<a href="https://kyzylorda-news.kz/">Kyzylorda-news.kz</a>&nbsp; Оқушылар арасында қала бойынша 1 462 бала үйде, 110 бала ауруханада ем қабылдап жатыр.
Алматыда бірінші қыркүйектен бері 89 бала коронавирус инфекциясын жұқтырды. Оның барлығы мектепте емес, отбасы ішінде вирусқа шалдыққан. Бұл туралы қаланың бас санитар дәрігері Жандарбек Бекшин мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>&nbsp;.
“Бірінші қыркүйектен бастап қалада офлайн оқып жатқан 89 оқушы коронавирус инфекциясын жұқтырды. Бұл 62 мектепте болған жағдай. Олар оқыған сыныптар карантинге жіберілді. Себебі бір адамнан инфекция табылса, мектеп емес, сынып карантинге жіберіледі. Сабақ онлайн режимде өтеді. Ал олардың 99%-і мектепте емес, отбасы ішінде жақындарынан инфекция жұқтырған”, – деді Жандарбек Бекшин.
Ал студенттер арасында 6 науқас, 17 байланыста болған адам анықталды. Олар арнайы дайындалған емханаға жатқызылды. Ауру жеңіл түрде өтті.
Соған байланысты қаланың бас санитар дәрігері ата-аналардан барлық санитарлық талапты сақтауды сұрады.
Айта кетері, Алматыда коронавирус жұқтырғандар арасында 31,2%-і 20-39 жас аралығындағы азаматтар, 24%-і – 40-59 жас аралығындағы азаматтар, 23%-і – 60 және одан жоғары жастағы қарт адамдар.

Бірінші қыркүйектен бері 89 бала коронавирус жұқтырды

<a href="https://kyzylorda-news.kz/">Kyzylorda-news.kz</a>&nbsp; Журналистердің ынтымағы кәсіби тұрғыда орнаған. Ұлттық, әлеуметтік мәселелерде ортақ көзқарас қалыптасқан деп “Сыр медиа” ЖШС бас директорының орынбасары Дәурен Омаров өз пікірін білдірді.
<blockquote>
 «Бүгінде ақпарат кеңістігі кеңейді. Оқырман талғамынан шығу басты назарда. Журналистердің талабы шынайы ақпарат тарату. Бұл үдеден шығып та келеміз. 
 Бүгінде халық ақпарат пен қоса талдап, зерделенген мәселерді іздеп жүріп оқитын болды. Оқырманның сұранысы сараптамалық жарияланымда екені дәлелденіп келеді. Сондықтан, биылдан бастап біздің басылымдардағы тілшілерімізге сараптамаға аса ден қоюды талап етіп отырмыз. Әрі бұл баспасөздің өміршеңдігін білдіреді. 
 Расында, Сыр өңірінің жорналшылар арасында ынтымақ пен бірлік орнаған. Әсіресе кәсіби тұрғыда. «Сыр Медиа» ЖШС ұжымы өзге де аймақтық медиа құрылымдармен ынтымақтық байланысты берік орнатып жүр. Оңтүстік өңірлердегі «Түркістан Медиа Холдинг», «Әулие Ата Медиа» ЖШС, Батыс Қазақстан облысындағы «Жайық Пресс», және тағы басқа ірі баспасөз құралдары арасында меморандумға қол қойып, бүгінде түрлі тәжірибе алмасулар өткізіп келемдіз. Бұл біздің жас әріптестеріміз үшін де үлкен мектеп. 
 Жалпы, облыстағы барлық әріптестеріміздің ұлттық мәселеде, тіл, тарих жайында көзқарастары ортақ. Осы турасында кез келген сәтте бірігіп, шешуге ат салысамыз. Дегенмен, саяси мәселенің кейбір тұстарында қалыс қалатынымыз жасырын емес. Пікір тоғыспай қалатыны заңдылық», – деді Дәурен Сейітжанұлы.
</blockquote>
Айта кету керек, «Сыр Медиа» ЖШС жас тілшілерді даярлауда да үлестерін қосуда. Осыған орай, 2018 жылы «Сыр Медиа» академиясы құрылды. Мақсаты – жас журналистерді тарту, қалам тербеуге қызығушылық танытып жүрген оқушыларды тәрбиелеу. Бүгінде академия қабырғасында майталман журналистер, әлеуметтік желіде белсенді блоггерлермен өзекті тақырыптарда семинарлар ұйымдастырылуда.

