<a href="https://kyzylorda-news.kz/">Kyzylorda-news.kz</a> Қызылордада сәби өмірге келіп, бес күннен кейін шетінеп кетті. Туғанда денсаулығы жақсы деп сендірген дәрігерлер сараптама нәтижесі баланың миында ісік барын көрсеткенін айтты. Ұлынан айырылған ата-ана болған жағдайға дәрігерлер кінәлі деп санайды.&nbsp;Бұл туралы <a href="https://stan.kz/kizilordada-bes-kunnen-keyin-shetinep-ketken-sabidin-at-416516/">Stan.kz</a> ақпарат агенттігі 31 арнаның Информбюро жаңалықтар қызметіне сілтеме жасап хабарлайды.Ерлі-зайыпты Дәулет пен Айгүл бір ай бұрын ұлды болдық деп қуанып, жақындарынан сүйінші сұраған. Өмірге келген нәрестеге Байжан деген есім қойып үлгеріпті. Алайда небәрі бес күн жарық дүниені көрген шақалақ шетінеп кеткен.Әйел ұлын кесарь тілігі арқылы дүниеге әкелген.&nbsp;Алайда дәрігерлер баланың жатырда өкпесі қысылып қалғанын айтты деп отыр. Ал бес күн өткенде сәбидің денсаулығы күрт нашарлап, жансақтау бөлімінде жан тапсырған. Ал сараптама қортындысында баланың шетінеп кетуіне миындағы ісік себеп болғаны жазылған.&nbsp;Ерлі-зайыпты&nbsp;бұрын-соңды байқалмаған сырқат дәрігерлердің&nbsp;салғырттығынан пайда болуы мүмкін деп күдіктенеді.<blockquote>“Киіндіріп жатқан кезде ме, әлде былайынша уақыттарда ма қатты бір жерге қойып қалды басын. Болмаса ұрып алды. Әйтпесе ісік қайдан пайда болады? Сап-сау бала, ол қалай кетіп қалады деп едім. Неден болып жатқанын біз де&nbsp;түсінбедік деп отыр”, –&nbsp;дейді Айгүл.</blockquote>Ал Қызылордадағы “Ана мен бала” орталығындағы дәрігерлердің өз шындығы бар. Олардың айтуынша, баланың денсаулығында құрсақта жатқанда біткен ақауы болған.<blockquote>“Ұзақ құрсақ ішілік гепоксия негізінде бас ми ишемиясы диагнозы қойылып, жансақтау бөлімінде нәресте ем алды. Бұл оттегі жетіспеушілігі ғой. Соның негізінде полиорганды жетіспеушілік бас ми ісінуінен ем-домға қарамастан нәрестенің ағзасында қайтымсыз процестер болуы негізінен бала 11 наурыз&nbsp;күні шетінеп кетті”, –&nbsp;дейді&nbsp;Қызылорда облыстық ана мен бала перинаталдық орталығы бас дәрігерінің орынбасары Сәуле Жақанова.</blockquote>Дәрігерлер нәрестені аман алып қалу үшін қолымыздан келгенін жасадық деп ақталып әлек. Алайда ерлізайыпты олардың сөзіне сенуден бас тартты. Сол себепті құзырлы органдарға дәрігерлердің үстінен шағым түсірмек.Фото: Нұрболат Нұржаубай

Қызылордада бес күннен кейін шетінеп кеткен сәбидің ата-анасы баланың өліміне дәрігерлерді кінәлайды

