<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Қазалы ауданына жұмыс сапары барысында жаңадан салынған «Әмір Арена» спорт кешенінің ашылу рәсіміне қатысты.Салтанатты шараға Парламент Сенатының депутаты Наурызбай Байқадамов, жауапты сала басшылары, еңбек ардагерлері мен аудан тұрғындары келді.Аймақ басшысы Қазалы ауданының әлеуметтік-экономикалық дамуындағы жетістіктерге және Сыр спортындағы жаңалықтарға тоқталды.<blockquote>«Өздеріңізге белгілі, Президентіміздің, Үкіметтің қолдауымен Сыр өңірінде мақсатты бастамалар қолға алынып, ауқымды жобалар жүзеге асуда. Екі жыл бұрын облыс бюджеті 364 млрд. теңге болатын, бүгінде 744 млрд. теңгеден асты. Бұл қаражат аймақтың ең өзекті деген мәселелерін шешуге бағытталды. Ауқымды инфрақұрылымдық жобаларды жүзеге асыру арқылы тұрғындардың өмір сүру сапасын арттыруға баса көңіл бөлінді.Өткен жылы Қазалы ауданының бюджеті 13 млрд. 600 млн. теңге болса, биыл 17 млрд. 600 млн. теңгеге жетіп, 18,7 пайызға өсті. Әйтеке би кенті мен Қазалы қаласының аралығындағы аудандық маңызы бар автомобиль жолы қайта жаңғыртылуда, 29 шақырым жолдар мен көшелер жөнделуде.«Ауыл – ел бесігі» бағдарламасы аясында кенттегі Жанқожа батыр, Әйтеке би көшелерін қайта жаңғыртуға қаржы бөлінді. Үш елді мекеннің (Әйтеке би кенті, Қазалы қаласы және Қожабақы ауылы) электр желілері жаңғыртудан өтуде.Аудан орталығында «Руханият орталығы», Жанқожа батыр ауылында «Жайлы мектеп» ұлттық жобасымен 300 орындық мектеп құрылысы қарқын алды. Биыл Әйтеке би кенті мен Қазалы қаласының аралығына салынуы жоспарланған 600 орындық мектептің құрылысы басталады.Соңғы жылдары аймағымызда заманауи спорт нысандары көптеп бой көтеруде. Өткен жылы 13 спорт кешені салынып, оның 9-ы пайдалануға берілді. Бүгін өздеріңізбен бірге «Әмір Арена» жаңа спорт кешенін ел игілігіне табыстаймыз. Қазалылық жас жеткіншектер осы кешенде жаттығып, шарболаттай шынығып, көк байрағымызды көкте желбіретсін!», – деді Н.Нәлібаев.</blockquote>Салтанатты шарада спорт саласының қызметкерлері мен ардагерлеріне облыс әкімінің Алғыс хаты табысталып, облыстық мәслихат депутаты, «Қазалы кәсіпкерлер одағы» қоғамдық бірлестігінің төрағасы, «Тілеп» ЖШС директоры Ибайдулла Тілеп құттықтау лебізін жеткізді.Жеке кәсіпкер Шынар Өтегенованың демеушілігімен салынған 200 адамдық бұл кешенде жастардың футбол, баскетбол, волейбол, гандбол және күреспен шұғылдануына барлық жағдай жасалған.Фото: Қызылорда облысы әкімінің баспасөз қызметі

Қазалы ауданында «Әмір Арена» спорт кешені ашылды

<a href="https://kyzylorda-news.kz/">Kyzylorda-news.kz</a>&nbsp; 23 қазан мен 3 қараша аралығында Черногорияның&nbsp;Будвада қаласында бокстан жастар арасындағы әлем чемпионаты өтеді, деп жазады&nbsp;<a href="https://egemen.kz/">Egemen.kz</a>.Бокстан Қазақстан әйелдер, ерлер құрамасы әлем чемпионаты алдындағы дайындығын Алматы облысында пысықтап жатыр. &nbsp;Бапкерлер штабы әлем біріншілігіне қатысатын спортшылардың есімін жария етті.&nbsp;Аға бапкер Мақсат Бақтыбазаров Будвадаға бастап баратын ерлер құрамасы:&nbsp;48 келі. Диас Берікбай 51 келі. Бексұлтан Боранбек 54 келі. Бауыржан Мұратов 57 келі. Жансері Көшербаев 60 келі. Алексей Хаванцев 63.5 келі. Ахмет Үсен 67 келі. Төрехан Сабырхан 71 келі. Өнер Сейілхан 75 келі. Санжарәлі Бегалиев 80 келі. Мадияр Бексұлтанов 86 келі. Бақытжан Айтмұханов 92 келі. Расул Асанханов +92 келі. Аслан ЕділбайұлыЖастар арасындағы әлем чемпионатына қатысатын қыздар құрамасы:48 келі. Әнел Абдрасилова 50 келі. Елянур Турганова 52 келі. Бағжан Отынбай 54 келі. Аяжан Сыдық 57 келі. Аяжан Ермек 60 келі. Толғанай Қасымхан 63 келі. Аружан Жаңабаева 66 келі. Ұлдана Таубай 70 келі. Мария Сидоренко 75 келі. Шұғыла Нәлібай 81 келі. Аружан Зейноллаева +81 келі. Панар СейітханқызыБокстан Қазақстан әйелдер құрамасын&nbsp;Жангелді Ахметов баптайды.Фото: olympic.kz

