<a href="https://kyzylorda-news.kz/">Kyzylorda-news.kz</a>. Өзбекстанның Ташкент қаласында ауыр атлетикадан 20 жасқа дейінгі жастар арасында өткен Әлем чемпионатында жерлесіміз Айсамал Сансызбаева алтын медаль жеңіп алды.
Ол 87 келіден жоғары салмақ дәрежесінде жеңіс тұғырына көтерілді. Айсамал қоссайыс қорытындысы бойынша 258 (113+145) келіні бағындырды.Айта кетейік, кеше ғана Сыр спортшысы Рахат Бекболат (175+202=377) Әлем чемпионы атанған болатын.Айсамал былтырғы жылы Ташкентте өткен Азия чемпионатында 2 мəрте алтын медаль алса, Перудің Лима қаласында жасөспірімдер арасындағы Әлем кубогының жеңімпазы атанған.
Айсамал Сансызбаева – Шиелі ауданының тумасы, қазіргі таңда Ж.Баһадүр атындағы олимпиадалық резервтің облыстық мамандандырылған мектеп-интернат-колледжде оқиды. Жаттықтырушылары – Арман Абдраев, Нұрсұлтан Бахрадин, Мұхаммед Тұрысбеков.

Қызылордалық зілтемірші Айсамал Сансызбаева әлем чемпионы атанды

<a href="https://kyzylorda-news.kz/">Kyzylorda-news.kz</a>. «Серіктес директорлар» лигасы аясында №140 Абылайхан атындағы орта мектеп ғылыми-әлеуметтік жобаларға бағытталған мектеп ретінде жаңа жобаларды жандандыратын болады. Білім ұясы оқушылар мен мұғалімдер үшін венчурлік әдісті енгізіп, инвестиция тарту жұмыстарын бастап кетті.
Мектеп «Жасыл ғаламшар» кіші жобасы аясында мектеп ауласынан «Green study» жылыжай ғылыми-зерттеу оқу орталығын іске қосты. Аумағы 200 шаршы метрді құрайтын жылыжайда қызанақ, қияр, шалқан өсіріледі. 
Венчурлық қадамнан түскен қаржыға мектеп әкімшілігі «Метеорология» тәжірибелік-зерттеу алаңын ашты. Мұнда оқушылар ғылыми бағыттағы ізденістерін дамытып, университет ғалымдарымен бірлесе жұмыс істеуге мүмкіндік береді.
Мұнан бөлек, мектепте «Global eco» жобасы қолға алынған. Мұнда оқушылар мен ұстаздардың бірлесіп экологиялық таза бұйымдардан көрме ұйымдастырды.
Мектептегі жаңа бастамалардың таныстырылымына қатысқан облыстық білім басқармасының басшысы Ақзира Қасымова әрбір жобаның маңызды екенін атап өтіп, оқушылардың ғылыми ізденіске бет бұруына ерекше мүмкіндік беретінін атап өтті.
Айта кетейік, ғылыми-әлеуметтік жобаларды қолға алған №140 мектептің тәжірибесі өзге мектептерге таратылады. Бұл ретте университет ғалымдарымен арнайы жоспар бекітілетін болады.
<img src="https://kyzylorda-news.kz/wp-content/uploads/2021/05/193169902_1129785027524701_3595760633800193375_n.jpg" alt="" />
<img src="https://kyzylorda-news.kz/wp-content/uploads/2021/05/193195026_1129785224191348_5621426676431578159_n.jpg" alt="" />

