<a href="https://kyzylorda-news.kz/">Kyzylorda-news.kz.</a> Шиелі ауданында «Алтын күз – 2021» мерекесіне орай диқан Ыбырай Жақаевтың 130 жылдық мерейтойына арналған театрландырылған көрініс, сала үздіктерін марапаттау шарасы өтті.
Айтулы шараға, облыстық мәслихат хатшысы Н.Байқадамов, аудан әкімі Нариман Мақұлбеков, Ы.Жақаевтың ұлы С.Жақаев, аудандық мәслихат хатшысы Т.Жағыпбаров, «Nur Otan» партиясы Шиелі аудандық филиалы төрағасының бірінші орынбасары Б.Сыздық, зиялы қауым өкілдері мен БАҚ өкілдері қатысты.
Шиелінің мерей мәртебесі күрішімен, дән ырысымен тағы да меже биігіне көтерілді. Көне тарихтың куәсі, сарабдал шежірешісі Шиелі өңірінің атағын алысқа танытқан ақ алтын – ақ күріш. Алтын дән бидай боп жайқалып, күріш боп ырғалып Шиелінің тайқазанын тасытты. Ырыс пен күріштің шаттық шырайы болған «Алтын дән» мерекесі Қазақстан Республикасы Тәуелсіздігінің 30 жылдығымен ақ күріштің атасы атанған, екі мәрте Еңбек Ері, әлемдік рекорд иесі, даңғайыр дихан Ыбырай Жақаевтың 130 жылдық мерейтойымен қатар келіп отыр.
Мерейлі мереке барысында, облыстық мәслихат хатшысы Н.Байқадамов облыс әкімінің құттықтау хатын оқып аудан әкімі Нариман Мақұлбековке табыстады. Сонымен қатар, аудан әкімі диқандардың биылғы жеткен жетістіктерін айтып, дала еңбеккерлеріне алғысын білдіріп, мерейлі мерекелерімен құттықтап, «Алтын күз-2021» мерекесі және Ы.Жахаевтің 130 жылдығына арналған іс шарада ҚР Ауыл шаруашылығы министрлігінің наградаларымен, «Алтын күз-2021» мерекесі және Ы.Жахаевтің 130 жылдығына арналған іс шарада облыс әкімінің алғыс хаттарын табыстады.
Алты Алаштың анасы атанған Сыр өңірінен 102 Социалистік Еңбек Ері шықса, соның 41-і осы Шиелі ауданында еңбек етіп, осы киелі жерде Еңбек Ері атағына ие болған. Аймағымыздағы Еңбек Ерлерінің арасында өзінің есімін тарихта алтын әріптермен қалдырған даңғайыр диқан, әлемдік рекордтың иесі, екі мәрте Социалистік Еңбек Ері Ыбырай Жақаевтың орны ерекше.
<blockquote>
 «Тәуелсіздігіміздің 30 жылдығы ішінде тұрақтылық пен бірліктің, Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевтың, Президентіміз Қасым-Жомарт Кемелұлы Тоқаевтың сарабдал саясатының нәтижесінде – елімізде ілкімді істер мен толымды тірліктер атқарылып, бағындырған белестерімізбен алған асуларымыз артты. Ауданымызда бірқатар жобалар жүзеге асырылып, көптеген жетістіктерге қол жеткіздік. Бүгінгі мерейтойға – ауданымыздың ауылшаруашылығы саласы судың тапшлығына қарамастан жетістіктермен жетіп отыр. Биыл аудан күрішшілері жоғары өнімге қол жеткізіп, жыл қорытындысымен Шиелі ауданы егін шаруашылығы бойынша облыста «Озат аудан» атанды», – деді аудан әкімі Н.Мақұлбеков.
</blockquote>
Ағымдағы жылы ауданда 2021 жылдың 9 айында ауылшаруашылығы саласы бойынша 25,9 млрд. теңгенің өнімі өндіріліп, өткен жылдың тиісті кезеңімен салыстырғанда 102,8%-ға артты. 30 189,5 гектар жерге егін егілді. Негізгі дақыл 12 039 гектар күріштің әр гектарынан 55 центнерден өнім алынып, 66214 тонна күріш салысы жиналған. 
Шара соңында, аудан басшысы сала ардагерлерінің алдағы жұмыстарына сәттілік тіледі.
<img src="https://kyzylorda-news.kz/wp-content/uploads/2021/11/251354174_1187706618426462_892597507240004819_n.jpg" alt="" />
<img src="https://kyzylorda-news.kz/wp-content/uploads/2021/11/251239855_1187706185093172_6748917748013101609_n.jpg" alt="" />
<img src="https://kyzylorda-news.kz/wp-content/uploads/2021/11/251362746_1187706491759808_4494463332960591791_n.jpg" alt="" />
<img src="https://kyzylorda-news.kz/wp-content/uploads/2021/11/251569103_1187706318426492_8481129487345735829_n.jpg" alt="" />