Қазақтың жас боксшылары әлем чемпионатында бақ сынайды

<a href="https://kyzylorda-news.kz/">Kyzylorda-news.kz</a> Бүгін Қызылорда қаласындағы «Евразия» спорт кешенінде қазақ күресінен арнаулы және құқық қорғау органдары, күштік құрылымдар арасында ҰҚК Төрағасының жүлдесіне арналған «Ұлттық Қауіпсіздік Барысы» республикалық жарысы ұйымдастырылды.Облыс әкімі Нұрлыбек Нәлібаев қатысушыларға сәттілік тілеп, Сыр спортының жетістіктерін атап өтті.<blockquote>«Елімізде тұңғыш рет қазақ күресінен арнаулы және құқық қорғау органдары, күштік құрылымдар арасында Ұлттық қауіпсіздік комитеті Төрағасының жүлдесіне арналған «Ұлттық Қауіпсіздік Барысы» дүбірлі додасы басталды. Ерекше маңызы бар республикалық жарыстың біздің өңірден бастау алғанына ризашылығымызды білдіреміз.Ел спортының дамуына Сыр спортшыларының қосқан үлесі мол. Биыл ұлттық құрамаға облыстан 690 спортшы қосылды. Жыл басынан бері аймақ спортшылары республика чемпионаттары мен кубоктарынан 668 медаль жеңіп алса, Әлем және Азия чемпионаттары мен кубоктарынан 93 медаль иеленді. Астана қаласында өткен V Дүниежүзілік көшпенділер ойындарында ел намысын қорғағандардың барлығы дерлік жоғары нәтиже көрсетті.Спорт – сан қырлы сала. Ондағы мәселелер мемлекеттің ғана емес, жан-жақты қолдау арқылы шешіледі. Мұны ет-жүрегімен сезінген жанашыр жерлестеріміздің арқасында аймағымызда көптеген жаңа нысан құрылысы жүруде, алдағы уақытта да ауқымды жоспарымыз бар.Жуырда ғана сол жағалаудан Үстел теннисі орталығын ел игілігіне табыстадық.Бүгінде халықаралық стандарттарға сай 10 мың орындық Орталық стадионның құрылысы қарқынды жүруде. Жастар мен балаларды үйірмелермен қамтуға мүмкіндік беретін «Қызылорда Арена» көпбейінді спорт кешені салынады. Сондай-ақ, 10 кешеннің құрылысы басталды.Көшпелілер күресінің бас­ты қағидасы қашанда әділеттілік болған. Сондықтан да қазақ күресінің тәрбиелік маңы­з­ы зор. Бүгін күш-қайраттарыңызды көрсетіп, жарыс көрігін қыздырыңыздар! Қорқыт бабамыздың рухы дем беріп, батырлар мен баһадүрлердің киесі қолдасын! Бақ пен бап қатар шапсын деп тілеймін! Ел іргесі берік, Тәуелсіздігіміз тұғырлы болғай!», – деді Н.Нәлібаев.</blockquote>ҚР ҰҚК Кадрлар департаментінің бастығы Алмас Бекішов пен ҰҚК Қызылорда облысы және Байқоңыр қаласы бойынша департаментінің бастығы Азамат Ищанов адамның рухын асқақтататын, ар-намыс пен қара күшті бойына тоғыстырған нағыз ерлер сыналатын сайыста палуандарға сәттілік тіледі. Жарыс қонақтары қатарында «Қазақстан барысының» жеңімпаздары Бейбіт Ыстыбай мен Мақсат Исағабылов бар.Айтулы бәсекеге 9 командадан, атап айтсақ, ҚР Ұлттық қауіпсіздік комитетінен, Ішкі істер, Төтенше жағдайлар министрліктерінен, ҰҚК Шекара қызметінен, Мемлекеттік күзет қызметінен, Сыбайлас жемқорлыққа қарсы іс-қимыл агенттігінен, мамандандырылған күзет қызметі басқармасынан, Қылмыстық түзеу жүйесі комитетінен 45 спортшы қатысуда.Жарыс 66, 74, 82, 90, 100 келі салмақта командалық есеп бойынша өткізіледі. Палуандарға 10 төреші әділ бағасын береді. Олардың қатарында ұлттық дәрежедегі төрешілер бар. Бозкілемдегі бәсеке кешке дейін жалғасады.<img src="https://knadmin.beoblood.kz/uploads/sport_1_ecdb7db4b3.jpg" alt="спорт 1.jpg"><img src="https://knadmin.beoblood.kz/uploads/sport_2_1f0ecac1d1.jpg" alt="спорт 2.jpg">Фото: Қызылорда облысы әкімінің баспасөз қызметі

