<a href="https://kyzylorda-news.kz/">Kyzylorda-news.kz</a>.&nbsp;Қызылордалық оқушылар енді аспан денелерін жаңа обсерватория құрылғысы арқылы көре алады. Президент тапсырмасы аясында Балалар жылында Қызылорда қаласындағы үздік білім беру ұйымы атанған №264 мектепте жаңа обсерваториялық орталық пен балалар киностудиясы ашылды. Өткен жылы облыс әкімінің сыйақысы ретінде 34 миллион теңгенің сертификатын иеленген білім ошағын қолдау нәтижесінде балалар астрономия іліміне еніп, мектеп студиясы арқылы журналистикаға бет бұра алады.
Наурыз мерекесі қарсаңында балалардың игілігіне бағытталған заманауи кабинеттердің ашылу рәсіміне облыс әкімі Гүлшара Әбдіқалықова қатысып, дарынды және өнертапқыш оқушылармен пікірлесті.
Обсерваторияда балалар телескоп, процессор, спектроскоп, арнайы призма мен Vive pro 2 шлемі секілді құрал-жабдықтармен жұмыс істей алады. Ал, киностудия арқылы сапалы бейнеконтент түсіруге арналған заманауи жабдықтар қойылып, балалардың шығармашылық жұмыстармен еркін айналысуына жағдай жасалды. Сондай-ақ, «Bio Master» кабинеті арқылы оқушылар қолдан макет жасап, жергілікті өлкетану іліміне тереңдей түседі. 
Ал, жаңадан ашылған инклюзивті кабинетте ерекше қолдауды қажет ететін балалар ребилитациядан өтеді. Мұнда сенсорлық кабинет және емдік дене шынықтыру бөлмелері қарастырылған.
Облыс әкімі балалардың танымдық және шығармашылық бағытта жұмыс істеуіне жол ашатын кабинеттердегі құрылғылар арқылы озық идеяларды іске асырып, жаңа жобалар жасауға жол ашатынын атап өтті.
Айта кетейік, бұл оқу орны жапон елшілігінің «Шөп тамыры» бағдарламасы аясында 2 млн.теңгенің грантын иеленіп, қала маңындағы «Сабалақ», «Эдельвейс» саяжай аудандарынан қатынап оқитын оқушыларды тасымалдауға «ПАЗ» автобусы сатып алды. Ал, алдағы уақытта «Газель» автокөлігін алмақ.
<img src="https://kyzylorda-news.kz/wp-content/uploads/2022/03/276052560_264461102541808_3738063631553110381_n.jpg" alt="" />
<img src="https://kyzylorda-news.kz/wp-content/uploads/2022/03/276099243_264460932541825_3885469076931672959_n.jpg" alt="" />
<img src="https://kyzylorda-news.kz/wp-content/uploads/2022/03/276110570_264461119208473_3741019488801231502_n.jpg" alt="" />
<img src="https://kyzylorda-news.kz/wp-content/uploads/2022/03/276142023_264461219208463_6203179656763386620_n.jpg" alt="" />
<img src="https://kyzylorda-news.kz/wp-content/uploads/2022/03/276161932_264461195875132_4290472681581324507_n.jpg" alt="" />
<img src="https://kyzylorda-news.kz/wp-content/uploads/2022/03/276303193_264461275875124_5436567741617414219_n.jpg" alt="" />
<img src="https://kyzylorda-news.kz/wp-content/uploads/2022/03/275960515_264461185875133_1739475033912929424_n.jpg" alt="" />
<img src="https://kyzylorda-news.kz/wp-content/uploads/2022/03/276184115_264461299208455_1094004478961107870_n.jpg" alt="" />