Шиелі ауданында 66214 тонна Сыр салысы жиналды

Kyzylorda-news.kz. Сыр өңіріне жұмыс сапарымен келген ҚР Еңбек және халықты әлеуметтік қорғау министрі Серік Шәпкенов Қызылорда өңіріндегі бірнеше аудандарға барып, «Ауыл – Ел бесігі» бағдарламасы аясында іске асырылған жобаларды саралап, жұмысымен танысты.
Іссапар кезінде облыс әкімі Гүлшара Әбдіқалықова министрге даму әлеуеті жоғары ауылдық елді мекендердің әлеуметтік және инженерлік инфрақұрылымын жетілдіруді көздейтін «Ауыл – Ел бесігі» жобасы шеңберінде облыста 103 перспективалы ауыл анықталып, нәтижесінде 82 жобаны жүзеге асыру қолға алынғанын атап өтті. Бұл үшін 53 тірек ауылы мен 50 спутник елді мекендер айқындалғанын тілге тиек етті.
Алдымен министр Сырдария ауданы Тереңөзек кентіндегі бағдарлама арқылы жөндеуден өткен А.Иманов көшесіндегі күрделі жөндеу жұмыстарын бақылады. Ұзындығы 1,56 шақырымды құрайтын көшеде жаяу жүргіншілер жолы, бордюр және 3 шақырымға жететін суағар қоса салынуда. Биылғы жылдың тамыз айында басталған құрылыс жұмыстары қарашада аяқталады деп жоспарлануда.
Ауданда «Ауыл – Ел бесігі» бағдарламасы аясында қолға алынған жобаның бірі – орталық стадионға күрделі жөндеу жүргізу. Бұл нысан да жыл аяғына дейін қолданысқа беріледі. 140 орынға лайықталған алаңды жөндеу барысында 7,5 мың шаршы метрге жасанды көгал төсеу қарастырылған.
Мұнан кейін ведомство басшысы Жалағаш ауданына да барды. «Ауыл – Ел бесігі» бағдарламасы шеңберінде Таң ауылдық округіндегі атқарылған жұмыстарды бағдарлады. Биыл ауылда 11 жоба іске асуда. Соның бірі – Орынбай жырау көшесіндегі жөндеу жұмыстары.
Ұзындығы бір шақырымнан асатын даңғыл жол заманауи талаптарға сай төселген. Осы елді мекендегі №118 орта мектебінің есік-терезелері, едені толық ауыстырылған. Сыртқы қабырғасы металл сайдингпен қапталып, су, кәріз жүйелері, әжетхана мен электр желілері жаңартылған. Сондай-ақ, ауылдағы дәрігерлік амбулатория мен орталық алаңды жаңғырту, Жалағаш кентіндегі 200 орындық оқушылар үйі мен 50 орындық өнер мектебінің құрылысы жыл соңында пайдаланылуға беріледі.
Айту керек, ауданда «Таң ЛТД» ЖШС директоры Имақ Шағыртаев ауыл халқына мешіт ғимаратын жөндеу, бөбекжайды қайта жаңғырту, спорт кешенін салу, ет өндеу цехының құрылысын салу, округтегі көшелерді жарықтандыру ісін өз қаражаты есебінен жүргізіп, ауылға қомақты инвестиция салған.
Іссапары барысында министр «Ауыл-Ел бесігі» мемлекеттік бағдарламасының облыста орындалуы жөніндегі арнайы отырысқа қатысты. Жиында облыстық экономика және бюджетті жоспарлау басқармасының басшысы Нұрғали Қордабай, облыстық құрылыс, сәулет және қала құрылысы басқармасының басшысы Бердияр Пірімбетов, Жалғаш ауданы әкімі Асылбек Шәменов жоба шеңберіндегі атқарылған жұмыстарды баяндады.
Атқарылған жұмыстарды саралап, ұсыныстарды тыңдаған ведомство басшысы ауыл тұрғындарының өмір сүру жағдайын жақсартуға бағытталған жобаларды жүзеге асыру аса маңызды жауапкершілік екенін атап өтті.
<blockquote>
 Үкімет басшысының тапсырмасына сәйкес «Ауыл – Ел бесігі» бағдарламасының орындалуын көріп, туындаған мәселелер бойынша нақты ұсыныстар тыңдау үшін қасиетті Сыр еліне келіп отырмын. Жолдарды күрделі жөндеуден өткізу, дәрігерлік амбулатория мен оқушыларға арналған мектептер салу – елді-мекендердегі тұрғындардың жағдайын жақсартуға барынша мүмкіндік береді.
 Тұрғындарды жұмыспен қамту да ерекше маңызға ие. Бұл жерде бөлінген қаржыны игеріп қана қоймай, халықтың игілігіне берілетін нысандарды уақытылы, сапалы іске қосу керек. 
 Маған Қызылорда облысындағы мемлекеттік бағдарламадан бөлек, жергілікті жеке кәсіпкерлердің ауыл өмірін жақсартудағы бастамалары ұнады. Мәселен, Таң ауылында жанашыр азаматтар өз қаражатын ауылды көркейтуде жақсы тәжірибені іске асырып келеді. Бұл өте қуантарлық жағдай. Алдағы уақытта мұндай кәсіпкерлерге мемлекеттік деңгейде қолдау көрсетудің тетіктерін қарастыруды ұсынамыз. Жоспардағы жобаларды орындауда қандай мәселеге баса назар аудару керектігін зерделеп, Үкіметке тиісті ұсынымдар беретін боламын, – деді министр Серік Шәпкенов.
</blockquote>
Жиында Гүлшара Әбдіқалықова жобалардың қаржыландыру жоспары бойынша игеру мәселесін көтеріп, құрылыс жұмыстарының уақытылы әрі сапалы жүргізілуі мердігер компанияның жауапкершілігінде екенін айтып, жыл аяғына дейін бірқатар жобаларды аяқтап, халық игілігіне бағытталатынын тілге тиек етті.
Атап өту керек, бұған дейін облыс әкімі Гүлшара Әбдіқалықова тірек ауылдар желісін арттырып, туған елді көркейтуге үлес қосып жүрген кәсіпкерлерге мемлекеттік бағдарламадан бөлек ауылды дамытуды көздейтін жаңа бастамаларды қолдауға шақырды. Соның нәтижесінде өңірде өз қаражатына ауылдың инфрақұрылымын жақсартып, әлеуметтік нысандарын жаңартуға үлес қосып жүрген кәсіпкерлер қатары артты. 
Еске салайық, «Ауыл – Ел бесігі» бағдарламасы басталғалы 3 жыл ішінде облыста құны 11 миллиард теңгеден асатын 173 инвестициялық жоба жүзеге асырылды. 2019 жылы 31 жоба арқылы 54 адам жұмыспен қамтылса, 2020 жылы өңірдің 8 елді мекенінде құны 4,2 миллиард теңгені құрайтын 60 жоба іске асқан. Нәтижесінде 2019-2020 жылдары атаған бағдарлама бойынша 955 жаңа кәсіпкерлік нысаны ашылып, жұмыссыздық деңгейі 5 пайызға қысқарды.
Қызылорда облысына екі күндік жұмыс сапары барысында министр Серік Шәпкенов Қармақшы және Қазалы аудандарына барып, бірқатар нысандардың жұмысын бағдарлайды.
<img src="https://kyzylorda-news.kz/wp-content/uploads/2021/10/fb_img_1635524763822.jpg" alt="" />
<img src="https://kyzylorda-news.kz/wp-content/uploads/2021/10/fb_img_1635524758011.jpg" alt="" />
<img src="https://kyzylorda-news.kz/wp-content/uploads/2021/10/fb_img_1635524754625.jpg" alt="" />

