<a href="https://kyzylorda-news.kz/">Kyzylorda-news.kz.</a> Руханиятымыздың алтын қазығы – қазақ халқының ғасырлар бойы қалыптасқан әдет-ғұрпы, салт-дәстүрі, мәдениеті мен өнері екендігі көпке белгілі. Тек қала орталықтарында ғана емес, ауылдарда да мәдениет пен өнердің жаңғыруы сондағы клубтар мен мәдениет үйлеріне қатысты. Қалаға қарасты ауылдық округтердің мәдениет саласындағы жетістіктері қандай? Бүгінде ауыл мәдениетін жоғары деңгейге жеткізу үшін қандай ауқымды жобалар жүзеге асуда? Осы сұрақтарға жауап алу мақсатында Ақсуат ауылдық округінің мәдениет үйіне&nbsp; бет алдық.Үлгілі елді мекенАқсуат ауылдық округіне осымен бірнеше рет жол түсті. Бұған дейін ауылдың өсіп-өнуі, кәсіпкерлігі жайында сөз еткенбіз. Бүгін рухани тұрғыда дамуына назар аударғанды жөн көрдік. Алдымен&nbsp; тарихтан бастасақ. Деректерге сүйенсек, Ақсуат ауылының негізі 1928 жылы қаланған. Ауыл алғашқы ауыл шаруашылығы артельдерін ұжымдық шаруашылықтарды ұйымдастыруға қатысқан Ешпан Жанбосыновтың атымен Ешпан ауылдық кеңесі аталған. 1928-1932 жылдар аралығында құрылған майда серіктестіктер 1934 жылы төртінші ауылдық кеңесі бойынша Жасқайрат, Жаңатұрмыс, Киров, Қызылорақ, Қызылқұм, Қара Қожа, Батбаққара ұжымдық шаруашылықтары болып ұйымдасқан. 1938 жылы мамыр айында бұл 7 шаруашылық бірігіп, Жасқайрат, Жаңатұрмыс, Кировтай 3 шаруашылық құрылды. Одан кейін бұл үшеуі іргелі шаруашылық Киров колхозы болып құрылды. 1972 жылы колхоз көкөніс және сүт өндіретін шаруашылыққа айналды.1993 жылдың ақпан айында халық депутаттары облыстық кеңесінің қаулысымен Сырдария ауданы Ақсуат ауылдық кеңесі болып аталды. Ал бір жылдан соң елді мекенге Кеңес Одағының батыры Жақыпбек Махамбетовтің аты берілді. 1997 жылдың маусымында ауыл Сырдария ауданы құрамынан шығарылып, Қызылорда қаласына қарады.Ауылдағы көнекөз қариялар – тірі тарихтың көзі. Олардан ауыл жайлы мәліметке толық қанығуға болады. Білім саласының ардагері Қадыр Әмзеев «Ауылым сұлу Сырдың жағасында» атты кітап жазып шығарған. Мұнда елді мекеннің дамуына еңбегі сіңген кісілер туралы толық жазылған. Ақсуат жайлы жазылған кітап жан-жақты зерттелген. Ал «Ауылым» атты ән округтің әнұраны болып қабылданған.Бүгінгі Ақсуат бейнесі өзгерген. Қазір елді мекен жаңарған. Осындай жетістік нәтижесінде 2014 жылы «Үлгілі елді мекен» деген атаққа ие болды. Жан-жақты даму жолынан көрінген ауылдың мәдениеті де жоғары деңгейде.Таланттар ауылдан шығады&nbsp;«Театр – киім ілгіштен басталады» демекші, ауыл мәдениеті де клубтан басталады.&nbsp; Ауылдың мәдениетін қалыптастыруға үлесін қосқан Жақыпбек Махамбетов ауылдық клубы 2013 жылы пайдалануға берілген. Одан кейін 2014 жылдың тамыз айынан бастап Ақсуат ауылдық округі әкімі аппараты жанындағы «Ақсуат мәдениет үйі» мемлекеттік коммуналдық қазыналық кәсіпорны болып құрылған. Ауылдағы мәдениет үйі – қаншама адамға ізгілік дәнін сеуіп, өнерді сүюге тәрбиелеген. Қазіргі таңда мұнда 6 үйірме жұмыс істейді. Оған 75 адам қатысады.&nbsp;<blockquote>«Мәдениеттің мәйегі өнер арқылы дәріптеліп, халықтың құлағына жетіп жатады. Мұндағы атқарылып жатқан игі істер – ұлттық дәстүрді дамыту, өнер мен мәдениеттің өмірмен өзектестігін бағамдау, өнерді өнеге тұтқан елдің рухани дүниесін байыту мақсатын көздейді. Үйірмелер өнерлі жастардың өнерге деген қызығушылығын оятып, үлкен сахнаға баулу үшін жас өрендермен тығыз байланыста. Мәселен, «Бұлбұл»&nbsp; ән&nbsp; үйірмесі&nbsp;ән&nbsp; &nbsp;айтуға,&nbsp; танылмай&nbsp;жүрген&nbsp; өнерпаздарды&nbsp; халық-қа&nbsp;таныту,&nbsp;өнерлерін шыңдау,&nbsp; бейімдеу бағытында жұмыс істеуде. Үйірме&nbsp; мүшелері&nbsp;қалалық,&nbsp; облыстық,&nbsp; республикалық&nbsp;байқауларға қатысып,&nbsp; жүлделі&nbsp; орындарға&nbsp;ие&nbsp; болды. Атап айтсақ, осы үйірменің қатысушысы Дильназ Жаханова көптеген биіктен көрініп жүр. Ол ХХІV облыстық «Бозторғай» конкурсында ІІІ орын, «Сырдария – достық өзені» атты республикалық әншілер байқауында ІІІ орынмен марапатталған. Сондай-ақ VI республикалық «Жарық жұлдыз» атты балалар өнер байқауында «Эстрада вокал» жанрында өнер көрсеткені үшін «Балдаурен» ән үйірмесінің қатысушысы Орынбай Асылымның өнері І орынға лайық деп танылды. Сонымен қатар «Көркемсөз»&nbsp; оқу&nbsp; үйірмесі балаларға тіл байлығын үйрету,&nbsp; келешекте&nbsp;қаламгерлерлікке бейімдеу мақсатында ашыл-ған.