Қызылордалық үздік мектепте обсерватория мен киностудия ашылды

<a href="https://kyzylorda-news.kz/">Kyzylorda-news.kz</a>. Бүгін «Достық» үйінде Қызылорда облысының ішкі саясат басқармасының кеңейтілген мәжілісі өтті. Оған арнайы облыс әкімінің орынбасары Қайрат Нұртай және облыс ардагерлері, зиялы қауым өкілдері, үкіметтік емес ұйымдар мен БАҚ өкілдері, этномәдени бірлестіктердің жетекшілері мен белсенділері, волонтерлар, қала және аудан әкімдерінің орынбасарлары, ішкі саясат пен мәдениет бөлімдерінің басшылары және басқармаға қарасты мекеме қызметкерлері қатысты.
Жиында басқарма басшысы Мира Жомартқызы өткен жылдың қорытындысы мен атқарылған жұмыстарға тоқталып, негізгі міндеттерді баяндады.
<blockquote>
 Былтыр ішкі саясат саласында үлкен өзгерістер орын алды. Құрылымның құрамы өзгеріп, жұмыс істеу шеңбері артты. Жаңа функциялар беріліп, жастармен жұмыс жасау және Қазақстан халқы ассамблеясы хатшылығы және этносаралық қатынастар бөлімдері ашылып, бұқаралық ақпарат құралдары мен интернет ресурстар бөлімдері біріктірілді. Атап айтқанда, облыстық «Жастар ресурстық орталығы» және «Қоғамдық келісім» мекемелері басқарманың құрылымына еніп, «Рухани жаңғыру орталығы» коммуналдық мекеме ретінде қайта құрылды, – деді басқарма басшысы Мира Жомартқызы.
</blockquote>
<img src="https://kyzylorda-news.kz/wp-content/uploads/2022/03/276134485_1493432907718883_738886838685223316_n.jpg" alt="" />
Қазалы ауданы әкімін орынбасары Дәурен Тілеумбетов пен Шиелі ауданы әкімінің орынбасары Алмасбек Есмаханов қоғамдық саяси тұрақтылықты қамтамасыз ету және ұлтаралық қатынастарды дамыту мақсатындағы жұмыстарды баяндады. Сондай-ақ, басқармаға қарасты мекемелер мен ұйымдардың өкілдері мінберде сөз сөйлеп, өз ұсыныстарын ортаға салды. Кеңейтілген отырыста «Халықаралық «Қазақ тілі» қоғамы» Қоғамдық бірлестігі облыстық филиалының төрағасы, «Тіл сақшысы» газетінің бас редакторы Сәдуақас Аңсат қазақ тілінің мәртебесін арттыруда ішкі саясат саласының рөлі маңызды екенін атап өтті. Жиын соныңда облыс әкімінің орынбасары Қайрат Нұртай Мемлекет басшысының Жолдауына айтылған міндеттерді жүзеге асыруда бірлесе жұмыс істеуге шақырды.
<img src="https://kyzylorda-news.kz/wp-content/uploads/2022/03/276122838_1493432934385547_6066965261768403165_n.jpg" alt="" />

Қызылорда: Облыстық ішкі саясат басқармасының кеңейтілген мәжілісі өтті

<a href="https://kyzylorda-news.kz/">Kyzylorda-news.kz</a>. Бүгін қала әкімдігінің ұйымдастыруымен Ақжарма ауылдық округінде 22 наурыз – Ұлыстың Ұлы күні Наурыз мерекесіне орай кент және ауылдық округ жастарының басын қосқан «Qosyl думан» мерекелік шарасы өтті.
Мерекелік шарада ауыл жастары арқан тартыс, аударыспақ, теңге ілу, асық, гір көтеру сынды ұлттық спорттың түрлері бойынша сайысқа түсті.
Бұқаралық спортты дамыта отырып, жастардың ұлттық ойынға деген қызығушылықтарын арттыру мақсатында ұйымдастырылған бұл шарада командалық есеп бойынша І орынды – Қосшыңырау ауылдық округінің жастары жеңіп алса, ІІ орынды – Ақжарма, ІІІ орынды – Ақсуат ауылдық округінің жастары иемденді. Сайыс жеңімпаздарына алғыс хат, диплом және бағалы сыйлықтар табысталды.
Шара барысында қатысушылар мереке айшығының бірі болып саналатын ағаш отырғызу ісіне қатысып, ондаған түп көшет егілді. Көпшілікке Наурыз көже ұсынылып, бауырсақ таратылды.
<img src="https://kyzylorda-news.kz/wp-content/uploads/2022/03/276047759_3048557938744277_5999479113269715968_n.jpg" alt="" />
<img src="https://kyzylorda-news.kz/wp-content/uploads/2022/03/276073278_3048558115410926_3278966736197665624_n.jpg" alt="" />
<img src="https://kyzylorda-news.kz/wp-content/uploads/2022/03/276232112_3048558488744222_570257230449911562_n.jpg" alt="" />
<img src="https://kyzylorda-news.kz/wp-content/uploads/2022/03/276311414_3048558042077600_8283430143960377576_n.jpg" alt="" />

