<a href="https://kyzylorda-news.kz/">Kyzylorda-news.kz</a> Соңғы уақытта ер мен әйел арасында өзара тартыс сипат алды. Сондықтан, ошақ отын сөндірмей, ізгілікті кемітпей тату тұрудың маңызы жиі айтылып келеді. ҚАЖ департаментіне қарасты №68 мекемесінің жеке құраммен жұмыс тобының ұйымдастыруымен қызметкерлерге түсіндірме жұмысы жүргізіліп, өзекті мәселе жайында өткір ойлар ортаға салынды.Алдымен ҚАЖ департаментінің жеке құраммен жұмыс жөніндегі аға инспектор-психологы әділет капитаны Моншақ Маханова “Тұрмыстық зорлық-зомбылықтың көбеюіне не себеп?” тақырыбында тарқата сөйлеп, аяулыларды аяусыз соққыға жығуға болмайтынын, ортақ түсіністік керегін баса айтты.Содан соң, “Отбасылық тұрмыстық зорлық- зомбылыққа қарсы күрес қызметі” бөлімшесінің аға инспекторы полиция майоры Инабат Ишниязова отбасындағы зорлық-зомбылықтың әсері, оның алдын алу жолдары туралы нақты мысалдар келтірді. Қол көтерудің немесе қысым жасаудың ешқандай ақтауы жоқ екенін, мұндай әрекет заң алдында да, адамдық тұрғыдан да жауапкершілік жүктейтінін атап өтті.Сонымен қатар, қызметкерлер кездесу барысында “Отанды сүю – отбасынан басталады” атты бейнероликті тамашалап, арнайы қонақтардың түйдек ойын түйіндеді.<blockquote>– Отбасындағы тыныштық пен сыйластық – қоғам қауіпсіздігіне тікелей әсер ететін құндылық. Сондықтан әйелдің құқығын қорғау, зорлыққа жол бермеу – әрқайсымызға ортақ міндет деп білемін. Бүгінгі іс-шара осыны тағы бір айқындап берді. Отбасындағы кикілжіңге қатысты түрлі дау-дамайды естіп те, көріп те, жаңалықтан хабардар да болып жүрміз. Өзекті өртейтін өкінішке ұрынбас үшін, өзара ымыра керек-ақ. Расымен, отбасы – шағын мемлекет. Демек, оны қызғыштай қорып, арадағы құрметті сақтау арқылы жанжалға жол бермеген жөн, - дейді мекеменің тәрбие ісі жөніндегі орынбасары Мирамбек Тұрымбетов.</blockquote>Кездесу қызметкерлерге қоғамдағы өз рөлін қайта ой елегінен өткізуге себеп болғаны анық.

Тұрмыстағы қатынастың тайғанақ тұстары талданды

<a href="https://kyzylorda-news.kz/">Kyzylorda-news.kz</a> 2025 жыл сыр спорты үшін табысты болды. Салаға лайықты көңіл бөлінуі, инфрақұрылымның оңалуы өңір спортының өркендеуіне орасан пайдасын тигізді. УЕФА-ның 4-ші санатына сәйкестендірілген жаңа стадион «Kaysar Arena» ресми түрде Қазақстан кубогінің финалдық кездесуімен ашылды. Қызылорда қаласының сол жағалауында «Самұрық Қазына Траст» әлеуметтік қолдау қорымен бірлескен «Теннис орталығы» ашылды.&nbsp;Сондай-ақ аймақ басшысының қолдауымен Қызылорда ерлер және әйелдер бокс клубы болып ресми түрде ашылды. Бір жыл бедерінде грек-рим күресінен 26 жылдан кейін Әлем чемпионы атанған Айдос Сұлтанғали, бокстан Әлем Кубогының жеңімпазы Нұрсұлтан Алтынбек, бокстан Азия чемпионатының жеңімпазы мен жүлдегері Гүлсая Ержан, Зарина Толыбай, Ақбота Болат байрақты бәсекелерде ел намысын қорғап,аймақ абыройын асқақтатты. Саладағы толайым табыстарды облыстық дене шынықтыру, спорт және туризм басқармасының басшысы Бақтияр Артаев мәлімдеп берді.<blockquote>- Спорттық инфрақұрылымдарды қарқынды дамыту бағытындағы ауқымды жобалар жалғасын табуда. Соның бірі – облыс орталығында аумағы 25 мың шаршы метрлік көпбейінді «Қызылорда Арена» спорт кешенінің құрылысы қарқынды жүруде.Кешенде олимпиадалық стандартқа сай 50/25 метрлік жүзу бассейні және олимпиадалық спорт түрлеріне арналған жаттығу залдарымен қамтылады. Сонымен қатар, «Қазақстан Халқына қоғамдық қорының» демеушілігімен қаланың сол жағалауында ерекше қажеттілігі бар жандарға арнайы арналған дене шынықтыру-сауықтыру кешені салынуда. Бұл нысан желтоқсан айында спортшыларымыздың игілігіне табысталады. Аталған қордың көмегімен осы жылы Шиелі және Жалағаш аудандарында ангар типтес жаңа спорт нысандары салынып, ауыл тұрғындарына табысталды. Биыл сыр спортшылары біршама бәсекелерде үздік көрінді. Аймақ абыройын арқалаған азаматтарымызға облыс әкімдігі тарапынан арнайы шәкірт ақы төленуде. Өздеріңіз білетіндей, биыл облысымызда әлемдік және республикалық деңгейдегі спорттық іс-шаралар көптеп ұйымдастырылды. Атап айтсақ, өңірімізде алғаш рет Тәйімбет Көмекбаевты еске алуға арналған грек-рим күресінен халықаралық турнир, бокстан ҚР VI жастар спорттық ойындары, Нәлқожа Ергешбаевты еске алуға арналған тоғызқұмалақтан халықаралық турнир, Аралбай Махамбетовты еске алуға арналған шахматтан халықаралық турнир, ұлағатты ұстаз Велорий Пактың жүлдесіне арналған ауыр атлетикадан халықаралық турнир,велоспорттан ересектер арасында ҚР Кубогы, жасөспірімдер арасында ҚР чемпионаты, Аманбек Дмаилосовты еске алуға арналған бокстан халықаралық турнир, Олимпиада ойындары жеңімпаздарының қатысуымен алғаш рет Өнер орталығында ҚР «Спорт күні»мерекелік шарасы өтті,- деді Бақтияр Ғарифоллаұлы.</blockquote><img src="https://knadmin.beoblood.kz/uploads/Sport_salasynda_y_serpindi_zh_mystar_bayandaldy_bd506cd5a1.jpg" alt="Спорт саласындағы серпінді жұмыстар баяндалды.jpg">Туризм саласында да тиянақты жұмыстар бар. Биыл өңірдің туристік әлеуетін арттыру бағытында бірқатар ауқымды шаралар атқарылды. 2025 жылы жазғы маусымда облыста 13 шағын және 2 ірі демалыс орындары келушілерге сапалы қызмет көрсетті.<blockquote>- Өңірге келген туристерге сапалы сервистік қызмет көрсету – өңірдің имиджіне тікелей әсер ететіндігі белгілі. Осы ретте, туристердің қызмет көрсету саласындағы сұраныстарын қанағаттандыру үшін өңірде халықаралық деңгейдегі «Rixos» және «Pana» қонақ үйлерінің құрылысы қарқынды жүруде. Сонымен қатар, «Қалалық мәдени және демалыс паркі» қайта жаңғыртудан өтіп пайдалануға берілді. «ҚР Тұңғыш Президенті саябағына» қайта жаңғырту жұмыстары жүргізілуде. Одан бөлек, заманауи үлгіде жабдықталған жаңа парк пайдалануға берілді. Осы бағыттағы жұмыстарды одан әрі жетілдіру үшін Қорқыт ата әуежайы ішінен туристік бұрыш орнатылды. Биылғы жылдың маусым айынан бастап өңірде Қызылорда - Анталия бағытында халықаралық рейс ашылды. Тұрақты рейс Қызылорда және Анталия арасында аптасына бір рет қатынауда. Аталған бағыттың ашылуы өз кезегінде әуежайдың ұшу географиясын кеңейтіп, шетелдік туристерді көптеп тартуға ықпал етеді,- деді Бақтияр Ғарифоллаұлы.</blockquote>

