<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Сырдария ауданы Тереңөзек кентінде орналасқан аудандық орталық стадион «Ауыл ел бесігі» бағдарламасының аясында қайта жаңғыртылып, күрделі жөндеуден өтуде.
Мердігер мекеме «Астана сервис LTD» ЖШС-нің жүргізуімен күрделі жөндеу жұмыстары ағымдағы жылдың 20 қыркүйегінде бастау алған.
Стадионның күрделі жөндеу жұмыстарына 14 жұмысшы тартылған олардың 7-уі жергілікті тұрғындар.
Бүгінде стадион алаңының бордюрлары қойылып, малта тасы төселуде. Жасанды төсеніштері де құрылыс алаңына жеткізілген. Құрылыс жұмыстарының аяқталуы 2021 жылдың 30 қарашасына дейін жоспарлануда. 
Жалпы, Сырдария ауданында спортпен шұғылданушыларға әр түрлі деңгейдегі 130 нысан қызмет көрсетуде. Аудан бойынша дене шынықтыру мұғалімі және оқытушы-жаттықтырушылар саны – 230, оның 199-ы жоғарғы білімді, 30-ы арнаулы орта білімді мамандар. 574 дене шынықтыру және спорт үйірмелері жұмыс жасайды. Аудан бойынша оқушылар және тұрғындарды қоса есептегенде 11729 спортшы жүйелі спортпен айналысуда. Бұл аудан тұрғындарының 31 пайызын құрап отыр.
<img src="https://kyzylorda-news.kz/wp-content/uploads/2021/10/d-1.jpg" alt="" />
<img src="https://kyzylorda-news.kz/wp-content/uploads/2021/10/zh.jpg" alt="" />

«Ауыл ел бесігі»: Сырдарияда стадион жаңғыртылуда

Kyzylorda-news.kz. Қарағанды қаласында киокушинкай-кан каратэден балалар, жастар, жасөспірімдер, ересектер арасында өткен ҚР чемпионатында командалық ката бойынша Кызылорда облысы 2 орын алды.
Мейрамбек Али 16-17 жас 1 орын, Мейрамбек Мади 16-17 жас 2 орын, Мейрамбек Мади 18-20 жас 3 орын, Жармағамбетов Жанболат 12-13 жас 3 орын, Жұмабек Нұрбақыт Ересектер арасында -70 кг 3-орын иемденді.
Спортшыларды жарысқа дайындаған Бауыржан Муханов пен Үсен Төлегенов. Спортшылар #2 ООРМБЖМ-де жаттығады.
<img src="https://kyzylorda-news.kz/wp-content/uploads/2021/10/fb_img_1634182375807.jpg" alt="" />

ҚР чемпионатында Сыр спортшылары жеңіспен оралды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қызылордалық ауыр атлет Рахат Бекболат жасөспірімдер арасында әлем чемпионы атанды.
Рахат Бекболат Сауд Арабиясында өтіп жатқан ауыр атлетикадан жасөспірімдер арасындағы әлем чемпионатында 102 келіге дейінгі салмақ дәрежесінде бірінші орынды иеленді.
Бекболат 355 (155 + 200) келіні көтерді. Екінші орында түркиялық Танер Чаглар (152 + 185). Үздік үштікте Ирак спортшысы Аммар Рубаяви Әли бар (149 + 185). Спортшы алтын медаль алғаннан кейін қазақстандық жанкүйерлерге қолдау көрсеткені үшін алғысын білдірді.
Мен өте ризамын, бәрі бір деммен өтті. Жарыс жоғары деңгейде және санитарлық-эпидемиологиялық талаптарға сай болды, – дейді жас спортшы.

