<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Елімізде «Кәсіпкерлік негіздері» пәні ұстаздарының қауымдастығын құру ұсынылды. Бұл ұсынысты осы пәннен сабақ беретін мұғалімдер Нұр-Сұлтан қаласында өткен «Атамекен» Ұлттық кәсіпкерлер палатасының төралқа төрағасы Тимур Құлыбаевпен кездесуде айтты.
Төраға оқушылар мен студенттерге кәсіпкерлік негіздерін үйрететін ұстаздардың талап-ұсынысын тыңдады. Арнайы жиынға Қызылорда облысынан № 9 мектеп-гимназиясының мұғалімі Сәуле Шайхысламова қатысты.Ол аймақта «Кәсіпкерлік негіздерін» алғаш факультатив курс ретінде пилоттық режимде жүзеге асырған.
Қызылордалық мұғалімнің айтуынша, кездесуде ұстаздар түрлі ұсыныс айтып, түйткілді мәселелер көтерген. Олардың ішінде ұстаздар қауымдастығын құру және 5-9 сыныптар үшін пәнді қосымша сабақ етіп енгізу бар.
<blockquote>
 «Пән пилоттық режимде болған кезде арнайы оқу бағдарламасы, қосымша әдістемелік құралдар болған жоқ. Дегенмен, палатамен бірге жоспардың жобасын әзірлеп, кәсіпкерлерді мектебімізге шақырып, оқушылармен кездестірдік. Оқушылардың іскерлік қабілетін ашуға септігін тигізетін ойындарды ұйымдастырып, оқушылардың қызығушылығын ояттық. Білім және ғылым министрлігінің талабына сәйкес пән қазір мектептерде 10-11 сынып оқушыларына енгізілген. Бірақ біз жақында Нұр-Сұлтан қаласында өткен кездесуде «Атамекеннің» басшысына 5-9 сыныптар арасында қосымша сабақ етіп қосуды ұсындық. Себебі 10-11 сыныпқа балалар бұл пәннің маңызын түсініп бару керек», –&nbsp; дейді Сәуле Шайхысламова.
</blockquote>
Бұл пәннің оқытушылары біліктілікті арттыру курсынан әзірге бір рет өткен. Сондықтан педагогтар кәсіби дағдыны дамыту үшін мұндай арнайы курсты бірнеше рет өткізуді ұсынып отыр.
Сондай-ақ, Сәуле Шайхысламова кей жағдайда ата-аналар тарапынан бұл пәннің қажеттігіне қатысты сұрақтар туындайтынын айтты. Ол «Кәсіпкерлік және бизнес негіздері» баладан бизнесмен шығармаса да, кем дегенде іскер, қоғаммен дұрыс қарым-қатынас жасай алатын, жан-жақты азамат тәрбиелеуге ықпал ететініне сенімді. Сонымен қатар, кәсіп ашып, табыс тауып отырған оқушылардың бар екенін атап өтті.
Еске салайық, өңірде «Кәсіпкерлік негіздерін» факультатив ретінде пилоттық жобамен енгізуді 2015 жылы Қызылорда облысының кәсіпкерлер палатасы ұсынған болатын.
Осы уақытқа дейін Қызылорда облысында «Кәсіпкерлік негіздері» пәнінен сабақ беретін 288 мектеп мұғалімі, 13 жоғарғы оқу орны мен 62 мемлекеттік колледж оқытушысы «Атамекен» ҰКП-ның арнайы біліктілік арттыру курсынан өткен.

