<a href="https://kyzylorda-news.kz/">Kyzylorda-news.kz.</a> Егемендікке қол жеткен, дамудың жаңа жолына түскен қандай да бір үлкенді-кішілі мемлекет алдымен өзіндік ішкі сыртқы саясатын айқындап алатыны белгілі. Бұл мәселе осы екі саясатта үш түрлі көрініс береді.
Біріншіден, мемлекеттің сыртқы саясатында шет елдермен қарым-қатынаста қолданылатын тіл ресми белгіленеді. Екіншіден, көптілділік жағдайында мемлекеттің ішкі саясат жүйесінде тұрақты тіл саясаты белгіленіп, онда тілдердің мәртебелері мен қолданылу аялары айқындалады. Үшіншіден, мемлекеттің ішкісыртқы саясаттары сол мемлекет халқының ортақ негізгі тілінде түзіле отырып, жұртшылыққа баянды етіледі. Олай болса, мемлекеттік тіл алдымен «билік тілі».
Өйткені мемлекет – басқарудың институты мен тетігі (механизмі) десек, мемлекеттік тіл – басқарудың институттанған тілі, биліктің өмір сүру тілі. Сан алуан тілде сөйлейтін адамдардың өз ана тілін және өзге тілдерді меңгеру мүддесін қорғау міндетіне жауап беру үшін билік пен тіл тұтастыққа бірігеді. Біріншісі екіншісіне көмектеседі, екіншінің көмегімен біріншісі қосымша күшке ие болады. Мемлекеттік тілді білудің әлеуметтік қажеттілігі табиғи түрде жүзеге асқанда одан ұтатын тек мемлекет қана емес, сол мемлекеттің әрбір азаматы болмақ.
Мемлекеттік тіл – көптілді, сондай-ақ біртілді қоғамның өзі айналып өте алмайтын аса қажетті құбылыс. Ол жоғарыда айтып өткеніміздей, әрбір мемлекеттің саяси құрылымына, өзіндік ұстанған ішкі, сыртқы саяси бағыттарына байланысты әрқалай сипатталады. Мәселен, Франция, Испания, Шри-Ланка, Пакистан, Малайзия, Судан, Қытай сияқты елдерде мемлекеттік тіл – оны жариялаған ел азаматтарының барлығы міндетті түрде білуге тиісті тіл болса, Индонезия, Филиппинда мемлекеттік тіл көпұлтты елдің түрлі халқын саяси-мәдени бірлікке ұйымдастырудың тиімді құралы деп анықталады. Енді бір елдерде екінші бір тілді мемлекеттік деп тану ол елдің халқын екіге жаруға әрекет ету деп бағаланады. Сол сияқты бірқатар елдерде мемлекеттік тіл – мәртебесін талқыға салуға Конституция бойынша барлық деңгейде тыйым салынған тіл. Сонымен жоғарыда айтылғандарды негізге алар болсақ, «мемлекеттік тіл» ұғымының мәнін былайша түсіндіруге болады: 1. Көптілдік жағдайында барлық тілдерді тең сақтау немесе бірдей дамыту мүмкін бе? Тіл проблемасы – дүниедегі 200-ден астам мемлекетте зерттелетін үлгі. Өйткені мемлекет халқы мейлі бір ұлттан тұрсын, көп ұлттан құралған болсын, бәрібір өзіндік тіл проблемаларынсыз болмайды. Айталық, бір ұлтты мемлекетте тіл мәселесі таза лингвистикалық сипатта, яғни халықтық тілдің жекелеген өмір сүру салалары арасында өрбиді. Мысалы, дүние жүзінде бір ұлтты мемлекет ретінде танылатын Жапонияда мемлекеттік тіл проблемасы жапон диалектілерінің арасында өршіп отырғандығы байқалады. Ал көпұлтты мемлекеттерде тіл мәселесі жекелеген тілдер арасында ұлтаралық деңгейде болып, саяси-лингвистикалық реңкке ие болады. Өйткені көптілділік жағдайында барлық тілдерді әрдайым тең сақтау немесе бірдей дамыту мүмкін бола бермейді. Тілдердің заң жүзіндегі теңдігі мен қызмет ету аясындағы теңдігі деген екеуі екі бөлек түсінік. Конституция тілдер теңдігін жариялауы мүмкін, алайда олар қызмет ету ауқымы жағынан ешқашан тең болмайды.
Көптілділік жағдайында ылғи да бірді-екілі тіл этносаралық қарым-қатынас құралы болып, бөлектеніп отырады. Сондықтан мұндай көптілділік жағдаятты елде демократиялық бағыттағы тіл саясаты екіжақты мақсатты ұстауды қажет етеді: а) әрбір жекелеген тілдердің өмір сүруі мен дамуын қамтамасыз ету; ә)қандай да бір тілдің бүкіл ел аумағында этносаралық қарым-қатынас құралы ретінде қызметтік мәртебесін бекіту. Тілдерді дамыту ісі осылайша нақтылы жоспарланған түрде жүргізілуі тиіс. Бұл – әлемдік қалыпты жағдай (стандарт). 2. Қандай тілді ел аумағында міндетті мемлекеттік деп тануға болады? Тіл мәртебелерінің ішіндегі ең маңыздысы – мемлекеттік (ресми) тіл. Қандай да бір тілдің ел аумағында мемлекеттік тіл болып танылуы үшін ол барынша дамыған тіл болуы керек. Тілдің дамығандық деңгейін белгілі социолингвист-ғалым Ч. Фергюссон мынадай үш түрлі белгіге ие болуымен анықтайды: 1.Графикаланған (графизация), яғни жазу жүйесі жасаған тіл. 2.Жүйеленген (стандартизация), яғни ауызша және жазбаша формалары нормаланған тіл. 3.Жаңарып жетілген (модернизация), яғни лексикалық, синтаксистік және стилистикалық жағынан жетілген, терминологиясы бай, осы заманғы ғылыми-техникалық прогресс пен саяси өмірді қамтамасыз етуге жарамды тіл болуы керек. Осы белгілерге қарасақ, елімізде мұндай деңгейдегі тіл – қазақ тілі. Тек қазақ тілі ғана Қазақстан халқының басын біріктіруші, этносаралық қарым-қатынасты қамтамасыз ететін аралық тіл бола алады. Сондықтан да қазақ тілі – мемлекет қамқорлығына алынған мемлекеттік (ресми) тіл. Қазақ тілі – әлемдегі 5661 тілдің ішінде өзінің сөйлеушілері жағынан жетінші ондықтағы тілдердің бірі. Ол құрылымдық – жүйелік жағының түбегейлі зерттелген, өзіндік әдеби нормасы мен стилдері қалыптасқан ұлттық тіл. Қазақ тілі – көне түркілік құрылымды сақтап қалған түркі тілдерінің Ата тілі. Бұл қазақ тілінің түркі халықтары арасындағы халықаралық тіл қызметінде қолданылуының бір айғағы болмақ. Сондықтан қазақ тілі өзіне жүктелген міндетті толығынан атқара алатын, болашағы баянды, көсегесі көгеретін ұлтымыздың қымбат қазынасы.
Аман МӘДЕЛХАНҰЛЫ, филология ғылымдарының кандидаты, қауымдастырылған профессор, орталықтың ғылыми қызметкері

