<a href="https://kyzylorda-news.kz/">Kyzylorda-news.kz</a>.&nbsp; Әдетте, әскери қызметкер десе көз алдымызға ер азаматтардың бейнесі келеді. Алайда, ақ найзаның ұшымен, ақ білектің күшімен келген қасиетті жерді қорғауда қазақтың арулары да өз қажыр-қайратын аз жұмсаған жоқ. Шекарасы бекіген қазіргі Тәуелсіз еліміздің тыныштығын сақтауда нәзік жандылардың зор үлесі бар. Солардың бірі – ҚР ҰҚК Шекара қызметі Қызылорда облысы бойынша департаментінің әскери қызметші Толқынай Ізімбетова еліне адал қызмет етіп, шекара қорғауда қайсарлық танытып жүрген жанның бірі. Бүгін Өңірлік коммуникациялар қызметінің ақпарат алаңында Толқынай Ізімбетова өз саласына тоқталды.<blockquote>– Мен Қызылорда облысының шекара қызметі департаментінде 2007 жылдан бері қызмет атқарамын. Бұл қызмет мен үшін үлкен абырой, зор мақтаныш. Менің бұл салаға келуіме өз ұстазым себеп болды. Сол жылы “Сыр сұңқары” деп аталатын әскери оркестрдің мүшесі болдым. Оркестрмен бірге Қазақстанның түкпір-түкпірін аралап, түрлі сайыстарда ән шырқадым. 2013 жылы қарулы күштер арасында өткен сұлулық сайысына қатысып, жеңімпаз болдым. Одан кейін Ресейде өткен халықаралық байқауға еліміздің атынан жалғыз өзім қатысып, лауреат атандым. Бұл менің еңбек жолымдағы ең үлкен жетістігім деп білемін. Бүгінде ата-бабамыздан мұра боп қалған кең байтақ жеріміздің шекарасын ерлермен бірге иық тіресіп, бір сапта күзетіп келемін. Мамандығыммен мақтанамын. Сөзімді қорытындылай келе, барлық қыз-келіншектерді 8 наурыз - Халықаралық әйелдер күнімен шын жүректен құттықтаймын! Елімізге амандық, жұртымызға тыныштық тілеймін, – деді Толқынай Маратқызы.Фото: Қызылорда облысының Өңірлік коммуникациялар қызметі</blockquote>

Толқынай Ізімбетова: Мамандығыммен мақтанамын

<a href="https://kyzylorda-news.kz/">Kyzylorda-news.kz.</a> Дүйсенбі. Басылымның сейсенбідегі бір беті менің мойнымда. Газеттің бұл жолғы санын тұтастай мәдинет саласына һәм сол салада жүрген майталман мамандарға арнауды жөн көрдік. Себебі бұл шежірелі өлкеден өнер десе, ішкен асын жерге қоятын талай таланттылар қанат қаққан.Сондықтан тек бізге берілген мағлұматтарға сүйене алмай, мәдениет саласының қыр-сырын көрмекке аудан орталығының қақ төрінен орын тепкен өнер орталығына қарай беттедік. Көп ұзамай діттеген жерге де табан тіредік. Бұл жерде нағыз өнерпаздардың қара шаңырағы деседі. Елдің айтуындай-ақ бар екен. Есіктен ентелей сала құлағымызға бірден әуен естілді. Құдды бір симфония дерсің. Алдыға бес-алты қадам басқан соң, әлгі әдемі үнге сүйріктей саусақтарын қозғап, мың бұралып, талдырмаш мүсінімен таңқалдыра билеп биші екенін байқадық. Ол есіктен тілшінің келіп тұрғанын аңғарса да, музыканың ырғағына тербеліп, билеуді әрі қарай жалғастыра берді. Біз де ішімізден бидің бекзат өнер екеніне тағы да көз жеткізіп, сүйсініп тұра бердік.Сәлден соң нәзік қимыл, әдемі әрекетті, сұлу қозғалысты суреттеген жан бізге қарай жақындады. Дереу келген жөнімізді айтып, би өнері жайлы мағлұматқа қанықтық. Кейіпкеріміз «Би – ол өмір сүру символы» деп сөзін бастады. Әрмен қарай «Түсіне білген адамға әр қимылдың астарында мән мен маңыз, тарих пен аңыз бар. Осы бір әсем өнердің әр қимылын сұлулықпен үйлестіре білетін жүрген бишілеріміз өз шеберліктерін күн сайын шыңдап отырады» деп сөзін жалғай түсті.Бұл М.Әуезов атындағы Оңтүстік Қазақстан университетінде «хореография» мамандығын тәмамдаған – Нұршат Қанатқызы. Қазіргі таңда Б.Қабылұлы атындағы мәдени-шығармашылық орталығы жанындағы «Жас дәурен» халықтық ән-би ансамблінің балетмейстері болып жұмыс істейді. «Жас дәурен» би үйірмесінде 40-қа жуық оқушы бар. 6-14 жас аралығында кіші топ, одан әрі жоғары топ шәкірттерін дайындауда. Аудан бишілерінің алған асуы көп. Алайда шығар биігі әлі алда. Мәселен, І-республикалық «KERUEN» байқауынан бірінші орынды қанжығалады. Сондай-ақ биыл «Таланттар топ жарған күн» облыстық заманауи өнер байқауынан ІІІ орыннан қара көрсетсе, «BELES» республикалық байқауынан І орын иеленді. Республикалық «NOMAD» байқауынан би тобы бас жүлдені қанжығасына байлады. Атап айта берер болсақ жетістіктерінің соңы көріне қоймасы анық. Ал кәсіби биші дайындау жолында қажырлы еңбегімен көрініп жүрген Нұршат Қанатқызы «Үздік ұстаз» алғыс хатын алған.

