<a href="https://kyzylorda-news.kz/">Kyzylorda-news.kz.</a> Жалағашта спорт саласында серпін қалыптасуы заңдылық, иә, бұл сөзімізді біржақты пікір дерсіз, бірақ бүгінгі шарада сала ардагерлерінің сөзіне құлақ түрген мен осындай шешімге келдім. Ешқандай жалғандық жоқ, барды бар, жоқты жоқ деп таза сөйледі. Саланың дамуы жолында еткен еңбек, төккен тер, осы жолда көрген қиыншылықтар, бәрі-бәрі сала ардагерлерінің естеліктеріне арқау болды. Рас, қазір спорт саласын дамытамын, осы жолда тер төгемін деген азамат болса, барлық жағдай қарастырылған. Ал өткен шаққа көз жүгіртсек, осынша қиындықты еңсеріп, жас өрендерден чемпион шығарған аға буынға алғаусыз алғыстан басқа айтарымыз жоқ. Міне, бізде спорт саласының дамуы заңдылық дегенім де осы еді. Бастысы, із бар, сол ізбен келе жатқан жастарымыз да жетерлік. Ал мұндай еңбек барда өңір спортында серпін қалыптасуы заңдылық.Аудан әкімінің міндетін атқарушы Арнұр Нұрмағанбетов мереке қарсаңында жалағаштық спортшылардың басын қосты. Аудан әкімдігінде өткен мерекелік кездесуде барша спортшыларды төл мерекесімен құттықтаған Арнұр Әлібекұлы салада ел мерейін үстем етуге бағытталған жұмыстарына сәттілік тілеп, мемлекет тарапынан салаға қолдау басым екенін жасырмады.&nbsp; – Қазақстан Республикасының Спорт күні мерекесімен шын жүректен құттықтаймын! 2003 жылдан бастап тамыз айының үшінші жексенбісінде атап өтілетін бұл мереке тек спортшылар мен жаттықтырушылар ғана емес, дене тәрбиесі мен спортты насихаттайтын барша қазақстандықтар үшін ерекше мереке. Халқымыз ежелден денсаулықтың қадірін жете түсініп, оны басты байлыққа балаған. «Спорт – денсаулық кепілі» қағидасын берік ұстанған мемлекетіміз халқының ойы сергек, дені сау болуы үшін қолда бар мүмкіндіктің бәрін жасауда. Білімді, тәрбиелі әрі дені сау ұрпақ – ұлттың ең қымбат байлығы. Олай болса, балалар мен жас-өспірімдердің оқумен қатар, өнер үйреніп, спортпен шұғылданып, жан-жақты жетілуіне қолайлы жағдай жасау – мемлекет алдындағы стратегиялық басым бағыт. Сол себепті Мемлекет басшысы Қасым-Жомарт Тоқаев өзінің Президент ретіндегі алғашқы Жолдауында бұқаралық спортты дамыту мәселесіне басты назар аударған бо-латын. Президенттің осы тапсырмасы аясында әзірленген «Дене шынықтыру мен бұқаралық спортты дамыту жөніндегі 2020-2025 жылдарға арналған кешенді жоспар» бойынша ауданда да біршама жұмыстар атқарылды, – деді аудан әкімінің міндетін атқарушы Арнұр Нұрмағанбетов. Айта кетейік, бүгінгі таңда ауданда дене шынықтыру және спортпен жүйелі түрде шұғылданушылар қатары 13 500 адамға жетіп отыр. Бұл аудан халқының 38 пайызын құрайды. Қазіргі таңда ауданда спорттың әр түрімен айналысатын 150 &nbsp;арнайы орын, спорт залдар мен алаңдар жұмыс істейді. Балалар мен жасөспірімдерді, аудан тұрғындарын спортқа тарту бағытында 178 спорт маманы еңбек етуде. Аудандағы екі спорт мектебінде 1 592 бала өзі қалаған спорт түрімен айналысуда.&nbsp; – Қай заманда да спорт бейбітшіліктің, туысқандық пен достықтың елшісі іспетті болған. Сонау Қажымұқан бабамыздан бастау алатын қазақ спорты бүгінде әлемдік деңгейге көтерілді. Еліміз тәуелсіздік алғалы спортшы саңлақтарымыз қазақ халқының намысын қорғап, жер бетінде қазақ деген халықтың бар екенін паш етіп, оның ұл-қыздарының теңдессіз күш-қуатын, қабілет-қарымын дүниежүзіне мойындатып келеді. Аудан спортшылары да республика көлемінде ғана емес, халықаралық деңгейде де мақтанарлық нәтижелерге қол жеткізіп, аудан абыройын асқақтатуда. Осы жолда еткен еселі еңбектеріңіз бар, бүгінгі мерекемен сіздерді тағы да құттықтай отырып, отбастарыңызға амандық, дендеріңізге саулық, жұмыста-рыңызға сәттілік тілеймін, – деді Арнұр Әлібекұлы. Биыл І жартыжылдықта спортшыларымыз республикалық және халықаралық жарыстарға қатысып, ел чемпионаттарында 7 алтын, 2 күміс, 1 қола медалға ие болса, облыстық жарыстарда 22 алтын, 13 күміс, 20 қола медал қоржынға салған. Алғашқы алты айда І разрядты спортшылар саны 9, спорт шеберлері 8, спорт шеберіне үміткерлер 27-ге жетті. Мұндай жетістіктер өз алдына, келелі кездесуде аудан әкімінің міндетін атқарушы саладағы тағы бір жағымды жаңалықпен бөлісті. Ол осы аптада Алтай бөктерінен жеткен ақжолтай хабарға қатысты екен. Қаракөз қарындасымыздың жеткен жетістігіне қуанбаған халық жоқ, бәріміз өре тұра өзі бұл жиында болмаса да қошемет көр-сеткеніміз сондықтан еді. &nbsp;&nbsp; – Осы кездесуімізде жағымды жаңалықпен бөлісе кетсем, «Наркескен» спорт клубының «Тоғызқұмалақ» бөлімінің жаттықтырушысы, Халықаралық дәрежедегі спорт шебері &nbsp;Кенже-бекова Ақерке Батырбекқызы Монғолияның Баян-Өлгей қаласында 9 елден 200-ден астам спортшы қатысқан тоғызқұмалақтан өткен VI Азия чемпионатында алтын жүлде иегері атанды. Жеңіс құтты болсын! Осындай толағай табыстарда жаттықтырушылардың да маңдай тері мен табанды еңбегінің қолтаңбасы жатқанын айта кеткім келеді, – деді Арнұр Нұрмағанбетов. Мұнан кейін кезек марапаттау рәсіміне де келіп жетті. Бірқатар спортшы облыс және аудан әкімдерінің алғыс хатымен марапатталса, сала ардагерлеріне аудан әкімінің Құттықтауы табысталды. Мұнан кейін ардагерлер спорт саласында еткен еңбектері хақында естеліктер айтып, ізін басқан бүгінгі буыннан ағалық ақылын аямады. Олар біздің буынға қалай ақыл айтса да жарасады, шама-шарқынша салада еңбек етті, аудан спортын алға сүйреді, осы жолда тер төкті. Саналы ғұмырын спортқа сарп еттті, әлі де спорттан қол үзген емес, ауданда ардагерлер арасында мұндай сайыстарда қазыналы қарттарымыз төбе көрсетіп жатады. Осындай шаралардан тыс қалмауының өзі бізге үлгі. Арнұр Әлібекұлының сала ардагерлерінің еңбегіне ерекше тоқталуы да сондықтан.&nbsp; – Ауданда салауатты өмір салтын халыққа насихаттап, спорттық жарыстарға белсене қатысып, жас ұрпаққа үлгі көрсетіп жүрген аға буын өкілдерімен біз мақтанамыз. Олай дейтінім, Садық Алиев ағамыз бастаған ардагерлер кеңесінің ұйымдастыруымен жылда спорттық шаралар, балық аулаудан жарыстар, спартакиадалар өткізілуде. Осы маңызды шараларға ардагерлер де атсалысып келеді. Осы спорт саласының бүгінгі жеткен жетістіктерінде ерекше қолтаңбасы бар, жас ұрпаққа үлгі болып жүрген ардагер спортшыларымыз аман болсын, – деді ол. Келелі жиында сала ардагерлері Сұлтан Бекжанов пен Қуандық Ахметов ағаларымыз сөз сөйлеп, бүгінгі құрмет үшін алғыс білдірді.&nbsp; – Бұл тек аудан спортшыларына және ардагерлеріне ғана көрсетілген құр¬мет емес, жалпы қазақ спортына көрсетілген құрмет деп білемін. Өзім осы салада ұзақ жылдар еңбек еттім. Әлі де спорттан қол үзбеймін. Осындай құрмет үшін алғыс білдіремін. Сондай-ақ ізімізді басып келе жатқан жастарға айтарым, тек спортқа адал болыңыздар. Спортқа адал маманнан, бапкерден ел мерейін үстем етер чемпиондар қалыптасады. Елдің мерейін байрақты бәсекелерде үстем ететін жастарды қалыптастыратын сіздерсіздер. Осы жолда жасап жатқан жұмыстарыңыз жемісті болсын, – деді сала ардагері, аудан спортында өзіндік қолтаңбасы бар Сұлан ағамыз.&nbsp; Мұнан кейін Қуандық Ахметов ағамыз да көрсетілген құрметке алғыс білдіріп, бірқатар ұсынысын ортаға салды. Ол сала ардагерлеріне ауданның құрметті азаматы атағы берілсе дейді, сондай-ақ аудан спорты жайында және салаға серпін берген азаматтардың өнегелі өмір жолы хақында кітаптар жарыққа шықса деген тағы бір тілегін жасырмады. Арнұр Әлібекұлы бұл ұсыныстарды аудан әкімі Асқарбек Есжановтың қолдайтынын айтып, алдағы уақытта тиісті жобалар қолға алынатынын жеткізді.