Аман Мәделханұлы:  Қазақ тілі — қазақ елінің тәуелсіздік символы

<a href="https://kyzylorda-news.kz/">Kyzylorda-news.kz.</a> Достық үйінде «Қоғам мен мемлекеттің тұрақты дамуы мүддесіндегі әріптестіктің 30 жылдығы» Х жергілікті Азаматтық форумы өтті. Тәуелсіздіктің 30 жылдығына орай ұйымдастырылған шараға облыс әкімінің орынбасары Серік Ахмет қатысты.
Алғашқы рет бұл форум 2003 жылы өткізілді. Содан бері 2 жыл сайын тұрақты ұйымдастырылып келеді.
<blockquote>
 «Халық пен билік арасындағы алтын көпірге, азаматтық қоғам өкілдерінің диалог алаңына айналған мұндай басқосулардың маңызы зор. Облыстағы үкіметтік емес ұйымдар саны жылдан жылға көбейіп келеді. Тәуелсіздік алған жылдары облыстағы қоғамдық ұйымдар саны 15 болса, бүгінде олардың қатары 1000-ға жуықтады. Бұл да азаматтық сектор негіздерінің күшейіп, қоғамдағы азаматтық жауапкершілік пен белсенділіктің артқанын көрсетеді»,- облыс әкімінің орынбасары Серік Ахмет.
</blockquote>
«Рухани жаңғыру» қазақстандық қоғамдық даму институты «Қазақстан Республикасы Тәуелсіздігінің 30 жылдығына орай ұйымдастырылған қажырлы еңбектің арқасында жетістікке жеткен тұлғалардың «Қажырлы еңбек – табыс кілті» атты электронды флаерлерін әзірлеу жобасы іске асырылып, өңірімізден екі адам тізімге енді. Олар «Абай-Дәулет» ЖШС директоры Мұрат Сәрсенбаев және «Қазақстанның еңбек сіңірген ұстазы», бірінші деңгейлі педагог Жәмилә Әбжан.
Өңірдегі үкіметтік емес секторды дамытуда Азаматтық Альянс Қауымдастығы үлкен жұмыс атқаруда. «Бір терезе» қағидаты бойынша қолдау көрсету орталығын жүзеге асырды. Азаматтық қоғам өкілдері мен белсенділер, меценаттар ел өміріндегі кез келген шаруаға, әсіресе пандемияны еңсеруге белсенді атсалысуда.
Азаматтық қоғам өкілдері бас қосқан келелі кеңесте қоғам дамуына үлес қосқан бірқатар азаматтар марапатқа ие болды. «Қазақстан Республикасының Тәуелсіздігіне 30 жыл» мерекелік медалімен «Қызылорда облысының Үкіметтік емес ұйымдарының Альянсы Қауымдастығы» ЗТБ-нің төрайымы, Қызылорда қалалық мәслихат депутаты Анар Ізден марапатталды. Сондай-ақ, «Халық алғысы» медалі, ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссияның және ҚР Тәуелсіздігінің 30 жылдығына орай облыс әкімінің алғыс хаты бірнеше азаматқа табысталды. Сонымен бірге, «Рухани жаңғыру» бағдарламасы аясында ұйымдастырған республикалық «Жомарт жүрек» байқауының өңірлік жеңімпаздары марапатталды. Атап айтқанда, «Жыл меценаты» номинациясының иегері кәсіпкер Ляйля Ризванова, «Жыл тұлғасы» номинациясының иегері дәрігер Әлия Қартабаева, «Жылдың үздік ұйымы» номинациясының иегері «Қызылорда қалалық мүгедектер қоғамы» қоғамдық бірлестінің жетекшісі Сәкен Алдашбаев, «Туған өлке» номинациясының иегері «Ер-Әлі» шаруа қожалығының төрағасы Әліби Бекжанов, «Жылдың үздік қамқоршысы» номинациясының иегері Самұрық инновациялық идеяларды дамыту орталығы» қоғамдық қорының директоры Жандос Тұсмағанбетов.
Форумда қоғам белсенділері, жастар, өңірдегі азаматтық қоғам өкілдері баяндама жасап, пікірлері мен ұсыныстарын ортаға салды.
<img src="https://kyzylorda-news.kz/wp-content/uploads/2021/12/269818227_1437613259967515_4763980743063611819_n.jpg" alt="" />

