<a href="https://kyzylorda-news.kz/">Kyzylorda-news.kz.</a> Қызылорда облысында велоспорттан Әлем чемпионы, КСРО-ға еңбек сіңірген спорт шебері М.Сатыбалдиевтің жүлдесіне арналған жасөспірімдер арасында тас жолдағы велосипед спортынан, республикалық жарыстың ашылу салтанаты өтті.&nbsp;Салтанатты шараны облыс әкімінің орынбасары Нұрымбет Сақтағанов ашып, барша қатысушыларға сәттілік тіледі. Спорт ардагері Ким Юрий Федерович өз құттықтау сөзінде аталмыш жарыстың жыл сайын дәстүрлі түрде Сыр елінде өтуінің маңыздылығын атап өтсе, велоспорттан Әлем чемпионы, КСРО-ға еңбек сіңірген спорт шебері Марат Сатыбалдиев өз кезегінде ұйымдастырушылар мен барша қатысушыларға алғысын білдірді.Сондай-ақ, ҚР төрешілер алқасы төрағасының велосипед спорты жөніндегі орынбасары Сергей Бредихин барша қонақтар мен қатысушыларға өтетін жарыс бағдарламасын баяндап берді.&nbsp;Жарысқа Астана, Шымкент қалалары мен Алматы Жамбыл Жетісу Батыс Қазақстан, Қарағанды, Солтүстік Қазақстан облыстарынан және тұңғыш рет көршілес Өзбекстан Республикасынан 12 команда бақ сынасады. Тартысты дода 31 наурыз күні аяқталып, мықтылар анықталатын болады.Ендеше Сыр спортшыларына жеңіс, ал қалған велошабандоздарға сәттілік тілейміз!<figure class="image"><img src="https://knadmin.beoblood.kz/uploads/338400381_237643008740773_7397761605728508543_n_2454696372.jpg" alt="338400381_237643008740773_7397761605728508543_n.jpg"></figure>

