<a href="https://kyzylorda-news.kz/">Kyzylorda-news.kz</a>&nbsp; &nbsp;Көпке танымал «Келінжан» сериалында Нартай рөлін сомдаған Сәуіржан Төлеш – Сыр өңірінің тумасы. Әнші ретінде халықтың жүрегінен жол тапқан ол енді киноактер ретінде танылды. «Әке – балаға сыншы» демекші, бала Сәуіржанның әнге жақын екенін білген әкесі Төлеш оған кішкентай кезінде «осы сені асырайды» деп баян сатып әкеп берген екен. Әке тілегі қабыл болып, ол өнер адамдарының ортасында «баянмен ән айтуды трендке айналдырған Сәуіржан» атанады. Бүгінде елге әншілігімен қоса, киноактер ретінде танылған Сәуіржан Төлешпен сұхбаттасудың сәті түсті. – «Келінжан» сериалында актер ретінде танылған Сәуіржанның туған жері Қызылорда екенін біреу білсе, біреу білмес. Сол себепті әңгімені туған жеріңіз, өскен ортаңыз, отбасыңыздан бастасақ... – Мен 1986 жылы Қызылорда облысы, Жаңақорған ауданында дүниеге келдім. Бес ағайындымыз. Үйдің кенжесімін. Алдымда 4 ағам бар. Мен дүниеге келгеннен кейін ата-анам Қызылорда қаласына көшіп келген екен. Балалық шағым Қызылорда қаласында өтті. Қаладағы №23 мектепте оқыдым. Әкем Төлеш өмір бойы мұғалім болды. Өнерге де жақын адам еді. Өзі ән айтпаса да, өнерді жоғары бағалайтын. Анам – Қалдыгүл отбасында бала тәрбиесімен айналысқан жан. Әкемнің айтуынша, мен кішкентайымнан музыкаға жақын болған екем. Бала кезімде домбыраға үйірсек болыппын. Ал төрт жасымда өзімнен-өзім домбыра тартып, үлкендер жиі айтатын халық әні «Күміс құманай» әнін домбыраға салып, ыңылдағанымды көрген әкем «осы бала түбі өнерге жақын болады» деп мені өнер мектебіне береді. Өнер мектебінде Болат Бекбатыров деген күйші ұстаздан сабақ алдым. Бұл өзі бесжылдық мектеп екен. Мен домбыра сыныбының бір жылын аяқтаған соң, алғырлығымды байқаған ұстазым бірден 3-ші сыныпқа көшірді. Сонымен, бес жылдық өнер мектебін 4 жылда аяқтадым. Өнер мектебінде тек домбыра ғана емес, ямаха да тартып жүрдім. 12 жасымда Файзулла деген ағамызбен тойға шығып, ән айтып, табыс таба бастадым. Сөйтіп, өнердегі алғашқы қадамым осылай басталып кетті. Ал 9 сыныпқа өткен кезде әкеме музыкалық аппаратура алып беруін өтіндім. Сол кезде оның бағасы 1000 АҚШ доллары тұрады. Әкем көңілімді қимай, біреуден екі есе етіп қайтаратын болып қарызға ақша тауып берді. Су жаңа аппаратураға қол жеткізген мен өнердегі ағаларыммен тойға шыға бастадым. Сол аппаратурамен мектептің бүкіл мерекелік іс-шарасын, тіпті мектеп бітіру кешін де өткіздім. Бір күні мектеп директоры Раушан Ахметәліқызы «сенің кешіңді ұйымдастырайық», – деді. Мектеп оқушысы үшін бұл үлкен мәртебе ғой. Мектептің акт залын безендіріп, үлкен концерт беретіндей дайындалдық. Сыныптастарым, ұстаздарым мені шабыттандырып, қолдап жүр. Концертіме ата-анам келіп қатысты. Олар да мәз. Кейін ойлап отырсам, ата-анам үшін сол менің алғашқы әрі соңғы концертім болыпты... Студенттік жылдарым да туған жерде өтті. Қорқыт ата атындағы Қызылорда университетінің музыка факультетін бітіргеннен кейін де еңбек жолым сол тойдың айналасында жалғасты. Кейін үлкен қалаға, үлкен ортаға кеткім келді. Әкемнің батасын алып, Алматыға жол тарттым. Үлкен қала, бейтаныс орта. Қанша дегенмен жүрексіну бар. Дегенмен жолымда жақсы адамдар жолықты. Өнердегі достарым марқұм Нәби Аймұратов, Ерболат Ержанбаев, Тахауи Ахтанов үлкен ортаны жатырқамау, тез сіңісіп кетуіме себеп болды. Кейіннен өнерде жүрген ағалар Жанатбек Бәйтеков, Мейрамбек Беспаевпен танысып, ағалы-інідей қатысып кеттік. Кейін МузАрттың 15 жылдығына орай шығармашылық концертінде ансамбльде ойнадым. Алматыда тойларға баянмен шыға бастадым. Сол уақытта тойда баян тарту кездесе бермейтін. Қысқасы, бала күнімде әкем «түбі сені асырайтын осы болады» деп қара баян сатып алып бергенде бұған соншалықты мән бермеген екем. Шынында да, менің есімім баянмен егіз болды. Баянмен ән айтуды трендке шығарсам, сол қара баян мені әнші Сәуіржан етті.&nbsp; – Әнші Сәуіржан «Келінжан» сериалы арқылы актер ретінде жаңа қырынан көрінеді . Шынын айтқанда, сізді елге танымал еткен де осы сериал болды.&nbsp; – Иә, оны мойындаймын. Мені «Келінжан» сериалы танымал етті. Бұл – кино әлеміндегі алғашқы қадамым. Тіпті киноға түсем деген ойымда жоқ. Продюссер Гүлнұр Мамасарипова баян тартатын адам іздеп Мейрамбек Беспаевқа хабарласқан ғой. Ол бірден мені ұсыныпты. Ұсыныс түскен соң қолымнан келсе көрейін деп, тәуекел етіп келдім. Кино алғашында Бақбақты деген ауылда түсірілді. Дайындық басталып кетті. Маған Нартайдың ролін түсіндіріп жатыр. «Мас адамның ролін ойнайсың, баян тартып жүресің» дегендей. Костюмерлер үстіме шұрқ тесік киім кигізді. «Мынау немене?» деп әдепкіде түсінбей, қабылдай алмай тосырқағаным рас. Алғашында қиындықтар да болды. Бірақ жақсы алып шықтым деп ойлаймын. Негізі кино түсіру барысында өзіндік шектеу болады. Сценарийден шықпау, сондағы сөздерді ғана айту деген сияқты. Ал «Келінжан» сериалында бізге еркіндік берілді. Кейде рольді ойнау барысында өз шығармашылығыңнан қосып жіберетін кезің болады. Сонысымен де кино шынайы болды деп ойлаймын.&nbsp; – Көрермен ретінде Нартайдың роліне қандай баға бердіңіз? – Кинодағы рольдерді талдау, сын айту қолымнан келмейді. Себебі мен кәсіби маман емеспін. Бағасын халық береді. Бір қуанарлығы, қазір қазақ киносы қатты дамып келеді.&nbsp; – Бұдан кейін киноға түсуге ұсыныс түскен жоқ па? – «Күйеу бала» деген киноға түстім. Бірақ дәл «Келінжандағыдай» танымал болатындай рольде ойнамадым. – Кинодағы Нартай мен өмірдегі Сәуіржанның ұқсастығы мен айырмашылығын айтыңызшы. – Өнерге жақындығы, баян тартатыны, досқа адал, ешкімге зияны жоқ, адамгершілігі жаныма жақын болды.&nbsp; – Ішімдікке жақындығы ше?&nbsp; – Мүлдем татып көрмедім деп айта алмаймын. Пенде болған соң кемшіліктер де болады. Жастық шақ, оның үстіне Алматыда еркін жүрмін, «ай дейтін әже, қой дейтін қожа жоқ» дегендей. Қазір ішімдікпен дос емеспін.&nbsp; – Отбасыңыз туралы айтсаңыз.&nbsp; – Жұбайым Айжан екеуміз екі ұл тәрбиелеп отырмыз. Айжан да әнші. Екеуміз бірге дуэт айтып жүрміз. Өнерде де, өмірде де біргеміз.&nbsp; – Балаларыңыздың өнер жолын таңдағанын қалайсыз ба?&nbsp; – Жоқ. Балаларымның әркімнің босағасында жүргенін қаламаймын. Себебі бізде шоу бизнестен гөрі той бизнес қатты дамыған. Қазір өнер адамдарының барлығы тойдың айналасында жүр. Себебі табыс табу керек, күнкөріс қамы...&nbsp;– Сұхбатыңызға рахмет&nbsp;