Қызылордалық Рахат Бекболат ауыр атлетикадан әлем чемпионы атанды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қазалы ауданында Тәуелсіздіктің 30 жылдығына орай «Qazaly Marathon – 2021» атты желаяқтар марафоны өтті. Жарысқа қатысушылар 12 шақырымға жүгірді.
Марафонға қазалылықтармен қатар Қызылорда, Байқоңыр қалалары және Жалағаш, Қармақшы аудандарынан 200-ге жуық спортшы қатысты.
Әйтеке би кентіндегі теміржол вокзалында жарыс жолына шыққан спортшыларға аудан әкімі Мұхтар Оразбаев сәттілік тілеп, салауатты өмір салтын ұстанушы азаматтарға алғысын айтты. Мұхтар Әуесұлы мұнан соң өзі де марафонға қатысушылардың қатарына қосылып, спортшылармен бірге жүгірді.
Қалалық жастар ресурстық орталығының ұйымдастыруымен өткен жарыстың жеңімпазы Қармақшы ауданынан келген Мейірімжан Мақшат атанды. Жүлделі екінші орынды байқоңырлық Данияр Баймаханов иеленсе, қола жүлдеге тағы бір қармақшылық Бағдат Елібаев жеткізді.
Жеңімпаздар мен жүлдегерлерді аудан әкімінің орынбасары Дәурен Тілеумбетов пен жарыстың демеушісі, жеке кәсіпкер Әділет Қарымсақ құттықтап, оларға қаржылай сыйақы табыс етілді. Сондай-ақ, алғашқылардың қатарында келген спортшылар «Алғыс хат» пен бағалы сыйлықтарға ие болды.
<img src="https://kyzylorda-news.kz/wp-content/uploads/2021/10/244951302_3175507776003481_384161945545498020_n.jpg" alt="" />
<img src="https://kyzylorda-news.kz/wp-content/uploads/2021/10/244653478_3175507999336792_8856780470883635020_n.jpg" alt="" />
<img src="https://kyzylorda-news.kz/wp-content/uploads/2021/10/244672900_3175509319336660_8266897834825455034_n.jpg" alt="" />

Қазалыда желаяқтар марафоны өтті

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Сырдария ауданының әкімі Мұрат Ергешбаев спорт жаттықтырушыларымен кездесті.
Кездесуге аудандық дене шынықтыру және спорт бөлімі басшысының міндетін атқарушы А.Мешітбаева, №11 Сырдария ауданының олимпиадалық резервтің мамандандырылған балалар-жасөспірімдер мектебінің директоры Б.Есенов, Сырдария спорт клубының директоры Б.Ахметов, спорт саласының ардагерлері және спорт жаттықтырушылар қатысты.
Мемлекет басшысы Қасым-Жомарт Кемелұлы Тоқаев өз Жолдауында «Барлық жастағы ел азаматтары арасында бұқаралық спортты дамыту маңызды. Бұқаралық дене шынықтыруды өркендету ісі жаңа чемпиондар шыңына шығатын пирамидаға айналуы тиіс»- деп атап өтті.
Бүгінде ауданда түрлі деңгейдегі 130 спорт нысаны жұмыс жасауда. Аудан бойынша 11875 адам тұрақты түрде ,57 дене шынықтыру ұжымдарында спортпен шұғылдануда. Бұл аудан халқының 31 пайызын құрап отыр. Түрлі деңгейдегі жарыстардан спортшыларымыз жетістіктерге жетіп, аудан спортының дамуына өз үлестерін қосып келеді.
Аудан басшысы биылғы жылдың 27 қазанында басталатын «Алтын күз-2021» облыстық спартакиадасында спортшыларымыздың жоғары жетістіктерге жетіп, жеңіс тұғырынан көрінулеріне тілектестігін білдірді.
Кездесу барысында спорт саласының ардагерлері Бақытжан Абдулпаттаев пен Мектепхан Елеусінов ауданның спорт саласының дамуына, жан-жақты насихатталуына әлі де үлес қосатындарын айтты.
Аудан әкімі Мұрат Ергешбаев спорт жаттықтырушыларына бүгінгі айтылған ұсыныс-пікірлері назарға алынып, алдағы уақытта шешілу жолдары қарастырылатын айтты.

