<a href="https://kyzylorda-news.kz/">Kyzylorda-news.kz.</a> Токио Олимпиадасының қол жүлдегері Қамшыбек Қоңқабаев әлі талай елдің абыройын асқақтатып, жеңісті күндер көп болатынына сенімді екенін жеткізді.
<blockquote>
 «Барша қазақстандықтарды ел Тәуелсіздігінің 30 жылдығымен құттықтаймын! Егеменді елде туылып, Тәуелсіздіктің төл құрдасы болғаныма қуанамын. Ең алғаш боксқа келуіме себепші болған жанның бірі – туған ағам еді. Содан бері спорт саласында жүргеніме 16 жыл толды. Осы уақыт аралығында кәсіби бокста шыңдалып, түрлі жекпе-жектерге қатыстым. Жақында «WBA Gold» чемпиондық атақ үшін ауыр салмақта жекпе-жек өткен болатын. Бұл кездесу 12 раундқа жоспарланған еді. Алайда жетінші раунда қарсыласымның жарақатына байланысты жекпе-жек тоқтатылып, жеңіс бізге бұйырды. Осылайша кәсіби бокста 4-ші жеңісіме қол жеткіздім. Қарсыласым туралы айтатын болсам, Стивен Уорд Ұлыбританиялық кәсіби боксшы. Ол кәсіби бокста 14 рет жекпе-жек өткізіп, біреуінде ғана жеңіліске ұшыраған. Алға қойған жоспарларымның бірі келесі жылы наурыз айында тағы кездесу өткізу ойда бар. Әлі талай елімнің абыройын асқақтатып, жеңісті күндер көп болатынына сенімдімін», – дейді боксшы.
</blockquote>

Қамшыбек Қоңқабаев: Әлі талай елімнің абыройын асқақтатып, жеңісті күндер көп болатынына сенімдімін

<a href="https://kyzylorda-news.kz/">Kyzylorda-news.kz.</a> Сыр елінде ҚР Тәуелсіздігінің 30 жылдық мерекесінде Нартай Бекежанов атындағы қазақ академиялық музыкалық драма театрында 15 желтоқсан күні «Абылай ханның арманы» атты тарихи драмасы сахналанады.
<blockquote>
 «Тарихи қойылымда Абылай ханның жоңғар тұтқынына түскен кезінен басталады. Сондай-ақ, 1720-1770 жылдар аралығында ел билеген хандар мен жаужүрек батырлардың ерлігі баяндалып, қазақ халқының басына түскен қиындықтары көрсетіледі. Драмада Абылай ханның көшбасшылық қасиеті, елін, жерін сақтап қалудағы саясаткерлігі, ақыл-парасаттылығы, ержүрек батырлығы жан-жақты қырынан ашып көрсетіледі. Спектакльде ойнайтын актерлардың дайындығы жоғары деңгейді. Бұл қойымды бұған дейін де бірнеше мәрте сахналағанбыз. Көрерменнің ықыласы ерекше болды», – дейді Н.Бекежанов атындағы қазақ академиялық музыкалық драма театрының көркемдік жетекшісінің міндетін атқарушы Ақтөре Оразалы.
 «Кез келген қойылымның басты кейіпкерін сомдау үлкен жауапкершілік жүктейді. Иығыңда екі есе жүк тұрады. Ал Абылайдай ханның ролін ойнау екінің біріне бұйырмайтын бақ. Берілген мүмкіндікті әрдайым дұрыс пайдаланып келеміз. Көрерменннің ықыласы тіпті шабыттандырады. Шығармашылық топ өте жоғары деңгейде өнер көрсетуге бар күштерін салады. Баршаңызды қойылымды тамашалауға шақырамын. Тәуелсіздік мерекесі құтты болсын», – деді актер, мәдениет саласының үздігі Сырым Әбдіразақов.
</blockquote>