Баянды трендке айналдырған қызылордалық жігіт 

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде білім алатын студент шетелдік ЖОО-да тәжірибе жинақтап, бірден екі дипломға ие бола алады. Университет студенттеріне осындай мүмкіндік ұсынуда. Қазіргі уақытта жоғары білім ордасы әлемнің көптеген мемлекетімен халықаралық байланыс орнатқан. Осы орайда Оңтүстік Кореяға жұмыс сапарымен барған университеттің Әлеуметтік және тәрбие жұмыстары жөніндегі проректоры Жандос Базартаймен халықаралық байланыстың тиімділігі турасында сұхбаттастық.– Жандос Нұртайұлы, білім ордасының Оңтүстік Кореямен халықаралық байланысы нығайғанынан хабардармыз. Ресми сапар аясында сол жақтағы оқу орындарымен жаңа жобаларды жүзеге асыру жөнінде келісім жасалуда. Іс-сапардың мақсаты, халықаралық LUPIC жобасы туралы айтып берсеңіз…<blockquote>– Оңтүстік Кореяға университеттегі кәсіпкерлік орталықтың басшысы Жанарыс Түбекбаевпен бірге бардық. Бір айға жоспарланған іс-сапардың негізгі мақсаты – тәжірибе алмасу, жаңадан байланыстар орнату, Сеул Ұлттық ғылым және технологиялар университетімен (СеулТех) бірлескен халықаралық LUPIC жобасы бойынша жұмыстарымызды пысықтау. 2023 жылдың сәуір айында Қорқыт ата атындағы Қызылорда университеті мен СеулТех университеті халықаралық LUPIC (Leading University project for International Cooperation) жобасына қол қойды. Сол жылдың мамыр айында университет делегациясы СеулТехқа жұмыс сапарымен барып, бірлескен жұмыстарды талқылады. Ал, қараша айында ҚР Ғылым және жоғары білім министрі Саясат Нұрбектің және СеулТех университеті өкілдерінің қатысуымен Қызылордада Жасанды интеллект және информатика жоғары мектебі ашылды. Онда оқу үшін іріктеуге қатысқан 131 адамның ішінен 31-і таңдап алынды. Оларға жыл бойына СеулТех университетінің 5 профессор-оқытушысы, кәсіпкерлік бағыт бойынша 1 арнайы өкіл келіп білім береді. Алдағы уақытта университетте СеулТех филиалын ашу және қос дипломды бағдарламаны жүзеге асыру жоспарлануда. Соның нәтижесінде түлектер екі ЖОО-ның дипломын ала алады.</blockquote>– Шетелдік оқу орнымен бірлескен мектеп көпшіліктің қызығушылығын тудыруда. Мектепке қабылдау қалай жүзеге асады, өзге облыс тұрғындары оқи ала ма?<blockquote>– Жасанды интеллект және информатика жоғары мектебінде өзге өңірдің тұрғындары да оқи алады. Университет ҚР Ғылым және жоғары білім министрлігіне 100 грант бөлу жөнінде сұраныс хат жіберді. Мектепке Сеултех және университеттің профессор-оқытушыларын, арнайы кәсіби шеберлігі жоғары практик мамандарды тарту жоспарлануда.</blockquote>– Әлеуметтік желідегі жазбаңызда Жасанды интеллект және информатика жоғары мектебі жанынан BIC орталығы ашылатынын хабарладыңыз. Орталықтың мақсаты мен ерекшелігіне тоқталсаңыз...<blockquote>– ВІС (Business incubation center) орталығының мақсаты – стартап жобаларды қолдау, жаңа бағдарламаларды енгізу, жастарды кәсіпкерлікке баулу. Орталық жанында робототехника, дрондарды құрастыру курстары ұйымдастырылады. Қазіргі таңда әлем бойынша құрылыс, геодезия, ауылшаруашылығы, медицина, төтенше жағдай қызметі, әскери қарулы күштер тағы басқа салаларда дрон кеңінен қолданылады. Қазақстанда бұл бағытты дамытуға үлкен сұраныс бар. Сондықтан осы сала бойынша мамандарды даярлау өте маңызды. Сапар барысында ұсынысымызды СеулТех университеті толығымен қолдады. Сондай-ақ Жасанды интеллект мектебі жанынан корей тілін үйрету курсы ашылады.</blockquote>– Сапар барысында SANMYOOK HEALTH UNIVERSITY-мен ынтымақтастық туралы келісім жасалды. Меморандум аясында қандай жұмыстар жүзеге асырылмақ?<blockquote>– SANMYOOK HEALTH UNIVERSITY-мен де алдағы уақытта ауқымды жұмыстар жүргізілмек. Айталық, бұл университетте «әлеуметтік жұмыс» мамандығы бар екен. Ол екі бағытқа бөлінеді: қарттармен және балалармен жұмыс істеу. Біздің университетте де осы мамандық бар. Соған сәйкес екі жақты білім беру бағдарламасын бірге дайындап, тәжірибе алмасу жоспарда бар. Сонымен қатар, «косметология» мамандығын Қорқыт ата атындағы Қызылорда университетінде ашуды жоспарлаудамыз.</blockquote>– Университет білім алушылары Кореяның басқа да оқу орындарында оқып, тәжірибеден өте ала ма?<blockquote>– Кореяның Каннам университетімен 15 жылдан бері байланыстамыз. «Академиялық ұтқырлық бағдарламасы аясында студенттер осы жақта білім алуда. Сонымен қатар Шинхан университетімен де байланыс орнатылған.</blockquote>– Оңтүстік Корея – музыка, кино, бьюти индустриясы арқылы әлемді жаулаған, қарқынды даму үстіндегі ел. Бұл елдегі оқу орындарының ерекшелігі туралы не айтар едіңіз?<blockquote>– Мұндағы оқу орындарының ерекшелігі – миниквалификациялық мамандар даярлауға машықтанғаны. Бірқатар мамандықтар бойынша төрт жыл емес, екі жылда өз саласының үздіктерін дайындап шығады. Байқағанымыз, косметология саласы бойынша жоғары жетістіктерге жеткен. Енді осы саланы өз елімізде дамыту – басты міндетіміз.</blockquote>– Технологиясы мықты, тәртіп бірінші орында деп жатады… Сіз қандай өзгешелік байқадыңыз?<blockquote>– Кореяда халық өте сыпайы. Бас иіп сәлемдесуі, жылы қоштасуынан, қоғамдық көлікте жол беруінен-ақ мәдениеттіліктері ерекше байқалады. Тәртіп бірінші орында, тәрбие жоғары деңгейде. Естуімше, ұрлық өте аз кездеседі. Көшеде полицей көліктерін көрмейсің. Өйткені барлық жерде бейнекамера орнатылған әрі халық тәртіпті қатаң ұстанады. Корейліктер өте ерте тұрады, бастаған істі аяғына жеткізгенше тынбайтын еңбекқор. Жаяу жүргіншілер жолында біздің елдегідей адам жалғыз өте бермейді, кемі жанында үш адам болып өтуі керек. Таксилері өте таза. Кез келген адам таксист бола алмайды екен. Міндетті түрде лицензия алып, тәжірибеден өтіп қана жұмысқа орналасады. Технологиясы өте дамыған ел. Сондықтан телефон, көлік бағасы біздің елмен салыстырғанда арзан әрі тұрғындарының айлық табысы жоғары.</blockquote>– Уақыт бөліп, сұхбаттасқаныңызға рақмет! &nbsp;

Оңтүстік Корея оқу орындарымен байланыс берік

<a href="https://kyzylorda-news.kz/">Kyzylorda-news.kz</a> Облыстық тілдерді оқыту орталығы ұжымының шығармашылық қоры тағы бір кітаппен толықты.&nbsp;Яки «Қазақ тілін кинофильмдер арқылы оқытуға арналған жаттығулар жинағы» атты әдістемелік құрал жарыққа шықты.&nbsp;Кітаптың авторлары облыстық тілдерді оқыту орталығы директорының орынбасары Жаныгүл Ерекешова және М.Мәметова атындағы Қызылорда педагогикалық жоғары колледжінің қазақ тілі мен әдебиеті пәнінің оқытушысы, педагог-зерттеуші, магистрі Мөлдір Меңдібаева. Біз кітап авторларымен кітаптың мазмұны туралы сұқбаттасуды жөн санадық.–&nbsp;Әдістемелік кітап әзірлеу жүйелі ізденісті талап ететіні анық. Бұл идея қалай туды?Жаныгүл Мұхитқызы:<blockquote>– Әдістемелік құрал әзірлеу – педагогика саласының әрбір қызметкері үшін қажет дүние.&nbsp;Оқытумен айналысатын оқытушы шығармашылықпен, өзінің әдістемелік қорын қалыптастырады. Бұл қағидатты біз де мүлтіксіз орындап, мемлекеттік тілді оқыту жүйесіне байланысты әдістемелік өнімдерді әзірлеп келеміз. Облыстың қоғамдық даму басқармасының «Қызылорда облысының тілдерді оқыту орталығы» мекемесі жанынан құрылған ғылыми кеңестің жұмыс жоспары бойынша сараптамалық комиссияға ұсынылған «Қазақ тілін кинофильмдер арқылы оқытуға арналған жаттығулар жинағы» атты әдістемелік құрал республикадан қолдау тауып, 1000 дана таратылды. Әрине тілді оқыту, үйрету үшін ұлттық құндылықтарды насихаттау маңызды. Бұл идея бірнеше жыл бұрын «Құнанбай» фильмін алғаш көрген кезде туындады. Тарихи фильмдегі дәстүрлер, қазақтың сөйлеу мәдениеті, сөз құдіретін танытатын сәттер еріксіз шығармашылыққа жетелейді екен. Одан кейінгі алаштану саласы бойынша түсірілген фильмдер осы әдістемелік құралдың негізгі мазмұнына арқау болды.</blockquote>– Бұған дейін ғылыми айналымға енген басқа қандай еңбекке үлес қостыңыздар?Жаныгүл Мұхитқызы:<blockquote>– Облыстық тілдерді оқыту орталығының негізгі мақсаты – облыс тұрғындарын, мемлекеттік және бюджеттік сала қызметкерлерін, жеке кәсіпкерлерді, этнос өкілдерін оқыту болса, осыған сәйкес, әдістемелік шығару, оны тарату, тәжірибеде қолдануды жүйелі жүргізу – негізгі қызметі.&nbsp;Оқыта отырып құндылықтарға тәрбиелеу – шығармашылық жұмыстардың басты қағидасы. Бұдан бұрын 2022 жылы республикалық «Үздік оқытушы» байқауында жүлделі ІІ орын алған «Тыңда! Түсін! Тіл үйрен!» атты ұжымдық мәтіндер жинағы авторларының құрамында болдым. Қарапайымнан бастап жоғарыға дейінгі деңгей тапсырмаларын қамтитын жинақтың аудиториясы – мектеп, колледж, университет, оқыту орталықтарының тыңдаушылары мен оқытушылары. Бұл еңбек тыңдаушының тыңдау дағдысын қалыптастыру, кезінде «құлақ жеп» атаның ақылын тыңдап, халықтық тыңдалыммен өскен құймақұлақ бабалардың бай мұраларын бүгінгі сандық технология мүмкіндігіне бейімдеп, қазақ тілін үйретуге қолдансақ, бүгінгі ұрпақтың есте сақтау қабілетін де арттыруға септігі тиер деген мақсатпен жасалды.</blockquote>–&nbsp;Тілге деген жанашырлық әрбір азаматтың бойында болуы шарт.&nbsp;Мұндай құндылықты жастардың бойына ұялату үшін қандай қадам жасау керек деп ойлайсыз?Жаныгүл Мұхитқызы:<blockquote>– Қоғамның құндылығы халық дейтін болсақ, оның ішінде жастар – жаңа идеялар иесі.&nbsp;Біздің ұлт болып ұйысуымыздың, ұлттық болмысты сақтаудың негізгі тетігі – бүгінгі жас буын. Тіл тазалығы, тілімізде қалыптасып жатқан сленгтермен күресу туралы айтудан жалыққан емеспіз. Кешегі бүгінгі жасап жатқан әдістемелік топтамалардың негізгі мазмұны да жастардың болмысын дұрыс қалыптастыру, ұлттық тіл, ұлттық дәстүр жайлы санасына сіңіретін, адастырмас «темірқазықты» табу. Ол дегеніміз – оқытудан, тәрбиелеуден, үйретуден басталатын саналы әрекеттер. Мемлекеттік тілдің қолдану аясын кеңейту, мерейін арттырып, мәртебесін көтеру жолындағы әрбір игі істің нәтижелі болуы – жаңа толқынның жаңашыл көзқарасы, ұлтқа деген сезіміне байланысты. Сөз арқылы адамның тек сөйлеу мәдениеті ғана қалыптаспайды ғой. Жағымды ойдан жақсы сөз туып, ол жақсы әрекетке ұласып жатады, демек болмысы мен табиғаты да сөз арқылы өріледі деген сөз. Қазақта жүрекке жылы тиетін сөзді жібек жіпке, ал өткірлігі үшін наркескен қылышқа теңеген. Міне, біздің өскелең буынның бүгінгі қалыптасқан тілдік мәдениеті оның болашақтағы ұлттық, елдік мәдениетінің баспалдағы екенін ұғындыра білгеніміз жөн.</blockquote>–Тіл үйретудің жеңіл әдісі қандай деген сауалға жауап іздесек...Мөлдір Болатбекқызы:<blockquote>– Қазақ тілі – қазақтың ана тілі.&nbsp;Мен де осы тілімнің мәртебесінің жоғары болуына атсалысып жүрмін. Тілге деген жанашырлық әрбір қазақтың қанында болуы қажет деп есептеймін. Жастар бойында да тілге деген құрмет өте жоғары. Оған дәлел ретінде Тілдерді оқыту орталығымен жүргізілетін шараларды айтуымызға болады. Күнделікті өмірде тіліміздің бөтен сөзбен былғанбай, таза, көркем болуына сабақ үдерісінде, тәрбиелік шараларда мазмұнды жұмыстар арқылы әсер етіп отырамыз.</blockquote>–&nbsp;Шәкірт тәрбиелеуде де еселі еңбек еттіңіз. Шәкірт жетістігімен бөліссеңіз.Мөлдір Болатбекқызы:<blockquote>– Білімнің киелі қарашаңырағында ұстаздық қызметте жүргеніме қуаныштымын.&nbsp;Болашақ мамандардың кәсіби әлеуетін қалыптастыру мақсатында түрлі сайыстар, байқаулар өткізіліп тұрады және оған шәкірттерді жан-жақты даярлап, нәтижесінде жүлделі орындар алып келеміз. Шәкірт жеңісі – ұстаз мерейі! Біздің «М.Мәметова атындағы Қызылорда жоғары колледжі» көптеген жетістіктерге жетті. Талай белестерді бағындырды. Алдағы уақытта да шәкірттерге үлкен үміт артамыз. Менің шәкірттерімнің бәрі бірдей. Барлығы да жан-жақты, білімді, ізденіске құштар. Мен олардан үлкен үміт күтемін!</blockquote>– Тәжірибе алмасуға қаншалықты көңіл бөлесіз?Мөлдір Болатбекқызы:<blockquote>– Білім беру үдерісінде оқытушының тәжірибе алмасуы күнделікті орын алатын жағдай.&nbsp;Республикалық, облыстық деңгейде шеберлік сағаттарына, ғылыми конференцияларға үздіксіз қатысып, әдістемелік қоржынымыз қазақ тілін оқыту жөнінде тиімді әдістер, тәжірибелермен толығып отырады. Жалпы білімге, ізденіске, жаңаға ұмтылыс бізге жетіспейді. Көбіне осы дүниелерге мән бермей жатамыз. Біздің қателік жіберетін тұсымыз осында. Сондықтан мен студенттерді ізденуге осы бастан бойына сіңіремін. Иә, рас мектеп жасынан бастау керек. Десе де еш нәрсеге кеш болмайды. Оқу бітіріп, жұмысқа орналасар кезде жауапкершілікті сезінеді. Өзім көп ізденемін, жан-жақты кітаптар оқып, курстарға қатысамын. Білімімді жетілдіруге ешқандай уақыт аямаймын. Қажет болса өзге қалаларға баруға дайынмын. Сондықтан тәжірибе алмасу менің тәжірибемде қалыптасқан дүние. Өзгелердің жұмысымен етене танысып, өзіңе керекті тұстарын аласың.</blockquote>

