<a href="https://kyzylorda-news.kz/">Kyzylorda-news.kz.</a> Қазалы ауданында білек күші тасыған, жүрегі мықты, алған бетінен қайтпайтын өжет те, қайсар спортшы жігіттер баршылық. Солардың қатарында Абылайхан Жұбаназар да бар. Мақсатшыл жас 2000 жылдың 15 ақпанында Қазалы қаласында дүние есігін ашқан. Алдағы жеңісті күндерге жету жолында талапты қоя білетін ол ең алғаш қазақ күресіне 2013 жылы аяқ басты. Оның бозкілемдегі батырлығын байқаған бапкері Мұхтар Күзентаев «болашақта әлем танитын чемпион боласың» деп жігерлендіріп отыратын болған. Біз сөз еткелі отырған кейіпкер, самбодан Азия чемпионы, дзюдодан Қазақстан жастары арасында екі дүркін жеңімпаз атанған. Бұл аз десеңіз, «Жас барыс» турнирінде бес мәрте бірінші орынды иемденген.&nbsp;Бүгінде дзюдодан ересектер арасында Қазақстан құрамасында жаттығып жүр. Әңгіменің ауаны жақында Грузияның астанасы Тбилисиде дзюдодан өткен «Grand Slam» турнирінің күміс жүлдесін иемденген жерлесіміз Абылайхан Жұбаназар жайында болмақ. Аудан, облыс қана емес, ел намысын әлемдік аренада жықпай жүрген спортшымен еркін әңгіме өрбітудің сәті түскен болатын.– Абылайхан, ең әуелі кешегі Грузияның бозкілеміндегі тартысы туралы тарқатсақ…– Бұл жарыс көптен ойымда жүрген жоспарларымның бірі еді. Өйткені, бұған дейін «Grand Slam» және Гран-при жарыстарында жүлде алып көрмегенмін. Бір жағынан жүлделі орыннан көрініп, алдағы болатын Олимпиадаға менің де барып, топ жарғым келетініне жан-жағымдағыларды сендіру болатын. Барлығы ойдағыдай болды.Әлемдік доданың екінші күні 81 келіге дейінгі салмақта финалға дейін төрт кездесу өткіздім. Жарысты екінші айналымнан бастап, іріктеу кезеңінде Канада және Польша спортшыларын тізе бүктіріп, артта қалдырдым. Сосын ширек финалда молдовалық Виктор Стерпуден басым түстім. Ал, жартылай финалда татами иесі, грузиялық Дмитрий Гочилидзеден вазари әдісімен ұтылып жатып, таза жеңіске жетіп кеттім.Ақтық сында аустриялық Уашид Борчашвилимен алтын жүлдені сарапқа салдық. Спорт болған соң жеңіс пен жеңіліс қатар жүреді. Бұл жолы маған алтын емес, күміс медаль бұйырған екен. Мұнымен тоқтап қалмаймын. Алда әлі мен шығатын шыңдар бар.– Ең алғаш жарысқа қатысқан кезің есіңде ме?– Иә, ең бірінші, облыстық жарысқа барған болатынмын. Ол кезде спорт мектебінде 40-қа жуық бала дайындалатынбыз. Жалағашта өтетін жарысқа ағайымыз балаларды іріктеп алды. Сол қатарда мен де болдым. Қазақша күреске келгеніме бір жарым ай уақыт болса да, маған сенім білдірген ұстазымның үмітін ақтап, бірінші орын иегері атанамын деп барғанмын. Бірақ, сәті түспеді. Үшінші орынды қанжығама байладым. Міне, сол кезден бастап қазақша күреске деген қызығушылығым артып, қазір өзімді әлемдік аренада дәлелдеуге асығып жүрмін.– Қазақша күресті қойып кеткің келетін жағдайлар жиі бола ма?– Әрине, кейде психологиялық тұрғыдан шаршайтын кездер кездеседі. Мұндай жағдай тек менің ғана емес, басқа да спортшылардың басынан өткен болар. Сондайда бірі – спорт саласын таңдаған болса, екіншісі, шыдамдылығы жетпей жарты жолдан барлығын тастайды. Өйткені, ондай палуандарды көзіміз көрді. Талай рет аты шығып, енді көтеріліп келе жатқан жастардың арасында отбасы мәселесі немесе өзге де шаруалар шығып, соның салдарынан спортты тастап кеткен жайлар болды. Нендей кедергі орын алса да, алдыңа қойған мақсатың айқын болуы керек. Мойымай, еңбектеніп, бастаған істі соңына дейін жеткізген жөн.– Кез келген спортшының өзіне үлгі тұтатын даңқты тұлғасы болады? Сен үшін…– Шыны керек, қазақша күреске келуіме ешқандай жан себепші болған емес. Алғашында, қазақ спортшыларын өзіме үлгі тұтпайтынмын. Тек, өзімді іштей «барлығы енді ғана басталды. Мені жеңісті күндер алда күтіп тұр» деп шыңдайтынмын. Бертін келе, 60 келі салмақта тараздық Елдос Сметов ағамыздың әлемді бағындырғанын көріп, сол кісіге еліктей бастадым. «Армансыз адам қанатсыз құспен тең» демей ме, Елдос бауырымыз көгілдір экраннан қандастарымызға сәлем жолдап, көк туды көкке желбіретіп, әнұранды әлемдік аренада шырқатып жатқанда, болашақта сол орыннан өзімді көргендей болдым. Бүгінгі күні сол үшін аянбай тер төгіп келемін.– Спорт жолындағы ең қуанышты сәтің?– Аллаға сансыз шүкір, бүгінге дейін біршама жетістіктерге жетіп жүрмін. Барлығы дерлік қуанышты сәттерге толы. Бірақ, соның ішінде, ең қуанышты күнім деп, Моңғолия елінде өткен байрақты бәсекеде жастар арасында 74 келі салмақта Азия чемпионы болғанымды айту керек шығар. Қазақстан жерінде көптеген жарыстарда жүлделі болсам да, өзге елде қазақтың көк туын көтеріп, әнұранын шырқатқанға жетпейді. Кеудеңді өзгеше сезім кернейді екен. Міне, сол уақытта іште толқу болып, кеудемді қуаныш кернеп, ел атын шығарып жатқаныма қатты қуандым.– Шет мемлекеттердегі жарыстарға жиі шығып тұрасың ба?– Қазақстандық жасөспірімдер арасында жеңімпаз атанғанымда өзге елде белдесуге мүмкіндік берілген болатын. Содан бері шет елдің біршама жерінде болып көрдім. Мысалы, Моңғолия, Ресей, Грузия, Өзбекстан, Түркия, Грекияда өткен халықаралық додаларда бақ сынадым. Өзге елде жарыс күні белгілі болып, дайындық жасап жүріп, бос уақыт табуға тырысамын. Өйткені, сол елдің салтын зерттеп, танымал орындарын аралап, халқымен тіл табысып көргім келіп тұрады. Көшеде еркін киіммен жүргенде аса бір мән бере қоймайды. Ал, Қазақстанның туы бар спорттық киіммен шықсақ, жылы қабылдап, құрметтеп жатады. Өзге ел азаматтары бетімізді қайтарып, қабақ шытқан емес.– Төрешілердің әділетсіздігіне ұшыраған кезің болды ма?– Жоқ. Бұрындары алдыңғы буын ағалар төрешілердің адал емесін айтып, қамығып отыратын. Қазірдің өзінде басқа елде белдесіп жатқанда өз қандастарына жақтасып отырады. Дегенмен, шын мықтыға тұсау жоқ. Бергісі келмей тұрған жеңісті соңғы секундтарда жұлып алған кездеріміз де болды. Өз басым ондай әділетсіздікті бастан өткізіп көрмеппін.– Мотивацияны қайдан аласың?– Анамнан. Әрбір жарыс жолына шыққанда анам қоңырау шалып ақ батасын береді. Өзінің маған үлкен үміт артатынын айтып, алдыға қарай өрлеуіме дем береді. Өзі ауылда тұрса да, маған әрқашан қолдау білдіріп отырады.– Он жылдан кейінгі Абылайхан қандай болуы керек?– Барлығы бір Алланың қолында. Алайда, өзімнің алға қойған мақсаттарым орындалып, Әлем, Олимпиада чемпионы болуды армандаймын.– Әңгімеңізге рақмет!