Нұршат Қанатқызы: Би – өмір сүру символы

<a href="https://kyzylorda-news.kz/">Kyzylorda-news.kz.</a>&nbsp; Ел тәуелсіздік алғалы солтүстік өңірлердегі көштің ағыны тоқтаған емес. Әріге бет түзегендер мен нәсіп тартып ірі қалаларға қарай үдере көшкендердің есебі қисапсыз. Содан-ақ, біздегі жұмыс күшінің тапшылығы сезіледі. Жасыратыны жоқ, оңтүстік пен батыс өңірлердегі біршама отандасымыз екі қолға бір күрек таппай жүр. Аймақтардың еңбек ресурстары арасындағы осы мәселені жою үшін арнаулы мемлекеттік бағдарлама түзіліп, жүзеге асты. Олардың ішінде, біздің ауданнан солтүстікке көшкендердің де саны аз емес. Соның бірі – Рабиға Бердімұратова.&nbsp;Ә дегеннен әңгімесін әріден бастаған ол Қазалы қаласында 16 Максим Горький атындағы мектепте оқыған. Білімі жоғары, орыс тілі әдебиеті пәнінен мұғалім және Бастауыш білім беру, Балабақша тәрбиешісі және де аспаздық қысқа мерзімді курсын тәмамдаған. Екі ұлдың анасы.&nbsp;– Мен, 2014 жылы оңтүстіктен солтүстікке көш бағдарламасын білгеннен бастап, солтүстікті зерттеп келдім, аралап көріп, дегендей оның ішінде. Қостанай, Петропавл, Павлодар қалаларын барып, аралап көрдім. Барған күнде немен айналысады, күнкөріс деңгейі қалай, табиғаты, жол қатынасы қалай деген ішкі сұрақтарыма жауап таптым. Соның ішінде, ең жақсы ұнағаны Павлодар облысы болды. Ескі әдемі, табиғаты керемет қала. Оның үстіне бас қала. Астанаға жақын екен. Қазалы мен Қызылорда қаласы секілді. Мен өзім табиғатты жақсы көргендіктен қалаға жақын Ертіс өзенімен Омск трассасының бойындағы ауылға көшіп келдім. Келген бойда, мектеп жанындағы шағын орталыққа тәрбиеші болып орналастым. Бәрі жақсы әрі заңды. Бағдарлама бойынша жан басына бөлінетін квотамызды алдық. Керегімізге жараттық. Көлік жалдап барлық мүлкімізбен көшіп келдік. Екі студент баламмен, жағдайымыз жақсы. Барлық жағдайы жасалған. Жаңа үйге қоныстандық. Есік алдында үлкен егістік алқаптар бар. Қалаға дейін көкөністі егіс алқаптары. Демалыс күндері жұмысқа шығып, көкөніс теріп, қосымша ақша да табамыз. Жазғы демалыста оқушылар да егістікке жұмысқа шығып ақша табады. Адал еңбекпен таңғы 8-ден кешкі 5-ке дейін бос жүрген адам көрмейсіз, – дейді ол.&nbsp;Жерлесімізден туған жерге қайта ораласыз ба деп сұрағанымызда оның нақты шешім қабылдап, сол жаққа сіңіскенін аңғардық.&nbsp;– Қазалыға қайтамын деп емес, осында өсіп-өнемін деп келдім. Ал, болашақта балалар туған жерде тұрамын десе қарсы емеспін. Мұнда, жұмыс бабында өсуге еш кедергі жоқ. Қолыңнан келсе, құжатың сәйкес болса, қалаған жұмысыңа таныс-тамырсыз орналаса аласыз.&nbsp;Қазақстанның 85 процент жерін аралап көрген адам ретінде айтсам, бұл жақта заң бар. Мысалы, қоғамдық көліктерде 15 жасқа дейін оқушылар, көп балалы аналар, мүгедек жандар тегін жүрсе, зейнеткерлер 50 процент жеңілдікпен жүре алады. Ауылдық жерге баратын қоғамдық көліктерге студенттерге жарты билет төлейді. Сосын аурухана, емханаларында мүгедектік анықтамасы барлар кезектен тыс босатылады. Қала таза әдемі халқы өте мәдениетті.&nbsp;Көшуге ниет білдіруші қазалылық жерлестеріме қорықпаңыздар, келіңіздер дегім келеді. Үкіметтен қолдау барда көшіп келіп солтүстікті бірге дамытып, өсіп-өнуге бірге Қызылорда секілді қазақы қала қылуға шақырамын. Солтүстік те біздің жеріміз, өз еліміз. Келем деушілер болса үкіметтен бөлінген тегін жатақхана бар. 10 күнге дейін жатып, аралап ұнаған жеріңізді таңдауыңызға, қалаған жұмысыңызға орналасуға болады. Айтқандай, бұл жақта да қызылордалықтар жетерлік. Шымкент пен Түркістаннан келгендер де өте көп. Одан қалды шет елдегі қандастарымыз да бар. "Ебін тапқан екі асайды" дегендей үкіметтен берілетін көмекті алы, осындай керемет жерге келіп, кәсіп бастап кетсеңіз болады, – дейді Рабиға Серікқызы.&nbsp;Қазалылықтар жалғыз Павлодар облысында ғана емес, Қостанай, Петропавл сынды аймақтарда да бар. Сонымен қатар кейіпкеріміздің ықпал етуімен Қызылорда, Шымкент, Түркістан, Ақтау, Өзбекстан, Түрікменстаннан бірнеше отбасы көшіп келген.