Елімізде «Кәсіпкерлік негіздері» пәні ұстаздарының қауымдастығын құру ұсынылды

<a href="https://kyzylorda-news.kz/ru/obshestvo/">Kyzylorda-news.kz</a>. Ел Президентінің Жолдауында жеке қосалқы шаруашылықтар мәселесі қозғалды. Жасыратыны жоқ бүгінде облыстағы мал өнімдері өндірісінің 85 пайызы үй шаруашылықтарының үлесінде. Осыған орай азық-түлік қауіпсіздігін қамтамасыз етуде жеке қосалқы шаруашылықтардың мүмкіншілігін тиімді пайдалану үшін кооперация жүйесін жетілдіру қажет деді Өңірлік коммуникациялар қызметінде өткен баспасөз конференциясында облыстық ауыл шаруашылығы басқармасының басшысы Талғат Дүйсебаев.
<blockquote>
 «Осыған орай, біз Жамбыл облысының «Алқаптан сөреге дейін» пилоттық жобасын іске асыру бойынша тәжірибесін зерттеп, тиісті шаралар топтамасын енгізу бағытында жұмыс жасайтын боламыз. Бұл бағытта республикалық бюджеттен 2022 жылға 6,5 млрд. теңгеге бюджеттік өтінім жолданды», – деді басқарма басшысы.
</blockquote>
Сонымен қатар, мал шаруашылығы мәселелерінің бірі – малды жайылымдық жермен қамтамасыз етуде айтылды.
Жеке қосалқы шаруашылықтардағы мал басын тиісті жайылымдық, шабындық жерлермен қамтамасыз ету мақсатында елді мекен аумағындағы барлық жерге түгендеу жұмыстарын жасап, жеке қосалқы шаруашылықтарына жер беруді заңдастыру бағытында жұмыстар жүргізілуде. Жайылымдарды тиімді пайдалану мақсатында оларды бақылаудың жаңа әдістері, тиісті мемлекеттік қолдау шаралары барынша пайдаланылатын болады. Сондай-ақ, жайылымдарды түбегейлі жақсарту, суландырудың барынша тиімді тәсілдерін қолдана отырып, жаңа жайылымдық жерлерді айналымға тарту жұмыстары қолға алынуда.
Тағы бір айта кетерлігі, Үкіметпен әзірленіп жатқан алдағы 5 жылға арналған «Жасыл Қазақстан» Ұлттық жобасы. Онда су нысандарының экожүйесін сақтап, оны үнемді пайдалану үшін облыстың 237 су шаруашылығы жобасын енгізу бойынша жұмыс жасалуда. Бүгінгі күні, «Қызылорда» және «Әйтек» су тораптарына жөндеу жұмыстары жүргізіп жатса, 2023 жылға дейін коммуналдық меншіктегі 192 су шаруашылығы нысандарын тазалау және жөндеу жұмыстары кезең-кезеңмен атқарылатын болады.
Су шаруашылығын басқаруды цифрландыру арқылы да каналдар бойынша берілетін суды тиімді пайдалану мен үнемдеуге қол жеткізілетін болады. Жалпы 2025 жылға дейін облыс бойынша 15 магистралды және шаруашылық аралық каналдар цифрландырылу жоспарланып отыр.
Баспасөз конференциясында егін жинау науқанының барысы да айтылды.
Ағымдағы жылы барлығы188,1 мың гектар жерге ауыл шаруашылығы дақылдары орналастырылды. Негізгі дақыл күрiштің көлемі 83,6 мың гектарды құрады. Сонымен қатар, облыста биылғы жылы 53,5 гектарға жерге жеміс-жидектер мен жүзімдіктер егілді. Қазіргі таңда, бидай, арпа, сұлы, дақылдарын жинау аяқталса, мақсары, жүгері, картоп, көкөніс, бақша, дақылдарын жинау жұмыстары жалғасуда. Биыл ораққа түскен 40,3 мың гектар ескі жоңышқа дақылының I-ші және II-ші орымы аяқталып, қазіргі таңда III-ші орымы жүруде.
Облыста күрішке орақ салу жұмыстары 26 тамыздан басталды. Бүгінде күріштің 65283 гектарына орақ салынып, 55537 гектары бастырылды. Әр гектарынан орташа 53,3 центнерден өнім алынуда. Күзгі егін жинау науқанын 10 қазаннан кешіктірмей аяқтау жоспарланып отыр.

Күзгі егін жинау науқаны 10 қазаннан кешіктірілмей аяқталады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Кептірілген қауыннан жасалған қытырлақ ерекше дәмімен танымал. Қазірде халық арасында бұл өнімге сұраныс артып келеді. Сұраныс көбейсе нарыққа шығу мүмкіндігі де бар деген сөз. Өңірлік коммуникациялар қызметінде өткен брифингте Қорқыт ата атындағы Қызылорда университетінің Жаралыстану институтының директоры, ауыл шаруашылығы ғылымдарының кандидаты Самалбек Қосанов танымал өнімді өндірудің қыр-сырын және алдағы жоспарларын баяндады.
<blockquote>
 “Біздің мақсатымыз − өңіріміздегі көкөніс бақша шаруашылығын дамыту. Біздің облыс әлемдегі қауын өсіретін 3 негізгі орталыққа кіреді. Демек өңірде кездесе бермейтін қауын сорттарын пайдалануға мүмкіндік бар. Қауын қытырлағын белсенді шығарушы ел − Өзбекстан мемлекеті. Олармен біз тәжірибе алмаса отырып қауын қытырлағын шығарып жатырмыз. Бұл өнімді жасау үшін қауындарды арнайы пештерде кептіріп, ешқандай қоспасыз даярланады. Сондықтан бұл өнімге сұраныс жоғары. Өйткені толығымен табиғи өнім болып саналады. Күніге 10-20 қауыннан даярлаймыз. Яғни 10 килограмм қауыннан 1 килограмм қытырлақ қауын әзірленеді. Алда өнім санын көбейтіп нарыққа шығарсақ деген жоспарымыз бар”, – деді Самалбек Оразбайұлы.
</blockquote>
<img src="https://kyzylorda-news.kz/wp-content/uploads/2021/10/243387893_1382224158839759_390983782947593812_n.jpg" alt="" />

