<a href="https://kyzylorda-news.kz/">Kyzylorda-news.kz</a> Жақсылыққа жол сілтеп, қайырымдылыққа қадам басу, пайдасы мол іспен айналысып, айналаны ілтипатқа толтыру – нағыз адами болмыстың көрінісі екені анық. Асыл дінімізде де амалдарды шынайылықпен атқарып, мол сауапқа кенелу – басты мақсаттардың бірі. Жер бетіндегі сондай ізгі амалдардың ең қайырлысы – барша мұсылман қауым құлшылық жасап, парызын өтейтін руханият ордасы мешіт тұрғызу.&nbsp;Халық даналығында мешітті Алланың жердегі үйі деп атайды. Расында, мұсылман үшін аталған мейірім ордасынан асқан қасиетті жер болмайтыны хақ. Себебі бұл – тек құлшылық жасайтын орын ғана емес, діни сауат ашып, сәбиге азан шақыра ат қоятын, отау құрған жас жұбайлардың ақ некесін қиып, дүниеден озған жандардың рухына Құран бағыштайтын, діни мейрамдарда бас қосып, қайырымдылық жасап, қиналған адамдарға рухани қолдау болатын киелі мекен. Бүгінде жомарт жандар мен сауап іздеген азаматтардың қолға алуымен өңірде осындай ғибадат орындары бой көтеруде. Соның бір үлгісі жуырда жалғасын тапты. Жеке кәсіпкер Мақсат Көшерұлының демеушілігімен ауданда заман талабына сай, биік мұнаралы, әсем күмбезді мешіттің жаңа ғимараты тұрғындарға құшағын айқара ашты.&nbsp;Алланың сүйікті құлы әрі елшісі, ғаламның рахым нұры, екі дүние сардары, адамзаттың ардақтысы болған Пайғамбарымыздың (с.ғ.с.) атына берілген жаңа ғимарат кенттегі Тәуелсіздік көшесінің бойынан орын тепті. Жуырда шежірелі өлкеде Хазіреті «Мұхаммед (с.ғ.с.)» мешітінің ашылу салтанатына жиылған жамағаттың қарасы тым көп болды. Салтанатты шараға Шиелі&nbsp;ауданының әкімі Нұржан Сәбитұлы, облыстық ардагерлер кеңесінің төрағасы Серік Әбішұлы, облыстың бас имамы Дастан Жанасұлы, сондай-ақ бірқатар зиялы қауым өкілдері қатысты. Алғашқы құттықтау сөз алған Шиелі ауданы әкімі Нұржан Ахатов тұрғындарды жаңа ғимараттың ашылу салтанатымен құттықтап, дінімізге қуат, елімізге тыныштық тіледі.–&nbsp;Мемлекет басшысы Қасым-Жомарт Кемелұлы: «Ілім тұрғысынан ұшталған Исламды дамыту үшін Қазақстанның барлық мүмкіндігі бар. Біз прогресс, бейбітшілік және әділет, дін мен адамгершілік құндылықтарды құрметтеу, толеранттылық және басқа дін ілімдерінің өкілдерімен тату көршілік қағидаттарында қоғамды құрудың лайық үлгісін барша әлемге көрсетуге қауқарлымыз»,&nbsp;–&nbsp;деген болатын.&nbsp;Түрлі ұлт өкілдері тұратын біздің ауданымызда да діни ахуал тұрақты деуге толық негіз бар. Бүгінде аудан бойынша 2 діни бірлестік, 31 ғибадат ету орындары қызмет атқаруда. Сонымен қатар Ислам бағытындағы медресе діни білім алуға қызығушылығы бар барлық баланы оқытып, имамдарды қайта даярлауда.&nbsp;Құрметті жамағат! Жаңа мешіттің ашылуымен баршаңызды құттықтай отырып, дінімізге қуат, елімізге тыныштық тілеймін. Халқымыздың ырыс-несібесі мол болып, ауызбіршілігі арта берсін,&nbsp;– деді ол.Сонымен қатар Қызылорда облысының бас имамы Дастан Құрманбаев&nbsp;қасиетті мекеннің ашылуына жиналған жамағатқа ҚМДБ төрағасы, бас мүфти Наурызбай қажы Тағанұлының ыстық сәлемі мен құттықтауын жеткізіп, барлық игі, салиқалы амалдар Алла Тағаланың нәсіп етуімен болатынын, осы орайда осынау игілікті істі қолға алып, жүзеге асырған Мақсат Нұрмағамбетов пен оның ата-анасына алғыс білдірді.Қонақтар күллі адамзатты жаратқан мейірімді Аллаға құлшылық жасауға арналған таухид орталығының жүректерді ғибадатпен нұрландыруға үлкен мүмкіндік екенін айтып, ашылған киелі орынның&nbsp;Сыр еліндегі Пайғамбарымыздың (с.ғ.с.) атына берілген алғашқы мешіт екенін тілге тиек етті. Мешіттің негізін қалап, құрылысын жүргізген жеке кәсіпкер Мақсат Көшерұлы мен оның ата-анасы да өз кезегінде ғимарат құрылысына атсалысқан барша ағайынға алғысын жаудырды.–&nbsp;Осы өңірдің топырағынан нәр алғаннан кейін, оның болашағына қосқан үлесіміз ретінде мойнымызға үлкен жауапкершілік алып, аманат арқалап едік. Бүгін бірнеше жылдан бері ойымызда болған құлшылық орнын&nbsp;халық игілігіне табыстағалы жатырмыз.Қасиетті мешіттің құрылысы кезінде қолынан келгенше көмек көрсеткен барша жамағатқа, жора-жолдастар мен ағайын-туыс, бауырларға үлкен алғысымды білдіремін, – деді&nbsp;Мақсат Көшерұлы.Ынтымағы жарасқан ағайынның білек біріктіре тұрғызған имандылық ұясының лентасы үлкендердің батасымен қиылды.&nbsp;Мешіттің символикалық кілті Дастан Жанасұлына табысталды. Жиылған жамағат Алла үйіне басып кірген әр қадам берекеге толсын деген ақ тілегін арнады. Қонақтарға дәстүрге сай шапан жауып, естелік суретке түсті.Айта кетейік, Шиелі ауданының орталығынан бой көтерген&nbsp;Хазіреті «Мұхаммед (с.ғ.с.)» мешіті 500 адамға арналған. Мұнда ерлер және әйелдерге арналған намазжайдан бөлек, дәрісхана, имамдар бөлмесі бар. Ішкі көрінісі қазақы ою-өрнекпен безендірілген. Ал төр жақ қабырғада Алланың 99 көркем есімі жазылған. Құлшылық орнына Сарыағаш медресесінің түлегі, «Шәйзында» мешітінің бас имамы болған білікті маман Ержан Пірімбетов бас имам болып тағайындалды.&nbsp;Қоса кеткен жөн, жақында ғана жаңа мешітке елімізге белгілі ұстаз, исламтанушы Нұрсұлтан Рысмағанбетұлы келіп, шиелілік жамағатқа уағыз насихатын арнады. Жамағатқа лық толы болған құлшылық үйі бұл күні қайырымды қасиеттер мен ізгі ойларға толып тұрды. Адамзат баласының рухани тұрғыдан дамуы мен пенденің тұла бойына адамгершілік құндылықтарды ұялатудың тағы бір себебіне айналған осынау мекен асыл дініміздің діңгегіне айналсын. Салтанатты шараға жиылған жамағаттың көкейдегі тілегі бұл.