Әдістемелік құрал әзірлеу – әр педагогке қажет дүние

<a href="https://kyzylorda-news.kz/">Kyzylorda-news.kz</a> &nbsp;Қоғам&nbsp;дертін тап басып танып, қарасөздің қаймағын қаламмен қалқып беріп, тілшілік тіршілікте тынымсыз еңбек етіп жүргендер көп. Бұғып қалу мен бүгіп қалуды білмейтін таланттар арасында жас та жетерлік. Мақсатын мансап қуалауға емес, халық игілігіне бағыттаған жанның жұлдызы жарық болатыны белгілі. Ең­бек жолын өңірлік басылым, ай­мақтық арнадан бастаған «Хабар 24» телеарнасының тілшісі Бекзат Аманов «Тұмар» ұлттық теле­ви­зиялық бәйгесінде «Үздік жур­на­листік зерттеу» аталымы бойынша жеңімпаз атанды. Осы орайда әріптесімізбен сұхбаттасудың сәті түсті.–&nbsp;Кіл таланттының ішінде топ жару оңай емес. Десе де бәйгеде басып озамын деген ішкі сенім болды ма?<blockquote>– «Тұмарды» журналистердің «алтын добы» деп атап һәм «Оскар» сыйлығымен тең көреді. Сондықтан төгілген тер мен еткен еңбек таразыға түскенде бәсіміздің биік болғаны қуантты. Сараптама сараланып, зерттеу зерделенетін бәй­геде озық боламыз деген ой да, сенім де болды. Байқауда өткен жылдың қазан айын­да түсірген» арнайы репортаж «АЭС ақиқаты» үздік деп танылды. Бұл шыға­рылымда қордаланған мәселені көтеріп, «АЭС бізге керек пе?», «Ол қауіпсіз бе?», «Чернобыльдің тағ­ды­рын қайталамай ма?», бұдан бөлек «Оны кім, қайда салады?» сынды сан сауалға жауап іздедік. Сарапшылар мен мемлекеттік ор­гандардың ойын, тіпті ауыл тұр­ғын­дарының пікірін біліп қайт­тық. Қысқасы осы арнайы ре­­пор­тажды түсіруге 1 ай көле­мінде уақыт кетті. 3 өңірге бар­дық. Тілшілермен бірге опера­тор, режиссер секілді 10-нан аса маман әр жерді аралап, зерт­теу жасап, хабардың сәтті шы­ғуы үшін жұмыла кірісті. Жұ­мыс көрермендер тарапынан жоға­ры бағаланып, өз уақытында қол­дау тапты. АЭС-тың төңірегінде өр­бі­ген сұрақ, туындаған түйткілді қау­зап, қалың қауымға шы­найы ақпарат беру – бас­ты мис­сиямыз болды. Бай­қау­да бұйырған жүлде – ортақ еңбектің жемісі деп білемін.</blockquote>–&nbsp;Облыстық телеарна­дағы тәжірибе бір белеске шығарды. Жалпы, «Хабар 24» арнасындағы қызме­тіңізге қанша уақыт бол­ды?<blockquote>– Иә, тәжірибе мен тар­тын­бас табандылық адам­ның ұмтылысын ұсақтамай­тыны анық. Аймақтық телеарнада қабілетімді шыңдай түстім. Ал «Хабар 24» арнасындағы қызметіме 1 жылдан аса уақыт болды. Осы мерзім ішінде көптеген арнайы ре­портаж, жаңалыққа сю­жет дайындап, тікелей қо­сы­лым­дарға шықтым. Жал­пы атал­ған арна жас жур­на­лис­терге зор мүм­кіндік бе­реді. Сондық­тан қыз­ме­тім­нің осында жалғас­қа­ны­на қуа­намын.</blockquote>– «Репортаж – оқиға­ның өзі». Оперативтілік пен толымды зерттеу болмаса жұмыстың шикілігі байқалады. Аталған жанрға бейім болуыңызға не себеп?<blockquote>– Журналистика – әмбебап мамандық. Сондықтан кез келген журналист, қолына қалам ұстаған маман жанрды жыға танып, қабілетті болу керек. Репортаждың құрылымын біліп, оқиғаны сол мезетте баяндаудың әдіс-тәсілін меңгеру қажет. Шиеленіс пен шешім, қорытынды мен түйінді тыс қалдырмай, көрермен талғамын ескеру негізгі талап. Өзіме жаңалықтарға сюжет дайындағаннан гөрі журналистік зерттеу жүргізген ұнайды. Бір сәтте жеделдік пен сапаға көңіл бөліп, дәйекті дерекке жүгінген жөн.</blockquote>–&nbsp;Әр хабарыңыз тапқыр тақырыбы, мәнді мазмұнымен ерекше. Осы орайда өзіңізге ерекше ұнаған репортаж қайсы?<blockquote>– Көрермен жаңалықты, оның мазмұнын түрліше бағалайды. Сол себепті әр шығарылымның нақты фактіге құрылуын назарға алып, таңдаған тақырып төңірегінде терең талдау жасауға тырысамын. Жоғарыда атап өткен «АЭС ақиқаты» және Жаңаөзендегі мұнайшылар мәселесін қозғаған «Қалың қалай, мұнайшы?» атты арнайы репортаждар өзіме ыстық. Сондай-ақ, маған ұнаған тағы бір шығарылым қуғын-сүргінге байланысты түсірілген «Алжир – азап аралы». Израильдегі тілшілерге сұраныс жасап, Қарағандыдағы «Алжир» түрмесінде ең алғаш туған сәбиді тауып алып, одан бөлек тарихшылармен тілдестік. Бұрын соңды айтылмаған деректерді ортаға салдық. Бұл сәтті жұмыс үшін де режиссерлер оқиға орнына барып түсіріп, керемет дүние жасалды. Монтажына дейін ерекше болды. Қызық пен шыжықтың ортасында жүріп жасағаның өнімді болса көрермен көкейіне ой салғанымыз.</blockquote>–&nbsp;Салада үздік атанып, жүлдеге ие болдыңыз. Енді алдағы уақытқа жүйелеген жоспар мен мақсат қандай?<blockquote>– «Тұмар» – баптың ғана емес, бақтың да рөл атқаратын байқауы. Жаза білетін талант, дара жолы қалыптасқан дарынды көп. Сондықтан еңбек еленіп, жүлдені еншілеуім бағымның жанғаны деп есептеймін. Басты мақсатым – көрермен мен оқырманға обьективті, шынайы ақпаратты жеткізу. Ал қызмет, жүлде, лауазым оның бәрі екінші орында. Өйткені мамандыққа адалдық алға жетелейтіні анық.</blockquote>

Бекзат Аманов: «Журналистік зерттеу жүргізген ұнайды»