Қызылордада «Жомарт жүрек» байқауының жеңімпаздарына марапат табысталды

<a href="https://kyzylorda-news.kz/">Kyzylorda-news.kz.</a>&nbsp;ҚР Парламенті Мәжілісінің депутаты, Қазақстан халқы Ассамблеясы депутаттық тобының мүшесі Мейрамбек Төлепберген Қызылорда облысына жұмыс сапарымен келді. Негізгі мақсаты этносаралық қатынастардың өзекті мәселелері бойынша халық арасында ақпараттық-түсіндіру жұмыстарын жүргізу.
<blockquote>
 «Кеше Қармақшы ауданы, ІІІ Интернационал ауылына барып, Цай Ден Хак атындағы мұражайды араладық, ауылдық мәдениет үйінде тұрғындармен кездестік. Сонымен қатар, «Достық жер МК» ЖШС-нің қырман жұмысымен танысып, ауыл шаруашылығы саласының өкілдерімен кездестік. Ел тұрақты, тату-тәтті өмір сүріп жатыр. Сыр өңірі қашанда ұлттар достығының жаршысы. Тағдыр қосқан ұлттар Қазақстан деген тәуелсіз мемлекеттің азаматтары. Олар біздің ағайынымыз, бауырымыз, достарымыз. Елбасымыздың саяси тұрақтылықты сақтау саясатын насихаттау біздің басты мақсатымыз», – деді Мейрамбек Төлепберген.
</blockquote>
Ал, облыстық ҚХА төрағасының орынбасары, облыстық неміс этномәдени бірлестігінің жетекшісі Ирина Шек бірлікті, достықты дәріптеу мақсатында атқарып жатқан жұмыстарына тоқталды.
<blockquote>
 «Бүгінде 160 азамат осы елдің төл перзенттері болып кеткен. Барлығымыздың да мүддеміз елдің бірлігі мен тұрақтылығын сақтап, ұлттар достығын дәріптеу. Біздің бірлестік барлық шараларда белсенді ат салысып келеді», – деді Ирина Шек.
</blockquote>

Мейрамбек Төлепберген: Сыр өңірі қашанда ұлттар достығының жаршысы

<a href="https://kyzylorda-news.kz/">Kyzylorda-news.kz.</a> Күзде балық аулауды жақсы көретіндер облыстың өзендері мен көлдеріне, сондай-ақ кіші Арал теңізіне балық аулауға барады. Осыған байланысты балық аулаушылар су айдындарында балық аулау кезіндегі қауіпсіздік ережелерін сақтауға шақырады.
Сіз балыққа шықпас бұрын, қайықтың және құлаққаптардың жағдайын тексеріңіз. Егер үрлемелі қайық болса, клапандардың ауасы шығып кетпейтінін тексеру қажет.
Мұны тексеру үшін суды клапанмен ылғалдандырыңыз. Балықшылар отыратын орнына қайықтың төменгі жағын бөгде заттармен араластыруға болмайды, балық аулаудың барлық түрлерін жақтаулар жағына қою керек. Үрлемелі қайықта аяқ астына ешқандай зат болмау қажет.
Су айдындарына шықпас бұрын құтқару жилетін кию керек. Қайық үстінде балық аулау кезінде, жылдам қозғалыстар жасауға, сондай-ақ балық аулау кезінде бортты бүгуге болмайды.
Қайықта тұрып аулау кезінде, екі аяқты кеңінен ашып, қайықтың ортасында тұру қажет. Үрлемелі қайықта тұруға қатаң тиым салынады. Сондай-ақ, үрлемелі қайықтың үстіне қойылған тақтайшаға отырып қармақ салуға болмайды. Суда тұрған қайықта орындарды ауыстырмаңыз.
16 жасқа дейінгі балаларға және ересектердің қарауынсыз балалар моторлы қайықты пайдалануға жол берілмейді.
Шынжырхан СҮЛЕЙМЕНОВ, 
«Қызылорда Fish» Қызылорда облысы бойынша 
спорттық және әуесқой балық аулаушылар қоғамы» 
қоғамдық бірлестігінің атқарушы директоры

