<a href="https://kyzylorda-news.kz/">Kyzylorda-news.kz.</a> Қазақстан Республикасының Сыртқы істер министрлігінде Қытайдың ҚР-дағы Елшісі Чжан Сяомен кездесу өтіп, оның барысында қазақстандық тарап қытайлық&nbsp;<a href="http://www.sohu.com/">www.sohu.com</a>&nbsp;сайтындағы «Қазақстан неге Қытайға оралуға тырысады» атты мақалаға қатысты наразылық білдірілді, деп хабарлайды <a href="https://lenta.inform.kz/kz/kazakstan-kytay-elshisine-narazylyk-bildirdi_a3637900">ҚазАқпарат</a>.
<blockquote>
 «Қытай Елшісіне мұндай сипаттағы мақаланың жариялануы 2019 жылғы 11 қыркүйекте Мемлекет басшылары қол қойған Қазақстан Республикасы мен Қытай Халық Республикасының бірлескен мәлімдемесінде айқындалған мәңгілік жан-жақты стратегиялық әріптестік рухына сәйкес келмейтіндігі атап өтілді. Тараптар ақпарат тарату және БАҚ саласында тығыз өзара ықпалдасуға келісті», – делінген&nbsp;<a href="https://www.gov.kz/memleket/entities/mfa/press/news/details/v-mid-kazahstana-proshla-vstrecha-s-poslom-kitaya?lang=kk">ҚР СІМ ақпаратында.</a>
</blockquote>
Сондай-ақ мәлім болғандай, Қазақстанның Бейжіңдегі Елшілігі ҚХР Сыртқы істер министрлігіне тиісті нота жолдады.

Қазақстан Қытай Елшісіне наразылық білдірді

Мемлекет басшысының Төтенше жағдай режимін қамтамасыз ету жөніндегі мемлекеттік комиссияның отырысында сөйлеген сөзі

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев коронавирустың оңтүстік аймақтарда жылдам таралуына алаңдаушылық білдірді, деп хабарлайды&nbsp;<a href="https://sputniknews.kz/">Sputnik Қазақстан</a>.
Президенттің айтуынша, карантин енгізудің арқасында вирустың жаппай таралуы бәсеңдеді. Нұр-Сұлтан мен Алматыдағы жағдай тұрақты. Бірақ, Қарағанды, Ақмола, Қызылорда, Түркістан, Жамбыл облыстарында ауруға шалдыққандардың саны күрт өсіп кетті.
<blockquote>
 «Бұл атқарылған жұмыстардың жеткіліксіздігін және қосымша шаралар қабылдау қажет екенін көрсетеді. Оңтүстік – халық тығыз орналасқан өңір. Сондықтан, індеттің таралуын тоқтатпасақ, жағдайды ушықтырып аламыз», – деді Тоқаев төтенше жағдай жөніндегі мемлекеттік комиссияның бүгінгі отырысында.
</blockquote>
Мемлекет басшысының сөзіне қарағанда, қазіргі кезде көктемгі егіс науқаны басталды. Алдағы уақытта «Жұмыспен қамту жол картасы» бойынша бірқатар жоба қолға алынады. Осындай уақытта елдегі эпидемиологиялық ахуалға ерекше көңіл бөлген жөн.
<blockquote>
 «Мемлекеттік комиссия аймақтардағы карантин шараларының орындалуын қатаң бақылауға алуға тиіс. Бұл ретте, полиция мен мемлекеттік органдардың іс-қимылдары тек қатаң шаралар түрінде емес, орынды әрі ақылға қонымды болуы қажет. Жөнсіз әрекеттерге жол берілмеуі тиіс», – деп атап көрсетті Тоқаев.
</blockquote>
Осы орайда президент карантинде отырған халықты шыдамдылық танытуға үндеді. Себебі бұл – мәжбүрлі шара. Вирусты ауыздықтаудың басқа жолы жоқ.