Қызылордада «Метеорология» тәжірибелік-зерттеу алаңы ашылды

<a href="https://kyzylorda-news.kz/">Kyzylorda-news.kz</a>. Қазалы ауданының диқандары биыл 6137 гектар жерге күріш екті. Қазіргі таңда күріштікті суға бастыру жұмыстары аяқталуға жақын қалды.
Аудан басшысы «Сыр маржаны» ЖШС, «Рза – Агро» ЖШС, «Ақмаржан» шаруа қожалығы, «Агро – Өркен» ЖШС, «Алшын» ЖШС, «Мерей» шаруа қожалығы, «Жанкент – Агро» ЖШС-ның егістік алқаптарын аралап, шаруалармен тілдесті.
Егістік басында шаруашылықтың басшылары аудан әкімі Мұхтар Оразбаевқа күріш егу барысымен таныстырып, Сырдария өзеніндегі су мәселесі алаңдататынын жеткізді.
Облыстық мәслихат депутаты, «Сыр маржаны» ЖШС директоры Мнажадин Өтеев әлі де су тапшылығы орын алып отырғанын айтып, өзінің ұсыныс-пікірлерін білдірді.
Аудан әкімі Мұхтар Оразбаев алдағы уақытта да аудан көлемінде атқарылып жатқан көктемгі дала жұмыстары мен күріштік алқаптарын суару жұмыстары күн тәртібінен түспей, бақылауда болатынын жеткізді.
Сондай-ай, орын алып отырған қиындықтардың алдын алу үшін тиісті сала басшыларына шұғыл шешімдер қабылдап, қатаң бақылауда ұстау жөнінде арнайы тапсырма берді.
<img src="https://kyzylorda-news.kz/wp-content/uploads/2021/05/193017772_2891543264452239_1127132627771293901_n.jpg" alt="" />

Қазалы ауданының диқандары биыл 6137 гектар жерге күріш екті

<a href="https://kyzylorda-news.kz/">Kyzylorda-news.kz</a>. Өткен жылы еліміздегі еріктілер өздерін нағыз батырлар ретінде көрсетті. Олардың ерлігі көпке үлгі болып, қиын кезде демеу бола білді. Тек жастар ғана емес, егде жастағылар да волонтер қатарына қосылды. Бүгінде елімізде «күміс волонтерлік» қозғалысы қарқын алуда. Негізгі мақсат – 50 жастан асқан адамдарды волонтерлік қызметке тарту.
<blockquote>
 «Қазіргі кезде 17 қалада «күміс волонтерлік» қозғалысы қарқын алуда. Бүгінде біздің облыстағы осы санаттағы волонтерлерге кәсіби мамандар дәріс оқып, халықаралық тренерлер тәжірибелерімен бөлісуде. Алдағы уақытта тақырыптық семинарлар мен кездесулер, жиындар өткізу жоспарлануда», – деді «Волонтеры Кызылорда» қайырымдылық қорының төрайымы Ольга Чебакова.
</blockquote>
Егде жастағы адамдар өз тәжірибелері мен білімдерін басқалармен бөлісуге ұмтылады. Олар барлық жобаларға белсенді қатысып, бір деңгейде қалмауға тырысады, үнемі қозғалыста болады. Мұндай шаралар оларға өздерін физикалық және психологиялық жағынан жақсы ұстауға көмектеседі.

Қызылордада «Күміс волонтерлік» қозғалысы дамуда

<a href="https://kyzylorda-news.kz/">Kyzylorda-news.kz</a>. Аккредиттеу және рейтинг тәуелсіз агенттігі өткізген ЖОО-ның Ұлттық рейтингісінде «Болашақ» университеті ТОП-20 енді. Университетте мамандар даярлауда 50 бакалавриат және 6 магистратура бойынша білім беру бағдарламалары арқылы жүзеге асырылады.
<blockquote>
 «Бүгінде университет 4963 студент білім алуда. Оның ішінде 139-ы грант негізінде оқыса, 23-і шетел азаматтары. Университетте 203 оқытушы-профессор қызмет етеді. Ресей Федерациясы, Өзбекстан, Швеция елдерінен профессорлар дәріс оқиды. Бұл биылғы оқу жылының бір ерекшелігі десек болады. Сондай-ақ, 150 студентке жеңілдіктер тағайындалды. Атап айтсақ, көпбалалы отбасылардан шыққан, бір отбасынан екі студент оқыған жағдайда, ата-анасынан айрылған студенттерге, біздің колледждерді бітірген, белсенді және түрлі жетістіктері бар студенттерге жеңілдік берілді. Бүгінде ғылыми-зерттеу институтының құрамында кафедралар жанынан құралған 1 лаборатория және 4 ғылыми орталық бар. Университет жылыжайы көлемі биылғы оқу жылында 2 есеге ұлғайды», – деді «Болашақ» университетінің ректоры Қуаныш Дәуренбеков.
</blockquote>
Қазіргі уақытта университеттің материалдық-техникалық базасы жыл сайын қарқынды дамуда. Биыл заманауи 378 орындық жаңа жатақхана және 2260 шаршы метрді құрайтын спорттық секциялар ұйымдастыруға арналған спорткешен құрылысы аяқталып, қолданысқа берілді. Бүгінде 400 орындық екінші жатақхана, 1100 орындық «Болашақ» конгрессхол құрылысы, типтік ашық стадион құрылысы басталды. Сонымен қатар, келесі жылы оқытушы профессорлар үйі, дендропарк, медициналық клиника, жағалаудағы ашық аспан астындағы атриум, кинотеатр, бизнес инкубаторды жүзеге асырылады. Ал білім алушылардың ғылыми зерттеу жұмыстарын жүргізуге арналған технопарк, университет жанындағы зияткерлік мектеп, жастар кешені құрылысын салу жоспарлануда.

