<a href="https://kyzylorda-news.kz/">Kyzylorda-news.kz</a> Кеңестік кезеңнің қылышынан қан тамып тұрған тұста елдегі бай-бағыландар мен шаруа адамдардың күйі тайып, қуғынға ұшырағанын тарих айғақтайды. Сондай нәубет жылдардың мехнатын тартқандар Арал маңында да аз болмаған. Күні кеше ел-жұрты есіне алған, қойнауы құт Сазды өңірінен атына мешіт ашылған Байдәулетұлы Жұбай да сол советтік сергелдеңді көзімен көрген, зардабын сезген жан еді. Саздыда 1883 жылы дүниеге келіп, осы өңірде өмір кешкен қарапайым еңбек адамын бүгінде жұртшылық құрығына құт қонған, адал еңбегімен абыройға бөленген атақты жылқышы ретінде таниды. Өткен аптада сол бір киелі өңірдің төрінде үлкен ауқымда ас беру рәсімі өтті. Сазды төрінен Жұбай ата мешіті жаңадан ашылып, баба ұрпақтары арнайылап ат шаптырып, алыс-жақыннан келген ағайынның ақ жарма тілегі мен батасын алды.&nbsp;Саздыдағы ауқымды шараға аудан әкімі А.Оңғарбаев бастаған бір топ зиялы қауым өкілдері барып, мерейлі сәттің куәсі болып, жаңадан ашылған мешіттің лентасын қию рәсіміне қатысты. Мұнан соң мәртебелі меймандар Сазды төріндегі дүбірлі думанның куәсі болды. Дәстүрге сай&nbsp;14-15 маусым күндері аралығында аудан әкімдігінің ұйымдастыруымен, Сазды ауылында ұлттық спорт түрлерінен (гір спорты, қол күрес, қой көтеру, теңге ілу, аударыспақ) жарыстар ұйымдастырылып, жарысқа жалпы саны 80-нен астам спортшы қатысып, жүлдеге тігілген құнды сыйлықтарды олжалады.&nbsp;Айталық гір тасын көтеру спортынан аралдық Бексұлтан, қол күрсінен қазалылық Әділет, қой көтеруден қазалылық Ілияс, теңге ілуден Ырғыздан келген Берік есімді азаматтар жүлделі І орын тұғырынан көрінді. Сондай-ақ ауданда алғаш өткізілген аударыспақ жарысынан 75 келі салмаққа дейінгі жарыста ырғыздық Берік қарсылас шыдатпаса, 75 келі салмақтан жоғары дәрежедегі жігіттер арасындағы аударыспақта Ырғыздан келген Әділжан есімді азамат І орын еншіледі. Ұлттық спорттың бұл түрінен жүлдеге ілігіп, қанжыға майлаған жігіттер өзара 2 және 3 орындарды бөлісті. Мұнан соң қазақтың делебесін қоздырар ұлттық ат бәйгелері ұйымдастырылды. Қазақы тай, Арғымақ тай, құнан, тоқ және аламан бәйгелері өтіп, бұл додада жалпы саны 182 ат жарыс жолына шықты. Бәйгенің басты жарысы аламанда Жамбылдан келген «Сарарқа» атты сәйгүлік мәреге бірінші келді. Осылайша бәйгенің бас жүлдесіне тігілген «Нива» автокөлігі Жамбылға бұйырды.&nbsp;Жарыс жеңімпаздары мен жүлдегерлеріне асты ұйымдастырушы Елеусізұлы Қожабай ұрпақтарының атынан ақшалай сыйлықтар мен бағалы дүниелер табысталды. Бірнеше күнге созылған Сазды төріндегі торқалы той үлкен ауқымдағы гала концертпен түйінделді.&nbsp;

Саздыда ауқымды шара ұйымдастырылды

<a href="https://kyzylorda-news.kz/">Kyzylorda-news.kz</a> &nbsp;Айтыскер ақын, коуч-психолог Айнұр Тұрсынбаева немересі Әлемнің бір жасын жасап, тұсауын кесті. Бұл туралы <a href="https://stan.kz/brilliant-zhaugan-toy-aynyr-tyrsinbaeva-nemeresinin-bir-401901/">Stan.kz</a> ақпарат агенттігі хабарлайды.Айтыс сахнасының жұлдызы Ыстамбұл қаласынан ұшып келіп, Алматыда өнердегі дос-жаранның басын қосты.<blockquote>“Әлемнің тұсауын әлемге қазақты танытқан адам кесуі керек деп ойладық. Біреуі –&nbsp;менің туған ағам, біреуі –&nbsp;туған бауырым. Туған ағам –&nbsp;Қыдырәлі Болманов, қазақтың өнері үшін бүкіл өмірін арнаған қазақтың азаматы. Қаншама қазақ баспаналы болсын деп қазақ үшін түн ұйқысын төрт бөлген Дәулет Мұқаев арнайы Астанадан келіп тұр", –&nbsp;деді той иесі.</blockquote>Желі қолданушылары түрлі пікір жазып, қуанышқа ортақтасып жатыр.<blockquote>“Тойға шақырылмасақ та, тойда отырғандай болып отырмыз”, "Немереңіздің алғашқы қадамы құтты болсын! Сол қадамымен биік шыңдармен асу белестерді бағындырсын. Әлемге аты шыққан Әлем болсын. Әлемнің қасында айдай жарқыраған әжесі болсын", "Жаңа жасы құтты, берекелі жас болсын, Алла деніне саулық берсін, ғұмырлы қылсын! Бақытты балалық шақ тілеймін, ата анасы аман болсын! Аллахым артынан іні-қарындастарын берсін", “Бриллиант пен бренд жауған той болыпты”, “Алтын комплекті Қайрат Нұртастың мамасы ұтып алған”, – деп жазып жатыр оқырман қауым.</blockquote>Фото:&nbsp;https://www.instagram.com/aidyn_nury/