Шиеліде жаңа мешіт бой көтерді

<a href="https://kyzylorda-news.kz/">Kyzylorda-news.k</a> Еліміздің батысындағыдай күнде бомба жарылып, оқ ысқырып жатпағанымен, тылдағы тірлік те соғыстағыдан кем болған жоқ. «Бәрі де жеңіс үшін, бәрі де майдан үшін» деген ұранмен жігерленген жұрт күнді түнге, түнді таңға ұластырып жұмыс істеді. Еңкейген кәріден&nbsp; еңбектеген балаға дейін тыным таппады. Оны көзімен көргендер ғана айта алады.Ұлы Отан соғысындағы Жеңіске тыл еңбеккерлерінің қосқан үлесі орасан зор. Балғындықпен ерте қоштасқан балалар, майдандағы жауынгерлердің аналары мен жарлары елде тынымсыз тер төкті. Олардың қатарында Әділхан Османов, Зейнеп Қадарқызы да бар.Жеңіс күні мерекесі қарсаңында Шиелі ауданының әкімі Нұржан Сәбитұлы тыл ардагерлерінің отбасына барып, тылдағы майданда тынбай тірлік істеген жандардарға алғысын білдірді.Алдымен, аудан басшысы Шиеліге қарасты Алмалы ауылындағы 100 жастағы тыл ардагері Әділхан Османовтың шаңырағында болды.Шиелі ауданы әкімі Нұржан Ахатов сұрапыл соғыс кезінде «Барлығы майдан үшін, барлығы жеңіс үшін» деген ұранмен таң сәріден, кеш батқанға дейін қажырлы еңбек етіп, соғыс күндерінің барлық ауыртпалықтарын қайсарлықпен көтерген ғасыр адамына ізгі лебізін білдіріп, сый-сияпатын табыстады.Одан соң, Бестам ауылындағы 99 жастағы тыл ардагері Зейнеп Қадарқызының отбасына барып, қарт ананы қуанышқа бөледі.Сондай-ақ, мереке қарсаңында Шиелі аудандық мәслихат төрағасы Айтбай Жандарбеков,&nbsp; «Аманат» партиясы Шиелі аудандық филиалы төрағасы Болат Сыздық және Шиелі ауданы әкімінің орынбасарлары аудан басшысының құттықтауын бірқатар тыл ардагерлеріне жеткізді.Үлкенін құрметтеп, ізгілік жолымен келе жатқан ел ісіндегі азаматтарға ардагерлер ризашылықтарын жеткізіп, ақ батасын берді.

Шиеліліктер тыл ардагерін құттықтады

<a href="https://kyzylorda-news.kz/">Kyzylorda-news.kz</a>&nbsp; Партияның облыстық филиалы жанындағы «Кітап - AMANAT» орталығында бірнеше жыр жинақтары мен прозалық кітаптардың &nbsp;авторы, ақын, Халықаралық «Алаш» әдеби сыйлығының лауреаты, Қазақстан Телерадио Академиясының «Алтын жұлдыз» иегері, Қазақстанның Құрметті Журналисті Қаршыға Есімсейітованың &nbsp;«Шешім» атты кітабының тұсаукесер рәсімі өтті.Қаршыға Құрмашқызы бұл кітабында кейінгі толқын жастарға, студенттерге өз болмысының тұңғиық әлемін ашып, көңіл терезесінен сәуле түсірейін деген шешім қабылдаған. Шараны ашқан партияның облыстық филиалы Атқарушы хатшысының орынбасары Алтынбек Жарылқасынов партияның «Кітап-AMANAT» жобасы мен орталықтың негізгі жұмысын атап өтті.<blockquote>«Өздеріңіз білетіндей Мемлекет басшысы ұлттық мүддеге сай келетін кітаптар шығару, кітапханалар ашу ісіне ерекше мән беріп келеді. Осы орайда «AMANAT» партиясы Мемлекет басшысының қоғамдық тірегі ретінде Президенттің ұлттың зияткерлік дамуына жан-жақты қолдау көрсету бастамасын іске асыруға дәнекер болатын «Кітап-AMANAT» жобасын іске қосып, барлық өңірлерде партия филиалдары жанынан кітап орталықтарын ашты. Бұл орталықтардың мақсаты &nbsp;отандық әдебиет пен баспагерлерді қолдау.Олардың туындыларын оқырманға барынша қолжетімді бағамен ұсыну. Қазақ тілінде кітап шығаратын отандық баспаларды қолдау және қазақстандықтардың интеллектуалдық-мәдени әлеуетін дамыту проблемаларына жұртшылықтың назарын аудару болып табылады. Мұнан бөлек, бұл орталықтарда оқырмандар кештері ұйымдастырылады. Жаңа кітаптардың презентациялары өтіп, қазақстандық жазушылардың қатысуымен партияның түрлі іс-шаралары өткізілуде. Бүгінгі шара соның бір көрінісі»,- деді Алтынбек Жарылқасынов.&nbsp;</blockquote>Кездесуге партияның облыстық филиалы жанындағы ұлттық руханият пен мәдениетті қолдау жөніндегі «Мирас» аймақтық кеңесінің төрағасы, философия ғылымдарының докторы, профессор Баймырза Қожамберлиев, эколог-жазушы Сайлаубай Жұбатырұлы, Қазақстан жазушылар одағының мүшесі, «Бір нәзік сезім», «Мен табынған құдірет», «Құмырсқа тірлік» атты әңгімелер мен новеллалардың авторы Несібелі Рахмет, ақын, сазгер тіл жанашыры Ділдахан Торғаева, &nbsp; Қазақстан Жазушылар және Журналистер одақтарының мүшесі, ақын Ғазиза Әбілда қатысып, кейінгі ұрпаққа білім мен тәлім - тәрбие берудегі «Кітап – AMANAT» жобасының маңыздылығы зор екендігін атап өтіп, автор мен оның туындысы туралы ой бөлісті.&nbsp;Тағылымды шара барысында сиясы кеппеген жаңа туынды оқырман қауым үшін партияның «Кітап - Аманат» орталығына тапсырылды.&nbsp;

