<a href="https://kyzylorda-news.kz/">Kyzylorda-news.kz.</a> Қызылордадағы құрылыстың қарқынын қазір ел-жұрт жақсы біледі. &nbsp;Мемлекеттік тұрғын үйлерден бөлек, жеке мақсаттағы құрылыстардан көз сүрінеді. &nbsp;Құрылыс саласында жұмыс істеп, бірнеше зәулім ғимараттардың салынуына түрткі болған қызылордалық Жасұлан Абилов 2019 жылдан бастап сұйық травертин өндірісімен айналысуда. Ал 2021 жылы цехтың жұмысын кеңейту мақсатында «Микробизнес Қызылорда» өңірлік инвестициялық орталығы» арқылы 2 пайыздық несиелендіру бойынша 10 млн теңге қаражат алды. Бұл туралы облыстық кәсіпкерлік және өнеркәсіп басқармасы хабарлады.&nbsp;<blockquote>«Қазіргі уақытта жылу панелін көп шығарып жатырмыз. Осыған сұраныс өте көп. Жеке сектордың тапсырыстарын жиі орындаймыз. Өйткені қазір барлығы десек те болады, үйдің сыртын осы жылу панелімен қаптайды. Бағасы қалтаға қонымды әрі үй де жылы болады. Содан соң сұйық травертин шығарамыз. Мұны өндіру технологиясын Қырғызстаннан үйреніп келдік. Жаз мезгілінде жұмыс өте қауырт болады. Алған несиенің қаражатына пескоблок, полистиролбетон шығаратын жабдықтарын Ресей мемлекетінен алдырттым», – деді Жасұлан Абилов.</blockquote>«Абилов» ЖК құрылыс жабдықтарымен облыс көлемін қамтып отыр. Сұранысқа орай тұтынушыларға дер кезінде жеткізіліп тұрады.Бұл өндіріс орнында сұйық травертиннің көмегімен текстураның түр түрі дайындалады. Нәтижесінде салынып жатқан нысанның интерьеріне, сыртқы көрінісіне әдемілік береді. Көптің талабын ескере отырып, сапалы өнім шығаруда мамандардың біліктіліктері де жоғары болғаны ләзім. Осы бағытта кәсіпкер мамандарды Қырғызстан еліне және Алматы қаласына тәжірибе жинақтауға жіберетінін жеткізді.Кәсіпкер шикізатты жергілікті өндірушілерден де, көрші аймақтардан да сатып алады. Мысалы, Цемент Шиеліден, көбіктен және құрылыс материалдарын өндіруге қажетті химиялық компоненттерді – Алматы мен Шымкенттен сатып алады.Құрылыс маусымының ортасында кәсіпорында шамамен 15 адам жұмыс істейді. Қысқы кезеңде жұмыс, әдетте, тоқтатылады, тек бірнеше адам шағын тапсырыстарды орындайды. Өндіріс процесі автоматтандырылған. Мұнда тапсырыс берушінің қажеттіліктері мен тілектеріне негізделген құрылыс материалдары мен панельдік декор шығарылады.Өндіріс қуаты артып келеді. Мұнда күніне 50 шелек сұйық травертин (сәндік сылақ), бір мың құм блоктары, 50 шаршы метрге дейін төсеніштер, жылу панельдері, күніне 500 кірпіш шығарылады.<img src="https://knadmin.beoblood.kz/uploads/315088755_1306421563452371_4480538986797035345_n_1ea428cf9b.jpg" alt="315088755_1306421563452371_4480538986797035345_n.jpg"><img src="https://knadmin.beoblood.kz/uploads/314901093_1306421576785703_1606024363814455061_n_cb97a919c5.jpg" alt="314901093_1306421576785703_1606024363814455061_n.jpg">

«Микробизнес Қызылорда»: Қызылордада сұйық травертин сұраныста

<a href="https://kyzylorda-news.kz/">Kyzylorda-news.kz.</a>&nbsp; Тұңғыш рет Арал ауданында «Арал Инвест» форумы өтті. Оған еліміздің бірқатар облыстары мен аудандардан делегаттар келіп қатысты. Шараның басты мақсаты - кәсіпкерлік аясын кеңейту, туризм саласын дамыту және инвестиция тарту көлемін арттыру.Маңыздылығы мол жиынға аудан әкімі Серік Сермағамбетов қатысып, ауданда атқарылып жатырған жұмыстар мен алдағы жоспарлар туралы айтып өтті.<blockquote>«Соңғы бес жылда ауданда тіркелген шағын орта кәсіпкерлік субъектілерінің саны 2368 бірлікке, яғни 1,7 есеге өскен. Бұған қоса сауда саласы бойынша да жыл басынан бері бөлшек сауданың көлемі 6,3 млрд. теңгеге, көтерме сауда 13 млрд. теңгеге жетті.Ауданда индустрия инновациялық даму мемлекетік бағдарламасының ІІІ-бесжылдығы аясында 9 жоба енгізіліп, оның 2-і іске асты. Қазіргі таңда жалпы құны 160 млрд.теңгені құрайтын, іске қосылғанда 1352 адамды жұмыспен қамтитын 7 жоба жүзеге асырылуда. Бұдан бөлек, биылдың өзінде біріңғай индустрияландыру картасына қосымша жалпы құны 5 млрд 674 млн. теңге болатын, 5 жоба енгізу мақсатында тиісті жұмыстар жүргізілуде. Нысандар іске қосылғанда 500-ге жуық жергілікті азамат жұмыспен қамтылатын болады.Бүгінгі күні, мемлекеттік бағдарламалар аясында ауданымызға инвестор боламыз деген азаматтарға жер телімдерін алу, тиісті инфрақұрылымдар жеткізу, салалық сүйемелдеу жұмыстары және басқа да қолдау шаралары қарастырылған. Жуырда ауданымызда «Кәсіпкерлер үйін» ашып, таңдау еркіндігі болу үшін «КМФ» шағын қаржы ұйымы мен «Банк Центр Кредит» несие ұйымдарын ауданымызға шақырдық. Бұл өз кезегінде кәсіпкерлеріміз үшін барлық қолайлы жағдай жасау мақсатында қабылданған шаралардың бір бөлігі ғана.Құрметті жиынға қатысушылар, шарамызға инвесторлар мен көршілес облыстардағы әріпестеріміз де келіп қатысуда. Сондықтан да форум жұмысы өз нәтижесін беріп, сіздердің жаңа идеяларыңыз, жобаларыңыз бен бастамаларыңыз өңіріміздің дамуына өз септігін тигізеді деген сенімдемін»,- деп аудан әкімі С. Сермағамбетов форум жұмысына сәттілік тіледі.</blockquote>Мұнан соң жиынға қатысушылар кәсіпкерлік саласын өрістету мен инвестиция көлемін ұлғайту бойынша пікірлерін білдірді. Түрлі сала өкілдері мен тиісті мамандар, кәсіпкерлер Арал ауданына инвестияция тарту және инвесторларға жасалатын қолдаулар туралы баяндамалар жасады.Арал ауданында алғаш рет өткізілген Инвест форум аясында бес жақты меморондум жасалды. Арал ауданы әкімдігінің бастамасымен «Арал Полимер» ЖШС-нің «Қап шығару жобасы» бойынша инфрақұрылым тарту мен өндірілген өнімді өткізу бойынша «Арал СДО» ЖШС, «Арал Тұз» АҚ, «Арал Кварц» ЖШС-келісімге қол қойды.Сондай-ақ осы басқосуда Арал ауданы әкімдігі мен «ЮгГазПроект» ЖШС арасында да меморондум болды. Құжаттың мақсаты ауданда орналасқан елді-мекендерді газдандыру бойынша жоба сметалық құжаттарын аталған демеушілердің көмегімен әзірлеу.Шарада аудан экономикасын дамыту мен кәсіпкерлік саласының өркендеуіне үлес қосып үздік болып танылған бір топ азаматқа аудан әкімі құрмет көрсетіп, алғыс хатпен марапаттады.<img src="https://knadmin.beoblood.kz/uploads/314960713_3410564475938581_2513874408164899235_n_4e840412ba.jpg" alt="314960713_3410564475938581_2513874408164899235_n.jpg"><img src="https://knadmin.beoblood.kz/uploads/315016185_3410564815938547_5472952009914623902_n_4422b0bfa2.jpg" alt="315016185_3410564815938547_5472952009914623902_n.jpg"><img src="https://knadmin.beoblood.kz/uploads/315188843_3410568875938141_4872806160624083726_n_66f255eb78.jpg" alt="315188843_3410568875938141_4872806160624083726_n.jpg"><img src="https://knadmin.beoblood.kz/uploads/314498500_3410565902605105_962898204837178200_n_63bed7340f.jpg" alt="314498500_3410565902605105_962898204837178200_n.jpg"><img src="https://knadmin.beoblood.kz/uploads/315090946_3410565329271829_5545911239469082933_n_0a951cc2cc.jpg" alt="315090946_3410565329271829_5545911239469082933_n.jpg"><img src="https://knadmin.beoblood.kz/uploads/314398778_3410566785938350_9095833263266785345_n_a9d9c31747.jpg" alt="314398778_3410566785938350_9095833263266785345_n.jpg">