Дәурен Омаров: Ұлттық мәселеде сыр журналистерінің көзқарасы ортақ

<a href="https://kyzylorda-news.kz/">Kyzylorda-news.kz</a>&nbsp; Егу науқанын жүргізу үшін 2,5 млн доза вакцина сатып алынды. Бұл туралы Денсаулық сақтау бірінші вице-министрі Марат Шоранов мәлімдеді.
Мемлекеттік бюджет қаражаты есебінен медицина қызметкерлері, медициналық ұйымдарда диспансерлік есепте тұрған балалар, жетім балалар мен ата-анасының қамқорлығынсыз қалған балаларға арналған білім беру ұйымдарының, сәбилер үйлерінің балалары вакцина алады. Бұдан басқа, вакцинация жұмыс берушілердің қаражаты және халықтың жеке қаражаты есебінен жүргізілетін болады.

15 қыркүйектен бастап Қазақстанда халықты тұмауға қарсы егу басталады

<a href="https://kyzylorda-news.kz/">Kyzylorda-news.kz</a> Қызылорда қалалық полиция басқармасының қызметкерлері есірткі еккендерге қарсы іс-қимыл шараларын күшейтуде.
Қала аумағына қарасты орталықтарда рейд жүргізіп, есірткімен айналысқан, оны сатып және тасымалдаған құқық бұзушыларға қатысты «Қарасора–2021»жедел профилактикалық іс – шарасын жүргізуде.
Мәселен ағымдағы жылдың 4 қыркүйегінде үйінің ауласында есірткі тектес сора өсімдігін өсірген 62 жастағы қала тұрғынын ұсталып, уақытша ұстау изоляторына қамалды.
Күдіктінің ауласынан 105 түп сора өсімдігін тауып, айғақ зат ретінде тәркіледі. Сараптама тағайындалды. Қорытындыға сәйкес алынған түптер 141,853 гр сора есірткісі болып шықты.
<blockquote>
 «Аталған жәйтсотқа дейінгі тергеп-тексерудің бірыңғай тізіліміне енгізіліп, Қазақстан Республикасының Қылмыстық Кодексінің 300-бабы 2 – бөлігімен (Құрамында есірткі заттар бар, өсіруге тыйым салынған өсімдіктерді заңсыз егіп-өсіру) қылмыстық іс қозғалды. Қазіргі таңда осы іс бойынша тергеп-тексеру амалдары жүргізілуде», – делінген полиция департаментінің таратқан хабарламасында.
</blockquote>

Қызылордада 105 түп сора өсімдігін еккен қала тұрғыны ұсталды

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы әкімі аппараты басшысының бұйрығымен облыс әкімі аппараты басшысының орынбасары қызметіне Бәкіров Ерлан Әмірханұлы тағайындалды.
Ерлан Бәкіров 1984 жылы туылған. Қазақ гуманитарлық заң университеті мен Болашақ университетін заңгер, экономист мамандығы бойынша бітірген.
Еңбек жолын 2004-2005 жылдары «Раим» ЖШС-де заңгер болып бастаған. 2005-2006 жылдар аралығында Қызылорда облысының табиғи монополиялардың қызметін реттеу және бәсекелестікті қорғау департаментінің жетекші маманы.
2006-2016 жылдары Қызылорда облысы әкімі аппаратының мемлекеттік-құқықтық жұмыстар бөлімінің жетекші маманы, бас инспекторы, кадр жұмысы бөлімінің басшысы.
2016-2020 жылдары Қызылорда облысының жұмылдыру дайындығы басқармасы басшысының орынбасары, 2020 жылғы маусым айынан бастап осы кезге дейін Жалағаш ауданы әкімінің орынбасары қызметін атқарды.
<img src="https://kyzylorda-news.kz/wp-content/uploads/2021/09/sajtqa-7-e1631168655477.jpg" alt="" />