Сыр елінде «Ұлттық қауіпсіздік барысы» республикалық жарысы өтуде

<a href="https://kyzylorda-news.kz/ru">Kyzylorda-news.kz</a> Бәйгеқұм ауылдық округінде ХІХ ғасырда өмір сүрген әйгілі би, Бала би бабаға арнап ұрпақтары атынан ас берілді. Бәйгеқұм ауылындағы арнайы дайындалған алаңда мәдени-көпшілік шаралар өткізілді.Шара барысында аудан әкімі Айтбай Жандарбеков сөз сөйлеп, Жетісу мен Сарарқадан, Шығыс пен Батыстан, Оңтүстік мен Сыр жағасынан келген қонақтарды және аудан тұрғындарына ризашылығын білдіріп, бабаларға етілген құрметтің бір көрінісі ретінде өткізіліп отырған осындай іс-шара сәттілік тіледі. Алаңға киіз үйлер мен шатырлар тігіліп, барша тұрғындар мен қонақтарға арнап ас берілді.Сонымен қатар, баба рухына арнап құран бағышталып, «Жастар» театрының қойылымы және республикаға белгілі ақындардың қатысуымен ақындар айтысы, жазба ақындар мүшәйрасы, ұлттық спорт түрлерінен, оның ішінде қазақша күрестен палуандар сайысы өткізіліп, ат жарыс бәйге ұйымдастырылды.

Бәйгеқұм ауылында «Бала би» баба рухына арнап ас берілді

<a href="https://kyzylorda-news.kz/">Kyzylorda-news.kz</a> Бүгін Қызылордада Қала күні мен «Алтын күз-2024» дәстүрлі мерекесі аясында ұлттық ат спорты бәйгесі ұйымдастырылды. Дүбірлі бәйгені облыс әкімі Нұрлыбек Нәлібаев, Парламент Сенаты мен Мәжілісінің депутаттары тамашалады.Аймақ басшысы жарысқа қатысушыларды құттықтап, сәттілік тіледі.<blockquote>"Берекесімен, молшылығымен келетін күз мезгілінде халқымыз егінін жинап, қамбасын толтырып, мәре-сәре болып, бір жасап қалады. Егінім бітік шықты деп, қуаныш тойын тойлап, ат шаптырып, бәйге береді.Ертеден жеткен осы дәстүрімізді біз де жалғастырып келеміз.Баршаңызды «Алтын дән-2024» ұлттық ат спорты бәйгесінен облыстық жарыстың ашылуымен құттықтаймын!Қыркүйек айында Мемлекет басшысының бастамасымен өткен V Дүниежүзілік көшпенділер ойындарында 4 саңлағымыз бақ сынап 2 алтын, 1 қола медаль жеңіп алды. Осылайша Сыр спортының жылнамасын жаңартты, этноспорттың дамуына үлес қосты.Бүгінгі бәйге Сыр өңірінің мерейін асырып, ұлттық спорттың өркендеуіне мол мүмкіндік береді деп сенемін!Төзім мен жігер, қайрат пен мінез сынға түскен бәйгеде тұлпарлардың тұяғы талмасын, арғымақтар аламанда арындасын! Шабандоздардың тақымы тастай болсын!", - деді Нұрлыбек Нәлібаев.</blockquote>Жарысқа қатысушыларға ауыл шаруашылығы саласының ардагері Нұрлыбай Ұлықпанұлы ақ батасын берді.Бәйге жеңімпаздарына қаржылай сыйлықтар тағайындалған.Аламан бәйге, 25 шақырым:І орын – 3 000 000 теңге,ІІ орын – 2 000 000 теңге,ІІІ орын – 1 000 000 теңге.Тоқ бәйге, 15 шақырым:&nbsp;І орын – 1 500 000 теңге,ІІ орын – 1 000 000 теңге,ІІІ орын - 500 000 теңге.Құнан бәйге, 11 шақырым:І орын - 1 200 000 теңге,ІІ орын – 800 000 теңге,ІІІ орын - 500 000 теңге.Тай жарыс, 5 шақырым:І орын – 500 000 теңге,ІІ орын – 300 000 теңге,ІІІ орын – 200 000 теңге.<img src="https://knadmin.beoblood.kz/uploads/bajge_1_13cf791c16.jpg" alt="байге 1.jpg"><img src="https://knadmin.beoblood.kz/uploads/bajge_2_b3edd62317.jpg" alt="байге 2.jpg">Фото: Қызылорда облысы әкімінің баспасөз қызметі