Абылайхан Жұбаназар: Олимпиада чемпионы болуды армандаймын

<a href="https://kyzylorda-news.kz/">Kyzylorda-news.kz.</a>&nbsp; ҚР Мәдениет және спорт вице-министрі Сәрсен Құранбек Ә.Тәжібаев атындағы облыстық кітапханада спорт саласы қызметкерлерімен кездесті. Кездесуді облыс әкімі аппаратының басшысы Шахмардан Байманов жүргізіп отырды.Облыс басшылығының қолдауымен өңірде бұқаралық спортпен шұғылданушылар қатарын арттыруға ерекше көңіл бөлініп отыр. Нәтижесінде былтыр қызылордалық жастар көптеген жарыста ел мерейін асқақтатты. Жергілікті спортшылар халықаралық ресми жарыстарда жүлде иелену бойынша рекордтық көрсеткішке қол жеткізді. Әлем, Азия чемпионаттары мен кубоктарында 218 медаль алып, 78 мәрте жеңіс тұғырына көтерілді.<blockquote>Облыста 97 спорт түрі дамыған. Оның ішінде 27-сі олимпиадалық, 30-ы олимпиадалық емес спорт түрлері саналады. Сондай-ақ, 3-і қысқы, 10-ы ұлттық, 1-і техникалық және 26-сы мүгедектер спорты. Өңірде 22 спорт мектебінде 21376 адам оқиды. 2008 жылдан бері облыстан 21 үздігіміз ұлттық құрама сапында 4 жазғы Олимпиадаға барып қайтты. Олардың арасынан боксшы Қамшыбек Қоңқабаев пен ауыр атлет Александр Зайчиков қола медаль алды. Спорт түрлерін одан әрі дамыту барысында жыл сайын облысымызда өңірлік федерациялар саны артып келеді, – деді Шахмардан Асқарұлы.</blockquote>Облыста денешынықтыру және спортпен айналысушылар санын 42, 2025 жылға дейін 50 пайызға жеткізу көзделген. Биыл тұрғындардың спорт¬тық нысандарға қолжетімділігін арттыру үшін 11 денешынықтыру-сауықтыру кешенін пайдалануға беру жоспарланып отыр. Сондай-ақ, алдағы уақытта Сырдария өзенінің сол жағалауынан 7 мың жанкүйерге арналған стадион ел игілігіне айналады. Халық сұранысын қамтамасыз ету мақсатында заманауи көпсалалы спорт кешенінің жоба-сметалық құжаттамасы әзірленді.– Сыр өңірі – талантқа бай өлке. Олардың қатарында әлемдік деңгейде топ жарған үздіктер бар, – деді Сәрсен Абайұлы жұртшылық алдында.<blockquote>Бұл орайда жергілікті мамандардың қажырлы еңбегі, мол тәжірибесі мен жоғары біліктілігін айрықша атап өткен дұрыс. Жалпы елімізде спорт саласының дамуына Президент, Үкімет басшысы үлкен көңіл бөліп отыр. Мемлекет басшысы өз Жолдауында бұқаралық спортқа мән беру қажеттігін атап өтіп, оған лайықты қамқорлық көрсетіп келеді. Жақында «ҚР дене шынықтыру мен спортты дамытудың 2023-2029 жылдарға арналған тұжырымдамасы» бекітілді. Соған сәйкес алдымызға бұқаралық спортпен шұғылданушылар санын 50 пайызға дейін жеткізу міндеті қойылды. Вице-министрдің айтуынша, мұндай жоғары талапқа қол жеткізу спорт саласы қызметкерлерінің жүйелі жұмыс жүргізуі арқасында жүзеге асады. Бұл орайда нұсқаушы, бапкер, инфрақұрылым секілді мәселелер бар. Қордаланған күрделі проблемалар аз емес. Стратегиялық құжатта олардың барлығы көрініс тапты.</blockquote><blockquote>2025 жылға дейін 113 жаңа спорт нысаны салынып, жұмыс істеп тұрған 26 нысан қайта жаңғыртылады. Еліміз бойынша 43 мыңға тарта спорттық нысан бар. Олардың жай-күйі қандай? Аталған ғимараттар бүгінгі күн талабына сай ма? Бұл жөнінде қолымызда нақты мәлімет жоқ. Осы орайда министрлік тарапынан бұл нысандарды жыл ішінде түгендеу жұмыстарын алдымызға мақсат етіп қойдық. Осыған байланысты комиссия құрамы бекітілді. Жыл соңында жинақталған мәліметтерді Президент әкімшілігіне, Үкіметке ұсынатын боламыз. Соның нәтижесінде тиісті іс-шаралар қабылданады, – деді вице-министр.