<a href="https://kyzylorda-news.kz/ru/">Kyzylorda-news.kz</a>.&nbsp; Бұқаралық спортты дамыту мемлекет алдында тұрған басты мәселелердің бірі. Оған дәлел жыл сайынғы Қазақстан Халқына арнаған Жолдауында мемлекет басшысы Қасым-Жомарт Тоқаев осыған басымдық беріп отырады. Жалпы мемлекеттің де мәртебесін әлемдік аренада айшықтап көрсететін саланың бірі де, бірегейі спорт екендігі жасырын емес. Қазіргі заманда баланы спортқа бауылып, салауатты өмір салтын насихаттау да игі іс. Біздің арамызда да өз алдына футбол командасын құрып, өз беттерінше жарыстарға қатысып аудан атын жақсы жағынан шығарып жүрген әуесқой спортшылар бар. Солардың бірі – «Порт» футбол құрама командасы.&nbsp;«Порт» командасы 2015 жылы әуесқой футболшылардан құралған. Командаға Төребек Дәрмағамбетов жетекшілік етеді. Жалпы бұл футбол командасының мүделерінің спорттық киімдері мен сырт өңірлерге жарыстарға барғандағы жол ақысына да демеушілік жасап отырған Төребек. Команда мүшелері кәсіпқой спортшылар емес. Қоғамда белгілеп алған әрқайссының өз мамандығы бар. Әр саладағы қызметкер азаматтар. Жас айырмашылықтары да бар. Алды 35 жаста болса, кішілері 17 жаста. Бірақ оларды спортқа деген сүйіспеншілік осы топқа біріктірген.<blockquote>&nbsp;Командадағы жігіттер спортты жан жүрегімен сүйеді. Олар өз командасына шын жанашыр. «Прот» командасында осындай спортшылар жиналған. Біз осынша жылдар ішінде тауды жарып, тас қопарып тастадық деп айта алмаймыз. Бірақ команда мүшелері жетілді. Өздерін мойындатты. Мен оларды тәжірбие жинасын деп, қызылордалық әуесқойлар арасындағы футбол жарысына, көршілес Қазалы ауданына жиі апарып жүрдім. Тіпті соңғы екі жылда Қазалы ауданының қыстық, жаздық әуесқойлар футбол лигасына қатысып жүр, – дейді Т.Дәрмағамбетов.</blockquote>Бүгінгі әңгіме де осы турасында болмақ. Яғни, Қазалы ауданында дәстүрлі өтетін әуесқой футболшылар арасындағы қысқы және жазғы ала доп додасында «Порт» командасының жеткен жетістіктері бір шоғыр. Қазалылық футбол сүйер қауым «Портты» жақсы таниды. Тіпті ондағы әрбір ойыншы туралы ақпаратқа қанық. Көршілердің қошеметіне бөленіп, Порттың ойынын тамашалау үшін келетін көрермен тапқан.<blockquote>&nbsp;Әр аптаның жексенбі күні Қазалыға барып әуесқойлар арасындағы лигаға қатыстық. Көршілес ауданның футбол деңгейінің жоғары екендігін айтуымыз керек. Ойыншылар арасындағы мәдинет, командалардың қарсыластарына құрметпен қарауы, төрешіні құрметтеу жолға қойылған. Мойындау керек, ең алғаш қатысқанда біз өзіміздің осал екенімізді білдік. Ал келесі ойындарда жаттығу мен ізденісті молайттық. Бірақ спортшы үшін баппен бірге бақ та қатар шабу керек сияқты. Өткен жылғы чемпион команданы биыл жеңсек те, жеңіс тұғырына шыға алмағанымыз өкінішті. Бір қуантатыны бізге деген қазалылықтардың ыстық қошеметі зор. Ерекше ықыласпен шығарып салды. Осыдан артық жеңіс бар ма? - дейді команда капитаны Ерлан Досжанов.</blockquote>Команда чемпион болмаса да өткен жылғы жазғы, биылғы қысқы лигада «Порт» командасының мүшесі Рахымбек екі мәрте, ең көп гол салған спортшы ретінде танылып, «Сұрмерген» атанды. Осылайша Қазалының әуесқойлар лигасының тарихында қалды.&nbsp;<blockquote>&nbsp;Жетекшіміз Төребек Әділбекұлына алғыс айтамыз. Бізге демеуші болып, бар шығынымызды көтеріп, өзімізді танытуымызға, Арал ауданының атын шығаруымызға көмегін көрсетіп жүр. Енді басшылық тарапынан біздің жаттығуымызға, ойын ойнауымызға зал мәселесін қарасытырып берсе деген кішкене өтінішіміз бар, - деген капитан Е.Досжанов біздің ауданда да әуесқойлар лигасын дамытса деген ойын ортаға салды.&nbsp;</blockquote>Өскелең ұрпақтың салауатты өмір салтын ұстанып, спортты жанына серік еткені жөн-ақ. «Порт» командасынан да бөлек біздің ауданда да әуесқой спортшылар көп. Солардың мүмкіндігін шыңдауға қолдау көрсетілсе нұр үстіне нұр болар еді.

Аралдың атын шығарып жүрген спортшылар

<a href="https://kyzylorda-news.kz/ru/">Kyzylorda-news.kz</a>. Бүгінде медицина әлдеқайда алға жылжығанмен, халық еміне жүгінушілер көп. Соның ішінде емдеудің ерекше тәсілі – айкунемен айығуды құп көретін жерлестеріміз аз емес. Жақында Ресейде патенттелген осы айрықша гимнастиканың сырына &nbsp;үңілген едік. Өңірде алғашқылардың бірі болып &nbsp;айкуне орталығының жұмысын жолға қойған Тұмар Темірбекқызымен сұхбатта толығырақ айталық.– Алдымен айкуненің тарихына тоқталсаңыз…– Айкуне – қазақтың ежелгі гимнастикасы. Кез келген адам оны үйде немесе кеңседе отырып жасай алады. Нәтижесінде бұлшық етке күш түсіп, қан айналымы қалпына келеді, тән сауығады, ой жинақталады. Мәселен, ежелгі түркі халқы жауынгерлерінің жағдайына ерекше көңіл бөлген. Соның ішінде атты әскерге деген талап күшті болған. Себебі атта дұрыс отырмайтындардың ұзақ сапар кезінде белі, омыртқасы ауырсынған. Сол кезеңде жауынгерлік гимнастикаға көп көңіл бөлінген. 1998 жылға дейін біздің бұл туралы хабарымыз болмады. Тек сол жылы Абай Баймағамбетовтың оны ресми медициналық жаттығу ретінде патенттеуі реинкарнацияға ұшырауына себепші болды. Абай Баймағамбетов 1998 жылы айкуненің алты жаттығуын ойлап тауып, оны ел ішінде жарнамалауға күш салған. Бірақ қолдау таппағандықтан үш айдан соң Ресейге бағыт алады. Осылайша уақыт өте Новосібірдің ҒЗИ-ы айкунені медициналық жаттығу ретінде мойындайды. Ал 2002-2003 жылдары Мәскеуде патент алады. 2005 жылы Санкт-Петербург мемлекеттік педиатрлық медициналық университетінде айкунені медицинаға енгізу қадамы ойластырылды. Ленинград және Санкт-Петербургта оны ЛФК жаттығулары ретінде қабылдайды. Бүгінде айкуне орталықтары Мәскеу, Омбы, Махачкала, Днепропетровск, Қазан, Минск, Симферополь, Челнах қалаларында бар. Франция, Беларусь, Германия және Үндістан халқы одан хабардар. Қазақстанның бірнеше облысында аталған орталықтар жұмыс істеуде. Мен де арнайы оқытудан өткен соң біздің облыстан осы орталықты аштым. Қарқын жаман емес, осы уақытқа дейін орталыққа 1500-ден астам адам жүгініп, қажетті көмек алды.– Гимнастиканың мыңдаған түрі бар. Солардың ішінде айкуненің ерекшелігі неде?– Сабақта денені дұрыс қалыптастыруға ғана емес, омыртқа мен омыртқа арасындағы жарық, остеохондроз, кеуде, бел ауруымен күресеміз. Сонымен қатар бұл жаттығулар есту, көру, тыныс алу мүшелерін жақсартады.Айкуненің әрбір жаттығуы қазақ руларының таңбасына ұқсас және сол рудың атымен аталады. Мұнда екі мыңнан астам тірек қимыл түрлері бар. Олар атқа отыру, малдас құрудың өзі талай ауруға ем екенін растайды.– Көбіне қандай жаттығулар жасалады?– Жаттығу әр бұлшық етті қозғалтуға арналған. Өте баяу жасалады. Бірінші омыртқа бұлшық етіне қысым түсіріледі. Сосын омыртқаны барынша созады. Екі жауырынды бір-біріне айқастыруға тырысамыз. Миды да іске қосу керек. Себебі, жаттығуды ой-санамен сезініп орындау маңызды. Нұсқаушының бақылауы &nbsp;қажет. Әр жаттығудан кейінгі статика, тыныштық күйі 3-10 минутқа дейін созылады. Бұл да спорт секілді, үздіксіз жаттығуды талап етеді. Негізінен күніне 20 минутты гимнастикаға арнауды әдетке айналдырған дұрыс. Гимнастика қатерлі ісік, созылмалы, жұқпалы ауруы бар адамдарға ұсынылмайды.– Үшінші сабақтан соң нәтиже байқалатынын естідік. Қаншалықты рас?– Неліктен адамдарда омыртқа жарығы протрузиясы және сол секілді проблемалар пайда болады? Себебі басым бөлігі үзіліссіз, бір орында ешбір қозғалыссыз отырып жұмыс істейді. Омыртқаға зақым келеді, ол дене бітімінде айқын байқала бастайды. Ал айкуне осы мәселелермен күреседі. Курстың үшінші күнінде адамның халі жақсарып, бойын тік ұстай бастайды. Көру қабілеті, көңіл-күйі жақсарады. Бұлшық еттерді қозғалту барысында сіңірлер созылады. Жаттығудың арқасында тыныс алатын кеуде бұлшық еті кеңейеді. Денеге оттегі барады. Диафрагма кеңейеді, әрі қан айналым жақсарады, жасарасыз. Бір сөзбен айтқанда, оң өзгерістерге қадам бастайсыз.– Айкуне жан тыныштығының кілті ме?– “Айкуне” сөзі ай шуақ шашса, күн жылу береді деген мағынада ай мен күн сөзінің қосындысынан алынған. Бұл жаттығуларды орындау барысында ішкі жан дүниеге үңіле аласыз, тыныштыққа бой алдырасыз. Сондықтан болар, айкунені жан тыныштығының кілті деп айтуға толық негіз бар.– Сұхбатыңызға рахмет! &nbsp;

