<a href="https://kyzylorda-news.kz/">Kyzylorda-news.kz.</a> Бүгінде жемқорлық туралы хабарлаған азаматтарға қылмыстың ауырлығына қарай белгілі бір мөлшерде сыйақы беріледі.
Мәселен, былтыр 1424 нөміріне қоңырау шалған 214 қазақстандыққа 31 миллион теңге төленген. Сыбайлас жемқорлыққа қарсы іс-қимыл агенттігі бірінші департаментінің аға тергеушісі Данияр Бегайдаров Call-орталықтың жұмысы мен жемқорларды қолға түсіруге атсалысқандарды ынталандыру тетігі туралы айтып берді, деп хабарлайды&nbsp;<a href="https://sputniknews.kz/society/20200119/12578525/aqsha-qazaqstandyqtar.html">Sputnik Қазақстан</a>.
Бегайдаровтың айтуынша, қазір агенттік тек өз жұмысымен шектелмей, қылмысты ашу кезінде белсенді азаматтардың көмегіне де сүйенеді. Бұл өте маңызды. Жемқорлыққа қарсы күрес агенттігінің Call-орталығы да осы мақсатпен ашылған. Нөмірі – 1424.
<blockquote>
 «Call-орталыққа әртүрлі шағымдар, ұсыныстар мен пікірлер түседі. Операторлар сыбайлас жемқорлық фактілері, оның ішінде жасалған немесе дайындалып жатқан заң бұзушылықтар жайлы, сондай-ақ кәсіпкерлік қызметке кедергі келтіру жағдайлары туралы хабарламаларға тәулік бойы ден қояды», – деді ол.
</blockquote>
Мәселен, Түркістан облысының азаматы хабарласып, өзінен бәз біреулердің пара талап етіп жатқанын мәлімдейді. Агенттік Call-орталыққа түскен хабарламаны сол облыстағы қызметкерлерге жолдайды. Кейін агенттіктің Түркістан облысындағы қызметкерлері әлгі кісімен кездесіп, қажетті ақпаратты алады. Оның арыз-шағымын қабылдап, реестрге тіркейді. Содан соң қылмыстық іс қозғалады. Іс тергеліп, әрі қарай сотқа жолданады.
<blockquote>
 «Сот үкімі шыққаннан кейін, парақорлық туралы хабарлаған азаматқа қылмыстың ауырлығына қарай белгілі бір мөлшерде сыйақы төленеді. Егер Call-орталыққа қоңырау шалған адам аты-жөнін айтпаса, ақша төленбейді», – деді аға тергеуші.
</blockquote>
Осы ретте Бегайдаров жемқорларды ұстауға көмектескендерге төленетін сыйақыны нақтылады:
сыбайлас жемқорлық құқық бұзушылық туралы әкімшілік істер бойынша – 30 АЕК немесе 79 530 теңге;
жеңіл санаттағы қылмыстық істер бойынша – 40 АЕК немесе 106 040 теңге;
ауырлығы орташа қылмыстық істер бойынша – 50 АЕК немесе 132 550 теңге;
ауыр санаттағы қылмыстық істер бойынша – 70 АЕК немесе 185 570 теңге;
аса ауыр санаттағы қылмыстық істер бойынша – 100 АЕК немесе 265 100 теңге.
<blockquote>
 «Өткен жылдың он екі айында 214 қазақстандық сыйақы алды. Олар хабарлаған жемқорлық фактілері дәлелденіп, 31 811 080 теңге ақша төленді», – деді Бегайдаров.
</blockquote>
Жемқорлық туралы хабарлағандардың ең көбі Түркістан облысы, Шымкент және Алматы облысынан екен. Ең аз қоңырау Солтүстік Қазақстан облысынан түсіпті.
Ақшалай сыйақымен қоса, белсенді азаматтарға марапаттау қағазы да беріледі.
<blockquote>
 «Негізінен жылдан-жылға орталыққа түсетін хабарламалар көбейіп келеді. Бұл азаматтардың өз жауапкершілігін сезініп, жемқорлықпен күреске немқұрайлы қарамайтынын көрсетеді», – дейді департамент тергеушісі.
</blockquote>
Айтуынша, пара алатындардың дені – ішкі істер органдарының қызметкерлері. Бегайдаров мұны жалақының төмендігімен байланыстырып отыр.
Сыбайлас жемқорлыққа қарсы агенттік жемқорлық туралы хабар берген азаматтарды көбірек ынталандыруды көздеп отыр. Бұл бағыттағы жұмыс басталып та кеткен.
Атап айтсақ, агенттік халықаралық тәжірибені ескере отырып, қазақстандықтарды көтермелеудің сараланған жүйесін енгізбек.
<blockquote>
 «Пара немесе шығын сомасы 2,5 миллион теңгеден асатын қылмыстар бойынша жемқорлық туралы хабарлаған азаматқа сот үкімімен белгіленген пара немесе келтірілген залал сомасының 10%-ін төлеу ұсынылып отыр. Бірақ сыйақының шекті деңгейі 10 миллион теңгеден аспайды», – деп түсіндірді Бегайдаров.
</blockquote>
Мәселен, жемқордың 3 миллион теңге пара алғаны дәлелденсе, осы қылмыс туралы агенттікке хабар берген адамға параның 10 проценті, яғни 300 000 теңгесі төленеді.
<blockquote>
 «Бұл қазақстандықтардың белсенділігін арттыру мақсатында жасалып отыр. Қазір бұл бастама бүкіл мемлекеттік органдармен келісілуде», – деді ол.
</blockquote>
Сонымен қатар, жемқорлық туралы хабар берген азаматтардың құқығын қорғау мәселесі де агенттіктің назарында.