 Қаршыға Есімсейітованың  жаңа кітабы оқырманға жол тартты

<a href="https://kyzylorda-news.kz/">Kyzylorda-news.k</a> Медицина саласы жоғары жауапкершілікті, асқан төзімділікті, биік парасат пен батыл қадамдарды талап ететін мамандық. Аталған мамандықта кездейсоқ тап болу деген атымен жоқ. Саналы түрде шешім қабылдап, медицина қызметкері боламын деп өмірлік мақсат қойған адамның ғана қолынатын келетін іс. Шиелі аудандық көпбейінді орталық ауруханасының эпидемиолог-мейіргері Құралай Жүрсімамбетованың әңгімесінен осындай ой түйдік. Ол 1981 жылы Түркістан Медициналық училищесіне түсіп, 1983 жылы Шиелі аудандық ауруханасының жұқпалы аурулар бөліміне кезекші мейіргер болып жұмысқа орналасады. Қазіргі таңда аталған мекемеде эпидемиолог-мейіргер болып қызмет атқарады.&nbsp;Жұқпалы аураларды бақылау мейірбикесінің негізгі міндеттері де бар. Оны медбике төмендегіше түсіндірді.&nbsp;<blockquote>– ЕПМ-нің эпидемиолог дәрігері тағайындайтын профилактикалық іс-шараларлы орындауды жүзеге асырып, стационардың барлық функционалдық бөлімшелерінен күнделікті ақпарат алады. Сондай-ақ жұқпалы аурулар түскен жағдайда белгіленген тәртіппен аумақтық тұтынушыларрдың құқығын қорғау басқармасына шұғыл хабарлама жіберілуін қадағалайды. Иммундық-биологиялық препараттарды жеткізу шарттарын және сақтауды, уақытылы және сапалы профилактикалық егуді жүргізуді бақылауды қарастырамыз, – деді.&nbsp;</blockquote>Ісіне берік, жұмысына тиянақты маманға әріптестері ерекше құрметпен қарайды. Жалпы еңбек өтілі – 41 жыл. Келесі жылы зейнетке шығады. Дегенмен, "осы салаға келетін мамандарға үйретерім" көп дейді. Оның айтуынша, мейірбике ісі – денсаулық сақтау жүйесінің бөлінбес бөлшегі.&nbsp;

Шиелі: Саналы ғұмырын санитарлық-эпидемиологиялық қызметке арнаған мейіргер

<a href="https://kyzylorda-news.kz/">Kyzylorda-news.kz</a> «Таза Қазақстан» республикалық акциясы аясында Сыр өңірінде «Мөлдір бұлақ» апталығы қорытындыланды. Жалпы акцияның мақсаты - табиғатты таза ұстап, тұрғындар арасында экологиялық мәдениетті арттыру. Ұйымдастырылып жатқан тазалық шаралары нәтижесінде су айдындары мен өзен, көлдер жағалаулары және аяқсу арықтарының бойы тазартылды. «Мөлдір бұлақ» апталығы аясында 20 мыңнан астам адам, соның ішінде мемлекеттік мекемелер мен жеке ұйымдар, жастар және волонтерлер, тұрғындар қатысып, барлығы 245 техника жұмылдырылды. Тазалық апталығы аясында облыстағы «Сырдария» өзенінің жағалауы, «Аққұмшық» жағажайы, «Кәрібөгет» көпірі, «Лайкөл», «Қамбаш», «Жалаңаш», «Шөмішкөл», «Райым», «Тұщы», «Иіркөл», «Қараөзек», «Әлімкөл», «Жаманкөл» көлдерінің және &nbsp;«Қалғандария», «Елтай», «Шіркейлі», т.б. су арналарының жағалауларына қоқыстан, тұрмыстық қалдықтардан тазарту жұмыстары жүргізілді. &nbsp;Жалпы экоакция апталығы аясында су айдындары мен аяқсу арықтары 40 тоннадан астам қоқыстан тазартылды.Еске сала кетсек, «Таза Қазақстан» экологиялық акциясы аясында облыс әкімі Н. Нәлібаевтың экологиялық науқанға аймақ жұртшылығын белсене қатысуға шақырған үндеуі жарияланып, облыс көлемінде санитарлық тазарту, көркейту және көгалдандыру бойынша сенбіліктер ұйымдастырылуда. Облыс көлемінде көркейту-көгалдандыру және санитарлық-тазалық жұмыстары тек акция аясында ғана емес аймақтағы барлық елді мекендерде көктемнің алғашқы күні 1 наурыздан бастау алған болатын.

