<a href="https://kyzylorda-news.kz/">Kyzylorda-news.kz</a> Қазақстанда электр энергиясының шекті тарифтерін өзгерту жоспарланып отыр. Энергетика министрлігі әзірлеген бұйрық жобасына сәйкес, 2026 жылдың 1 шілдесінен бастап 60 энергия өндіруші ұйым үшін жаңа тарифтер енгізілуі мүмкін. Бұл туралы <a href="https://stan.kz/qazaqstanda-elektr-energiiasynyn-tarifteri-1-sildeden-bastap-qaita-qar-435873/">Stan.kz </a>ақпарат агенттігі хабарлайды.Қазақстанның энергетика министрлігі электр энергиясының шекті тарифтерін бекіту туралы бұйрыққа өзгерістер енгізуді ұсынды.Ведомствоның мәліметінше, тарифтерді қайта қарау елдегі энергиямен жабдықтаудың тұрақтылығын қамтамасыз ету және генерациялайтын қуаттарды кезең-кезеңімен жаңғырту мақсатында жүзеге асырылады.Құжатта 60 энергия өндіруші ұйым үшін шекті тарифтерді түзету қарастырылған. Министрлік бұл шешім жөндеу жұмыстарын уақытылы жүргізуге, сондай-ақ жабдықтардың сенімділігін арттыру мен жаңарту бағдарламаларын іске асыруға қажет қаржылық жағдай жасауға бағытталғанын атап өтті.Жаңартылған тарифтерді 2026 жылдың 1 шілдесінен бастап енгізу жоспарланған. Бұйрық жобасы 30 маусымға дейін қоғамдық талқылауда болады.Фото: freepik.com

Электр энергиясының тарифі шілдеден бастап қайта қаралмақ

<a href="https://kyzylorda-news.kz/">Kyzylorda-news.kz</a> &nbsp;Қытайдың Гуйян қаласында өтіп жатқан әлем кубогының екінші күні, 16 маусымда қазақстандық Тимур Нұрсейітов (75 келі) жарысты жалғастыруға мүмкіндік <a href="https://kaz.inform.kz/news/kazakstandik-boksshi-timur-nurseytov-alem-kuboginin-shirek-finalina-shikti-c39178a1">алды.</a>Отандасымыз 1/8 финалда Ирландия спортшысы Тадхг Одонеллмен шеберлік байқасты.Қос боксшы да бір-бірінің шабуылын күтіп, айқас 3 раунд бойы аңдысумен өтті. Нәтижесінде төрешілер 3:2 есебімен жеңісті отандасымызға берді.Айта кетсек, бұдан бұрын Санатәлі Төлтаев (65 келі) жарысты жалғастыруға мүмкіндік алды .Отандасымыз 1/16 финалда әзербайжандық Малик Хасановты қапы қалдырды.Енді ел құрамасынан тағы 4 боксшы шаршы алаңға шығады. Олардың қатарында Тимур Қабдешов (55 келі), Назым Қызайбай (54 келі, Лаура Есенкелді (70 келі), Нұрбек Оралбай (90 келі) бар.Еске салсақ, 15 маусымда әлем кубогы екінші кезеңінде ел құрамасынан Сабыржан Аққалықов (80 келі), Нұрбек Оралбай (90 келі), Серік Теміржанов (60 келі), Айбек Оралбай (90 келіден жоғары), Дина Исламбекова (80 келіден жоғары) жарысты жалғастыруға мүмкіндік алды.Өкінішке қарай ел құрамасынан Наталья Богданова (75 келі) қарсыласына есе жіберіп, жарыс жолынан шығып қалды.Фото: Қазақстан бокс федерациясы