Арал ауданында «Арал Инвест» форумы өтті

<a href="https://kyzylorda-news.kz/">Kyzylorda-news.kz.</a> Соңғы жылдары Шиелі ауданында кәсіп ашып, ауданның әлеуметтік-экономикалық әлеуетінің дамуына үлес қосамын деген тұрғындар қатары артқан. Әрине, жұмыс істеймін деп талпынған жанға кәсіптің аз емес екені белгілі. Әсіресе табиғаты тамылжыған Шиелі ауданында ауыл шаруашылығы саласында мүмкіндік аз емес. Халыққа қызмет көрсету саласында да сұраныс жетіп артылады. Тек қана «Адал еңбегіммен ырыздығымды молайтамын» деген ниет пен ынта болса жеткілікті. Осы орайда мемлекет тарапынан зор қолдау барында айта кету керек.&nbsp;«Бизнестің жол картасы – 2025» бағдарламасы аясында биыл ауданда 27 жоба ұсынылып, 580 млн теңге қолдау алған. Арнайы курстан өтіп, бизнес әлеміне қажетті біліммен қаруланғандардың қайтарымсыз грант қаражатын алу мақсатындағы 39 жобасы ұсынылған. Нәтижесінде 3 инновациялық жобаға 11 млн теңге көлемінде қаражат берілген.Осындай мемлекеттік бағдарламалар талабы тұрғындар табысын еселеп, өз кәсібін дөңгелетуге мүмкіндік берсе, екінші жағынан ел ішіндегі жұмыссыздықтың азаюына септігін тигізуде. Ауданда мемлекеттік бағдарламалардың нәтижесінде жұмыссыздар саны жылдан-жылға қысқарып келеді. Жұмысын жаңа бастағанымен, ісі алға басқан кәсіпкерлердің талпынысын көріп, өзгелердің де ұмтылатындары анық. Айта кету керек, биыл ауданда жұмыссыздық деңгейі 5,0 процентті құрап отыр.Бүгінде шағын және орта кәсіпкерлікті дамыту мақсатында аудандағы «Наурыз-Дем» несие серіктестігі арқылы ауыл шаруашылығы бағытында жобалық құны 516,5 млн теңгені құрайтын 13 жоба қолдау тауып, қаржыландыруда. Сонымен қатар «Қызылорда» Өңірлік ¬инвестиция орталығы арқылы жобалық құны 90 млн теңгені құрайтын 18 жоба қолдау тапты. Ал «Аграрлық несие корпорациясы» АҚ арқылы мал шаруашылығын дамыту мақсатында 38 жобаға 448,7 млн теңге несие қаражатын берген. «Сырдария – 1» несие серіктестігі арқылы ауыл шаруашылығын дамыту мақсатында 5 жобаға 274 млн теңге несие қаражатын қарастырған. «Жұмыспен қамтудың жол картасы» мемлекеттік бағдарламасы аясында «Atameken Qyzylorda» МҚҰ-ы арқылы 33 020 млн теңгеге 6 жоба қаржыландырылыпты. Қосымша құны 25 млн теңгені құрайтын 6 жобаның құжаттары әзірленіп, несиелендіруге жолданған екен.Бүгінгі таңда жалпы мемлекеттік бағдарламалар бойынша 2 млрд 790 млн теңгені құрайтын 457 жоба шағын несие және грант қаражатын алып үлгерген. Аудан бойынша жобалық құны 8 млрд 234 млн теңгені құрайтын 31 инвестициялық жоба жүзеге асырылу жоспарда бар. Алдағы уақытта жобалар толықтай іске қосылғанда 381 жаңа жұмыс орны құрылмақ.Осы аталған жобалардың ішінде қазіргі таңда жобалық құны 984 млн теңгені құрайтын 8 жоба іске қосылған. Яғни, ауданда 46 жаңа жұмыс орны ашылған. Ауданда кәсіпкерлердің қатарының артуы, тұрғындардың мемлекеттік қолдауды ұтымды пайдаланып отырғаны десек болады. &nbsp;

Шиелі ауданында кәсіпкерлік саласы қарқынды дамуда

<a href="https://kyzylorda-news.kz/">Kyzylorda-news.kz.</a>&nbsp; Қызылорда облыстық статистика департаменті бастауыш кәсіподақ ұйымының төрайымы Гүлзира Есқараеваға салалық деңгейде өткен «Үздік ұжымдық шарт -2022» республикалық байқауынан ІІІ &nbsp;орын алса, &nbsp;салалық кәсіподақтың кәсіподақ көшбасшылары мен үздік әлеуметтік әріптестерге берілетін жоғары наградасы – «Кәсіподақ қайраткері» медалімен департамент басшысы Мәриям Баекеева марапатталды.8 қараша - ҚР Статистикасының күні аталып өтеді. Осыған орай ҚР СЖРА Ұлттық статистика бюросының Қызылорда облысы бойынша департаментінде мерекелік шара өтті. Шараға қатысқан «Қызмет» салалық кәсіподағының Қызылорда облыстық филиалының төрайымы Сәуле Тұрсынбаева департамент қызметкерлері – кәсіподақ мүшелерін мерекемен құттықтап, сала қызметкерлерінің күнделікті тәжірибелері мен атқарған жұмыстары арқылы еліміздің дамуына, өркендеуіне қосқан үлестерін, салалық кәсіподақ құрамындағы үлкен бастауыш кәсіподақ ұйымдарының бірі әрі 35 жылдан астам кәсіподақтан қол үзбеген, белсенді кәсіподақ ұйымы екенін атап өтті.Салалық кәсіподақтың Үздіктері қатарынан табылған бастауыш ұйымның бірқатар кәсіподақ мүшелері де мерекелік марапаттарға ие болды. «Мемлекеттік қызметкерлер кәсіподағының үздігі» төсбелгісімен департамент басшысының орынбасары Сәуле Рысмаханова, Қызылорда облыстық аумақтық кәсіподақтар бірлестігінің құрмет грамотасымен Жаңақорған статистика бөлімінің бас маманы Нұрлан Орынбаев, Облыстық салалық кәсіподақтың құрмет грамотасымен департаменттің статистикалық ақпаратты пайдаланушылармен жұмыс бөлімінің басшысы Ирина Ан марапатталды.Сонымен қатар, шара барысында департамент қызметкерлері Баян Медетова мен Алтын Мұсаеваға зейнетке шығуларына байланысты құрмет көрсетіліп, сый-сияпаттар табысталды.<figure class="image"><img src="https://knadmin.beoblood.kz/uploads/315733931_3338078819842166_1246971072080692680_n_b1cd340c58.jpg" alt="315733931_3338078819842166_1246971072080692680_n.jpg"></figure>