Сыр өңірінде «Мөлдір бұлақ» апталығы қорытындыланды

<a href="https://kyzylorda-news.kz/">Kyzylorda-news.kz</a> «Ауру батпандап кіріп, мысқылдап шығады» деген қазақ денсаулықтың қадірін әу баста-ақ жақсы білген. Алда-жалда басымыз ауырып, балтырымыз сыздаған кезде ақ халатты абзал жандарға қарай жүгіретініміз сөзсіз. Олардың еңбегі де орасан зор. Соның ішінде мейірімділік пен жылылықтың символына айналып, игі қызмет жасап жүрген медбике ісі қашанда сый-құрметке лайық. Бұл маман иелері денсаулық сақтау ісінің ажырамас бір бөлігі. Мұқым елге мәлім, 12 мамыр – әлем бойынша медбикелер күні. Атаулы датаға орай Шиелі көпбейінді орталық ауруханасы мен аудандық емхананың мейіргерлерінің тыныс-тіршілігін баян етпекпіз.Дертіне шипа іздеген науқастың сауығып кетуіне алдымен дәрігер жауапты болса, одан кем қарамайтын күнделікті жұмыста мықты тірек, көмекші болып жүрген медбикелердің ісі қашанда адал. Осы тұрғыда Шиелі аудандық аурухананың бас мейіргері болып қызмет атқаратын Назым Сейлханованы ерекше атап өтпекпіз. Мамандық таңдауда қателеспеген білгір маман Қызылорда медициналық колледжді ойдағыдай бітіріп, «Емдеу ісі» факультетінде «фельдшер» мамандығында оқыпты. Әрмен қарай 2018-2021 жылдары Қызылорда жоғары медициналық колледжінің мейіргер ісі қолданбалы бакалавр мамандығын тәмәмдап, 2021-2022 жылдар аралығында Қарағанды медициналық университетінің академиялық мейіргер ісі біліктілігін алған.Кейіпкеріміз еңбек жолын 18 жасында бастаған. 2006 жылы Нартай Бекежанов отбасылық дәрігерлік амбулаториясында фельдшер мамандығы бойынша еңбек етеді. Оның қызметтегі алғашқы ұстаздары Гүлнар Пірманова, Асия Түбелбаева, Жаухар Өтепбаевадан үйренгені көп.&nbsp;– Медбикелер – медицинаның негізгі күші, дәрігердің сенімді серігі. Науқас келіп түскеннен аман-есен сауығып, аяғына нық тұрып кеткенге дейін жанашырлық танытып, қолынан келгенше аянбайды. Дәрігер науқасты тексеріп, тағайындауын берген соң, әрі қарай бар жұмысты медбике орындайды. Әрбір өзгерісті қалт жібермей, қадағалап, оны дәрігерге жеткізу – медбикенің міндеті. Медбике сонымен қатар егуін жасап, дәрі-дәрмегін уақытылы береді. Төсек-орын, ас-ауқатын, жалпы халін бақылап, науқасқа қарайтын медбикелердің еңбегі ұшан-теңіз, – дейді Н.Оралбекқызы.&nbsp;Уақытпен санаспай тәулік бойы науқастың жанында қалатын бас медбикенің қызметі адалдық пен жауапкершіліктен жаратылғанына еріксіз бас иесің, құрметтейсің. Айта кетейік, ол 2015 жылы Шиелі аудандық көпбейінді орталық ауруханасына бас мейіргер болып жұмысқа орналасады.&nbsp;Әрбір қызметкермен жеке жұмыс жүргізіп, бағыт-бағдар беру – оның басты міндеті. Сонымен қатар медбикелердің білім деңгейін көтеру үшін оқу курстарына жіберіп отыру да оның қызметінің бір саласы. Мұнан басқа құжаттармен айналысып, дәрігерлермен жұмыс жасау, өзі жетекшілік ететін медбикелер мен тазалықшылардың міндеттерін реттеп, жұмыс кестесі мен тәртібін қадағалауды қалт жібермеу – күнделікті жұмысы. Қазіргі таңда Сібір мемлекеттік медициналық университетінде «денсаулық сақтауды басқару менеджменті» факультетінде магистратурасында білім алуда. Ал 2018 жылы Финляндия елінде мейіргер ісінің озық технологиялары бойынша іс-тәжірибе алмасып, білімін толықтырады. Сонымен қатар білікті медбике өзі қызмет ететін Шиелі аудандық көпбейінді орталық ауруханасындағы әріптестерімен тығыз байланыс орнатып, науқастарды күтіп-баптауды үйретуге де уақыт табады. Қолы қалт етсе, медбикелерге білгенін үйретіп, тәжірибесімен бөліседі.

