Kyzylorda-news.kz. Бүгін Қызылорда облыстық қоғамдық даму басқармасы мен облыс әкімі жанындағы әйелдер істері және отбасылық-демографиялық саясат жөніндегі комиссиясының ұйымдастыруымен «Ұлттық құндылықтарды жаңғыртудағы қазақ анасы» тақырыбындағы дөңгелек үстел өтті.
Дөңгелек үстелге облыс әкімі аппаратының бас инспекторы – комиссия хатшысы Қаламқас Каримова модераторлық етті. Басқосуға ҚР Президентiнiң жанындағы Әйелдер істері және отбасылық-демографиялық саясат жөнiндегi ұлттық комиссия мүшесі, «Қазақ аналары – Дәстүрге жол» РҚБ төрайымы Айнұр Жугунусова, қоғам қайраткері, еңбек ардагері «Темірбек Жүргенов» атындағы қоғамдық қор төрағасы Сәпен Аңсат және Қорқыт ата атындағы университеттің оқытушы-профессорлары, зиялы қауым өкілдері, батыр аналар және студент-жастар қатысты.
Қатысушылар қазақ халқының ықылым заманнан ұрпақтан-ұрпаққа жалғасып келе жатқан салт-дәстүрін, әдет-ғұрпын, мол рухани байлығын және ұлттық құндылықтарын сақтап қалу мен насихаттаудағы қазақ аналарының орны мен рөлі тақырыптарында пікір алмасып, тұшымды ойлар айтылды.

«Ұлттық құндылықтарды жаңғыртудағы қазақ анасы» тақырыбында дөңгелек үстел өтті

<a href="https://kyzylorda-news.kz/">Kyzylorda-news.kz.</a>&nbsp;Маман тапшы және білім сапасы нашар өңірлерге барып жұмыс істейтін мұғалімдер үшін республикалық бюджеттен қаржы қаралып отыр. Бұл туралы ҚР Оқу-ағарту министрлігі мектепке дейінгі және орта білім комитетінің төрағасы Гүлмира Кәрімова мәлім етті, деп хабарлайды <a href="https://lenta.inform.kz/kz/maman-tapshy-onirlerge-bargan-mugalimderdin-zhalakysy-150-ben-tolenedi-ministrlik_a3946895">ҚазАқпарат</a>.
<blockquote>
 «Маман тапшы және білім сапасы нашар өңірлерге баратын мұғалімдерге республикалық бюджеттен қаржы қаралып отыр. Ол үшін педагог бірнеше кезеңнен тұратын сынақ тапсырады. Бағдарламаға қатысып жеңімпаз атанған мұғалімдердің жалақысы 150 пайызбен төленетін болады. Сонымен қатар жергілікті атқарушы органдармен бірлесіп отбасылы ұстаздарды орналастыру, балаларын мектепке беру секілді мәселелер сол жерде шешіледі. Сонымен қатар тапсырманы сәтті орындап, жолдама алған мұғалімдер барған жерінде 4 апта бойы біліктілігін арттырады», – деді Гүлмира Кәрімова.
</blockquote>
Комитет басшысының айтуынша, маман тапшы және білім сапасы нашар өңірлерге баратын педагогтермен 5 жылдық келісімшарт жасалады.
Бұған дейін хабарлағанымыздай елімізде мұғалім тапшылығы бар және білім сапасы нашар өңірлерге үздік педагогтерді тартуға арналған жаңа бағдарлама іске қосылды .
Айта кетсек, ҚР Оқу-ағарту министрлігінің мәліметіне сәйкес, Түркістан, Атырау, Маңғыстау және Алматы облысында педагогтер тапшы.