«Болашақ» университеті үздіктер қатарында

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова «Интергаз Орталық Азия» АҚ Бас директорының бірінші орынбасары Бақтияр Ізбасаровпен кездесті. Кездесуде аймақ басшысы «ҚазТрансГаз Аймақ» АҚ Қызылорда өндірістік филиалының директоры Талғат Қызылбаевтың өзге қызметке ауысуына байланысты жаңа жұмысына сәттілік тілеп, «Алғыс хатпен» марапаттады. Оның орнына тағайындалған Шәкір Кәрібаевқа аймақты газдандыру жұмысын одан әрі жандандыратынына сенім білдірді.
Кездесуде өңір басшысы «Интергаз Орталық Азия» АҚ Бас директорының бірінші орынбасары Бақтияр Ізбасаровқа 3 мәселеге назар аударуды сұрады.
<blockquote>
 «Бүгінгі таңда тұтынушылардың «ҚазТрансГаз Аймақ» алдындағы берешегі шамамен 1,5 млрд.теңгені құрайды, оларды жазғы кезеңде азайтқан абзал. Осы мәселені шешудің бірі ретінде газ үшін төлем жүйесін облыстың «Бірыңғай төлем құжатына» енгізу қажет деп есептеймін. Аймақтың коммуналдық меншігінде жалпы құны 17 млрд. теңгеге 28 жоба бойынша газбен жабдықтау объектілері бар. Алдағы уақытта объектіні пайдаланушы ұйымның балансына беруді уақтылы ұйымдастыру қажет. Биылғы жылы Жосалы мен Жалағаш кенттерін газға қосамыз. Осы жұмыстардың мерзімінінде жүйелі орындалуына бірге атсалысайық», – деді облыс әкімі Гүлшара Әбдіқалықова.
</blockquote>
Аймақ басшысы айтқан мәселелерге қатысты «Интергаз Орталық Азия» АҚ Бас директорының бірінші орынбасары Бақтияр Ізбасаров алдағы уақытта бірлесе жұмыс жасайтындығын жеткізді.
<blockquote>
 «Сіз айтқан мәселелердің барлығы Қызылорда өңірі үшін аса маңызды екенін түсінеміз. Алғашқы мәселені Шәкір Болатұлы қолға алып, газ үшін төлем жүйесін облыстың «Бірыңғай төлем құжатына» енгізуге күш салады. Сіздермен ынтымақтаса отырып, қалған екі мәселенің де жедел шешілуіне барынша қолдау көрсететін боламыз», – деді «Интергаз Орталық Азия» АҚ Бас директорының бірінші орынбасары Бақтияр Ізбасаров.
</blockquote>

Гүлшара Әбдіқалықова «Интергаз Орталық Азия» АҚ Бас директорының бірінші орынбасарымен кездесті