Рабиға Бердімұратова: 	Солтүстікке көшуді көп уақыт зерттедім 

<a href="https://kyzylorda-news.kz/">Kyzylorda-news.kz</a>. &nbsp;Жылдағы дәстүр бойынша 8 наурыз – Халықаралық әйелдер күні қарсаңында облыс әкімі Нұрлыбек Нәлібаев «Анаға тағзым» орталығында өткен салтанатты іс-шарада аналар мен қыз-келіншектерді мерекемен құттықтады. Оған ақ жаулықты әжелер мен көпбалалы аналар, түрлі сала өкілдері, аймақ дамуына үлес қосқан кәсіпкер, ғалым, спортшы арулар қатысты.Аймақ басшысы Сыр өңірінде әйелдердің ғылым, кәсіпкерлік, креативтік, басқа да салалардағы бастамашылдығына, әсіресе, көпбалалы аналарға жан-жақты қолдау көрсетілетінін атап өтті.<blockquote>«Былтыр өңірімізге іссапармен келген Мемлекет басшысы Қасым-Жомарт Кемелұлы жаңадан ашылған «Анаға тағзым» орталығында болып, мұндағы жұмыстарға жоғары бағасын берді. Президентіміз осы орталықта бүкіл ел аналарының басын қосатын, салиқалы жиындар өткізетін тәжірибе алмасу алаңын ұйымдастыру туралы тапсырма берді. Бірнеше күн бұрын дәстүрлі «Анаға тағзым» республикалық форумын өткіздік. Шараға Президент жанындағы әйелдер істері және отбасылық-демографиялық саясат жөніндегі Ұлттық комиссия төрағасы, Мәдениет және ақпарат министрі Аида Балаева, елімізге белгілі қоғам қайраткерлері, барлық өңірлерден делегаттар қатысты. Форум аясында мәдениет пен өнердің құтты шаңырағы – «Өнер орталығы» салтанатты түрде ашылды», – деді Н.Нәлібаев.</blockquote>Кездесуде қоғам қайраткері Бибіжан Жәукебаева, 10 баланың анасы, 50 немере мен 20 шөберенің әжесі Келіс Мамырбай, еңбек ардагері, 9 немере мен 8 шөберенің әжесі Күлпаш Үкібаева, сарапшы журналист, ақпарат саласының үздігі Айткүл Шалғынбаева сөз сөйлеп, ақ тілектерін айтты. Сондай-ақ, Сыр өңірінде отбасы құндылықтарын насихаттап, отбасылық-демографиялық саясатты белсенді іске асырған асыл жандар Қызылорда облысының Құрмет грамотасымен марапатталды.Салтанатты шара көрерменге мерекелік көңіл-күй сыйлайтын концертпен жалғасты.Айта кетейік, Қызылорда облысында 141 мыңнан астам отбасы, 48 мыңнан астам көпбалалы ана бар. Олардың 17 мыңға жуығы – «Алтын алқа» мен «Күміс алқа» иегері. Статистикаға зер салсақ, өңірдің 833 531 тұрғынының 415 243-і – әйелдер. Оның 188 639-ы қалада, 223 237-сі ауылдық жерде тұрады. Мемлекеттік қызметшілердің 37,4 пайызы, медицина қызметкерлерінің 87 пайызы, педагогтердің 78,3 пайызы, бюджет саласындағы қызметкерлердің 62 пайызы – әйелдер.<img src="https://knadmin.beoblood.kz/uploads/430803840_705105125144068_7904453087351012179_n_3ef3e94e09.jpg" alt="430803840_705105125144068_7904453087351012179_n.jpg"><img src="https://knadmin.beoblood.kz/uploads/430886500_705105255144055_3591826773331910044_n_a0c9e45c02.jpg" alt="430886500_705105255144055_3591826773331910044_n.jpg">Фото: Қызылорда облысы әкімінің баспасөз қызметі