Қазақстандықтар білуі тиіс ақпарат: 1424 нөміріне хабарласып, 10 млн теңге ақша алуға болады

<a href="https://kyzylorda-news.kz/">Kyzylorda-news.kz.</a> “Жолда қабылдау” республикалық акциясы аясында Армения мен Қырғызстанның көліктерін тіркеуге қатысты сұрақтар көптеп түсуде.&nbsp;Осы мәселеде шетелдік нөмір таққан көліктерді тіркеу тәртібі қалай жүргізіледі?
Қазақстанға транзиттік нөмірмен келу керек
<blockquote>
 “Негізі, Қазақстан азаматтарына Армения мен Қырғызстанда тіркелген көлік құралдарын жүргізуге тыйым салынған. Сондықтан көлікті сатып алғанда тіркеуден шығарады. Ал осында келгенде алдымен утилизациялық алымды төлейді. Сосын алғашқы тіркеуге қояды. Алғашқы тіркеудің де төлемі бар”, – дейді Павлодар облыстық полиция департаменті басшысының орынбасары Жасқайрат Қайыров.
</blockquote>
Оның айтуынша, Армения мен Қырғызстанның нөмірімен жүрген көліктер тәртіп бойынша тіркелмесе, оларды қайтадан сол жерге апару керек. Сол жақтан тіркеуден шығарып, Қазақстанға транзиттік нөмірмен келуі тиіс. Осыдан кейін утилизациялық алымды төлеп, көлікті рәсімдеуге болады.
<blockquote>
 “Енді, ол жаққа бармаса, көлікті тіркеуден қалай шығарады? Білуімше, Арменияда уақытша тіркеуге қояды да, 30 күннен кейін автоматты түрде шығарып тастайды. Ал ондай көліктер анда да, мұнда да тіркелмей қалады. Дегенмен, тіркеуден ресми түрде шығару тәртібі бар. Соны жасап келу керек”, – деп атап өтті Қайыров.
</blockquote>
Полицей жай құжатпен тіркеуден шығаруға болмайтынын, шетелге көлікпен бару қажеттігін жеткізді. Ал Ресей мен Беларусьтің нөмірін таққан көліктер үшін тәртіп басқаша. Олар бір жыл бойы жүре алады. Бір жыл өткесін Қазақстаннан шығып, 30 күннен кейін қайтадан кіруге рұқсат бар.
ЕУРО-4 талабын ұмытпау қажет
Қазақстанда тіркеуге қойылмайтын көліктер бар. Олар – рөлі оң жақта және ЕУРО-4 экологиялық талабына сай келмейтін автомобильдер. Заңнамада талапқа сәйкес келетін көліктердің шығарылған жылы да жазылған.
<blockquote>
 “Жаңылмасам, Корея көліктері 2006 жылдан, Еуропа 2005 жылдан, Жапония 2010 жылдан, ал Қытай көліктері 2012 жылдан бастап тіркеуге қойылады. Осы уақытта шығарылған автомобильдер ЕУРО-4 стандартына жатады. Одан ерте шығарылса, тіркеуге мүлдем қойылмайды”, – деді Қайыров.
</blockquote>
Оның айтуынша, күні кеше “Жолда қабылдау” аясында кеңес алған адамдардың басым бөлігінің көлігі ЕУРО-4 стандартына кірмейді. Себебі 2000-2003 жылдары шығарылған. Ондай көліктерді тіркеуге қоюға рұқсат жоқ.
<blockquote>
 “Енді, оларға ешкім тиіспейді, арнайы ұстап, жауапқа тартпаймыз. Бірақ жол ережесін бұзса, барлық құжаты тексеріледі. Жылдамдықты асырса, сосын жол апатына себеп болса, тексеріс жүргіземіз. Бақылау бекеттерінде тоқтатуы мүмкін. “Ориентировка” түссе, іздейміз. Ал жолда тұрып алып, бәрін тоқтату деген болмайды”, –&nbsp; деп түсіндірді Қайыров.
</blockquote>
Облыстағы бас полицейдің орынбасары жол жүру ережесін бұзған ондай көліктер бірден айып тұрағына тоғытылатынын да ашық айтты. Себебі заң бойынша ондай көліктерді Қазақстанға кіргізуге болмайды.&nbsp;&nbsp;
Утилизациялық алымның мөлшері қандай?
2016 жылдан бастап Қазақстанда автомобиль жасайтын компаниялар мен ресми импорттаушылар утилизациялық алымды төлеуге міндеттелді. Олардың қатарына көлікті сырттан әкелетін қарапайым азаматтар да кіреді. Алым көлікті алғашқы тіркеуге қойғанға дейін төленуі керек.
Утилизациялық алымның мөлшері жыл сайын айлық есептік көрсеткішке қарай өзгеріп тұрады. Жаңа жылдан бастап бір айлық есептік көрсеткіш 2 651 теңгеге көтерілді. Ал утилизациялық алымның базалық төлемі 50 АЕК, яғни 132 550 теңгені құрайды.
Базалық төлем көлік қозғалтқышының көлеміне қарай есептеледі. Мәселен, бір литрге дейінгі қозғалтқышы бар автомобильдердің утилизациялық алымы 3 базалық төлемге тең, үш литрден жоғары болса, 23 базалық төлем жасалады. Осылайша 2.5 литрлік көлік үшін 1 325 000 теңге төлеу керек. Ал 3.5 литрлік қозғалтқыштың утилизациялық алымы 3 048 650 теңге болады.
Жалпы, алғашқы тіркеуге төленетін баж салығымен қоса есептегенде барлық шығын 4 миллион теңгеге дейін баруы мүмкін.
<a href="https://sputniknews.kz/society/20200118/12572489/tirkeu-Armeniya-Qyrgyzstan.html"></a><a href="https://sputniknews.kz/society/20200118/12572489/tirkeu-Armeniya-Qyrgyzstan.html">Sputnik Қазақстан</a>