Қызылордада велоспорттан республикалық жарыс өтеді

<a href="https://kyzylorda-news.kz/">Kyzylorda-news.kz.</a> Қармақшы өңірі елімізге тек жыраулық, ақындық өнерімен танылған өлке емес, бұл өңір қазақ еліне күш атасы – балуандарымен де, бокспен де, &nbsp;штангашылармен де танылған. Оған дәлел, полицейлер арасында бокстан Бауыржан, қазақ күресінен &nbsp;Бауыржан Райсов, Айбек Серікбаев пен Ғалымжан Әбдірахманов, штангадан жасөспірімдер арасындағы байрақты жарыста Ерасыл Сәулебеков әлемді бағындырса, Еламан Ерғалиев пен Мақсат Исағабыловтай «Қазақстан барысы» атағын иеленген балуандарымыз ел алдында қармақшылықтардың мерейін тасытқаны біз үшін үлкен абырой.Міне, осындай даңқты спортшыларымыздың үлкен аренада өнер көрсетуіне жол ашып берген жаттықтырушылардың еңбектерін айтып &nbsp;өту біз үшін &nbsp;міндет.Жас ұрпақ Қармақшы спортының дамуына өзіндік үлес қосып, ел құрметіне бөленген аға ұрпақ өкілдерін біле бермеуі мүмкін. Кезінде ауданда бүгінде көзі жоқ болса да спорт үшін бар саналы өмірін арнаған марқұм ағаларымыз – Сұлтанбек Омаров, Жарболсын Құндақбаев, Қорғанбек Манасов, Сағат Бұқпанов, Зейнулла Жәкиевті, сонымен қатар отбасылық жағдайымен өзге өңірге қоныс аударса да сол аймақта спортты дамытуға &nbsp;сүбелі үлесін қосып жүрген Қуаныш, Тұрсынбек, Найзабек, Бердібек және ағайынды жеңілатлет Мощеевтердің есімін жерлестері құрметпен атайды.Ал Қармақшы спортының бүгінгі аға буын өкілдері &nbsp;– Төленді Мырзабаев, Әлжан Төремаханов, Еркін Атабаев, Шәріпбек Асановтар &nbsp;құрметті демалыста болса да өскелең ұрпақ алдында өмірлік тәжірибелерін беруден аянған емес. Осындай ұлағатты ұстаздардан тәлім-тәрбие алған шәкірттер де түрлі деңгейдегі спорттық жарыстардан жасындай жарқырап, аудан спортсүйер қауымның мерейін тасытуда.Бүгінгі мақаламның кейіпкері менің спорттағы алғашқы ұстазым Төленді Мырзабаев және оның спортшы отбасы туралы болмақ. Төленді ағайды мен өткен ғасырдың жетпісінші жылдарының ортасынан, №26 орта мектепте білім алып жүрген кезімнен танимын. Өйткені ол менің еркін күреспен шұғылдануыма себепкер болған бірден-бір ұстазым. Ағайдың жаттықтыруымен аудандық, облыстық жарыстарда талай рет жеңімпаз, жүлдегер атандым, бірақ &nbsp;жоғары сыныпқа көшкен соң ол кісі орнын Зейнулла Жәкиев ұстазыма тапсырып, өзі басқа қызметке ауысты.Бірақ алғашқы ұстазыммен одан кейінгі жылдарда да байланысымды үзген жоқпын. Спорт десе ішкен асын жерге қоятын ағайым көптеген жас балуанның түрлі деңгейдегі жарыстарда үздіктер қатарынан орын алуына еңбек сіңірді. Аудан экономикасын дамытудағы елеулі еңбегі үшін де талай құрметті марапаттарға ие болды. Аудандық мәслихаттың да депутаттығына сайланып, жерлестерінің мүддесі үшін билік алдында шешімін таппай жүрген көкейкесті мәселелерді көтерді. Оның ішінде спорт саласын дамытуға арналған күрделі мәселелер де болды.«Жақсыға жақын көп» дейді дана халық. Қай кезде де, кімге де болмасын көмегін аямайтын, өзінде барын жоқ-жұқаға таратып беруге асығатын Төленді Мырзабаевтай ағайымызды қармақшылықтар да аса ризашылықпен құрметтейді. Соның дәлелі болар ел алғысына бөленген қадірлі жан «Қармақшы ауданының Құрметті» азаматы деген де атаққа ие болып, ардақтылар қатарынан көрінді.&nbsp; Ауданымызда бір мамандықты атадан балаға мирас етіп, көпке үлгі көрсетіп жүрген отбасылар аз емес, солардың бірі – &nbsp;Мырзабаевтар отбасы.Төленді ағайымыздың үлкен баласы Аманкелді де Астана қаласындағы &nbsp;республикалық Оқушылар сарайында спорт секторының меңгерушісі болып қызмет етсе, оның баласы Нұрділда Астанадағы «Fly» волейбол клубының аға бапкері. Төленді Мырзабайұлының екінші баласы Ерболы да елордадағы орта мектептердің бірінде денешынықтыру пәнінің мұғалімі болса, бел баласы Нұрбол да жасынан спортты, оның ішінде қазақ күресі, самбо сияқты спорт түрлерімен шұғылданып, көптеген жетістіктерге қол жеткізген спортшы. Спорттық мансабын жаттықтырушылықтан бастаған Ербол Төлендіұлы түрлі қызметтік сатылардан өтіп, қазіргі таңда &nbsp;аудандық денешынықтыру және спорт &nbsp;бөлімінің басшысы қызметін абыроймен атқаруда. Көзі жоқ болса да туған еліне көрсеткен игі ісі ел есінде мәңгі сақталып қалған, Қазақстанға еңбек сіңірген жаттықтырушы, көптеген балуанның Қазақстанның &nbsp;спорт шебері атағына ие болуына себепші болған спорт майталманы марқұм Әділбек Серікбаевтан тәлім алған &nbsp;Нұрболдың жаттықтырған бірнеше шәкірті түрлі жарыста топ жарып, ұстаз есімін ардақтауда.Осындай ұлық мамандықты ардақтаған отбасының енді бір мүшесі Бектұрған Мырзабаев бүгінде Астанада тұрады. Ол да самбодан өз салмақ дәрежесінде еліміздің бірнеше дүркін жеңімпазы. Ал қазіргі таңда елордада тұрады. Ол дзюдодан ұлттық дәрежедегі төреші және күрестің осы түрінен елімізде өтетін жарыстарға төрешілік етеді. &nbsp;Ендігі кезекте осындай спорт саңлақтары өсіп-өнген отбасының енді бір мүшесі Нұрболдың баласы Нұрасыл Төленді де әке-атасының жолын өміріне серік етуді мақсат етті. Ол ауданда «Білектілер бапкері» атанған қол күресінен облыс құрама командасының аға жаттықтырушысы Талғат Қанаевта жаттығады. Жас қол шебері жыл басында Өзбекстанның Самарқанд қаласында жасөспірімдер арасында өткен Азия чемпионатында жүлдегер атанып, ел мерейін тасытса, &nbsp;Қазақстан Республикасы чемпионаты мен &nbsp;жасөспірім спортшылар арасындағы республикалық &nbsp;ауыл спартакиадасында да өзінің мықтылығын танытып, абырой биігінен көрінді.Иә, шындығында да байқап қараған адамға Төленді Мырзабаев ағайымыз салған құтты жол әулеттің осындай өнері көпке үлгі болатын игі дәстүр деуге негіз бар. Бұл мақаланы дайындағандағы мақсат та әулеттің осындай өнегелі өмірін ел-жұртқа дәріптеп, өзгелерді спортқа қызықтыру. Саламатты өмір салтын қалыптастыру. Сөз соңында айтарымыз «Туған жердің өркендеуі жолындағы өнегеге толы өмірлеріңіз өрге өрлей болсын, Мырзабаевтар әулеті» дейміз.

Қармақшыдағы споршылар әулеті

<a href="https://kyzylorda-news.kz/">Kyzylorda-news.kz.</a> Қазақстандық Дәурен Ермеков (17-5) Ресейдің Самара қаласында аралас жекпе-жектен өткен Ural Fighting Championship 2 турнирінде өнер көрсетті, деп хабарлайды <a href="https://www.sports.kz/news/kazahstanskiy-chempion-ligi-habiba-zadushil-rossiyskogo-boytsa-vtrilogii">Sports.kz</a>.Д.Ермеков ресейлік Гамзат Хирамагомедовпен (10-2) жекпе-жек өткізіп, оны екінші раундта буындыру әдісімен жеңді.Осылайша, Ермеков кәсіби спорттағы 18-інші жеңісіне қол жеткізді. Ал ГамзатХирамагомедов октагонда осымен үшінші рет жығылып отыр.Айта кетейік, Ермеков пен Хирамагомедов бұған дейін екі рет кездескен: олар алғаш 2015 жылы әуесқой сатыда жұдырықтасты. Ол кезде ресейлік файтер төрешілердің бірауызды шешімімен жеңіске жетті. Екінші кездесу былтырғы шілде айында өтіп, қазақстандық спортшы қарсыласын екінші раундта нокаутқа жіберді.Д.Ермеков Eagle FC лигасының орта салмақтағы чемпионы. Титул құрылтайшысы – UFC-тің экс-чемпионы Хабиб Нұрмағамбетов.