</blockquote>Еліміздің имиджін көтеретін, намысын қорғайтын саңлақтарды дайындау барысында білікті басшы, білімді мамансыз нәтижеге қол жеткізу мүмкін емес. Қазір спорт саласына ғылыми тұрғыдан қарау қажеттігі айқындалып отыр. Осы орайда Астана қаласында ұлттық спорт университетін салу алдағы жылдың соңына дейін аяқталады.<blockquote>&nbsp;Қазірге дейін елімізде дене¬шы¬нықтыру және спорт саласына қатысты екі маманды тәрбиелеп шығарамыз. Оның бірі – денешынықтыру пәнінің мұғалімі болса, екіншісі – спорт жаттықтырушысы. Негізінде бұл &nbsp;– өте күрделі сала. Физиолог, спорт тағамдарын айқындайтын және белгілейтін диетолог, спорт дәрігері, массажист мамандар арнайы білімді қажет етеді. Алайда оған мән берілмей келді. Ұлттық университетте салаға қатысты барлық маманды дайындауға назар аударылады. Сондай-ақ, Алматы облысының аумағында заманауи олимпиадалық даярлау базасының құрылысы жүргізілуде. Онда ұлттық құрамаға қабылданған 2200 спортшы шеберлігін жетілдіруге мүмкіндік алады, – деді Сәрсен Абайұлы.</blockquote>Вице-министр спорт саласына жеке инвесторлар қаржысын салу мәселесі өзекті екенін атап өтті. Мемлекет қаржысы барлық мәселені шешуге жете бермейтіні белгілі. Сондықтан жеке кәсіпкерлерді көптеп тартуға ынталандыру қажет. Алдағы уақытта мемлекет тарапынан оларға қолдау көрсетуге көңіл бөлінеді.Кездесу барысында аталған салаға қатысты өзге де өзекті мәселелер көтерілді. Көпшілік тарапынан қойылған сауалдарға вице-министр толыққанды жауап берді.

Спорт саласына қолдау көбейеді

<a href="https://kyzylorda-news.kz/">Kyzylorda-news.kz.</a>&nbsp; Қызылорда гарнизонына қызмет көрсету жөніндегі әскери полиция бөлімшесінің бастамасымен Қазақстан Республикасы Қарулы Күштері Әскери полициясының құрылғанына 26 жыл толу құрметіне орай және салауатты өмір салтын ұстану мақсатында гарнизонның әскери бөлімдері мен мекемелерінің әскери қызметшілер арасында шағын футболдан доп додасы мен теннистен жарыс болып өтті.&nbsp;Жарыс өзі жолдастық сипат алғанымен алаңдағы тартыс тегеурінді болды. Мұндай жолдастық сайыстар әскери қызметшілердің ара қатынасының нығаюына әкеледі. Үздік үштіктің сапына кіруге деген құлшыныс пен жеңістің кубогына тартыс жоғары деңгейде болды. Теннистен бас жүлдені Қызылорда аудандық пайдалану бөлімінің қызметкері Әмзе Дархан алса, шағын футболдан жүлделі кубоктыҚызылорда облысы қорғаныс істер жөніндегі департаментінің футбол коммандасы &nbsp;қанжығаларына байлады.&nbsp;Марапаттау рәсімінде Қызылорда гарнизонына қызмет көрсету жөніндегі әскери полиция бөлімшесінің бастығы әділет капитаны Бактияр Дауренкулов, мерекелік іс-шара көпшіліктің көңілінен шығып, жандарына жылулық сыйлап, таныстық артып, достықтың нығайғанын атап өтті.<blockquote>&nbsp;Әскери қызметкерлерімізспорттық өнерлерін көрсетуде жылдам, епті, ұйымшыл және көңілді екендіктерін көру қандай қуаныш.Спорт берік, мықты, күшті, қуатты, төзімді болуға көмектеседі, ең бастысы үнемі біріктіреді,- деді Бақтияр Дәуренқұлов.</blockquote>Шара қорытындысында жеңiмпаздар мен жүлдегерлер диплом, медаль және арнайы сыйлықпен марапатталды.<img src="https://knadmin.beoblood.kz/uploads/be133eaa_bc0e_4249_a814_701a8249765c_624f201e75.jpg" alt="be133eaa-bc0e-4249-a814-701a8249765c.jpg">&nbsp;&nbsp;