Шиеліде 600 мейіргер, 300-ге жуық кіші буын медицина қызметкері бар

<a href="https://kyzylorda-news.kz/">Kyzylorda-news.kz.</a> Бүгін аудан әкімі Берік Сәрменбаевтың есепті кездесулері Айдарлы, Жетікөл және Аманкелді ауылдарында басталды. Кездесулерде аудан басшысы өңірде атқарылып жатқан жұмыстарға тоқталып өтті.<blockquote>– Мемлекет басшысы Қасым-Жомарт Кемелұлы Тоқаевтың тапсырмасымен, облыс әкімі Нұрлыбек Машбекұлы Нәлібаевтың қолдауымен өңірде қарқынды жұмыстар жүргізілуде. Мәселен, «Батыс Еуропа-Батыс Қытай» халықаралық дәлізінің Қызылорда қаласынан Ақтөбе қаласына дейінгі аумағын І санатты жолға айналдыруға шешім қабылданды. «Қызылорда-Жезқазған» автомобиль жолының 216 шақырымы жөнделуде. Облыс орталығы ыстық сумен қамтамасыз етіледі. Мемлекет басшысының бастамасымен қолға алынған «Жайлы мектеп» ұлттық жобасы аясында облыста 12 300 орындық 21 мектеп салынуда. Өткен жылы 10 мектептің құрылысы басталса, биыл 11-нің құрылысы жүргізіледі. Оның 1-уі аудан орталығында бой көтереді. «Болат Өтемұратов» қорының қолдауымен 17 млрд. теңгеге жуық қаржыға «Қорқыт Ата» әуежайының жаңа терминалы халықаралық талаптарға сай етіп салынды. Ғимарат жақын арада пайдалануға берілмек. «Руханият жылы» аясында жалпы құны 11 млрд. 500 млн. теңгені құрайтын «Руханият» орталықтары барлық аудан орталықтарында салынып, пайдалануға беріледі. «Ауылдық денсаулық сақтауды жаңғырту» ұлттық жобасы аясында құны 11 млрд теңгені құрайтын 27 нысан салынуда. Өткен жылы елді мекендерде 15 жаңа дәрігерлік амбулатория, 1 медициналық бекет ел игілігіне табысталды. Биыл қалған 11 нысан және 1 ауылдық аурухана салынады. Осы ретте, Аманкелді ауылындағы дәрігерлік амбулатория 103 млн. теңгеге күрделі жөндеуден өткізілуде. Жалпы, барлық сала бойынша жоспарлы жұмыстар атқарылып, елді мекендерді газдандыру, электр желілерін қайта жаңарту, су құбырларын жаңғырту, жол жөндеу жұмыстары жүргізілуде, – деді Берік Әбдіғаппарұлы.</blockquote>Биыл Айдарлы ауылының құрылғанына – 50 жыл. Елді мекенде атқарылып жатқан жұмыстар атаулы дата аясында ұйымдастырылуда. Сондай-ақ, бүгінгі таңда ауылдағы «Уәлихан» және «Тораңғылды» каналдары қазылып, аяқ су мәселесі шешімін табуда.Жетікөл ауылында қоғамдық қауіпсіздікті қамтамасыз ету бағытында 6 көшеге бейнебақылау камералары орнатылса, Аманкелді елді мекенінде А.Ағайдаров, А.Жанкин, М.Қалымбетов көшелерінің ауыз су құбырларын жаңғырту жұмыстары жүргізілуде.Кездесулерде елді мекен тұрғындары инфрақұрылымдық, білім, денсаулық, қоғамдық көлік және басқа салаларға қатысты ұсыныс-пікірлерін жеткізді. Аудан әкімі барлық ұсыныс бақылауда болып, тиісті жұмыстар атқарылатынын айтты.

Сырдария аудан әкімінің есепті кездесулері Айдарлы, Жетікөл, Аманкелді ауылдарында басталды

<a href="https://kyzylorda-news.kz/">Kyzylorda-news.kz</a> Шиелі аудандық емханасының отоларингология бөлімшесінің мейіргері Әлия Рахымова құлақ, тамақ және мұрын аурулары жөнінде сала маманы ретінде ақыл-кеңестерін ұсынбақ.&nbsp;Әуелі, тамақ ауруынан бастайық. Бұл аурудың бірден-бір себебі жұтқыншақтың кілегей қабатының қабынуынан болады. Ол фарингит ауруы деп аталады. Көбіне тұмау мен жедел респираторлы вирустық инфекциялық аурулардан кейін болып жатады. Тамақ неліктен ауырады? Өйткені салқын тиюімен байланысты. Ол ауа арқылы немесе тоңазытқыштан алып мұздай сусын ішкеннен болады. Дер кезінде күтінбесе ары қарай ангинаға ұласады. Тіпті оның іріңді және іріңсіз түрлері болады. Науқас ұзақ уақыт бұл аурумен ауырса созылмалы болып кетеді. Бұның бәрі&nbsp;–&nbsp;салқындаудың әсерінен болатын жағдай.&nbsp;Емханаға ауа райынан немесе мұздай сусын ішіп салқын тигендер жиі келеді. Науқастарға айтатыным, ағзаң әлсіз болса, жиі ауырасың. Мәселен, жиі ауыратын баланың иммунитеті сәйкесінше төмен болады. Ол не себепті дейсіз? Бұл&nbsp;–&nbsp;қаназдықтың салдарынан. Менің айтар кеңесім, иммунитеті төмен балаларды педиатрға қарату қажет. Оның себептерін анықтап алған жөн. Егер қаназдық болатын болса, талдауларын тапсырып, қорытындысы бойынша қан мөлшерін көтеру керек.Келесі мұрын аурулары жиі кездесетін түрі&nbsp;–&nbsp;ринит. Ол мұрынның кілегей қабатының қабынуынан болады. Ауруды мұрын қуысына түскен микробтар мен вирустар тудырады. Ол ауамен беріледі. Мұрын ауруларында тағы бір жиі кездесетіні – гайморит. Мұрында 4 қуыс болады. Соның ең үлкені&nbsp;–&nbsp;ауамен тікелей байланыста болатын гайморит қуысы. Гайморит тіс ауруларының әсерінен де болады. Өйткені жоғарғы жақ тіс гайморит қуысымен байланысты. Сондықтан тісті күтіммен ұстап, тереңдеп шіруінен сақтау керек.&nbsp;Көп адамдардан "Құлақты қалай тазалаған жөн?" деген сауал келіп жатады. Айтпағым, құлақты суға түскен соң тазалаңыздар. Себебі құлақтың іші ылғалданады, сол кезде мақта таяқшаларымен тазалау керек. Ал құлақты құрғақ күйінде тазаласа механикалық жарақат алады. Құлақтың ішінде бұлақ бөлетін бездер болады. Сол бездердің қызметін бұзып алуы ықтимал.&nbsp;