<a href="https://kyzylorda-news.kz/">Kyzylorda-news.kz</a>. Қызылордада 31 мамыр – «Саяси қуғын-сүргін құрбандарын еске алу күні» аясында «Қазақ зиялылары және зұламат жылдар» атты дөңгелек үстел өтті. Дөңгелек үстелге облысқа белгілі зиялы қауым өкілдері, тарихшылар және кітапхана ұжымы мен оқырмандары қатысты.
Шараның модераторы облыстық ішкі саясат басқармасы “Рухани жаңғыру орталығы” коммуналдық мемлекеттік мекемесінің директоры Уалихан Ибраев ұлттық тарихта ақтандық аталған нәубетті жылдары турасында сөз қозғап, ҚР Президенті Қ.Тоқаевтың «Саяси қуғын-сүргін құрбандарын толық ақтау жөніндегі мемлекеттік комиссия туралы» 2020 жылғы 24 қарашадағы №456 Жарлығын және ҚР Мемлекеттік хатшысы Қ.Көшербаевтың төрағалығымен өткен Саяси қуғын-сүргін құрбандарын толық ақтау жөніндегі Мемлекеттік комиссияның бірінші отырысының хаттамасының 7-тармағын орындау мақсатында, 2021 жылғы 20 қаңтарында облыс әкімінің «Саяси қуғын-сүргін құрбандарын ақтау жөніндегі өңірлік комиссияны құру туралы» №185 Қаулысы бекітілгендігі жөнінде баяндады.
Жиын барысында Қазақстанның еңбек сіңірген қайраткері Ержан Уайс тарихтан сыр шертіп, кейінгі жастарға сабақ болар мағлұматтарымен бөлісті. Әсіресе Уайс Үбәйдәұлы қазақ зиялыларының өмірі жайлы, бойындағы қасиеттері төңірегінде тарихи мәліметтерді баяндап, қатысушылардың тақырыпқа байланысты қызығушылығын күшейтті.
Сонымен қатар жиынға қатысқан Қорқыт Ата атындағы Қызылорда университетінің «Тарих және Қазақстан халқы Ассамблеясы» кафедрасының меңгерушісі, тарих ғылымдарының кандидаты Оразбақов Айтжан Жұмабайұлы өз зерттеулеріндегі тың еңбектерімен бөлісіп, зұлмат жылдарындағы еркілерінен тыс жер аударылған бауырлас өзге ұлт өкілдері жайлы жаңа деректер ұсынды.
<blockquote>
 «Өздері еңсесін тіктей алмай отырған қазақ халқының өзге ұлт өкілдерінің кеудесінен қақпай, керісінше, оларға жасаған қамқорлығын, ерлікпен пара-пар батыл қадамдарын тарихи деректермен ұштастырды. Ел зиялыларының ерлігін баяндады», – деді Айтжан Оразбақов.
</blockquote>
Дөңгелек үстелге қатысқандардың ішінде облысқа белгілі Қорқыт Ата атындағы Қызылорда университетінің аға оқытушысы, магистр Бақытжан Ахметбек өңірдегі XX ғасырдың бас кезіндегі орын алған көтерілістер жайында баяндап, сол дәуірдегі батырлардың есімдерімен бөлісті және “Болашақ”университетінің жоғарыколледжі оқытушысы Қанат Қыпшақбаев тұшымды пірілерін, орамды ойларын ортаға салып, тарихшылар мен әдебиетшілердің зұлмат жылдар жөніндегі қазіргі көзқарастары жөнінде ойларын айтып, тарихты оқыту процесіндегі әдістердің жаңа тұстарына тоқтады.
Дөңгелек үстел барысында орталық директоры Уалихан Серікұлы шараны қорытындылай келе, Елбасы Нұрсұлтан Әбішұлы Назарбаевтың «Тарих өткеннің сабағы. Біз өткенімізге қарап, ертеңімізді түзеуіміз керек» деген сындарлы сөзін айтып, тарихи сананы жаңғыртуға, ұлттық рухтың өрлеуіне жол ашатынын баяндады. Бұл шараның мақсаты жастарға тарихты бүкпесіз жеткізіп, жас ұрпақ жадына егемендіктің оңай келмегендігін дәріптеу болды.