"Алтын күздің" ұлттық ат спорты бәйгесі тартысты өтті

<a href="https://kyzylorda-news.kz/">Kyzylorda-news.kz</a>&nbsp; Жасөспірімдер арасында ұлттық спортымызды насихаттау, балаларды саламатты өмір салтына баулу мақсатында шаһарда биыл үшінші мәрте «Бала барыс - 2024» байрақты бәсекесі ұйымдастырылды.&nbsp;«Бала барыс-2024» турнирінің дәстүрлі сипат алуы қазақ күресінің келешегі кемел, болашағы жарқын боларының бір дәлелі.Облыс аумағынан 32 жасөспірім қатысқан жас балуандар додасы «Евразия» спорт кешенінде өтті.&nbsp;Тартысты бәсекенің нәтижесінде қызылордалық «Балмолдин» лақап атын иеленген Исламбек Балмолдаев ІV орын 25 мың теңге иемденсе, ІІІ орын 50 мың теңге және «Қола белбеу» «Көкбөрі» лақап атын иеленген Жалағаш ауданынан Ерсұлтан Сұлтанбековке бұйырды. «Ошақты» Жалағаш ауданынан Әлинұр Сәрсенбай ІІ орын 100 мың теңге мен «Күміс белбеуді» қанағат тұтса, І орын 200 мың теңге және «Алтын белбеуді» қармақшылық «Семетей» Әлихан Әлиасқаров жеңіп алып, арнайы жасалған алтын «Тайтұяқты» қанжығасына байлады. Осылайша үш дүркін "Бала барыс" атағын иемденді.<img src="https://knadmin.beoblood.kz/uploads/462461502_3727537664179631_915747406153797890_n_d6dde122e6.jpg" alt="462461502_3727537664179631_915747406153797890_n.jpg"><img src="https://knadmin.beoblood.kz/uploads/462363905_3727537637512967_3605896635940365948_n_e89fc130a0.jpg" alt="462363905_3727537637512967_3605896635940365948_n.jpg"><img src="https://knadmin.beoblood.kz/uploads/462463519_3727537577512973_4327047991652980347_n_82566d0e55.jpg" alt="462463519_3727537577512973_4327047991652980347_n.jpg">

 Жас балуандар боз кілемде белдесті

<a href="https://kyzylorda-news.kz/">Kyzylorda-news.kz</a> Орта салмақта WBO және IBF тұжырымдары бойынша әлем чемпионы Жәнібек Әлімханұлы (15-0, 10 КО) бүгін жаңазеландиялық Андрей Михайловичтен басым түсті. Қазақстандық былғары қолғап шебері қарсыласымен тартысты жекпе-жек өткізді деп хабарлады <a href="https://kaz.inform.kz/news/zhanbek-almhanuli-austriyalik-andrey-mihaylovichten-basim-tust-ee9571/">KAZINFORM</a>12 раундқа жоспарланған кездесуде отандасымыз айқын басымдылық танытты. Бірінші раундта Андрей Михайловичті нокдаунға түсірді. Ал, тоғызыншы раундта төреші жекпе-жекті тоқтатты. Осылайша Жәнібек қарсыласын Сиднейде сан соқтырып, чемпиондық белбеуін сақтап қалды.&nbsp;Айта кетсек, бұл жекпе-жек шілде айында өтуі тиіс болатын. Ол уақытта Жәнібек Әлімханұлы ауруханаға түсті. Бұл жөнінде боксшы кейіннен твиттер парақшасында былай деп жазды:<blockquote>«Қолдауларыңызға рақмет! Менде қазір барлығы дұрыс. Бірнеше апта салып араға қайта қосыламын. Бастысы мен орта салмақта өнер көрсете беремін. Менің бұл жақта бітпеген шаруаларым бар», - деп жазды Әлімханұлы.</blockquote>Бүгінгі бокс кеші Аустралияның Сидней қаласындағы The Star аренасында өтті. 25 жастағы Андрей Михайлович кәсіпқой рингте 21 жекпе-жек өткізіп, бірде-бір рет жеңілмеген. 13 кездесуін нокаутпен аяқтаған 21-0, 13 KO. Қазірде Халықаралық бокс федерациясы (IBF) рейтингінде 3 орында тұр.Фото: No Limit Boxing

