<a href="https://kyzylorda-news.kz/">Kyzylorda-news.kz.</a>&nbsp; Бүгін облыс әкімі Нұрлыбек Нәлібаев ел ағаларымен бірге жаңа әуежайдың іргетасын қалау рәсіміне қатысып, жерлестерін береке мен бірлікке бастайтын «Көрісу күні» – Амал мерекесімен құттықтады.<blockquote>«Мемлекет басшысы Қасым-Жомарт Кемелұлының Сыр еліне деген қолдауымен аймақта берекелі істер атқарылуда. Облыс орталығында қала көркін еселеп, ажарын айшықтай түсетін бірқатар зәулім ғимараттың іргетасы қаланып, әлеуметтік нысандарды салу сәтті жүзеге асуда. Өздеріңізге белгілі, әуе қатынасы – өзінің ерекшелігімен үлкен сұранысқа ие, серпінді дамып келе жатқан саланың бірі. Жолаушылар және жүк ағымын ұлғайту, қызмет сапасын жақсарту үшін әуежайдың жаңа терминалын салу жөнінде шешім қабылданып, құрылыс жұмыстары жүргізілуде. Жаңа терминал жеке инвестор Болат Өтемұратов қорының қаржысы есебінен салынуда.Әкімдік әуежайдың сыртқы инженерлік-коммуникациялық инфрақұрылымын жетілдіріп, терминал аумағын абаттандыратын болады. Жаңа терминалда жолаушыларға халықаралық стандарт талаптарына сай барлық жағдай қарастырылған. Аталған жоба өңіріміздің әлеуметтік-экономикалық дамуына оң әсерін тигізеді. Әуе көлігі қызметін халықаралық деңгейге жеткізуге, авиациялық қауіпсіздікті күшейтуге, жаңа әуе бағыттарының ашылуына мүмкіндік артады. «Қорқыт Ата» әуежайының жаңа терминалы ежелгі Сыр жеріндегі заманауи әуе айлағы әрі Қызылорданы көріктендіре түсетін тағы бір айтулы нысан болатынына сенімдіміз», – деді аймақ басшысы.</blockquote>Іс-шара барысында қоғам қайраткері, Арал, Жалағаш, Қармақшы аудандары және Қызылорда қаласының құрметті азаматы, «Құрмет» орденінің иегері Биғали Қаюпов жерлестерін жаңа нысанның құрылысы басталуымен құттықтады. Қоғам қайраткері, Құрмет» орденінің иегері, Жаңақорған, Шиелі, Сырдария аудандары мен Қызылорда қаласының «Құрметті азаматы» Ибрагим Әбибуллаев жұртшылыққа бата берді.Айта кетейік, жаңа әуежай ғимаратының жалпы аумағы 7,5 мың шаршы метрден астам, жалпы құны 31 млн. АҚШ долларын құрайды. Нысан пайдалануға берілген кезде көлік саласының көрсеткіштері бірнеше есе артпақ. Қазір жылына 1400 рейс орындалса, 2025 жылға қарай рейс саны 3000-ға жетеді деп күтілуде. Тасымалданған жолаушы саны 260 мыңнан 500 мыңға дейін ұлғаяды. Ал, жүк тасымалы 150 тоннадан 300 тоннаға дейін артады деп межеленуде.Құрылыс кезінде 600-ден астам адам жұмыспен қамтылады, аяқталғаннан кейін 64 жаңа тұрақты жұмыс орны құрылады.Еске салсақ, биыл Қызылорда қаласы мен қалаға қарасты елді мекендердегі 236 көшеге орташа жөндеу жүргізу үшін 5 млрд. теңгеден астам қаржы бөлінді. Оның ішінде 99 көшеге асфальт және 137 көшеге тас төсеу жоспарлануда.Жолаушылар тасымалын жақсарту үшін 2022 жылы «Өнеркәсіпті дамыту қоры» АҚ арқылы лизингке жаңа үлгідегі 150 автобус алынды. Биыл 1 млрд. 434 млн. теңгеге тағы 150 автобус сатып алуға қаржы бағыттау үшін тиісті құжаттары рәсімделуде.<figure class="image"><img src="https://knadmin.beoblood.kz/uploads/335847586_3464115690531408_3000203748558016426_n_3fef2dc870.jpg" alt="335847586_3464115690531408_3000203748558016426_n.jpg"></figure>&nbsp;<figure class="image"><img src="https://knadmin.beoblood.kz/uploads/335829037_6425467690830729_5215972574497711722_n_a98674494d.jpg" alt="335829037_6425467690830729_5215972574497711722_n.jpg"></figure>&nbsp;<figure class="image"><img src="https://knadmin.beoblood.kz/uploads/335902402_764928468176189_3741350706343443311_n_0c402482c3.jpg" alt="335902402_764928468176189_3741350706343443311_n.jpg"></figure>&nbsp;<figure class="image"><img src="https://knadmin.beoblood.kz/uploads/335820851_472881271630733_5613808260523049709_n_1ebb3af7fb.jpg" alt="335820851_472881271630733_5613808260523049709_n.jpg"></figure>&nbsp;<figure class="image"><img src="https://knadmin.beoblood.kz/uploads/335825366_607637467463576_1802737966415826585_n_2dea2d1940.jpg" alt="335825366_607637467463576_1802737966415826585_n.jpg"></figure>&nbsp;<figure class="image"><img src="https://knadmin.beoblood.kz/uploads/335909453_171785431915137_2067704522159801791_n_8db2d91b9a.jpg" alt="335909453_171785431915137_2067704522159801791_n.jpg"></figure>

Қызылордада жаңа әуежайдың іргетасы қаланды

<a href="https://kyzylorda-news.kz/">Kyzylorda-news.kz.</a>&nbsp; Аудан әкімі Серік Сермағамбетовтың халықпен кездесуі бүгін Ақирек пен Қамыстыбас ауылдық округтерінде жалғасты. Аудан басшысының іс-сапары алдымен Ақбай ауылында өтті. Ауыл халқымен өткен кездесуде аудан әкімі жыл басынан бері өңірдегі атқарылған жұмыстарды баяндады.<blockquote>«Агроөнеркәсіп кешені саласында 2022 жылы еңбеккерлердің жұмысы жемісті болып, ауданымыз «Мал және балық шаруашылығын дамыту» бойынша аудандар арасында үздік деп танылды. Өткен жылы 13,4 млрд теңгенің ауыл шаруашылығы өнімдері өндіріліп, 104,2 пайызды құрады.</blockquote><blockquote>Былтыр ауылшаруашылығын дамытудың 2022-2024 жол картасын бекіттік. Жол картасы негізінен 3 бағытқа, яғни мал, балық және егін шаруашылығын дамытуға көзделген. Аталған бағдарламаға сәйкес ауданды егін шаруашылығына бейімдеу жұмыстары қолға алынуда, 2021 жылы 166,7 гектар жерге егін егілсе, 2022 жылы бұл көрсеткіш 704,2 гектарға жетті. Ал, биыл 1500 гектарға жеткізуді жоспарлап отырмыз», - деді С.Сермағамбетов.</blockquote>Сондай-ақ тұрғындармен басқосуда аудан басшысы ауылдың географиялық жағдайын ескере отырып, егін егу көлемін арттыру қажет екендігін алға тартты. Тиісінше дихандарға мемлекеттік қолдаулардың жеткілікті екендігін айтып, бірлесе жұмыс жасауға шақырды.Жыл қорытындысы бойынша халықпен кездесу мұнан соң Қамыстыбас ауылдық округінде жалғасты. Онда аудан әкімі барыс жылындағы жетістіктерді тізбектеп, алдағы жоспарларға да тоқталды.<blockquote>«Урбанизация және демографиялық процестерге байланысты 2025 жылға дейін білім ордалары салу көзделіп отыр. Жалпы аудан бойынша 12 мектеп салынса, оның 4-еуі «Жайлы мектеп» бағдарламасы аясында жүзеге асады. Ал осы Қамыстыбас ауылында типтік мектеп салу жобасы қолға алынады. Кәсіпкерлік саласында аудан жоғарғы орында. 2022 жылы ауданымыз бойынша тіркелген шағын және орта кәсіпкерлік субъектілері 6038 бірлікті құраса, оның ішінде 95 пайыздан астамы тұрақты жұмыс жасауда. Осыған орай, өткен жылы Арал қаласында аудандар арасында орталықтандырылған «Кәсіпкерлік үйі» алғаш болып ашылды. Қазіргі таңда, нысан кәсіпкерлерге және кәсібін бастаймын деген азаматтарға бизнес кеңес беру секілді қызмет түрлерін бір орталықтан көрсетуге мүмкіндік туған»,-деп кәсіпкерлікпен айналысамын деушілерге жан-жақты демеудің бар екендігін айтты.</blockquote>Есепті кездесуден соң аудан әкімі жеке мәселелері бойынша тұрғындарды қабылдады.<figure class="image"><img src="https://knadmin.beoblood.kz/uploads/e5a7dc34_c7bd_4372_ad1e_fea3ae4900f8_40835ef19b.jpg" alt="e5a7dc34-c7bd-4372-ad1e-fea3ae4900f8.jpg"></figure>