&nbsp; «Қызғалдақ»&nbsp;би&nbsp; үйірмесі де қалалық іс-шараларда өз өнерлерін көрсетіп келеді. Олар Алматы қаласында өткен «Наурыз айы туғанда!» атты І халықаралық өнер мен білім фестиваль-конкурсында І дәрежелі лауреат атанды», – дейді мәдениет үйінің әдіскері Гүлназ Алданазарова.</blockquote>Таланттар ауылдан шығатыны осының дәлелі. Ал бұл таланттарды таныту үшін мәдениет үйі қызметкерлері аянбай еңбек етіп келеді. Атап айтсақ, олардың жетістіктері өз алдына бөлек. Мәселен, «Ел іші – өнер кеніші» атты қалаға қарасты кент және ауылдар арасында ұйымдастырылған дәстүрлі қалалық байқауда «Ақсуат мәдениет үйі» ІІІ дәрежелі дипломмен марапатталған. Қармақшы ауданында өткен «Жеті қазына» атты ашық аспан астындағы клуб қызметкерлерінің облыстық байқауында мәдени ұйымдастырушы Еркеғали Нұрғали ІІІ орынға лайық деп танылған.<blockquote>«Мәдениет үйінде өтіп жатқан барлық шараның тың ойлы, жаңашылдықпен өтуіне өз үлесімізді қосып жүрміз. Осы жолда жеткен жетістіктер көп. Жасаған еңбегіміздің нәтижесінде шәкірттер биіктен көрінуде. Бізге бұдан асқан марапат жоқ. Әр істі бастарда одан шығатын нәтижеге назар аударамыз. Жас өрендермен, халықпен жұмыс істеу біздің міндетіміз. Мәдениет үйінің есігі жастарға қашанда ашық. Тың ой, идеясы бар ортаны қа-лыптастырып, халықты мәдени шаралармен сусындатып, жаңашылдықты енгізу – біздің басты мақсатымыз», – дейді мәдениет үйінің әдіскері.</blockquote>Әнімен әдемі әжелерАқ жаулықты әжелер – ұлтымыздың ұлағат тұтар ардақтылары. Оларға қандай жылы сөз айтсақ та, сый-сияпат көрсетсек те артық етпейді. Олардың ел алдында айдай болып жарқырап жүргені жүрегімізге жылулық сыйлайды. Қазіргі уақытта көптеген ауылда әжелер ансамблі құрылып, ұлттық өнерді паш етіп жүр. Солардың бірі – ауылдағы «Ақ бата» әжелер ансамблі.Жылдан-жылға ұжым өнеріне ынтық көрермендер қатары артып келеді. Әжелер тобы облыстық, қалалық бәйгелерде топ жарып жүр. Ансамбль жетекшісі әрі әншісі Жәмила Тәжікова:<blockquote>«Бұл – халықтың сұранысы. Қазір жұртшылық жанды дауысқа, ұлттық өнерге құштар. Ансамбль құрылғалы бері ауылда екі рет жеке концертімізді қойдық. Сол кезде жұртшылықтың ұлттық өнерге сусындап қалғаны байқалды. Қошемет жақсы болды. Қазір ауыл әкімі, жеке кәсіпкерлер, мәдениет үйі демеушілік жасайды», – деді ағынан жарылып.</blockquote>Ансамбль мүшелері әр салада қызмет еткен, бүгінде зейнетке шыққан әжелер қауымы. Бүгінде шаңырақтарының құты мен берекесін кіргізіп отырған аяулы жандар. Алғашқыда олардың қатары аздау болатын. Уақыт өте келе ниет білдірген әжелер көбейді. Әрбірі қазақы салт-дәстүрді де, халық әндерін де жақсы біледі<blockquote>«Жанды дауыста баян, домбыра секілді аспаптардың сүйемелдеуімен орындаймыз.&nbsp; Ансамбль мүшелері жеке-жеке де ән айтады. Олардың ішінде қазақтың халық әндері, композитор Ш.Қалдаяқовтың туындылары бар. Ән орындап қана қоймаймыз, халықтың салт-дәстүрлерін насихаттаймыз. Көрініс көрсетеміз, жүн сабап, ұршық иіріп, диірмен тартамыз, киіз басу, сырмақ сыруды да ұмытпаймыз. Мысалы, ана туралы ән айтсақ ананың балаға деген махаббатын, баланы бесікке салу, тұсау кесу сияқты дәстүрлерді дәріптейміз», – дейді Жәмила әжей.&nbsp;</blockquote>Бұл ұжым облыс, қала көлемінде өткізілетін мәдени шаралардың бәріне қатысады. Сондай-ақ аудандарда, ауылдарда өнер көрсетіп жүр.Балалар кітабы көбейсе…Мәдениет үйінің ішінде қалалық орталықтандырылған кітапханалар жүйесіне қарасты №8 кітапхана орналасқан. Мен де ішіне бас сұғып, тұрғындардың кітап оқуға деген қызығушылықтарын байқадым.<blockquote>«Ауыл тұрғындары бір сәт осында келіп, кітап оқығанды жақсы көреді. Кітап қоры&nbsp; – 17053 дана. Оның ішінде 10559-ы қазақ тілінде. Барлық салалық кітаптар қамтылған. Тұрақты 600-ден аса оқырман жиі бас сұғып, өзіне қажетті дүниелерді іздейді. Соңғы жылдары кітапханаға келушілер саны көбеюде. Балаларға арналған кітаптар көбірек болса екен дейміз. Оқырмандар залы бар. Мұнда түрлі іс-шара, көрме ұйымдастырылады. «Ертегімен есейемін» жобасы бойынша жақында түрлі тақырыпта іс-шара өтті. Атаулы мереке күндері ескерусіз қалмайды. Мәселен, «Әке – шаңырақтың тірегі» әңгімелер кеші, «Табиғат – сырлы да қазыналы әлем» тақырыбында эко-логиялық сағат, «Қылқаламның хас шебері» сурет байқауы өткізілді», – деді кітапханашы Сәнім Шәкиева.</blockquote>Ауыл – ұлттың қаймағы. Еліміздің даңқын асырып жүрген таланттардың көбі сол ауылдан шықты. Ауылдың өнері өркен жайса, қазақтың мәдениеті қанатын кең жаяды.