Қазақстандық боксшы Тимур Нұрсейітов әлем кубогының ширек финалына шықты  

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің «Тарих және археология» білім беру бағдарламасының аға оқытушысы, философия докторы Ыслам Құрманиязов Қарағанды облысында ұйымдастырылған «Сарыарқаның көшпелі мәдениеті: Ұлы даланың құпиялары – Талды» атты халықаралық ғылыми симпозиумға қатысты.Халықаралық деңгейдегі маңызды ғылыми жиынға Қазақстанмен қатар Түркия, Германия, Венгрия және Ресей мемлекеттерінен жетекші ғалымдар, археологтар, тарихшылар мен мәдени мұра саласының мамандары жиналды. Симпозиум барысында тарихи-мәдени мұраны сақтау мен насихаттау, археологиялық зерттеулердің заманауи әдістерін қолдану, ғылыми нәтижелерді халықаралық деңгейде интеграциялау және ғылыми ынтымақтастықты дамыту мәселелері кеңінен талқыланды.Ғылыми басқосу аясында қатысушылар Орталық Қазақстандағы бірегей тарихи нысандардың бірі саналатын Талды археологиялық паркінің аумағында болып, қола дәуіріне жататын археологиялық ескерткіштермен танысты. Мамандар соңғы жылдары жүргізілген қазба жұмыстарының нәтижелерін ортаға салып, ежелгі көшпелі өркениеттердің мәдениеті мен тұрмыс-тіршілігіне қатысты тың ғылыми тұжырымдарымен бөлісті.Сонымен қатар, симпозиум бағдарламасында қазақ халқының дәстүрлі мәдениеті мен рухани мұрасын дәріптеуге арналған арнайы іс-шаралар ұйымдастырылды. Қатысушылар ұлттық қолөнер бұйымдарының көрмесін тамашалап, қазақтың салт-дәстүрлері мен ұлттық спорт түрлерінің ерекшеліктерімен танысты. Бұл өз кезегінде Қазақстанның бай мәдени мұрасын шетелдік ғалымдарға кеңінен таныстыруға мүмкіндік берді.Аталған халықаралық ғылыми алаң тәжірибе алмасуға, жаңа ғылыми байланыстар орнатуға және археология мен тарих саласындағы бірлескен зерттеу жобаларын дамытуға жол ашты. Сондай-ақ, жас зерттеушілер мен тәжірибелі ғалымдардың пікір алмасуына қолайлы орта қалыптастырады.Халықаралық симпозиумға қатысу Қорқыт ата атындағы Қызылорда университеті ғалымдарының ғылыми әлеуетін танытып қана қоймай, отандық археология мен тарих ғылымын халықаралық деңгейде насихаттауға ықпал етті. Мұндай ғылыми кездесулер тарихи-мәдени мұраны зерттеу мен сақтау бағытындағы ынтымақтастықты нығайтып, жаңа зерттеулердің жүзеге асуына негіз қалайды.<img src="https://knadmin.beoblood.kz/uploads/UNIVERSITET_ALYMY_HALY_ARALY_YLYMI_SIMPOZIUM_A_ATYSTY_2636cd6345.jpeg" alt="УНИВЕРСИТЕТ ҒАЛЫМЫ ХАЛЫҚАРАЛЫҚ ҒЫЛЫМИ СИМПОЗИУМҒА ҚАТЫСТЫ.jpeg">

 Университет ғалымы халықаралық ғылыми симпозиумға қатысты

<a href="https://kyzylorda-news.kz/">Kyzylorda-news.kz</a> Орал қаласындағы Назарбаев Зияткерлік мектебінің базасында NIS педагогтері мен қызметкерлері арасында дәстүрлі желілік спартакиада жоғары деңгейде ұйымдастырылып, өз мәресіне жетті. Еліміздің түкпір-түкпірінен келген зияткерлік мектептердің қызметкерлерін бір алаңға тоғыстырған спорттық іс-шара биыл он алтыншы рет өтті.Ауқымды додаға Қазақстандағы Назарбаев Зияткерлік мектептерінен 18 команда қатысып, 300-ге жуық педагог пен қызметкер спорттың бірнеше түрі бойынша өзара бақ сынады. Қатысушылар волейбол, футбол, шахмат, үстел теннисі, ләңгі тебу, садақ ату және арқан тартыс секілді спорт түрлерінде шеберліктерін көрсетіп, тартысты кездесулер өткізді.Спартакиада барысында Қызылорда қаласындағы Назарбаев Зияткерлік мектебінің командасы жоғары дайындық деңгейін көрсетіп, барлық спорт түрі бойынша жартылай финалға жолдама алды. Командалық ауызбіршілік пен жүйелі дайындықтың нәтижесінде қызылордалықтар жалпыкомандалық есепте жүлделі ІІ орынды иеленіп, өңір намысын абыроймен қорғады.Жекелей сайыстарда да Қызылорда құрамасының мүшелері ерекше жетістіктерге қол жеткізді. Атап айтқанда, Абылай Жәндеуов ләңгі тебу сайысында жоғары нәтиже көрсетіп, бұрынғы рекордты жаңартты. Ол «Ондық озығы» аталымының жеңімпазы атанып, жарыстың үздік спортшыларының бірі ретінде танылды. Сонымен қатар, Жанна Омарова үстел теннисінен шебер ойын өрнегін көрсетіп, «Үздік теннисші» номинациясына ие болды.Желілік спартакиада қатысушылар арасында салауатты өмір салтын насихаттаумен қатар, бұқаралық спортты дамытуға, әріптестік байланысты нығайтуға және ұжымдық рухты көтеруге бағытталған маңызды алаңға айналды. Мұндай жарыстар педагогтер мен қызметкерлердің кәсіби қызметтен тыс уақытта да белсенді өмір салтын ұстануына, тәжірибе алмасуына және өзара ынтымақтастықты арттыруына мүмкіндік береді.Қызылордадағы Назарбаев Зияткерлік мектебі командасының бұл жетістігі – жүйелі дайындықтың, командалық бірліктің және спортқа деген жауапкершіліктің нәтижесі. Жүлделі ІІ орын мен жекелеген номинациялардағы жеңістер ұжымның жоғары әлеуетін тағы бір мәрте дәлелдеп, алдағы жарыстарда бұдан да биік белестерді бағындыруға жігер береді.<img src="https://knadmin.beoblood.kz/uploads/yzylordaly_NIS_komandasy_sportty_dodada_zh_ldeli_boldy_a55ee53cc4.jpg" alt="Қызылордалық NIS командасы спорттық додада жүлделі болды.jpg">