 Қызылордада әскерилер арасында спорттық сайыс өтті

<a href="https://kyzylorda-news.kz/">Kyzylorda-news.kz.</a> Орталық алаңға жиналған көпшілік спорттық жарыс түрлерін тамашалап, мәре-сәре болған мезетте Саят есімді жігітке біздің көзіміз түскен еді. Білектің күшіне сенген ол 40 келі тартатын қойды иығына асып, отырып-тұра жөнелген болатын. Бұған дейін бағын сынаған бірнеше жігіт 100-ге жетіп жығылса, шапшаң қозғалатын Саят бір мезетте 177 рет отырып-тұрды. Жас спортшы қапелімде «Күш атасын танымас» деген тәмсілді тағы бір мәрте спортсүйер қауымға аңғартқан еді.Қаумалаған халықтың назарын өзіне аудартқан Саят Өмірбек бірнеше жыл уақыт бойы ауыр атлетика спорты бойынша жаттығып келеді. Ең алғаш оны 10 жасында алаңда доп теуіп жүрген жерінен алғашқы бапкері Бауыржан Ахметов жаттығу залына әкеледі. Міне, осы сәттен бастап, талапты жас спорттың осы түрінен бір сәтке ажыраған емес. Үнемі өзіне жоғары талап қоя білетін Саят Жеңісбекұлы осы күні жұлқа және серпе көтеру жаттығуы бойынша тиісті межені бағындыру үстінде. Мәселен, спортшы дәрежесі жоғары сан алуан жарыста жұлқа көтеруден 115 келіні, серпеден 150 келіні төбісінен асырады екен.<blockquote>Бала кезінен ауыр атлетика спортына қызығушылығым арта түсті. Салмағы ауыр темірді көтеру үшін едәуір күш керек. Бапкерлерім жаттығу барысында жақсы техниканы қалыптастырып, барынша шынықтыра алды. Білікті маман Бауыржан Ахметов ағайымыз жақсы спортшы болуға баулыса, қазіргі бапкерім Алмас Нәрікбаев байрақты бәсекеге жан-жақты дайындап жүр. Менің әкем Жеңісбек те кір тасын көтерумен айналысады. Бірнеше республикалық жарыстың жеңімпазы атанған әкемнің нұсқауымен табанды, жігерлі болуға ұмтыла білдім. Қай кезде де қателікпен жұмыс жасау арқылы үздік көрсеткішке қол жеткізу үшін барымды саламын, – дейді Саят Өмірбек.</blockquote>Ауданның ғана емес, Сыр өңірінің намысын қорғайтын Саят Өмірбек – ҚР чемпионатының күміс жүлдегері. Жігері жасымайтын мықты спортшы өткен жылы ҚР спорт шебері атанған. Бұның барлығы жарыстағы қол жеңістердің арқасы екені айқын дәлел. Көпбалалы отбасынан шыққан Саят Жеңісбекұлы – №210 Оспан Әбілпаттаев атындағы орта мектептің түлегі. Қазіргі уақытта талабы таудай спортшы Алматы қаласындағы Қазақ спорт және туризм академиясында білімін жалғастыру үстінде.<blockquote>&nbsp;Қазақтың ұлттық мерекесі саналатын ұлыс күнінде бірнеше жігітпен қой көтеруден жарысқан болатынмын. Сынға түсіп жатқанымда қойды көтеру ешбір қиындыққа соқпады. Осыған дейінгі физикалық және техникалық дайындығым орасан зор көмектесті. Қаумалаған жергілікті халықтың ыстық ықыласына бөленуім – зор қуаныш. Өзім көтерген қойды жеңіп алғаныма дән ризамын. Алдағы уақытта бәсі биік бәсекелерде жеңіс тұғырынан көрініп, ата-анамның, бапкерімнің үмітін ақтасам деген тілек бар. Мамыр айында Қызылорда қаласында өтетін Ыбырай Жақаев атындағы республикалық турнирде бақ сынаймын. Осы жарыста жеңіске жетуге күш-жігерімді аямаймын, – дейді жас спортшы.</blockquote>Бүгінде Саяттың жасы 18-де екенін ескерсек, әлі талай биік белесті бағындырады деген сенім мол.&nbsp;

