<a href="https://kyzylorda-news.kz/">Kyzylorda-news.kz</a>&nbsp; «Жігітке жеті өнер аз, жетпіс өнер көп емес» дейді қазақ. Сыр өңірі бір бойында сан түрлі өнер тоғысқан «сегіз қырлы, бір сырлы» дарынды тұлғаларға кенде емес. Жас болса да хас талант атанған жерлестеріміз талайды таңдай қақтырып, топ жарып жүргенін мақтанышпен айта аламыз. Солардың бірі, Сыр сүлейлерінің ізін жалғаушы, талабы таудай, болмысы бөлек айтыскер ақын, жыршы-термеші Бексұлтан Орынбасаров. Ол 2001 жылы Қызылорда обылысы Арал ауданында Шөмішкөл ауылында дүниеге келген.&nbsp;Айтыс – халық пен биліктің арасын байланыстыратын алтын көпір. Айтыс – халқымыздың рухани қазынасы, ел мен елді, бұқара мен билікті байланыстыратын киелі көпір. Қазақ қайда жүрсе де, қай ғасырды бастан кешірсе де, айтыс өнері қашанда оның серігі, сөз өнерінің шырағы болып келеді. &nbsp;«Бұл өнер – жай ғана сөз сайысы емес, ол – тәрбие мектебі, ұлттың ішкі жан дүниесін тербетіп, қоғамның көкейкесті мәселелерін дөп басып айтатын мінбер. Ақынның әрбір ұтқыр ойы, астарлы әзілі мен отты шумағы тыңдаушының жүрегіне жол тауып, сана-сезіміне әсер етіп, терең ойға жетелейді. Сондықтан да айтыс – халықтың үні, елдің тамыры, ұлттық сана мен қоғамдық пікірдің айнасы деуге толық негіз бар. Бүгінгі айтыстың тынысы – бөлек, тынығы – ерек. Замана талабына сай түрленіп, сахна мәдениетімен үйлесім тауып, халықпен тікелей байланысын үзбей, ай сайын тұрақты түрде ұйымдастырылып келе жатқаны – бұл өнердің жаңғырып, жаңарып, жаңа белестерге қадам басып жатқанын көрсетеді. Демек, айтыс – тек өткеннің мұрасы емес, бүгіннің де, ертеңнің де сөзбен сомдалған шежіресі», – дейді Бексұлтан Орынбасар. &nbsp; &nbsp; Жас ақынның өнер жолына келуіне әкесінің көмегі зор екен. Ол көбіне «Мені ақындық баулыған өзімнің әкем» деп айтады. Ал ақындық өнерге алғаш болып тәрбиелеген Аралдың Шижаға деген ауылында Қайрат Құлекешов. Сол кісі ең алғаш айтыстан тәлім берді. Айбек Тәңірбергенов жыраудың шеберханасында жыраулық өнерге бағыт алып, қалыптаса бастаған. Бертін келе, қалада Ержеңіс Әбді ұстаздан тәлім алған. Айтуынша, өнер руға, жүзге, жасқа бөлінбейді. Сондықтан әлі де ұстаздардан алатын тәлім-тәрбие, үлгі-өнеге көп деп ойлайды.<blockquote>«Мені ақындық өнерге баулыған өзімнің әкем. Ең бірінші Алланың берген қасиеті, қанмен де, туған топырақтың киесімен де келді деп ойлаймын. Өйткені «қасиет белден емес, елден» деген қазақта сөз бар ғой. Біздің Арал беткейінде Нұртуған, Нұрмағанбет, Жаңаберген, Дәріқұл, Жаппарберді секілді жыраулар туған. Біз сол Аралдың Шөмішкөл елді мекенінде дүниеге келдік. Өз атам Орынбасар да сөз ұстаған. Елдің аузында аты қалған, атыберлі адам болған. Әкемнің жетекшілігімен, сол кісінің ақыл-кеңесін ала отырып, қолыма алғаш домбыра ұстаған уақыт 12-13 жас шамасы. Ол кісі де құралақан емес, Нұртуған шайыр мектебінің өкіліміз. Сыр бойындағы жыраулық өнер өздеріңіз білетіндей, үш жыраулық мектепке жіктеп айтылады. Аралда Нұртуған шайыр мектебі, Қармақшыда Жиенбай жырау мектебі болса, Шиелі жақ бетінде Нартай ән-өнері мектебі қалыптасқан. Біз сол Нұртуған шайыр мектебінде Айбек Тәңірбергенов ұстазымыздан білім алып, сол жақта оқыдық. Алғашқы айтысқа да сол мектеп жасымда, жетінші сынып оқып жүргенде шықтым. Домбыра тартып, жыраулар байқауына қатысып жүргенімді себеп қылып, ұстаздарымыз айтысқа да шығарып жіберген жайы бар. Сөйтіп айтысқа да, жыраулық өнерге де арасы алыс емес 13-14 жасымда қадам бастым, – дейді Бексұлтан Орынбасар.</blockquote>Айтыс – ауыз әдебиетінде ежелден қалыптасқан поэзиялық жанр, топ алдында қолма-қол суырып салып айтылатын сөз сайысы, жыр жарысы. Айтыс – әдебиет жанры болғанымен, ертеден қалыптасқан халықтық дәстүрдің үлкен түрі. Жалпы біз айтысты экран алдында немесе сахнада көрермен ретінде тамашалаймыз. Дегенмен оның қиындығы, жауапкершілігі, артылар жүгі жайында білмейміз. Осы төңірегінде Бексұлтанның өзінен сұрап көрдік.&nbsp;<blockquote>«Айтыс өнерінің қиындықтары өте көп. Сахнаға шыққан кезде бір басыңда бірнеше жауапкершілік болады. Бірнеше өнердің басын қосып шығу керек. Мәселен халықпен жұмыс істеу, ақындығы бір төбе және сахна мәдениеті, одан қала берді тұшымды сөз, ұшқыр ой қажет. Оны суырып салып айтудың өз алдына қиындығы болады.&nbsp;Айтыстың қоғамдағы рөлі айқын. Хан мен қараны, халық пен биліктің арасын байланыстыратын алтын көпір. Халықтың сөзін билікке жеткізу, елдің ойын, ахуалын, мәселелердің шешімдерін тиісті орынға жеткізу. Бабадан келе жатқан асыл өнер болғаннан соң айтыстың орыны биікте», – дейді Бексұлтан Орынбасар.</blockquote>Әр айтыс ақынға ерекше әсер сыйлайды. Мәселен әнші өзінің жеке концертінде есте қаларлықтай нәрсемен бетпе-бет келеді. Оған көрермендері, олардың қошеметі ерекше әсер қалдыруы мүмкін. Айтыс та солай. Қарсыласын ерекше шабыт беріп, одан әрі шындалуына атсалысатын жағдайлар кездесіп жатады. «Өзі айтысқа шығатын адамның жүрегі ғарышқа ұшатын адамның жүрек соғысымен бірдей болады екен. Сондықтан барлық айтысты, сахнадағы әрбір сәтті ерекше деп айтуға болады. Қаншама халықтың алдына шығып өнер көрсету, сол жерде сөз тауып, суырып салу – екінің бірінің басына бұйырмайтын бақ, екінің бірінің қолынан келмейтін шаруа деп айтар едім.<blockquote>Ең ерекше есте қалған қарсыласым жайлы айтар болсам, қателеспесем 2019 жылдың ақпан айында «Абай жолымен» атты республикалық деңгейде Жүрсін Ерманның жүйріктер қатысқан айтыс өтті. Сонда «Алтын домбыра» иегері Жансая Мусина әпкемізбен айтысқа шықтым. Менің үлкен айтыста, алыптар арасында алғаш тұсауым кесілген сәт ретінде есте қалды. Жансая әпкемізбен өте сәтті, жоғары деңгейде айтыс көрсетіп, халықтың ықылас-қошеметіне бөлендік. Сол сахнада әпкеміз маңдайымнан сүйіп, батасын бергені ерекше сәт және есте қалған қарсыластарымның бірі» – дейді Бексұлтан.</blockquote>«Сын» деген нәрсе бар. Мәселен актерлар образдан шыға алмай қалатын кездер жиі кездеседі. Қанша уақыт дайындалып, сол адамның образын, бейнесін сомдап алық шығуға, бар ынтасымен дайындалады. Ақырында ол образдан көп уақытқа дейін өзі шыға алмай қалып жатады. Сын да солай. Бір адам сынды қабылдай біледі, енді бірі оны қабылдауға қауқары жетпейді. Ал жастардың сынды қабылдау үшін біраз уақыт үйренісуі шарт. Жас ақын сынды қабылдай біледі ме, оған көз-қарасы қандай осы төңірегінде де әңгімені жалғастырсақ…<blockquote>– &nbsp;«Сын түзелмей, мін түзелмейді» деген сөздің салмағы әр заманда да орнын жоғалтпаған. Өнер жолындағы адам болсын, ел ішінде сөзі өтімді азамат болсын – бәріне де сын айтылады. Ол заңдылық. Ең бастысы – сол сыннан сабақ алу, шын ниетпен айтылған сынды қабылдай білу. Ал орынсыз, астары теріс сынға келгенде оған жүрек жүгіртудің қажеті жоқ деп ойлаймын. Себебі мұндай пікір адамның болмысына әсер етпейді. Ең маңыздысы – ішкі түйсіктің тазалығы, ойың мен сөзіңнің ақтығы. Егер жүрегіңмен дұрыс деп санаған жолың болса, соның нәтижесін уақыт пен Жаратқан Иенің әділетіне тапсырған жөн. Сын – пікір. Пікір – пікірталасқа бастайды. Ал пікірталас – кейде жаңа бір биікке жол ашады. Сол үшін де сынға сыни көзбен қарау керек, ренжігенмен емес, түсінумен қабылдау қажет», – дейді Бексұлтан Орынбасар.</blockquote>Бексұлтанның есімі бүгінгі таңда Сыр өңірі ғана емес, республикаға да танымал. Жас болса да, жан-жақты. Әр істің басынан Бексұлтанды кездестіреміз. Ақындық өнерімен қатар, жас келіндердің бетін ашып, қазақтың беташар салт-дәстүрінде де бой көрсетеді. Жалпы шабытты қайдан алады? «Шабыт – адамның ішкі шындығы мен көңілінің көркем көрінісі. Ол – жүректен бастау алып, қиялдың қиясынан келіп, сөзбен өрілетін орамды ой. Шабыт – тек қайғының да, қуаныштың да, намыстың да, жігердің де жемісі. Адам өзін-өзі алдауы мүмкін, бірақ жүрегін ешқашан алдай алмайды. Сондықтан нағыз шабыт – жүректен шығып, жүрекке жететін шын сөздің бастауы. Мен үшін шабыт – белгілі бір уақыттың, жағдайдың, не бір мезеттің жемісі емес. Ол кейде бір сәтте, күтпеген жағдайда келеді. Қайғырып отырғанда да, қуанып тұрғанда да оянады. Көңілдің тұңғиығынан туындайтын, еш өлшемге бағынбайтын тылсым құбылыс» – дейді Бексұлтан Орынбасар.Бексұлтанның мақсаты – қарсыласты жеңу емес. «Айтыс – өнер сайысы. Ал өнер сайысында жеңуді мақсат тұтып, өмірдегі сыйластыққа сызат түсіруің мүмкін. Сондықтан айтыста айтқан бір ауыз сөзім бір адамның жүрегінен орын алса, ой түйсе мен үшін нағыз жеңіс сол» деген ұстанымда. Жас ақынға шығармашылық шабыт тілейміз. Биік белестерді бағындырып, Қызылорданың ғана емес, Қазақстанның есімін бүкіл елге паш ете берсін деген тілектеміз.