Әлия Рахымова: Гайморитті асқындырмаған абзал

<a href="https://kyzylorda-news.kz/">Kyzylorda-news.kz</a>&nbsp; Партияның облыстық филиалының Атқарушы хатшысы Ләйлә Төрешованың қатысуымен партия филиалы жанындағы Партиялық бақылау комиссиясы мен Cыбайлас жемқорлыққа қарсы іс – қимыл жөніндегі Кеңестің бірлескен отырысы өтті.Жиында Мемлекет басшысының Жолдауында айқындалған бағыттардың бірі - мемлекеттік сатып алудың жаңа жүйесін енгізу, қазіргі жүйенің проблемаларын жою, сонымен қатар мүгедектігі бар азаматтар құрған қоғамдық ұйымдарынан сатып алынатын тауарлардың, көрсетілетін қызметтерді мемлекеттік сатып алу кезінде Индустриялық сертификат талап ету бойынша ұсыныстары жан-жақты талқыланды.Мемлекеттік сатып алу жүйесін қайта қарау мәселесі бірнеше жылдан бері көтеріліп келе жатыр. Бұл барлық әлеуметтік маңызды жобаны жүзеге асыруға тікелей әсер ететіндіктен Үкіметтің кеңейтілген отырысында Мемлекет басшысы бұл саланы түбегейлі реформалауды тапсырған болатын. Қазіргі таңда мемлекеттік сатып алу туралы заң жобасы Мәжілісте қаралып жатыр. Жиын барысында партиялық бақылау комиссиясының төрағасы Нұркен Бақытбекұлы мемлекеттік сатып алудың барлық процесі автоматтандырылғанмен мемлекеттік сатып алулар проблемалық салалардың бірі болып отырғандығын тілге тиек етті.<blockquote>«Мемлекеттік сатып алу – жемқорлыққа әбден батқан сала деп айтсақ артық айтқандық болмас. Әсіресе құрылыс пен жол жөндеу ісіне сұрақтар көптеп кездеседі. Мәселен, аудандардағы құрылысы кешігіп жатқан нысандарға партиялық бақылау жүргізгенде, бірнеше мердігер мекемелердің құрылыс жұмыстарына салғырттығы, жауапсыздығы салдарынан пайдалануға беру кестесінен кешікеніне куә болдық. Мерзімінде бітпеген нысандар, сапасы сын көтермейтін нысандар осы сөздің айғағы. Бұл бойынша депутаттық фракция тарапынан аталған компанияларға қатысты құқықтық баға беруін сұраған арнайы хат Жоғарғы сот пен Бас прокурорға, Ұлттық қауіпсіздік комитеті мен Сыбайлас жемқорлыққа қарсы іс-қимыл Агенттігіне, Қаржылай мониторинг агенттігі мен партия басшылығына жолданды», - деді Нұркен Бақытбекұлы.</blockquote>Жиын барысында Мемлекет Басшысының Жолдауында айтылған тапсырмаларын іске асыру жөніндегі шаралардың өңірде орындалуы бойынша облыстық мемлекеттік сатып алу басқармасы басшысының хабарламасы тыңдалды. Сонымен қатар Қазақстан Республикасының мүгедектігі бар адамдар қоғамдық бірлестіктері және (немесе) Қазақстан Республикасының мүгедектігі бар адамдар қоғамдық бірлестіктері құрған ұйымдардан сатып алынатын тауарлардың, жұмыстардың, көрсетілетін қызметтерді мемлекеттік сатып алу кезінде Индустриялық сертификат талап ету қаншалықты тиімді. Осы бағытта ҚР Қаржы министрлігіне мемлекеттік сатып алу заңнамасына тиісті өзгерістер енгізу туралы «Жігер» Қызылорда облысы мүгедектерінің қоғамдық бірлестігінің төрағасы Мұрат Джумадилаев ұсынысын жеткізді.Біріккен отырыста күн тәртібіне сәйкес, Ішкі мемлекеттік аудит комитетінің, «Атамекен» кәсіпкерлер палатасының, Сыбайлас жемқорлыққа қарсы іс-қимыл агенттігінің Қызылорда облысы бойынша департаменті өкілдерінің ұсыныс пікірлері тыңдалды.Жиынды Сыбайлас жемқорлыққа қарсы іс-қимыл жөніндегі кеңес төрағасы Мақсұт Нәлібаев қорытындылап, Сыбайлас жемқорлықтық алдын алу мен саланы жетілдіру бағытында ойын айтты.