Қызылорда облыстық статистика департаменті «Үздік ұжымдық шарт -2022» республикалық байқауында жүлдегер атанды

<a href="https://kyzylorda-news.kz/">Kyzylorda-news.kz.</a> Жалағаш ауданында жыл сайын түрлі бағдарламалардың көмегімен мемлекеттен қаржылай қолдау тауып, кәсіп ашып жатқан тұрғындар қатары артқан. Себебі іс бастаймын деген жандарға бүгінде пайыздық үстемақысы төмен несиеден бөлек қайтарымсыз қаражат та үлестірілуде. Былтыр 600 мың теңгеге дейін шағын кәсіпкерлікке бағытталған жоба авторларына қайтарымсыз қаражат үлестірілсе, биыл оның көлемі 1 млн 200 мың теңгеден асқан.Биыл ауданда жаңа бизнес-идеяларды іске асыруға арналған мемлекеттік грантқа 367,6 млн теңге қаражат қаралған. 109 млн теңгесі ел қазынасынан бөлінсе, Ұлттық қордан 258,6 млн теңге қаралыпты. Негізінен жыл соңына дейін 300 адамды қайтарымсыз қаражатпен қамтамасыз ету көзделсе, жос¬пар қазірдің өзінде 100 пайызға орындалып, қарашаға дейін 300 жоба қаржыландырылды.Жалпы ауданда қайтарымсыз грантты жоба авторларына үлестіруге арналған 4 рет комиссия отырысы өткен. Ең алғашқысында 2 адам үміткер болып қатысып, жаңа бизнес-идеяларды іске асыруға арналған мемлекеттік грантты былтыр «Бастау-Бизнес» жобасы бойынша оқуын аяқтаған 1 адам мал шаруашылығы бағытында комиссияның оң шешімін алса, келесісі қолдау таппаған. Ал келесі комиссия отырысында жаңа бизнес-идеяларды іске асыруға арналған мемлекеттік грантқа оқуын аяқтаған 79 адам комиссия отырысына қатысып, оның 62-сі бизнес жоспарын қорғап, комиссияның оң шешімін алған. 1 адам тұрақты жұмысқа орналасуына байланысты грант қаражатынан бас тартса, қалған 17 адамның жобасы қолдау таппаған.Үшінші мәрте өткен отырыста жаңа бизнес-идеяларды іске асыруға арналған мемлекеттік грантқа оқуын аяқтаған 178 адам қатысуға өтініш беріпті, оның 92-сі бизнес жоспарын қорғап, комиссияның оң шешімін алған, 86 адамның түрлі жобасы қолдауға ие болған жоқ. Ал соңғы рет қазан айында өткен жаңа бизнес-идеяларды іске асыруға арналған мемлекеттік грантқа оқуын аяқтаған 363 адам қатысуға өтініш беріп, оның 146-сы бизнес жоспарын қорғап, комиссияның оң шешімін алған, керісінше 217 адамның жобасы қолдау тапқан жоқ.Қайтарымсыз қаражаттың әрбір өңірге үлестірілу межесіне келсек, Жалағаш кенті бойынша негізінен 111 адамға грант беру жоспарланған. Десе де 165 адамның жарқын жобасы қаржылай қолдау тапты. Ал ауданға қарасыт ауылдық елді мекендерге келсек, Аққұм ауылы бойынша 17 адамның жобасы меже бойынша қолдау табуға тиіс болса, бүгінге дейін 10 ауыл тұрғыны қаржылай қолдауға ие болған. Шалғайдағы Аққыр ауылдық округі бойынша меженің орындалуы 50 пайызға да жетпейді. Мәселен, бұл елді мекеннен 10 адамның жобасын қаржыландыру межеленсе, бүгінге дейін 4 жоба қолдау тауыпты. Бұл ретте аталған ауылдан келген жоба авторларының саны аз болғанын айта кеткен жөн.Аудан іргесіндегі Ақсу ауылы – негізінен кәсіп бастауға және оның жемісін көруге қолайлы жер. Кентке жақын орналасқандықтан бұл ауылда өнім өтпей қалады деген іскер азаматтарда күмән аз болатыны сөзсіз. Сондықтан болар, кешеге дейін комиссия отырысында ақсулық ағайындар бірнеше жоба қорғады. Олардың кәсіп ашуға ынталы екені анық байқалды. Мәселен, аталған елді мекен бойынша 12 жоба қаржылай қолдау табуы тиіс болса, бүгінге дейін 15 жоба сәтті қорғалған. Ал Аламесек ауылдық округі бойынша 14 жобаға дейін қолдауға мүмкіндік болған. Бірақ бүгінге дейін 8 жоба сәтті қорғалған.Бұқарбай батыр ауылы бойынша 15 жобаны қолдауға мүмкіндік болды. Бірақ бүгінге дейін 13 жоба қаржыландырылған. Бұл елді мекенде де кәсіпкерлік саласына жергілікті тұрғындардың қызығушылығы басым екенін айта кеткен жөн. Еңбектен 10 жоба қолдау қажет болса, меже бүгінге дейін 60 пайызға орындалған. Ал Жаңадария ауылы бойынша меже 43,7, Қаракеткенде 78,6, Жаңаталапта 25, Мақпалкөлде 46,7, Мәдениетте 163,6, Мырзабай ахунда 46,7, Таңда 141,7, М.Шәменовте 66,7 пайызға орындалып отыр.Тиісті қаражатқа қол жеткізгендердің алды бүгінде кәсіпті бастап кетті. Аудан бойынша 300 жобаның қолдау табуы өңірде 300 шағын кәсіпорын жұмысын бастағанын білдіреді. Ауданда бизнес жоба авторларының артуы аталған салада айтарлықтай серпін барын, оған мемлекеттік бағдарламаның көмегі тиіп жатқанының белгісі болар. &nbsp;<img src="https://knadmin.beoblood.kz/uploads/1551182404_kasipkerliktin_ekinshi_zhyly_149d80974b.jpg" alt="1551182404_kasipkerliktin-ekinshi-zhyly.jpg">