Қызылорда облысы әлемдегі қауын өсіретін 3 негізгі орталыққа кіреді

Kyzylorda-news.kz. Бүгін облыс әкімі Гүлшара Әбдіқалықова Франция Республикасының Ұлттық қорғаныс жөніндегі жоғары зерттеу институты делегациясымен кездесті.
Кездесуге Францияның Қазақстандағы Елшісі Дидье Канесс, Францияның Ұлттық қорғаныс жөніндегі жоғары зерттеу институтының қару-жарақ бойынша Бас инженері Флоранс Плессис, Францияның Алматыдағы Бас консулы Алекс Шахтахтински және Франция Елшілігі мен қорғаныс саласының қызметкерлері келді. 
Аймақ басшысы екі ел арасындағы өзара тиімді қарым-қатынастардың жалғасатынына сенім білдіріп, делегация сапарына сәттілік тіледі.
Франция Республикасы Қазақстанның тәуелсіздігін мойындаған алғашқы еуропалық мемлекет. Биыл Франция мен Қазақстан арасындағы ашық және сенімді дипломатиялық қарым-қатынастардың орнағанына 29 жыл толып отыр.
<blockquote>
 Франция мемлекеті осы өңірден шыққан жерлесіміз, Алаш қайраткері Мұстафа Шоқайға ерекше назар аударып, құрмет білдіріп келеді. Бүгінгі күні Францияны өзінің екінші отаны ретінде көрген Мұстафа Шоқайдың құрметіне саябақ және Ножан-сюр-Марн қаласында мүсіні қойылғанын ерекше атап өткен жөн, – деді облыс әкімі.
</blockquote>
Айта кетейік, осы жылдың тамыз айында Сыртқы істер министрлігінің қолдауымен екі жақты қарым-қатынас пен ынтымақтастықты одан әрі дамыту мақсатында Ножан-сюр-Марн қаласының мэриясымен Қызылорда қаласы әкімдігі арасында Бауырластық байланыстар туралы келісімге онлайн режимде қол қойылды.
Өз кезегінде, Францияның Қазақстандағы Елшісі Дидье Канесс және Ұлттық қорғаныс жөніндегі жоғары зерттеу институтының қару-жарақ бойынша Бас инженері-делегация басшысы Флоранс Плессис аймақ басшысына қонақжайлылық танытып, жылы қабылдағаны үшін алғыс білдірді.
Сыр өңіріне екі күндік сапары барысында делегация өкілдері Байқоңыр қаласына барып, Байқоңыр ғарыш алаңының тарихы музейін аралайды және Ю. Гагарин мемориалдық музейі мен бақылау алаңының жұмысымен танысады.