Cыбайлас жемқорлыққа қарсы іс-қимыл жөніндегі кеңестің бірлескен отырысы өтті

<a href="https://kyzylorda-news.kz/">Kyzylorda-news.kz</a> Жадырап жаз мезгілінің келуіне де санаулы күндер қалды. Дәл осы мезгілде оқушылардың басым көпшілігі лагерьлерде демалуды қалайды. «Жаз жайнатып, күн күлдіріп біз лагерьге барамыз» деп, балалық шақтың көңілді сәттерін қуаныш пен шаттыққа ұласқан естеліктерге толтырады. Ата-аналар да балаларының бос уақытын тиімді өткізуі маңызды екенін алға тартады.Елімізде әр түрлі санаттағы мектеп жасындағы 3,1 миллионнан астам бала жазғы демалысын тиімді өткізе алады. Бұл жалпы оқушылардың 88%-дан астамы. Бұл ақпаратты ҚР Оқу-ағарту министрлігінің баспасөз қызметі хабарлап отыр.&nbsp;<blockquote>– «Бүгінгі таңда 11 мыңнан астам лагерь балаларды қабылдауға әзір тұр. Балалар мен олардың ата-аналары үшін қолжетімді сауықтыру бағдарламалары, орналасу шарттары мен қауіпсіздік ережелері туралы пайдалы ақпарат қамтылған «Балаларға базарлық» және «Қауіпсіз жаз» ақпараттық пакеті дайындалды. Сонымен қатар өңірлерде жаңадан 5 сауықтыру орталығын ашу жұмыстары жүргізілуде. Жалпы, 2026 жылға дейін 50 жаңа орталық пайдалануға беріледі», – деп атап өтті Тәрбие жұмысы және қосымша білім беру департаментінің директоры Меруерт Медетбекова.&nbsp;</blockquote>Естеріңізге сала кетейік, уәкілетті мемлекеттік органдармен балаларды сауықтыру орталықтарының тізілімі бекітілді. ІІМ, ДСМ, ТЖМ, МАМ, ТСМ, ҒЖБМ, ЕХӘҚМ және ЭТРМ-мен бірлесіп заңнамалық нормаларды, бағдарламаларды, сондай-ақ мониторинг пен бақылауды қамтитын іс-шаралар жоспары қабылданды. Биыл алғаш рет лагерьлердің барлық түрі үшін бірыңғай талаптар әзірленді, қосымша білім беру волонтерлері мен педагогтері лагерь жұмысына тартылды, лагерьлерді қабылдау мен нұсқамалық өткізудің республикалық мониторингі құрылды.Ал Шиелі ауданына қарасты «Сыр ұланы» лагеріне жергілікті бюджеттен өткен жылы 15 341,0 мың теңге қаралған. Жазғы лагерь барысында балаларға медициналық қызмет көрсетуге, олардың сауықтырылуына барынша көңіл бөлінген. Жасөспірімдердің денсаулығын қадағалау мақсатында демалыс базаларының әрқайсына арнайы тексеріс те жүргізілген. Оны білу үшін Шиелі аудандық санитариялық-эпидемиологиялық бақылау басқармасының бас маманы Ш.Нұржановаға байланысқа шықтық.– «Сыр ұланы» тынығу лагері және аудандағы мектепішілік лагеріндегі балаларды демалдыру іс-шарасы маусымның 1-нен басталады. Өткен жылы Шиелі ауданындағы мектепішілік тамақсыз лагерлерьде 12 190 бала қамтылу жоспарланып, 15 күндік лагерьде балалар демалды. «Сыр ұланы» лагерінде 553 бала демалдыру жоспарланып, 6 кезеңде 511 бала демалысын қызықты өткізді. 7 кезеңде 70 бала демалса, оның 26-сы демеушілердің көмегімен уақыттарын тиімді пайдаланды. «Сыр ұланы» тынығу лагерінің ғимаратына санитариялық-эпидемиологиялық қорытындысы алынған, – дейді бас маман.Тынығу лагерьлері жайында толыққанды ақпарат берген бас маман Ш.Нұржанова өткен жылы бала қауіпсіздігі үшін тыңғылықты тексеріс болғандығын жасырмады.– Лагерьдің медициналық талаптарға сәйкес, жұмыс істеуіне арнайы «Шиелі аудандық көпбейінді орталық ауруханасы» ШЖҚ КМК мекемесінің мамандары бекітіліп, іс-шаралар жоспары бойынша жұмыстар атқарылды. Аккредиттелген «ҰСО» ШЖҚ РМК Қызылорда облысы филиалымен келісім шарт арқылы тағам өнімдерінің қауіпсіздігін аспаптық және зертханалық зерттеулерді қоса алғанда, өндірістік бақылауға, «Дезинфекция, дезинсекция және дератизация» жұмыстары бойынша келісім шарттар жасалынып, әр ауысым сайын жұмыстар жүргізілді. Шиелі аудандық көпбейінді орталық ауруханасымен «Балаларды сауықтыру ұйымдарында балалардың демалысын, тамақтануын, медициналық көмек пен сауықтыру шараларын ұйымдастыру туралы» бірлескен бұйрығы бойынша 7 рет семинар өткізілді. Семинарға 164 мектепішілік лагерьлер қызметкерлері, лагерь аспаздары мен медицина қызметкерлері қатысты. Тиісінше, әр кезеңде өткізілген семинарлар фэйсбук әлеуметтік желісіне жарияланды. Өндірістік бақылаудың келісім шартына сәйкес, бактериологиялық зерттеуге 18 тағам үлгісі, 2 ауыз су, 120 шайынды, санитарлық-химиялық зерттеуге құнарлылыққа 30 тағам үлгісі, 2 ауыз су, 2 залалсыздандыру ерітіндісі зертханалық зерттеуге алынды, – дейді Ш.Нұржанова.Шиелі аудандық санитариялық-эпидемиологиялық бақылау басқармасының мамандары берген мәліметке қарап, балалардың тынығуы үшін тыңғылықты тексерістің болғанын бағамдауға болады. Бір ұққанымыз, жазғы тынығу лагерьлері мектеп оқушыларын қуантуға қашан да даяр. Балалар демалысының дұрыс ұйымдастырылуы жайлы сөзімізді қорыта келгенде, біз көп нәрсені ұсақ-түйек деп елемейтін сияқтымыз. Ал тереңірек ойлап қарасақ, жазғы лагерьлер – тек демалыс орны ғана емес, үлкен тәрбие мен шыңдалу орталығы. Себебі, балалар онда жай демалып қана қоймай, әрі денсаулығын түзейді, қоршаған ортаны танып, еңбекке, достыққа бейімделеді.Сүйіншілейтін жаңалық та жоқ емес. Жыл басында облыс әкімі Нұрлыбек Нәлібаевтың төрағалығымен Шиелі ауданының даму жоспары қаралған кеңес өткен болатын. Сол жиында Шиелі ауданының әкімі Нұржан Ахатов Жансейіт елді мекеніне 100 орындық мектеп, кенттегі №252 мектепке 375 орындық бастауыш сынып оқитын қосымша құрылыс салудың бюджеттік өтінімдері салалық министрлікке ұсынылғанын жеткізген-ді. Бұған қоса 200 орындық Оқушылар үйі мен 50 орындық Өнер мектебін салу жоспарлануда. Жоба құны – 1 миллард 113 миллион теңге. Қазір салалық министрліктермен жұмыс жүргізілуде.Сонымен қатар жаңа 200 орындық лагерьдің орны белгіленген. Ол Бәйгеқұм ауылындағы көл жағалауынан 6 гектар жерге салынбақ. Жоба-сметалық құжат әзірлеуге және сараптамадан өткізуге 32 миллион теңге қажет.

