<a href="https://kyzylorda-news.kz/">Kyzylorda-news.kz.</a> Токио Олимпиадасының қол жүлдегері Қамшыбек Қоңқабаев әлі талай елдің абыройын асқақтатып, жеңісті күндер көп болатынына сенімді екенін жеткізді.
<blockquote>
 «Барша қазақстандықтарды ел Тәуелсіздігінің 30 жылдығымен құттықтаймын! Егеменді елде туылып, Тәуелсіздіктің төл құрдасы болғаныма қуанамын. Ең алғаш боксқа келуіме себепші болған жанның бірі – туған ағам еді. Содан бері спорт саласында жүргеніме 16 жыл толды. Осы уақыт аралығында кәсіби бокста шыңдалып, түрлі жекпе-жектерге қатыстым. Жақында «WBA Gold» чемпиондық атақ үшін ауыр салмақта жекпе-жек өткен болатын. Бұл кездесу 12 раундқа жоспарланған еді. Алайда жетінші раунда қарсыласымның жарақатына байланысты жекпе-жек тоқтатылып, жеңіс бізге бұйырды. Осылайша кәсіби бокста 4-ші жеңісіме қол жеткіздім. Қарсыласым туралы айтатын болсам, Стивен Уорд Ұлыбританиялық кәсіби боксшы. Ол кәсіби бокста 14 рет жекпе-жек өткізіп, біреуінде ғана жеңіліске ұшыраған. Алға қойған жоспарларымның бірі келесі жылы наурыз айында тағы кездесу өткізу ойда бар. Әлі талай елімнің абыройын асқақтатып, жеңісті күндер көп болатынына сенімдімін», – дейді боксшы.
</blockquote>

Қамшыбек Қоңқабаев: Әлі талай елімнің абыройын асқақтатып, жеңісті күндер көп болатынына сенімдімін

<a href="https://kyzylorda-news.kz/">Kyzylorda-news.kz.</a> Қазақстан Республикасы Тәуелсіздігінің 30 жылдығына орай Қызылорда облысының полиция департаментінің&nbsp; арнайы жұмылдыру даярлық басқармасымен «Динамо» спорт кешенінде полиция қызметкерлері арасында шағын футболдан турнир ұйымдастырды.&nbsp;&nbsp;
Турнирдің ашылу салтанатына Қызылорда облысы Полиция департаментінің басшылығы, ішкі істер органдарының ардагерлері, сондай-ақ «Динамо» дене шынықтыру-спорт қоғамының облыстық филиалының өкілдері қатысты.
<blockquote>
 «Тәуелсіздік күні – бұл бостандықты, күш пен өркендеуді білдіретін ұлы мереке. Еліміздің әр азаматы үшін бұл өте маңызды күн. Өздеріңіз білетіндей, мұндай жарыстар қызметкерлер арасында спортты дамыту, даңқты дәстүрлерді нығайту, ойыншылар арасында құрметті қарым-қатынас орнату үшін маңызды. Жарыс жоғары деңгейде, командаларға лайықты жеңістер, барлық қатысушыларға спорттық мерекеден ұмытылмас әсер қалдыруын тілеймін», – полиция департаменті бастығының орынбасары, &nbsp;полиция полковнигі Ерлан Ахметов.
</blockquote>
Жарысқа 8 команда, 96 қызметкер қатысты. Ойынның міндеттері мен шарттарын анықтайтын мандаттық комиссия құрылды.
Шағын футболдан жарыс аяқталғаннан кейін командалар арасындағы орындар келесідей бөлінді: 1 командалық орынды Қызылорда облысы Полиция департаментінің құрама командасы жеңіп алса, 2 орынды Қызылорда қалалық Полиция басқармасының құрама командасы алды, ал 3 орынды ПБ-ның патрульдік полиция батальонының құрама командасы иеленді.
Сондай-ақ полиция қызметкерлері арасында «Үздік ойыншы» – ПБ-ның полицейi полиция сержанты Нұрлыбек Күмісбай, «Үздік қорғаушы» – ПД-нiң Тергеу басқармасының бөлім бастығы полиция майоры Бауыржан Савлябеков, «Үздік қақпашы» – Арнайы жұмылдыру даярлық басқармасының инспекторы полиция капитаны Қадыр Жұмабеков, «Үздік шабуылшы» – ПБ-ның патрульдік полиция батальонының рота командирі полиция майоры Шаттық Жайсанбаев номинациялары анықталды.
«Динамо» дене шынықтыру-спорт қоғамының облыстық филиалының өкілі&nbsp; үздік ойыншыларға естелік сыйлықтар табыс етті.
Жарысқа қатысушылар мен жүлдегерлер Департамент бастығының Дипломымен, кубоктармен, медальдармен марапатталды.
<img src="https://kyzylorda-news.kz/wp-content/uploads/2021/12/img_2960-scaled.jpg" alt="" />