Министр Серік Шәпкенов Сыр еліндегі кәсіпкерлердің ауыл өмірін жақсартудағы бастамаларын жоғары бағалады

<a href="https://kyzylorda-news.kz/">Kyzylorda-news.kz.</a>&nbsp;&nbsp; «Республикалық ғарыштық байланыс орталығы» АҚ басқарма төрағасының орынбасары Василий Леонов KazSat ғарыш жүйесін ары қарай дамыту жоспары туралы айтты, деп хабарлайды ҚазАқпарат.
<blockquote>
 «KazSat ғарыш жүйесін ары қарай дамытуға ерекше назар аударып отырмыз. Осы орада перспективалы ғарыштық байланысты құру бойынша әзірлемелер жалғасады. Қазіргі кезде ол KazSat 3R уақытша атауға ие болып отыр. Ол қолданыстағы KazSat 3 спутнигін алмастыру үшін арналған. Жобаға дейінгі жұмыстар бізде 2024 жылға белгіленген», – деді Василий Леонов Digital Bridge халықаралық технологиялық форумында
</blockquote>
Оның сөзіне қарағанда, бұл жүйенің нұсқасы ғарыш аппараттарын шығаратын алдыңғы қатарлы компаниялардың заманауи шешімдерін қолдануға бағдарланады.
<blockquote>
 «2024 жылға дейін өзгерістер мен трансформациялар енгізілетінін, жаңашылдықтар пайда болатынын түсінеміз. Осы ғарыш жүйесін даярлау кезінде бұл аспектілер ескеріледі. Қазір негізгі бағдарлар спутниктік телеарнаны трендтік дамытуға жүріп жатыр», – деді Василий Леонов.
</blockquote>
Бұрын хабарланғандай, елордада үшінші рет Digital Bridge халықаралық технологиялық форумы 28-29 қазан аралығында&nbsp;<a href="https://www.inform.kz/kz/elordada-digital-bridge-halykaralyk-tehnologiyalyk-forumy-otedi_a3853619">өтіп жатыр.</a>
Биылғы форумның тақырыбы – Digital Era Lifestyle. ҚР Цифрлық даму, инновациялар және аэроғарыш өнеркәсібі министрі Бағдат Мусин «Цифрландыру, инновация және ғылым арқылы технологиялық серпіліс» ұлттық жобасын ұсынды.

KazSat ғарыш жүйесінің жаңа буыны қандай болады?