Тұмар Темірбекқызы: Қызылордадаға ерекше гимнастика түрін әкелдік

<a href="https://kyzylorda-news.kz/ru/">Kyzylorda-news.kz</a>. Салауатты өмірдің салтын бұзбай, уақытын сауық-сайраннан гөрі жаттығуға арнайтын спортшылардың еңбегі – еліміздің ертеңгі жеңісі. Өйткені, шыңдалудың жолында шымыр болатын шыншыл мінезділердің абыройды адал атқаратыны да ақиқат. Бүгінде спортшылар Сыр елінің атағын аспандатып, атын әлемге танытуда ауыз толтырып айтарлықтай жетістікке ие. Осы орайда, ескек есушілер де есе жібермей, есепті жаңартып, жылда жеңістің жалауын тік көтеріп келеді. Шынтуайтында байдарка мен каноэде есу спортын естігенде таңданысын жасыра алмайтындар бар. Себебі, сумен байланысы бар спорттың басқаларынан ерекше екені белгілі. Иә, барлығы жазғы маусымның аптап ыстығында тынығуды жоспарлап, көл жағасында демалып, қайықпен серуендейтіні рас. Дегенмен, сырт көзге жеңіл көрінген спорттың өзіндік заңдылықтары мен ескеруге тиіс ережелері бар. Яғни, қайықта қағидаға сүйеніп, біркелкі тепе-теңдікті ұстап, екі қолдың қажырлылығымен ескек есу оңай емес. Демек, ескек есуде ебедейсіздік таныту қарсыластың қанжығасын майлайды деген сөз. Сыр елінің сайыпқырандары қоржынға алтын толтыруда алға озып, күмісте де кері шегінбейді. Әр кез марапат мінберінен көрініп, медальға ие болуы қошемет көрсететіндей-ақ. Осы орайда облысымызда байдарка мен каноэ спортының даму деңгейіне толығырақ тоқталмақпыз.Қызылорда облысында байдарка және каноэде есу 2013 жылдың 10 қаңтарында ашылған. Осы мақсатта сол уақыттағы дене шынықтыру және спорт басқармасының бастығы Садық Мұстафаевтың бастамасымен Астанадан арнайы 2 жаттықтырушы Мұхитдин Миербеков мен Диана Хазиева шақырылған. Әлбетте, қандай да бір істің берекелі болып, оның алға жылжуына жәрдемдесетін білікті мамандардың болғаны жақсы. Қанша дегенмен жеңіске жетелейтін жаттықтырушы үздік спорт шеберлерін даярлайтыны даусыз. Онсыз да он жылға жуық уақыт ішінде бұл спорт түрі жанданып, әлем чемпионатында жүлдегер атанған жастар көп.– 2023 жылы біз аталмыш спорт түрінің 10 жылдығын атап өтеміз. Осы 10 жылдан аз уақыт ішінде есудің дамуы қарқынды болды. Ашылғаннан кейін 3 жылдан соң Қызылорда облысынан Қазақстан Республикасының жүлдегерлері мен чемпиондары шыға бастады. 2015 жылы әлем чемпионатында Мерей Медетов 6 орынға ие болды, ол Әлем кубогынан үш рет медаль жеңіп алды. Сонымен бірге, Мерей Әлем кубогында Ресей спортшысына ғана есесін жіберіп, 2-орын иеленсе, Индонезияда өткен Азия ойындарында Қазақстан құрамасының қоржынын қола медальмен толықтырды. 2018 жылы Қожахмет Алтынбек Болгарияда өткен жасөспірімдер арасындағы Әлем чемпионатында күміс жүлде, Гүлжайна Тыныбекова қыздар арасындағы Әлем чемпионатында 5 орын алды. Алайда, ең үлкен жетістігіміз 2018 жылы Аргентинада жасөспірімдер арасындағы Олимпиада ойындарында жерлесіміз Диас Бахраддиннің алтын медаль иеленуі болды. Сондай-ақ осы Олимпиада ойындарында Эльнура Нұрланова қыздар арасында 4-орынға ие болды, ол 3-орын иегерінен небәрі 1 секундқа кеш келген еді,- деді ҚР еңбек сіңірген жаттықтырушысы Мұхитдин Миербеков.&nbsp;Табандылықты талап ететін, жылдамдықты қажет ететін спортта сағы сынбай, жоғары көрсеткіш үшін жанын салып дайындалатын үздіктер жеңісте үзіліс жариялағысы жоқ. Таудай талап пен тапқырлықтың негізінде әр жарыста жүлделі болуды жөн санайды. Мұның өзі облысымыздың абыройын асқақ етіп, мәртебесін биіктетіп тұрған жоқ па?! Байдарка мен каноэде есу спортында қызылордалықтар ҚР чемпионаттарында 150-ден астам медаль, әлем кубогында әлем чемпионатынан 3 медаль, Азия ойындарынан 1 медаль, Олимпиада ойындарынан 1 медаль, Азия чемпионаттарынан 15-тен астам медаль алды. 10 жыл ішінде 4 халықаралық дәрежедегі спорт шебері, 11 ҚР спорт шебері, 20 спорт шеберіне кандидат және көптеген разрядтаушылар, сондай-ақ ҚР Ұлттық құрамасының 26 мүшесі дайындалды. Осындай жағымды жаңалықтың көптігі көңілді қуантып, еңсені тіктейтіні тағы рас. Асылында, ерінбей еңбек еткеннің еншісіне жүлде бұйырып, жалқаулыққа жар бермей жаттығуды күшейту жеңісті жақындататыны сөзсіз.Сыр елінің спортшыларының спортқа келгенде кежегесі кері тартпайды. Сенім жүгін арқалаған жастар үмітті ақтауға бек дайын. Сол үшін кез келген кедергіні таптап өтіп, дайындық жұмысын жүргізеді. Өйткені, олар төгілген ащы тердің жемісі тәтті болатынын анық біледі. Осы ретте, спортшылар қысқы мерзімде ауа райының қолайсыздығына байланысты қазан айынан бастап көрші Өзбекстанға барады, ол жақта дайындық жұмыстары сәуір айына дейін созылып, сәуір айында жарысқа дайындалу үшін Қызылорда мен Алматыға келеді екен. Қалайда жеңістен қол үзбеуді қарастыратындар еңбектің бәрін жеңетінін жиі дәлелдейді. Иә, байдарка мен каноэде есудің облысымызда даму деңгейі жоғары екенін атап көрсеттік. Оған жіпке тізіп көрсеткен жетістіктер де дәлел. Тіпті, өңірімізде есу базасы ашылып, төбеміз көкке жетіп қуанған болатынбыз. Дей тұрғанмен, кейбір кемшін тұстардың да бары жасырын емес. Енді соған көңіл бөлініп, шешімі табылса ескек есу спортының даму қарқыны әлі де үдейтінін қаперге алған жөн.