<a href="https://kyzylorda-news.kz/">Kyzylorda-news.kz</a> &nbsp; Қызылорда қаласындағы "Абай аллеясында" Абай күніне орай «Мақсұтым – тіл ұстартып, өнер шашпақ...» атты облыстық байқаудың жеңімпаздарын марапаттауға арналған іс-шара өтті.Облыс әкімінің орынбасары Шахмардан Байманов қатысушыларды атаулы күнмен құттықтады.«Біз Абай шығармаларынан елдің алға жылжуына, өсіп-өркендеуіне шын тілеулес болуды үйрендік. Өркендеудің негізі білім мен ғылымда екені анық. Абай қазақтың дамылсыз оқып-үйренгенін қалады.Бұл тұжырымдар қазір де өзекті. Тіпті бұрынғыдан да зор маңызға ие. Себебі, ХХІ ғасырдағы ғылымның мақсаты - биікке ұмтылу, алысқа құлаш сермеу. Ал, біздің міндетіміз – осы ілгері көшке ілесіп қана қоймай, алдыңғы қатарда болу» - деді Шахмардан Асқарұлы.Бұл байқауға Қызылорда қаласы мен аудандардан көркемсөз оқу және ән айту шеберлігін қатар меңгерген 16-35 жас аралығындағы талапкерлер қатысқан.Олар Абай шығармаларын мәнерлеп жатқа оқу, «Абай жолы» романынан үзіндіні көркем шеберлікпен жатқа айту, Абай әндерін орындау бойынша сынға түскен болатын.Байқау жүлдегерлеріне арнайы Алғыс хат, бағалы сыйлықтар табысталды.Айта кету керек, аймақта Абай күнін атап өтудің өңірлік іс-шаралар жоспары әзірленіп, 10-20 тамыз аралығында 200-ден астам танымдық шара ұйымдастырылады.Фото: Облыс әкімдігінің баспасөз қызметі

Абай күні: Облыс көлемінде 200-ден астам іс-шара өтті

<a href="https://kyzylorda-news.kz/">Kyzylorda-news.kz</a> Ұлы қазақстандық ақын және ойшыл Абай Құнанбайұлының туған күніне орай Yandex Qazaqstan Іздеудің басты бетінде оның дәйексөздері бар портретін орналастырды, сондай-ақ Карталардың көмегімен Республикада классиктің атымен қандай объектілер аталғанын және олардың қанша екенін<a href="https://massaget.kz/basty-zhaalytar-438/113696/"> анықтады.</a>9-10 тамыз аралығында қолданушылар Іздеудің басты бетінде ақынның бейнесін көре алады. Егер суретті бассаңыз, сервис Абайдың қазақ және орыс тілдерінде дәйексөздерінің бірін көрсетеді. Осылайша, сізге ақынның дана өсиеттерін қайта оқуға мүмкін болады немесе, мысалы, өзіңіз үшін оның шығармашылығынан жаңа нәрсе таба аласыз.Классиктің дәйексөздерін көру үшін, қолданушылар Іздеуде «Абайдың даналығы» сұрауын енгізе алады. Егер сіз көбірек мәлімдемелерді оқығыңыз келсе, «Қосымша дәйексөз» батырмасын басу жеткілікті – және сервис ақынның басқа нақыл сөзін көрсетеді.Абайды үлкен мұра қалдырған Қазақстанның ағарту реформаторы деп санайды. Яндекс Картаның мәліметінше, елде ойшылдың құрметіне 100-ге жуық білім беру және мәдени мекемелер, соның ішінде мектептер мен гимназиялар, жоғары оқу орындары мен колледждер, мұражайлар, театрлар мен кітапханалар аталған. Қазақстанның түрлі қалаларында ақынға 38 ескерткіш орнатылып, оның есімімен 1500-ден астам көше, тұйық көшелер мен даңғылдар аталуда. Сондай-ақ, елде Абайдың құрметіне аталған 8-ден астам табиғи нысандар, соның ішінде шатқалдар, шыңдар, мұздықтар мен асулар бар.Yandex Qazaqstan — машиналық оқыту мен нейрожелілер негізінде өнімдер мен қызметтерді жасайтын технологиялық компания. Компания қолданушылардың өмірін жақсартуға және Қазақстанда цифрлық ортаны дамытуға бағытталған инновациялық технологияларды әзірлеумен және енгізумен айналысады. Елде іздеу, қалалық, бұлтты және ойын-сауық қызметтері қазірдің өзінде жұмыс істейді, сонымен қатар компания білім беру және әлеуметтік жобаларды дамытуда.Фото: Yandex Qazaqstan

