<a href="https://kyzylorda-news.kz/ru/obshestvo/">Kyzylorda-news.kz</a>. 11 қараша күні республиканың басым бөлігіндегі ауа райын циклон жырасы және сонымен байланысты атмосфералық фронттар анықтайды. Соған орай жауын-шашын күтіліп, солтүстік өңірлерде жаңбырдың соңы қарға ұласады, деп хабарлайды Қазгидромет.
Еліміздің шығысы, орталығы және оңтүстігі жоғары қысымды алқап ықпалында болғандықтан, көбіне жауын-шашынсыз күн райы болжанады. Қазақстанның басым аумағында желдің күшеюі, солтүстік аудандарда жаяу бұрқасын, көктайғақ, тұман болады. Сондай-ақ батыс, солтүстік-батыс және оңтүстіктің таулы аудандарында тұман күтіледі.
Атап айтқанда, Ақмола облысында көктайғақ, жаяу бұрқасын, 15-20 м/с екпінде жел тұрады.
Ақтөбе облысында көктайғақ, жаяу бұрқасын, күндіз облыстың шығысында желдің күші 5-20 м/с артады.
Қостанай облысының солтүстік және шығысында, Солтүстік Қазақстан облысының солтүстік-батысында көктайғақ, жаяу бұрқасын, тұман, 15-20 м/с жылдамдықта жел күтіледі.
Павлодар облысында тұман, көктайғақ, жаяу бұрқасын, 15-20 м/с екпінде жел болжанады.
Алматы облысының Алакөл көлдері ауданында, Шығыс Қазақстан облысының Жарма ауданында желдің күші 15-23 м/с құрайды.
Қарағанды облысының оңтүстік-шығысында, Батыс Қазақстан облысының солтүстігінде түнде және таңертең, Оңтүстік Қазақстан, Жамбыл облыстарының таулы және оңтүстік аудандарында тұман, түнде Батыс Қазақстан облысының шығысында жел 15-20 м/с күшеюі күтіледі.
Атырау облысының шығысында, Қызылорда облысының солтүстік-батысында желдің екпіні 15-20 м/с құрайды.
Маңғыстау облысының солтүстік-батысында, шығысында жел 15-20 м/с артады, түнде екпіні 23 м/с жетеді. Түнде және таңертең облыстың солтүстігінде көктайғақ болады.

Бейсенбіге арналған ауа райы болжамы

<a href="https://kyzylorda-news.kz/ru/obshestvo/">Kyzylorda-news.kz</a>. Нұр-Сұлтан қаласындағы №2 көпбейінді қалалық ауруханасы отбасын жоспарлау орталығының гинеколог-эндокринологы Айгүл Мұсабаева «экоға» қатысушылардың жас шектеуіне қатысты өзгерістерді атады, деп хабарлайды ҚазАқпарат.
<blockquote>
 «Аңсаған сәби» бағдарламасы бойынша бала сүюге кімнің мүмкіндігі бар? Бұл бағдарлама бойынша жасанды жолмен ұрықтандыру әдісін бала сүюге үмітті, репродуктивті жастағы кез келген жұп пайдалана алады. Консервативті жолмен емдеу нәтиже бермейтін бедеулік диганозы қойылған пациенттерге арналған. «Экоға» отбасылық жұптар да, жалғызбасты әйелдер де қатыса алады. Қазақстан азаматы болу және пациенттердің міндетті медициналық сақтандыруы болу керек», – деген маман медициналық сақтандыру жүйесінде «экоға» қатысушылар қандай критериймен іріктелетінін айтты.
 «Ең бірінші репродуктивті жастағы пациенттер, ерлер факторына байланысты бедеулік, әйелдің жатыр түтікшелерінің екеуі де бітелген жағдайда немесе отамен алынған кезде хирургиялық гистероскопия, лапароскопия, ем-шара нәтижесі болмаған кезде «экоға» жүгіне алады. Гормоналды емдеу нәтижесіз болған бедеулік түрі де «экоға» жатады. Жоғары технологиялардың бәрін пайдаланса да, бір жылдан аса бала көтере алмаудың белгісіз генезі де «эко» жасатуға негіз болады. Жамбас мүшелерінің эндометриозына байланысты бедеулік те «экоға» жатады», – деді гинеколог-эндокринологы.
</blockquote>
Маманның мәліметі бойынша, экоұрықтандыруға қатысатын әйелдердің жасына қатысты шектеу алынған.
<blockquote>
 «Денсаулық сақтау министрлігінің №272 бұйрығы бойынша квота беру мүмкіндігі кеңейді. Бұрын үміткерлердің жасы 42 жасқа дейін шектеулі болған. Жаңа бұйрық бойынша әйел репродуктивті жаста болуы керек. Осы аталған көрсеткіштер бұрынғы бұйрықта болмаған. Сондықтан бұл «экоға» үміткерлердің санын арттырады», – деді Айгүл Мұсабаева.
</blockquote>