<a href="https://kyzylorda-news.kz/">Kyzylorda-news.kz.</a>&nbsp;&nbsp; Шиелі ауданына қарасты Нартай Бекежанов ауылдық округінің тұрғындарына көгілдір отын берілді.
Аудан әкімі Нариман Мақұлбеков Керделі ауылының тұрғындарын тарихи күнімен құттықтап, газ құбырын салтанатты түрде ашты.
Қазіргі таңда, Шиелі кенті мен Байтерек, Жаңатұрмыс, Бидайкөл ауылдық округтері көгілдір отынға қосылса, бүгіннен бастап Нартай Бекжанов ауылының тұрғындары көгілдір отынның игілігін көріп, 540 үйге газ кіреді. Желтоқсан айына дейін Қодаманов ауылын «Ауыл – ел бесігі» бағдарламасы аясында газбен қамтамасыз етіп, 525 үй от жағу бейнетінен құтылатын болады. Жыл аяғына дейін жерлестеріміздің 65 пайызы көгілдір отынның жемісін көреді.
Бүгінде ауданға қарасты елді-мекендердің әлеуметтік-экономикалық және инженерлік инфрақұрылымын дамытуда ауқымды жобалар жүзеге асырылуда. Жыл сайын, халықтың сұранысын қанағаттандыру мақсатында, аудан тұрғындарының жайлы тұрмыс кешуіне ең қажетті ауыз су, газ тарту, жол салу секілді мәселелер кезең-кезеңімен шешімін табуда. Ірі стратегиялық маңызы бар Бейнеу-Бозой-Шымкент магистралды газ құбыры Сыр еліне, оның ішінде ауданымызға сәтті жоба болды. Соңғы жылдары ауданға қарасты елді мекендерді көгілдір отынмен қамтамасыз ету жұмыстары жүзеге асып келеді. Аудан орталығына жақын елді мекендерді көгілдір отынмен қамтамасыз етсек, мұның тиімділігі де орасан зор. Бұл дегеніңіз, халықтың тұрмыс жағдайы ғана емес, аудандағы өндірістің өрге басуының, кәсіптің одан әрі кең қанат жаюының кепілі болмақ.
<blockquote>
 «Бұған дейін жыл сайынғы есепті кездесуде ауыл халқының көтеріп жүрген ең өзекті мәселесі ауылға көгілдір отын тарту болатын. Бүгінгі қуанышты жаңалығымыздың бірі – Керделі ауылдық округінің тұрғындары көгілдір отынға қол жеткізіп отыр. Бұл жобаға өңірлерді дамытудың 2025 жылға дейінгі бағдарламасы аясында құны 374,6 млн.теңге қаражат қаралып, жоспар бойынша 540 үй табиғи газға қосылады. Құрылыс жұмыстарын жүргізген бас мердігер компания «Транс Азия Констракшн» мекемесіне және құрылысшыларға барша ауыл тұрғындарының атынан және Өз атымнан алғысымды айтамын», – деді аудан басшысы.
</blockquote>
Сонымен қатар, облыс әкімінің қолдауымен жол картасы бағдарламасы аясында Ақмая және Алғабас ауылдық округтеріне газ құбырын жүргізіп бастау үшін 745 млн.теңге қаржы бөлініп, жақын арада құрылыс жұмыстары басталатын болады. Мұнан бөлек Бестам, Ақтоған, Жиделіарық, Еңбекші Алмалы, Телкөл елдімекендерін газдандыруға ЖСҚ әзірленіп, 4 елді мекеннің мемлекеттік сараптама қорытындылары алынса, 2 елді мекеннің құжаттары сараптамаға тапсырылды.
Сөз соңында аудан басшысы Нариман Мақұлбеков Мемлекеттік бағдарламалар аясында алдағы уақытта да ауданымызда мұндай игілікті істер өз жалғасын табатынын айтты.
<img src="https://kyzylorda-news.kz/wp-content/uploads/2021/10/248559587_1183200978877026_7663999175676394688_n.jpg" alt="" />
<img src="https://kyzylorda-news.kz/wp-content/uploads/2021/10/248704882_1183200932210364_3434964283453153114_n.jpg" alt="" />

Қызылордада тағы бір ауыл табиғи газға қосылды

<a href="https://kyzylorda-news.kz/">Kyzylorda-news.kz.</a>&nbsp;&nbsp; Облыс әкімі Гүлшара Әбдіқалықова «КазМұнайГаз» акционерлік қоғамы Басқарма төрағасының орынбасары Жақып Марабаевты қабылдады. Басқосуда Сыр өңірінің даму бағытында бірлесіп атқарылатын жұмыстар сараланды.
Облыс әкімі мұнай компаниясының өңір экономикасын дамытудағы орны ерекше екенін атап өтті.
<blockquote>
 – Өздеріңізге белгілі, мұнай компаниялары өңір дамуының локомотиві болып табылады. Биыл өңірде 4,2 млн. тонна мұнай өндірілетін болса, оның ең жоғарғы үлесі – 35,2 пайызы «КазГерМұнай» біріккен кәсіпорны» серіктестігіне тиесілі. Компания – елімізде алғашқылардың бірі болып кеніштерді игеруге, сол арқылы еңбек өнімділігін арттыруға, шығындарды азайтуға мүмкіндік беретін ақылды технологияларды енгізді. Сонымен қатар, аймақты көгілдір отынмен қамтамасыз етіп отырған бірден-бір кәсіпорын, – деді Гүлшара Әбдіқалықова.
</blockquote>
Сонымен қатар жиында Жақып Марабаев «КазГерМұнай» біріккен кәсіпорны» серіктестігінің Бас директорының орынбасары Мұрат Мұстафаев жаңа қызметке ауысуына байланысты жаңа қызметкер Нұржан Әбдірахмановты таныстырды.
Облыс әкімі Гүлшара Әбдіқалықова Мұрат Мұстафаевтың өңірімізде жемісті еңбек еткеніне алғысын білдіріп, Нұржан Әбдірахмановтың жаңа қызметіне табыс тіледі.

Аймақ басшысы «КазМұнайГаз» акционерлік қоғамы Басқарма төрағасының орынбасарын қабылдады

