<a href="https://kyzylorda-news.kz/">Kyzylorda-news.kz</a> Үндістанның Гоа қаласында шахматтан 21-30 шілде аралығында өткен әлем чемпионатында қазақстандық пара спортшылар 9 медаль жеңіп алды.Дүниежүзілік додаға 18 елден 100-ден астам спортшы қатысты. Аталған дода шахматтың классика, блиц және рапид ойын түрлерінен өтті.Жарыс қорытындысы бойынша классикалық шахматтан Аяулым Қамбарова, Бақытжан Майкенов және Әлімжан Аяпов қола медаль иеленді. Блиц ойын түрінен Аяулым Қамбарова мен Бақытжан Майкенов күміс, ал Серік Солтанов пен Әлімжан Аяпов қола жүлде иеленді. Ал рапид бойынша Аяулым Қамбарова мен Әлімжан Аяпов екінші орын алды.Фото: Спорт және дене шынықтыру істері комитеті

Шахматтан әлем чемпионатында қазақстандық пара спортшылар 9 медаль алды 

<a href="https://kyzylorda-news.kz/">Kyzylorda-news.kz</a> 26 маусымнан 27 тамызға дейін Қазақстан Республикасы Мәдениет және ақпарат министрлігі «Дарын» мемлекеттік жастар сыйлығына үміткерлерден өтінім қабылдауды жалғастырады. Бұл туралы Мәдениет және ақпарат министрлігі мәлім етті.«Дарын» мемлекеттік жастар сыйлығы ғылым, шығармашылық, қоғамдық қызмет салаларында жемiстi еңбегімен көзге түскен, сондай-ақ жоғары спорттық жетістіктері үшін дарынды жастарды мемлекет тарапынан қолдау мақсатында табысталады.Байқау «Әдебиет», «Ғылым», «Дизайн және бейнелеу өнері», «Журналистика», «Классикалық музыка», «Қоғамдық қызмет», «Спорт», «Театр және кино», «Эстрада», «Халық шығармашылығы» атты 10 номинация бойынша өтеді.Конкурсқа Қазақстан Республикасының 35 жасқа дейінгі азаматтары қатыса алады. Олар халықаралық және республикалық конкурстардың, фестивальдер мен түрлі шаралардың лауреаттары, республикалық және халықаралық деңгейлердегі спорттық жарыстардың жүлдегерлері мен жеңімпаздары, сондай-ақ аталған салалар мен тұтастай қоғамды дамытуға ықпал еткен үміткерлер болуы қажет.«Дарын» жастар сыйлығына үміткерлерді орталық, жергiлiктi және өзге де мемлекеттік органдар, қоғамдық бiрлестiктер және Қазақстан Республикасының аумағында тіркелген өзге де заңды тұлғалар ұсынады.Жеңімпаздарға «Дарын мемлекеттік жастар сыйлығының лауреаты» атағы беріледі және олар дипломмен, төсбелгілермен сондай-ақ қаржылай сыйлықпен марапатталады.«Дарын» жастар сыйлығы 1992 жылы тағайындалған. Содан бері аталған сыйлықты түрлі саладағы 360-тан астам азамат иеленді.Конкурсқа қатысуға құжаттар 2025 жылғы 26 маусымнан 27 тамыз аралығында Қазақстан Республикасы Мәдениет және ақпарат министрлігі (қағаз нұсқада) мына мекенжай бойынша қабылдайды: Астана қаласы, Мәңгілік ел даңғылы 8, «Министрліктер үйі» ғимаратының 14-кіреберісі.

«Дарын» мемлекеттік жастар сыйлығына өтінім қабылдау жалғасып жатыр

<a href="https://kyzylorda-news.kz/">Kyzylorda-news.kz</a> «Ырыскелді қажы» мешітінің Бас имамы Нұрлан қажы Байжігітұлы Orta подкастінде қазақстандықтарды қашықтан дем салғызудан аулақ болуға шақырды.<blockquote>— Мен дем салудың заманауи түрін көрдім. Ол түрінде TikTok арқылы салады екен. Қалай десе, «Телефонның экранын жақын» ұста дейді. Сонда экранға үрлеген кезде демі ауырып тұрған бүйрегіне тиеді. Не деген КТ-аппарат (компьютерлік-томографиялық аппарат) екенін қайдан білейін. Мұның бәрі жай нәрсе, халқымызға алданбау керек, — деді ол.</blockquote>Сондай-ақ, ол әлеуметтік желі арқылы діни контентті ақылмен тұтыну маңызды екенін айтты.&nbsp;<blockquote>— Дұға қылу деген бар. «Маған дұға қылып қойыңыз» деп жатады. Ол — жақсы нәрсе. Ал енді микрофон арқылы дем салып, экранның ар жағынан, YouTube арқылы дұға дарыту деген енді… Мен өзім көрдім. Дүкенге кіріп барсам, сатушы көзіме бірден түспеді. Құранның даусы шығып тұр. Сатушы шыққанда неге құран қосқанын сұрасам, «Тазартып жатырмыз» дейді. «YouTube арқылы тазаланбайды» дедім. YouTube-тен тамақ ішкенді көрсең, қарның тойып қала ма? Бұл да сол сияқты. Ондай нәрсеге иланбауымыз керек, — деді Нұрлан қажы.</blockquote>Фото: Фото: Солтан Жексенбеков

