<a href="https://kyzylorda-news.kz/">Kyzylorda-news.kz</a> Бүгін «AMANAT» партиясы облыстық филиалының ұйымдастыруымен өңір жастарына арналған «Creative Day» іс-шарасы өтті. Шараның мақсаты – жастардың азаматтық белсенділігін арттыру, құқықтық және қаржылық сауаттылығын дамыту, мемлекеттік бағдарламаларды түсіндіру, жұмыспен қамтуға қолдау көрсету және жастар арасында тәжірибе алмасу алаңын қалыптастыру.Іс-шараға «AMANAT» партиясы облыстық филиалының төрағасы Жандос Базартай, қоғам белсендісі Жасұлан Жақыпов, «Отбасы банкі» филиалы директорының орынбасары Дастан Тасыбаев, «Қарызсыз қоғам» жобасының Қызылорда облысындағы өкілі Балдырған Мәмен, кәсіби заңгер Жандос Абсат, облыстық қоғамдық даму басқармасының бөлім басшысы Ернұр Биқожаев, «Байқоңыр» әлеуметтік-кәсіпкерлік корпорациясының несие бөлімінің бас менеджері Бауыржан Серікбай және облыстық жастар денсаулығы орталығының маманы Гүлдана Алмурзаева қатысты.Жиында сөз алған партияның облыстық филиалының төрағасы Жандос Базартай жастардың қоғамдағы рөліне тоқталып, іс-шараның маңызын атап өтті.<blockquote>«Кез келген мемлекеттің болашағы – білімді, белсенді жастар. Бүгінгі жас – ертеңгі ел тізгінін ұстайтын азамат. Сондықтан жастардың жан-жақты дамуына жағдай жасау – басты міндеттердің бірі. Осы мақсаттағы үш күндік шара кеше «Таза бейсенбі» экологиялық акциясымен басталды. Алдағы күндері жастарға арналған семинарлар, кездесулер және спорттық шаралар ұйымдастырылады. Бұл бастама жастардың белсенділігін арттырып қана қоймай, олардың қоғамдағы орны мен жауапкершілігін нығайтуға бағытталып отыр», – деді Жандос Базартай.</blockquote><img src="https://knadmin.beoblood.kz/uploads/Zhastar_a_ke_es_berildi_2_a6fe9f8023.jpg" alt="Жастарға кеңес берілді 2.jpg">Іс-шара барысында қатысушылар баспана алу мүмкіндіктері, қаржылық сауаттылық, заң көмегі, кәсіпкерлік бастамалар, алаяқтықтың алдын алу, денсаулық сақтау және экологиялық мәдениет бағыттары бойынша сала мамандарынан нақты кеңестер алды. Сонымен қатар Мансап орталығымен бірлесіп ұйымдастырылған бос жұмыс орындары жәрмеңкесіне қатысып, тұрақты жұмысқа орналасу мүмкіндіктерімен танысты.Айта кетейік, жәрмеңкеге 17 мекеме қатысып, жастар бағдарламалары аясында 295 бос жұмыс орны ұсынылды. Жәрмеңкеге қатысқан белсенді жас Жанерке Жаңабекова өзінің медициналық жоғары колледждің 4-курс студенті екенін айтып, ұсынылған бос жұмыс орындарымен танысқанын жеткізді.<blockquote>«Бүгінгі ұйымдастырылған шарадан жақсы әсер алдым. Мұндай кездесулер жастарға үлкен мүмкіндік береді деп есептеймін. Жәрмеңке барысында түрлі мекемелер ұсынған бос жұмыс орындарымен танысып, еңбек нарығындағы сұраныстар туралы ақпарат алдық. Өзім медициналық жоғары колледждің 4-курс студенті болғандықтан, болашақ мамандығыма сәйкес келетін бағыттарға көбірек назар аудардым. Осындай шаралар жастарға тәжірибе жинақтап, алдағы кәсіби жолын айқындауға үлкен көмегін тигізеді», – деді Жанерке Жаңабекова.</blockquote>Іс-шара аясында жастар өздерін толғандырған сұрақтарға жауап алып, түрлі мемлекеттік бағдарламалар мен жобалар туралы жан-жақты ақпарат алды. Ұйымдастырушылардың айтуынша, мұндай бастамалар алдағы уақытта да жалғасын табады.<img src="https://knadmin.beoblood.kz/uploads/Zhastar_a_ke_es_berildi_3_0ae1dcd503.jpg" alt="Жастарға кеңес берілді 3.jpg">