Күзгі балық аулау кезіндегі қауіпсіздік ережелері

Kyzylorda-news.kz. Қызылорда қаласындағы Әли Мүсілімов атындағы №101 мектеп-лицейінде Тәуелсіздіктің төл құрдасы, ақын, халықаралық және республикалық жыр мүшәйраларының жүлдегері, Қазақстан Жазушылар Одағының мүшесі, мектеп мұғалімі Мөлдір Айтбайдың шығармашылық кеші өтті.
Ақынның бұл кеші Тәуелсіздіктің 30 жылдығына арналды.
Кешке Мөлдір ақынды ақындық өнердің биігіне жетелеуші, өмірдегі, өнердегі ұстазы-анасы Қазына Өзденбаева, үлкен өнер жолына, өмір жолына ақ батасын берген ұстазы Қадыргүл Бердібекқызы, “Сыр Медиа” ЖШС бас директор орынбасары Дәурен Сейітжанұлы және өнердегі досы Мақсат Дауылбай арнайы қонақ болды.
Кеш иесі Мөлдір ақын жүрекжарды өлеңдерін оқып, оқырман қауымды, өнерін құрметтеуші ұжымын тәнті етті. Ақын қызға деген әріптестерінің, оқушылардың қошеметі ерекше.
Кеш барысында ақынның өлеңіне жазылған әндерді облыстық филармонияның әншісі Бекзат Молдаберген мен мектептің өнерлі оқушылары шырқады.
<img src="https://kyzylorda-news.kz/wp-content/uploads/2021/12/fb_img_1639713184943.jpg" alt="" />

Ақын Мөлдір Айтбайдың шығармашылық кеші өтті

Kyzylorda-news.kz. Бүгін Қазақстан Республикасының Демократиялық жаңару күні, деп хабарлайды <a href="https://www.inform.kz/kz">ҚазАқпарат.</a>
1991 жылы 12 желтоқсанда Қазақстан Республикасы Президенті Нұрсұлтан Назарбаевтың «Қазақстандағы 1986 жылғы 17-18 желтоқсандағы оқиғаларға қатысқаны үшін жауаптылыққа тартылған азаматтарды ақтау туралы» Жарлығымен Қазақстандағы 1986 жылғы желтоқсанның 17-18-індегі оқиғаларға қатысқаны үшін қылмыстық, әкімшілік және тәртіптік жауапқа тартылған адамдар ақталды. Сонымен қатар, аталған Жарлықтың 4-тармағы бойынша желтоқсанның 17-сі Қазақстан Республикасының Демократиялық жаңару күні деп жарияланды.
Сондай-ақ осы күн Желтоқсан құрбандарын еске алу күні де.
1986 жылы 17-19 желтоқсан аралығында Алматыда қазақ жастарының КСРО билігінің отаршылдық, әміршіл-әкімшіл жүйесіне қарсы наразылық қимылдары орын алды. Көтерілістің басталуына Мәскеудегі орталықтың республика халқының пікірімен санаспастан Ресейдің Ульянов облыстық партия комитетінің 1-ші хатшысы Г.В.Колбинді Казақстан Компартиясы ОК-нің 1-ші хатшысы етіп тағайындауы түрткі болды. Желтоқсанның 17-і күні таңертеңгі сағат 8-де қаладағы Л.И.Брежнев атындағы алаңға (қазіргі Республика алаңы) саяси тәуелсіздікті талап еткен ұрандармен алғашында 300-дей адам жиналып, кешкісін ереуілшілер саны 20 мыңға жетті. Бірақ олардың қойған талап-тілектері аяқ асты етіліп, оларды тарату мақсатында алаңға құқық қорғау органдарының қызметкерлері мен арнайы әскери күштер тобы жеткізілді.
КСРО ІІМ-нің № 0385 бұйрығы негізінде дайындалған «Құйын-86» операциясы бойынша көтеріліс қатыгездікпен басып жаншылды. Желтоқсанның 18-і күні алаңға қайта жиналмақ болған жастарға қарсы әскер күші қолданылды. Олардың қалған топтарын ығыстыру үшін жедел отряд, милиция мен жасақшылардан арнайы топтар құрылып, қала көшелеріне аттандырылды. Осы әскери күштер желтоқсанның 19-ы күні қаланың әр тұсында қайтадан шеруге шықпақ болған 6 топты басып, таратты, ұстап қамады. Алаңдағы көтерілісшілер таратылған соң ішкі істер бөлімдеріне 2401 адам жеткізілген (Алматы түрмесіне сыймағандықтан, қала сыртына апарып тасталғандарды қосып есептегенде, барлығы 8,5 мың адам ұсталған).
Желтоқсан көтерілісі құрбандарының қатарында Е.Сыпатаев, С.Мұхамеджанова, К.Молданазарова, Қ.Рысқұлбеков, М.Әбдіқұлов, Л.Асанова сынды қазақ жастары бар.