Сырдариялық спортшы облыс намысын қорғап жүр

&nbsp;<a href="https://kyzylorda-news.kz/">Kyzylorda-news.kz.</a> &nbsp;Ташкентте өтетін бокстан әлем чемпионатында өнер көрсететін Қазақстан ерлер құрамасының құрамы анықталды. Қазір ұлттық құрама боксшылары Шымкент қаласындағы "Алма-Тау" базасында соңғы оқу-жаттығу жиынын өткізіп жатыр, - деп хабарлайды ҚР МСМ Спортты дамыту дирекциясының баспасөз қызметі.Бас бапкер Мырзағали Айтжанов әлем чемпионатына қатысатын боксшылардың есімін атағаннан кейін, ақсақалдар "батасын" беріп, Қазақстан бокс федерациясының басшылығы өз тарапынан бағыт-бағдар мен нұсқауларын жасады.Өзбекстан астанасында ел намысын қорғайтын боксшылар:48 кг: Санжар Тәшкенбай 51 кг: Сәкен Бибосынов 54 кг: Махмұд Сабырхан 57 кг: Серік Теміржанов 60 кг: Талғат Сырымбетов 63,5 кг: Санатәлі Төлтаев 67 кг: Дулат Бекбауов 71 кг: Асланбек Шымбергенов 75 кг: Нұрқанат Райыс 80 кг: Нұрбек Оралбай 86 кг: Сағындық Тоғамбай 92 кг: Айбек Оралбай + 92 кг: Қамшыбек Қонқабаев<blockquote>«Бұл әлем чемпионатына баратын үміткерлерді біз ұзақ уақыт әрі тиянақты іріктедік. Жыл басынан бері бірнеше оқу-жаттығу жиынын өткіздік, жігіттерді түрлі жарыстарға апардық. Әр боксшыға қатысты сараптама жасадық, сондықтан, әрқайсысының шамасын білеміз. Әлем чемпионатына бірінші рет қатысатын 3 былғары қолғап шеберіміз бар. Олар жас болса да, тәжірибесі толысқан, бокс әлемінде алар орындары бар. Халықаралық аренада намысты қолдан бермейді деген сенімдемін», - деді Мырзағали Айтжанов.</blockquote><blockquote>«Бапкерлік құрам боксшыларды әлем чемпионатына жақсылап дайындап апара жатыр. Дұрыс таңдау жасады деп ойлаймын. Өз кезегінде ҚР Мәдениет және спорт министрлігі, Кеңес Рақышев басқаратын Қазақстан бокс федерациясы тарапынан барлық жағдай жасалды. Боксшылар мен бапкерлер олардың өнерін бүкіл Қазақстан тамашалайтынын біледі, сондықтан жауапкершілікті түсінеді. Құрамамызға сәттілік тілейміз», - деп атап өтті Қазақстан бокс федерациясының атқарушы директоры Маратбек Мықтыбеков.</blockquote>Естеріңізге сала кетсек, Белградта өткен соңғы әлем чемпионатында Қазақстан құрамасы 5 медаль (2 алтын, 2 күміс, 1 қола) иеленген болатын. Сербия астанасындағы жаһан біріншілігінің 3 бірдей финалисі (әлем чемпионы Сәкен Бибосынов, күміс жүлдегерлер – Махмұд Сабырхан мен Серік Темиржанов) Ташкент шаршы алаңында өнер көрсетеді. &nbsp;&nbsp;<blockquote>«Ташкенттегі әлем чемпионатына тиянақты дайындалуға мүмкіндік болғаны үшін алғыс айтамын. Бір жұдырық болып жұмылып жұмыс істесек, алынбайтын қамал жоқ. Құрамадағы жігіттер бір-бірін әрқашан қолдап жүреді. Ал мен әлем чемпионы деген атағымды қорғап қалуға барымды саламын. Мақсатым – екі дүркін әлем чемпионы атану», - деп атап өтті Сәкен Бибосынов.</blockquote>Әлем чемпионатының басталуына тура бір апта қалды. Жарыс 1-14 мамыр аралығында өтеді.&nbsp;Ұйымдатырушылар біріншілікке 104 елден 600 аса былғары қолғап шебері қатысады деп отыр. Жеңімпаздар мен жүлдегерлер 13 салмақ дәрежесі бойынша анықталады.&nbsp;Халықаралық бокс қауымдастығы (IBA) алтын медаль иегеріне 200 000 АҚШ долларын, екінші орын алған боксшыға 100 000 және екі қола жүлдегердің әрқайсысына 50 000 АҚШ долларынан береді. Чемпионаттың жалпы жүлде қоры 5,2 млн. АҚШ долларын құрайды.&nbsp;Боксшылар додасының тікелей трансляциялары Qazaqstan&nbsp;және Qazsport&nbsp;телеарналарының эфирінен көрсетіледі.<figure class="image"><img src="https://knadmin.beoblood.kz/uploads/image_l_jpg_b48ae8ad58.webp" alt="image_l.jpg.webp"></figure>&nbsp;