Қызылорда: Ақсуат мәдениетінің ауқымы кең

<a href="https://kyzylorda-news.kz/">Kyzylorda-news.kz.</a> А.Тоқмағанбетов атындағы мәдениет үйінде қала әкімдігінің қолдауымен және жергілікті кәсіпкерлердің демеушілігімен ерекше жандарға арналған «Арман» инклюзивтік театрымен алғаш рет Талғат Телеубаевтың «Қолымнан ұста» атты пьесасы сахналанды.Қойылымның қорытындысында қала әкімінің орынбасары Жанмұрат Сейілов өнер ұжымын алғашқы қойылыммен құттықтап, алдағы уақытта толағай табыстарға жете беруіне тілектестігін жеткізді.Айта кету керек, биыл қаңтар айынан бастап А.Тоқмағанбетов атындағы қалалық мәдениет үйі жанынан ерекше жандарға арналған «Арман» инклюзивтік театр үйірмесі құрылды. Үйірменің жұмысын үйлестіру мақсатында қалалық мәдениет және спорт бөліміне қарасты кәсіпорын арқылы арнайы штат бөлініп, бір маман жетекшілік етуде.Қазіргі таңда, үйірмедегі оннан аса мүмкіндігі шектеулі жандарға өнердің қыр-сырын, сахнаға театрлық қойылымдарды қоюды ғана емес, эмоциялық мәдениет пен актерлік шеберлікті қалыптастыруды үйретуде.<blockquote>«Мүмкіндігі шектеулі жандардың Қызылорда облыстық филармониясының жас өнерпаздарымен бірлесе қойған қойылымы өте әсерлі, шынайы шықты. Бір сөзбен айтқанда жоғарғы деңгейде өтті. Қыз тағдыры сараланған қойылымның барысында бір сәт жүзімізге күлкі үйрілсе, бір сәт мұңайдық. Тіпті, залда отырған көрермендер көзіне жас алып, көңілдері босады. Бұл қойылым қай заман болмасын адамдар арасындағы қарым-қатынастың әр қилы болатынын көрсетті. Барлық өнерпаз өздеріне берілген рөлді өте керемет алып шықты. Алдағы уақытта да осындай халықтың жүрегіне жақын туындыларды сомдап, елдің құрметіне бөленіп, биіктен көрінулеріне тілектеспіз», – деді жеке кәсіпкер Қайрат Ераназаров.</blockquote>

Қызылордада ерекше жандар алғаш рет қойылым қойды

<a href="https://kyzylorda-news.kz/">Kyzylorda-news.kz.</a>&nbsp;Ілгеріде ел арасында темірден түйін түйгендер аз болмаған. Ұлт ішіндегі ұсынақты ұсталардың дені өз ата-бабасының жолын жалғап келді. Қару-жарақ, ат әбзелдері, үй шаруасына қажетті ыдыс-аяқ, отырықшы халыққа қажетті егін егу құралдарын соғып, маңдай терінің ақысын кәсібінен айырыпты. Осының ішінде ең күрделісі – зергерлік өнер. Киелі де қасиетті саналатын бұл өнер ерекше талант пен шабытты қажет етеді.Жалпы бұрынғы шеберлер де, бүгінгі зергерлік өнерді игерген буын да әшекей жасауда көбіне-көп күмісті пайдаланып келеді. Бағалы металл саналатын күміс шеберлердің жұмыс істеуіне өте қолайлы. Жылтыр түсінен бөлек, жұмсақ әрі таза күміс түрлі бұйым жасауға технологиялық жағынан икемді.«Сунақ ата» жеке кәсіпкерлігін құрып, қолынан келетін іспен шұғылданып жүрген жаңақорғандық жас жігітпен таныстық. Еркебұлан күмістен зергерлік бұйымдар істейді. Бұл салада 8 жылдық тәжірибесі бар оның өнімдеріне сұраныс та жетерлік.<blockquote>– Негізінен бала күнімде қорғасын ерітіп, түрлі зат шығаруға, сондай-ақ пластилиннен түрлі мүсін істеуге құмар едім. Кейін Алматы қаласындағы жеке зергерлік бұйымдар шығаратын цехта жұмыс істеп, көп нәрсені өз бетімше үйренгенім бар. Адамда ынта мен ниет болса жеткілікті екен. Осылайша елге оралысымен көріп, біліп, үйренгенімді аудан көлемінде дамытқым келді. Былтыр қазан айында «2021-2025 жылдарға арналған кәсіпкерлікті дамытудың ұлттық жобасы» аясында конкурсқа қатысып, 1 млн 225 мың теңге көлемінде қайтарымсыз грант ұттым. Түскен ақшаға металды ерітетін, кесетін, сығатын, ою-өрнек салатын құрал-жабдықтарымды Алматыдан сатып алдым. Қазір Instagram желісі пайдалы. Сол арқылы өнімді жарнамалап отырамын. Одан бөлек, аудан тұрғындары бір-бірінен естіп, тапсырыс береді. Сатып алушылардың дені – қыз-келіншектер мен үлкен апа-әжелеріміз, – дейді Еркебұлан Медет.</blockquote>Ол сапасы 999 маркалы күмісті, яғни, шикізатты да Алматы қаласынан алдырады. Одан әйелдерге арналған түрлі әшекей бұйымдар – сырға, сақина, білезік істейді. Әзірге өзін ғана жұмыспен қамтыған кәсіпкердің ендігі жоспары – шағын цех ашып, екі көмекші жігіт алып, оларға да осы өнерді үйрету.Айта кетейік, Жаңақорғанда кәсіпкерлікке ынталы жастар легі көбейген. Мысалы, аудан бойынша 360 адам түрлі бағыттағы кәсіп ашу үшін мемлекеттік бағдарламалар арқылы қайтарымсыз қаржы алған. Осының ішінде 285 адам 1 млн 225 мың теңге көлемінде грант ұтса, 75 тұрғынға 612 мың теңгеден мемлекеттік қайтарымсыз қаражат берілді. Ал биыл Жаңақорғанда жаңа бизнес-идеяларды іске асыру үшін әр адамға 400 айлық есептік көрсеткішпен, яғни, 1 млн 380 мың теңгеден қаржы беріледі. Бұған 149 орын жоспарланыпты.<figure class="image"><img src="https://knadmin.beoblood.kz/uploads/3c69145d_a086_4126_9dd8_accbf2e637d0_f84cfb5bed.jpg" alt="3c69145d-a086-4126-9dd8-accbf2e637d0.jpg"></figure>