Бүгін Қазақстан Республикасының Демократиялық жаңару күні

Kyzylorda-news.kz. Қызылордада Қазақстан Республикасының Тәуелсіздігінің 30 жылдығына орай, «ВОЛОНТЕРЛІК – ӨМІР БЕЛЕСІ» атты облыстық волонтерлер слеті өтті.
Шараға облыс әкімінің орынбасары Серік Ахмет қатысып, жыл басынан бергі қиын сәтте қайырымдылығын аямаған, бірліктің нағыз үлгісін көрсете білген барша азаматқа, азаматтық қоғам белсенділеріне, соның ішінде волонтерлердің жыл басынан бері атқарған игі жұмыстарына тоқталып, алғысын білдірді.
<blockquote>
 «Тәу етер Тәуелсіздігіміз – біздің ең басты құндылығымыз! Тұңғыш Президент – Елбасы Нұрсұлтан Әбішұлы Назарбаев өзінің «Тәуелсіздік тағылымы» атты мақаласында «Ол – ата-бабаларымыздың азаттық жолындағы жан алысып, жан беріскен сан ғасырлық күресінің заңды жалғасы, халықаралық құжаттармен бекітіліп, мәңгілікке берген сыйы», – дегенін жақсы білесіздер. Тәуелсіз ел болудың арқасында біз ұлттық құндылықтарымызды сақтай отырып, аз ғана мерзім ішінде көптеген жетістіктерге қол жеткізіп келеміз. Осы ретте, жабырқағанның жанына жалау болып, қамыққанға қол ұшын беру, қайырымдылық жасау – халқымыздың қанына біткен асыл қасиеттердің бірі екенін айта кеткеніміз абзал, – деді облыс әкімінің орынбасары Серік Ахмет.
</blockquote>
Шара одан әрі марапаттау кезеңімен жалғасып, облыс әкімінің орынбасары бірқатар азаматтарға Қазақстан Республикасы Президентінің 2021 жылғы 2 желтоқсандағы Жарлығына сәйкес «Халық алғысы» медалін, Қазақстан Республикасы Ақпарат және қоғамдық даму министрінің алғыс хатын, Республикалық волонтерлер фронт-офисі директорының алғысын, Қызылорда облысы әкімі орынбасарының алғыс хатын және «Жыл волонтері» облыстық сыйлығын табыстады.

Қызылордада облыстық волонтерлер слеті өтті

Kyzylorda-news.kz. 16 желтоқсан-Тәуелсіздік күні мерекесіне орай «Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалында мерекелік шара өтті.
Жиында филиал директоры Айнұр Тобаева әріптестерін мерекемен құттықтап, Егемендіктің қазақ халқы үшін қастерлі екенін айрықша атап өтті. Сондай-ақ мемлекетіміздің Тәуелсіздік жылдарындағы жетістіктеріне де тоқталып, корпорация қызметкерлерінің де ел дамуы ісіне атсалысқанын айта кетті.
<blockquote>
 “Биыл Ел Тәуелсіздігіне 30 жыл толуда. Осы аралықта мемлекетіміз үлкен жетістіктерге жетіп, әлемге жақсы атымен таныла білді. Біздің корпорациямыз да күні кеше Біріккен Араб Әмірлігі елінде Біріккен ұлттар ұйымының жоғары бағасына қол жеткізді. Бұл – «Азаматтарға арналған үкімет» Мемлекеттік корпорациясы» қызметінің барша тұрғындарға қол жетімді болғанының дәлелі. Аталған жетістік сіз бен біздің мызғымас бірлігімізге, орасан еңбегімізге берілген баға деп білемін. Алдағы уақытта да толағай табыстардың бастамашысы болатындарыңызға сенемін”, – деді Айнұр Тобаева.
</blockquote>
Филиал директоры Айнұр Тобаева осы жиында халыққа қызмет көрсету орталығының бірнеше қызметкеріне түрлі марапаттарды табыс етті. Атап айтар болсақ, ҚР Президентінің 2021 жылдың 2 желтоқсандағы Жарлығы бойынша филиалдың 5 қызметкері «Қазақстан Республикасының Тәуелсіздігіне 30 жыл» мерекелік медалімен наградталды. Сонымен қатар «Мемлекеттік қызмет көрсету саласындағы қызметкерлердің жергілікті кәсіптік Одағы» қоғамдық бірлестігінің «Еңбек даңқы» медалімен 3 қызметкер және осы бірлестіктің «Кәсіподақ қызметінің дамуына қосқан үлесі үшін» төсбелгісімен 4 қызметкер марапатталды.
Шара барысында «Азаматтарға арналған үкімет» мемлекеттік корпорациясы» КЕ АҚ басқарма төрағасы Әділ Қожықовтың «Алғыс хаты» филиалдың 47 қызметкеріне табысталды. Сондай-ақ, Қызылорда облысы әкімі Гүлшара Әбдіқалықованың «Алғыс хатын» Халыққа қызмет көрсету орталығының Шиелі аудандық бөлімі басшысының орынбасары Қуаныш Мәуленов, облыстық ішкі саясат басқармасы «Қызылорда облысының тілдерді оқыту орталығының» директоры Ләззат Ортаеваның «Алғыс хатын» филиал менеджері Мейірбек Әбутәліпұлы иеленді.
<img src="https://kyzylorda-news.kz/wp-content/uploads/2021/12/img-20211215-wa0112.jpg" alt="" />
<img src="https://kyzylorda-news.kz/wp-content/uploads/2021/12/img-20211215-wa0111.jpg" alt="" />
<img src="https://kyzylorda-news.kz/wp-content/uploads/2021/12/img-20211215-wa0113.jpg" alt="" />