Облыс әкімі аналар мен қыз-келіншектерді мерекемен құттықтады

<a href="https://kyzylorda-news.kz/">Kyzylorda-news.kz.</a> Қай халықтың да өнері мен мәдениетіне байыпты түрде көз салсақ, сол халықтың әдемілік талғамы мен танымына, эстетикалық көзқарасына орай белгілі бір өнер түрінің дамып отырғанына көз жеткіземіз. Соның бірі – халқымыздың рухани дүниесінде орны ерекше күй өнері. Бұл өнер қазақ халқының өмір тіршілігінен айрықша орын алып, ғасырдан ғасырға, ұрпақтан ұрпаққа жалғасып келеді. Сонау ХІХ ғасырда қазақ халқының тұрмысында анағұрлым кең тараған саз аспап екі ішекті домбыра болатын. Содан бері халқымыздың асыл мұрасын, қайғысы мен қуанышын, зарын біздің дәуірімізге жеткізіп отыр. Ұлы ақын Қадыр Мырза Әлінің «Нағыз қазақ қазақ емес, нағыз қазақ – домбыра» деген сөзінің зор мәні бар. Мұның астарында қазақтың осынау киелі аспабына деген құрметі жатыр. Музыка &nbsp;– адамдардың рухани қорегі. Қазақ халқы өзінің ұлттық аспаптарын құрметтеп, ән-күйлерін тыңдап, рухани ләззат алады. Әсіресе домбыраның үні естілгенде елеңдемейтін қазақ жоқ.Бүгінде Сексеуіл кентіндегі №177 орта мектебінде "Ақмешіт" домбырашылар ансамблі Дәулеткерей мен Құрманғазы, Қазанғап пен Тәттімбет, Дина мен Сүгір сынды кемеңгер күйшілердің күйлерін елге дәріптеп жүр. «Ақмешіт» &nbsp;домбырашылар ансамблі осыдан үш жыл бұрын мектеп директоры Күлайша Тәниқызының бастамасымен «Үкілі домбыра» &nbsp;үйірмесінің жанынан құрылған болатын. Ансамбльдің аты аз ғана уақытта аудан, облысқа ғана емес, республикаға да танылып, халықаралық байқауларда үздік атанды. Домбыра өнерін балаларға үйретуді мақсат еткен жетекші Салиха Қабделованың тынымсыз еңбегінің арқасында талай шәкірттің таланты ашылды.&nbsp;Салиха Қабделова 1978 жылы 24 қыркүйекте Атырау облысы, бұрынғы Новобогат ауданы, қазіргі Исатай ауданы, Хамит Ерғалиев ауылында Қабделов Жақия мен Құрбангүлдің отбасында дүниеге келген. Ата-анасы отбасында үш ұл, төрт қыз тәрбиелеп, оларды өнерге, спортқа бейім етіп өсірді. Ауыл шаруашылығы саласының майталманы атанған әке мен мейірімді де өнегелі анадан тәлім-тәрбие алған балалары жоғары оқу орындарын бітіріп, мұнайшы, кеден қызметкері, егінші, бейнелеу өнерінің маманы, домбырашы сынды мамандық иелері атанып, абыройлы еңбек етуде.&nbsp;Ал Салиха 1986 жылы Алғадағы орта мектептің бірінші сыныбына қабылданып, 1995 жылы Чкалов орта мектебін бітіреді. Мектеп қабырғасында оқып жүргенде өнерге ынтасы артқан Салиха музыка мектебінің 5 сыныбын мұғалімі Орынғали Дауылбаевтан дәріс алып, аяқтайды. Сөйтіп мектепті ойдағыдай тәмамдаған жас қыз арман жетегінде Дина Нұрпейісова атындағы музыка колледжіне түсіп, 1999 жылы ҚР Білім беру ісінің үздігі, Құрманғазы атындағы Қазақ Ұлттық консерваториясының құрметті профессоры, еңбек ардагері Бағила Мұхтарованың домбыра класын бітіреді. Сол жылы Алматы қаласындағы Құрманғазы атындағы Қазақ Ұлттық консерваториясына "халық музыкасы" факультетіне түсіп, Қазақстанның халық әртісі, дәулескер күйші-домбырашы, композитор Қаршыға Ахмедияровтың домбыра класын тәмамдайды. Өнердің қыр-сырын жетік меңгерген жас маман Ақтөбе қаласында өткен Қазанғап атындағы конкурста лауреат атанса, Атырауда өткен Құрманғазы атындағы конкурста дипломант, М.Ерғалиұлы атындағы Орал қаласында өткен конкурста лауреат болып, мерейі арта түседі. 2003 жылы оқу бітіріп келген соң, Атырау облысында Н.Жантөрин атындағы филармонияда "Нарын сазы" атты ұлт-аспаптар оркестрінде концертмейстер қызметінде болса, содан кейін Д.Нұрпейісова атындағы академияда домбыра класынан студенттерге дәріс береді. Осы жылдары өнер шыңынан көрінген Салиха филармонияның 40 жылдығына орай "40 жылдық" медалімен де марапатталады.&nbsp;Осыдан он бес жыл бұрын Салиха сексеуілдік Сырымжан Ахметовпен табысып, жарасым тапты. Өмірлік серігі бүгінде "Қамқор локомотив" депосында мастер болып аянбай еңбек етуде. Өнер мен отбасын қатар алып жүрген Салиха Жақияқызы жолдасы Сырымжан Арыстанұлымен бірге Назым, Назерке, Сауран, Жан, Нұрасыл есімді балаларын жан-жақты білімді, ұлтжанды, өнерлі етіп тәрбиелеуде.&nbsp;Бауыржан Момышұлы: "Мен қолына домбыра ұстаған қазақтың қара баласын көрсем қуанамын. Сол баланың бойынан имандылық, тазалық, қазақ өнеріне, соның ішінде қастерлі домбыраға деген махаббатын сеземін" дегендей, сахнаға шыққан өнерпаздарды көргенде көз сүйсінеді. Үстінде ұлттық киім, қолында домбыра. Қандай керемет! Бүгінгі таңда "Үкілі домбыра" үйірмесіне 80-ге жуық оқушы қатысуда. "Ақмешіт" ансамблі құрамында 40-қа жуық оқушы үлкен, орта, кіші топта дәріс алуда. Жас домбырашылар былтыр Астана қаласында өткен "Дарынды оқушы – ұлт болашағы" атты республикалық форумға қатысып, жүлделі І дәрежелі диплом мен "Үміт артар дарынды оқушы" атты төсбелгісін иеленсе, Алматыда өткен "Серпер" республикалық фестиваль-байқауында гран-при иегері атанды.Қызылорда қаласында өткен "Қазақстан үміті" республикалық шығармашылық конкурсында І дәрежелі дипломмен марапатталды. Осы конкурста өнерімен көпшілікті тәнті еткен өрендеріміз Алматы қаласында өтетін "Жеті өнер" VІІ халықаралық шығармашылық фестивалі конкурсына қатысуға жолдама алды. Сонымен қатар Астана қаласында өткен ХV халықаралық "Ақ көгершін" балалар шығармашылығы фестиваль-байқауында ІІ дәрежелі лауреаты дипломын еншіледі. Аз ғана уақытта білімді де білікті ұстаздан тәлім алып, осындай биіктерден көрініп, аудан мерейін асырып жүрген Рустам Жолдыбай, Қадыржан Амедулла, Әділжан Көпберген, Гүлсезім Қазиева, Нұрдәулет Тәни, Нұрбақыт Тәниева, Инабат Қайроллаева сынды және де басқа өрендеріміздің еңбегі қандай мақтауға да лайықты. Осы тұрғыда осы мектептің мұғалімі Венере Аймолдаева:– Ансамбльдің бағыт-бағдары мен мақсаты зор. Мектеп қабырғасында күй күмбірін естісеңіз қуанып қана емес, ризашылық сезімге бөленесіз. Домбыраның сабындағы сырғыған кіп-кішкентай саусақтар күй құдіретін мойындатпай қоймайды. Әрине, "Жақсының жақсылығын айт, нұры тасысын" дегендей, мектебіміздің басшысы Күләйша апайымыз бен Салиха ұстазға ата-аналар атынан өнерге сусындап өсіп жатқан жас өнерпаздардың жетістіктері үшін ерекше ықыласымыз бен алғысымызды білдіреміз. Балаларымыз "жүзден жүйрік, мыңнан тұлпар" атанып, қазағымның атын шет елге танытатын нағыз күйшілер атансын деген тілегіміз орындалсын, – дейді ағынан жарыла."Арманыңыз қандай?" деген сұрағымызға Салиха Жақияқызы:&nbsp;– Адамда арман таусылмаған ғой. Қарапайым жұрт күйді тыңдап отырып, оның көңілді не қайғылы екенін ажырата алмайтындығына талай рет куә болдым. Сондықтан қазір қазаққа күйді түсіндіруге жұмыс жасау керек деп ойлаймын. Сонда ғана бабадан қалған әуез құлағымызға сіңісті, жүрегімізге жұғысты болады. Келешекте осы істі тындырсам, өнердің биігіне шықсам деймін. Алдағы уақытта осындай өнерге жақын балалар үшін кенттен бір өнер мектебі ашылса деген тілегім бар. Ол бір құптарлық іс болар еді, – деді ол тебіреніс құшағында.Байқағанымыздай, бұл мектепте үйірмеге қатысушыларды пән мұғалімдері ең алдымен мәдениеттілік пен &nbsp;эстетикалық тәрбиеге және тәртіпке үйретіп қана қоймай, әр баланың бейімділігіне байланысты қажетті қағидалар сіңіретіні аңғарылады. Балалар – біздің болашағымыз. Сондықтан олардың жан-жақты тұлға ретінде қалыптасуы үшін біліммен қатар өнер және спорт үйірмелеріне қатысуын қамтамасыз ету әрбір ата-ананың борышы әрі парызы екендігі ақиқат.