Абай күніне орай Yandex Qazaqstan Іздеуде ақынның дәйексөздерін орналастырды

<a href="https://kyzylorda-news.kz/">Kyzylorda-news.kz</a> &nbsp;Облыс әкімі Нұрлыбек Нәлібаевтың жастар жұмыссыздығын азайту және оларды әлеуметтендіру тапсырмасына сәйкес, облыс әкімдігінің ұйымдастыруымен «Мүмкіндіктер алаңы» іс-шарасы өтті.Халықаралық жастар күні қарсаңында «Жастармен бірге» ұлттық онкүндігі аясында ұйымдастырылған іс-шарада облыс әкімінің орынбасары Шахмардан Байманов аталған бастаманың маңыздылығын атап өтті.Сондай-ақ, аймақта жастарды жан-жақты қолдауға бағытталған жұмыстар мен жаңа жобалар жалғасатынын жеткізді.Іс-шарада Қызылорда қалалық «Мансап» орталығы, «AMANAT» партиясының, «Атамекен» ұлттық кәсіпкерлер палатасының, «Аграрлық несие корпорациясы», «Отбасы банк», «Halyk bank» АҚ Қызылорда облыстық филиалдарының, Жастар денсаулығы орталығының мамандары өз салалары бойынша бағыт-бағдар, кеңес берді.Бос жұмыс орындары жәрмеңкесіне 40-қа жуық жергілікті жұмыс беруші мекеме өкілдері, 3 жоғары оқу орны мен 10 кәсіптік-техникалық білім беру ұйымының қабылдау комиссиялары қатысты.Жастарға 36 мекемеден 222 бос жұмыс орны ұсынылды. Жәрмеңкеге 136 жұмыс іздеуші қатысып, 48-і жолдама алды.Іс-шара соңындағы спорттық сайыстар мен мерекелік концертте жастар белсенділік танытты.Айта кету керек, өңірде аймақ басшысының тікелей қолдауымен жастарды әлеуметтік қолдауға бағытталған жобалар жүзеге асырылып келеді.Облыста алғаш рет «Сыр жастары» өңірлік тұрғын үй бағдарламасы қабылданып, 60 жас отбасы жаңа пәтер иеленсе, 40 отбасы жыл соңына дейін қоныс тойын тойлайды деп күтілуде.Бұдан бөлек, жылдағы дәстүр бойынша мектеп бітіруші түлектерге2024-2025 оқу жылына облыс әкімінің 100 оқу гранты тағайындалды.Мемлекеттік қаржылық қолдау бағдарламасы арқылы несие портфелі 3,7 млрд. теңге болатын жас кәсіпкерлердің 130 жобасы субсидияланды.Сондай-ақ, 2,1 млрд. теңгеге жас кәсіпкерлердің 115 жобасы бойынша кепілдік шарты жасалды."Аграрлық несие корпорациясы" арқылы 48 жоба қаржыландырылды.Алдағы уақытта «Мүмкіндіктер алаңы» жобасы қала, аудандарда тұрақты түрде ұйымдастырылады.<img src="https://knadmin.beoblood.kz/uploads/2_ab6528f46b.jpg" alt="2.jpg">