Маман тапшы өңірлерге барған мұғалімдердің жалақысы 150%-бен төленеді

<a href="https://kyzylorda-news.kz/">Kyzylorda-news.kz.</a> Қызылорда облысы кәсіпкерлер палатасының алаңында облыстың әкімшілік істер жөніндегі соты мен мамандандырылған ауданаралық әкімшілік сотының судьялары, сондай-ақ кәсіпкерлерге бақылау-қадағалау жүргізу функциясы жүктелген мемлекеттік орган мамандарының қатысуымен кездесу өтті.
Кәсіпкерлер палатасының директоры Пірмұхаммед Сыздықов Мемлекет басшысы 19 мамырда отандық бизнес өкілдерімен кездескен кезде құқық қорғау органдары тарапынан негізсіз қудалауды азайту жөнінде жүйелі шаралар қабылдау қажеттігі және кәсіпкерлерге қысым көрсету факторларын анықтаудың барынша тиімді жүйесін құруды жүктегенін атап өтті.
<blockquote>
 «Біз облыстық прокуратурамен, сыбайлас жемқорлыққа қарсы іс-қимыл қызметімен, сондай-ақ, сот органадырмен әріптестік негізде, тиімді жұмыс істеп жатырмыз. Осы жылдың 5 айында Палатаға кәсіпкерлерден 350-ден аса арыз-шағым түсті. Оның 40 пайыздан астамы мемлекеттік органдардың әрекетіне қатысты. Әсіресе, салық органдарына, сәулет-құрылыс, жер қатынастары салаларына, сондай-ақ, санитарлық-эпдемиологиялық қызметке қатысты өтініштер басым. Бұл кездесуді кәсіпкерлер мен мемлекеттік орган өкілдері ашық пікірлесіп, жұмысқа қатысты ұсыныстарын берсін, талқыласын деп ұйымдастырып отырмыз», – деді Палата директоры.
</blockquote>
Облыстың әкімшілік істер жөніндегі сот алқасының судьясы Клара Қаниева мен мамандандырылған ауданаралық әкімшілік сотының төрағасы Гүлжан Мырзатаева жеке және заңды тұлғалар мен мемлекеттік органдар арасында жиі кездесетін даулы мәселелерге тоқталды.
<blockquote>
 «Бізге түсетін істердің басым бөлігі мемлекеттік сатып алу мен салық органдарының қызметіне қатысты болып отыр. Осындай отырыстар жиі өткізіліп, кәсіпкерлердің заңдарға енгізіліп жатқан өзгерістермен таныс болғаны дұрыс. Кәсіпкерлерді қашан, қандай жағдайда тексеретіні заңда нақты жазылған. Дегенмен кейде даулы мәселелерде бизнес өкілдері бізге мерзімі өтіп кеткеннен кейін келіп, мәселені шешу қиындық тудыратын кездер болады», – деді облыстық мамандандырылған ауданаралық әкімшілік сотының төрағасы Гүлжан Мырзатаева.
</blockquote>
Сонымен қатар, кәсіпкерлер салық, санитарлық-эпдемиологиялық салаларғақатысты кездескен нақты проблемаларымен бөлісті, мамандардан кеңес алды.
Пірмұхаммед Сыздықов кей мәселелердің әкімшілік кедергілерге алып келетінін ескеріп, мемлекеттік орган өкілдерін кәсіпкерлерге барынша қолдау көрсетуге шақырды.