Сексеуілдік жас домбырашылар республикаға танылды

<a href="https://kyzylorda-news.kz/">Kyzylorda-news.kz</a>. Бүгін ҚР Премьер-министрі Олжас Бектеновтің төрағалығымен өткен Үкімет отырысында инвестицияларды қолдау және ынталандыру шараларының тиімділігі, қалаларды абаттандыру, көгалдандыру мәселелері қаралды.&nbsp;Сонымен қатар, күн тәртібінен тыс Алматы қаласындағы жер сілкінісіне қатысты Төтенше жағдайлар министрі Шыңғыс Әрінов қабылданған шаралар туралы баяндады. Бұл туралы Қызылорда облысы әкімінің баспасөз қызметі хабарлады.ҚР Премьер-министрінің орынбасары – Ұлттық экономика министрі Нұрлан Байбазаров Үкіметтің алдына инвестиция тарту бойынша ауқымды міндеттер қойылғанын баса айтты. Инвестициялық жобалардың бірыңғай пулы аясында биыл республикада 2,3 трлн теңгенің 234 жобасын жүзеге асыру жоспарланған.Мәжілістен кейін облыс әкімі Нұрлыбек Нәлібаев осы бағыттағы жұмыстарды нақтылады.<blockquote>«Мемлекет басшысы Үкіметтің кеңейтілген отырысында жаңа инвестициялық кезеңді бастауды тапсырған болатын. Осыған байланысты, өңірдегі іске асырылу сатысындағы және алдағы уақытта жүзеге асырылатын жобаларды сүйемелдеп, туындаған мәселелерді шешу, кедергілерді жою үшін нақты шаралар қабылдау қажет. Биыл облысқа 517,5 млрд. теңге инвестиция тарту индикаторы бекітілді. Қаңтар айының қорытындысымен қаржыландырудың барлық көздерінен 40,2 млрд. теңге инвестиция тартылып, өткен жылғы сәйкес кезеңмен салыстырғанда көрсеткіш 32,4%-ға өсті», - деді аймақ басшысы.</blockquote>Айта кетейік, өңірде аумағы 525 гектар 6 индустриялық аймақ құрылып, оған 9,7 млрд. теңгеге инженерлік инфрақұрылым жүйелері тартылған. Бүгінде осы аймақтарда 30 жоба іске асуда. Бұдан бөлек, 22 жобаның құрылысы жүргізілуде. Дегенмен, 4 жоба уақытша тоқтаған, 5 жобаның жер телімдерін қайтару қажет. Ал, индустриялық аймақтар бойынша табысталған 525 гектар жердің қазір 206 гектары ғана игерілген. Мемлекет басшысы жарты жылдың нәтижесі бойынша Инвестициялық штабтың жұмысын қорытындылап, әрбір министр мен әкімнің осы бағытта атқарған жұмысына нақты баға береді. Нұрлыбек Машбекұлы осы салаға жауапты орынбасары Ардақ Зебешевке инвесторлар жобаларына заң аясында барынша қолдау көрсетуді, нақты нәтиже беретін жұмыстарды қолға алуды тапсырды.&nbsp;

Қалаларды абаттандыру, көгалдандыру мәселелері қаралды

<a href="https://kyzylorda-news.kz/">Kyzylorda-news.kz</a>. Қызылордада «Анаға тағзым» орталағында республикалық Аналар кеңесінің төрағасы Нәзипа Шанаи Қызылорда облыстық ҚХА жанындағы Аналар кеңесінің өкілдерімен кездесті.Кездесуге облыстық қоғамдық даму басқармасының «Қоғамдық келісім» КММ директоры Бақытжан Камалов, облыстық қоғамдық даму басқармасының этносаралық қатынастар мәселелері жөніндегі бөлімінің басшысы Айгерім Алиева, Атырау, Ақтөбе, Батыс Қазақстан, Қарағанды, Жамбыл &nbsp;өңірлерінің Аналар кеңесінің төрағалары мен мүшелері қатысты.Кездесуде Нәзипа Ыдырысқызы отбасылық құндылықтар, бүгінгі күннің өзекті мәселелері вейп, құмар ойынға жастардың құмарлығы, Аналар күні мен Отбасы күндерін атап өтуге ерекше мән беру, ажырасудың алдын-алу, «Саналы ата-ана», көпбалалы аналар мәселелері, аналарды мәдениеттендіру, бала тәрбиесі мен білімі, ұрпақ жалғастыруға жас отбасыларды дайындау және түрлі маңызды жобалар сөз болды. Қызылорда облыстық ҚХА жанындағы Аналар кеңесінің жүргізіліп отырған жұмысын және жобаларды, атап айтсақ “Сарбаздар анасы”, Аналар кеңесі мен Әкелер одағының бірлескен әлеуметтік жобалары, Отбасы мектебі жобаларын ҚХА республикалық сессиясында таныстыру, тәжірибе ретінде тарату ұсынылды. Кеңестің ортақ негізгі бағыттары бойынша жұмысты қарқынды түрде жүргізу тапсырылды.Сонымен бірге, Қызылорда облысы бойынша Аналар кеңесінің жүргізіп жатырған жұмыстарына оң баға беріліп, әскери органдармен бірлескен іс-шараларды одан әрі жандандырып, жалғастыру керектігі айтылды. Алдағы сәуір айында өтетін ҚХА сессиясында Аналар тарапынан көтерілетін маңызды мәселерді де талқыға салды. Бағыт-бағдар берді.<blockquote>Н. Шанаи: «Аналар кеңесінің миссиясы – аналардың мәртебесін көтеріп, отбасы институтын дұрыс қалыптастыру. Әр өңірдегі аналардың жағдайлары әртүрлі. Бірақ барлық аналарды біріктіретін ортақ проблемалар бар. Осы проблемалармен күресу, алдын-алу бағытында барлық өңірлерде ауқымды жұмыстар жүріп жатыр»,- дей келе, әр облыстағы Аналар кеңестерінің жеткен жетістіктер мен ерекшеліктеріне тоқталып өтті.</blockquote>Осы ретте Қызылорда облыстық ҚХА жанындағы Аналар кеңесінің төрағасы Айгүл Мұсабаева мен Батыс Қазақстан облыстық ҚХА жанындағы Аналар кеңесінің төрағасы, &nbsp;п. ғ. д, профессор &nbsp;Шалқыма Құрманалина ынтымақтастық меморандумына қой қойды. Меморандум аясында екі жақ ақпараттық-насихаттық жұмыстар, мәдени-рухани мұра, салт-дәстүрлерді сақтауға, жалпыұлттық бірлік пен қоғамдық келісімді насихаттауға, өзара тәжірибе алмаса отырып мазмұнды жұмыстарды бірлесе атқаруға мүдделі болды.Өз кезегінде Батыс Қазақстан облыстық ҚХА жанындағы Аналар кеңесінің төрағасы, &nbsp;п. ғ. д, профессор &nbsp;Шалқыма Құрманалина өңіріндегі атқарылған жұмыстарға тоқталып, Аналар кеңесі – бұл ұлттық тәрбие кеңесі екендігін алға тартты.<img src="https://knadmin.beoblood.kz/uploads/MW_6_A1492_11baf1bc6d.JPG" alt="MW6A1492.JPG"><img src="https://knadmin.beoblood.kz/uploads/MW_6_A1545_d24cdbb2c6.jpg" alt="MW6A1545.jpg"> &nbsp;