Сыр елінде «Мүмкіндіктер алаңы»  жобасы жүзеге асырылуда 

<a href="https://kyzylorda-news.kz/">Kyzylorda-news.kz</a> Қалалық орталықтандырылған кітапханалар жүйесіне қарасты №6 кітапхана мен «Зейнеткерлерге жартылай стационарлық жағдайда арнаулы әлеуметтік қызмет көрсету» орталығы бірлесіп 10 тамыз – Абай күніне орай қазақтың ұлы ақыны, қазақ жазба әдебиетінің және әдеби тілінің негізін қалаушы Абай Құнанбаев шығармаларын кеңінен насихаттау мақсатында «Ұлы халықтың – ұлы Абайы» атты әдеби-сазды кеш өткізді.&nbsp;Шара барысында «Көп адам дүниеге бой алдырған, Бой алдырып, аяғын көп шалдырған, Өлді деуге бола ма, ойлаңдаршы, Өлмейтұғын артына сөз қалдырған – деп жырлаған, қазақтың бір туар данышпан ақыны, ойшыл, дана ғұламалардың бірі, қазақ әдебиетінің шоқтығы биік ірі тұлғасы Абай Құнанбаевтың өмірі мен шығармашылығы орталық қызмет алушыларына таныстырылып, арнайы жасақталған кітап көрмесі бойынша ақынның үш томдық шығармаларының толық жинағы, 10 томдық шығармалар жинағы, «Қалың елім, қазағым», «Хикмет кітабы», «Қара сөздері», «Аудармалары» және де Тұрағұл Абайұлының «Шығармалар жинағы», М. Мырзахметұлының 2 томдық «Абайтану», Ғ. Есімнің «Хакім Абай», «Абай туралы естеліктер» кітабы және т.б. әдебиеттер мен мерзімді басылымдарға библиографиялық шолу жасалды. Сонымен қатар орталық қызметкерлері мен қызмет алушылары Абайдың «Күз», «Жасымда ғылым бар деп ескермедім», «Қалың елім, қазағым, қайран жұртым», «Ғылым таппай мақтанба» өлеңдерін мәнерлеп оқып, «Көзімнің қарасы», «Айттым сәлем, Қаламқас», «Желсіз түнде жарық ай», «Қараңғы түнде тау қалқып» әндерін нақышына келтіре орындап кеш ажарын аша түсті.

Ұлы халықтың – ұлы Абайы

<a href="https://kyzylorda-news.kz/">Kyzylorda-news.kz</a> Отандық шоу-бизнес өкілдері Қайрат Нұртас пен Жұлдыз Әбдікәрімованың қызы Алау Америкадан концерт қойып келді. Бұл туралы<a href="https://stan.kz/100-eldin-arasinan-21-oringa-taban-tiredi-kayrat-nyrtas-404548/"> Stan.kz</a> ақпарат агенттігі хабарлайды.Айта кетейік, актриса Жұлдыз Әбдікәрімова Испанияға екі ұлын ғана алып кетіп еді. Өйткені қыздарының бірі – Кореяға, екіншісі – Америкаға кетті.<blockquote>“Мұхит асып, әлемдік сахнада өнер көрсетіп келген қыздан айналдым. Қыздар бұл сапарға жыл бойы дайындалды. Қыста аязға қарамай, жазда каникулға қарамай, аптасына жеті күн тер төкті. Жыл бойы қолдау білдірген ата-аналардың, әр қыздың көңіл күйіне қараған жаттықтырушының еңбегі теңіздей. Бұл жарысқа әлемнің жүзден аса мемлекетінен команда қатысты. Үздік деп жапондықтар танылды. Біздің қыздар 100 елдің арасынан 21-орынға табан тіреді. Мақтанамын. Алда талпынар бағыт бар. Pink-Girl енді аз ғана демалып, сабағына кіріседі. Алда жаңа оқу жылы, жаңа белестер, жаңа жоспар. Бұл жаздағы миссия орындалды”, – деп жазды әнші.</blockquote>Еске салайық, бұған дейін өнер иесінің үлкен қызы&nbsp;Корей елінің біліміне қызығып жүргенін жазған едік.“Сезім дәл қазір Корей елінің университеттерімен танысып жатыр. Қай елде оқитынын әлі нақты шешкен жоқ. Барынша зерттеп көргісі келеді", –&nbsp;деп жазған болатын&nbsp;Сезімнің анасы.Одан кейін бостандыққа шыққан Қайрат Нұртас балаларымен қауышқанын көрсеткен едік.&nbsp;Фото:&nbsp;https://www.instagram.com/kair_n/