Спорт саласындағы серпінді жұмыстар баяндалды

<a href="https://kyzylorda-news.kz/">Kyzylorda-news.kz</a> Қызылорда облысының Арал ауданында прокуратура органдары арқылы мемлекетке қайтарылған активтер есебінен Тоқабай және Абай елді мекендерінің тұрғындарын сумен қамтамасыз ету мақсатында су құбырының құрылысы жүргізілуде.Сонымен қатар, Ерімбетжаға елді мекенін орталықтандырылған су құбыры желісіне қосу жұмыстары аяқталуға жақын.Қазіргі уақытта ауыл тұрғындары суды жер асты құдықтарынан пайдалануға немесе шалғай орналасқан елді мекендерден тасуға мәжбүр.Аталған жобалардың іске асырылуы үйлерді орталықтандырылған су жүйесіне қосуға мүмкіндік беріп, тұрғындардың өмір сапасын арттырып, өңір инфрақұрылымының одан әрі дамуы мен жаңғыртылуын қамтамасыз етпек.Арал ауданы прокуратурасы мен аудан әкімдігінің басшылығы әлеуметтік нысандардың құрылыс барысымен танысты.Құрылыс жұмыстарын ағымдағы жылдың соңына дейін аяқтау жоспарлануда.Бүгінгі күні мемлекетке қайтарылған активтер есебінен Арал ауданында денсаулық сақтау және сумен жабдықтау салалары бойынша жалпы алты әлеуметтік нысан жүзеге асырылып жатқандығын атап өткен жөн.Нысандардың құрылысы мен мемлекет қаражатының мақсатты жұмсалуы прокуратураның тұрақты бақылауында.

 Арал ауданында мемлекетке қайтарылған активтер есебінен әлеуметтік нысандардың құрылысы басталды