Коронавирус: Тоқаев Қызылордадағы ахуалға алаңдаушылық білдірді

Нұрсұлтан Назарбаев: Бірлесе білген ел бәрін жеңеді

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықованың төрағалығымен аппарат отырысы өтті. Жиынға қала және аудан әкімдері селекторлық байланыс арқылы қатысты. Жиын басталмас бұрын аймақ басшысы жаңадан тағайындалған орынбасарларын таныстырды.
Қазақстан Республикасы Президенті Әкімшілігінің келісімі бойынша облыс әкімінің өкімімен Сүлейменов Серік Жүсіпұлы облыс әкімінің орынбасары лауазымына тағайындалды. Облыс әкімінің орынбасары ретінде С. Сүлейменов құрылыс, энергетика, тұрғын үй және көліктік инфрақұрылымды дамыту салаларына жетекшілік ететін болады.
Қазақстан Республикасы Президенті Әкімшілігінің келісімі бойынша облыс әкімінің өкімімен Ахмет Серік Әбжәліұлы облыс әкімінің орынбасары лауазымына тағайындалды. Облыс әкімінің орынбасары ретінде С. Ахмет аймақтың ішкі саясат, жастар мәселесі, мәдениет пен спорт және жұмылдыру дайындығы салаларына жетекшілік етіп, облыс әкімдігі мен құқық қорғау органдары арасындағы өзара іс-қимылды жүзеге асырып, коронавирус індетіне қарсы штаб төрағасының орынбасары, облыстағы қалыптасқан төтенше жағдайлардағы жұмыстарды үйлестіретін болады.
Сондай-ақ, облыс әкімінің орынбасары Жаханов Бахыт Дүйсенұлы ауыл шаруашылығы, жер қатынастары, табиғат пайдалануды реттеу, ветеринария, индустриалды-инновациялық даму, кәсіпкерлік және туризмді дамыту салаларына жауапты болады.
Ал, облыс әкімінің орынбасары Байқадамов Наурызбай Сейітқалиұлы білім, денсаулық, жұмыспен қамту және еңбек саласындағы бақылау салаларына жетекшілік етеді.
Отырыстың күн тәртібінде Мемлекет басшысының жұмыссыз жастарға «Жұмыспен қамтудың жол картасы» бағдарламасы аясында тиісті жалақы төлей отырып, оларды су тасқынына қарсы іс-қимылдарға, көктемгі егінге, құрылысқа және басқа да жұмыстарға тарту туралы тапсырмасының аймақта орындалу барысы баяндалды. Бұл бағыт бойынша өңірге 37 млрд. теңге қаржы бөлінуде. Қандай шаралар атқарылатыны турасында облыс әкімнің орынбасары Бақыт Жаханов баяндады.
Сонымен қатар, жиында аймақта корнавирус індетімен күрес, азық-түлік бағалары және жергілікті жердегі қоғамдық-саяси ахуал талқыланды. Жауапты сала басшылары Қызылорда қаласы мен аудан әкімдері аймақ басшысына атқарылған жұмыстар туралы есеп берді.
Облыс әкімі Гүлшара Әбдіқалықова қала мен аудан әкімдеріне, облыстық басқарма басшыларына нақты тапсырмалар берді.

Гүлшара Әбдіқалықова аппарат отырысын өткізді

<a href="https://kyzylorda-news.kz/">Kyzylorda-news.kz.</a> Қазақстан Президенті Қасым-Жомарт Тоқаев Денсаулық сақтау министрлігіне қарасты Масғұт Айқымбаев атындағы Аса қауіпті инфекциялар ұлттық ғылыми орталығы мен Білім және ғылым министрлігіне қарасты Ұлттық биотехнология орталығының ұжымдарына құттықтау хат жолдады, деп хабарлайды <a href="http://www.akorda.kz/kz/events/international_community/telegram_of_congratulations/memleket-basshysy-medicina-salasyndagy-gylymi-ortalyktardyn-kyzmetkerlerin-kuttyktady">Ақорданың</a>&nbsp;баспасөз қызметі.
<blockquote>
 «Ғылыми институттардың ұжымдарын COVID-19 коронавирусын анықтауға арналған диагностикалық тест жүйесін әзірлеуімен құттықтаймын! Аса қауіпті инфекциялар ұлттық ғылыми орталығы мен Ұлттық биотехнология орталығының ғалымдары халықаралық стандарттарға сай келетін қажетті тест жүйесін қысқа мерзімде жасап шықты. Сіздердің жетістіктеріңіз отандық биомедицина саласының бәсекеге қабілеттілігі жоғары екенін көрсетеді. Әлемге тараған коронавирус індетіне қарсы күрес жүріп жатқан кезде бұл жаңалықтың ұсынылуы өте маңызды болып отыр. Әзірленген тест жүйесі мыңдаған азаматымыздың өмірі мен денсаулығын сақтап қалуға көмектеседі деп сенемін», – деп жазылған Мемлекет басшысының құттықтау хатында.
</blockquote>