"100 елдің арасынан 21-орынға табан тіреді": Қайрат Нұртастың қызы АҚШ-та өнер көрсетті

<a href="https://kyzylorda-news.kz/">Kyzylorda-news.kz</a> Арал аудандық мәдениет үйінде тоқсан тамырлы тарихи мен дамылсыз даму шежіресі бар, текті ата-бабалардың құты дарыған, киелі өлке Арал өңірінде аудандық тарихи-өлкетану музейін алғаш ұсыныс жасап ашылуына себеп болған, КСРО мәдениет министрлігінің «Үздік мәдениет қызметкері», Қ. Жасекеновтың 100 жылдығына орай «Мәдениет – жасампаз сана» атты жылжымалы мәдени-демалыс кешендерінің облыстық байқауы өтті.Шараға келушілер алдымен Құдайберген Жасекенұлының ғибратты ғұмыры мен шығармашылығынан сыр шертетін көрмені тамашалады.Байқаудың ашылуында алғы сөз сөйлеген аудан әкімінің орынбасары Б. Жұмағұлов мәдениет майталманының өнегелі өміріне тоқталды.<blockquote>– Диірмен тасындай дөңгеленген дүние кіл мықтыларды сайдың тасындай іріктеп шығарды десек солардың бір шоғыры осы Арал топырағында түлеген. Түрлі саланың шылбырын қағып, жілігін шаққан мамандардың алды келместің көшіне ілессе, арты ортамызда жүр. Өздеріңіз білетіндей бүгінгі біз бас қосып отырған кештің негізгі кейіпкері Құдайберген Жасекенов ағамыз да сол бір сүрлеудің қазанынан шыққан қайраткері, КСРО мәдениет министрлігінің «Үздік мәдениет қызметкері» атанған абыз еді. Киелі өлке тарихының терең тұңғиығына бойлап, арғы ата-бабаларымыз жүріп өткен күреске толы қиын жылдарды танып-біліп, ертеңгі болашақ ұрпақтарымыз адаспай, жаңылмай жөн тауып өмір кешуіне бағыт-бағдар сілтеуде өткеннің мұрасы мол мұражайы керек. Осындай тарихи-өлкетану музейін ауданда алғаш ұсыныс жасап ашылуына себеп болған – Арал ауданы мәдениетінің майталманы – Жасекенов Құдайберген Құсбекұлының еңбегі зор. Көз көргендер Құдайберген Жасекеновты адалдық пен тазалықтың, кісілік пен кішіпейілдіктің нақ үлгісіндей еді деп еске алады. Бұл өз ісіне мығым, нағыз мәдениет жанашырына деген лайықты баға болса керек, – деді.</blockquote>Мұнан соң, өнердің туын тік ұстап жүрген аймағымыздың жылжымалы мәдени демалыс кешен ұжымдары өз өнерлерін ортаға салып, көпшіліктің қошеметіне бөленді.Байқау қорытындысы бойынша қатысушыларға дипломдар мен бағалы сыйлықтар табыс етілді.