Жәнібек Әлімханұлы Сиднейдегі бокс кешінде Андрей Михайловичті нокаутпен жеңді

<a href="https://kyzylorda-news.kz/">Kyzylorda-news.kz</a> Қала күні қарсаңында Сыр елінде бірқатар әлеуметтік нысан ел игілігіне табысталды. Соның бірі – үстел теннисі орталығы.Облыс әкімі Нұрлыбек Нәлібаев жаңа орталықтың салтанатты ашылу рәсіміне қатысып, қала тұрғындарын құттықтады.Мерекелік іс-шараға «Самұрық-Қазына» АҚ басқарушы директоры Ғибрат Ауғанов, жауапты салалардың, құқық қорғау органдарының басшылары, Халықаралық Қарттар күні қарсаңында аймақ басшысының арнайы шақыртуымен барлық ауданнан келген ардагерлер, зиялы қауым өкілдері қатысты.<blockquote>«Бүгін ел игілігіне берілген үстел теннисі орталығы Сыр спортына жаңа серпін әкеліп, жеңімпаздар сыйлайды деп сенеміз. Сүйікті Қызылордамыздың келбетіне көрік қосатын әсем ғимараттардың қатарын толықтырған орталықтың қолданысқа берілуі баршаңызға құтты болсын!Облыстың қарқынды дамуына қажетті әлеуметтік нысандардың салынуына зор үлес қосқан «Самұрық-Қазына» акционерлік қоғамы директорлар кеңесінің мүшесі, басқарма төрағасы Жақыпов Нұрлан Қаршығаұлына және «Самұрық-Қазына Траст» корпортивтік қорының бас директоры Адиева Альфия Дәулетқалиқызына Сыр жұртшылығы атынан ризашылық білдіремін. Сонымен қатар, орталықтың құрылысын сапалы жүргізген «Дәнекер» жауапкершілігі шектеулі серіктестігіне алғыс айтамыз. Еліміздің көк байрағы дүбірлі додаларда биікте желбіреп, спортшыларымыз жеңіс тұғырынан көрінсін!», – деді Нұрлыбек Машбекұлы.</blockquote>Іс-шарада «Самұрық-Қазына» АҚ басқарушы директоры Ғибрат Ауғанов, облыстық үстел теннисі федерациясының төрағасы, Қазақстанның Еңбек Ері Абзал Ералиев, Қызылорда облысының Құрметті азаматы Самұрат Имандосов сөз сөйлеп, игі тілек білдірді. Мердігер «СК Дәнекер» ЖШС құрылысшылары облыс әкімінің Алғыс хатымен марапатталды.Халықтың сұранысына сәйкес үстел теннисі орталығын салуға облыстық бюджеттен 2,5 млрд теңге бөлініп, құрылыс биыл басталды. Оған «Samruk Kazyna Trust» әлеуметтік жобаларды дамыту қоры 900 млн теңге қаржы бөлді. Орталықта 16 үстел теннисі орналасқан ойын алаңы, 350 көрерменге арналған орындар, жаттығу залы мен әкімшілік бөлмелер бар. Мұнда 31 қызметкер жұмыс жасайды.<img src="https://knadmin.beoblood.kz/uploads/tennis_1_50bf1ed36b.jpg" alt="теннис 1.jpg"><img src="https://knadmin.beoblood.kz/uploads/tennis_2_c714c7992e.jpg" alt="теннис 2.jpg"><img src="https://knadmin.beoblood.kz/uploads/tennis_4_21b08af2e2.jpg" alt="теннис 4.jpg"><img src="https://knadmin.beoblood.kz/uploads/tennis_3_7e3a188c8a.jpg" alt="теннис 3.jpg">Фото: Қызылорда облысы әкімінің баспасөз қызметі