<a href="https://kyzylorda-news.kz/">Kyzylorda-news.kz</a> 16-17 сәуір күндері Орталық Азия бойынша медиа саласының мамандары Астанада бас қосады. Форумға Қазақстан, Өзбекстан, Қырғызстан, Әзербайжан, Тәжікстан, Түрікменстан, Ұлыбритания, Қытай, Қатар, Ресей және басқа да елдерден 700-ден астам делегат қатысып жатыр, деп хабарлайды <a href="https://kaz.inform.kz/news/ortalik-aziya-eldernn-brlesken-telearnasi-kuriladi-mediaforum-44d0c7/">Қазақпарат.</a>Биылғы форум «Жаһандық өзгерістер дәуіріндегі Орталық Азия. Стратегиялық даму құралы ретіндегі медиа» деп аталады.Екі күн бойы панельдік сессияларда Орталық Азия елдерінің ақпарат құралдары үшін жаңа даму мүмкіндіктері мен ынтымақтастық мәселелері, жаһандық медианың дамуы, болашақтың ақпараттық кеңістігін қалыптастыру, ЖИ және көп дерек кезеңіндегі медианың цифрлық трансформациясы, сондай-ақ ел имиджін қалыптастырудағы әлеуметтік желілердің рөлі талқыланады.ҚР Мәдениет және ақпарат министрі Аида Балаева Орталық Азия қазіргі уақытта Еуропа мен Азия арасындағы сенімді көпір әрі транзиттік хаб ретінде ғана емес, зор инвестициялық, сауда-экономикалық, туристік және мәдени-гуманитарлық әлеуеті бар ауқымды орталық ретінде қарастырылатынын атап өтті.<blockquote>− Орталық Азия көшбасшылары деңгейінде ақпараттық саладағы ынтымақтастықты жандандыру мәселесі бірнеше рет талқыланғаны мәлім. Былтыр Астанада өткен консультативті кездесуде Президент Қасым-Жомарт Тоқаев бірлескен медиаөнімдерді жасау бастамасын көтерді. Қазақстан Орталық Азияның ортақ телеарнасын құру және аймақтық әлеуетті осы аумақта тұратын халықтардың достығы мен бірлігі туралы хабардар ететін тележобаларды және халықтарымыздың тарихи мән-ерекшелігі туралы танымдық телерадиобағдарламалар топтамасын дайындау идеясын қолдады. Бүгінгі кездесуімізде осы мәселеге мұқият тоқталып, Silk Way телеарнасының жұмысына бірлескен контент дайындау бойынша нақты шешімдерді қабылдадық, − деді министр форумның ашылу салтанатында.</blockquote>Осылайша қазіргі уақытта Орталық Азия елдері өңірдегі ақпараттық ынтымақтастықты нығайтуға бағытталған бірлескен телеарна мен өңірлік медиаплатформаны іске қосу мүмкіндігін қарастырып жатыр.Фото: Виктор Федюнин

Орталық Азия елдерінің бірлескен телеарнасы құрылады – Медиафорум

<a href="https://kyzylorda-news.kz/">Kyzylorda-news.kz</a> Бүгін Мәжілістің жалпы отырысында депутаттар 3 заңды бірінші оқылымда, ал 2 заңды екінші оқылымда талқылайды.Атап айтқанда, депутаттар бірінші оқылымда «Нысаналы капитал қорлары (эндаумент-қорлар) туралы» заң жобасын талқылайды. Баяндамашы - Ғылым және жоғары білім министрі Саясат Нұрбек.Жаңа заң жобасы Үкіметпен нысаналы капитал қорлары мен эндаумент-қорларды құру және олардың қызмет етуінің құқықтық негізін қалыптастыру үшін әзірленген. Эндаумент-қорларды басқару үшін инвестициялық табыс пен меценаттық қызмет нысандарын қаржыландыруды қамтамасыз ететін коммерциялық емес ұйым ретінде мақсатты капитал қор құру ұсынылады. Осы заң жобасына ілеспе ретінде Азаматтық кодекске, «Білім туралы», «Қайырымдылық туралы» және «Ғылым мен технологиялық саясат туралы» заңдарға өзгерістер енгізу қарастырылған.«Қазақстан Республикасының кейбір заңнамалық актілеріне нысаналы капитал қорларының (эндаумент-қорлардың) қызметі мәселелері бойынша өзгерістер мен толықтырулар енгізу туралы» Қазақстан Республикасы заңының жобасы туралы да Ғылым министрі баяндайды.Жалпы отырыста депутаттарға ішкі істер органдарының қызметі саласындағы нормалардың артық (шамадан тыс) заңнамалық регламенттелуін болғызбау мәселелері бойынша түзетулерді бірінші оқылымда қарау ұсынылады. Аталған заң жобасы Қазақстан Республикасы Президентінің 2022 жылғы 13 сәуірдегі «Мемлекеттік аппараттың қызметін бюрократиядан арылту жөніндегі шаралар туралы» Жарлығын іске асыру мақсатымен әзірленген. Өзгерістер қолданыстағы 16 заңға енгізіледі. Бұл заң жобасы бойынша депутаттар алдына Ішкі істер министрінің міндетін атқарушы Санжар Әділов шығады.Сонымен қатар күн тәртібінде «Қазақстан Республикасының аумақтық қорғаныс туралы» заң жобасы да бар. Бұл құжатпен аумақтық қорғаныстың құқықтық негіздері, оның мақсаттары, міндеттері мен қағидаттары, мемлекеттік органдардың, ұйымдар мен азаматтардың өкілеттіктері мен жауапкершілігі айқындалады. Заң жобасын депутаттар екінші оқылымда қарайды. Баяндамашы - Халықаралық істер, қорғаныс және қауіпсіздік комитетінің мүшесі Максим Рожин. Ол «Қазақстан Республикасының кейбір заңнамалық актілеріне аумақтық қорғаныс мәселелері бойынша өзгерістер мен толықтырулар енгізу туралы» заңының екінші оқылымы кезінде әріптестерінің алдында сөз сөйлеп, сауалдарына жауап береді.Жалпы отырысқа жоғарыда аталған министрлерден бөлек өзге де ведомстволардың вице-министрлері, орынбасарлары келеді. Олар жалпы отырыс аяқталғаннан кейін БАҚ өкілдерінің сауалына жауап береді.Фото: ҚР Парламенті

Мәжілісте қандай заң жобалары талқыланады?