Жастар арасында «Qosyl думан» ұлттық ойындар сайысы өтті

<a href="https://kyzylorda-news.kz/">Kyzylorda-news.kz</a>. Елімізде 2022 жылы Наурыз мейрамына байланысты жалпыұлттық ауқымдағы негізгі іс-шаралар 21 наурызда мемлекет басшысының Қазақстан халқын құттықтауынан бастау алады. Бұл туралы мәдениет және спорт вице-министрі Нұрғиса Дәуешов орталық коммуникациялар қызметінде өткен брифингте мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
Сондай-ақ тазалық пен экологияға, мейірімділік пен қайырымдылыққа үндейтін іс-шаралар жоспарланған.
<blockquote>
 “Наурыз – тазалық пен экологияға қамқорлық мерекесі. Мереке қарсаңында бүкіл ел бойынша жаппай ағаш отырғызу және елді мекендер мен аулалардың аумағын тазарту бойынша “Таза табиғат” республикалық акциясы басталады. Ағаш отырғызу ауа райына қарай жүргізіледі, соған байланысты кей аймақта акцияны кейінірек ұйымдастыруға болады”, – дейді вице-министр.
</blockquote>
Сондай-ақ, биыл отбасыларда, білім беру ұйымдарында және еңбек ұжымдарында “Наурыз кәдесі”, “Наурыз қоржын” сыйлықтарын тарту ету дәстүрін енгізіп, балалар аудиториясына басымдық беру көзделген.”23 наурызда бүкіл ел бойынша “Қайырымды ұлт” ауқымды қайырымдылық акциясы ұйымдастырылады, оның аясында балалар үйінің тәрбиеленушілері, мүмкіндігі шектеулі балалар мен қарттар үшін көшпелі концерттерді өткізу қарастырылған. Акцияға еріктілер, мәдениет өкілдері, меценаттар тартылады”, – деді Нұрғиса Дәуешов.
<a href="https://sputnik.kz/20220318/nauryz-meyramy-toylanady-23619013.html#"></a>Бүкіл өңір өзінің жоспарын әзірледі. Әрбір мәдени ошақтың өзінің жылдық жоспарында Наурыз мейрамына қатысты концерт, спектакльдері, қоғамдық шаралары бар. Өңірлер әкімдіктермен бірлесе іске асырады, деді вице-министр.
Брифингке қатысқан Түркістан облысының мәдениет басқармасының басшысы Әзімхан Қойлыбаев және Нұр-Сұлтан қаласы мәдениет басқармасының басшысының орынбасары Нұран Қамзиннің айтуынша, екі өңірде де мейрамды тойлауға қаржы бөлінбеген.
<blockquote>
 “2021 жылы Наурыз мейрамын тойлауға мемлекет тарапынан ақша бөлінген жоқ. Ол кезде демеушілер көмегімен қаланың сыртында, этноауылда тойланды. Биыл да облыс тарапынан да, қала тарапынан да бір де бір тиын Наурызды тойлауға бөлінген жоқ. Барлығына демеушілер бастамашы болып, іске асырылып жатыр”, – деді Әзімхан Қойлыбаев.
</blockquote>
Нұр-Сұлтан қаласында да жағдай дәл осындай. Ел астанасында Наурызды тойлауға қаражат бөлінбеген.
“Барлық іс-шара ведомствоға бағынысты ұйымдардың әртістері мен шығармашылық ұжымдардың қатысуымен өтеді”, – деді елорданың мәдениет басқармасының басшысының орынбасары.
<a href="https://sputnik.kz/20220318/nauryz-meyramy-toylanady-23619013.html#"></a>Сондай-ақ 25 наурызда Нұр-Сұлтан қаласы әкімдігінің ұйымдастыруымен “Наурыз сыйлығы” ұлттық премиясы табысталады. Бұл премия былтырдан бері беріліп келеді.
<blockquote>
 “13 наурызға дейін онлайн түрде 8 аталым бойынша дауыс берілді. Ішінде “Үздік жыршы”, “Үздік күйші”, “Үздік тоқыма шебері” секілді аталымдар бар. Халықтың дауыс беруі арқылы жеңімпаздар анықталды. Салтанатты марапаттау шарасы 25 наурызда өтеді. Жеңімпаздарға диплом мен мүсінше беріледі”, – деді Нұран Қамзин.
</blockquote>
Айта кетері, биыл Наурыз мейрамы 21-23 наурыз аралығында аталып өтеді, 19 және 20 наурыз сенбі және жексенбі күндеріне сәйкес келіп тұр. Наурызда қазақстандықтар бірден бес күн демалады– 19, 20, 21, 22 және 23 наурыз.