Қызылордада Тәуелсіздік мерекесінде тарихи қойылым сахналанады

<a href="https://kyzylorda-news.kz/">Kyzylorda-news.kz.</a>&nbsp;Сырбойлық ұстаздар білім берумен қатар өздерін дамытуға да баса назар аударады. Тәуелсіздіктің 30 жылдық мерекесіне орай ұйымдастырылған қос бірдей конкурстан жалағаштық 2 ұстаздың мерейі үстем болды. Өңірлік коммуникациялар қызметінде өткен баспасөз конференциясына қатысып, жетістіктерімен бөлісті.
<blockquote>
 «Биыл Егемендігімізді алып, өзге елдермен иық тірескенімізге – 30 жыл толды. Қазіргі таңда білім саласы үлкен жетістіктерге жетіп, арамызда жас ғалымдар көбейді. Өздеріңіз білетіндей, бүгінде жас ұрпақтың білім алуына үлкен мүмкіндіктер жасалған. Облысымызда он жыл ішінде халықаралық және республиалық олимпиадалар мен ғылыми жобаларда 500-ге жуық оқушы оқ бойы оза шауып, аймақ абыройын асқақтатып, жүлделі орындардан көрінді. Еркін қалықтаған Тәуелсіздік перзенттері бүгінде әлемнің ең ақылды жастары деп айтуымызға болады. Төл тарихымызбен ұлттық құндылықтарымызды дәріптеуге негізделген білім беру жүйесі жеткіншектеріміз бен ұстаздарымыздың биік белесті бағындыруына ықпал жасап келеді», – деді облыстық білім басқармасының басшысы Ақзира Қасымова.
</blockquote>
Жалағаш ауданы Темірбек Жүргенов атындағы №123 мектеп-лицейінің ағылшын тілі пәні мұғалімі Айсана Намурадин «Медиа» – жаңа медиа-жобаларды іске асыру бағыты бойынша 3 млн. теңге көлеміндегі гранттың жеңімпазы атанды. Ал №33 мектебінің мұғалімі Сымбат Жәнібай «Үздік өзін-өзі тану мұғалімі» республикалық байқауында топ жарды.
<blockquote>
 «Тәуелсіздік жылдарында мемлекетіміз жастарды қолдауға басымдық беріп, осы бағытта көптеген шараны жүзеге асырды. Соңғы уақытта ел жастарына көңіл бөлу, оларды барынша жан-жақты қолдау ісі ерекше қарқын алды. «Тәуелсіздік ұрпақтары» гранты мен секілді жас буынды қолдау ісін ілгерілетіп қана қоймай, алдағы уақытта игі қадамдарға кеңінен жол ашатынына сенімім мол», – деді Айсана Намурадин.
</blockquote>
Байқаудың мақсаты – өзін өзі тану идеяларын жүзеге асыру бойынша озық педагогикалық тәжірибені анықтау болды. Байқау 3 кезеңнен және 9 турдан тұрды. Нәтижесінде, «Үздік өзін өзі тану мұғалімі» құрметті атағын иелендім. Бұл жетістік тек өзімнің емес мектебімнің, ауданның, облыстың жетістігі деп білемін, – деді Сымбат Жәнібай.
Басқарма басшысы осындай талантты ұстаздарды қолдау бағытындағы жұмыстар жалғаса беретіндігін жеткізді.

Ақзира Қасымова: Талантты ұстаздарды қолдау бағытындағы жұмыстар жалғасады

<a href="https://kyzylorda-news.kz/">Kyzylorda-news.kz.</a> 30 жылда өңір дамуының барлық салаларында ауқымды жұмыстар жасалды. Тарих үшін аз уақыт болғанымен ғасырға татитын тіршілік атқарылды. Тәуелсіздік – тағдырдың сыйы. Бұдан 30 жыл бұрын бейбіт жолмен келді десек те, осы тәуелсіздікті жақындату үшін ата-бабаларымыз қан төгіп, өмірін берді. Үлкен күреспен келгенін кейінгі ұрпақ білуі тиіс. Тәуелсіздіктің тарихы тереңде жатыр.
Үлкен жауапкершіліктің астарында – тұғырын нықтау бар, туын биіктету бар, барлық жағынан тәуелсіздікті орнықтыру бар. Өйткені, бұл үлкен істердің бастамасы ғана. Егемендікке қол жеткізгенде, әнұранымызды шырқаттық, көк туымызды желбіретіп, Елтаңбамызды қабырғамызға ілдік. Қазақстанның өз армиясы қалыптасты. 
Нарықтық жолдағы қиындықты да еңсердік. Барлық салаларда реформалар жүрді. Халықтың шыдамдылығы мен елдің сабырлылығы арқасында өтпелі кезеңдегі қиындықты жеңе білдік. Бүгінгі таңда халықаралық деңгейде Қазақстанның дәрежесі өсті. Елбасымыздың сарабдал саясаты арқасында сыртқы саясатымыз орнықты. Өзге елден айырмашылығымыз біздің еліміз бейбіт өмір сүріп келеді.
1972 жылы 25 жасқа да толмаған кезім, аудандық комсомол комитетінің бірінші хатшысы едім. Сол кезде алғаш рет Тереңөзекке көпір салуға ұсыныс жасадым. Мен осы ғасыр құрылысына айналған көпірге 50 жыл өмірімді бердім десем артық болмас. Жыл сайын республикаға барып, түрлі Парламент сессияларында мәселе көтеріп, ізденіп, ауданнан кеткенше сол көпірді сала алмадым. Үлкен өкінішім еді. Табиғат та, Құдірет те көмектескені болуы керек, сонан кейін облыстық мәслихаттың депутаты, хатшысы болып жүріп, осы мәселені күн тәртібінен түсірмедім. 2011 жылы Елбасына кіріп, көмек сұрадым. 2014 жылы көпір салынып, арманым орындалды. Ең бастысы, 40 жыл көтерілген мәселе тәуелсіз елімнің жылдарында жүзеге асып, елдің игілігіне берілді. Сондықтан да, әрбір тәуелсіздік жылдары жасалған жақсылықты істерді насихаттау біздің парызымыз болуы тиіс.
Алмагүл БОЖАНОВА,
«Парасат» орденінің иегері,
«Ұрпақтан ұрпаққа» қоғамдық бірлестігінің төрайымы

