<a href="https://kyzylorda-news.kz/">Kyzylorda-news.kz</a> Мемлекет басшысының төрағалығымен өткен Үкіметтің кеңейтілген отырысынан туындайтын міндеттің бірі – инвестиция тарту бағытындағы жұмысты күшейту.Осы мақсатта облыс әкімі Нұрлыбек Нәлібаевтың тапсырмасына сәйкес облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай және облыс әкімінің орынбасары Ардақ Зебешев Байқоңыр қаласы әкімшілігі басшысының орынбасары Сергей Летягинмен кездесу өткізді.Қазіргі таңда облыс әкімдігі Париж келісімі аясында парниктік газдар шығарындыларын азайту жөніндегі халықаралық міндеттемелерді орындауда жаңартылатын энергия көздерін дамыту бойынша белсенді жұмыс жүргізуде. Өңірде жалпы қуаты 89 МВт болатын 9 күн-электр станциясы жұмыс жасайды, оның үшеуі шетелдік инвесторлардың қатысуымен іске қосылған.Қосымша жалпы қуаттылығы 201,5 МВт болатын 6 жоба жүзеге асырылуда.Бұл орайда аймақ экономикасына 62 млрд.теңге инвестиция тартылып, 54 жаңа жұмыс орны құрылады.Байқоңыр қаласының аумағында екі қосалқы станция бар. С.Летягинмен кездесуде Байқоңыр кешеніндегі электр инфрақұрылымының әлеуеті, жаңартылатын энергетиканы дамыту және пайдалану мәселелері талқыланды.Бұл энергетикалық инфрақұрылымды жаңғыртуға, жаңа электр станцияларын салуға және инвестиция тартуға мүмкіндік береді.Фото: Қызылорда облысы әкімінің баспасөз қызметі

Энергетикалық инфрақұрылымды дамыту мәселесі талқыланды

<a href="https://kyzylorda-news.kz/">Kyzylorda-news.kz</a>&nbsp; Қызылорда облысының табиғи ресурстар және табиғат пайдалануды реттеу басқармасының басшысы тағайындалды.Бүгін облыс әкімі Нұрлыбек Нәлібаевтың төрағалығымен әлеуметтік-экономикалық көрсеткіштерге, кадрлық өзгерістерге орай актив отырысы өтті.Жиында аймақ басшысы Қызылорда облысының табиғи ресурстар және табиғат пайдалануды реттеу басқармасының жаңа басшысы Еркебай Ғалымжан Бақтығалиұлын таныстырды.Ғалымжан Бақтығалиұлы 1981 жылы дүниеге келген. Қорқыт ата атындағы Қызылорда мемлекеттік университетінде білім алған.Еңбек жолын 1997 жылы «Шаған» агрофирмасында бастаған. Әр жылдары Қызылорда қаласының сәулет және қала құрылысы, жер қатынастары бөлімдерінде жетекші маман, бас маман, сектор меңгерушісі, бөлім басшысы, «Мемлекеттік қала құрылыс кадастры» мекемесі филиалының директоры, Қазалы, Сырдария аудандары әкімінің орынбасары, облыстық құрылыс, сәулет және қала құрылысы басқармасы басшысының орынбасары лауазымдарында абыройлы еңбек етті.2022 жылдың тамыз айынан осы күнге дейін Қызылорда қаласы әкімінің орынбасары қызметін атқарып келді.Облыс әкімі жаңа басшыға сәттілік тілеп, табиғи ресурстарды пайдалану саласындағы жұмыстарға тоқталды.<blockquote>«Әріптесіміз мемлекеттік қызметте, басшылық лауазымдарда мол тәжірибе жинаған. Жаңа қызметіне байланысты бірқатар міндет жүктеледі.Мемлекеттік орман қоры аумағында өрттің алдын алу және оған қарсы күрес жоспарын жүзеге асыру, орман және су қорын, жануарлар дүниесі мен балық ресурстарын қорғау, өсімін молайту, тиімді пайдалану өте маңызды. Арал теңізінің құрғаған ұлтанына сексеуіл көшетін егу, тұқым себу жұмыстары да жүйелілікті талап етеді. Елді мекендердегі қоқыс полигондары мен сұрыптау кешендеріне қатысты жалпы жұмысты үйлестіріп, жаңадан жоспарланған полигондар құрылысының экологиялық талапқа сәйкестігін қамтамасыз етуді тапсырамын», – деді Н. Нәлібаев.</blockquote><img src="https://knadmin.beoblood.kz/uploads/1_Bas_arma_basshysy_ta_ajyndaldy_79e1d10091.jpg" alt="1 Басқарма басшысы тағайындалды.jpg">Фото: Қызылорда облысы әкімінің баспасөз қызметі