Жалғызбасты әйелдер де тегін «эко» жасатып, бала сүйе алады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; «Қоғамдық және жол қауіпсіздігі үшін бейнебақылау жүйесін орнату» жобасы бойынша Қызылорда қаласы орталығында автокөліктер ағымы басым көп жүретін көше бойларына қосымша 7 (жеті) дана (комплекс) «АРКАН» стационарлы жылдамдық өлшегіш құрылғылары орнатылды.
1. Әл Фараби көшесі (№128 үй тұсы)
2. Марал Ишан көшесі («Абзал и К» ЖШС мекемесінің тұсы)
3. Т.Рысқұлов көшесі&nbsp; (Мерей м\а №8 үй тұсы)
4. Жаппасбай батыр көшесі (Күріш зауыты тұсы)
5. М.Шоқай көшесі (№208, 233 үйлерінің тұсы)
6. Желтоқсан көшесі (№94 үй тұсы)
7. Н.Назарбаев даңғылы (Салық департаменті тұсы)
Аталған камералар екі бағытта жылдамдықты түсіретін болады. Сонымен қатар нөмірлік белгілерді (төмен жарық жағдайында да шағылыстыратын, сондай-ақ шағылыстырмайтын МТНБ-ны оқи отырып), машиналардың түсін, маркасын автоматты түрде тануды, жылдамдық артуын оптикалық тіркеп, учаскедегі трафикті есептейді.
ЖҚЕ бұзушылықтары туралы ақпарат, сондай-ақ нақты уақыт режиміндегі бейне автоматты түрде деректерді өңдеу орталығына жіберіледі және айыппұл туралы ұйғарымдарды қалыптастыру үшін Қазақстан Республикасы Бас прокуратурасының әкімшілік өндірістердің бірыңғай тізіліміне (ЕАҚ) енгізіледі.
Құрылғылар ағымдағы жылдың 11 қарашасы күні жергілікті уақыт сағат 00:00-ден &nbsp;бастап іске қосылатындығы хабарланады.
<blockquote>
 «Жүргізушілерді жол жүру ережелерін бұзбауды және белгіленген қозғалыс жылдамдығын сақтауды сұраймыз,» – деп атап өтті Қызылорда облысы Полиция департаментінің бастығы полиция полковнигі Сұлтан Бектөре Жеңісбайұлы.
</blockquote>

Қызылордада бірнеше көшеге камера орнатылды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Қазақстанда 90 мыңнан астам шағын көлемді фургон көліктерінің салығы жеңілдетіледі. Салық кодексіне енгізілген өзгерісті мәжіліс депутаттары бірауыздан <a href="https://sputnik.kz/society/20211110/18623537/Gazel-koligi-zhanalyk.html">қабылдады</a>.
Енгізілген өзгерістерге орай, шағын көлемді фургондарға салық қозғалтқышының көлеміне емес, жүк көтергіштігіне байланысты салынады.
90 мыңнан астам көлік иелеріне қатысты заң жобасы келесі жылдың 1 қаңтарынан бастап күшіне енеді.
Мәжіліс спикері Нұрлан Нығматулин мемлекеттік құрылымдар салықты төлеп қойған көлік иелерінің төлемдерін қайта есептеуге дайын болуы керек екенін атап өтті.
<blockquote>
 “Осы норманың арқасында “Газель” жүргізушілері жаңа жылға жақсы сыйлық алатын болды. Енді ең бастысы мемлекеттік органдар іс жүзінде ешбір бюрократиясыз заңға сай қажетті есептеулерді жүзеге асыруға тиіс”, – деді ол.
</blockquote>
Қайта есептеу процесі көлік иелерінің қатысуынсыз жүзеге асырылатын болады. Мәжіліс сипкері бұл жөнінде түсіндіру жұмыстарын жүргізуді де тапсырды.
“Азаматтар ешқайда барудың қажеті жоқ екенінен хабардар болуы керек. Барлығы автоматты түрде жүзеге асырылады. Егер түсіндіру жұмыстарын жүргізбесе елдің бәрі халыққа қызмет көрсету орталығына ағылатын болады, call-орталықтарға қоңырау шалып мазалары кетеді”, – деді Нығматулин.
Қаржы вице-министрі Марат Сұлтанғазиевтің айтуынша, шағын көлемді фургон иелері үшін көлік салығы айтарлықтай азаяды. Мысалы қозғалтқыш көлемі&nbsp; 3,5 мың текше сантиметр көлік үшін салық 136 мыңнан 20 мыңға дейін төмендейді.