<blockquote>– Өткен жылдың желтоқсан айында біздің қуанышымызға орай есу базасы ашылды. Қазіргі уақытта мұнда 60-тан астам спортшы айналысады, олармен 2 штаттық жаттықтырушы және жартылай штатпен 2 жаттықтырушы сабақ өткізеді. Ал, базасы толық жұмыс істеуі үшін кем дегенде 10 жаттықтырушы жұмыс істеуі керек. Салыстырмалы түрде алар болсақ, Шымкент есу базасында 30-ға жуық жаттықтырушы жұмыс істейді. Осы көрсеткіштен кейін біз оларға қалай бәсекелес болмақпыз? 60 спортшының барлығына қайық жетіспейді. Бізде бүгінгі күні барлығы 15 қайық қана. Байқағандарыңыздай, жетіспеушілік көп. 15 қайықтың 10 қайығы мен моторы бар катерді ЖСШМ директоры Бағдат Каленов және 5 қайық пен моторы бар 2 катерді №5 ОРМБЖМ сатып алды. Жалпы алғанда, есу спортының әрі қарай дамуы үшін көмек қажет немесе жақын арада біз 10 жылда қол жеткізген барлық жетістіктерімізді жоғалтуымыз мүмкін. Облыста ескек есумен ҚР еңбек сіңірген 2 жаттықтырушысы және 1-санатты 3 жаттықтырушы айналысады,- деді М.Хамидұлы.</blockquote>Сонымен, су үстіндегі жарыста қауіпсіздікті қаперде ұстап, қайық қозғалысын бағамдап, ескектің ебін тауып есу қажет. Сайып келгенде, бір мезетте бәрін ойластырып, күш-қуатты да арттырып отыру, жылдамдыққа иек арту жеңіл іс емес. Ал, егжей-тегжейлі әр тәсілін меңгерген спортшылар ақылдың амалына жүгіну керектігін айтады. Мұны спортқа деген сүйіспеншілігі зор Гүлжайна Тыныбекованың сөзінен байқадық.– Ескек есу спортынан үздік атану үшін қайтпас қайсар мінез, шыдамдылық және жылдамдық, күш пен ақыл керек. Егер алған бетінен қайтпайтын табандылық болса жеңісті күндердің көп болатыны айдан анық. Менің байдарка мен каноэде есу спортымен айналысып жүргеніме 9 жылдай уақыт болып қалды. Осы уақыт аралығында көптеген ел мен қалаларды көрдім. Алдағы уақытта да мақсатым айқын. 2023 жылы Азиада және 2024 жылы Париж қаласында өтетін олимпиада ойындарында жеңіске жету.Спортта айтарлықтай кедергілер кездеспейді. Үздіксіз жаттығудың нәтижесінде және өз ісінің майталманы бола білген жаттықтырушыларымыздың арқасында жеңіс тұғырынан көрініп келеміз. Осы ретте, әрқашан жанашырлық танытып, қолдау білдіретін барлық жаттықтырушыларға алғысымды білдіргім келеді,- деді халықаралық спорт шебері Г.Алмасбекқызы. «Жеңілгенді жер көтереді» дейді халық даналығы. Әйтсе де, жеңілісті жеңіл қабылдауға бекінгенімен, жеңіске біртабан жақын Гүлжайнаның арманы асқақ. Бүгінде көздеген мақсатына, діттеген мұратына жету үшін тынбайтынын спортқа деген қызығушылығынан аңғардық.Шынтуайтында, шылым шегіп, шырт түкірудің денсаулыққа зияны болмаса пайдасы жоқ. Сондықтан саналы ұрпақтың саулық үшін спортпен шұғылданғаны өзі үшін һәм қоғам үшін маңызды. Қайткенмен де, ессіздіктің ерге сын екенін ескерсек, салмақтылық пен саналылықты сабақтастыра білген спортшылардың бағындырар белесі биік болмақ. Осы орайда, спорт десе ішкен асын жерге қоятын жігерлі жастардың ұстанымына берік болғаны орынды. Әлем чемпионатының жүлдегері Қожахмет Алтынбек те өз ұстанымына адал азамат. Сыр елінің атын әлемге танытқан спортшының байдарка және каноэде есумен айналысып жүргеніне 10 жылға таяған.<blockquote>– Алғашқыда бұл спорт түріне қызығушылықпен келгенмін. Бәлкім, уақытша ғана айналысармын деген ой болған. Алайда, бірте-бірте ескек есу менің сүйікті салама айналды. Сондықтан болар, кездескен келеңсіздікке қарамастан, кедергіге де көз жұмып, жеңімпаз атануды және жеңіске жетуді жалғастырып келемін. Иә, жарыс кезінде көптеген қиындықтар болады. Дегенмен, жаттықтырушының көмегімен, жақындарымның қолдауымен биік шыңдарды бағындырудамыз. Жеңіске жетудегі басты ұстанымым «үлкен мақсат – үлкен жетістікке жетелейді» деген сөз. Яғни, жеңіс жолында бағытымды бағдарлап, мақсат қоямын,- деді Қ.Алтынбек.&nbsp;</blockquote>Сонымен қатар, спортшы ескеру керек ережелер мен талаптарды да тілге тиек етті. Оның айтуынша, ескек есу кезінде әр спортшының өз жарыс жолы бар, сол жолдан шықпау қажет. Сондай-ақ, қайыққа сағат алып шығуға болмайды және барлық спортқа бірдей талап ол – допинг қолданбау. Сонымен қатар, жарыста қайық ұзындығы мен оның салмағы да ескеріледі. Ұзындығы 5 м 50 см-ден аспау және кем болмау, ал салмағы 14 кг-нан төмен болмау керек. Егер де 1 см тіпті 1 мг төмен болғанның өзінде қандай жарыс болмасын 1-орын алса да, жарыстан шеттетіледі екен. Байқап қарасаңыздар, спорт саласының қызығы мен шыжығы қатар жүреді. Әсіресе, су үстіндегі жарыста қайыққа жайғасқаннан бастап жеңіске жетем дегенше жаны жай таппай, қажырлылық танытатын қайраттылардың еңбегі ерен.Түйіндей келе, облысымыз үшін он жылда жеткен жетістіктің өзі аз емес. Жас спортшыға сүрінгенде сүйеу болып, қашан да қолдау көрсететін жаттықтырушының да үлесі зор екені шындық. Алдағы уақытта, ескек есу спортына ден қойылса, даму қарқыны үдемесе тоқтамақ емес. Өйткені, өр мінезді спортшылардың есті әрекеті мен табандылығы талай мәрте көк туымызды көкке желбірететіні сөзсіз.