Президент коронавирусты анықтайтын тест жүйесін әзірлеген қазақстандық ғалымдарды құттықтады

<a href="https://kyzylorda-news.kz/">Kyzylorda-news.kz.</a> Ресей президенті Владимир Путин SARS-CoV-2 коронавирусын жұқтыру қаупіне байланысты қашықтықтан жұмыс істеу режиміне көшті деп хабарлайды <a href="https://www.dw.com/ru/%D0%BF%D1%83%D1%82%D0%B8%D0%BD-%D0%BF%D0%B5%D1%80%D0%B5%D1%88%D0%B5%D0%BB-%D0%BD%D0%B0-%D0%B4%D0%B8%D1%81%D1%82%D0%B0%D0%BD%D1%86%D0%B8%D0%BE%D0%BD%D0%BD%D1%8B%D0%B9-%D1%80%D0%B5%D0%B6%D0%B8%D0%BC-%D1%80%D0%B0%D0%B1%D0%BE%D1%82%D1%8B-%D0%B8%D0%B7-%D0%B7%D0%B0-%D0%BA%D0%BE%D1%80%D0%BE%D0%BD%D0%B0%D0%B2%D0%B8%D1%80%D1%83%D1%81%D0%B0/a-52980667">DW</a>.
<blockquote>
 «1 сәуірде үкімет мүшелерімен кездесу телеконференция арқылы өтті», деді Путиннің баспасөз хатшысы Дмитрий Песков.
 «Президент Ново-Огаревода болады және телекөпір арқылы үкіметтің жетекшілерімен, министрлер кабинеттерімен жұмыс істейді, шенеуніктер де жұмыс орындарында болады», – деді Песков.
</blockquote>
Оның айтуынша, коронавирустың таралуына байланысты Путин сәлемдесу тәсілін өзгерткен. Ресей басшысының әзірге жеке кездесулерде қол беріп амандаспайтыны белгілі болды.
<blockquote>
 «Қазір барлығы әлеуметтік қашықтықты сақтайды», – деп сөзін толықтырды Песков.
</blockquote>
Песков коронавирусқа арналған күнделікті сынақтарды Путиннің тапсыратынын жасырған жоқ.
<blockquote>
 «Әрине, біз сақтық шараларын қолданамыз, кез келген жиналыстарды болдырмаймыз, мұны мүмкіндігінше қашықтан жасауға тырысамыз», – деді ол.
</blockquote>

Путин коронавирус жұқтыру қаупіне байланысты қашықтан жұмыс істеуге көшті

<a href="https://kyzylorda-news.kz/">Kyzylorda-news.kz.</a> Гүлшара Әбдіқалықова Қызылорда облысының әкімі болып тағайындалуына қатысты ҚР Президентінің кеңесшісі Ерлан Қарин пікір білдірді.
<blockquote>
 «Елімізде алғаш рет облыс әкімі ретінде әйел адам тағайындалды. Ұлттық кеңестің екінші отырысында Президент партиялық тізімнің 30%-ын әйелдер мен жастар құрауы керектігі туралы бастама көтерген болатын. Соған сәйкес заң жобасы дайын, қазіргі уақытта талқылануда», – деп жазды Ерлан Қарин Telegram&nbsp;<a href="https://t.me/erlankarin/448">парақшасына</a>.
</blockquote>
Бұған дейін хабарлағанымыздай, Мемлекет басшысының Жарлығымен Гүлшара Әдбіхалықова <a href="https://kyzylorda-news.kz/kogam/qyzylorda-oblysynyng-aekimi-taghajyndaldy-52537/">Қызылорда облысының әкімі болып&nbsp;тағайындалды.</a>

Тоқаевтың кеңесшісі Гүлшара Әбдіқалықованың жаңа қызметіне қатысты пікір білдірді