Нұрлан имам TikTok-та дем салатындарды сынады

<a href="https://kyzylorda-news.kz/">Kyzylorda-news.kz</a> Қоғамның тұрақтылығы мен ел дамуының басты шарты – этносаралық келісім мен бірліктің нығаюы. Бұл бағытта Қазақстан халқы Ассамблеясы белсенді қызмет етіп келеді. Аталған құрылымның негізгі миссиясы – түрлі этнос өкілдерінің өзара татулығын қамтамасыз етіп, бейбітшілік пен қоғамдық келісімді сақтау екендігі баршаға мәлім.Бүгін Қазақстан халқы Ассамблеясы төрағасының орынбасары, ҚР Президенті Әкімшілігінің Қазақстан халқы Ассамблеясы хатшылығының меңгерушісі Марат Әзілханов аймақтағы этномәдени бірлестік жетекшілерімен жүздесті. Достық үйінде өткен жиында облыс әкімінің орынбасары Мейрамбек Шермағанбет қатысты.Жиында облыстық қоғамдық даму басқармасы басшысының орынбасары - облыстық ҚХА хатшылығының меңгерушісі Артур Қамбаров өңірдегі этносаралық қатынастар саласындағы атқарылған жұмыстар мен алдағы жоспарларға тоқталды.Жиында Марат Алмасұлы Қызылорда облысындағы бірлік пен келісім саласындағы жұмыстарға оң бағасын беріп, Президенттің ҚХА-ның 34-сессиясында берген тапсырмаларын орындаудың маңыздылығына назар аударды.<blockquote>– Қазақстан халқы Ассамблеясы құрылғанына биыл 30 жыл. Осы уақыт ішінде Ассамблея бейбітшілік пен келісімнің, қоғамдық татулықтың алтын көпіріне айналды. Қоғамдағы әр азаматтың үнін естіп, этностардың құндылықтарын дәріптеуде маңызды жұмыс атқарып келеді, – деді Марат Алмасұлы.</blockquote>Сонымен қатар, Алматы, Жетісу, Жамбыл, Түркістан облыстарындағы аудандық Ассамблея хатшылықтарының құрылуы, Ақтау қаласында өтетін этномедиаторлардың форумы мен Өскемен қаласындағы ҚХА конгресі және Астана қаласындағы ҚХА академиясы туралы атап өтті.Өз кезегінде Мейрамбек Зинабдинұлы қатысушыларға ерекше алғысын айтып, Ассамблеяның ел бірлігін сақтау жолындағы рөліне ерекше тоқталды. Ол өз сөзінде Мемлекет басшысы Қасым-Жомарт Тоқаевтың реформаларын қолдау мен ел ішіндегі тұрақтылықты сақтау — барша қазақстандықтың ортақ міндеті екенін атап өтті.Кездесу барысында облыстық ҚХА жанындағы Ақсақалдар кеңесінің төрағасы Нұрмұрат Ерманов пен «Славяне» қоғамдық-мәдени орталығының төрағасы Галина Щербакова өз ұсыныс-пікірлерін білдіріп, этносаралық татулықты одан әрі дамытуға қатысты ойларымен бөлісті.<figure class="image"><img src="https://knadmin.beoblood.kz/uploads/assam_37f99e374f.jpg" alt="ассам.jpg"></figure>