<a href="https://kyzylorda-news.kz/">Kyzylorda-news.kz</a> «AMANAT»&nbsp;партиясының облыстық филиалының атқарушы хатшысы Ләйлә Төрешованың қатысуымен партияның облыстық филиалы жанындағы экологиялық кеңестің отырысы өтті. Онда қос басқарма өкілдерінің сайлауалды бағдарламада қамтылған жұмыстардың орындалуы бойынша есебі тыңдалды.Нақты айтсақ, облыстық денсаулық сақтау басқармасы өкілі халықты скринингтік зерттеулермен қамту және Арал теңізінің құрғаған ұлтанында сексеуіл екпелерін ұлғайту бағытындағы атқарылған жұмыстар бойынша табиғи ресурстар және табиғат пайдалануды реттеу басқармасы басшысының орынбасары хабарлама жасады.Арал теңізінің құрғаған ұлтанында сексеуіл екпелерін ұлғайту бойынша 2021-2024 жылдары барлығы 659,1 мың гектар алқапқа екпелер жасалып, оның 332,5 мың гектары облыстық деңгейде, қалған 326,6 мың гектары Орман шаруашылығы комитетімен атқарылған. Ағымдағы жылы 440,9 мың гектар аумаққа сексеуіл көшеттері мен галофитті тұқымдарын егу жоспарланып, 1071 мың гектар алқапқа топырақ зерттеу және жобалау жұмыстары жүргізілген.Осы бағытта Орман шаруашылығы комитеті арқылы көктемде 120 мың гектар жерге тұқым себу, 11,8 мың гектар жерге көшет отырғызу, 60 мың гектарға табиғи өсіп-өнуіне ықпал ету жұмыстары атқарылған. Сонымен қатар, биыл облыс бойынша 15 мың гектар алқапқа сексеуіл көшетін отырғызу, 85 мың гектар жерге қажетті 357 тонна галофитті тұқымдарды араластырып себу жоспарланып, қазіргі уақытта15 мың гектар жерге 4,5 млн. дана көшет толықтай отырғызылған.&nbsp;Басқарма басшысының орынбасары Қайрат Жансұлтанұлы жоспар жыл соңына дейін толық орындалады, - дейді.Күн тәртібіндегі екінші мәселеге келсек, облыстық денсаулық сақтау басқармасының Бастапқы медициналық-санитариялық көмекті ұйымдастыру бөлімінің басшысы Динара Сарманова скринингтік зерттеулерге 6 нозология бойынша жүргізіледі дейді.<blockquote>«Олар қанайналым жүйесінің аурулары, қант диабеті, глаукома, сүт безі, жатыр мойны және колоректальды обырын ерте анықтау. Ағымдағы жылы облыс бойынша жас шамаларына сәйкес 486 957 азаматты скринингтік тексеруден өткізу жоспарланып, 10 ай көлемінде олардың 81,2% тексеруден өткен. Нәтижесінде олардың 5,3 пайызынан науқастар анықталса, 15 пайызы диспансерлік есепке алынған. Сонымен қатар биыл медициналық тексеруге 143 456 тұрғын жоспарланып, 10 ай қорытындысымен олардың 88 пайызы толық қамтылды. Оларға диагностикалық зерттеулер, зертханалық зерттеулер жүргізіліп, бейінді мамандар кеңесі берілді»,- деді Динара Сарманова.</blockquote>Кеңес мүшелері жиында аймақ экологиясын жақсарту, денсаулық сақтау саласының негізгі көрсеткіштерінің төмендеу динамикасын сақтау және тұрғындарға сапалы медициналық көмектің қолжетімділігін арттыру, медициналық қызметтердің сапасын жақсартуға бағытталған ұсыныстарын айтты. Олар хаттамаланып, жауапты органдарға жолданатын болды.&nbsp;

Сайлауалды бағдарламада қамтылған жұмыстардың орындалуы талқыланды

<a href="https://kyzylorda-news.kz/">Kyzylorda-news.kz</a> Осы аптада Брюссельде визалық режимді жеңілдету жөніндегі келіссөзді бастадық.Бұл уағдаластық Қазақстан мен Еуропа азаматтары үшін өте маңызды екенін жақсы түсінемін. Келісімге қол қойылғаннан кейін азаматтарымыздың барыс-келісі, алыс-берісі жиілеп, білім алып, жұмыс істеуіне оңтайлы жағдай туады. Бұл халықтарымыз арасындағы достықтың нағыз символына айналады, – деді ол.Еуропалық Кеңес басшысы Самарқанд қаласында өткен «Еуропа Одағы – Орталық Азия» саммитінің нәтижесінде өңіраралық серіктестікті стратегиялық деңгейге жеткізу туралы шешім қабылданғанын атап өтті. Алқалы жиында көлік, энергетика, климат, су ресурстары, аса маңызды шикізат материалдары, цифрландыру және халықтар арасындағы байланысты кеңейту ынтымақтастықтың басым бағыттары ретінде белгіленгенін еске салды.Антониу Кошта халықаралық тәртіпке қауіп төндірген жаһандық шиеленістер мен қақтығыстар кезеңінде күш-жігерді ортақ мақсатқа жұмылдыру маңызды екеніне тоқталды.<blockquote>– Өздеріңізге белгілі, Еуропа Одағы соғысты тоқтату үшін Украинамен тығыз қарым-қатынас жасайды. Біз серіктестерімізбен бірге Украинада әділетті және мызғымас бейбітшілік орнату ұстанымын әрдайым қолдаймыз. БҰҰ Жарғысын және халықаралық құқық қағидаттарына негізделген тәртіпті дәйекті түрде қорғап келе жатқан Қазақстан тарапына алғыс айтамыз. Сондай-ақ Қазақстанның өңірлік тұрақтылықты қамтамасыз етудегі белсенді әрі конструктивті әрекетін, атап айтқанда, Сіздің Армения мен Әзербайжан арасындағы қақтығысты реттеуге көрсеткен қолдауыңызды құптаймыз. Бейбіт әрі өркендеген Оңтүстік Кавказ Еуропа мен Орталық Азия арасындағы байланыстарды тереңдетуде аса маңызды рөл атқарады, – деді Еуропалық Кеңес басшысы.</blockquote>Сонымен қатар мәртебелі мейман Қазақстан Президенті жүргізіп жатқан реформаларға жоғары баға берді.<blockquote>– Президент Қасым-Жомарт Тоқаевтың бастамасымен қолға алынған экономикалық, саяси және әлеуметтік реформалармен үйлесім тапқан Қазақстан қоғамының өрлеу қарқыны өзара ынтымақтастығымызды жаңа деңгейге көтеруге негіз болады. Біз бірлесе отырып, қазіргі сын-қатерлерді халықтарымыздың келешегіне қызмет ететін ортақ мүмкіндіктерге айналдыра алатынымызға сенімдімін, – деді Антониу Кошта.</blockquote>t.me/aqorda_resmi

Антониу Кошта Еуропа Одағы мен Қазақстанның серіктестігі нақты нәтиже беріп отырғанына назар аударды