Аралас жекпе-жек шебері Дәурен Ермеков қарсыласын нокаутпен жеңді

<a href="https://kyzylorda-news.kz/">Kyzylorda-news.kz.</a> &nbsp;Үндістанның Нью-Дели қаласында бокстан әйелдер арасында өтіп жатқан әлем чемпионатында қазақстандық Карина Ибрагимова күміс жүлдегері атанды, деп хабарлайды ҚазАқпарат.Қазақстандық боксшы 57 келіге дейінгі салмақта финалда италиялық Ирма Тестамен шеберлік байқасты.Азия чемпионы, екі мәрте әлем біріншілігінің қола жүлдегері К. Ибрагимованың қарсыласы да мықты еді. Ирма Теста – 2020 жылғы Токио олимпиадасының қола, өткен жылғы әлем біріншілігінің күміс жүлдегері, 2019 жылғы Еуропа чемпионы. Екеуінің де жасы 26-да.Бірінші раундта бес төреші түгелдей И. Теста басым деп тапты. Ақыры қазылар жеңісті италиялық боксшыға берді – 5:0.Осылайша, Карина Ибрагимова өз спорттық жолында алғаш рет әлем біріншілігінің күміс медалін жеңіп алды.Тағы бір қазақстандық Ләззат Күнгейбаева аса ауыр салмақта ертең финалдық кездесуін марокколық Марди Хадиджамен өткізеді.

Карина Ибрагимова бокстан әлем чемпионатының күміс жүлдегері атанды

<a href="https://kyzylorda-news.kz/">Kyzylorda-news.kz.</a> &nbsp;Апта басында Талдықорған қаласында ауыр атлетикадан жеке жаттығулар бойынша 17 жасқа дейінгі жасөспірімдер арасындағы ел чемпионатының жалауы желбіреді. Елдің жас зілтеміршілері бақ сынаған ҚР-ның чемпионатында Сыр елінің қоржынына бір алтын жүлде түсті. 71 келіде өнер көрсеткен жаңақорғандық Аянат Жұмағали алтыннан алқа тағынып, тұғыр биігінен көрінді. Чемпион қызын жерлестері арнайылап күтіп алып, құрмет көрсетті.Жаңақорған ауданының мәдениет және спорт бөлімінің басшысы Әбілқайыр Сыздықов, сектор меңгерушісі Махмут Рахымжанов, аудандық мәслихат депутаты Серік Мырзабаев, №7 спорт мектебінің директоры Сламхан Боранбаев, БАҚ саласының ардагері Ерубай Қалдыбек және ата анасы мен жерлестері қошемет білдіріп, жеңісімен құттықтады. №7 спорт мектебінің түлегіне Сламхан ағамыз бен аудандық мәслихат депутаты Серік Мырзабаев сый-құрмет көрсетті.<blockquote>«Аянаттың жеңісі ауданның ғана емес, Сыр өңірінің жеңісі. Алла амандығын берсе, қызымыз елдің байрағын әлем елдерінің алдында биік тұғырға қондырып, әнұранымызды шырқататын болады. Біз оған сенімдіміз, өйткені, спортшымыз әлі жас, болашағы әлі алда. Бапкерлері мен ата-анасына алғыс айтамыз, елдің мақтанышына айнала берсін», – деп мәдениет және спорт бөлімінің басшысы ізгі тілегін білдірді.&nbsp;</blockquote>Аянат чемпионатта жұлқа көтеруде 85 келіні бағындырса, серпе көтеруде 106 келіні ырқына көндіріп, қоссайыстың нәтижесімен 191 кг-ды еңсеріп, жеңімпаз атанды. Айта кететіні, ол жақында Албанияда өткен Әлем чемпионатына қатысып, үздік бестікке енген болатын. Бұл керемет нәтиже, енді ересектер көшіне ілесіп, бағын сынауға ниетті.<blockquote>«Қазақстан біріншілігі Аянаттың спорттық мансабындағы екінші биік белес. Бұл жолы оның үздік екенін барлығы мойындады. Енді жаз айында спартакиадаға қатысып, артында Индияда өтетін Азия чемпионатына барамыз. Алла сәтін салса, әлемдік ареналарда атой салып, олимп шыңын бағындыруға барымызды салатын боламыз», – деді бапкері Берік Өтешов.</blockquote>Жалпы, Жаңақорғанда бұл спорт түрі соңғы бес жыл ішінде еңсе көтеріп, жас спортшыларды шыңдап үлгерді. Әсіресе, бұрымдылардың қатары артып, қызығушылығы оянып келеді. Солардың көшінде жүрген Аянаттың бүгінгі жетістігі аудан үшін үлкен абырой болды. Оның ізінен ерген Беріктің шәкірттері облыста озық жүр. Аймақ чемпионаттарында олжалы оралып келеді. Чемпион қызға құрмет көрсете келген өзі оқыған №169 Н.Ильялетдинов атындағы мектеп оқушылары мен ұстаздары да қуанышын бөлісіп жатты. Ал, әкесі қызының ертеңіне елдің үміт артып отырғанын біледі. Сондықтан қызына бағыт-бағдар беріп, осы сенім үдесінен шығуға батасын беріп келеді.<blockquote>«Алғашында Аянатты басқа спорт түріне беруге тырыстық. Бірақ өзінің қалауы ауыр атлетика болды. Осылай ұстазы Беріктен спорттың әліппесін үйренуді бастады. Аллға шүкір, қызымыз ауданның абыройын асырып, мерейімізді үстем етіп келеді. Алматы қаласындағы Қажымұқан Мұңайтпасов атындағы республикалық спорт мектеп интернатынан шақырту алып, сонда білім алуда. Бұйырса, 2028 жылғы Олимпиада ойындарында көріп қалам ба деген арман бар. Ең бастысы, спорттық мансабын биіктете беруі тиіс. Құрмет көрсетіп жатқан жандарға мың алғыс айтамын», – деді әкесі Жомарт.</blockquote>Иә, 5 жылдан соң Аянат Олимп шыңының алтынын елге алып келеді деп сенеміз. Ол уақыттың көшінде, бәрінен бұрын ауданның ауыр атлетика спортының өсіп келе жатқаны көңіл қуантады.