<a href="https://kyzylorda-news.kz/ru/obshestvo/">Kyzylorda-news.kz</a>. Биыл Шиелі ауданы бойынша 30 189,5 мың гектар жерге ауыл шаруашылығы дақылдары орналастырылды. Күрiштің көлемі 12039 гектарды құрады. Сондай-ақ, су тапшылығына байланысты негізгі дақыл күріш көлемі өткен жылмен салыстырғанда 2 314 гектарға дейін азайтылып, орнына суды аз қажет ететін көкөніс, бақша дақылдары егілді. Олардың көлемі өткен жылмен салыстырғанда 222,2 гектарға дейін артқан.
Күзгі егін жинау науқаны оңтайлы мерзімінде атқарылуда. Қазіргі таңда, ауданда күріштен басқа дәндік дақылдарды (күздік бидай, жаздық бидай, арпа, дән жүгері) және майлы дақылдардан мақсары мен сояны, картоп, көкөніс, бақша, дақылдарын жинау жұмыстары толығымен аяқталды. 8 915 гектар жерге егілген жоңышқадан 52 499 тонна ескі жоңышқа, 3 467 тонна жаңа жоңышқа өнім жиналды.
Аймақта күрішке орақ салу жұмыстары 27 тамызда басталды. Бүгінгі күні күріштің 11 931 гектарына (99,1%), орақ салынып, оның 11 321 гектары (94,0%) бастырылды. Әр гектарынан орташа 50-55 центнерден өнім алынуда.
Көктемгі егін егу жұмыс барысында жалпы 30 246 гектарға межеленген болатын.
Су тапшылығына байланысты 57 гектарға қысқартылды. Яғни 30 189,5 гектарға ауыл шаруашылығы дақылдары орналастырылды. Су тапшылығына байланысты суды көп қажет ететін дақылдардың көлемін азайтып, әртараптандыру бағытында дақыл көлемі ұлғайтылды. Жуантөбе ауылдық округіне қарасты «Жер-Жомарт Д» ЖШС-і, Жиделі ауылдық округіне қарасты «Апбасов» шаруа қожалықтары су тапшылығының аз болуына қарамастан жоғары өнімге қол жеткізіп отыр. Сонымен қатар, Бәйтерек, Ақмая, Керделі, Иіркөл, Тұран, Жаңатұрмыс ауылдық округтерінде өнім көрсеткіші жақсы болды.

Шиелі ауданында су тапшылығына байланысты күріш аз егілді

<a href="https://kyzylorda-news.kz/ru/obshestvo/">Kyzylorda-news.kz</a>. Облыс әкімінің орынбасары Б. Жаханов жұмыс сапарымен Арал ауданында болып, өңірдегі балық өңдеу мен түйе сүтінен құрғақ ұнтақ шығару жобасы бойынша салынған нысандарды аралап, жағдайымен танысты.
Алдымен «Қазақстан Аквакультура ЛТД» ЖШС-нің «Балықты тереңнен өңдеу және пластик қайық дайындау» цехына барып, жұмыс барысын көрді. Аталған цехта балықтар «Евростандарт» бойынша мақұлданған технологиямен өңделіп, ішкі нарыққа және ТМД елдеріне жөнелтіледі. Қазіргі таңда аталған зауыт аумағынан балық қалдықтарынан ұн шығару және пластик қайық дайындау цехының құрылысы аяқталған. Ұн шығаруға арналған цехқа қажетті құрылғылар да жеткізілген.
Мұнан кейін Арал қаласындағы индустриялық аймақта орналасқан «QAZAQ CAMEL» ЖШС -нің «Түйе сүтінен құрғақ ұнтақ дайындау» зауытында болды. Жоба бойынша екі ғимарат құрылысы – сүт қабылдап, жинау және құрғақ ұнтақ дайындау ғимараттарын салу жоспарланған. Қазіргі таңда сүт жинақтау ғимаратының құрылысы аяқталған. Құрғақ ұнтақтар шығару құралғыларының ғимараты бойынша жоба сметалық құжаттары дайындалуда.
Облыс әкімінің орынбасары ауданға жасаған сапары барысында Сырдария өзенінен келіп жатқан суды белгілі деңгейде ұстап, балықтың өсуі мен мал азығын дайындауға жағдай жасау үшін сол маңдағы көлдерге, шабындықтарға, каналдар арқылы су жіберілуін реттеп тұрған «Ақ лақ» су тоспасына және «Көкарал» бөгетіне барып, қазіргі жағдайымен таныс болды.
<img src="https://kyzylorda-news.kz/wp-content/uploads/2021/10/246420788_3100841766910855_322769753497552257_n.jpg" alt="" />
<img src="https://kyzylorda-news.kz/wp-content/uploads/2021/10/245870158_3100842050244160_8225534495276980094_n.jpg" alt="" />