Басқарма басшысы тағайындалды

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың төрағалығымен денешынықтыру- сауықтыру кешенін салу жобасы бойынша жиын өтті. Оған «Қазақстан халқына» қоғамдық қорының басқарма төрайымы Ләззат Шыңғысбаева, жауапты сала басшылары, зиялы қауым өкілдері және қордан балаларының еміне көмек алған ата-аналар қатысты.Басқосуда Қызылорда облысының әкімдігі, «Қазақстан халқына» қоғамдық қоры және «Р и А Сервис ЛТД» жауапкершілігі шектеулі серіктестігі арасында денешынықтыру-сауықтыру кешенін салу туралы үшжақты меморандумға қол қойылды. Аймақ басшысы бірлесіп атқарылатын жұмыстарға тоқталып, алдағы жоспарларды бөлісті.<blockquote>«Президентіміз Қасым-Жомарт Кемелұлының тікелей бастамасымен денсаулық сақтау, білім беру және әлеуметтік қолдау салаларындағы мәселелерді шешу мақсатында құрылған «Қазақстан халқына» қоғамдық қорымен тығыз байланыс орнатылып, өңірімізде бірлескен жобалар қолға алынған.Бүгін қордың қолдауымен Қызылорда қаласынан құны 2 млрд. 900 млн. теңге (қор – 2 млрд. 300 млн. теңге, ОБ – 600 млн. теңге) болатын денешынықтыру- сауықтыру кешенін салу үшін үшжақты келісімге қол қою рәсіміне жиналдық.Президентіміздің, Үкіметтің ерекше қолдауымен Сыр өңірінде байыпты бастамалар қолға алынып, жасампаз жобалар жүзеге асуда. Облыс бюджетін 750 млрд теңгеден асырдық. Сәулеті мен сәні келіскен жаңа ғимараттар бой көтеріп, ел игілігіне табысталуда.Мемлекет басшысының «Туған жерді бірге түлетейік!» үндеуіне орай жергілікті кәсіпкерлер, қоғамдық қорлар, облыстан шыққан меценаттар ортақ іске белсенді араласып, қайырымдылық шараларына, Сыр елін көркейтуге үлес қосуда.Бүгінде демеушілердің 50 млрд. теңгеден астам қаржысына іргелі істер атқарылды. Қор ұжымына қажырлы да қомақты еңбегі үшін ризашылығымызды білдіреміз. Болашақта да қарым-қатынасымыз өзара тиімді негізде құрылады деп үміттенеміз», – деді Н.Нәлібаев.</blockquote>Жиында Ләззат Шыңғысбаева өңірдегі жұмыстарға оң бағасын берді. Сонымен қатар, облыстық ардагерлер кеңесінің төрағасы Серік Дүйсенбаев пен еңбек ардагері, қоғам қайраткері Ибрагим Абибуллаев бастамаларға сәттілік тіледі. Ата-аналар атынан Досбол Сәттібаев қор ұжымына лебізін білдірді.Айта кетейік, «Қазақстан халқына» қоғамдық қоры аймағымызда 7 млрд. 150 млн теңгенің жобаларын жүзеге асыруда. Соңғы екі жылда өңірдің денсаулық сақтау саласына 4 млрд. 800 млн. теңге қаржы бағыттады. Бұл қаржыға облыстық балалар ауруханасы базасында және Жаңақорған ауданында «Қамқорлық» орталықтары ашылып, қажетті дәрі-дәрмек алынды.Қордың қолдауымен Арал ауданында да «Қамқорлық» орталығы салынуда. Мамыр айында пайдалануға беріледі. Сондай-ақ, облыстық онкология орталығын құны 1 млрд. 100 млн. теңге болатын скрининг жүргізуге арналған жылжымалы медициналық кешенмен қамтамасыз етті. Бұл кешен еліміздің 3 өңірінде ғана бар. Қазіргі кезде аймақтың шалғай елді мекендеріндегі тұрғындарға тұрақты қызмет көрсетеді.«Қазақстан халқына» қоғамдық қоры «Ауылдық аймақтардағы тірек мектептердің әлеуетін дамыту» жобасын да іске асыруда. Жоба аясында 2022-2024 жылдары 6 мектеп 1 млрд. 500 млн. теңгеге қайта жабдықталды. Биыл тағы 2 мектепке 500 млн теңге қаржы қаралған.Қор демеушілігімен 172,5 млн. теңгеге жылдам тұрғызылатын ангар типтес спорт кешені Шиелі ауданы Ақтоған ауылында салынып, ел игілігіне табысталды. Жалағаш ауданы Аққыр ауылындағы спорт кешені жақын күндері пайдалануға беріледі. Ал Сырдария ауданына спорттық құрал-жабдықтар алынып, бөлмелер жабдықталды.&nbsp;Фото: Қызылорда облысы әкімінің баспасөз қызметі