Қызылордалық NIS командасы спорттық додада жүлделі болды

<a href="https://kyzylorda-news.kz/">Kyzylorda-news.kz</a> Бүгінде заманауи хирургиялық оталар тек мемлекеттік стационарларда ғана емес, Қызылорда облысындағы жекеменшік медициналық ұйымдарда да қолжетімді бола түсуде. Бұл әсіресе медициналық көмекке жүгінудің ең жиі себептерінің бірі болып саналатын жүрек-қан тамырлары ауруларына шалдыққан пациенттер үшін маңызды.Осындай медициналық орталықтардың бірі – «Денсаулық групп» клиникасы. Бір жарым жыл ішінде мұнда жүректің ишемиялық ауруы, стенокардия, артериялық гипертензия, ишемиялық кардиомиопатия және басқа да жүрек-қан тамырлары жүйесі ауруларымен ауыратын өңірдің шамамен 1,5 мың тұрғыны ем қабылдаған. Қажет болған жағдайда пациенттер&nbsp;Емдеуге жатқызу&nbsp;бюросының порталы арқылы қайта емделуге жолдама ала алады.<img src="https://knadmin.beoblood.kz/uploads/osms_3_fa87c196aa.jpg" alt="осмс (3).jpg">Сырдария ауданының тұрғыны Темірбай Сағынай міндетті әлеуметтік медициналық сақтандыру жүйесінің арқасында қажетті көмекті тегін алғанын айтты.<blockquote>– Екі жыл бұрын осы клиникада маған стенттеу&nbsp;ота жасалды. Қазір дәл осындай екінші&nbsp;отаға дайындалып жатырмын. Мен зейнеткермін, МӘМС жүйесінде сақтандырылғанмын. Денсаулығымды дер кезінде күтуге мүмкіндік бергені үшін алғысымды білдіремін, – дейді&nbsp;ардагер.</blockquote>Шиелі ауданының тұрғыны Күнімжан Мадиева да жүрек ауруымен бес жылдан астам уақыт бойы күресіп келеді. Ол жақында қайтадан стенттеу&nbsp;отадан өткен.<blockquote>– Емхананың жолдамасымен коронарографиядан өттім, содан кейін маған стент қойылды. Бірнеше жылдан соң басқа зақымданған қан тамырына қайта араласу қажет болды. Қазір өзімді жақсы сезінемін, тексерулер мен емді тегін алып жатырмын. Баршаңызды МӘМС жүйесінде сақтандырылған болуға шақырамын, – дейді&nbsp;пациент.</blockquote>Аз инвазивті емдеу әдістері ағзаға түсетін жүктемені айтарлықтай азайтып, асқыну қаупін төмендетуге және қалпына келу мерзімін қысқартуға мүмкіндік береді.&nbsp;Отадан кейін пациенттер клиника мамандарының бақылауында болып, бұл емнің тиімділігін арттыруға және ықтимал асқынулардың алдын алуға ықпал етеді.Медициналық көмек тегін медициналық көмектің кепілдік берілген көлемі және МӘМС жүйесі аясында көрсетіледі. 2026 жылы аталған қызметтерді көрсету үшін «Денсаулық групп» клиникасына Әлеуметтік медициналық сақтандыру қорынан 316 миллион теңгеден астам қаражат бөлінді.Клиника бөлімшесінің меңгерушісі Ринат Исабайдың айтуынша, МӘМС жүйесінсіз жоғары технологиялық медициналық қызметтердің құны айтарлықтай жоғары. Сондықтан «сақтандырылған»&nbsp;мәртебесінде болу маңызды.<blockquote>-&nbsp;Стенттеу&nbsp;отаның құны шамамен 1,7 миллион теңгені құрайды. Күндізгі стационар жағдайындағы коронарографияның құны – 170 мың теңге, ал тәулік бойғы стационарда – 425 мың теңге. Бұдан бөлек, қатар жүретін ауруларды да емдейміз. Емдеу&nbsp;мерзімі&nbsp;10 күнге дейін созылуы мүмкін, – деді&nbsp;дәрігер.</blockquote>МӘМС жүйесіндегі жекеменшік сектордың дамуы жоғары технологиялық медициналық көмектің қолжетімділігін арттырып, өңір тұрғындарының жүрек-қан тамырлары ауруларын сапалы әрі елеулі қаржылық шығынсыз ем алуына мүмкіндік беріп отыр.