<a href="https://kyzylorda-news.kz/">Kyzylorda-news.kz.</a> Мемлекет басшысы «Қазақстан Республикасының Үкіметі мен Ресей Федерациясының Үкіметі арасындағы «Байқоңыр» кешенін газбен жабдықтау туралы келісімді ратификациялау туралы» Қазақстан Республикасының Заңына қол қойды.
Бұл туралы Ақорданың&nbsp;<a href="http://www.akorda.kz/kz/legal_acts/laws/memleket-basshysy-kazakstan-respublikasynyn-ukimeti-men-resei-federaciyasynyn-ukimeti-arasyndagy-baikonyr-keshenin-gazben-zhabdyktau-turaly-">баспасөз қызметі</a>&nbsp;хабарлады. Заңның мәтіні баспасөзде жарияланады

ҚР Президенті «Байқоңыр» кешенін газбен жабдықтауға қатысты заңға қол қойды

<a href="https://kyzylorda-news.kz/">Kyzylorda-news.kz.</a> Президенттің бір жылда атқарған жұмысының қорытындысы төрт том болып жарық көрді. Бұл туралы Мемлекет басшысының баспасөз хатшысы Берік Уәли&nbsp;<a href="https://www.facebook.com/100003403233694/posts/2691340787656003/?d=n">Facebook</a> парақшасында жазды.
Қазақстан Президенті Қасым-Жомарт Кемелұлы Тоқаевтың елді басқару тізгінін қолына алып, президенттік қызметіне кіріскеніне бүгін тура 1 жыл толды.
<blockquote>
 «Қасым-Жомарт Кемелұлы жуырда твит-парақшасында: «Бір жыл бұрын аса көрнекті мемлекет қайраткері, жаһандық деңгейдегі саясаткер Н.Назарбаевтан ел тізгінін қолға алу мәртебесі бұйырды. Мемлекетіміздің негізін қалаушы – Елбасы стратегиясының сабақтастығын жүзеге асыру үшін көп жұмыс атқарылды…» деп жазды. Расында сол тарихи кезеңдегі Елбасының таңдауынан кейін, көп ұзамай өткен сайлау қорытындысы бойынша Қазақстан халқының басым бөлігі (70,96%) Қасым-Жомарт Кемелұлының кандидатурасына қолдау білдіріп, дауыс берді. Қасым-Жомарт Кемелұлының сол 2019 жылдың 20 наурызынан бері қабылдаған шешімдері, өткізген кездесулері мен қабылдаулары, жалпы атқарған жұмыстары түгелдей бұқаралық ақпарат құралдарында жарияланып отырды», – деп жазады Берік Уәли.
</blockquote>
Бұл кітаптарда Мемлекет басшысының әртүрлі іс-шараларда сөйлеген 76 сөзінің толық мәтіні жинақталды.
Бірінші кітапқа Қасым-Жомарт Тоқаевтың елімізді дамыған елдердің қатарына қосу мақсатымен қолға алған бастамалары және халықтың жарқын болашағы үшін жүзеге асырылатын жобалар туралы ой-пікірлері, мемлекеттің алдында тұрған басым бағыттары мен міндеттерін айқындауға арналған жалпыұлттық іс-шараларда сөйлеген сөздері енгізілді.
Екінші кітапқа Мемлекет басшысының өңірлердегі жұртшылықпен кездесу өткізіп, ел мен жердің тағдыры, саяси өзгерістер, экономикадағы серпін, әлеуметтік жауапкершілік және басқа да қоғам өмірі туралы ой-толғамдары, еліміздің алдында тұрған басым бағыттар мен міндеттер жөнінде сөйлеген сөздері топтастырылды.
Үшінші кітапқа Қазақстан Президентінің шет мемлекеттердің басшыларымен кездесулерде, әлемдік саммиттер мен халықаралық форумдарда сөйлеген сөздері жүйеленіп топтастырылды. Қасым-Жомарт Кемелұлы Қазақстан Президенті қызметіне кіріскеннен кейін бірнеше айдың ішінде Ресей, Қытай, АҚШ және Еуразияның басқа да көптеген елінің көшбасшыларымен байланыс орнатып, шет елдерге бірнеше мемлекеттік, ресми және жұмыс сапарын жасады. Біріккен Ұлттар Ұйымы, Тәуелсіз Мемлекеттер Достастығы, Шанхай Ынтымақтастық Ұйымы, Азиядағы өзара іс-қимыл және сенім шаралары жөніндегі кеңес, Еуразиялық экономикалық одақ, Ұжымдық қауіпсіздік шарт ұйымының саммиттеріне қатысты. Аталған жиындарда халықаралық саясаттағы Қазақстанның орны, ұстанымы туралы мәлімдемелер жасады.
Төртінші кітапқа Қазақстан Президентінің бір жыл ішіндегі отандық және шетелдік бұқаралық ақпарат құралдарында жарияланған мақалалары мен сұхбаттарында, БАҚ өкілдері үшін өткізген брифингтерде еліміздің шет мемлекеттермен арасындағы байланыстарға, халықаралық және ішкі саяси мәселелерге қатысты айтқан ой-толғамдары енді. Сондай-ақ, кітаптың соңында 8 сұхбат пен 2 деректі фильмнің видеонұсқасы флеш-картаға жүктеліп, қоса беріліп отыр.
<blockquote>
 «Міне, ҚР Президентінің баспасөз қызметі Мемлекет басшысының бір жылғы атқарған жұмысының жалпы қорытындысы ретінде осы 4 томдықты қалың бұқараға ұсынып отыр. Кітап саясаттанушылардың, журналистердің, зерттеушілердің және жалпы, кез келген ізденуші азаматтың талғамына сай келеді деген үміттеміз», – деп түйіндейді сөзін Президенттің баспасөз хатшысы.
</blockquote>
<img src="https://kyzylorda-news.kz/wp-content/uploads/2020/03/prezidentting-4-tomdyq-zharyqqa-shyqty-2.jpg" alt="" />