Айтжан Оразбақов: Еңсесін тіктей алмай отырған қазақ өзге ұлт өкілдерінің кеудесінен қақпады

<a href="https://kyzylorda-news.kz/">Kyzylorda-news.kz</a>. Биыл «Шиелісушар» өндірістік учаскесіне Сырдария өзенінен 539 млн м3, ал таза егіске 444 млн м3 лимит берілді. Осы бөлінген лимит негізінде Шиелі ауданы бойынша 12037 гектар күріш дақылын егу жоспарлануда. Бұл туралы Өңірлік коммуникациялар қызметінің ақпарат алаңында Шиелі ауданы әкімінің орынбасары Ерсұлтан Апетов мәлімдеді.
<blockquote>
 «Биыл ауданда 30 246 гектар жерге ауыл шаруашылығы дақылдарын орналастыру межеленген. Негізгі күріштің үлесі 12037 гектар. Су шаруашылығы нысандарын дайындау жоспары жасалынған. Биыл 0-2 және Р-12 каналдарын қазу жұмыстары аяқталды. 15 сәуірден бастап Жаңа Шиелі магистралды каналына су жіберілді. Қазіргі таңда Сырдария өзенінің Шиелі ауданы тұсындағы су деңгейі 158,18 см-ге тең», – деді Шиелі ауданы әкімінің орынбасары Ерсұлтан Апетов.
</blockquote>
Жалпы аудан шаруашылықтарына түсіндірме жұмыстары жүргізілді. Нәтижесінде ауданда егін шаруашылын әртараптандыру жұмыстарына басымдық беріліп, 95 гектар жерге бақша дақылдарын тамшылатып суару әдісімен егілді.
<blockquote>
 «Бүгінгі мәлімет бойынша, Шардара су қоймасына секундына 96,3 текше метр су түсуде. Бұл өткен жылдың осы кезеңімен салыстырғанда 37,7 текше метрге кем. Қоймадағы су көлемі 4120 млн текше метр, өткен жылдан 542 млн текше метрге кем. Ал қоймадан төменге секундына 250 текше метр су жіберілуде, бұл өткен жылдан 50 текше метрге кем», – деді облыстық табиғи ресурстар және табиғат пайдалануды реттеу басқармасы басшысының орынбасары Бауыржан Оспанов.
</blockquote>
Бүгінгі күні Жаңа Шиелі магистралді каналы бойында орналасқан егіс алқаптарын суармалы сумен қамтамасыз ету тұрақты жүргізілуде. Жоспар бойынша 52,8 м3/сек су алу қажет болса, нақты алып жатқаны 54 м3/сек құрап отыр.
<blockquote>
 «Жаңа Шиелі магистралді каналының ПК-85 бекетінен бастау алатын О-2 каналының Р-8 тармағынан су алатын Ақмая ш/қ су деңгейі жетіспеушілігінен 67 гектар егіс алқабын қысқартты. Қазір 2 дана насос қондырғысын орнатылған. Сол сияқты Р-12 каналы бойындағы Бестам елі ш/қ Р-12-7 каналына 1 дана насос қондырғысын орнатып су тарту жұмыстарын жүргізуде. Сондай-ақ, Қамыстықақ каналы 8 м3/сек су алып отыр. Канал бойында су тапшылығы жағдайына байланысты «Байдалиев» ш/қ 2 дана насос қондырғысын орнатып К-4 қашыртқысынан су тартуда», – деді «Қазсушар» РМК Қызылорда филиалының су шаруашылығы нысандарын пайдалану бөлімінің басшысы Айдос Асанбаев.
</blockquote>

Шиелілік шаруаларға лимит бойынша су беріледі

<a href="https://kyzylorda-news.kz/">Kyzylorda-news.kz</a>. “Қазгидромет”” синоптиктері 1-3 маусым аралығында ауа райы қандай болатынын айтты.
<blockquote>
 “Ауқымды циклон республиканың көп бөлігінде тұрақсыз ауа райын тудырады, найзағай күтіледі. 2 маусымда күндіз батыста, 3 маусымда республиканың солтүстігінде қатты жаңбыр, бұршақ жауып, жел күшеюі мүмкін”, – делінген “Қазгидромет” хабарламасында.
</blockquote>
Республиканың солтүстік өңірінде солтүстік-батыс антициклоны сілемінің әсерінен түнде плюс 11-16, кей жерлерде 8 градус жылы болады. Күндіз плюс 21-26, кей жерде 18 градус жылы болады деп болжанады.