Қызылордалық спортшылар жеңіс тұғырынан түспек емес

<a href="https://kyzylorda-news.kz/">Kyzylorda-news.kz.</a> Қазіргі қоғамдағы ең өзекті мәселе бұқаралық спортты дамыту және жастарды спортқа көптеп тарту. Бұған байланысты мемлекет тарапынан арнайы бағдарламалар түзіліп және сол бойынша түрлі шаралар қолға алына бастады. Нәтижесі де жаман емес. Соның дәлелі ретінде біздің ауданымызды айтуға болады.&nbsp;Расымен, Жалағашта соңғы жылдары спорт саласында айтарлықтай серпін бар, оны мойындауымыз керек және онда «Наркескен» спорт клубының өзіндік қолтаңбасы барын да ешкім жоққа шығара алмас. Иә, аталған мекеменің жұмысы бүгінде бір ізге түскен. Оны ауданда "Наркескеннің" бастамасымен қолға алынған үлкен додаларға, жалпы ауқымы кең спорттық жарыстардағы нәтижесіне үңілген адам оңай аңғарады. Бүгін дәл осы мекеменің бастамасымен қолға алынған тағы бір жарыстың куәсі болдық. Мемлекет және қоғам қайраткері Темірбек Жүргеновтың 125 жылдығына орай баскетболдан аудандық турнир өтті. Кент және ауылдық округтерден келген спортшылар арасындағы бәсеке тартысты болды. Шараны аудан әкімінің орынбасары Ғани Сүлейменов ашып, қатысушыларға сәттілік тіледі.&nbsp;<blockquote>«Бүгінгі спорттық шараның маңызы зор. Бір жағынан бұл мемлекет және қоғам қайраткері, ұлт зиялысы Темірбек Жүргеновтың 125 жылдығына орай ұйымдастырылып отыр. Жалпы Темірбек Қараұлының 125 жылдығы түркі әлемінде аталып өтіледі. Туған жері Жалағаш ауданында бірқатар шара қолға алынған. Бүгінгі спорттық сайысты соның бірі де бірегейі деп қарауға болады. Қатысушыларға сәттілік тілеймін, спортты серік еткен өздеріңіздей жастар мемлекеттің өркендеуіне еңбек ете береді деп сенемін», – деді Ғани Кенжеғараұлы.</blockquote>Мұнан кейін кент және ауылдық округтерден келген командалар жеребе бойынша қай топқа қай команда баратынын анықтады. Осылайша 12 команда 4 топ бойынша сайысып, өзара мықтыны анықтады. Жарыстың шымылдығы «Наркескен» мен «Таң ауылы» командалары арасында ойынмен ашылды. Бұл кездесуде орталық жігіттері қонақтарды кешірмеді. Осылайша 34:10 есебімен «Наркескен» басым болды. Мұнан кейін келесі топтағы аудандық полиция бөлімінің жігіттерінен құралған команда мен «Қаракеткен» командасы өзара мықтыны анықтады. Бұл кездесуде ауылдың жігіттері 15 ұпай айырмашылықпен алға шықты.&nbsp;Кент орталығындағы №201 мен №123 мектеп-лицейі арасындағы тартысты бәсекеде мемлекет және қоғам қайраткері атындағы білім ошағының бәсі биік болды. Ал «Жалағаш жастары» мәдениеттің жігіттерін 40:2 есебімен шаң қаптырды. Басқа да командалар арасындағы ойын тартысты өтті. Қорытындысында 4 топтан 4 команда шығып, жартылай финалда Есет батырдың жігіттері мен «Наркескен» командасы ақтық мәренің жолдамасын сарапқа салды. Аламесектен келген қонақтар қарсыласын 22:15 есебімен жеңіп, ақтық мәреге өтті. Ақсу ауылынан келген жігіттер мен №123 мектеп-лицейінен келген команда арасында ақсулықтардың бағы басым болды. Осылайша ақтық мәреде «Ақсу» мен «Есет батыр» командасы кубокты сарапқа салса, «Наркескен» мен «123 мектеп-лицейі» командасы 3 орынға таласты.&nbsp;Жарыс қорытындысымен Есет батырдың жігіттері бас жүлдеге лайық деп танылды. Сондай-ақ олар кубок пен қаржылай 50 мың теңгеге ие болды. Ал ақтық мәреде оларға есе жіберген «Ақсу» командасына 30 мың теңгенің сертификаты табысталды. Үшінші орынға «Наркескен» командасы лайық деп танылды. &nbsp; &nbsp;Жалпы, ауданда спорттың бұл түріне қатысты әңгіме өрбісе, Есет батыр ауылының аты қатар айтылады. Бұдан Аламесктегі жастардың баскетболға бейім екенін түсіне қоямыз. Бүгінгі турнирде де ауылдың жігіттері топ жарды. Кент және ауылдық округтерден келген командалар арасынан қарсылас шақ келтірмеген Ақарықтың жігіттері осылайша ауылға олжамен оралып отыр. Жарысты басынан аяғына дейін тамашалап, тақым қысып, жанкүйер болдық. Расында жігіттер бабында тұр. Тіпті алды 35-тен асса да, Бекет Әйтімовтың қимылына қарап, командадағы жастардан жас айырмашылығын аңғару қиын танымайтындарға. Одан кейінгі алды Мақсат Өмірзақ, басқа да команда мүшелері де қарап қалмады.

Жалағашта баскетболдан турнир өтті

<a href="https://kyzylorda-news.kz/">Kyzylorda-news.kz.</a> Спорт адам өмірінің бір бөлшегі. Сондықтан спортпен шұғылдану ісі жеке адамдар үшін ғана емес, жалпыхалықтық сипат алуы тиіс. Спорт – өмір, спорт – денсаулық, спорт – абырой. Бүгінде Жалағаш ауданында спорт саласы жанданып келеді. Әсіресе, жасөспірімдердің спортқа деген қызығушылығы артқан. Спорттың әр түрінен республикалық, халықаралық, әлемдік бәскелерде жоғары жетістікке жетіп, жеңіс тұғырынан көрініп жүрген жеткіншектер ауданымыздың абыройы. Өзге елде өз ұлтын, халқын танытқан жеңімпаздармен біз қашанда мақтанамыз, оларды құрмет тұтамыз. &nbsp; &nbsp; &nbsp; &nbsp;&nbsp;Жуырда жас спортшыларымыздың қоржыны тағы бір жүлдемен толықты. №13 олимпиадалық резервтің мамандандырылған балалар және жасөспірімдер мектебінің волейболдан жаттықтырушысы Ләззат Әбдіқалықованың шәкірттері республикалық командалық жарыста жеңімпаз атанды.Шымкент қаласында өткен қыстық чемпионатта жалағаштық волейболшы қыздар облыс құрамасы қатарында жүлделі бірінші орынды иеленді. “Жеңімпаз атану оңай, сол тұғырды ұстап қалу қиын” демекші, волейболшы қыздар көктемгі өтетін ел біріншілігіне де тыңғылықты дайындалған. Ыждағаттылық пен еңбектің арқасында Ұлыстың ұлы күні қарсаңында Өскемен қаласында волейболдан өткен 2010-2011 жылдары аралығындағы қыздар арасында көктемгі ел біріншілігінде Ақпейіл Маратқызы мен Назым Қанибай аймақ құрамасы қатарында өнер көрсетіп, бас жүлдені жеңіп алды. Осылайша өңіріміздің қайсар қыздары Сыр елінің мерейін тағы бір мәрте үстем етті.&nbsp;Аталған жарыста республиканың түк¬пір-түкпкірінен келген 21 команда бақ сынаған. Волейболдан облыстың құра¬масына ену оңай шаруа емес секілді. Ол үшін спортшы бірнеше жарыста бой көрсетіп, әдемі ойын мен чемпиондық мінезді көрсету керек. Ақпейіл мен Назым да өткен жылы күзде облыс құрама бапкерінің шақыртуымен команданың бірлескен жаттығуына қатысыпты. Содан бері жеңімпаз қос қарындасымыз бірде-бір жарысты қалдырмай қатысып, қысқа уақыттың ішінде мол тәжірибе жинақтаған.&nbsp;Жалпы, бұл спорт түрінен ел біріншілігі жылына 4 рет, яғни әр мезгіл сайын өтіп тұрады. Осылайша күзде Хромтау қаласында өткен республикалық жарыста Ақпейіл мен Назым бірінші рет облыстық команда қатарында ойнап, бесінші орынды місе тұтқан. Иә, жаттықтырушы да, спортшы қыздар да жеңістің оңай жолмен келмейтінін жақсы түсінеді.– Жарысқа барысында спортшыларымыз барын салып, терін төкті. Әрине, республиканың түкпір-түкпірінен жиналған қарсыластар осал емес. Бәрінің мақсаты – чемпион болу. Сондықтан өрендерге жеңіс оңай келмеді, – дейді білікті бапкер Ләззат Әбдіқалықова.&nbsp;Иә, жиырма жылдан аса уақыт жаттықтырушы болып еңбек етіп келе жатқан Ләззат ауданымызда бірнеше қайсар да қабілетті спортшы қыздарды, чемпиондарды тәрбиелеп, аудан спортының дамуына елеулі үлес қосып келеді.&nbsp;<blockquote>«Шүкір, ауданымыз мықты спортшылардан кенде емес. Спорттың тілімен айтсақ, өсіп келе жатқан жүйріктерге тәртіп пен төзімділік керек. Оның барлығы үйдегі ата-ана мен мектептегі ұстазды сыйлаудан басталады. Оған спортта жүрген бапкерлерді де қоса аламыз. Әрбір жаттықтырушы шәкіртінің жаман болғанын қаламайды, ерсі қылық жасауына жол бермейді. Сосын әрбір спортшы алдына мақсат қойып, әрдайым өзін бабында ұстап, бос уақытты құр өткізбей, жаттығу жасап, залда болуы қажет. Өйткені барлық жетістік, жеңіс төккен тердің, еткен еңбектің арқасында келеді. Санадағы қорқынышты сылып тастап, психологиялық тұрғыдан мықты болуы шарт. Сонда ғана барлығы оңынан болады. Айналып келгенде жаттықтырушымен тығыз байланыста болып, берілген тапсырманы артығымен орындау қажет. Соның барлығы тәртіппен келеді. Көріп тұрғаныңыздай, бүгінде еңбегім елеусіз емес, жетістігіміз жетерлік, шәкірттерім жүлдемен оралып жүр», – дейді Ләззат Әбдіқалықова.</blockquote>Айта кетейік, 2019 жылы Жаңақорғанда өткен 2006-2007 жылғы жасөспірімдер арасындағы сайыста воллейболшы қыздар үздік үштікке ілінді. Ал, Ақерке деген шәкірті облыс құрамасына еніп, Петропавл қаласындағы республикалық жарысқа қатысып, жүлделі орынға ие болған. Сондай-ақ былтыр Талдықорған қаласында өткен ауыл жасөспірімдерінің ойындарында облыс құрамасына енген шәкірті Нұрсұлу Мырзаш та жүлделі І орынды иеленген. Осылайша Нұрсұлу спорт шеберіне кандидат дәрежесін қорғап, аудан тарихында волейболдан бірінші рет осындай үлкен жетістікке жеткен қыздың бірі болды. Ақпейіл мен Назым да жеңімпаз апаларының жолымен жүруді мақсат етіп, еліміздің көк туын әлемдік додаларда желбіретуді көздейді.Айта кетейік, бүгінде болашағынан үлкен үміт күтіп отырған Ақпейіл Маратқызы №202 орта мектептің, ал Назым Қанибай 246 орта мектептің озат оқушылары. Жеңімпаз қыздар тек спортта ғана емес, мектеп қабырғасында да түрлі танымдық шараларда бой көрсетіп жүрген белсенді оқушылар қатарында екен.Кез келген мықты спортшының артында білікті бапкер мен жанкешті жат-тықтырушы тұратыны анық. Жеңіс пен жеңілісті спортшымен бірдей көтеретін мамандар көп жағдайда көзден тасада қалып жатады. Жаттықтырушы спортшының спортқа деген алғашқы қадамын басқызып, кәсіби спорттағы жолын бағдарлап, нағыз спортшы ретінде қалыптастыруға негіз болады. Түптеп келгенде, спортшыны жеңіске де, жеңіліске де жетелейтін жаттықтырушы болып табылады. Тәлімгерлік – көзге көріне бермейтін жұмыс. Осы орайда біз таудай жауапкершілік, асыл үміт пен мықты сенімді бірдей арқалаған Ләззат Әбдіқа¬лықова мен талапты да талантты шәкірттері өңіріміздің абыройын әлі де асқақтатарына сенеміз.