Арал ауданында биыл 1500 гектарға жерге егін егу жоспарлануда

<a href="https://kyzylorda-news.kz/">Kyzylorda-news.kz.</a> Биыл аудандық ауылшаруашылығы саласында жаңалық көп. Мал шаруасы мен құс бағытындағы жұмыстар жетерлік. Әсіресе, төрт түліктің төлін көбейтіп, өнім өндіруде ілгерілеу бар. Соның бір ғана көрінісі шұжық шығаратын зауытты айтуға болады. Сол секілді биыл егін шаруасы да ширай түсуде. Бүгін біз осы бағыттағы атқарылып жатқан жұмыстарды жүйелеп, тағы бір пысықтап алсақ.Биыл егіспен айналысатын 485 шаруашылық 37 781 гектар дән тастауды жоспарлап отыр. Соның 8346 гектары күрішке арналады. Жыл сайын әртараптандыру бағытына басымдық беруді көздеп отырған диқандар жөнінде толығырақ таразылауға тырыстық.<blockquote>«Азық-түлік қауіпсіздігін сақтау мен бағаны тұрақтандыру мақсатында қосымша жерлер ашылып ұжымдық түрде 295 гектарға картоп, көкөніс, бақша дақылдарын орналастыру бағытында жұмыстар атқарылуда.Нақтырақ айтқанда 845 адам отбасылық егістікпен айналысып, нәтижесінде әлеуметтік маңызы бар азық-түліктермен өзін-өздері қамтитын болады.Бүгінгі таңға шаруашылық жетекшілерінің демеуімен 150 гектарға жуық егістік алқаптары шеңгел,жусандардан тазартылып, 90 гектары қоршаланып дайындалды», – деді бас аграном Дәурен Абибуллаев.</blockquote>Ауданның ауыл шаруашылығы құрылымдары биылғы жылдың егісі үшін &nbsp;3151 гектар күздік бидай егуді және 7300 гектар сүдігер айдауды қамтамасыз етіпті. Сонымен қатар ағымдағы жылы бірқатар шаруашылықтар тарапынан тамшылатып суару әдісі мен жаңбырлатып суару жүйесіне көшуге басымдық берілуде.Тамшылатып суару технологиясымен Талап ауылдық округінде «Қызылорда Агроплюс» ЖШС-де 5 гектар қызанақ егуді жоспарлауда. Жаңбырлатқыш суару технологиясымен Қожакент ауылдық округіне қарасты «Береке» шаруа қожалығы 30 гектар малазықтық дақылдарды егуді мақсат етіп отыр. Жалпы біздің ел әлемнің 123 еліне 800-ден астам тауар түрін экспорттайды. Тауарлардың 65 пайызы Қытай, ЕАЭО және ЕО елдеріне жеткізіледі. Сарапшылардың айтуынша, қазақ тауарларының экспорттық әлеуетін көтеретін мүмкіндіктердің алғышарты енді қалыптасты.Оның негізі осы салада жатыр. Мәселен, біздегі қарбыз, жүгері сусыны мен шұжық өнімі осының бастауы деп білеміз. Егер бақша өнімін көбейте беретін болсақ базар нарығын өзіміз-ақ реттейтін боламыз.<blockquote>«Аудан бойынша 2023 жылдың егісі үшін шаруашылық құрылымдарының қолында 2087 тонна күріш тұқымы бар. Сонымен қатар, 2023 жылдың егісіне қажет 50 тонна жоңышқа тұқымы толығымен дайын, ал 50 тонна мақсары тұқымы дайындалды. Биылдың егісіне қажетті минералдық тыңайтқыштардың көлемі 4462 тонна, оның ішінде 4226 тоннасы – азотты, 236 тоннасы фосфорлы тыңайтқыштар болса, қажетті гербицидтердің көлемі 3113 литрді құрайды. Қазіргі таңда шаруашылықтар тарапынан минералдық тыңайтқыштардың 4220 тоннасы (94,6%) және 1005 кг/л (32,3%) гербицид сатып алынды», – деді жауапты маман.</blockquote>Техника және жанар-жағар майдың да жайы алаңдатады. Аудан бойынша көктемгі дала жұмыстарына 1 422 тонна дизель отыны бөлінген. «Жібек Жолы LTD и К»ЖШС – 524 тонна, «Жаңақорған ОiI» ЖШС – 898 тоннаны жауапкершілігіне алыпты. Қазіргі таңда аудан бойынша 10 шаруашылық құрылымы бойынша «Жаңақорған ОiI» ЖШС-нен 150 тоннаға жуық дизель отыны алынған.Көктемгі дала жұмыстарына 207 трактор, 38 соқа, 28 дән сепкіш, 21 автомашина, 52 трактор тіркемесі толығымен дайын екен.<blockquote>«Ауданда &nbsp;2023 жылы межеленген егіс көлемдеріне сәйкес, көктемгі дала және егіс егу жұмыстарына қажетті қаржы көлемі 615 млн теңгені құрайды. Осы қажет қаржыдан шаруашылықтардың өз есебінен 197 млн теңге, инвесторлар тарапынан 160 млн теңге, басқа көздер арқылы арқылы 140 млн теңгеге қаржыландыру жоспарланды. Сонымен қатар, «Қамқоршы» несие серіктестігі арқылы «Кең-Дала» бағдарламасымен 14 шаруашылық құрылымдары 82,3 млнтеңге несие несие берілді», – деді бас аграном.</blockquote>Сонымен биылғы жылы көктем ерте шығып, аудан шаруашылық құрылымдары көктемгі дала және егін егу жұмыстарына аяқтап, санаулы күннен кейін дән тастап бітеді. Бүгінгі таңға аудан бойынша 1700 гектар жаңа жоңышқа егу, &nbsp;2100 гектар күздік бидай және ескі жоңышқаның 6400 гектарына тырмалау жұмыстары жүргізіліп, көктемгі дала және егін егу жұмыстары жалғасуда.Міне, аудандағы аграрлы саладағы серпілістің бір келбеті осылай реттелуде. Бұл дегеніміз отандық өнімнің өрісін кеңейту, сонда ғана нарықты өзгелер емес, өзіміз-ақ реттейтін боламыз. Халықтың негізгі тұрмыс-тіршілігі ауылшаруашылығы саласымен тығыз байланысты болғандықтан осы бағытта атқарылар жұмыс ауқымды. Әсіресе, ауылдағы ағайын егін мен мал шаруасынан жыл он екі ай нәпақасын тауып отыр. Бұйырса биылғы егіс мол өнім береді деп күтілуде. Ол үшін күтім мен аяқ су уақытылы берілсе болғаны. Қалғаны уақыттың еншісінде.