Гүлшара Әбдіқалықова Франция делегациясымен кездесті

*<a href="https://kyzylorda-news.kz/ru/obshestvo/">Kyzylorda-news.kz</a>. Қасым-Жомарт Тоқаев Қазақстан мен Ресейдің XVII Өңіраралық ынтымақтастық форумына қатысты,&nbsp;<a href="https://www.akorda.kz/kz/kasym-zhomart-tokaev-kazakstan-men-reseydin-xvii-oniraralyk-yntymaktastyk-forumyna-katysty-3083618">деп хабарлайды</a>&nbsp;Ақорда.*
Шекара маңындағы аймақтар арасындағы ынтымақтастықты дамытудың өзекті мәселелеріне арналған форумның жұмысына облыстардың басшылары, екі елдің салалық мемлекеттік органдары мен іскер топтарының өкілдері қатысты.
Қазақстан Президенті жиынға қатысушылар алдында сөйлеген сөзінде форум екіжақты қатынастардың, әсіресе өңірлердің өзара байланыстарының құрамдас әрі маңызды бөлігіне айналғанын айтты.
Мемлекет басшысы індеттің таралуына байланысты күрделі кезеңде Қазақстанға көрсеткен көмегі үшін Владимир Путинге ризашылығын білдірді.
<blockquote>
 – Ресей алғашқылардың бірі болып дәрі-дәрмек жеткізді, сынама жүйелерін қайтарымсыз ұсынды, Қазақстан азаматтарын эвакуациялауға айтарлықтай көмек көрсетті. Бірнеше апта бойы ресейлік дәрігерлер қазақстандық әріптестерімен эпидемиологиялық ахуалы күрделі өңірлерде иық тіресе еңбек етті және тәжірибелері мен білімдерін бөлісе отырып, өздерінің кәсіби міндеттерін абыроймен атқарды. Өзара уағдаластықтарды орындау барысында ресейлік «Спутник V» вакцинасын Қарағанды фармацевтикалық кешенінің базасында өндірудің іске қосылуы осы кезеңдегі ынтымақтастығымыздың маңызды сәті болды. Мұның бәрі Ресей мен Қазақстанның стратегиялық серіктес әрі одақтас екенін нақтылай түсті, – деді Қасым-Жомарт Тоқаев.
</blockquote>
<img src="https://www.inform.kz/radmin/fotofiles/a/2021/09/30/2109301654532700g.jpg" alt="" />
Президенттің айтуынша, Қазақстанда 7500-ден астам ресейлік және 3500-ге жуық бірлескен кәсіпорын табысты жұмыс істеп жатыр.
Ынтымақтастық орнатқан уақыттан бері Форум аясында 200-ге жуық келісім мен шартқа қол қойылды. Осы кезеңде тауар айналымы 3,5 есеге өсіп, 19 миллиард долларға жетті.
Ресейден тартылған тікелей инвестицияның көлемі соңғы 15 жылда 16 миллиард доллардан асты.
Өз кезегінде Ресейге салынған қазақстандық инвестицияның көлемі 4,5 миллиард долларға жуықтады.
Елдеріміз арасындағы іс-қимылдар экономиканың барлық саласы: өнеркәсіп, ауыл шаруашылығы және инфрақұрылым бағыттары бойынша жүргізілуде.
<blockquote>
 – Биыл біз мұнай тасымалдайтын Каспий құбыр желісі консорциумы – ірі халықаралық жобаның 25 жылдығын атап өтеміз. Бұл кәсіпорын құрылған уақыттан бері әлемдік нарыққа 745 миллион тоннадан астам мұнай тасымалдады. Мұнай өндіру ісінің артуына және жаңа кен орындарының игерілуіне, соның ішінде мұнай өндіру жөніндегі бірлескен жобалардың әзірленуіне байланысты мұнай құбырларының өткізу мүмкіндігін алдын ала күшейту, осы күрделі халықаралық жобаны басқарудың тұрақтылығын қамтамасыз ету маңызды. Біздің кәсіпорындарымыз Теңіз, Қарашығанақ сияқты әлемдік деңгейдегі кен орындарын бірлесе игеруде. Каспийдің қазақстандық бөлігінде Жеңіс, Әл-Фараби теңіз жобалары жүзеге асырылуда. Бұл жобалардың жалпы құны 6,5 миллиард доллар. Бұдан бөлек біз Қаламқас-теңіз – Хазар ірі кен орындарын игеруге кірісеміз. Ресеймен арадағы стратегиялық серіктес анықталды. Ол «Лукойл» компаниясы. Жобаның жалпы құны – 5 миллиард долларға жуық. Біз теңіз жобаларын жүзеге асырып жатқан инвесторлар үшін қолайлы жағдай жасадық, – деді Мемлекет басшысы.
</blockquote>
Оның айтуынша, Қазақстан Үкіметі инвестицияға қатысты жаңа механизм – үздік модельді келісім әзірлеген.
Аталған құжат инвестицияның заңдық тұрғыдан қорғалуын және тұрақтылығын қамтамасыз етеді, сондай-ақ жеңілдіктердің жаңартылған топтамасын қамтиды.
Қасым-Жомарт Тоқаев Өндірістік кооперация саласындағы бірлескен іс-қимыл жөніндегі бағдарламалардың сәтті жүзеге асырылып жатқанын атап өтіп, ресейлік серіктестерді жаңа жобаларды іске асыруға шақырды. Қазіргі уақытта 3 жоба іске қосылды.
Олар: «Кировец» маркалы тракторын, «Hyundai» автомобилін және ГАЗ автокөліктеріне арналған қосалқы бөлшектерді шығару жобасы.
Сәуірде қуаты жылына 3,5 миллион дана дөңгелек шығаратын зауыттың құрылысы басталды.
<blockquote>
 – Мемлекеттеріміздегі порттардың қуаттылығының әлеуеті зор. Қазіргі жағдайда негізгі экспорттаушылар қалыптасқан бағыттарға балама жолдар қарастыруда. Сондықтан Қазақстан мен Ресейдің теңіз порттары арқылы мультимодальді транскаспий бағытын дамыту өте өзекті болып отыр. Біз Ресейдің Солтүстік теңіз жолына қатысты үлкен жоспарлары мен жобалары туралы білеміз. Іс жүзінде Қазақстан мен Ресей бірлесе отырып, экспорттаушыларға Еуропадағы және басқа да аймақтардағы көлік тораптарымен байланыстыратын балама транзитті бағыттар желісін ұсына алады, – деді Қазақстан Президенті.
</blockquote>
<img src="https://www.inform.kz/radmin/fotofiles/a/2021/09/30/2109301654561101g.jpg" alt="" />
Мемлекет басшысы екі елдің шекарасы арқылы өтетін жүк тасымалдаушылардың мәселелеріне арнайы тоқталды.