Қызылордалық полицейлер арасында шағын футболдан турнир өтті

Kyzylorda-news.kz. Алматыда өтіп жатқан MTK Kazakhstan бокс кешінде басты кездесу өтті, деп хабарлайды Sports.kz.
Кездесуде қазақстандық боксшы Қамшыбек Қоңқабаев (3-0, 3 КО) британиялық Стивен Уордпен (13-1, 4 КО) жұдырықтасқан болатын.
Крузервейттегі жекпе-жекте қарсыластар бос тұрған WBA Gold чемпиондық атағы үшін сайысқа түсті. Кездесу 12 раундқа есептелген. Алайда, ол аяғына дейін жетпеді. Жекпе-жек жетінші раундта Қамшыбектің жеңісімен аяқталды. Уорд алған жарақатына сайысты жалғастыра алмады.
Бесінші раундта төреші британиялық боксшының нокдаунға түскенін көрсетті.
Осылайша, Қамшыбек Қоңқабаев кәсіби бокстағы карьерасында 4-ші жеңісіне (тұртіншісін нокаутпен) қол жеткізді. Ол WBA Gold чемпиондық белдігін жеңіп алды. Стивен Уорд болса, кәсіби рингте екінші рет жеңілді.

Қамшыбек Қоңқабаев британиялық қарсыласын тізе бүктірді

<a href="https://kyzylorda-news.kz/">Kyzylorda-news.kz.</a> Қызылорда облысында спорттық және әуесқой балық аулаушылар қоғамының құрылғанына 4 жылдан асты.
2017 жылы негізі қаланған қоғамның – аймақтағы спорттық және әуесқой балық аулауды дамыту және оны көпшілікке тарату.
Біршама уақыттан бері жұмыс жасап келе жатқан әуесқойлар ұйымының да өз мәселесі бар.
<blockquote>
 «Облыс аумағында балық шаруашылығында маңызы бар Кіші Арал теңізі, Сырдария өзені және жергілікті маңызы бар 196 су айдыны бар. Өңірдегі спорттық және әуесқой балық аулауды насихаттау және дамыту үшін облыс орталығынан белгілі бір су айдынын анықтау керек. Бұл осы уақыттағы заман талабы. Әуесқой балықшылар демалыс кезіндегі бос уақытты әр көлді жағалап, олардың егерлерінен рұқсат сұрап өткізіп жүрміз», – дейді «Қызылорда Fish» облыс бойынша спорттық және әуесқой балық аулаушылар қоғамы» қоғамдық бірлестігінің төрағасы Серік Жұбаназаров.
</blockquote>
Бірлестік төрағасы Сырдария өзенінде су тапшылығы орын алған 2 жыл уақыттан бері, балық аулайтын орындар болмай қалғанын жеткізді. Ол балық аулау ісін хоббиге айналдырған жандарға арнайы су айдыны бекітілсе, балық аулаудың түрлері бойынша жарыстар, әртүрлі көпшілік шаралар ұйымдастыруға болатынын айтты.