Мерекеде қызметі бағаланып, еңбегі еленді

Kyzylorda-news.kz. Қызылорда облысының әкімі Гүлшара Әбдіқалықова сырбойылықтарды ел Тәуелсіздігінің 30 жылдығымен құттықтады.
ҚЫМБАТТЫ ЖЕРЛЕСТЕР! Сіздерді еліміздің ең басты ұлық мерекесі – қастерлі де қасиетті ТӘУЕЛСІЗДІГІМІЗДІҢ 30 ЖЫЛДЫҚ МЕРЕЙТОЙЫМЕН шын жүректен құттықтаймын!
Бұл – әлем картасында ойып өз орнын алған Қазақстанның орда бұзар жасы!
Бабалар ұланғайыр жерімізді ақ найзаның ұшымен, ақ білектің күшімен қорғап, сан ғасыр егемен ел болуды арман етсе, сол арманына 1991 жылы ұрпағының қолы жетті.
Тәуелсіздік – бұл ең асыл, киелі құндылық қана емес, келер ұрпақ алдындағы үлкен жауапкершілік! Әлемдегі қандай халық үшін де азат ел болудан асқан ұлы мақсат жоқ. Егемен ел бола алмай жүрген мемлекеттер қаншама. Соларды еске алсақ, Тәуелсіз ел екенімізге шүкіршілік дейміз!
Тәуелсіз Қазақстанның бүгінге дейін жеткен жетістігі мен алған биігінде әрбір сырбойылық азаматтың лайықты үлесі бар. Қандай да бір ісіміз жемісті, нәтижелі болса, ол сіз бен біздің үйлесімді тірлігіміз бен берекелі бірлігіміздің арқасында деп білемін.
Сіздерді ең маңызды ұлттық мерекемізбен құттықтай отырып, әр отбасына амандық, ырыс-құт тілеймін!
Сүйікті Отанымыз – Тәуелсіз Қазақстанымызды одан әрі нығайту жолында аянбай еңбек ете берейік! Еліміз еңселі, Тәуелсіздігіміз тұғырлы, ғұмыры мәңгілік болсын! ТӘУЕЛСІЗДІК КҮНІ ҚҰТТЫ БОЛСЫН!

Гүлшара Әбдіқалықова: Тәуелсіз Қазақстанның бүгінге дейін жеткен жетістігінде әрбір сырбойылық азаматтың лайықты үлесі бар

Kyzylorda-news.kz. Бүгін Қазақстанның қасиетті әрі қастерлі мерекесі – Тәуелсіздік күні. Осыдан 30 жыл бұрын 16 желтоқсанда Жоғарғы Кеңес «Қазақстан Республикасының Мемлекеттік тәуелсіздігі туралы» Конституциялық Заңды қабылдаған еді, деп хабарлайды <a href="https://www.inform.kz/kz">ҚазАқпарат.</a>
Тәуелсіздіктің 30 жылдығында Қазақстан елеулі жетістіктерге жетті және күрделі сын-қатерлерден өтті. Төл валютасын қолданысқа енгізді. Айбынды әскерін құрды. Шекараларын бекітіп, жаңа астанасын салды. Мемлекеттік рәміздерін бекітті.
Орнықты мемлекеттік институттары бар және экономикасы бәсекеге қабілетті демократиялық мемлекет ретінде қалыптасты.
Әлемдік сауда-экономикалық жүйеге толық еніп, өзін сенімді серіктес ретінде көрсете білді.
Бүгінде әлем бойынша 120-дан астам ел Қазақстанмен дипломатиялық қарым-қатынас орнатқан.
Биылғы мерейтойлық жылда да елімізде ауқымды реформалар басталды, экономика мен әлеуметтік сала жаңғырып келеді.
Пандемияға қарамастан, мемлекет отандық бизнеске қолдау көрсетіп жатыр. Халқымыздың саны 19 миллионнан асты.
Қазақстан ССРО тарағаннан кейін араға 8 күн салып, тәуелсіздігін жариялады. Қазақстанның дербес ел болғанын әлемге алғашқылардың бірі болып «ҚазАқпарат» халықаралық ақпарат агенттігі (ҚазТАГ) хабарлаған еді.
<blockquote>
 «Тәуелсіздіктің біздің бәрімізге артар міндеті мол. Енді еңселі ел болудың жолына шындап түсуіміз керек. Әулетіміздің асуы да, дәулетіміздің тасуы да өз қолымызда. Кең-байтақ жеріміздің байлығы осы даланың түпкілікті халқына да, тағдыр қосып бірге өмір сүріп жатқан өзге ұлт өкілдеріне де молынан жетеді. Не істесек те ақылмен істейік, арзан ұранға ермейік, ұшпа сезімге ерік бермейік дегім келеді», – деді Елбасы Нұрсұлтан Назарбаев 17 желтоқсанда Алматыдағы Орталық алаңда Қазақстан Республикасының мемлекеттік тәуелсіздігі жариялануына орай өткізілген жиында.
</blockquote>
Қазақстанның Тәуелсіздігін ресми түрде ең алғаш Америка Құрама Штаттары мойындады.
Одан кейін Қытай, Ұлыбритания, Моңғолия, Франция, Жапония, Оңтүстік Корея және Иран Ислам мемлекеті Қазақстанды тәуелсіз мемлекет ретінде таныды.
Ал Түркия бірінші болып Қазақстанда өз елшілігін ашты.
ҚР Тұңғыш Президенті – Елбасы Нұрсұлтан Назарбаев өзінің «Тәуелсіздік тағылымдары» атты мақаласында ғасырлар тоғысында ел басқару ісі үлкен сеніммен қатар зор жауапкершілік жүктегенін айтады.
<blockquote>
 «Осыдан отыз жыл бұрын біз саналы түрде, өз дүниетанымымыз бен болмысымыздың негізі ретінде бостандық пен азаттыққа таңдау жасадық. Бүгінге дейінгі бұл мерзім адамзат тарихы үшін қас-қағым ғана сәт болғанымен, орда бұзар жасқа енді толған тәуелсіз Қазақстан үшін ол – үлкен белес, асқаралы асу. Мұндайға тек рухы күшті, бірлігі бекем жұрт қана қол жеткізе алады», – деп жазды Н. Назарбаев.
</blockquote>
Мемлекет басшысы Қасым-Жомарт Тоқаев ел Тәуелсіздігінің 30 жылдық мерейтойына арналған салтанатты жиынында Тәуелсіздіктің отыз жылын халқымыздың тарихында бетбұрыс болған жасампаздық дәуірі деп атады.
<blockquote>
 «Тарихи уақыт өлшемімен қарағанда отыз жыл деген – қас-қағым сәт. Ал, өткен оқиғалар тұрғысынан бағаласақ, ғасырларға татитын мерзім. Қазақстан халқы үшін бұл – азаттық жылнамасының тұтас дәуірі. Жарқын болашағымызға жол салған ұлы жетістіктер кезеңі. Енді Тәуелсіздіктің төртінші онжылдығына қадам басқалы тұрмыз. Бұл кезең бізге жаңа міндеттер жүктейді. Мемлекеттігімізді одан әрі нығайтып, халқымыздың әл-ауқатын арттыра түсуіміз керек. Сондықтан, барлық саладағы реформаны міндетті түрде жалғастыра береміз. Ең бастысы, бейбіт өмірді, тыныштық пен тұрақтылықты сақтай білуіміз қажет. Сонда азаматтарымыз Тәуелсіздіктің игілігін әрдайым сезінетін болады. Біздің мақсатымыз – осы», – деді Президент.
</blockquote>
Қазақстандағы Тәуелсіздік күнінде тұтас ел бойынша салтанатты іс-шаралар өтеді, әлеуметтік нысандар іске қосылады. 2021 жылдың басынан бергі көптеген іс-шаралар Тәуелсіздік күніне арналды.
Сонымен бірге, Президент Ақордада еліміздің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі, белсенді қоғамдық қызметі үшін бір топ азаматты мемлекеттік наградалармен марапаттады және Қазақстанды көркейтуге үлес қосқан барлық азаматқа ризашылық білдірді.
Ал 15 желтоқсанда Нұр-Сұлтанның үш нүктесінде демеушілік қаражат есебінен мерекелік отшашу ұйымдастырылды.
<blockquote>
 «Даму жолымызды нақты нұсқап тұрған стратегиялық мақсаттарымыз бар. Еліміз өзінің сара жолынан айнымай, алға қадам баса береді. Біз үшін Тәуелсіздік бәрінен қымбат. Осы баға жетпес құндылығымызды қастерлеп, қуатты Қазақстанды дамыту үшін бәріміз жұмылып, бір ел болып аянбай еңбек етейік. Жалпыұлттық мерейтойымыз құтты болсын! Еліміздің абыройы асқақтап, беделі биіктей берсін! Елбасымыз аман болсын! Қазақстанымыз мәңгі болсын!», – деп құттықтады Қасым-Жомарт Тоқаев.
</blockquote>