Сырдария ауданында 130 спорт нысан бар

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Токио олимпиадасынының қола жүлдегері Софья Берульцева және Мөлдір Жаңбырбай Мәскеуде өткен Karate 1 Premier League жарысында алтын медаль алды.
Софья бірнеше жылдың ішінде +68 келінің лидеріне айналып үлгерді. Ол финалда ресейлік Вера Ковалеваны жеңді. Берульцева осымен төртінші рет Karate 1 Premier League жарыстарында алтын медаль иеленіп отыр. Ол осыған дейін Шанхай мен Мадрид (2019 жыл) және Стамбул (2021) премьер-лигасында жеңіске жеткен. Софья қарашада Дубайда өтетін әлем чемпионатына фаворит ретінде барады.
Мөлдір Жаңбырбай 50 келіде финалда австриялық Веттина Планкты жеңіп, Мәскеудегі жарыстың чемпионы атанды. Мөлдір биыл Лиссабон (Португалия) премьер-лигасында күміс медаль иеленген.
Ерлер арасында 60 келіде финалда қазақстандық Қайсар Алпысбай ресейлік Евгений Плахутиннен басым түсіп, Мәскеудегі премьер-лиганың алтынын алды. Алпысбай 2020 жылы Сантьяго (Чили) премьер-лигасында жеңімпаз атанған.
Ал Сабина Захарова (әйелдер арасында 55 келі) финалда ресейлік Анна Чернышевадан жеңіліп, екінші орын алды.
Karate 1 Premier League – WKF (Әлемдік каратэ федерациясы) ұйымдастыратын деңгейі жағынан әлем чемпионатынан кейінгі екінші жарыс.

Мөлдір Жаңбырбай Мәскеуде өткен жарыста алтын медаль алды

<a href="https://kyzylorda-news.kz/ru/obshestvo/">Kyzylorda-news.kz</a>. Мәнерлеп сырғанаудан әлем чемпионатының күміс жүлдегері, Қазақстанның үш дүркін чемпионы, жасөспірімдер қысқы олимпиядасының қола жүлдегері Элизабет Тұрсынбаева әлеуметтік желіде өзінің спорттағы мансабын аяқтағаны туралы хабарлаған болатын. Бүгін Өңірлік коммуникациялар қызметінде өткен баспасөз конференциясында Элизабет Байтаққызы БАҚ өкілдеріне ресми мәлімдеме жасады.
<blockquote>
 «Мен кішкентай кезімнен мәнерлеп сырғанаудың шебері болуды қаладым және сол жолда барымды салып дайындалдым. Үлкен жетістіктерге де қол жеткіздім. Әрине бұл мені қолдаған жандардың арқасында деп білемін. Өкінішке орай денсаулығыма байланысты спорттық мансабымды аяқтауға тура келді. Бұл шешімге келу әрине қиын болды. Бірақ алда әлі талай жақсы жаңалықтар көп болады деген сенімдемін. Мені қолдаған баршаларыңызға алғыс айтамын», – деді Элизабет Тұрсынбаева
</blockquote>
Баспасөз аланыңда облыстық дене шынықтыру және спорт басқармасы басшысының міндетін атқарушы Жағыпар Тажмаханов мәнерлеп сырғанаушы Элизабет Тұрсынбаеваға өз қолдауын білдіріп, алдағы жоспарларына табыс тіледі.
<blockquote>
 «Осы уақытқа дейін қысқы олимпидаға дайындықтар жасап, Элизабеттен үлкен көрсеткіштер күткен едік. Дегенмен жарақаттарына байланысты осындай шешім қабылданды. Біз басшылық ретінде де жалпы Элизабеттің жанкүйері ретінде де бұл шешіміне үлкен құрметпен қараймыз. Елімізде мәнерлеп сырғанау спорты кенже дамыса да оған қызығушы жастар көп. Сондықтан Элизабет Байтаққызы спорттан алыстамайды. Қазіргі таңда басқармаға қарасты спорт мектебінің мәнерлеп сырғанау бөліміне жаттықтырушы қызметін бастады. Алдағы уақытта облыстағы балалар мен жасөспірімдер мәнерлеп сырғанаудан үлкен жетістіктерге жететініне сенемін», – деді Жағыпар Айтбайұлы.
</blockquote>
Сондай-ақ брифингте Элизабет Тұрсынбаеваның әкесі және жеке бапкері Байтақ Тұрсынбаев бұл шешімге байланысты өз пікірімен бөлісті.
<blockquote>
 «Элизабет мәнерлеп сырғанау спортына 2005 жылы келді. Сегіз жасында елде өткен барлық жарыстарға қатысты. Сондай-ақ “Қазақстан құрама командасында” бой көрсетті. Осы аралықта Элизабет үлкен жетістіктерге жетті. Қазақстанның атын әлемге танытты десек те болады. Біздің алға қойған мақсаттарымыз өте көп болатын. Қысқы олимпиадаға қатысуды жоспарлаған едік. Дегенмен денсаулығы сыр бергеннен кейін осындай шешімге келдік. Әрине мұндай шешім шығармас бұрын көп ойланып, толғандық. Бірақ ұзақ уақыт бойы арқа жарақатынан толық айыға алмады. Элизабеттің барша жанкүйерлеріне тек алғыс айтамыз»,-деді Байтақ Әбілханұлы.
</blockquote>
<img src="https://kyzylorda-news.kz/wp-content/uploads/2021/09/243565140_1382131628849012_2453292637256387298_n.jpg" alt="" />