Елде 90 мыңнан астам көліктің салығы қайта есептеледі

<a href="https://kyzylorda-news.kz/ru/obshestvo/">Kyzylorda-news.kz</a>. Ел Тәуелсіздігімен тұспа-тұс келген қаржы-экономика саласы ғасыр белесінде. Жүз жыл уақыт аралағында Сыр өңірінің қаржыгерлік мектебі қалыптасып, аталған саланын біртуар азаматтары ел экономикасының дамуына өз үлестерін қосты. Бүгін Өңірлік коммуникациялар қызметінде өткен брифингте облыстық экономика және бюджеттік жоспарлау басқармасының басшысы Нұрғали Қордабай атаулы мерейтойға орай өткізілетін ізгі шаралар тізбегін баяндады.
<blockquote>
 «Қаржы саласының қалыптасуы 1920 жылдан бастау алады. Осы уақыт аралағында талай еңбек ерлері облыс экономикасының ілгерлеуіне аянбай қызмет етті. Камал Шөкенов, Бименді Баймаханов, Құттықожа Ыдырысов, Қалқазбек Әжібеков, Райхан Искакова сынды еңбек ардагерлері саланың қалыптасуына қайталанбас ізгі жол қалдырды. Атаулы датаға орай, 11 қараша күні Тұңғыш Президент саябағында 100 жылдық мереке аясында 100 түп ағаш отырғызылады. Одан әрі игі шара қаржы ардагерлерін еске алумен жалғаспақ. 12 қараша күні Нартай Бекежанов атындағы музыкалық драма театрында “Ғасыр белесінде” атты кітаптың тұсаукесері өтеді», – деді басқарма басшысы Нұрғали Рахымшаұлы.
</blockquote>
Алқалы жиында қаржы саласының ардагері Қалқазбек Әжібеков аталған саланың құрылу тарихын еске алып, облыс экономикасының өсу баспалдағын баяндады.
<blockquote>
 «1921 жылы қазан айында Бүкілқазақ сьезінде қаржы жүйесін құру туралы шешім қабылданды. Дәл сол жылдың 20 тамызында қаржы халық комиссариаты құрылған болатын. Ал қазан айында мемлекеттік жоспарлау комиссиясы өз жұмысын бастады. Біте қайнасқан екі салаға − 100 жыл. Барша осы салада еңбек етіп жүрген мамандарды атаулы мерекесімен құттықтаймын», – деді сала ардагері Қалқазбек Әжібекұлы.
</blockquote>