Бексұлтан ОРЫНБАСАР: Бүгінгі айтыстың тынысы – бөлек, тынығы – ерек

Фото: Облыс әкімдігі Құрметті жерлестер!Сіздерді Тәуелсіздік күнімен құттықтаймын! Мемлекет басшысы Қасым-Жомарт Кемелұлы: «Біз осы мерейлі мерекеде халқымыздың бостандық туралы арманын ақиқатқа айналдыруға өлшеусіз үлес қосқан ерлердің рухына тағзым етеміз», – деп атап өтті. Тәуелсіздік пен теңдік, азаттық пен елдік, береке мен бірлік – жер бетіндегі қай халықтың болмасын алтынға айырбастамас асылы, баға жетпес байлығы. Оларды көздің қарашығындай сақтауымыз керек. Қазақстанның Әділетті, Қауіпсіз, Таза, Күшті ел болуы жолындағы стратегиялық мақсаты – баршамызға ортақ міндет, қастерлі парыз. Азаттықтың арқасында еліміз халықаралық деңгейде жаңа белестерге қадам басты. Тәуелсіздігін жариялаған күннен бастап Қазақстан халықаралық қауымдастықтың толыққанды мүшесі ретінде танылды. Тілегі татулыққа негізделген Қазақ елін бүгінде әлем бейбітшілік бесігі деп мойындайды. Отыз төрт жыл ішінде тәуелсіз мемлекетіміздің экономикасы қарыштай дамып, көпэтносты, ынтымағы ырысты, бірлігі бекем, келешегі кемел елге айналды. ​Бұл – ұлт пен ұлыстың ауызбіршілігінің, отандастарымыздың табанды еңбегі мен ерік-жігерінің жемісі. ​Тарихи оқиғалар тоғысқан бұл мерекеге қазақ халқы ерекше құрметпен қарайды. ​Баршаңызды Тәуелсіздік күнімен құттықтап, Сіздерге зор денсаулық, бақ-береке тілеймін! Қастерлі Отанымыз өсіп-өркендеп, тәуелсіздігіміз тұғырлы, елдігіміз ғұмырлы болсын! Жігерін еңбекке жаныған халқы бар егемен еліміздің ертеңі жарқын болғай!