Биыл Наурыз мейрамы қалай тойланады?

<a href="https://kyzylorda-news.kz/">Kyzylorda-news.kz</a>. Қызылорда облысы Қармақшы ауданының 72 жастағы тұрғынының мәйіті табылды.
Қуанышқүл Оңалбаева 2022 жылдың 20 ақпанына қараған түні жоғалып кетті. Ол үйден белгісіз бағытқа шығып, қайтып оралмаған. Әжені іздестіру полиция, Қызылорда облысы ТЖ департаментінің қызметкерлері, еріктілер, қоғамдық белсенділер күшімен жүргізілді.
<blockquote>
 «Қуанышқүл Оңалбаеваны іздеуге 5 құтқарушы, кинолог және 1 бірлік техника тартылды. 1 наурызда іздеу тобы бірнеше ауылды аралап, моторлы қайыққа қонды. 3 наурызда іздеу жұмыстары тікұшақпен жүргізілді. Дегенмен, еш нәтиже болмады», – деді Қызылорда облысы Төтенше жағдайлар департаментінің баспасөз қызметі.&nbsp;
</blockquote>
Полиция әйелдің денесі қаладан бірнеше шақырым жерде табылғанын хабарлады.&nbsp;
<blockquote>
 «Жедел іздестіру шараларын жүргізу барысында Қармақшы ауданының 72 жастағы тұрғынының мәйіті (криминалдық өлім белгілері жоқ) табылды. Ол қатып қалған. Қазіргі уақытта сот-медициналық сараптама тағайындалды», – деді Қызылорда қалалық полиция басқармасының баспасөз қызметі.
</blockquote>

Қызылордада жоғалып кеткен әженің мәйіті табылды

<a href="https://kyzylorda-news.kz/">Kyzylorda-news.kz</a>. Жуырда ел Президенті Қ.Тоқаевтың Қазақстан халқына арналған Жолдауында айтылған саяси шешімдердің мемлекетіміздің дамуына оң әсерін тигізері анық. Осы орайда, «Жаңа Қазақстан» құрудың бағыт-бағдары айқындалған Жолдауды аймақ жолшылары да қолдайды.
Мәселен, биыл жұртшылық көптен күткен «Қызылорда-Жезқазған» автожолын қайта жаңғырту жұмыстары бастау алады. Ауқымды жобаны жүзеге асыру үш жылға дейін созылады деп күтілуде. Дегенмен, Мемлекет басшысының кешегі алқалы жиында Ұлытау облысын құру туралы тапсырмасы Қызылорда мен Жезқазған арасындағы жолдың құрылысын жеделдете түседі деген пікірде жол саласының білікті мамандары.
<blockquote>
 «Жалпы еліміздің орталығы мен оңтүстігін жалғайтын ең төте автожолдыңтезірек аяқталғаны біріншіден көршілес екі облыс үшін ғана емес, тұтас оңтүстік өңірлердіңжол көлік логистикасын едәуір жеңілдетеді. Екіншіден, қанша жылдан бері жол азабын тартып келген халықтың қатынасы артып, екі өңірдің алыс-берісі мен байланысы нығая түседі. Үшіншіден, «БатысЕуропа-БатысҚытай» халықаралық автодәлізі арқылы Өзбекстан, Қырғызстан елдерінің жүк тасымалы да «Қызылорда-Жезқазған» автожолы арқылы өтетін болады. Сондықтан, дербес облыс атанған Ұлытау өңірінің басшылығыбұл жобаның әлеуметтік-экономикалық маңыздылығын ескере отырып, автожолдымерзімінен бұрын аяқтауды көздейді деп ойлаймын», – дейді ардагер жолшы Мадияр Наркешбаев.
</blockquote>
Айта кетейік, «Қызылорда-Жезқазған» автожолының 204 шақырымы Сыр өңіріне тиесілі. Жоба бойынша қаланың айналма жолы 14,6 шақырымы Іб санатты болады. Әрі қарай 12-216 шақырым аралығына ІІ санатты жол салынады. Бүгінде жобаны жүзеге асырушы мердігер компаниялар белгіленді. Наурыз айында құрылыс-монтаж жұмыстары басталмақ. Жол құрылысына шамамен 3 мың адам жұмылдырылады деп күтілуде.