Тәуелсіздік – тағдырдың сыйы

<a href="https://kyzylorda-news.kz/">Kyzylorda-news.kz.</a> «Ел тәуелсіздігіне орай берілген марапат жеке басыма ғана емес, менің халқыма, Сыр кәсіпкерлеріне көрсетілген қошемет деп білемін», – дейді «Парасат» орденінің иегері, кәсіпкер Сейітқали Алшынбаев.
Осыдан 30 жыл бұрын кәсіпкерлікке бет бұрған марапат иегері «Мемлекет маған не береді деп емес, мемлекетіме мен не беремін» деген принциппен жұмыс жасаған.
<blockquote>
 «Балапан басымен, тұрымтай тұсымен кеткен заманда, қиындықтан жеңілмей, бүгінге дейін жеткеніміз тәуелсіз елімнің, тағдырымның бізге жасаған сыйы деп білеміз. Осы уақыт аралығында қайтарымсыз қаржы есебінен 7 мектеп, 5 балабақша және бірнеше әлеуметтік нысандар салдық. Ұрпақ үшін осындай игілікті қадамға бардық. Менің есімде, алғаш рет типтік жобадағы мектепті бірінші Қалжан ахун ауылында салдық. Бюджетте ақша жоқ, зейнеткерлер зейнетақысын жинап берді, мемлекеттік қызметкерлері айлықтарын аударды, егін еккен еңбеккерлер 10-15 тонна күрішін берді. Әлі күнге дейін халықтың ықыласына тәнтімін. Құрылыс жұмыстары 8-9 ай жүрді, сонда күн сайын ауыл тұрғындары жеті күлшесін тарататын. Қорасында соңғы ешкісін сойып, құрылысшыларды қонақ қып шақыратын. Содан кейін талай құрылыс салсақ та, дәл осындай ықылас асып тасыған елді көргем жоқ, халқына басымды иемін. Осындай пейілі кең даладай елімнің тәуелсіздігі тұғырлы, халқының еңсесі биік болсын», – дейді Сейітқали Алшынбаев.
</blockquote>

Сейітқали Алшынбаев: Марапат &#8211; Сыр кәсіпкерлеріне жасалған қошемет

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығына орай Ә.Тәжібаев атындағы Қызылорда облыстық әмбебап ғылыми кітапханасында үш тілде жарыққа шыққан «Сыр – Алаштың анасы» атты тарихи құнды кітаптың тұсауы кесілді.
Салтанатты шараға облыс әкімінің орынбасары, редакциялық алқа төрағасы Серік Ахмет, облыстық мәслихаттың хатшысы, тарих ғылымдарының кандидаты Наурызбай Байқадамов, техника ғылымдарының докторы, профессор, ҚР ҰҒА академигі Қылышбай Бисенов, Қорқыт Ата атындағы Қызылорда университетінің «Қорқыттану» ғылыми орталығының жетекшісі, филология ғылымдарының докторы, профессор Бағдат Кәрібозұлы, «Рухани жаңғыру» орталығының директоры, тарих ғылымдарының кандидаты Уәлихан Ибраев және ардагерлер мен ұстаздар, қоғам белсенділері қатысты.
Кітапта аймақтың ерте дәуірден бастап бүгінгі күнге дейінгі тарихы, экономикасы, қоғамдық-саяси және рухани-мәдени өміріндегі қол жеткізген табыстары мен жетістіктері үш тілде әзірленген. Кіріспесі Қазақстан Республикасының Тұңғыш Президенті – Елбасы Нұрсұлтан Назарбаевтың, Мемлекет басшысы Қасым-Жомарт Тоқаевтың және осы кітаптың идея авторы, облыс әкімі Гүлшара Әбдіқалықованың құттықтауымен басталады.
«Сыр – Алаштың анасы» кітабы логикалық тұрғыдан тізбектелген бірнеше бөлімдерден, яғни, облыс туралы жалпы ақпарат, облыс тарихына арналған, облыстың экономикалық әлеуеті, «Сыр елі – жыр елі», әлеуметтік салаға арналған, «Рухани жаңғыру» бөлімдерінен тұрады. Сонымен қатар, Қызылорда, Байқоңыр қалалары мен аудандардағы соңы серпіліс, үдемелі экономикалық дамуы мен қоғамдық-мәдени өмірдегі өзекті ақпараттар берілген.
Кітаптың тұсаукесер рәсімін облыс әкімінің орынбасары, редакциялық алқа төрағасы Серік Әбжәліұлы Ахмет ашты. Жинақтың мазмұны мен көркемдік-идеялық ерекшелігіне кеңінен тоқталып, бұл кітап Сыр елінің Тәуелсіздікке деген тартуы болмақ деді.
<blockquote>
 «Баршаңызды Тәуелсіздіктің 30 жылдық мерейтой аясында оқырманға жол тартқан жаңа кітаптың жарыққа шығуымен құттықтаймын. Редакциялық алқамен ойласа келе кітапты «Сыр – Алаштың анасы» деп атауымыздың үлкен символдық мәні бар. Халқымыздың сан ғасырлық тарихында Сыр өзенінің бойы ұлы өркениеттердің ошағы болып қана қоймай, барша дала халқына қиналғанда пана, сүрінгенде сүйеніш болғаны тарихтан белгілі. Бұл сөз бүгінде тек облыс халқына ғана емес, барша қазақстандықтарға және алыс-жақын шетелдік қонақтарымызға да таныс деп айтсақ қателеспейміз. Ал, сыртқы мұқабасының түсін де кездейсоқ таңдаған жоқпыз. Сыр топырағының түсімен үйлесім табуының өзі тарихтан тамыр тартқан туынды екенін дәлелдейді. Ал, Қорқыт ата ескерткішін бейнелеу арқылы өңіріміздің тарихы өте тереңде екенін және Сыр елінің жыр елі екенін ұғындыруды жөн санадық. Сыр елінің тарихына қаныққысы келген әрбір оқырман бұл еңбектен көп дүниені саралай алады деген ойдамын», – деді облыс әкімінің орынбасары.
</blockquote>
Келелі басқосуда облыстық мәслихаттың хатшысы, тарих ғылымдарының кандидаты Наурызбай Байқадамов іргелі ізденістерге құрылған жаңа кітап оқырманға олжалы сый болғалы тұрғанын қаперге салды. Ал, техника ғылымдарының докторы, профессор, ҚР ҰҒА академигі Қылышбай Бисенов бұл кітап тұтас Сыр елінің даму динамикасын айшықтап беретін құнды мұраға айналатынын атап өтті. Сондай-ақ, Қорқыт Ата атындағы Қызылорда университетінің «Қорқыттану» ғылыми орталығының жетекшісі, филология ғылымдарының докторы, профессор Бағдат Кәрібозұлы бұл кітаптың тың тарихи деректерге негізделіп, бұрын-сонды жарық көрмеген ақпараттармен толықтырылып шығуы үлкен ізденістен туған еңбек деп жоғары бағасын берді.
Алқалы отырыста «Рухани жаңғыру» орталығының директоры, тарих ғылымдарының кандидаты Уәлихан Ибраев кітаптың киелі жерлер географиясына негізделген тарихи орындар мен аңыз болып жеткен оқиғаларға сүйеніп жазылуының өзіндік мәні жоғары екенін мақтанышпен жеткізді.
Жиында жаңа кітаптың тұсауы кесіліп, қалың көпшілікке жол тартты. Жарыққа шыққан кітаптар өңірдің барлық кітапханаларына таратылатын болады.
Айта кету керек, тарихи жинақ аймақтың тұрмысын, рухани-мәдени даму белестерін саралау, қазына-жауһарларымызды белсенді насихаттауға үндейді. Бұл қоғамды адамның жаңа келбетін қалыптастыруда өңірде жүзеге асып жатқан «Сыр елі» мега жобасының ажырамас бөлігінің бірі болмақ.
<img src="https://kyzylorda-news.kz/wp-content/uploads/2021/12/kitap.jpg" alt="" />
<img src="https://kyzylorda-news.kz/wp-content/uploads/2021/12/kitap1.jpg" alt="" />