<a href="https://kyzylorda-news.kz/">Kyzylorda-news.kz</a>&nbsp; Ел ғалымдары «500 ғалым» жобасы аясында әлемнің үздік ғылыми орталықтарында тағылымдамадан өтуде.&nbsp;Зерттеушілер шетелде жинақтаған тәжірибесін ел игілігіне жұмсамақ. Осы орайда «500 ғалым» жобасының грант иегері, Қорқыт ата атындағы Қызылорда университетінің аға оқытушысы, техника ғылымдарының кандидаты Гүлнұр Далдабаевамен тілдестік.– Швейцарияда бірнеше ай тағылымдамадан өттіңіз. Ғылыми ізденіс, тәжірибе жинақтау қандай бағытқа негізделді? Қай университет базасында зерттеу жүргіздіңіз?<blockquote>– Университеттің аға оқытушысы Эльмира Елеуовамен бірге Швейцария елі, Солтүстік-Батыс Швейцария қолданбалы ғылымдар және өнер университетінің (FHNW) Экологиялық кәсіпкерлік институтында (EIC) тағылымдамадан өттік. Солтүстік- Батыс Швейцария қолданбалы ғылымдар және өнер университеті бұл елдің бірнеше қаласында орналасқан тоғыз университеттен тұрады. Эко-кәсіпкерлік институты (EIC) экологиялық таза өндірістік процестер мен қалдықтар, ағынды суларды тазарту, қайта өңдеу және кәдеге жарату әдістерін әзірлеумен айналысады. Тағылымдамамыздың бағыты – агроөнеркәсіп кешені саласындағы зерттеулер, оның ішінде ауыз су сапасын, тазалығын қамтамасыз ету. Сапар барысында дамыған шетел тәжірибесі бойынша жаңа білім мен дағдыларды игеруге, ауыл шаруашылығы саласындағы жаңа технологиялармен танысуға, біліктілігімізді жетілдіруге мүмкіндік алдық.</blockquote>– Таңдау неліктен Швейцарияға түсті? Бұл елдегі ғылым жүйесінің ерекшелігі туралы айтып берсеңіз…<blockquote>– Швейцариядағы университеттің аға ғылыми қызметкері, PhD Марина Питермен біздің кафедра тығыз байланыста. Алғаш рет ғалыммен 2021 жылы Алматы қаласында таныстым. Ол Алматыдағы Орталық Азияның аймақтық экология орталығында қазақстандық ЖОО оқытушыларына семинар-тренинг өткізген еді. Сол семинарға Қорқыт ата атындағы Қызылорда университетінен мен, Жиенбай Ырысалды және эколог әріптесіміз Светлана Кужамберлиева қатысты. Ауқымды шарадан кейін Марина Питер біздің университеттің шақыртуы бойынша Қызылордаға келіп, білім алушылар мен профессор-оқытушылар құрамына дәрістер оқыды. Бір жылдан кейін Марина Питер маған және әріптесім Эльмира Елеуоваға шақыру жіберді. Швейцария елінде ғылым жүйесі өте жақсы дамыған. Ол жақта ғылыми жобалар басты назарда. Қызметкерлер, оқытушылар ғылыми жобаға қатысумен қатар, білім алушыларды да шақырады. Байқағанымыз, университет оқытушыларына ғылыммен айналысуға барлық жағдай жасалған, бір мезгіл сабақтарын береді, қалған уақытта өздерінің ғылыми жұмыстарымен айналысады.</blockquote>– Елдегі су сапасы, су технологиясына қатысты зерттеулер қаншалықты жүйелі?<blockquote>– Қазақстанда су сапасы, су тапшылығы жыл өткен сайын күрделі мәселеге айналып келеді. Қазақстан 2050 жылға қарай «суға өте мұқтаж» елдер санатына кіруі мүмкін. Бұл туралы Мемлекет басшысы Қасым-Жомарт Тоқаев елдің әлеуметтік-экономикалық дамуы жөніндегі кеңесте айтты. Сондықтан 2023 жылы елімізде Су ресурстары және ирригация министрлігі құрылды. Былтыр Қорқыт ата атындағы Қызылорда университетінің ғалымдары мақсатты қаржыландыру бағдарламасы бойынша «Қызылорда облысында су тапшылығы жағдайында мал азықтық дақылдары мен ағаш екпелерін суару үшін сарқынды суларды қауіпсіз утилизациялау технологиясын әзірлеу» тақырыбындағы гранттық жобаны ұтып алды. Қазіргі таңда зерттеу жұмыстары жүргізілуде. Сонымен қатар, «Су шаруашылығы және жерге орналастыру» кафедрасының магистранттары мен докторанттарының ғылыми зерттеу тақырыптары осы су үнемдеу технологияларына, яғни тамшылатып суаруға байланысты. Бұл тақырып аясында көптеген зерттеу жүргізілуде.</blockquote>– «500 ғалым» жобасы бойынша тағылымдамадан өту талаптары қандай?<blockquote>– Жобаға қатысушы үміткердің ғылыми дәрежесі, ғылыми зерттеу бойынша таңдаған саласында кейінгі 12 айда үзіліссіз жұмыс өтілінің болуы ескеріледі. Ғылыми тағылымдамаға үміткерді қабылдайтын, шетелдік ұйымның шақыртуы керек. Мемлекеттік және шет тілді білуі маңызды. Швейцариядағы тағылымдама барысында украиналық ғалым, профессор Галина Круссирмен таныстық. Сол кісі бізге «Қандай бақытты жансыздар, біздің елде ондай бағдарлама жоқ, жастарға ондай мүмкіндік жасалмаған» деп қызыққан еді. Сол себептен қазақстандық ғалымдарға осындай мүмкіндік берген ҚР Ғылым және жоғары білім министрлігіне, Халықаралық бағдарламалар орталығына және университет басшылығына алғысымды білдіремін. Әріптестерімді бұл мүмкіндікті пайдаланып, «500 ғалым» жобасы аясында әлемнің алдыңғы қатарлы оқу орындарында тағылымдамадан өту үшін байқауға қатысуға шақырамын.</blockquote>– Өзге де ғылыми зерттеу жұмыстарыңыз туралы айтып берсеңіз…<blockquote>– Менің негізгі ғылыми зерттеу жұмысым – Арал теңізінің құрғаған табанын галофиттер, яғни тұзға төзімді өсімдіктер көмегімен баптау. Қазір университет ғалымдарымен бірігіп, жоғарыда айтып өткен, ауқымды гранттық жобаға қатысудамын. Бұл жоба барысында бірнеше мақсатқа жету көзделіп отыр. Соның бірі – су ресурстары тапшылығы жағдайында, ағынды суларды, су үнемдеу һ технологияларын пайдалана отырып, ауыл шаруашылығы дақылдары мен ағаштарын өсіру.</blockquote>– Уақыт бөлгеніңізге рақмет!

Университет ғалымдары гранттық жоба ұтып алды

<a href="https://kyzylorda-news.kz/">Kyzylorda-news.kz</a> &nbsp;Атақ деп аласұрмайтын, даңқ деп даурықпайтын жастардың көптігі қуантады. Сондықтан беделімен белден басарлық ессіздікке емес, іскерлікке бел буатын азаматтың айы оңынан туары анық. Сайып келгенде ісіне мығым жанды мұқым ел де қолдайтыны сөзсіз. Осы тұста, таңдаған саласында тер төгіп жүрген талапты жас Рамазан Әнәпия «Үздік баспасөз хатшысы» аталымы бойынша жеңімпаз атанған еді. Орайы түскенде біз де сұхбаттасуды жөн көрдік.– «Менмін» деген мықты маманның арасынан көзге түсіп, жүлдеге ие болу қиынның қиыны. Байқауға қатысарда түйсігіңіз не деді?<blockquote>– Шынымды айтсам, бұрын соңды байқау атаулы­ға қатыса бермейтінмін. Себебі «фартовый» яғни, жолы болғыш жігіттердің қатарынан емес едім. Ба­ла күнімнен бастап байқауда бақ сынап, жеңімпаз ата­нуға аса құштар болмағандықтан, бұған да мән бермедім. Дегенмен осы жолы тәуекел етіп, қатысып көруді жөн санадым. «Пендеден әрекет, Алладан берекет» демекші, еңбегім елеусіз қалмады.</blockquote>– Журналистикадағы еңбек жолыңыз қалай бас­талды? Жалпы баспасөз хатшысы қызметіне ұсыныс қалай түсті?<blockquote>– Қорқыт ата атындағы Қызылорда университетінің дипломын алғаннан кейін 1 аптадан соң Түркістан қаласындағы «Оңтүстік» телернасына қызметке орна­ластым. Кейін Түркістан облыстық қоғамдық даму басқармасының «Өңірлік коммуникациялар қыз­ме­тінде» істедім. Дегенмен отбасылық жағдайға бай­ланысты туған жерге оралып, аудандық «Өскен өңір» газетінде тілші қызметін атқардым. 6 айдан кейін ішкі саясат бөліміне шақырту алып, бөлімде жарты жылға жуық уақыт табысты жұмыс атқарып, «Өскен өңір» газетіне бөлім меңгерушісі қызметіне тағайындалдым. Аудандық газетте бір жылдан астам уақыт жұмыс істеп, қыркүйек айында баспасөз хатшысы қызметіне шақырту келіп түсті. Осылайша шақыртуды ой елегінен өткізіп, бастап&nbsp;қызметке кірісуге бел будым.</blockquote>– Халық әкімдік жұмысына егжей-тегжейлі қанық болғысы келеді. Желіде жанжал тудыратын жазбалар да бар. Қалың қауым қаумалап, жан-жақтан сұрақ жауғанда тығырықтан қалай шығасыз?<blockquote>– Әрине, мемлекет басшысының да, аймақ басшы­сының да жүргізіп отырған саясаты ашықтықты көз­дейді. Сондықтан біз әрдайым жедел, нақты ақпарат таратуға тырысамыз. Ал, наразылық білдірген, мәселесін әлеуметтік желі арқылы жеткізгісі келген азаматтарға түсінікті етіп, жауабын беру үшін әрдайым түрлі сала бойынша жүргізіліп жатқан жұмыстарды саралап, жадымда сақтап отырамын. Осы арқылы тығырыққа тірейтін сәттерде тиісті жауабын беруге дайын боламын.</blockquote>– Мекеме имиджін қалыптастыру баспа­сөз хатшысының міндеті. Осы орайда медиа кеңістіктегі коммуникацияда нендей кемшілік жібермеу керек?<blockquote>– Бұқарамен байланысты бекемдеу, ортамен коммуникация күшейту ең негізгісі. Қысқасы бұл қызметке қойылар талап қатаң, жауапкершілік жоғары. Медиа кеңістікте оперативті болу мен сенім орнату, көпшілік кез келген жағдайдың жай-жапсарын сұрағанда жалтақтамай жауап беру маңызды. Сондықтан бұл істе ең алдымен баспасөз хатшылары бүкпесіз әрі бояусыз нақты ақпарат беру керек. Сондай-ақ тілші қауыммен әрдайым тұрақты байланыс орнату да баспасөз хатшысының шеберлігі. Яғни ақпараттың айқын, қысқа да нұсқа болуын қадағалап, дерек пен дәйекті дөп сөйлету маңызды аспектінің бірі дер едім. Позициясы мен принципіне берік адамның жұмысында кемшілік болмайды.</blockquote>– Тілшілік пен хатшылыққа келгенде айтылар уәж көп. Осы ой төңірегінде сіз не дейсіз?<blockquote>– Бәріне бірдей ұнау мүмкін емес және бұл қалыпты жағдай. Кейде уақыттың тапшылығына байланысты тілшілер сұратқан ақпаратты дер кезінде бере алмай қаламыз. Бірақ БАҚ өкілдері қойған сауалдарды назарға алып, істің анық-қанығын баяндап, тұшымды жауап беруге тырысамын. Меніңше байланыс нығайған сайын түсінбестік туындаймайды.</blockquote>– Болашақта жүзеге асырар жоспар мен мақсатыңыз жайында айта кетсеңіз…<blockquote>– Ойға алған жоспар мен мақсаттар жүзеге асқанға дейін жасырын болу керек. Ал қызмет барысына келер болсам, жұмысымды адал атқарып, Шиелі ауданының көркейіп-гүлденуіне атсалысамын.</blockquote>