Облыс әкімі Нұрлыбек Нәлібаевтың Тәуелсіздік күнімен құттықтауы

Құрметті отандастар!Тәуелсіздік күні құтты болсын!Бұл мерекенің еліміз үшін мән-маңызы айрықша. Осы күні халқымыз Қазақстанды егемен ел ретінде дамыту жолында ерікті әрі түпкілікті таңдау жасады.Тәуелсіздік бәрінен қымбат! Біз бабалар рухына тағзым етіп, өскелең ұрпақ алдындағы тарихи жауапкершілікті сезіне отырып, осы ұстанымға адал боламыз.Азаматтарымыздың ырысты ынтымағының, өзара қолдауының және жасампаз еңбегінің, сондай-ақ қоғамдағы тұрақтылық пен келісімнің арқасында Қазақстан Тәуелсіздікті нығайту ісінде елеулі жетістіктерге қол жеткізді. Қазір бүкіл әлем жылдам өзгеріп жатыр. Түрлі сынақтармен қатар, тың мүмкіндіктерге толы жаңа тарихи дәуір басталды.Мұндай жағдайда біз жас және озық ойлы ұлт ретінде болашаққа зор үмітпен және нық сеніммен қарап, берекелі бірлігімізді сақтауымыз керек. Еліміздің жаһандық деңгейдегі беделі мен бәсекеге қабілетін арттырып, Қазақстанды көркейген мемлекет ретінде дамыту үшін аянбай еңбек етуіміз қажет.Қазір жүзеге асырылып жатқан ауқымды реформалардың нәтижесінде зор табысқа жетеміз деп сенемін. Жан-жақты жаңғыруға бағытталған стратегиялық бағдарымыздан ауытқымай, Әділетті, Күшті, Таза, Қауіпсіз Қазақстанды құрамыз.Баршаңызға мол бақыт, бақ-береке және толағай табыс тілеймін!Қастерлі Тәуелсіздігіміз мәңгі болсын!t.me/aqorda_resmi

Қазақстан Республикасының Президенті Қасым-Жомарт Тоқаевтың Тәуелсіздік күнімен құттықтауы

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Журналистика мамандығының 4-курс студенттері ұйымдастырған «Тәубенің зоры – Тәуелсіздік» атты тағылымдық шара өтті. Аталған іс-шараның негізгі мақсаты – ұлт тәуелсіздігінің мәнін терең ұғындыру, Желтоқсан оқиғасының тарихи орнын жаңаша қырынан көрсету және елдік рухты қалыптастыруға зор үлес қосқан тұлғаларға құрмет білдіру болды.Тәуелсіздік – ұлттың рухын тіктеп, өз болмысын қайта танытқан тарихи белес. Егемендіктің әрбір таңы – бабалардың жанқияр ерлігі мен бүгінгі ұрпақтың жауапкершілігін айшықтайтын қастерлі құндылық екенін тағылымдық шараның мазмұны айқын көрсетті. &nbsp; &nbsp;Шара Мемлекеттік Әнұранмен ашылып, азаттығымыз жолында еңбек еткен аға буын өкілдерін бір минут үнсіздікпен еске алумен жалғасты. Қадірлі қонақтар, 1986 жылғы Желтоқсан оқиғасының куәгерлері, сол бір сындарлы кезеңнің тарихи сәттері туралы жастармен тұщымды ой бөлісті. Олар еркіндікке бастар жолдың әр қадамы табандылық пен қайсарлықты талап еткенін, ал бүгінгі ұрпақтың міндеті – тәуелсіздіктің қадірін терең түсіну екенін атап өтті.Іс-шараға қатысқан батыл желтоқсаншылардың қатарында университеттің Шетел тілдері және аударма БББ-ның аға оқытушысы, п.ғ.м Шолпан Баймаханова, сондай-ақ Қазақ тілі мен әдебиеті және журналистика БББ-ның доценті, ф.ғ.к Гүлмира Баялиева болды.Тәуелсіздік құндылығын дәріптеудегі белсенді қызметі және өскелең ұрпаққа көрсеткен өнегелі еңбегі үшін Шолпан Баймаханова, Гүлмира Баялиева және Асыл Уразова Қызылорда қалалық «AMANAT» партиясының Алғыс хатымен марапатталды. Бұл құрмет – олардың елдік мүдде жолындағы сүбелі еңбегіне көрсетілген ерекше бағасы болды.Журналистика мамандығының 4-курс студенттері ұйымдастырған мазмұнды шара – тарихқа тағзымның, ұрпақ сабақтастығының және тәуелсіздіктің қадірін терең түсінудің жарқын үлгісі. Осындай игі бастамалар жас буынның елдік рухын бекітіп, азаттықтың мәнін ұғынуға септігін тигізері сөзсіз.

«Тәубенің зоры – тәуелсіздік»

<a href="https://kyzylorda-news.kz/">Kyzylorda-news.kz</a> Достық үйінің концерт залында облыстық «Славяне» қоғамдық-мәдени орталығының ұйымдастыруымен, облыстық қоғамдық даму басқармасының «Қоғамдық келісім» КММ қолдауымен дәстүрлі «Достықта жоқ шекара» фестивалі өтті.Тәуелсіздік күніне орай ұйымдастырылған мерекелік шараға облыстық этномәдени бірлестіктердің жетекшілері мен белсенділері, «Қоғамдық келісім» КММ қызметкерлері, мектеп оқушылары мен олардың ата-аналары, әскери қызметшілер және қала тұрғындары қатысты.Достық үйінің фойесінде фотосуреттер мен қолөнер бұйымдарынан көрме ұйымдастырылды.Фестиваль барысында «Қоғамдық келісім» КММ директоры Бақытжан Камалов пен облыстық Қазақстан халқы Ассамблеясының ардагері Рахима Ахметова құттықтау сөз сөйлеп, «Славяне» орталығының достық пен бірлікті сақтау және нығайту жолындағы еңбегіне ризашылықтарын білдірді.Концерттік бағдарлама аясында қала мектептерінің оқушылары мен «Анар Бэби» балаларды дамыту орталығының тәрбиеленушілері, вокалдық топтар мен этномәдени бірлестіктердің шығармашылық ұжымдары әлем халықтарының билерін орындап, достық, бірлік пен бейбітшілік тақырыбында түрлі тілдерде әндер шырқалды. Сондай-ақ славян орталығының «Надежда» жастар тобы «Иван Васильевич меняет профессию» фильмінен көрініс қойды.Фестиваль барысында жуырда Ресей Федерациясының Түмен қаласында өткен зейнеткерлер спартакиадасында жүлделі орындарға ие болған этномәдени бірлестіктердің белсенді ардагерлерінен құралған спорттық команда сахнаға шақырылды. Сонымен қатар, Жамбыл облысындағы «Радонеж» орыс қауымдастығының «Калинка» ансамблі (Тараз қаласы) өнер көрсетті. Фестивальдің әрбір концерттік нөмірі көрермендердің ыстық ықыласына бөленіп, зор қошеметпен қарсы алынды.Іс-шара соңында «Славяне» қоғамдық-мәдени орталығының төрағасы Галина Щербакова фестивальге белсене қатысқан барлық қатысушыларға алғысын білдірді