Тәуелсіздікке тарту: Қызылордада «Сыр – алаштың анасы» кітабы жарыққа шықты

Kyzylorda-news.kz. Бүгін, 11 желтоқсанда ел Тәуелсіздігінің 30 жылдығы аясында Қызылорда қаласы «Достық» үйінде «Сыр журналистикасының тарихы» 5 томдығының тұсаукесері өтті.
<img src="https://kyzylorda-news.kz/wp-content/uploads/2021/12/img-20211211-wa0065.jpg" alt="" />
Мерекелік шараға облыс әкімінің орынбасары Серік Ахмет, облыстық мәслихат хатшысы Наурызбай Байқадамов, Қазақстан Журналистер одағының төрағасы Сейітқазы Матаев, ҚР Парламент Сенатының депутаты Нұртөре Жүсіп, «Бас редакторлар клубы» ҚБ президенті Бибігүл Жексенбай, Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі Амантай Шәріп және Түркістан облысындағы БАҚ басшылары, қызылордалық қаламгерлер, зиялы қауым өкілдері қатысты.
<img src="https://kyzylorda-news.kz/wp-content/uploads/2021/12/img-20211211-wa0046.jpg" alt="" />
«Сыр журналистикасының тарихы» еңбегінің ерекшелігі, Сыр өңіріндегі бұқаралық ақпарат құралдарының өткені мен бүгінін қызылордалық журналистердің өздері саралап, зерттеп жазып шықты. Шығармашылық топ бұған екі жыл уақыт арнады. Кітап жазу барысында Сыр журналистикасының тарихына қатысты бұрын-соңды қалам тербеген аға-әріптестердің, ғалымдардың еңбегі пайдаланылды.
<img src="https://kyzylorda-news.kz/wp-content/uploads/2021/12/img-20211211-wa0062.jpg" alt="" />
Мұнымен қоса Мәскеу, Алматы қалаларындағы, Қызылорда облысындағы архивтерден, кітапханалардан нақты мәліметтер, тың деректер алынды.
<img src="https://kyzylorda-news.kz/wp-content/uploads/2021/12/img-20211211-wa0064.jpg" alt="" />
Бестомдық кітап қазақ журналистикасы әрі өлкетану үшін үлкен қазына болғалы тұр. Себебі, ҚР Тұңғыш Президенті – Елбасы Н.Ә.Назарбаев Алаштың анасы деп баға берген Сыр бойы шежіресінің бір парағы – бұқаралық ақпарат құралдарының бай тарихы алғаш рет жүйеленіп, жазылды. Ауқымды жоба көмескі тартқан тарихты қайта түгендеу, қалам ұстаған кешегі әрі бүгінгі буынның азды-көпті еңбегін дәріптеу, талдап-таразылау, ғылыми айналымға қосу, жас журналистерге кәсіби бағдар беру секілді мақсаттарды көздеді. Сондықтан, бұл еңбек оқырмандардың, әсіресе, журналистердің, ғалымдардың назарын аударып, қызығушылығын тудырып отыр.
<img src="https://kyzylorda-news.kz/wp-content/uploads/2021/12/img-20211211-wa0063.jpg" alt="" />
Басқосуда Қызылорда облысы әкімінің орынбасары Серік Ахмет Тұңғыш Президент Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласымен үндескен игі бастаманың тағылымдық мәні зор екенін жеткізді.
<img src="https://kyzylorda-news.kz/wp-content/uploads/2021/12/img-20211211-wa0056.jpg" alt="" />
<blockquote>
 “Елбасы Нұрсұлтан Әбішұлы Назарбаев айтқандай: «Жалпақ жұртыңды, исі Алашыңды қадірлеу – алдымен өзің туған өлкенің тарихы мен табиғатын танудан, тұлғаларын ардақтаудан басталады». Расында, қай салада болмасын жаңаша даму жолына түсу үшін, сол саланың өткен жолы мен тарихын түгендеу, тұлғалардың еңбегінен тағылым алу маңызды. Бүгінгі тұсауы кесілгелі тұрған 5 томдық еңбектің негізгі миссиясы да осы. Яғни, телегей-теңіз ақпарат ғасырында, дәстүрлі медианың жаңа медиамен күш біріктіріп дамудың жаңа сатысына көтерілген кезеңінде, Сыр елінің барлық бұқаралық ақпарат құралдарының тарихын түгендеп, қоғамға, халыққа және жалпы өз-өзімізге есеп беру деп білеміз. Сондықтан, бұл кітаптың Тәуелсіздігіміздің 30 жылдық мерейтойы қарсаңында оқырманға жол тартуы біз үшін үлкен мәртебе, зор қуаныш” – деді Серік Ахмет.
</blockquote>
Сыр перзенті, ҚР Парламенті Сенатының депутаты Нұртөре Жүсіп тарихты түгендеуде баспасөздің орны ерекше екенін атап өтті.