Үшжақты меморандумға қол қойылды

<a href="https://kyzylorda-news.kz/">Kyzylorda-news.kz</a> Бүгін Қызылордадағы «Достық үйінде» «Сыр елі – достық мекені» атты республикалық Ассамблея жастары форумының пленарлық отырысы өтті.Форумға ҚР Парламенті Сенатының депутаты, жастар жанашырлары Нурия Ниязова, Ғылым және білім министрлігі Жоғары және жоғары оқу орнынан кейінгі білім комитеті төрағасының орынбасары Ақерке Абылайханқызы, «Ассамблея жастары» республикалық қоғамдық бірлестігінің төрағасы Тимур Жұмырбаев, барлық өңірден келген Ассамблея жастарының көшбасшылары қатысты.Аймақ басшысы Нұрлыбек Нәлібаев форум қатысушыларын Қазақстан халқы Ассамблеясының 30 жылдығымен құттықтап, басқосу жұмысына сәттілік тіледі.<blockquote>«Баршаңызды бірліктің ұйытқысы болып, еліміздегі этносаралық достық пен толеранттылықтың үлгісін әлемге танытқан Қазақстан халқы Ассамблеясының 30 жылдық мерекесімен шын жүректен құттықтаймын! Бүгін өздеріңізбен Қазақстан халқы Ассамблеясының 30 жылдығына арналған «Сыр елі – достық мекені» атты форумда жүздескеніме қуаныштымын!Президентіміз Қасым-Жомарт Кемелұлы: «Отаншылдық, адамгершілік, білімпаздық, нағыз маман болу, үнемшілдік, еңбекқорлық, ел мен жерге жанашырлық сияқты асыл қасиеттер бәрінен биік тұруға тиіс. Осындай ізгі қасиеттің бәрін бойына сіңірген жанды Адал азамат деген бір ауыз сөзбен сипаттауға болады. Әділетті Қазақстанды құру үшін әрбір отандасымыз адал азамат болуға ұмтылуы қажет», – деген болатын.Сыр өңірінде әр салада, атап айтқанда, білім, ғылым, журналистика, қоғамдық қызмет, спорт, медицина, мәдениет, кәсіпкерлік, өндірісте табысты еңбек етіп, жоғары көрсеткіштерге жеткен жастарға жыл сайын «Сыр үміті» облыстық жастар сыйлығы табысталып келеді. Баспана мәселесін шешу үшін 2023 жылдан бері «Сыр жастары» тұрғын үй ипотекалық бағдарламасы жүзеге асуда. Оған жыл сайын жергілікті бюджеттен «Отбасы банк» тұрғын үй құрылыс жинақ банкі» арқылы кредит беруге 1 млрд 200 млн теңге бөлінеді.Ассамблеяның мерейлі жылы аясындағы қуанышты жаңалық – Қызылорда қаласында жаңадан «Достық үйі» салынуда. Бұл бірлік пен ынтымақты нығайтуға атсалысқан этномәдени бірлестіктерге арналған, барлық қажеттіліктермен қамтамасыз етілген заманауи ғимарат болады. Тағы бір ерекше жаңалығымыз, алдағы 1 мамыр – Қазақстан халқының бірлігі мерекесі күні облыс орталығынан «Шығармашылық академиясы» ашылады», – деді Н.Нәлібаев.</blockquote>Жиынға қатысушылар Нурия Исмагилқызы, Ақерке Абылайханқызы және Тимур Ғабдулұлының атқарылған жұмыстар мен алдағы міндеттерге арналған баяндамаларын тыңдады.Ертең қонақтар Байқоңыр ғарыш айлағына экскурсияға барып, зымыран ұшырылымын тамашалайды. Байқоңыр музейінде ғарыш саласының даму кезеңдерімен, еліміздің ғарыштық жетістіктерімен, тұңғыш ғарыш айлағының тарихымен танысады. Қазақстан Халқы Ассамблеясының және Ассамблея жастарының тулары ғарышқа жіберу үшін ресми тапсырылады. Осылайша Қазақстан халқы Ассамблеясының 30 жылдық эмблемасы бейнеленген ту ғарышқа алғаш рет көтеріледі.Фото: Қызылорда облысы әкімінің баспасөз қызметі

«Сыр елі – достық мекені» атты республикалық Ассамблея жастары форумының пленарлық отырысы өтті