Қаржы-экономика саласына 100 жыл

Әділдік жолы

<a href="https://kyzylorda-news.kz/ru/obshestvo/">Kyzylorda-news.kz</a>. «ORDA IDEAS» – Kun.kz диалог платформасы мен Қорқыт ата атындағы Қызылорда университетінің бірлескен жобасы. Жоба аясында «ORDA IDEAS» өңірлік сарапшылар алаңы құрылып, тікелей эфир Қорқыт ата атындағы Қызылорда университетінің Студенттер сарайында өтті.
Өңірлік сарапшылар алаңының алғашқы шығарылымы Білім және ғылым министрі Асхат Аймағамбетовтің «Оқуға құштар мектеп – Оқуға құштар ұлт» жобасын негізге ала отырып, «Интернет заманында кітап оқу өзектілігі өзгере ме?» тақырыбында өткізілді. Елге белгілі тұлғалар қоғамдағы маңызды мәселені талқыға салып, шешу жолдарын қарастырды.
Қазақстанның мемлекет және қоғам қайраткері, Kun.kz диалог платформасының модераторы Мұрат Әбенов жоба барысында кітаптың құндылығы, елімізде осы бағытта атқарылған жұмыстар, шетел практикасы туралы сөз қозғап, білімді ұрпақ ұлттың жарқын болашағы екенін жеткізді.
<blockquote>
 «Қазіргі жастардың кітапқа деген қызығушылығын арттыру – үлкен мәселе. Бірақ оны біржақты шеше алмаймыз. Қоғамдағы әр азамат бірлесіп шешу жолын қарастырғанда ғана нәтижеге жетуіміз мүмкін. Кітап оқу – бәсекеге қабілетті болудың негізі. Ел болашағы, оның жан-жақты дамуы білімді, сауатты адамдардың қолында», – деді Мұрат Әбенов.
</blockquote>
Тікелей эфирде Қызылорда облыстық мәслихат хатшысы Наурызбай Байқадамов, Қорқыт ата атындағы Қызылорда университетінің Басқарма Төрағасы – Ректоры Бейбіткүл Кәрімова, Қызылорда облыстық білім басқармасының басшысы Ақзира Қасымова, Қызылорда облыстық кәсіпкерлер палатасының директоры Ғалымбек Жақсылықов ел тұрғындарының кітап оқуға деген қызығушылығын арттыру, кітап оқу дағдысын қалыптастыру бағытында ұсыныс, пікірлерін айтты.
<blockquote>
 «Артық білім деген болмайды. Бірақ артық ақпарат, пайдасыз білімнен гөрі керек білімді алу жолында еңбектенген дұрыс. Көп кітап оқыған адамнан емес, қажетін саралап, керегіне жарата алған, шығарманың негізгі ойын түсінген адамның кеңесіне жүгінгенді жөн санаймын», – деді Наурызбай Байқадамов.
</blockquote>
Эфирге ҚР Білім және ғылым вице-министрі Қуаныш Ерғалиев, Ақпарат және қоғамдық даму министрлігі жастар және отбасы істері комитетінің төрағасы Шахмардан Байманов, Әлем чемпионы, жастардың мотиваторы Илья Ильин онлайн қатысып, өз пікірлерін білдірді.
Сондай-ақ, жобаға облыстық мәслихат депутаты, «Қазпошта» АҚ Қызылорда облыстық филиалының директоры Аида Абибуллаева, Ә.Тәжібаев атындағы облыстық әмбебап ғылыми кітапханасының директоры Нұрлыбек Мыңжас, айтыс ақтаңгері, қалалық мәдениет және тілдерді дамыту бөлімінің басшысы Мұхтар Ниязов, С.Лапин атындағы №261 орта мектеп директоры Қарлығаш Әбдірахманова, Қызылорда облыстық кәсіпкерлер палатасының бөлім басшысы Жасұлан Серіков, заңгер Мейірбек Даубалаев, №235 орта мектептің мұғалімі Уалихан Файзуллаев, рекрутинг орталығының жетекшісі Жандос Оразмаханов эксперт ретінде қатысып, тың идеяларын ортаға салды.
Көрермендер «ORDA IDEAS» жобасын «Facebook», «Youtube» желілерінде тікелей эфирде тамашалап, жазбаша сауалдарын жолдады.
Айта кету керек, Қорқыт Ата атындағы Қызылорда университетінде кітап пен ғылыми әдебиет қоры жиі толықтырылып, интернет ресурстар қолжетімділігі жылдан жылға артып келеді. Ғылыми кітапхананың жалпы қоры 2 118 674 дананы құрайды. Негізгі білім беру бағдарламаларын жаңа басылымдармен, оқу және ғылыми әдебиеттермен қамтамасыз ету мақсатында республикалық және шетелдік баспалармен жұмыс жүргізіледі. 2020-2021 оқу жылында 5388 дана оқу құралы мен ғылыми әдебиет сатып алынды.
Ғылыми кітапхана ҚР Білім және ғылым министрлігінің ұлттық жазылымы бойынша «Scopus/Sciencedirect» және «Web of Science» халықаралық деректер қорына қол жеткізе алады, сондай-ақ отандық ақпараттық ресурстардың деректер базаларын да пайдаланады.
<blockquote>
 «Университет кітапханасын заманауи кітаптармен қамтамасыз ету маңызды. Қазіргі таңда ғылыми еңбек, көркем әдебиеттердің электронды нұсқасының болуына ерекше көңіл бөлудеміз. Біріншіден, электронды кітаптар қолжетімді. Екіншіден, білім алушылар оны кез келген уақытта пайдалана алатындықтан ыңғайлы. Бүгінде студенттерге «Жаңа гуманитарлық білім. Қазақ тіліндегі 100 жаңа оқулық» жобасы бойынша жарық көрген кітаптарды оқуға барлық мүмкіндіктер жасалды. Шетелдік кітаптарға келер болсақ, былтыр университетте корей бұрышы ашылды. Онда Кореяда шыққан ағылшын және корей тіліндегі кітаптар қойылды», – деді Бейбіткүл Кәрімова.
</blockquote>
Сондай-ақ, биыл 1 қазаннан бастап республикалық жоғары оқу орындары арасындағы электрондық кітапханамен, «ALEM BOOK» электронды кітапханасымен 5 жылға шарт жасалды.
Ал цифрлық кітапхана қалыптастыру және университеттің электрондық кітапханасын дамыту мақсатында «МегаПро» автоматтандырылған интеграцияланған кітапхана жүйесі сатып алынды. «МегаПРО» бағдарламасында университет кітапханаларына қажетті модульдер бар. Студенттер бағдарлама арқылы оқу процесіне қажетті әдебиеттерді сұрай алады.
Қызылордада алғаш рет «ORDA IDEAS» өңірлік сарапшылар алаңының өткізілуіне қалалық мәслихат депутаттары, «Қызылорда жарығы» холдингінің коммерциялық директоры Дархан Көшербаев, «Dalatex» тігін фабрикасының директоры Ділмұхаммед Абизов, «Нұр-Назар» ЖШС директоры Ердос Әбдісаттаров демеушілік жасады. 
Айта кету керек, жоба алдағы уақытта да жүзеге асып, сарапшылар алаңында өзекті тақырыптар талқыланатын болады.
<img src="https://kyzylorda-news.kz/wp-content/uploads/2021/11/256382376_1409678289427679_5624802027877041797_n.jpg" alt="" />
<img src="https://kyzylorda-news.kz/wp-content/uploads/2021/11/255441353_1409678309427677_3995913220238795530_n.jpg" alt="" />
<img src="https://kyzylorda-news.kz/wp-content/uploads/2021/11/255020654_1409678256094349_3697876478693625499_n.jpg" alt="" />