«Достықтың шекарасы жоқ» фестивалі өтті

<a href="https://kyzylorda-news.kz/">Kyzylorda-news.kz</a> Президентіміз Қасым-Жомарт Кемелұлы Тоқаев 2025 жылды Жұмысшы мамандықтар жылы деп жариялады. «Жұмысшы мамандығының мәртебесін көтеру – қоғамда еңбек адамының қадірін арттыру, оның кәсіби біліктілігін шыңдау, жұмысшы қарым-қабілетін жан-жақты бағалау арқылы жүзеге асатын сан салалы үдеріс» деп атап айтты.&nbsp;Осы орайда Жетікөл ауылдық клубының ұйымдастырыуымен еңбек адамдарының құрметіне арналған «Адал адам» мәдени-тәрбие орталығы тұжырымдамасының «Сұхбат-TIME» жобасы аясында «Еңбекпен ер атанған» атты кездесу кеші өтті.&nbsp;Жетікөл ауылының өсіп-өркендеу жолында еңбек еткен еңбек адамдарының қатарында &nbsp;сауыншы, сушы, аспазшы болып қарапайым еңбек еткен ауылдың ақ жаулықты асыл аналарыда болды.&nbsp;Іс-шара барысында &nbsp;Орынкүл Қозбағарова , Қамаш Жақсығұлова, Күлшаһар Оржанова, Сәрсенкүл Байбосынова, Күлпатша Мырзабекова еңбек адамдарымен сәтті сұхбат жүргізіліп, бейнероликтер көрсетілді. Сонымен қатар ауыл өнерпаздары ән шырқап, би биледі.Сол жылдарда қызмет еткен еңбек адамдарының бойындағы сабырлылық, адалдық, үлкенге құрмет, кішіге ізет көрсетуідің өзі өмір жолдары өскелең ұрпаққа үлгі өнеге.&nbsp;Іс-шара &nbsp;соңында &nbsp;кешке қатысқан &nbsp;қатысушыларға ауыл әкімінің арнайы алғыс хаты табысталды.

Еңбекпен ер атанған

<a href="https://kyzylorda-news.kz/">Kyzylorda-news.kz</a> &nbsp;Бүгін Қызылордада «Бірлігі бекем Сыр елі» атты облыстық Қазақстан халқы Ассамблеясының республикалық форумы өтті.Оған облыс әкімінің орынбасары Мейрамбек Шермағанбет, Қазақстан халқы Ассамблеясының мүшесі, «Адал азамат» жобасының жетекшісі – амбасадоры, Қарағанды облыстық ақсақалдар кеңесінің төрағасы Бекзат Алтынбеков және Жамбыл облыстық «Қоғамдық келісім» мекемесінің директоры Мүбарак Жинақбаева арнайы қатысты.Аймақ басшысының орынбасары атаулы жылда атқарылған жұмыстарға тоқталып, форумға қатысушыларға сәттілік тіледі.«Мемлекет басшысы Қазақстан халқы Ассамблеясының отыз төртінші сессиясында сөйлеген сөзінде: «Былтыр еліміздің рухани және тарихи-мәдени ордасы Түркістанда жаңа Достық үйі ашылды. Достық үйлері тағы бірнеше қала мен аудан орталығында ашылады деп жоспарлануда. Мен бұл бастаманы қолдаймын. Біз қоғамдық келісім инфрақұрылымын біртіндеп кеңейте беруіміз керек» – деген болатын.<blockquote>Биылғы Ассамблеяның 30 жылдығы аясында баршамыз үшін қуанышты жаңалық – Қызылорда қаласында жаңадан «Достық үйі» салынды. Бұл – аймағымыздың бірлігі мен ынтымағын нығайтуға атсалысып келе жатқан этномәдени бірлестіктер мен барша Ассамблея белсенділерінің қажеттіліктерін қамтамасыз ететін замануи ғимарат болады», – деді Мейрамбек Зинабдинұлы.</blockquote>Форумда Бекзат Қомарұлы, Мүбәрәк Қасымқызы, Қазақстан халқы Ассамблеясы төрағасының қоғамдық негіздегі орынбасары Дильфура Бакишқызы сөз сөйлеп, пікір білдірді.Аймақта Қазақстан халқы Ассамблеясының 30 жылдығы мен 1 наурыз – Алғыс айту күніне арналған мерекелік іс-шарадан бастау алған мерейлі жыл аясында ауқымды жұмыс атқарылды. Сәуір айында еліміздің барлық өңірінен келген Ассамблея жастарының басын қосқан «Сыр елі – достық мекені» форумы ұйымдастырылып, қатысушылар Байқоңыр ғарыш айлағына барды. Онда Ассамблея жастарының Туы ғарыш кемесінің бортына табысталып, қонақтар зымыран ұшырылымын тамашалады.Мемлекет басшысының Жарлығына сәйкес Қазақстан халқы Ассамблеясының 30 жылдығына арналған мерекелік медальдар өңірдегі белсенді Ассамблея мүшелеріне салтанатты түрде табысталды.Сонымен қатар, облыстағы этномәдени бірлестіктердің онкүндіктері өткізіліп, аудан орталықтарына «Достық» көш-керуені жол тартты. Бұл шаралар мерейлі жылдың мазмұнын байытып, мәнін айшықтай түсті.Фото: Қызылорда облысы әкімінің баспасөз қызметі