Спортшылар құрмет төрінде

<a href="https://kyzylorda-news.kz/">Kyzylorda-news.kz.</a> Бүгін мереке қарсаңында аудан әкімдігінде спортшылар бас қосқанын айттық. Аудан әкімінің міндетін атқарушы Арнұр Нұрмағанбетов шама-шарқынша оларға құрмет көрсетті. Сала ардагерлері мен спортшыларды марапаттады. Сөз кезегі сала ардагерлеріне келгенде Сұлтан Бекжанов ағамыз Өмірбек Кәлменовтың есімін ерекше атап өтті. Естуімізше, Өмірбек отызды енді еңсерген бапкер екен, небары 33 жасында спортшы ардагерлер естелігіне арқау болатындай не тындырды, салаға қандай еңбек сіңірді? Шыны керек, шара бітісімен осы сауалдардың түйінін тарқатуға асықтық.Өмірбек Кәлменов бүгінде аудандық №13 олимпиадалық резервтің мамандандырылған балалар және жасөспірімдер мектебінде жаттық-тырушы болып жұмыс жасайды. 2008 жылы алғаш еңбек жолын бастаған бозбала бүгінде салада 15 жылдық тәжірибесі бар білікті бапкер.&nbsp; Дзюдодан жастайынан топ жарып жүрген Өмекеңнен тәжірибелі жаттықтырушының қалыптасуы да заңдылық. Мектеп жасынан салада үлкен белестерді бағындырған бапкердің бүгінде шәкірттері де дүбірлі додаларда топ жарып, аудан, облыс, қалаберді ел мерейін үстем етуде. Алайда оған кейіпкеріміз тоқмейілсуден ада. Керісінше шәкірттерін шыңдап, одан да жоғары биіктерден көрінуіне тер төгіп жүр.&nbsp; – Бапкер болу – баланың ісі емес, керісінше сол балалардан мықты спортшы қалыптастыру. Алдыңдағы шәкірттеріңнің барлығы бірдей емес, бірі спорттың айла-тәсілдерін тез қағып алса, енді бірі енжар келеді. Бірақ спортқа селқос қарайтын шәкіртіңнен үміт үзу қиянатпен бірдей. Негізгі міндетімізге адал болу үшін олардың барлығын спортқа епті етуге күш саламыз. Артық айтып не қылайын, қазір шәкірттерімнің алды халықаралық, әлемдік додаларда жүлделі орындардан бой көрсетіп келеді. Шәкірттеріммен мақтанамын, жеңісіне марқаямын, бірақ тоқмейілсуге тағы болмайды, Сыр спортына, оның ішінде аудан спортының алға басуына тамшыдай болса да үлес қоссам, сол менің салаға сіңірген еңбегім, адалдығым деп білемін. Алдағы уақытта да үлкен жарыстар күтіп тұр. Бұйыртса, ол додаларда бірнеше шәкіртім бақ сынайды, қазір алдағы жарыстарға қызу дайындық үстіндеміз, қалғанын уақыт көрсетеді, – дейді Өмірбек Кәлменов. Білікті бапкер – Қазақстан республикасының спорт шебері. Өзі де уақытында республикалық турнирлерде топ жарып, халықаралық жарыстарда дзюдодан байрағымызды желбіреткен. Бүгінде оның шәкірттері ізін басып, үлкен додаларда топ жарып жүр. 2016 жылы шәкірті Тынарбай Тілеген Сарыағаш қаласында өткен ел біріншілігінде қоржынға қола салса, 2019 жылы Тараз қаласындағы Қазақстан чемпионатында қарсылас шақ келтірмепті. Дәл осы додада тағы бір шәкірті Жаныс Бекарыс үздік үштікті түйіндеген.&nbsp; Әлгі Тынарбай Тілеген кейін Тайпейде өткен Азия чемпионатында ел қоржынына алтын салды. Жалпы, бұл спортшының жетістігін толық жазар болсақ, бір еңбекке жүк болары анық. Ал 2021 жылы Орал қаласындағы жас¬тар ойындарында Әсел Бейсенбай қоржынға қола салған. Былтыр тағы бір шәкірті Нұрсұлтан Серік ел чем-пионатында қола жүлдеге ие болса, тағы бір шәкірті Темірболат Ерсұлтан мен Альбина Смайыл Талдықорғандағы жазғы ойындарында үздік үштікті түйіндеген.&nbsp; Өмекеңнің үлкен додаларда топ жарып жүрген басқа да шәкірттері жетерлік, қарап отырсақ, шағын ауданнан осынша спортшы шығарудың артында үлкен еңбек жатыр. Оған төзімі мықты, тәжірибесі мол бапкер ғана еңбек ететіні сөзсіз. Бұл сөзімізге білікті бапкердің салаға сіңірген еңбегі дәлел.