Серік Жұбаназаров: Әуесқой балық аулауды насихаттау үшін белгілі бір су айдынын анықтау керек

<h1 id="">Бокс пен ауыр атлетика Олимпиада бағдарламасынан шығып қалды</h1>
<a href="https://kyzylorda-news.kz/">Kyzylorda-news.kz.</a> Бокс пен ауыр атлетика Олимпиада бағдарламасынан шығып қалды, деп хабарлайды <a href="https://sn.kz/sn-akparat-agyny/86631-boks-pen-auyr-atletika-olimpiada-bagdarlamasynan-shygyp-kaldy?fbclid=IwAR3LrfuUpb27ZEkqhTfdday8aGAItCb0Vt6IMOR0BoeMoi-Pz_-OjEr2r2s">SN.KZ</a>.
Аталған спорт түрлерінің Олимпида бағдарламасына қайта енуі немесе енбеуі жөніндегі мәселе Халықаралық Олимпиада комитетінің 2023 жылғы сессиясында қаралады.
Халықаралық Олимпиада комитеті 2028 жылы Лос-Анджелесте өтетін Олимпиада ойындарының бағдарамасына енген 28 спорт түрінің тізімін жариялады. Аталған тізімге бокс, ауыр атлетика мен қазіргі бессайыс енген жоқ деп хабарлайды ТАСС.
ХОК президенті Томас Бах жиын барысында бокс пен ауыр атлетиканы “проблемасы көп балаларға” теңеді.
“Әңгімемді проблемасы көп балалардан бастағым кеп тұр. Бұлар – бокс пен ауыр атлетика. ХОК атқарушы комитеті бокс, ауыр атлетика және қазіргі бессайыстың өтінішін қабылдау немесе кері қайтару туралы ойланатын болады.
АІВА (Халықаралық әуесқой бокс қауымдастығы) қаржылық ашықтық бойынша жұмыстың жақсарғанын көрсетуі тиіс.
Сондай-ақ, төрешілерді тағайындауды дұрыс жолға қоюы керек. IWF (Халықаралық ауыр атлетика федерациясы) допингпен күрес жөніндегі ұсыныстарды толық орындап, допингке қарсы бағдарламаның толық тәуелсіздігін дәлелдеуі тиіс.
Ал UIPM (Халықаралық қазіргі бессайыс одағы) атпен жарысуды алмастыратын жаңа бағдарламаны дайындап шығуы қажет”, – деді ХОК президенті Томас Бах.
Аталған спорт түрлерінің Олимпида бағдарламасына қайта енуі немесе енбеуі жөніндегі мәселе Халықаралық Олимпиада комитетінің 2023 жылғы сессиясында қаралады.
Айта кетелік, ХОК Токио Олимпиадасы қарсаңында АІВА-ны өз мүшелігінен шығарып жіберген болатын. Токио Олимпиадасындағы бокс турнирі мен Олимпиадаға іріктеу жарысын ХОК өзі өткізді. Ауыр атлетика бірқатар чемпиондар мен жүлдегерлердің допингпен ұсталуына байланысты сынға ұшырады. Ал қазіргі бессайыс ат спортының орнына басқа жарыс түрін ойластырмақ.
Өйткені, Токио Олимпиадасында жарысқа түсетін жылқыны қорлаған неміс бапкерінің әрекетінен соң, әлемдік ұйым жануардың қатысы жоқ басқа спорт түрін енгізетінін мәлімдеген.
Еске сала кетейік, бұған дейін Париж Олимпиадасының бағдарламасына енбей қалған спорт түрлері анықталған болатын.