Республикалық Аналар кеңесінің төрағасы Сыр аналарымен кездесті

Kyzylorda-news.kz. &nbsp;Бүгін облыс әкімі Нұрлыбек Нәлібаев Жалағаш ауданына жұмыс сапарымен барып, «Таң» ауылдық округінің әлеуметтік-экономикалық дамуымен танысты.Алдымен аймақ басшысы ауылға кіреберіс жолдың бойындағы жобаларды көрді. Елді мекенге «Батыс Еуропа – Батыс Қытай» автодәлізінен кіреберіске дейін ағаш отырғызылмақ. «Таң – Жаңақоныс», «Таң – Самұрат» автомобиль жолдары мен «Бозарық» каналының көпірін қайта жаңғырту жұмыстары пысықталды. Бұл туралы Қызылорда облысы әкімінің баспасөз қызметі хабарлады.Айта кетейік, «Таң LTD» ЖШС ауданның әлеуметтік-экономикалық дамуына үлес қосып, бірқатар маңызды бастамаларды іске асыруда. Ауыл тұрғындарына арналған екі пәтерлік 10 тұрғын үйдің құрылысы жүргізілетін болады. Сондай-ақ, кәсіпорын 3 өндірістік базаны іске қосып, жаңа жұмыс орындарын ашуды жоспарлауда. Қазір шаруа қожалығының иелігінде күріш ақтау зауыты мен ет өңдеу цехы бар. Күріш ақтау зауыты 5 жыл бұрын іске қосылған, тәулігіне 100 тонна өнім өңдеуге қауқарлы, мұнда 15 адам тұрақты жұмыспен қамтылған. Ал 2019 жылы ауылдық округке қарасты «Жаңақоныс» елді мекенінде «Агролидер Таң» ЖШС-ның ет өңдеу цехы ашылған. Кәсіпорын тәулігіне 0,5 тонна ет өндіріп, 15 түрлі (түшпара, манты, қазы, әсіп, бір асым ет және т.б.) өнім шығаруда. Мұнда 8 адам жұмыс істейді.Мұнан әрі облыс әкімі «Таң» ауылындағы күрделі жөндеуден өткен әлеуметтік нысандардың эскиздік жобаларымен танысты.Серіктестіктің демеушілігімен мұнда балалар ойын алаңы мен кіші футбол алаңы салынып, жарықшамдар орнатылды. Сондай-ақ, Ұлы Отан соғысында қаза тапқан боздақтардың құрметіне «Тағзым алаңы» салынып, қазір жаңа спорт кешенінің құрылысы жүргізілуде. Өткен жылы бір ғасыр бұрын салынған «Әбжәли» мешітінің ғимараты жөнделді.Сапар соңында облыс әкімі ауылдағы жарықтандыруды қажет ететін көшелерді аралады. Жұмыстарды тиянақты орындап, нысандарды мерзімінде пайдалануға беруді тапсырды.<img src="https://knadmin.beoblood.kz/uploads/429673745_704059811915266_1712563867501880980_n_112fd7fc9a.jpg" alt="429673745_704059811915266_1712563867501880980_n.jpg">Фото: Қызылорда облысы әкімінің баспасөз қызметі

Облыс әкімі «Таң» ауылындағы жобаларымен танысты

<a href="https://kyzylorda-news.kz/">Kyzylorda-news.kz.</a> Отбасылық демалыстың бір түрі – киноға бару. Себебі ол ересектерге де, балаларға&nbsp; да қызықты. Мәселен, балаңызды мультфильм көруге апардыңыз делік. Оны тек апарып ғана қоймайсыз, кинодан шыққан соң баланың ойын сұрап, талқылайсыз. Жарайды, киноға баруды түсіндік. Ал Шиеліде кинотеатр құрылысы бой көтергені рас па? Осы сауалға жауап тапқыңыз келсе, мақаланы мұқият оқып шығыңыз.Ауданда ашылғалы жатқан «Aizhuldyz cinema» кинотеатры 2023 жылдың тамыз айында құрылысын бастап кетті. Құрылыс нысанын жалға алған кәсіпкер Бағлан Сейтмұратов жастардың кино көруіне демалыс орын ашып беруді басты мақсат еткен.Кәсіпкердің айтуынша, кәсіпті өз қаражатымен бастаған. Мемлекеттік грант пен несиелерге өтініш берсе де, оның өтініші кері қайтарылып, қаржылай ақша алмағандықтан өзі тәуекел етіп бастап кетті. Құрылыс жаңа жыл алдында тоқтап, жылдың басы қайта қолға алуды жөн санады. Расында&nbsp; аудан жастарының көбісі дерлік Қызылордаға барып кино көреді. Неге өзіміздің ауданда ашылмасқа деген ой келеді? Бұл пайымыма ауданның жас ақыны Елдар Әмірхан былай жауап берді:<blockquote>–&nbsp;Ауданға ауадай кинотеатр қажет. Киноға тек жастар ғана емес, егде жастағы ересек кісілер, отбасылар барғанын&nbsp; көреміз. Сол себепті облыс орталығына сабылмай, өз өңірімізде кинотеатрдың ашылғаны дұрыс. Біріншіден, &nbsp;халықтың қалтасынан шығатын&nbsp; қаржыны жеңілдетеді. Екіншіден, ауданның дамуына үлес қосар еді. Заман талабына сай болса аудан жұртшылығы қалаға барып әуреленбейтін еді, – деді.</blockquote>Айта кетейік, кинотеатр 128 адамға арналған. 10-15 адамды жұмысқа қабылдайды.&nbsp;Фото:freepik.com