Элизабет Тұрсынбаева сыр жастарын мәнерлеп сырғанауға баулымақ

<a href="https://kyzylorda-news.kz/ru/obshestvo/">Kyzylorda-news.kz</a>. &nbsp;Бүгін Қазақстан құрамасы футзалдан әлем чемпионатының жартылай финалында Португалиямен шеберлік байқасады, деп хабарлайды ҚазАқпарат.
Кездесу елорда уақытымен 23:00-де басталып , «Qazsport» телеарнасынан тікелей эфирде көрсетіледі.
Топтық кезеңде Қазақстан құрамасы Коста-Рикадан 6:1, Литвадан 3:0 есебімен басым болды. Ал Венесуэламен 1:1 есебімен тең ойнады. Одан кейін 1/8 финалда Таиландтан 7:0 есебімен басым түсіп, ширек финалда Иранды&nbsp;<a href="https://lenta.inform.kz/kz/futzaldan-alem-chempionaty-kazakstan-kuramasy-zhartylay-finalga-shykty_a3841737">3:2 есебімен</a>&nbsp;сүріндірді.
Ал Португалия топтық кезеңде С тобында Таиландты 4:1, Соломон аралдарын 7:0 есебімен тізе бүктіріп, Мароккомен 3:3 есебіне қанағат білдірді. Келесі кезекте 1/8 финалда Сербияны 4:3, 1/4 финалда Испанияны 4:2 есебімен жеңді.
Еске салсақ, 29 қыркүйекте жартылай финалда Аргентина Бразилияны 2:1 есебімен жеңіп, финалға жолдама алды. Финалда оған Қазақстан мен Португалия жұбының жеңімпазы қарсылас болады.
Португалия әлем чемпионатына алтыншы мәрте қатысып отыр. 2000 жылы 3-орын иегері атанған еді. Аталған құрама 2018 жылы Еуропа чемпионы атағын жеңіп алды.
Қазақстан құрамасы бұдан бұрын әлем чемпионаты финалдық сатысында екі мәрте бақ сынады. 2000 жылы бірінші кезеңнен аса алмаса, 2016 жылы 1/8 финалға дейін жетті.
Екі құрама бұған дейін 2000 жылы әлем чемпионаты топтық кезеңінде кездесті. Аталған кездесуде португалдар 6:2 есебімен басым түскен еді.
Әлем чемпионатының финалы 3 қазанға белгіленген.