Жалағаш ауданында шағын кәсіпкерлікке бағытталған 300 жоба қолдау тапқан

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев аймақта 10 ай ішіндегі бюджеттің игерілу барысы мен еңбек көрсеткіштерін саралап, Ел Президенті, Үкіметі, облыс әкімінің тапсырмаларын орындау бойынша бағдарлы жиын өткізді.Облыстық экономика және қаржы басқармасының басшысы Нұрғали Қордабай өз баяндамасында жылдың 10 айында облыс бюджетінің игерілуі 99%-ды құрағанын мәлімдеді.Бюджет қаражатын игеру бағытында Қызылорда облысы республикада екінші орында. Дегенмен, бөлінген қаржыны уақытылы игеруде бірқатар ауданда жұмыс баяу жүруде. Мәселен, Арал, Қармақшы, Жалағаш және Жаңақорған аудандары тиісті көрсеткішке толыққанды қол жеткізе алмауда. Ал, басқармалар бойынша білім, жұмыспен қамту және әлеуметтік бағдарламалар, денсаулық сақтау, ауыл шаруашылығы мен жер қатынастары, энергетика және тұрғын үй-коммуналдық шаруашылық басқармалары тарапынан қаражат толық игерілмеген.Аймақ басшысы мемлекеттің қаржысы өз мерзімінде әрі сапалы игерілуі керек екенін баса айтып, жұмысты уақытылы үйлестіре алмаған Қармақшы ауданы әкімі Әділбек Ерсұлтанов пен оның орынбасарына сөгіс жариялады. Өзге де аудан әкімдері мен бірқатар басқарма басшыларына ауызша ескерту берді. Бұл ретте қаржы саласына жауапты облыс әкімінің орынбасары Нұрымбет Сақтағановқа ескерту жасап, бюджет қаржысын мақсатты түрде игеру жұмыстарын бақылауға алуды, бірінші басшылардың жауапкершіліктерін қатаң қарауды тапсырды.Тағы бір мәселе - 2021-2025 жылдарға арналған Қызылорда облысының даму жоспарын орындау. Стратегиялық көрсеткіштер картасында өңірге бекітілген 122 нысаналы индикатордың ішінде көрсеткіштердің орындалмай қалу қаупі бар 3 басқармаға тиісті ескерту жасалды.Тарқатып айтқанда, ауыл шаруашылығы басқармасы шаруаларға қажетті техникаларды сатып алу жұмыстарын, денсаулық сақтау басқармасы ана мен бала өлімінің алдын алу, кәсіпкерлік және өнеркәсіп басқармасы өңірде орта кәсіпкерліктің үлесін көбейту жұмыстарын сапалы аяқтауы тиіс.Облыс әкімінің бірінші орынбасары Серік Қожаниязовқа индикаторлардың уақытылы орындалуын қатаң бақылауды тапсырды.Облыс әкімі Нұрлыбек Нәлібаев аталған басқарма басшыларына жұмысты әлі де ширату қажет екенін тағы бір еске салды.Облыс әкімі аппаратының басшысы Шахмардан Байманов облыс әкімінің хаттамалық тапсырмаларының орындалу барысы бойынша баяндама жасап, талдаулар ұсынды.Мәселен, Қызылорда қаласын көркейту-көгалдандыру бағытында қоқыс тасымалдайтын арнайы техникалар алу жұмыстары әлі де кешігуде. Сол жағалау аймағының көшелерін жарықтандыру бағаналарының қолды болғаны аймақ басшысының сынына ілікті. Көпқабатты тұрғын үйлердің жобалық құжаттамасын жасау жұмыстары уақытылы орындалмаған, аяқ сумен қамтамасыз етуге қосымша құдықтар қазу тапсырмасы да өз деңгейінде атқарылмауда.Облыс әкімі қала аумағында қатынайтын қоғамдық көліктерді сатып алу процестерінің баяу жүруін сынға алды. Осы кезге дейін алынуы тиіс 150 қоғамдық көліктің тек 60-ы ғана әкелінген. Бұған дейін де тапсырма ретінде берілген автовокзал салу жұмыстарына инвестор табу мәселесі де шешімін таппай тұр. Облыс әкімі өзекті мәселелерді өз уақытында орындай алмағаны үшін орынбасары Мархабат Жайымбетовке қатаң ескертіп, қала әкімі Асылбек Шәменовке және құрылыс, сәулет және қала құрылысы басқармасының басшысы Ерлан Төралиев пен энергетика және тұрғын үй коммуналдық шаруашылық басқармасының басшысы Руслан Нұрмағанбетовке сөгіс жариялады.<blockquote>«Мархабат Жайымбетұлы, Сіз қаланың кураторы ретінде тапсырылған жұмыстың сапалы аяқталуына тікелей жауаптысыз!Аймақ басшысы болып келген сәттен бастап қоғамдық көлік жеткіліксіздігін алға тартып, қажетті қаражат та бөлдім. Содан бері 7 ай болды ғой, жұмысты үйлестіре алмай келесіздер. Халыққа уәде етілген мәселе уақытылы орындалуы керек. Сылбыр қимылдайсыздар. Қаржысы шешілген бойда нақты әрекет-амалдарын қарастыру Сіздердің міндеттеріңіз. Өкінішке қарай, жұмыс көңіл көншітпейді. 20 қарашаға дейін кемшіліктеріңізді түзеп, нақты жұмыс істеңіздер»,- деді Н.Нәлібаев орынбасары М.Жайымбетов пен қала әкімі А.Шәменовке.</blockquote>Отырыста Байқоңыр қаласының мәселесі де шет қалмады. Мұнда 50 пәтерлі 5 тұрғын үй құрылыстарының жұмысы баяу жүргізілуде. Облыс әкімі тұрғын үйлерді салу іркіліссіз жүруі қажет екенін қаперге салып, өз орынбасары Қайрат Нұртай мен аудан әкімі Әділбек Ерсұлтановқа жұмыстың сапалы әрі уақытылы орындалуына баса мән беру керектігін тапсырды.Нұрлыбек Нәлібаев ауылдық жердегі әкімдер, учаскелік инспекторлар мен мектеп директорларының сол аумақта тұруы міндетті екенін осы кезге дейін де айтқан. Облыс әкімі бұл талап халықтың өтініші негізінде ескерілгенін жеткізді. Дегенмен, аудан әкімдері тарапынан және тиісті мекеме, орган басшыларынан бұл тапсырма әлі күнге дейін толық орындалмауда. Мәселен, Сырдария, Жаңақорған, Шиелі аудандарындағы ауыл әкімдері өзі қызмет атқаратын аймағында тіркеліп қойғанымен, шын мәнінде аудан орталығынан немесе келесі ауылдық округтен қатынап жұмыс істейтіндігі анықталды.<blockquote>«Президент тапсырмасы аясында ауыл-ауылдарды аралап, халықпен кездескен сайын үнемі тұрғындар ауыл әкімі мен учаскелік инспекторлардың жұмысына жиі шағым айтады. Оқыс оқиғалар орын алған сәтте, инспекторды да, ауыл әкімін де таппаймыз дейді. Мұның бәрі жұмысты қатынап істеудің салдарынан туындайды. Халықтың шынайы талап-тілегін ескергеннен кейін мұндай тапсырма берілді. Бірақ, нәтиже жоқ. 20 қарашаға дейін тапсырма орындалмаса, аудан әкімдерінің жұмысы қатаң қаралып, тиісті шешімдер қабылданады. Біз халықтың өтінішін орындауға тиістіміз! Тұрғындар өз мәселесіне лайықты деңгейде жауап ала алмағандықтан, амалсыз әлеуметтік желіде мәселе көтереді. Реті келсе, заң аясында шешімін табуға ықпал жасап, халықпен сындарлы диалог орнатылуы керек.Сіздерге қызмет сеніп тапсырылды, халық үшін атқаруға тиіс жұмыстарыңыз мүлтіксіз орындалуы қажет.Шахмардан Асқарұлы, берілген тапсырмалардың уақытылы әрі сапалы орындалуына бақылау жасау аппараттың тікелей міндеті. Жұмысты күшейтіңіздер!», - деді аймақ басшысы.</blockquote>Жиында қаралған әрбір мәселе облыс әкімінің тікелей бақылауында болады. Алдағы кезде өзекті мәселелер жеке-жеке қаралады.<img src="https://knadmin.beoblood.kz/uploads/314733937_425028753151708_2628012802609050083_n_c71e127cf2.jpg" alt="314733937_425028753151708_2628012802609050083_n.jpg"><img src="https://knadmin.beoblood.kz/uploads/314844931_425028816485035_4894141874035594366_n_29c66b240b.jpg" alt="314844931_425028816485035_4894141874035594366_n.jpg">