Қызылордада «Orda Ideas» жобасы басталды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; «Тұлпар мініп, ту алған!» байқауының облыстық кезеңі аяқталды. Байқау Қызылорда қаласы Достық үйінде өтті.
<blockquote>
 «Ұлы даламыз кейде ашық жатқан жыр кітабы сияқты болып та көрініп кетеді. Жадыңды жаңғыртып, дұрыстап, жақсылап оқи алсаң, жан дүниең жадырап,бабалардың баянды үнін, тарихтың тылсым сырын, туған еліңнің мәңгілік жырын қайыра естіп, байтақ әлемге құлашыңды кең жайғандай боласың» – деген Елбасымыз. Қазақстан Республикасының Тұңғыш Президенті Н.Ә.Назарбаевтың «Ұлы Даланың жеті қыры» мақаласы аясында басталған айтулы шара биыл Сыр елі, жыр елі Қызылорда өңірінде екінші рет өтіп жатыр.
</blockquote>
Байқаудың облыстық кезеңінің ашылуында «Nur Otan» партиясы Қызылорда облыстық филиалы төрағасының бірінші орынбасары Ләйлә ТӨРЕШОВА және облыстық білім басқармасының басшысы Ақзира ҚАСЫМОВА құттықтау сөз сөйлеп, қатысушыларға сәттілік тіледі.
«Алпамыс» дастанынан басталған жоба былтыр көлемді «Қобыланды батыр» жырына жалғасты. Биыл «Едіге батыр» жырын жатқа айту бойынша өткізіліп отыр. Байқауды «Qazaq Epos» қоғамдық қоры «Nur Otan» партиясы облыстық филиалы, облыстық білім басқармасымен бірлесе отырып ұйымдастыруда.
Байқау 6-10 сынып оқушылары арасында «Едіге батыр» жырын жатқа айтудан өтті. Қатысушылар қосымша мектеп бағдарламасы бойынша қазақ әдебиеті пәнінен сұрақтарға жауап беруі тиіс.
Байқауға «Nur Otan» партиясы облыстық филиалы төрағасының бірінші орынбасары Ләйлә ТӨРЕШОВА, облыстық білім басқармасы басшысы Ақзира ҚАСЫМОВА, жазушы, журналист, облыстық партия филиалы жанындағы «Miras» аймақтық қоғамдық кеңес мүшесі Қаршыға ЕСІМСЕЙІТОВА, тарих ғылымдары кандидаты, аймақтық «Рухани жаңғыру» орталығының директоры Уәлихан ИБРАЕВ, филология ғылымдарының кандидаты, Қорқыт Ата атындағы Қызылорда университетінің Қазақ тілі мен әдебиеті кафедрасының доценті Ұлжан ЖАҢБЫРШИЕВА, жырау, Қармақшы аудандық «Жыраулар үйі» директорының орынбасары Бидас РҮСТЕМБЕКОВ, облыстық «Жастар ресурстық орталығы» директорының орынбасары Мақсат ДАУЫЛБАЙ қазылық етті.
Облыстық кезеңде оқушылар алдын ала өткізілген жеребе бойынша 12 жұпқа жұптасып, өнер көрсетті.
Нәтижесінде 1-орынды қазалылық Гауһар Әзен (дайындаған мұғалімі Жадыра Кушекпаева), 2-орынды тағы бір қазалылық Гүлназ Жеңісбек (дайындаған мұғалімі Балагүл Орынбаева) иеленді. Ал 3-орынға Арал ауданынан келген Қарақат Берікқызы (дайындаған мұғалімі Нұрсұлу Ибраева) лайық деп танылды.
Жеңімпаздарды облыс әкімінің орынбасары Балжан Шәменова құттықтады.
<blockquote>
 «Аймағымызда биыл екінші рет ұйымдастырылған шоқтығы биік, мағынасы зор шаралардың бірі әрі бірегейі – «Qazaq Epos» республикалық ағарту жобасы «Тұлпар мініп, ту алған!» байқауының бүгін облыстық кезеңінің марапаттау сәті өткелі отыр.
 Республикалық деңгейде ұйымдастырылып жатқан ұлттық жобаға еліміздің аймақтары ішінде алғашқылардың бірі болып тағы да Қызылорда облысының әкімдігі айрықша қолдау көрсетті. Сыр өңірі елдікті, отансүйгіштікті насихаттауға, жастарды рухани дүниемен рухтандыруға келгенде ешқашан бейжай қараған емес.
 Бала тәрбиелеуде батырлар жырын оқыту қайта қолға алынып, қайта жаңғыртылуы игі бастама. Біз тек атадан қалған сырлы сөздер мен рухани үлгімен ғана рухани түлеп, саналы түрде жаңғырамыз, – деді Б.Шәменова.
</blockquote>
Жеңімпаздардың марапатын «Nur Otan» партиясы Қызылорда облыстық филиалы төрағасының бірінші орынбасары Ләйлә Төрешова, облыс әкімінің орынбасары Балжан Шәменова бастаған азаматтар табыстады.
Облыстық кезеңде үздік шыққан І орын иегеріне 750 000 теңге, ІІ орынға 350 000, ІІІ орын үшін 200 000 теңге қаржылай сый берілді. Облыстық деңгейдегі жеңімпаз оқушылардың мұғалімдеріне де сый қарастырылған: І орынға 1 500 000 теңге, ІІ орын иегеріне 700 000, ІІІ орынды еншілеген қатысушының мұғаліміне 400 000 теңге берілді.
Айта кетейік, байқаудың аудандық-қалалық кезеңіне 713 оқушы қатысып, солардың арасынан іріктеліп шыққан 24 оқушы облыстық кезеңге жолдама алған. Байқаудың аудандық-қалалық кезеңінде І орын еншілегендерге 150 мың, ІІ орын 100 мың, ІІІ орын иегерлеріне 50 мың теңгенің сертификаты табысталған болатын.
<img src="https://kyzylorda-news.kz/wp-content/uploads/2021/11/795de7c3-b519-4838-af43-6a163b0647b1.jpg" alt="" />
<img src="https://kyzylorda-news.kz/wp-content/uploads/2021/11/29df8a2e-ff79-4d09-81b4-40cbe6013ede.jpg" alt="" />
<img src="https://kyzylorda-news.kz/wp-content/uploads/2021/11/014fbbc5-3c47-4f7c-90fc-4de7a77e8faf.jpg" alt="" />