<blockquote>
 – Қазақстан мен Ресей шекарасында 30 автокөлік бекеті бар. Оның тек бесеуі ғана бақылау-тексеру кешендерімен жабдықталған. Өкінішке қарай, олар сәт сайын істен шығып жатады. Бұл ретте Саратов, Орынбор, Челябинск, Курган, Тюмень және басқа да облыстармен шекарадағы өткізу бекеттері туралы айтып отырмын. Ресейдің Шекара қызметі аталған мәселені қамтамасыз ету үшін көліктердің жүк бөлімдерінде «технологиялық өту» сияқты жаңа талаптар енгізді. Сол тексеру аймағында жүргізушілерді жүктерін түсіруге мәжбүрлейді. Бұл көбінесе тауарлардың бұзылуына әкеп соқтырады. Осыдан кейін тасымалдаушылар көлігінің 2/3 бөлігіне ғана жүк тиеуге мәжбүр болады. Нәтижесінде көліктердің шығыны артып, тауар бағасы өседі, – деді Қасым-Жомарт Тоқаев.
</blockquote>
Президент өткізу пункттерін коммерциялық транзит қауіпсіздігі мен жылдамдық мәселелерін шеше алатын заманауи тексеру кешендерімен жабдықтауды ұсынды.
Қасым-Жомарт Тоқаев бүгінгі форумның тақырыбы экология мен «жасыл экономикалық» өсім саласындағы ынтымақтастық екенін атап өтіп, аталған мәселенің маңызды әрі шұғыл сипат алып отырғанын айтты.
<blockquote>
 – Қазақстан мен Ресейдің экологиялық мәселелері ұқсас. Бұл – ауаның, судың, топырақтың ластануы, радиация мен өндірістік қалдықтардың жиналып қалуы. Оған қоса, көрші отырған соң көптеген мәселе екі жаққа да ортақ. Оны шешу үшін үкіметтер экология, биологиялық әртүрлілікті сақтау, трансшекаралық су нысандарын бірлесіп пайдалану және қорғау салаларындағы 7 келісімге қол қойды. Келісімдер жүйелі түрде жүзеге асырылып жатыр. Алайда, экологиялық ахуалдың нашарлауы тоқтайтын емес. Сондықтан аталған мәселелерді шешу халықаралық деңгейде бірлескен әрекеттерді күшейтуді талап етеді, – деді Мемлекет басшысы.
</blockquote>
Президенттің пікірінше, экономиканы көміртегінен арылту мәселесін екі ел үкіметтері бірлесіп пысықтап, тәжірибе алмасуы қажет.
Сондай-ақ оның экономикаға тигізетін кері әсерін жеңілдету мақсатында халықаралық келісімдерге, әсіресе ДСҰ аясында енгізілетін нормаларға қатысты ортақ ұстанымға келуі керек.
Қасым-Жомарт Тоқаев Жайық өзенінің өте қатты тартылуы және ондағы экологиялық жағдайдың нашарлауы Қазақстанның ғана емес, сондай-ақ Ресейдің де шекаралас аймақтарындағы тұрғындар үшін аса қауіпті екенін айтты.
<blockquote>
 – Владимир Владимирович, 2019 жылы Омбы қаласындағы кездесуіміздің қорытындысы бойынша Жайық өзені бассейнінің экожүйесін сақтау жөніндегі ынтымақтастық бағдарламасы қабылданды. Сол үшін Сізге алғысымды білдіремін. Үкіметтерімізге аталған бағдарламаның сапалы іске асырылуы жайында, сондай-ақ бір жылда атқарылған жұмыстар жөнінде баяндама әзірлеуді тапсыруды ұсынамын. Шағын өзендердегі бөгеттердің құрылысы мен оларды пайдалану тиімділігіне қатысты мәселеге, сондай-ақ жаңа тоғандар құрылысын ұйымдастыруға ерекше мән берген жөн, – деді Қазақстан Президенті.
</blockquote>
Каспий итбалықтарының популяциясын сақтау мақсатында теңіздің солтүстігінде мемлекеттік резерваттар құру мүмкіндігін, сондай-ақ киіктердің маусымдық қоныс аударуы кезінде екі елдің шекарасынан еркін өту жолын қамтамасыз ету мәселелерін қарастыру ұсынылды.
<img src="https://www.inform.kz/radmin/fotofiles/a/2021/09/30/2109301655009802g.jpg" alt="" />
Мемлекет басшысы Қазақстан мен Ресейдің «жасыл» экономика саласы бойынша ынтымақтастығы белсенді түрде артып жатқанын атап өтті. Елдеріміздің жаңартылатын және баламалы энергия көздерін дамыту жөніндегі әлеуеті зор.
<blockquote>
 – Қазақстан жел энергиясы бойынша бір жылда сағатына үш триллион киловатқа жуық қуат өндіруге қауқарлы. Еліміз – «жасыл» сутегін экспорттау әлеуеті жоғары әлемдегі сегіз мемлекеттің бірі. Баламалы энергетика саласындағы жобаларды іске асыру үшін өндірістік және ғылыми инфрақұрылымды қалыптастыру керек, сондай-ақ жоғары білікті мамандар қажет. Осыған орай біз энергетика саласында Жоғары технологиялық инновациялар жөніндегі құзыреттер орталығын ашамыз. Ресейдің мықты ғылыми базасы мен тиісті кадрлық әлеуеті бар. Сондықтан Ресей мамандарын өзара тиімді ынтымақтастық орнатуға шақырамыз, – деді Қасым-Жомарт Тоқаев.
</blockquote>
<img src="https://www.inform.kz/radmin/fotofiles/a/2021/09/30/2109301655033603g.jpg" alt="" />
Форум аясында киіктерді қорғау және олардың санын көбейту, Каспий итбалығын қорғау, сондай-ақ өңірлер мен кәсіпкерлер арасындағы сауда-экономикалық байланыстарды нығайту жөнінде 13 құжатқа қол қойылды.
<blockquote>
 – Форумның дәстүрлі өнеркәсіптік-экономикалық күн тәртібіне экология және жасыл экономиканы дамыту мәселесін сәтті енгізе алғанымыз қуантады. Бұл – сән қуу емес, шын мәнінде, қажеттілік әрі елдеріміздің болашағы. Осы саладағы жобаларымыз екіжақты ынтымақтастықтың дамуына тың серпін беретініне сенімдімін, – деді Мемлекет басшысы.
</blockquote>
Пленарлық отырыс аясында Ресей Президенті Владимир Путин, Қазақстан мен Ресейдің салалық министрліктері мен өңір басшылары сөз сөйледі.