Жеке клиникада МӘМС аясында жүрекке оталар жасалуда

<a href="https://kyzylorda-news.kz/">Kyzylorda-news.kz</a> &nbsp;Өңірде балық қорын сақтау мен су айдындарының экологиялық жағдайын жақсартуға бағытталған «Таза су айдындары» және «Уылдырық-2026» республикалық акциялары аясында ауқымды жұмыстар атқарылуда. Табиғат қорғау шараларына мемлекеттік органдар, құқық қорғау құрылымдары және қоғам өкілдері жұмылдырылып, өңірдің су экожүйесін сақтауға бағытталған кешенді жұмыстар жүргізілді. Бұл туралы Өңірлік коммуникациялар қызметінің ақпарат алаңында Арал-Сырдария облысаралық бассейндік балық шаруашылығы иснпекциясы басшысының орынбасары Жанқожа Сапаров мәлімдеді.<img src="https://knadmin.beoblood.kz/uploads/Baly_oryn_sa_tau_zh_ne_su_ajdyndaryn_tazartu_basty_nazarda_3247a407f3.jpg" alt="Балық қорын сақтау және су айдындарын тазарту - басты назарда.jpg"><blockquote>– Өңірімізде балық ресурстарын сақтау, су айдындарының экологиялық жағдайын жақсарту және табиғат пайдалану заңнамасының сақталуын қамтамасыз ету бағытында кешенді жұмыстар жүйелі түрде жүргізілуде. Осы мақсатта өңірде республикалық «Таза су айдындары» табиғат қорғау акциясы мен «Уылдырық–2026» балық қорғау акциясы кең көлемде ұйымдастырылып, су айдындарын тазарту, заңсыз балық аулаудың алдын алу және балықтардың табиғи көбеюіне қолайлы жағдай жасау бағытында нақты нәтижелерге қол жеткізілді. «Таза су айдындары» акциясы барысында облыс аумағындағы өзен-көлдер мен балық шаруашылығы су айдындары қоқыстан тазартылды. Акция басталғалы 397 адам, 68 арнайы техника және 5 шағын жүзу құралы тартылып, су айдындарынан 10 тоннадан астам тұрмыстық қалдық шығарылды. Сонымен қатар, балық қорына айтарлықтай қауіп төндіретін суда қалған 78 заңсыз ау қалдықтары анықталып, жойылды. Бұл жұмыстар су экожүйесін сауықтыруға және балықтардың табиғи мекендеу ортасын сақтауға мүмкіндік берді. Ал «Уылдырық-2026» балық қорғау акциясы кезінде өңірдегі су айдындарында балықтардың уылдырық шашу кезеңінде қорғау шаралары күшейтілді. Нәтижесінде заңсыз балық аулаудың ондаған дерегі анықталып, әкімшілік хаттамалар толтырылды, бірқатар істер сотқа жолданды. Құқық қорғау органдарының өндірісінде қылмыстық сипаттағы істер қаралуда. Заң бұзушылардан жүздеген келі заңсыз ауланған балық пен ондаған балық аулау құралдары тәркіленіп, табиғатқа келтірілген залалды өтеу бағытында жұмыстар жүргізілуде.Жалпы, аталған акциялар табиғи ресурстарды қорғау мәдениетін қалыптастыруға, браконьерлікке қарсы күресті күшейтуге және өңірдің балық қорын сақтауға бағытталған маңызды бастамалардың тиімділігін көрсетті. Су айдындарының тазалығы мен балық байлығын келер ұрпаққа аман жеткізу - тек жауапты органдардың ғана емес, әрбір азаматтың ортақ міндеті , – деді Жанқожа Рамбердіұлы.&nbsp;</blockquote>