«Тұлпар мініп, ту алған!»: Қазалылық оқушылар жеңімпаз атанды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысында электрмен қамту жүйесінде арнаулы шектеулер қойылған болатын. Енді ертеңнен бастап шектеулер алынып тасталады. Облыс тұтынушылары электр энергиясымен толық қамтылады. Бұл туралы бүгін Өңірлік коммуникациялар қызметінің ақпарат алаңында облыстық энергетика және тұрғын үй-коммуналдық шаруашылық басқармасының басшысы Ерлан Жаңабаев мәлімдеді.
<blockquote>
 «Айта кету керек, 3 қарашадан бастап облыс бойынша тәулігіне орташа есеппен 30-50 мегават аралығында электр энергиясының жетіспеушілігі (дефицит) орын алды. Соның салдарынан күнделікті кешкі сағат 18.00-ден 20.00-ге дейін тұтынушыларға электр энергиясы шектеліп беріліп келді. Атап айтқанда, электр энергияның жетіспеушілігінен 6 аудандағы 58 ауылдық елді мекеннің 15 мыңға жуық абоненттеріне шектеулер қойылды. Осы мақсатта, Энергетика министрлігі мәжіліс өткізіп, Жамбыл ГРЭС-тің 3 және 4 блогын іске қосуға шешім қабылдады», – деді басқарма басшысы.
</blockquote>
Нәтижесінде, ертеңнен бастап жалпы оңтүстік өңір оның ішінде Қызылорда облысы электр энергиясымен толықтай қамтамасыз етілмек.