Талант пен шабыт қажет ететін ерекше өнер

<a href="https://kyzylorda-news.kz/">Kyzylorda-news.kz.</a>&nbsp; Сырдария аудандық мәдениет үйінде өне¬ге¬лі өмір иесі, Сыр өңірі мен Сырдария ауданының әлеуметтік-экономикалық, қоғамдық-саяси, рухани-мәдени дамуына айрықша үлес қосқан ардақты азамат, «Құрмет белгісі» орденінің иегері, Сырдария ауданының Құрметті азаматы Абызбай Маханбетовке арналған «Болмысы бөлек тұлға» атты ғұмырбаяндық кітаптың тұсаукесер рәсімі өтті. Тағылымы мол іс-шараға зиялы қауым өкілдері мен ардагерлер, аудан тұрғындары, ¬текті тұлғаның ұрпақтары қатысты.Іс-шараның басында «Еңбектегі ерлігі үшін», «Ерен еңбегі үшін» медалінің иегері А.Маханбетовтің өмір жолы, атқарған қызметі туралы бейнебаян көрсетілді. Онда еңбек жолын білім саласынан бастаған ардақты азаматтың аудандық партия комитетінде, журналистика саласында жауапты қызметтерді абыроймен атқарып, білікті басшы, іскер ұйымдастырушы бола білгендігі, халық қалаулысы ретінде де ауданның әлеуметтік-экономикалық, қоғамдық-саяси дамуына зор еңбек сіңіргені насихатталды. Сондай-ақ құрметті зейнет жасына шықса да қоғамдық істердің бел ортасында болғаны көрсетілді.Жаңа кітаптың тұсаукесер рәсімінде Мұрат Ергешбаев сөз сөйлеп, Абызбай Маханбетовтің өмірі өнегеге толы екеніне тоқталды.<blockquote>– Өзі өмірден өтсе де өнегелі істері ұмы¬тылмайтын тұлғалар болады. Біз білетін Абызбай Маханбетов сондай дара тұлғалар санатынан. Ол кісі туралы кім айтып, кім әңгімелесе де тек жақсы естеліктер айтады. Бұл жақсы тұлғаның жақсы аты ешқашан ұмытылмайтынын білдіреді. Мен де текті тұлғаның тек жақсы қасиеттерін білемін, одан өнеге аламын, құрмет тұтамын. Ол кісі партия органдарында, аудандық газетте ұзақ жыл жемісті еңбек етті. Ауданның дамуына, жоспарлардың сапалы орындалуына өзіндік үлесін қосты. Сондықтан аудан халқы ол кісіні әркез ұмытпайды. Ардагер аға-апаларымыздан әрқашан Абызбай аға туралы жақсы естеліктер естимін. Сірә, «Жақсының аты, ғалымның хаты өлмейді» деген даналық сөзді халқымыз осындайда айтқан шығар. Абызбай Маханбетовті жақынырақ танып-білуім Сырдария ауданына қызметке келгенге дейін қалыптасты. Түрлі жиындарда ол кісінің азаматтық, тұлғалық болмыс-бітімі, тазалығы ерекше назар аудартатын еді. Ол кісі сөз сөйлесе, өзінің айтар орнықты ойларын, пайымды пікірлерін тәрбиелік мәні зор мысалдармен көркемдеп жеткізетін. Ал, іс бастаса, сол іс нәтижелі аяқталғанша барлық күш-жігерін жұмсайтын. Мұнан бөлек, іс басында жүрген азаматтарға әркез тілектес болып, ағалық, үлкендік жанашырлығы мен қолдауын көрсетіп жүретін. Біз Абызбай ағаның ойларынан, көзқарастарынан жақсылықтың лебі есіп тұратынын сезінетінбіз. Иә, мұндай кісілердің есімі тарихта алтын әріппен жазылады. Осы кітаптың жарыққа шығуы, ел азаматтарының естеліктерінің жинақталуы да тағылымы мол іс. Бұл кітап – бір тұлғаға ғана емес, ауданның тарихына арналған еңбек деп білемін. Өйткені, кітапта талай жақсы кісілердің есімі аталып, жақсы естеліктер жазылғаны анық. Сол себепті, кітап шығару ісін қолға алып, игі істі жүзеге асыруға ниеттенген барша азаматтарға абырой-амандық тілеймін. Бұл кітап бір әулеттің ғана емес, қоғамның қазынасына, оқырманның олжасына айналарына сенемін. Ұмытылмайтын қайраткер-тұлғаның ұрпақтарының әкелерінің абыройлы жолын жалғап, егемен еліміздің дамуына үлес қосуына тілектестігімді білдіремін, – деді Мұрат Нәлхожаұлы.</blockquote>Мұнан соң мемлекет және қоғам қайраткері Алмагүл Божанова, Қармақшы және Сырдария ауданының Құрметті азаматы Жақай Бодықбаев, облыстық қоғамдық кеңес төрағасы Әріп Қожбанов болмысы бөлек тұлға туралы өз естеліктерімен бөлісті, адамгершілік қасиеттерін жастарға өнеге етті. Атап айтқанда, текті тұлғаның есте сақтау қабілетінің жақсы екенін, қызмет барысында ұқыптылық, тиянақтылық, тәртіпке ерекше мән беретінін, ағайын-туысқа бауырмалдығын айтты. Сонымен қатар барлық істе өзі үлгі болып жүретінін тілге тиек етіп, кадр жасақтауға да ерекше мән бергенін жеткізді.Өңірге белгілі тұлға туралы естеліктер айтылған соң құрметті меймандар жаңа кітаптың лентасын қиды.Ғұмырбаяндық кітапта А.Маханбетовтің бала шақтан қариялық кезеңге дейінгі өмірі, тұлғаның болмыс-бітімі, атқарған еңбегі, ұлағатты істері мен тағылымды тағдыр жолы туралы мәліметтер жинақталған. Онда бірге қызметтес болған замандастарының, ағайын-туыс, ұрпақтарының естеліктері, фотосуреттері, ардақты жанның баталары қамтылған. Бұл кітаптың жарыққа шығуына ұрпақтары ұйытқы болды.<blockquote>– Уақыт жүйрік екен. Тағдыр жолы тағылымға толы әкеміздің өмірден өткеніне де биыл бес жылға жуық уақыт болыпты. Осыған орай, әке рухына тағзым ретінде ғұмырбаяндық кітап шығарып, өмір жолын келер ұрпаққа өнеге етуді жөн санадық. Бұл бастамамыз әкеміздің көзін көрген аға буын өкілдері тарапынан қолдау тауып, кітапқа естеліктер тез жиналды. Бәрі де әкеміз туралы шынайы ықыласпен, адал пейілмен өз естеліктерін ұсынғанын ерекше айтып өткеніміз жөн. Кітапты құрастыруға үлес қосқан, ой-пікір білдірген барлық азаматқа шын жүрегімізбен шексіз алғысымызды білдіреміз. Бұл кітап ауданның дамуына үлес қос¬қан тарихи тұлғалардың тағылымды шежіресінің жал¬ғасы боларына сенеміз, – дейді ұрпақтары.</blockquote>Жаңа туындыдағы материалдардың жинақталуына Ақтөре Ибрагимұлы редакторлық етсе, Ердос Беркінбаев техникалық редактор болды. Оқырманға жол тартқан кітаптың таралымы – 250 дана.Кітаптың тұсаукесер рәсімінен кейін ардақты азаматтың рухына арналып ас берілді.&nbsp;&nbsp;&nbsp;