Жаңақорғандық бойжеткен жеңіс тұғырында

<a href="https://kyzylorda-news.kz/">Kyzylorda-news.kz.</a> &nbsp;Үндістанның Нью-Дели қаласында бокстан әйелдер арасында өтіп жатқан әлем чемпионатында қазақстандық Карина Ибрагимова бүгін финалдық жекпе-жегін өткізеді, деп хабарлайды <a href="https://www.inform.kz/kz/bokstan-ach-bugin-karina-ibragimova-finaldyk-zhekpe-zhegin-otkizedi_a4049478">ҚазАқпарат.</a>Қазақстандық боксшы 57 келіге дейінгі салмақта италиялық Ирма Тестамен қолғап түйістіреді.Қос спортшы Астана уақытымен сағат 18.30-да басталатын кешкі сессияда үшінші жекпе-жекте рингке шығады.Әлем чемпионаты «Qazsport» телеарнасынан тікелей эфирде көрсетіледі.Осыған дейін Азия чемпионы атанып, екі мәрте әлем біріншілігінің қола жүлдегері болған К.Ибрагимова енді кемінде күміс медаль алады.Ирма Теста да осал қарсылас емес. Ол – 2020 жылғы Токио олимпиадасының қола, өткен жылғы әлем біріншілігінің күміс жүлдегері, 2019 жылғы Еуропа чемпионы.Тағы бір қазақстандық Ләззат Күнгейбаева аса ауыр салмақта ертең алтын үшін таласады. Ал Алуа Балқыбекова, Надежда Рябец, Валентина Хальзова және Фариза Шолтай қола жүлдегер атанды.

Карина Ибрагимова финалдық жекпе-жегін өткізеді

<a href="https://kyzylorda-news.kz/">Kyzylorda-news.kz.</a> Қазақстанның жасөспірімдер құрамасы Малайзия қаласы Кучингте өткен World Junior tennis Competition 14&amp;under Азия/Океания аймағының әлемдік біріншілігі біліктілігінің жартылай финалына өтті деп хабарлайды Stan.kz ақпарат агенттігі. Ширек финал кезеңінде жас қазақстандықтар Үндістан өкілдерін жеңді. Алдымен Ева Корышева қарсыласын 6:1, 6:1 есебімен жеңді, содан кейін Еркежан Жанатаева қарсыласын 6:4,6:7, 6:2 есебімен басып озды. Бұл екі жеңіс қазақстандық топтың жартылай финалға шығуына мүмкіндік берді. 24 наурызда қазақстандықтар Жапония құрамасымен бақ сынасады.Алдын ала топтық раундта қазақстандық жасөспірімдер Қытай мен Жаңа Зеландияның теннисшілерін 2:0 есебімен жеңді.Биыл Чехияның Простеев қаласында жазда өтетін әлем чемпионатының финалдық бөлігіне тек үздік үш команда барады. Іріктеуде 1-2 орын алғандар барады, сонымен қатар финалға шықпаған командалар бір-бірімен тағы бір жолдамаға бақ сынасады.

Қазақстандық жасөспірім теннисшілер Малайзияда өтіп жатқан әлем чемпионатының жартылай финалына өтті