Білікті бапкер

<a href="https://kyzylorda-news.kz/">Kyzylorda-news.kz.</a>&nbsp; Бүгін облыс әкімі Нұрлыбек Нәлібаев, ҚР Парламенті Сенатының депутаттары Ақмарал Әлназарова, Руслан Рүстемов және Мәжіліс депутаты Мұрат Ергешбаев Арал ауданына жұмыс сапарымен барып, Қамыстыбас ауылындағы дене шынықтыру-сауықтыру кешенінің ашылу рәсіміне қатысты.Аймақ басшысы ауыл тұрғындарын құттықтап, Сыр өңірінде заманауи үлгідегі спорттық нысандар көптеп салынатынын айтты.<blockquote>«Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек», - деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. «Жайлы мектеп» ұлттық жобасы аясында алдағы 3 жылда 100 млрд. теңгеден асатын қаржыға 21 мектептің құрылысы жүргізіледі. Оның 4-еуі Арал ауданында бой көтермек. Биыл 10 мектептің құрылысы басталса, оның екеуінің іргетасы Арал қаласы мен Сексеуіл кентінде қаланады. Өткен жылы Аманөткел ауылындағы кешен қолданысқа берілсе, жақын күндері Жақсықылыш кентіндегі дәл сондай денешынықтыру-сауықтыру кешенінің игілігін халық көре бастайды», - деді Нұрлыбек Машбекұлы.</blockquote>Іс-шарада тыл ардагері Сейілхан Садақбаев та жерлестерін құттықтап, бата берді.<figure class="image"><img src="https://knadmin.beoblood.kz/uploads/363451582_591004649887450_5957590746111249162_n_609edf4381.jpg" alt="363451582_591004649887450_5957590746111249162_n.jpg"></figure>&nbsp;<figure class="image"><img src="https://knadmin.beoblood.kz/uploads/363857125_591004423220806_1071251894254643535_n_f0d70cb2f7.jpg" alt="363857125_591004423220806_1071251894254643535_n.jpg"></figure>&nbsp;<figure class="image"><img src="https://knadmin.beoblood.kz/uploads/363780234_591004453220803_4838342976965439165_n_affe958e91.jpg" alt="363780234_591004453220803_4838342976965439165_n.jpg"></figure>