"Бриллиант жауған той": Айнұр Тұрсынбаева немересінің бір жасын дүркіретіп атап өтті

<a href="https://kyzylorda-news.kz/">Kyzylorda-news.kz</a> Ел Президенті Қасым-Жомарт Тоқаев: «Бүгінде армиямыз әлемдік стандартқа сай жабдықталған. Сонымен қатар жаңа жаһандық сын-қатерлер Қарулы Күштеріміздің жауынгерлік қабілетін арттыру үшін оңтайлы шешімдер іздеуді талап етеді. Жеке құрам жүйелі түрде жауынгерлік дайындықты пысықтайды, ауқымды оқу-жаттығулар өткізіледі. Болашақ офицерлерді даярлаудың заманауи жүйесі құрылды» деген болатын.&nbsp;Расында ел шетіне жау тисе ең алдымен мемлекеттің сақадай сай әскері болуы керектігі айтпаса да түсінікті. Осы тұста болашағын темірдей тәртіпті талап ететін әсери саламен байланыстырған жерлесіміз Иманжүсіп Асылбекұлы туралы сөз қозғағым келеді. Себебі ол жуырда ғана Президент Қасым-Жомарт Тоқаевтың қолынан әскери шен алып қайтты.&nbsp;Иманжүсіп Асылбекұлы Жақсықылыш кентінде 2003 жылы өмірге келген. Әкесі Асылбек пен анасы Іңкәрдің 5 баласының ішіндегі 3 қыздан соң дүниеге келген ер баласы. Мектепті үздік оқыған ол бала кезінен-ақ әскери салаға биімділігін танытты. Оқушы кезінде «қозғалыстың жас инспекторы» жарысына қатыса жүріп, ол болашақ мамандығын таңдап қойған болатын. Мұнымен қоса, Иманжүсіп спортты да жанына серік еткен азамат. Төртінші сыныптан бастап еркін күреспен айналыса бастаған. «Спорт шеберіне» кондидат.&nbsp;Иманжүсіп Асылбекұлы әскери саланы бар жан-тәнімен қалағаны соншалық, ол мектеп бітіргенге дейін 2 жыл сайын әскери дайындық шеберліктерінен өтіп тұрған. 11 сынып оқып жүргенде Президент Қасым-Жомарт Тоқаевтың бастамасымен Қарағанды қаласында өткен «Айбын» әскери-спорттық жарысқа Қызылорда облысы атынан қатысып, жүлделі 2-орынды еншілеп қайтқан. Баласының жетістік жолы туралы анасы Іңкәр Айдынқызы:– Мектеп бітірген соң өзінің жүрек қалауымен Алматы қаласындағы Сағадат Нұрмағанбетов атындағы Әскери құрлық институтына оқуға түсті. Әрине бұл кез келген адамға бұйыра бермейтін бақ. Төрт жыл бойы әскери саланың мызғымас тәртібіне мойынсұнып биыл қызыл дипломмен бітірді. &nbsp;Ата-ана үшін баланың жетістігі зор мәртебе ғой. Ел қорғау саласын таңдағанда ана ретінде уайымдағаным рас. Бірақ баламның жүрегінде бүр жарған отансүйгіштік қасиетті көргенде, үйде отырып тақым қысқанды жөн көрдім. Иманжүсіптің табиғаты да әскери салаға бейімделгендей. Сыралғы, томаға тұйық, әрі бірбеткей мінезді болып өсті, – дейді.Жуырда еліміздегі маңызды мемлекеттік мерекелердің бірі Рәміздер күнінде Елорда төрінде өткен салатантты шарада Пезидент Қасым-Жомарт Тоқаев әскери институтты тәмамдаған бірқатар жас сарбаздарға әскери шен табыстаған болатын. Солардың қатарында Иманжүсіп Асылбекұлы да бар. Оның мерейлі сәтіне әкесі Асылбек арнайы қатысып қайтқан көрінеді.&nbsp;Бұл тарихи сәт Иманжүсіптің жарқын болашағының бастауы болса керек. Шараға қонақ болған Халық қаһарманы Бақытжан Ертаев әскери саладағы өзінің өмір жолынан сыр шертіп, өнегесін айта отырып, Иманжүсіпке ақ батасын беріпті.&nbsp;– Мен үшін бұл жүрек толқытатын ерекше сәт болды. Перзиденттің қолынан әскери шен ала отырып, мен еліме, жеріме адал қызмет етуге ант бердім. Мемлекет басшысы мейірімге толы жылы жүзімен күлімдей қарап, ақ тілегін арнады. Сол сәтте өзімді әлемдегі ең бақытты адамдай сезіндім. Арманы орындалған адам, расында шексіз қуанышқа бөленеді екен. Ендігі мақсатым – әрі қарай оқуымды жалғастырып, әскери академияға түсу, – дейді Иманжүсіп.Иманжүсіп Асылбекұлы осы салтанатты шарада Қазақстан Республикасының Қорғаныс министрлігінің арнайы құттықтау хатымен мадақталғанын да айта кетуіміз керек.&nbsp;Президентпен жүздесіп, оның қолынан алу кез келген адамның арманы. Осы арманға Иманжүсіп өзі ғана қол жетізіп қоймай әкесі Асылбектің де мәртебесін биіктетіп, осындай бақытқа кенелуге мүмкіндік ашып берді. «Болам деген баланың, бетін қақпа белін бу» деген тәмсілді ұстанған ата-анасы да оның ел мүддесін көздеген азамат болатындығына кәміл сеніп, қолдау көрсетіп келеді. Және сол үміттері де ақталып жатыр.