«CREATIVE DAY»: Жастарға кеңес беріліп, мүмкіндіктер ұсынылды

<a href="https://kyzylorda-news.kz/">Kyzylorda-news.kz</a> Париж қаласында өткен Дүниежүзілік жануарлар денсаулығы ұйымының (WOAH) 93-ші Бас сессиясында ұйымға мүше 183 елдің делегаттары Қазақстанға аусылға қарсы вакцинацияланған таза аймақ мәртебесін беру туралы шешім қабылдады. Ресми сертификат бүгін Қазақстан делегациясына табысталды.Осылайша, WOAH халықаралық стандарттарына сәйкес, енді еліміздің бүкіл аумағы аусыл ауруынан таза деп танылды. Шығыс және Орталық Азия елдерінің ішінде Қазақстан ғана осындай мәртебеге ие.Бұл 2024 жылдан бері ел үкіметі жүргізіп келе жатқан ауқымды әрі жүйелі жұмыстың нәтижесі. Мемлекеттің ветеринариялық жүйесін даярлау және бағалау аясында эпизоотиялық ахуалды тұрақты сақтау, ветеринариялық бақылаудың тиімділігін арттыру және биологиялық қауіпсіздік жүйесін жетілдіру мақсатында ветеринариялық-профилактикалық, мониторингтік, ұйымдастырушылық және бақылау шаралары кешенді қолға алынды.<blockquote>«Қазақстан халықаралық деңгейде мойындалған эпизоотиялық қауіпсіздік жүйесін дәйекті түрде нығайтып, ұлттық ветеринариялық қауіпсіздіктің деңгейінің жоғары екенін тағы бір мәрте дәлелдеп отыр. Бүгінде еліміздің бүкіл аумағы аусылға қарсы вакцинацияланған таза халықаралық аймақтармен қамтылды. Бұл ел үшін үлкен жетістік. Сонымен қатар Қазақстан жыл сайын африкалық жылқы обасы мен классикалық шошқа обасы бойынша да қауіпсіз екенін дәлелдеп келеді, &nbsp;сондай-ақ WOAH талаптарына сәйкес құс тұмауының жоғары патогенді түрі мен африкалық шошқа обасына қатысты өзіндік декларацияларын тұрақты түрде қолдап отыр», – деді Айдарбек Сапаров.</blockquote>Министрдің айтуынша, бұл мәртебе Қазақстанның халықаралық беделін нығайтып, шетелдік сауда серіктестерінің сенімін арттыруға және отандық мал шаруашылығы өнімдерінің экспорттық әлеуетін кеңейтуге жол ашады.Аталға ұйымның 93-ші Бас сессиясы аясында Ауыл шаруашылығы министрі бастаған қазақстандық делегация халықаралық ветеринария саласындағы негізгі мәселелерді талқылауға белсенді қатысты. Әсіресе биологиялық қауіпсіздік, жануарлардың трансшекаралық ауруларына қарсы күрес және ветеринария саласындағы халықаралық ынтымақтастық мәселелеріне баса назар аударылды.Сессия аясында Айдарбек Сапаров ұйымның Бас директоры Эммануэль Субейранмен кездесті. Ол Қазақстан ветеринариялық қызметті дамытуда, WOAH халықаралық стандарттарын енгізуде және Орталық Азиядағы өңірлік өзара іс-қимылды нығайтуда жүйелі әрі дәйекті тәсіл ұстанып отырғанын атап өтті.Эммануэль Субейран ұйымға мүше мемлекеттерге министрлік дөңгелек үстелі мен ұйымның Бас сессиясы аясында Қазақстанның ғылыми-диагностикалық әлеуетті дамыту бағытындағы жұмысын жоғары бағалап, ветеринариялық қызметті жаңғыртудағы оң тәжірибені таныстыруды ұсынды.Айта кетейік, Айдарбек Сапаров WOAH министрлік дөңгелек үстелі мен Бас сессиясында сөз сөйлеген Орталық Азия елдері арасындағы жалғыз ауыл шаруашылығы министрі болды.Фото: Минсельхоз РК

Қазақстан ДЖДҰ-ның 93-ші Бас сессиясында аусылдан таза ел мәртебесін алды

<a href="https://kyzylorda-news.kz/">Kyzylorda-news.kz</a> Жол үстінде сабыр мен сақтықты серік еткен абзал. Темір тұлпарды тізгіндеген әрбір адамға қатысты қағида осы. Бүгін ҚАЖ департаментіне қарасты №68 мекемесіне Қызылорда қалалық полиция басқармасынан арнайы маман келіп, жеке құрам қызметкерлеріне жол қозғалысы ережелерін қатаң сақтау туралы түсіндірме жұмысы жүргізілді.Кездесу барысында полиция майоры, взвод командирі Бектұр Сатенов тақырып төңірегінде тарқата сөйледі. Оның айтуынша, жылдамдықты шамадан тыс арттыру, көлік тізгіндеу кезінде телефон қолдану қауіпке ұрындырады. Қызмет бабында болсын, жеке уақытта болсын, әрбір қызметкер заң талаптарын қатаң сақтауы тиіс. Өйткені, қарапайым ережені елемеу адам өміріне үлкен қауіп төндіруі мүмкін. Сондықтан, жол қозғалысы ережелерін сақтау мен көліктердің техникалық жағдайын тексерудің маңызы зор. Бәріне байыппен қарасақ, қауіп пен күдік те сейіледі.Сондай-ақ, қызметкерлердің автокөлігі де тексеріліп, қажетті құжаттардың түгел болуына назар аударылды. Қызметкерлер толғандырған сұрағын қойып, өзара пікір алмасу өрбіді. Мұның өзі сақтыққа салғырт қарамаудың көрінісі іспетті.