Қасым-Жомарт Тоқаев Қазақстан мен Ресейдің XVII өңіраралық ынтымақтастық форумына қатысты

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Жалағаш ауданының орталығымен іргелес жатқан Ақсу ауылдық округінің бүгінде тірлігі түлеп, әлеуеті артып келеді. Ауылда кәсіпкерлік саласы қанат жайып, тұрақты жұмыспен қамтылған азаматтар саны артқан. Ұлттық санаққа тіркеліп, вакцина алуда да ауыл халқы белсенді. Ақсулықтардың 86% онлайн санақтан өтсе, 93 пайызы індетке қарсы екпе салдырған. Бүгін Өңірлік коммуникациялар қызметінің ақпарат алаңында өткен брифингте Ақсу ауылдық округінің әкімі Қанат Ниетқұлов елді мекендегі елеулі жұмыстарды баяндап, ауылда атқарылған жұмыстарды айтып берді.
Ауылдың шаруасын ширатуға кіріскен Қанат Қуанышұлы биыл «Үздік ауыл әкімі» республикалық конкурсының өңірлік кезеңінде жеңімпаз болды. Енді ауыл әкімі республикалық кезеңде үздіктер қатарынан көрінуге үмітті. Жеңімпаз болу үшін ауылда Қанат Қуанышұлының басшылығымен атқарылып жатқан ілкімді істердің септігі тиері анық.
Мәселен өткен жылы Ақсуда “Бірлік Агро” шаруа қожалығы тәулігіне 10 тонна күріш ақтау цехын іске қосқан. Қазір цех өз тиімділігін дәлелдеп, нәтижелі жұмыс істеп тұр. Ауылдағы “Толғанай” шаруа қожалығының мал бордақылау алаңы мен жылыжай кешені де жүйелі жұмыс істеп келеді. Бұл қожалық асыл тұқымды сиыр малын сатып алып, аудан орталығы мен қала тұрғындарына өз өнімдерін ұсынуда.
Ауыл әкімінің айтуынша ақсулық шаруалар биыл 2 мың гектардан аса аумаққа Сыр салысын егіп, жоспарға сай күріш жинауға кіріскен. Ауыл еңбеккерлері науқанды межелеген уақытта аяқтайды деп күтілуде. Су тапшылығы диқандарға қиынға соқса да мол өнім алудан үмітті.
Жыл көлемінде шағын және орта кәсіпкерлікті дамыту мақсатында мемлекеттік және өңірлік бағдарламалар аясында ауылдағы 46 кәсіпкерге қолдау көрсетілген. Нәтижесінде қосымша 32 адам тұрақты жұмыспен қамтылыпты. Облыс аумағында орын алған қуаңшылық кезеңінде Ақсудан Арал ауданына көмек ретінде 10 мың дана шөп жеңілдетілген бағамен жөнелтілген. Ерікті жастар және шаруашылықтың көмегімен 3 қамаз шөп қайырымдылық көмек есебінде тегін жеткізілді.
<blockquote>
 “Біздің ауыл бұрыннан өнерде де спортта өте белсенді. Ауылдағы батыр аналардан құрылған Асыл әжелер ансамблі Түркістан және Қызылорда қалаларында өз өнерлерін көрсетті. Сонымен қатар демеушілердің көмегімен ауыл ардагерлерін түрлі саяхаттарға, демалу орындарына баруына ықпал етіп келеміз. Жастарды салауатты өмір салтын ұстануға баулу бағытында спорт түрлерінен арнайы командалар жасақталған. Ауылымыздың абыройын қорғап жүрген спортшыларымыз аз емес”, – деді ауыл әкімі.
</blockquote>

Ақсуда ауқымды жұмыстар атқарылуда

<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданында 5576 кәсіпкерлік субъектісі тіркелген, соның ішінде 5277-сі нақты жұмыс істеуде. Салада жұмыс жасайтын азаматтар саны 8984. Осы жылдың 1 қыркүйектегі ақпарат бойынша кәсіпкерлік субъектілерінен түскен салық көлемі 15,1 млн теңге.
8 айда Палатаның аудандық филиал кеңесшілерімен 1917 қызмет көрсетілген. Атап айтқанда, 517 бизнес жоспар әзірленіп, 146 жоба сүйемелденген, 273 сервистік қызмет, 981 ақпараттық қолдау көрсетілген.
Биыл 406 қазалылық «Бастау Бизнес» жобасы аясында білімін жетілдіріп, сертификаттарға ие болған.
<blockquote>
 «Қазалы ауданында осы жылдың 8 айының өзінде жалпы құны 2707,1 млн теңгені құрайтын 695 жоба түрлі қаржы көздері арқылы қаржыландырылды. Аталмыш жобаларды жергілікті әкімдік арқылы бірге сүйемелдедік. Жыл басынан бері 5 кәсіпкерлің құқығын қорғап, 8 кәсіпкердің мәселесін келіссөздер арқылы шештік», – деді шарада филиал директоры Қадырхан Еңсепов.
</blockquote>
Филиал директоры атқарылған жұмыстармен қоса, аудан кәсіпкерлерінің өтініштерін де атап өтті. Олар – биылғы қуаңшылыққа байланысты жем-шөп бағасы дотациялау, сонымен бірге несие пайызының субсидиялануына қолдау көрсету.
Отырыста Өңірлік кеңес мүшелері ұсыныстар негізінде алдағы уақытта Палатамен бірге қажетті жұмыстарды атқаратындығын жеткізді.
<img src="https://kyzylorda-news.kz/wp-content/uploads/2021/09/06b46bc5-bd47-4106-9095-5b9ffd867053.jpg" alt="" />

Қазалы ауданында 8 айда 695 жоба қаржыландырылды

<a href="https://kyzylorda-news.kz/ru/obshestvo/">Kyzylorda-news.kz</a>. Құрылыс саласындағы заңнама талаптарын өрескел бұзған техникалық қадағалау сарапшыларына аттестаттарын тоқтатуға дейінгі қатаң жаза қолдану практикасы жүзеге асырылуда. Мәселен, мемлекет қаржысына салынып жатқан объектілерде құрылыс-монтаждау жұмыстарының сапасыз орындалуына жол берген 5 техникалық қадағалау сарапшысына әкімшілік айыппұл салумен бірге сарапшы аттестатының қолданысы 6 ай мерзімге тоқтатылды.
Нысандарда құрылыс жұмыстарының сапасына бақылау күшейтіліп, жеке және заңды тұлғалардың өтініштері бойынша 71 жоспардан тыс тексерулер ұйымдастырылды. Анықталған ақаулар мен кемшіліктерді жою жөнінде 18 нұсқама берілді.
<blockquote>
 «Тексерулер нәтижесімен сәулет-құрылыс саласындағы заңнама талаптарын бұзған тұлғаларға қатысты 91 әкімшілік іс қозғалып, кінәлі тұлғаларға 21 млн. 396 мың 196 теңге айыппұл салу жазасы қолданылды. Салынған әкімшілік айыппұлдардың 18 млн. 105 мың 820 теңгесі немесе 85,0%-ы бюджетке нақты өндіріліп, қалған 3 млн. 290 мың 876 теңге өндірілу сатысында», – деді облыстық мемлекеттік сәулет-құрылыс бақылауы басқармасының басшысы Сұлтан Мақашов.
</blockquote>
Сонымен қатар, көрсетілетін 5 түрлі мемлекеттік қызмет электронды қызмет жүйесі «Е-лицензирование» порталы арқылы да тұрғындарға 1448 қызмет көрсетілді. Оның 294-і сарапшылық қызметке аттестаттауға, 1154-і лицензиялауға қатысты болды. Бұған қоса, техникалық қадағалау сарапшылары «E-qurylys» бірыңғай платформасы арқылы ай сайынғы есебін тапсыруда. Бүгінгі күнге 3116 техникалық қадағалаушының ай сайынғы есебі келіп түсті.