Арал ауданында дене шынықтыру-сауықтыру кешені ашылды

<a href="https://kyzylorda-news.kz/">Kyzylorda-news.kz.</a> Өткен аптада Жалағаш ауданының спортында өзіндік қолтаңбасын қалдырған Аслан Бағдатұлын еске алуға арналған аудандық турнир өтті. Бозкілемде 20 палуан өзара мықтыны анықтап, ұлттық спортты ұлықтады. Шараның ашылу салтанатында аудандық мәдениет және спорт бөлімі басшысының орынбасары Еркебұлан Жамалатов турнирдің маңыздылығына тоқталып, қатысушыларға сәттілік тіледі.&nbsp;– Бүгінгі шараның өзіндік маңызы бар, оны аудан спортына Аслан бауырымыздың сіңірген еңбегімен етене таныс кез келген азамат жақсы түсінеді деген ойдамын. Игі шараны қолға алған құрдастарына алғыстан басқа айтарымыз жоқ. Елдің спортына еңбегі сіңген азаматтардың есімі осылай ел жадында жаңғыруы тиіс. Бүгінгі турнирге арғы басы Аралдан келіп жатқан палуандарымыз да бар. Сондықтан бозкілемдегі палуандар бәсекесінің тартысты өтетініне күмәнім жоқ. Кім жеңіске жетсе де, кіл мықтылардың аты озсын. Осындай игі шаралар аудан спортының дамуына, жастарды спортқа баулуға үлкен сеп болары сөзсіз. Себебі бүгінгі бір ғана шарада тек бір азаматты еске алып қана қоймаймыз, ұлттық спортымызды дәріптейміз, оған жастардың қызығушылығын арттырамыз. Ауданда ең көп турнир ұйымдастырылып жатқан ұлттық спорт түрлерінің бірі де бірегейі – қазақ күресі, бүгін де осындай игі шараға куә болып отырмыз, қатысушыларға тағы да сәттілік тілеймін, – деді Еркебұлан Жамалатов.Мұнан кейін бозкілемге бірінен кейін бірі палуандар шақырылып, кіл мықтылар анықталды. Қатысушылар 90 келі салмаққа дейін өзара мықтыны анықтады. Иә, палуандар әдіс жасау, жалпы қазақ күресінің тактикаларын меңге¬руімен, қарсыласынан айласын асыруда бірінен бірі өтеді. Бәрі де «сен тұр мен атайын» деп тұрған сайыпқырандар екені анық байқалады. Бозкілемде 5 минут бойы бір-бірін ала алмағандар да болды, уақытынан бұрын қарсыласының жауырынын жерге тигізгендер де табылды, тіпті белдесіп, соңында салмақ өлшеу арқылы келесі кезеңге кім өтетіні де анықталды. Өзбасым мұндай шешімді бірінші рет көрдім.Не керек, бозкілемде «әттеген-ай» деп қалған 10 палуан жарыс жолынан шеттетілді. Сондай-ақ 10 палуан келесі кезеңге жолдама алды. Оның бесеуінің тағы да жауырыны жер иіскеп, қос палуан үшінші орынға кім лайық екенін анықтаса, ақтық мәреде қарсылас шақ келтірмеген қос палуан бүгінгі турнирдің нүктесін қойды. Ақтық мәреге дейінгі жекпе-жекте сүрінген ақсулық Ұласхан Алпысбай мен Арал ауданынан келген Еңбек Сақтағанов турнирдің жүлделі үшінші орынын сарапқа салды. Иә, Аралдан ат терлетіп келген палуанның мықтылығы көрініп-ақ тұр. Жерлесіміз де осыған дейінгі талай турнирде бізді жерге қаратқан жоқ. Оның үстіне тұтас Жалағаш жұрты тақымын қысып отыр. Қонақ сыйлап, қарсыласына жол берейін десе, жеңілу қаншама шәкірт тәрбиелеп отырған атына сын. Ал жол бермейін десе, қонақтың да көңіліне қарайды, онысы да дұрыс, ертеңгі күні Аралға әлгі палуан «ауылдастың аты озды» деп барса, тағы ұят. Не керек, жекпе-жектің соңғы секундтары соққанша бауырымыз қонақ сыйлады, ақырында шыдамай кетті ғой деймін, өзін сұлатуға әрекет еткен Еңбекке қарсы әдіс жасап, жеңісті қолдан жұлып алды. Осылайша ол бүгінгі турнирде үздік үштікті түйіндеді.&nbsp;Негізі, Ұласхан әуелгі қарсыласпен шыққаннан оның ақтық мәреге дейін баратынына жанкүйерлерде күмән болмады. Ақсуда қазақ күресі мен дзюдо үйірмесінде қаншама шәкірт баулып отқан білікті бапкердің ұлттық спорттың бірнеше әдісін еркін меңгергенін жанкүйерлер түсіне қойды. Тіпті ақтық мәреге шығатын да, себебі оны қарсыласы жекпе-жекте де, белдесуде де ала алмады, ақыр соңында салмақ өлшеу әдісімен ақтық мәреден шеттетілді. Бар айыбы сол, қарсыласынан салмағы бірнеше келіге жоғары екен. Жас та болса дзюдо мен қазақ күресінен Ақылбек Серіктің есімі еліне етене таныс. Оны үлкен додаларға алып барған бапкерлері үшінші, екінші орын алса, өкпелейтін көрінеді. Білікті бапкерлерде мұндай түсінік қалыптасатындай да бар, себебі ол кішкентайынан бозкілемге шыққаннан тек бас бәйегелерді еншіледі. Бұған дейін аудан, облыс, ел намысын қорғап, үлкен додаларда жауырыны жер иіскемеген жас палуанның бүгінгі турнирде де бағы жанды. Бозкілемде қарсылас шақ келтірмеген палуан ақтық мәре алдында аралдық Еңбек Сақтағановты қалай еңсергенін көрсеңіз ғой, «міне, осылай күресу керек» дейсіз еріксіз. &nbsp; &nbsp;Ақтық мәреде Ақылбектің қарсыласы Шыңғысхан Әбілқасенұлы болды. Мықтыны мықты деуіміз керек шығар, ақтық мәреге дейін сүрінбеген ол да осал емес болып шықты. Не керек, қанша дегенмен тәжірибе деген тағы бар, жекпе-жек соңына дейін Ақылбек бұл турнирдің жеңімпазы атанса, қарсыласы екінші орынға жайғасты. Жарыс соңында турнирдің бас төрешісі Өмірбек Кәлменов қатысушыларға алғысын білдірсе, аз ғана ғұмырында аудан спортында атын қалдырған Асланның әкесі Бағдат ағамыз жүлдегер палуандарға арнайы дипломдар мен қаржылай сыйақысын табыстады. Сондай-ақ турнирде үздік өнер көрсеткен тағы 5 палуан қаржылай сыйақыға ие болды. Тіпті төрешілер де мұндай сыйақыдан құр қалмады.– Өткенді ұлықтап, өшкенді қайта жаңғыртуда Жалағш жұрты салтынан жаңылған емес. Ал мұндай шараларда ұлттық спортты дәріптеу өз алдына бөлек әңгіме. Міне, ауылдың азаматтары осындай игі шараны қолға алып, ер есімін ел жадында қайта жаңғыртып жатыр. Баршаңызға алғыстан басқа айтарым жоқ, аудан спорты алға бассын, үлкен додаларда байрағымыз биікте желбіреп, әнұранымыз шырқалсын, – деді Бағдат Сыдықов.Шара соңында аудан орталығындағы «Иманқұл» мешітінде спортшының рухына құран бағышталып, ас берілді.

Жалағашта қазақ күресінен турнир өтті

<a href="https://kyzylorda-news.kz/">Kyzylorda-news.kz.</a> Жаңақорған ауданында өтіп жатқан гандболдан 2010-2011 жылы туылған жасөспірімдер (қыз-балалар) арасында облыстық БЖСМ біріншілігінде Қармақшы ауданының намысын қорғаған мектеп гандбол бөлімшесінің спортшылары қола жүлдегер атанды.Жарыстың үздік ойыншысы Ібіраш Ақерке атанды. Команда жетекшісі Ш.Алихан, жаттықтырушы С.Сақтағанов, Ж.Сарбасов гандболшы қыздардың бағындырар белесі көп екенін алға тартады.

Қармақшылық гандболшы қыздар қола жүлдегер атанды

<a href="https://kyzylorda-news.kz/ru">Kyzylorda-news.kz.</a> ҚР Премьер-министрі Әлихан Смайыловтың төрағалығымен өткен Үкімет отырысында машина жасау саласын дамыту, &nbsp;бұқаралық спортты дамыту және салауатты өмір салтын қалыптастыру мәселелері қаралды.Министрлер аталған салаларды дамыту барысын баяндады. Сондай-ақ, бірқатар өңір әкімдері атқарылған жұмыстар туралы хабарлама жасады.Үкімет отырысынан кейін облыс әкімі Нұрлыбек Нәлібаев Премьер-министр берген тапсырмаларды пысықтау мақсатында жиын өткізді. &nbsp;Биылғы І жартыжылдықтың қорытындысы бойынша Қызылорда облысының машина жасау саласының кәсіпорындары 12,1 млрд. теңгеге қызмет көрсеткен.&nbsp;Былтырғы жылмен салыстырғанда өсім 12,9%-ды құрады. &nbsp;Аймақ басшысы облыстық кәсіпкерлік және өнеркәсіп басқармасына аталған саланың даму қарқынын төмендетпеу үшін тиісті шаралар қабылдауды тапсырды.&nbsp;Күн тәртібіндегі екінші мәселе бойынша Нұрлыбек Машбекұлы өңірде бұқаралық спортты дамытуға айрықша көңіл бөлінгенін айтты.<blockquote>«Салауатты өмір салтын насихаттау мақсатында өткен 7 айда 719 іс-шара өтіп, оларға 176 326 &nbsp;адам қатысты. Жыл сайын &nbsp;«Президенттік тестілеу» айлығын тапсыру дәстүрге айналған. Тиісінше «Президенттік», «Ұлттық» және «Бастапқы» деңгейді орындаған қатысушыларға төсбелгі мен куәлік табысталды. Биыл «Жазғы президенттік сынама айлығына», 100-ге жуық норматив қабылдау шарасына 199 747 адам қатысса, оның 797-сі "Президенттік" деңгей, 3310 адам &nbsp;"Ұлттық" және 4804 адам "Бастапқы" деңгей нормативін қорғады. Сол жағалаудан заманауи талаптарға сай &nbsp;7000 орындық стадион бой көтерсе, Үкімет басшысының қолдауымен құны 7 млрд.теңге болатын әмбебап спорт сарайын салу мәселесі шешім тапты. Мұнан бөлек, елді мекендерде 13 дене шынықтыру- сауықтыру кешені жыл көлемінде тапсырылады», - деді облыс әкімі.</blockquote>Осы бағыттағы жұмыстарды әрі қарай жетілдіру үшін облыстық мәдениет және спорт басқармасына Қызылорда қаласы және аудан әкімдерімен бірлесіп, елді мекендерде салынатын спорт алаңдарында кешенді спорттық шараларды жыл бойы ұйымдастыру жүктелді. Аймақ басшысы «Президенттік сынама» айлығын өткізуді жандандыру, республикалық «Денсаулық фестивалі» аясында көпшілік шараларды ұйымдастыру және мүгедектігі бар азаматтарды спортқа бейімдеу жұмыстарының деңгейін арттыру қажеттігін де атап өтті.Облыстық білім басқармасы жалпы білім беретін мектептер жанынан балалар мен жасөспірімдерге дене дайындығы клубтарын ашу туралы ұсыныс әзірлеуі тиіс. Сабақтан тыс уақытта мектептердің спорт залдарында тұрғындар спортпен тұрақты шұғылдануы үшін тиісті шаралар қабылдау тапсырылды.