1-3 маусым аралығында ауа райы қандай болады?

<a href="https://kyzylorda-news.kz/">Kyzylorda-news.kz</a>. Тараз қаласында Қажымұқан Мұңайтпасұлының 150 жылдығына арналған қазақ күресінен ересектер арасында өткен Қазақстан Республикасының кубогында Қызылорда облысының спортшылары жалпы командалық есепте қола медальға ие болды.
Ел кубогында Сыр балуандары 10 медальды облыс қоржынына салса, Мақсат Исағабылов “Түйе палуан” сайысының қола жүлдегері атанды.
Жекелей есепте ұлдар арасында Серікболсын Шарипов (55 келі) екінші, Нұршат Әбілтаев (60 келі), Еңбек Сақтағанов (90 келі) және Мақсат Исағабылов (+100 келі) үшінші орындарды еншіледі.
Қыздар арасында 77 келі салмақта Меруерт Құдайбергенова Қазақстан кубогының жеңімпазы атанса, Мунира Рахымжанова (48 келі), Бибіхан Нәбиева (52 келі), Гүлзат Уринбаева (65 келі), Мереке Әбубәкірова (+77 келі) қола жүлделерге қол жеткізді.
Қазақ күресінен облыстың аға жаттықтырушысы Болат Кенеевтің айтуынша, облыс құрамасы 16-20 маусым аралығында Нұр-Сұлтан қаласында өтетін Қазақстан чемпионатына дайындалады. 
Сондай-ақ, 4 шілде күні Нұр-Сұлтан қаласында ҚР Тұңғыш Президенті жүлдесі үшін өтетін «Қазақстан Барысы» республикалық турниріне Нұрым Сəлімгереев пен Мақсат Исағабылов қатысады.

Мақсат Исағабылов «Түйе палуан» сайысының қола жүлдегері

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықованың қатысуымен ашаршылық және саяси қуғын-сүргін құрбандарына арналған мемориалды ескерткіште митинг өтті.
Шара 31 мамыр – Ашаршылық және саяси қуғын сүргін құрбандарын еске алу күніне арнайы ұйымдастырылды. Митингке облыстық мәслихатының хатшысы Наурызбай Байқадамов, қала әкімі Ғанибек Қазантаев, облыстық ардагерлер кеңесінің төрағасы Серік Дүйсенбаев, ҚМДБ-ның Қызылорда облысы бойынша өкілі, «Ақмешіт-Сырдария» мешітінің Бас имамы Болатбек Абуов және мемлекеттік орган өкілдері қатысты.
Аймақ басшысы Сыр жұртшылығы атынан ескерткішке «Тағзым гүлін» қойып, шараға қатысушылар құрбандар рухына бас иді. Бас имам құран бағыштады.
Ашаршылық кезеңін зерттеушілердің мәліметтеріне сәйкес, тоталитарлық жүйе жүргізген саясаттың салдарынан облыс бойынша 4038 отбасы қуғынға ұшырап, 1153 адам атылған екен.
<img src="https://kyzylorda-news.kz/wp-content/uploads/2021/05/194260202_3412425085527203_8917351614415668117_n.jpg" alt="" />
<img src="https://kyzylorda-news.kz/wp-content/uploads/2021/05/192879824_3412425428860502_8169272149851086120_n.jpg" alt="" />
<img src="https://kyzylorda-news.kz/wp-content/uploads/2021/05/192805442_3412425558860489_5262777346633158008_n.jpg" alt="" />

Ашаршылық және саяси қуғын-сүргін құрбандарын еске алу күніне арналған митинг өтті