Нұрлыбек Нәлібаев: Уәде - орындалуымен құнды

<a href="https://kyzylorda-news.kz/">Kyzylorda-news.kz.</a> Астанада өткен «Атамекен» ҰКП-ның Х съезі аясында отандық бизнесмендердің орталық мемлекеттік орган өкілдерімен кездесуі ұйымдастырылды. Кездесуде қызылордалық кәсіпкер, «Ақтөбе және К» ЖШС директоры, Өңірлік кеңес мүшесі Нұрлан Іздібаев ауыл шаруашылығы саласын дамытуға берілетін субсидияның проблемасын көтерді.Оның айтуынша, Ауыл шаруашылығы министрлігіне қарасты субсидиялаудың ақпараттық жүйесі мен Қаржы министрлігіне қарасты электрондық шот-фактуралардың ақпараттық жүйесі арасында интеграцияның болмауынан кәсіпкерлер сотта жауап беруге мәжбүр.<blockquote>«Ауыл шаруашылығы министрлігінің 2015 жылғы бұйрығында шот-фактуралар өзгертуге, түзетуге, қайтарып алуға жатпайды деп көрсетілсе, Салық Кодексінде шот-фактураларды өзгертуге, түзетуге жол берілетіні жөнінде бап бар. Бүгінде қызылордалық шаруашалар 2018-2019 жылдары мемлекеттен алған субсидиясы бойынша сотта жауап беріп жатыр. Себебі қадағалаушы орган Ауыл шаруашылығы министрлігінің бұйрығын басшылыққа алып отыр», – деді Нұрлан Іздібаев.</blockquote>Кездесуде Ауыл шаруашылығы вице-министрі Айдарбек Сапаров мәселені зерттейтінін және қызылордалық кәсіпкер Нұрлан Іздібаевты субсидия мәселесімен айналысатын республикалық жұмыс тобының мүшелігіне қосатынын жеткізді.Бұл мәселе бойынша Қызылорда облысы кәсіпкерлер палатасының заңгерлері биылдың өзінде сотта 50-ден астам кәсіпкердің мүддесін қорғап шықты.<blockquote>«Ақпараттық жүйелер арасындағы интеграцияның жоқтығы, оның үстіне мемлекеттік органдардың нормативтік-құқықтық актілердегі иерархияны орынсыз пайдалануы кәсіпкерлерді біраз әбігерге салып жатқаны рас. Тек қана осы проблемамен биылдың өзінде 70-тен астам кәсіпкер Палатадан көмек сұрап келді. Соның ішінде 50 кәсіпкердің ісі бойынша сотқа қатыстық. Барлығында да іс кәсіпкерлердің пайдасына шешілді. Дегенмен, мәселені республикалық деңгейде шешпесе, яғни құжатқа өзгеріс енгізбесе немесе жүйеге интеграция жасамаса шағымданушылардың қатары арта берері сөзсіз», – деді Кәсіпкерлер палатасының директоры Пірмұхаммед Сыздықов.</blockquote>Жақында ғана облыстық мамандандырылған ауданаралық экономикалық сотының судьясы Бақытбек Елшібеков облыстық ауыл шаруашылығы басқармасының «Медеубай», «Серікболсын», «Жұмағали», «Жөлек-Ырыс», «Томирис» шаруа қожалықтарынан субсидия сомасын мемлекет кірісіне өндіру туралы талап арызын қанағаттандырудан бас тарту туралы шешім қабылдады.Нәтижесінде Кәсіпкерлер палатасының заңгерлері биыл субсидияға қатысты шаруалардың 25 млн теңгеге жуық қаржысын сақтап қалды.&nbsp; <img src="https://knadmin.beoblood.kz/uploads/6f19f20d_076b_4560_94d3_52f455e3db90_a60cc003e1.jpg" alt="6f19f20d-076b-4560-94d3-52f455e3db90.jpg">

Қызылордалық кәсіпкер ақпараттық жүйелер арасында интеграцияның жоқтығына шағымданды

<a href="https://kyzylorda-news.kz/">Kyzylorda-news.kz.</a> Биыл Қазақстанның мемлекеттік статистикасына – 102 жыл толды. Қазіргі кезде статистикалық жүйені құру және оны одан әрі цифрландыру мақсатында баламалы ресурстар пайдалануда. Бұл өз кезегінде тиімді деректерді жинауға септігін тигізбек.&nbsp;Бүгін Өңірлік коммуникациялар қызметінде өткен брифингте облыстық статистика департаменті басшысының міндетін атқарушы Гүлмира Нұрқабылова жыл басынан бері атқарылған жұмыстарды баяндады.<blockquote>«Қай кезеңде де статистиканың негізгі міндеті – азаматтарды толық, нақты, жедел ақпаратпен қамтамасыз ету болып табылады. Биыл 135 жалпымемлекеттік статистикалық байқау бекітілген болатын. Осыған сәйкес, әртүрлі салалар бойынша 8 жаңа статистикалық жұмыстар жүргізілді. Атап айтқанда, жеке кәсіпкерлерге, мұнай өндіруші және мұнай өңдеуші кәсіпорындардың қызметі мен ауыл шаруашылығы саласына қатысты болды. Жалпы жүргізілген статистикалық мәліметтерге сүйенсек, жыл басынан бері облыста құрылыс саласы 35,1 пайызға, өңдеу өнеркәсібі &nbsp;8,6 пайызға, ауыл шаруашылығы 3,1 пайызға, сауда 2,3 пайызға артқаны байқалады. Сондай-ақ негізгі капиталға салынған инвестиция көлемі &nbsp;24,0 пайызға өскен. Ал әлеуметтік-экономикалық дамудың негізгі көрсеткіштері бойынша облыстың барлық аудандарында оң динамика қалыптасты. Сонымен қатар, орман және балық шаруашылығы саласы 3,1 пайызға жоғарылап, өнім көлемі артты», - деді Гүлмира Жеткергенқызы.</blockquote><figure class="image"><img src="https://knadmin.beoblood.kz/uploads/314448112_1660647577664081_315097116506480576_n_8639f517f9.jpg" alt="314448112_1660647577664081_315097116506480576_n.jpg"></figure>

Биыл мемлекеттік статистикаға -102 жыл

<a href="https://kyzylorda-news.kz/">Kyzylorda-news.kz.</a> Қазіргі таңда &nbsp;қазынашылық жүйе еліміздің қаржылық жүйесінің басты бөлігі.&nbsp;Қызылорда облысы бойынша Қазынашылық департаментінің бөлім басшысы&nbsp;Алмас Рүстемовтің айтуынша 2004 жылы бірыңғай ақпараттық ортаны қамтамасыз ету үшін - қазынашылық органдары жаңа - ақпараттық жүйе енгізілген. &nbsp;Ал 2011 жылы орган жұмысының тиімділігін барынша жоғарылатса, 2012 жылы квазимемлекеттік сектор­ субъектілерінің шоттарына қызмет көрсете бастады. Одан әрі бюджеттік шығыстардың тиімділігін түпкілікті жақсар­ту үшін «Құрылыс бойынша мемлекеттік сатып алуды қазынашылық қолдау» жобасы енгізілген болатын. Бүгінде құрылыс бойынша мемлекеттік сатып алуды қазынашылық қолдау туралы өзгерістер мен толықтырулар енгізілуіне байланысты тиісті жұмыстар жүргізілуде. Биыл мемлекеттік мекемелердің құжаттары сапалы және уақытылы орындалуын, төлем шоттарын тиімді жұмсалуын қамтамасыз етілуде.&nbsp;Қазынашылық &nbsp;мемлекет байлығының сақталуына жауап береді. Яғни, салық, салым, баж салығын өндіріп алуды ұйымдастырады. Және де мемлекеттік мұқтаждықтарға қаражат бөледі. Мұнан өзге, ақша эмиссиясына, ақша соғуға жауапты. Түйіндегенде , қазынашылық &nbsp;ақша қаражаттарын тиімді жұмсауды және сақталуын қамтамасыз ететін қаржылық орган. Сонымен қатар, қаражатты тиімді басқару жүйесін құру, жаңғырту әрі дамыту, біршама елдердің қазынашылық органдарының басты міндеттерінің бірі. &nbsp;