Шиеліде кинотеатр ашылмақ

Kyzylorda-news.kz. &nbsp;Белгілі блогер&nbsp;Ырысбала армиясы 97-ші үйдің кілтін қызылордалық отбасыға табыстады. &nbsp;Бұл туралы өзі инстаграм әлеуметтік желідегі <a href="https://www.instagram.com/irisbala__ikrambai_official/">irisbala__ikrambai_official</a>&nbsp; парақшасында &nbsp;&nbsp;4 бөлмелі үйді таныстырып шықты.<blockquote>&nbsp; &nbsp; &nbsp; – Қайырлы күн Ырысты армия! Жеке мүддем үшін ешкімнің мазасын алу, тілге тиек етіп сөз етуге хақым жоқ мендегі уайым 8 баланың тағдыры және соның ішінде қиындау келетін қыздардың тағдыры. Әкесі мен анасын алған екен Алла сынаққа тек көнеді, енді тағдырдан сол тағдыр жолында кездесетін адамдардан теперіш көрмесінші. Айналайын сөз қадірін түсінетін Сыр елі бұл балалар сіздерге Алладан аманат, жетім көрсең жебей жүр дейді қазақ. Сәл ғана демеп жіберсек ертең-ақ аяққа тұрып көшке ілесіп кетеді. Балаларға бақ болған баспана болсын! Жақсыны көрмекке!,– деді.</blockquote>Фото: irisbala_ikrambai_official