Қызылордада бұқаралық спортты дамыту мәселелері талқыланды

<a href="https://kyzylorda-news.kz/ru">Kyzylorda-news.kz.</a> Шахмат – ақыл-ойды дамытатын спорт түрі. Адамның бәсекеге қабілеттілік қасиетінің дамуына бұл ойынның пайдасы өте көп. Соңғы уақытта аталған спорт түрі ел ішінде жыл сайын жоғары деңгейде өткізіліп келеді. Шиелі &nbsp;спортшылары да одан қалыс қалған емес. Оған Шиелі ауданының 95 жылдық мерейтойына орай орталық спорт кешенінде ерлер арасында шахматтан өткен аудандық турнир дәлел.Турнирге аудан әкімінің орынбасары Ерсұлтан Әпетов, аудандық мәдениет және спорт бөлімінің басшысы Аруна Өркенқызы, аудандық «Жастар ресурстық орталығының» қызметкерлері, зиялы қауым өкілдері мен жас жеткіншектер, БАҚ өкілдері қатысты.Турнир барысында аудан әкімінің орынбасары Ерсұлтан Әпетов сөз алып, турнирге қатысушы жандарға ақжарма тілегін білдірді.<blockquote>«Бұл фестивальді ауданымызда шахматты спорт түрі ретінде танымал ету және дамыту, салауатты өмір салтын насихаттау, сондай-ақ жас спортшылардың шеберлігін арттыру мен жас таланттарды іздеу мақсатымен өткізіп отырмыз. Бүгінде елімізде шахмат спорты өзіндік қайта түлеуді, танымалдылықтың жаңа кезеңін бастан кешіруде. Бұған жерлестеріміздің Азия және әлем чемпионатындағы нәтижелері ықпал етуде. Әрқайсыңызға біздің турнирде жеңіске жетуге шын жүректен тілектеспін», – деді Ерсұлтан Әпетов.</blockquote>Айта кетейік, шағын ғана шахмат тақтасы ойыншылар үшін көптеген айла-тәсілді орындайтын негізгі «соғыс алаңы» десек болады. Ойын кезінде егер шахматшы бірінші болып жүретін болса, онда ол ойынды бастау үшін 20 түрлі тәсілді пайдалана алады. Ал қарсыласы жауап қайтару үшін 400 түрлі төтеп беру жолдарын қарастыруға мүмкіндік туады. Сол себептен шахматшылар әр қадамын байыппен орындайды. Қалт кеткен ойыншының тасы, мүлт кетеді.Жарысқа қатысушы азаматтар Шиелі ауданының 95 жылдық мерейтойы аясында ұйымдастырылып отырған шараға алғыстарын айтып, алдағы уақытта да осындай турнир өз жалғасын тапса деген ұсыныстарын білдірді.Тартысты өткен турнирге 20-ға жуық ер азамат қатысты. Ал жарыс нәтижесі бойынша I орынды Олжас Азатжанұлы, II орынды Құдайберген Жұмабек, III орынды Қаһарман Ерболат иеленді. Турнирге қатысқан жеңімпаздар аудан әкімінің алғыс хаттарымен марапатталып, бағалы сый-сияпаттар табысталды.