Ұлытау облысының құрылуы «Жезқазған-Қызылорда» автожолының құрылысын жеделдетеді

Kyzylorda-news.kz. «AMANAT» партиясы Қызылорда облыстық филиалының активі Президент Жолдауын талқылады. Алқалы жиынға облыстық партия филиалының төрағасы, облыс әкімі Гүлшара Әбдіқалықова қатысты.
<blockquote>
 «Мемлекет басшысы, Партия Төрағасы Қасым-Жомарт Кемелұлы Тоқаев «Жаңа Қазақстан: Жаңару мен жаңғыру жолы» атты Қазақстан халқына Жолдауын арнап, ол барша елмен ерекше ыстық ықыласпен қабылдануда. Жолдауда Президент ең алдымен жыл басында орын алған қасіретті қаңтар оқиғасы мен әлемде орын алып отырған геосаяси жағдайлардың себеп салдарына тоқтала келе, елімізді онан әрі дамыту үшін негізгі 10 реформаны атап өтті.
 Өз кезегінде Жаңа Қазақстанды құру мен жаңғыру жолына бағыттайтын жаңа Жолдау партияға да айрықша жауапкершілік пен үлкен міндеттер жүктейді. Бұл тұрғыда жаңару үстіндегі «AMANAT» партиясы да Мемлекет басшысының барлық бастамаларын толық қолдайды және ұсыныстарына ұйытқы бола отырып, оларды іске асыруға белсенді қатысатын болады»,-деді филиал төрағасы Гүлшара Әбдіқалықова.
</blockquote>
Актив отырысында Жолдаудан туындайтын партия алдында тұрған міндеттер туралы айтқан «AMANAT» партиясы облыстық филиалының Атқарушы хатшысы Ләйлә Төрешова көптің көкейінде жүрген «Партия төрағасы кім болады?»,- деген сауалдың жауабына да тоқталды.
<blockquote>
 Жолдауда Мемлекет басшысы «өзінің өкілеттігін атқару кезеңінде партияға мүшелігін тоқтата тұруға міндетті екенін заң жүзінде рәсімдеуді ұсынып, бұл норма саяси бәсекелестікті арттырып, барлық партияның дамуына бірдей жағдай жасайтындығын тілге тиек етті. Бұл Мемлекет басшысының партия мүшелігін тоқтата тұруы, оның партия қатарынан мүлдем шығатынын білдірмейді. Заңнамаға тиісті өзгерістер енгізілгенге дейін Президент партия Төрағасы болып қала береді. Партия төрағасы міндетін атқарушы кім болатынын партияның жоғарғы басқару органы Съезд шешеді. Сонымен қатар әкімдердің филиалдар төрағасы қызметі де тиісті заңнамалық өзгерістерге дейін жалғасатын болады, – деп атап өтті Атқарушы хатшы.
</blockquote>
Партия ардагері Алмагүл Божанова заманауи сұраныстар мен жаңалықтарға және даму қажеттіліктеріне қашанда дайын, уақыт талабына сай жаңғыруға бет алған жетекші партия қатарына өтініш білдерген басқа да саяси партиялардың қосылуы заңдылық деп қабылдап, партияның қазіргі қоғамдағы саяси бәсекелестікте алда болатынына сенім білдірді. Сонымен қатар, Президент Жолдауындағы міндеттерді жүзеге асыруда жасотандықтарға сенім, жауапкершілік, адалдық қағидаттарын жадына тоқуды партия ардагерлері атынан аманаттады.
Сондай-ақ жиында өкілді органдар қызметін қайта құру туралы Сыбайлас жемқорлыққа қарсы іс-қимыл жөніндегі аймақтық қоғамдық кеңестің төрағасы, фракция жетекшісінің орынбасары Мақсұт Нәлібаев, рухани қазынамызды сақтау мен жаңғырту және оны болашаққа аманаттау туралы «Miras» аймақтық қоғамдық кеңестің төрағасы, Баймырза Қожамберлиев, Сайлау жүйесі мен Саяси партияларды дамыту туралы «Рухани жаңғыру» орталығы директорының орынбасары, саясаттану ғылымдарының кандидаты Сәулет Сахиев, Жолдаудан туындайтын жастар алдында тұрған міндеттер туралы Қорқыт ата атындағы Қызылорда университетінің оқытушысы, «Болашақ» бағдарламасының түлегі Бекзат Ырза пікірлерін ортаға салды.
<img src="https://kyzylorda-news.kz/wp-content/uploads/2022/03/img-20220318-wa0015.jpg" alt="" />
<img src="https://kyzylorda-news.kz/wp-content/uploads/2022/03/img-20220318-wa0012.jpg" alt="" />