Естелік кітап жарық көрді

<a href="https://kyzylorda-news.kz/">Kyzylorda-news.kz.</a>&nbsp; Биыл Алаш қайраткері, ақын, қазақ әдебиетінің жарық жұлдызы Мағжан Жұмабаевтың туғанына 130 жыл толып отыр. Жыл көлемінде қазақтың арынды ақынына арналған айтулы іс-шаралар күнтізбелік жоспарға қойылған. Өз кезегінде Қоғалыкөл ауылдық клуб үйінде өлеңдерімен оқырман жүрегінен жол тапқан Мағжан Жұмабаевты еске алуға арналған жазба ақындар мүшәйрасы өтті.<blockquote>«Мен жастарға сенемін» тақырыбында өткізілген жазба ақындар мүшәйрасы 2 кезеңнен тұрды. Аталған мүшәйрада жас ақындар Мұхамеджан Мансұров, Елдос Жаппасбаев, Бақтөре Айтбаев, Құндыз Бажиева, Әсел Зұлпар, Тұмарлан Өмірбек, Баубек Әуесхан, Асанова Гүлжазира, Нұрсұлтан Сүйіндіков, Ержан Мұхиятдинов бақ сынады. Алғашқы кезеңде аузымен құс тістеген жасқа ақындар Мағжан Жұмабаевқа арналған өлеңдерін оқыды. Сонымен бірге екінші кезеңде олар еркін тақырыптағы өлеңдерін көпшілікке ұсынды. Өз кезегінде мүшәйрада оқ бойы озып шыққан 5 ақын арасында үшінші кезең ұйымдастырылды. Заматында жас ақындар «Ақ шашты көрдім апа самайыңнан» тақырыбында 2 шумақ өлең шығарды.</blockquote>Өз кезегінде Қоғалыкөл ауылдық ардагерлер кеңесінің төрағасы Базарбек Жаныбаев пен №44 орта мектептің Сламбек Қаюпов ардақты ақын жайлы ойларын ортаға салды.<blockquote>«Бүгін біз Қоғалыкөл ауылында ерекше жыр кешіне куә бола білдік. Жас ақындар шама-шарқы жеткенше Алаш қайраткерінің өмірін, тым қысқа ғұмырын жырға қосты. Барлық ақынның талабы таудай. Өлеңнің техникасын меңгерген жас ақындар тақырыпты аша білді. Жалпы, елінің егемендігі үшін күрескер атанған Мағжан ақын өлеңдері арқылы халықтың мұң-мұқтажын жырлай білді. Әрине, осындай дара тұлғаға лайықты құрмет көрсетлуі керек», – деді Қоғалыкөл ауылдық ардагерлер кеңесінің төрағасы Базарбек Жаныбаев.</blockquote>Мүшәйрада жасқан ақындардың өнеріне жергілікті ақын Байрон Есенбаев, аудандық мәдениет үйінің әдіскері Гаухар Сәрсенбаева, аудандық «Тіршілік тынысы» газетінің тілшісі Балтабай Ордабеков баға берді. Сөз сайысының нәтижесінде, ІІІ орынды Тұмарлан Өмірбек, ІІ орынды Бақтөре Айтбаев, І орынды Мұхамеджан Мансұров, бас жүлдені Ержан Мұхиятдинов еншіледі. Барлық ақынға арнайы диплом мен бағалық сыйлық табысталды.&nbsp;&nbsp;