Шиеліде ерлер арасында шахматтан аудандық турнир өтті

<a href="https://kyzylorda-news.kz/">Kyzylorda-news.kz.</a>&nbsp;Әр халықтың, әр аймақтың атын асқақтатқан атақты тұлғалары бұрын да болған, қазір де бар. Солардың бірі – көптің аузында «Ғабит палуан» атанып жүрген Ғабит Тәжбенов.&nbsp;Ол 1968 жылы қаңтар айының бірінші жұлдызында Шиелі ауданы, Бала би ауылында дүниеге келген. Әкесі Рантай мен анасы Алмагүлдің тәрбиесін көріп өскен Ғабит ес жиып, оңды-солын тани бастағанда-ақ спортқа үйірсек болды. Оның үстіне нағашы жұртында бар палуандық жас Ғабитті де айналып өтпеді. «Жігіттің жақсысы – нағашыдан» демекші, нағашы аталарында бар палуандықты өз бойынан байқағаннан кейін, онымен шындап шұғылданды. Әрине, спорт саласына өз бетінше келмеді. Қазақта «Бұлақ көрсең көзін аш» деген қанатты сөз бар емес пе? Көптің ішінде Ғабиттің бойындағы талантын алғашқылардың бірі болып байқаған – Әлімбай Дәулетов еді. Бойында бұла күштің қайнары бар екенін көрген Ә.Сағынбайұлы сол сәттен бастап Ғабиттің алғашқы ұстазына, жаттықтырушысына айналады. Жас спортшыны бесінші сыныптан бастап-ақ күреске шыңдап, боз кілемде белдесуге баулиды. Бүгінде алғашқы жаттықтырушысы әлі күнге дейін қазақтың қара баласы қандай ыждағаттылықпен жаттығу залына келіп, дайындалатынын еске алып отырады. Сірә, көптің ішінен суырылып шығып, ұстаздың есінде қалғаны Ғ.Тәжбеновтың спортқа деген сүйіспеншілігінің арқасында шығар.Боз кілемде белдескен алғашқы жылдарОрта мектепті тәмамдағаннан кейін Ғ.Тәжбенов Қызылорда қаласындағы қазіргі Қорқыт ата атындағы жоғары оқу орнына түседі. Бірақ ол студент атандым, жаңа өмір бастадым деп спорттан жырақ кетпейді. Керісінше, үлкен өмірдің баспалдағын аттаған соң спорттағы жетістігі де ұлғайып, палуандық өнері де дами береді. Кілемге сан рет шығып, облыс намысын абыроймен қорғап шығады. Ә дегенде қазақша күрестің айла-тәсілін меңгеріп, кейін классикалық күрес, самбоны үйреніп, қарсыластарына есе жібермейді. Ал, 1990 жылы Кентау қаласында қазақша күрестен өткен республика біріншілігінде 90 келі салмақ дәрежесінде чемпион атанып, спорт шеберінің нормасын орындайды. 1991 жылы Павлодарда самбодан екінші орынды иеленеді. 1992 жылы Қостанайда студенттер арасындағы универсиадада қазақша күрестен бірінші орынды жеңіп алады. Дәл осы жылы Ақтөбеде самбо күресінен республика чемпионаты атағын иемденді. Сол жылы Қарағандыда дзю-до күресінен республика біріншілігінде екінші орынды қанжығасына байласа, Жамбылда өткен классикалық күрестен республика чемпионы болды. 1993 жылы Қызылордада өткен республика біріншілігінде чемпиондық атақты жеңіп алып, биік тұғырға көтерілді. Сол жылы еліміздің командасы сапында Бұхарадағы турнирге қатысып, жүлдегер атанды. Әлде де тізімді жалғастыра беретін болсақ Ғабит Тәжбеновтің жеңіске жетіп, олжа салған кезі аз емес. Әрине, жеңіс бар жерде, жеңіліс те болады. Сол сияқты Ғ.Тәжбеновтің де бәсекеде бағы емес, бабы шапқан кездер де бар. Мұндай сәтте нар тұлғалы азамат сағын сындырмай, керісінше әр жеңілістен тәжірибе жинақтауға тырысады. Бұл туралы өзі «Жеңіліс тапқан кездер де кезігеді. Ондай да жағдайлар болған. Әсіресе, есімнен кетпейтіні Павлодар қаласында өтіп жатқан біріншіліктің финалында Нұрғалиев деген палуанды жеңіп тұрып, соңғы секундтарда жеңіліп қалдым. Әрине, қарсыластың оңайы болмайды. Сондықтан әрқашан сақ жүріп, әбжіл қимылдау керек» дейді бір сұқбатында түйе палуан.Спортта саңлақ, еңбекте ерБапкер болу – жігер мен табандылықты талап етеді. Сол себепті болашақ спорт саңлақтары өз жаттықтырушыларына үлкен сенім артады. Спортта саңлақ, еңбекте ер атанған Ғабит Тәжбеновтің бұл салада да бағы жанып, талай шәкірттің қанатын қомдап, биік белесті бағындыруға мұрындық болатыны белгілі. Себебі, ол өзі жастайынан спортпен айналысып, күрестің де айла-тәсілін толық меңгерген еді. Міне, осындай қабілет-қарымының арқасында ол 1993 жылы еңбек жолын Шиелі аудандық жасөспірімдер спорт мектебінің жаттықтырушысы болып бастайды. Арада бес жыл өткен соң осы спорт мектебінің оқу ісінің меңгерушісі қызметіне ауысады. Меңгеруші болып жеті жыл жұмыс істеген соң, 2005 жылы №9 Шиелі ауданының олимпиадалық резервтің мамандандырылған балалар-жасөспірімдер мектебінің директоры болып тағайындалып, бүгінге дейін осы қызметті табан аудармастан абыроймен атқарып келеді. Егер шәкірті жетістікке жетсе, ұстазына одан асқан қуаныш жоқ. Жаттықтырушы немесе спорт мектебінің директоры үшін де солай. Егер өз мектебіндегі оқушылар жеңімпаз атанып, бәйгеде оқ бойы оза шапса бақыт емес пе? Олай болса спорт мектебінің директоры Ғ.Тәжбенов үшін мұндай қуанышты сәттердің аз болмағанын сеніммен айта аламыз. Себебі, Шиелі ауданының намысын қорғап, туған жерге жүлдемен оралып жүрген жасөспірімдеріміз жеткілікті. Атап айтар болсақ, Д.Маратұлы, А.Мүптілда, А.Сансызбаева, С.Төрехан, Ұ.Әбдіғани, Н.Нұржанұлы, Ш.Төлебаева, Р.Ертай, А.Сейтман, Ж.Сейдахметов, Ж.Әбубәкір, С.Ажарбай, Ж.Әмірхан, И.Хазуев, А.Кенжебек, И.Серикбаева, М.Шадманұлы, Б.Төлепов, Ж.Әбубакиров, М.Қоқантаев сынды болашақ чемпиондардың барлығы білегі мығым бапкерлерден дәріс алып жүрген, Ғ.Тәжбенов басқаратын №9 Шиелі ауданының олимпиадалық резервтің мамандандырылған балалар-жасөспірімдер мектебінің шәкірттері. Ғабит Рантайұлының шәкірттерінің арасында бүгінде беделді қызмет иесі, елге сыйлы азаматтар да жеткілікті. Олардың қатарында Қазақстан-Қытай мемлекеттік шекарасындағы «Нұр жолы» (жүктік) шекаралық бақылау бөлімінің бастығы, майор – Нұрман Арысбаев, Шиелі аудандық спорт және дене шынықтыру бөлімінің басшысы Нариман Сапарбаев, Талаптан ауылдық округінің әкімі Амангелді Өмірәлі де бар.Ғабит Тәжбенов директорлық қызметте жүріп, өзін ұйымдастырушылық жағынан да жақсы таныта білді. Ол басшылық еткен жылдары қазақ күресінен жыл сайын турнир өтіп, ұлттық күрестің жалауын желбіреткен спортшылардың аты ауданға таныла бастады. Мәселен, 2006 жылдан бастап М.Шоқай атындағы республикалық турнир өткізілуде, ал Бала би баба атындағы турнир 2010 жылдан бастап ұйымдастырылып келеді. Тек қазақша күрестен ғана емес ауыр атлетикадан да турнир өткізуді Ғ.Рантайұлы қолына алған. Оның бастамасымен ауыр атлетикадан 2016 жылдан бастап Ы.Жақаев атындағы турнир болып жүр. Ал қазақ күресінен Қазақстан Республикасының чемпионаты жылына бір рет ұйымдастырылады. Осындай турнир мен үздіксіз жаттығудың арқасында жыл сайын мектептен 10-15 спорт шебері, 20-25 спорт шеберіне үміткер, 40-45 І разрядшы спортшылар дайындалуда.Әрине, спорт шеберлері дайындалып, байрақты бәсекеде топ жарып жатқаны жалғыз жаттықтырушының ісі емес. Қандай да бір оқушы уақыт өте келе чемпион атанып жатса, оның артында бір адамның ғана емес, бүтіндей бір ұжымның еселі еңбегі жатқаны мәлім. Осы орайда, №9 Шиелі ауданының олимпиадалық резервтің мамандандырылған балалар-жасөспірімдер мектебінің атын асқақтатып, болашақ чемпиондарды даярлауда тынымсыз еңбек етіп жүрген жаттықтырушыларды да айтпай кетпесек болмас. Ғабит Рантайұлы айналасына өзі секілді спортта саңлақ, еңбекте ер азаматтарды жинай білген. Олардың қатарында волейбол бөлімшесінің жаттықтырушысы Өтепберген Әбдраманов, ауыр атлет бөлімшесінің жаттықтырушысы Мұхаммед Тұрысбеков, таеквондо бөлімшесінің жаттықтырушысы Сүндетхан Смайл, қазақ күресі бөлімшесінің жаттықтырушысы Бауыржан Мырзалиев, греплинг бөлімшесінің жаттықтырушысы Нариман Елупановтың және директордың оқу ісі жөніндегі орынбасары Серік Рахметовтің есімі ерек.&nbsp;Еткен еңбек, төккен тердің жемісіБүгінде еңселі елуді бағындырған Ғабит Рантайұлы әлі де еселі еңбек етіп келеді. Оның түрлі марапат биігінен көрініп, көпке сыйлы болуы мамандық майданындағы жемісті жұмысын айғақтайды. Әңгіменің әлқиссасында айтқанымыздай нар тұлғалы азаматтың жетістігін санамалай берсек, оның олжа салған, марапат алған сәттері аз емес. Алайда, «Жақсының жақсылығын айт, нұры тасысын» деген бар емес пе? Осы орайда кейіпкеріміздің спорт мектебінің директоры болып қызмет атқарып жүргендегі жеткен жетістіктеріне тоқтала кетуді жөн санадық. Ол «Қызылорда облысының дене шынықтыру және спорт басқармасына 60 жыл» төсбелгісімен, «Ыбырай Жақаевқа – 125 жыл» медалімен, «Дене шынықтыру саласының үздік қызметкері» медалімен марапатталған. Сонымен қатар, 2012 жылы қазақ күресінен «Қазақстан Республикасының жоғары дәрежедегі ұлттық спорт төрешісі» атағын иеленеді. Сол жылы аудан әкімі болған Н.Нәлібаев Ғ.Рантайұлын «Үздік спортшы» номинациясымен марапаттайды. Қазақ күресінің өркендеуіне қосқан үлесі және сіңірген еңбегі үшін дүниежүзілік «қазақ күресі» федерациясының атынан дипломға ие болады.Қызметте абыройлы, отбасында сыйлыАдам ұрпағымен мың жасайды. Осы ретте тұғырлы тұлғаның ізін басар ұрпағы туралы айтпай кетпеске болмас. Ғабит Рантайұлы – отбасының ұйытқысы. Бір шаңырақтың астында зайыбы Гүлназ екеуі тату-тәтті өмір сүруі де тегіннен тегін емес. Отбасы шағын мемлекет болғандықтан барлығы оның қалай басқарылуына, басшылық жасауына байланысты. Ал біздің кейіпкеріміз қоғамда ғана емес, тұрмыста да үлкенді кішірейтпейді, кішіні алаламайды. Соның арқасында ұл мен қыз тәрбиелеп отыр. Қызы Гүлжанат Шиелі ауданы әкімдігінің есеп бөлімінде бас бухгалтердің көмекшісі қызметін атқарса, ұлы Райымбек «Әке көрген – оқ жонар» дегендей, әкесінің салған сара жолымен спортты таңдап, бүгінде ауданның ғана емес, еліміздің де атын асқақтатуда. Райымбек Ғабитұлы жас болса да талай бәсекеде бақ сынап, қазақ күресінен жасөспірімдер арасында екі мәрте Қазақстан Чемпионатының жеңімпазы, Әлем чемпионатының қола жүлдегері, ҚР спорт шебері атанды. Райымбектің жаттықтырушысы – әкесі Ғабит Тәжбенов. Бүгінде Райымбек аудандық спорт клубында жаттықтырушы болып қызмет атқаруда. Алдағы уақытта Райымбек те әкесі әрі жаттықтырушысы бағындырған белесті бағындырады деген сенімдеміз.