Аралда «Мәдениет – жасампаз сана» атты облыстық байқау өтті

<a href="https://kyzylorda-news.kz/">Kyzylorda-news.kz</a> Кездесуге қатысушылар баспасөз журналистикасын дамыту, бұқаралық ақпарат құралдарының жас қызметкерлері мен блогерлерді және ықпалды тұлғалар сияқты жаңа кезең журналистерін қолдау мәселелерін талқылады.ҚР Парламенті Сенатының депутаты Нұртөре Жүсіп «Егемен Қазақстан», «Казахстанская правда», «Ана тілі», «Балдырған», «Ұйғыр авази» басылымдарын біріктіретін «Қазақ газеттері» ЖШС-нің Алматыдағы филиалының қызметкерлерімен кездесті. Сенатор дәстүрлі бұқаралық ақпарат құралдарын трансформациялау, сөз бостандығын қорғау, журналист мәртебесін бекіту жөніндегі мемлекеттік реформалар және Парламент қабылдаған «Масс-медиа туралы» заңдағы жаңалықтар туралы айтып берді.Кездесуге қатысушылар баспасөз журналистикасын дамыту, бұқаралық ақпарат құралдарының жас қызметкерлері мен блогерлерді және ықпалды тұлғалар сияқты жаңа кезең журналистерін қолдау мәселелерін талқылады.Нұртөре Жүсіп қазіргі қоғамның іргетасы сапалы ақпарат екенін атап өтті. Ақпарат таратудың негізгі құралының бірі ретінде мерзімді баспасөз қоғамдық пікір қалыптастыруда және өзекті оқиғаларды жариялауда маңызды рөл атқарып келеді.<blockquote>«Газеттер мен журналдар білім көзі ретінде және адам құндылықтарын қалыптастыруда қоғам өмірінде маңызы зор. Мемлекет тиісті заңдарды қабылдауда және отандық бұқаралық ақпарат құралдарының дамуын белсенді түрде қолдап келеді. Парламент қабылдаған «Масс-медиа туралы» заң осы жолдағы маңызды қадамның бірі, ол бұқаралық ақпарат құралдары саласындағы қолданыстағы бірнеше заңның ережелерін біріктіріп отыр. Онда мемлекеттік емес бұқаралық ақпарат құралдарына арналған грант арқылы мемлекеттік ақпарат саясатын қаржыландыруды жетілдіру, сауалдарды қарау мерзімін қысқарту, журналистің кәсіби қызметіне құқықтық кепілдік беру, сондай-ақ бұқаралық ақпарат құралдарының өзін-өзі реттеуі және журналистің әдеп кодексін әзірлеу жөніндегі қоғамдық-кәсіби кеңес құру сияқты негізгі жаңалықтар бар. Бұл заң еліміздің медиа кеңістігін дамытудағы маңызды қадам болып отыр», – деді Нұртөре Жүсіп.</blockquote>Тараптар журналистерді даярлау, мамандық этикасы және журналистикада жасанды интеллекті пайдалану келешегі мәселелерін де талқылады.Фото: senate.parlam.kz

Сенатор Нұртөре Жүсіп Алматыда еліміздің медиа кеңістігін дамыту келешегін журналистермен бірге талқылады

<a href="https://kyzylorda-news.kz/">Kyzylorda-news.kz</a> &nbsp;️«AMANAT» партиясы дәстүрлі «Ұлы дала» республикалық шығармашылық байқауының басталғанын хабарлайды.Биыл әдеби конкурс көрнекті жазушы, балалар әдебиетінің классигі Бердібек Соқпақбаевтың 100 жылдық мерейтойы аясында өтеді.🖋️Партияның «Ұлттық мұра» жобасы аясында Жазушылар одағымен бірлесіп өткізіп келе жатқан «Ұлы Дала» республикалық шығармашылық байқауы осымен бесінші мәрте ұйымдастырылуда.Шығармашылық доданың басты мақсаты – ұлттық болмысты, рухани құндылықтарды паш ететін, креативті идеяларға ие жас қаламгерлерге, отандық авторларға қолдау көрсету және шығармаларын насихаттау.Сонымен қатар, балалар әдебиетінің бәйтерегі Бердібек Соқпақбаевтың шығармаларындағы тағылымды ойлар мен ескірмес образдарды өскелең ұрпаққа дәріптеу.Үміткерлер​: «Проза», «Поэзия», ​ «Драматургия», «Әдеби сын» және «Балаларға арналған шығарма» номинациялары бойынша қатыса алады.Бұдан бөлек, байқауда «Бердібек Соқпақбаевтың 100 жылдығы» және «Алаш аманаты» арнайы жүлделері де қарастырылған. Сонымен қатар, Алаш қайраткерлері І. Жансүгіров, С. Сейфуллин, Б. Майлиннің туғанына 130 жыл толуына орай «Үш бәйтерек» арнайы жүлдесі тағайындалып отыр.Әр номинацияның жүлде қоры: 🥇 орын – 1 000 000 теңге 🥈 орын – 750 000 теңге 🥉 орын – 500 000 теңге. Арнайы жүлде жеңімпаздарына 1 000 000 теңге көлемінде қаржылай сыйақы табысталады.Қатысушыларға қойылатын барлық талап пен байқау шарты белгіленген ереже мәтіні бүгін БАҚ-тарда, партияның ресми сайтында, әлеуметтік желілердегі парақшаларында жарияланады.🗓️Шығармалар 1 тамыздан 30 қазанға дейін қабылданады.Ережеге сай еліміздің барлық өңіріндегі партияның аймақтық филиалдарында ұйымдастыру комитеттері құрылды. Әрбір аймақтық ұйымдастыру комитеттерінде байқауға қатысушылардан шығармаларды қабылдап алатын арнайы электронды мекенжайлар ашылды.Осыған орай, келіп түскен шығармаларды аймақтардағы ұйымдастыру комитеттері ереженің талаптарына сәйкес тексеріп, партияның Орталық аппаратында құрылған Республикалық ұйымдастыру комитетіне жолдайды.Өз кезегінде аймақтардан келіп түскен шығармаларды Республикалық ұйымдастыру комитеті тексерістен өткізіп, арнайы бүркеншік есіммен aikyn.kz сайтынан ашылған «Ұлы дала» байқауы айдарында күнделікті жариялап отырады. Қызығушылық танытқан кез келген оқырман шығармалармен сол жерден таныса алады.Байқауға 20-45 жас аралығындағы авторлар қатыса алады.Келіп түскен жұмыстарды байқау комиссиясы 1-15 қараша аралығында қарайды. Байқау нәтижесі «Тәуелсіздік күні» қарсаңында қорытындыланып, салтанатты марапаттау шарасы Астана қаласында өтеді.Байқау бойынша толық ақпарат: <a href="https://drive.google.com/drive/folders/1bnDuz_Awkob9zHOFeF8OZXhyqIvUPTfq?usp=drive_link">https://drive.google.com/drive/folders/1bnDuz_Awkob9zHOFeF8OZXhyqIvUPTfq?usp=drive_link</a><img src="https://knadmin.beoblood.kz/uploads/2_35b3f119f2.jpg" alt="2.jpg">