Аралда балық қалдықтарынан ұн шығарылмақ

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысы кәсіпкерлер палатасының мамандары бизнес өкілдеріне 9 айда 1320 экспорттық, 85 СТ-КЗ, 11 индустриалды сертификат берді. Кәсіпкерлерге берілетін сертификаттың түрлері, ерекшеліктері туралы сұрақтарымызға Палата сарапшысы Айман Шаймаханқызы Сәдуова жауап берді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Айман Шаймаханқызы, сәлеметсіз бе. Кәсіпкерлер палатасымен кәсіпкерлерге қандай сертификаттар беріледі? Бір-бірінен айырмашылығы қандай?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Сәлеметсіз бе. Кәсіпкерлер палатасымен бизнеспен айналысатын азаматтарға сертификаттың үш түрі беріледі. Олар индустриалды сертификат, СТ-KZ және экспорттық сертификат.&nbsp; Индустриалды сертификаттың өзге сертификаттардан айырмашылығы – отандық қызмет, жұмыс және тауар өндірушілерге беріледі. Бұл құжатты рәсімдеу үшін кәсіпкер техникалық және технологиялық базасы, тауар, қызмет, жұмыс өндіруге қатысты нормативті құжаттары мен салаға қатысты мамандары бар екенін дәлелдеуі қажет.&nbsp; СТ-KZ сертификаты қазақстандық тауар өндірушіге беріледі, және қазақстандық үлестің пайызын көрсетеді және тауардың шығу тегін айқындайды. Ал экспорттық сертификат халықаралық экономикалық қарым-қатынас үшін, тауардың шыққан елін анықтау мақсатында, Қазақстан мен экспортқа шығарылатын елдердің арасында жасалған келісім-шарттар негізінде рәсімделеді.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Айман Шаймаханқызы, осы құжаттардың ішінде индустриалды сертификатқа тоқталып өтіңізші. Сертификатты алу үшін талаптары қандай?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Индустриалды сертификат – бұл ерікті түрде жасалатын сертификация. Өтініш берушінің техникалық, технологиялық, ресурстық мүмкіндіктері бар екенін көрсетеді, тауар, қызмет және жұмыс өндіруге шамасы жететіндігін айғақтайды, өтінімде көрсетілген өнімдер ауқымын өндіруге қауқары жететінін дәлелдейді. Кәсіпкерлер индустриалды сертификатты алу үшін 2 кезеңнен өтуі қажет. Бірінші кезеңде салалық қауымдастықпен ұсынылған сарапшы кәсіпорын тапсырған құжаттар топтамасын қарап шығады, кейін өндірістің базасына барып, талдау жүргізеді де берілген мәліметтерге сәйкестігін салыстырады. Сарапшы өндірісте болып, мәлімделген тауар, жұмыс, қызмет номенклатурасын шығаруға мүмкіндікті бағалап, тиісті біліктіліктегі қызметкерлер санын, өндірістік жабдық, өндіріс технологиясын тексереді. Талдау нәтижесі бойынша тауар, жұмыс, қызметті өндіру мүмкіндігін және мәлімденген өндірістік қуаттылық туралы сараптамалық қорытынды береді (сарапшылар тізімі Ұлттық палатаның сайтында қолжетімді). Екінші кезеңде кәсіпкер электрондық құжаттар алмасудың біріңғай жүйесіне тіркеліп (қазақстандық электрондық құжаттар алмасу орталығы DOC24), содан соң өңірлік кәсіпкерлер палатасына салалық сарапшының шығарған қорытындысымен қатар құжаттар пакетін қосып, өтініш ұсынады. Өңірлік кәсіпкерлер палатасы жергілікті атқарушы органның және аймақтық кеңес мүшесінің қатысуымен өндіріске тексеру жүргізеді. Кәсіпкердің өндірістік мүмкіндіктері дәлелденген кезде сертификат рәсімделеді. Аталмыш сертификат кәсіпкерге 3 жыл мерзіміне электронды түрде QR белгісімен тегін беріледі. Құжаты бар кәсіпорын автоматты түрде отандық тауар, жұмыс және қызмет өндірушілердің тізіміне енгізіледі.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Индустриалды сертификат 3 жылға беріледі дедіңіз. Үш жылға дейін кәсіпкер осы құжатпен жүре бере ме, әлде өзге де талаптар бар ма? Сондай-ақ сертификат қандай жағдайда кері қайтарылады?
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Сертификат 3 жылға беріледі. Дегенмен 12 ай өткеннен кейін кәсіпкер көрсетіп отырған жұмыс, қызметі мен шығарып жатқан тауар түрлерінде, технологиялық құрал-жабдықтарында қандай да бір өзгерістер болмаса, жалпы бастапқы ұсынған түріне өзгерістер енгізілмеген жағдайда сол сертификатты келесі жылға актуализация жасайды. Ал сертификатты алғаннан кейін кәсіпорнын ұлғайтып немесе мамандар санын арттырған болса, технологиялық, техникалық өзгерістер жасап, жаңадан құрал-жабдықтар алған болса қосымша өзгерістер енгізуге өтініш береді. Индустриалды сертификат бірнеше жағдайда кері алып қойылуы мүмкін. Бұл Индустриалды сертификат Қағидасының 13 бөлімінде көрсетілген: кәсіпкер өз қызметін тоқтатып ликвидация болған жағдайда, қағиданың 5-ші бөліміндегі шарттар орындалмаса, верификация кезінде көрсететін қызметін, жұмысын, өнімін шығара алатындығын дәлелдей алмаса, 3-ші жағдайды есептемегенде, өтінім беруші ерікті түрде қайтарып алса, &nbsp;верификация комиссиясын технологиялық базаны тексеруге өтінім иесі рұқсат етпесе. Осындай жағдайларда, өтінім беруші арнайы тізілімге өтіп кетуі мүмкін. Бұл кезде кәсіпкер 24 айға дейін индустриалды сертификат алуға қайта өтініш бере алмайды.&nbsp; Жалпы сертификат алуға қатысты бизнес өкілдерінен сұрақтар туындаған жағдайда кеңес беруге әзірміз. Байланыс нөміріміз 8/7242/ 40-09-81.
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – Айман Шаймаханқызы, сұхбатыңызға рақмет. Жақсы, сау болыңыз.