Шиеліде жаңа тынығу лагері салынады

Мемлекет басшысының Сыр еліне жасаған сапары қалай өтті?

<a href="https://kyzylorda-news.kz/">Kyzylorda-news.kz</a>&nbsp; Айдарбек Маншарипов &nbsp;- 30 жылдан астам еңбек өтілі бар полковник. Оның 20 жылын тергеу саласында қызмет атқарған. Қазіргі таңда Қызылорда облысы Полиция департаментінің Штаб басқармасының қызметкері. Тәжірибелі тергеушінің артында мыңдаған істер бар.Айдарбек Жақсыбекұлының айтуынша ол бала кезінен халықтың игілігі үшін қызмет етуді және қоғамды қылмыскерлерден қорғауды арман еткен.Ол 1973 жылы Сахалин облысында дүниеге келген. Осы уақытта әкесі Маншарипов Жақсыбек Ресей аумағында армияда әскер қатарында қызмет еткен. Кейін отбасы Қызылорда облысының Жалағаш ауданына көшеді. Айдарбек Жақсыбекұлының әкесі еңбек сіңірген агроном-селекционер болған. Ол өмір бойы ауылшаруашылық саласында жұмыс істеді. «Маржан» сортты күрішті өндіріске енгізгендердің бірі. Ұлының өзінің еңбек жолын жалғастыруын армандаған.<blockquote>"Әкем менің агроном болғанымды қалады. Мен полиция мамандығын таңдаған кезде ол қарсы болды. Оған қарамастан, 1990 жылы Қарағандыға оқуға түстім. Бала кезімнен құқық қорғау органдарының қызметкері болуды армандадым. Әлі есімде, мен әрқашан полицейлерге үлкен таңданыспен және құрметпен қарайтынмын. Оқу орнын өте жақсы бітіріп, туған жеріме оралдым", - дейді Айдарбек Жақсыбекұлы.</blockquote>Айдарбек Маншарипов еңбек жолын қарапайым жедел қызметкер болып бастады. 1996 жылы Қызылордада Мемлекеттік тергеу комитеті құрылды. Мұнда ол аға тергеуші болып қызмет атқарып, Комитет тарағаннан кейін Жалағаш аудандық ішкі істер бөліміне ауысты. Тергеу бөлімінде жұмысын жалғастырды. Әр жылдары Жалағаш және Сырдария АІІБ бастығының орынбасары болып еңбек етті.<blockquote>"2003 жылы мен Ішкі стер министрлігінің Алматы қаласындағы Академиясында басшылық лауазымдарға кадрлар даярлау бойынша оқудан өттім. 2006 жылы мені Жалағаш АІІБ бастығы етіп тағайындады. Мұндай лауазымды атқару маған үлкен жауапкершілікті артты. Мен басшылық пен қарапайым халықтың үмітін ақтауға тырыстым", - дейді полковник.</blockquote>Бірнеше жыл бойы Айдарбек Жақсыбекұлы болашақ полиция қызметкерлеріне арналған оқу орталығында сабақ берді. Қазіргі уақытта да университеттерде болашақ заңгерлерге сабақ беріп, тәжірибесімен бөлісуде. Оның Қорқыт ата атындағы университетінің «Құқықтану» кафедрасының оқытушыларымен бірлесіп шығарған «Сотқа дейінгі тергеп-тексерудің процестік құжаттары» оқу құралы жарық көрді.Полковник өз кәсібін өте жақсы көретінін және өз принциптеріне адал болуға тырысатынын айтады. Оның жұмыс үстелінде сүйікті авторлардың шығармаларын көруге болады. Тергеуші детектив жанрын жақсы көреді, бірақ ауқымды жұмыс көлеміне байланысты кітаппен отыруға мүмкіндік болмайды. Әріптестер полиция полковнигі Маншариповтың жұмысын өте жоғары бағалайды.<blockquote>"Айдарбек Жақсыбекұлы ел тәуелсіздігінің алғашқы жылдарында қалай жұмыс істегенін есіне алады. Ол кезде ішкі істер органдарында заманауи материалдық-техникалық база болған жоқ. Маған бірнеше мамандардың міндеттерін қатар орындауға тура келді. Қазір таңда полиция органдарында техникалық базалары заманға сәйес дамып, заманауи технологияларды кеңінен пайдалану арқылы құқық бұзушылықтың алдын алуға және қылмысты неғұрлым тез арада ашуға үлкен мүмкіндік бар. Арнайы цифрлық технологиялар тіпті ең қиын қылмыстарды шешуге көмектеседі. «Полиция қызметкері білімді де білікті болу керек. Себебі оларға қоғамда тәртіптің сақталуын қамтамасыз ету мен қылмыспен күресте үлкен міндеттер жүктелген. Сондықтан әрбір қызметкердің өз қызметінде қателік жібермеуі өте маңызды.»-дейді Айдарбек Жақсыбекұлы.</blockquote>Қазір Айдарбек Маншарипов жұбайы Жарқынаймен бірге Шарафаддин, Ернат, Алматбек және Елдар есімді төрт ұл тәрбиелеп отыр. Олардың ең үлкені - болашақ медицина қызметкері, ал екінші ұлы ІT мамандығын таңдады Ол балаларының әке жолын жалғастыратынын қалайды. Алайда мұндай шешімді қабылдау олардың өз еріктерінде.<blockquote>"Мен бір кездері әкемнің айтқанын тыңдамай, өзім шешім қабылдадым. Өткен жылдар таңдауымның дұрыстығын дәлелдеді. Мен балаларымның жақсы маман болғанын қалаймын. Әрине, егер олардың біреуі полиция қызметкері мамандығын таңдаса, мен бақытты болар едім, бірақ мен оларға қысым жасамаймын. Олар өз армандарын жүзеге асырсын, мен оларды қолдаймын", - дейді Айдарбек Жақсыбекұлы.</blockquote>&nbsp;

Қазақстан және Қызылорда облысының жаңалықтары: Қоғам