Қызылордада судьялар кәсіпкерлермен кездесті

<a href="https://kyzylorda-news.kz/">Kyzylorda-news.kz.</a>&nbsp; Облыста суармалы жерлердің жалпы көлемі 254 мың гектарды құрайды. Оның 178,6 мың гектары инженерлік жүйеге келтірілген жерлер. Басты дақыл – күріштің 90 пайызы аймақта өңделетін болғандықтан, суармалы судың 30 пайыздан астамы егістікке қолданылады.
Осыған сәйкес суармалы жерлерді қалпына келтіру және айналымға қосу үшін 3 жоба жүзеге асырылмақ. Бұл жөнінде Өңірлік коммуникациялар қызметінде өткен брифингте облыстық табиғи ресурстар және табиғат пайдалануды реттеу басқармасы басшысының орынбасары Қайрат Жансұлтанұлы мәлімдеді.
<blockquote>
 «Облыстың ауыл шаруашылық саласы толығымен суармалы егістікке негізделген. Суармалы жерлерде ұзындығы 10 мың шақырымнан астам сумен қамтамасыз ететін және 3 мың шақырымнан астам қашыртқы-дренаждық жүйелер бар. Соңғы 2 жылда өңірдегі су тапшылығына байланысты күріштің көлемі 11 мың гектарға дейін қысқартылып, орнына суды аз қажет ететін дақылдар егілді. Алайда күріш бастыру топырақтың тұздануын төмендетеді. Сондықтан ауыспалы егістік тәртібін сақтай отырып, күріштің көлемін 75-80 мың гектарға тұрақтандыру бойынша жұмыстар атқарудамыз. Сондай-ақ, суармалы жерлерді қолдану үшін 3 жоба қарастырылды. Бұл жобалар 29 мың гектар суармалы жерді айналымға қосуға және 158 мың гектар суармалы егістіктегі ирригация және дренаж жүйелерін жетілдіруге мүмкіндік береді», – деді Қайрат Жансұлтанұлы.
</blockquote>
Сырдария өзенінің жалпы жылдық су қоры – 37,1 млрд.текше метр. Ал каналдар арқылы берілген су көлемі – 1,1 млрд.текше метрді құрайды.
Еліміздің аумағы 8 су объектілері бассейндеріне белгіленген. Солардың ішінде ауқымды және экологиялық проблемалары толық шешілмеген бассейндердің бірі – Арал-Сырдария бассейні болып табылады. Соңғы 3 жылда су тапшылығы орын алғандықтан суармалы егіске 4,1 млрд.текше метрден 3,6 млрд текше метрге лимит қысқартылып белгіленген.
<blockquote>
 «Соңғы жылдары Нарын-Сырдария каскасында орналасқан су қоймасында жинақталған су көлемінің төмендігінен Сырдария өзенінің төменгі ағысында күрделі су тапшылығы орын алды. Жедел қабылдаған шаралардың арқасында диқаншылар өнімдерін жинақтай алды. Дегенмен, су тапшылығы жағдайында бірнеше дақылдардың көлемін қысқартуға мәжбүрміз. Су шаруашылығын реттеу мақсатында 2025 жылға дейін республика бойынша 9 су қоймасы мен 120 каналды қайта реконструкциялау қолға алынбақ», – деді «Қазсушар» РМК Қызылорда облыстық филиалының бөлім басшысы Айдос Асанбаев.
</blockquote>

Сырдария өзенінің жалпы жылдық су қоры – 37,1 млрд.текше метрді құрады

<a href="https://kyzylorda-news.kz/">Kyzylorda-news.kz.</a> Қызылорда облысында қатты ыстық болады.
«Қазгидромет» РМК Қызылорда облысы бойынша филиалының хабарлауынша, 22 маусымда күндіз Қызылорда облысында 40 градус қатты ыстық күтіледі. Облыстың басым бөлігінде төтенше өрт қаупі сақталады.
Қызылорда қаласында 22 маусымда төтенше өрт қаупі сақталады.

Қызылордада ауа райына байланысты ескерту жарияланды

<a href="https://kyzylorda-news.kz/">Kyzylorda-news.kz.</a>&nbsp;Шиелі ауданының жұмыссыз жастары, демалыстағы студенттер мен жоғары сынып оқушылары маусымдық жұмыспен айналысып, мемлекеттік қолдауға ие болуда.
Жасыл елдің алғашқы легі мамыр айының соңынан басталып, қазіргі уақытта 100-ден астам жас қатысып, тынымсыз еңбектенуде. Қазіргі уақытта кент орталығындағы көшелерде тазалық жұмыстарын жүргізілуде.
Осылайша, аудан жастары жазғы демалыс уақыттарын тиімді жұмсап, табыс тауып, әрі рухани кемелденіп сауапты істерде бастары бірігуде.
Алдағы шілде, тамыз айларына жұмыс жасауға ниет білдіруші барша жастарды тіркеп, тізімге алуда. Толық ақпарат алу үшін 8 747 887 80 69 телефон нөмеріне хабарласу қажет.
<img src="https://kyzylorda-news.kz/wp-content/uploads/2022/06/zhasyl.jpg" alt="" />
<img src="https://kyzylorda-news.kz/wp-content/uploads/2022/06/zhasyl-el1.jpg" alt="" />