Президенттің қолынан шен алған сарбаз

<a href="https://kyzylorda-news.kz/">Kyzylorda-news.kz</a> Әлемнің көптеген елінде отбасылық құндылықтарды насихаттау, отбасы және ата-ана институтын нығайту үшін аталып өтетін «Әкелер күні» өткен жылы елімізде ресми мереке ретінде маусымның үшінші жексенбісіне белгіленген.Осы мерекеге орай Шиелі аудандық ардагерлер үйінде кеше Шиелі ауданының қоғамдық даму бөлімінің мемлекеттік әлеуметтік тапсырысы шеңберінде «Қызылорда облысының жастар Одақтары» қоғамдық бірлестігінің ұйымдастыруымен «Жергілікті әйелдер кеңестері жұмысын дамыту және отбасы мен неке құндылықтарын насихаттау бағытында шараларды ұйымдастыру қызметі» әлеуметтік жобасы аясында отбасылық құндылықтарды насихаттау, әкелерді құрметтеу мақсатында «Әке – әркімнің сүйенер тіреуі» атты ардагерлер және жас әкелердің қатысуымен дөңгелек үстел болды.Шараны Шиелі ауданы әкімінің орынбасары Болатбек Ысмағұлов жүргізіп отырды.Жиында Шиелі аудандық білім бөлімі басшысының міндетін атқарушы Марат Ақпанбетов қоғамдағы әкелердің рөлі мен әке мен бала арасындағы байланыс, әкелер институтының қоғамдағы орны жайында баяндама жасады.Әкеден баланың алатын тәлім-тәрбиесін басқа ештеңе де ауыстыра алмайды. Осы тұрғыда әр ұлттың бала тәрбиесіндегі құндылықтары жайында ақсақалдар, жастар өкілдері өз ойларын ортаға салды.Жиын соңы, бар жүкті жотасымен көтеріп, аманатын абыроймен атқарған «Әкелер күні, құтты болсын!» деген жақсы көңіл-күйде аяқталып, тренингке ұласты.

Шиеліде әкелер күніне арналған дөңгелек үстел өтті

<a href="https://kyzylorda-news.kz/">Kyzylorda-news.kz</a> Германияда&nbsp;із-түссіз&nbsp;жоғалып кеткен қазақстандық&nbsp;Айгүл Сайлыбаеваның денесі&nbsp;табылды. Бұл туралы&nbsp;<a href="https://stan.kz/germaniyada-zhogalip-ketken-kazakstandik-ayeldin-denesi-401884/">Stan.kz</a>&nbsp;ақпарат агенттігі хабарлайды.Бұған дейін бұрынғы судья Айгүл Сайлыбаеваның Германияда із-түссіз жоғалып кеткені туралы хабарлаған едік. Ол&nbsp;Бенсхайм қаласында күйеуі, қызы және енесімен бірге тұрған. 4 маусым күні таңертең Сайлыбаева қызын балабақшаға алып кеткен. Содан бері оны ешкім көрмеген.Жексенбі күні оның денесі қала шетіндегі Эрлаче карьерінен табылды. Мәйіт полиэтилен пакетте болған. Әйел өлтірілмес бұрын зорлық-зомбылыққа ұшыраған. Қазір Сайлыбаеваның өлімін 35 тергеуші тексеріп жатыр. Әйелдің үйіне тінту жүргізілді.«Германия қылмыстық полициясының Қазақстан Республикасының Франкфурттағы бас консулдығына берген ақпаратына сәйкес, 16 маусымда Бенсхайм қаласының маңында әйелдің мәйіті табылды. Криминалистер сот-медициналық сараптама жүргізуде. Өз кезегінде, полицияның ауызша алдын ала берген ақпаратына сәйкес, сыртқы белгілері бойынша мәйіт Қазақстан азаматы Айгүл Сайлыбаева деп танылды. Қазіргі уақытта марқұмның туыстары Германияда және оларға барлық қажетті консулдық-құқықтық көмек көрсетілуде. Бұл іс туралы өзге ақпарат тергеу мүдделері үшін жарияланбайды”, –&nbsp;делінген&nbsp;сыртқы істер министрлігінің хабарламасында.Сайлыбаевамен бір уақытта оның 49 жастағы қайын енесі Наталья Донцова да жоғалып кеткен. Ол 4 маусым күні немересін балабақшадан алып, үйіне әкелгеннен кейін жоғалып кеткен.&nbsp;Баланың өзі аман, қазір туыстарының қамқорлығына берілген.&nbsp;Қазір Наталья Донцованы іздестіру&nbsp;жалғасуда.Сурет:kazinform.kz