«AMANAT» партиясының активі Жолдауды талқылады

<a href="https://kyzylorda-news.kz/">Kyzylorda-news.kz</a>. Қазгидромет 19-21 наурыз аралығында ауа райы қандай болатынын болжады.
Синоптиктердің болжамына сәйкес, 19-20 наурызда ел аумағының басым бөлігі солтүстік-батыс антициклон жотасының ықпалында болады, соған байланысты аяз болады, жауын-шашын жаумайды.
Алайда 20 наурызда солтүстік, солтүстік-батыс аймақтарда, 21 наурызда республиканың көп бөлігінде ауа температурасы көтеріледі және ауа райы нашарлайды – қар жауады, оңтүстік және оңтүстік-шығыста қар аралас жаңбыр жауады, жел күшейіп, боран болады. Республика бойынша тұман түседі.

Демалыс күндері ауа райы қандай болады?

<a href="https://kyzylorda-news.kz/">Kyzylorda-news.kz</a>. Үкімет отырысында ҚР Экология, геология және табиғи ресрустар министрі Серікқали Брекешев су тапшылығына жолыққан фермерлерге қандай көмек қарастырылғанын айтты, деп хабарлайды <a href="https://lenta.inform.kz/kz/su-tapshylygyna-zholykkan-fermerlerge-ukimet-rezervinen-kosymsha-komek-bolemiz-serikkali-brekeshev_a3912984">ҚазАқпарат</a>.
«Шардара су қоймасына барынша ең жоғары ағынды қамтамасыз ету бойынша шаралар қабылдануда. Оның басты мақсаты – Түркістан облысының Шардара, Отырар және Арыс аудандарындағы Қызылқұм алқабын, сондай-ақ Қызылорда облысының фермерлерін сумен қамтамасыз ету.
Өзбек және тәжік тараптарымен жүргізілген жұмыстың нәтижесінде Шардара су қоймасына құятын ағын су көлемі ұлғайтылды. Нақты айтсақ, ақпан айындағы көрсеткіш қаңтармен салыстырғанда 22% пайыз артты. Сондай-ақ, ақпан айында «Бахри Точик» су қоймасынан Қазақстан жаққа қосымша 181 млн текше метр су ағызылды.
Келесі айда Су шаруашылығын мемлекетаралық үйлестіру комиссиясының отырысы өтеді. Онда Нарын-Сырдария су қоймалары каскадының жұмыс режимдері келісілетін болады. Сонымен қатар, әрбір елдің су алу лимиттері бекітіледі», – деді Серікқали Брекешев.
Оның мәліметі бойныша, «Қазсушар» мекемесі мен фермерлердің өздері каналдарды тазарту бойынша ауқымды жұмыс жүргізіп жатқанын айтты.
<blockquote>
 «Су тапшылығы жағдайында фермерлерге көмек көрсету үшін Үкімет резервінен каналдарды тазалауға, қосымша сорғылар сатып алуға және ұңғымалар бұрғылау жұмыстарына тиісті қаражат бөлінеді», – деді министр.
</blockquote>