Жалағаштық саңлақтар көк байрақты желбіретті

<a href="https://kyzylorda-news.kz/">Kyzylorda-news.kz.</a> Жаңақорған ауданында ерікті жастар бас қосып, ауданнан шыққан есімі өңірге белгілі, рекодсмендерді еске алып, олар жайында арнайы баяндама оқыды. Бұл жиынның мақсаты, өскелең жастарға тарихта аты қалған тұлғаларды үлгі етіп, есімдерін ұлықтауға бағытталды.Тарихқа зер салсақ ерекше талант иелері биік-биік тұғырдан көрініп, жаһан жұртын таңқалдырып келеді. Мәселен, гимнаст Лариса Латынин Мельбурн, Рим және Токио Олимпиада ойынында 9 рет үздік көрсеткіш көрсетті. Афина, Пекин және Лондонда байрағы көтерілген аламанда жүзгіш Майкл Фэлпс алдына жан салмай, 23 алтынды мойнына тағады. Данқты диқан Ыбырай Жақаевтың да рекордпен таласы бар. Оның звеносы күріштің гектарынан 174 центнерден өнім жинап, қазақ диқандарының абыройын асқақтатты. Осылай тізбектей берсек рекордтар көп-ақ. Мұндай рекордтар аудан тарихында да аз емес. Сонымен...Ұлы Отан соғысы кезінде соғысқа 300-ден астам сәйгүлік жібергені үшін және 1947 жылы қарауындағы 80 биеден 80 құлын алған «Талдысу» колхозының жылқышысы Сердалы Құрымбеков КССР Жоғарғы Советі Президумының 1948 жылғы 23 шілдендегі жарлығымен «Социалистік Еңбек Ері» атанып, оған «Ленин» ордені мен «Орақ пен балға» алтын медалі қоса беріледі.Халықаралық «Қызыл Крест және Қызыл Жарты Ай» халықаралық қозғалысының шешімімен жүзден астам медбике марапатталды (осы уақытқа дейін). Соның ішінде жерлесіміз Рәзия Ысқақова да бар. Мұндай құрмет оған Ұлы Отан соғысы жылдары ұрыс алаңынан 2000 астам жаралы жауынгерді алып шыққаны және Сталинградты азат ету кезінде 44 жауынгерді (бір күнде) құтқарғаны үшін берілген. Мұндай марапат қазақ қыздарының ішінде Р.Ысқақоваға ғана берілді.Әйелдер арасынан 40 жылға жуық трактор рөлінде отырған «Екпінді» колхозынан шыққан «Ленин» орденінің иегері даңқты механизатор Қалипа Түлкібаева онға тарта ауыр көлікті тізгіндеген. Нақты айтқанда, трактордың ХТ-3, СТ-3, ЧТЗ, Беларусь, Нати, Дт-54, Дт-74, К-700 маркаларын айдаған.1989 жылы қарауындағы 90 інгеннен 90 бота алып ең жоғарғы көрсеткішке «Талап» кеңшарының түйекеші Шадыман Есенқұлов жетті.1965-1967 жылдар аралығында қазақ ССР-і Жоғарғы Кеңесінің депутаты болған «Красная звезда» кеңшарының даңқты сауыншысы Баян Әріпова қарауындағы әр сиырдан 4800-5600 литр аралығында сүт сауды. Бұл сол кездегі үздік көрсеткіш еді. Аудан шопандары арасында 1975 жылы қарауындағы әр жүз саулықтан 228 қозыдан алып, 400 қозыны тірідей өсіруге қалдырған «Төменарық» кеңшарының шопаны Орынбай Бидашев «Социалистік Еңбек Ері» атанды. Әрине, мұндай жетістікке жету әркімнің қолына келе бермейтіні ақиқат.Денсаулық саласында ең ұзақ қызмет істеген дәрігер Галина Викторовна Попова 1952-2003 жылдар аралығында қызмет етті. Яғни, 51 жыл Төменарық ауылдық ауруханасының дәрігері болды. Осы жылдары елді мекен тұрғындарының құрметіне бөленіп, абыроймен қызмет етті.Гір спорты бойынша жерлесіміз Серік Ибрагимов әлемнің 4 дүркін, Еуропаның 9 дүркін және Қазақстан Республикасының 5 дүркін чемпионы атанды. Бұл аудандағы ең үздік көрсеткіштің бірі.Еркін күрестен Дәулет Ниязбеков екі дүркін Азия чемпионы, Ғалымжан Өсербаев әскерилер арасында Әлем чемпионы атанды. Ал, Мереке Құдайбергенова қазақ, белбеу, самбо мен дзюдо күрестерінен Қазақстанның 10 дүркін, белбеу күресінен Әлемдік додада 2 рет үздік шықты.Халықаралық дәрежедегі төреші, білікті бапкер Әбдісаттар Садықов белбеу күресінен Қазақстанның 20 дүркін чемпионы.Аудандық жылжымайтын мүлікті тіркеу мекемесінің қызметкері Ербол Қырықбаев марафондық сайыста ауданның 5 дүркін, облыстың 4 дүркін және Қазақстанның 1 дүркін чемпионы.Спринтерлік қашықтықта 100 және 400 метрге жүгіруде 1958 чемпион атанған &nbsp;Совет Исамбаевтың &nbsp;көрсеткішіауданда осы кезеңге дейін өзгермеген.Ардагер ұстаз Досман Ахметов Аққұм мектебінің меңгерушілігіне 1935 жылы тағайындалып сонда 1980 жылға дейін бір орнында қызмет атқарды.Денсаулық саласында ең ұзақ қызмет істеген дәрігер Галина Викторовна Попова 1952-2003 жылдар аралығында қызмет етті. Яғни, 51 жыл Төменарық ауылдық ауруханасының дәрігері болды. Осы жылдары елді мекен тұрғындарының құрметіне бөленіп, абыроймен қызмет етті.Гір спорты бойынша жерлесіміз Серік Ибрагимов әлемнің 4 дүркін, Еуропаның 9 дүркін және Қазақстан Республикасының 5 дүркін чемпионы атанды. Бұл аудандағы ең үздік көрсеткіштің бірі. Еркін күрестен Дәулет Ниязбеков екі дүркін Азия чемпионы, Ғалымжан Өсербаев әскерилер арасында Әлем чемпионы атанды. Ал, Мереке Құдайбергенова қазақ, белбеу, самбо мен дзюдо күрестерінен Қазақстанның 10 дүркін, белбеу күресінен Әлемдік додада 2 рет үздік шықты.Халықаралық дәрежедегі төреші, білікті бапкер Әбдісаттар Садықов белбеу күресінен Қазақстанның 20 дүркін чемпионы. Аудандық жылжымайтын мүлікті тіркеу мекемесінің қызметкері Ербол Қырықбаев марафондық сайыста ауданның 5 дүркін, облыстың 4 дүркін және Қазақстанның 1 дүркін чемпионы.Спринтерлік қашықтықта 100 және 400 метрге жүгіруде 1958 чемпион атанған &nbsp;Совет Исамбаевтың &nbsp;көрсеткішіауданда осы кезеңге дейін өзгермеген.Ардагер ұстаз Досман Ахметов Аққұм мектебінің меңгерушілігіне 1935 жылы тағайындалып сонда 1980 жылға дейін бір орнында қызмет атқарды.Математик, күйші, аудандық газеттің белсенді авторы болған Қалжан Төрежанов №125 Садықбек Сапарбеков атындағы мектепте өмірінің соңына дейін ұстаздық етті. Ол үзіліссіз 52 жыл ұстаздық етті.ТҮЙІН. Әрине, тізбелей берсек аудан тарихында орнаған үздік көрсеткіштер өте көп. Біз санаулысын ғана сараладық. Егер қамтылмай қалған рекордтар жайлы білсеңіз, редакцияға хабарласып, үздіктердің үздігін анықтауға атсалысуға болады... Математик, күйші, аудандық газеттің белсенді авторы болған Қалжан Төрежанов №125 Садықбек Сапарбеков атындағы мектепте өмірінің соңына дейін ұстаздық етті. Ол үзіліссіз 52 жыл ұстаздық етті. Аудан тарихында орнаған үздік көрсеткіштер өте көп. Біз санаулысын ғана сараладық. Егер қамтылмай қалған рекордтар жайлы білсеңіз, редакцияға хабарласып, үздіктердің үздігін анықтауға атсалысуға болады...