<a href="https://kyzylorda-news.kz/">Kyzylorda-news.kz.</a> Бірнеше күннен бері жалағаштықтар Әз-Наурызды сән-салтанатымен атап өтуде. Амал мерекесінен бері орталық алаңда мерекелік шаралар ұйымдастырылып, аудан тұрғындары наурыз көжеден дәм татса, жергілікті өнерпаздар ұмыт қалып бара жатқан салт-дәстүрлерімізді қойылымдарына арқау етіп, қайта жаңғыртты. Енді міне, аудандық мәдениет және спорт бөліміне қарасты «Наркескен» спорт клубының ұжымы Ұлыстың Ұлы күнін тойлады. Дүбірлі тойға біз де барып, дәстүрлі құндылықтарымызбен сусындап қайттық.Ғимарат алды ұлттық нақышта безендіріліп, киіз үй тігіліп, тіпті балаларға арналған батут құрылды. Ақ түйенің қарны жарылып, Жер-Ана бусанып, тіршілікке жан бітірген Ұлыстың Ұлы күнін тойлауға жиылған жұрт қазақы құндылықтарымызды тағы бір ұлықтап, ұлттық спорт түрлерінен өткен сайысқа да қанықты. Мерекелік шарада аудандық мәдениет және спорт бөлімінің басшысы Ш.Қалыбаев аудандағы аталған саланың дамуына үлес қосып отырған ұжымға, спорт саңлақтарына алғыс білдіріп, Ұлыстың Ұлы күнімен құттықтады.&nbsp;<blockquote>«Бәріңізді Жер-Ананың түлеп, табиғаттың жаңаруымен тұспа-тұс келетін Наурыз мерекесімен шын жүректен құттықтаймын. Тәуелсіз мемлекетіміздің қалыптасуымен бірге жаңғырған наурыз мейрамы көпұлтты Қазақстан халқы үшін сүйікті мерекеге айналып, бірлік пен ынтымақтың, саяси тұрақтылықтың нығаюының негізі болды. Бұл күн мен түннің теңелген күні, молшылықтың мерекесі елімізге береке, байлығын ала келсін. Қазақтың салт-дәстүрі мен әдет-ғұрпы, ұлттық ерекшелігі айқындалатын бұл мейрамды жыл сайын асыға күтеміз. Бір-бірімізге ақ тілек тілеп, ұлыс оң болсын, ақ мол болсын, қайда барсаң жол болсын деп, алдағы келер күндерден ырыс пен молшылық, береке-бірлік, татулық пен шынайы мейірімділіктің ыстық ықыласын ақтаратын да осы – Наурыз мейрамы»&nbsp;, – деген бөлім басшысы Шарабан Мақсұтұлы қашаннан халқымыз күн мен түннің теңелгенін жақсылыққа жорығанын атап өтті.</blockquote>&nbsp;Мұнан бөлек «Наркескен» спорт клубының директоры Ғалымжан Ержанов және бөлім басшысының орынбасары Еркебұлан Жамалатов та Наурыз мерекесімен құттықтап, ұйымдастырылған шараның маңызы зор екенін атап өтті. Жалпы, Наурыз мейрамы ежелден жаңару мен жасампаздықтың, ырыс пен берекенің арқауы болған. Көктің тынысын тыңдап, жердің тамырын басқан, тұрмыс-тіршілігін табиғатпен байланыстырған халқымыз наурызды жақсылықтың бастауы деп білген. Сол сияқты наркескендіктер ұйымдастырған шара өзгеден ерек, нағыз қазақы салт-дәстүрді, құндылықтар мен берекелі тұрмысымызды көз алдымызға әкелді. Тігілген киіз үй, жанында меймандарға наурыз көже ұсынған қыз-келіншектер, азан-қазан көрініс, мәз-мейрам болған балалар, бәрі-бәрі жан дүниемізді жадыратып қоя берді. Меймандардың құттықтау сөзінен соң дастарханнан дәм татып, ұлттық спорт түрлерінен ұйымдастырылған сайысты тамашаладық. Мұнда жас спортшылар, балалар гір тасын көтеру, арқан тарту, ләңгі тебу мен қол күресуден сынға түсіп, кіл мықтының ішінен шын мықтыны анықтады. Ойынның барлығы да тартысты өтіп, соңында оза шапқан дарабоздарға түрлі дәрежедегі дипломдар мен қаржылай сыйлықтар табысталды.&nbsp;Жиылған жұртшылық тіршілік жаңарып, жақсылыққа бастайтын Ұлыстың Ұлы күнінің көжесінен де ауыз тиіп, ұлттық ойындарға да куә болды. Қазан асылып, ұлттық дәм наурыз көжеден де дәм татты. Мұнан кейін мереке Аққұм ауылында жалғасты.

Жалағашта «Наркескен» спорт клубы Наурыз мерекесін тойлады

<a href="https://kyzylorda-news.kz/">Kyzylorda-news.kz.</a> Қазақстандық боксшылар Будвада (Черногория) өткен жастар арасындағы бокстан 2023 жылғы Әлем кубогында өнер көрсетті, деп хабарлайды ҚазАқпарат Sports.kz порталына сілтеме жасап.Бұл турнирде Қазақстанның ерлер құрамасы 9 медаль жеңіп алды – бір алтын, екі күміс және алты қола.&nbsp;Қазақстан атынан жалғыз Дәулет Төлемісов (80 кг) чемпион атанды. Әлихан Нұрзақ (75 кг) пен Ерсұлтан Сапар (+92 кг) күміс медаль еншілесе, Аманат Нұрлыбек (48 кг), Ислам Мәшкентаев (51 кг), Нұрбек Мұрсал (67 кг), Ислам Советов (71 кг), Дихан Шайқыбеков (75 кг) пен Нұржан Думан (92 кг) турнирді «қоламен» қорытындылады.&nbsp;Жалпы жастар арасындағы Әлем кубогы-2023 жарысына әуелде Қазақстан командасынан 12 спортшы қатысқан болатын, олардың үшеуі медальға жетпей сүрінді. Олар: Жансері Көшербаев (54 кг), Өнер Сейілхан (67 кг) және Санжар-Әли Бегәлиев (71 кг).Фото: freepik.com