<a href="https://kyzylorda-news.kz/">Kyzylorda-news.kz</a> Елордада ІІ Орталық Азия медиа форумы өз жұмысын бастады, деп хабарлайды <a href="https://baq.kz/astanada-ii-ortalyq-aziya-media-forumy-bastaldy-200011814/">BAQ.KZ</a> тілшісі.Ауқымды шараға саясаткерлер, журналистер, медиакомпаниялар мен халықаралық ұйымдардың басшылары, сондай-ақ танымал ақпарат құралдарының сарапшылары қатысып отыр. Форумға Қазақстан, Өзбекстан, Қырғызстан, Әзірбайжан, Тәжікстан, Түрікменстан, Ұлыбритания, Қытай, Катар, Ресей және өзге де мемлекеттерден 700-ден астам делегат жиналды.Форумның мақсаты – Орталық Азиядағы медиа ұйымдар мен халықаралық серіктестер арасындағы ынтымақтастықты тереңдету, БАҚ-тың цифрлық трансформациясы мен оның аймақтың ақпараттық кеңістігіне ықпалын талқылау, сондай-ақ қоғамдық пікір қалыптастырудағы бұқаралық ақпарат құралдарының рөлін зерттеу.Сонымен қатар форум барысында жаһандық деңгейдегі маңызды сын-қатерлер – климаттың өзгеруі, геосаяси тұрақсыздық және олардың Орталық Азия экономикасына әсері де назардан тыс қалмайды. Тұрақты дамуды қолдау және халықаралық аренада аймақтық мүдделерді ілгерілету мәселелері де күн тәртібіне қойылған.Форум аясында екі күн бойы өтетін панельдік сессияларда қатысушылар Орталық Азия елдері арасындағы медиа ынтымақтастықтың жаңа мүмкіндіктерін, жаһандық медиа саласының даму жолдарын, болашақтың ақпараттық кеңістігін қалыптастыру мәселелерін, сондай-ақ жасанды интеллект пен үлкен деректер дәуіріндегі медиа саласының трансформациясын және әлеуметтік желілердің ел имиджін қалыптастырудағы рөлін кеңінен талқылайды.Сонымен бірге форум шеңберінде Орталық Азия елдерінің ақпарат өкілдері арасында жұмыс кездесуі өтеді.Фото: Гүлжан Раманқұлова/Baq.kz

Астанада ІІ Орталық Азия медиа форумы басталды

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимов Мәдениет ауылдық округі тұрғындарымен кездесіп, ұсыныс-пікірлерін тыңдады.<blockquote>– Өздеріңізге белгілі Мемлекет басшысының, Үкіметтің, облыс әкімінің қолдауымен елді мекендерде көптеген игі бастамалар жүзеге асырылып келеді. Халықтың ұсыныс-пікірін ескеріп, биыл да бірқатар жұмыстарды жүзеге асыруды көздеп отырмыз. Біз үшін халықтың ойы, пікірі маңызды, сондықтан да айтар ұсыныстарыңыз бен ой-пікірлеріңіз болса тыңдауға әзірмін, – деді аудан әкімі А.Ибраимов.</blockquote>Ауыл тұрғындары аяқсу мәселесін көтерді. Аудан әкімі халық аяқсудан тапшылық көрмеуі тиіс екенін айтып, бұл мәселені шұғыл шешу үшін жауапты сала басшыларына тиісті шаралар қабылдауды тапсырды.&nbsp;Айта кетейік, Мәдениет ауылындағы жаңа қоныс көшесіне күрделі жөндеу жұмыстарына ЖСҚ әзірленіп, бюджеттік өтінім ұсынылды. Қазіргі уақытта қаржы күтілуде. Сонымен бірге ауылдағы 4 көшені жарықтандыру бойынша да тиісті құжаттар әзірленіп, бюджеттік өтінім берілді.<img src="https://knadmin.beoblood.kz/uploads/Zhala_ash_audany_kimi_2_20decb8248.jpg" alt="Жалағаш ауданы әкімі 2.jpg">Фото: Жалағаш ауданы әкімінің баспасөз қызметі

Ардақ Ибраимов: "Тұрғындар аяқсудан тапшылық көрмеуі тиіс"