Жаңақорған ауданы 3151 гектар күздік бидай егуді бастады

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы құрылыс секторындағы жоғары өсу қарқыны бар аймақтар қатарында. Бұл туралы бүгін Үкімет отырысында ҚР Ұлттық экономика министрі Әлібек Қуантыров хабарлады.<blockquote>«Орындалған құрылыс жұмыстары бойынша Жетісу облысынан басқа барлық өңірлерде оң өсім тіркелді. Әсіресе, құрылыс-монтаждау жұмыстарының жоғары өсімі Жамбыл, Маңғыстау, Ақтөбе, Абай және Қызылорда облыстарында байқалды», - деді ведомство басшысы.</blockquote>Үкімет басшысы Әлихан Смайыловтың төрағалығымен өткен Үкімет отырысында 2023 жылғы қаңтар-ақпан айларындағы әлеуметтік-экономикалық даму қорытындылары, республикалық бюджеттің атқарылуы, «Жастар саясатын дамыту» тұжырымдамасы мен «Нашақорлыққа және есірткі бизнесіне қарсы күрес жөніндегі 2023-2025 жылдарға арналған кешенді жоспар» жобалары қаралды.Республикалық штаб отырысынан соң облыс әкімінің бірінші орынбасары Серік Қожаниязов ҚР Премьер-Министрі берген тапсырмаларды пысықтау мақсатында жиын өткізді. Серік Салауатұлы Үкімет басшысының тапсырмаларын мұқият орындап, барлық әлеуметтік-экономикалық даму бағыттарында межелі көрсеткіштерге қол жеткізу қажеттігін атап өтті.<figure class="image"><img src="https://knadmin.beoblood.kz/uploads/335465185_1341528486641985_9114956831320084976_n_32be3c67b8.jpg" alt="335465185_1341528486641985_9114956831320084976_n.jpg"></figure>

Қызылорда облысында құрылыс секторындағы өсу қарқыны жоғары

<a href="https://kyzylorda-news.kz/">Kyzylorda-news.kz.</a> Байқоңыр &nbsp;қаласында заман талабына сай кәсіп түрлері мен нысандары көбейіп келеді. Соның бірі – «Болашақ» сауда орталығы. Ол қала тұрғындары мен қонақтарына үздіксіз қызмет көрсетумен қатар, тұтынушы талғамынан шығып келе жатқан дүкен. Онда сапасы жоғары және табиғи азық-түлік өнімдері сөрелерде самсап тұр. Жұмсақ нан, шелпек, самса, тұшпара, басқа да ұннан жасалған өнім түрлеріне қашан да сұраныс жоғары. Тағы бір айта кетерлігі, ондағы нан өнімдері сауда орталығының өз наубайханасында өндіріледі. Нанға сұраныстың көптігі сол, кейде сөреге қойылған бойда-ақ таусылып қалатыны бар.«Тұтынушының сұранысына сай кей сәтте қайта нан пісіріп жатамыз. Кондитерлік өнімдер де орталыққа қарасты шағын цехымызда дайындалып, сатылымға шығарылады», &nbsp;дейді отбасылық кәсіп иелері Ерлан Жаппасбаев пен оның жары Меруерт Тоқтарбекқызы бізбен әңгімесінде.Өнегелі отбасында өсіп-өніп, қала тұрғындарының алғысына бөленген кәсіпкерлер елдің өркендеуінде кәсіпкерлік саласының маңызды рөл атқаратынын алға тартады.«Қазақ халқы басқадан дастарқанының молдығымен, көңілінің ашықтығымен, жүрегінің жомарттығымен өзгешеленген халық. Ас-ауқат мол болған жерде береке де, бірлік те бар. Кәсібімізді азық-түлік, нан өнімдерімен байланыстыра ашқанымыздың да сыры осында жатыр. Қазіргі уақыт пен бұған дейінгінің арасында жер мен көктей айырмашылық бар екенін айтудың өзі де артық шығар. Соған орай талап та жоғары. Тәуекел ете білсең, Тәңірі несібесіз қалдырмайды. Барды жоқ ететін, нығметіңнің жолын кесетін бір ғана жаман нәрсе бар – ол жалқаулық. Содан аулақ болып, еңбек етуге, тер төгуге өзіңді әркез қамшылап отырсаң, озып шығасың. Одан Отаның да, отбасың да ұтады, жемісін көреді. Қолымыздан келгенше көпбалалы, тұрмысы әлжуаз отбасыларға көмек көрсетіп, Қызылордадағы балалар үйіне қайырымдылық жасап келеміз. Тапқаныңды мұқтаж жандармен бөлісу де – үлкен сауапты іс. Мереке күндері де қамқорлық жасаудан құр қалмаймыз», &nbsp;дейді «Болашақ» сауда орталығының басшысы Меруерт Тоқтарбекқызы күлімдей сөйлеп.Кәсіпкер 50-ден аса қала тұрғынын тұрақты жұмыспен қамтыған. Ұжымда еңбек ететіннің көпшілігі жастар. Сол себепті де ол қарамағындағылардың тұрмыс-тіршілігіне назар аударып, жұмыс істеуіне барынша жағдай жасап қойған. Кәсіп істеу оңай тірліктен емес. Әйтпесе елдің бәрі кәсіп ашып кетер еді-ау. Оған қаншама төзім, шыдам, сабыр керек. Адаммен жұмыс істеген соң түрлі жағдай болады. Осындай кедергілердің бәрін еңсеріп, бағытынан айнымай келе жатқан Меруертті осы адамгершілік қасиеті үшін байқоңырлықтар сыйлап, құрметтейді. Біреуге болсыншы дейтін қағиданы ұстанатын кәсіпкердің жұмысы сан-салалы болғанымен, ұжымды ұйымдастырып, ұйыстырып ұстауда тәжірибесі көпке үлгі.«Қазақ қашанда бір-біріне демеу болып, үйіне келген қонақ үшін қазан көтерген. Дастарқанын жайып, батасын алған. Жарым екеуміздің де бар арман-мақсатымыз халыққа адал қызмет етіп, батасын алу, ризашылығына бөлену. Адалынан жүріп-тұрсаңыз, кәсіп етсеңіз одан өрісіңізді кеңейтпесеңіз, жаман болмасыңыз анық. Атамыз Бердібек Жаппасбаев Байқоңырда алғашқылардың бірі болып кәсіп бастаған кісі. Ол 8 сауда желісі мен Ақай ауылында 4 шағын цех ашты. Алғашында атамыз қарамағына 300 адамды жұмыспен қамтып, тұтынушыны шұжық, ет, сүт, балық, макарон, тағы басқа тұрмысқа қажетті өнімдермен қамтамасыз етіп отырды» дейді Меруерт Тоқтарбекқызы сөз арасында.Бала кезінен әкесінің әрбір істеген ісіне қарап, өзіне өнеге алған Меруерттің жары Ерлан да кәсіпкер болуға жастайынан-ақ бейім болды. Ол да кәсіптің бірнеше түрін ашып, дамытуда. Жалпы бұл әулетте кәсіп ету әкеден-балаға мирас болып келе жатқан дүние десек артық емес. Өйткені ерлі-зайыптылардың отбасындағы тұңғыш баласы Ермек те кәсіптің қыры мен сырына кішкентайынан қанық болып өсіп, ата-анадан үлгі алған жайы бар.Әрбір нәрсенің өз қайнар бұлағы болады. Әулеттегі отбасылық кәсіптің ұйымдастырушысы Ерлан Бердібекұлы 1998 жылы Байқоңырда сүзгіден өткен таза ауыз су шығаратын бірнеше аппарат сатып алып, онымен қала тұрғындарын қамтамасыз еткен. Сонымен қатар еліміздегі «Жасыл экономика» бағдарламасы аясында күннен қуат алатын электр стансалары құрылып жатқанын білеміз. Осы бастаманы жүзеге асыруға асыққан жаңалыққа құмар Ерлан бауырымыз өз шаруашылығында іске қосқан азамат. «Құс өсірсең, тауық өсір» демекші, шаруашылық ауласында жүрген бірнеше жылқы, сиыр, ешкімен қатар Қостанайдан 1200 голландиялық тауық әкелгенін және олардың саны бүгінде екі есеге артса, шаруашылық меншігіндегі басқа бірнеше жүздеген қазақы тауық тұқымы өсірілуде. Олардан алынған жұмыртқа дүкенге сатылымға қойылады. Шаруашылықтың асырап отырған бөденесі де сұранысқа ие өнім. Кәсіпкердің өсіріп отырған гидропоникалық цехы да бір жаңалық.Ерлі-зайыптылар шаруа шылық жылыжайында дастарқанға қойылатын ас мәзірі – түрлі салаттың сәнін келтіретін айсберг, изумруд деген атауы бар дәруменді жапырақтар мен қызанақ, қияр, тағы басқа көкөністерді өндіруде.Қазіргі таңда 100-ге жуық өңір тұрғынын жұмыспен қамтып отырған Ерлан мен Меруерттің болашаққа жасаған жоспарлары көп-ақ. Іскер жандар кәсіпте жұртшылыққа шеберлігімен танылса, олар отбасында 5 бала тәрбиелеп отырған бақытты ата-ана.