Тәуелсіздікке 30 жыл: Бүгін Қазақстанда ұлық мереке

<a href="https://kyzylorda-news.kz/">Kyzylorda-news.kz.</a> 20 желтоқсан күні облыстық Қазақстан Халқы Ассамблеясы жанындағы аналар кеңесінің бастамасымен «Қыз – елдің көркі» атты қыздар форумы ұйымдастырылады. Оған 16-20 жас аралығындағы қыздар қатысады.
<blockquote>
 «Аналар кеңесі жұмысының бір бағыты – қыздар тәрбиесі. Осы жылдың шілде айында бастау алған «Қыз – ұлттың ұяты, халықтың шырайы» атты ақпараттық-насихаттық жобасы жүзеге асырылуда. Аудандарда үлгілі көпбалалы отбасының және қыз тәрбиелеп отырған аналармен кездесулер өткіздік. Сондай-ақ, онлайн түрде оқушы және студент қыздар қатыстырылып тәрбиелік мәні бар шаралар ұдайы ұйымдастырылуда. Ал бұл форум өсіп келе жатқан өрістерімізге үлкен тәрбие бастауы болмақ. Себебі, ұрпақ өрбітуші болашақ ана, қыздарымыздың бойында инабаттылық, ибалалық қасиеттерді жоғалтпай, сақтап қалуымыз керек», – деді облыстық Аналар кеңесінің төрайымы Рахима Ахметова.
</blockquote>
Жалпы, Аналар кеңесі 2014 жылы құрылды. Қазіргі кезде облыс бойынша 113 Аналар кеңесі жұмыс жасайды, 1103 қыз-келіншек қамтылған. Олар отбасы мәртебесін биіктетуде, құндылықтарды насихаттауда және ұрпақ тәрбиесіне бағытталған жұмыстарды атқарады.
Барлық аудандарда әкенің отбасындағы рөлін, бала тәрбиесіндегі орнын нығайтуда «Әкем – асқар тауым», «Әкем – мақтанышым», «Әке болу оңай ма?!» атты кездесулер, пікір алмасулар, дөңгелек үстелдер ұйымдастырылуда.
<blockquote>
 «Отбасы құндылықтарын дәріптеу мақсатында ардагерлер, әжелер кеңестерімен 8 шара өтті. «Бойтұмар ханым» қоғамдық бірлестігінің ұйымдастыруымен облыста «Ақ орамал» жобасы іске асты. Мақсаты – әйел-аналарымыздың отбасы тәрбиесіндегі орны мен ұрпақтар сабақтастығын нығайту. Жоба «Қазақстанның іскер әйелдері» қауымдастығымен қолдау тауып, алдағы уақытта республика көлемінде жүзеге асу жоспарлануда», – деді Әйелдер істері және отбасылық-демографиялық саясат жөніндегі комиссия хатшысы Қаламқас Каримова.
</blockquote>