<a href="https://kyzylorda-news.kz/">Kyzylorda-news.kz</a> Арал ауданының әкімі Аманжол Оңғарбаев жұмыс сапарымен Ақирек ауылдық округіне барып, атқарылып жатқан біршама жұмыстармен танысты. Алдымен 2023 жылы бастау алған «Самара-Шымкент-Бекбауыл» автомобиль жолының 21,2 шақырым болатын аудандық маңызы бар жолдың жай-күйімен танысты.&nbsp;Қазіргі таңда аталған жолдың 20 шақырымына қиырышық тас (ГПС) төселініп, 1,2 шақырым жолына қажетті материладры нысан басына жеткізілуде. Жалпы құны 1,5 млрд теңгені құрайтын жол құрылысын «Строй модуль-Астана» ЖШС қолға алған. Құрылысы қарқынды жолдың бүгінде көптің үмітіне айналғаны белгілі. Мердігер мекеме ағымдағы жылдың шілде айына дейін жұмысты аяқтауды жоспарлауда. Аудан әкімі Аманжол Сақыпұлы құрылысы жүріп жатқан жолда мердігер мекеме өкілдерімен жүздесіп, қолға алған жұмысты сапалы әрі мерзімінде бітіруді тапсырды.&nbsp;Мұнан соң Сыр беткейдегі жұртшылықтың игілігі үшін қолға алынған ең ауқымды бастамалардың бірі – Қамыстыбастың тұсындағы автоматты газ тарату стансасының құрылыс жұмыстарымен танысты. «Бейнеу-Шымкент» магистарльды газ құбырынан 28 шақырым қашықтықтағы маңызды газ желісінің бүгінде 24 шақырымы тартылып, қалған 4 шақырымдай газ желісі алдығы уақытта толық аяқталады деп күтілеуде. Жобаның құрылыс жұмыстарын қолға алған «Транс Азия Констракшн» ЖШС мердігер мекемесі тарапынан құрылыс аумағында барлығы 12 техника, 25 адам жұмыс жүргізуде.Бұл станса арқылы 18 елді мекендегі 15 мыңға жуық халыққа кезең-кезеңімен көгілдір отын жеткізуге мүмкіндік болады. Осыншама ағайынның арманын ақиқатқа айналдыратын ауқымды жобаның игілігін Қамыстыбастан бастап жақын ауылдар кезең-кезеңімен көре бастайды. Аудан басшысы мекеме жұмысшыларымен тілдесіп, бүгінгі күнге дейін жүргізілген жұмыстардың жай-жапсарына қанықты. Мекеме өкілдерімен тілдесіп, ауқымды жұмысты аяқсыз қалдырмай, айтылған мерзімде, белгіленген уақытта бітіруге күш салу керектігін жеткізді.Ауданның туристік әлеуетін арттыруда Қамбаш көлінің маңызы зор. Биыл Сырдария өзенімен келетін су көлемінің мол болуы және «Аспай» су ағытқысының көмегімен Қамыстыбас-Ақшатау көлдер жүйесі толықтай су алды. Қамбаш көлінің де арнасы толып, бұрын жағалаудан 400-500 метрге алыстап кеткен көл жағажайдағы шағын үйлердің маңына келген. Демек бұл ұрымтал тұсты ұтымды пайдалану арқылы ауданның туристік әлеуетін арттырауға мол мүмкіндік.Аудан әкімі Аққұмшық жағажайында жауапты азаматтармен тілдесіп, алдағы уақытта бұл маңды толық талапқа сай ету мәселесін көтерді. Жергілікті кәсіпкердың алдағы жоспарына назар қойып, оң өзгерістерге бастайтын бастамаларға қолдау болатынын жеткізді.<blockquote>– Өздеріңіз білетіндей ауданда ең маңызды туристік аймақ саналатын Қамбаш көлінің биыл арнасы толды. Осы тұста бұл жерге жыл сайын алыс-жақын аймақтардан туристер келетінін ескерсек, биыл келушілердің санын еслеп артуы мүмкін деген ой бар. Бірақ біз ең алдымен осы жерге келген әрбір тынығушыға ерекше жағдай жасалуын ойлаймыз. Бұрынғы көзқарастан арылып, жабайы мәдениетті қойуымыз керек. Тауықтың күркесіндей бастырмаларда қонақ жайлап, ауданның дәрежесіне дақ түсіруге болмайды. Сондықтан осы маңдағы талапқа сай келмейтін демалыс орындарын көз тартар керемет ғимараттарға алмастыру қажет етіледі. Мәселен автотұрақ, түнгі жарық, тазалық және қоғамдық әжетхана мәселесі толық талапқа сай болуы тиіс. Осы маңнан табыс табам, жұмыс істеймін деуші кәсіпкерлерге қойылар талап сондай. Қазірден соған бейімделе бастау керек. Оған мүмкіндігі бар кәсіпкерлер жеткілікті, – деді аудан әкімі.</blockquote>Осы мәселеге қатысты азаматтардың ұсынысына құлақ түрген аудан әкімі Аманжол Сақыпұлы туристік әлеуетімізді арттыру жолында еңбек етемін деуші азаматтарға әркез қолдау балатынын жеткізді.Фото: Арал ауданы әкімдігінің баспасөз қызметі