Германияда жоғалып кеткен қазақстандық судьяның денесі табылды

<a href="https://kyzylorda-news.kz/">Kyzylorda-news.kz</a> Салауатты өмір салты мен дұрыс тамақтануды айтпағанда, &nbsp;саулықта өмір сүруіміздің кепілі бола алатыны ол – деннің саулығы және тазалық.&nbsp; Ал дені сау ұрпақ – қоғам байлығы.Туған жерді сүю – оның дәстүрі мен әдебіне көну. Елінің тау-тасын қадірлеп, әр мекенін мақтан ету, бұл – патриотизмнің алдыңғы көрінісі. Табиғатының сұлулығын қалаған&nbsp; Отансүйер, оның ластанбауын&nbsp; да ерікті түрде қалайтыны һақ. Көріп, біліп жүрміз. Ауданда тазалыққа, көгалдандыруға бағытталған жұмыстар тұрақты түрде жүргізіліп келеді. Бұл қатарда еңбексүйгіш, патриот жастарымыздың да елеулі еңбегі жатыр. Туған қаласына қамқорлықпен қарап, тазалығы үшін тартынбайтын жастар қатарластарына үлгі, көпке үлгілі болып келеді.&nbsp;Шынында қазақта ер бала азаматтығын дәлелдеу үшін&nbsp; үштік&nbsp; кезеңнен тұратын салтымыз бар. Онда, алдымен, үй тұрғызуды, екіншіден, өз баласын аяққа тұрғызуды, үшіншіден, «бір тал кессең, он тал ек!» деп ағаш отырғызуды &nbsp;міндеттеген. Міне, жастайынан осы міндеттің бірін орындауға машықтанған&nbsp;Арал қаласы, Сексеуіл және Жақсықылыш кенттерінде «Жасыл ел» еңбек жасағы жұмыс жасап келеді.

Тазалық - тәрбиеден

<a href="https://kyzylorda-news.kz/">Kyzylorda-news.kz</a> «Отан – отбасынан басталады» дейді. Отбасы – ең негізгі, мықты тәрбие бесігі, шағын мемлекет. Отбасының негізі баланы өмірге келтіру ғана емес, оны мәдени- әлеуметтік ортаның құндылығын қабылдату, ата-әженің ақыл-кеңесін бойына сіңіру, қоршаған орта, адамзатқа, өз қоғамына пайдалы етіп тәрбиелеу. Ия, баланың дұрыс бой түзеп, тұлға болып қалыптасуында өз ұясының, отбасының ықпалы орасан. &nbsp;Ұядағы ата-ананың, үлкеннің жасаған әр ісі жинақталып, перзент мінезінің қалыптасуына үлесін қосады.Біз балаларымызға жастық кезеңнен салт-дәстүр мен ұлттық құндылықты сіңіру, жаман-жақсымен қатар, өз құқықтарын да жете түсіндіре білуіміз қажет. Жанымызға тарта отырып, сырласа сөйлессек, баланың әр ісін, жоспарын біліп отыруға мүмкіншілік болады. Сол арқылы кездесуі мүмкін қатерлерден қорғауға қол жеткізе аламыз. Өзін заң аясында қорғай білуге, өз құқықтары бойынша білімін игеруге ықпал жасауға тиістіміз.Бала құқығы және бала құқығын қорғау мәселесі қазіргі таңда өте өзекті дүниеге айналды. Ата-ана, педагог, құқық қорғау саласы өкілдері бірлесе айналысқанымен, жасөспірімдер арасындағы әлімжеттік, топтық төбелес, тұрмыстық зорлық-зомбылық құрбаны болу, құмар ойындар мен зиянды әдеттерге бой алдыру жастар арасындағы кезек күттірмей шешімін табуы қажет өткір мәселелерге айналып отыр.Бұл тұрғыда «AMANAT» партиясы да қоғамдағы өзекті мәселелер бойынша біршама жұмыстар атқаруда. Мәселен, «Бақытты отбасы» партиялық жобасы аясында өткен жылы «Балаларға жайлы инфрақұрылым» қарастыру тетіктері талқыланып, шаһарымыздағы білім нысандарына мониторинг жұмыстарын жүргіздік. Аталмыш жоба бұдан бөлек отбасыдағы татулықты, қоғамға үлгілі жанұялардың баянды бақытының сыры жайлы&nbsp;танымдық кездесулерді де қамтиды. Жасөспірім қыздар көпбалалы, алтын құрсақты аналармен кездессе, әкелер қауымының да өзекті мәселелерді талқылайтын жиыны түрлі деңгейде өз жалғасын тауып келеді.&nbsp;Үлкен буынның тәжірибесі, өмірдегі түйгені, ақыл-кеңестері, ата-ананың өз борышын мүлтіксіз орындауы, бір-бірін құрметтеуі – енді қалыптасып келе жатқан жас үшін үлкен тәрбие мектебі.Сондай-ақ, өскелең ұрпақтың бос уақытын тиімді пайдалануы үшін партиялық "Ұлттық мұра" жобасы аясында ұлттық құныдылықтарымызды дәріптейтін танымдық шаралар ұйымдастырылып келеді. Оның ішінде ұлттық ойындарымыздан бастап, баланы елжандылыққа тәрбиелейтін, ана тілімізді дамытатын ауқымды шаралар легі де қарастырылған.Бұл атқарылып жатқан жұмыстардың барлығы да ұрпақ келешегі үшін, балаларымыздың жарқын болашағы мен уайымсыз балалық шақты өткеруіне деген қолдау.Маржан Қылышбайқызы БИСЕНОВАҚызылорда қалалық мәслихатындағы «AMANAT» партиясының депутаттық фракция мүшесі&nbsp;