Ғабит Тәжбенов: Бапкер болу – табандылықты талап етеді

<a href="https://kyzylorda-news.kz/ru">Kyzylorda-news.kz.</a> Қазіргі уақытта мүмкіндігі шектеулі азаматтарға мемлекет тарапынан түрлі қолдау шаралары ұйымдастырылып келеді. Қоғамнан тыс қалмай, ел қатарлы игі шаралардың басы-қасынан табылып, олардың жүріп-тұруына әкімдік тарапынан «инватакси» көлігі де пайдалануға берілген болатын. Осындай қамкөңіл жандарды қолдау мақсатында Шиелі ауданының 95 жылдық мерейтойына орай орталық спорт кешенінде үстел теннисінен аудандық турнир өтті.Турнирге аудан әкімінің орынбасары Ерсұлтан Әпетов, аудандық мәдениет және спорт бөлімінің сектор меңгерушісі Нариман Сапарбаев, аудандық қоғамдық даму бөлімінің басшысы Кенжехан Есенбаев пен бірқатар сала мамандары қатысты.Аудан әкімінің орынбасары Ерсұлтан Әпетов сөз алып, турнирге қатысушы жандарға жылы лебізін жолдады.<blockquote>– Үстел теннисі елімізде жоспарлы түрде дамып келе жатқан ең бұқаралы және қол жетімді спорт түрлерінің бірі болып табылады. Қазіргі уақытта инфрақұрылыммен қамтамасыз етудің және ел өңірлерінде материалдық-техникалық базаны нығайтудың арқасында үстел теннисі клубтарында, спорт кешендерінде шұғылданушылардың көбеюі байқалуда. Сіздердің бастарыңызды қосып, аудандық турнирді өткізудегі мақсатымыз – осы бір спорт түрінің бұқаралық сипатқа ие болуына жағдай жасау және әуесқой теннисшілерді қолдау болып табылады. Сондықтан қиындықтарға қарамай салауатты өмір салтын ұстануға деген ұмтылыстарыңыз үшін ерекше алғысымды білдіремін. Турнирде қандай жетістікке жетсеңіздер де, сіздер біз үшін нағыз жеңімпаз жансыздар, – деді аудан әкімінің орынбасары.</blockquote>Мүмкіндіктің шектеулі екеніне қарамастан күш-жігердің шексіздігін дәлелдеген жандар игі шараға демеу болған мекеме басшыларына алғыстарын жеткізді. Алдағы уақытта да салауатты өмір салтын ұстану мақсатында спорттық шаралар ұйымдастырылып тұрса деген ұсыныс-пікірлерін де білдірді.Айта кетейік, орталық спорт кешенінде өткен іс-шараға 20-дам астам мүмкіндігі шектеулі жандар қатысты. Мұндай спорттық басқосудың негізгі мақсаты – мүмкіндігі шектеулі азаматтардың құқықтарын сақтау, әлеуметтік жағдайын жақсартуға және салауатты өмір салтын ұстануға айрықша назар аудару болып табылады.Сонымен қатар бүгін Шиелі ауданының 95 жылдығына орай ерлер арасында шахматтан жарыс өткізілді.Шараны аудан әкімінің орынбасары Ерсұлтан Апетов ашып беріп, жарысқа қатысушыларға сәттілік тіледі. Үздік ойын өрнегін көрсеткен ерлер ойлау қабілеттерінің ұшқыр екенін тағы бір дәлелдеді. Ойында қарсыластарына дес бермей, жеңімпаз атану үшін барын салуда. Қатысушылардың бұл ойынға бірінші рет келуі емес. Осыған дейін де көптеген интеллектуалды ойындардың көрігін қыздырып жүрген жандар.Уақытында талай сында жеңіске жеткен жарысқа қатысушылар мұндай игі шаралардан қол үзгісі келмейді. Өйткені, спорт – денсаулық кепілі.