ҚАЖ: Жеке құрам қызметкерлеріне жол қозғалысы жөнінде түсіндірме жұмысы жүргізілді

<a href="https://kyzylorda-news.kz/">Kyzylorda-news.kz</a> Қазақстан Республикасының Бас Прокуроры Берік Асылов қылмысқа қарсы іс-қимыл саласындағы халықаралық ынтымақтастықты орнату мақсатында Гонконгқа жұмыс сапарымен барды.Сапар аясында Б.Асылов Гонконгтың Қауіпсіздік жөніндегі хатшысы Крис Тангпен кездесу өткізді. Ол өңірдің құқық қорғау және арнайы қызметтерінің, оның ішінде полицияның, көші-қон, кеден, қылмыстық-атқару, өртке қарсы және авиациялық-құтқару қызметтерінің жұмысын үйлестіреді.Қазақстандық қадағалау органының басшысы атап өткендей, бұл кездесу іздестіріліп жатқан адамды ұстап беру және трансұлттық қылмыс түрлерімен бірлесіп күресу саласындағы құқық қорғау органдары арасындағы өзара іс-қимылды нығайту үшін ерекше маңызды.Сұхбат барысында заңсыз шығарылған активтерді іздестіру және қайтару, қылмыстық жолмен алынған кірістерді жылыстатуға қарсы іс-қимыл мәселелеріндегі ынтымақтастыққа ерекше назар аударылды.Кездесу қорытындысы бойынша:<ul><li style="text-align:justify;">жасырынып жүрген қылмыскерлерді ұстап беру туралы;</li><li style="text-align:justify;">қылмыстық істер бойынша өзара құқықтық көмек туралы;</li><li style="text-align:justify;">сотталған адамдарды беру туралы мемлекетаралық келісімдерге қол қойылды.</li></ul>Келіссөздер соңында тараптар жедел және криминалистикалық ақпаратпен, заманауи технологиялар мен жасанды интеллектіні қолдана отырып өзекті қылмыс түрлерін тергеудің озық тәжірибесімен алмасуға уағдаласты. Сондай-ақ өзара қызығушылық тудыратын өзге де құқықтық мәселелер бойынша ынтымақтастықты тереңдетудің алдағы қадамдарын айқындады.Атап өтсек, Гонконг әлемдегі ең ірі қаржы орталықтарының бірі болып табылады. Осындай орталықтардың қатарына Макао да жатады. Екі күн бұрын Қазақстан Республикасының Бас прокуратурасы онымен қылмыстық-құқықтық саладағы халықаралық шарттардың толық пакетіне қол қойды.Еске салсақ, өткен жылдың қыркүйегінде Қазақстан Сингапурмен қылмыстық істер бойынша өзара құқықтық көмек туралы шартқа қол қойған еді.Осылайша, Қазақстан Республикасының Бас прокуратурасы Шығыс Азиядағы ірі офшорлық аймақтармен құқықтық көмек көрсету мәселелері бойынша халықаралық нормативтік-құқықтық базаны қалыптастыру жұмысын аяқтады.<img src="https://knadmin.beoblood.kz/uploads/R_Bas_prokurory_Gonkong_sapar_2_467e21bc18.jpg" alt="ҚР Бас прокуроры Гонконг сапар 2.jpg">Фото: gov.kz

Бас прокурор халықаралық ынтымақтастықты орнату мақсатында Гонконгқа жұмыс сапарымен барды

<a href="https://kyzylorda-news.kz/">Kyzylorda-news.kz</a> Қызылорда облысының денсаулық сақтау басқармасының басшысы Әбiлпатта Алмас Әбдіғаппарұлы партия алаңында азаматтарды жеке мәселелері бойынша қабылдады.Қабылдау барысында тұрғындардың денсаулық сақтау, әлеуметтік көмек, емделу, дәрі-дәрмекпен қамту, мүгедектік рәсімдеу және тұрғын үй мәселелеріне қатысты өтініштері тыңдалып, тиісті түсіндірме жұмыстары жүргізілді.Қабылдауға келген азаматтардың бірі өзінің денсаулығына байланысты тұрақты түрде ем қабылдайтынын айтып, дәрі-дәрмекпен қамтамасыз етуге көмек сұрады. Өз кезегінде жауапты мамандар тарапынан азаматқа медициналық мекемелер арқылы қажетті ем алу жолдары түсіндіріліп, мәселе бақылауға алынатыны жеткізілді.Сонымен қатар тағы бір тұрғын баспана мәселесін көтеріп, тұрғын үй кезегіне қатысты көмек сұрады. Осыған байланысты өтініш иесіне қолданыстағы заңнама талаптарына сәйкес түсіндірме беріліп, жауапты мекемелерге жолданатыны айтылды.Сондай-ақ қабылдауға келген азаматтар емханаға тіркелу, жолдама алу, мүгедектік рәсімдеу және әлеуметтік қолдау көрсету мәселелері бойынша да өтініштерін жеткізді. Әрбір мәселе назарға алынып, тиісті сала мамандары тарапынан заң аясында жауаптар берілді.Қабылдау қорытындысында көтерілген мәселелер бойынша тиісті жұмыстар жүргізілетіні айтылып, азаматтардың өтініштері бақылауға алынды.