Маржан Бисенова: Бала – біздің болашағымыз

<a href="https://kyzylorda-news.kz/">Kyzylorda-news.kz</a> Танымал продюсер Гүлзира Айдарбекова әлеуметтік желідегі парақшасында тосын жаңалық айтты, – деп хабарлайды <a href="https://massaget.kz/basty-zhaalytar-438/109667/">Massaget.kz.</a>Оның сөзінше, Атырауда жоспарланған Қайрат Нұртастың концерт өткізілмейді, себебі ұйымдастырушылар ұятқа қалдырған.<blockquote>«Құрметті Атырау қаласының қонақтары және тұрғындары! 17.07.2024 жылы Атырау қаласы Махамбет драма театрында болу қажет Қайрат Нұртастың концерті өткізілмейтін болды. Себебі ұйымдастырушы кесірінен концертімізді өткізбеуге тура келіп отыр. Билеттеріңіздің ақшасын сол компаниядан қайтарып алсаңыздар болады. Қайрат Нұртас және оның командасы концертке дайын екенін ұйымдастырушыға хабарлап айтқанда, ол кісілерден кері байланыс ала алмадық. Сіздерден тудырған келеңсіздік үшін кешірім сұраймыз. Не ватсапқа жауап жоқ, тұтқаны мүлдем көтермейді. Түнгі 12-ге дейін еш жауап ала алмадық, қатты уайымға салынып отырмыз. Амал жоқ, біз ұшпадық, билеттеріңіздің ақшасын қайтарып алыңыздар. Пәлен жыл жұмыс жасаған адам осылай елдің алдында ұятқа қалдыратын тірлік жасайды деп ойламадық. Біз жақтан айып жоқ, жолға дайын отырдық, бүкіл хабарласқанымыз, хаттарымыз тұр», – деп жазды Гүлзира Айдарбекова.&nbsp;</blockquote><img src="https://knadmin.beoblood.kz/uploads/eed45d901882f8a09120916aa2404af4_594x1024_4edd004fe8.jpg" alt="eed45d901882f8a09120916aa2404af4-594x1024.jpg">Сурет:әлеуметтік желі

"Қатты уайымдап, түнімен ұйықтаған жоқ": Атырау қаласында Қайрат Нұртастың концерті өтпей қалды

<a href="https://kyzylorda-news.kz/">Kyzylorda-news.kz</a> «Тазалық&nbsp;– денсаулық кепілі». Республика көлемінде қоршаған ортаның тазалығын қамтамасыз ету үшін Президенті Қасым-Жомарт Тоқаев «Таза Қазақстан» экологиялық акциясын жариялады. Осыған байланысты аудан аумағында тазалық жұмыстары қарқынды жүргізілуде. Барлық тұрғындар қоршаған ортаның тазалығына үлес қосуда.&nbsp;«Тазалық тал бесіктен басталады» десек жалпы қоғамның таза болуы әрбір ауланың тазалығынан басталады.&nbsp;Жалпы аудан аумағындағы тазалық жұмыстарына еңбек ұжымдары, белсенді жастар мен ерікті тұрғындар атсалысты. Сенбілік барысында қала көшелері мен қоғамдық орындар, кәсіпкерлік, әлеуметтік нысандар маңы тазартылып, күл-қоқыстар арнайы техникалардың көмегімен тиісті орындарға шығарылды.Ия, шашылған қоқысты күнделікті көзіміз шалып жүр. Десе де оған жейіркенішпен қарасақ та алдын алуға үлес қосып жатқанымыз аз. Қоршаған ортаның тазалығы барлық адамзаттың міндеті. Таза ұстау қазіргі таңда экологияны яғни, қоршаған ортаны қорғау ең басты мәселе болып отыр. Қоршаған ортаны ластауға, зиян келтіруге жол бермей, жануарлар мен өсімдіктер әлемін қорғау, сақтау әр адамзаттың міндеті. Өз денсаулығымызды сақтау үшін тазалықтың сақталуына жақсы әсер беруіміз керек.&nbsp;Тазалық – бүгінгі күннің өзекті мәселесіне айналып отыр. Қала тазалығын қамтамасыз ету бағытында көптеген ауқымды жұмыстар атқарылуда. Әрине қоршаған ортада бей-берекетсіздік орын алса онда өмір салты да өзгереді. Қай жерде болсын ең алдымен тазалық керек. Осы ретте тазалықты кеңінен насихаттап, ұрпақ санасына тазалықтың маңыздылығын сіңіру мақсатында мемлекет басшысы бастамасымен қолға алынған республикалық акция тазалық пен көктемгі көгалдандыру жұмыстарының қарқынын үдете түскендей.&nbsp;