<a href="https://kyzylorda-news.kz/">Kyzylorda-news.kz</a> &nbsp;Облыс әкімі Нұрлыбек Нәлібаев Аэроғарыш комитеті төрағасының орынбасары Ерден Ибраев және «Инфракос» шаруашылық жүргізу құқығындағы республикалық мемлекеттік кәсіпорнының бас директоры Назар Көптілеуовпен кездесті.Онда «Бәйтерек» ғарыштық зымыран кешені құрылысының жай-күйі және туризмді дамыту мәселесі талқыланды.Үкімет басшысы Олжас Бектенов Қызылорда облысына өткен жылғы іссапарында «Бәйтерек» кешені құрылысын тексерген болатын. Аймақ басшысы жобаны уақытылы іске асырудың маңызын атап өтті.«Бәйтерек» ғарыштық зымыран кешені – Қазақстан мен Ресейдің бірлескен ең ірі жобасы. Құрылысты аяқтау мерзімі 2028 жылдың мамырына, ал алғашқы ұшу сынақтары 2025 жылдың аяғына жоспарланған. Кешеннің жылына 6-8 зымыран ұшыруға мүмкіндігі бар. Жоба «Байқоңырдың» белсенді жұмысын қамтамасыз ету, қала тұрғындарын жұмыспен қамту үшін аса қажет.Туризмді дамыту және «Байқоңыр» кешенінің мәдени әлеуетін пайдалану бағытында да жұмыс жүргізілуде. Қазақстандық тараптан туристік қызметті жүзеге асыратын ұйым ретінде «Бәйтерек» бірлескен кәсіпорны» акционерлік қоғамы және «Инфракос» республикалық мемлекеттік кәсіпорны анықталды.Қалаға және ғарыш айлағына электронды форматта рұқсаттама рәсімдеу, «Байқоңыр» кешенінің туристік нысындарына баруға өтінім ұсыну мерзімін қысқарту мәселелері пысықталуда.Фото: Қызылорда облысы әкімінің баспасөз қызметі

«Байқоңыр» кешеніндегі жұмыстар сараланды

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Нұрлыбек Нәлібаев бизнес өкілдерімен кездесті. Жиынға құқық қорғау және мемлекеттік органдардың басшылары қатысты.Аймақ басшысы бизнесті қорғау, инвесторлар мүддесін сақтау, инвестициялық жобаларды жүзеге асырудағы мәселелерге тоқталды.<blockquote>«Өткен жылы өңірімізде 37 млрд. теңгенің 21 жобасы іске қосылды. Маңызды әрі ірі жобаның бірі ретінде құны 20 млрд. 900 млн. теңгені құрайтын «Қорқыт Ата әуежайының» жаңа терминалын атап өтуіміз қажет. Қазіргі таңда әуежайдың қызмет көрсету салаларын дамыту, сенімгерлік басқаруға беру үшін вьетнамдық «Совико Групп» компаниясымен келіссөз жүргізілуде.Одан бөлек, шыны зауытының ішінен 5 млн. шаршы метр энергия үнемдейтін шыны шығару желісі, тамақ өнеркәсібінде 5 жоба, логистика саласында 1 жоба қосылды.Бұл жобалар құрылысынан бастап іске қосылғанға дейін «қолмен басқару» режимінде сүйемелденді, туындаған мәселелері дер кезінде шешілді.Республикалық инвестициялар тарту кеңесінде цемент зауытының санитариялық-қорғаныш аймағы, салынып жатқан жаңа жылу-электр орталығының қосылған құн салығы, шыны зауытының тауарлық газ бағасын төмендету мәселелері шешімін тапты.Өңірімізге инвестиция тарту мақсатында Корея, Италия, Испания, Қытай елдеріне жасаған жұмыс сапарларымыз алғашқы жемісін беруде.Қорқыт Ата атындағы Қызылорда университетінің базасында Кореяның СеулТех университетінің еліміздегі алғашқы Жасанды интеллект және информатика жоғары мектебі ашылды.Наурыздың 12-сінде Астана қаласында Үкімет басшысы Олжас Абайұлымен бірге испаниялық «Roca Group» компаниясының басшылығымен кездесіп, алдағы жоспарларды талқыладық. Испандық инвестормен санитарлық бұйымдар өндіру зауытын салу жобасы пысықталуда.Қытай Халық Республикаcымен 10 млрд. 800 млн. теңгенің 9 келісіміне қол қойылды. Алдағы уақытта келісімдердің нәтижесі көріне бастайды.Президентіміздің Катар еліне жасалған жұмыс сапары аясында өңірімізде 800 млрд. теңгеге қуаттылығы 1 100 МВт-ты құрайтын бу-газ қондырғысын салу келісілді. Жобаны орналастыру үшін 280 гектар жер телімі резервке алынды. Оның 100 гектарына газ-электр станциясы салынады, қалған аумақ перспективалық жобаларды жүзеге асыру үшін белгіленген.Инвестициялық жобалардың мәселелерін талқылап, шешу жолдарын қарастыратын өңірлік штаб менің төрағалыммен тұрақты жұмыс жасауда.Одан бөлек, Өңірлік үйлестіру кеңесінде жер телімдері мен инженерлік инфрақұрылым жүйелерін жеткізуге қатысты шешімдер қабылданды. Құқық қорғау органдарымен бірлесіп, аймақтағы инвестициялық жобаларды сүйемелдеуді, олардың мәселелерін шешуді, шағын және орта кәсіпкерлік үшін бизнес-ахуалды жақсартуды әрі қарай жүйелі түрде жалғастыратын боламыз», – деді Н.Нәлібаев.</blockquote>Соңғы 3 жылда кәсіпкерлікті қаржылай қолдау үшін (2022-2024 жж.) 16 700 жобаға әртүрлі қаржы көздерінен 206 млрд. теңге тартылды. Оның 40 млрд. 931 млн теңгесі мемлекеттік бағдарламалар аясында қолдау тапты. Биыл 29 млрд. теңгеге кәсіпкерліктің 4 800 жобасы қаржыландырылды. Бұл кәсіпкерліктің экономикадағы үлесін 21%-ға жеткізеді (2021 ж. – 18,3%, 2022 ж. – 19,1%, 2023 ж. – 19,9%, 2024 ж 9 ай – 20,5%).Мемлекет басшысының бастамасымен қолға алынған «Ауыл аманаты» жобасы аясында 2023-2024 жылдары 748 жоба жүзеге асты, 1000-нан астам жаңа жұмыс орны ашылды. Биыл бағдарлама аясында 815 жоба көзделуде.Агробизнес өкілдері шағын өндіріс орталықтарын құруға басымдық берген. Шаруашылық құрылымдарының әлеуметтік жауапкершілігі аясында кәсібін бастаушыларды ғимаратпен, кепілдікпен қамтамасыз етуде.Жиын соңында туындаған мәселелер талқыланып, кәсіпкерлер өз ойларын ортаға салды.<img src="https://knadmin.beoblood.kz/uploads/4_02c1229b5a.jpg" alt="4.jpg">Фото:&nbsp;Қызылорда облысы әкімінің баспасөз қызметі