Рамазан Әнәпия: «Медиа кеңістікте оперативті болу маңызды»

<a href="https://kyzylorda-news.kz/">Kyzylorda-news.kz</a> &nbsp;Алға ұмтылған, өрге талпынған заманда көштен қалу қисынсыз. Сондықтан жастардың жыларман күй кешпей, аяққа нық тұруы құптарлық іс. Бойда бұлқыныс пен жастықтың оты барда жалындап жану жөн-ақ. Қызылордалық ару Марал Жаппасбай да асқақ арманынан айрылмай, қабілеті мен білімін шетелде шыңдап жүр.– Байқап қарасам, тәуекелшіл көрінесіз. Америкаға баруыңызға не себеп және ондағы өміріңіз жайында не айтасыз?<blockquote>– Ойға алған ісім үшін әркез тәуекел етемін. Мәселен, АҚШ-қа келуді жылдар бойы жоспарлаған емеспін. Аяқ асты кәсібімді жауып, шетелге шығуға бел будым. Дамуда дамылдағым келмейді, керісінше жаңаны үйренсем деген талпынысым бар. Қызылордадан арман қуып, Алматыға бардым. Онда 6 жыл тұрақтаған соң, мақсат-мұратымды жүзеге асыру үшін жаңа мүмкіндік, жаңа ел, жаңа қала керегін түсіндім. Көп ойланбай Америкаға кетуге шешім қабылдадым. Бәрі жақсы, өз ойымдағыдай өмір сүріп жатырмын.</blockquote>– Негізгі мамандығыңыз – қаржыгер. Бір сөзіңізде түрлі салада бақ сынау керегін айттыңыз…<blockquote>– Иә, Қорқыт ата атындағы Қызылорда университетін қаржыгер мамандығы бойынша қызыл дипломмен тәмамдадым. Кейін өз күшіммен банкке жұмысқа орналастым. 6 банктен ұсыныс түсіп, «Каспий банкті» таңдап, сату менеджерінен бастап бірнеше қызметті атқардым. Мұнда 3 жыл еңбек еткен соң, бір жерде отырып жұмыс істеу менікі емес екенін білдім. Осылайша мотиватор Қуаныш Шонбайдың мектебінде маркетолог мамандығын оқыдым. Бұл маған мамандықты емес, өз-өзімді және жаңа орта табуды үйретті. Тек белгілі бір салаға байланбай, жаңа салаларды игеруге септігін тигізді. Маркетолог мамандығын оқығаннан кейін банктегі жұмыстан бас тартып, құрылыс компаниясында маркетинг бөлімінің жетекшісі болып, 1,5 жыл қызмет атқардым. Жақсы жетістікке жеттім, табысым да жоғары болды. Әйтсе де қосымша түрде айналысқан саудам жақсы жүріп, кәсібіммен айналыстым. Кейін кәсібімде қиындық туындаған соң айналымдағы ақшамды шешіп, Америкаға жол тарттым. Қысқасы, Қуаныш Шонбайдың сабағы ой-пікірің мен көзқарасыңды өзгертіп, әрқашан іздену мен өзіңді жетілдіруге жөн сілтейді.</blockquote>–&nbsp;Жастар арасында «шетелде еркіндік пен ерік өзіңде болады» деген пікір қалыптасқан. Бұған не дейсіз?<blockquote>– Иә, АҚШ жастарға еркіндік пен мүмкіндік береді. Мидағы шектеуді алып тастап, тың идеяны іске асырудың кілті іспетті. АҚШ-та біреудің жасына, түр-түсіне, шыққан жеріне тиіспей, тұлға ретінде қабылдайды. Менде студенттік виза болғандықтан 5 жыл оқуға келгенмін. Қазіргі таңда магистратураға түсу мақсатында оқып, сапалы білім алудамын.&nbsp;Бастысы, адамдармен қарым-қатынас орнатып, ағылшын тілін жетілдіріп, ел-жерді аралағым келді. Яғни бұл жұмыстың барлығы маған тәжірибе жинауға сеп болды. Тіпті маркетолог қызметіне де ұсыныстар түсті. Осылайша кәсіпкердің ассистенті болып, маркетиг жағынан көмектестім. Маңдай термен тапқан табысыма жақсы өмір сүрудемін. Еңбектенуден жалықпайтын адам жарға жығылмайтыны анық.</blockquote>– Шетелде күн көрудің өзі күшке түсетіні белгілі. Жұмыс пен үй-жайдың мәселесін қалай шешуге болады? Қандай кеңес бересіз?<blockquote>– Иә, күнкөріс оңай емес. АҚШ-қа тек ғана мықтылар келеді. Өйткені, өмір сүру қиын болған соң өз еліне қайтып кеткендер жетерлік. Шетелде өмір сүру күшті болуды, тек диплом мен білімді қажет етпейді. Адамның пысықтығы мен қабілеті маңызды. Мұнда адамдар ашық, еркін болғанымен өз еліңдегідей жанашырлық көрсетпейді.</blockquote>–&nbsp;Тіл білу қаншалықты маңызды. Жалпы Америкада тұрақтап қалуыңыз мүмкін бе?<blockquote>– Тіл білмеген адамға жұмыс іздеу де, істеу де, өмір сүру де қиын. Себебі, бәрі ағылшынша сөйлейді. Сондықтан, тіл білу өте маңызды дер едім. Мұнда оқуым мен жұмысымды қатар алып жүргендіктен әзірге тұрақтап қалуым ықтимал.</blockquote>

Марал Жаппасбай: «АҚШ-қа тек мықтылар келеді»

<a href="https://kyzylorda-news.kz/">Kyzylorda-news.kz</a> &nbsp;Қоғамда қордаланған мәселе көп-ақ.&nbsp;Ақпарат ағыны да сананы сан саққа бөлетіні жасырын емес. Демек сараптаудың салмағы, байыпты байламның бәсі қашанда жоғары. Әлеуметтану ғылымы адамды зерттеу обьектісі ретінде қарастырып, соған қатысты дүниеге болжам жасайды. Осы ретте стратегиялық жоспарлау және сапаны қамтамасыз ету басқармасының топ жетекшісі Мария Махамбетовамен тілдескен едік.– Қоғамға қажеттісі әлеуметтік зерттеу. Сіздің ше, әлеуметтанушылар динамикалық заманда дұрыс диагноз қойып жүр ме?<blockquote>– Әлеуметтік зерттеудің мәні шындық туралы түсініктерді ұғуға және кеңейтуге мүмкіндік береді. Көбінесе өмір сүріп жатқан әлеуметтік шеңбермен шектелеміз, бәрі біз сияқты ойлайды деп тұжырымдаймыз. Дегенмен әлеуметтік зерттеу жеке идеялардың шекарасын кеңейтеді. Сондай-ақ түрлі себепке байланысты көрмейтін немесе көргіміз келмейтін дүниені түсіндіруге қауқарлы.Әрине, әлеуметтанушылар дұрыс диагноз қойып жүр. Республикалық деңгейдегі әлеуметтік зерттеу орталықтарымен тығыз жұмыс істеймін. Бүгінгі таңда билік үшін бұл ұйымдар саяси кеңістікті шарлауға, проблемаларды табуға және оларды шешуге мүмкіндік беретін сезім мүшелері сияқты. Қарапайым адамдар үшін елде орын алған өзгерістерді бағамдауға мүмкіндік беретін ақпарат көзі.</blockquote>– Өзіңізге белгілі, өте жылдам зерттеу 1 аптадан 2 айға дейін созылады. Қысқа мерзімде қабылданған шешім шикі болуы мүмкін бе? Нәтиже қаншалықты нанымды болмақ?<blockquote>– Егер ол кәсіби мамандармен жүзеге асырылса, болжам мен ұсыныс нақтыланса уақыт мәселе емес. Әлеуметтануға немесе әлеуметтік зерттеуге қызығушылық танытатын тұлғалар&nbsp; келіп «Бізде осындай мәселе бар. Зерттеуді қалай жүргізіп, зерттеу құралдарын дайындап, оны қалай есептеу керектігін түсіндірсеңіз. Қорытындыны өзіміз жасаймыз» дейді. Бұл – қате ұғым, теріс түсінік. Өйткені әлеуметтану өз маман иесімен жүзеге асатын ғылым саласы. Талдау мен түйін тарқатуға терең ізденіс керек. Көлденең кірісу күрмеулі мәселенің шешімін таппайды.</blockquote>– Кейс зерттеу болашақты болжауға, қоғам құбылысын тануға қаншалықты ықпал етеді?<blockquote>– Әлеуметтанушы зерттеу жүргізгенде «не білгім келеді?» деп деп өз-өзіне сұрақ қою керек. Соның аясында нәтиже мен мақсатқа жету үшін аянып қалмайды. Яғни кәсіби қызығушылықпен жұмыс істеген тиімді. Негізі кешенді әлеуметтік зерттеуді ұйымдастыру үшін қомақты қаражат бөлінеді. Сондықтан материалдық жағдай емес, кәсіпке адалдық басым болғаны ләзім. Жаңаға құмар, іске бейім білікті маман дәйекті дерек тауып, қоғам құбылысын дөп басатыны ақиқат.</blockquote>– Салаға сын тағатындар жоқ емес. Сараптаманы тек саяси науқанда жасайды дейді жұрт. Бұған көзқарасыңыз қандай?<blockquote>– Қалай болғанда да, әлеуметтік зерттеу тұжырымын өзгермейтін шындық ретінде қарастырмау керек. Дегенмен сауалнама белгілі бір ескертумен қоғамның жай-күйін бағалауға болатын термометр сияқты. Әлеуметтану, ең алдымен, ғылым болғандықтан әлеуметтік шындықтың нақты әдіснамалық принциптерімен басқарылады. Сонымен қатар жалпы ғылыми принциптерге сүйенеді, шындыққа қызмет ету, адамның ақпараттық, мәдени және басқа қажеттіліктерін қанағаттандыру секілді. Демек шешімді шынайы емес деп, астар іздеудің қажеті жоқ.</blockquote>– Жастардың әлеуметтануға қызығушылығы қандай? Қорқыт ата атындағы Қызылорда университетінің оқытушысы ретінде сабақ процесімен бөліссеңіз…<blockquote>– Әлеуметтанудың бағыттары өте кең. Сондықтан бәрі студенттің ұмтылысына байланысты. Жарнама, маркетинг, аналитика, экономика немесе ғылыми сала (академиялық әлеуметтанудың өзі) болсын, кез-келген саланы зерттеуге мүмкіндік бар. Дегенмен өңірдегі жоғары оқу орындары кәсіби әлеуметтанушы дайындамайды. Тек бакалавриаттың білім беру бағдарламасын міндетті пән ретінде оқытамыз. Жастардың қызығушылығы жоғары, құлшынысы зор. Ғылыми жоба, дипломдық, магистрлік сынды жұмыстың практикалық бөлімінде тақырыпқа сай әлеуметтік зерттеу жүргізеді. Соған сай жаңа идея мен ұтымды ұсынысын айтып жатады.</blockquote>– Өзіңізді толғандырған тақырыпқа талдау жүргізесіз бе?<blockquote>– Әрине. Тікелей қызметтік міндетіме кіретін университеттің экономикалық, мәдени, рухани, саяси, әлеуметтік, инновациялық тіршілік салаларын зерттеу бойынша зерттеу жүргіземін. Бұл – жауапты әрі қызықты іс.</blockquote>– Сұхбатыңызға рақмет!