Қамшыбек Қонқабаев бокстан әлем чемпионатына қатысады

<a href="https://kyzylorda-news.kz/">Kyzylorda-news.kz.</a> Қызылорда облысы полиция департаментінің Есірткі қылмысына қарсы іс-қимыл басқармасымен облыс оқушылары арасында қазақ ұлттық ойындарынан сайыс өткізілді. Іс-шараға 500-ден астам бала қатысты. &nbsp;Сайысқа қатысушылар қол күрес, бұқа тартыс, ләнгі тебу, асық, батпан көтеру, бес асық, қыз қуу, шоқпарласу сынды қазақтың ұлттық ойындарынан сынға түсті. Жарысқа жоғары сынып оқушылары қатысты. Өткізілген ойындардың қорытындысы бойынша жеңімпаздар анықталды.Полиция қызметкерлері қазақ ұлттық ойындарыннан жүлделі орындарға ие болған жеңімпаздарды құттықтап, сыйлықтар табыс етті. &nbsp; &nbsp;Жарыс барысында оқушылар күшімен концерттер ұйымдастырылды. Барлық қатысушылар спорттық жарыстарға жиі қатысуға ниет білдірді.Динара МАХАНОВА<img src="https://knadmin.beoblood.kz/uploads/Whats_App_Image_2023_04_25_at_16_03_53_1_1eca11ca6d.jpeg" alt="WhatsApp Image 2023-04-25 at 16.03.53 (1).jpeg"><img src="https://knadmin.beoblood.kz/uploads/Whats_App_Image_2023_04_25_at_16_03_54_2aeb02797c.jpeg" alt="WhatsApp Image 2023-04-25 at 16.03.54.jpeg">

Қызылордалық полицейлер оқушылар арасында ұлттық ойындардан сайыс ұйымдастырды

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Кемелұлы Президент ретінде алғашқы Жолдауында «Бұқаралық спортты дамыту пирамидаға айналуы қажет. Оның басына чемпиондар шықса, соның негізінде біз сау әрі саналы ұрпақты, мықты ұлтты қалыптастырамыз» деген болатын.Осы мақсатта 9 сәуір күні аудандағы бірнеше мекеме қызметкерлері арасында шағын футболдан «Шиелі ауданы әкімі кубогының» турнирі бастау алған болатын. Ала доптың додасы әр жексенбі сайын аудандық спорт мектебінде өтеді.&nbsp; Бүгінге дейінгі 2 ойынның есебі бойынша 5 ұжым командасы алғашқы орындарға жайғасты. Атап айтқанда, «Шиелі Ардагерлер», «Шиелі РЭС», «Шиелі Өрт», «Мәдениет және спорт», «Аудандық полиция» командалары алғашқы бестікте көш бастап тұр. Айта кетейік, «Ардагерлер командасы» екі ойын нәтижесінде қарсылас қақпасына 15 доп соғып, 3 доп есе жіберді.Турнирге мемлекеттік қызметкерлер, құқық қорғау органдарының қызметкерлері, медицина, білім беру салалары мен орман, су, өртке қарсы қызмет, теміржол сынды бірқатар мекеме өкілдері және ардагерлерден жасақталған 14 бірдей команда қатысып жатыр.Ала доп бәйгесі әр аптаның жексенбі күндері ұйымдастырылып, бірнеше айға созылатын болады. Аталған турнир 26 кезеңнен тұрады.

Шиеліде әкім кубогі: Ала доп додасы жалғасуда

<a href="https://kyzylorda-news.kz/">Kyzylorda-news.kz.</a> «Евразия» спорт кешенінде Гандболдан әйелдер арасындағы Қазақстан Республикасының VI жазғы спартакиадасы аяқталып, жеңімпаздар мен жүлдегерлер марапатталды.Марапаттау рәсіміне Республикалық гандбол федерациясының вице президенті, облыстық маслихат депутаты, дзюдодан ҚР еңбек сіңірген жаттықтырушысы, ҚР еңбек сіңірген спорт қайраткері Садық Мұстафа, облыстық гандбол федерациясының президенті Наурызбай Байқадамов және облыстық мәдениет және спорт басқармасының Жоғары спорт шеберлігі мектебінің директоры Бағдат Каленов қатысты.Айта кетейік, жарыс 17 сәуір күні басталып, оған 5 команда қатысқан болатын. Кіл мықтылар жиналған спартакиада 5 күнге созылып, спортшы қыздар тартысты ойын көрсетті.Жарыс нәтижесімен Қызылорда облысының Қайсар КГУ командасы 1-орын иеленді. Астана қаласы 2-орын, Алматы облысы жүлделі 3-орындарды өзара бөлісті.Аталған спартакиада 4 жылда бір рет өткізіледі. Өңіріміздің мақтаныштары гандболдан «Қайсар КГУ» командасы намысты қолдан бермей, биыл да Спартакиада чемпионы атанды. Сондай-ақ, команда ҚР 12 дүркін чемпиондары.&nbsp;

Сыр елінің гандболшы қыздары чемпион атанды

<a href="https://kyzylorda-news.kz/">Kyzylorda-news.kz.</a> Бүгін футболдан Премьер-лига командалары арасындағы ел біріншілігінің 7-турында «Астана» «Қайсардан» басым түсті, деп хабарлайды ҚазАқпарат.Аталған турды Қызылордада жергілікті «Қайсар» мен елордалық «Астана» қорытындылады.Кездесу барысында елордалық командадан Жарко Томашевич 53-минутта гол соқты. Оған 78-минутта алаң иелері сапынан Жоао Оливейра бір голмен жауап қайырды.Кездесудің 82-минутында елордалық командадан Абат Айымбетов жеңіс голын соқты.Осылайша «Астана» қарсыласынан 2:1 есебімен басым түсті.