Аймақ басшысы бизнес өкілдерімен кездесті

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев қоғам қайраткері Әбдіжәлел Бәкірді 85 жасқа, Денсаулық сақтау саласының үздігі Абдулла Шүленбаевты 75 жасқа толған мерейтойымен құттықтады.<blockquote>«Сыр өңірінде адал қызмет атқарып, саналы ғұмырын аймағымыздың әлеуметтік-экономикалық, мәдени-рухани дамуына арнаған, елдің қошеметіне бөленген аға буын өкілдеріне лайықты құрмет көрсету дәстүрге айналды. Мемлекет басшысы Қасым-Жомарт Кемелұлы: «Адал еңбек етіп, адал табыс тапқан адам жетістікке жетеді, құрметке ие болады. Нағыз еңбек адамы бұл – істің адамы, яғни әр ісіне, әр қадамына жауапкершілікпен қарайтын адал азамат. Әділетті Қазақстан және Адал азамат ұғымдары ел тірегі болатын егіз құндылық ретінде әрдайым қатар тұруға тиіс» деген болатын.Үлкендеріміз еңсесі биік ел іргесінің сөгілмеуін, келешек ұрпақ жолының ашық болуын тілеп, тұтас қауымды әрқашан бірлікке үндеп келеді. Бүгінгі жиынымыз адал еңбегімен халықтың ыстық ықыласына бөленген, өнегелі істердің ұйытқысы бола білген ардақты ағаларымыздың құрметіне арналады.Сыр жұртшылығы аймақтың дамуына зор үлес қосқан, елдің ыстық ілтипатына бөленген өздеріңіздей жерлестерімен мақтанады. Тілеулес азаматтардың, ақадал ниетті жерлестеріңіздің атынан бүгінгі мерейтойларыңызбен шын жүректен тағы да құттықтап, дендеріңізге саулық, отбастарыңызға амандық тілейміз! Ұрпақтарыңыздың қызығын көре беріңіздер! Тойларыңыз тойға ұласа бергей!»,– деді Н.Нәлібаев.</blockquote>Әбдіжәлел Қошқарұлы 1940 жылы Сырдария ауданында дүниеге келген. Н.В.Гоголь атындағы Қызылорда педагогика институтының филология факультетінде білім алған. Еңбек жолын мұғалімдіктен бастап, әр жылдары Қызылорда қалалық комсомол комитетінде, комсомол, партия органдарында, «Қазақстан-Қызылорда» телеарнасында, Қазақ гуманитарлық заң университетінде жауапты қызметтер атқарған. ҚР Парламенті Мәжілісінің депутаты кезінде өзекті мәселелерді көтеріп, еліміздегі «Бұқаралық ақпарат құралдары», «Жарнама туралы», «Тіл туралы», «Саяси партиялар туралы» заңдардың қабылдануына атсалысты. Алаш қозғалысын зерттеп, 10 монография, 2 оқулық, 200-ден астам ғылыми мақала жазған. Ерен еңбегімен саяси ғылымдар докторы, профессор ғылыми атақтарын, «Ыбырай Алтынсарин» төсбелгісін иеленіп, Қазақстан Республикасы Президентінің Құрмет грамотасымен марапатталды. Қызылорда қаласының құрметті азаматы атанды.Абдулла Сыздықұлы 1950 жылы Қызылорда қаласында дүниеге келген. Алматы мемлекеттік медицина институтында «Емдеу ісі» мамандығы бойынша білім алған. Еңбек жолын 1973 жылы облыстық ауруханада қатардағы дәрігерден бастап, бөлім меңгерушісі, директор қызметтерін атқарған. Құрметті зейнет демалысына шыққаннан кейін Сыр медицинасының қарашаңырағы көпбейінді облыстық ауруханада қызметін жалғастырып, жас мамандарға хиругия саласының қыр-сырын үйретумен айналысып келеді. Жарты ғасырдан астам еңбек жолында 15 мыңнан астам ота жасап, мыңдаған адамның өміріне араша болған. Қазіргі таңда еңбек жолын хирург-кеңесші ретінде жалғастыруда. Қазақстан Республикасы Президентінің Құрмет грамотасымен, «Құрмет» орденімен, «Шапағат» медалімен, «Денсаулық сақтау ісіне қосқан үлесі үшін» төсбелгісімен марапатталды. Қызылорда облысының құрметті азаматы.Басқосуда мерейтой иелеріне облыстың ең жоғары марапаты – Қызылорда облысының Құрмет грамотасы табысталып, халқымыздың игі дәстүріне сай шапан жабылды.Мерекелік жиында Қызылорда облысының құрметті азаматтары Тұрғанбай Маханов, Ибрагим Әбибуллаев, Шахизат Төребаев мерейтой иелерінің еңбек жолына тоқталып, құттықтау лебіздерін жеткізді.<img src="https://knadmin.beoblood.kz/uploads/1_Arda_ty_azamattar_a_lajy_ty_rmet_k_rsetildi_f1fe4ef81f.jpg" alt="1 Ардақты азаматтарға лайықты құрмет көрсетілді.jpg"><img src="https://knadmin.beoblood.kz/uploads/2_Arda_ty_azamattar_a_lajy_ty_rmet_k_rsetildi_3cc2af84c9.jpg" alt="2 Ардақты азаматтарға лайықты құрмет көрсетілді.jpg"><img src="https://knadmin.beoblood.kz/uploads/3_Arda_ty_azamattar_a_lajy_ty_rmet_k_rsetildi_b102e7e15c.jpg" alt="3 Ардақты азаматтарға лайықты құрмет көрсетілді.jpg">Фото: Қызылорда облысы әкімінің баспасөз қызметі