Қызылордада үстел теннисі орталығы ашылды

<a href="https://kyzylorda-news.kz/">Kyzylorda-news.kz</a> 8-13 қыркүйек аралығында Астанада өткен 5-ші Дүниежүзілік көшпенділер ойындарына 89 елден 2500-ден астам спортшы қатысты.Бұл шара Қазақстан үшін ғана емес, бүкіл этноспорт әлемі үшін де жылдың басты оқиғаларының бірі болды.&nbsp;5-ші Дүниежүзілік көшпенділер ойындарын ұйымдастыру дирекциясының басшысы Наиль Нұров бірнеше мәрте атап өткендей, Қазақстанда Ойындарды өткізудің негізгі мақсаты – ұлттық спорт түрлерін дамытып, ұлттық спорттық дәстүрлерді жаңғырту.&nbsp;<blockquote>«Біз бұл мерекені қазақстандықтар мен шетелдік қонақтар үшін ұйымдастырдық. Басты міндетімізге қол жеткіздік – өскелең ұрпақтың ұлттық спорт түрлеріне деген қызығушылығын арттыра алдық және халқымыздың бай мәдениетін көрсеттік. Бүгінде облыстық спорт басқармаларының телефон желілері көкпар, бәйге және басқа да ұлттық спорт түрлеріне қатысуға ниет білдірген балалардың ата-аналарының қоңырауларынан босамай жатыр. Біздің көшпенділер ойындарының чемпиондарын – көкпаршылар мен балуандарды көшеде танитын болды. Олар жастарымызға үлгі боларлық қарапайым, бірақ ел намысын қорғап жүрген спортшылар»,&nbsp;– деді Наиль Нұров.</blockquote>Ойындардан кейін елде балалар мен жастардың ұлттық спорт түрлеріне қызығушылығы күрт өсті. Өңірлерде ұлттық спорт түрлері секцияларына қатысуға ниет білдірушілердің қатары көбейді.&nbsp;<blockquote>«Біздің орталық биылғы мамыр айынан бері жұмыс істейді, бірақ балалардың қызығушылығы дәл Көшпенділер ойындарынан кейін күрт артты. Қыркүйектің өзінде ұлттық спорт секцияларына 50-ден астам адам жазылды. Біз тоғызқұмалақ, құсбегілік, қазақ күресі бойынша қосымша топтар аштық. Қараша айында дәстүрлі садақ ату секциясын іске қосу жоспарымызда»,&nbsp;– деді Алматы қаласындағы клуб жетекшісі Нұрлан Оспанов.</blockquote>Абай облысының «Ұлттық және ат спорты түрлері орталығы» спорт клубының директоры Болат Ақжігітовтің айтуынша, өңірде ұлттық спорт түрлерімен айналысқысы келетіндердің саны күрт өскен. Теңге ілу секциясы ашылған, сондай-ақ, жақында жамбы ату бойынша топ құрылады деп күтілуде. <img src="https://syrboyi.kz/wp-content/uploads/2024/09/1727699823_5.jpg" alt="" srcset="https://syrboyi.kz/wp-content/uploads/2024/09/1727699823_5.jpg 450w, https://syrboyi.kz/wp-content/uploads/2024/09/1727699823_5-300x199.jpg 300w" sizes="(max-width: 450px) 100vw, 450px" width="450" loading="lazy"><blockquote>«Ойындар аяқталғаннан бері екі аптаға жуық уақыт өтті.&nbsp;Соған қарамастан біз әлі де қазақстандықтар мен шетелдік қатысушылардан кері байланыс алып жатырмыз.&nbsp;5-ші Дүниежүзілік көшпенділер ойындары көшпенділер өркениетінің бай мұрасын көрсетіп қана қоймай, шетелдік қонақтарды қазақ мәдениеті, ұлттық тағамдары және ұлттық спорт түрлерімен таныстыруға мүмкіндік берді. Мұндай іс-шаралар Қазақстан үшін ұлттық болмысымызды сақтауға және дұрыс ұлттық идеологияны қалыптастыруға қажет»,&nbsp;– деп атап өтті Наиль Нұров.</blockquote>Қазақстан Республикасы Туризм және спорт министрлігінің мәліметінше, Ойындар кезінде тек Астананың өзінде eQonaq жүйесі арқылы 12,5 мың шетелдік турист тіркелген. Қазіргі уақытта Дүниежүзілік көшпенділер ойындары еліміздің экономикасына шамамен 300 миллион теңге кіріс әкелді. Дегенмен, нақты сандарды шағын және орта кәсіпорындар салық есептерін тапсырғаннан кейін білуге болады.&nbsp;«Алдын ала болжам жасағанамыздай,&nbsp;5-ші Дүниежүзілік көшпенділер ойындарына Қазақстаннан, жақын және алыс шетелден 100 000-ға жуық турист қатысады деп күткен едік. Алайда, жарыстар мен этноауыл аумағын және ғылыми конференцияны 250 000-нан астам елорда тұрғындары мен қонақтары тамашалады.&nbsp;Әлеуметтік-мәдени жобаны ұйымдастыру кезінде біз қаржылық жағын естен шығармадық, бірақ басты мақсатымыз ол емес еді. Біз бұл тұрғыда да күткенімізден асып түстік.&nbsp;Қазірге түскен қаржы туралы айтуға ерте. Дегенмен, үлкен туристік ағын шағын және орта бизнеске қолдау көрсетті.&nbsp;Қаланың барлық қонақүйлері толып, мейрамханалар мен кафелер қонақтарға лық толды, барлық мерч, кәдесыйлар және ұлттық киімдер сатылып кетті, ең танымал жарыстарға билеттер толықтай сатылды.&nbsp;Айта кетерлігі, этноауыл аумағындағы сауда орындары тегін негізде ұйымдастырылды. Іріктеу кезінде басты талап – жоғары сапа болды. Сондай-ақ, Дүниежүзілік көшпенділер ойындарын Қазақстанда өткізу ұзақ мерзімді инвестиция екенін атап өткім келеді. Қазақстан бюджеттік қаражат есебінен көшпенділер ойындарына қатысқан шетелдік спортшылардың шығындарын өтеді. Енді, өз кезегінде, қазақстандық спортшылар алдағы Дүниежүзілік көшпенділер ойындарына тегін қатысатын болады»,&nbsp;– деді Дирекция басшысы.&nbsp;5-ші Дүниежүзілік көшпенділер ойындарының арқасында жүз мыңнан астам турист Қазақстан мен оның бірегей мәдениетімен танысып, жылдың ең маңызды оқиғасының бір бөлшегіне айналып үлгерді.<img src="https://knadmin.beoblood.kz/uploads/1727699823_5_07880a26c7.jpg" alt="1727699823_5.jpg">Фото: ашық дереккөз