 Шығармашылық кеш ақын рухына арналды

<a href="https://kyzylorda-news.kz/">Kyzylorda-news.kz.</a> Театр – тәлім ордасы. Адамгершілік пен ізгіліктің, ұлағат пен тағылымның қарашаңырағы. Көрнекті жазушы Ғабит Мүсіреповтің «Театр – хас сұлудың көз жасындай мөлдір өнер» деп айтуы тегін болмаса керек. Мәдениет пен руханият әлемін театрсыз елестету әсте мүмкін емес.Өнер саласының ішінде театр өнерінің шоқтығы қашан да биік. Себебі, ол өзінің өміршеңдігімен ерекшеленеді. Ал сол өзгеше өнерге жан бітіретін театр артистерінің еңбегі қашанда елеулі.&nbsp;Өнерді заман талабына сай әрқилы етіп өңдеп, театрсүйер қауымға сапалы туындыларын ұсынып келе жатқан өнер ордаларының бірі – А.Тоқмағанбетов атындағы қалалық мәдениет үйі жанынан ашылған «Жастар» театры. Жеті жыл аралығында қаншама жетістікке жеткен шығармашылық ұжым талантты жастардан құралған. Актерлік шеберлігімен, еңбекқорлығымен, ізденімпаздығымен танылып келе жатқан талант Қарлығаш Қонақ солардың қатарында.Қарлығаштың өнерге келуі кездейсоқ емес. Балалық шағынан анасының қолдауымен өнер мектебінде білім алып, тәжірибелі, кәсіби биші атанған. Ұлбосын Жаналиеваның шәкірті атанып, хорда ән шырқаған. Талай додаларға қатысып, жетістікке жеткен.<blockquote>– Бүгінде сахнаға шығып, көрерменнің ыстық ықыласына бөленіп жүруіме анамның ықпалы мол болды. Ол кісі де өнерге біртабан жақын. Менің құлшынысымды арттырған анама алғыс айтамын, – дейді ол.</blockquote>Кейіпкеріміз театрға дейін музыкалық колледжде оқып, классикалық жанрда ән шырқап, үздік шәкірттер қатарында болған. Бір ғана өнермен шектеліп қалмай жан-жақты ізденіп жүріп, түрлі байқауларға қатысып, жеңімпаз атанған.<blockquote>– Колледжден соң Астана қаласындағы Қазақ Ұлттық өнер академиясына вокалдық өнер кафедрасына оқуға түстім. 4 жыл білім алып, кәсіби маман атандым. Оқуымды тәмамдаған соң Сыр еліне қайта келдім. Мамандығым бойынша жұмыс жасаймын деп көп жерге түйіндеме қалдырдым. Десе де, ешбір жер қабылдамады. Бағымды сынап көрейін деп Жастар театрына келгенімде ұстазым Оңталап Нұрмаханов тәжірибем болмаса да өзі тәрбиелеп, сахнаға бейімдеді. Ұстазымның арқасында өзім қатарлы жастармен жұмыс істеп, жаңа қырымнан танылдым, – дейді актриса.</blockquote>Үлкен ұжымға қосылған Қарлығаш талантымен көрерменді бірден баурап алды. Театр репертуарындағы көптеген спектакльдерде ойнай жүріп, әуезді үнімен көпшілік көзайымына айналды. Театрға келгеніне көп болмаса да бірнеше рөлді сахнаға алып шықты. Айта кетейік, жақында премьерасы өткен «Олимптің күйреуі» мифологиялық драмасында негізгі кейіпкердің бірі Афинаны сомдап, көрерменге естен кетпес әсер сыйлады. Шымылдық ашылғаннан финалға дейін оқиғаның өрбуіне атсалысты. Айтуынша бұл рөлді сомдау оңайға соқпаған. Бірақ өзіне бекітілген соң жақсы бейнелеп шықты. Оған көрерменнің шынайы ықыласы дәлел.Талантты артист үшін кішкентай рөл деген болмайды. Берілген образды шынайы жеткізу – қабілет ерекшелігі десек артық емес. Кейіпкеріміз көпшілік сахнадағы шағын рөлдерінен сәтті бейне жасап, қойылымның көзге көріне бермейтін штрихтарын тауып, өз кейіпкерлеріне үйлесімді пайдаланады. Мұның өзі – шығармашылық адамының бойынан табылатын ерекше қасиет.<blockquote>– Сахнаның құдіреті шексіз. Ол әрбір адамды сезеді. Себебі, сахна ол – айна. Актердің ішкі жан дүниесі мен рухани болмысын көрерменге көрсетіп тұрады. Жалпы театр өмірді сүйетіндерге ғана емес, жарық дүниенің сырын жан дүниесімен түсінетіндерге арналған. Бұл бағытта менің жолым болды, – дейді Қарлығаш.</blockquote>Артистің шығармашылық келбеті оның басты не қосалқы рөлді бейнелеуімен немесе олардың санымен бағаланбайды. Керісінше сол рөлдердің ерекшелігімен дараланады. Театр сахнасына шығу – кез келген адамның маңдайына жазылмаған бақыт. Осы өнердің дамуына үлес қосқан майталмандардың жолын жалғайтын талантты жасқа шығармашылық табыс тілейміз. Ақылына көркі сай арудың бағындырар белесі әлі көп.&nbsp;&nbsp;&nbsp;

Театр – ізгілікке толы орта

<a href="https://kyzylorda-news.kz/">Kyzylorda-news.kz.</a> Қызылорда қаласында «Көңілді керуен» көрмесі өтеді.2023 жылғы 7 наурыз күні сағат 11:00-де Салихитдин Айтбаев атындағы көркемсурет галереясында ҚР Суретшілер одағының құрылғанына 90 жыл толуына орай және Наурыз мерекесіне арналған ҚР Суретшілер және Қолөнершілер одағының мүшесі, Ұлмекен Маутованың «Көңілдегі керуен» көрмесі көрермен назарына ұсынылады.<blockquote>«Көрмеге 40-қа жуық кескіндеме және киізден жасалған паннолар қойылады. Барша өнерсүйер қауымды көрменің ашылу салтанатына шақырамыз», - делінген хабарламада.</blockquote>Мекенжайы Иса Тоқтыбаев-2 тұйық көше ғимарат №1, байланыс телефоны: 8 (7242) 27 29 14, 8 701 361 57 81.

Қызылордада «Көңілді керуен» көрмесі өтеді

​<a href="https://kyzylorda-news.kz/">Kyzylorda-news.kz.</a> Бүгін Қызылорда қаласының әкімдігінің қолдауымен, мәдениет және спорт бөлімінің ұйымдастыруымен әжелер ансамбльдерінің облыстық фестивалі өтті.​Қоғамдағы асыл әжелердің, әйел-аналардың мәртебесін арттырып, отбасылық құндылықтарды, қазақтың тұрмыс-салт жырларын, халық әндерін насихаттауды мақсат еткен «Ұлағатты әже» атты фестивальге арнайы қатысқан шаһар басшысы Асылбек Шаменов ұлттық тәрбиедегі қазақ әжесінің рөліне ерекше тоқталып, облыстың түпкір-түпкірінен келген өнер ұжымдарына ризашылығын білдірді.<blockquote>​«Әлімсақтан әжелер – ұлттың ұйытқысы, тәлім мен тәрбиенің тұма бастауы. Сондықтан бұл шараның келіндеріміз бен бойжеткен қыздарымыз үшін өнегесі мол. Ағайын-туманың бірлігін сақтаған, әулеттегі абысын-ажындардың ақылшысы атанған, жас келіндерге жол көрсеткен, немере-шөберелерін құндылықтардың қайнарымен сусындатқан ардақты әжелеріміздің дәл осылай халық алдына шығып, алқалаған әлеуметке бүгінгідей жаһандану дертіне қарсы тұрар қуат-күш сыйлауы - кешегі абзал аналар салып кеткен сара жолдың үзілмегенін, ғасырдан ғасырға мұрагер ұрпақтары арқылы жалғасын таба беретінін байқатса керек», - деген қала әкімі Асылбек Шаменов абзал аналарымызды алда келе жатқан төл мерекелерімен құттықтады.</blockquote>​Сондай-ақ, «Алып анадан туады, тектілік тұқым қуады» демекші, Тәуелсіз Қазақстанның гүлденуіне айрықша үлес қосып, түрлі салада абыройлы еңбек етіп жүрген елімізге белгілі тұлғалардың аналары мен жұбайларына көктемнің шуақты мейрамы қарсаңында арнайы сый-құрмет көрсетті.​Облыс аумағынан 10 әжелер ансамблі қатысып, Ақмешіт аспанын әнге бөлеген өнер мерекесінің нәтижесінде Қызылорда қалалық білім бөлімі жанынан құрылған &nbsp;«Асыл жандар» ансамблі «Көрермендер көзайымы» атанса, Қызылорда қаласы, Асқар Тоқмағамбетов мәдениет Үйі жанынан құрылған «Ұлағат» ансамблі мен Жалағаш ауданы, Мөрәлі Шәменов ауылдық мәдениет үйі жанынан құрылған «Асыл ана» ансамблі 3 орын, Сырдария ауданы, Асқар Тоқмағамбетов мәдениет Үйі жанынан құрылған &nbsp;«Асыл ана» ансамблі 2 орын, Роза Бағланова атындағы Қазалы аудандық мәдениет Үйі жанынан құрылған «Өнеге» ансамблі 1 орын иеленсе, Қармақшы аудандық Шәмшәт Төлепова мәдениет Үйі жанынан құрылған «Ақ әжелер» ансамблі Бас жүлдеге лайық деп танылды. ​Барлық қатысушылар мен жеңімпаздарға арнайы алғыс хаттар мен қаржылай сыйлықтар табысталды.​Айта кетейік, санаулы сәттерден соң А.Тоқмағамбетов атындағы қалалық мәдениет үйінде фестиваль аясында аналар форумы өтеді.<figure class="image"><img src="https://knadmin.beoblood.kz/uploads/334685429_112119245073499_3484704206099220063_n_725e8c0d01.jpg" alt="334685429_112119245073499_3484704206099220063_n.jpg"></figure><figure class="image"><img src="https://knadmin.beoblood.kz/uploads/328695235_491790042975729_8701866316613678753_n_bb6578f53c.jpg" alt="328695235_491790042975729_8701866316613678753_n.jpg"></figure><figure class="image"><img src="https://knadmin.beoblood.kz/uploads/334467418_907197053851017_4823418933537002408_n_e1049af794.jpg" alt="334467418_907197053851017_4823418933537002408_n.jpg"></figure><figure class="image"><img src="https://knadmin.beoblood.kz/uploads/329574698_188865140508074_551158256998224246_n_1de284ad52.jpg" alt="329574698_188865140508074_551158256998224246_n.jpg"></figure>