Президенттің бір жылда атқарған жұмысы туралы 4 томдық жарыққа шықты

<a href="https://kyzylorda-news.kz/">Kyzylorda-news.kz</a>. Қазақстанның Тұңғыш Президенті Нұрсұлтан Назарбаев Қазақстан халқына үндеу жолдады.
Қазақстан Республикасының Тұңғыш Президенті – Елбасы Н.Ә.Назарбаевтың Қазақстан халқына ҮНДЕУІ
Қымбатты отандастар!
Бүгінде бәріміз коронавирустың жаһандық пандемияға ұласқанына куә болып отырмыз.
Қазір вирус жер шарындағы 155-тен астам мемлекеттің, соның ішінде Қазақстанның да аумағына таралуда.
Індеттің географиялық өрісі үздіксіз кеңейіп, құрбандарының саны да өсіп келеді.
Бұл жағдайды халықаралық экономикалық дағдарыс – шикізат, валюта және қаржы нарықтарының құлдырауы ушықтыра түсуде.
Мұның бәрі біздің елді де айналып өтпейтіні анық.
Басқаша айтқанда, біз қазір «дүлей дауыл» деп сипаттауға болатын үлкен қауіп-қатер алдында тұрмыз.
Шешу жолдарын табу тұрғысынан күрделі боп отырған қазіргі ахуал бір жағынан 1990-шы жылдардың басындағы жағдайға ұқсайды.
Ол кезде біз шын мәнінде өте қиын жағдайда болған едік.
Осындай ауыр кезеңде мен барлық қазақстандықтарды ел Президенті Қасым-Жомарт Тоқаев пен Үкімет тарапынан іске асырылып жатқан шұғыл шараларды қолдауға шақырамын.
Ел билігі коронавирустан қорғану үшін оның алдын алуға бағытталған кешенді шаралар қабылдады.
Бұл ретте төтенше жағдайдың жариялануы – маңызды және қажетті қадам.
Ондағы мақсат – біздің азаматтарымыз бен мемлекетіміздің мүддесін қорғау.
Қазір коронавирус инфекциясының залалын азайту және экономиканы тұрақтандыру жөніндегі арнаулы штаб жұмыс істеп жатыр.
Азық-түлік пен ең қажетті тауарлардың, медициналық мақсатқа арналған заттардың тапшылығына жол бермеу үшін барлық жағдай жасалуда.
Мемлекеттің әлеуметтік міндеттемелерінің бәрі де орындалуда.
Елдегі құқықтық тәртіп қамтамасыз етіліп отыр.
Отандық кәсіпкерлерге, шағын және орта бизнеске жан-жақты қолдау көрсетіліп жатыр.
Жұмыс орындарын сақтауға барынша күш салынуда.
Мемлекеттік деңгейде қабылданып жатқан шаралар қазіргі қиын ахуалға сай дер кезінде қолға алынды.
Мен мұны толық қолдаймын!
Сонымен қатар, қазіргі дағдарыс ұзағырақ уақытқа созылар болса, Үкімет оған қарсы шаралар әзірлеуге тиіс.
Ондай жағдайда елімізді және азаматтарымызды қатаң үнемшілдікке, кешенді орнықты даму бағдарына шығуға дайындау керек.
Құрметті қазақстандықтар!
Дана халқымызда «Кемедегінің жаны бір» деген ұлағатты сөз барын білесіздер.
Осынау сын сағатта ортақ істен ешкім де сырт қалмауға тиіс.
Біріншіден, Үкімет бюджет саласы қызметкерлерінің, студенттердің, шағын және орта бизнестің ауыртпалығын жеңілдету бағытындағы нақты қадамдарын жария етті.
Бірақ тек қана мемлекеттің күш-жігері жеткіліксіз болады.