Су тапшылығын көрген фермерлерге Үкімет резервінен қосымша көмек беріледі

<a href="https://kyzylorda-news.kz/">Kyzylorda-news.kz</a>. Қызылорда гарнизонында Қызылорда қаласы әскери-техникалық мектебінің 21 сарбазы Отан алдында әскери ант берді.
Курсанттар қырық күндей аталған техникалық мектепте жоспарға сай қажетті даярлықтарын шыңдады. Әскери-техникалық мектептерде ант беру рәсімі оқу процесі аяқталғаннан кейін өтетіні белгілі. Сарбаздар әскери ант бергенге дейін «Тереңөзек» оқу-жаттығу полигонында екі мәрте қарудан оқ атып, тактикалық дайындықтарын дамытты. Білікті мамандардың арқасында нағыз әскери тәртіпті бойларына сіңіре білді. Түрлі әскери теориялық сабақтарды оқып, білгендерін іс-тәжірибеде қолданды.
Әскери-техникалық мектептерге іріктеу жергілікті әскери басқару органдары өкілдерімен жылына 7 рет өткізіледі. Қызылорда қаласының әскери-техникалық мектебі жылына шамамен 130-дан астам азаматтарды оқуға қабылдайды.
Курсанттар оқу барысында тактикалық, жауынгерлік және атысқа дайындықтың ерекшеліктерін оқып, әскери-патриоттық тәрбие сағаттарына қатысады. Әскери-техникалық мектеп қысқа мерзім ішінде жас өрендердің әскери өмірдің қыр-сырын меңгеруіне мүмкіндіктер ашуда.
<blockquote>
 «Әрбір азамат Отан алдындағы борышын өтеу қажет. Қызылорда қаласының әскери-техникалық мектебінің ұстаздар қауымына алғысымыз шексіз. Аз ғана уақытта әскери тәртіпке баулып, нағыз жауынгер қандай болу керкектігін үйретті. Қарусыз және қоршауда қалған жағдайдағы неше түрлі қоян-қолтық жекпе-жек өнерімен жаттықтық. Осы мектепті бітірген соң әскери қызмет атқарсам деген ойым бар», – дейді әскери-техникалық мектебінің түлегі Жұмағұл Жамбыл.
</blockquote>
Бұл – ағымдағы жылдың әскери-техникалық мектепті тәмамдап отырған түлектердің 1-ші легі. Қызылорда қаласы әскери – техникалық мектебі алдағы уақытта да Отанға адал қызмет ететін мамандарды қабылдауын жалғастырады.
Соңғы жылдары әскери-техникалық мектепті «атқыш» мамандығы бойынша аяқтаған түлектер ішінен Қарулы Күштерімізге қызмет ететін азаматтардың саны артқаны байқалады.
<img src="https://kyzylorda-news.kz/wp-content/uploads/2022/03/276004154_461937148963755_6173999714502575410_n.jpg" alt="" />