Қызылорда облыстық Қазақстан халқы Ассамблеясының республикалық форумы өтті

<a href="https://kyzylorda-news.kz/">Kyzylorda-news.kz</a>&nbsp;Қазақтың ежелден келе жатқан бір асыл сөзі бар: «Дін – иманның тірегі, иман – адамдықтың жүрегі». Осы жүрекке жылу беріп, елдің еңсесін тіктеп келе жатқан қарашаңырақ – Қазақстан мұсылмандары діни басқармасы (ҚМДБ). 1990 жылы іргесі қаланған бұл қасиетті ұйым – халықты имандылыққа үндеуде, бірлік пен берекенің туын желбіретуде көшбасшы болып келеді.ҚМДБ-ның басты мақсаты – Құран мен Сүннетке сүйенген саф Ислам ілімін халқымыздың тілі мен танымына сай жеткізу. Мешіттерімізде әр жұма сайын айтылатын өнегелі уағыздар, жастарға арналған дәрістер, қайырымдылық бастамалар – бәрі де ел ішінде ізгілік шырағын маздату үшін жасалады. Жат ағымдардан қорғау, отбасы құндылықтарын дәріптеу, дәстүр мен дінді үйлестіре насихаттау – Басқарманың күнделікті қызметінің айнымас бағыты.Бүгінгі заманда ҚМДБ тек мінбер мен медреседе ғана емес, ақпарат айдынында да алда жүр. Әлеуметтік желілер, теле-радио бағдарламалар, кітаптар мен мақалалар арқылы халыққа дұрыс діни түсінік жеткізіліп, жүректерге иман нұры себілуде.Қорыта айтқанда, ҚМДБ – елдің рухани тұтастығының алтын арқауы және &nbsp;қазақ даласында имандылықтың шамшырағын жағып, бірлік пен татулықтың баянды болуына адал қызмет етіп келе жатқан киелі қарашаңырақ.Нәби Нұрдәулет АсқарұлыҚазалы аудандық &nbsp;“Жанқожа батыр”&nbsp;мешітінің бас имамыФото: Freepik.com

ҚМДБ-ның рухани құндылықтарды насихаттаудағы рөлі

<a href="https://kyzylorda-news.kz/">Kyzylorda-news.kz</a> «AMANAT» партиясы Жалағаш аудандық филиалының «Дарын» бастауыш партия ұйымының ұйымдастыруымен, партияның «Ұлттық мұра» жобасы аясында «Әке көрген оқ жонар, ана көрген тон пішер» атты қолөнер туындылары байқауы өтті.Шараның негізгі мақсаты — ұлттық өнерді насихаттап, жас буынды ата-бабамыздан қалған мұраға құрметпен қарауға баулу, шығармашылыққа баулу, өнерге деген ынтасын арттыру.<img src="https://knadmin.beoblood.kz/uploads/Amanat_ol_ner_baj_auy_2_ffbadf0578.jpg" alt="Аманат қолөнер байқауы 2.jpg">Байқау басталар алдында қатысушылардың қолынан шыққан туындылардан арнайы көрме ұйымдастырылып, келген қонақтар мен қазылар алқасы туындылармен танысты. Қатысушылар өз қолөнер жұмыстарын түрлі материалдар — мата, киіз, жүн, ағаш, жіп, қағаз, сазбалшық т.б. арқылы жасап, көпшіліктің назарына ұсынды.Байқау 5 кезең бойынша өтті. Әр кезеңде қатысушылардың шығармашылық шеберлігі, қолданған материалы, ұлттық нақышты жеткізе білуі және жұмысқа деген жауапкершілігі сарапқа салынды.<img src="https://knadmin.beoblood.kz/uploads/Amanat_ol_ner_baj_auy_3_bd30ef90ea.jpg" alt="Аманат қолөнер байқауы 3.jpg">Нәтижесінде №246 мектептің мұғалімі Ғалымжан Абатұлы 1-орынды, №123 мектеп мұғалімі Гүлжайна Ақтау 2-орын, №202 мектептің мұғалімі Ботагөз Есенова 3-орынды иеленді.Сондай-ақ, «Баба мұрасын жалғастырушы» және «Ұлт рухын ұлықтаған ұстаз» номинациялары бойынша &nbsp;№201 мектеп Жомартов Алтынбай мен №201 мектеп Сейтқасымова Гүлдана арнайы марапаттарға ие болды.<img src="https://knadmin.beoblood.kz/uploads/Amanat_ol_ner_baj_auy_5_325100be6c.jpg" alt="Аманат қолөнер байқауы 5.jpg">Іс-шара соңында жеңімпаздар мен шараның өтуіне атсалысқан қатысушыларға партияның облыстық және аудандық филиалдары алғыс хаттары табысталып, естелік сыйлықтар берілді.Бұл байқау — жастарды ұлттық өнерге баулып, мәдени мұрамызды ұлықтауға бағытталған тәрбиелік мәні зор бастама болды.<img src="https://knadmin.beoblood.kz/uploads/Amanat_ol_ner_baj_auy_4_8031d52e69.jpg" alt="Аманат қолөнер байқауы 4.jpg">