Байқоңырдағы «Болашақ» сауда орталығы сапалы қызмет көрсетуде

<a href="https://kyzylorda-news.kz/">Kyzylorda-news.kz.</a> Мемлекет экономикасының қалыпты дамып, тоқырауына тоқтам қоя алатын жетекші саланың бірі салық деп айтуға болады. Халықтың әл-ауқатының артып, тұрмысының жақсаруына оң ықпал етіп, тіршілікте тірек салаға айналып үлгерген де салық комитеті екені сөзсіз. Демек, экономика дамуының белсенділігі бәсеңдемегені игі.Дағдарыста дағдарып қалмауымыз үшін тиімді шешім қабылдап, тиісті тетікті табудың маңызы зор. Осы ретте, салық жүйесінің қоғам үшін мәні мен орны ерекше екенін бағамдап, түйсікпен түсіне білгеніміз ләзім.Бюджет тайқазанына түскен қаржыны үлестіріп, заң шеңберінде шектен шығушылықты анықтап, бақылауды күшейтіп, есеп-қисап жүргізу оңай жұмыс емес. Сондықтан салық саласында салғырттық танытуға әсте болмайды. Қаражатты қамдап, бюджетке түсуі тиіс төлемдер мен салықты белгіленген көрсеткіште жүзеге асуын қадағалау – басты мақсаттың бірі. Астарында ауыр жүк жатқан жауапты жұмыста жауапкершілік танытып, бүтін бір айтулы саланы ұқыптылықпен ұршықша иіріп жүргізу, қадағалау арқылы салық жүйесін қарқынды дамыту – салық басқармасының негізгі міндеті.Мемлекеттік кірістер органдарының мақсаты – салықтар мен міндетті төлемдердің бюджетке мерзімінде және толық түсірілуін қамтамасыз ету, «көлеңкелі» экономиканы болдырмауға қызмет жасау, қоғамдағы салық мәдениетін көтеру.Қазіргі таңда, ақпараттық және инновациялық технологиялар жаңарған сайын салық, кеден жүйесіндегі бақылау мен әкімшілдендіруді жетілдіруге байланысты өзгерістер де күн санап дамып келеді. Мұндай оң өзгерістер облысымызда да орын алуда. Мәселен, облыс бойынша 2023 жылдың 1 қаңтарына барлығы 560 759 мемлекеттік қызмет, оның 559 488 немесе 99,8% электронды жүйемен, 1271 немесе 0,2% ғана қағаз түрінде көрсетілген. Мемлекеттік қызметтің электронды түрде көрсетілуі өткен жылмен салыстырғанда 37243-ке немесе 1,5% өссе, ал қағаз түрінде көрсетілуі 7849-ға азайып отыр, яғни қағазбастылықтан арылып, адами факторларды болдырмау үшін осындай қызметтер көбеюде. Жалпы жыл басындағы жағдай бойынша мемлекеттік тіркеуде 12379 заңды тұлға және 781244 жеке тұлға, оның ішінде 62947 дара кәсіпкер.Аймағымыздағы салық жүйесіне қатысты жағымды жаңалықтар жетерлік. Бұл қызметтің дұрыс ұйымдастырылуы мен аталған саланың бірізділікке түсуінен деп білемін. Сөзімізді сабақтасақ, шағын кәсіпкерлік субъектілерінің саны – 71963, оның ішінде 9016 заңды тұлға, 62947 дара кәсіпкер. Жыл басымен салыстырғанда заңды тұлғаның саны 359-ға, ал дара кәсіпкерлердің саны 15095-ке артқан. Өңіріміздің салық төлеушілері жыл санап өсіп келе жатыр деп айта аламыз, яғни, 2022 жылы мемлекеттік бюджет 206 млрд 366 млн теңгемен қамтамасыз етілді немесе өткен 2021 жылмен салыстырғанда 43 млрд 303 млн теңгеге артық түсті. Әлбетте, жүргізілген жұмыстың жемісті болуы – әрбір қызметкердің маңдай тері мен еткен еңбегінің нәтижесі. Салық саласының қыр-сырын меңгеріп, жауапкершілікпен, абыроймен қызмет ететін жандар барда департамент жұмысы жандана бермек. Бүгінде департаменттің штаттық саны 332 бірлікті құрайды, оның ішінде: облыстық аппаратта 151 бірлік (45,5%), аумақтық бөлімшелерде 181 бірлік (54,5%).Департаменттегі өз ісіне мығым, іскер, мықты мамандарымыз аса ыждағаттылықпен қарап, ықтиятты жұмыс істейтіні қол жеткізген жетістіктерімізден белгілі болып тұратындай. Әсіресе, отбасы мен қызметті қатар алып жүрген әйел адамдардың еңбегі ерен. Олардың саны 175 (53%), оның ішінде облыстық аппаратта 78 (52,7%), қала, аудандарда 97 (54%). Сонымен қатар, басшы лауазымдағы әйелдер саны 26-ны құрайды, оның ішінде облыстық аппаратта – 17, қала, аудандарда – 9. Тарқата айтсақ, салық және кеден органдары саласынан бүгінгі күнге дейін 55 әйел зейнеткерлік жасқа толуына байланысты демалысқа шыққан. Ал көпбалалы аналар саны – 29 қызметкер. Оның ішінде 1 қызметкер «Күміс алқа» иегері – Раббия Айтбаева. Шикілік шықпауы үшін шыдамдылық танытып, кемшілік кетпес үшін көз майын тауысып құжаттарды реттеп, олқылыққа жол бермейтін қызметкерлер абырой биігінде.&nbsp;Департаменттің жүйелі жұмысына, салық саласына сүбелі үлес қосудан тынбайтын әйелдер қауымының еңбегі зор. Еселі еңбегінің арқасында саланың еңсесін тіктеп, беделімен биік белестен көрінген қызметкерлеріміз мақтауға лайық. Департаментте марапат мінберінен көрінген майталмандар аз емес. Әйелдер қауымынан 2 қызметкер «Қаржы қызметінің үздігі», 4 қызметкер «Салық қызметінің үздігі», 11 қызметкер «Мемлекеттік кірістер органдарының үздігі» атанған. Одан бөлек, қызметкерлеріміз «ҚР Тәуелсіздігіне 10 жыл», «ҚР Тәуелсіздігіне 20 жыл», «Қазақстан Конституциясына 20 жыл», «ҚР Тәуелсіздігіне 25 жыл», «Қазақстан Конституциясына 25 жыл», «ҚР Тәуелсіздігіне 30 жыл» мерекелік медальдарымен марапатталған. Сайып келгенде, мұның бәрі жұмысқа адалдықтың көрінісі һәм нақ көрсеткіші екені ақиқат.&nbsp;