<a href="https://kyzylorda-news.kz/">Kyzylorda-news.kz</a> &nbsp;БҰҰ деректері бойынша дүние жүзіндегі әрбір үшінші әйел өмірінде бір рет зорлық-зомбылыққа ұшырайды, ал әлемде оның әр алуан түрлерінен зардап шеккен 1,3 млрд адам бар. Бұл туралы кеше №290 орта мектептің коваркинг орталығында әйелдер мен қыздарға қатысты цифрлық зорлық-зомбылықты жою тақырыбында өткен дөңгелек үстелде айтылды.&nbsp; &nbsp;Тақырыпты тізгіндеуші бастауыш сынып мұғалімі Әселхан Зұлхарнаеваның айтуынша, бүгінгі таңдағы әсіресе үлкен актуалды мәселеге айналып отырған цифрлық кеңістіктегі қысым мен қатерден, кибербуллингтен, зорлық-зомбылықтан ешкім сақтандырылмаған. Бұл туралы біліп қана қоймай, алдын алу шараларын жүргізу өте маңызды.&nbsp;«Анаға тағзым» орталығының психологы Ақшарбат Бақытжанқызы өзі жұмыс істейтін орталықта бұл мәселеге байланысты іс-шаралар жүйелі түрде жүргізілетінін айтты. Отбасындағы зорлық-зомбылық, оқушыларды цифрлық кеңістіктегі түрлі қауіпті ойындардан қорғау тақырыптарында видеоөнім ұсынды.&nbsp;“Kyzylorda news” ақпараттық агенттігінің бас редакторы Айжан Жұмабекқызы балаларды қолындағы смартфоннан келетін цифрлық қауіп-қатерден қорғаудың бірден бір балама жолы ол ерте жастан мерзімді басылымдармен таныстырып, жүйелі түрде оқуға дағдыландыру деген мәселені алға тартты.&nbsp;<blockquote>«Ақпарат деген не, оның жақсы-жаманы қайсы, анық не жалғаны қайсы, қандай сұрақтармен бетпе бет келгенде бала қауіп-қатерді сезіну керек, мұның барлығы да ерте жастан сыни ойлау дағдысын қалыптастыруға байланысты. Сыни ойлау – барлық қауіптің, әсіресе цифрлық кеңістіктегі қауіптің алдын алады», – деді ол.</blockquote>&nbsp;Мектеп психологы Айжан Асарбекова мұғалімдердің өзі де бұл мәселеде басын қорғай алу керектігіне назар аудартты. «Мұны дер уақытында айту, дабыл қағу өте маңызды» – деді.&nbsp; &nbsp;Дөңгелек үстелді №290 орта мектеп директорының оқу ісі жөніндегі орынбасары Жанар Есқабылова қорытындылап, қонақтарға, қатысушыларға алғыс білдірді.&nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp; &nbsp; &nbsp;«Kyzylorda news»

16 күндік акция аясында: өзіңді цифрлық зорлық-зомбылықтан қорға!