Балық қорын сақтау және су айдындарын тазарту – басты назарда

<a href="https://kyzylorda-news.kz/">Kyzylorda-news.kz</a> &nbsp;Тарифтердің негізділігі мен ашықтығын қамтамасыз ету, табиғи монополия субъектілерінің қызметін бақылау және тұтынушылардың құқықтарын қорғау – мемлекеттік реттеудің негізгі бағыттарының бірі. Осы бағытта өңірде атқарылып жатқан жұмыстар мен қабылданған шешімдер туралы ҚР ҰЭМ Табиғи монополияларды реттеу комитетінің Қызылорда облысы бойынша департаментінің басшысы Алмат Абдрайхан баяндады.<img src="https://knadmin.beoblood.kz/uploads/yzylordada_tarifterdi_negizdiligi_men_t_tynushylar_y_y_ba_ylauda_473888f3d0.jpg" alt="Қызылордада тарифтердің негізділігі мен тұтынушылар құқығы бақылауда.jpg">Спикердің айтуынша, қазіргі таңда департамент 53 реттелетін қызмет түрі бойынша 33 табиғи монополия субъектісінің қызметін қадағалауда. Сонымен қатар, электр энергиясы мен газбен жабдықтау саласындағы 3 қоғамдық маңызы бар нарық субъектісіне қатысты баға белгілеу функциялары жүзеге асырылуда.<blockquote>– Есепті кезеңде 11 табиғи монополия субъектісіне тарифтер мен тарифтік сметалар бекітілді. Атап айтқанда, сумен жабдықтау және сарқынды суды бұру, жылумен жабдықтау, электр энергиясын беру, тауарлық газ тасымалдау және кірме теміржол жолдары қызметтері бойынша тарифтік шешімдер қабылданды. Тұтынушылардың құқықтарын қорғау мақсатында 2024 жылғы тарифтік сметалар мен инвестициялық бағдарламалардың орындалуына жүргізілген талдау нәтижесінде 5 субъект бойынша уақытша өтемдік тарифтер енгізілді. Соның нәтижесінде тұтынушыларға қаражат қайтару тетігі қарастырылды. Бақылау бағытында 9 жоспардан тыс тексеру жүргізіліп, бір жағдайда заң бұзушылық анықталды. Сондай-ақ 11 әкімшілік іс қозғалып, тиісті әкімшілік шаралар қабылданды.Жыл басынан бері департаментке жеке және заңды тұлғалардан 76 өтініш келіп түсті. Барлық өтініштер заңнама талаптарына сәйкес қаралды. Сонымен қатар, мемлекеттік қызметтер көрсету аясында 6 өтініш түсіп, оның 3-і қанағаттандырылып, 3-і бойынша бас тарту туралы шешім қабылданды. Жалпы алғанда, департамент тарапынан табиғи монополиялар субъектілерінің қызметін тиімді реттеу, тарифтердің негізділігін қамтамасыз ету және тұтынушылардың құқықтарын қорғау бағытындағы жұмыстар жүйелі түрде жалғасуда, – деді Алмат Аблайханұлы.</blockquote>Фото: freepik