Әлеуметтанушылар дұрыс диагноз қойып жүр 

<a href="https://kyzylorda-news.kz/">Kyzylorda-news.kz</a>&nbsp; &nbsp;Қашанда ескірмейтін, өміршеңдігін жоймайтын мамандықтардың бірі – есепші мамандығы болып саналады.&nbsp;Өйткені қай кезде де есеп-қисаппен жасалатын жұмыс кенжелеп қалған емес. Қазіргі таңда Сырдария аудандық ауруханасында есепші болып жұмыс жасайтын білікті маман – Мейрамкүл Алдабергенова өз ісінің шебері. 41 жыл медицина саласында еңбек еткен жанмен дидарласудың сәті түскен болатын.Кейіпкеріміз Тереңөзек кентінде 1966 жылы дүниеге келген. Жүзінен мейірім шуағы төгіліп тұратын Мейрамкүл Сермағанбетқызы сол кездегі А.Жданов атындағы №36 орта мектебінің табалдырығын аттап, ұлағатты ұстаздардан білім алып шығады. Оның алғашқы еңбек жолы аудандық ауруханада хатшы қызметінен басталады. Кейіннен сала маманы Қызылорда қаласындағы совхоз техникумында есеп және аудит мамандығын меңгереді. Білімін одан әрі жетілдіру үшін «Болашақ» университетінің түлегі атанады. Білікті маман хатшылық қызметтен кейін тіркеу бөлімінде, кадр бөлімінің инспекторы, есепші ретінде тәжірибе жинақтайды. Тәжірибелі маманның қызметтік міндеті орасан. Есеп-қисапқа епті маман қателесуге жол бермеуі керектігін еш уақытта естен шығарған емес.– Әріптесім жайлы сөз қозғағанда оның қызметіне деген адалдығын ерекше атап өткім келеді. Мейрамкүл өзінің сабырлы да салмақты мінезімен көптің көңілінен шыққан маман. «Жүзі игіден түңілме» демекші, әркез жайсаң мінезімен, қажыр-қайратымен дараланып тұрады. Ең басты қасиеті – қарапайымдылығы, – дейді әріптесі Айнұр Сағатбаева.Мейрамкүл Сермағанбетқызы қызметте абыройлы, тәжірибелі маман болса, берекелі шаңырағында сүйікті жар, аяулы ана. 1994 жылы тереңөзектік азамат Сапиян Оспановпен отау құрып, үш баланың анасы атанды. Бір саланың пұшпағын илеп жүрген ерлі-зайыпты қызмет жолында танысып, үлкен өмірге қадам басады. Өмірлік серігі Сапиян Оспанов та аудандық ауруханада бас есепші қызметін атқарған.– Әр саланың өз қызығы мен қиыншылығы болады. Біздің мамандық ең бірінші адалдықты, мұқият болуды талап етеді. Және де қателікті кешірмейді. Бүгінде аудандық ауруханада жалақы жөнінен 3 есепші жұмыс жасаймыз. Ертеректе айлықты қолдап есептейтінбіз, қазіргі таңда барлығын арнайы бағдарлама көмегімен істейміз. Кейде айлық аударымдарында түсінбеушіліктер болып тұрады. Сол сәтте әріптестерге сабырлылықпен түсіндіруге тырысамыз. Осы салада жүріп мамандығыммен қатар, өмірлік серігімді адаспай жолықтырдым деп айта аламын, – дейді өз ісінің маманы.Мейрамкүл Сермағанбетова бүгінде адалдық пен сабырлылықты өмірлік ұстанымына айналдырған.

Мейрамкүл Сермағанбетова: Әр саланың өз қызығы мен қиыншылығы болады

<a href="https://kyzylorda-news.kz/">Kyzylorda-news.kz</a>&nbsp; Қазіргі таңда мүлік пен пәтерді «қалай сатамын?» деп ешкім бас қатырмайды. Тамыр-таныс жағалап,&nbsp;сыртқы есікке «үй сатылады» деп жазудың да дәурені өткен сыңайлы. Өйткені бұл жұмысты риэлторға тапсырса, жер жарған жарнамамен-ақ әп-сәтте үйді сатып береді. Сондай-ақ, талап пен шартты ескеріп, нұсқаулық беріп, құжат рәсімдеуде де қол ұшын созады. Бұған үй сатуды үйлестіріп, сенім үдесінен шыққан аймақтағы «Шаңырақ» агенттігі айғақ. Сол себепті сала маманы Азат Прмановпен әңгімелесіп, жұмыстың қыр-сырымен танысуды жөн санадық.– Сату менеджері қызметіне орналасқалы бері қанша үй сатып үлгердіңіз? – 2018 жылы ашылған «Шаңырақ» агенттігі жылжымайтын мүлікті сатумен айналысады. Яғни келісімге келіп, үй сатамыз. Бүгінде агенттікте жұмыс істегеніме 3 жыл болыпты. Осы уақыт аралығында 200-ге жуық үйді саттым. Әлбетте жұмысыма қызығушылығым жоғары. Табатын табыстан бөлек, көптеген адаммен жаңа қарым-қатынас құрып, түрлі сатып алушымен байланыста боламын. Бастысы, жұмысыңа көңілі толған жанның жылы лебізі мен айтқан алғысы еңбектің еш кетпегенін білдіреді. Тіпті кейбірі қоныс тойына шақырады. Сондықтан мұның өзі қуаныш дер едім.–&nbsp;Жалпы үй сатуда қандай да бір келеңсіздік кездесе ме?– Жұмыс болған соң түрлі жағдай орын алады ғой. Бәрі бірден жүзеге асып, сәтімен бола қоймайды. Иә, кейде кедергілер кездеседі. Мәселен, үй иесі мен сатып алушы арасында түсінбестік туындаса, табыстыруға тырысамыз. Екі жақтың мәмілеге келіп, бір-бірінің ұсыныс-пікірін ескеруі маңызды. Әсіресе, бағаға келгенде ашық сөйлескені тиімді. Мұндайда ортақ шешімге келуіне біз де себепкер боламыз. Қысқасы екі тарапта да реніш болмай, риза болуы үшін атсалысамыз. Кей кезде нотариуста құжаттар бойынша да келеңсіздік болса, көмек беруге әзірміз.–&nbsp;«Шаңырақ» агенттігіне тұтынушылар дән риза. Тіпті кейбір үйлер екі күн ішінде сатылады екен. Ал, қол байлайтын ұзақ мерзім қандай?– Келісімшартта көрсетілгендей 4 ай көлемінде үй жарнамасымен айналысып, сатуға тырысамыз. Пәтерді сатылымға қойған соң, 1-2 аптадан кейін өтіп кетеді. Ал ұзақ мерзімді алатын кәсіптік нысандар мен жер үйлер. Бірақ күнді созбақтап, уақытты алмай, бекітілген мерзімде жұмысты аяқтауға тырысамыз. Біздегі мақсат – тұтынушының сенімін ақтау. Әрі жұмыс өнімді болсын десек, әрекет еткеніміз өзімізге жақсы.Сондай-ақ, қайсыбір дүние өтімді болу үшін жарнама жақсы болу керек. Сол себепті жан-жақты жарнама жасап, көпшілікті үйлердің сатылымға шыққанынан құлағдар етеміз. Бізде жарнама «ютуб», «инстаграмм», «тик ток» әлеуметтік желілері арқылы жүргізіледі. «Шаңырақ» қосымшасына да жариялап, байланыс нөмірімізді қалдырамыз. Қазір қолданыстағы «Olx», «Крыша» қосымшасы тек сурет арқылы жарнама жасаса, біз видеоға түсіріп те дайындаймыз. Яғни, көпшілік үй бөлмелерін еркін көріп, таңдау жасауына мүмкіндік бар.– Үйдің лайықты бағасын қоюда көңіл бөлетін критерийге тоқталсаңыз. Қазіргі таңда үйдің жоғары бағасы қанша? Ол алдағы уақытта тағы өсуі мүмкін бе?– Үйді сатылымға қою үшін алдымен орталыққа қоңырау шалады. Сосын агенттіктегі қызметкер менеджерлерге бөліп береді. Әрі қарай жарнамасын жасап, жұмысты жүйелеймін. Негізі үйдің жылына, шаршы метріне назар аударамыз. Сонымен қатар кепілдікке қойылған ба, жоқ па соны анықтаймыз. Яғни жылы ескі үйлердің бағасы да төмен болады. Осындай жайттарды бақылап, сатылымға үйін қойған адаммен «мынадай баға қойған дұрыс» деп ақылдасамыз. Өйткені бағаның үйге лайықты қойылғаны дұрыс. Сонда тез өтіп, ұзақ уақыт алмайды. Қазір жаңа үйлердің бағасы қымбаттап, ескі үй бағасы төмендеп жатыр.–&nbsp;Ауыл немесе қала үйлерінің қайсысы сатылымға көп шығады? Және қайсысына көбірек қызығушылық бар?– Негізінен ауыл-аймақтағы үйлерді сатумен айналыспаймыз. Шеткі аймақ дегенде Талсуат пен Сабалақ мекен-жайындағы үйді сатуға шығарамыз.&nbsp;Тек қала ішіндегі үйлерді қамтимыз.&nbsp;

Азат Прманов: «Жылы ескі үйлердің бағасы да төмен»