«Ұлы дала»: «AMANAT» партиясының дәстүрлі байқауы бастау алды

<a href="https://kyzylorda-news.kz/">Kyzylorda-news.kz</a>&nbsp; &nbsp;Бүгін&nbsp;«Egemen Qazaqstan» газетінде Мемлекет басшысы Қасым-Жомарт Тоқаевтың «Орталық Азия ренессансы: орнықты даму және өркендеу жолы» атты мақаласы жарық көрді. Онда Президент Орталық Азия елдерінің ортақ даму мақсаттары туралы сөз қозғаған, деп хабарлайды&nbsp;<a href="https://egemen.kz/">Egemen.kz.</a><blockquote>«Орталық Азия аймағы сан ғасырдан бері біртұтас геосаяси және рухани кеңістік ретінде белгілі. Бұл – табиғи ресурсы мен адам капиталы мол, мәдени-тарихи мұрасы бай өңір. Көшпелі және отырықшы өмір салтының үндестігі мұндағы шаруашылық жүйенің негізі болып қана қоймай, аймақтың өзіндік саяси-құқықтық мәдениетін және кез келген өзгеріске бейімдігімен, төзімділігімен ерекшеленетін құндылықтар жиынтығын қалыптастыруға ықпал етті.&nbsp; Орталық Азия кеңістігі сан алуан империяның құрылғанына, ыдырағанына, саяси және экономикалық модельдердің табиғи жолмен дамығанына куә болды, бірақ өзіне тән бірегейлігін сақтап қалды. Халықтарымыз ежелден түрлі өркениетпен тіл табысып, қарым-қатынас орната білді. Соның арқасында бұл аймақ өзінің этномәдени және рухани ерекшелігін сақтай отырып, Ұлы Жібек жолының және тұтастай алғанда үлкен Еуразияның тарихында шешуші рөл атқарды», деп жазды Президент.</blockquote>Сондай-ақ мақалада дамудың жаңа тарихи кезеңінде елдеріміз көптеген сынақ пен қиындықты бастан өткергені айтылады.«Дегенмен Орталық Азия республикалары «қалыптаспаған мемлекеттердің» қатарына немесе failed states деп аталатын топқа қосылады деген пессимистік болжам расталған жоқ. Аймақтағы елдер өздерінің қалыптасқан дербес мемлекет екенін дәлелдеп, халықаралық қауымдастықтағы лайықты орнын алды. Халықтарымыздың бірлігі мен даналығының арқасында біз өзіміздің аумақтық тұтастығымызды, еркіндігіміз бен егемендігімізді нығайттық.Бүгінде өңірдегі әрбір елдің мемлекеттік құрылыс, нарықтық экономиканы дамыту, мәдени мұрасын қалпына келтіру, ұлттық бірегейлігін қалыптастыру ісінде өзіндік тәжірибесі бар десек, артық айтқандық емес», делінген мақалада.Бұдан соң, Мемлекет басшысы қоғамдық және мемлекеттік институттар жаңғыртылғаны жөнінде сөз еткен.<blockquote>«Дамыған инфрақұрылым мен өнеркәсіп желісі құрылды, мыңдаған шақырым жаңа теміржол мен автокөлік жолы салынды, маңызды әлеуметтік нысандар бой көтерді. Біздің ашықтық пен жаңару жолындағы бағытымыз ұлттық экономикаларымыздың дәйекті түрде өсуін және олардың әлемдік экономикалық қатынастарға ықпалдасуын қамтамасыз етті. Білім беру, денсаулық сақтау және зейнетақы жүйелерінің жоспарлы дамуы халықтың әлеуметтік-экономикалық жағдайының айтарлықтай жақсаруына септігін тигізді», делінген Президент мақаласында.</blockquote>Мақаланың толық нұсқасын оқу үшін мына <a href="https://egemen.kz/article/369879-ortalyq-aziya-renessansy-ornyqty-damu-dgane-orkendeu-dgoly">сілтемеге</a> өтіңіз.Фото: Ақорда