Қазынашылық жүйе - қаражатты тиімді басқару тетігі

<a href="https://kyzylorda-news.kz/">Kyzylorda-news.kz.</a> Бүгінде өңірде кәсіп ашып, өз ісін дөңгелетіп отқан кәсіпкерлер қатары өскен. Себебі мемлекет тарапынан өзін-өзі жұмыспен қамтимын деген тұрғындарға қолдау көп. Бұған «Даму» қорының Қызылорда облысы бойынша өңірлік филиалы ұйымдастырған баспасөз туры аясында көз жеткіздік.Толықтай автоматтандырылған өндіріс«Даму» кәсіпкерлікті дамыту қоры қолдауымен ісін дөңгелетіп отқан кәсіпкердің бірі – Жұмабек Садуақасов. Нарықта 2006 жылдан бері тас төсеніш, жиек тас, қоршауға арналған темір тор және т.б. құрылыс материалдарын өндіріп, тұтынушылардың сұранысын қанағаттандырып келе жатқан кәсіпкер 2021 жылы өндірісті кеңейтуді қолға алыпты.<blockquote>«Еңбек етемін, кәсіп ашамын дегендерге мемлекет тарапынан қолдау көп. Соның дәлелі ретінде өзімді мысалға келтірсем болады. 2021 жылы Сбербанктен «Даму» қоры арқылы бизнесті автоматтандыру үшін құрал-жабдықтар сатып алу мақсатында «Бизнестің жол картасы – 2025» бағдарламасы аясында субсидиялау құралы бойынша қолдау таптық. Шүкір, қазір ісіміз тұрақты, жұмысымыз жүйелі. Сұранысқа келсек, тапсырыс көлемі жеткілікті. Тапсырыс қала, облыс көлемінен түсіп жатады. Сондай-ақ, бүгінде біздің өнімге сұраныс мекемелерден де түсетін болды. Мұның себебі, біз үшін өнім сапасы басты орында», – дейді кәсіпорын директоры.</blockquote>Сонымен қатар, кәсіпкер Жұмабек Садуакасов келешекте кәсіпорын көкжиегін кеңейтіп, өнім өндіру қуаттылығын арттыруды жоспарлап отырғанын айтады.Бүгінде кәсіпкер 10 адамды тұрақты жұмыспен қамтып отыр. Қызметкерлердің әлеуметтік жағдайы басты назарға алынып, тіпті ыстық тамақпен де қамтылған. Жалақы тұрақты, қосымша сыйақы да қарастырылған.&nbsp;Кәсіпорын шебері Уалихан Балмахановтың айтуынша, тас төсеніштер, жиек тастар, қабырға материалдарын шығаруға арналған қажет құм мен тасты, басқа да шикізаттарды облыс аумағынан алады. Сондай-ақ, өндіріске қажет цементті «Гежуба Шиелі Цемент» зауытынан жеткізеді екен.Бағдарлама қолдау берген заманауи балабақшаҚызылорда қаласындағы «Астана», «Астана-1» мөлтек ауданының балғындары бүгінде жаңа балабақшада тәрбиеленіп жатыр. Балабақша заманауи үлгіде салынып, қазіргі таңда 320 бүлдіршін тәлім алуда.Білім беру саласында қызмет көрсететін «BAUER group» ЖШС 2020 жылы өз қаражаты мен «Сбербанк» арқылы рәсімделген несие қаражатын пайдалана отырып, «Сыр перзенті» балабақшасын салады.&nbsp;Балабақша құрылтайшысы Бауыржан Еркебаевтың сөзінше, жобаға «Басымдыққа ие жобаларды несиелендіру механизмі» бағдарламасы аясында пайыздық мөлшерлемесін субсидиялау және кепілдендіру құралдары бойынша «Даму» қоры қолдау көрсеткен.2-ден 6 жас аралығындағы балалар қамтылған балабақшада барлық жағдай жасалған. Жабдықталған музыка залы, хореография залы, ағылшын, шахмат сыныбы, спорт зал бар. Кең асхана, медициналық кабинет және ғимарат алдында тартымды ойын алаңы орналасқан. Балабақша жұмысын жүргізуде 51 адам жұмыспен қамтылған. Тәлімгерлердің барлығы арнайы оқудан өткен, білікті мамандар.&nbsp;<blockquote>«Бізде балаларды дамыту мақсатында әртүрлі көрмелер ұйымдастырылады. Бүлдіршіндер ата-аналарымен бірігіп, әр түрлі тақырыпта суреттер салады. Қазір күз мезгілі болғасын, міне осы тақырапта көрме бұрышын дайындадық. Өздеріңізге белгілі, жаңа оқу бағдарламасы бойынша балаларды ойын арқылы дамыту қолға алынып жатыр. Сондықтан бұрынғыдай баланы қиын тапсырмамен жүктемей, жеңіл, ой-өрісін дамытатын ойындар арқылы бүлдіршіндермен жұмыс істейміз. Қазір баланың өсіп-дамуына ата-аналар да өте жауапкершілікпен қарайды, әрине бұл бізді қуантады», – дейді балабақша меңгерушісі Светлана Елтаева.</blockquote>Табысқа бастаған кондитерлік өнім өндірісіМемлекеттік және өңірлік бағдарламалардың жәрдемін тиімді пайдаланған кәсіпкерлердің бірі – жеке кәсіпкер Алтынай Елеусізова. Кондитерлік өнерді кәсіпке айналдырып, азық-түлік өндіру саласында бірнеше жылдан бері қызмет етіп келеді.Алтынай Елеусізованың 2021 жылы кәсіпке қажетті негізгі құралдар алу мақсатында алған несиесі қайта қаржыландырылып, жоба «Даму» қорынан «Бизнестің жол картасы – 2025» бағдарламасы бойынша субсидиялау құралы арқылы қолдау табады.Кәсібінің көкжиегін кеңейтіп, барлық қажет деген құралдармен қамтыған кәсіпкер бүгінде 25 адамды тұрақты жұмыспен қамтып отыр. Пісіретін өнім түрлері де артқан. Наннан бастап, тәтті тоқаш, торт, самса, бәліш пісіреді. Кондитерлік цех қызметкері Гүлмира Тоятованың сөзінше, өнімге деген сұраныс жоғары. Тапсырыстар тек қала аумағынан емес, аудандардан да түседі екен.&nbsp;<blockquote>«Ең бастысы, өнімнің сапасына мән береміз. Сондай-ақ, бізде пісірілетін тәттілердің бағасы қалтаға қонымды. Тапсырыс жан-жақтан түсіп жатады, қала аумағы үшін жеткізу қызметі жұмыс істейді. Кейде үлгермей жатамыз, себебі тапсырыс көп, қала бойынша 1 ғана нүкте», – дейді цех кондитері.</blockquote>Аймақ халқына тәтті өнімін өткізіп, елдің алғысын алып жүрген кәсіпкер алдағы уақытта кәсібінің ауқымын кеңейтіп, өнім түрлерін ұлғайтуды жоспарлап отыр екен.Тұрғындардың шырайын келтірген «Шырақ»«Даму» қоры қолдау көрсеткен тағы бір сәтті жоба – «Шырақ» офтальмологиялық орталығы. Бұл орталық офтальмологиялық зерттеудің барлық түрін және көзге &nbsp;микрохирургиялық қызметін көрсетеді.Кәсіпкер 2016 жылдан бастап 2 жобаға қатысқан. Біріншісі «Бизнестің жол картасы – 2020» бағдарламасы аясында көзге микрохирургия қызметін жасау үшін құрал-жабдық алу мақсатында болса, екіншісі заманауи медициналық орталық құрылысы жобасы бойынша «Ұлттық жоба» бағдарламасы аясында субсидилау және кепілдендіру көмегін алып отыр. Мемлекеттің қолдауының арқасында клиника қысқа мерзім ішінде үлкен жетістіктерге жеткен.&nbsp;<blockquote>«Біздің клиника толықтай автоматтандырылған жүйеге көшкен. Өйткені орталық заманауи үлгідегі медициналық құралдармен жабдықталған. Бұл құрал-жабдықтар Оңтүстік Корея елінен тапсырыспен алынған. Сондықтан да клиника ем алушыларға сапалы қызмет көрсета алады деп сеніммен айта аламын», – дейді клиника әкімшісі Лаура Құрманбаева.</blockquote>Бүгінде «Шырақ» офтальмологиялық орталығы кеңес беруден бастап көздің кемшілігін түзету, көзге ота жасау секілді біршама қызмет түрлерін қамтыған. Сондай-ақ, клиника тек жоғары санаттағы білікті мамандардан құралған. Осының арқасында өз емделушілерінің сенімінен шығып, клиника аймақта үнемі үздіктер қатарынан көрінуде. Сонымен қатар, емделушілер тек қала аумағынан ғана емес, басқа да өңірлерден келеді екен.Қор жұмысының қарқынды әрекетіӘрине, «Даму» кәсіпкерлікті дамыту қоры қолдау көрсеткен кәсіпкерлік нысандар мұнымен шектелмейді. «Кәсіпкерлікті дамыту жөніндегі 2021-2025 жылдарға арналған ұлттық жоба» және «Қарапайым заттар экономикасы» басым жобаларын кредиттеу тетігі шеңберінде Қызылорда облысының кәсіпорындарына пайыздық мөлшерлемені субсидиялау және кепілдік беру құралдары бойынша бірнеше жоба қолдау табуда.&nbsp;«Даму» кәсіпкерлікті дамыту қоры» АҚ облыстық филиалы директоры Жомарт Ермағанбеттің айтуынша, жыл басынан бері «кепілдік беру» құралы бойынша облыс кәсіпкерлерінің жалпы кредит сомасы 10,2 млрд теңгеге яғни, 990 жобасына қолдау көрсетіліп, оның ішінде кепілдіктер сомасы 6,1 млрд теңгені құраған.<blockquote>«Аймақ кәсіпкерлерінің жалпы сомасы 143,4 млрд теңгеден астам несиелері бойынша 4 500-ден астам жобасына, сондай-ақ өңірдегі кәсіпкерлердің несиенің жалпы сомасы 50,9 млрд теңгені құрайтын 3 200-ден астам жобасына «Даму» қорының кепілдігі берілді», – дейді Жомарт Ермағанбет.</blockquote>Түйін: Кәсіпкерліктің дамуы аймақтың әлеуметтік-экономикалық дамуында маңызды рөл атқаратыны сөзсіз. Сондықтан да салаға жан-жақты қолдау көрсету – мемлекеттің басты міндеті. Байқағанымыздай бүгінде кәсіп ашып, қолдан келетін ісіммен айналысамын деген адамға мемлекет тарапынан жасалып жатқан қолдауда есеп жоқ. Тек, сол қолдауды мүмкіндігінше ұтымды пайдалана білуіміз керек.&nbsp;Жандос Жазкен &nbsp;<img src="https://knadmin.beoblood.kz/uploads/2_f599d9eb29.jpg" alt="2.jpg"><img src="https://knadmin.beoblood.kz/uploads/2_bde9bf07bc.jpg" alt="2.jpg"><img src="https://knadmin.beoblood.kz/uploads/1_d32d83e10f.jpg" alt="1.jpg"><img src="https://knadmin.beoblood.kz/uploads/1_7976ac83af.jpg" alt="1.jpg"><img src="https://knadmin.beoblood.kz/uploads/1_0f721b8478.jpg" alt="1.jpg">