Ардақты азаматтарға лайықты құрмет көрсетілді

<a href="https://kyzylorda-news.kz/">Kyzylorda-news.kz</a> Аймақ басшысы Нұрлыбек Нәлібаевтың төрағалығымен облыс әкімдігі жанындағы терроризмге қарсы комиссия отырысы өтті. Күн тәртібінде 3 мәселе қаралды.Облыстық жұмылдыру дайындығы, аумақтық және азаматтық қорғаныс басқармасының басшысы Марат Құрманбаев терроризмге қарсы орталық пен облыстық комиссияның хаттамалық шешімдерінің, ақпараттық қажеттілік тізбесінің орындалуы туралы баяндады. Облыстық дін істері басқармасының басшысы Дінмұхамед Ермеков тәуекел топтармен жүргізілген ақпараттық-түсіндіру жұмыстарының нәтижелеріне тоқталды. Этносаралық қарым-қатынастар мен этностар арасындағы қақтығыстардың алдын алуда атқарылған жұмыстарды облыстық қоғамдық даму басқармасының басшысы Руслан Каюпов айтты.Жиында облыс әкімі көтерілген мәселелерге қатысты жауапты тұлғаларға бірқатар тапсырма берді. Облыстық жұмылдыру дайындығы, аумақтық және азаматтық қорғаныс басқармасы терроризмге қарсы орталық пен облыстық комиссияның хаттамалық шешімдерінің орындалуын қатаң бақылауға алып, шараларды толық әрі сапалы жүзеге асыруы тиіс. Профилактикалық шаралардың сапасын арттыруда Қызылорда қаласы мен аудан әкімдіктері, жауапты мемлекеттік органдар әдістемелік көмек көрсетуі керек. Облыстық дін істері басқармасына тәуекел топтармен жүргізілетін профилактикалық шаралардың тиімділігін арттыру үшін ақпараттық-түсіндіру тобының жұмысын жетілдіру жүктелді.Аймақ басшысы этносаралық қарым-қатынас ерекше бақылауды қажет ететін маңызды мәселе екенін атап өтті. Өңірлік ақпараттық-түсіндіру тобының көмегімен этнос өкілдері көп шоғырланған жерлердегі профилактикалық және мәдени-көпшілік іс-шараларға оларды кеңінен тарту, этносаралық достық пен татулықты насихаттау әрдайым назарда болуы керек.<img src="https://knadmin.beoblood.kz/uploads/1_Terrorizmge_arsy_komissiya_otyrysy_tti_f5a9b7d6b2.jpg" alt="1 Терроризмге қарсы комиссия отырысы өтті.jpg">Фото: Қызылорда облысы әкімінің баспасөз қызметі