Көлікті тіркеу мәселесі: Армения мен Қырғызстанға қайта бару керек пе?

Міндетті медициналық әлеуметтік сақтандыру: ең маңызды 33 сұраққа жауап

<a href="https://kyzylorda-news.kz/">Kyzylorda-news.kz.</a> Соңғы уақытта әлеуметтік желіде Қызылорда облысы Арал ауданында орналасқан «Аралтұз» акционерлік қоғамының өнімдері жайында бейнематериалдар жиі жарияланып жүр.
Онда кәсіпорынның меншік иесі ретінде шетелдік компания саналатыны, өнім ішінде шыны, шүберек секілді заттардың бар болуы көрсетілген. Бұл жағдайлар шындыққа сай келе ме? Ол жөнінде кәсіпорын басшылығы мен тиісті сала мамандары не дейді? Бұл туралы <a href="https://lenta.inform.kz/kz/araltuz-oniminin-sapasy-zhayly-alyp-kashpa-angime-shyndykka-zhanasa-ma_a3605064">ҚазАқпарат</a> мәлімдеді.
«Аралтұз» АҚ президенті Айдынбек Тауасаров соңғы уақытта әлеуметтік желіде таратылып жатқан ақпараттың шындыққа сәйкес келмейтінін ресми мәлімдеді. Оның айтуынша, кәсіпорын тұзының құрамында эпсомит және астраханит секілді табиғи минералдардан тұратын табиғи ерімейтін тұнба бар. Олар – ағза үшін абсолют бейтарап. Өңдеуге келіп түсетін шикізат та экологиялық тазалығымен ерекшеленеді. Кәсіпорынның барлық өнімін ЕАЭО аумағында аккредиттелген тәуелсіз зертханалар тексереді. Бұл орындар тиісінше сәйкестік декларациясын берген.
<blockquote>
 «1925 жылдан бері жұмысын жүргізіп келе жатқан кәсіпорын еліміздегі ас тұзының жетекші өндірушісі саналады. Біздің өніміміз Қазақстан және ТМД аумағында жоғары бағаланатын отандық бренд ретінде қалыптасты. Бүгінде кәсіпорында 1200-ден астам адам еңбек етеді. «Аралтұздың» меншік иелері компания құрылғаннан бері қазақстандық кәсіпкерлер болды. Қазіргі таңда толық акциясы қазақстандық кәсіпкерлерге тиесілі. Ешқандай шетелдік тарапқа сатылған жоқ және үлесіне шетелдіктер қосылмаған. Осыған сәйкес біз соңғы уақытта әлеуметтік желілерде таратылып жатқан ақпараттың шындыққа сәйкес келмейтінін ресми мәлімдейміз», – деді А.Тауасаров.
</blockquote>
Ол ас тұзы құрамында табиғи ерімейтін тұнба болатынын атап өтті. Ол кез келген табиғи тұзда, әсіресе тұнба тұзда кездеседі.
<blockquote>
 «Іс жүзінде «шыны» ретінде қабылданып жүрген эпсомит, астраханит деген минералдар. Олар біз өндіретін тұздарда бұрын да болған, ол стандарт нормалары бойынша келісілген ерімейтін қалдық. Эпсомит – магнезия немесе ағылшын тұзы деп аталатын, мөлдір түсті табиғи минерал. Ол сулы магний сульфаты – адам ағзасының қалыпты әрекет етуі мүмкін болмайтын заттек. Астрахани́т — минерал, сулы натрий және магний сульфаты, ол адам ағзасы үшін абсолют бейтарап және ағзаға түскен кезде табиғи жолмен шығарылады. «Аралтұз» АҚ өнімдері барлық стандартқа сәйкес шығарылады. Компания ISO 9001, ISO 22000, HACCP және Халал сертификаттарына ие болған», – деді Айдынбек Тауасаров.
</blockquote>
Осы орайда өнім сапасы жөнінде Қызылорда облысының тауарлар, көрсетілетін қызметтердің сапасы мен қауіпсіздігін бақылау департаменті мамандарының пікірін білуді жөн көрдік. Мамандар кәсіпорын өнім сапасында адам денсаулығына қауіп төндіретін ешқандай қоспа жоқ екенін мәлім етті.
<blockquote>
 «Арал аудандық тауарлар, көрсетілетін қызметтердің сапасы мен қауіпсіздігін бақылау басқармасы 2019 жылдың бірінші жартыжылдығында «Аралтұз» акционерлік қоғамына тексеру шараларын жүргізді. Тексеру барысында кәсіпорын өнімінен 8 тұз сынамасы алынып, оның 5-нен йод құрамы қалыпқа сай болмағаны анықталды. Тұздың органикалық көрсеткіштері, хлорлы натрий, ион-кальций, ион-магний, ион-сульфат, суда ерімейтін қалдық, ылғалдың таза үлестері, қорғасын мен кадмий рұқсат етілген деңгейде, Адам денсаулығына қауіп төндіретін күмәнді қоспалар анықталған жоқ», – деді Қызылорда облысының тауарлар, көрсетілетін қызметтердің сапасы мен қауіпсіздігін бақылау департаменті басшысының орынбасары Ұлбосын Аханаева.
</blockquote>