Футзалдан әлем чемпионаты: Қазақстан құрамасы жартылай финалда Португалиямен кездеседі

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бейжіңдегі қысқы Олимпиада ойындары аясындағы жарыс билеттері құрлықтағы Қытайда тұратын жанкүйерлер арасында сатылады, деп хабарлайды Халықаралық Олимпиада комитеті.
Қысқы Олимпиада аясындағы жарысты көргісі келетіндер ковидке қарсы хаттамаларға сәйкес болуы тиіс.
Билеттерді сату мәселесі талқылау және өңдеу сатысында, олар туралы ақпарат кейінірек жарияланады.
Бейжің қаласындағы 2022 жылғы Олимпиаданың коронавирусқа қарсы вакциналаудың толық курсын өткен барлық спортшылары мен қатысушылары Бейжіңге келген соң жабық цикл жүйесінде орналасады.
Ал вакцина алмаған спортшылар Қытай астанасына келген соң 21 күндік карантинге жатқызылады. Вакцина алмаған атлеттер вакциналаудан бас тартудың медициналық негіздемесін ұсынса, олардың ісі бөлек қаралады.
Бейжіңге келіп жететін барлық қатысушылар (спортшылар мен атлеттермен Олимпиада ауылдарында бірге еріп жүрген делегацияның кейбір тұлғаларынан басқа) ұйымдастырушылар белгілеген ковидке қарсы шараларға сәйкес келетін қонақүйлерде тұрады.
Ойындардың барлық қатысушылары мен қызметкерлерінен күн сайын коронавирусқа қарсы тест алынады.
Бейжіңдегі Қысқы Олимпиада ойындары 2022 жылдың 4-22 ақпан күндері, ал Паралимпиада ойындары – 4-13 наурызда өтеді.

Бейжіңдегі қысқы Олимпиада ойындары көрерменсіз өтеді

<a href="https://kyzylorda-news.kz/ru/obshestvo/">Kyzylorda-news.kz</a>. Халықаралық бокс қауымдастығы (AIBA) өз қатарындағы үздіктерді марапаттау дәстүрін жалғастыруда. Осыған байланысты, әрбір ұлттық федерация өзінің негізгі мамандарын бокстың дамуына, нығаюына қосқан үлесі мен жетістіктеріне қарай таңдап, сараптайды.
Мәселен, ҚБФ пікірі бойынша Қазақстандағы ең үздік бапкер Қайрат Сатжанов болды. Оның жастар құрамасындағы жұмысы барысында жоғары спорттық нәтижелер, жақсы бокс тәжірибесін енгізу және т.б. көрсетілді.
Токио-2020 Олимпиадасының қола жүлдегері Қамшыбек Қоңқабаев үздік боксшы атанды. Ұлттық құраманың капитаны өскелең ұрпаққа үлгі болып табылады және рингтегі нәтижелерден басқа қоғамдық жұмыстарға да қатысады.
Әйелдер арасында үздік боксшы атағына команда көшбасшысы Алуа Балқыбекова лайық деп танылды. Ол биылғы жылы ең жеңіл салмақта Дубай-2021 Азия чемпионатын жеңіп алды.
<img src="https://kfb.kz/userfiles/IMG-20210927-WA0027(2).jpg" alt="" />
Жастар арасындағы Әлем және Азия чемпионы Санжар Ташкенбай да AIBA сертификатына ие болды. Осындай марапат оның құрамадағы әріптесі Милана Аюповада да бар. Биыл ол құрлықтық жастар арасындағы біріншілікте жеңімпаз атанды.
Және де, Ермек Сүйеніш Қазақстанның үздік төрешісі болып танылды. Біздің маман Токиодағы Олимпиада ойындарында жоғары деңгейде жұмыс істегені белгілі.
Марапаттау рәсімі онлайн форматта өтті. Оны Қазақстан бокс федерациясының атқарушы директоры Маратбек Мықтыбеков жүргізді. Іс-шараның өзі бүкіл әлемдегі халықаралық бокс күніне орайластырылған.
<img src="https://kfb.kz/userfiles/IMG20210927160714(1).jpg" alt="" />
<a href="https://prosports.kz/kz/news/518272-aiba-kamshybek-konkabaevty-zhyl-boksshysy-dep-tanydy">Prosports.kz.</a>