Облыстық денсаулық сақтау басқармасының басшысы тұрғындарды қабылдады

<a href="https://kyzylorda-news.kz/">Kyzylorda-news.kz</a> Әзербайжан Республикасының Баку қаласында өткен Дүниежүзілік урбан форумның 13-сессиясына Сыр өңірінің делегациясы қатысты. Аталған халықаралық алаң БҰҰ-Хабитат ұйымының қолдауымен ұйымдастырылып, урбанизация, қала құрылысы, климат тұрақтылығы және заманауи инфрақұрылым мәселелерін талқылауға арналды.Форумға әлемнің 100-ден астам елінен 20 мыңнан аса делегат жиналды. Олардың қатарында мемлекет және үкімет басшылары, халықаралық ұйымдар өкілдері, сарапшылар мен урбанистика саласының мамандары бар.Қазақстан делегациясы құрамына Қызылорда облысының өкілдері де енген. Олар өңірдің тұрақты дамуы, қала инфрақұрылымын жаңғырту және экологиялық бастамалар бағытында тәжірибе алмасты.Форумда ҚР Премьер-министрі Олжас Бектенов Мемлекет басшысы Қасым-Жомарт Тоқаев айқындаған урбанистикалық даму саясатының негізгі басымдықтарына тоқталды. Атап айтқанда, азаматтарға қолайлы әрі қауіпсіз орта қалыптастыру, цифрландыру мен жасанды интеллект технологияларын енгізу, су қауіпсіздігі және климат тұрақтылығы мәселелері кеңінен талқыланды.Сонымен қатар Urban Expo көрмесі өтуде, онда қатысушылар назарына Қазақстанның ұлттық павильоны ұсынылды. Экспозиция қоғамдық кеңістіктерді жаңарту, инфрақұрылымдық шешімдер және жаңа қала құрылысы жобалары арқылы елдің тұрақты, жайлы әрі экологиялық таза қалаларды дамытуға заманауи көзқарасын көрсетеді. Green ID жобасына ерекше назар аударылды, бұл – көгалдандыруға, климат тұрақтылығы мен қалалық ортаның сапасын арттыруға бағытталған бастама.Айта кету керек, өткен жылы Қызылорда қаласында тұңғыш Ұлттық урбан форум ұйымдастырылып, мемлекеттік органдар, халықаралық ұйымдар, сарапшылар мен бизнес өкілдері бас қосты. Іс-шара өңірдегі тұрақты қалалық даму, заманауи инфрақұрылым қалыптастыру және урбанистика бағытындағы өзекті мәселелерді талқылауға мүмкіндік берді.<img src="https://knadmin.beoblood.kz/uploads/yzylorda_oblysyny_delegacziyasy_haly_araly_forum_a_atysty_2_50de59aa49.jpg" alt="Қызылорда облысының делегациясы халықаралық форумға қатысты 2.jpg">

Қызылорда облысының делегациясы WORLD URBAN FORUM-13 халықаралық форумына қатысты