<a href="https://kyzylorda-news.kz/">Kyzylorda-news.kz</a>&nbsp; «Міржақып. Оян, қазақ!» фильмі санада сілкініс жасап, қазақ баласына ойтүрткі болды десек артық емес. Екі сағаттық фильмге ерте билет алып, жан тебіренісін жасырмаған әр көрермен желіде әсерімен бөлісті. Қиын-қыстау кезеңде түнектің түндігін түрген Алаш азаматын ардақтады. Жүрекке салмақ түскенімен, өткенді бағамдап, болашақты саралады. Бұл – қоғам назарындағы қайталанбас туынды. Осы орайда фильм продюссері Айсәуле Әбілдамен әдемі әңгіме өрбіттік.– Тұтас тарихты таспалау оңай емес. Осы уақытқа дейін Алаш ардақтылары туралы түсірген сериалдар ел назарында. Жалпы, фильм жүктеген жауапкершілік жайында сөз қозғасаңыз.<blockquote>– Кез келген фильм, кино немесе сериал қалың қауымға бағытталғаннан кейін арзан дүние ұсынудан аулақ болған жөн. Өйткені комедияның да өзіндік жауапкершілігі болады. Көрерменнің көңілінен шығып, оң баға алатындай лайықты дәрежеде түсіре білу маңызды. Татымды әрі тартымды тартудың көкейге тұщымды ой салатыны мәлім. Аумалы-төкпелі заманның картинасын, Алаш арыстарының өмірін баяндау екі есе жауапкершілік жүктеді. Екі сағаттық фильмде ұлтты ұйыстыра білген зиялы қауымның өрелі ісін көрсету, соңына дейін алып шығу, осындай нәтижеге жеткізу оңай болған жоқ. Бірақ фильм өз мақсатына жетті.</blockquote>– Мұрат Есжан бір сұхбатында «Бюджет резеңке емес, сондықтан қиялыңды шарықтатпақ түгіл, кең адымдап жүргізу мұң болады» деген еді. Соған қарамастан ұсақ-түйекке дейін мән беріп, сәтті шығуына көңіл бөлдіңіздер. Айтыңызшы, қаржыға байланысты сценарийдің өзгерген тұсы болды ма?<blockquote>– Дұрыс, қиялың көкте болғанымен, қаржы жетпесе ойлағаныңды іске асыру қиын. Десе де, шама-шарқымыз жеткенше, қолымыздан келгенше бәрін жасауға тырыстық. Қаржыға байланысты сценарийде өзгерістер болды. Мәселен, сценарий бойынша бірнеше арба жазылса, бір арбаға дейін қысқарттық. Алаш әскерін түсіретін кезде 100 атты 50 етіп, тіпті соңында 30-ға дейін&nbsp; азайтуға тура келді. Сонымен қатар көпшілік сахна деген бар. Ол жерде негізгі әртістер емес, қосымша әртістер рөл ойнайды. Жиын мен Міржақыптың тойында көп адам жүрсе деп едік, бірақ шамамыз келмегендіктен оны да қысқартып, камераға ыңғайлап түсірдік. Сондай сәттерде амалын тауып шығамыз. Яғни, қаржы жетіспеушілігі ойыңа тұсау болады. Содан болар, тарихи кинолар сынның астында жиі қалады. Сонда да ізденісті тоқтатқан емеспіз. Барынша ұқсастық болу үшін негізді сақтап қалуға тырыстық.</blockquote>– Жазбаларда тарихи оқиғаның өзі жиі өзгереді.&nbsp;Зерттеуші-ғалымдардың да пікірі сан қилы. Осы ретте қандай дерекке сүйен­діңіздер?<blockquote>– Кешегі кезеңге көз тастау үшін тасқа қашалған тарихқа үңілген ләзім. Бір ғана деректің, бір ғана тақырыптың төңірегінде айналмай, зерделі зерттеу жүргізіп, сана сүзгісінен өткізу артық етпейді. Тарихи деректерге қатысты фильмнің режиссері, сценарист Мұрат Есжан көп жерде айтып жүр. Яғни, Алаш ғалымдарының еңбегін түгел қарап шығуға тырыстық. Сөйтіп ортақ тоқтамға келген дәйекті деректерді негіз еттік. Фильмнің соңында 40-қа жуық пайдаланылған әдебиетті көрсеттік. Мұндағы мақсатымыз – қандай да бір ақпарат, идея, ой алынған зерттеу еңбектің авторларына құрмет көрсету. Сондықтан нақты бір ғана адамның еңбегіне сүйендік деп айта алмаймыз. Алаштану ғылымына үлес қосып жүрген ғалымдардың ешқайсысын шет қалдырмауға тырыстық.</blockquote>– Қазір зілі жоқ әзілдер басым. Қоғамдық құбылыс қалжыңның қалтарысында қалып жатыр. Алғаш туындыны түсірерде қандай да бір күмән болды ма?<blockquote>– Әрине, қазір күлкі мен әзілдің кең етек алған кезі. Жанрда тұрған ештеңе жоқ, тек жеңіл дүниеге ет үйреніп кетпесе болғаны. Сериал етіп түсірерде ешқандай күмән болған жоқ. Өз аудиториясын қалыптастыратынын сездік. 6 бөлімді сериал көрерменнің ықыласына бөленді. Қаралым жағы да көңіл қуантты.Кейін кинотеатр экранына жол тартатындықтан күмән болғаны рас. «Түрлі комедиялар толастамай, халыққа өтімді болған тұста тарихи фильмнің 2 сағат көрерменін тапжылтпай ұстап отыруы неғайбыл» деген пікірлер де айтылды. Сонда да тәуекелге бел буып, көрерменге сеніп, Алаш ардақтыларының өмірі әлі де өзекті екенін дәлелдеп шығады деген үмітпен фильм нұсқасын жасадық. Негізі бұл туралы «Qazaqstan» Ұлттық телеарнасы ұсыныс айтып, қолдау білдірген болатын. Сондықтан бірден іске кірісіп, монтаждау жұмысын бастадық.</blockquote>– «Міржақып. Оян, қазақ!» санаға сәуле түсірді. Содан болар фильм прокаттан алынғанда жұрт шуласты. Сіз де саяси астар жоғын айтып, мәселені түйіндедіңіз. Жалпы сұраныстың жоғары болғаны қуантқан болар?<blockquote>– Иә, фильм көрсетілімін тоқтатқанда елдің шулағаны бір жағынан қуантып, уайымға да салды. «Ел неге шулап кетті?», «Дұрыс түсінбей қалды ма?» деп абыржыдық. Бұл жерде саяси астар жоқ. Әу бастан көрсетілім екі аптаға жоспарланған болатын. Кейін көрерменнің сұрауымен қайтадан экранға шықты. Әлбетте, сұраныстың жоғары болғаны қуантты. Тіпті түгел сыныптың оқушылары мен отбасы, қызметкерлердің қалыспай баруы рухани мұраға атүсті қарамайтынын аңғартты. Фильмнен соң бізді белгілеп, толассыз пікір қалдырғандар тағы бар. «Сеанс жетпей қалды» деп жазып, фильмді көруге асық екенін жеткізген көрермен қатары көп болды. Бұл тарихты терең түйсінуге талпынған қазақ даласын біріктірген жоба іспетті сезілді. Өзге ұлт өкілдері де барып, жылап, мұңымызды бірге бөлісіп жатты. Психотерапевт Жұлдыз Төлеу айтқандай, ұлттық травмаға нағыз терапия болғаны даусыз.Ақмешіт – туған жерім. Осы ретте қызылордалық көрермендерге ризашылығымды білдіремін. Кинотеатрда аншлаг жасап, жылы лебізін айтты. Қолдау білдіріп, тарихымызға немқұрайлы қарамаған туған жұртыма алғысым шексіз.</blockquote>– Әр сахнада жалаң жаттандылық жоқ. Диалогтың өзі жүректі қозғап жібереді. Ми қатпарында төңкеріс жасады. Түсірілім барысында көңіл босаған күндер болды ма?<blockquote>– «Ұлы фильм жасау үшін үш нәрсе керек: сценарий, сценарий және тағы да сценарий» деген А. Хичкоктың сөзінің жаны бар. Мәтіннің құрылымы дұрыс болмаса, елең еткізбесе бастан-аяқ көрерменді ұстап отыру мүмкін емес. Эмоционалдық тұрғыда да әсер етпесе мәтіннің осал болғаны.&nbsp;Иә, түсірілім кезінде көзге жас алып, жүректі шым еткізген сәттер болды. Әсіресе түрмедегі түсірілім жанға батты. Түрменің аурасы да ауыр еді. Сондай-ақ Гүлнардың әкесімен қарым-қатынасы ет жүрегіңді езіп жібереді. «Әке» деп шырылдайтын сахнасы жанарға жас үйіріп, көңілге мұң ұялатты.&nbsp; Қатал тағдыр қамыты сүргінге сүйрелесе де ел болашағына бей-жай қарамаған Міржақып атамыздың қайсарлығы қайран қалдыратыны шындық.&nbsp;Сондықтан қиындыққа қасқайып тұрған ата-бабамызға разымыз.</blockquote>– «Біткен іске сыншы көп» дейміз. Тырнақ астынан кір іздегендер табылды ма?<blockquote>– Әр оқиғада шынайылық басым болу үшін жаныңды саласың. Қажетті реквизиттерді табуға жанталасып, құрап-қиыстыруға тура келеді. Күн-түн демей, көз ілместен дайындық жүргізу жеңіл іс емес. Жарығы жоқ жерде, топырақтың ортасында жүріп түсірген сахнаға жылы жерде отырып бір-екі ауыз пікір айту оңай. Біткеннен кейін бұрысын іздеп, тақырыпты қазбалайтындар бар. Тіпті ұлтараздық тудырады деп теріс пікір айтқандар да кездесті. Айтылған сынды қабылдай аламыз. Қоғам болғаннан кейін әркімнің өз ойын білдіретінін білеміз. Десе де фильмге қатысты сыннан гөрі алғыс пен мақтауды көп естідік. Бұл маңдай теріміз бен еңбегіміздің еш кетпегені.</blockquote>