«Қайсар» «Астанаға» есе жіберді

<a href="https://kyzylorda-news.kz/">Kyzylorda-news.kz.</a> Айнадай жалтыраған мұз айдыны. Әуелей шырқалған әуен. Мың бұрала билеген мәнерлеп сырғанаушылар. Көз алдымызға сонау бір шақтан қалған осы көрініс келе береді. Жұмыр жердегі жампоздар дәлдікті, жинақылықты, әбжілдікті қажет ететін мәнерлеп сырғанаудан сайысқа түсіп жатқанда «Осындай биіктен қазақ баласы қашан көрінеді? деген сауал көкейде тұратын.Бұл арманымызға беріде қол жетті. Ал Қызылордада ол кейінгі жылдары көкжиегін кеңейте түсті. Элизабет Тұрсынбаева сан алуан сайыста жеңіс тұғырына көтерілді. Жергілікті жерде мәнерлеп сырғанауға мән берген жас өрендердің қатарының көбеюіне игі ықпалын тигізді.Облыс орталығында бой көтерген «Мұз айдынына» қазір келушілер саны аз емес. Олардың қатарында жастайынан мәнерлеп сырғанауға қызыққан балалардың басым болғаны қуантады. Тәжірибелі маманнан тәлім алған өрендер көптеген сайыста алдыңғы лектен көріне бастады. Бұл – ұзақ жылдар бойы жасалған жұмыстың жемісі.<blockquote>– Қызылордада қыс қатал бола бермейді. Сондықтан қысқы спорт түрлері кенжелеп қалған еді. Арнайы кешен салынып, онда жастарға сергектікті серік етуге жағдай жасалды. Алғашқыда «Мәнерлеп сырғанаудың дамуы қалай болар екен?» деген сауал туындағанын жасыра алмаймыз. Білікті бапкерді қызметке шақырдық. Уақыт өте келе жас өрендердің қатары көбейді. Қай жұмыста да нәтиже бірден көрінбейді. Жоспарымыз бірден жүзеге аса қойған жоқ. Десе де қызылордалық спортшылардың өзге өңірдегі қарсыластармен терезесі тең деңгейде ойын көрсетіп, жоғары жетістікке жетуі негізгі мақсатымыздың орындалып жатқанын айғақтайды, – дейді облыстық коньки тебу федерациясының бас хатшысы Байтақ Тұрсынбаев.</blockquote>Мәнерлеп сырғанау спортының тарихы терең. Ол алғаш рет Ұлыбританияда пайда болған. Сайыс 1763 жылы Лондонда тұңғыш рет өткізілген, 1742 жылы Шотландия астанасы Эдинбург қаласында жас өрендерге тәлім беретін клуб тұсауын кескен.Қазір мәнерлеп сырғанаудың жекелей, жұптасып, топтасып сырғанау және мұздағы би түрлері бар. Үш түрі Олимпиада бағдарламасына енгізілген, Канада, АҚШ, Франция, Жапония, Оңтүстік Корея сынды мемлекеттерде мәнерлеп сырғанау кеңінен қанат жайған.Елімізде мәнерлеп сырғанаудан алғашқы жарыс 1957 жылы өтті. Қазақстандықтар арасында жұптасып сынға түсуден Е.Стекольникова мен Д.Казарлыга 1996 жылы Харбинде өткен III Қысқы Азия ойындарында алтын, ал 1996 жылы Оңтүстік Кореяның Кангвон қаласында өткен IV Қысқы Азия ойындарында М.Халтурина мен Е.Крюков күміс жүлдені еншіледі. Қазір мәнерлеп сырғанаушылар үйірмелері Алматы, Астана, Орал, Ақтөбе, Теміртау, Қарағанды, Өскемен, Қызылорда қалаларында жұмыс істейді. 2014 жылы 15 ақпанда Сочидегі Қысқы олимпиадада Денис Тен Қазақстан тарихында тұңғыш рет қола медаль жеңіп алды.<blockquote>– Мәнерлеп сырғанау – спорттың ең әдемі түрі. Бұл жерде ерекше дарын, шеберлік қажет. Элизабет кезінде канадалық Брайан Орсер деген бапкерден тәлім алды. Қазір ол Оңтүстік Корея, АҚШ, Жапония, Канада спортшыларына тәлім беріп жүр. Оған дейін де Олимпиада және Әлем чемпиондарын тәрбиелеп шығарды. Сондай-ақ, ол ресейлік Этери Тутберидзеден мәнерлеп сырғанаудың қыр-сырын үйренді. Жас буынды баулуда көп жұмыс жасалуы қажет деп санаймын, – деді Б.Тұрсынбаев.&nbsp;</blockquote>Өткен жылы спорттық мансабын аяқтаған Элизабет Тұрсынбаева бүгінде Алматы қаласында ізбасарларын дайындайтын орталық ашуға көңіл бөлген. Тәжірибелі спортшының тәлімін алуға ықылас білдірген өрендер қатары аз емес.Мәнерлеп сырғанаудан облыстың аға жаттықтырушысы Андрей Симакович қазірдің өзінде жоғары жетістіктерге жеткен шәкірттері аз емес екенін атап өтті. Олардың қатарында Артур Смағұлов, Темірлан Яхияев, Диана Жармұхамедова секілді өрендер бар. Әзірге жасөспірімдер қатарында сынға түсіп жүрген олар алдағы уақытта ересектер арасында ойын көрсетеді.