Әскери мектептің түлектері ант берді

<a href="https://kyzylorda-news.kz/">Kyzylorda-news.kz</a>. Наурыз мерекесі қарсаңында Қазақстан Республикасы Президентінің Жарлығымен елдің әлеуметтік-экономикалық және мәдени дамуына қосқан елеулі үлесі, белсенді қоғамдық қызметі, азаматтарды қорғауда және құтқаруда көрсеткен жеке жанқиярлығы, қоғамдық тәртіпті қамтамасыз етуге көрсеткен көмегі үшін еліміздің бір топ азаматы&nbsp;мемлекеттік наградалармен марапатталды. Олардың қатарында өндіріс, денсаулық сақтау салаларының қызметкерлері, бизнес өкілдері, мәдениет және ғылым қайраткерлері, спортшылар, волонтерлер бар. Бұл туралы Ақорданың ресми сайты хабарлады.
«Қазақстанның Еңбек Ері» атағы Қазақстан Республикасының әлеуметтік-гуманитарлық дамуындағы аса үздік жетістіктері үшін жазушы Илья Жақановқа, еліміздің денсаулық сақтау саласын дамытудағы аса үздік жетістіктері үшін Қазақ тағамтану академиясының президенті Төрегелді Шармановқа берілді.
«Отан» орденімен ақын Нұржан Светқали; І дәрежелі «Барыс» орденімен Л.Гумилев атындағы Еуразия ұлттық университетінің профессоры Жандарбек Мәлібекұлы, ақын Нұрлан Оразалин; ІІІ дәрежелі «Барыс» орденімен Алматы облысы Ардагерлер кеңесінің төрағасы Ермек Келемсейіт, Алматы қаласы Қазақстан халқы Ассамблеясы Қоғамдық келісім кеңесінің төрағасы Ахметжан Шардинов, Күрес федерациясының президенті Дәулет Тұрлыханов, әл-Фараби атындағы Қазақ ұлттық университетінің ректоры Жансейіт Түймебаев, Л.Гумилев атындағы Еуразия ұлттық университетінің проректоры Дихан Қамзабекұлы, Алматы облысы әкімінің бірінші орынбасары Ләззат Тұрлашов және басқалар наградталды.
«Парасат» орденімен мәдениет, ғылым және білім қайраткерлері, бұқаралық ақпарат құралдарының өкілдері марапатталды. Олардың қатарында Ұлттық ғылым академиясының мүшесі Кәрімбек Кұрманәлиев, М.Қозыбаев атындағы Солтүстік Қазақстан университетінің аға оқытушысы Павел Афанасьев, Парламент Мәжілісінің депутаттары Берік Әбдіғалиұлы, Еділ Жаңбыршин бар.
Спортты дамыту дирекциясы пауэрлифтинг командасының жетекшісі Сергей Цырульников ІІ дәрежелі «Достық» орденімен марапатталды.
«Құрмет» орденімен саясаттанушы Данияр Әшімбаев, Қолданбалы этносаяси зерттеулер институтының директоры Талғат Қалиев, Адам құқықтары үшін хартияның атқарушы директоры Жеміс Тұрмағамбетова, Тараз қалалық көпбейінді ауруханасының бөлім меңгерушісі Ернар Еділбаев, белсенді Орынбасар Сейітов, «Мир Евразии» қорының президенті Эдуард Полетаев, Шымкент қаласы Ауған соғысы ардагерлері одағының төрағасы Ғалымжан Майханов, қоғам қайраткері Дәурен Тәліпов, жыршы Арғын Бисенов, Қ.Оспанов атындағы №1 балалар-жасөспірімдер спорт мектебінің басшысы Нұржан Ермағамбетов, Алматы қалалық №7 клиникалық ауруханасының бөлім меңгерушісі Есенай Еспенбетов наградталды. &nbsp;«Құрмет» орденіне жалпы 94 адам ие болды.
«Ерен еңбегі үшін» медалімен «Адырна» қорының президенті Арман Әубәкір, Павлодар облысы аумақтық кәсіподақтар бірлестігінің баспасөз хатшысы Константин Музалевский, Қазақ ұлттық өнер университетінің аға оқытушысы Ұларбек Нұрғалым марапатталды. Осы медальмен барлығы 25 адам наградталды. «Шапағат» медаліне 68 волонтер, меценат және басқа да азаматтар ие болды. Олардың қатарында журналист Александра Мыскина, «Үміт-Надежда» мүгедектер ұйымының төрағасы Дүйсенғали Оспанов, «Океан» ПИК жұмыскері Арлан Мүтішев, «Paybox.money» ЖШС департамент директоры Мария Чечина, Р.Байсейітов атындағы Семей қаржы-экономикалық колледжінің студенті Мерейбек Мағабилов, «Богатырь-Көмір» ЖШС жол машиналарын реттеуші Евгений Шарифуллин, волонтер Айгерім Досқалиева бар.

Еліміздің бірқатар азаматы мемлекеттік наградалармен марапатталды

<a href="https://kyzylorda-news.kz/">Kyzylorda-news.kz</a>. Ұлттық экономика министрі Әлібек Қуантыров жаңа облыстарды құру туралы құжаттар қай кезде рәсімделетінін айтты.
<blockquote>
 “Президент нақты тапсырма берді, бірінші жартыжылдық аяқталғанша жасау керек. Қазір ұйымдастару шаралары басталып кетті. Іс-қимыл алгоритмі де бар. Қайта құрылатын облыстардың өкілдері ұлттық экономика министрлігіне келді. Дәл қазір біз бірлесіп аумақтық бөлу мәселесін талқылап жатырмыз”, – деді Қуантыров журналистерге берген сұхбатында.
</blockquote>
Министрдің айтуынша, ең соңында президенттің арнайы қаулысы әзірленеді. Осылайша, маусым айы аяқталғанға дейін барлық ұйымдастырушылық жұмыс аяқталады деген жоспар бар.
<blockquote>
 “Демек, жаңа облыстар жартыжылдықтың соңында құрыла ма?”, – деп сұрады журналистер.
 “Иә, солай деп айтуға болады. Қаулының жобалары дайын болады. Кейін президент шешімі қабылданады”, – деп атап көрсетті Қуантыров.
</blockquote>
Еске сала кетсек, 16 наурызда жолдау барысында президент Қасым-Жомарт Тоқаев үш жаңа облыс құрылатынын айтты. Семей аймағында Абай облысы, бұрынғы Жезқазған облысының аймағында Ұлытау облысы құрылады. Сондай-ақ Алматы облысының қазіргі территориясы екіге бөлініп, екі облыс болмақ.
<a href="https://sputnik.kz/">Sputnik Қазақстан</a>

Қазақстан және Қызылорда облысының жаңалықтары