Этносаралық келісім – ел бірлігінің негізі

<a href="https://kyzylorda-news.kz/">Kyzylorda-news.kz</a> Премьер-министрдің орынбасары Қанат Бозымбаев, облыс әкімі Нұрлыбек Нәлібаев Қармақшы ауданындағы «Жаңажол» жауапкершілігі шектеулі серіктестігінің жұмысымен танысты.«Жаңажол» – өңірдегі ауыл шаруашылығын дамытып, халықты тұрақты жұмыспен қамтыған жетекші құрылымдардың бірі. Биыл шаруашылық 4547,5 гектар алқапқа егін екті. Оның 3100 гектары күріш, 469 гектары жаңа, 600 гектары ескі жоңышқа, 325 гектары бидай, 39 гектары жүгері. Сонымен қатар 5 гектар картоп, 9,5 гектар алма бағы да бар.Қазіргі таңда мұнда 360 адам тұрақты жұмыспен қамтылған. Серіктестіктің 159 арнайы техникасы бар. Бұл егін ору, тасымалдау және басқа да жұмыстарды орындауға мүмкіндік береді.Серіктестік егіншілікпен ғана шектелмей, жем-шөп өндірісі мен бау-бақша шаруашылығын да дамытып келеді. Табиғи ресурстарды ұқыпты пайдаланып, заманауи әдістерді енгізуде.Ауданның суармалы жер көлемі 41 147 гектар, 25 258 гектарына ауыл шаруашылығы дақылдары, атап айтқанда дәнді дақылдар 14 123 гектарға, майлы дақылдар 1 205 гектарға, мал азықтық дақылдар 8 750 гектарға, картоп, көкөніс және бақша 1 180 гектарға егілген. Күріш көлемі 12 993 гектар. Қармақшы ауданында 32 шаруашылық егін шаруашылығымен, 30-ы күріш егумен айналысады.Биылға жоспарланған 404,0 млн текше метр судың 296,2 млн текше метрі нақты жеткізілді. Қазіргі уақытта 33 насос 9 шаруашылықтың егіс алқаптарындағы күріш пен ауыл маңындағы картоп, көкөніс, бақшаны суаруға қызмет етеді.Мұнан бөлек, Қ.Бозымбаев 2004 жылы құрылған «Жаңажол» шаруашылығының алмабағымен танысты. Шаруашылық 4,5 гектар жерге 1521 түп алма, 138 түп алмұрт және 205 түп өрік отырғызып, өнім алуда. 620 түп «Семеренка», 177 түп «Бес жұлдыз», 105 түп «Голдинк», 138 түп «Белиналип» сорттары арық арқылы суарылады. 2023 жылы тағы 5 гектар аумаққа 8 600 түп алма көшеті тамшылатып суару әдісімен егілді. Көшеттер Жамбыл облысы Мерке ауданындағы тұқымбақтан алынған. Жаңа алмабақта «Голден Делишес», «Старкримсон», «Мельба», «Столовка» және «Қызылай» сорттары өсірілуде. Суару жүйесі Израиль технологиясы бойынша жасалған.<img src="https://knadmin.beoblood.kz/uploads/Zha_azhol_Zh_Sh_S_2_3040f03b0a.jpg" alt="Жаңажол ЖШС 2.jpg">

Қанат Бозымбаев "Жаңажол" ЖШС жұмысымен танысты

<a href="https://kyzylorda-news.kz/">Kyzylorda-news.kz</a> Қазақстан Республикасы Президент жанындағы Орталық коммуникациялар қызметінің құрылымында Жалған ақпаратқа қарсы күрес жөніндегі орталық жұмысын бастайды.Жаңа құрылым азаматтардың сенімді ақпарат алу құқығын қамтамасыз етудегі маңызды элемент болады.Орталықтың негізгі міндеттері:<ul><li style="text-align:justify;">жалған ақпаратты анықтау және оны жоққа шығару;</li><li style="text-align:justify;">азаматтарды маңызды тақырыптар бойынша объективті, тексерілген деректермен қамтамасыз ету;</li><li style="text-align:justify;">ақпаратты жауапкершілікпен тұтыну мәдениетін дамыту.</li></ul>Ақпараттық қанықтыру жағдайында фактілерді қасақана бұрмалаудан ажырату өте маңызды. Жаңа орталық ақпарат ағынында навигация құралына айналады.Жұмыс мемлекеттік органдар, сарапшылар қауымдастығы, журналистер және азаматтармен ынтымақтастықта жүргізіледі.Орталықты құру - бұл нақты фактілерге, жауапкершілікке және ақпаратқа деген сенімге негізделген тұрақты коммуникациялық ортаны қалыптастыруға қисынды қадам.Орталық фейктерге тұрақты шолулар, манипуляция жасау кейстерін жариялайды, сондай-ақ резонанстық ақпараттық тақырыптар бойынша сараптамалық түсініктемелер береді. Орталықты іске қосу күрделі ақпараттық процестерді әлеуметтік желілердегі ресми ресурстарға қарапайым және көрнекі түсіндіруге бағытталған ақпарат орналастырумен қатар жүреді.Бірінші шығарылымда соңғы кездері еліміздің ақпараттық кеңістігінде пайда болып жатқан жалған мәліметтерді зерделейміз.Фото: ortcom.kz