Салық саласының жетістіктері

<a href="https://kyzylorda-news.kz/">Kyzylorda-news.kz.</a> Қолданылған тұрмыстағы қалдықтарды қайта өңдеп, тіршілік айналымына енгізуді қолға алған Жаңақорғандық кәсіпкер Насырла Мурзаев. Бұл ауданның &nbsp;ішкі нарығына, өнім өндіруіне, тіпті экономикасына оң әсерін тигізуде. Ең бастысы, экологиялық залалдан тазарып, тазалықты тұрақтандырады. Әрі табыстың көзі.Жаңақорған ауданында кәсіп енді ғана еңсе көтеріп келеді. Шымкент қаласындағы шағын зауыт қағаз, шыны ыдыстары мен баклашкаларды қайта өңдеуге ден қойған. Ал, оған шикізат жеткізіп беруде біздің қос жаңақорғандық кәсіпкер бірнеше жылдан бері жұмыс істеп келеді. Соның бірі – Насырла Мурзаев. Шағын шаруасын отбасылық бизнеске айналдырған ағамыздың кәсібін көруге арнайы барып, сұхбаттасып қайттық.Иә, полигондарда үйіліп жатқан қоқыс үйінділерін сұрыптап, жаңа өнім шығаруға болатынын сіз білесіз бе? Бұл үлкен саланың бірі. Қоқыс саласы бизнес көзіне айналуы үшін қомақты қаражатты, дұрыс дайындықты талап етеді. «Қоқыс қалдықтарын қайта өңдеу» өзекті проблемалардың бірі. Әлемдегі жетекші елдердің тәжірибесі көрсеткендей, бұл мәселені оңтайлы шешуге толық мүмкіндік бар.<blockquote>«Тіршілік барда қоқыс ешуақытта таусылмайды. 10 жылдан астам уақыт қажетсіз қалдықтарды жинап, Шымкент қаласындағы зауытқа өткізуді қолға алдым. Отбасым қолғабыс болса, қарамағымда тағы 2-3 жұмысшы бар. Күнделікті жұмыста макулатура, бөтелке, шыны, баклашка, салафан пакеттерді жинап, сұрыптаймыз. Тұрмыстық қатты заттарды теріп, сұрыптап, арнайы зауытқа өткізіп, табыс тауып жүрген жайымыз бар. Бір ай бойы жиналған қоқысты сұрыптап, ретке келтіреміз. Былтырғы жылға қарағанда биыл жұмыс жақсы жүруде. Өткен жылы 2-3 айда бір өткізетінмін. Биыл ай сайын 10-15 тоннадан кем өткізіп жатқанымыз жоқ. Тұрғындар да, тазалық мекемелері де үйренді. Күнделікті жиналған қоқыстарды өткізіп тұрады. Тіпті, Байкенже, Сунақ ата, Шалқия, Бірлік сынды ауыл тұрғындары да бізге үйренді. Жинап қойған заттарын айына бір рет барып жинап кетеміз», – дейді кәсіп иесі.</blockquote>Отбасылық кәсіппен нәпақасын тауып отырған Мурзаевтар отбасы кәзіргі таңда айлық табысының да жақсы екенін жасырып қалмады. Жақында жеке кәсіпкер ретінде тіркеліп, мемлекеттен көмек алуға мүдделі. Ағамыз балаларын осы кәсіпке икемдепті. Өзімен бірге жүріп, аудандағы үлкен сауда орталықтарынан дайындап қойған қоқысты көлікпен тиеп әкетеді.<blockquote>«Алланың берген екі ұлым бар. Былтыр мемлекеттен бөлінген 1 250 000 теңге грантты бір ұлым алып, қажетімізге жұмсадық. Одан бөлек зауыттармен келісім-шартқа отырып, жұмыс қарқынынын кеңейтудеміз. Алдағы уақытта 2-3 адамды жұмыспен қамту ойда бар. Наурыз айында Қызылорда қаласында шыны зауыты ашылса, сол жаққа өткіземіз, әзірге Шымкент қаласындағы «Boom prom» заводына кардондар, салафандар мен бөтелкелерді өткізудеміз», – дейді кейіпкеріміз.</blockquote>Бала кезімізде алдыңғы буын ағаларымыз темір-терсек, шыны ыдстарды өткізіп пұлдайтын. Үйден емес, сырттан теріп, теңге табатын. Қазір үйден шыққан қалдықты апарып өткізуге жеткіншектер жиіркенетінін ағамыз тартты. Әйтпесе, қажетсіз қағаз бен баклашкадан әжептеуір табыс табуға болады. Кейбір құжаты жарамсыз мекемелер қағазды өртемей осында өткізеді екен. Бұл да жақсы жүйе ғой. Керек болса кәсіпкер кез келген орталықтан тауарды қаржысын төлеп алуға дайын. Келісін есептеп, қажетін алып кетеді. Бірақ бұған біз дайын болмай жатқан жайымыз бар.Статистикаға зер салсақ, Қазақстанда жылына 31 млрд тоннадан астам қалдық шығарылады. Одан 120 млн тоннаға жуық қатты тұрмыстық және 2,5 млрд тонна қауіпті қалдық жиналады. Бұл сандар қоқысты кәдеге жаратудың қажеттілігі тұрғанынан хабар береді. Әлбетте, қоқыспен күрес – жалғыз бізді ғана емес, дүниежүзі елдерін толғандырған жаһандық мәселе. Химиялық қалдықтар өңір келбетін бұзып қана қоймайды, қоршаған ортаға үлкен зиян келтіреді. Жердегі қоқыстар мен қалдықтар ыдыраған кезде пайда болатын заттар атмосфералық ауаны ластайды. Айталық, табиғи жағдайда қарапайым қағаз 2 жылда ыдырайды. Химиялық жолмен өндірілген өзге де тұрмыстық қатты қалдықтар ше? Мәселен, ғалымдар металл консерві банкалары табиғи процеспен жойылуға 90 жыл кететінін, ал, шыны банкаларға – 1000 жыл қажет екенін алға тартады. Сол секілді қаңылтырға – 90 жыл, әйнекке – 1000 жыл уақыт керек екен.