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова Саяси қуғын-сүргін және ашаршылық құрбандарын еске алу күніне орай үндеу жариялады.
Бүгін – Қазақ елі үшін, қазақстандықтар үшін қасіретті де азалы күн. 
«Қаратаудың басынан көш келеді, көшкен сайын бір тайлақ бос келеді» деп зар жылаған санғасырлық тарихы бар халқымыздың басынан талай зұлмат жылдар өткені белгілі.
Соның ішінде, ХХ ғасырдағы саяси қуғын-сүргін мен ашаршылық – миллиондаған жазықсыз адамдардың қаны мен көзінің жасына суарылған тарихымыздың шерлі беттері.
Тұңғыш Президентіміз – Елбасы Нұрсұлтан Әбішұлы Назарбаевтың 1997 жылғы Жарлығымен бұл күн «Саяси қуғын-сүргін және ашаршылық құрбандарын еске алу» күні болып бекітілді.
Кеңестік тоталитарлық жүйе Алаш зиялыларын қуғын-сүргінге ұшырату арқылы қазақ халқының ұлттық тәуелсіздікке деген арман-мақсатына тұсау салды. 1922 жылдан бастап алашордашыларды қудалау саясаты ашық түрде жүргізілді. Кеңестік солақай саясат озық ойлы, білімді, ел қамын ойлаған азаматтардан құтылудың жолдарын қарастыра бастады. Осындай құрбан болғандар арасында қасиетті Сыр топырағының перзенттері де болды.
Ал, адамзат тарихындағы ең қасіретті 1932-1933 жылдардағы ашаршылықтың азабын қаншама отбасы тартты. «Асыра сілтеу болмасын, аша тұяқ қалмасын» деген ұранмен, зорлықпен жұрттың мал-мүлкі тартып алынды. Мәселен, 1929 жылы Қазақстанда 40 млн. бас мал болса, айналасы үш-төрт жылда төрт түліктің саны 10 есеге азайып 4 млн. құраған.
Аштыққа төтеп бере алмаған халық Қытай, Моңғолия, Иран, Өзбекстан, Қырғызстанға амалсыз қоныс аударды. Қолдан ұйымдастырылған ашаршылықтың кесірінен Қазақстанда 3 млннан астам халық құрбан болды. Тарихи деректер зұлмат жылдары Кеңестер Одағына қарасты 15 одақтас республика арасында ең көп халық шығыны Қазақстанда болғандығын көрсетеді.
Жеті жұртқа мекен болған Сыр өңірін қуғын-сүргін кезінде Қиыр Шығыстан корейлер, Еділ бойынан немістер, Солтүстік Кавказдан қарашай-балқарлар, шешен-ингуштар, қырым татарлары мен месхет-түріктері паналады. Қазақ халқы оларды жатсынбай, дархан көңілін білдіріп, құшағын айқара ашты. Сыр өңірі оларға туған үйі бола білді.
Бұл – адамзат тарихындағы аса қасіретті кезеңдер еді. 
Тәуелсіздіктің арқасында барымызды бүтіндеп, жоғымызды түгендеп жатырмыз. Кезінде жалған жаламен қараланған, жазықсыз жапа шеккен есіл ерлер есімдері ақталып, ортамызға оралды. 
Былтыр ел Президенті Қасым-Жомарт Кемелұлы Тоқаевтың Жарлығымен Саяси қуғын-сүргін құрбандарын толық ақтау жөніндегі мемлекеттік комиссия құрылып, өз жұмысын бастады. Соған сәйкес өңірлерде де облыстық комиссиялар құрылып, құрамына тарихшы ғалымдар, тарихтың ақтаңдақ беттерін зерттеушілер енгізілді.
Тарихымыздың қасіретті беттері, саяси қуғын-сүргін және ашаршылық құрбандары 
әрқашан біздің жадымызда. Оларды әрдайым еске алып, ұмытпау – біздің қасиетті борышымыз. 
Енді елімізде бұндай қасірет орын алмасын деп тілейміз! 
Еліміз тыныш, халқымыз аман, Тәуелсіздігіміздің тұғыры нық, ғұмыры мәңгі болсын!

Қазақстан және Қызылорда облысының жаңалықтары