ОКҚ жанында Жалған ақпаратқа қарсы күрес жөніндегі орталық іске қосылды

<a href="https://kyzylorda-news.kz/">Kyzylorda-news.kz</a> Теміржол саласы – еліміздің әлеуметтік-экономикалық жағдайына тікелей әсер ететін экономиканың негізгі күші. Ел экономикасының «күре тамыры» саналатын бұл саланың стратегиялық маңызы, ел алдындағы еңбегі ұшан-теңіз. Қазалы ауданының теміржол саласының да тарихы тым тереңде жатыр.Бүгін аудан әкімінің міндетін атқарушы Жалғас Сүйеубаев аудандағы теміржол саласының қызметкерлерін қабылдап, кәсіби мерекелерімен құттықтады.<blockquote>- Қазалы теміржол тасымалының тарихы 1905 жылы Орынбор-Ташкент темір жол қатынасы құрылысының салынуынан басталды. Қазақтың дархан даласын қиып өтіп, батыс пен шығысты байланыстырып жататын «Орынбор-Ташкент» магистралының да халықтың игілігіне берілгеніне ғасырдан асты. Ел тарихындағы бұл алғашқы темір жолдың аудан үстінен қиып өтетіні қазалылықтар үшін де зор мәртебе. Тыныс-тіршілігіміз үшін маңызды саланы алға жылжытуға білікті де білімді, іскер де қабілетті маман ретінде Сіздер өзгелерге үлгі-өнеге болып, ауданымыздың әлеуметтік-экономикалық деңгейінің артуына өлшеусіз үлес қосып келесіздер. Мезгілдің ыстығы мен суығына, уақыттың күні мен түніне қарамай, еселі еңбектің көркін қыздырып, ел экономикасын еселеуге үлкен үлес қосып жүрген сала қызметкерлеріне айтар алғысымыз шексіз, - деді Жалғас Оңғарұлы.</blockquote>Мерекелік қабылдауда ауданымыздағы теміржол саласында жемісті еңбек етіп жүрген бірқатар сала ардагерлерімен қызметкерлеріне облыс әкімінің және аудан әкімінің міндетін атқарушының «Алғыс хаты» табысталды.Жиында аудандық ардагерлер кеңесінің төрағасы, Құрметті теміржолшы Оразғали Бекпанов пен Қазалы вагон пайдалану депосының бастығы Арғын Орынбаев сөз сөйлеп, теміржолшыларды кәсіби мерекелерімен құттықтап, ізгі лебіздерін жеткізді.Мерекелік жиын соңында аудан өнерпаздары ән шырқап, жиылғандарға мерекелік көңіл-күй сыйлады.

Теміржолшылар құрметке бөленді

<a href="https://kyzylorda-news.kz/">Kyzylorda-news.kz</a> Қызылорда облысы бойынша Қылмыстық-атқару жүйесі департаментінің №37 мекемесінен жазасын толық өтеген үш азамат бостандыққа шықты. Мекеме әкімшілігі босатылған азаматтар үшін “Қақпа алдында кездесу” әлеуметтік &nbsp;шарасын ұйымдастырды.Аталған іс-шара — бостандыққа шыққан азаматтардың қоғамға бейімделуіне, әлеуметтік қолдау алуына және қайта құқық бұзбауына бағытталған. Шара аясында ҚАЖ қызметкерлері мен сала мамандары босап шыққандармен жеке әңгімелесіп, олардың алдағы өмірлік жолына бағыт-бағдар берді. Сондай-ақ, заң аясында олардың құқықтары мен міндеттері, жұмысқа орналасу мүмкіндіктері, мемлекеттік қолдау түрлері және қайталама құқық бұзушылықтардың салдары егжей-тегжейлі түсіндірілді.<blockquote>“Бүгін мен үшін қуанышты күн. Жазамды толық өтеп шықтым. Мамандардан болашаққа қажетті ақпараттар мен бағыт-бағдар алдым. Ендігі мақсатым — жұмыс істеп, отбасымның тірегі болу. Армандарым да жоқ емес. Сыртта мені бауырларым күтіп тұр. Енді тек алға жылжып, жақсы өмір бастау керек деп ойлаймын”, – деді босатылған азамат.</blockquote>Сотталғандарды мекеме алдында олардың жақын туыстары қарсы алды.ҚАЖ департаменті мұндай шараларды жүйелі түрде ұйымдастырып келеді. Бұл — тек сотталғандарды босатып қана қоймай, оларды қоғамға бейімдеу, жаңа өмірге бағыттау мақсатында атқарылып жатқан маңызды әлеуметтік жоба.