«Жасыл ел»: Шиеліде 100-ден аса жас жұмыспен қамтылды

<a href="https://kyzylorda-news.kz/">Kyzylorda-news.kz.</a>&nbsp;Арал ауданының әкімі Серік Сермағамбетов бірқатар нысандарды аралап, атқарылып жатқан жұмыс барысымен танысты.
Алдымен Арал қаласындағы №1 мөлтек ауданындағы насосты су айдау стансасында болды. Аталған нысан арқылы осы шағын ауданға су жеткізіліп, жаңа ауыл, автобаз мөлтек аудандарына берілетін ауыз су қысымы арттырылуда. Мұнда 2 дана 300 кубтық су сақтайтын резервуар, кезекпен сағатына 160 куб су айдайтын 3 насос орнатылған.
Аудан басшысы жауапты мамандарға мұндағы әрбір жұмысқа мұқият болу қажеттігін айтып, насосты станса арқылы су қысымы арттырылған мөлтек аудандардағы тұрғын үйлерді аралап, қазіргі өзгешелікті білуді тапсырды.
Мұнан Сексеуіл кентіндегі «Ауыл – Ел бесігі» бағдарламасы аясында орталық көшеге жүргізіліп жатқан орташа жөндеу жұмыстарының барысын көрді. Кенттегі темір жол өткелінен бастап № 231 орта мектебіне дейінгі аралықтағы 3,4 шақырым автокөлік жолы жөнделуде. Қазіргі таңда 2 шақырым жолға асфальт жабындысы төселіп, мердігер мекеме тарапынан тиісті жұмыстар жалғасуда.
Жол жөндеу жұмыстарына куә болған аудан әкімі мердігер мекеме өкіліне бірқатар кемшіліктерді көрсетіп, толықтай жөнге келтіру керектігін айтты. Сонымен бірге барлық жұмыстардың сапалы жүргізіліп, уақытылы аяқталуын тапсырды.
Ал кент әкіміне көшені жарықтандыру мен жаяу жүргіншілер жолын салу үшін жоба әзірлеуді жүктеді.
Одан соң Жіңішкеқұм ауылдық округіне қарасты Тоқабай елді мекеніндегі №248 мектеп ауласында ауыл ардагерлерімен кездесті. Елді мекендегі өзекті мәселе мектеп ғимараты апатты жағдайда деп танылғандықтан пайдаланылмай тұрған еді.
Соған сәйкес облыстық басқармалар арқылы толық зерделеу жұмыстары жүргізіліп, нәтижесімен ғимарат бұзылып орнына жаңа нысан салынатыны жөнінде шешім қабылданған болатын. Қазіргі таңда демеушілік есебінен анықталған мердігер мекеме мектеп ғимаратын бастап бұзуда. Аудан басшысы мердігер мекеме өкіліне барлық техникалық қауіпсіздік шараларын қатаң сақтап, тиянақты түрде жұмыс жүргізу қажеттігін айтты. Ауыл ардагерлері балалар игілігі үшін жаңа мектеп салынатындығына қуанышты екендіктерін білдіріп, ризашылықтарын жеткізді.
<img src="https://kyzylorda-news.kz/wp-content/uploads/2022/06/288973102_3293468684314828_8099263769367711487_n.jpg" alt="" />
<img src="https://kyzylorda-news.kz/wp-content/uploads/2022/06/288943354_3293468327648197_2466442086915744197_n.jpg" alt="" />

Аралдағы Тоқабай елді мекенінде жаңа мектеп салынатын болды

<a href="https://kyzylorda-news.kz/">Kyzylorda-news.kz.</a>&nbsp; Мексика елінде ауыр атлетикадан жасөспірімдер арасында Әлем чемпионы атанған Ерасыл Сәулебеков елге оралды.
Мұхит асып, Мексиканы бағындырған, алтыннан алқа тағып, көк туымызы көкке көтерген Ерасыл алаштың рухын аспандатқаны сөзсіз. Осы орайда, бүгін мәдениет және спорт басқармасының басшысы Руслан Рүстемұлы чемпионымыз Ерасыл мен жаттықтырушылары Айдар Ералиев және Жеңіс Алдабергеновты қабылдап, жүрек жарды лебізін білдірді.
<blockquote>
 «Жүлдеге қол жеткізу оңай болмаса да, Сіз қазақстандықтардың, оның ішінде Сыр елінің үмітін ақтадыңыз. Бұл өзіңіздің кәсіби шеберлігіңіз бен жеңіске деген айрықша ерік-жігеріңіздің нәтижесі. Сіздің жетістігіңіз – өскелең ұрпақтың патриоттық сезімін күшейтіп, мыңдаған жастың спортқа, салауатты өмір салтына ынтасын арттырары сөзсіз. Алтын медальді иеленіп қана қоймай, спорттық кәсіби өміріңізге жаңа да жарқын жол аштыңыз. Бұдан да биік белестерді бағындыратыныңызға сенемін!», – деді басқарма басшысы өз құттықтау сөзінде.
</blockquote>
Естеріңізге сала кетейік, Сәулебеков Ерасыл Мексиканың Леон қаласында ауыр атлетикадан жасөспірімдер арасында өткен Әлем чемпионатында 67кг салмақ дәрежесінде жұлқи көтеруден 123, серпе көтеруден 158, қоссайыста 281кг жинақтап Әлем чемпионы атанды.