Қызылордада тарифтердің негізділігі мен тұтынушылар құқығы бақылауда

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаев, облыстық мәслихат хатшысы Мұрат Тлеумбетовтың Жаңақорған ауданына жұмыс сапары Сунақата ауылындағы «Әмір» шаруа қожалығының егіс алқаптарын аралаумен жалғасты. Сондай-ақ аймақ басшысы осы сапарда «Сығанақ» қалашығын зерттеу жұмыстарының барысын да бағамдады.Шаруашылық орта есеппен жылына 200 тонна күріш және 400 тонна көкөніс-бақша өнімдерін өндіреді. Өнімдері Қызылорда және Түркістан облыстарының ішкі нарығына жеткізіледі. Заманауи агротехнологиялармен және техникамен жабдықталған.<img src="https://knadmin.beoblood.kz/uploads/Zamanaui_tehnika_ndiris_tiimdiligin_arttyrady1_2def9e3b08.jpg" alt="Заманауи техника өндіріс тиімділігін арттырады1.jpg">Атап айтқанда, «Беларус 1221» тракторы, «Class» комбайны, ХТЗ техникасы, жүк тиегіштер, лазерлі тегістегіштер, КамАЗ көліктері және агродрондар қолданылады. Бұл егін шаруашылығын цифрландыру мен өндіріс тиімділігін арттыруға мүмкіндік беріп отыр.Биыл аймақта 89,7 мың гектарға дәнді дақылдар, 6,1 мың гектарға майлы дақылдар, 73,2 мың гектарға малазықтық дақылдар, 16,8 мың гектарға картоп, көкөніс және бақша дақылдары егілді.<img src="https://knadmin.beoblood.kz/uploads/Zamanaui_tehnika_ndiris_tiimdiligin_arttyrady2_6bd1d6f104.jpg" alt="Заманауи техника өндіріс тиімділігін арттырады2.jpg">Мемлекет басшысының тапсырмасына сәйкес күріш көлемі 10,9 мың гектарға қысқартылып, 70 мың гектар болды. Бұл қадам су ресурстарын тиімді пайдалану және егіс құрылымын әртараптандыруға бағытталған.Ауыл шаруашылығы тауарөндірушілері қолда бар 3975 техниканы толық жөндеуден өткізді. Қажетті минералдық тыңайтқыштардың жалпы көлемі 65,6 мың тонна, оның 11 мың тоннасы отандық өнімдер есебінен қамтамасыз етілуде.Аймақ басшысы барған келесі нысан ортағасырлық Сығанақ қалашығы еліміздегі ең маңызды археологиялық ескерткіштердің бірі саналады. Қыпшақ хандығының, кейін Ақ Орданың және Қазақ хандығының астанасы болған тарихи қала орны. ЮНЕСКО-ның Дүниежүзілік мұралар тізіміне енгізуге ұсынылған маңызды тарихи ескерткіштер қатарына кіреді.Қазір мұнда ежелгі қамал дуалдарының іздері, төбешікке айналған құрылыс қалдықтары және археологиялық қазба жұмыстары барысында анықталған нысандар сақталған. Қалашық толық қалпына келтірілмегенімен, оның тарихи келбетін зерттеу, сақтау және қалпына келтіру бағытындағы жұмыстар жүйелі түрде жалғасуда.<img src="https://knadmin.beoblood.kz/uploads/Zamanaui_tehnika_ndiris_tiimdiligin_arttyrady3_98312b5377.jpg" alt="Заманауи техника өндіріс тиімділігін арттырады3.jpg">Облыс әкімі Мұрат Ергешбаев Жаңақорған ауданына жұмыс сапары барысында көпбейінді орталық ауруханаға жапсарлас салынған жаңа қосымша ғимаратты аралап көрді.Медициналық қызмет сапасын арттыру және тұрғындардың заманауи диагностикалық қызметтерге қолжетімділігін кеңейту мақсатындағы құрылысты «Дәнекер құрылыс компаниясы» жүргізген. Оған 792 млн теңге қаржы бөлінген.<img src="https://knadmin.beoblood.kz/uploads/724189610_1306281821693059_7825913092779469120_n_257903a7de.jpg" alt="724189610_1306281821693059_7825913092779469120_n.jpg">Жалпы ауданы 1212,06 шаршы метр, екі қабатты, цокольдік қабаты да бар, 9 төсек-орынға арналған. Заманауи магниттік-резонанстық томография аппараты орнатылатын болады.Жаңа ғимарат аудан тұрғындарының жоғары технологиялық-диагностикалық қызметтерге қолжетімділігін арттырып, ауруды ерте анықтау мен сапалы медициналық көмек көрсету мүмкіндіктерін кеңейтеді.Жаңақорған аудандық көпбейінді орталық ауруханасы 245 төсек-орынға есептелген, ғимараттың жалпы көлемі 5852,4 шаршы метр, үш қабатты, бес блоктан тұрады.Заманауи медициналық құрал-жабдықтармен қамтамасыз етілген. Қабылдау бөлімшесі, хирургия, терапия, перзентхана және гинекология бөлімшелері, зертхана, нейрореабилитация, жұқпалы аурулар, реанимация бөлімшелері жұмыс істейді.&nbsp;Сонымен қатар, күндізгі емдеу бөлімі, сәулемен емдеу, рентген, трансфузиология, ультрадыбыстық зерттеу, жүкті әйелдерге арналған УДЗ аппараты және компьютерлік томография қызметтері көрсетіледі.Бүгінде ауруханада 1520 қызметкер аудан тұрғындарының денсаулығын сақтау мен нығайту бағытында жүйелі жұмыс атқаруда. Медициналық мекеме жеке қазандық арқылы сұйытылған газбен жылытылады. Фото: Қызылорда облысы әкімінің баспасөз қызметі