Мұнымен айтпағымыз кенттің келбеті ең бірінші тазалығынан көрінетіні анық. Күнделікті қолданыстағы тұрмыстық қалдықтарды жерге тастамай, ауламызды ластамай, өз денсаулығымызға, ортамызға зиянды әдеттен құтылып Насырла мырзаның кәсібіне қолдау білдіріп, қоқыстан ақша тауып әрі тазалыққа бет бұрсақ нұр үстіне нұр емес пе? Қоқыс қалауын тапса кіріс әкеледі деген сөздің астарын түсінген жанға тек пайда алып келері анық. &nbsp;Статистикаға зер салсақ, Қазақстанда 31,72 млрд тоннадан астам қалдық шығарылады. Одан 120 млн тоннаға жуық қатты тұрмыстық және 2,5 млрд тонна қауіпті қалдық жиналады. Бұл сандар қоқысты кәдеге жаратудың қажеттілігі тұрғанынан хабар береді. Әлбетте, қоқыспен күрес – жалғыз бізді ғана емес, дүниежүзі елдерін толғандырып отырған жаһандық мәселе. Химиялық қалдықтар өңір келбетін бұзып қана қоймайды, қоршаған ортаға үлкен зиян келтіреді. Жердегі қоқыстар мен қалдықтар ыдыраған кезде пайда болатын заттар атмосфералық ауаны ластайды. Айталық, табиғи жағдайда қарапайым қағаз 2 жылда ыдырайды. Химиялық жолмен өндірілген өзге де тұрмыстық қатты қалдықтар ше? Мәселен, ғалымдар металл консерві банкалары табиғи процеспен жойылуға 90 жыл кететінін, ал, шыны банкаларға – 1000 жыл қажет екенін алға тартады. Сол секілді қаңылтырға – 90 жыл, әйнекке – 1000 жыл уақыт керек.Әлем елдеріндегі тәжірибеОсы тұста әлем елдерінде тазалыққа қаншалықты мән беретінін зерделеп көрген едік. Қолда бар ақпаратқа сүйенсек, дамыған елдерде жерде жатқан қоқыстар әжептәуір табыс көзі саналады. Әсіресе, қағаз өнімдері, әйнек сынықтары, бөтелкелер, полимерлер, пластик өнімдері, ағаш және темір заттары кәдеге жарамды әрі сұраныста екен. Мәселен, Финляндия қалдық заттарды өңдеу бойынша әлемде көш бастап тұр. Онда «қалдықтар иерархиясы» деген принцип бар. Бұл – қалдықтарды болдырмау деген сөз. Қытайда қоқыс сұрыптау, қайта өңдеу үлкен бизнес көзінеайналған. Пекинде қоқысты түрлі әдіспен сұрыптайды. Бір ғана Шанхай қаласының өзінде мыңдаған қоқыс қабылдау орындарында 2,5 миллионнан астам жұмысшы еңбек етеді. Францияда қоқысты қайта өңдеу арқылы 30 пайыз аллюминий, 50 пайыз әйнек, 50 пайыз газет қағазын өндіреді екен.Қаламгер Қайнар Олжайдың жазуынша, ағылшындар да поллиэтилен мен пластиктен жасалған тұрмыстық қатты заттарды шектеудің жолын тапқан. Олардың кейбір супермаркеттері мен дүкендер желісінде «Бізге өз дорбаларыңызбен келіңіздер!» деген әлеуметтік жарнамалар ілінген екен. Кейбір елдер қатты қалдықтарды жинап, қолданысқа енгізу үшін зауыттарды іске қоса бастады. Мәселен, Өзбекстанда пластик құтыларды өңдеу ісі жолға қойылған. Олар көбіне қайта балқытып, көкөніс пен жеміс салатын жәшіктер шығарады. Себебі, ағаш пен темір жәшіктерден пластиктен жасалған жәшіктер қолдануға ыңғайлы. Осы себепті, сұранысы да жоғары. Сол секілді Қытай темірден түйін түйсе, филиппиндіктер полиэтиленген пакеттер мен ыдыс құтылардан қайық жасап, туристерге ақылы қызмет көрсетіп, нәпақасын тауып отыр. Ал, Мексика пластиктік тұрмыстық қалдықтарды кәдеге жаратып, үйлер тұрғыза бастапты. Міне, әлем елдері зиянды заттарды қажеттілікке икемдеп, тазалыққа мән беріп жатыр. Тағы бірі қайта өңдеп, қолданысқа енгізуде. Мұның бәрі түптеп келгенде қоршаған ортадағы тепетеңдік заңдылығын сақтап, әлемді экологиялық апаттан қорғап, адам денсаулығына оң әсерін тигізері анық.Міне, өзге елдерге қарап көз сүйсінеді. Ал, бізде керісінше қоқыс жәшігі қойылса, ізбе-із сындырып немесе өз аулаларына қойып алатындар да кездеседі. О тоба десеңізші, қоқыс жәшігі түгілі балаларға арналған ойын тербелгішін өз үйіне кіргізіп алғандарын көргенде жағамызды ұстадық. Содан болар, тазаланған аймақ қайта қоқысқа толып, еңбекті еш ететіні.Түйінін айтсақ, қатты қалдықтармен қоғамды ластағанша, жиыптеріп, өткізіп отырсақ, қаражатқа айналып шыға келеді, бастысы аулаңызға жинап, Насырулла ағаның кәсіпорнына хабар берсеңіз болғаны. Әрі, кәсіпкер Насырулла ағамыздың кәсібіне демеу бергеніміз болар еді. Ал, мемлекеттен берілетін көмекті құзырлы органға қалдырайық.