Ұлтық мұра: Қолөнер шеберлері сынға түсті

<a href="https://kyzylorda-news.kz/">Kyzylorda-news.kz</a> Бүгін Қызылорда облысының тарихи және ірі аудандарының бірі – Сырдария ауданы, Нағи Ілиясов ауылында «Ауыл Әйелі: Бірлік. Даму. Болашақ» атты өңірлік ауыл әйелдерінің форумы өтті.Іс-шара Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссиясы мен «Ауыл» партиясының және Қызылорда облысы әкімдігінің ұйымдастыруымен жүзеге асырылды.Форумның мақсаты – ауылдық жерлердегі әйелдердің көшбасшылық әлеуетін нығайту, әйел кәсіпкерлерлігін қолдау және олардың экспорт пен кооперация мүмкіндіктерін кеңейту, Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі Ұлттық комиссия мен «Ауыл» партиясының ауыл әйелдерінің мәселелерін шешудегі қызметін таныстыру, сондай-ақ дәстүрлі құндылықтарды насихаттау.Іс-шараға Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі Ұлттық комиссияның мүшелері, «Ауыл» партиясының, орталық және өңірлік мемлекеттік органдардың өкілдері, Жамбыл, Түркістан, Ұлытау облыстары мен Шымкент қаласының делегеттары, әйел-кәсіпкерлер, азаматтық қоғам көшбасшылары, сондай-ақ ауыл еңбеккерлері және еңбек ардагерлері қатысты.Форумды облыс әкімінің орынбасары Мейрамбек Шермағанбет ашып, Сыр елі әйелдерінің өңірдің тұрақты дамуына қосып отырған зор үлесін ерекше атап өтті.​<img src="https://knadmin.beoblood.kz/uploads/irlik_auyl_jelderini_forumy_tti1_465a15f878.jpg" alt="өңірлік ауыл әйелдерінің форумы өтті1.jpg"><blockquote>«Ұланғайыр даламыздың тарихында өздерін кемел көшбасшы, ақылды ел билеуші, көрнекті қайраткер, ұлт жанашыры, ұрпақ тәрбиешісі ретінде танытқан әйелдер аз емес. Олардың есімін бүгінгі күні ерекше қадір-құрметпен еске аламыз. Ел ішіндегі батырлық пен батылдықтың, ақыл мен парасаттың ұйытқысы бола білген Тұмар мен Зарина ханшайымдар, қазақ қыздарының қайраткерлігінің дәлелі болған &nbsp;Әлия мен Мәншүк, Хиуаз апаларымыздың есімдері тарихымызда алтын әріптермен жазулы.Осындай аналарымыздың ізін жалғап, Сыр елінің өсіп-өркендеуіне қажыр-қайратын қосқан Социалистік Еңбек Ерлері – Шырынкүл Қазанбаева, Сәлима Жұмабекова, Балдырған Мұстафаева, Закира Ержанова, Қазына Жүсіпова, Жадыра Таспанбетова сынды апаларымыздың есімі ұрпаққа үлгі болып қала бермек.Қазіргі таңда да, қоғамның барлық саласында әйелдер үлесінің артуы да – Сіздердің қарымды қабілеттеріңіз бен іскерліктеріңіздің дәлелі деп білеміз», - деді Мейрамбек Зинабдинұлы.</blockquote>Жиын барысында ҚР Парламенті Мәжілісінің депутаты, «Ауыл» партиясының Төрағасы Серік Егізбаев сөз сөйлеп, бұл форумның Атырау, Павлодар және Алматы облыстарында өткен кездесулердің ізгі жалғасы екенін мәлімдеді.<blockquote>«Әйел – отбасының тірегі, қоғамның тұрақтылығы мен жаңғыруының қайнар көзі. Президентіміз Қасым-Жомарт Кемелұлы Тоқаев Ұлттық Құрылтайда: «Біз әйелдердің қоғамдағы орнын күшейтіп, олардың құқықтары мен мүмкіндіктерін қорғауға баса мән беруіміз қажет. Бұл – өркениетті елдің белгісі», – деген болатын. Бұл сөздер әйелдердің қоғамдағы орны тек әлеуметтік бағытпен шектелмей, елдің жалпы даму стратегиясымен өзектес екенін көрсетеді. Ауылдағы әйелдер – өңірлік экономиканың қозғаушы күші, ауыл шаруашылығы мен шағын бизнестің тірегі» – деді Серік Рахметоллаұлы.</blockquote>ҚР Президенті жанындағы Әйелдер істері және отбасылық-демографиялық саясат жөніндегі комиссия мүшесі Айгерім Сарсенбаева өз баяндамасында ауыл әйелдерінің әлеуметтік және экономикалық теңдігін қамтамасыз етудің мемлекеттік маңыздылығын атап көрсетті.​​​<img src="https://knadmin.beoblood.kz/uploads/irlik_auyl_jelderini_forumy_tti_22_cc0fa4e541.jpg" alt="өңірлік ауыл әйелдерінің форумы өтті 22.jpg">Пленарлық отырыстың негізгі секциясы ауыл әйелдерінің табысты тәжірибелері мен инновациялық идеяларына арналды:Ақтөбелік «Нұралы» ШҚ басшысы Кәмшат Төлеуова «Экономикалық серпін мен дәстүр сабақтастығы: ауыл әйелдерінің жаңа миссиясы» тақырыбында сөз сөйлеп, шаруашылықты басқарудағы әйелдің рөлін көрсетті.​Қармақшы ауданы, Ақжар ауылының әкімі Нұржамал Тұрсынбаева ауыл әйелдерінің өңір дамуындағы үлесі туралы баяндама жасап, жергілікті басқарудағы табысты әйел көшбасшысының тәжірибесімен бөлісті.Батыс Қазақстан облысынан келген кәсіпкер, Ақжайық аудандық мәслихатының төрайымы Ләззат Сейткереева «Қазақ әйелі: өмірде – нәзік, істе – мығым» деген ұранмен әйелдердің қоғамдық және іскерлік өмірдегі мықтылығын дәріптеді.«Азия Қамыш» ЖШС басшысы Венера Тайлақбаева (Қазалы ауданы) қамыс өнеркәсібінің дамуы және Еуропа елдерімен қамыс экспортын жолға қою бойынша бірегей тәжірибесін ұсынды.​С.Сейфуллин атындағы Қазақ агротехникалық зерттеу университетінің доценті Айнагүл Бегенова «Ауыл әйелдері үшін аграрлық ғылымға жол ашу: білім, инновация және жаңа мүмкіндіктер» тақырыбында ғылыми-инновациялық білімнің маңыздылығына тоқталды.<img src="https://knadmin.beoblood.kz/uploads/irlik_auyl_jelderini_forumy_tti_33_718f27c155.jpg" alt="өңірлік ауыл әйелдерінің форумы өтті 33.jpg">Форум ауыл әйелдері үшін білім, қаржыландыру және көшбасшылық тұрғысынан жаңа мүмкіндіктерді айқындап, тиімді тәжірибе алмасу алаңына айналды. Жиын қорытындысында барлық ұсыныстар мен бастамалар жинақталып, оларды алдағы уақытта іске асыру тетіктері белгіленді.

 Қызылордада «Ауыл Әйелі: Бірлік. Даму. Болашақ» атты өңірлік ауыл әйелдерінің форумы өтті