<a href="https://kyzylorda-news.kz/">Kyzylorda-news.kz</a> &nbsp;Қазақстан мен Еуропалық Одақ арасындағы Кеңейтілген әріптестік пен ынтымақтастық туралы келісімге қол қойылғанына он жыл өте біздің қарым-қатынасымыз кең және серпінді серіктестікке айналды. Бұл серіктестік саяси диалогты, қауіпсіздік пен экономикалық даму саласындағы ынтымақтастықты, сондай-ақ көпжақты дипломатияны, өзара байланыстылық пен инновацияларды қамтиды. Геосаяси шиеленіс пен жаһандық белгісіздікпен ерекшеленетін дәуірде, Қазақстан ЕО үшін тұрақты, сындарлы және перспективалы серіктес болып қала береді.Көпжақты деңгейде біз БҰҰ Жарғысының қағидаттарын сақтау, бейбіт шешімдерді ілгерілету, ережелер мен ынтымақтастыққа, сондай-ақ елдердің егемендігі мен аумақтық тұтастығын құрметтеуге негізделген халықаралық жүйені нығайту мақсатында тығыз ынтымақтастықтамыз. Қазақстанның дипломатиялық іс-әрекеті – қақтығыстардың алдын алудан бастап жаһандық форумдарға қатысуға дейін – ЕО-тың бейбітшілікті ілгерілету, диалог орнату, шиеленісті азайту және халықаралық серіктестікті нығайту жөніндегі басымдықтарына сәйкес келеді. Осы ортақ көзқарастың арқасында біздің қарым-қатынасымыз барынша стратегиялық сипатқа ие болып, ынтымақтастығымыз қазіргі заманғы геосаяси контексте, мысалы санкцияларды айналып өтудің алдын алу мәселелері саласында анағұрлым өзекті болып отыр. Соғысты тоқтатып, Украинада жан-жақты, әділ және тұрақты бейбітшілік орнату – Қазақстан мен ЕО-тың ортақ басымдығы.Нақты нәтижелерді көріп отырған серіктестігіміздің тағы бір саласы – көлік өзара байланыстылығы. Транскаспий халықаралық көлік дәлізі Орталық Азия мен Еуропа арасындағы сенімді әрі тұрақты көпір ретінде стратегиялық маңызға ие болды. 10 миллиард еуродан астам еуропалық және халықаралық инвестициялардың арқасында Орта дәліз жылдамырақ, тиімдірек және негізінен цифрлық сипатқа ие болып келеді. Бұл бағытты нығайту тек сауда үшін ғана емес, сонымен қатар осалдықты азайтатын және Еуропаның аймақтағы басқа елдермен байланысын әртараптандыратын барынша орнықты еуразиялық көлік инфрақұрылымы архитектурасын құру үшін де өте маңызды.Экономикалық байланыстар серіктестігіміздің берік және маңызды тірегі болып қала береді. Қазақстанда 4000-нан астам еуропалық компания жұмыс істейді, ал «Horizon Europe» және «Erasmus+» бағдарламалары аясындағы ынтымақтастық, сондай-ақ кеңейіп келе жатқан тұлғааралық байланыстар біздің ұзақ мерзімді жаңғыртуға салып жатқан инвестицияларымыздың айқын көрінісі. Визалық режимді жеңілдету туралы келіссөздер іскерлік, инновациялық және академиялық байланыстарды дамытуға ықпал ете отырып, осы өзара іс-қимылды одан әрі нығайтады. Серіктестігіміздің тағы бір маңызды әрі стратегиялық аспектісі – Қазақстан мен Еуропаның «жасыл» және цифрлық көшуінің негізінде жатқан аса маңызды шикізат, энергия ресурстары мен технологияларды жеткізуді қамтамасыз ету.Жақында орын алған жеткізудегі іркілістер жаһандық жеткізушілердің аз санына шамадан тыс тәуелділіктің тәуекелдерін көрсетті. Қазақстан-ЕО әріптестігінің осы проблемаларды шешу үшін бірегей мүмкіндіктері бар. Ол энергетикалық әртараптандыруды жеделдетуге, жаңартылатын энергия көздеріне инвестицияларды ұлғайтуға, технологиялық дамуды қолдауға және ЕО аса маңызды деп санайтын шикізаттың елеулі үлесін жеткізуге ықпал етуі мүмкін. Шикізат, аккумуляторлық батареялар мен жасыл сутек жөніндегі стратегиялық серіктестігіміз, сондай-ақ 2025-2026 жылдарға арналған бірлескен жол картасы осы әлеуетті жүзеге асыру үшін берік негіз қалайды.Біздің болашақтағы ортақ міндетіміз өңдеу және қайта өңдеу саласындағы ынтымақтастығымызды тереңдететін, сондай-ақ геологиялық барлау, аккумуляторлық батареяларды қайта өңдеу және экологиялық таза сутегі сияқты салалардағы инновацияларға ықпал ететін стратегиялық және тиімділігі жоғары жобаларды айқындау болып табылады. Бұл тек материалдар туралы ғана емес, сонымен қатар ЕО-тың бәсекеге қабілеттілігін нығайта отырып, Қазақстанның өнеркәсіп секторын жаңғыртуға ықпал ететін тұрақты, болашаққа бағытталған құн тізбектерін дамыту туралы.Кеңейтілген әріптестік пен ынтымақтастық туралы келісімге 10 жыл бұрын қойылған және қазір ынтымақтастығымыздың бағыты нақты айқындалған. Біз бейбітшілікті ілгерілететін, жаһандық ынтымақтастықты нығайтатын, орнықты байланыстарды күшейтетін және Қазақстан мен Еуропаның ұзақ мерзімді тұрақтылығын қолдайтын серіктестік құрып жатырмыз».Келесі онжылдық іске асыру белгісімен өтуі тиіс: қосылған құнды құру тізбектерін нығайту, инфрақұрылымды жаңғырту, технологиялық ынтымақтастықты тереңдету және нақты бірлескен жобаларды жүзеге асыру. Қазақстан бұл жолда сенімді серіктес болып табылады. «Бірге біз ортақ қиындықтарды ортақ артықшылықтарға айналдырып, екі тарап үшін де қауіпсіз, тұрақты және бәсекеге қабілетті болашақты қалыптастыра аламыз.Антониу Кошта,Еуропалық кеңес президенті

Еуропалық Одақ пен Қазақстан сын-қатерлерді ортақ мүмкіндіктерге айналдырып келеді

<a href="https://kyzylorda-news.kz/">Kyzylorda-news.kz</a> Мемлекет Басшысының тапсырмасын орындау мақсатында прокуратура құқық қорғау және арнайы органдармен бірлесіп, есірткі бизнесіне қарсы күрес бойынша күшейтілген жұмыс жүргізуде. Арнайы прокурорлар интернеттегі есірткі бизнесіне қарсы күрес бойынша бірқатар ірі істерді тергеп-тексеруді аяқтап, сотқа <a href="https://x.com/asylov_genpr/status/1996447326114852995?s=46&amp;t=-bfM9JiZE6cmi0Fasd556w">жіберді.&nbsp;</a>Шымкентте Telegram мессенджері арқылы жұмыс істейтін халықаралық есірткі желісінің жолы кесілді.Тергеп-тексеру басқа құқық қорғау және арнайы органдармен бірлесіп жүргізілді.Прокуратураның бастамасымен қазақстандық жедел- &nbsp;тергеу тобына халықаралық деңгейде осы жұмыста тәжірибесі бар АҚШ-тың есірткі бизнесіне қарсы күрес ведомствосының (DEA) қызметкерлері енгізілгенін атап өткім келеді. &nbsp;Қылмыстық схемаға 300-ден астам адам қатысқан.Тек екі айыпталушының транзакциялары бойынша айналым 7 миллион АҚШ долларынан асқаны белгілі болды.24 адам ұсталды, олардың арасында Ресей, Өзбекстан және Ауғанстан азаматтары бар.500 миллион теңгеден астам мүлік тәркіленді.Ақша «дропперлердің» банк карталары және лицензияланбаған криптобиржалары арқылы аударылып отырған.Криптовалюталардың түпкілікті алушылары — шет елдердің азаматтары.Сондай-ақ тергеу барысында Шымкент аумағынан екі есірткі зертханасы табылып, олар жойылды. Олардан:– 6,1 кг дайын мефедрон;– 330 грамм сатуға арналған оралған есірткі;– 2,1 тонна прекурсор;– есірткі өндіруді қамтамасыз етіп отырған зертханалық жабдықтар жиынтығы алынды.Қылмыстық желі «Карбон», «DDD_Shym» және басқа Telegram арналарын пайдаланған, олар арқылы есірткі таратылып қана қоймай, сонымен қатар «алғашқы қолданушыларға» оларды өндіру әдістерін үйреткен.Кейбіреулер прекурсорларды жеткізетін және айналымды бақылайтын негізгі желімен байланысын сақтай отырып, өз арналарын ашты.Осындай тәсілдер еліміздің басқа өңірлерінде тергеп-тексеруде қолданылды. Ұлытау мен Маңғыстау облысының арнайы прокурорлары бастаған жедел-тергеу топтары синтетикалық есірткі сатуға әлеуметтік желілерді пайдаланатын есірткі сатушылардың екі таралған желісінің қызметін әшкереледі. Екі істе сотқа жіберілді.&nbsp;Осылайша, Ұлытау облысында «Kaef Mafia» Telegram арнасы арқылы есірткі сатқан дүкеннің жұмысы тоқтатылды. 6 айыпталушы қамауға алынды, цифрлық активтерді, криптовалюта әмияндарын және басқа да құндылықтарды қосқанда 3,2 миллиардтан астам теңге мемлекет кірісіне айналдырылды. Маңғыстауда «Dune-Operator 24/7» есірткі дүкенінің әрекеттерінің жолы кесілді.Есірткі сатудан түскен қолма-қол ақшаны банкке тапсыру кезінде арнайы прокурор облыстың ЭТД және ПД қызметкерлерімен бірлесіп, Шымкентке барған кезде 1 миллиард 155 миллион теңге және 176 мың АҚШ долларын тәркілеген.Сонымен қатар сот бір жеке кәсіпкердің банктік шотына есірткі бизнесінен түскен 1 миллиард теңгеге және 734 228 АҚШ доллары (USDT) бар криптоәмиянға тыйым салды.Есірткі бизнесіне қарсы күрестегі бұл операциялар Қазақстанның құқық қорғау және арнаулы органдары қызметкерлерінің жарқын, жүйелі және жанкешті жұмысының үлгісі болып табылады.&nbsp;Мыңдаған адамдар, сондай-ақ олардың отбасылары осы заманның кесапатының зиянды ықпалынан қорғалуда. Қазақстанның құқық қорғау және арнаулы органдары азаматтардың құқықтарын қорғау және тыныштығын қамтамасыз ету жұмыстарын жалғастыруда.Сурет:&nbsp;​saryarka-samaly.kz​​​