Жаңақорғандық кәсіпкер айына 10-15 тонна қоқыс өткізіп, пайда тауып отыр

<a href="https://kyzylorda-news.kz/">Kyzylorda-news.kz.</a> Жиһаз өндірісі – экономикаға серпін беретін саланың бірі. Келешекте үлкен әлеуетке ие болу мүмкіндігі бар бірегей сала – жиһаз өнеркәсібі. Бұл – бізде даңғыл жолға түсіп кете қоймаған бағыт. Дегенмен соншалықты тұралап қалған да кәсіп емес.. Жаңақорғанда бұл кәсіппен айналысушылардың қатары жыл сайын артып келеді. «Жас келсе іске» демекші, ауданымызда кәсіптің көзін тауып, ісін дөңгелетіп отырған жастардың саны жыл сайын артып келеді. Бүгінгі нарық заманында әркім өз бетінше жұмыс істеп, кәсібінен нәсіп теруді жөн санайды. Әсіресе, жеке кәсіпкерлігін ашып, өз ісінің өрге домалауын жолға қоюды көздейді. Сондай жандардың бірі Мелдебеков Нұрсұлтан Темірханұлы кент орталығынан «Хан-ша» жиһаз орталығын ашып, көпшілікке қызмет етуде.«Қалауын тапса, қар жанар» деген тәмсіл бар дана қазақта. Жолын тапсаң, табыстың көзін де табасың. Осы ретте аудан тұрғындарына жиһаздың түр-түрін жеткізіп, заманауи тұрмыстық қажеттіліктерді көпшілікке ұсынып отырған кәсіпкер – Нұрсұлтан да нартәуекелге бел буып, ойға алған мақсатын жүзеге асыруда. Нарық қатынастары қатал, ол ешкімді аямайды, дегенмен жанын жалдап еңбек еткенді құр қалдырмайтынын жоққа шығара алмаймыз.<blockquote>«Қазіргі таңда «қимылдағанның қыр асатынын» елдің бәрі біледі ғой. Қызылорда қаласында Қорқыт ата атындағы университеттің ауыл шаруашылығы саласын бітіріп келдім. Алайда, өз салам бойынша жұмысқа орналаса алмадым. 2013 жылы «Ақ жол» сауда орталығына жұмысқа орналастым. Нұрболат Аширов ағамыздың қамқорлығымен көп тәжірбие жинақтап, сауданың қыр-сырын меңгеріп, міне бір жылдан бері өзімнің «Хан-ша» жиһаз орталығын аштым. Шүкір, қазір дамудың даңғыл жолына түсіп, кәсібімнің шырайы кіре бастады. Енді осы кәсібімді кеңейту мақсатында «Даму» қорынан несие алдым. Бұйыртса, жиһандың сан алуан түрінен әкеліп, халықтың таңдауына кең мүмкіндік жасасам деген ниетім бар», – дейді кәсіпкер.</blockquote>Міне, сөзіне ісі сай бозбалаға қарап кәдімгідей марқайып қалдым. Жұмыс жоқ деп сылтауратпай, қолынан келетін істі кәсіпке айналдырып келеді. Байқасаңыздар, нарық заманы мол табыс тауып, жаңа жұмыс көздері көптеп ашылып, кәсіпке бейімделуге жол ашты. Жас кәсіп иесінің бір күнімен танысқанымызда оның өз ісіне адалдығын аңғардық. Әр келушіні жылы шыраймен қарсы алатын ол, кез-келген тұтынушының қажетін тауып беруге тырысады. Әр заттың қалай жасалғанын, сапасының қандай деңгейде екенін айтып, нәпақасын адал еңбекпен табатынын байқатты.<blockquote>«Еңбектің қай түрінде болмасын ерінбесең ризық табасың. Шағын болса да береке дарыса кез-келген істің алға жылжитыны анық. «Ханша» жиһаз орталығынан бөлек құрылысқа қажетті заттарды сататын қосымша дүкеніміз бар. Қазір де бес адам таңнан кешке дейін халыққа қызмет етіп жатқан жайымыз бар. Бір орында тоқтап қалуға болмайды. Өзім үнемі ізденіс үстінде жүремін. Қалаға барған сайын жиһаз дүкендерін ондағы тауардың сапасын үнемі бақылап отырамын. Өзім саудаға жоғары сападағы әрі әдемі тауарларды шығаруға тырысамын. Өйткені, тұтынушының сенімінен шығу біздің міндетіміз. Шүкір, аудан халқының жағдайы жақсы ғой. Сұраныс өте жоғары», – деді.&nbsp;</blockquote>Көп еңбек еткенге бақыт та басын иеді. Адал еңбек еткеннің қашанда көңілі шат. «Адамды көркейтетін - еңбек» деген осы шығар, бәлкім. Шынында әлем еңбекпен ғана жасарып, жаңғырады. Бұл тұрғыда Нұрсұлтанның сапаға мән беретінін тұтынушылар жақсы біледі.Қазір адамдардың танымталғамы артып, жайлы өмір сүруге талпынуда. Сондықтан оған сәйкес, дайын тауарды емес, тапсырыспен жасалатын жиһаздың қатты түрін дайындаймыз. Тұтынушылар ғимараттың көлеміне байланысты биіктігі мен еніне қарай тапсырыс береді. Кейінгі жылдары трансформер жиһаздарға сұраныс артып келеді. Жиһазды тапсырыспен өндіретіндіктен, сатып алушының талап-тілегін ескереміз. Тәуекелге бел буып, өзін дамытқысы келетін адам ғана белгілі бір кәсіппен айналыса алады. Әрі еңбек еткен табысқа жетеді, яғни өз жалқаулығын жеңген адам ғана мол бақыт пен байлыққа кенеледі. Сондықтан өзі жас болса да, кәсіпкерліктің көшін бастап отырған Нұрсұлтан Темірханұлының еңбегі көпке үлгі. Біз де өз кезегімізде кәсіпкерліктің баспалдығынан көрінген кәсіпкердің ісіне сәттілік тілейміз.

Жаңақорған: Мемлекеттік грант жиһаз өндірісінің дамуына ықпал болды

<a href="https://kyzylorda-news.kz/">Kyzylorda-news.kz.</a> Субсидия мәселесі төрт түлігі мен егінін өсіріп отырған шаруа ағайынға жақсы таныс. Ауыл шаруашылығы тауарөндірушілері жаңа ережелер бойынша қолдау алатыны белгілі болды. «Субсидиялаудағы негізгі өзгерістер қандай?» деген сауал жауабын бірнеше дереккөзден іздестіріп, төмендегідей мағлұматтарға қанықтық.Елімізде агроөнеркәсіпті мемлекеттік қолдау тәсілдері қайта қаралды. Құрамына ауыл шаруашылығы тауар өндірушілері, салалық одақтар мен қауымдастықтар, сыбайлас жемқорлыққа қарсы қызмет, мемлекеттік органдар, ғылыми ұйымдардың өкілдері, сондай-ақ Парламент депутаттары кіретін арнайы жұмыс тобы 9 отырыс өткізді. Олардың қорытындысы бойынша қолданыстағы қағидалардың негізгі контурларын сақтай отырып, субсидиялаудың жаңа жүйесі әзірленді. Бұл жөнінде еліміздің Ауыл шаруашылығы министрлігі мәлім етті.Қаражат бойынша субсидиялаудың барлық бағыттары өзгеріссіз қалды. Олардың қатарында бағытына байланысты 15%-дан 80%-ға дейінгі нормативтермен инвестициялық, қарыз алушы үшін мөлшерлемені жылдық 6%-ға дейін төмендете отырып, кредиттер мен лизингтер бойынша сыйақы мөлшерлемесін, сақтандыру сыйақыларын субсидиялау бар. Бұл барлық туындайтын тәуекелдерді азайтуға, сақтандырылған егіс алқаптарын кеңейтуге, сондай-ақ мал мен құсты сақтандыруды ұлғайтуға мүмкіндік береді. Кепілдік мөлшері – негізгі борыштан 50%-ға дейін, басым бағыттар бойынша 85%-ға дейін қарыздарға кепілдік беруді сақтандыруды субсидиялау.Ал өсімдік шаруашылығындағы бағыттар мен нормативтер сақталды. Қант қызылшасын өсірудің тартымдылығын арттыру үшін оны өндіруді субсидиялау нормативі тоннасына 15 мың теңгеден 25 мың теңгеге дейін ұлғайтылады. Бұл ретте сыбайлас жемқорлық тәуекелдерін болдырмау және әкімшілендіруді оңайлату үшін аударым өтінімдерінің күші жойылады.Асылтұқымды мал сатып алу кезінде шошқа шаруашылығын қоспағанда, барлық қолданыстағы субсидиялау нормативтері өзгеріссіз қалады. Селекциялық-асылтұқымдық жұмыс саласында жоғары сыбайлас жемқорлық тәуекеліне байланысты бұқа мен қошқарды жалға беруді субсидиялау ғана жойылады.Тауар-спецификалық субсидиялар өзгеріссіз қалады. Алайда күркетауық еті мен суда жүзетін құсты субсидиялау жойылады. Өйткені, олар әлеуметтік маңызы бар азық-түлік тауарларына жатпайды. Меншікті аналық басы жоқ кооперативтерге дистрибьюторлық орталықтар көрсеткен қолдан ұрықтандыру жөніндегі қызметтерді, асылтұқымды мал импорты кезінде екінші деңгейлі банктегі қаржы институтының арнайы шотына субсидиялар аудару күшін жояды.Жұмыртқа шаруашылығы бойынша норматив бір жұмыртқа үшін 3 теңге болып қалады. Бұл ретте 1-санаттағы жұмыртқаны сатудың шекті бағасы әкімдіктер жасаған меморандумдар негізінде белгіленеді. Малды өздерінің бордақылау алаңдарына көшіретін шаруашылықтар үшін орын ауыстыру нормасы жойылады.Сондай-ақ, терең өңделген өнімдерді өндіру үшін сатып алынған шикізат құнын субсидиялауда глютен және биоэтанол өндіру үшін бидай құнын субсидиялау жойылды. Өйткені бұл тауарлардың әлеуметтік маңызы жоқ.Айта кетерлігі, еріген суларды жинауға арналған жасанды су айдындарын салу үшін вагондардың құнын субсидиялау жойылады. Сондай-ақ сыбайлас жемқорлық тәуекелдерінің жоғары деңгейіне және әкімшілендірудің күрделілігіне байланысты «Бәйтерек «ҰБХ» АҚ еншілес және тәуелді компаниялары мен екінші деңгейдегі банктерді қоспағанда, аванстық түрде инвестициялық субсидиялар алу мүмкіндігі алынып тасталады.Жайылымдарды суландыру үшін ұңғымалар мен құдықтар қазу кезінде бұрғылау материалдары мен қызметтердің құны ғана субсидияланады. Бұл ретте жабдықтың құнын субсидиялау жойылады. Өйткені оның нарықтық құны өндіруші елге байланысты ондаған есе өзгеріп тұрады. Ал қызмет көрсетушілер арзан жабдықты жеткізу арқылы бюджет қаражатын заңсыз игеріп келген.&nbsp;