Облыс әкімі аппаратында кадрлық өзгеріс бар

<a href="https://kyzylorda-news.kz/">Kyzylorda-news.kz</a> Бас мемлекеттік санитариялық дәрігердің “Қазақстан Республикасының халқы арасында коронавирустық инфекция ауруының алдын алу жөніндегі шараларды одан әрі күшейту туралы” 2021 жылғы 2 қыркүйектегі №38 Қаулысына сәйкес осы аптада еліміздің барлық мешіттері ауласында жұма намазын оқуға рұқсат берілді.
Осыған дейін ҚМДБ-ға қарасты 19 өкілдіктің бесеуінде ғана жұма намазын оқу уақытша тоқтатылған болатын. Жаңа қаулыға сәйкес енді еліміздің барлық өңірінде жұма намазы мешіт ауласында оқылады.
<blockquote>
 “Мешіттер, православие шіркеулері және басқа да діни объектілер аумағында ұжымдық діни іс-шараларды (оның ішінде “жұма намазы”, күнделікті православиелік дұғалар және басқаларын) ашық ауада өткізу маска режимі мен бір адамға кемінде 4 метр есебінен әлеуметтік қашықтық сақталған кезде жүзеге асырылады”, –&nbsp;делінген қаулыда.
</blockquote>
Қаулыда шектеу іс-шараларын, оның ішінде карантинді енгізу кезеңінде діни объектілердегі санитариялық-дезинфекциялық режимге қойылатын талаптар да көрсетілген. Атап айтқанда, мешіттерде бір рет қолданылатын медициналық маскалардың жеткілікті қорымен, сондай-ақ қолды өңдеуге арналған дезинфекциялық сулықтармен, тері антисептиктерімен, дезинфекциялау құралдарымен қамтамасыз етуді ұйымдастыру, діни объектілерде персонал мен діни қызметшілердің маскалар киюін қамтамасыз ету міндеттелген.
Сондай-ақ ғибадат үйлеріне (құрылыстарына) кіруге міндетті түрде маска болған жағдайда рұқсат етіледі. Ғибадат үйлерінде намаз оқу бір адамға 4 метрден кем емес есеппен қашықтықты сақтау кезінде жүзеге асырылады.