Есірткі бизнесіне қарсы күрес бойынша күшейтілген жұмыс жүргізілуде

<a href="https://kyzylorda-news.kz/">Kyzylorda-news.kz</a> Қызылорда қаласының астана болғанына 100 жыл толуы және Қазақстан халқы Ассамблеясының 30 жылдығына орай Көмекбай Қаракөзов атындағы №235 мектеп-гимназиясында кездесу өтті. Шараға өңірдегі тарих, мәдениет және қоғамдық келісім бағытында еңбек етіп жүрген сарапшылар арнайы шақырылды.Кездесуге облыстық ҚХА жанындағы ғылыми-сарапшылық топ мүшелері, «Қоғамдық келісім» КММ директорының орынбасары, философия докторы (PhD) Дәулет Омаров, тарих ғылымдарының магистрі Бақытжан Ахметбек, «Қоғамдық келісім» КММ бөлім басшысы Ерсұлтан Есов және «Атамекен» мұражайының жетекшісі Күлаш Алматшақызы қатысты.Жиын барысында Сыр өңірінің тарихи даму кезеңдері, 1925–1929 жылдары Қызылорданың астаналық кезеңі және бұл уақыттың ел тарихындағы орны кеңінен сөз болды. Сарапшылар Алаш қайраткерлерінің мемлекет құру ісіне сіңірген еңбегіне тоқталып, олардың білім мен ғылымды, ұлттық бірлік пен мәдени өрлеуді басты құндылық ретінде ұстанғанын атап өтті.Сонымен бірге кездесуде өңір аумағындағы археологиялық ескерткіштерді сақтау, тарихи-мәдени мұраны насихаттау, жастардың туған өлке тарихына қызығушылығын арттыру мәселелері жан-жақты талқыланды. Оқушылар көне қалалар, батырлар мен тұлғалар жайлы сұрақтар қойып, мамандардан толыққанды жауап алды.