Ырысбала Икрамбай 97-ші баспана кілтін қызылордалық балаларға табыстады

Қазалы ауданы кие мен қасиетке тұнған өлке десек қателеспейміз. Оның бабалардан қалған бай мұраға толы қойнауы құт-берекемен қатталған. Бұл тарихи мекенде талай талантты жанның кіндік қаны тамған. Солардың бірі – Қазақстан Журналистер одағының мүшесі, Қаратал ауданының Құрметті азаматы Қараша Қараман. Жетпістің бесеуіне келіп, ақсақалдықты абыроймен арқалап жүрген азамат бірнеше кітаптың авторы.Туған жері мен өсіп-өнген елін тең көрген қаламгердің Жанқожа батыр, Жалаңтөс баһадүр, Қарасақал Ерімбет шайыр мен Ескелді, Балпық, Жолбарыс, Қарымбай әулие, өнер саңлақтары Қанабек пен Бикен, өзге де халық ақындары мен жазушыларының өмір өнегесі туралы жазбалары оқырман жүрегінен жол тапқан тартымды туындылар.Ол өлке тарихын тануға жәрдемдесетін «Қаратал күндіз – күміс, түнде – алтын», «Ел мен жер», Тәттібайұлы Қарымбай туралы «Ақылмен хан-төрені бағындырған», «Ақиық азамат» кітабы мен Сыр шайыры «Қарасақал Ерімбет» монографиясы және «Қасиетті Қаратал» тарихи-танымдық кітабының авторы.– Сіздің қасиетті Қазалы топырағының тумасы екеніңізді жұртшылық білгенімен, балалық шағыңызбен етене таныс емес. Туған жер, онда өткен өмір жолыңыз туралы өз аузыңыздан естісек...– Иә, біздер арынды, жерлес ақынымыз Жарасхан Әбдірашев айтқандай, соғыстан соңғы ұрпақтың өкіліміз. Екінші дүниежүзілік соғыс аяқталып, ел енді-енді есін жинап жатқан шақта 1948 жылдың қарашасында Қазалы стансасына кіре берісте орналасқан Алтай ауылында теміржолшылар отбасында дүниеге келіппін. Әкем де, анам да теміржолда еңбек етті.Орта мектепті 1966 жылдың жазында бітірдім. Тарих пен әдебиетке, жазуға, әжептеуір бейімім болды. Отбасылық жағдайыма байланысты сол жылы оқуға бара алмадым. Амалсыздан іргедегі Қазалы локомотив депосына екінші разрядты тепловоз жөндейтін слесарь болып жұмысқа орналастым. 1967-1969 жылдар КСРО Қарулы күштер қатарында екі жылдық азаматтық борышымды өтедім. Елге оралған соң еңбек жолымды қайта жалғастырдым.Журналист қазіргі тілмен айтқанда өмір барлаушысы. Ал журналистика өмір мектебі. Бұл бағаны берген қазіргі қазақ журналистикасының корифейлері қаламы жүйрік журналист замандасымыз, ашылмаған аралдарды ашқан, көп танымдық кітаптардың авторы, «Егемен Қазақстанның» редакторы болған Жанболат Ауыпбаев пен Қали Сәрсенбаев. Журналист негізі мамандық. Бұл мамандықты меңгеру екінің бірінің қолынан келе бермейтінін айтқан орынды. Өзім журналист болған соң мақтап отырғаным жоқ. Өмірден көріп, түйгенім. Адамды журналистикаға итермелейтін ең біріншіден, білім, ал ол білім кітаптан алынды. Мен оқушы кезден мектеп кітапханасы мен теміржол клубы кітапханасының тұрақты оқырманы болдым. Шетел классиктерінің романдарын, қазақ әдебиеті өкілдерінің туындыларын оқып, өз ортамызда талқылайтын едік. Жора-жолдастар арасында әңгіме қылатынбыз. Осының барлығы әсер кеткен болуы керек.Екіншіден, №5 кварталда Ерқосай Қабылов деген ағамыз болатын. Мектеп қабырғасында жүргенінде ақындық қабілеті байқалып, журналист болуды армандаған. Бірақ Ташкентте теміржол институтында оқып, инженер болды. Вагон депосында бастықтың орынбасары, бас инженер қызметтерін атқарды. Сол кісінің інісі Арғын Қабыловпен бір сыныпта оқыдық. Қазір Алматыда тұрады. Ағасының жинаған кітаптарын біртіндеп оқуға бізге беретін. Ерқосай ағамыздың кітапханасындағы академик, профессор, әдебиетші Қажым Жұмалиевтің әдебиет теориясына қатысты оқулықтарын оқып, әрі қарай терең бойладық. Абайдың, Махамбеттің, шығармаларына қалай талдау жасаған солардың бәрі бізге түрткі жасады.Тағы бір оқиға есіме түсіп отыр. Бізден бір сынып жоғары оқыған оқу озаттары қос азаматты Есқара Көмекбаев пен Шайхслам Серікбаев мектебіміздегі спорт пәнінің өз дәрежесіндегі жүрмейтіндігін, спортқа арналған құрал-жабдықтардың жоқтығын сынап, республикалық «Спорт» газетіне бірлесіп, екеуі мақала шығарған. Мектебімізде кәдімгідей мұғалімдер, ата-аналар, оқушылар шу ете қалды. Содан аудандық білім бөлімінен, аудандық атқару комитетінен комиссия келіп, мақаланың түрткі болуымен спорт алаңы салынып, құрал-жабдықтар алынды. Сол кезде менің көкейіме: «Журналист осындай кемшілікті көтеріп, жария етсе, биліктің назарын аударса, оң шешімін тауып, елдің алғысын арқалайды екен ғой деген» ой келіп, бүйрегім бұрған еді.– Мақсатқа жете алдыңыз ба? Бала кезіңіздегі армандарыңыз қандай болған еді?– Бала кезімізде көркем шығармаларды, тарихи танымдық, қиял-ғажайып дүниелерді оқыдық. Бала арманы әр жаққа ала қашады ғой. Бір жолы ұшқыш та болғың келеді. Көк аспанда көсіліп жүретін. Кен-байлықтарын кешіп жүретін геолог та болғымыз келді. Гуманитарлық пәнге әуестігім басым болған соң, аға буынға еліктеп, қалам тербесек, елге пайдамыз тисе деп армандадық. Әзілхан Нұршайықов айтқандай, журналист болуды қалап соның ізіне түсіп, өз мақсатыма жеткендеймін. Бір адамдай еңбек етіп, тер төктім деп айтуға толық қақылымын деп ойлаймын. Осы кезге дейін шыққан кітаптарымның жартысы Қаратал ауданына арналса, жартысы Қазалыма арналады.–Сізді қазіргі қоғамдағы жайттардан не алаңдатады?– Біз аға буын өкілдерінің санатына жатамыз. Бір қарағанда, жасарымызды жасап, асарымызды асаған адамбыз. Бірақ бұл қасиет қарақан басын ойлаған адамға ғана жарасады. Қазір алаңдайтын дүние көп. Мәселен, мемлекеттігіміздің тірегі болып саналатын ана тіліміздің жай-күйі мен болашақ тағдыры. Қазір жасыратыны жоқ, қалалық жердегі жастар өзге тілде сөйлеседі. Кейбір азамат қазақ сөздерінің арасына орысшаны қойыртпақ қылып қосып отырады. Жас ұрпақ газет-журнал, кітаптан гөрі әлеуметтік желіге таңылып қалғандықтан сөздік қоры азайып кетті. Тәуелсіздіктің белгісі – тіл мен дінде жатқандығын көбісі сезіне бермейді. Жеңіл қарайды, жауапсыздық танытады. Ана тіліміздің, бай тіліміздің әрі қарай өркендеп, өрістеп, қоғамдық ортада өз мәнінде қолданылуына алаңдаулымын.Тағы бір алаңдататыны, ел арасында белең алып бара жатқан рушылдық. Руын білген жақсы, рушылдыққа салынған дұрыс емес. Бұл өсуді емес, өшуді көрсетеді. Осы төңіректе терең ойлану керек. Жақсыдан үйрену, жаманан жиренуге дағдылануымыз тиіс. Атадан өсиет, анадан қасиет деген қағиданы әрбір шаңырақ, отбасы басшылыққа алғаны абзал.Артық ақыл айтты деп қалың оқырман ренжімес.&nbsp;Жастардың «жұмыс жоқ, беретін ақшасы төмен» деп ата-ана мойнына масыл болуы да артты. Жұмыстың үлкен-кішісі жоқ. Адамды абыройға бөлейтін еңбек. Адал тапқан ақшаның барлығы берекелі. Әр ауданның әрбір тұрғыны көктем сайын саялы ағаш отырғызса, оны күтіп-баптаса, туған жеріміз одан әрі гүлденер еді.– Қарапайымдылықты қалай сақтап қалуға болады?– Қарапайымдылыққа ешнәрсе жетпейді. Отбасында, еңбек ұжымында, ағайын-туыс, дос-жаранның ортасында лауазымың жоғары, табысың шаш-етектен болса да, қазынаң ақшаға толы болса да кішілікті, үлкендікті сақтай білу керек. Байлық айтып бөсіп кетуге болмайды. Менің түсінігімде ең басты байлық рухани байлық.«Азамат түзде мырза, үйде құл» деп айтады. Бұның ұғымы бай ма, батыр ма, бағлан ба түзде мырзалық жасаған жөн. Ал отбасыға келгенде барлық шаруаны әйел-бала-шағаға қалдырмай, ауыртпалықты теңдей көтеруі керек. Қазір қабырғаға шеге қаға алмайтындар көп.–&nbsp;Жерлестеріңізге айтар жылы лебізіңіз...– Иә, күні бүгінге дейін туған жерден қол үзген жоқпыз. «Туған жердей жер болмас, туған жердей ел болмас» дейді ғой. Өмір ағысы, қызметтің барысымен жырақта жүргеніміз рас. Қазалы өсіп-өркендеп, қанатын кеңге жаюда. Аудан орталығы мен Қазалы қаласының аралығында сәнді үйлер бой көтеріп, жақын арада қосылатын түрі бар.«Елге ел қосылса, құт» деген. Қазалылық ағайындар тамырын тереңге жіберіп жатыр. Тарихи, мәдени орындардың, әлеуметтік нысандардың, сәнді үйлер саны көбейе берсін. Жұмыс орындары кеңінен ашылып, әр отбасы жағдайы жақсы болуына тілектеспін. Осы 75 жылдығыма орай «Қара қалам баптаған» деген кітабымның соңғы сөзінде «Мен үшін Сырдың Қазалысы мен Жетісудың Қараталы домбыраның қос ішегі іспеттес. Бір ұққаным тарихы тереңде жатқан қос өлкенің төл перзенті тел ұлы болу екінің бірінің пешенесіне жазылмаса керек. Ал өз басым нақ осындай өмір мектебінен сүрінбей, ширығып, серпіліп, құлшынып, жігерленіп, өткенімді азаматтық, перзенттік борышымды, адамдық парызымды адал атқарғанымды мақтан тұтамын. Сіздерге де соны тілеймін қазалылық ағайындар» деп жазыппын.Туған топырақтың гүлденуіне, ауыл-аймақтың ажарлануына, ел тұрмысының жақсаруына, сан салалы аудан экономикасының қарыштап ілгерілеуіне, елге тұтқа ер азаматтар мен кәсіпкерлердің ат үстінен түспеуіне бек тілектеспін.Сайып келгенде, Қазалының әрбір тұрғыны, азаматы Қазалы деген атты жоғары ұстап, оған кір келтірмеудің жолдарын қарастырса, ең бастысы, сол болар еді.– Әңгімеңізге рақмет аға. Шығармашылық табыс тілеймін.

Қазақстан және Қызылорда облысының жаңалықтары: Мәдениет