Тазалыққа үлес қосу – баршаға ортақ іс

<a href="https://kyzylorda-news.kz/">Kyzylorda-news.kz</a> Қайсыбір мақалада ел Президенті Қасым-Жомарт Тоқаевтың: «Шын мәнінде, кез келген мемлекетті тұрғындарына қарап бағалайды. Яғни біздің қандай ел боларымыз өскелең ұрпаққа байланысты. Сондықтан жастарымыз отаншыл, білімпаз, еңбекқор, үнемшіл, әділ әрі жанашыр болуы қажет» деген сөзін көзім шалып қалғаны бар еді. Бұл менің өмірлік ұстанымыммен сәйкес келгендіктен көңіліме қона кетті.&nbsp;Әрине әрбір ата-ана өзінің баласының болашағынан зор үміт күтеді. Келешегі жарқын, саналы азамат болғанын қалайды. Дегенмен олар сол армандарына жету үшін баланың дамуына мүмкіндік көздерін қарастыра алмай жатады. Ата-ананың парызы – баланың тән қалауымен қоса жан қалауын да орындап, қаршадайынан санасына білім нәрін сіңіру. Осы орайда мен өзімнің білім білігіне көзім айқын жеткен қаладағы «Умка» оқу орталығының негізін қалаушы Үміт Қазыбаева туралы айтқым келеді.&nbsp;Тұңғышым Нұрсезім Ахмет қаладағы №14 мектеп-лицейдің 7 сыныбын тәмамдады. Ес біле бастағаннан Нұрсезім өзінің ағылшын тіліне бейімділігін байқатты. Және болашақта шетелде білім алу арманы екенін де айтып қалды. Әрине, жолдасым екеуміз қызымыздың арманын орындау үшін ешнәрседен аянып қалмадық. Ағылшын тілінен тереңдетіп оқытатын түрлі орталықтарға беріп көрдім. Бірде Нұрсезім қатарластарынан «Умка» оқу орталығы туралы естігенін айтып, сонда ағылшын тілінен білім алуға ниет білдірді. Әрине, біз қолдай кеттік. Осылайша соңғы екі жылда «Умка» оқу орталығында ағылшын тілінен тереңдетілген білім алып келеді.Алғашқы барған уақытта Үміт Қазыбайқызы бір аптаға жуық баланы бақылап, оның қабілетін саралайды. Сонан соң ғана оқуға қабылдайды екен. Нұрсезімнің болашағынан ұстазы үміт күтті. Орталыққа барған соң қызымның құлшынысы тіптен ояна бастады. Үміт Қазыбайқызының жібектей жұмсақ мінезі, балаларға мейіріммен қарай отырып, санасына білім сіңіре білуі шәкірттерінің алға қадам басуына көмектесті. Және оның білім беру тәсілі мектеп бағдарламасын меңгертуімен шектелмейді. Өзінің бөлек арнайы оқулықтары арқылы терең оқытады.&nbsp;Және бір қуантарлығы, оқу орталық өзінің үздік нәтижеге қол жеткізген шәкірттерін шетелге апарып, ондағы әйгілі университеттің профессорларынан дәріс алып, саяхаттап қайтуға жағдай туғызады. Мұндай батыл қадамдар жасайтын Аралдағы жалғыз қосымша білім беру орталығы «Умка» оқу орталығы деп сеніммен айта аламын. Сөзімнің дәлелі ретінде Үміт Қазыбайқызы өзінің бір топ шәкіртімен күні кеше ғана бір апта Дубайға барып келді. Сол топтың арасында менің қызым Нұрсезім де бар. Оқушылардың шетелдегі қаржылық шығындарының да жартысын ата-аналар өтесе, жартысын оқу орталық төлеп берді. Біз тек жол ақысын өтедік. Ал апай жатын орнын, тамағы мен саяхатының қаржысын көтерді. Балалардың осы сәттегі көңіл-күйін сөзбен жеткізіп айту мүмкін емес. Бұл деген керемет емес пе?!Өзге елдің табалдырығын аттап, жерін көрген қызымның қуанышында шек жоқ. 13 жаста болса да ол ересек адамша сөйлеп әсерімен бөліскенде өзіміз таң қалдық.– Анашым, әлемде қандай керемет қалалар, зәулім ғимараттар мен техникалар бар. Осының бәрін адам ойлап тауып, адам қолымен жасалды ғой. Мен болашақта шетелде оқығым келеді. Мұнда мол тәжірибе жинақтап &nbsp;Қазақстанның дамуына үлес қоссам деймін. Біздің еліміздің де осындай ғылым, білімі дамыған, сәулеті келіскен көркем ел болғанын қалаймын, – деді қызым.&nbsp;Олар өздерінің теориялық білімдерін іс жүзінде жүзеге асырып, ағылшындармен сұхбаттасты. Білікті университеттің профессорларының лекцияларын тыңдады және Қазақстанды, оның ішінде Аралды әлем халқына таныстырды.Әрине, жас балалармен шетелде жүру оңай емес. Бірақ сондай қиындықтарға қарамастан Үміт Қазыбайқызы шәкірттері үшін жаны қалмай бәйек болып жүр. Олардың әрқайсысына өзінің баласындай мейірімін төгуде. Келер жылы жақсы нәтиже көрсеткендерді жолдамамен Англияға апаруды да жоспарлап отыр.Болашақ осы жас жеткіншектердің қолында. Сондықтан ата-ана баласының болашағы үшін қазірден бастап қамдануы керек. Қай уақытта да балаға жан-жақтан қолдау болғанда ғана жақсы нәтиже көрсетеді. Және ата-ана өз қалауын емес, баланың қалауын орындауға тырысу керек деп ойлаймын. Ойлап қана қоймай, осыны ұстанамын. Үміттің білімі мен біліктілігіне көзім толық жеткен соң екінші қызым Бегімсұлуды да осы оқу орталығына бердім. Мүмкін ол Нұрсезім сияқты әлем аралайтындай нәтижеге қол жеткізе алмас, дегенмен өз нанын сұрап жейтін ағылшыншасы болса деймін.&nbsp;«Умка» оқу орталығының жақында Алматы қаласынан филиалы ашылды. Аралда жүріп, еліміздің алып шаһары Алматыдан оқу орталығын ашу кез-келген адамның қолынан келе бермейді. Сондықтан осындай білімді ұстаздың өз туған жерімізден шыққанына қуанамыз және бағалай білуіміз керек.&nbsp;Бұл мақаланы редакцияға жолдаудағы мақсатым – арамызда жүрген осындай жанашыр ұстаздың еңбегін елге білдіру және ағылшын тілін жақсы меңгертетін орталық таппай жүрген ата-аналарға жол сілтеу.Э.Келімбетова