Қызылордада әжелер ансамбльдерінің облыстық фестивалі өтті

<a href="https://kyzylorda-news.kz/">Kyzylorda-news.kz.</a> «Respublica» партиясы түркі әлемінің рухани астанасы Түркістанда 500-ден астам тұрғынмен кездесті. Партия төрағасы, Мәжіліс депутаттығына кандидат Айдарбек Қожаназаров кездесуде ұлттық мәдени бірегейлікті ілгерілетудің маңыздылығын атап өтті.<blockquote>– Көшпенділердің тарихи-мәдени мұрасын саналы ұрпақ ретінде сақтап қана қоймай, жастардың санасына сәуле шашатындай насихаттауға, бүкіл әлемге тарату маңызды. Біз халықтың біртұтас мәдени кеңістігін қалыптастыруды бас­ты міндет ретінде қарас­тырып отырмыз. Қазақ халқының ұлттық мәдени болмысының өзегі – тарихи дәстүріміз, ұлттық құндылықтары­мыз және қазақ тілі. Күллі түркі әлемінің рухани астанасындағы Қожа Ахмет Ясауи сияқты тарихтағы рухани көшбасшыларымыздың дүниетанымын дәріп­теп, ұрпақтан ұрпаққа жеткізу маңызды, – деді А.Қожаназаров.</blockquote>Өз кезегінде депутаттыққа кандидат Ека­терина Смолякова да қоғамды топтастырудың факторы ретінде қазақ тілін насихаттаудың маңыздылығына тоқталды.<blockquote>– Қазақ тіліндегі танымал контентті дамыту мен таратуды ынталандыратын тетіктердің жоқтығы қынжылтады. Біз бос ұрандарға қарсымыз. Біз ұлт бірлігінің басты факторы – қазақ тілін дамытудың тиімді тетіктері мен жағдайын жасауды мақсат етіп қойдық, – деді Е.Смолякова.</blockquote>«Respublica» партиясының жетекшілері мен депутаттыққа кандидаттар Шымкент қаласы­на барып, «Ferrum Vtor», «ЦветЛит» және «ST temir» ЖШС металлургиялық кәсіпорындарының еңбек ұжымдарымен кездесті. Жиын барысында партия төрағасы Айдарбек Қожаназаров қоғам игілігі үшін еңбек ету нағыз патриотизмнің көрінісі екенін айтты.<blockquote>– «Respublica» партиясының идеяларын шынайы патриоттарға, күнделікті зауыттар мен фабрикаларда жұмыс істейтін нағыз еңбек адамдарына ұсынғаныма өте қуаныштымын. Отаншылдығыңды жар салып көрсетпей-ақ, Отанға деген сүйіспеншілігіңді іспен дәлелдеу – халықтың игілігі үшін еңбек ету деп білемін, – деді партия жетекшісі.</blockquote>

Мәдени мұра - ғасырлар үні

<a href="https://kyzylorda-news.kz/">Kyzylorda-news.kz.</a>&nbsp; Биыл халық жазушысы, мемлекет және қоғам қайраткері Шыңғыс Айтматовтың 95 жылдығы. Осыған орай, бүгін Н.Бекежанов атындағы облыстық қазақ академиялық музыкалық драма театрында махаббат пен достықтың айқын көрінісі бейнеленген жылдың алғашқы премьерасы «Жәмилә» туындысы сахналанады.Брифинг барысында қойылым режиссері Дина Жұмабаева «Жәмиләнің» басты жаңалығымен бөлісті.<blockquote>«Бұл шығарма Шыңғыс Айтматовтың ең алғашқы туындысы және әлемнің 150 тіліне аударылған. «Жәмилә» шығармасы Данияр мен Жәмилә арасындағы тәтті махаббат арқылы оқырман қауымды өзіне баурап алды. Осы әсерлі туындыны театр саханасында шынайы көрсету үшін барымызды салып жатырмыз. Бүгінгі премьераның басты ерекшелігі – қойылымға Ш.Айтматовтың көркемдік стилін қостым. Сондай-ақ, спектакльде ерекше суреттерде көрініс табатын болады. Әртістер өздерінің рөлдерін жетілдіріп, көрермендерге эмоция сыйлайды деген ойдамыз», - деді Ғ.Мүсірепов атындағы академиялық балалар мен жасөспірімдер театрының режиссері Дина Жұмабаева.</blockquote>