<img src="https://kyzylorda-news.kz/wp-content/uploads/2021/12/img-20211211-wa0055.jpg" alt="" />
<blockquote>
 “Баспасөз елдің әр кезеңдегі өмірін, тыныс-тіршілігін, мысалы, сонау тарихтың ақтаңдақ жылдарынан бастап бүгінгі Тәуелсіздік тұсындағы іргелі істерді тайға таңба басқандай таспаға түсіріп келеді. Архивтердегі сарғайған газет беттерін парақтасақ, еліміздің бір ғасырлық өмір тарихының көрінісін табуға болады. Бұл ретте бестомдық деректерді жинақтауда еңбек еткен жүрген барша азаматтарға, «Сыр медиа» ЖШС бас директоры Аманжол Оңғарбаевқа, қолдау танытқан облыс әкімдігіне ризашылығымыз зор», – деді Нұртөре Жүсіп.
</blockquote>
Қазақстан Журналистер Одағының төрағасы Сейітқазы Матаев бестомдықтың шығуы айтулы оқиға екенін атады. Бұрын-соңды мұндай жоба болмағанын айта келе сырбойылық журналистер және Сыр журналистикасы ақпарат кеңістігінде өзгелерге үлгі болатынын жеткізді.
<img src="https://kyzylorda-news.kz/wp-content/uploads/2021/12/img-20211211-wa0054.jpg" alt="" />
<blockquote>
 “Қазақ журналистикасының тарихын түгендеуде сырбойылық журналистердің бастамасы өте құптарлық іс”, – деді Сейітқазы Матаев.
</blockquote>
Белгілі ғалым Амантай Шәріп те кітапқа жоғары бағасын берді.
<img src="https://kyzylorda-news.kz/wp-content/uploads/2021/12/img-20211211-wa0050.jpg" alt="" />
<blockquote>
 “Сыр журналистикасының тарихы» – ғылыми еңбек. Яғни естеліктер жинағы емес, ғылыми тағылымды еңбектеп топтастырылған. Бұған дейін журналистердің тарихы жолы жүйеленіп, бір арнаға түскен жоқ. Осы тұрғыдан алғанда бір ғылыми зерттеу институты көтеретін еңбек деп бағалау керек”, – деді ол.
</blockquote>
Бұдан бөлек, «Бас редакторлар клубы» ҚБ президенті Бибігүл Жексенбай жаңа кітаптың қазіргідей ақпарат ағыны қарқынды, журналистиканың жаңа кезеңінде таптырмайтын құрал болатынын айтты.
<img src="https://kyzylorda-news.kz/wp-content/uploads/2021/12/img-20211211-wa0053.jpg" alt="" />
<blockquote>
 “Журналистиканың басты миссиясы – ағартушылық. Ал, бұл кітап осы міндет үдесінен шығып отыр. Бестомдық кітапты шығару барысында архив құжаттары, көптеген ғылыми еңбектер парақталған, ғалымдар пікірі ескерілген. Жалпы, құнды туындыда өткен мен бүгін, қаламы қарымды қаламгерлердің жүріп өткен өнеге болар өмір жолы көрініс тапқан. Бұл қазіргідей ақпарат ағыны қарқынды, журналистиканың жаңа кезеңінде таптырмайтын құрал болмақ”, – дейді Бибігүл Жексенбай.
</blockquote>
Жиын соңында «Сыр медиа» ЖШС бас директоры, облыстық мәслихат депутаты Аманжол Оңғарбаев бұл бір күнде, бір айда дүниеге келген еңбек еместігін тарқатып айтты.
<img src="https://kyzylorda-news.kz/wp-content/uploads/2021/12/img-20211211-wa0059.jpg" alt="" />
<blockquote>
 “Ел дамуының маңызды кезеңінде Қазақ журналистикасының – Қазақ сөз өнерінің бір қайнар бұлағы ретінде сырбойылық қалам ұстаған қауымның ел алдында берген есебіндей осы бір сындарлы еңбек жарық көріп отыр. Тарихқа зер салсақ, сонау ХІХ ғасырдың аяғы мен ХХ ғасырдың басында республиканың түкпір-түкпірінде жарық көрген мерзімді басылымдар Сыр бойына да тарай бастады. Олардың қатарында «Дала уалаяты», «Қазақ» газеттері, «Айқап» журналы, «Абай» журналы болды. Мұнымен қоса Орда қаласынан шығып тұрған «Қазақстан» газеті, Семей қаласында жарық көрген Алаш партиясының органы «Сарыарқа» газеті, Мұстафа Шоқай негізін қалаған әрі шығарған «Бірлік туы» газеттері де ішінара Сыр бойына тарап тұрды. Жай тарап қана қойған жоқ, бүгінгі тілмен айтқанда, алғашқы газетке қаржылай қолдау білдірген меценаттардың ішінде сырбойылықтардың болуы да бүгінгі туған жерге туын тіккен ұрпақ үшін үлкен мақтаныш сезімін тудырады. Мәселен, 1913 жылы «Қазақ» газетінің басылып шығуына қаржылай қолдау білдірген сырбойылық Ахмет ишан Оразайұлын көпшілік біле бермейді. Әдетте мерзімді басылымдар қоғамдық пікір қалыптастырады десек, аталған газеттер мемлекеттік идеологияға әсер етті. Осы тұрғыдан келгенде бұл бестомдықты Алашқа ана, талайға пана болған Сыр бойының шежіресі деп қарауға болады”, – деді Аманжол Сақыпұлы.