Ауыр атлетикадан Әлем чемпионы Ерасыл Сәулебеков елге оралды

<a href="https://kyzylorda-news.kz/">Kyzylorda-news.kz.</a> Жеңілдетілген автокредит бағдарламасы бойынша екі банкке кезекті транш бөлінді, деп хабарлайды «Өнеркәсіпті дамыту қоры» АҚ.
Бөлінген лимит мөлшері:
«Еуразиялық банк» АҚ – 10 млрд теңге;
«Қазақстан Халық банкі» АҚ – 7,5 млрд теңге.
Осылайша бағдарлама басталғалы бері төрт банкке барлығы 90 млрд теңге берілді. Оның ішінде:
Еуразиялық банк – 25 млрд теңге;
Банк Центр Кредит – 27,5 млрд теңге;
Қазақстан Халық банкі – 22,5 млрд теңге;
Forte Bank – 15 млрд теңге.
Бүгінгі таңда банктер жалпы сомасы 82 млрд теңгеге 10 888 өтінім мақұлдады, 4 847 автокөлік берілді.
<blockquote>
 «Айта кетері, жалпы сомасы 90 млрд теңгенің бөлінбеген лимиті 8 млрд теңгені құрайды. Бұл сома шегінде автонесие алуға өтінішті тек Еуразиялық банк пен Халық банк қана қабылдап жатыр. Бағдарламаға қатысатын қалған банктер бөлінген лимиттерді толығымен игерді», – деп мәлімдеді қор.
</blockquote>
Осы 8 млрд теңге толығымен игерілгеннен кейін қалған 10 млрд теңге Еуразиялық банкке бөлінеді. 
Одан кейін жаңа автонесие «револьверлік» механизм бойынша беріледі. Яғни өтінім бергендерге ақша көлік алған азаматтардың банкке ай сайын төлейтін несиесінен бөлінеді.
<a href="https://sputnik.kz/20220621/zhenildetilgen-avtokredit-bank-otinim-25672795.html">Sputnik.kz</a>

Жеңілдетілген автокредит бойынша тек екі банк қана өтінім қабылдап жатыр

<a href="https://kyzylorda-news.kz/">Kyzylorda-news.kz.</a> «Бақытты отбасы» бағдарламасы бойынша өтініш қабылдау басталды, деп хабарлайды «Отбасы банктің» баспасөз қызметі.
Өтініш otbasybank.kz платформасында 20 маусым мен 19 шілде (қоса алғанда) аралығында қабылданады.
Бағдарламаға мына санаттар бойынша баспана кезегінде тұрған азаматтар қатыса алады: 
көпбалалы отбасы; 
мүмкіндігі шектеулі бала тәрбиелеп отырған отбасы; 
-толық емес отбасы (неке бұзылған сәттен бастап кемінде 3 жыл өтуі керек).
<blockquote>
 “2022 жылы “Бақытты отбасы” бағдарламасы бойынша 5 мыңнан астам отбасыға несие беруді жоспарлап отырмыз. Қазірдің өзінде Отбасы банкіне 51 млрд теңге қаражат түсті. Биыл лимиттерді бағдарламаға қатысушылар арасында бөлу кезінде басымдық былтырғыдай мүмкіндігі шектеулі балаларды тәрбиелеп отырған отбасыларға беріледі”, – “Отбасы банк” АҚ басқарма төрағасы Ләззат Ибрагимова.
</blockquote>
«Бақытты отбасы» бағдарламасына 2021 жылы тапсырыс берген, алайда несие алмаған үміткерлердің өтініші күшін жояды. Олар бағдарламаның жаңа кезеңіне қатысу үшін биыл қайтадан өтініш беруі қажет.
Өтініш қабылдау аяқталғаннан кейін қатысушылардың негізгі және резервтік тізімдері автоматты түрде қалыптастырылады. Тізімдерге бөлу кезінде қатысушылардың жергілікті әкімдікте кезекке тұру күні мен санаты анықтаушы факторға айналады. Байқау нәтижелерін otbasybank.kz порталынан көруге болады.
Бағдарлама шарттары
Қатысушыларды іріктеу кезінде азаматтардың кірісі тексеріледі.
Соңғы алты айда отбасының әрбір мүшесіне шаққандағы табыс ең төменгі күнкөріс деңгейінің 3,1 еселенген мөлшерінен аспауы керек.
Айта кетері, биыл күнкөріс деңгейі – 37 389 теңге. Сәйкесінше бір отбасы мүшесіне шаққандағы табыс 115 905 теңгеден аспауға тиіс. 
бастапқы жарна – несие сомасының 10%-і; 
жылдық мөлшерлеме – 2%; 
несие мерзімі – 20 жылға дейін.
Бағдарлама аясында жергілікті әкімдік арқылы салынған кредиттік тұрғын үйді, жаңа және қолданыстағы пәтерлерді, сондай-ақ жер үй де сатып алуға болады.
Нұр-Сұлтан, Алматы және қала маңы аудандарында, Шымкент, Ақтау, Атырау қалаларында несиенің ең жоғарғы сомасы – 15 млн теңге. Ал қалған өңірлерде ең көбі 10 млн теңге кредит рәсімдеуге болады. Өтініш беруші өзі баспана кезегінде тұрған өңірден ғана үй сатып ала алады.