«Аралтұз» өнімінің құрамынан шыны мен шүберек табылып жатқаны рас па?

<a href="https://kyzylorda-news.kz/">Kyzylorda-news.kz.</a> Облыс әкімі Қуанышбек Ысқақов Қармақшы ауданында жұмыс сапарымен болып, 13 елдімекеннің тұрғындарымен кездесті.
Т.Көмекбаев ауылының тұрғындары Қ.Қуаңбаев көшесіне орташа жөндеу жұмыстары жүргізілгендігін айтып, ризашылықтарын жеткізді.
Сонымен қатар, ауылдық клуб үйін жаңарту мен елдімекендегі емдеу мекемесінің ғимаратына күрделі жөндеу жұмыстарын жүргізу туралы өтініштерін айтты. Өңір басшысы аталған мәселе бойынша мемлекеттік-жекешелік әріптестік шеңберінде жеке инвесторлар арқылы алдағы уақытта ауылдық клуб пен медициналық амбулатория мәселесі шешіледі деді.
Аймақ басшысы Қуаңдария, Алдашбай-ахун, Дауылкөл, Ақжар, Ақтөбе, ІІІ-Интернационал, Жаңажол, Иіркөл ауылдық округтерінде де болып, тұрғындармен кездесті. Иіркөл мен Алдашбай-ахун ауылдық округінде сапалы интернет және ұялы байланыс орнату мен аяқ су мәселесі көтерілді. Облыс әкімі жауапты мамандарға 2019-2020 жылдарға арналған “Каналдарды қыршып, тазалау” жоспарлы бағдарламасы шеңберінде тұрғындар айтқан аяқ судың проблемасын көктем мезгілінде шешіп беруді тапсырды. Қажет болған жағдайда “электрлі дизельді мотор” қоюды жүктеді.
Мұнан соң өңір басшысы Төребай би, Ақай, Төретам, Қармақшы ауылдық округтерінде болып, тұрғындармен кездесті. Ақайлықтар газ мәселесін көтерді. Өздеріңізге белгілі қазір Байқоңыр қаласы көгілдір отынға қосылды. Ал маңындағы Ақай, Төретам елдімекендерін газдандыру үшін тиісті жұмыстар атқарылуда дейді жауапты мамандар.
Бұған дейін Арал, Қазалы, Жалағаш, Сырдария аудандарына қарасты ауылдарды аралап, халықтың тұрмыс-тіршілігімен танысқан аймақ басшысы Қармашы ауданының да елдімекендерін түгел қамтыды. Тұрғындар көтерген мәселелердің ешқайсысы назардан тыс қалмайтынын айтқан облыс әкімі, барлық жұмыстар өзінің қадағалауында болатынын жеткізді.
<img src="https://kyzylorda-news.kz/wp-content/uploads/2020/01/20akkarm2.jpg" alt="" />
<img src="https://kyzylorda-news.kz/wp-content/uploads/2020/01/20akkarm3.jpg" alt="" />
<img src="https://kyzylorda-news.kz/wp-content/uploads/2020/01/20akkarm4.jpg" alt="" />