Заманауи техника өндіріс тиімділігін арттырады

<a href="https://kyzylorda-news.kz/">Kyzylorda-news.kz</a> Қазақстан қор биржасындағы (KASE) сауда-саттық қорытындысы бойынша доллар бағамы қымбаттады, – деп хабарлайды <a href="https://kaz.inform.kz/news/kor-nariginda-dollar-bagami-nigaya-tust-d8905b7f">Қазақпарат.</a>Күндізгі сауда-саттық қорытындысы бойынша доллардың орташа бағамы 2,04 теңгеге өсіп, 491,37 теңге болды. Ұлттық банктің ресми бағамы - 489,33 теңге.Kurs.kz мәліметіне сәйкес, елорданың ақша айырбастау орындарында:<ul><li style="text-align:justify;">доллар 487,00 теңгеден сатып алынады, 494,00 теңгеден сатылады;</li><li style="text-align:justify;">еуро: сатып алу - 564,00 теңге, сату - 574,00 теңге;</li><li style="text-align:justify;">рубль: сатып алу - 6,40 теңге, сату - 6,70 теңге.</li><li style="text-align:justify;">юань: сатып алу - 68,98 теңге, сату - 74,02 теңге.</li></ul>Алматының ақша айырбастау пункттерінде доллар орта есеппен 490,02 теңгеден сатып алынады, 492,38 теңгеден сатылады. Еуро 569,11 – 574,13 теңге, ал рубль 6,50 – 6,62 теңге аралығында саудаланады. Ал юань 70,58 теңгеден сатып алынады, 72,98 теңгеден сатылады.Фото: freepik.com

Қор нарығында доллар бағамы нығая түсті

<a href="https://kyzylorda-news.kz/">Kyzylorda-news.kz</a> Премьер-министр Олжас Бектенов Мемлекет басшысының әртараптандыруға баса назар аудара отырып, экономиканың тұрақты өсуін қамтамасыз ету туралы тапсырмаларын орындау мәселесі бойынша кеңес өткізді.Онда экономика салаларын дамытудың ағымдағы көрсеткіштері қаралды. Премьер-министрдің орынбасары – ұлттық экономика министрі Серік Жұманғарин, көлік министрі Нұрлан Сауранбаев, энергетика министрі Ерлан Ақкенженов, өнеркәсіп және құрылыс министрі Ерсайын Нағаспаев, ауыл шаруашылығы министрі Айдарбек Сапаров, қаржы министрі Мәди Такиевтің баяндамалары тыңдалды.Ұлттық экономика министрлігінің мәліметінше, бес айдың қорытындысы бойынша экономиканың өсуі 3,7%-ды құраған. Өңдеу өнеркәсібінде өсім – 9%. Машина жасауда өндіріс көлемі 22,2%-ға ұлғайды. Қаңтар-мамыр айларында елімізде 81 мыңнан астам автокөлік құралдары жасалды. Өсім химия өнеркәсібінде 17,8%-ға және құрылыс материалдары өндірісінде 18,7%-ға қамтамасыз етілді. Ауыл шаруашылығында нақты көлем индексі 103,6% болды. Отын-энергетика кешеніне де назар аударылды.Премьер-министр инвестициялық жобаларды жүзеге асыру, жаңа өндірістерді уақтылы іске қосу және қолда бар өсу резервтерін тиімді пайдалану жөніндегі жұмысты күшейту қажеттігін атап өтті. Министрлерге қажетті өсу қарқынына қол жеткізу үшін барлық шараларды қабылдау тапсырылды.Үкімет басшысы жарты жылдың қорытындысы бойынша нақты көлем индексінің жоспарлы көрсеткіштеріне қол жеткізу үшін мемлекеттік органдардың бірінші басшыларының дербес жауапкершілігін бекітті.Фото: Үкіметтің баспасөз қызметі

Қазақстан экономикасы бес айда 3,7%-ға өсті

<a href="https://kyzylorda-news.kz/">Kyzylorda-news.kz</a> Арал ауданында түйе сүтінен құрғақ ұнтақ өндіретін жаңа зауыт іске қосылмақ. Кәсіпорын жылына 392 тонна өнім шығаруды жоспарлап отыр. Зауыт құрылысына жалпы көлемі 3 млрд теңге инвестиция тартылған. Оның 1,8 млрд теңгесі мемлекеттік қолдау аясындағы жеңілдетілген несие болса, 1,2 млрд теңгесі жеке инвестиция есебінен қаржыландырылған. Жоба бастамашысы – «Qazaq Camel» ЖШС.Қазіргі таңда негізгі өндірістік ғимараттың құрылысы мен технологиялық құрал-жабдықтарды орнату жұмыстары толық аяқталған. Жекелеген құрылғыларды соңғы рет монтаждау және іске қосу-баптау жұмыстары жүргізілуде. Кәсіпорын алғашқы сынамалық өнімдерін шығара бастады.Зауыт қажетті инфрақұрылыммен толық қамтылған. Атап айтқанда, сүт қабылдауға арналған 10 арнайы резервуар мен бірнеше сүт тасымалдайтын автокөлік сатып алынған. Өндіріс орны тәулігіне 20 мың литрге дейін түйе сүтін өңдеуге қауқарлы. Алдағы уақытта нарықтағы сұраныс көлеміне қарай өндірістік қуатты кезең-кезеңімен арттыру жоспарлануда.Жобаның іске асуы өңірдегі түйе шаруашылығын дамытуға тың серпін беріп, жергілікті өнімнің экспорттық әлеуетін арттыруға мүмкіндік жасайды. Сонымен қатар жаңа өндіріс орны аудан тұрғындарын тұрақты жұмыспен қамтып, өңір экономикасының дамуына оң әсерін тигізеді деп күтілуде.