Қызылорда: «Қыз &#8211; елдің көркі» атты қыздар форумы өтеді

<a href="https://kyzylorda-news.kz/">Kyzylorda-news.kz.</a> Тәуелсіздік жылдарында елімізде мұнай өндіру 3,5 есе, газ өндіру 7 есеге ұлғайды, деп хабарлайды <a href="https://www.inform.kz/kz">ҚазАқпарат.</a>
Энергетика министрі Мағзұм Мырзағалиевтің мәліметінше, еліміз тәуелсіздік алғалы өндірудің өсу қарқынында айтарлықтай серпіліс байқалған.
<blockquote>
 «Тәуелсіздіктің 30 жылында мұнай өндіру 3,5 есеге, газ өндіру 7 есеге ұлғайды. Осы кезеңде 1,7 млрд тонна мұнай, 790 млрд текше метр газ өндірілді. Ал, 1,4 млрд тонна мұнай экспортталды. 2020 жылдың қорытындысымен газ өндіру көлемі 55,1 млрд текше метрді құрады. Электр энергетикасы саласында бірқатар маңызды жобалар жүзеге асырылды. Соның нәтижесінде электр энергиясын өндіру 83 млрд-тан 108 млрд квт/сағатқа дейін артты. Яғни 30%-ға ұлғайды», -дейді Мағзұм Мырзағалиев.
</blockquote>
Министрдің айтуына қарағанда, жаңартылатын энергия көздерін дамытуда да жоғары қарқын бар. Қазір елімізде жаңартылатын энергия көздерінің 126 объектісі жұмыс істеп тұр. Оның жалпы қуаты 1975 МВТ-ты құрайды.
<blockquote>
 «Біз осы жетістіктермен тоқтап қалмауымыз қажет. Алдымызда мұнай-газ, энергетика саласын дамытудың жаңа белестері тұр. Осы жолда аянбай еңбек етіп, тәуелсіздіктің жаңа онжылдығында елімізді асқақтата берейік», -деп атап өтті Мағзұм Мырзағалиев.
</blockquote>

Қазақстан және Қызылорда облысының жаңалықтары: Қазақстан Тәуелсіздігіне – 30 жыл

Аман Мәделханұлы: Қазақ тілі — қазақ елінің тәуелсіздік символы

Қызылордада «Жомарт жүрек» байқауының жеңімпаздарына марапат табысталды

Мейрамбек Төлепберген: Сыр өңірі қашанда ұлттар достығының жаршысы

Күзгі балық аулау кезіндегі қауіпсіздік ережелері

Ақын Мөлдір Айтбайдың шығармашылық кеші өтті

Бүгін Қазақстан Республикасының Демократиялық жаңару күні

Қызылордада облыстық волонтерлер слеті өтті

Мерекеде қызметі бағаланып, еңбегі еленді

Гүлшара Әбдіқалықова: Тәуелсіз Қазақстанның бүгінге дейін жеткен жетістігінде әрбір сырбойылық азаматтың лайықты үлесі бар

Тәуелсіздікке 30 жыл: Бүгін Қазақстанда ұлық мереке

Қызылорда: «Қыз – елдің көркі» атты қыздар форумы өтеді

Тәуелсіздік жылдарында елімізде мұнай өндіру 3,5 есе, газ өндіру 7 есеге ұлғайды

Қазақстан және Қызылорда облысының жаңалықтары: Қазақстан Тәуелсіздігіне – 30 жыл

Аман Мәделханұлы: Қазақ тілі — қазақ елінің тәуелсіздік символы

Қызылордада «Жомарт жүрек» байқауының жеңімпаздарына марапат табысталды

Мейрамбек Төлепберген: Сыр өңірі қашанда ұлттар достығының жаршысы

Күзгі балық аулау кезіндегі қауіпсіздік ережелері

Ақын Мөлдір Айтбайдың шығармашылық кеші өтті

Бүгін Қазақстан Республикасының Демократиялық жаңару күні

Қызылордада облыстық волонтерлер слеті өтті

Мерекеде қызметі бағаланып, еңбегі еленді

Гүлшара Әбдіқалықова: Тәуелсіз Қазақстанның бүгінге дейін жеткен жетістігінде әрбір сырбойылық азаматтың лайықты үлесі бар

Тәуелсіздікке 30 жыл: Бүгін Қазақстанда ұлық мереке

Қызылорда: «Қыз &#8211; елдің көркі» атты қыздар форумы өтеді

Тәуелсіздік жылдарында елімізде мұнай өндіру 3,5 есе, газ өндіру 7 есеге ұлғайды

Қызылорда: «Қыз – елдің көркі» атты қыздар форумы өтеді