Барлық мешіттерінің ауласында жұма намазын оқуға рұқсат берілді

<a href="https://kyzylorda-news.kz/">Kyzylorda-news.kz</a> Облыс әкімі Гүлшара Әбдіқалықованың қатысуымен Достық үйінде Қызылорда облыстық ардагерлер ұйымының кезекті VIII конференциясы өтті. Жиынға облыс әкімінің орынбасары Серік Ахмет, бірқатар басқарма басшылары, делегат мүшелері мен сала ардагерлері, қоғамдық ұйымдардың басшылары және онлайн ZOOM платформасы арқылы қала, аудан әкімдері мен аймақтардан сайланған делегация мүшелері қатысты.
Конференцияда 3 мәселе қаралып, бірқатар ұсыныстар енді. Ең әуелі облыстық ардагерлер кеңесінің төрағасы Серік Дүйсенбаев ұйымның 2016 жылдан бергі атқарған есебін тізбектеп, ардагерлер ұйымын одан әрі дамытуды көздейтін негізгі міндеттерді саралап өтті. Ал, тексеру комиссиясының мүшесі Серік Сыздықов ұйым шеңберінде атқарылған жұмыстардың есебін берді.
Жиын барысында облыстық ардагерлер ұйымы мен тексеру комиссиясының мүшелері және Республикалық VIII съезіне қатысатын делегаттар сайланды.
Алқалы жиында ардагерлер тарапынан Мемлекет басшысының жаңа Жолдауында көзделген басым бағыттарға қолдау білдіру, ортақ іске бірігу сынды пікірлер қозғалды. Сонымен бірге Ардагерлер ұйымына біріккен жанашыр азаматтардың ұлтты ұйыстыру ісінде ерекше рөл атқаратыны жан-жақты айтылды. Еңбек ардагері Шахизат Төребаев, Қазалы ауданының еңбек ардагері Құбыл Ршымбетов, облыстық ардагерлер кеңесінің Алқа мүшесі Нажмаддин Мұсабаев пен Шиелі аудандық ардагерлер кеңесінің Алқа мүшесі Айжамал Әбдіғамитқызы жарыссөзге шығып, ашық пікірлерін білдіріп, келелі ұсыныстарын жеткізді. Сонымен бірге еңбек ардагері Биғали Қаюпов пен ардагер-журналист Ержан Уайс мазмұнды ойларын ортаға салды. Делегация мүшелері тарапынан облыстық ардагерлер кеңесінің есепті кезеңдегі жұмысы лайықты бағаланды.
Басқосуда облыс әкімі Гүлшара Әбдіқалықова ардагерлер ұйымының қоғамдағы орны мен аймақ дамуы жолындағы елеулі еңбектерін атап өтіп, қажыр-қайратымен өңірді өркендетуге үлес қосып жүрген ардагерлерге Сыр жұртшылығы атынан алғыс білдірді.
<blockquote>
 «Бүгінгі онлайн конференцияның ел Тәуелсіздігінің 30 жылдық мерейтойы аясында өтуінің үлкен символикалық мәні бар. Егемендігіміздің бастауында тұрған Елбасы Нұрсұлтан Әбшіұлы Назарбаевпен бірге өздеріңіздей ел ағалары, ардагерлеріміз мемлекетіміздің, Сыр өңірінің аяғынан тұрып, нығаюына зор үлес қосты. 
 Президентіміз Қасым-Жомарт Кемелұлы Тоқаевтың «Халық бірлігі және жүйелі реформалар – ел өркендеуінің берік» негізі атты жаңа Жолдауында 7 мәселеге негізгі басымдық берілгенін білесіздер. Бұл бағыттардың барлығы да өте маңызды. Соның ішінде сапалы білім беру, өңірлік саясатты жетілдіру, саяси жаңғыру және адам құқығын қорғау, ұлтты ұйыстырудағы іргелі істерде ардагерлеріміз, ақсақалдарымыз белсенділік көрсетуі қажет. Сондықтан, мұндай басқосудың өтуі бәріміз үшін де тиімді екені рас», – деді Гүлшара Әбдіқалықова.
</blockquote>
Конференцияда барлық деңгейдегі ардагерлер ұйымдарының алдағы атқаратын жұмыстары мен міндеттері айқындалып, ұсыныстар тыңдалды. Шарада Биғали Қаюповтың ұсынысымен қоғам қайраткері, абыз ақсақал Сейілбек Шаухамановтың ел игілігі жолындағы еңбегіне деген ерекше құрмет білдіру мақсатымен жиынға жиналғандар бір минут үнсіздікпен еске алды.
Конференцияда делегат мүшелеріне облыстық ардагерлер кеңесі төрағасын сайлау мүмкіндігі беріліп, ардагерлер бірауыздан Серік Дүйсенбаевтың кандидатурасын қолдады. Сондай-ақ, облыстық ардагерлер кеңесінің жаңа Алқа құрамы мен тұрақты комиссия мүшелері бекітілді.
Басқосуды қорытындылаған аймақ басшысы қоғамдық жұмыстарда белсенділік танытып, өңірдің дамуына үлес қосқан бірқатар ардагерлерді марапаттап, ілтипат танытты. Қазалы аудандық ардагерлер кеңесінің төрағасы Оразғали Бекпанов, ардагерлер кеңесі төрағасының орынбасары Күлай Ермағамбетова, еңбек ардагерлері Әбдіғаппар Әмірғалиев пен Нұрлыбай Ұлықпанұлы және Шиелі аудандық әйелдер қоғамының төрайымы Нәйля Палымбет облыс әкімінің Алғысын иеленіп, құрмет төрінен көрінді.
Айта кетейік, өңірде 75 мыңға жуық ардагер ұйымға мүше. Олар 728 бастауыш ардагерлер ұйымына біріккен.
<img src="https://kyzylorda-news.kz/wp-content/uploads/2021/09/241629530_3689225981180444_1331124743979529297_n.jpg" alt="" />
<img src="https://kyzylorda-news.kz/wp-content/uploads/2021/09/241633700_3689226034513772_4048613924564106999_n.jpg" alt="" />
<img src="https://kyzylorda-news.kz/wp-content/uploads/2021/09/241665835_3689226004513775_2410479433198703234_n.jpg" alt="" />
<img src="https://kyzylorda-news.kz/wp-content/uploads/2021/09/241636723_3689226047847104_7151184748350665545_n.jpg" alt="" />