Жазасын өтеушілер бостандыққа шықты

<a href="https://kyzylorda-news.kz/">Kyzylorda-news.kz</a> Президент, ең алдымен, көлік саласы қызметкерлерін кәсіби мерекесімен құттықтап, оларды еліміздің дамуына елеулі үлес қосып жатқан нағыз еңбек адамдары деп атады.<blockquote>– Мемлекет үшін көлік саласының стратегиялық маңызы айрықша. Бұл – айқын нәрсе. Көлік жүйесі – әрбір елдің дамуының көрінісі. Онсыз экономиканың алға басуы мүмкін емес. Сондықтан бұл салаға біз аса маңызды басымдық ретінде қараймыз. Көлік құралдары – экономиканың қозғаушы күші, өсіп-өркендеу кепілі десек, артық болмайды. Еліміздің осы саладағы мүмкіндіктері мол, тіпті, бірегей деуге болады. Қазақстан – Еуразиядағы негізгі транзиттік хабтың бірі. Біз қазір Транскаспий халықаралық көлік бағдарын белсенді түрде дамытып жатырмыз. Бұл – Қытай, Орталық Азия және Еуропа арасында тауар жеткізудің төте жолы. Былтыр Сиань қаласында көлік-логистика орталығын аштық. Оны «Бір белдеу, бір жол» атты жаһандық бастама аясында Қытай елімен бірлесіп жүзеге асырдық. Бұл қадам халықаралық жүк тасымалын арттыруға септігін тигізуде, – деді Қасым-Жомарт Тоқаев.</blockquote>Президент Қазақстан аумағы арқылы өтетін дәліздердің инфрақұрылымын біртіндеп жақсарту қолға алынғанын айтты.<blockquote>– Логистика орталықтары және қоймалар салынуда. Темір жол құрылысы жанданып жатыр. Осындай маңызды шаралар сыртқы сауда айналымын ұлғайтуға мүмкіндік береді, экономиканы өркендетуге ықпал етеді. Биыл «Достық – Мойынты» темір жолының екінші желісі салынып бітеді. Соның арқасында жүк көлемі бес есе артады. Осы ауқымды жобаны, негізінен, өз жұмысшыларымыз жүзеге асырып жатқанын да атап өту қажет. Сондай-ақ жыл соңында Алматы бекетін айналып өтетін темір жол іске қосылады. Нәтижесінде жүктеме азайып, жүк жеткізу мерзімі қысқармақ. Көлік-тасымал саласы озық, заманауи және бәсекеге қабілетті болуы керек. Сол себепті, алдағы уақытта еліміздегі темір жолдың ұзындығын едәуір арттыру көзделіп отыр. Он бір мың шақырым теміржолды жөндеу жұмысы жалғасады. Жаңадан 5 мың шақырым жол салу және оны жаңғырту жоспарлануда. Қазір Транс-Қазақстан теміржол дәлізі ауқымды жобасы қолға алынды. Менің тапсырмаммен ұзындығы 323 шақырым болатын «Мойынты – Қызылжар» теміржолы салынып жатыр. Бұдан бөлек, «Дарбаза – Мақтаарал» және «Аягөз – Бақты» теміржол өткелінің құрылысы қарқынды жүруде, – деді Мемлекет басшысы.</blockquote>Қасым-Жомарт Тоқаевтың пікірінше, тағы бір маңызды бағыт – машина жасау секторы. Әлемнің ең озық компанияларын тарта отырып, жергілікті өндірісті дамыту өзекті.<blockquote>– Қазір Қазақстанда шетелдік үздік компаниялар жұмыс істейді. Мен жыл басында Астанадағы электровоз құрастыру кәсіпорнына бардым. Онда жүк және жолаушылар тасымалдайтын электровоз бен қосалқы бөлшектер шығарылып жатыр. Ең бастысы, осындай маңызды жұмысты өз мамандарымыз атқаруда. Мемлекет мұндай жобаларға жан-жақты қолдау көрсете бермек, – деді Президент.</blockquote>Мемлекет басшысы әуе қатынастарын дамыту көлік саясатындағы басым міндеттердің бірі екенін атап өтті.<blockquote>– Бүкіл ел бойынша авиация инфрақұрылымын жаңғырту үшін кешенді жұмыс жүргізіліп жатыр. Мысалы, өткен жылы Алматы, Шымкент және Қызылорда қалаларында жаңа терминалдар іске қосылды. Әуежайлардың өткізу қабілеті айтарлықтай артты. Бұрын Алматы әуежайы жылына 2,5 миллион жолаушыға ғана қызмет көрсете алатын. Бүгінде бұл көрсеткіш 14 миллионға дейін ұлғайды. Менің тапсырмаммен Зайсанда, Катонқарағайда және Кендірліде үш жаңа әуежай салынып жатыр. Арқалық әуежайы қалпына келтіріле бастады. Мұндай жобалардың жүзеге асуы жолаушылар нөпірін көбейтіп қана қоймайды. Сонымен қатар логистика, туризм, сауда және басқа да қосалқы салалардың дамуына серпін береді. Әуе рейстерінің географиясын кеңейту мақсатында тұрақты түрде жүйелі шаралар қабылдап жатырмыз. Қазіргі кезде Қазақстанның 30-дан астам елмен тікелей әуе қатынасы бар. Бірақ бұл аз. Аталған бағыттағы жұмыс жалғасады, – деді Мемлекет басшысы.