«Даму» демеген жобалар

<a href="https://kyzylorda-news.kz/">Kyzylorda-news.kz.</a> Бүгін Роза Бағланова атындағы аудандық мәдениет орталығында «Алтын дән – 2022» мерекесіне орай салтанатты шара өтті.Салтанатты шарада аудан әкімі Мұхтар Оразбаев қазалылықтарды береке мен молшылықтың бастауы болған «Алтын дән» мерекесімен құттықтап, ауыл еңбеккерлерінің ел үшін еткен ерен еңбектерінің ақталғанын атап өтті.Сондай-ақ, ауыл шаруашылығы өнімдерін өңдеуде жоғары нәтижелерге қол жеткізгені үшін Қазалы ауданы биыл үшінші рет қатарынан «Озат аудан» номинациясымен марапатталғанын да қуанышпен жеткізді.Мұнан соң табысқа жеткен озаттарды марапаттап, бағалы сыйлықтар табыстады.Салтанатты шарада «Рза Асыл Түлік» ЖШС директоры Жеңіс Қарабалаев ҚР Ауыл шаруашылығы министрлігінің «Ауыл шаруашылығы саласының үздігі» төсбелгісімен, «Рза Агро» ЖШС механизаторлары Баубек Бердалиев пен Әсет Рамберді ҚР Ауыл шаруашылығы министрлігінің «Құрмет грамотасымен», «Мақсатбай» шаруа қожалығының жетекшісі Темірхан Мақсатбаев пен «Кеңесбай» шаруа қожалығының жетекшісі Талғат Кеңесбаев ҚР экология, геология және табиғи ресурстар министрлігінің «Құрмет грамотасымен» марапатталды.Сондай-ақ, бірқатар сала ардагерлері облыс және аудан әкімінің «Алғыс хатымен», жеке кәсіпкер Нұрбек Қазбергенов Астана қаласы әкімінің «Алғыс хатымен» марапатталды.Биылғы жылы облыстың агроөнеркәсіптік кешені бойынша үздік жетістіктерге жеткен озаттарға түрлі номинациялар табысталып, бағалы сыйлықтар үйлестірілді.Күріш дақылынан мол өнім алған шаруашылықтар да марапат төрінен көрінді.Агроөнеркәсіп кешенін дамытуда биылғы жылы ең жоғарғы көрсеткіштерге қол жеткізген «Агро-Өркен» ЖШС «Үздік шаруашылық» номинациясына ие болып, аудан әкімінің І дәрежелі дипломымен марапатталды. Серіктестік егілген 600 гектар күріштің әр гектарынан 50 центнерден өнім алып, аудан экономикасының дамуына ерекше үлес қосты.Әр гектардан орташа 45,5 центнерден өнім алған «РЗА-Агро» ЖШС-на аудан әкімінің ІІ дәрежелі дипломы табысталды.Ал, аудандық мәслихат депутаты Төребек Игіліков басшылық жасайтын кәсіпорын «Озат өңдеу кәсіпорны» номинациясына ие болды.Кәсіпорын 3632 тонна балық аулап, оның 456,6 тоннасын өңдеп, экспортқа шығарған.Жеке кәсіпкер Төребек Жұмабекұлы сондай-ақ, жыл сайын дәстүрлі түрде өткізілетін ауыл шаруашылығы өнімдерінің жәрмеңкесіне ерекше атсалысқаны үшін Астана қаласы әкімінің «Алғыс хатымен» де марапатталды.Ауыл шаруашылығы саласы қызметкерлерінің мерейін үстем еткен көңілді кеште өнерпаздар ән-күйден шашу шашып, көпшіліктің көңілін бір серпілтіп тастады.Айта кетейік, қазалылық диқандар биылғы жылы егілген 6361 гектар күріштің әр гектарынан 33 центнерден өнім жинап, ел қамбасына 21 мың тоннадан астам астық құйды.<img src="https://knadmin.beoblood.kz/uploads/314550176_3503363939884528_4265652039429382118_n_4348b64de6.jpg" alt="314550176_3503363939884528_4265652039429382118_n.jpg"><img src="https://knadmin.beoblood.kz/uploads/314457805_3503363603217895_7592883179043202773_n_6e47318134.jpg" alt="314457805_3503363603217895_7592883179043202773_n.jpg">