Ұлттық спорт түрлеріне қызығушылықты арттыру мақсатымыз орындалды

<a href="https://kyzylorda-news.kz/">Kyzylorda-news.kz</a> Қызылордалық ауыр атлет Ерасыл Сәулебеков Испанияның Леон қаласында өтіп жатқан жастар арасындағы әлем чемпионатында жүлдегер атанды.81 келіге дейінгі салмақта Сәулебеков қоссайыста (154+190) 344 келі нәтижемен өнер көрсетті. Осы нәтиженің арқасында Ерасыл серпе көтеруде күміс, құрама сайыста қола медальді жеңіп алды.Айта кетейік, қызылордалық спортшы 73 келі салмақта 17 жасқа дейінгілер арасында екі дүркін әлем чемпионы атанды.Фото: Instagram/wf_rk<img src="https://knadmin.beoblood.kz/uploads/ajdar2_29c3d7c251.jpeg" alt="айдар2.jpeg">

Қызылордалық спортшы ауыр атлетикадан әлем чемпионатында қола жүлде алды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Сырдария ауданы, Тереңөзек кентінде мемлекет және қоғам қайраткері Елеу Көшербаевты еске алуға арналған волейболдан ХХV халықаралық турнирдің салтанатты ашылу рәсіміне қатысты. Іс-шараға ҚР Парламенті Мәжілісінің депутаты Мұрат Ергешбаев, Елеу Көшербаевтың ұрпақтары, мемлекет және қоғам қайраткерлері келді.Жарысқа Өзбекстаннан, Астана, Шымкент қалалары мен Ақтөбе, Алматы, Жамбыл, Түркістан, Шығыс Қазақстан және Қызылорда облыстарынан 25 команда қатысуда.Аймақ басшысы турнир қатысушыларына ізгі тілегін білдірді.<blockquote>«Президентіміз Қасым-Жомарт Кемелұлы Олимпиада ойындарының жүлдегерлерімен кездесуде: «Бұқаралық спортты дамыту арқылы біз кәсіби спортқа жол ашамыз және ең бастысы, ұлт саулығын жақсартамыз», – деген болатын.Мемлекет басшысының, Үкіметтің қолдауымен және кәсіпкерлердің демеушілігімен соңғы жылдары аймағымызда заманауи спорт нысандары көптеп бой көтеруде. Өткен жылы 13 спорт кешені салынып, бүгінде 9-ы ел игілігіне табысталды. Биыл 10 спорт кешенінің құрылысы басталды.Бұдан бөлек, халықаралық стандарттарға сай келетін 10 000 орындық Орталық стадион және жабық бассейні бар көпсалалы денешынықтыру-сауықтыру кешені салынуда. Үстел теннисі орталығының құрылысы аяқталды, жақында пайдалануға беріледі. Құрылысы жоспарланған «Қызылорда Арена» көпбейінді спорт кешенінде 2000 көрерменге арналған арена, олимпиадалық стандартқа сай келетін бассейн және 600 адамдық көрермен залы, жаттығу, конференц және хореография залдары болады. Қазақстан футбол федерациясының «ALAN» бағдарламасымен Ғани Мұратбаев атындағы стадионның қосалқы алаңы күрделі жөндеуден өткізілуде. Осылайша біз жастар мен жасөспірімдердің бос уақытын тиімді ұйымдастырып, спортпен шұғылдануына қолайлы орта қалыптастырудамыз. «Спорт – денсаулық кепілі» десек, нысандарды көпшілікке қолжетімді ету арқылы халық денсаулығын жақсарту біздің басты міндетіміз болып қала бермек», – деді Нұрлыбек Машбекұлы.</blockquote>Салтанатты ашылу рәсімінде мемлекет және қоғам қайраткері, Қызылорда облысының Құрметті азаматы Айтбай Көшербай мен Мәжіліс депутаты Мұрат Ергешбаев сөз сөйледі. Сондай-ақ, іс-шарада турнирді ұйымдастыруға атсалысқан спорт саласының қызметкерлері марапатталды.Е.Көшербаев Тереңөзек, Сырдария аудандық атқару комитеттерінің төрағасы, Қармақшы, Қазалы аудандық партия комитеттерінің бірінші хатшысы, облыстық атқару комитеті төрағасының орынбасары болған. Зейнетке шыққан соң да облыстық ардагерлер кеңесінің төрағасы ретінде игі істер атқарған.<img src="https://knadmin.beoblood.kz/uploads/turnir_1_aaebffff13.jpg" alt="турнир 1.jpg"><img src="https://knadmin.beoblood.kz/uploads/turnir_2_895de29e3b.jpg" alt="турнир 2.jpg"><img src="https://knadmin.beoblood.kz/uploads/turnir_3_aa057f4187.jpg" alt="турнир 3.jpg">Фото: Қызылорда облысы әкімінің баспасөз қызметі