Орталық Азия өзіне тән бірегейлігін сақтап қалды - Мемлекет басшысы

<a href="https://kyzylorda-news.kz/">Kyzylorda-news.kz</a> &nbsp;Бұл туралы ҚР Еңбек сіңірген қайраткері, әнші Жеңіс Ысқақова &nbsp;«Ұждан» &nbsp;әкелер алаңына берген <a href="https://www.instagram.com/reel/C-FK9cSoqz4/?igsh=MWd6OHd0cHhzcWF1ZA%3D%3D">сұқбатында айтты</a>.<blockquote>«Менің әкем өзі салмақты, өзіне сенімді, әрбір сөзін ойланып сөйлейтін және еш уақытта балаға дауыс көтермеген. Маған, жалпы балаларына «Сен мықтысың, ақылдысың, сенің қолыңнан бәрі келеді» деп жүрегіне сенім ұялатып, жігер берген әкенің баласымын. Әрине, әкем бала кезімізден жүрегімізге сенім ұялатып, тәрбиеледі», – деді Жеңіс Ермағанбетқызы.</blockquote>Әншінің айтуынша, әкесінің қуатты сөздері ғұмырлық қағидасына айналған. &nbsp;<blockquote>«Әкем шешеме «балаларға көп сөйлей берме, қадірің кетіп қалады, оларға бір рет айтып, түсіндіру керек» дейтін. Менің өмірдегі ұстанымым, әкемнің ғұмырлық қағидасы: өтірік сөйлеп, көлгірсімеу һәм ұрламау, адамды сатып кетпеу. Соңғы кезде адамдар өздеріне есеп бермейді. Ал әкем бізді бір уақыт өз-өзімізге есеп беруге үйретті. &nbsp;Мысалы, біреуді ренжітіп қойсаң, ойлан. Не үшін ренжіттің? Мүмкін сенің де қателескен жерің болар, үйге келгенде осыларды ой елегіңнен өткіз. «Мен не істедім, кімге ауыр сөз және кімнің көңіліне тиетіндей әңгіме айттым» &nbsp;деген сұрақтарға күнделікті жауап ізде. Әкемнің тәрбиесі осындай еді. Бүгінге дейін әкемнің айтқан сөздері есімнен кеткен емес. Сондай-ақ ешкімге сенбе, сүрінген жеріңнен ешкім сені сүйремейді, өзіңді жетелейтін өзің, өзіңді алып шығатын да өзің деген болатын», – дейді әнші.</blockquote>Жеңіс Ысқақованың айтуынша, анасы әкесін паштадай сыйлайтын болған.<blockquote> «Қоғамдағы әкенің орны орасан зор. Өйткені, қазақта жақсы сөз бар: «Әке – асқар тау». Жалпы, шешелеріміз бізді әкелерімізбен қорқытатын. Ал негізінде әкеміз ең мықты, басқа балаларды еркелетпесе де мені әлпештеп отыратын. «Әкең келе жатыр, шуламаңдар, тамағын ішсін» деп аналарымыз үлкен патша қылып қоятын. Патшадай әкеден тәрбие алған ер бала өзінің отбасының патшасы болуы тиіс. Патшадан патша туады. Сондықтан да бүгінгі қоғамда патшалар азайып барады. Бұл ащы шындық болса да отанымызды, әр отбасыны асырайтын да азаматтар. Балаларға еркектік тәрбие беріп, жігерлендіретін де азамат. «Сен азаматсың, еркек емессің бе» деп жүрегіне сенім ұялататын да әке. Бүгінде сол азаматтардың рөлін айта алмаймын, керісінше әйелдердің рөлі басымырақ. &nbsp;Бірқатар еркектердің әңгімесі «Біреу сөйлеп жатса, аузын қышып бара ма» деген принцип. Ал әйелдер балалары, күйеулері үшін тірлігін жасап жүре береді. Ал жігіттер «Вперед Фатима» деп отыратын қоғамда өмір сүріп жатырмыз», – деді әнші.</blockquote>Фото: inform.kz