Жаңақорғандық рекордсмендердің есімі ұлықталды

<a href="https://kyzylorda-news.kz/">Kyzylorda-news.kz.</a> Аудандық мәдениет және спорт бөліміне қарасты «Сырдария аудандық спорт клубы» коммуналдық мемлекеттік мекемесіне биыл күрделі жөндеу жүргізілетін болады.&nbsp;Шын мәнінде, аталған&nbsp; ғимараттың салынғанына жарты ғасыр болған.Турасын айтқанда, 1976 жылы асар әдісімен салынған. Сол уақыттан бері ішінара жөндеу көрсе де қайта жаңғырту жұмыстары жүргізілмеген.Алғашқыда аталған нысан білім ордасы болды. №36 орта мектеп базасы осында болып, мұнда қаншама шәкірт білім алған. Тереңөзек кентіне кіреберістен жаңа мектеп салынғаннан кейін аудандық білім бөлімінің теңгеріміндегі ғимараттың бір бөлігі спорт клубына берілді. Яғни, 2011 жылдан бері осында жасөспірімдер түрлі спорттық үйірмелерге қатысып, шынығып келеді.Нысан қазір күрделі жөндеуді қажет ететіндігін көпшілік айтып жүр. Бұған қатысты спорт клубы қызметкерлері тарапынан жыл сайын жөндеу жүргізу керектігі қозғалуда.<blockquote>– Аудандық спорт клубында 13 жаттықтырушы жұмыс істейді. Олар аудан бойынша 800-ден аса жасөспірімді спортқа баулуда. Бізде ауыр атлетика, жеңіл атлетика, ережесіз жекпе-жек, қол күрес, гір көтеру, тоғызқұмалақ, волейбол секілді спорт түрлерінен жасөспірімдер жаттығып, түрлі жарыстарға қатысуда. Тиісінше, жеңіске жетіп жүрген тәрбиеленушілеріміз жетерлік. Міне, осындай жасөспірімдердің спортпен емін-еркін айналысуына ескірген ғимаратты жаңғырту керек-ақ, – дейді аудандық спорт клубының директоры Диас Әлжанов.</blockquote>Үш қабатты ғимаратта спорт және тренажер залдары бар. Мамандар отыратын бөлмелер де қарастырылған. Десе де кабинеттер жетіспеушілігі бар екенін айта кеткен жөн. Міне, осыған байланысты спорттық нысанға күрделі жөндеу жұмысы жүргізілуі тиіс. Бұл биыл іске асырылмақ.Аудандық спорт клубын күрделі жөндеу биылғы жоспарға енген. Тіпті жоба-сметасы дайындалып, сараптамадан өткізіліп, тиісті қаражат бөлініп қойған. Енді конкурс негізінде мердігер компания анықталса, құрылыс қарқын алмақ. Күрделі жөндеу жұмыстары сапалы жүргізіліп, спорттық нысан жаңарса, оның ішінде спортпен шұғылданушыларға ерекше серпін болмақ. Тиісінше, спорттық құрал-жабдықтар да жаңартылатын болса, аудан намысын, ел мерейін үстем ететін спортшылар шығатыны анық.

Сырдарияда спорт клубы күрделі жөндеуден өткізіледі 

<a href="https://kyzylorda-news.kz/">Kyzylorda-news.kz.</a>&nbsp;Бүгін «Мұз айдыны» спорт кешенінде Қызылорда облысының грек-рим, еркін және әйелдер күресі федерациясы қоғамдық бірлестігінің конференциясы өтті. &nbsp;Конференцияға облыстық мәдениет және спорт басқарма басшысының орынбасары А.Жаманкұл, ҚР Құрметті спорт қайраткері, ҚР еңбек сіңірген жаттықтырушысы С.Мұстафа, федерация вице-президенті Е.Кукетов, облыстық мәдениет және спорт басқармасына қарасты мекеме басшылары мен күрес түрлерінен жаттықтырушылар қатысты.Күн тәртібінде басты мәселе федерация төрағасын тағайындау болды. Асхат Мамадахунов Қызылорда облысының грек-рим, еркін және әйелдер күресі федерациясының төрағалық қызметін тоқтатып, Бақдәулет Мақашев федерациясының төрағалық қызметіне тағайындалды.&nbsp;Конференция жұмысында Қызылорда облысының грек-рим, еркін және әйелдер күресі федерациясының құрметті президенті лауазымына Мұстафа Садық Шоңмұрыңұлы тағайындалды. Сондай-ақ, аталмыш федерациясының атқарушы директор, бас хатшы, вице-президенттері тағайындалды. Жиын барысында Күрес түрлерінен облыс аға жаттықтырушыларының атқарылған жұмыстар бойынша баяндамалары жасалып, алдағы жоспарлары талқыланды.&nbsp;<img src="https://knadmin.beoblood.kz/uploads/336494404_1215974505786379_3155500044958091335_n_3a7865a8f1.jpg" alt="336494404_1215974505786379_3155500044958091335_n.jpg">