</blockquote>
Сонымен қатар, ол «бұл кітапты журналист деген атын кіршіксіз қорғаған, кешегі қаламгер-қайраткерлердің ізін парасаттылықпен жалғаған аға буынның алдындағы парызымыздың бір өтеуіндей деп қабылдасаңыздар болады» деп атап өтті.
<img src="https://kyzylorda-news.kz/wp-content/uploads/2021/12/img-20211211-wa0048-1.jpg" alt="" />
Жиын соңында жаңа кітаптың бестомдықтың тұсауы кесілді. Бұдан кейін өмірден өткен қаламгердің рухына арнап ас беріліп, құран бағышталды.
Осы іс-шарада «Сыр медиа» ЖШС жариялаған мемлекет және қоғам қайраткері Т.Жүргенов атындағы, қаламгерлер Айжарық Сәдібекұлы, Әскербек Рахымбекұлы, Әділхан Бәймен атындағы шығармашылық байқаулардың жүлдегерлері марапатталды.
Айта кетейік, Сыр бойында жарық көрген бұқаралық ақпарат құралдарының тарихын зерттеп-зерделеген жинақтың І томы облыс әкімі Гүлшара Әбдіқалықованың алғысөзінен бастау алған. Сонымен бірге «Сыр медиа» ЖШС бас директоры, филология ғылымдарының кандидаты Аманжол Сақыпұлының, филология ғылымдарының докторы Құлбек Ергөбектің, Қорқыт ата атындағы Қызылорда университетінің доценті, тарих ғылымдарының кандидаты Сағат Тайманның жалпы қазақ баспасөзіне жасаған талдау ойлары, Сыр журналистикасына айтылған пайым-пікірлері берілген.
Жалпы I томда ғасырға жуық тарихы бар облыстық «Сыр бойы», «Кызылординские вести» газеттері және «Ақмешіт жастары» басылымы қамтылған. Сондай-ақ «Сыр медиа» ЖШС-ның құрылу кезеңі жайлы айтылады.
Кітаптың ІІ томында облыс аумағына кіретін қалалық газет және аудандардың мемлекеттік басылымы қамтылған. Бұл үнжариялардың тарихи кезеңі, онда жарық көрген тақырыптардың ауқымы, жалпы қоғам дамуындағы газеттің рөлі жайында қызықты мағлұматтар бар.
Кітаптың ІІІ томы қазіргі күні заманауи цифрлық мүмкіндіктер арқылы Сыр бойынан республика аумағына тарайтын «Қазақстан» РТРК облыстық филиалының және Қызылорда қоғамдық телекомпаниясының тарихына арналады. Сондай-ақ бүгінде жабылып қалған облыстық радионың 80 жылға жуық тарихы да оқырманын бей-жай қалдырмайды. Аз уақыт болса да Қазалыдан хабар таратқан «Серік ТВ» және қызылордалық жастардың құлағында үні қалған СЕТА радиосы жайлы да азды-көпті мәлімет бар. Жаңа медианың жолашары болған «Qyzylorda news» ақпараттық агенттігі және оның азаматтық медианы дамытудағы рөлі жайында айтылады. Бұл томда облыстағы баспа ісі жайлы да жазылған.
Жинақтың ІV томында берілген Сыр бойында жарық көрген бұқаралық ақпарат құралдарының үлкен бір легі жекеменшік басылымдар тарихы жаңа дәуірдегі жаңа Қазақстанның тынысындай әсер қалдырады. Сондай-ақ тәуелсіздіктің алғашқы жылдары ашылып, кейін қаржы тапшылығынан жабылып қалған қанатқақты ірілі-ұсақты газеттер, мұнымен қоса жоғары және орта оқу орындарының, басқармалардың ведомстволық басылымдары қамтылды.
Бесінші кітап «БАҚ саласындағы Сыр мақтаныштары» және «Практикалық журналистика» деген екі бөлімнен тұрады. «БАҚ саласындағы Сыр мақтаныштары» жай ғана анықтамалық емес, сырбойылық қалам ұстаған қауымның шеберлік бастау-бұлағы деп ұсынылып отыр. «Практикалық журналистика» бөлімінде сырбойылық журналистердің тәжірибесі, жас журналистер үшін шеберлік дәрістері жинақталған.