<a href="https://kyzylorda-news.kz/">Kyzylorda-news.kz</a> Қызылорда облысы әкімдігі және Қорқыт ата атындағы Қызылорда университетінің ұйымдастыруымен «Мұстафа Шоқай мұраларын зерттеудің өзекті мәселелері: тарих, таным және тағылым» тақырыбында халықаралық ғылыми-теориялық конференция өтті.&nbsp;Конференция Мұстафа Шоқайдың өмірі мен мансабы туралы бейнероликпен басталды. Көрнекті мемлекет және қоғам қайраткері, Алаш қозғалысының ірі өкілі, түркі дүниесінің ұлы перзенті Мұстафа Шоқайдың туғанына 135 жыл аясында ұйымдастырылған халықаралық ғылыми-теориялық конференцияға Қазақстан, Түркия, Әзербайжан, Өзбекстан елдерінің ғалымдары мен зерттеушілері, БАҚ және қоғамдық ұйым өкілдері, магистранттар мен докторанттар қатысты. Конференция жұмысы пленарлық және секциялық отырыс түрінде өтті. Ғалымдар мен сарапшылар Мұстафа Шоқайдың өмір жолы, саяси-қоғамдық қызметі, публицистикалық және ағартушылық еңбектері сонымен бірге оның идеяларының қазіргі кезеңдегі өзектілігі жөнінде баяндама жасады.&nbsp;Конференцияның пленарлық мәжілісін Қызылорда облысы әкімінің орынбасары, педагогика ғылымдарының кандидаты Мейрамбек Шермағанбет алғы сөзімен ашты.<img src="https://knadmin.beoblood.kz/uploads/Whats_App_Image_2025_11_14_at_10_26_28_a1be8cb896.jpeg" alt="М.Шоқай конференция.jpeg"><blockquote>– Қызылорда – Мұстафа Шоқайдың кіндік қаны тамған, Сыр бойының қасиетті өлкесі. Бұл өлке – елдік пен ерліктің, руханият пен білімнің тоғысқан жері. Сондықтан аймағымызда Мұстафа Шоқай есімін дәріптеу, мұрасын насихаттау бағытында жүйелі жұмыстар жүргізіліп келеді. Бүгінде облыс пен қала көлемінде қайраткер есімі көшелер мен білім беру ұйымдарына берілді. Қаланың ортасында Мұстафа Шоқайдың еңселі ескерткіші бой көтерді. Университет қабырғасында дәстүрлі түрде «Мұстафа Шоқай оқулары» өткізіліп, жас ғалымдардың зерттеу көкжиегі кеңейіп келеді. Мектептер мен жоғары оқу орындарында қайраткердің өмірі мен қызметін танытатын ғылыми-танымдық және тәрбие бағытындағы іс-шаралар жүйелі жолға қойылған. Театр сахнасында қойылымдар ұсынылып, деректі фильмдер түсіріліп, еңбектері мен энциклопедиясы жарық көруде. Мұның барлығы өңірдің Мұстафатану іліміне қосқан нақты үлесі. Ұлттың ертеңі – білімді, елжанды, отансүйгіш жастардың қолында. Ал сол жастардың жүрегінде Мұстафа Шоқай сынды тұлғалардың өнегесі мен рухы мәңгі жасай береді, – деді Мейрамбек Зинабдинұлы.</blockquote>Пленарлық мәжілісте Түркия мемлекеті Мимар Синан көркем өнер университетінің профессоры, тарих ғылымдарының докторы – Әбдіуақап Қара, АҚШ, Мичиган университетінің құрметті профессоры, филология ғылымдарының докторы – Тимур Кожаұлы, Өзбекстан Республикасы Ғылым академиясының Тарих институтының бас ғылыми қызметкері, тарих ғылымдарының докторы, профессор – Қаһромон Раджабов, Азербайжан ҰҒА тарих және этнология институтының бөлім меңгерушісі, тарих ғылымдарының докторы, профессор – Гюллю Йологлу, ақын, Қазақстан Жазушылар одағы төрағасының орынбасары – Қасымхан Бегманов, Қазақстан мұсылмандары діни басқармасы жанындағы Ислам ғылыми-зерттеу институтының директоры, филология ғылымының кандидаты, доцент – Төрәлі Еділбайұлы, PhD, Қазақстан Жазушылар одағы балалар мен жасөспірімдер әдеби жанрлық кеңесінің төрағасы – Елдос Тоқтарбай, Мұстафа Шоқайтану ғылыми орталығының жетекшісі, саяси ғылымдарының докторы, профессор – Әбдіжәлел Бәкір баяндама жасады.Көп жылғы уақытын Мұстафа Шоқай өмірін зерттеуге арнаған ғалым Әбдіуақап Қара ел тәуелсіздігі жолында құрбан болған ұлы тұлғаларға тиісті баға берілмей келе жатқанын тілге тиек етті. Бұрынғы идеологиялық таным-түсініктен арылу қажет екенін және оларға саяси баға беруде тәуелсіз¬дік мұратын басшылыққа алу керегін ортаға салды. Шоқайдың саяси күресінің басты мақсаты – Түркістандағы кеңес билігінің орнына тәуелсіз ұлттық басқару жүйесін орнықтыру болғанын нақты деректермен дәлелдеп берді.Қорқыт ата атындағы Қызылорда университетінің профессоры Әбдіжәлел Бәкір Мұста¬фа Шоқайдың саяси қайраткер болып қалыптасуына ең алдымен оның өскен ортасы, отбасындағы тәрбиесі ықпал еткенін ортаға салды.&nbsp; Алаштанушы ғалым Елдос Тоқтарбай ХХ ғасырдың алғашқы ширегіндегі әдебиеттегі Түркістан мүддесі туралы айта келіп, Мұстафа Шоқай мұрасын тереңдете зерттеу қажеттігіне тоқталды.&nbsp;<blockquote>– Бүгінде ел бірлігі жолында қызмет еткен азаматтардың өз дәрежесінде ұлықталмай келе жатқаны шындық. Еліміздің тарихы Мұстафа Шоқайдың еңбектерінде айқын көрсетілген. Оның барлығы басқа тілде болғандықтан бүгінде көптеген еңбектерін түсіне алмай келеміз. Сол себепті оқу ордаларында қазақ, орыс, ағылшын тілдерінен бөлек басқа да тілдерді ресми түрде енгізіп, оқыту қажет деп ойлаймын. Мұның барлығы тарихты зерттеу үшін қажет. Сонда болашақ ұрпақтың ұлы тұлғаның өмірі мен шығармашылығына деген қызығушылығы артары сөзсіз. Мұстафа Шоқайдың еңбектері ұлт үшін қызмет ететін мың жылдық мұра. Оны атадан балаға аманат ретінде сақтауымыз қажет, – деді ол.</blockquote>Жазушылар одағы төрағасының орынбасары Қасымхан Бегманов Мұстафа Шоқайдың шығармаларына қатысты ұсынысын айтты.<blockquote>– Мұстафа Шоқай салған жол Санкт-Петербургтен бастап Ташкент, Тбилиси, Баку, Ыстанбұл, Берлин, Париж, Лондон, Варшава, Ригаға дейін созылады. Осы елдердің архивінде түпнұсқа материалдардың басым бөлігі орыс, француз, түрік, неміс тілдерінде сақтаулы тұр. Қазақ және өзбек тіліндегі аудармалар қысқартылып, контексті бұзылған. Осы баяндама аясында бірқатар ұсынысым бар. &nbsp;Біріншіден, бірлескен көптілді аударма-редакция кеңесін құрып, ғылыми аударманың бірыңғай стандарты мен глоссарийін бекіту керек деп ойламын. Сонда болашақ шоқайтанушылар таза ғылыми ізденіспен айналысар еді. Екінші – Мұстафа Шоқайдың Берлиндегі және Париждегі басылымдарының толық жиынтығы қолымызда емес. Кей сандар түрлі жеке қорларда сақтаулы тұр. Осы орайда «Мұстафа Шоқай мұрасы» атты жоба бастап, &nbsp;электронды каталог жасап, еңбектерінің бәрін қолжетімді етуге атсалыссақ нұр үстіне нұр. Үшінші – Мұстафа Шоқайдың қай кезеңде, қандай құжаттарға қол қойғанын және де оның позициясын айқын көрсетіп, ғылыми дәйектермен тайға таңба басқандай етіп көрсетуіміз керек. Оны нақты дәлел ретінде ғылыми айналымға енгізу керек. Ол үшін – хронологиялық карта, Мұстафа Шоқай қатысқан жиналыстар, кездесулер, хаттар тізбелері арқылы биобиблиографиялық профилін жасау міндетті. Төртінші ұсынысым – &nbsp;«Мұстафа Шоқай және түркішілдік» идеясы. Осы идеяны нақтылап, ғылыми тұжырымдап көрсету керек деп ойлаймын. Кей басылымдарда Мұстафа Шоқайдың көзқарасын үстірт көрсетеді. Оның тұлғасын «тарихи пантеон» форматына лайықтап, мультимедиялық көрме, цифрлық тур жасау қажет. Қателеспесем бұл Түркістан қаласында бастау алды. Мұстафа Шоқайдың болған әрбір мемлекеттерін көрсете отырып, құжаттарды да соған сай цифрландырып көрсету бүгінгі заман талабына сай болар еді, – деді ол.</blockquote><img src="https://knadmin.beoblood.kz/uploads/Whats_App_Image_2025_11_14_at_10_26_29_a68e64f2bb.jpeg" alt="М.Шоқай конференция.jpeg">Конференция Мұстафа Шоқайдың саяси-құқықтық, публицистикалық және ағартушылық мұрасын кешенді түрде зерттеу, оның мемлекетшілдік идеяларының қазіргі кезеңдегі өзектілігін айқындау және Мұстафатану ғылымының дамуына жаңадан серпін беруді мақсат етті.Конференцияға қатысушылар Мұстафа Шоқайдың еркіндік пен әділет жолындағы күресі қазіргі Қазақстанның тарихи жадын, рухани тәуелсіздігін және мемлекетшілдік дәстүрін қалыптастырудағы маңызды іргетас екенін атап өтті. Сонымен қатар, Қорқыт ата атындағы Қызылорда университеті жанынан тұрақты түрде жұмыс істейтін «Мұстафа Шоқай мұрасын зерттеу жөніндегі халықаралық ғылыми кеңес» құру, Мұстафа Шоқайдың шығармашылық және саяси мұрасын цифрландыру, оның еңбектерінің толық академиялық жинағын бірнеше тілде дайындау, ашық электрондық «Mustafashokay.kz» цифрлық платформасын іске қосу, Мұстафа Шоқайдың 135 жылдығына арналған халықаралық ғылыми еңбектер жинағын басып шығару және тарату туралы шешім қабылдады.Алаш қайраткерлерінің есімін мәңгі есте сақтау үшін Қызылорда қаласының сол жағалауында «Алаш қайраткерлері аллеясын» ашу, Шиелі ауданына «Мұстафа Шоқай» атауын беру, мектептер мен колледждерде жыл сайын оқушылардың ғылыми конференциясын, эссе байқауларын, дебаттурнирлерін дәстүрлі форматқа енгізу мен Қорқыт ата атындағы Қызылорда университетінде демеушілер есебінен жыл сайын конкурс негізінде білім алушыларға «Мұстафа Шоқай» атындағы білім грантын, «Мұстафа Шоқай» атындағы степендия тағайындау туралы ұсыныстар айтылды.Аталған іс-шара Алаш қайраткерінің мұрасын зерттеудегі жаңа кезеңнің басталғанын айқындайды. Қазақстан, Түркия, Әзербайжан, Өзбекстан сияқты елдерден келген ғалымдардың басын қосқан конференция, Мұстафа Шоқайдың өмірі мен қызметіне қатысты тың дерек пен жаңаша көзқарастарды ортаға салды. Бұл Мұстафа Шоқайдың мемлекетшілдік идеяларының бүгінгі Қазақстан үшін маңызын айқындап, оның мұрасын тереңірек зерттеуге жаңа серпін бергені сөзсіз.Аружан ЕРАЛЫ