Атқарылып жатқан жұмыстармен танысты

<a href="https://kyzylorda-news.kz/">Kyzylorda-news.kz</a> Қазақстандықтарды жазда&nbsp;аптап ыстық күтіп тұр. Сол себепті министрлікті&nbsp;орман шаруашылығында өрт шығу қаупі жоғарылағаны алаңдатып отыр.&nbsp;Бұл туралы&nbsp;<a href="https://stan.kz/kazakstanda-zhazda-aptap-istik-boladi-ministrlik-orman-416493/">Stan.kz</a>&nbsp;ақпарат агенттігі хабарлайды.&nbsp;Үкімет отырысында экология және табиғи ресурстар министрі Ерлан Нысанбаев аптап ыстық мезгілінде орман шаруашылығына төнетін қауіпті мәлімдеді.<blockquote>"Қазгидрометтің болжамы бойынша, биылғы жаз&nbsp;ыстық болады. Осыған байланысты облыс әкімдіктері ормандарда өрт қауіпсіздігін сақтау үшін барлық шараны қабылдауы керек", –&nbsp;деді министр үкімет отырысында.</blockquote>Жыл басынан бері еліміздің мемлекеттік орман қоры аумағында 32 орман өрті тіркелді.Оның айтуынша, ел өз күштері мен құралдарын толық жауынгерлік дайындыққа келтіріп, мемлекеттік орман қоры аумағында ірі орман өрттерінің алдын алуға кірісті.Бөлінген қаржы қажеттілікті толық өтей алмайтынын айтқан министр үкімет басшысынан көмек сұрады.<blockquote>"Құрметті Олжас Абайұлы, осы маңызды мәселені шешуге көмектесуіңізді сұраймын. Қосымша 11 млрд теңге қажет”, – деді министр.</blockquote>Нысанбаевтың айтуынша, өрт сөндіру техникасының 75 бірлігі жарамсыз, 314 көліктің 132-сі есептен шығарылуы керек.&nbsp; Бұл – бүкіл автокөлік паркінің 42 пайызы.Сонымен қатар&nbsp;ол орман күзетшілерінің жетіспейтінін де айтты.<blockquote>"Өткен жылдағыдай бұл өзекті мәселе. Шығыс Қазақстан және Павлодар облыстарында орман күзетшілерінің санын стандартқа дейін арттыру мәселесі шешілген жоқ", –&nbsp;деді министр.</blockquote>Төтенше жағдайлар вице-министрі Кеген Тұрсынбаев та жаз мезгілі құрғақ, биік шөп өсетінін баса айтты.<blockquote>"Өрт қаупі жоғары. Қазір министрліктің басқару орталығында жедел топ тәулік бойы жұмыс істеп жатыр. Былтырғыдай өрттің алдын алу және ертерек анықтау басты назарда", – деді Тұрсынбаев.</blockquote>Фото: freepik.com

Қазақстанда жазда аптап ыстық болады: Министрлік дабыл қақты

<a href="https://kyzylorda-news.kz/ru">Kyzylorda-news.kz</a> Елімізде орын алған су тасқынының салдарын жою және алдын алу шараларына Қызылорда облысының құтқарушылары да жұмылдырылған. Атап айтқанда, Ақтөбе, Ақмола облыстарында кезек күттірмейтін және авариялық-құтқару жұмыстарына өңірлік төтенше жағдайлар департаментінен 52 маман, 8 техника, 22 мотопомпа және 2 моторлы қайық бар. Бүгін Өңірлік коммуникациялар қызметінің ақпарат алаңында су тасқыны кезінде өзге өңірлерде атқарылған жұмыстар мен су тасқынының алдын алу жұмыстары туралы айтылды.<blockquote>– Авариялық-құтқару жұмыстары кезінде Ақтөбе облысындағы Құйылыс елді мекенінен өтетін Ырғыз бен Торғай өзендерінің қосылған арнасын нығайту мақсатында 9 585 дана қапқа құм толтырылып, ұзындығы 212 метр болатын бөгеттің жиегі күшейтілді. Ырғыз ауданына қатынайтын далалық жол бойында ауыл тұрғындарының күшімен салынған көпірді нығайту үшін 4 910 дана құм толтырылған қап төселді. Ақмола облысына қарасты Ешім ауылында су басу қаупі бар тұрғын үйлердің ауласының сырты 4 050 дана құм толтырылған қаптармен қоршалды. Сол елді мекендегі 265 тұрғын үйге және оның ішінде су басу қаупі жоғары 51 тұрғын үйге қауіптің алдын алу жұмысы атқарылды,- деді облыстық ТЖД бастығының орынбасары Бекболат Әбдіқадыров.</blockquote>&nbsp;<blockquote>– Су тасқынының алдын алу үшін қыс-көктем мезгілдерінде тиісті сала мамандары Сырдария өзені арнасындағы 10 су бекеттерінен, 4 су тораптарында су деңгейіне күнделікті мониторинг жүргізді. Ықтимал су тасқыны кезеңінде халықты көшіруге 61 эвакуациялық қабылдау пункті дайындалды. Қосымша 22 уақытша орналастыру пункті, 13 жылыту пункті жұмыс жасады. Су тасқынына қарсы департаменттің күш-құралдарының құрамында 123 адам, 23 техника, 6 жүзу құралы, 33 мотопомпа мен 2 тікұшақ әзірленді. Өңірде су тасқыны кезеңі шығынсыз тәмамдалды, төтенше жағдай орын алған жоқ,- деді облыстық ТЖД төтенше жағдайдың алдын алу басқармасының бастығы.</blockquote>Фото: Қызылорда облысының Өңірлік коммуникациялар қызметі