</blockquote>Қасым-Жомарт Тоқаевтың айтуынша, алдағы маңызды міндет – әуе арқылы жүк тасымалын дамытып, Қазақстанды аймақтағы жетекші авиациялық хабқа айналдыру.<blockquote>– Үкімет ұлттық жүк тасымалдаушы әуе компаниясын құру туралы жоспарын мәлімдеді. Жалпы, еліміздегі азаматтық авиация мен әуе арқылы жүк тасымалын дамыту мәселесі тек көлік қызметі ретінде қарастырылмайды. Оның ауқымы одан әлдеқайда кең. Бұл – еліміздің экономикалық өсіміне, халықаралық аренадағы орнына және егемендігіне тікелей әсер ететін стратегиялық вектор, – деді Президент.</blockquote>Сонымен қатар Мемлекет басшысы автокөлік жолдарының сапасын жақсартуға қатысты ауқымды жұмыс жүргізіліп жатқанына назар аударды.<blockquote>– Былтыр 7 мың шақырым автокөлік жолы пайдалануға берілді. Талдықорған – Өскемен, Қарағанды – Алматы, Ақтөбе – Атырау – Астрахан бағытындағы күре жолдар жаңғыртылды. Жергілікті автокөлік жолдары да жөнделіп жатыр. Мұндай ауқымды жұмыс ел тарихында бірінші рет іске асатын болды. Бұдан бөлек, басқа да ірі жобалар жүзеге асырылып жатыр. Өткен жылы халық көптен күткен Бұқтырма су қоймасындағы көпір ашылды. Бұл – Қазақстандағы ең ұзын көпір. Осы өткел екі облысты және жеті ауданды байланыстырады, сондай-ақ Қытай мен Ресейді жалғайды. Шақпақ баба асуында еліміздегі ең алғашқы туннель іске қосылды. Шын мәнінде, «Жол – тіршілік көзі, жол бар жерде қайнаған өмір бар» деп бекер айтылмаған. Осы нысандардың игілігін ең алдымен халық көреді. Сапалы жол азаматтардың әл-ауқатын арттыруға ықпал етеді. Жалпы, Қазақстанда көлік-транзит саласы қарқынды дамуда. Бұл – өздеріңіз сияқты азаматтардың қажырлы еңбегінің жемісі. Қазір осы салада 770 мыңнан астам адам жұмыс істейді. Сіздер адал қызмет етіп, елімізді көркейтуге мол үлес қосып жүрсіздер. Мен бүгін барлық көлік саласы қызметкерлеріне шынайы ризашылығымды білдіремін. Біз бір ел болып заң мен тәртіпке бағынатын Әділетті Қазақстанды құрып жатырмыз. Бұл – мемлекетіміздің болашағы үшін өте маңызды жұмыс, оны міндетті түрде орындауымыз керек. Көлік саласы мамандары өз міндеттерін мінсіз атқарып, мемлекеттік маңызы бар іске белсенді түрде атсалысып келеді. Алдағы уақытта да ел игілігіне қызмет етесіздер деп сенемін. «Еңбек еткен елден ырыс кетпейді» дейді халқымыз. Еңбекқорлық пен кәсібилік – өркениетті қоғамға тән қасиеттер. Еңбек адамы ең жоғары марапатқа лайықты, – деді Қасым-Жомарт Тоқаев.</blockquote>Салтанатты жиында еліміздің көлік саласын дамытуға, қатынас жолдарының инфрақұрылымын қалыптастыруға және жаңғыртуға қосқан елеулі үлесі үшін бір топ азамат мемлекеттік наградамен марапатталды. Атап айтқанда, «Қазақстанның Еңбек Ері» атағы «Қазақстан темір жолы» компаниясының ардагері Қалтай Сәмбетовке берілді. Ол 66 жыл үздіксіз жұмыс істеп, теміржол саласын және көлік инфрақұрылымын дамытуға зор үлес қосқан. Ең жоғары мемлекеттік награда көлік саласының өкіліне алғаш рет табысталып отыр.Сондай-ақ былтыр мемлекеттік наградалар жүйесіне 9 жаңа құрметті атақ енгізілді. Соның бірі – «Қазақстанның көлік саласының еңбек сіңірген қайраткері». Бүгін бұл құрметті атақ еңбек ардагерлері – Борис Исинамановқа, Владимир Аверкинге, Қанат Шайминге және Андрей Горватқа берілді.Жиында сала ардагері, «Қазақстанның Еңбек Ері» Қалтай Сәмбетов, «Гидротехникалық құрылыстар» филиалы Бұқтырма шлюзінің «Тайфун» сүңгуір станциясының капитаны – жоғары санатты механигі Владимир Аверкин, «Шымкент әуежайы» АҚ ұшу аппараттарын жуушы Нұрзейнеп Пірманова сөз сөйледі.