Шәкірттерін шетел аралатқан - Үміт Қазыбаева

<a href="https://kyzylorda-news.kz/">Kyzylorda-news.kz</a>&nbsp;Адам өмірден үйреніп, жақсы мен жаманның дәмін татып барып, кең арналы жолға түседі.&nbsp;Санаңда сәуле болса, оқып-тоқып алған білімің, халықтың адал да ақпейіл ұл-қызынан көргенің, үйренгенің игілікке айналады. Кездескен кісіңнің жақсы жағын көріп, көңіліңе тоқи алсаң ғана көңіл көкжиегің кеңейеді. Болмысы бөлек, жұмысына жауапты азаматтар ел арасында жетерлік. Солардың ішінде – әр істі жауапкершілікпен қолға алатын жанның бірі – Серік Сапақов.Ақжарқын қалпынан, ағалық жолынан айнымайтын кейіпкерімізден үйренеріміз мол. Атқарған ісіне адалдығы мен терең ойлап, оң шешім шығаратын Серік Тұрмағамбетұлы Ақжар ауылында дүниеге келген. Ол 1973 жылы сондағы мектептің табалдырығын аттайды. 1977 жылдан бастап Жаңажол ауылына қоныс аударғандықтан, №107 мектепті тәмамдайды. Мектепті бітіре сала колхозға жұмысқа қабылданып, 2 бригадаға тракторшы болып жіберіледі. 1984-1986 жылдары Кеңес әскеріне қабылданып, азаматтық борышын өтейді. Одан кейін де №7 өндіріс бригадасында жұмысын жалғастыра береді. Өз ісіне жауапты, тапсырылған істі тиянақты орындайтын ол 1988-1989 жылдары ауылдық бастауыш комсомол ұйымының хатшысы, 1989 жылдан 2019 жылға дейін ауылдық мәдениет үйінің директоры, 2020 жылдан бастап «Жаңажол» ЖШС-де ұйымдастырушыпрограммист болып қызмет атқарып келеді. Қай уақытта да жұмысын алдыңғы орынға қоятын оның еңбегі елеусіз қалған емес. Елге қызмет еткен осынау жылдарда бірнеше рет ауыл, аудан, облыс әкімдерінің «Алғыс хатымен» марапатталған. 2003 жылы «Жылдың үздiк мәдениет кызметкерi» атанса, 2005 жылы республикалық додада «Мәдениетті ауыл» номинациясын жеңіп алған. Мәдениет үйінде қызмет еткен уақытында халықаралық байқауларда жүлдегер, республикалық сайыстарға жеңімпаздар дайындағаны үшін облыстық мәдениет басқармасының алғысын алған. 2017 жылы салалық мәдениет, спорт және ақпарат кызметкерлерiнiң кәсiптiк одағының «Еңбек даңқы» төсбелгiсi және «Халық мақтанышы» орденімен марапатталған. Өзінің жұмысымен қоса қоғамдық істерді де қалт жібермейтін ол 1989-2000 жылдар аралығында учаскелік сайлау комиссиясының хатшысы болса, 2000 жылдан 2017 жылға дейін сайлау комиссиясының төрағасы қызметін атқарған. Сонымен қатар, мәдениет саласының үздігі Сұлтан Сармолдинге арналған «Сырдың сырбаз Сұлтаны» атты кітапты жинақтаушы редактор. Жұмыста абыройлы ағамыз, отбасында да өнегелі әке, ардақты ата. Жары Гүлбанумен бірге 3 ұл, 1 қыз өсіріп құтты орнына қондыруда. Қызы Құралай жаңақорғандық азаматқа тұрмысқа шығып, сондағы ХҚКО-да қызмет етуде. Мұхтар мен Тоқтар есімді ұлдары үй болып, немере сүйгізіп, ата бақытын еселеу де. Ал кенжесі Саттар ауданда жас тар тәжірибесімен жұмыс істейді.<blockquote>– Қазақта «Отан – отбасынан басталады» деген дана сөз бар. Шынында да әрбір азамат үшін Отан деген ұғымнан кейін отбасы тұрады. Жас ұрпаққа саналы тәрбие беру – әрбіріміздің парызымыз. «Балаңды тәрбиелеме, өзіңді тәрбиеле» дегендей, бала біздің айтқанымызды емес, көргенін жасайды. Сондықтан да, барлық жағынан перзенттерімізге өзіміз үлгі болуымыз керек. Ата-ана тәрбиелі болса, баламыз адамдық ары биік азамат болады. Үлкенді сыйлайтын ұлттың ұрпағы болғандықтан, бүгінде өзіміз де үлкендіктің үлгісін көрсетуге тырысып жүрміз, – дейді ол.</blockquote>Серік ағайды ауыл халқы жұмысын асқан жауапкершілікпен атқаратын нағыз майталман маман ретінде таниды. Әсілі адамның адамшылығы – мейірімі мен көңіл шуағының өзінен артылып, өзгеге сәулесін түсіруінде, ары мен жанын ізгілікке толтыра білуінде сияқты. Оның бойындағы адамгершілік қасиеті мен ақкөңілділігі туралы әңгіме бөлек. Осындай ақжарқын қалпынан, ағалық жолынан айнымайтын кейіпкерімізден көп жас үлгі алса дейсіз.«Ер жігітті ер үстінде таны» дейді дана халқымыз. Серік Тұрмағамбетұлы қандай ортада жүрсе де, қарапайым қалпынан айнымай, еліне деген міндеті мен парызына адалдық танытып келеді.