Өңірде су тасқыны кезеңі шығынсыз аяталды

<a href="https://kyzylorda-news.kz/ru">Kyzylorda-news.kz</a> 15 сәуірде Қазақстанда Ғашықтар күні — аты аңызға айналған Қозы Көрпеш пен Баян Сұлуға арналған мереке атап өтіледі. Осы ерекше күні Қызылордада жас жұбайлар үшін салтанатты неке қию рәсімі өтті.Осы күні алғашқылардың бірі болып Дамир мен Ақерке Өтегеновтар некелерін заңдастырды. Жас жұбайлар бұл күнді кездейсоқ таңдамағанын мойындады - Қозы Көрпеш пен Баян Сұлудың оқиғасы оларды шынайылығымен шабыттандырады.<blockquote>"Біз үйлену тойымыз үшін дәл осы күнді таңдағанымызға өте қуаныштымыз. Ол ерекше мағынаға толы және мәңгілік махаббатты бейнелейді. Біздің сезімдеріміз Қозы Көрпеш пен Баян Сұлу сияқты күшті болады деп үміттенеміз", — деп Дамир мен Ақерке өз сезімдерімен бөлісті.&nbsp;</blockquote>"Азаматтарға арналған үкімет" мемлекеттік корпорациясының облыстық филиалының басшысы Аида Абибулаева осындай іс-шараларды өткізудің маңыздылығын атап өтті.<blockquote>"Жастар отбасын құру үшін Өозы Көрпеш пен Баян Сұлу күнін — адал және шынайы махаббаттың бейнесін таңдайтыны символдық. Мұндай оқиғалар неке институтын нығайтып қана қоймай, біздің мәдени құндылықтарымыздың сақталуына ықпал етеді", — деп атап өтті Аида Ибрагимқызы.</blockquote>Айта кетейік, бүгін қызылордалық 15 жұп осы күнді ерекше махаббат, адалдық және бақытты болашаққа деген үмітпен толтыра отырып, өз тағдырларын байланыстыруға шешім қабылдады.<img src="https://knadmin.beoblood.kz/uploads/Whats_App_Image_2025_04_15_at_15_35_59_1_8509268113.jpeg" alt="WhatsApp Image 2025-04-15 at 15.35.59 (1).jpeg">Фото: Отбасы орталығы