Аймақ басшысы Қармақшы ауданында болды (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысында ақбөкен атып, полиция қызметкерлерінен бой тасалап кетуге әрекет жасаған «Охотзоопром» ӨБ РМҚК 2 қызметкері мен көлік жүргізушісі қолға түсті. Олардың жүк салғышынан ақбөкеннің еті табылды. Бұл туралы Қызылорда облыстық Полиция департаментінің баспасөз қызметі мәлімдеді.
Аталмыш оқиға Қармақшы ауданы аумағындағы Тышқантамда болған. Полиция қызметкерлері сол маңайда «Браконьер» жедел алдын алу іс-шарасын жүргізген болатын. Олардың назарын «Ланд Крузер ЛХ76» маркалы қызметтік автокөлігі аударған. Оны тексерген кезде артқы бамперде қан іздері байқалды. Полиция қызметкерлері жүргізушіден жүк салғышты ашуды талап еткен. Сол сәтте автокөлік жүргізушісі мен «Охотзоопром» ӨБ РМҚК 2 қызметкері полицей талабына бағынудан бас тартқан. Осылайша оқиға орнынан бой тасалаған. Полиция қызметкерлері олардың артынан жүре отырып «Охотзоопром» тұрағында қолға түсірді.
<blockquote>
 «Автокөлікті тексеру барысында салонынан 1 дана тегіс ұңғылы қару, пышақ және прожектор табылды. Олар заттай дәлелдеме ретінде алынды. Ал автокөліктің артқы жүк салғышынан бір ақбөкенге ұқсас жануардың тұтастай еті табылды. Ұсталғандардың бірі уақытша ұстау изоляторына қамауға алынды. Ал қалғанына бұлтартпау шарасын қолдану мәселесі шешілуде. Қазіргі таңда ҚР Қылмыстық кодексінің 339-бабы 2-бөлігінің 2,4-тармақтары бойынша сотқа дейінгі тергеп-тексеру жұмыстары жүргізілуде», – деп мәлім етті Қызылорда облыстық Полиция департаментінің баспасөз қызметі.
</blockquote>
<img src="https://kyzylorda-news.kz/wp-content/uploads/2020/01/20akboken2.jpg" alt="" />

Қармақшыда ақбөкен атқан «Охотзоопромның» 3 қызметкері тұтқындалды

<a href="https://kyzylorda-news.kz/">Kyzylorda-news.kz.</a> 20 қаңтар күні Қазақстанның бірқатар аймақтарында қар жауып, көктайғақ болады, деп хабарлайды «Қазгидромет».
Қазақстанның барлық аумағына дерлік солтүстік және оңтүстік циклондары және атмосфералық фронттар әсер етеді. Осыған байланысты қар жауады, батыста, оңтүстікте және оңтүстік-шығыста – жауын-шашын болады.
Маңғыстау, Атырау, Қызылорда облыстарында күн ашық болады. Кей жерлерде тұман түседі, жел күшейеді, солтүстік пен шығыста қар жауады, оңтүстікте көктайғақ болады.
Ақмола, Қостанай, Солтүстік Қазақстан, Шығыс Қазақстан облыстарының кей жерлерінде тұман, бұрқасын күтіледі, жел екпіні – 15-20 м/с.
Жамбыл, Түркістан ​​облыстарының кей жерлерінде тұман мен көктайғақ күтіледі, жел жылдамдығы 15-20 м/с жетеді.
Қарағанды, Атырау облыстарының кей жерлерінде тұман мен көктайғақ болады, Қарағанды облысында кей жерлерде жаяу бұрқасын көтеріледі.
Алматы облысында түнде Жалаңашкөл ауданында жел қарқыны 17-22 м/с дейін күшейеді.
Қызылорда, Маңғыстау, Батыс Қазақстан, Ақтөбе, Павлодар облыстарының кей жерлерінде тұман түседі.

20 қаңтар күні Қазақстанда ауа райы қандай болады?