Қызылордалық кәсіпкерлер 9 айда 1320 экспорттық сертификат алды

<a href="https://kyzylorda-news.kz/ru/obshestvo/">Kyzylorda-news.kz</a>. Облыс әкімінің орынбасары Бахыт Жаханов жұмыс сапарымен Қазалы ауданына барды. Басты мақсат – жеке кәсіпкер Төребек Игіліковтың балық ұнын шығаратын цехтың жұмысымен танысу.
Қазіргі таңда жеке кәсіпкер балық қалдықтарынан ұн және жем дайындайтын украиналық замануи техниканы сатып алған. Бұл құрылғы «Еуро 4» стандарты бойынша ұн және жем шығарады. Төребек Игіліков жобаны іске асыру үшін «Қарапайым заттар экономикасы» бағдарламасы шеңберінде 20 млн теңге және өз қаражаты есебінен 10 млн теңге қаржы жұмсаған. Цех үшін Әйтеке би кентіндегі«Өндірістік аймақтан» арнайы ғимаратты да дайындаған. Төребек Игіліковтың айтуынша, Қазалы ауданы үшін жаңа кәсіптің түрін бастап кету үшін көгілдір отын аса қажет.
Аудан әкімінің орынбасары Күнтілес Назымбеков Әйтеке би кентіндегі «Өндірістік аймаққа» көгілдір отын жеткізу үшін жоба әзірленгенін, оның іске асуы үшін 25 млн теңге қажет екендігін жеткізді.
Облыс әкімінің орынбасары Бахыт Жаханов жеке кәсіпкер Төребек Игіліковтың жаңа жобасын іске асыру үшін «Өндірістік аймаққа» табиғи газ жеткізу жолдары қарастырылатынын жеткізді.
<img src="https://kyzylorda-news.kz/wp-content/uploads/2021/10/246362346_3182852211935704_1898748531044086810_n.jpg" alt="" />

Бахыт Жаханов Қазалы ауданына жұмыс сапарымен барды

<a href="https://kyzylorda-news.kz/ru/obshestvo/">Kyzylorda-news.kz</a>. Бизнестің қарқынды даму үдерісіне мемлекеттік және өңірлік бағдарламалардың үлесі зор. Мәселен, ағымдағы жылдың қаңтар-қыркүйек аралығында Қызылорда облысында жалпы 23,8 млрд. теңгеге 1 975 жоба қаржыландырылды.
Атап айтқанда, “Бизнестің жол картасы” аясында 1360 жобаға 20,8 млрд. теңге, “Еңбек” бағдарламасы бойынша 450 жобаға 1,9 млрд.теңге, “Өңірлік инвестициялық орталық” тарапынан 165 жоба бойынша 1,15 млрд.теңге бөлінді.
Несие портфелі өткен жылмен салыстырғанда 6 есеге ұлғайды. Оған мемлекеттік бағдарламалары аясында несиелердің сыйақы мөлшерлемесінің төмендеуі, мемлекеттік кепілдіктер лимиттерінің ұлғаюы және кредит беру саласының кеңеюі себеп болды.
Бұдан бөлек, жергілікті тауар өндірушілерді қаржыландыру үшін ағымдағы жылы 2 пайыздық несиелеу бағдарламасы іске қосылды.
Осы мақсатта облыстық бюджеттен “Қызылорда” Өңірлік инвестициялық орталығына 400 млн. теңге тартылды. Қазірдің өзінде бөлінген қаражат шеңберінде тауар өндірушілердің 14 жобасы үшін 348 млн. теңге мақұлданды.
Айта кету қажет, келер жылға 2 пайызбен несиелеу бағдарламасына 500 млн. теңге қаралды. Қажет болған жағдайда, бөлінген қаражат көлемін ұлғайту мүмкіндігі бар.
Бұдан бөлек, ісін жаңа бастаған кәсіпкерлердің және кәсіпкер болуға әлеуетті жұмыссыз азаматтардың кәсіпкерлік бастамаларын қаржыландыру шаралары жалғасуда.
Биылғы жылы мемлекеттік бағдарламалары шеңберінде жалпы көлемі 1,7 млрд. теңгеге 2 592 жоба өтеусіз гранттармен қамтамасыз етілді.

Қызылордада шағын және орта бизнесті дамыту бағытында 1 975 жоба қаржыландырылды

Kyzylorda-news.kz. Қызылорда облысында «Atameken Qyzylorda» микроқаржы ұйымы арқылы жалпы құны 8,2 млн теңгеге алғашқы екі жоба қаржыландырылды. Жобасы қаржыландырылған кәсіпкерлердің бірі Қызылорда қаласының, екіншісі – Сырдария ауданының тұрғыны.
Тоғжан Қалдыбай Сырдария ауданына қарасты Іңкәрдария ауылының тұрғыны. 26 жастағы келіншек отбасылы, жолдасымен екі бала тәрбиелеп отыр. Бала күтімінде отырған ол отбасымен ақылдаса келе кәсіп бастауға бел буады.
<blockquote>
 «Ауылда тұрғандықтан үйде мал ұстаймыз. Оның күтімі бізге жақсы таныс. Отбасы мүшелері ата-енем, жолдасыммен ақылдаса келе мал бордақылаумен айналысайық деп шештік. Ол үшін осы жазда «Бастау Бизнес» жобасын онлайн оқып, сертификат алдым», – дейді Тоғжан Қалдыбай.
</blockquote>
Жас кәсіпкер Қызылорда облысы кәсіпкерлер палатасының Сырдария аудандық филиалы мамандары арқылы мемлекеттік бағдарлама талаптарымен танысып, «Atameken Qyzylorda» микроқаржы ұйымынан жылдық 6 пайызбен несие алуға болатыны жөнінде ақпарат алды.
<blockquote>
 «Тамыздан бастап құжаттар жинақтай бастадым. Қажетті құжаттарды дайындауда аудандық филиал кеңесшісі көп көмектесті. Түсінбеген сұрақтардың барлығына жауап беріп, қаржыландыру алғанға дейін жобаға сүйемелдеу көрсетті.&nbsp; «Atameken Qyzylorda» микроқаржы ұйымынан алғашқылардың бірі болып қаржы алып жатыр екенмін. Қуаныштымын. Енді бұл қаржатқа жылқы алып, оны бордақылаймыз», – деді келісімшартқа қол қойып тұрған Тоғжан Қалдыбай.
</blockquote>
Тоғжанмен бірге алғашқылардың бірі болып жеңілдікпен несие алған келесі азамат Қызылорда қаласының тұрғыны Нұрлан Ахтаев. Ол микроқаржы ұйымынан алған несиеге жүк тасымалына арналған машина сатып алмақ. Көлік кәсіпкерге пластик терезелерге арналған цехының жұмысын кедергісіз жүргізу үшін қажет екен.
<blockquote>
 «Ұйым осы жылдың маусымында ашылды. Жалпы биыл «Atameken Qyzylorda» микроқаржы ұйымы арқылы 238 жобаға қаржы бөлінеді деп жоспарлап отырмыз. Қазір 11 жоба мақұлданып, оның екеуіне несие берілді. Мамандарымыз түгел, жұмыс жолға қойылды», – дейді ұйым директоры Имат Қуанышев.
</blockquote>
Айта кетейік, «Atameken Qyzylorda» микроқаржы ұйымы Қызылорда қаласы, Қорқыт ата көшесі 123, «Бизнеске арналған үкімет» ғимаратының 3-қабаты, 316-кабинетінде орналасқан. 
Несиелендіруге қатысты барлық сауалдар бойынша 8 /7242/ 40-09-81, (ішкі нөмірі 4330) байланыс нөмірі арқылы хабарласуға болады.