«Сыр журналистикасының тарихы» 5 томдығының тұсаукесері өтті

<a href="https://kyzylorda-news.kz/">Kyzylorda-news.kz.</a>&nbsp;Қызылордада «Сыр журналистикасының тарихы» 5 томдығының тұсаукесері өтті.
Шарада «Бас редакторлар клубы» ҚБ президенті Бибігүл Жексенбай жаңа кітаптың қазіргідей ақпарат ағыны қарқынды, журналистиканың жаңа кезеңінде таптырмайтын құрал болатынын айтты.
<blockquote>
 «Журналистиканың басты миссиясы – ағартушылық. Ал, бұл кітап осы міндет үдесінен шығып отыр” деген пікір білдірді. Бестомдық кітапты шығару барысында архив құжаттары, көптеген ғылыми еңбектер парақталған, ғалымдар пікірі ескерілген. Жалпы, құнды туындыда өткен мен бүгін, қаламы қарымды қаламгерлердің жүріп өткен өнеге болар өмір жолы көрініс тапқан. Бұл қазіргідей ақпарат ағыны қарқынды, журналистиканың жаңа кезеңінде таптырмайтын құрал болмақ», – дейді Бибігүл Жексенбай.
</blockquote>

Бибігүл Жексенбай: Бұл ақпарат ағыны қарқынды, журналистиканың жаңа кезеңінде таптырмайтын құрал болмақ

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері <a href="https://kyzylorda-news.kz/bez-rubriki/syr-zhwrnalistikasynyng-tarihy-5-tomdyghynyng-tusawkeseri-bastaldy-134824/">өтті</a>.
Шара барысында Сенат депутаты Нұртөре Жүсіп тарихты түгендеуде баспасөздің ролі ерекше екенін алға тартты. Бұл ретте бестомдықтың басы-қасында жүрген барша азаматтарға, “Сыр медиа” ЖШС бас директоры Аманжол Оңғарбаевқа, қолдау танытқан облыс әкімдігіне ризашылығын білдірді.
Сонымен қатар Сырбойылықтарды Тәуелсіздіктің 30 жылдығымен құттықтап, Тәуелсіздік біздің бақытымыз екенін айтты.
Айта кетейік, «Сыр журналистикасының тарихы» 5 томдығы ел Тәуелсіздігінің 30 жылдығы қарсаңында жарық көріп отыр. Бұл еңбектің ерекшелігі сол, Сыр өңіріндегі бұқаралық ақпарат құралдарының өткені мен бүгінін қызылордалық журналистердің өздері саралап, зерттеп жазып шықты. Шығармашылық топ бұған екі жыл уақыт арнады. Кітап жазу барысында Сыр журналистикасының тарихына қатысты бұрын-соңды қалам тербеген аға-әріптестердің, ғалымдардың еңбегі пайдаланылды. Мұнымен қоса Мәскеу, Алматы қалаларындағы, Қызылорда облысындағы архивтерден, кітапханалардан нақты мәліметтер, тың деректер алынды.

Нұртөре Жүсіп: Тарихты түгендеуде баспасөздің рөлі ерекше

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері өтті.
Шара барысында Қазақстан Журналистер Одағының төрағасы Сейітқазы Матаев бестомдықтың шығуы айтулы оқиғаға екенін айтты.
<blockquote>
 «Мұндай кітаптар басқа өңірлерге үлгі болады. Өңірлер арасында сырбойылық журналистердің бастама көтеріп, руханиятты дамыту үшін қажетті кітапты қолға алуы құптарлық және көпке үлгі», -деді Сейітқазы Матаев.
</blockquote>

Сейітқазы Матаев: Сырбойылық журналистердің мұндай бастама көтеруі құптарлық және көпке үлгі