Зауалды еңсеру үшін басқа да қосымша ресурстарды жұмылдырған жөн.
Әрбір азамат өзінің қолынан келетін үлесін қосуға тиіс.
Мен бұл қиын кезеңде ел-жұртқа көмектескісі келетін және жәрдем бере алатын адамдардың қаражаты жинақталатын Республикалық қор құруды ұсынамын.
Осындай жағдайда бұрынғыша отандық ірі кәсіпорындар да қолдауын көрсетеді деп сенемін.
Ондай қорларды әрбір облыс орталығында және республикалық маңызы бар қалаларда құру қажет.
Ол жұмысты тиісінше сол жерлердің әкімдері жүзеге асырғаны дұрыс.
Бүкіл халық, қалың ел, жалпақ жұрт болып жұмылудың жарқын үлгісі мен тиімділігін біз Арыс қаласын апаттан кейін жедел қалпына келтірген кезде көрсеткен едік.
Екіншіден, мен қазірдің өзінде ұлттық бизнес өкілдерінің ел-жұртқа көрсетіп жатқан көмегі үшін ризашылығымды білдіремін.
Мұндай мәрттік жалғасын тауып, оған қосылатын бизнес өкілдерінің саны көбейе түседі деген үміттемін.
Компаниялар иелері өздерінің қол астында еңбек етіп жүрген жандарға қаржылай да, моральдық тұрғыдан да жәрдемдеседі деп сенемін.
Мәселен, уақытша демалысқа жіберуге мәжбүр болған жағдайда еңбеккерлерді ақылы түрде босатқан немесе қысқартылған жұмыс кестесіне көшкен абзал.
Отандық бизнес өкілдерін жалдамалы қызметкерлерді жұмыстан шығармауға шақырамын.
Сіздер жұмыс орындарын сақтау арқылы қоғамға қамқорлықтарыңызды көрсетесіздер.
Еліміздің кен өндірісі мен шикізат ресурстарын өңдеу және өнеркәсіп саласындағы ірі инвесторлар да Үкіметпен, әкімдіктермен бірлесе отырып, өздері жұмыс істеп жатқан өңірлердің тұрғындарына қолдау көрсетуге тиіс.
Қиындықта қол ұшын беру – игі дәстүр, халқымыздың қанында бар, бойымызға сіңген асыл қасиет.
Үшіншіден, қазіргі уақытта ең әуелі аса мұқтаж жандарға көмек көрсету керек.
Менің тапсырмаммен «Nur Otan» партиясының жобалары аясында 150 миллион теңге бөлінді.
Бұл қаражат карантин жарияланған Нұр-Сұлтан және Алматы қалаларындағы әлеуметтік жағдайы төмен азаматтарға атаулы көмек көрсетуге жұмсалады.
Коронавирус инфекциясының таралуына жол бермеу үшін менің шешіммен Тұңғыш Президент Қоры есебінен тағы 200 миллион теңге бөлінді.
Жалпы, коронавирусқа қарсы күреске арналған қаражаттың дұрыс жұмсалуын «Nur Otan» партиясы бақылауында ұстайды деп ойлаймын.
Төртіншіден, үлкен кісілерді, балалар үйі тәрбиеленушілері мен арнаулы аураханалардағы науқастарды қажетті заттармен үзбей қамтамасыз етуге баса көңіл бөлген жөн.
Еліміздің көмекке мұқтаж әрбір азаматына қамқорлық көрсетілуге тиіс.
Қазақстандықтар қиын кезеңдерде әрдайым бір-біріне жәрдемдескен.
Бұл іске еріктілер қозғалысының өкілдері де атсалысады деп сенемін.