Бокс пен ауыр атлетика Олимпиада бағдарламасынан шығып қалды

<a href="https://kyzylorda-news.kz/">Kyzylorda-news.kz.</a> «Қайсар» футбол командасы Қызылордада жергілікті футболшылармен алғашқы оқу-жаттығу жиынын бастады.
Алғашқы жиынға 23 футболшы шақырту алды. 30 желтоқсанға дейін жалғасын табатын жаттығу жұмыстары футболшылардың қалпына келу мақсатында физикалық бағытта өрбейді.
Жиынға шақырту алған футболшылар:
Қақпашылар: Нұрымжан Салайдын, Нұрмат Сәрсенов; 
Қорғаушылар: Елжас Сарбай, Айбол Жахаев, Абылайхан Төлегенов, Сәбит Шегебай, Ерболат Серік, Бекзат Бектай, Бауыржан Мағжан;
Жартылай қорғаушылар: Думан Нәрзілдаев, Мақсат Байжанов, Бекзат Құрманбекұлы, Аян Құлмағанбетов, Бақдәулет Нәрзілда, Нұрдәулет Әмірбек, Ислам Әбілқасов, Самат Балымбетов, Ерболат Рүстемов;
Шабуылшылар: Бейбарысхан Исаходжаев, Өркен Махан, Елжас Алтынбеков, Шоқан Абзалов, Қасымхан Алпысбаев.

«Қайсар» оқу-жаттығу жиынын бастады

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазақстан Республикасы Тәуелсіздігінің 30 жылдығына орай баскетболдан Қызылорда қаласы әкімінің кубогіне арналған ашық біріншіліктің марапаттау шарасы өтті.
Жасөспірімдер арасындағы ашық біріншілікке Қызылорда қаласы мен аудандардан және Ақтөбе облысынан 240-қа жуық спортшы, 24 команда қатысты.
Марапаттау рәсіміне қатысқан қала әкімінің орынбасары Бектас Нуридинов командаларды жеңісімен құттықтады.
<blockquote>
 «Бүгінде спорт – кез келген елдің халықаралық дәрежедегі имиджін қалыптастыратын саланың бірі. Әлемдік жарыстарда жеңіске жеткен елдің Әнұраны орындалып, Туы көкке көтерілуі де спорттың маңыздылығын айқындай түседі. Бүгінгі жарыстың барлық жеңімпаздары мен жүлдегерлерін жарқын жеңістерімен құтықтаймын», – деді қала әкімінің орынбасары Бектас Балғабайұлы.
</blockquote>
Екі күнге жалғасқан баскетбол бәсекесінде жеңіске жеткен командаларды Сыр елінің мақтанышы Илья Ильин де құттықтап, сәттілік тіледі.
‌Жеңімпаз командаларға Қызылорда қаласы әкімінің кубогі және медальдар мен дипломдар табысталып, үздік ойыншылар номинациялармен, бағалы сыйлықтармен марапатталды.

Баскетболдан Қызылорда қаласы әкімінің кубогіне арналған ашық біріншілік өтті

<a href="https://kyzylorda-news.kz/">Kyzylorda-news.kz.</a> Ақпарат және қоғамдық даму министрлігінің қолдауымен «Қазақстан» телерадиокорпорациясы ұйымдастырған «30 жыл 30 есім» ұлттық байқауының жеңімпаздары анықталды.
**Жеңімпаздар: 
**– «Медицина және денсаулық сақтау саласына қосқан үлесі үшін» – Серік Ақшолақов, Юрий Пя, Надежда Петухова 
– «Қоғамдық белсенділігі үшін» Асылы Осман, Олеся Баимова, Айман Омарова 
– «Мәдениет саласына сіңірген еңбегі үшін» Димаш Құдайберген, Секен Тұрысбеков, Ерболат Төлепбай 
– «Кино саласына сіңірген еңбегі үшін» Болат Әбділманов, Асанәлі Әшімов, Досхан Жолжақсынов 
– «Спорт саласындағы жетістіктері үшін» Дәулет Тұрлыханов, Қанат Ислам, Илья Ильин 
– «Ғылымның дамуына қосқан үлесі үшін» Асқар Жұмаділдаев, Күнсұлу Закарья, Зейнолла Самашев 
– «Білім саласының дамуына қосқан үлесі үшін» Муаммер Гүль, Аятжан Ахметжанұлы, Аягүл Миразова 
– «Ауыл шаруашылығы және агроөндіріс саласына қосқан үлесі үшін» Нұрислам Ыбраев, Иван Сауэр, Сыдық Дәулетов 
– «Дәстүрлі өнердің дамуына қосқан үлесі үшін» Айгүл Үлкенбаева, Рамазан Стамғазиев, Елмұра Жаңабергенова 
– «Әдебиет» аталымы бойынша Дулат Исабеков, Светқали Нұржан, Ұлықбек Есдәулет марапатталды.