Қызылорда облыстық ардагерлер ұйымының кезекті VIII конференциясы өтті

<a href="https://kyzylorda-news.kz/">Kyzylorda-news.kz</a>&nbsp; Қазақстанда өткен тәулікте 6926 адам коронавирус инфекциясынан жазылып шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 890,
Алматы қаласы – 1410,
Шымкент қаласы – 143,
Ақмола облысы – 263,
Ақтөбе облысы – 1033,
Алматы облысы – 237,
Атырау облысы – 696,
Шығыс Қазақстан облысы – 125,
Жамбыл облысы – 416,
Батыс Қазақстан облысы – 127,
Қарағанды облысы – 658,
Қостанай облысы – 182,
Қызылорда облысы – 94,
Маңғыстау облысы – 268,
Павлодар облысы – 341,
Солтүстік Қазақстан облысы – 22,
Түркістан облысы – 21.
Қазақстан бойынша жазылғандар саны – 741809.

COVID-19: Қызылордада 94 адам жазылып шықты

<a href="https://kyzylorda-news.kz/">Kyzylorda-news.kz</a> Мемлекет басшысы Қазақстанның Ауғанстандағы ахуалға қатысты қабылдаған шешімдері жайлы айтты. Бұл туралы Президенттің әлеуметтік желідегі парақшасында <a href="https://www.instagram.com/p/CTkirk1sJny/?utm_medium=share_sheet">жазды.</a>
<blockquote>
 «Сенім грамоталарын қабылдау рәсімінде, елшілер алдында Қазақстанның Ауғанстандағы ахуалға қатысты қабылдаған шешімдеріне тоқталдым: 
 «Ауғанстандағы күрделі дағдарыс жағдайында Қазақстанның прагматикалық сыртқы саясаты маңызды болып отыр. Соғыстан тоз-тозы шыққан бұл елмен ортақ шекарамыз болмаса да, Алматы мен Кабулдың арасы ұшақпен бір-ақ сағаттық жер. 
 Мен ТМД, Еуропалық Одақ және Таяу Шығыстағы әріптестеріммен тығыз байланыста отырмын. 
 Егер осындай ниет білдіретін болса, сіздердің мемлекеттеріңіз бен үкіметтеріңіздің басшыларымен ой-пікір алмасуға әрқашан дайынмын» деп жазды Президент.Мемлекет басшысының айтуынша, ә зірге Ауғанстандағы дүрбелең өңірлік қауіпсіздік проблемаларына назар аудартып тұр. Қазақстан зорлық-зомбылықтың, заңсыз есірткі айналымының және Ауғанстаннан тыс жерлерге бақылаусыз көшіп кетудің алдын алу мақсатында бұл елмен ынтымақтастық орнатуға дайын.«Тәліптер біртұтас, инклюзивті және өкілетті ұлттық үкімет қалыптастырып, өздерінің, шын мәнінде, байсалды позиция ұстанатынын және келіссөздерге бейілді екенін дәлелдейді деп үміттенемін. 
 Қазақстан Ауғанстанның өз ішінде және көршілерімен тату-тәтті, бейбітшілікте өмір сүретін тұрақты, егемен және біртұтас мемлекет болғанын қалайды. Біз елде қалыптасқан гуманитарлық қиыншылықтарды шешу үшін конструктивті іскерлік байланыстар орнатуға дайынбыз. Халықаралық қоғамдастық Ауғанстанды қазіргідей дағдарыс кезінде қиыншылықтармен бетпе бет қалдырмауы керек. Керісінше, біз болашақта Ауғанстанның экономикалық және орнықты дамуы үшін барлық іс-әрекеттеріміз бен жоспарларымызды жұмылдыруымыз керек» деп түйді сөзін ҚР Президенті.
</blockquote>