Бесіншіден, біз пандемиямен күрестің «алдыңғы шебінде» жүрген дәрігерлер мен медбикелерді, құқық қорғау органдары мен әскери қызметкерлерді қолдауымыз керек.
Олардың иығына ауыр жүк түсіп, зор жауапкершілік артылып отыр.
Жұртшылықтың оларға көмектесіп, түсіністік танытуға және барлық нұсқауын жауапкершілікпен орындауға тырысқаны жөн.
Қадірлі отандастар!
Біздің бірлігіміз – қазіргі қиындықты еңсерудің кепілі.
Тәуелсіз Қазақстан тарихында бұдан да күрделі кезеңдерді бастан өткердік.
Барлық ауыртпалықты жеңіп, әрдайым ортақ Отанымыздың гүлденуі жолында еңбек етіп келеміз.
Осы жолғы сынақты да ел болып еңсереміз деп сенемін.
Қазақстанның жолы қиындықсыз болмайтынын мен тәуелсіздіктің бастапқы кезінде-ақ білгенмін.
Бұл ретте тарих пен уақыт біздің жоспарымызға өзгерістерін енгізетінін ескерген едім.
Жайма-шуақ кездердің өзінде де біз алдымыздан шығуы мүмкін сын-қатерлерге дайындалып, алмағайып уақыттарда қажет болатын резерв қалыптастырдық.
Жинақталған алтын-валюта қоры мен Ұлттық қор қаражаты әрдайым біздің қабылдаған шараларымыз бен жалпы ұлттық экономиканы қолдауға септігін тигізді.
Қазір осы күрделі ахуалдан шығу үшін Қазақстанда барлық қажетті ресурс бар, қор да жеткілікті.
Бұл – біздің «Алдымен экономика, сосын саясат» қағидатына негізделген бағыт-бағдарымыздың нақты нәтижесінің бірі.
Жаңадан мемлекет құру оңай емес, ал оны сын-қатерден қорғау және тәуелсіздікті сақтап қалу одан да қиын.
Бізде тәжірибе де, нақты іс-әрекет алгоритмі де бар.
Мен ұлтты ұйыстырудың, бірлік пен қоғамдағы келісімнің маңыздылығын үнемі айтып келемін.
Тұтастығымызды тағы бір рет дәлелдейтін күн туды.
Еліміздің барлық азаматтарын төзімділік танытуға, мемлекет қабылдап жатқан шараларды қолдауға шақырамын.
Бірлік барда алынбайтын асу жоқ.
Келе жатқан Наурыз мейрамы – біздің бірлігіміздің нышаны.
Шуақты мереке қарсаңында әрбір шаңыраққа шаттық пен игілік тілеймін!
Барлық ауыртпалық бізді айналып өткей.
Қазақстан бұл қиындықты да еңсеріп, дамудың жаңа кезеңіне аяқ басады деп нық сенемін.
Біз біргеміз!

Нұрсұлтан Назарбаев Қазақстан халқына үндеу жолдады

<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаев бір жыл бұрын Нұрсұлтан Назарбаевтан ел тізгінін қолға алу мәртебесі бұйырғанын еске алды.
<blockquote>
 «Бір жыл бұрын аса көрнекті мемлекет қайраткері, жаһандық деңгейдегі саясаткер Н.Назарбаевтан ел тізгінін қолға алу мәртебесі бұйырды. Мемлекетіміздің негізін қалаушы — Елбасы стратегиясы сабақтастығын жүзеге асыру үшін көп жұмыс атқарылды. Елімізді жаңғырту реформалары жалғасын табады» деп жазды Мемлекет басшысы&nbsp;<a href="https://twitter.com/TokayevKZ/status/1240337944080191488?s=08">Twitter</a>-дегі парақшасында.
</blockquote>

Қазақстан және Қызылорда облысының жаңалықтары: Саясат