Әзербайжанда бүкілхалықтық аза тұту күні
1990 жылы 00 сағат 20 минутта КСРО-ның басқа өңірлерінен келген кеңес әскері Әзербайжан КСР Жоғарғы Кеңесі Президиумының келісімінсіз Баку қаласына баса-көктеп кіріп, КСРО және Әзербайжан КСР Конституцияларын, сондай-ақ республиканың егемендігі туралы Конституциялық заңды өрескел бұзды.
Қарулы акция салдарынан жүзден астам бейбіт тұрғын, негізінен әзербайжандар қаза тапты. Қайғылы оқиғалардың себеп-салдарын тексеру жөніндегі республикалық комиссияның деректеріне сәйкес, 131 адам қаза тауып, 744 адам жараланған. Сол күн «Қаралы қаңтар» деген атпен Әзербайжан тарихында қалды.
1919 жылы&nbsp;қазіргі Алматыда Жетісу жыршы-ақындарының слеті өтті. Оған халық ақыны Жамбыл Жабаев та қатысты.
1932 жылы&nbsp;Қазақ Өлкелік Комитетінің ІІІ Пленумының Қаулысымен «Советская степь» газеті «Казахстанская правда» болып өзгерді.
1984 жылы&nbsp;Қазақ КСР Жоғарғы Кеңесі Төралқасының Жарлығымен «Қазақ КСР-інің халық жазушысы» құрметті атағы бекітілді. Құрметті атақты алғашқылардың бірі болып Ғабит Мүсірепов, Дмитрий .Снегин, Тұрсынхан Әбдірахманова иеленді. 1999 жылдан бастап «Қазақстанның халық жазушысы» атағын беру тоқтатылды.
1994 жылы&nbsp;«Байқоңыр» ғарыш айлағынан «Галс» телехабар таратудың алғашқы ғарыштық қондырғысы ұшырылды.
1994 жылы&nbsp;Елбасы Нұрсұлтан Назарбаевтың Жарлығымен Қазақстанның мамандандырылған коммерциялық жинақ банкі Халық банкі болып қайта құрылды.
1996 жылы&nbsp;Қазақстанның екі палаталы Парламенті – заңнамалық қызметтерді атқаратын Қазақстан Республикасының жоғары өкілетті органы өз жұмысын бастады.
2009 жылы&nbsp;«Қазпошта» АҚ Екінші Ұлттық халық санағына арналған пошта конвертін айналымға шығарды. «Kazpost» таңбалы конвертте Екінші ұлттық халық санағының белгісі мен «Елтаңба» стандартты пошта маркасы басылған. Көлемі 220 х 110 мм-лік конверт – 1 миллион дана.

20 қаңтар: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 20 қаңтарға арналған жұлдыз-жорамалы.
Тоқты
Қосымша табыс көзін табасыз. Осыдан кейін қаржылық жағдайыңыз жақсара түседі. Денсаулығыңызға көп мән беріңіз.
Торпақ
Адамдармен байланыс орната біліңіз. Көмек керек жандарға қол ұшын созыңыз. Сонымен қатар бүгін жолда сақ болыңыз.
Егіздер
Денсаулығыңызды күтіңіз. Дұрыс тамақтана біліңіз. Ағзаңызға дәрумендер жетіспейді. Әсіресе сүйектерге қажетті дәруменді пайдаланыңыз.
Шаян
Өзіңіздің тапқырлығыңыздың және тың тәжірибелеріңіздің арқасында барлық шаруаларыңызды соңына дейін жеткізесіз. Қаржы мәселесі де оң шешіледі.
Арыстан
Сіздің іскерлігіңіз бен өз ісіңізге деген ынтаңыз жұмыста табысты болудың басты кепілі болмақ. Егер сіз жұмыс алушы болсаңыз онда бүгін сіз үшін сәтті күн.&nbsp;
Бикеш
Бүгін бар назарыңызды жеке өміріңізге аударыңыз. Бүгінгі күн ғашық болуға, сезіміңізді білдіруге қолайлы күн.&nbsp;
Таразы
Сәттілік серігіңізге айналады. Қызметте өсуді көздейсіз. Сіздің талантыңыз, іскерлігіңіз көлеңкеде қалып қоймайды.
Сарышаян
Бүгін ешқандай мәселе туындамайды. Күш-қуатыңыз да тасып, барлық шаруаны тез атқара аласыз.
Мерген
Бүгін іскерлік кездесулер ойдағыдай өтеді. Серіктестермен бірге жұмыс көлемін ұлғайтып, істеріңіз берекелі болмақ.
Тауешкі
Бүгін білім көкжиегін кеңейтетін күн. Сондай-ақ бүгін білім беру саласының және саясатқа жақын жандардың жолы болады.
Суқұйғыш
Егер күш-қуатыңыз тасып, энергияға толы болсаңыз күніңіз сәтті өтетін болады. Саяхаттап немесе жұмыс барысымен сапарға шығуыңыз мүмкін.
Балықтар
Айналаңыздағы адамдардың көңілін өзіңізге аудара аласыз. Ұйымдастырушылық қабілетіңіз артып, таныстарыңыздың арқасында біраз шаруаны тындырасыз.
Аударған Динара МАХАНОВА