Президент Қазақстанның Ауғанстандағы ахуалға қатысты қабылдаған шешімдері жайлы айтты

<a href="https://kyzylorda-news.kz/">Kyzylorda-news.kz</a>.&nbsp;Қазақстанда өткен тәулікте 4106 адамнан коронавирус инфекциясы ПТР арқылы анықталды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 329,
Алматы қаласы – 976,
Шымкент қаласы – 150,
Ақмола облысы – 201,
Ақтөбе облысы – 222,
Алматы облысы – 330,
Атырау облысы – 127,
Шығыс Қазақстан облысы – 201,
Жамбыл облысы – 79,
Батыс Қазақстан облысы – 124,
Қарағанды облысы – 549,
Қостанай облысы – 178,
Қызылорда облысы – 92,
Маңғыстау облысы – 185,
Павлодар облысы – 229,
Солтүстік Қазақстан облысы – 81,
Түркістан облысы – 53.
Жалпы ел бойынша ауырғандар саны 828224.

Қызылордада бір күнде 92 адамнан коронавирус анықталды

<a href="https://kyzylorda-news.kz/">Kyzylorda-news.kz</a> Мемлекет Басшысы жариялаған Жолдауды іске асыру бойынша Жалпы Ұлттық Жоспар әзірленіп, ҚР Үкіметінің 2021 жылғы 6 қыркүйектегі мәжілісінде мақұлданды. Барлығы 7 бөлім, 102 іс шарадан тұратын Жалпы Ұлттық Жоспар 2021-2022 жылдары жүзеге асырылатын болады. Біздің өңірде де атқарылатын жұмыстар пысықталды. Облыстың дамыту жоспарлары ұсынылды. Бұл туралы Өңірлік коммуникациялар қызметінде өткен брифингте облыстық экономика және бюджетті жоспарлау басқармасының басшысы Нұрғали Қордабай мәлімдеді.
Ұлттық жоспардың 1-ші бөлімінде «Пандемиядан кейінгі кезеңдегі экономикалық даму» аясында «Қарапайым заттар экономикасы» және «Бизнестің жол картасы» бағдарламаларын одан әрі жалғастыру, оның қаржыландыру көлемін арттыру, микро және шағын бизнесті, әсіресе ауылда кредиттеу үшін микроқаржы ұйымдарының әлеуетін кеңейту және тағы басқалары тапсырылды.
<blockquote>
 «Ағымдағы жылдың басынан бері “Бизнестің жол картасы-2025” бойынша жалпы несие сомасы 15,6 млрд.теңгеге 1130 жоба субсидияланды, несие сомасы 4,8 млрд. теңгеге 788 жоба бойынша кепілдік берілді. “Еңбек” бағдарламасы шеңберінде микрокредиттер беру үшін республикалық бюджеттен 3,76 млрд.теңге қаралып, оның бүгінде 1,9 млрд. теңге сомасына 450 жоба несиелендірілді. Жұмыспен қамту жол картасы бағдарламасы аясында шағын несиелеуге 1 млрд.теңге бөлінді. «Қарапайым заттар экономикасы» бағдарламасы шеңберінде облыста құны 9,7 млрд. теңгені құрайтын 120 жобаға өтінім мақұлданды. Ағымдағы жылы құны 1,7 млрд. теңге тұратын 14 жоба мақұлданып, оның 9 жобасы бүгінде қаржы институттарымен қарастырылуда. Осы жұмыстардың нәтижесінде Жалпы Өңірлік өнімдегі шағын және орта бизнестің үлесін ағымдағы жылы 18,5%-ға дейін жеткізу жоспарлануда», – деді басқарма басшысы.