«30 ЖЫЛ 30 ЕСІМ» ұлттық жүлдесінің иегерлері анықталды

<a href="https://kyzylorda-news.kz/">Kyzylorda-news.kz.</a>&nbsp; Қазақстан Республикасы Тәуелсіздігінің 30 жылдығы аясында Қорқыт ата атындағы Қызылорда университетінің оқытушысы Ерболат Мұстафаевты еске алуға арналған қазақ күресінен қалалық ашық біріншілік өтті.
Салтанатты шараның ашылуына Қорқыт ата атындағы Қызылорда университетінің Басқарма мүшесі – әлеуметтік және тәрбие жұмыстары жөніндегі проректоры, іскерлік әкімшіліктендіру докторы Жандос Базартай қатысып, спортшыларға сәттілік тіледі.
<blockquote>
 «Ерболат Тоқтаболатұлы өте еңбекқор, талантты, нағыз патриот азамат болатын. 2001 жылы өзі дәріс алған кафедраға оқытушылық қызметке келді. Университет қабырғасында оқытушы-тәлімгер қызметінде әрбір іске жауапкершілікпен қарайтын, бастаған ісінің нәтижелі болуына қол жеткізбей тынбайтын, еңбекқор азамат еді. Білікті маман ретінде шәкірттері мен әріптестерінің құрметіне бөленді. Оның кәсібилігі көпке үлгі. Сондықтан еңбегі мәңгі есімізде қалары анық. Бүгін міне, оқу орны тарапынан еске алу турнирі ұйымдастырылды. Біз әрдайым қызметкерлеріміздің еңбегін бағалап, оны дәріптеу жұмыстарын одан әрі жалғастыратын боламыз», – деді Жандос Нұртайұлы.
</blockquote>
<img src="https://kyzylorda-news.kz/wp-content/uploads/2021/12/6-scaled.jpg" alt="" />
Дүбірлі додаға 60-қа жуық балуан қатысып, тартысты сайысқа университеттің аға оқытушы Серік Ержанов төрелік жасады. Жарыс&nbsp; халықаралық&nbsp; «Қазақ күресі»&nbsp; федерациясы бекіткен ереже бойынша&nbsp; өтті.
Балуандар 55 кг, 60 кг, 66 кг, 74 кг, 82 кг&nbsp; және 90 кг салмақ дәрежесі бойынша күш сынасты. Жарыс нәтижесі бойынша Қорқыт Ата атындағы Қызылорда университетінің балуандары 3 алтын, 4 күміс, 10 қола жүлде алды. Тартысты додада «Болашақ» университеті 3 алтын, 1 күміс медальмен марапатталды. Ал М.Мәметова атындағы Қызылорда педагогикалық жоғары колледжінің қоржынында 1 алтын және 2 қола. Шара қорытындысында әр салмақ дәрежесiндегi жеңiмпаздар мен жүлдегерлер диплом, медаль және арнайы сыйлықпен марапатталды.
Қазіргі таңда Қорқыт ата атындағы Қызылорда университетінде 50-ден аса студент қазақ күресімен айналысады. 15 спортшы республикалық додаларда облыстың намысын қорғап, жүлделі орындарды иеленіп жүр.
7 спортшы Қазақстан Республикасының спорт шебері, Қазақстан Республикасының спорт шеберлігіне үміткерлер саны 30-дан асады.
Университетте студенттердің бос уақытын тиімді пайдалану мақсатында спорттың 11 түрінен 21 спорт секциясы жұмыс жасайды. Оған 1-2 курстың 3 мыңнан аса білім алушысы қатысады.
<img src="https://kyzylorda-news.kz/wp-content/uploads/2021/12/3-scaled.jpg" alt="" />