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Әлеуметтік желілерде сән саласында халал қызмет көрсету мәселесі қызу талқыланып жатыр, деп хабарлайды <a href="https://24.kz/kz/zha-aly-tar/o-am/item/367979-khalal-as-rleudi-bas-asynan-ajyrmashyly-y-andaj">«Хабар 24».</a>
Сұлулық салондарында мұсылман әйелдерге қас әрлеудің халал түрі ұсынылған. Епті кәсіпкерлер өз қызметін осылай түрлендіруде. Ал бұған арнайы сертификат қажет пе?
Халал қас әрлеу шеберінің тұрақты келушілерінің бірі – Қарлығаш Шұнғарина. Салонға айына бір рет барып тұрады. Ол бұл қызмет түрінің денсаулыққа ешқандай зиян тигізбейтініне және ислам қағидаттарына еш қайшы келмейтініне нық сенімді.
<blockquote>
 «Әлияның қызметіне жүгініп жүргеніме екі жылдай болды. Біріншіден, оның халал сертификаты бар. Дінімізде қас жұлуға болмайтындықтан, мен осы қызмет түрін пайдаланып келемін», – дейді қала тұрғыны Қарлығаш Шұңғарина.
</blockquote>
Әлия Қайранбаева халал қас әрлеумен екі жылдан бері айналысып келеді. Осы кәсіпті нәсіп етуі үшін ол Мәскеуден арнайы сертификат алып, екі күнге созылған арнайы курс үшін 2 миллион теңге төлеген. Осылайша, қазір оның қолында тиісті сертификаттың барлығы бар. Әлияның айтуынша, оның қас әрлейтін бояуларының құрамында спирт пен шошқа майы жоқ.
<blockquote>
 «Бұл өнім Үндістанда өсетін қынадан жасалады. Сапасы Ресейдің Мұсылмандар одағының мамандары берген сертификатпен расталған», – дейді қас әрлеу шебері Әлия Қайранбаева.
</blockquote>
Атырау облысының бас имамы Алтынбек Ұтысханұлының айтуынша, дінде қас бояуға қатысты нақты тыйым жоқ. Алайда көрсетілетін қызметтің ашықтығын жіті тексеру керек.
<blockquote>
 «Егер ислам қағидаттарына қайшы келетін доңыздың майы секілді қоспалар қосылмаған болса, онда халал сертификаты беріледі. Оны пайдалануға, сатуға рұқсат беріледі. Қазақстан мұсылмандар діни басқармасы тарапынан берілген сертификаттың өзінің арнайы белгісі бар», – дейді Атырау облысының бас имамы Алтынбек Ұтысханұлы.
</blockquote>
Халал қас әрлеу сертификатының қаншалықты заңды екенін Ресей Мүфтилері кеңесінің «Халал» Халықаралық стандарттау және сертификаттау орталығының Қазақстан аумағындағы тікелей өкілдігі саналатын Қазақстанның Халал индустриясы қауымдастығынан сұрадық.&nbsp;
<blockquote>
 «Қас жұлу, тырнақты өсіру ешқандай халал стандартқа да, дін шартына да жатпайды. Пайғамбарымыз бұл мәселені, тіпті қарғаған. Сол себепті бұл мәселеде өте сақтық керек», – дейді «Қазақстанның халал индустриясы қауымдастығының төрағасы Марат Сәрсенбаев.
</blockquote>
Анықтағанымыздай, халал сертификатын сұлулық салондары ғана емес, дәмханалар мен мейрамханалар да, қонақ үйлер мен басқа да қызмет көрсету орындары ала алады екен. Ал оның біртұтас стандарты болмағандықтан, тұтынушылардың 100 процент халал-өнімге қол жеткізетініне ешқандай кепілдік жоқ.

Халал қас әрлеудің басқасынан айырмашылығы қандай?