Қызылордада электр энергиясына шектеу тоқтатылды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Бүгін облыс әкімі Гүлшара Әбдіқалықова энергетика саласындағы өзекті мәселелер бойынша отырыс өткізді. Жиынға облыс әкімінің орынбасары Нұрлан Тілешев, облыс әкімінің аппарат басшысы Ерлан Райғаниев, Қызылорда қаласының әкімі Ғанибек Қазантаев, облыстық энергетика және тұрғын үй-коммуналдық шаруашылығы басқармасының басшысы Ерлан Жаңабаев, облыс бойынша табиғи монополияларды реттеу департаментінің басшысы Гүлмира Өтегенова және энергетика саласындағы мекемелер басшылары қатысты.
Отырыста негізгі мәселе ретінде қарашадан басталған республиканың оңтүстік өңірлеріндегі электр энергиясының жетіспеушілігі сараланды.
Облыстық энергетика және тұрғын үй-коммуналдық шаруашылығы басқармасының басшысы Ерлан Жаңабаев орын алған шектеулер бойынша ахуалды баяндады.
Бүгінгі күні өңірдің жалпы электр энергиясын тұтыну көлемі 172 мегаватты құрайды. Оның 51 мегаваты «Қызылордажылуэлектр орталығымен», 10 мегаваты «CKЗ-U» серіктестігімен өндіріліп, қалған 111 мегаваты сырттан жеткізіледі.
Соңғы күндері облыс бойынша тәулігіне орташа есеппен 30-50 мегават аралығында электр энергиясының жетіспеушілігі орын алды. Салдарынан күнделікті кешкі сағат 6-дан 8-ге дейін тұтынушыларға электр энергиясы шектеліп берілген.
Осыған байланысты Энергетика министрлігі Жамбыл ГРЭС-тің 3 және 4 блогын іске қосуға шешім қабылдады. Алдағы уақытта оңтүстік өңірді оның ішінде Қызылорда облысын электр энергиясымен толықтай қамтамасыз ету жоспарлануда. Бұл ретте аймақтағы энергиямен жабдықтаушы ұйымдар Жамбыл ГРЭС-пен қажетті электр энергияның көлемін алуға қосымша келісім-шарт жасалды. Нәтижесінде, қала, аудан көлеміне қажетті электр энергиясы жеткізіліп, шектеулер тоқтатылады.
Аймақ басшысы энергия жабдықтаушы ұйымдар ұсынған электр энергияның шекті бағасына өтінімін Табиғи монополияларды реттеу комитетінің Қызылорда облысы бойынша департаментімен қарап, тиісті ұсынтар енгізу қажеттігін қаперге салды. Сондай-ақ, электр энергиясы туралы тұрғындар арасында туындаған шағымдарды ескеріп, нақты түсіндірме жұмыстарын күшейтуді тапсырды.
<blockquote>
 «Тұрғындар электр энергиясынан тапшылық көрмеуі керек. Қажетті келісімдер мен нақты механизмдерді қабылдау Сіздердің міндеттеріңіз. Жетіспеушілік болған жағдайда электр тарату мекемелеріндегі резервтік ресурстарды пайдаланып, амал-әрекеттерді ұйымдастыруларыңыз қажет. Жылу маусымы кезінде тұрғындар жарық пен жылудан қиындық көрмеуі тиіс»,-деді Гүлшара Әбдіқалықова.
</blockquote>
Жиын соңында облыс әкімі облыстық энергетика және тұрғын үй-коммуналдық шаруашылық басқармасы мен коммуналдық мекеме басшыларымен бірлесіп жылу беру маусымының тұрақты өтуін қамтамасыз етуді тапсырды.
<img src="https://kyzylorda-news.kz/wp-content/uploads/2021/11/255583668_183207520667167_8499962272071315017_n.jpg" alt="" />
Тұрғын үй-коммуналдық шаруашылығы басқармасының басшысы Ерлан Жаңабаев

Гүлшара Әбдіқалықова: Тұрғындар жарық пен жылудан қиындық көрмеуі тиіс

&nbsp;<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; ҚР ДСМ Санитарлық-эпидемиологиялық бақылау комитетінің төрағасы Айжан Есмағамбетова «12 жасқа дейінгі балаларды ата-ана келісімімен вакциналауға бола ма?» деген сұраққа жауап берді, деп хабарлайды ҚазАқпарат.
Маманның айтуынша, қазір Қазақстанда балаларға тек 12 жастан бастап екпе жасауға рұқсат етілген.
<blockquote>
 «Қазіргі уақытта Қазақстан Республикасында қолданылатын және тіркелген нұсқаулыққа, яғни Comirnaty Pfizer нұсқаулығына сәйкес, 12 жастан бастап вакцина жүргізіледі. Бірақ бұл өндіруші компания қазір Америкада балаларды 5 жастан бастап вакциналауды бастады. Яғни сол Pfizer, бірақ 5 жасар балалар үшін басқа доза қолданылады. Егер өндіруші біздің органға тиісті құжаттарды енгізсе, яғни тіркеу үшін Дәрілік заттарды экспертизалау ұлттық орталығының нұсқаулығына «5 жастан бастап вакциналауды» енгізсе, бұл балаларды 5 жастан вакциналауға мүмкіндік береді. Бірақ қазір бекітілген нұсқаулық тек 12 жастан бастап вакциналауға рұқсат етеді», – деп түсіндірді Айжан Есмағамбетова Үкімет отырысынан кейін журналистерге.
</blockquote>
Комитет төрағасының айтуынша, вакциналау үшін жас санатының кеңеюін вакцина өндірушілер клиникалық зерттеулер аясында анықтайды.
<blockquote>
 «Егер өндіруші клиникалық зерттеулерден нәтиже алса, тиісінше осы өзгерістерді нұсқаулыққа енгізеді. Нұсқаулық біздің заңнамаға сәйкес Қазақстанда тіркелуі тиіс. Содан кейін ғана бұл бізге вакцинаны қолдануға мүмкіндік береді. Мысалы, Қытайдағы Sinopharm қазірдің өзінде 3 жастан асқан балаларға қолданылады. Қазақстанда бүгінгі күні тек 12 жастан бастап Pfizer вакцинасын егуге болады», – деп нақтылады А.Есмағамбетова.
</blockquote>