Қызылордада Қозы Көрпеш және Баян Сұлу күні атап өтті

<a href="https://kyzylorda-news.kz/">Kyzylorda-news.kz</a> Бүгін өртке қарсы дайындық, су тасқынының алдын алу мәселелері талқыланған Үкімет отырысы өтті. Оған облыс әкімі Нұрлыбек Нәлібаев селекторлық режимде қатысты.Аймақ басшысы Үкімет отырысынан кейін жиын өткізіп, көтерілген мәселелер бойынша жауапты сала басшыларына тапсырма жүктеді.«Статистикалық деректерге қарағанда, еліміздегі төтенше жағдайлардың 90 пайызы өрт салдарынан болады. Өңіріміздің құрғақ, желді климатын ескерсек, дала өрттерінің тұтану, тез таралу қаупі аса жоғары.Дала өрттерінің алдын алу үшін тұрақты мониторинг жүргізіп, тиісті шараларды дер кезінде қамтамасыз ету қажет. Орман, дала өрттерінің басым бөлігі тұрғындардың, шаруашылықтардың өрт қауіпсіздігі ережелерін сақтамауынан, жауапкершілікті сезінбеуінен туындайды.Жергілікті шаруашылықтар тазалық жұмыстарын жүргізерде орман мекемелеріне алдын-ала хабарлама беруі тиіс. Өрттің алдын алу шараларының толық ұйымдастырылуын қатаң бақылауға алыңыздар. Табиғи, адами факторлардың әсерінен магистральді және ауданаралық жол бойында, егіс алқаптарында құрғақ шөптің жану қаупі жоғары. Орман алқаптарында, егістікте бақылауды күшейту керек.Өңірімізде су тасқынының алдын алудың кешенді шаралары қабылданып, 14 ақпаннан бастап өзен бетінде мұз жүрді, наурыз айында толық тазартылды. Келген мол су көлдер жүйесіне жіберілді. Өзендегі су деңгейі магистральді каналдар мен көлдер жүйелеріне су алу арқылы реттелді. Суды тиімді пайдалану және су басу аймақтарының қауіпсіздігін қамтамасыз ету аса маңызды.<blockquote>Бүгінгі мәжілісте қаралған мәселелер өзекті. Қатаң бақылауда ұстап, мерзімінде тиісті шара қабылдау қажет», – деді Н.Нәлібаев.</blockquote>Айта кетейік, өрттің алдын алуда орман шаруашылығы мекемелерінде 15 өрт сөндіру автокөлігі, 10 дрон және 65 тұрақты өрт сөндіруші жасағы қызмет атқаруда.Соңғы 3 жылда өңірдегі орман шаруашылығы мекемелерінің материалдық- техникалық базасын нығайтуға қаржы бөлінді. Биыл 62 техника мен 80-ге жуық құрал алу көзделуде. Орман және дала өрттерін сөндіру үшін 18 тонна жанар-жағармай қоры дайындалып, 15 қадағалау мұнарасында тұрақты кезекшілік ұйымдастырылған.Су басу қаупі бар 29 аймаққа арнайы техника, күш-құралдары бар 135 жауапты мекеме бекітілді. Оларда 410 арнайы техника және 1 234 адам күші бар. Су тасқынына қарсы материалдық-техникалық қор жеткілікті, яғни 129,7 тонна жанармай, 95 110 қап және басқа да материалдар жинақталған. Ықтимал су тасқыны кезінде халықты көшіру пункттері дайын. Атап айтсақ, 61 эвакуациялық жинақтау және 71 эвакуациялық қабылдау пункті бар.<img src="https://knadmin.beoblood.kz/uploads/Oblys_kimdigi_zhinalys_2_d839dedea2.jpg" alt="Облыс әкімдігі жиналыс 2.jpg">Фото: Қызылорда облысы әкімінің баспасөз қызметі

Үкімет отырысында көтерілген мәселелер бойынша тапсырма берілді

<a href="https://kyzylorda-news.kz/ru">Kyzylorda-news.kz</a> Аймақ басшысының төрағалығымен өткен мәжілісте өртке қауіпті маусымға дайындық барысы және су тасқыны жағдайы туралы мәселелер қаралып, бірқатар олқылықтар назарға алынған болатын. Осыған сәйкес Арал ауданының әкімі Аманжол Оңғарбаевтың төрағалығымен арнайы мәжіліс өтіп, күн тәртібіндегі мәселелер бойынша аудан аумағында атқарылуы тиіс жұмыстар пысықталды.Айталық, 2025 жылдың І тоқсанында аудан аумағында барлығы 12 өрт оқиғасы тіркелген. Бұл алдыңғы жылмен салыстырғанда 4 есеге көбейген. Өрт салдарынан жарақат алғандар да бар. Аудан әкімі тілсіз жаудың алдын-алу бағытында әрбір жағдайға жауапкершілікпен қарап, тиісті жұмыстарды қазірден қолға алуды тапсырды. Сонымен қатар орман және дала өрттерін болдырмау керектігін жеткізіп, жауаптыларға қауіпті аумақтарға минералды жолақтарды жаңғырту жұмыстарын толық әрі сапалы жүргізуді тапсырды.Аудан аумағында шаруа қожалықтардың егістіктер мен жайылымдарда және шабындықтарда құрғақ шөптерді өртеу жұмыстары бекітілген кестеге сәйкес жүргізілу керек. Бұл бағытта аудандық төтенше жағдайлар бөлімімен бірлесіп жұмыс жасау маңызды. Мәселеге ауылдық округ әкімдері де бей-жай қарамауы тиіс.Мәжілісте көтерілген кезекті мәселе су тасқыны жағдайы туралы болды. Биыл Кіші Аралға түскен судың көлемі айтарлықтай ұлғайғаны байқалады. 2024 жылдың вегетация кезеңінде Кіші Арал теңізіне түскен судың көлемі де едәуір ұлғайды. 2022 жылдың қазан айында Кіші Арал теңізінің су деңгейі Балтық жүйесі бойынша 40,42 метрді құрап, су көлемі 18,5 млрд. текше метрге азайған болатын. Қазіргі таңда, су деңгейі Балтық жүйесі бойынша 41,13 метрді құрап, теңіздегі су көлемі 22,3 млрд. текше метрге дейін көбейді. Бұл мәселеге байыпты көзқарас танытқан аудан әкімі аудан аумағындағы жайылымдық жерлердің сулану деңгейін де тілге тиек етті.<blockquote>– Биыл Сырдария өзенімен келетін су көлемінің мол болуы және «Аспай» су ағытқысының көмегімен Қамыстыбас-Ақшатау көлдер жүйесі толықтай су алды. Әрине мол суды береке дейміз, бірақ екінші жағынан тілсіз жау екенін де жоққа шығара алмаймыз. Сондықтан мол судан келетін қауіптің болу ықтималдығын ескере отырып, тиісті мамандарға жағдайды тұрақты бақылауда ұстауды тапсырамын, – деді Аманжол Сақыпұлы.</blockquote>Жиын соңында аудан басшысы жер жырту жұмыстарына қысқаша тоқталып, бұл мәселеде шаруа қожалықтарына тиісті көмекті үйлестіру үшін арнайы техникалардың мүмкіндіктерін пайдалану керектігін атап өтті.<img src="https://knadmin.beoblood.kz/uploads/Aral_audany_m_zhilis_3efcbee674.jpg" alt="Арал ауданы мәжіліс.jpg">Фото: Арал ауданы әкімінің баспасөз қызметі