<a href="https://kyzylorda-news.kz/">Kyzylorda-news.kz.</a> Ғалымдар адам баласы жетістікке жету үшін, өз отбасының ынтымағын сақтау үшін, кейбір мәліметтерді айтпау керек деген пікірдe. Осы орайда ешкімге тіс жаруға болмайтын жеті құпия туралы біле жүріңіз.
1. Келешекке құрған жоспар
Жоспар толыққанды орындалмайынша ол туралы айтпаған жөн. Адамның ойы бастапқыда әлжуаз болады.
2. Қайырымды істер туралы ешкімге айтпау
Қайырымды іс – жер бетінде сирек кездесетін құбылыс, сол себепті оны көздің қарашығындай сақтау керек. Өзіңізді жақсылық жасағаныңыз үшін асыра мақтамаңыз. Мақтау адамды тәкәппарлыққа жетелейді.
3. Иманды екеніңіз туралы көпшілікте айтпау
Тамақ, ұйқы, күлкі, төсек қатынасына байланысты шектеулеріңізді ешкімнің білмегені жөн. Тәннің шектеуі көңілдің тақуалығымен үйлессе ғана пайдалы.
4. Жасаған ерлік, батырлық туралы үндемеу
Әр адам күн сайын түрлі оқиғаларды бастан өткереді. Біреу білектің күшімен жеңіп жатса, біреудің ақылы асып-түседі. Күшпен жеңген адамның ерлігі тезірек бағаланатыны рас. Ал ішкі арпалысты барлығы байқай бермеуі ықтимал. Сондықтан ол үшін ешкім марапат бермейді.
5. Рухани жетілу туралы айтпау
Рухани құндылық тек сіздікі. Оны біреуге айтып абырой жинай алмайсыз. Айналаңыздағы адамдардың шын мұқтаждығын көрсеңіз ғана шет жағасын айтыңыз.
6. Үйдегі ұрыс-керіс пен отбасылық өмір туралы үндемеу
Отбасыңыздағы ұрыс туралы неғұрлым аз айтсаңыз, оның ынтымағы берік бола түседі. Бұл есіңізде болуы керек. Ұрыс – араласу барысында жиналып қалған зиянды қуат.
7. Баяғыда естіген жаман сөздер туралы айта бермеу
Көшеде жүріп аяқкиімді былғап алуға болады. Ал кейде сананы да былғап алатындар табылады. Жолда келе жатып естіген бар қаңсық сөзді үйге келіп айтқан адамның табалдырықтан аттап, былғаныш аяқ киіммен төрге шыққан жаннан ешқандай айырмашылығы жоқ.
<a href="https://kaz.nur.kz/1836571-eskimge-ajtuga-bolmajtyn-zeti-kpiany-bilesiz-be.html">KAZ.NUR.KZ</a>

Ешкімге айтуға болмайтын 7 құпияны білесіз бе?

<a href="https://kyzylorda-news.kz/">Kyzylorda-news.kz.</a> Әйелдердің 20%-і өздерінде бірінші ақ шаштың пайда болғанын 30 жасқа дейін байқайды. Ол қартаюдың басты белгісі болмаса да, әйел психикасына қатты әсер етеді екен. Көз айналасында пайда болатын әжім де әйелге жағымсыз сезім сыйлайды. Алайда ақ шаш пен ұсақ әжімдердің пайда болуына қарағанда сырт келбетке қаттырақ әсер ететін зиянды әдеттер бар. Назарыңызға соңғы ғылыми деректерге сүйеніп, сыртқы келбетті ерте қартайтатын 4 әдетті ұсынамыз.
1-әдет. Енжар өмір салты
Калифорния Университетінің ғалымдары American Journal of Epidemiolog журналына енжар өмір салты жасушалардың қартаюын жылдамдататыны жайлы мақала жариялады. 8-10 сағат бойы отырып (мысалы, компьютер алдында) жұмыс істейтін әйелдер өздерінің биологиялық жасынан 9 жас үлкен көрінеді екен. Алайда, қорқудың қажеті жоқ: күніне 30 минуттық серуендеу мен баспалдақпен жаяу көтерілу мұның алдын алады екен.
2-әдет. Смартфонды шектен тыс қолдану
Ерте қартаюдың бір себебі – смартфондар мен мобилді құрылғыларды шектен тыс қолдану. Телефон мен компьютердің көк экраны коллагеннің бұзылуына, яғни ерте қартаюға әкеледі. Әжім торлары да, дақтар да осыдан пайда болады. Гаджеттердің тағы бір негатив әсері – бет және мойын терісінің салбырауы. Мұндай әсер смартфон ұстайтын 77% адамнан байқалған. Оның себебі адам ұялы телефон қолданғанда басын төмен салбыратып отырады.
3-әдет. Алкоголь
Алкоголь ішімдіктер сырт келбетке, әсіресе, тері мен шашқа негатив әсер береді. 20 жаста адамның иммун жүйесі жылдам қалыпқа келетіндіктен мастықтың салдары сезілмеуі мүмкін. Ал 30-40 жаста оның әсері бірден байқала бастайды, теріні қалпына келтіруге жылдам әсері бар ылғалдандырғыш маскалардың өзі әрең көмектеседі. Әрине, қызыл шарап секілді кей сусындардың пайдасы жайлы естіп жүрміз. Бірақ бір тамшы алкоголь ішпейтін әйелдердің тері жағдайы жақсы болатыны ғылыми дәлелденген факт екенін ұмытпайық.
4-әдет. Қайғы
Steelcase компаниясы жұмысбасты 12 000 еріктінің қатысуымен ауқымды зерттеу жүргізді. Сонда әйелдердің көбінде зейін қою қиындығы мен үлкен күйзеліс жүгі байқалған. Бұл әрдайым өзіңізді шаршаңқы сезінуге, жеке мотивацияның жоғалуына және жылдам қартаюға әкеледі.
<a href="https://sn.kz/densaulyk/64896-erte-kartaimau-ushin-4-detten-saktanynyz">SN.KZ</a>

Қазақстан және Қызылорда облысының жаңалықтары: Қоғам