12 жасқа дейінгі балаларды ата-ана келісімімен вакциналауға бола ма – Министрлік жауабы

<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданында соңғы жылдары ауыл арасындағы жолдар мен елді мекендар арасындағы көшелердің жағдайы жақсарып келеді.
Биыл бөлінген 3,1 млрд теңгеге аудандық маңызы бар 50 шақырым жол мен елді мекенішілік 40 көше жөнделеді.
<blockquote>
 «Елді мекенішілік жолдарға келетін болсақ, Әйтеке би кентінен 19 көше, Қазалы қаласынан 10 көшеге жол құрылыс жұмыстары жүргізілуде. Одан бөлек, ауылдық елді мекендегі 11 көше жөндеуден өтуде. Қазіргі таңда 27 көшенің /Әйтеке би кентінде – Р.Бағланова, Әйтеке би кентіне кіре беріс, М.Маметова, Қорқыт Ата орамы, Қ.Ерімбет тұйығы, Дәулеткерей, А.Табынбаев, Привокзальная, Т.Жұмабаев, Жанқожа батыр 3-км көшелері, Н.Бекежанов, Жақсыбаев, Айбосынов тұйығы, Ә.Марғұлан, Сартай батыр, Ахметов тұйығын орташа жөндеу, Ақтан батыр ауылында – Б.Момышұлы көшесі, Бірлік ауылында – Жанқожа батыр көшесі, Қ.Пірімов ауылы – Ғ.Мұратбаев бұрылысы, Абай ауылында – Абай ауылына кіре беріс автомобиль жолы, Сырдария көшесі, Өркендеу ауылында – Сарыкөл, Ж.Байқадамов, Ғ.Мұратбаев, Жылуан көшелері, Жалаңтөс батыр ауылында – Қызылой, Ә.Мекешов көшелері/ жұмыстары толық аяқталып, пайдалануға берілді», – дейді аудан әкімі Мұхтар Оразбаев.
</blockquote>
Сонымен қатар, өткен жылдан бастап қала мен кенттің екі аралығындағы жолды кеңейту жұмыстары басталған. Қазіргі таңда 2 темір бетон көпір мен 2 су өткізгіш құбырлар қайта жаңғыртудан өткізіліп, жолдың негізігі қабаты күшейтілуде.
Аудан басшысы осыдан 3 жыл бұрын басталған Кәукей ауылына баратын автомобиль жолын жөндеу жұмыстары жалғасып жатқанын айтты.
Сонымен қатар, «Қарлаң» көпірінен Қожабақыға дейінгі, Қазалы қаласы мен «Әлсейіт» көпіріне дейінгі жолдарына жөндеу жұмыстары жүргізілген.
<blockquote>
 «Облыстық жолаушылар көлігі және автомобиль жолдары басқармасы тапсырысымен «Қарлан» көпірінің жоба сметалық құжаттамасы әзірленіп, мемлекеттік сараптамадан өткізілді. Қазіргі таңда республикалық бюджеттен құрлыс жұмыстарын бастауға 1,0 млн теңге қаржы бөлініп, мемлекеттік сатып алу жұмыстары жүргізілуде. Биыл жоба құны 233,0 млн теңгені құрайтын «Әйтеке би-Басықара» аудандық маңыздағы автомобиль жолының бойындағы темір бетонды көпірді қайта жаңғырту үшін республикалық бюджеттен 93 млн теңгесі бөлінді. Қазіргі таңда құрылыс жұмыстары қарқынды жүргізілуде», – дейді Мұхтар Әуесұлы.
</blockquote>
Бұдан бөлек 9 көпірдің техникалық жағдайы нашар екені анықталып, жоба алды іздестіру жұмыстары жүргізілген.
<img src="https://kyzylorda-news.kz/wp-content/uploads/2021/11/255536025_1409141959481312_9147250228144178278_n.jpg" alt="" />
Қазалы ауданының әкімі Мұхтар Оразбаев

Қазақстан және Қызылорда облысының жаңалықтары