Бүгін Сыр сахнасында алғаш рет «Жәмилә» премьерасы көрсетіледі

<a href="https://kyzylorda-news.kz/">Kyzylorda-news.kz.</a>&nbsp; Қ.Қазантаев атындағы мәдениет үйінде Жалағаш ауданы әкімдігінің қолдауымен мемлекет және қоғам қайраткері Т.Жүргеновтің 125 жылдық мерейтойына арналған «Түркі әлемінің Темірбегі» атты облыстық жас ақындар айтысы өткізілді.Дүбірлі додаға аймағымыздан 12 айтыскер ақын қатысып, бақтарын сынады.Айтысты аудан әкімі Есжанов Асқарбек Темірбекұлы ашып, барлық қатысушыларға сәттілік тіледі.Айтысты ақын, «Құрмет» орденінің иегері, Сырдария ауданының «Құрметті азаматы» Байдаулетов Мамыр Байментайұлын жүргізді.Аузымен құс тістеген кіл жүйріктер тау тұлға Темірбек Жүргеновтің білім мен әдебиет, мәдениет пен өнер саласындағы ұйымдастырушылық қабілетін, қаламгерлік қажырын, сондай-ақ ел Тәуелсіздігінің тарих таразысындағы жеткен жетістіктерін айтып, бірінен бірі озды.Айтыстың қазылары ақын, Қазақстан Журналистер Одағының мүшесі, Жалағаш ауданының «Құрметті азаматы», «Құрмет белгісі» орденінің иегері Қазына Өзденбаева, айтыскер ақын, үш дүркін «Алтын домбыра» иегері, Қызылорда қаласының және Жалағаш ауданының «Құрметті азаматы» Мұхтар Ниязов, айтыскер ақын, Сырдария ауданының «Құрметті азаматы» Нұрмат Мансұров ақындардың өнерін сарапқа салды.Қазылар алқасының шешімімен:Жүлделі ІІІ орынды Сырдария ауданынан Мұхамеджан Мансұров, Қызылорда қаласынан Ерасыл Байментаев, Шиелі ауданы Бекжан Ержігіт иеленсе, жүлделі ІІ орынды Арал ауданынан Бексұлтан Орынбасаров қанжығасына байлады. Ақындардан оза шапқан Қармақшылық Тұрар Бекмұрзаевқа жүлделі І орын бұйырып, айтыстың бас жүлдесін Қармақшы ауданынан Сырым Әділбеков иеленді.Сондай-ақ, айтыстың барлық қатысушылары мен жүлдегерлеріне дипломдар мен алғыс хаттар және қаржылай сыйлықтар табысталды.Сөз соңында Темірбек Жүргенов атындағы қоғамдық қордың төрағасы С. Аңсат Алаштың арда азаматы Темірбек Жүргеновтің 125 жылдығы аясында өткізілетін іс-шаралардың ұрпақ үшін маңызды екенін жеткізіп, айтысты ұйымдастыруға атсалысқан Жалағаш ауданының әкімдігіне өз алғысын білдірді.<figure class="image"><img src="https://knadmin.beoblood.kz/uploads/332786255_619288540025423_5372780451762614091_n_dfd73a9f89.jpg" alt="332786255_619288540025423_5372780451762614091_n.jpg"></figure>&nbsp;<figure class="image"><img src="https://knadmin.beoblood.kz/uploads/332879910_489969099820583_9132559799659255072_n_897642fb58.jpg" alt="332879910_489969099820583_9132559799659255072_n.jpg"></figure>&nbsp;<figure class="image"><img src="https://knadmin.beoblood.kz/uploads/332759314_2362904343885271_6221330166628688832_n_c2c46b15ba.jpg" alt="332759314_2362904343885271_6221330166628688832_n.jpg"></figure>&nbsp;<figure class="image"><img src="https://knadmin.beoblood.kz/uploads/332745400_3537157529943315_3656897495580530395_n_6748ada88f.jpg" alt="332745400_3537157529943315_3656897495580530395_n.jpg"></figure>

Т.Жүргеновтің 125 жылдық мерейтойына арналған облыстық ақындар айтысы өтті 

<a href="https://kyzylorda-news.kz/">Kyzylorda-news.kz.</a> Бүгінде өңірде 209 кітапхана бар болса, оның 165-і ауылдық елдімекендерде шоғырланған. Ал облыс бойынша барлығы 4 млн 522 мыңнан астам кітап қоры бар. 14 ақпан – Халықаралық кітап сыйлау күніне орай Өңірлік коммуникациялар қызметінде өткен баспасөз конференциясында Ә.Тәжібаев атындағы Қызылорда облыстық әмбебап-ғылыми кітапханасының директоры Нұрлыбек Мыңжас кітап қорын жасақтау бағытында атқарылған жұмыстарды баяндады.<blockquote>«Кітап – алтын қазына, білім бұлағы, жан азығы. Бүгінгі кітап сыйлау мерекесі 2012 жылдан бері халықаралық дәрежеде тойланып келеді. Қаламыздағы Ә.Тәжібаев атындағы Қызылорда облыстық әмбебап ғылыми кітапханамызда 42 мыңнан астам кітап қоры бар. Ондағы кітаптардың басым көпшілігі жаңартылған және электронды форматта оқуға ыңғайланып жасақталды. Қазіргі таңда халық арасында кітапқа деген көзқарас өзгеріп, ерекше кітапты оқуға құмартқан жастар артып келеді. Осыған орай, біз жастарды кітап оқуға тарту мақсатында орталық алаңда «Адалдық кітапханасын» ұйымдастырудамыз. Бұл игі шараның негізгі мақсаты – оқырмандарды бір-бірімен жолықтыру және өздерінің кітаптарымен өзара алмасу болып табылады. Бұл бағыттағы іс-шараларды әрі қарай жалғастыра береміз», - деді Нұрлыбек Кәрібозұлы.</blockquote>Брифинг барысында «Кітап құрттары» клубының жетекшісі Талғат Меңдібаев аталмыш ұйымның 4 жыл ішіндегі ауқымды жұмыстарын баяндап өтті.<blockquote>«Бүгінде «Кітап құрттары» атты клубымыз авторлық құқыққа ие болды. Бұл клуб мүшелерінің үздіксіз жұмысының арқасы деп білемін. Біздің клуб екі жыл бойы «Кітап сыйла» акциясын ұйымдастырып келеді. Осы уақыт ішінде оқырмандарға 3 мыңнан аса кітап сыйладық. Бұдан бөлек, интеллектуалды ойындарды қолға алып, мектеп оқушыларын кітап оқуға тарту мақсатында бағалы сыйлықтар беруді қарастырудамыз. Кітап оқысаң заманауи мықты тұлғасың. Бұл идеяны жастардың бойына сіңіргіміз келеді», - деді «Кітап құрттары» клубының жетекшісі Талғат Амангелдіұлы.</blockquote>

Қазақстан және Қызылорда облысының жаңалықтары: Мәдениет