«Atameken Qyzylorda» микроқаржы ұйымы арқылы алғашқы екі жоба қаржыландырылды  

Kyzylorda-news.kz. Индустрияландыру бағдарламасы аясында облыста құны 543 млрд. теңгені құрайтын 46 жоба жүзеге асырылуда. 7 мыңнан аса жұмыс орны құрылатын болады. Былтыр 5 жоба іске қосылды. 10 жоба құрылыс индустриясы саласына бағытталған. Бұл туралы бүгін Өңірлік коммуникациялар қызметінің ақпарат алаңында өткен баспасөз конференциясында облыстық индустриялық-инновациялық даму басқармасының басшысы Ринат Сұлтангереев мәлімдеді.
<blockquote>
 «Ірі стратегиялық жобамыздың бірі – шыны зауыты. Құрылысы биыл аяқталады. Кәсіпорынның аясында бірнеше ілеспе кәсіпорындар құру бойынша жұмыстар басталды. Қазір 2 ілеспе жоба – шыны талшықтары мен композиттік материалдар және айна өндірісі бойынша жобалау жұмыстары жүргізілуде. Құрылыс индустриясы саласында алдағы уақытта керамзит, арматура, 2 асфальтбетон шығаратын зауыттары ашылып, құрғақ құрылыс қоспаларын өндіретін цех кеңейтілетін болады», – деді басқарма басшысы.
</blockquote>
Өңірдің ерекшелігіне сәйкес 46 жобаның ішінде агроөнеркәсіп саласындағы жобалардың 26-ның үлесі басым. Оның ішінде, 3 жоба былтырғы жылы іске қосылды. Олар Арал ауданында екі балық өңдеу цехы, Жалағаш ауданында тыңайтқыштар шығаратын «Агрохим Сервис» серіктестігі. Биыл осы салада тағы 2 жоба іске қосылмақ. Біреуі – бағдарламаның белсенді қатысушысы – «Аралтұз» акционерлік қоғамының қуаттылығы жылына 180 мың тонналық ІІІ испан цехы. Қазір ас тұзының сынамалық өнімін шығаруда. Екіншісі – Сырдария ауданындағы «Ақжарма-1» қожалығының қуаттылығы жылына 630 тонналық күріш өңдеу зауыты. Сонымен қатар, ет және сүт өнімдерін өндіруге бағытталған инвестициялық жобалар да бар. Оның ішінде, құс етін өндіруге бағытталған 4 жоба бар, оның екеуі – келер жылы іске қосылатын болады. Сүт өндіруге бағытталған 4 жоба бар. Оның ішінде, «РЗА» акционерлік қоғамының, «Сыр агро и К» серіктестігі тауарлы-сүт фермасын кеңейту және ашу жұмыстарын жүргізуде. Бие сүтін өңдейтін 2 жобада іске қосылмақ
«Қызылорда AGROPlus» серіктестігі томат пастасының өндіретін жобасына – жаңа инвестор «Orbis-Agro» компаниясын тартты. 
Сондай-ақ, Арал ауданында жаңа өнім түрін шығаратын түйе сүтінен құрғақ ұнтақ цехы келер жылы іске қосылмақ. Ал, Шиелі ауданында іске асырылуы жоспарланған бақша дақылдарын өңдеп түрлі өнімдер шығаратын және жоңышқаны 10 мың гектарға жаңбырлатып суару әдісімен өсіріп, пресстеу жобалары бар.
Басқарма басшысының айтуынша, мемлекеттік қолдау шарасы ретінде 42 жоба жер телімдерін алды, 2 жоба инвестициялық жеңілдіктерге қол жеткізді, 6 жобаға жер қойнауын пайдалану құқығы берілді, 6 жобаға инженерлік инфрақұрылым тарту көмектері көрсетілуде.

Қазақстан және Қызылорда облысының жаңалықтары: Экономика