Әлем кубогы-2023: Қазақстандық боксшылар 9 медаль жеңіп алды

<a href="https://kyzylorda-news.kz/">Kyzylorda-news.kz.</a> Таңғы жаттығу мен жүгіруді күн сайын қалт жібермейтін бұл спортшыны сырдариялықтар жақсы біледі. Саламатты өмір салтын ұстану бойынша өзгеге үлгі көрсете білетін Бегалы Серікбаевты орталық стадионнан жиі кезіктіреміз. Денсаулықты барынша күте білетін оның басты міндеті – жастайынан жанына серік еткен спортты бір сәтке де тастамау екені айдан анық. Кезекті рет жаттығу жасау барысында жолыққанымызда ол бізге дене шынықтыру мен спортқа байланысты біршама маңызды ақпаратты кеңінен айтып берген болатын.Күнделікті орталық стадионға жаттығу үшін келетін көпшілікке ақыл-кеңесін аямайтын Бегалы Серікбаевтың биыл 60 жасқа толатындығына ешкім сене қоймас. Дене бітімін қаз-қалпында сақтауға барын салатын кейіпкерім – Тереңөзектің тумасы. Жылдар бойы күрес түрлерімен айналысқан спортшы аудан мерейін тасыта білген. Алғашқы жаттықтырушысы Сұлтан Сексенбаев 15 жастағы бозбаланың томағасын сыпырады. Айта кетейік, Бегалы аға №35 М.Калинин атындағы орта мектептен білім алып, кәсіптік колледждің де шеберханасында шыңдалады. Кейіннен, Отан алдындағы борышын өтеген Бегалы аға үлкен міндетті абыроймен атқарып, туған жерге оралады.<blockquote>«Біздің балалық кезең небір қызыққа толы еді. Оң-солымызды тани бастаған кезімізде спортпен айналысуға бел будым. Еркін күреспен тұрақты түрде шұғылданғаныммен, сан түрлі күрестің қыр-сырына қанықтым. Тұрақты түрде жаттығуға келетін палуандар арасында бәсекелестік жоғары болатын. Тек аудандық жарыстардан топ жарған спортшы ғана облысқа жолдама алатын. Өз кезегінде Жұмабек Дәрменов, Ақылбек Нұрахатов, Жорабек Шамкенов сынды замандастарыммен бірге аудан намысын өз деңгейінде қорғай білдім. Күресті жаныма серік ете жүріп, кросс жүгіруге дағдыландым. Расында, әлі күнге дейін жүгіруді тастаған емеспін. Таңғы жаттығу жасау – мен үшін үйреншікті әдетке айналған», – дейді кәсіби спортшы.</blockquote>Негізінен, Бегалы Серікбаев 40 жылға жуық уақытын ұстаздық қызметке арнап келеді. Әскерден оралған жас спортшы Сырдария ауданы Асқар Тоқмағамбетов ауылындағы білім ошағына жұмысқа орналасады. Әсілінде, теориялық білімді тереңнен игеру үшін ұлағатты ұстаз Қарағанды қаласындағы педагогикалық институтқа оқуға түседі. Сарыарқа төрінде дене шынықтыру пәні бойынша үздік оқытушылардан тәлім алған ардақты жан сол кездегі №36 А.Жданов атындағы орта мектепте қызмет ете бастайды. Кейіннен, өзі білім алған қарашаңырақ – №35 М.Калинин атындағы орта мектепке ауысады. Мұнда 5 жыл халық баласына білім беріп, жан-жақты спортқа баулиды. Бір жылдары жеке кәсіпкерлікпен айналысқан Бегалы аға еңбекпен тапқан нанның қадірін жақсы біледі. Осы күні №210 О.Әбілпаттаев атындағы орта мектепте оқушыларға сабақ беретін Бегалы Серікбаев өз ісінің шебері десек, қателеспейміз.&nbsp;<blockquote>«Иә, ауданға қарасты 4 білім ошағында еңбек ете білгеніме қуаныштымын. Оқушы алдында үлгілі болу мақсатында ерік-жігерімді спортқа арнап келемін. Күнделікті жүріп, жүгіріп дағдыланбаған адам әуелі ерте тұрып қарапайым дене жаттығуларын жасау арқылы денсаулықты қалыптастыру керек. Ең алдымен, жаттығу жай жүруден басталады. Содан кейін адам 100 және 200 метрге жүгіруге ауысып дағдылануға болады. Жаттығуға қалыптасқан кезде 200 метр жүгіріп, 100 метр жүруге машықтанған дұрыс. Толықтай жаттығу мен жүгіруге ағза қалыптасқан уақытта таңғы ұйқыдан емін-еркін оянуға мүмкіндік туады. Жаз мезгілінде таңғы 4.00-де жүгіруге шығамын. 15-18 минутта үлкен көпірге барып, осынша уақытта стадионға келемін. Содан кейін 1 сағат бойы бірнеше жаттығу жасаймын», – дейді білікті маман.</blockquote>Қазіргі уақытта орталық стадионда таңғы және кешкі жаттығу жасайтын жандар қатары көбейген. Жақында халықаралық «Қазақ тілі қоғамы» ҚБ Сырдария аудандық филиалының төрағасы Шаһарбек Нұрсейітовтің демеушілігімен орта және аға буын өкілдері арасында спорттық жарыс ұйымдастырылған. Аталған жарыстың талапқа сай өтуіне Бегалы Серікбаев өзіндік үлесін қосты.&nbsp;&nbsp;Негізінен, ұлағатты ұстаз жаңартылған білім мазмұны бойынша жас мамандарға бағыт-бағдар беріп келеді. Ұстаздық қызметте зор тәжірибе жинақтаған ардақты ағаның зайыбы – Жанар Нағызханқызы да педагогика саласының білікті майталманы. Отбасындағы 4 ұл, 1 қыздың аяулы анасы математика пәні бойынша жас өрендерді қажетті білім нәрімен сусындатып келеді.<blockquote>«Шын мәнінде, осы спорт саласында жүріп, көптеген жетістіктерге қол жеткіздім. Президенттік көпсайыстан жүлделі орындарды алған сәттерім әлі есімде. Күнделікті білім саласында сан түрлі өзгерістер орын алады. Әркез оқушыға сабақ беруге мұқият дайындықпен барамын. Денсаулықты күтіп ұстаудағы ұстанатын қатаң ережелерді жастарға айтуға жалықпаймын. Анығын айтқанда, 45 минут ішінде бала ұстаздан өзіне керекті білімді ала білген жөн», – дейді ұлағатты ұстаз.&nbsp;Қай кезде де денсаулықтың қалыпты жағдайда болуына аса мән беретін Бегалы Серікбаевтан жас ұрпақтың әлі талай үйренері көп деп білеміз. Ардақты аға, ақылман ұстаздың еңбегі барынша елене берсін демекпіз.</blockquote>