Шиеліде үстел теннисінен турнир өтті

<a href="https://kyzylorda-news.kz/">Kyzylorda-news.kz.</a> Жапонияда өтіп жатқан су добынан әлем чемпионатында Қазақстан ерлер құрамасы Қытайдан басым түсті, деп хабарлайды ҚазАқпарат.Әлем чемпионаты 16-28 шілде аралығында Жапонияның Фукуока қаласында өтіп жатыр.Биыл он алтыншы мәрте жалауын көтерген дүбірлі додада ұлттық құрама А тобында АҚШ-тан 5:18, Австралиядан 6:22, Грекиядан 2:18 есебімен <a href="https://www.inform.kz/kz/alem-chempionaty-su-dobynan-kazakstan-erler-kuramasy-aksh-tan-zhenilip-kaldy_a4090521">жеңіліп</a>, төртінші орынды місе тұтты.Одан кейін 13-16 орындар үшін сайыста Қытайды 5:12 есебімен тізе бүктірді.Енді олар 25 шілдеде 13-орын үшін Аргентина құрамасымен кездеседі.Ел құрамасына биыл тоғызыншы мәрте қатысып отыр. Әзірге ең жоғары жетістігі - 1998, 2015, 2017 жылдарда алған 11 орын.Сондай-ақ, су добынан әлем чемпионатында еліміздің әйелдер құрамасы 15-орын үшін 24 шілдеде Аргентинамен шеберлік байқасады.Олар В тобында Испаниядан 5:24, Нидерландтан 2:30, Израильдан 6:17 есебімен жеңілсе, жарыстың келесі сатысында Қытайға 8:16 есебімен жол берді.

Әлем чемпионаты: Су добынан Қазақстан ерлер құрамасы Қытайды жеңіп кетті

<a href="https://kyzylorda-news.kz/">Kyzylorda-news.kz.</a> Көкшоқы мөлтек ауданындағы спорт комплексте Шиелі ауданының 95 жылдығына орай футболдан жасөспірімдер арасында турнир басталды.Турнирдің ашылу салтанатына аудандық мәдениет және спорт бөлімінің басшысы Аруна Өркенқызы, аудандық ішкі саясат бөлімінің басшысы Кенжехан Есенбаев және бұқаралық ақпарат құралдары өкілдері қатысты.Шара барысында аудан әкімінің орынбасары Алмат Алдабергенов сөз сөйлеп, турнирге қатысушы жасөспірімдерді спартакиаданың ашылуы салтанатымен құттықтады.<blockquote>– Жас ұрпақты спортқа баулу, салауатты өмір салтын ұстануына жағдай жасау Мемлекетіміз үшін қашан да маңызды бағыттардың бірі саналады. Себебі, спорт адамды төзімділікке, табандылыққа үйрететін үлкен өмір мектебі секілді. Сондықтан Баршаңызды салауатты өмір салтын ұстанып, спортпен тұрақты шұғылдануға шақырамын. Біз өз тарапымыздан Сіздерге қажетті барлық жағдайды жасайтын боламыз. Атап айтар болсам, жуырда Шиелі кентінен дене-шынықтыру сауықтыру кешені ашылмақ. Аталған кешеннің ашылуы аудандағы бұқаралық спорттың дамуына тың серпіліс береді деген ойдамын, – деді &nbsp;Алмат Алдабергенов.</blockquote>Аталған турнирге кент және ауылдық округтерден арнайы 7 команда жасақталып, өзара сынға түсіп, бақ сынамақ. Сонымен бірге, турнирге қатысушы спортшылар намысты қолдан бермей, ойынды қыздыра түсуде.

Шиелі ауданының 95 жылдығына орай футболдан жасөспірімдер арасында турнир өтті

<a href="https://kyzylorda-news.kz/">Kyzylorda-news.kz.</a> Бүгін Қызылорда облысы әкімі аппаратының басшысы Шахмардан Байманов 3-8 шілде аралығында Астана қаласында отырып ойнау волейболынан өткен Азия чемпионатында ҚР ұлттық құрама сапында өнер көрсетіп, күміс жүлдегер атанған спортшыларды қабылдады.Қабылдау барысында аппарат басшысы Азия чемпионатының жүлдегерлерін жеңістерімен құттықтады. Сондай-ақ, оларға алғыс хат табыстап, келер жылы Франция астанасы Парижде өтетін Паралимпиада ойындарында жоғары нәтижеге қол жеткізетіндіктеріне сенім білдіріп, сәттілік тіледі.Кездесуде Шахмардан Асқарұлы өңірімізде мүмкіндігі шектеулі жандардың спортпен айналысуына барынша жол ашылғандығын айтты. Сондай-ақ, олардың спорттың бірнеше түрлері бойынша паралимпиадаларға қатысып, түрлі жаттығу орындарында шынығып жүргендігін тілге тиек етті. Сонымен бірге, облыстағы мүгедектерге арналған спорт клубтарына әкімдік тарапынан әрдайым қолдау болатындығын және өз кезегінде алдағы уақытта клуб базасымен арнайы барып танысатындығын жеткізді.Соңғы жылдары Сыр спортында серпін жоғары. Айта кетер жайт, аймақтың спорт саласын дамытуда мүмкіндігі шектеулі азаматтардың да үлесі зор.&nbsp;

Қазақстан және Қызылорда облысының жаңалықтары: Спорт