Мемлекет басшысы көлік саласының қызметкерлерін марапаттады

<a href="https://kyzylorda-news.kz/">Kyzylorda-news.kz</a> Аймағымызда &nbsp;2–12 тамыз аралығында Халықаралық жастар күніне орай жастар онкүндігі өтеді. Әр күнге түрлі тақырып бекітіліп, 200-ге жуық іс-шара ұйымдастырылады. Олардың қатарында экологиялық акциялар, мәдени бастамалар, бос жұмыс орындары жәрмеңкелері, құқықтық түсіндіру жұмыстары, қайырымдылық және еріктілік бағытындағы жобалар бар. Бұл туралы бүгін Өңірлік коммуникациялар қызметінің ақпарат алаңында облыстық қоғамдық даму басқармасының басшысы Руслан Каюпов хабарлады.<blockquote>- Онкүндік аясында күн сайын белгілі бір тақырыпқа негізделген іс-шаралар өткізіледі. Атап айтқанда, «Жастар және тазалық», «Жастар және денсаулық», «Жастар және білім», «Жастар және еріктілік», «Жастар және заң мен тәртіп», «Жастар және адал еңбек», «Жастар және достық», «Жастар және Абай», «Жастар және дәстүр» бағыттары бойынша түрлі мазмұндағы жұмыстар жүргізіледі. Бұл шаралар арқылы жастардың қоғамдық өмірге белсенді қатысуына, экологиялық, мәдени, құқықтық және рухани мәселелерге деген көзқарасын қалыптастыру көзделіп отыр. Мәселен, сенбілік акцияларынан бастап, зияткерлік ойындар, кітап оқу марафондары, қан тапсыру бастамалары, ұлттық құндылықтарға негізделген мәдени кездесулер, өнер байқаулары мен жастарға арналған ашық диалог алаңдары ұйымдастырылады. Шаралар жастардың қабілетін шыңдауға, пікірін еркін білдіруге және белсенді азаматтық ұстаным қалыптастыруға бағытталған. Жалпы, бұл онкүндік - жастарға арналған іргелі жобалардың бірі. Жастар саясатын іске асыруда әр сала бойынша нақты қадамдар жасалып келеді. Осы онкүндікті ұйымдастыруда облыс әкімдігімен қатар барлық басқармалар мен аудан, қала әкімдіктері жұмыла жұмыс жүргізеді. Барлығы 200-ге жуық іс-шара өткізіліп, тікелей және жанама түрде 50 мыңға жуық жас қамтылмақ. Бұл - жастардың әлеуетін дамыту мен қолдауға бағытталған ауқымды әрі мазмұнды бастама,-деді Руслан Мұхамедәліұлы.&nbsp;</blockquote>Сонымен бірге, облыстық жастар ресурстық орталығының директоры Алиби Басаров жастардың қабілеті мен мүмкіндіктерін дамытуға арналған жобалардың маңызды екенін атап өтті.<blockquote>- Жастардың әлеуетін дамыту - өңірдің басты басымдықтарының бірі. Қазіргі таңда біз жастардың білім, денсаулық, мәдениет, спорт және құқықтық сауаттылық салаларындағы белсенділігін арттыруға ерекше назар аударудамыз. Онкүндік аясында өткізілетін шаралар жастарға өздерін толық танытуға, кәсіби және шығармашылық қабілеттерін жетілдіруге, қоғамдық өмірге араласуға мүмкіндік береді. Сонымен қатар, бұл шаралар жастардың патриоттық сезімін күшейтіп, ұлттық құндылықтарды насихаттауға бағытталған. Біз жастардың әрбір бастамасын қолдап, олардың дамуына барлық жағдайды жасауға ұмтыламыз. Өңірде жастарға арналған инфрақұрылым үздіксіз жетілдіріліп келеді, бұл өз кезегінде олардың болашаққа сеніммен қарауына және елдің дамуына үлес қосуына септігін тигізеді,-деді Алиби Төлепбергенұлы.</blockquote>