Бегалы Серікбаев: Таңғы жаттығу жасау – мен үшін үйреншікті әдетке айналған 

<a href="https://kyzylorda-news.kz/">Kyzylorda-news.kz.</a> Жас та болса ауданымызда ұлттық спортты дамытуға атсалысып жүрген жастар аз емес. Олар өздерінің біліктілігімен, ұйымдастыру қабілетімен, елжандылығымен дүйім жұртқа танылып, құрмет төрінен көрінуде. Сондай дарынды жастардың бірі &nbsp;– аудан орталығындағы тәжірибелі сала маманы Ғалымжан Ержанов басқаратын №16 аудандық балалар мен жасөспірімдер спорт мектебіндегі қол күресі бөлімінің жаттықтырушысы Талғат Қанаев. &nbsp;Байқоңырда өмір есігін ашып, &nbsp;мектепте білім алып жүріп елімізге танымал жаттықтырушы Әділбек Серікбаевты үлгі ретінде таныған Талғат өсе келе Алматы қаласындағы &nbsp;жоғары оқу орнында төрт жыл білікті ұстаздардан таңдаған мамандығы бойынша жоғары білім алады. Еліміздің ең ірі мегополисы Алматыда білім алып, өзінің еттірлігімен аталмыш жоғары оқу орнында қол күресімен айналысып, уақыт өте 70 келі салмақта Қостанайда өткен Қазақстан Республикасының чемпионатында жеңімпаз атанған Талғат 2015 жылы екінші рет өз салмақ дәрежесі бойынша ел жеңімпазы, келесі жылы Көкшетауда өткен ел біріншілігінде қола жүлдегер атанады.Осылайша &nbsp;жоғары оқу орнын тәмамдаған Талғат туған елге оралып, өзін биік белестерге көтерген спорттың осы түрін аймақта жандандыруға кіріседі.Бұл жылдары ауданда, тіпті Сыр бойында спорттың осы түрі кенжелеп тұрған шағы болатын. Қол күресі, гір тасын көтеру деген тек тойларда, ұлттық мерекелерде ғана ұйымдастырылатын.&nbsp;Ал өз кезегінде қол күресін өңірімізде жандандыруды қолға алған Талғат аудан, облыстағы сала басшыларының қолдауын иеленіп, алғаш рет аймақта қол күресінен федерация құрады. Өзі сол федерацияның төрағалығына сайланады және өңірдің бас жаттықтырушысы болып тағайындалады.&nbsp;Ол күндіз-түні тыным таппай мақсат еткен жоспарының жандануына еңбек сіңірді, тіпті еселі еңбегінің арқасында айналасына мықты деген спортшылар жиналып, облыстық, республикалық жарыстарда жүлделі орындардан көріне бастайды.&nbsp; Осындай тындырымды тірліктердің нәтижесімен 2019 жылы Талғат аймақтағы спорт басшылығының қолдауымен &nbsp;облыс орталығында тұңғыш рет Қазақстан Республикасының чемпионатын ұйымдастырып, &nbsp;онда Сыр бойы құрамасы ІІ орынды иемденеді. Чемпионатта қармақшылық қол күрес шеберлері Роман Швед &nbsp;пен Бауыржан Бекжанов, жаңақорғандық Рақымжан Махмут жеңімпаз атанса, Нұрай Сәрсенова мен Руслан Әлімов өз салмақтарында жүлделі орыннан көрінеді.Жас та болса өз ісінің шебері, бүгінде есімі елімізге танылған спорт маманы Талғат Қанаев өзі жаттықтыратын 40-қа жуық жас қолкүресшіні аудандық спорт клубта спорттың осы түріне баулуда. Спортшылар арасында Роман Швед пен Бауыржан Бекжанов ҚР спорт шебері атанса, олар Өзбекстан мемлекетінің астанасы Ташкентте өткен Азия біріншілігіне ел намысын қорғады, Әділбеков Асхат ел чемпионатында жүлделі ІІ орынды жеңіп алып, Грузияда өткен Әлем біріншілігінде Қазақстан құрамасы сапында өнер көрсетті.&nbsp;Осы ретте Талғаттан ауданымызда қол күресінің дамуы жайлы сұрағанымызда ол: «Менің балалық арманым орындалды. Марқұм Әділбек ағамның қолдауымен осы спорт түрімен шұғылдана бастадым. Облыста қол күресінен федерация құрып, сол арқылы жұмысымызды жүргізіп, жетістіктерге жеттік. Чемпион атандым. Шәкірттерім де бар есімдері елге танылған. Жас буын өкілдері де жетіліп келеді. Олардан үлкен үміт күтеміз. Алдағы уақыттағы жоспарға келсек өзім де, шәкірттерім де, Әлем біріншіліктерінде жеңімпаздар тұғырында тұрып, ел байрағын желбірету» дейді білектілер бапкері Талғат.