Қызылордада грек-рим, еркін және әйелдер күресі федерациясы қоғамдық бірлестігінің конференциясы өтті

​<a href="https://kyzylorda-news.kz/">Kyzylorda-news.kz.</a> Қызылорда қаласына қарасты Тасбөгет кентінің жұртшылығы асыға күткен дене шынықтыру-сауықтыру кешенінің құрылысы басталды. Осы орайда кент әкімі Семсер Сыздықов еңбек ардагерлерімен бірге аталған нысанның құрылысы барысымен танысып қайтты.&nbsp;Құрылысы енді басталған &nbsp;заманауи талаптарға сай спорт кешенінде Тасбөгет кентінің жас спортшылары оннан аса спорт түрінен жаттығу жасауға мүмкіндік алады. Кешеннің құрылысына бюджеттен 463,8 миллион теңге көлемінде қаржы қарастырылған. Құрылыс &nbsp;жұмыстарына &nbsp;жауапты мекеме ретінде «Интегрострой» серіктестігі танылып, жоспар бойынша спорттық нысанды 2023 жылдың желтоқсан айында пайдалануға бермек.Спорт кешенінің құрылысын арнайы бақылап қайтқан кент ардагерлері жаңа кейіптегі спорт кешенінен көптеген чемпион шығуына шын жүректен тілектестік білдірді.Еске салсақ, биыл облыс орталығы қаласында бірнеше нысанның құрылысы жүргізілуде. Мәселен, 100 келушіге арналған емханасы бар 300 төсектік көпбейінді аурухана құрылысына 3 миллиардтан астам қаржы бөлінген. Одан бөлек «Қазгермұнай» ұлттық компаниясы да шаһарда заманауи үлгідегі «Оқушылар сарайының» құрылысын жүргізеді. Сонымен қатар Қызылорда қаласында «Өнер орталығы», «Неке сарайы» мен «Қан орталығы» да бой көтермек.

Тасбөгет кентінде спорт кешенінің құрылысы басталды

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданына қарасты Шіркейлі аулының спортшысы Үсен Маханбетов жақында жақсы жаңалығымен бөлісті. Бапкер баптаған жас шахматшы Сабина Абылай Алматыда өткен ҚР балалар мен жасөспірімдер чемпионатына қатысып, спорттың екі түрі классика мен блицтен 2 қола медаль жеңіп алғанын сүйіншілей келіпті.Сырдария ауданының №12 балалар-жасөспірімдер спорт мектебінің спортшысы Сабина 5 жастан бастап шахмат бөліміне қатысады. №129 Ә.Жәмішев атындағы мектеп-лицей базасындағы үйірмеге дене шынықтыру пәнінің мұғалімі Ү.Маханбетов жетекшілік етеді. Үйірмеде барлығы 18 бала жаттығып, түрлі спорттық додаларға қатысуда. Бағы мен бабы келіскен 8 жастағы спортшы Сабина Абылайды бапкері алдымен облыстық додаға қатысып, облыс чемпионы атанғанын айтады.<blockquote>Қазір балалардың арасында шахматқа қызығушылық танытып, ел чемпионатында бақ сынап жүрген спортшыларымыз бар. Араларынан 4 спорт шеберлігіне үміткер, 2 бірінші разрядты спортшы шықты. Сабина 6 жасында Түркістан қаласында өткен республикалық турнирде классика мен блицте жақсы ойын өрнегін көрсетіп, екі қола медаль жеңіп алған болатын. Міне, биылғы жылы ел чемпионатында да жақсы нәтижемен шықты. Алдағы уақытта шілде айында Қырғызстанда өтетін Батыс Азия чемпионатында бақ сынайтын болады, – дейді бапкері Үсен Маханбетов.</blockquote>Ел чемпионатында 1156 жас спортшы қатысқан додадан жүлдегер атанып келген Сабина шахматта үздік ойнаумен қатар, сабағын да үздік оқиды.Айту керек, биылғы жылдың өзінде 3 чемпион шығарған бапкер Үсен Маханбетов Семей қаласында мұғалімдердің арасында «Спорт жұлдыздары» журналының ұйымдастыруымен өткен республикалық турнирде шахматтан бірінші орын алып, ел мерейін асырған болатын.&nbsp;&nbsp;

Сырдариялық жас шахматшы жүлделі оралды

<a href="https://kyzylorda-news.kz/">Kyzylorda-news.kz.</a> Елімізде дене шынықтыру және спорт саласы бойынша халықтың салауатты өмір салтын ұстануы мақсатында атаулы сала бойынша біршама жұмыстар атқарылып келеді. Иә, «Дені саудың – жаны сау» демекші, қай елде болмасын спортқа аса назар аударып, халық денсаулығына жауапкершілікпен қарайды. Бүгінгі тақырыбымызға осы аудан көлеміндегі спорт саласының деңгейі арқау болып отыр.Айдынды Арал өлкесінде спорт саласы қарқынды дамып келедіЕліміздің әр өңірінде спортшыларға барынша мүмкіндіктер қарастырылғаны белгілі. Сонымен бірге спорттың қай түріне болсын қызығушылық білдірген жастар қалаған жаттығу түріне бара алады. Тағы айта кетерлігі, футбол, баскетбол және басқа да спорт түрлеріне арнайы ойын алаңдары салынған. Статистикалық есеп бойынша ауданда 239 спорт объектісі тіркелген. Яғни, 2 спорттық кешен, 1 стадион, сондай-ақ &nbsp;55 спорт зал, 14 бейімделінген спорт бөлмелері, 4 спорттық ату тирлері мен 171 жазықтағы спорт алаңдары бар.Жас спортшылар жетістігі елді сүйсіндіредіАудан абыройын асқақтатып, біршама жетістіктерге жетіп жүрген спортшыларымыз да жоқ емес. Олар аудан, облыс, республика көлемінде бақ сынап, жүлделі орындарға ие болып келеді. Жыл басынан бері ауданның спортшылары біршама жетістіктерге қол жеткізді. Қазақстан Республикасының ресми (ҚР чемпионаттары мен біріншіліктері) жарыстарында аудан спортшылары 49 медальға ие болды. Оның 10 алтын, 19 күміс, 20 қола. Оның ішінде әмбебап жекпе-жектен жастар арасында өткен Әлем чемпионатында 1 күміс және 1 қола және грек-рим күресінен жасөспірімдер арасында өткен Азия чемпионатында 2 алтын. Сонымен бірге Арал ауданында волейболдан 2008-2009 жылдары туған жасөспірімдер арасында белгілі спортшы Асқат Ахановты еске алуға арналған республикалық турнир өтті.Ауданымызда XXI мәрте өткізіліп жатқан турнирде Шымкент қаласы, Ақтөбе, Атырау, Батыс Қазақстан, Маңғыстау, Түркістан, Қызылорда облыстарынан келген спортшылар бақ сынады. Бокстан 2007-2008 жылдары туған жасөспірімдер арасында Жалдыбай Нұрпейісовті еске алуға арналған республикалық турнир өтті. Республикалық дәрежеде IІ мәрте өткізіліп отырған турнирде Алматы, Атырау, Ақтөбе, Қостанай облыстары және Қызылорда қаласы мен аймаққа қарасты аудандардан арнайы келген 150-ге жуық жасөспірімдер 15 салмақ дәрежесі бойынша бақтарын сынады. Еркін күрестен 2008-2009 жылы туған жасөспірімдер арасында спорт шебері Оңдасын Жанесеновті еске алуға арналған республикалық турнир өткен болатын. Оныншы мәрте ұйымдастырылып отырған республикалық турнирде Атырау, Маңғыстау, Батыс Қазақстан, Ақтөбе, және Қызылорда облыстарынан келген 250 жасөспірім 17 команда құрамында 12 салмақ дәрежесі бойынша боз кілемде бақтарын сынады.Мерейлі мерекеде атқарылған жұмыстар да жетерлікҚаланың 95 жылдығы аясында барлық дерлік сала бойынша түрлі іс-шаралар өткізілген болатын. Айтулы мерекеден спорт саласы да қалыс қалмады. Арал қаласында 2022 жылдың 23 қазанында Республика күні мен Арал қаласының 95 жылдық мерекесі аясында республикалық ат бәйгесі өткен. Арал ауданы әкімдігінің жүлдесін жеңіп алу үшін әр өңірден келген шабандоздар жалдарынан жел есіп, атқан оқша зулаған сәйгүліктерінің қарымын осы дүрмекте сынап көрді. Барлығы 40-қа жуық сәйгүлік қосылған дүбірлі дода – тай жарысы, құнан, аламан бәйге болып үш топқа бөлініп өткізілді.Еңбегі елеулі жаттықтырушыХалқымыз әрдайым үлкендерден өнеге алып, сол кісілер салған жолмен жүретіні анық. Осы тұста балаларды спортқа баулып, еңбегі сіңген тұлғалар да жетерлік. Соның бірі – Жалдыбай Нұрпейісов. Ол зейнетке шыққан кезінен бастап, өмірінің соңына дейін &nbsp;Арал аудандық балалар мен жасөспірімдер спорт мектебінде бокс жаттықтырушысы қызметін атқарды. Өңіріміздің талантты спортшыларын баптап, республикаға танымал боксшылар етіп тәрбиелеп &nbsp; шығарды. Белгілі бапкерден тәлім алған төрт шәкірті спорт шебері болса, 15-і осы атаққа үміткерлігін қорғады.Балалар жылы аясында ауқымды жұмыстар атқарылдыАудан әкімінің кубогі үшін өткен Балалар жылына орай ұлттық жекпе-жек түрінен балалар мен жасөспірімдер арасында өткен жарыста жергілікті спортшылардан бөлек, Қызылорда, Түркістан облыстары мен Атырау, Ақтау, Ақтөбе қалаларынан келген балалар мен жасөспірімдер бақ сынады. &nbsp;Аталмыш турнирдің ашылу салтанатына аудан әкімінің орынбасары К.Бержанов қатысып, жас спортшыларға сәттілік тіледі. Ауданда үшінші мәрте ұйымдастырылған турнирде 2013-2014, 2011-2012 жылы туған балалар мен 2007-2008, 2009-2010 жылы туған жасөспірімдер 32 салмақ дәрежесі бойынша 300-ге жуық спортшы сынға түсті. Өткен 2022 жылдың 25 қараша күні №71 орта мектептің спорт залында аудандық дене шынықтыру және спорт бөлімінің ұйымдастыруымен гір спорты мен қол күрестен ересектер мен оқушылар арасында аудандық ашық турнир өткізілді. Турнирге жалпы 150 спортшы қатысуға ниет білдірді. Жарыс жеңімпаздары мен жүлдегерлерін Арал аудандық дене шынықтыру және спорт бөлімінің арнайы медаль, грамоталарымен марапатталды. Сонымен қатар Балалар жылына орай аудан көлемінде өткізіліп жатқан іс-шараларға үн қосу және жасөспірімдерді батылдыққа, ептілікке, ел қорғайтын батырлыққа, ұлттық салт-дәстүр мен рухани байлықты сақтауға бейімдеу мақсатында Арал ауданы Сексеуіл кентінде өткен еркін күрес жарысында 12 салмақ дәрежесі бойынша 166 спортшы қатысуға ниет білдірді.&nbsp;Мекеме қызметкерлері де спорттан қалыс қалмадыЕлімізде 2022 жылдың қазан айының соңғы жексенбісі әлеуметтік қызметкерлер күні болып бекітілген. Қазіргі таңда ауданда әлеуметтік қорғау жүйесін дамытуда 101 қызметкер жұмыс жасауда. Кәсіби мерекеге орай әлеуметтік қорғау жүйесінің қызметкерлері арасында спорт түрлерінен жарыс өткізілді. Аудандағы әлеуметтік қызметкерлер спорттың волейбол, арқан тарту, гір көтеру, асық ату, бес тас, қол күрес және эстафета түрлерінен өзара бақ сынасты.«Бәріміз бірдейміз, бөлінуді білмейміз!» Халықаралық зағиптар күніне орай дойбыдан мүмкіндігі шектеулі жандар арасында аудандық жекелей біріншілігінде 15-ке жуық ерлер мен әйелдер бақ сынасты.