«Бүгінгі қоғамда патшалар азайып барады»: Жеңіс Ысқақова әкелердің беделі туралы айтты

<a href="https://kyzylorda-news.kz/">Kyzylorda-news.kz</a> Арал аудандық "Толқын" газетінің бас редакторы қызметіне Сайлауов Айдар Әділжанұлы тағайындалды.Айдар Сайлауов &nbsp;1996 жылы Арал ауданы, Қызылжар ауылында дүниеге келген.Еңбек жолын республикалық «Ұстаз мәртебесі» газеті мен «Әлімсақ» журналынан бастап, жауапты хатшысы лауазымына дейін жоғарылаған. "Сыр медиа" ЖШС "Сыр бойы" газетінің тілшісі, Республикалық "Ақмешіт жастары" газетінің бас редакторы қызметтерін атқарды.Айдар Әділжанұлы қаламгер Сағитжан Бермағамбетов атындағы жастар сыйлығының және облыстық «Сыр үміті» сыйлығының иегері.&nbsp;Сонымен қатар, Қазақстан Журналистер одағының мүшесі.&nbsp;Аға буынның ізін жалғаған талантты ақын.

Айдар Сайлауов жаңа қызметке тағайындалды

<a href="https://kyzylorda-news.kz/">Kyzylorda-news.kz</a> Бүгін облыс әкімінің орынбасары Шахмардан Баймановтың төрағалығымен облыс әкімдігі жанындағы жастар істері жөніндегі кеңес отырысы өтті.Жиында облыс әкімі - кеңес төрағасы Нұрлыбек Нәлібаевтың тапсырмасына сәйкес жастар мен жас отбасылардың әлеуметтік жағдайын жақсарту, оның ішінде, білім алу мүмкіндігін кеңейту, кәсіпкерлік бастамаларын қолдау, жұмыспен қамту мәселелері қаралды.Мемлекеттік жастар саясатының жүзеге асырылуы және жұмыссыз жастар санын азайту бағытында аймақта атқарылған істер есебі тыңдалды.Кеңес отырысына қатысқан жастар ұйымдары өкілдері мен басқа да сала мамандарының ұсыныстарын негізге алып, жүйелі іс-шаралар атқару қажеттігі айтылды.Жиын қорытындысында мүдделі орган басшыларына жастарға арналған мемлекеттік бағдарламалар мен жобаларды кең көлемде насихаттау, NEET санатындағы жастарды әлеуметтендіру тапсырылды.

Қазақстан және Қызылорда облысының жаңалықтары: Мәдениет