<a href="https://kyzylorda-news.kz/">Kyzylorda-news.kz</a> Қазақстанның Бурабай мен Көлсайы, Шарын шатқалы мен Іле Алатауы, Баянауыл мен Қарқаралысы – көз тартар көрікті мекендер ғана емес, елдің экологиялық тұрақтылығы мен табиғи болашағын айқындайтын стратегиялық ресурс. Дегенмен, туристік ағынның артуы&nbsp;оларға&nbsp;түсетін қысымды күшейтіп, табиғатты сақтау мәселесін жаңа деңгейге көтеріп отыр. Осы тұрғыда экотуризм бүгінде жай ғана демалыс формасы емес, табиғатты қорғау мен экономикалық дамуды тең ұштастыратын маңызды әрі жауапты бағытқа айналуда.Саланың&nbsp;даму әлеуетіЭкотуризм – табиғи аумақтарға зиян келтірмей саяхат жасауға, экожүйелерді сақтауға және жергілікті халықтың әл-ауқатын қолдауға бағытталған туризмнің заманауи түрі. Бүгінде бұл бағыт әлемдік деңгейде қарқынды дамып, жаһандық туризм индустриясының маңызды әрі тұрақты сегменттерінің біріне айналып отыр.Осы үрдістен Қазақстан да тыс қалып отқан жоқ. Ел аумағының кеңдігі, табиғи ландшафттардың ерекше әртүрлілігі және сирек кездесетін экожүйелер экотуризмді дамытуға зор мүмкіндік береді. Шарын шатқалы, Көлсай мен Қайыңды көлдері, Алтын-Емел, Катон-Қарағай, Бурабай және Маңғыстау өңірлері бүгінде экотуризмнің негізгі әрі сұранысқа ие бағыттары ретінде қалыптасып келеді.Дегенмен, мамандардың пікірінше, табиғи аумақтарға келушілер санының артуы экожүйелерге түсетін антропогендік қысымды айтарлықтай күшейтіп отыр. Бұл жағдай өз кезегінде туристік инфрақұрылымды ғана емес, жалпы басқару жүйесін де қайта қарауды және жетілдіруді талап етеді.Дамуға не кедергі?Экология саласының сарапшысы Светлана Спатарь Қазақстанда туризм дамып келе жатқанымен, оны басқару деңгейі артта қалып отырғанын айтады.<figure class="image"><img src="https://knadmin.beoblood.kz/uploads/Derekk_z_Maksim_Morozov_48d1b379e6.jpg" alt="Ашық дереккөз"><figcaption>Ашық дереккөз</figcaption></figure><blockquote>– Бүгінде туризм табиғатты тамашалау емес, оны тұтыну құралына айналып барады. Инфрақұрылым жоқ, айыппұл жүйесі жұмыс істемейді, ал мәдениет деңгейі өте төмен, – дейді ол.</blockquote>Осы пікірді экология саласының тағы бір маманы Базарбек Қамысбаев та қолдайды. Оның айтуынша, табиғи аумақтардағы бақылаудың әлсіздігі экологиялық тепе-теңдіктің бұзылуына тікелей әсер етіп отыр.<blockquote>– Бурабайда жартастарға жазу жазу, Жұмбақтасқа жақын бару, қоқыс тастау сияқты жағдайлар жүйелі бақылаудың жоқтығын көрсетеді, – дейді ол.</blockquote><figure class="image"><img src="https://knadmin.beoblood.kz/uploads/ashy_derekk_z_2_122fe0ed79.jpg" alt="ашық дереккөз (2).jpg"><figcaption>ашық дереккөз</figcaption></figure>Мамандардың пайымынша, бұл түйткілдер жеке-дара емес, өзара байланысты жүйелік мәселелердің жиынтығы. Олар негізгі проблемаларды бірнеше бағытқа бөледі. Олар – &nbsp;экологиялық заңнаманың әлсіз орындалуы, туристік мәдениеттің төмендігі, инфрақұрылым тапшылығы және ұзақмерзімді стратегиялық жоспарлаудың жеткіліксіздігі.Болашақ перспектива: тұрақты туризм моделіАталған мәселелерді еңсеруде әлемдік тәжірибеге үңілуге болады.&nbsp;Мысалы, Кения мен Еуроодақ елдерінде бір реттік пластикке қатаң шектеу енгізілген. Мұндай шешім экожүйеге түсетін жүктемені айтарлықтай азайтып, табиғи аумақтардың ластану деңгейін төмендетуге ықпал етті.Сарапшылар Қазақстанда да осыған ұқсас шараларды кезең-кезеңімен енгізу қажет екенін айтады. Олардың пікірінше, ұлттық парктерге пластик өнімдерін алып кіруге шектеу қою, қайта пайдаланылатын ыдыстар жүйесін дамыту және экодүкендер желісін қалыптастыру – экотуризмді тұрақты дамытудағы нақты әрі тиімді қадамдардың бірі.Бұл тұста&nbsp;Норвегия тәжірибесі де ерекше маңызға ие. Елде туристерге табиғатты қорғау ережелері алдын ала түсіндіріліп, оларды бұзғандарға қатаң айыппұл жүйесі қолданылады.– Қазақстанда да экобекеттер мен ақпараттық жүйелерді дамыту қажет, – дейді мамандар.Сонымен қатар сарапшылар QR-код арқылы виртуалды экскурсиялар жасау, туристер ағынын реттеу және алдын ала онлайн брондау жүйесін енгізу сияқты цифрлық шешімдерді кеңінен қолдануды ұсынады.<figure class="image"><img src="https://knadmin.beoblood.kz/uploads/Derekk_z_24_kz_f69051594c.jpg" alt="Дереккөз 24.kz.jpg"><figcaption>Дереккөз 24.kz</figcaption></figure>Мамандардың&nbsp;сөзінше,&nbsp;туристерге сапар алдында экологиялық мінез-құлық ережелерін түсіндіру тәжірибесін жүйелі түрде енгізу қажет. Бұл ретте туристік қызмет көрсететін компанияларға міндетті экобрифинг өткізу талабын қою тиімді шешім ретінде қарастырылады.Осыған қоса ұлттық парктерде «экотәрбие сағаттарын» енгізу мүмкіндігі де ұсынылып отыр. Мәселен, келушілерге арналған қысқаша нұсқаулық видеолар көрсету немесе гидтердің сапар басында экологиялық ережелерді түсіндіруі бұл мәдениетті қалыптастыруға ықпал етеді.Сарапшылар сондай-ақ әлеуметтік желілер арқылы инфлюенсерлермен бірлескен экобілім беру кампанияларын жүргізуді де тиімді әрі шығыны аз құрал ретінде атап өтеді.P.S. Экотуризм Қазақстанда қарқынды дамып келе жатқанымен, оның болашағы тек инфрақұрылымға емес, ең алдымен қоғамның экологиялық санасына тікелей байланысты.&nbsp;Табиғатты сақтау мен туризмді дамыту арасындағы тепе-теңдік сақталған жағдайда ғана&nbsp;аталған&nbsp;сала ұзақмерзімді және тұрақты даму траекториясына шыға алады.Мөлдір КенжеғұловаФото: Ашық дереккөзден