Қызылордалық көрермендер кинотеатрда аншлаг жасады

<a href="https://kyzylorda-news.kz/">Kyzylorda-news.kz</a>&nbsp;Қазақ әйелі – бар мұратын отбасының игілігіне байлаған, әлемдегі ең ізгі әйел. Қазақ әйелі – бар тілегін перзентінің жолына арнаған, әлемдегі ең мейірбан әйел. Қазақ әйелі – бар бақытын некелі ерінің талайынан күткен, әлемдегі ең адал әйел. Ұлттың ұйтқысы. Ұрпақтың анасы. Солай болған, солай бола беруге тиіс. Болмас қисыны жоқ, неге десеңіз, бұл әйелдің бойында сиқырлы, құтты, өзгеше қасиет бар, оның аты – сұлулық: жан сұлулығы, тән сұлулығы… Ол рас, әлемдегі ең сұлу – қазақ әйелі!» Бұл – Мұхтар Мағауин шығармалар жинағының 11-томынан алынды. Өте керемет жазылған. Иә-иә, қазақ қыздары расымен де әдемі. Олар жүзімен де, жүрегімен де, сөзімен де, ісімен де сұлу. Осындай сұлулығымен, іскерлігімен, белсенділігімен ерекшеленіп жүрген біздің бүгінгі кейіпкеріміз – Жаннат Садуакасова. Ол – қалалық әйелдер кеңесінің төрайымы, Абай атындағы үш тілде оқытатын дарынды балаларға арналған мамандандырылған сыныптары бар мектептің директоры, қалалық мәслихат депутаты. Бүгінде қызмет пен құрметтің ортасында жүрген ізгі де іскер әйелдердің қоғамдағы орны ерекше. Мереке қарсаңында Жаннат Мылтықбайқызымен сұхбаттасудың сәті түсті. Тақырыпқа арқау болған сөзді де сұхбат барысында осы кісі айтты.–&nbsp;Жаннат Мылтықбайқызы, алдымен әңгімемізді өзіңізден бастасақ…&nbsp;– Сіздерге мың алғыс! Мен 1965 жылдың 8 наурызында Қызылорда қаласында дүниеге келдім. Сол үшін де әр мереке күндері, жыл сайын анама рақметімді айтамын. Анам отбасында жалғыз қыз болып, еркін өскен. Ал келін болып, енесі, 5 қайын сіңлісі мен 1 қайын апасы бар отбасына түсті. Әкем жалғыз ұл болды. Ол кісі өзінің шыдамдылығы мен ақкөңіл пейілімен сыйлы келін, аяулы ана, ақжаулықты әже болып отыр. Осы кезде анамның жасы сексенге жақындап қалды. Анамыздың жанымызда жүргенінің өзі – үлкен бақыт. Жалпы біз алты ағайындымыз, үш қыз, үш ұл. Бүгінде әр шаңырақ кеңейіп, қанатын жаюда. Негізі өзім 1984 жылы Н.В.Гоголь атындағы Қызылорда педагогикалық институтына «Шетел тілі: екі шетел тілі» мамандығы бойынша оқуға қабылданып, 1989 жылы оқуды тәмамдадым. Еңбек жолым Қызылорда пошта-телеграф бөлімінде оператор болып жұмыс істеуден басталды. Одан кейін білім саласына ұласып кетті. 1989-1994 жылдары №211, 187 мектептерінің ағылшын тілі пәні мұғалімі болып жұмыс істеп, 1994-1997 жылдар аралығында №235 мектеп директорының оқу-тәрбие ісі жөніндегі орынбасары болып қызмет атқардым. Ал 1997-1999 жылдар аралығында қалалық білім бөлімі басшысының орынбасары ретінде жұмыс істеп, 1999-2020 жылдар аралығында №7, 217, 11 мектептерінің директоры қызметін атқардым. 2020 жылдың 14 сәуірінен бастап, «Абай атындағы үш тілде оқытатын дарынды балаларға арналған мамандандырылған сыныптары бар мектеп» директоры болып қызметке тағайындалдым. Содан бері осы қызметтемін. Жалпы білім саласындағы жетістігім ретінде ең үздік марапат Ы.Алтынсарин төсбелгісін иеленгенімді атап өтуге болады. Ағылшын тілінің маманы, педагог зертеушісі ретінде 1999-2013 жылдары №7 мектебінде қызмет барысында корей ассоциациясымен бірлесіп, корей тілі кабинетін аштым. Осы салада еңбек етіп, жаңа идеялармен бөлісіп, жаңашылдыққа деген ізденіспен 2004 жылы АҚШ мемлекетінің грантымен, Миннесота штаты, Солт-ЛейкСити қаласында тәжірибе алмасудан өтіп, 2018 жылы Израиль мемлекетінің грантымен Иерусалим қаласында тәжірибе алмасу бағдарламасы бойынша білім алып қайттым.– Сіз жеткен жетістіктерге ұстаздарыңыздың да еңбегі зор. Ал ұстазыңыз кім?&nbsp;– Дұрыс айтасыз. Әр адамның қандай да бір жетістікке жетуіне ұстаздың қосар үлесі зор. Ұстаз – білімнің алғашқы баспалдағын қалыптастырушы тұлға. Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде мұғалімнің еңбегі зор. Сондықтан да ол әрдайым қасиетті маман ретінде ерекшеленеді. Осы елеулі үлесі үшін ең алғашқы мұғалімін ешкім ұмытпайды. Өзімнің педагогикалық еңбек жолында ұстаздық қызметімді шыңдауға зор үлесін қосқан, мен үшін орны ерекше, білгенін үйретіп үлгі бола білген, аяулы ана, ардақты ұстаз, №235 мектептің басшысы болған Үрбибі Батырқұлқызын атап өткім келеді. Ол – өзінің кәсіби шеберлігін, педагогикалық іс-тәжірибесінің озық үлгісін көрсете білген, ұлағатты ұстаз.– Қалалық әйелдер кеңесінің төрайымысыз. Кеңестің қазіргі жұмысы қалай жүріп жатыр?– Қоғамдағы әйелдердің, оның ішінде аналардың орны мен рөлін айшықтау және түйткілді мәселелерді оңтайлы шешу мақсатында 2021 жылдан бастап, қала мен кент, ауылдық округтерінің белсенді әйел азаматтарының бірігуімен «Қызылорда қалалық әйелдер кеңесі қоғамдық бірлестігі» құрылып, өз жұмысын бастаған болатын. Кеңестің қызметі нәзік жандар арасында кәсіпкерліктің дамуына, отбасы институтын нығайту, отбасындағы тұрмыстық зорлық-зомбылықтың алдын алу, ана мен балалар құқығын және денсаулығын қорғау бағытындағы маңызды істерді ілгерілетуге бағытталған. Бүгінде әйелдер қауымдастығы қаламыздағы отбасылық қатынастарды, моральдық-этикалық және руханиадамгершілік құндылықтарды нығайту, тұрғындар арасында азаматтық белсенділікті, шығармашылық бастамаларды қолдау, консультациялық мақсаттарға қол жеткізу мен азаматтық қоғам қағидаттарын жүзеге асыруда әріптестікті дамытуға қолдау көрсетуді ұйымдастырып келеді. Мәселен, бірлестік мүшелерінің қатысуымен білім ордаларында түрлі тәрбие сағаттары, көшбасшы әйелдер мектебінің дәрістері, сондай-ақ «Ана әлдиі» облыстық видеоролик байқауы, «Алтын белгі» иегерлерінің аналарын марапаттау кештері өткізілсе, өңірімізді көгалдандыруға бағытталған игі істі жалғастыру мақсатында бірлестіктің ұйымдастыруымен Тасбөгет кентінде орналасқан облыстық балалар ауруханасының ауласына 100 түп ағаш отырғызылды.«Қызылорда қалалық әйелдер кеңесі» қоғамдық бірлестігінің жоспарына сәйкес еліміздің егемендік алуы жолында ерлермен бірге аянбай жұмыс істеп, саналы ұрпақ тәрбиелей білген ардақты аналардың еңбегін насихаттау мақсатында «Бегім ана» аналар клубы ашылды. Бұл клубтың негізгі мақсаты – қаламыздың еңбек сіңірген, белсенді мүшелерін жас ұрпаққа үлгі болатындай дәріптеу. Осы істің бастамасы ретінде сол кісілердің еңбек жолын, отбасын әлеуметтік желілерде жариялау арқылы насихаттау жұмыстары қолға алынды.Сонымен қатар №140 қазақ орта мектеп директоры, қалалық мәслихат депутаты Айгүл Мұсабаева мен кеңес бірлестігінің ұйымдастыруымен «Тәрбиелі зияткер ұрпақ – болашақ кепілі» тақырыбындағы облыстық әлеуметтік-ғылыми ашық алаңы өткізілсе, қалалық білім бөлімі мен қалалық білім қызметкерлері кәсіподақ комитетінің және «Қалалық әйелдер кеңесі» қоғамдық бірлестігінің ұйымдастыруымен М.Шоқай атындағы №187 IT мектеп-лицейінде «Бақытты отбасы – бақытты ел» атты шара көпшіліктің көңілінен шықты. Сондайақ «Болашақ» университетінде облыстық және қалалық әйелдер кеңесі мүшелерінің ұйымдастыруымен көшбасшы әйелдер мектебінің алғашқы дәрісі өтті. Жалпы білім беру ұйымдарында аналарымыз тәрбие бағытында қыз балалармен кездесулер, ашық сұхбаттар өткізіп келеді. 2022 жылдың қыркүйек айында «Қалалық әйелдер кеңесі» қоғамдық бірлестігінің жұмыс жоспарына сәйкес қоғамдық бірлестік жанынан білім беру ұйымдарынан әйелдер кеңесін құру қолға алынып, төрайымдары бекітіліп, жұмыс істеуде. Айта кету керек, мұндай жұмыс алдағы уақытта да жалғасын таппақ.– Қоғамда белсенді жанның бірісіз. Оған қоса қалалық мәслихаттың депутатысыз. Депаутат ретінде қандай мәселені шештіңіз?&nbsp;– Иә, 2023 жылы 19 наурыз ҚР Парламенті Мәжілісінің және барлық деңгейдегі мәслихат депутаттарының сайлауына «AMANAT» партиясының атынан қалалық мәслихат депутаттығына ұсынылдым. Маған сенім артып, дауыс берушілердің арқасында сайлауда жеңіп шықтым. Содан бері депутаттық жұмысымды коммуналдық-шаруашылық және қала инфрақұрылымы мәселелері жөніндегі тұрақты комиссия мүшесі ретінде бастадым. Қазіргі уақытқа дейін тұрғындармен «AMANAT» партиясы қалалық филиалының қоғамдық қабылдауында, мөлтек ауданға қарасты Абай мектебінде қоғамдық қабылдау жұмыстарын жүргіземін. Арасында сайлаушыларыммен де кездесіп тұрамын.– Отбасыңыз жайлы айтып өтсеңіз…&nbsp;– Ата-енем ауылда тұрды, 10 бала туған батыр ана болатын. Біз қалада студент едік, каникулда барып тұрғанымыз болмаса бірге тұрмадық. Осы кезде жолдасым, қызым мен немерелерім бар. Айта кетейін, өмірлік серігім жеке кәсіпкер және құрылыс саласында жұмыс істейді.&nbsp;– Қыз бала бақытты болуы үшін не істеу керек? Кеңес төрайымы ретінде кеңесіңіз…– Бақытты әйел болуы үшін қыз баласын жастайынан тілдің, сөздің, ойының, жанының тазалығына баса назар аударып, жалқаулыққа бой бермеу керек. Қазіргі кездегі ақбозатты ханзаданы күтіп, бақытты боламын деген қате пікір қалыптасқан. Жоғарыда атап өткендей, қыз баласы жанының тазалығымен қатар рухани бай болып, көркем мінезді, жан жақты, қылықты болуы қажет.– Адамның бойындағы қандай қасиетті бағалайсыз?– Адалдығын бағалаймын.– Соңғы оқыған кітабыңыз?– Қазақ тілінде оқып жатқаным «Кемел адам» Қайрат Жолдыбайұлының кітабы, орыс тілінде «Жизнь в удовольствие», авторы – Александр Палиенко.&nbsp;– Бос уақытыңыз болса немен айналысасыз?– Шахмат және волейбол ойнап тұрамын. Студент кезімде шахматтан пединститут командасында ойнағанмын.–&nbsp;Сұхбатыңызға рақмет!&nbsp;

Қазақстан және Қызылорда облысының жаңалықтары: Сұхбат