Арал ауданында жаңа өндіріс орны пайдалануға берілмек

<a href="https://kyzylorda-news.kz/">Kyzylorda-news.kz</a> 15 маусым – Кеңес Одағының Батыры, мерген Әлия Молдағұлованың туған күні. Ұлы Отан соғысы жылдарында Отаны үшін отқа түсіп, ерлігімен ел есінде қалған қазақтың қаһарман қызының биыл туғанына 101 жыл.Былтыр Әлия Молдағұлованың 100 жылдық мерейтойы мемлекеттік деңгейде кеңінен аталып өтті.Атап айтқанда, Әлия Молдағұлованың 100 жылдығына арналған «Айбын» XI халықаралық әскери-патриоттық жастар жиынының ашылу салтанатында Мемлекет басшысы Қасым-Жомарт Тоқаев Әлия Молдағұлова мен Мәншүк Мәметова сынды батырлардың ерлігі өскелең ұрпақ үшін Отан алдындағы парызға адалдықтың үлгісін көрсеткенін атап өткен болатын.Батыр қыздың қайсарлығы – Отанға адалдықтың, өр рух пен жанқиярлықтың жарқын үлгісі.Әлия Молдағұлова 1925 жылы 15 маусымда Ақтөбе облысының Бұлақ ауылында дүниеге келген. Ғұмыры қысқа болса да, рухы мен есімі ел жадында мәңгіге сақталды.Ашық шайқасқа 1943 жылдың қазан айында 2-Прибалтика майданының 22-армиясы құрамындағы 54-жеке атқыштар бригадасы құрамында түсті.1944 жылғы 14 қаңтарда Псков облысындағы Насва стансасын жау қолынан азат ету кезінде Әлия Молдағұлова ерекше ерлік көрсетті. Толассыз оқ астында сарбаздарды бірнеше мәрте шабуылға бастап, жауынгерлерді жігерлендіріп отырды. Командирлер саптан шыққан сәтте басшылықты өз қолына алып, ұрысты жалғастырды. Ауыр жараланса да, соңғы демі қалғанша майдан шебін тастамай, ержүректік пен өжеттіктің озық үлгісін көрсетті.Әлия Молдағұлова небәрі 18 жасында майдан даласына аттанып, ерлікпен қаза тапты. Соғыстан кейін майданда қаза болған жауынгерлердің сүйегі әскери құрметпен бауырластар зиратына қайта жерленді.Тарихи деректерге сәйкес, мерген қыз майдан даласында жаудың 78 солдаты мен офицерінің көзін жойған. Көрсеткен ерлігі мен қайсарлығы үшін Әлия Молдағұловаға қайтыс болғаннан кейін Кеңес Одағының Батыры атағы беріліп, «Алтын Жұлдыз» медалімен және Ленин орденімен марапатталды.Әлия Молдағұлованың есімі мен ерлігі халық жадында мәңгі сақталып келеді. Батыр қыздың аты көптеген елді мекендерге, көшелер мен даңғылдарға беріліп, оның құрметіне ескерткіштер мен мемориалдық кешендер салынды.Ақтөбе облысында Кеңес Одағының Батыры Әлия Молдағұловаға арналған облыстық мемориалдық музей жұмыс істейді. Онда мерген қыздың балалық шағы, оқыған кезеңі және майдан жолына қатысты құнды деректер жинақталған. Сонымен қатар Қобда ауданындағы Әлия ауылында да оның рухына арналған музей бар.Әлия Молдағұлованың есімі мен ерлігі Мәскеуде де кеңінен насихатталып келеді. 1998 жылы №891 мектепке Әлия Молдағұлованың есімі берілді. Бұдан бөлек, Әлияның өзі тәлім алған мергендер мектебі орналасқан даңғыл оның құрметіне аталған. Ал 2005 жылы Әлия Молдағұлованың 80 жылдық мерейтойы қарсаңында мектеп ауласына ескерткіш қойылды.Қазақтың даңқты қызы – ел басына күн туған шақта халқын, жерін жауға бермеу үшін атқа қонған қазақтың батыр қыздарының ізбасары. Оның тағдыры мен жауынгерлік жолы әдебиетте, музыкада, кино мен театрда кеңінен дәріптеліп келеді. Ал ерлігі мен тағылымы жыл өткен сайын жаңғырып, жаңара бермек.

Қазақстан және Қызылорда облысының жаңалықтары