Қармақшылық білікті бапкер

<a href="https://kyzylorda-news.kz/">Kyzylorda-news.kz.</a> Жаңақорған &nbsp;ауданында әлемдік рейтингте көш бастаған «UFC» додасындасының іргетасы қалана бастады. Келінтөбелік Нұрсұлтан Бекзілдаев есімді жас жолға қойды.Жаңақорғанда Келінтөбе деген ауыл бар, шаруашылық құрылымдары мен гандбол спортынан озып келеді. Қол добынан аядай ауылдан шыққан арулардың дені аймақ абыройын қорғап жүрсе, екі-үш қыз ұлттық құрама сапында. Міне, осындай спорты биік ауылдан енді ережесізжекпе жектен ел чемпиондары шығатын болады.– 2020 жылы ауылға арнайы келіп, шәкірт тәрбиелеуде мақсат тұттым. Негізі бұл ісіме бастамашыл болған Әбдісаттар Садықов бапкер болатын. Қазір греплинг, қоянқолтық ұрыс, самбо мен дзюдодан балалар тәрбиелеудемін. Әзірге турнирлерге оқушылар қоян-қолтық ұрыс пен самбодан қатысып келеді. Бүгінде 30 оқушым бар. Барлығы Келінтөбенің тумалары, бұйырса №8 спорт мектебіне тіркеліп, штаттық жүйеде жұмыс жасайтын болсам өзге ауылдардан да шәкірт іздейтін боламын.– ММА, Греплинг, панкратион, яғни ережесіз жекпе-жек дегенді естіген ата-аналар балаларын жіберуге қарсы болмай ма?– Бұл балалар бірден төбелеске тартылып, жекпе-жекке араласып кете алмайды. Біріншіден жасы жетпейді, оның үстіне турнирлерге тек жоғарыда айтқандай қоян-қолтық ұрыстарға бара алады. Спорттың қай түрінен болмасын өзіндік ережесі болады, сондықтан барлығын алдынала ата-аналарға түсіндіреміз. Қазір дамыған заман, әрі спорттың әлеуеті артып тұр. Шыны керек, елдің бір еңсесін көтеретін осы спорт қой, сондықтан бұл спортқа да көңіл бөліне бастады. Барлығына уақыт керек. Негізінен мен 2020 жылға дейін де ауылда жастарды жаттықтырдым. Мен дайындаған сол жастар қазір Алматы қаласында жүр.– Сіздің мектепке қабылдану үшін балалар жасына қарай бөліне ма?– Мектеп жасынан бастап қабылдай береміз, яғни 7 жасынан бастап қатысуға мүмкіндік бар. Қазір демалыстамыз, қыркүйектен бастап жаттығуды бастаймыз. Біздің клубтың аты «Олжас» деп аталады. Биылғы жетістігіміздің бірі Әлия Ысқақова есімді шәкіртім облыста қоян-қолтық ұрыстан чемпион атанды. Одан бөлек жасөспірімдер самбо мен дзюдо турнирлерінде олжалы оралып жүр.Жалпы, бұл спорт дүйім қазақ жұртына жақсы таныс. Дегенмен, біздің ауданда арнайы спорт түріне әлі ене қоймады. Ауылдағы жалынды жастар Алматы шаһарына барып дайындалып, жарыстарда төбе көрсетіп келеді. Нұрсұлтан да осыдан оншақты жыл бұрын арман қуалап Алматыға барып, «ММА» турниріне қатысуды мақсат тұтты. Жаттығу залдарын жағалап, демеушілік іздейді. Тамшы тер, еңбектің арқасында өзі қалаған «ММА» турниріне тап болады.«Алмас қырандары» деген клубқа келіп қосылдым. Ел және халықаралық турнирлерде бақ сынап, жеңісті жолым басталды. Көбіне қырғыз оғландарымен кездесіп, мықтылығымды дәлелдеп жүрдім. Ауылға келсем де жаттығудан қол үзбедім, өйткені, шақырту келсе кез келген турнирлерге, рейтингтік жарыстарға баруға әзірмін. Ауылға екі себеппен келдім, ең алдымен, отбасылық жағдайға байланысты шаңырақта болуым керек болса, екіншіден, өзім жете алмаған, өзім бағындыра алмаған биіктерді шәкірттерім жетсін деген мақсатта оқушы тәрбиелеуді мақсат тұттым», – деді чемпион.Иә, бұл спортты естігенде бұрындары көбісі үрки қарайтын еді. Бірақ, қазір қазақ қоғамының да қызығушылығы артты. Жауынгерлік өнер біздің қанымызда бабадан бері бар, әу бастан батырдың ұрпағы болған ұлттың жекпе-жектен жеңілуі, бұл спорттан тайсалуы дұрыс емес. Сондықтан, Нұрсұлтан сынды жастар жауынгерлік спорттың рухын көтеріп, елде дамуына үлес қосып келеді. Арманын ауылдан бастаған азаматтың артынан ерген сайыпқырандары ауданның ғана емес, өңірдің, жалпы алаш жұртының айбынын асқақтатар Шавкат, Жалғас, Дамир сынды чемпион болады деп сенейік. Алға, Нұрсұлтан!

Қазақстан және Қызылорда облысының жаңалықтары: Спорт