Қамшыбек Қоңқабаев жыл боксшысы атанды

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстан құрамасы футзалдан әлем чемпионатының ширек финалында Иранмен шеберлік байқасты, деп хабарлайды ҚазАқпарат.
Бүгінгі кездесу аса тартысты өтті. Алғашқы минуттарда ирандық спортшылар тізгінді өз қолына алуға тырысты. Нәтижесінде бірінші кезеңнің 8-минутында Мослем Оладгобад есеп ашса, 15-минутта Ахмад Эсмаилпур есепті үстемелей түсті.
Екінші кезеңде қазақстандық футзалшылар алға қарай ұмтылды. Ойынның 25-минутында Дәурен Тұрсағұлов көздеген нысанадан мүлт кеткен жоқ. Ал 29-минутта Арнольд Кнауб таразы басын теңестірді. Ойынның 39-минутында қазақстандық Тайнан жеңіс голын соқты.
Осылайша Қазақстан қарсыласын&nbsp;3:2 есебімен жеңді.
Топтық кезеңде Қазақстан құрамасы Коста-Рикадан 6:1, Литвадан 3:0 есебімен басым болды. Ал Венесуэламен 1:1 есебімен тең түсті. Одан кейін 1/8 финалда Таиландты 7:0 есебімен&nbsp;тізе бүктірді.
Бұдан бұрын 1/4 финалда Бразилия Марокконы 1:0 есебімен жеңген болатын. Ал Аргентина мен Ресей кездесуінің негізгі кезеңі 1:1 есебімен аяқталып, пенальтиде аргентиналықтар 5:4 есебімен жеңіске жетті. Бүгін Португалия – Испания кездесуі португалиялықтар пайдасына 4:2 есебімен аяқталды.
Енді 29 қыркүйекте өтетін жартылай финалда Бразилия мен Аргентина кездессе, 30 қыркүйекте Қазақстан мен Португалия ойнайды.
Қазақстан құрамасы бұдан бұрын әлем чемпионатының финалдық сатысында екі мәрте бақ сынаған еді. 2000 жылы бірінші кезеңнен аса алмаса, 2016 жылы 1/8 финалға дейін жетті.
Әлем чемпионатының финалы 3 қазанға белгіленген.

Футзалдан әлем чемпионаты: Қазақстан құрамасы жартылай финалға шықты

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Мәнерлеп сырғанаушы, 2019 жылғы әлем вице-чемпионы Элизабет Тұрсынбаева анасы Падишахан Сұлтаналиеваның Қазақстанның мәнерлеп сырғанау саласына қатысты сөзіне <a href="https://sputnik.kz/sport/20210926/18235442/Tursynbaeva-anasy-keshirim.html">түсініктеме</a> берді.
<blockquote>
 “Анамның сөзі үшін кешірім сұраймын. Өкінішке қарай, екеуіміз екі жақтамыз. Анам қазір Мәскеуде, мен Қазақстандамын. Мен бұл жағдайды бақылаған жоқпын. Оны бәрібір жақсы көремін. Артық айтқаны үшін уайымдап жүрген болар”, – деп жазды Элизабет Тұрсынбаева <a href="https://www.instagram.com/stories/elizabetkz/2671261480931979215/">Instagram</a> желісінде.
</blockquote>
Ол анасы ашық адам екенін айтты. Әркімнің өз ойы болатынын атап өтті.
Спортшы Ұлттық Олимпиада комитеті, Қызылорда облысының басшылығы мен мәдениет және спорт министрлігіне әрдайым қолдау көрсеткені үшін алғасын жеткізді.
“Менде бәрі жақсы. Әлемдік аренада Қазақстан атынан мақтанышпен өнер көрсеттім”, – деп түйіндеді Тұрсынбаева.
Ол желі қолданушыларынан анасының сөзіне қатысты жағымсыз пікір жазып уақыт жолғатпауды сұрады.

Қазақстан және Қызылорда облысының жаңалықтары: Спорт