Елеу Көшербаевты еске алуға арналған халықаралық турнир басталды

<a href="https://kyzylorda-news.kz/">Kyzylorda-news.kz</a> Санаулы күн бұрын V Дүниежүзілік көшпенділер ойындары да өз мәресіне жетті. Әлемнің 85-тен астам елінен 2 000-ға жуық спортшы қатысқан дүбірлі додада Қазақстан құрамасы жалпы нәтиже бойынша 43 алтын, 34 күміс, 37 қола медальмен көш бастады.Ұлттық құраманың сапында болып, ел намысын жоғарғы деңгейде қорғаған жерлестеріміз Өңірлік коммуникациялар қызметінің ақпарат алаңында қонақ болып, БАҚ өкілдеріне сұхбат берді.<blockquote>– V Дүниежүзілік көшпенділер ойындарында тоғызқұмалақ бойынша 40-қа жуық мемлекеттен спортшылар бақ сынады. Бұл сайыс біздің елімізде өтіп жатқандықтан мен үшін жауапкершілік жүгі екі есе ауыр болды. Әрбір адам жарысқа қатысарда басты жүлдеден үмітті болады ғой. Сол сияқты менде де жеңіске жетсем екен деген арман болды. Тақта үстіндегі сайыста сегіз ойын өткіздім. Барлығында да жеңіске жетіп, жалпы есепте 8 ұпай жинап жекелей сында да, жалпыкомандалық есепте де жеңімпаз болып, алтыннан алқа тақтым. Ендігі мақсатым, қараша айында Түркия елінде өтетін Әлем чемпионатында да осы жеңісімді қайталасам деймін. Осы орайды пайдаланып әлеуметтік желі арқылы маған қолдау білдірген барша жанкүйерлеріме, жерлестеріме алғысымды айтамын, – деді V Дүниежүзілік көшпенділер ойындарының жеңімпазы Бексұлтан Бостандықов.</blockquote>Көшпенділер ойындарының бағдарламасына енген спорт түрлерінен облысымыз бойынша 4 спортшы Ұлттық құрама командаға шақырту алып, жарыстарға қатысты.<blockquote>– Спортпен айналысып жүргеніме 12 жыл уақыты болды. Осы жылдар аралығында көптеген байрақты бәсекелерде өнер көрсеттім. Бірақ осы көшпенділер ойынының алар орны ерекше болды. Олай деуімізге себеп көп. Әлемнің 89 мемлекетінен спортшылар келді. Олармен лайықты бәсеке көрсетуге біз де дайын болдық. Жауапкершілікті сезіне алдық. Жарысқа қай спортшы болсын, жеңіс үшін барады. Қоланы қанағат тұттық. Алдағы уақытта да елдің абыройын асқақтатып, туымызды биіктен желбіреткім келеді. Қолдаған жерлестеріме шынайы алғысымды білдіремін, – деді V Дүниежүзілік көшпенділер ойындарының жүлдегері Назерке Әбілтаева.</blockquote>Ат спортын ел арасында насихаттап жүрген спортшыларымыздың қатарында көкбөрі жарысынан Ұлттық құрамада өнер көрсеткен Нұрлыбек Асқаров та бар.<blockquote>– Жарыстың оңайға соқпайтынын алдын-ала білдік. Тыңғылықты дайындалдық. Мен қырғыздардың ұлттық ойыны көкбөрі деп аталатын спорт түрінен сынға түстім. Алтыннан дәмелі едік. Дегенмен, көпшілік көз тіккен спорт додасында күмісті олжаладық. Финалда қырғыз ағайындармен болған ойын өте қиын әрі қызық болды. Елдің намысын абыроймен қорғай алдық деп ойлаймын, – деді V Дүниежүзілік көшпенділер ойындарының жүлдегері Нұрлыбек Асқаров.</blockquote>Фото: Өңірлік коммуникациялар қызметі

Қазақстан және Қызылорда облысының жаңалықтары: Спорт