Қызылордада халықаралық жастар күніне орай онкүндік басталды

<a href="https://kyzylorda-news.kz/">Kyzylorda-news.kz</a> Бүгін Сексеуіл кентінде теміржолшылар күні және Сексеуіл темір жолы мекемелерінің құрылғанына 120 жыл толуына орай шағын фудболдан аудандық турнир өтті.Теміржол саласы – еліміздің әлеуметтік-экономикалық дамуында, өндіріс пен халық арасындағы байланысты нығайтуда аса маңызды рөл атқарып келе жатқан іргелі сала. Осы салада табанды еңбек етіп, күре жолдағы қатынасты дамылсыз қадағалап жүрген теміржолшылар мереке қарсаңында бір сәт салауатты өмір салтын ұстанып, турнир көркін айшықтай түсті.Мемлекет басшысы қоғамда еңбек адамына деген көзқарасты түбегейлі өзгертіп, жұмысшы мамандықтарды дәріптеу керектігін баса айтқаны белгілі. Бұл еліміздің өндірістік және логистикалық әлеуетін нығайту жолында айтарлықтай септігін тигізетін маңызды бастама. Бұл турнир де жұмысшы мамандықтарға деген құрметтің белгісі іспетті.Турнирдің ашылу салтанатына аудан әкімінің орынбасары Н.Бохаев қатысып, сала қызметкерлерін мерекемен құттықтап, тартысты доп додасына сәттілік теледі.<blockquote>– Құрметті теміржолшылар! Баршаңызды алдымен теміржолшылар күні мерекесімен құттықтаймын. Бүгін өздеріңізбен кәсіби мерекеге орай темір жол мекемелерінің қызметкерлері арасында шағын футболдан өткізілгелі тұрған турнирде бас қосудамыз. Темiр жол – ел экономикасының өзегi, мемлекетiмiздiң қуатты жүйесi саналады. Осы орайда, темір жолдың темірдей тәртібіне бағынып, өз міндеттеріне жоғары жауапкершілікпен қарайтын сіздердің еңбектеріңізді әрдайым жоғары бағалаймыз. Темiржолшы мамандығы – ерлiк пен үлкен жауапкершiлiктi талап ететiн кәсiп екені белгілі. Барлық қатысушы командаларға сәттілік тілеймін, – деген Нұрмұхамед Омарұлы болат жол бойындағы барыс-келісті бір сәт көзден таса қылмай, локомативтің кідріссіз әрі сенімді жұмыс жасауына жағдай жасап келе жатқан жандар жұмысшы мамандықтар жылында ескерусіз қалмайтынын айтып, жыл бойы құрмет көрсетуге лайық екенін жеткізді.</blockquote>Теміржолсышлардың кәсіби мерекесі қарсаңында өткен тартысты доп додасына сала мамандарынан құралған 10 команда қатысты. Темір саласында жұмыс істейтін түрлі мекемелерден жасақталған командалар арасында «Сексеуіл локомотив пайдалану депосы» командасы жүлделі І орынды еншілесе, «Қазалы сигнализация және байланыс дистанциясы Сексеуіл бөлімшесі» командасы ІІ орынды қанжығалады. Тартысты турнирдің жүлделі ІІІ орнын «Әсериленген теміржол күзеті ЖШС-нің Сексеуіл атқыштар» командасы иеленді.

Жұмысшы мамандар арасында турнир өтті

<a href="https://kyzylorda-news.kz/">Kyzylorda-news.kz</a> Сауд Арабиясының Эт-Таиф қаласына жақын орналасқан Хада ауданындағы Green Mountain Park саябағында "360 градус" аттракцион сынып кетті. Бұл туралы <a href="https://stan.kz/">Stan.kz</a> ақпарат агенттігі Oxu.Az Khaleej Times басылымына сілтеме жасап хабарлады.&nbsp;Оқиға салдарынан 23 адам жарақат алған. &nbsp;Оқиға болған сәт видеоға түсіп қалған. Кадрлардан аттракционның дәл ортасынан сынып, адамдар отырған кабинаның жерге құлағаны анық көрінеді. Құлау кезінде адамдардың қорқыныштан айқайлаған дауысы естілген.Жарақат алғандар шұғыл түрде жақын маңдағы ауруханаларға жеткізілді. Зардап шеккендердің жағдайы туралы нақты ақпарат әзірге анықталып жатыр.Видеодан скрин

Қазақстан және Қызылорда облысының жаңалықтары: Қоғам