Тілсіз жаудан келер қауіптің алдын алу маңызды

<a href="https://kyzylorda-news.kz/ru">Kyzylorda-news.kz</a> Қала әкімі Нұржан Ахатовтың өкімімен қала әкімінің орынбасары лауазымына Омаров Бақытжан Бауыржанұлы тағайындалды.Шаһар басшысы жаңа орынбасарын кадрлық өзгерістерге байланысты өткен актив отырысында таныстырды.«Бақытжан Бауыржанұлы – журналистика, қоғаммен байланыс салаларында және мемлекеттік қызметте жемісті еңбек еткен тәжірибелі маман. Сондықтан әлеуеті жоғары кадр ретінде өз жұмысын кәсіби деңгейде атқарады деп сенемін», – деді қала әкімі.Бақытжан Бауыржанұлы 1987 жылы дүниеге келген. Жоғары білімді.Л.Н.Гумилев атындағы Еуразия ұлттық университетін «Халықаралық қатынастар» (2008 жыл), «Журналистика» (2010 жыл) мамандықтары бойынша тәмамдаған.Еңбек жолын 2008 жылы республикалық «Қазақстан» телерадиокорпорациясында редакторлықтан бастап, 2009-2012 жылдары аралығында осы корпорацияда түрлі қызметтерді атқарған.2012-2025 жылдары Түркия мемлекетінің Анкара қаласындағы телерадиокорпорациясында жаңалықтар жүргізушісі, «Хабар-24» телеарнасының бас редакторы, Қызылорда облысы әкімінің баспасөз хатшысы, ҚР Мәдениет және ақпарат министрлігінің Түрксой ұйымындағы өкілі болып еңбек еткен.2025 жылдың ақпан айынан бастап бүгінгі күнге дейін Қызылорда облысы әкімі аппараты басшысының орынбасары лауазымын атқарып келді.Бақытжан Бауыржанұлы қоғамдық даму, жұмыспен қамту және әлеуметтік бағдарламалар, дене тәрбиесі, спорт және туризм, мәдениет және тілдерді дамыту бөлімдеріне жетекшілік жасайтын болады.Осы кезге дейін қала әкімінің орынбасары болған Еркебай Ғалымжан Бақтығалиұлы облыстық табиғи ресурстар және табиғат пайдалануды реттеу басқармасының басшысы лауазымына ауысуына байланысты атқарып отырған қызметінен босатылған болатын. Шаһар басшысы актив отырысында Ғалымжан Бақтығалиұлының өзіне жүктелген міндеттерді жоғары деңгейде атқарып, қаланың құрылыс, тұрғын үй-коммуналдық шаруашылық салаларының дамуына қосқан зор үлесі үшін алғысын білдіріп, Қызылорда қаласының ең жоғары марапаты «Құрмет грамотасын» табыстады.Актив отырысына қатысқан қалалық қоғамдық кеңестің төрағасы Серік Дүйсенбаев, қалалық ардагерлер кеңесінің төрағасы Шәкизат Төребаев және «Қызылорда қоғамдық телерадиокомпаниясының» құрылтайшысы Шаһизада Әбдікәрімов тағайындалған азаматтардың жаңа қызметтеріне сәттілік тіледі.Фото: Қызылорда қаласы әкімінің баспасөз қызметі

Қазақстан және Қызылорда облысының жаңалықтары: Қоғам