Экотуризм және Қазақстан: табиғатты қорғаудан тұрақты дамуға дейін

<a href="https://kyzylorda-news.kz/">Kyzylorda-news.kz</a> Мәдениет және өнер қызметкерлері күніне орай партияның облыстық филиалында салтанатты шара ұйымдастырылып, мәдениет саласының дамуына елеулі үлес қосып жүрген бірқатар қызметкерлер мен белсенділер марапатталды.Сала өкілдерін кәсіби мерекемен құттықтаған партияның облыстық филиалының төрағасы Жандос Базартай мәдениет пен өнердің ұлт руханиятының алтын діңгегі екенін атап өтіп, мәдениет қызметкерлерінің қоғамдағы орнына ерекше тоқталды.<blockquote>«Мәдениет – ұлттың рухани келбеті. Сіздер ұлттық құндылықтарды дәріптеп, руханиятымызды байытып келесіздер. Өнер мен мәдениеттің дамуына қосып жүрген еңбектеріңіз өлшеусіз. Баршаңызды кәсіби мерекелеріңізбен құттықтай отырып, шығармашылық табыс пен толағай жетістіктер тілеймін», – деді ол.</blockquote>Филиал төрағасы өз сөзінде өңірде мәдениет саласын қолдау бағытында «AMANAT» партиясы тарапынан атқарылып жатқан жұмыстарды да атап өтті.<blockquote>«AMANAT» партиясы мәдениет пен өнер саласын әрдайым қолдап келеді. Әсіресе, осы салада еңбек етіп жүрген азаматтардың әлеуметтік жағдайын жақсарту мен өңірдегі мәдени инфрақұрылымды дамытуға басымдық берілуде. Мәселен, соңғы үш жыл ішінде партияның сайлауалды бағдарламасы аясында облыста 10 мәдени нысан ел игілігіне берілді. Сондай-ақ мәдени ошақтарды сақтап қалу мақсатында 10 нысанға күрделі жөндеу жұмыстары жүргізілді. Бұл бастамалар тұрғындардың мәдени ортаға қолжетімділігін арттырып, өңірдің рухани өміріне серпін беруде. Сонымен қатар кітапхана қызметкерлері мен сала мамандарының жалақысын көтеру, әлеуметтік мәртебесін арттыру мәселелері де партияның тұрақты бақылауында. Партия жанындағы «Miras» кеңесі мәдениет пен өнерді қолдау, ұлттық құндылықтарды дәріптеу және шығармашыл азаматтарға қолдау көрсету бағытында белсенді жұмыс атқарып келеді. Кеңес бастамасымен түрлі мәдени-көпшілік іс-шаралар, кездесулер мен рухани жобалар тұрақты түрде ұйымдастырылуда. Бұл жұмыстар алдағы уақытта да жалғасын табады», – деді Жандос Базартай.</blockquote>Салтанатты шара барысында мәдениет саласының бірқатар қызметкерлері мен өнер өкілдері Дәулет Кәрібектің Алғыс хатымен марапатталды.