Ерболат Мұстафаевты еске алуға арналған қазақ күресінен қалалық ашық біріншілік өтті

<a href="https://kyzylorda-news.kz/">Kyzylorda-news.kz.</a> Сыр елінің қос балуаны қазақ күресінен республикалық «Үздіктердің үздігі» додасында топ жарып, алтын медальға ие болды. Байрақты бәсекеде бағы жанған Мақсат Исағабылов пен Бекжан Төлепов Өңірлік коммуникациялар қызметінің ақпарат алаңында журналистерге жарыс туралы айтып, алдағы жоспарларымен бөлісті.
<blockquote>
 Ел Тәуелсіздігінің 30 жылдығына биыл тұңғыш рет қазақ күресінен үлкен дода ұйымдастырылды. Облыстың намысын 5 балуан қорғады. 100 келі салмақта Нұрым Сәлімгереев, 60 келіде Нұршат Әбілтаев және 55 келіде Серікболсын Шарипов пен Бекжан Төлепов, аса ауыр салмақта Мақсат Исағабылов бақ сынады. Спортшылардың барлығы жақсы өнер көрсетті. Екі балуанымыз бас бәйгені жеңіп, облыс обыройын асқақтатты. Жерлестеріміздің жеңісімен шын жүректен құттықтаймыз, – деді облыстық дене шынықтыру және спорт басқармасы басшысының міндетін атқарушы Жағыпар Тәжмаханов.
</blockquote>
Биыл Сыр спортшылары ел біріншілігінде барлығы – 1024 медаль жеңіп алса, Азия чемпионаттарында – 40, әлем чемпионаттарында – 64 медаль қанжығалады.
<blockquote>
 Айтулы додада Сыр өңірінің намысын қорғап, жүлдегер атандық. Бұл жарысқа ұзақ уақыт дайындалдық. Бастысы үмітті ақтадық. Алдағы уақытта да үлкен додаларда олжалы болуға жаттығуды күшейтеміз. Бізге қолдау білдірген жерлестерге ризамыз, – деді Мақсат Исағабылов.
 Кеше ғана өткен «Үздіктердің үздігі» республикалық бәсекеде еліміздің түкпір-түкпірінен кіл мықтылар жиналды. Әрине, жарыс оңай болған жоқ. Үлкен қолдау білдірген облыстық дене шынықтыру және спорт басқармасына және жерлестерге алғысымыз шексіз. Біз мұнымен тоқтап қалмаймыз. Жеңісті күндер әлі алда, – деді Бекжан Төлепов.
</blockquote>

Қызылордалық спортшылар «Бас балуан» атанды

<a href="https://kyzylorda-news.kz/">Kyzylorda-news.kz.</a> Қазақстан Республикасы Тәуелсіздігінің 30 жылдығына орай Қызылорда қаласының «NOMAD MMA» Федерациясының ашық чемпионаты өтті.
Жарыстың ашылу рәсімінде қала әкімінің орынбасары Бектас Нуридинов қатысушыларға сәттілік тіледі.
<blockquote>
 «Қазірдің өзінде әлемдік ареналарда еліміздің даңқын асқақтатып, көкбайрағымызды желбіретіп, әнұранымызды әуелетіп жүрген мықты спортшыларымыз жетерлік. Солардың ізбасарлары өздеріңіз! Сондықтан жарыстың жас қатысушыларына рух пен жігер, күш-қуат тілеймін», – деді қала әкімінің орынбасары Бектас Балғабайұлы.
</blockquote>
Ашық чемпионатқа облысымыздан 110 спортшыдан құралған 6 команда қатысты. Жарыс жеңімпаздарына арнайы дипломдар, қалалық дене шынықтыру және спорт бөлімінің медальдары мен «Nomad MMA» Федерациясының кубоктары табысталды.
Айта кету керек, соңғы жылдары ерекше қарқынмен дамыған қойын-қолтық ұрыс спортымен айналысушылардың қатары артып келеді. Бұл өз кезегінде осы спорт түрінің келешегі кемел екендігін айғақтайды.
Аталған шара «Қызылорда облысының Ауған соғысының ардагерлері мен мүгедектері кеңесі» қоғамдық бірлестігі мен қалалық дене шынықтыру және спорт бөлімінің ұйымдастыруымен өткізілді.
<img src="https://kyzylorda-news.kz/wp-content/uploads/2021/12/264596192_2977907139142691_2865404893634978335_n.jpg" alt="" />
<img src="https://kyzylorda-news.kz/wp-content/uploads/2021/12/264661497_2977907115809360_4063395214599057076_n.jpg" alt="" />