Аралдық спортшылар қоржынында 49 медаль бар

​<a href="https://kyzylorda-news.kz/">Kyzylorda-news.kz.</a> Сыр өңіріндегі спортшылары үшін сәуір айы сәтті басталды деуге толық негіз бар. Өйткені аймақтың спорт шеберлері түрлі жарыстардан жүлделі орындармен оралуда. Жаңа айдың бес күнінде-ақ спортшылар бірнеше жарыста облыс мерейін үстем етті.Атап айтар болсақ, Футболдан Қазақстан Olimpbet чемпионатының 4 турында «Қайсар» қасқырлары «Каспийге» қонаққа барып, 3-1 есебімен жеңіске жетті. Қасқырлар сапынан Василий Совпель дубль авторы атанса, Бақдәулет Зулфикаров маусымдағы алғашқы голын соқты.Австрияның Иннсбрук қаласында 30 наурыз бен 3 сәуір аралығында &nbsp;таеквондодан G-1 халықаралық турнирі ұйымдастырылды. Турнирде кадеттер арасында қызылордалық Нұрперзент Саматұлы 37 келі салмақта алтын белгіні иемденді. Сонымен қатар жастар арасында Теміржан Тасқын 45 келі салмақта жүлделі І орынды, ал София Клименко 44 келіде жүлделі ІІ орынға ие болды. Турнирде ересектер арасында Сыр спортшылары Ботагөз Қапанова 49 келі салмақта жүлделі І орын және Нұрахан Ерасыл 54 келі салмақта ІІІ орын иегері атанды.30 наурыз бен 2 сәуір аралығында Семей қаласында кикбоксингтен 2007-2008 жылы туған кадеттер арасындағы Қазақстан Республикасының чемпионаты өтті. Біріншілікте Сыр спортшыларынан Ернұр Біләл 63,5 келіде фулл бойынша ІІІ орын, Сопбек Абдрахман 67 келіде ІІІ орын, Айтуған Алихан 60 келіде лоу кик бойынша ІІІ орын және Тайранбек Дамир 81 келіден жоғары салмақта лоу кик бойынша ІІ орын иеленді. Сонымен қатар Нұрашов Меделхан 81 келіден жоғары салмақта фулл бойынша &nbsp;І орын және Кеңесова Жұлдызай 36келі салмақ дәрежесінде фулл бойынша жүлделі ІІ орынды иеленді.&nbsp;Астана қаласындағы Сарыарқа мұз сарайында шорт-тректен оқушылар арасында ҚР ХІ қысқы гимназиадасы өтті. Гимназиадада Сыр спортшылары 8 рет жеңіс тұғырына көтерілді.Соның ішінде 1000 метр қашықтықта Есен Жансая І орын, Құрманбай Ұлту ІІІ орынды иеленсе, 500 метр қашықтықта Айару Қайратқызы және 777 метр қашықтықта Жансая Есен жүлделі І орынды жеңіп алды. Ал 1000 метр қашықтық бойынша сайысқа түскен қызылордалық Есен Жансая суперфиналдың ІІ орын иегері атанды. Одан бөлек Жансая көпсайыста да оқ бойы озып, жүлделі бірінші орынды қанжығаға байлады. Айару Қайратқызы да көпсайыста жүлделі ІІІ орынды жеңіп алды. 2000 метр қашықтықта командалық эстафетада Қызылорда облысының құрамы жүлделі ІІ орын иегері атанды. Команда құрамында Диляра Туралиева, Ұлту Құрманбай, Айару Қайратқызы мен Жансая Есен бар.Абай облысы Семей қаласында Грек-рим, еркін және әйелдер күресінен жасөспірімдер (U17) мен 23 жасқа дейінгі (U23) спортшылар арасындағы ҚР чемпионаты өтті.Чемпионатта 30 наурыз - 1 сәуір аралығында өткен грек-рим күресінен Сыр спортшылары Бүркітбай Ермухаммед І орын, Болатұлы Алпамыс І орын, Қайрат Шыңғыс ІІІ орын иеленді. Ал Түркістан қаласында Сидней Олимпиадасының жеңімпазы Бекзат Саттархановты еске алуға арналған бокстан жастар арасындағы ХХІ халықаралық турнирде Сыр өңірінің екі былғары қолғап шебері жеңіс тұғырына көтерілді. 51 келі салмақта сынға түскен Ерхан Оңталапов І орын иегері атанса, Дарын Кенжебекұлы 57 келі салмақ дәрежесінде жүлделі ІІІ орынды жеңіп алды.

Қазақстан және Қызылорда облысының жаңалықтары: Спорт