Терроризмге қарсы комиссия отырысы өтті

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың төрағалығымен облыс аумағындағы құрылыстардың сапасы, мерзімінде қолданысқа берілуі, жаңа нысандар маңайының абаттандырылуы талқыланған жиын өтті.&nbsp;Оған қала, аудан әкімдері, жауапты сала басшылары қатысты.Бұған дейінгі жиындарда аймақ басшысы жауапты тұлғаларға құрылыс нысандардағы жұмысты қатаң бақылауға алып, кемшіліктерді дер кезінде анықтап, жою туралы тапсырма берген болатын. Жиында осы тапсырмалардың орындалу мәселесі қаралды.<blockquote>«Құрылыс алаңының орнында сапалы салынған, сәулеті мен сәні келіскен, жылдар бойы халық игілігіне жарайтын ғимарат болуы тиіс. Ол үшін, әрине сапалы материалдар пайдаланылып, кемшілік кетсе уақытында анықталуы керек. Мердігер мекемелермен ұдайы байланыста болып, құрылыстың басына барып тексеріңіздер. Бірінші әрі басты талап – сапа, сосын жұмысты мерзімінде аяқтау да әрдайым назарда болсын, – деді Нұрлыбек Машбекұлы.</blockquote>Сондай-ақ, облыс әкімі жаңа нысандардың аумағын абаттандыруға қатысты бірқатар тапсырма берді.Фото: Қызылорда облысы әкімінің баспасөз қызметі

Тапсырмалардың орындалуы қатаң бақылауда

<a href="https://kyzylorda-news.kz/">Kyzylorda-news.kz</a>&nbsp;Мемлекет басшысы "Ұлы Отан соғысындағы Жеңіске 80 жыл" медалі туралы Жарлыққа қол қойды. Бұл туралы <a href="https://stan.kz/ardagerler-medalmen-marapattaladi-tokaev-zharlikka-kol-415557/">Stan.kz</a> ақпарат агенттігі хабарлайды.Жарлыққа сәйкес Ұлы Отан соғысының ардагерлері, тыл еңбеккерлері және басқа да тұлғалар "Ұлы Отан соғысындағы Жеңіске 80 жыл" бірыңғай мерейтойлық медалімен марапатталатын болады.Жарлықтың&nbsp;әзірленуіне ТМД мемлекет басшылары кеңесінің 2024 жылғы 10 маусымдағы "1941-1945 жылдардағы Ұлы Отан соғысының 80 жылдығына арналған бірыңғай мерейтойлық медальді белгілеу туралы" шешімі негіз болғаны айтылған.Ұлы Отан соғысының 80 жылдығына арналған мерейтойлық медальмен соғыс кезінде армия, флот, штабтар мен әскери мекемелерде қызмет еткен әскери қызметшілер, партизандар мен астыртын әрекет етушілер, сондай-ақ соғыс кезінде жарақат, контузия, мертігу немесе ауруға шалдығу салдарынан мүгедектік белгіленген әскери қызметшілер, жұмысшылар мен қызметшілер марапатталады.Бұдан бөлек, соғыс ардагерлері мен партизандардың, сондай-ақ "Ленинградты қорғағаны үшін" медалімен марапатталғандардың қайта некеге тұрмаған жұбайлары және соғыста қаза тапқан жауынгерлердің жесірлері де медальмен марапатталады.<blockquote>"Мерейтойлық медальді тапсыру Қазақстан Республикасының жергілікті атқарушы органдары арқылы Қазақстан Республикасының Президенті атынан және оның тапсырмасы бойынша наградталушылар тізімдері бекітілген күннен бастап алты айдан кешіктірілмей жүзеге асырылады. Медаль наградталушы тұлғаның тізімге енгізілген жерінде табысталады", – делінген жарлыққа берілген түсіндірмеде.</blockquote>Мерейтойлық медальмен бірге марапатталушыға медаль куәлігі де тапсырылады. Жарлық ресми жарияланған күнінен бастап күшіне енеді.Фото: Ақорда