Ұлы тұлға есімі дәріптелген күн

<a href="https://kyzylorda-news.kz/">Kyzylorda-news.kz</a>&nbsp; Автожол қызметкерлерінің күні және «Арал құрылысы» ЖШС мекемесінің құрылғанына 20 жыл толуына орай, қала тұрғындары мен қонақтары куә болған салтанатты іс-шаралар легі кешкілік гала концертке ұласты.Бұл күн – жол саласында еңбек етіп жүрген азаматтардың тынымсыз еңбегін бағалау, сондай-ақ 20 жыл бойы ауданның әлеуметтік-экономикалық дамуына өз үлесін қосып келе жатқан «Арал құрылысы» мекемесінің жетістіктерін атап өтуге арналды.Кеш барысында аудан өнерпаздары мен шығармашылық ұжымдары және эстрада жұлдыздары өз өнерлерін ортаға салып, аралдықтарға мерекелік көңіл-күй сыйлады.Концерттің басты қонағы қазақ эстрадасындағы танымал әнші, ақын, сазгер Шымберген Сүлейменов және танымал «МузАрт» тобының сахна төріне шығып, халық сүйіп тыңдайтын әсем әндерін орындауы мерекелі күннің көркін қыздыра түсті.Әсерлі кеште тұрғындар «МузАрттың» орындауындағы көңіл сарайын жадыратар әндерді қосыла шырқап, қуанышқа бөленді.Концертте ауданның құрылыс және инфрақұрылым саласындағы айшықты істері жұртшылыққа кеңінен насихатталды. Шын мәнінде ауданның әлеуетін арттыруда түрлі сала бойынша нәтижелі істер бар. Әріге бармай жыл басынан есептегенде көптеген тұрғын үйлер мен әлеуметтік нысандар пайдалануға берілді. Аспалы көпір салынды, Руханият және Қамқорлық орталығы ашылды. Ақбасты ауылына ауыз су жеткізілсе, Арал қаласы мен Сексеуіл кентінде келешек мектептері пайдалануға берілді. Денсаулық сақтау саласында да айшықты істер бар. Мұның барлығы Мемлекет басшысының, Үкіметтің және аймақ басшысының Арал ауданына деген қолдауының ерекше екенін білдіреді.Кеш қонақтары автожол және құрылыс саласында еңбек етіп жүрген мамандарға жылы лебіздерін білдіріп, қызметтеріне табыс пен сәттілік тіледі.Мерекелік кеш Аралдың аспанын ән мен шаттыққа бөлеп, түрлі отшашулар аудан тұрғындарына ұмытылмас әсер қалдырды.Фото: Арал ауданының әкімінің баспасөз қызметі

Қазақстан және Қызылорда облысының жаңалықтары: Руханият