Сұлтан Мақашов: Техникалық қадағалау сарапшысына талап қатал

<a href="https://kyzylorda-news.kz/ru/obshestvo/">Kyzylorda-news.kz</a>. Көптен айтылып жүрген «Қарлаң» көпірінің құрылысын бастау үшін республикалық бюджеттен қаржы бөлініп, облыстық жолаушылар көлігі және автомобиль жолдары басқармасы тарапынан мемлекеттік сатып алу конкурсы жарияланды.
Бұл аудан орталығы мен Жанкент, Бірлік, Қожабақы, Аранды, Бозкөл, Тасарық, Лақалы, Кәукей, Ажар, Тасөткел ауылдарының тұрғындары үшін мемлекет тарапынан көрсетілген үлкен қолдау болып табылады.
Жақын күндері мемлекеттік сатып алу конкурсының жеңімпазы анықталған соң Сырдария өзенінің «Қарлаң» учаскесіндегі темір бетон көпірінің құрылысы басталады деп күтілуде.
<img src="https://kyzylorda-news.kz/wp-content/uploads/2021/09/60843356_605974263220588_5977730212647927808_n.jpg" alt="" />

Қазалыдағы «Қарлаң» көпірінің құрылысын бастау үшін конкурс жарияланды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; «Атамекен» ҰКП Төралқа Төрағасы Тимур Құлыбаевпен онлайн-кездесуде Қызылорда облысы кәсіпкерлер палатасы Өңірлік кеңесінің мүшелері саладағы бірқатар мәселелерді жеткізді.Өңірлік кеңестің төрайымы Гүлзағира Абдраимова кәсіпкерлердің атынан мемлекеттік бағдарламалар аясында берілетін несиелердің пайыздық мөлшерлемесін субсидиялауға қатысты проблеманы көтерді.
Оның айтуынша, «Кредиттер және лизинг бойынша сыйақы мөлшерлемелерін субсидиялау» бағдарламасын толық қаржыландырмау салдарынан кәсіпкерлер мемлекеттік қолдауды өз дәрежесінде ала алмай отыр.Мәселе мынада, бағдарламаға сәйкес кәсіпкер сыйақының бір бөлігін 4-9 пайыз аралығында төлеу көзделген. Алайда мемлекет тарапынан аталмыш бағдарламаға қаржы қажетті көлемде бөлінбей отыр. Салдарынан кәсіпкерлер бастапқы келісім-шартта көрсетілген сыйақы мөлшерлемесін толықтай, яғни 14-19 пайызбен өтеуге мәжбүр.
<blockquote>
 «Қызылорда облысында пайыздық мөлшерлемені субсидиялауға бюджеттен осы жылға 1,2 млрд теңге бөлінді. Қаржы институттары мен кәсіпкерлердің арасында жүргізген сауалнамамыз бойынша, қажеттілігіміз шамамен 3 млрд теңге көлемінде. Өткен жылдың желтоқсанынан бастап бүгінге дейін «Қарапайым заттар экономикасы» бағдарламасы бойынша да субсидиялар төленген жоқ. Бұл жағдай кәсіпкерлер арасында мемлекеттік бағдарламаларға деген сенімсіздік тудырып отыр», – дейді Гүлзағира Абдраимова.
</blockquote>
Қазір несиелеудің толық процесіне бірнеше тарап қатысады екен. Олар қаржы институты, субсидиялаудың ақпараттық жүйесі, жергілікті атқарушы орган және кәсіпкер. Бұл бюрократиялық схемадан зардап шегетін тек кәсіпкер.Кеңес төрайымы бұл мәселені шешу үшін жалпы несиелендіру процесін оңтайландыруды ұсынды. Ол үшін несие беру бағдарламаларын қайта қарап, қаржы институтынан кәсіпкерге жылдық 6 пайызбен тікелей несие беруді ұйымдастыру керек.Нәтижесінде қолданыстағы несиелендіру тетігінен жергілікті атқарушы орган мен субсидиялаудың ақпараттық жүйесінің жұмыстары жойылады. Бұл қадам арқылы мемлекеттік бағдарламалар қолжетімді бола түспек.Сонымен бңрге кездесуде кеңес мүшесі Жанарбек Нұрымбетов тұрмыстық баллондарды әлеуметтік бағадағы сұйытылған мұнай газымен қамтамасыз етуге көмек сұрады.Кәсіпкердің бұл мәселені көтеруіне келесі жылдан бастап сұйытылған мұнай газын өткізу толықтай электрондық сауда алаңына өтетініні себеп болып отыр. Қазір сұйытылған газ кезең-кезеңімен электрондық биржаға шығарылуда. Қыркүйекте оның 60 пайызы электрондық сауда алаңында сатылып жатыр.
<blockquote>
 «Осы өтпелі кезеңде сұйытылған газ бағасының өсуі байқалып отыр. Сұйытылған газдың әлеуметтік бағасы бір тоннаға 43,3 мың теңгені құраса, электрондық биржа арқылы бұл көрсеткіш 138 мың теңгеге дейін жетті. Оның өзінде жергілікті газ желісі ұйымдары Қызылорда облысында орналасқан «Казгермұнайдан» сұйытылған газ ала алмай жатыр. Аймақ тұрғындарының 35 пайызы немесе 288 мың адам табиғи газға қосылмаған ауылдық жерлерде тұрады. Сұйытылған газдың барлық көлемі электрондық биржада көшкенде тұрмыстық баллондардың тапшылығы орын алуы мүмкін. Ал тұрмыстық баллондарды сатуға арналған инфрақұрылмы бар газ желісі ұйымдары бұл қызметтен айналыспай қою қауіпі туындап тұр. Бүгінгі күні мүмкіндігі бар төрт мекеменің екеуі ғана тұрмыстық баллондарды сатып жатыр. Бұл мәселе табиғи газға қосылмаған ауылдық жерлердегі тұрғындарға айтарлықтай қиындық тудырады», – деген кеңес мүшесі Жанарбек Нұрымбетов сұйытылған газды тұрмыстық баллонмен сатуды электрондық биржадан алып тастап, оны әлеуметтік бағамен қамтамасыз етуге көмек көрсетуді сұрады.
</blockquote>
Қызылордалық кәсіпкерлердің мәселелеріне қатысты «Атамекен» ҰКП-ның басқарма мүшелері мүдделі мемлекеттік органдармен бірге шешу жолдарын қарастыратын болды.