</blockquote>
«Өңірлік саясатты жетілдіру» аясында облыстың дамыту жоспарларын өзектендіру, Түркістан облысында, Талдықорған және Қызылорда қалаларында 1000 МВт жаңа өндіруші қуаттарды іске қосу, Ақмола, Алматы, Батыс Қазақстан, Жамбыл, Қызылорда, Түркістан облыстарында 9 су қоймасын салуды қамтамасыз ету тапсырылған болатын.
Осыған орай, 2025 жылға дейінгі даму жоспарына сәйкес Қызылорда облысының әкімдігі облысты дамытудың 2021-2025 жылдарға арналған бағдарламасының жобасын әзірледі.
Жаңартылған даму жоспары 3 бағыт бойынша яғни азаматтардың әл-ауқаты, институттардың сапасы, мықты экономика және 6 басымдықтан тұрады.
Облыстың 2025 жылға дейінгі даму жоспарының жаңартылған жобасы ҚР Ұлттық экономика министрлігіне келісуге жолданды. Келісім алынғаннан соң ҚР Үкіметінің 2021 жылғы 26 ақпандағы «Қазақстан Республикасындағы мемлекеттік жоспарлау жүйесін бекіту туралы» №99 қаулысына сәйкес Қызылорда облысының 2021-2025 жылдарға арналған даму жоспарын ағымдағы жылдың 1 желтоқсанына дейін облыстық мәслихатқа бекітуге ұсынылады.
Сонымен қатар, ҚР Президентінің «Халық үніне құлақ асатын мемлекет» тұжырымдамасына сәйкес Халық қатысатын бюджет – жергілікті бюджет қаражатын бөлуде азаматтардың қатысуы енгізілді. Бүгінде Қызылорда қаласы әкімдігінің ресми интернет ресурсында – мемлекеттік органдарының бірыңғай порталында (www.gov.kz) арнайы «Халық қатысатын бюджет» бөлімі енгізілген.

Қызылорда: 2025 жылға дейінгі даму жоспарының жаңартылған жобасы жасалды

<a href="https://kyzylorda-news.kz/">Kyzylorda-news.kz</a>&nbsp;Қазгидромет 9 қыркүйекке арналған ауа райы болжамын ұсынады.
Атмосфералық ауа ағындардың өтуіне байланысты еліміздің оңтүстік-батысында, солтүстік-батысында, солтүстігінде, оңтүстігінде және орталығында жаңбыр жауып, найзағай жарқылдайды шығысында нөсер жаңбыр жауады.
Тек батыс өңірде ауқымды антициклон жотасының әсерінен жауын-шашынсыз ауа райы күтіледі. Республиканың солтүстігінде, солтүстік-батысында, орталығында, оңтүстігінде және оңтүстік-шығысында жел күшейеді. Солтүстігінде, солтүстік-батысында және орталығында тұман, шығысында және еліміздің оңтүстік-шығысындағы таулы аудандарда – бұршақ жаууы ықтимал.

Қазақстан және Қызылорда облысының жаңалықтары