Қызылордада ережесіз жекпе-жектен ашық чемпионат өтті

Kyzylorda-news.kz. Өңір басшысы Гүлшара Әбдіқалықова Шиеліге жұмыс сапары аясында Ақмая шаруа қожалығының ғимаратына барды. Әкім назарына стенд арқылы күрделі жөндеуден өткен монша мен шаруа қожалығының демеушілігімен салынған тұрғын үй таныстырылды. Шаруа қожалығының басшысы Дәулет Жұмбеков қожалықта жұмыс істейтін көпбалалы 2 отбасыға баспана салу үшін осы жобаны бастаған. Сондай-ақ, ауыл жастары үшін бірлестік құрып, арнайы кабинет ашқан.
Әрі қарай облыс әкімі Керделі ауылдық округінде мемлекеттік-жекешелік әріптестік аясында салынған спорттық сауықтыру кешенін ашты.
Аймақ басшысы игі бастаманы қолдап, нысанның бой көтеруіне ықпал жасаған кәсіпкер, Шиелі ауданының құрметті азаматы Бағлан Әшірбековке ауыл тұрғындары мен өз атынан ризашылығын білдірді.
<blockquote>
 Соңғы 5 жылда мемлекеттік-жекеменшік әріптестік аясында Ақмая, Алғабас, Бестам, Тұран ауылдық округтерінде спорт кешені пайдалануға беріліп, спортшыларымыздың жеңістері еселенді.
 Бүгін, міне, өздеріңіздің қатысуларыңызбен спорт кешенін ел игілігіне пайдалануға бергелі тұрмыз. Бұл күн балғын балалардың, ауыл жастарының ең қуанышты да бақытты күндерінің бірі деп есептеймін. Осы спорт кешенінен шыңдалған жастарымыз облыстық, республикалық додаларда жеңіске жетіп, олимпиада шыңдарын бағындырып, көк туымызды желбірете берсін, – деді Гүлшара Әбдіқалықова.
</blockquote>
Спорт кешенінде күрес, таэквандо, баскетбол және ауыр атлетикадан үйірмелер жұмыс жасап, 11 азамат тұрақты жұмыспен қамтылды. 
Мұнан соң, өңір басшысы Шиелі кентіндегі аудандық жастар үйі мен И.Әбдікәрімов көшесі бойына салынып жатқан аллеяны көрді. 
«Жастар ресурстық» орталығының директоры Ержан Әбдешов шиелілік жастардың бастамасымен іске асып жатқан жобаларға тоқталды. Орталықта кітапхана, конференц зал, коворкинг, өнерлі жастарына арналған арнайы орын бар. Сонымен қатар, патриоттық тәрбие беру және жастар арасында ұлттық құндылықтарды насихаттау бағытында бірқатар жұмыстар жүргізілуде.
Жұмыс сапарын қорытындылаған облыс әкімі елді-мекендердегі инфрақұрылымды дамыту жұмыстарының одан әрі жалғасатынын және жобаларды уақытында тапсыру керектігін қаперге салды.
<img src="https://kyzylorda-news.kz/wp-content/uploads/2021/12/fb_img_1638532687323.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638532692588.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638532725746.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638532699822.jpg" alt="" />

Қазақстан және Қызылорда облысының жаңалықтары: Спорт