Қызылордалық кәсіпкерлерді субсидия мен сұйытылған газ бағасы алаңдатып отыр

*<a href="https://kyzylorda-news.kz/ru/obshestvo/">Kyzylorda-news.kz</a>. Мемлекет басшысы өз Жолдауында ветеринария саласын жетілдіруді тапсырған болатын. Қазіргі таңда тиісті шаралар сараланып, ветеринариялық жұмыстар уақытылы жүргізілуде. Осының нәтижесінде облыс көлемінде эпизоотиялық ахуал тұрақты қалпын сақтап, мал басының өсімі артуда.*
<blockquote>
 “Аса қауіпті 16 түрлі жұқпалы және 6 түрлі энзоотиялық ауруларға қарсы алдын ала егу және диагностикалық жұмыстар бекітілген жоспарға сәйкес жүргізілуде. Жолдауда айтылғандай мал басының амандығы және өнімділігі жауапты мамандардың тиімді жұмысына байланысты. Сондай-ақ заманауи технологиялар қолданылып, ауыл шаруашылығы өнімдерінің экспортын арттыру басты міндеттердің бірі. Осыған сәйкес 2022 жылы облыстық бюджет есебінен нақты қаражат бөлініп, керекті құрал-жабдықтар қамтылатын болады. Қабылданатын шаралар мен шешілуі қажет мәселелер туралы ҚР Ауыл шаруашылығы министрлігіне ұсыныстар берілді”, – деді облыстық ветеринария басқармасының басшысы Шахмардан Қойшыбаев.
</blockquote>

Шахмардан Қойшыбаев: Мал басының амандығы мамандардың тиімді жұмысына байланысты

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Аудан орталығы – Әйтеке би кенті мен Қазалы қаласының аралығындағы жолды кеңейту аясында екі көпірге жөндеу жұмыстары жүргізіліп жатыр.
Қазіргі таңда мердігер мекеменің жұмысшылары көпір үстіне асфальт төсеу үшін жұмысты қарқындатты. Басты мақсат – жақын арада екі көпір үстінен екі аралықта қатынайтын көліктерді жүргізу.
Аудан әкімі Мұхтар Оразбаев көпір басына арнайы барып, жүріп жатқан жұмыстың барысымен танысты. Құрылысшылармен тілдесіп, жұмыс ырғағын үдету қажеттігін айтты. Көпір басында аудан әкімінің орынбасары Жалғас Сүйеубаев пен тиісті сала басшыларына жұмыстың уақытылы әрі салапы жүргізілуін қадағалауды тапсырды.
Аудан басшысы мұнан соң Басықара ауылына баратын жолдағы көпірге демонтаж жұмыстарын жүргізіп жатқан «Жылу – ХХІ» ЖШС директоры Көпжан Бижановпен кездесті.
Кездесу барысында серіктестік директоры аудан әкімі Мұхтар Оразбаевқа қазіргі таңда атқарылып жатқан жұмыстың барысымен таныстырды. Бүгінгі күні көпір құрылысына қажетті материалдардың біршамасы алынып, қалған бөлігін сатып алу үшін келіссөздер жүргізіліп жатқанын жеткізді.
<img src="https://kyzylorda-news.kz/wp-content/uploads/2021/09/242761738_3162990923921833_4411462319799530464_n.jpg" alt="" />
<img src="https://kyzylorda-news.kz/wp-content/uploads/2021/09/242718420_3162991230588469_6971701550735904747_n.jpg" alt="" />

Қазақстан және Қызылорда облысының жаңалықтары: Экономика