Қазалыда ауыл шаруашылығы саласының озаттары марапатталды

<a href="https://kyzylorda-news.kz/">Kyzylorda-news.kz.</a>&nbsp; Мемлекет басшысы Қасым-Жомарт Кемелұлы Тоқаев Қазақстан халқына арнаған Жолдауында кәсіпкерлік саласын дамыту мен бизнес идеяларды қолдау шаралары артып, «Мемлекет бизнеске көмек көрсету ісін жалғастыра береді» деген болатын.​Бұл тұрғыда облыс орталығында да жүйелі жұмыстар жасалып, «Қарапайым заттар экономикасы», «Бизнестің жол картасы - 2020, 2025», «Нұрлы жер» секілді кәсіпкерлікті қолдауға бағытталған түрлі мемлекеттік бағдарламалар өз тиімділігін дәлелдеп келеді.​Өздеріңізге белгілі, қала әкімі ай сайын кәсіпкерлерді салалық мәселелер бойынша қабылдап, ұсыныстар бойынша нақты шараларды жүзеге асыруда. Кәсіпті жаңа бастаған және бұл бағытта шаруасын жүйелеген азаматтар мұндай қолдауларға ризашылықтарын білдіруде.​Солардың бірі – жеке кәсіпкер Жеңісбек Бердешов. Ол Қызылжарма ауылдық округінен «Green house» жылыжай кешенін ашып, одан аптасына жарты тонна өнім алып отыр. Қазір қияр және қызанақпен сол елді-мекен халқын қамтамасыз етуде. Өнімі базар бағасынан 20 пайызға төмен.​Жылыжай кешенінің аумағы 10 сотық. Жеңісбек бұл жобаны өз қаржысымен жүзеге асырып, бірнеше отбасыны жұмыспен қамтыды. Алақандай жерден әлеуметтің сұранысына сай өнім ұсынған жеке кәсіпкерге шаһар басшысы жан-жақты көмек көрсетілетіндігін жеткізіп, жұмысына сәттілік тіледі.​Қазіргі таңда шаруалардың халықты көкөніспен, жеміс-жидекпен толықтай қамтамасыз ете алмай отырғандығы жасырын емес. Сондықтан бұл өнімдерді көрші өзбек ағайындардан алып, елге қымбатқа тасымалдауға мәжбүрміз. Бағаның тұрақсыздығы соның салдары. Бұл тәуелділікті жою үшін жылыжай өндірісін дамытуды мықтап қолға алуымыз қажет. Ал ол бағыттағы кәсіпке ынталыларға барынша жағдай жасалғаны абзал.​Ақсуат ауылдық округі аумағынан жылыжай кешенін салып, жұмысын бастағандардың қатарында Бауыржан Нұрмағамбет те бар. Ол мемлекеттік бағдарлама арқылы шаруашылықты бастап, қазір дүкен иелерінің күнделікті тапсырыстарын орындап отыр. Аптасына жарты тоннаға жуық қияр, қызанақ өнімдерін алатын «Шапағат» брендісімен танылған кешенде 4 адам еңбек етуде.​Жылыжай агрономы қияр мен қызанақтан бөлек, алдағы 3 жыл ішінде қала тұрғындарына лимон өнімін ұсынамыз дейді. Өйткені шет мемлекеттерден алынған лимон көшеттері қазір жерсініп, өркен жайып келеді. Дегенмен, жылыжай ісін ілгерілету үшін бірқатар жұмыстар атқарылу керек болып отыр. Қала әкімі Асылбек Өмірбекұлы кешенді ұлғайту, дамытуға байланысты ұсыныстарға қолдау жасалады деді. Сонымен қатар, мұндай шаруашылықтарды көбейту үшін кәсіпкерлерге семинар-тренингтер ұйымдастыру қажет екендігін жеткізді.​Шаһар басшысы кәсіпкерлік нысандарын аралауда Жаппасбай батыр көшесінде орналасқан «Примжанов» ЖК – нің сыртқы және ішкі есіктер шығаратын цехының жұмысымен танысты. Бұл жерде жеке кәсіпкер Дәулет Примжанов өз қаражаты есебінен құны 150 млн. теңгені құрайтын жобаны бастап, сапалы есіктер дайындауда. Бүгінде 10 адамды тұрақты жұмыспен қамтыған кәсіпорында күніне 20 дана есік сатылымға шығарылады. Дәулет Примжанов өндіріс цехы 2021 жылы іске қосылып, өнімдеріміз жоғары сұранысқа ие болды, тұрақты тұтынушыларымыз көбейді дейді. Заманауи құрылғылармен жарақтандырылған цех өнімдері сапалы, бағасы да қолжетімді екен. Кәсіпкер алдағы мақсатым кәсіпорынның аумағын ұлғайтып, өнім түрлерін көбейту деп отыр.​Цех жұмысымен танысқан қала әкімі Асылбек Шаменов шеберлерге ризашылығын білдіріп, мемлекет қолдауын тиімді пайдаланып отырған кәсіпкердің ісі алға өрлеуіне тілектестігін білдірді.​Расында да шаһарымызда айтулы кәсіппен айналысушылардың қатары артса, жергілікті тұрғындар үшін сырттан тасымалданатын өнімнен гөрі, өзімізде өндірілетін таза отандық өнім қай жағынан алғанда да пайдалы болмақ.<img src="https://knadmin.beoblood.kz/uploads/313966709_3222358988030837_2099535636037305850_n_fe943f6c7c.jpg" alt="313966709_3222358988030837_2099535636037305850_n.jpg"><img src="https://knadmin.beoblood.kz/uploads/314148336_3222358868030849_6274130815085263949_n_1e07b04cb0.jpg" alt="314148336_3222358868030849_6274130815085263949_n.jpg"><img src="https://knadmin.beoblood.kz/uploads/313910233_3222358911364178_2817600817307323646_n_9ada72e613.jpg" alt="313910233_3222358911364178_2817600817307323646_n.jpg"><img src="https://knadmin.beoblood.kz/uploads/313889402_3222358958030840_367927864203686807_n_876c159552.jpg" alt="313889402_3222358958030840_367927864203686807_n.jpg">

Қазақстан және Қызылорда облысының жаңалықтары: Экономика