Өңір тарихы сөз болған кездесу

<a href="https://kyzylorda-news.kz/">Kyzylorda-news.kz</a> Вице-премьер Қанат Бозымбаев су ресурстары және ирригация министрі Нұржан Нұржігітов, ауыл шаруашылығы министрі Айдарбек Сапаровпен бірге Қызылорда облысына жұмыс сапарымен барып, фермерлермен алдағы вегетациялық кезеңге дайындық, ауыл шаруашылығы дақылдарының егіс алаңдарын әртараптандыру және су үнемдеу технологияларын енгізу мәселелерін талқылады.Кездесуде Сырдария өзені бассейніндегі судың аздығы туралы қалыптасып отырған ахуал талқыланды. Нарын–Сырдария каскадына келіп түсетін су көлемі айтарлықтай төмендеген. Бұл келесі жылғы вегетациялық кезеңде су тапшылығы қаупін тудырады.Оның салдарын барынша азайту мақсатында Су ресурстары министрлігі су қоймаларының жұмыс режимдеріне қатысты бірнеше болжамдық нұсқа әзірледі. Су тым аз келген жағдайда ресурстарды қайта бөлу және лимиттерді түзету қажет болатын сценарийлер пысықталды.Су ресурстары шектеулі болған жағдайда ауыл шаруашылығы өндірісінің өнімділігін арттыру және азық-түлік қауіпсіздігін қамтамасыз ету мақсатында Ауыл шаруашылығы министрлігі ылғалды көп қажет ететін дақылдар алқаптарын қысқарту және құрғақшылыққа төзімді, аз су қажет ететін дақылдарды енгізу арқылы егіс алқаптарын әртараптандыру жұмыстарын жалғастырып келеді.Барлық су тұтынушылар судан тапшылық көрмеуі үшін және Сырдария өзенінің төменгі ағысында төтенше жағдай туындауына жол бермеу мақсатында Қызылорда облысында 2026 жылы күріш егістіктерінің алаңы 70 мың гектардан аспауға тиіс.Бір айта кететіні, егіс алқаптары жыл сайын оңтайландырылып жатқанына қарамастан, орташа өнімділік өсіп келеді (2024 жылы 85 мың га алқапта гектарынан 58 центнер, 2025 жылы 80 мың га алқапта гектарынан 58,1 центнер алынды). Бұған жаңа күріш сұрыптарын енгізу және заманауи техниканы пайдалану септік етіп отыр.Сондай-ақ өңірде су үнемдеу технологияларын қолданатын егістік көлемі артып келеді. Егін алқаптарында судың ысырап болуының алдын алу үшін лазерлік тегістеу жұмыстары жүргізілуде. Бұл әдіс суды 20%-ға дейін үнемдеп, өнімділікті арттыруға мүмкіндік береді. Биыл 60 мың гектар күріш алқабы тегістелді.Заманауи су үнемдеу технологияларын енгізу тәуекелдерді азайтып, АӨК-тің орнықты дамуын қамтамасыз етеді. Бүгінде бұл технологиялар республика бойынша 500 мың гектардан астам жерде қолданылуда, ал 2030 жылға қарай бұл көрсеткішті 1,3 млн гектарға дейін (суармалы жерлердің шамамен 70%-ы) жеткізу жоспарлануда. Аталған мақсаттарға жету үшін Үкімет кешенді шаралар қабылдауда, соның ішінде субсидиялау мәселелері де шешілуде.2026–2028 жылдарға арналған республикалық бюджеттің шеңберінде инвестициялық шығындарды өтеуге бағытталған жалпы трансферттер көзделген, ал қаржыландыру көлемі 215 млрд теңгеге дейін ұлғайды.<img src="https://knadmin.beoblood.kz/uploads/Vicze_premer_2_f4fc575151.jpg" alt="Вице-премьер 2.jpg"><blockquote>«Алдағы вегетациялық маусымда жоғарыдан келетін су көлемі айтарлықтай азаюы мүмкін. Ондай жағдайда су үнемдейтін технологиялар тыңайтқыштар мен өсімдікті қорғау құралдарымен қатар өсімдік шаруашылығы жүйесінің міндетті элементі болуы тиіс. Қызылорда облысының әкімдігі Су ресурстары және ирригация министрлігі, Ауыл шаруашылығы министрлігі және ғылыми ұйымдармен бірлесіп, инновациялық препараттарды қолдану үшін кемінде 100 гектар жер телімін анықтап, оларды жергілікті бюджет қаражаты есебінен қаржылық қолдауды қамтамасыз етуі қажет», — деді Қанат Бозымбаев.</blockquote>Кездесуде фермерлерге суды пайдалану ашықтығын қамтамасыз ету және су ресурстарын есепке алуды одан әрі цифрландыру үшін енгізіліп жатқан биллинг жүйесі туралы да айтылды. Бұл — фермерлерді сумен қамтудың толық циклін біріктіретін бірыңғай цифрлық платформа. Оның ішінде өтінім беру және келісімшарт жасасудан бастап, нақты тұтынуды есепке алу және төлем жасауға дейінгі функциялардың барлығы бар. Жүйе процестерді оңтайландырады, суды бөлу мен есеп айырысудың ашықтығын қамтамасыз етеді, сондай-ақ нақты көлемдерді дәл есепке алуға мүмкіндік береді.&nbsp;Вегетациялық кезең басталғанға дейін Қызылорда облысының әкімдігіне диқандар арасында тиісті түсіндіру жұмыстарын жүргізу тапсырылды. «Қазсушар» РМК-ға ылғалды көп қажет ететін дақылдарға бекітілген лимиттерге қатаң сәйкес келетін су беру шарттарын жасасу, сондай-ақ құқық қорғау органдарымен бірлесіп, алдағы вегетациялық кезеңде «қара су нарығымен» күресті күшейту тапсырылды.Су шаруашылығындағы ахуал өзгерген жағдайда Су ресурстары және ирригация министрлігіне 2026 жылғы вегетациялық кезеңге арналған өңірлер бойынша су тұтыну лимиттерін 2026 жылдың 1 ақпанына дейін Ауыл шаруашылығы министрлігіне жолдау жүктелді. Ал Ауыл шаруашылығы министрлігіне 2026 жылдың 1 наурызына дейін ылғалды көп қажет ететін дақылдардың егістік құрылымын нақты қолжетімді суару суының көлеміне сәйкес түзету тапсырылды.<img src="https://knadmin.beoblood.kz/uploads/Vicze_premer_4_f95cd03343.jpg" alt="Вице-премьер 4.jpg">