Мәнерлеп сырғанау: Елімізде мұз спорты қарқынды дамып келеді

<a href="https://kyzylorda-news.kz/">Kyzylorda-news.kz.</a>&nbsp; «AMANAT» партиясы жанындағы «Жастар Рухы» Жастар қанаты Қызылорда облыстық филиалының ұйымдастыруымен 10-11 сынып оқушылары арасында «Qaisar» әскери-патриоттық ойындарының іріктеу кезеңі өтті.Жобаның негізгі мақсаты – жастардың бойында Отанға деген сүйіспеншілікті арттыру, әскери патриоттық рухты қалыптастыру, жас ұрпақты әскери қызметші мамандығымен және әскери қызметтің қыр-сырларымен таныстыру болып табылады.Қатысушылар қашықтыққа жүгіруден, арнайы әскери жаттықтырушылар дайындаған кедергілерден тұратын эстафета және танымын кеңейту бойынша викторина сұрақтарына жауап беру арқылы сынға түсті.Қазақстан Республикасының Президенті Қ.К. Тоқаевтың тапсырмасы бойынша 2022 жылы «AMANAT» партиясы «Жастар Рухы» Жастар қанаты «QAISAR» әскери-патриоттық жобасын іске қосты. Ойын жыл сайын тұрақты негізде барлық аймақта өтуде. Жоба қатысушыларды физикалық тұрғыдан ғана сынап қоймай, әскерден кейінгі жастарға ашылатын мүмкіндіктер туралы ақпарат береді, - деді «Жастар рухы» ЖҚ облыстық филиалының төрағасы М.Жорабек.Ойын нәтижесінде І орынды « Дарын» мектеп-интернаты иеленсе, ІІ орынды «Абай» атындағы №2 мектебі, ІІІ орынмен №7 мектеп-лицейі марапатталды. Жауынгерлік рух көтеретін сайыста өңірміздің мектеп оқушылары белсенділік танытып іріктеу тартысты өткенін айтуда.<blockquote>Жастардың қайсарлығын шыңдаған әскери-патриоттық ойыны тартысты өтті. Шын мықтылар жеңіске жетті деп ойлаймын. Жобаның мақсаты түсінікті. Отанды қорғау әрбір азаматтың борышы. Сондықтан менде әскерде болып, өз міндетімді орындауға әрқашан дайынмын, - деді қатысушы Қыпшақпай Сырымбет.</blockquote>Іріктеу нәтижесінде І орынды иеленген «Дарын» мектеп-интернатының командасы республикалық «Qaisar» әскери-патриоттық ойынына жолдама алып, Қызылорда облысының намысын қорғайтын болды.

«Qaisar» әскери-патриоттық ойындарының іріктеу кезеңі өтті

<a href="https://kyzylorda-news.kz/">Kyzylorda-news.kz.</a> Бүгін Арал ауданында жасөспірімдер арасында еркін күрестен спорт шебері Жанесенов Оңдасын Нақылұлын еске алуға арналған республикалық турнир бастау алды.Дәстүрлі турнирдің салтанатты ашылу рәсіміне аудан әкімінің орынбасары К. Бержанов қатысып: -« Дене шынықтыру мен бұқаралық спортты дамыту – салауатты өмір салтын қалыптастырудың негізгі шарты болып табылады. Республикалық деңгейдегі осындай турнирлер жас балуандардың тәжірибе алмасып, шеберліктерін шыңдауына үлкен мүмкіндік. Бүгінгі жарыста бағы мен бабы келіскен спортшылардың жеңіске жетуіне тілектеспін»-деп Оңдасын Жанесеновтің спорттағы жетістіктеріне тоқталып, жарысқа қатысушыларға сәттілік тіледі.Мұнан кейін сөз алған белгілі спортшының анасы Марияш апай мен ағасы Байғабыл турнирге қатысушы балуандарға ізгі лебіздерін білдірді.Жастайынан спортқа бейім болған Оңдасын Нақылұлы он екі жасынан бастап еркін күреске ден қойған. Студент шағында да спорттан алыстамай, жоғарғы оқу орындары арасында өткен спартакиаданың бірнеше дүркін жеңімпазы атанып, «Спорт шебері» атағына қол жеткізген. Әскер қатарында Отан алдындағы азаматтық борышын өтеп жүрген кезеңде де күрестің осы түрінен бірқатар жетістіктерге жеткен.Елге оралған соң еркін күрес пен қазақша күрестен КСРО спорт шебері атанды.Биыл оныншы мәрте жалауын көтерген республикалық турнирде Атырау, Ақтөбе, Ұлытау, Жамбыл, Қызылорда облыстары мен Шымкент қаласынан келген жасөспірім ұлдар және қыздар үш күн бойы боз кілемде бақтарын сынамақ.<figure class="image"><img src="https://knadmin.beoblood.kz/uploads/342339155_965152357992789_2733576634513098448_n_0bb8654fbf.jpg" alt="342339155_965152357992789_2733576634513098448_n.jpg"></figure>&nbsp;<figure class="image"><img src="https://knadmin.beoblood.kz/uploads/342217853_136049195994923_4323175335179506464_n_bdb3602c20.jpg" alt="342217853_136049195994923_4323175335179506464_n.jpg"></figure>&nbsp;<figure class="image"><img src="https://knadmin.beoblood.kz/uploads/342339087_225538133417489_7777226614608572184_n_1ef993d3ab.jpg" alt="342339087_225538133417489_7777226614608572184_n.jpg"></figure>

Қазақстан және Қызылорда облысының жаңалықтары: Спорт