Мәдениет саласының дамуына елеулі үлес қосқан қызметкерлер марапатталды

<a href="https://kyzylorda-news.kz/">Kyzylorda-news.kz</a> Қызылорда қаласында төрт жылда бір рет өткізілетін VIII халық ойындарына арналған облыстық іріктеу жарысы өз мәресіне жетті.Ауқымды спорттық додаға Қызылорда облысының барлық аудандары мен Қызылорда қаласынан келген спортшылар қатысып, спорттың бірнеше түрі бойынша өзара мықтыларды анықтады. Атап айтқанда, жарыс бағдарламасына волейбол, баскетбол 3х3, шахмат, тоғызқұмалақ, қазақ күресі, үстел теннисі, шағын футбол, асық ату, қол күресі және гір спорты енгізілді.Төрт күнге созылған жарыс барысында қатысушылар жоғары дайындық деңгейін көрсетіп, тартысты әрі қызықты бәсекелер өткізді. Әр спорт түрі бойынша үздіктер анықталып, командалар арасындағы бәсеке жоғары деңгейде өтті.Жарыс қорытындысы бойынша Арал ауданының құрама командасы барлық спорт түрлерінен жоғары нәтижелер көрсетіп, қарсыластарынан басым түсіп, жалпыкомандалық есепте жүлделі ІІ орынды иеленді. Бұл нәтиже аудан спортшыларының жүйелі дайындығы мен спорт саласындағы атқарылған жұмыстардың нақты жемісі болып табылады.Аталған жарыс өңірде бұқаралық спортты дамытуға, салауатты өмір салтын насихаттауға және спортшылар арасындағы тәжірибе алмасуды нығайтуға зор үлес қосты.<img src="https://knadmin.beoblood.kz/uploads/Aral_oblysty_irikteu_zharysy_2_c3315f3e82.jpg" alt="Арал облыстық іріктеу жарысы 2.jpg">

Халық ойындарына арналған облыстық іріктеу жарысы өз мәресіне жетті

<a href="https://kyzylorda-news.kz/">Kyzylorda-news.kz</a> Бүгін облыс әкімі Мұрат Ергешбаевтың төрағалығымен өткен мәжілісте өңірдегі маңызды инвестициялық және инфрақұрылымдық жобалардың &nbsp;жүзеге асырылу барысы талқыланды.Кеше облыс әкімі Мемлекет басшысының қабылдауында болып, аймақтың әлеуметтік-экономикалық дамуы және алдағы міндеттер жөнінде баяндады. Ұлттық құрылтайдың бесінші отырысында және өңірге жұмыс сапарлары кезінде Президент жүктеген тапсырмаларға тоқталды.Мәжілісте драма театр, Президенттік кітапхана, 500 орындық емхана және 200 орындық перинаталдық орталық құрылыстарына қатысты мәселелер талқыланып, жауапты тұлғаларға нысандарды талапқа сай етіп әрі уақытылы пайдалануға беру міндеті жүктелді.Бұдан бөлек, тиісті мекемелерге «Батыс Еуропа – Батыс Қытай» халықаралық дәлізінің Қызылорда – Ақтөбе бағытын кеңейтуге, Бейнеу – Сексеуіл автомобиль жолының құрылысына орай министрлікпен бірлесіп шешетін мәселелерді пысықтау тапсырылды.Өңір экономикасына серпін беретін инвестициялық жобалардың қазіргі жай-күйі де қаралды. Бұл ретте инвесторлармен байланысты күшейтіп, әр кезеңдегі мәселелерге нақты бақылау орнату қажет.Мәжіліс қорытындысында құрылыс және инфрақұрылым нысандарындағы жұмысты күшейтілген режимде ұйымдастыру, сапа мен мерзімді қатаң қадағалау тапсырылды.

Президент тапсырмаларының орындалу барысы пысықталды

<a href="https://kyzylorda-news.kz/">Kyzylorda-news.kz</a>&nbsp; Өңірлік коммуникациялар қызметінің көшпелі брифингі Қызылорда қаласындағы «Ақмешіт-Сырдария» облыстық орталық мешітінде жалғасты. Жиында 2026 жылы Қазақстанда Құрбан айт мерекесінің өту тәртібі, құрбан шалудың шариғи талаптары мен қайырымдылық шаралары кеңінен түсіндірілді.Брифинг спикері ҚМДБ-ның Қызылорда облысы бойынша өкілі, «Ақмешіт-Сырдария» облыстық орталық мешітінің бас имамы Дастан Құрманбаев қасиетті мерекенің рухани мәніне тоқталып, Құрбан айттың қоғамдағы татулық пен жанашырлықты нығайтатын ұлық мейрам екенін айтты.<blockquote>«Құрбан айт – тек құрбан шалумен шектелмейтін, мұсылман қауымын ынтымақ пен бірлікке үндейтін қасиетті уақыт. Бұл күндері мұқтаж жандарға көмек қолын созып, мейірім мен қайырымдылықты арттыруымыз қажет. Биыл һижри күнтізбесі бойынша зұлхижжа айы 18 мамырда басталып, 26 мамыр - Арапа күні, ал 27 мамыр Құрбан айттың алғашқы күні болып белгіленген. Айт намазы облыстағы барлық мешітте таңғы сағат 06:00-де оқылады», – деді Дастан Жанасұлы.</blockquote>Брифинг барысында құрбан шалудың үкімі мен тәртібі де түсіндірілді. Құрбандыққа қой, ешкі, ірі қара және түйе шалынатыны, малдың мінсіз әрі белгілі жасқа жеткен болуы шарт екені айтылды. Сонымен қатар, құрбандық етін мұқтаж жандарға тарату сауапты іс екені ерекше атап өтілді.<img src="https://knadmin.beoblood.kz/uploads/rban_ajt_mejirim_men_birlikti_merekesi_4ba5caf892.jpg" alt="Құрбан айт - мейірім мен бірліктің мерекесі.jpg">Өңір мешіттерінде мерекеге дайындық қызу жүргізілуде. Арнайы қасапханалар белгіленіп, еріктілер тобы жасақталған. Құрбан шалу рәсімдері санитарлық талаптарға сай ұйымдастырылып, онлайн форматта да жүзеге асырылады. Ол үшін qurban.muftyat.kz платформасы арқылы тапсырыс беруге мүмкіндік қарастырылған.Дастан Құрманбаев тұрғындарды күмәнді қорлар мен беймәлім ұйымдардың онлайн құрбандық акцияларынан сақ болуға шақырды. Сондай-ақ кәсіпкерлерге әлеуметтік маңызы бар азық-түлік пен құрбан малдарының бағасын негізсіз қымбаттатпау жөнінде үндеу жасады.<blockquote>«Құрбан айт - жүректерге иман нұрын, көңілдерге шаттық сыйлайтын мереке. Осы күндері көпшілікке жақсылық жасап, елдің алғысын алайық. Өткен жылы облыс мешіттерінің ұйымдастыруымен мыңдаған отбасыға құрбан еті таратылып, қайырымдылық шаралары кең көлемде өткізілген. Биыл да осы игі дәстүр жалғасын таппақ», – деді бас имам.</blockquote>Фото: gov.kz