Ауыл шаруашылығы саласына қатысты бірқатар мәселелер қаралды

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрінің орынбасары Қанат Бозымбаев, ҚР Су ресурстары және ирригация министрі Нұржан Нұржігітов , ҚР Ауыл шаруашылығы министрі Айдарбек Сапаров , ҚР Су ресурстары және ирригация вице-министрі Талғат Момышев, ҚР Ауыл шаруашылығы вице-министрі &nbsp;Азат Сұлтанов, ҚР Ұлттық экономика вице-министрі &nbsp;Бауыржан Омарбеков Сыр еліне жұмыс сапары аясында жақында іске қосылған «Тұмар» шағын өнеркәсіптік аймағының жұмысымен танысты.Үкіметтің шағын және орта бизнесті қолдау мақсатында жүзеге асырып жатқан бастамаларының бірі – шағын өнеркәсіптік аймақтарды құру «Тұмар» жеке кәсіпкерлігінің бастамасымен Сырдарияның жол жағалауында салынған тамақ өнеркәсібі бағытындағы шағын өнеркәсіптік аймақ қазан айында ашылып, кәсіпкерлер игілігіне берілді. Жоба құны – 526 млн теңге, мұнда азық-түлік өнімдерін өндіруге бағытталған 8 өндірістік цех іске қосылып, 50-ден астам адам тұрақты жұмыспен қамтылды. Кәсіпкерлер өз жұмысын бастау үшін «Қызылорда» өңірлік инвестициялық орталығынан жылдық 3 пайыздық мөлшерлемемен 157 млн теңге жеңілдетілген несие алды.Айта кетейік, аймақта экономиканы әртараптандыру мақсатында 2,8 трлн. теңгеге 98 жоба жүзеге асырылып, 12 мыңнан астам жұмыс орны ашылады. Биыл инвестициялық жобалар пулы аясында 54 жоба жоспарланған. Қазіргі уақытта 36-сы жұмысын бастап кетті. Олардың қатарында кірпіш, айна, күріш зауыттары, нан-тоқаш, кондитерлік, печенье және макарон өнімдерін өндіру кешені, онкологиялық диагностикалық орталық, &nbsp;шағын өнеркәсіптік аймақ, «Syr darya» коммуналдық базары &nbsp;және сауда үйлері бар.&nbsp;Жыл соңына дейін қуаттылығы 240 мегаватт болатын заманауи жылу-электр станциясы, жолаушылар вагондарын жөндеу кешені, түйе сүтінен жылына 392 тонна құрғақ ұнтақ өндіретін зауыт, тағы бір шағын өнеркәсіптік аймақ және 2 күн-электр станциясы іске қосылады.Өңдеу өнеркәсібін дамыту, жаңа жұмыс орындарын құру мақсатында құны &nbsp;553 млрд. 600 млн. теңге болатын 14 жобаның құрылысы басталуда.

Үкімет басшысының орынбасары «Тұмар» шағын өнеркәсіптік аймағының жұмысымен танысты

<a href="https://kyzylorda-news.kz/">Kyzylorda-news.kz</a> Қазан айынан бастап теңгенің долларға шаққандағы айырбастау бағамы 499-500 теңге деңгейіне дейін нығайып, шамамен 9%-ға өскені байқалады. Ұлттық банктің мәліметінше, ұлттық валютаның күшеюі қолайлы сыртқы ахуал, дәйекті макроэкономикалық саясат және инвесторлардың оң күтулері нәтижесінде жүзеге асып отыр, деп хабарлайды <a href="https://baq.kz/ulttyq-bank-tenge-kursyna-qatysty-malimdeme-zhasady-200026783/">BAQ.KZ тілшісі.</a>Мұнайдың әлемдік бағасы барреліне 60 АҚШ долларынан жоғары деңгейде тұрақты қалыптасқан. Сонымен қатар, АҚШ Федералды резерв жүйесінің мөлшерлемені төмендету циклі жаһандық доллар индексінің 8,3%-ға әлсіреуіне ықпал етті. Нәтижесінде дамушы нарықтар валюталары да осындай деңгейде нығайды. Бұл халықаралық инвесторлардың активтерге, соның ішінде Қазақстан нарығына қызығушылығын арттырып отыр.Ұлттық банк Үкімет және Қаржы нарығын реттеу агенттігімен бірлесіп, 2026-2028 жылдарға арналған макроэкономиканы тұрақтандыру және халықтың әл-ауқатын арттыру жөніндегі іс-қимыл бағдарламасын іске асыруда. Оның мақсаты – бюджет шығыстарының тиімділігін арттыру, инфляцияны төмендету, сұраныс пен ұсыныс арасындағы теңгерімді қалпына келтіру және орнықты экономикалық өсімге жағдай жасау.Ақша-кредит саясаты нарық сенімін күшейттіҰлттық банктің қатаң әрі дәйекті шешімдері инфляциялық күтулерді қайта қарауға және теңгедегі қаржы құралдарының нақты кірістілігін арттыруға әсер етті. Бұл бейрезиденттер үшін де олардың тартымдылығын жоғарылатты.Қазан айының басынан қарашаның соңына дейін шетелдік инвесторлардың Қазақстанның мемлекеттік бағалы қағаздарына салған портфельдік инвестициялары 1,1 млрд АҚШ долларына артып, тарихи максимум – 3,6 млрд долларға жетті. Жыл басынан бергі өсім 1,5 млрд долларды құрады.Бұл қарыздық құралдардың құнын төмендетті: желтоқсанда 9 жылдық МБҚ 16,1% мөлшерлемемен орналастырылды (қазанда – 17,2%).Теңгенің нығаюы инфляцияны тежеуге әсер етудеҰлттық банк валюта нарығын тұрақты бақылауда ұстап отыр. Инфляцияның негізгі факторларының бірі – импорт үлесі жоғары тауарлар бағасы. Осы тұрғыдан теңгенің нығаюы сыртқы баға қысымының ішкі нарыққа берілуін шектейді және баға тұрақтылығын қолдайды.<blockquote>Біз еркін өзгермелі айырбас бағамы режимін сақтаймыз және теңгенің қисынды құбылмалылығына жол береміз. Валюта нарығында алыпсатарлыққа себеп болатын факторлар байқалмайды, – деп мәлімдеді Ұлттық банк.</blockquote>Айырбастау бағамының қазіргі динамикасы – экономикалық саясаттың сапалы жүргізіліп жатқанын және инвесторлар сенімінің артуын көрсетеді. Бұл Қазақстанға портфельдік инвестициялар ағынын әрі қарай да ұлғайтуға мүмкіндік береді.Фото: Александр Павский/Казинформ

Қазақстан және Қызылорда облысының жаңалықтары