Ардагерлер медальмен марапатталады: Мемлекет басшысы Жарлыққа қол қойды 

<a href="https://kyzylorda-news.kz/">Kyzylorda-news.kz</a> Құрметті бауырлар! Ардақты ағайын!Қасиетті Қадір кеші мүбәрак болсын! Алла Тағала ұстаған оразаларыңызды, жасаған құлшылық-ғибадаттарыңызды қабыл еткей.Алла Тағала Құранда: «Біз шынында, Құранды Қадір түнінде түсірдік. Қадір түнінің не екенін білесің бе? Қадір түні (қасиет және сауап жағынан) мың айдан да қайырлы. Сол түнде періштілер және Жәбірейіл Алланың әмірімен (жер бетіне Алла тағдыр еткен) барлық істерді атқару үшін түседі. Сол бір түн, ағарып таң атқанға дейін амандық-тыныштық түні болады» («Қадір» сүресі, 1-5-аяттар) деп баяндайды.Расында, Рамазан айының қасиетті болуының ұлы ерекшеліктерінің бірі – Қадір түнінде тағдырдың жазылуы. Ал Қадір түнінің қасиетті болуының мәні – адамзат баласын екі дүние бақытына жетелеуші қасиетті кітабымыз Құранның түсуі. Бұған тұтастай осы қасиетті түнге қатысты баяндалған «Қадір» сүресі дәлел болады.Айша анамыз (оған Алла разы болсын): «Рамазанның соңғы он түні кірген кезде Пайғамбар білегін сыбанып, түнін құлшылықпен тірілткен және отбасын да құлшылыққа оятқан» дейді. Бұл түні намаз бен Құран оқудың сауабы мол. Сонымен қатар Алладан көбірек кешірім сұрап, дұға жасауды ұмытпайық.Бірде Айша анамыз (оған Алла разы болсын) ардақты Пайғамбарымыз Мұхаммедтен (оған Алланың салауаты мен сәлемі болсын): «Уа, Алланың Елшісі, Қадір түнінде қандай дұға тілейін?» деп сұрайды. Сонда Пайғамбарымыз (оған Алланың салауаты мен сәлемі болсын): «Алла, расында, Сен кешірімдісің және кешіргенді жақсы көресің. Мені кешіре көрші» деп айтасың» деп жауап берген. Хадистердің бірінде: «Кімде кім Қадір түні иманмен және сауабын үміт етіп құлшылық етсе, оның алдыңғы күнәлары кешіріледі» делінген.Алла Тағала баршамыздың қате-кемшілігімізді кешіріп, өз мейіріміне бөлегей. Раббымыз Қадір кешінде шынайы иманмен жасаған дұғаларымызды, намаздарымызды, берген садақаларымызды, оқыған Құранымызды қабыл етіп, сауабын еселеп жазғай. Баршаңызды ел игілігі мен бірлігі үшін дұға жасауға шақырамын.Еліміз аман, жеріміз тыныш, тәуелсіздігіміз баянды болғай! Әмин!НАУРЫЗБАЙ ҚАЖЫ ТАҒАНҰЛЫҚМДБ төрағасы, Бас мүфти

Бас мүфти Қазақстан мұсылмандарын Қадір түнімен құттықтады

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде коммуналдық және өнеркәсіптік қалдықтарды басқару мәселелері талқыланды. Оған облыс әкімі Нұрлыбек Нәлібаев селекторлық режим арқылы қатысты.Өңірде коммуналдық және өнеркәсіптік қалдықтарды басқару бағытында жұмыс жасайтын 24 кәсіпкерлік субъектісі бар. Өткен жылы жиналған 303 мың тонна коммуналдық қалдықтың 91 мың тоннасы, 135 мың тонна өнеркәсіптік қалдықтың 107 мың тоннасы өңделді. Мемлекет басшысының ірі қалаларда қатты тұрмыстық қалдықтарды қайта өңдейтін зауыттар салу тапсырмасына сәйкес «Жасыл Даму» акционерлік қоғамымен бірлескен жұмыстар атқарылуда. Тұрмыстық қатты қалдықтарды басқару саласында 42 млрд. 504 млн. теңгеге 9 жобаны жүзеге асыру жоспарланған.Облыс орталығында 41 млрд. 200 млн. теңгеге 3 жоба қолға алынып, инженерлік инфрақұрылым желілері жеткізілген. Оңтүстік Корея технологиясы бойынша құны 9 млрд. 535 млн. теңге болатын қатты тұрмыстық қалдықтарды сұрыптау, өңдеу және кәдеге жарату зауытының құрылысы басталды. Онда жылына 300 мың тонна қалдықты сұрыптау, қалдықты өртеу арқылы электр энергиясын өндіру көзделуде.Мамыр айында шыны ыдыстар өндіру жобасын бастау жоспарланған. Жылына 220 млн. дана бөтелке шығаратын зауытқа шикізат ретінде республика аумағынан жинақталатын шыны қалдықтары қолданылмақ. Одан бөлек, қала аумағындағы тұрмыстық қалдықтарды сұрыптау және өңдеу жобасының құжаттары әзірленуде.Фото: Қызылорда облысы әкімінің баспасөз қызметі

Қазақстан және Қызылорда облысының басты жаңалықтары