 Қызылорда облысында Құрбан айт мерекесіне дайындық басталды

<a href="https://kyzylorda-news.kz/">Kyzylorda-news.kz</a> Биыл Арал өңірінен шыққан қазақ поэзиясының көрнекті өкілі, Қазақстанның еңбек сіңірген қайраткері, ақын Шөмішбай Сариевтің 80 жылдығы.Осыған орай Арал ауданы Қамыстыбас ауылдық округінде ақын мұрасын ұлықтауға арналған мазмұнды шаралар өтті. Ақынның 80 жылдығына орай ұйымдастырылған шараларға ақынның жары Ж.Сариева, қызымен және немересімен бірге арнайы келіп қатысты.Алдымен №21 орта мектепте ұйымдастырылған «Ұлы дала – шөл даланың ұлымын» атты әдеби-сазды шарамен бастау алды. Жас шәкірттер ақын өлеңдерін мәнерлеп оқып, өнерпаздар халық жүрегінен орын алған әндерді орындады. Сондай-ақ, ақынның өмір жолы мен шығармашылығына арналған бейнеролик көрсетілді. Кеш соңында қонақтар мектеп жанындағы мұражайды аралап, ақын мұрасына арналған жәдігерлермен танысты.<img src="https://knadmin.beoblood.kz/uploads/A_yn_m_rasy_rpa_a_amanat1_14a646e47d.jpg" alt="Ақын мұрасы – ұрпаққа аманат1.jpg">Рухани шаралар легі ауылдық мәдениет үйінде өткен «Шөмішбай мұрасы – руханият шамшырағы» атты сыр-сұхбат кешімен жалғасты. Мәдениет үйінің фойесінде арнайы фотоаймақ ұйымдастырылып, ақын шығармашылығына арналған көрме көпшілік назарына ұсынылды.Тағылымды сыр-сұхбатты «Толқын» газетінің бас редакторы Айдар Сайлауов жүргізді. Кеш барысында Жұмагүл Сариева ақынның шығармашылық жолы, отбасылық өмірі мен азаматтық болмысы жайлы естеліктерімен бөлісті.Кеш Шөмішбай Сариевтің өз дауысымен оқылған «Кел, жылдарым!» өлеңінің бейнежазбасымен ашылып, көпшілікке ерекше әсер сыйлады. Одан кейін жас өнерпаздар мен көркемсөз оқу шеберлері ақын шығармаларын орындап, поэзия мен өнер үндескен мазмұнды кешке ұластырды.<img src="https://knadmin.beoblood.kz/uploads/A_yn_m_rasy_rpa_a_amanat2_beb054b77b.jpg" alt="Ақын мұрасы – ұрпаққа аманат2.jpg">Қамыстыбас ауылдық округінің әкімі А.Төлебайқызы сөз сөйлеп, Шөмішбай Сариев мұрасының ұлттық руханияттағы орны ерекше екенін атап өтті. Ол өз сөзінде ақын шығармаларының жас ұрпақ тәрбиесіндегі маңызына тоқталып, мұндай тағылымды шаралардың рухани құндылықтарды дәріптеудегі рөлі зор екенін жеткізді. Құрметті қонаққа ұлттық дәстүрге сай құрмет көрсетілді.Мазмұны бай, тәрбиелік мәні зор қос шара да ақын мұрасын ұлықтап, жас ұрпақтың рухани дүниесін байытуға бағытталған маңызды кездесулердің біріне айналды.&nbsp;

Қазақстан және Қызылорда облысының жаңалықтары: Қоғам