«Бақытты отбасы» бағдарламасы бойынша өтініш қабылдау басталды

<a href="https://kyzylorda-news.kz/">Kyzylorda-news.kz.</a> Шілде айында елімізде екі мереке – Елорда күні мен Құрбан айт мейрамы тойланады.
6 шілде Елорда күні сәрсенбіге сәйкес келеді және барлық қазақстандықтар бір күн демалады. 
Биыл Құрбан айттың бірінші күні 9 шілде, сенбіге түсетіндіктен, демалыс қарастырылмаған.
Осылайша бес күндік жұмыс аптасы үшін 11 күн, алты күндік жұмыс аптасы үшін 6 күн демалыс болмақ.

Қазақстандықтар шілдеде 11 күн демалады

<a href="https://kyzylorda-news.kz/">Kyzylorda-news.kz.</a>&nbsp;Қызылордада «Қарасора-2022» жедел-профилактикалық іс-шарасы кезінде ірі есірткі алқабы анықталды.
Қызылорда облысы Полиция департаменті Есірткі қылмысына қарсы іс-қимыл басқармасы мен ҚР ҰҚК Қызылорда облысы және Байқоңыр департаменті мен Шиелі АПб-нің қызметкерлерімен бірлесіп жүргізілген жедел іс-шара барысында 34 жастағы қала тұрғыны Қызылорда облысы, Шиелі ауданына қарасты далалық жерде қалың сексеуілдер арасында 1665 (бір мың алты жүз алпыс бес) түп сора өсімдігін еккені үшін құрықталып, ұсталды.
Одан бөлек оқиға басынан ұсталған күдіктіге жеке тінту жүргізу барысында одан кептірілген марихуана есірткі заты алынды.
Сараптама қорытындысына сәйкес заттай дәлелдеме ретінде алынған зат жалпы салмағы 8 келі 59 грамм сора өсімдігі мен 657,14 грамм кептірілген марихуана болып шықты.
Күдікті Шиелі аудандық полиция бөлімінің уақытша ұстау изоляторына оқшауландырылды. 
Аталған дерек бойынша Қазақстан Республикасы Қылмыстық кодексінің 296-бабының 3-бөлігімен (Ірі мөлшердегі есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау) және 300-бабының 2-бөлігімен (ірі мөлшерде құрамында есірткі заттар бар, өсіруге тыйым салынған өсімдіктерді заңсыз егіп-өсіру) сотқа дейінгі тергеп-тексеру әрекеттері жүргізілуде.
<img src="https://kyzylorda-news.kz/wp-content/uploads/2022/06/whatsapp-image-2022-06-20-at-14.11.341.jpeg" alt="" />

Қазақстан және Қызылорда облысының жаңалықтары