Еңбек ер атандырады

<a href="https://kyzylorda-news.kz/">Kyzylorda-news.kz</a> Тарихтың тарғыл беттерінде – қазақтың аты, заты және хақы қалды. Егеменді ел болғалы есімізді жиып, өзгелермен тереземізді тең ұстап келеміз. Сол теңдігіміздің тегеуріні тектілік нарқын әспеттеп, бүгінде атағымыз күллі әлемге қарыштап тұр. Мәселен, бойындағы күштің жойқындығын түрлі амал-тәсілдермен көрсеткен Балуан Шолақтың даңқы көзі тірісінде күллі шартарапты шарлаған еді. Елу бір пұт гір тасын көтеріп, әйгілі балуандармен күреске түскені, ешқашан жауырыны жерге тимей, жүйрік ат үстінде тік тұрып немесе шалқалап жататыны туралы естігенде таңғалмайтын жан жоқ. Алып күш иесі Қажымұқан да қазақ ұлтының теңдесі жоқ балуаны еді. Бұрынғы өткен батыр бабалардың мұндай ерлігі біз үшін аңыз-әфсана секілді көрінетін. Алайда сондай батырлардың жалғасы бүгінгі қазақ жігіттерінің арасынан табылатындығы ерекше қуантады.Жақында шежірелі өлке Шиеліде толағайлар тартысқан керемет күн болды. Құрбан айт мерекесі аясында ұйымдастырылған шараға біз де қатысып, тамаша әсер алып қайттық. Шараның ұйымдастырушылары Шиелі аудандық орталық мешіті мен өңірдің жастары және Шиелі «Біз біргеміз» қоғамдық қоры ұлттық өнер үшін қызмет етіп жүр. Сайыстың жалпы жүлде қоры 1 миллион теңгені құрады. Мерекелік думанды топқа түскен жауырыны қақпақтай саңлақтардың қай-қайсысы да жүлдеден үмітті еді. Бәйгенің аты бәйге болған соң, үздіктерден қара үзіп шыққан оғландар топ жарды. Сайыс белгілі бір атаулардан тұрды. Атап айтсақ, балалар арасындағы қазақ күресі мен аймақтық командалық арқан тартысы, қылыш көтеру және көшпенділер мен алыптылар сайысы.Мерекелік кештің шымылдығы балаларға арналған спорттық ойындармен басталды. «Мен», «мен» деген кішкентай балдырғандар қазақша күресіп, жүлделі орындармен марапатталып, велосипед ұтып алды. Сондай-ақ 3000 балаға сыйлықтар таратылды. Орталық алаңға жиналған бүлдіршіндердің қалай қуанғанын көрсеңіз?!Келесі арқан тартыста 12 команда қатысып, бақ сынасты. Нәтижесінде I орынды Ы.Жақаев ауылы, ал II орынға Нартай ауылы іліксе, III орын Бала би ауылы жеңіп алды. Әрмен қарай тартысты жарыс қарапайым халықтың арасында өткізілген қылыш көтеру және көшпенділер жарысымен жалғасты. Оған да арнайы сыйлықтар ұсынылды. Нақтырақ жеткізсек, толағайлар 100 келілік тасты құшақтап қашықтықтан жүріп өтсе, енді бірі бөрене көтеріп, арба сүйреді. Содан кейін гірді және қапты көтеріп күш сынады. Білектілер мен жүректілер жарысы жоғары деңгейде өтті. Бақ таластықта бақ пен қатар баптың да шабатынын ескерсек, толағайлар текетіресі нағыз айыз қандырар сайысқа айналды.Олай дейтініміз, орталық алаңның бопыдай шаңын бадырая қаққан сайыпқырандар сай-саланы қиқуға толтырып, күйбең тірліктен әбден қажыған көрермендерді бір серпілтті. Әсіресе алыптар айқасының финалдық бәсекесі ерекше толқумен қатар, еріксіз алақан ұрғызып отырды.Алыптар сайысының нәтижесі бойынша толағайдың бас жүлдегері атанған шиелілік Қуаныш Шәріпбекұлы жеңімпаз белбеуі мен 150 мың теңге ақшалай сыйақыға ие болды. Екінші орынға Арыс қаласының намысын қорғауға келген Азамат Мақұлбеков жайғасса, үшінші орынды жерлесіміз Бағлан Айтбай иеленді. Қоса кеткен жөн, алыптар сайысында өз мықтылығын көрсеткен Қуаныш алдағы уақытта Астанада өтетін V Дүниежүзілік көшпенділер ойынына жолдама алды.Сонымен қатар жарысқа қол күрестен халықаралық дәрежедегі спорт шебері, ҚР рекордшысы Тимур Спатаев келіп, қатысты. Қатысқаннан бөлек жастарға қолдау көрсетіп, кешті жүргізді.– Бұл кешегі Балуан Шолақ, Қажымұқан, Иманжүсіп сияқты алып күш иелерінің ізін жалғаушы ұрпақтарының рухын оятып, қазақы намысын шыңдау үшін ұйымдастырылып отырған сайыс деуге болады. Бүгін бұл сайысқа күштері бойына сыймай, буырқанып тасыған 16 жігіт «сен тұр, мен атайын» деп сақадай сай тұрды. Алыптар сайысы – саламатты өмір салтын насихаттайтын турнир. Ендеше қызықты әрі тартысты додада кіл мықтылар дара шықты, – деді ол.Сонымен мерекенің соңы концерттік бағдарламаға ұласып, жиылғандар мәресәре болып тарқасты. Ал біз жарысқа түскен жігіттерге қарап баяғы батырлардың бейнесін көргендей болдық.

Қазақстан және Қызылорда облысының жаңалықтары: Қоғам