<a href="https://kyzylorda-news.kz/">Kyzylorda-news.kz.</a> Бүгін «Сыр медиа» ЖШС-де «Өңірлік журналистиканың медиаменеджмент мәселелері» тақырыбында семинар-тренинг өтті.
Семинар-тренингке Қазақстан Журнилистер Одағы Түркістан филиалының төрағасы, «Егемен Қазақстан» газетінің Түркістан облысындағы меншікті тілшісі Ғалымжан Елшібай, «Tukistan media Holding» бас директорының орынбасары Тельман Бейсен, «Бас редакторлар клубы» ҚБ атқарушы директоры Әсем Есілбаева және аудандық газет редакторлары, Қорқыт ата атындағы Қызылорда университетінің журналистика кафедрасының оқытушылар мен студенттері қатысты.
Шараға арнайы келген қонақтар әлеуметтік желідегі ақпараттардың шынайылығы, журналистикада сапалы контент жасау сынды мәселелер бойынша өз ойларын ортаға салды.
<blockquote>
 «Журналистикадағы сапалы контент – сараптамалық материалды талдап, зерттеп жазу. Қазіргі таңда бүгін орын алған жағдайға байланысты ақпараттық сараптамалық мақала дайындау үшін бір апта немесе үш күніңіз кетуі мүмкін. Бірақ бұл материалыңызбен оқырманың назарын аудара алмайсыз. Себебі қазір тек жылдам ақпарат тарау керек», – деді Ғалымжан Елшібай.
</blockquote>
Семинар барысында «Tukistan media Holding» бас директорының орынбасары Тельман Бейсен басылымға сапалы контент жасау үшін ең алдымен медиаменеджмент жақсы болу қажет екенін айтты. Сондай-ақ «Сыр медиа» ЖШС осы саланы үздік меңгерген мекемелердің алғашқыларының бірі екенін де ескертті.
Семинар тренинг соңында аудандық газет редакторлары мен оқу орнының оқытушылары мен студенттер тарапынан сұрақтар қойылып, ұсыныс-пікірлер айтылды.

Қызылорда: Өңірлік журналистиканың медиаменеджент мәселелері талқыланды

<a href="https://kyzylorda-news.kz/">Kyzylorda-news.kz.</a> «Сыр журналистикасының тарихы» 5 томдығының тұсаукесерінде Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі, филология ғылымдарының докторы Амантай Шәріп кітапқа ерекше баға берді.
Ол өз сөзінде «Бұл еңбек бір ғылыми зерттеу институты атқаратын жұмыс» – деді.
Айта кетейік, бүгін Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері өтті.
Шараға облыс әкімінің орынбасары Серік Ахмет, облыстық мәслихат хатшысы Наурызбай Байқадамов, Қазақстан Журналистер одағының төрағасы Сейітқазы Матаев, ҚР Парламент Сенатының депутаты Нұртөре Жүсіп, «Бас редакторлар клубы» ҚБ президенті Бибігүл Жексенбай, Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі, филология ғылымдарының докторы Амантай Шәріп және Түркістан облысындағы БАҚ басшылары, қызылордалық қаламгерлер, зиялы қауым өкілдері қатысты.

Қазақстан және Қызылорда облысының жаңалықтары: Қазақстан Тәуелсіздігіне – 30 жыл

Қамшыбек Қоңқабаев: Әлі талай елімнің абыройын асқақтатып, жеңісті күндер көп болатынына сенімдімін

Қызылордада Тәуелсіздік мерекесінде тарихи қойылым сахналанады

Ақзира Қасымова: Талантты ұстаздарды қолдау бағытындағы жұмыстар жалғасады

Тәуелсіздік – тағдырдың сыйы

Сейітқали Алшынбаев: Марапат – Сыр кәсіпкерлеріне жасалған қошемет

Тәуелсіздікке тарту: Қызылордада «Сыр – алаштың анасы» кітабы жарыққа шықты

«Сыр журналистикасының тарихы» 5 томдығының тұсаукесері өтті

Бибігүл Жексенбай: Бұл ақпарат ағыны қарқынды, журналистиканың жаңа кезеңінде таптырмайтын құрал болмақ

Нұртөре Жүсіп: Тарихты түгендеуде баспасөздің рөлі ерекше

Сейітқазы Матаев: Сырбойылық журналистердің мұндай бастама көтеруі құптарлық және көпке үлгі

Қызылорда: Өңірлік журналистиканың медиаменеджент мәселелері талқыланды

Амантай Шәріп: Бұл еңбек бір ғылыми зерттеу институты атқаратын жұмыс

Қазақстан және Қызылорда облысының жаңалықтары: Қазақстан Тәуелсіздігіне – 30 жыл

Қамшыбек Қоңқабаев: Әлі талай елімнің абыройын асқақтатып, жеңісті күндер көп болатынына сенімдімін

Қызылордада Тәуелсіздік мерекесінде тарихи қойылым сахналанады

Ақзира Қасымова: Талантты ұстаздарды қолдау бағытындағы жұмыстар жалғасады

Тәуелсіздік – тағдырдың сыйы

Сейітқали Алшынбаев: Марапат &#8211; Сыр кәсіпкерлеріне жасалған қошемет

Тәуелсіздікке тарту: Қызылордада «Сыр – алаштың анасы» кітабы жарыққа шықты

«Сыр журналистикасының тарихы» 5 томдығының тұсаукесері өтті

Бибігүл Жексенбай: Бұл ақпарат ағыны қарқынды, журналистиканың жаңа кезеңінде таптырмайтын құрал болмақ

Нұртөре Жүсіп: Тарихты түгендеуде баспасөздің рөлі ерекше

Сейітқазы Матаев: Сырбойылық журналистердің мұндай бастама көтеруі құптарлық және көпке үлгі

Қызылорда: Өңірлік журналистиканың медиаменеджент мәселелері талқыланды

Амантай Шәріп: Бұл еңбек бір ғылыми зерттеу институты атқаратын жұмыс

Сейітқали Алшынбаев: Марапат – Сыр кәсіпкерлеріне жасалған қошемет