Субсидиялаудағы негізгі өзгерістер

<a href="https://kyzylorda-news.kz/">Kyzylorda-news.kz.</a> Жиһаз өндірісі – экономикаға серпін беретін саланың бірі. Жаңақорғанда бұл кәсіппен айналысушылардың қатары жыл сайын артып келеді. Себебі сұраныс артты. 2023 жылы елде бұл саланың нарықтағы үлесі артып, ішкі сұраныстың үштен бірін қамтыған. Әсіресе асхана мен қонақ бөлмеге арналған ағаш жиһаз өндірісінде бір жыл ішінде 16,2, кеңселік тауарлар 2,6 процентке өскен. Сарапшылар өңдеу өнеркәсібінің ілгерілеуінің – қарапайым халық үшін тиімді екенін айтады. Бәсеке артқан сайын тұрғындар сапалы өнім алуға, талғамына сай тапсырыс беруге мүмкіндік алады. Сондықтан біз бүгін аудандағы жиһаз өндірісінің тыныс-тіршілігін бағамдап көрдік.Қазір шағын кәсіппен айналысамын деген адамдарға мемлекет тарапынан қолдау жеткілікті. Әсіресе жастарға басымдық көбірек берілуде. Жеңілдетілген процентпен несие алып, қайтарымсыз қаржыға қол жеткізгендер шағын бизнестің шырайын кіргізе бастады. Сондықтан «қолда бар алтынның қадірін» біліп, мүмкіндікті сәтті пайдаланған жөн. Былтыр екі азамат жиһаз өндіретін цехты іске қосу үшін қайтарымсыз қаржыға қол жеткізді. Соның бірі – Нұрмұхаммед есімді азамат.Ол трансформер жиһазын өндіруді қолға алды. Яғни жас кәсіпкер жұмсақ жиһаздың осы бір креативті түрін жасауға кірісіп кетті. Отырсаң диван, жатсаң жатын орныңа айналатын бұйымға сұраныс та жоғары. Біз Нұрмұхаммед Оразбаев туралы төл басылымда тарқата жазғанбыз. Бүгінде шеберлер қолданатын қарапайым жиһаз тұтқасынан бастап, ұсақ-түйек заттары мен ЛДСП, МДФ материалының барлығы да отандық өнім екен.Шыны керек, біз Түркістан нарығынан тәуелділіктен арыла қойған жоқпыз. Сапалы тауар, қолжетімді баға және тауар таңдауға мүмкіндік жасауға көрші өңірдің нарығы бізден артықшылыққа ие. Соның есебінен көрші аймақпен бәсекелесу оңай емес. Былтырғы жылдың қорытындысымен жиһаз өндірісінің ең көп жылдық өсімі Түркістан қаласында тіркелді. Онда жас жұбайлардың шаңырағына сыйлайтын жиһаздың саудасы қызып тұр. Яғни көрші облысқа жаңақорғандықтар жас отбасыға сыйлық алуға көп барады. Қалған үй жиһаздары өзімізде өндіріледі.Жаңақорған ауданы бойынша кәсіпкер ретінде жұмыс жасайтын 7 жиһаз цехы болса, оларда 20-дан астам қызметкер бар. Тапсырыс беретін тұрғындардың да қатары аз емес. Бірақ бізде көбі уақыт жоғалтып алудан қорқады. Яғни бір жиһазды кемінде бір айдан астам уақыт күтуге тура келеді. Тұтынушының көңілі толмайтыны да содан. Қазіргі уақытта жиһаз саудасы бойынша нарықтың 70-80 проценті отандық өнімге тиесілі екен. Осылайша, өзіміздің өндіріс шетелдік тауарлардан артық болмаса да кем емес екенін дәлелдейді. Тиісінше, импорттық ахуал екі есеге төмендеп, экспорт көлемі артып келеді. Сол секілді Түркістан тауары Жаңақорған нарығында экспортталудан көш бастап келеді. Десе де, біздің кәсіпкерлер өндіріс саласына серпін беріп, ішкі өнім үлесін еселей түсуге ниетті.<blockquote>«Қазір бәсеке күшейе түсті. Жиһаз құрастыратын кәсіпорындар, шағын цехтар жеткілікті. Мен ауылда отырып тапсырыс қабылдап, жиһаздарды жеткізіп отырамын. Шүкір, тапсырыс көп. Кейде үлгеруіміз қиындап жатады. Жиһазға қажетті құрал-жабдықтарды Түркістаннан аламыз. Көбіне тұрғындар сапалы, бірақ бағасы қолжетімді болуын талап етеді. Осыған көп мән беремін», – деді байкенжелік кәсіпкер Мақсат Әлиев.</blockquote>Аудан орталығындағы «Жұмабай» жиһаз орталығы шағын цехының тұтынушылары аз емес. 20 жылға жуық аудан тұрғындарына қызмет ететін Мұрат кәсіпкер тапсырыс берушінің талабынан шығуға күш салады. Онда жиһазға тапсырыс берсеңіз, бірнеше апта күтесіз. Бірақ сапалы өнім ала аласыз. Ал жас отаудың жатын орындары, шкафтары көбіне «Ақжол» сауда үйінен алынады. Ол жақтағы өнім Түркістан, Шымкент немесе Алматы қаласынан келеді екен. Ал Алматы сынды ірі мегаполистерде тауардың керек жабдықтары Польша, Қытай, Ресей елдерінен әкелінеді. Демек онда да тауар сапалы деген сөз.Осы орайда Қазақстанның жиһаз және ағаш өңдеушілер қауымдастығының президенті Қанат Ыбраевтың пікіріне құлақ салсақ:<blockquote>«Саланы жетілдіре түсудің барлық алғышарттары бар. Жасалып жатқан бұл мүмкіндіктерді қазақстандық өндірушілерге барынша жеткізу маңызды. Мемлекеттің көрсетіп жатқан қолдауына лайықты жұмыс жасауға міндеттіміз. Біз жиһаз өнімдерін кешенді өндіріс жолына қоюға күш салуымыз керек. Бұл ең алдымен, қосымша шығындарды азайтады. Есесіне өнім құны төмендейді. Сондай-ақ экспортқа шығуға мүмкіндік береді. Нәтижесінде кәсіпорындарда әлемдік трендтерді ендіріп, жаңа бұйымдар жасауға болады. Мұның сапа көрсеткіші артуына септігі бар», – деді.</blockquote>Қазақстанда жиһаз өндірісі кластерін дамытуға мән беру керек. Сонда ғана саланың көкжиегі кеңейе түседі.<blockquote>«Шынтуайтында жиһаз өндіретін мекемелердің артуы бізді қуантады. Көбіне Шымкент пен Түркістанға баратынымыз рас. Сондықтан алдағы уақытта өз өнімімізді де көбірек тұтынатын кез келген тәрізді. Өндірушілер жиһазды талғамға сай жасаса болды. Біз сатып алуға дайынбыз», – деді кент тұрғыны Әлішер Батырбеков.</blockquote>Жалпы алғанда, біз бүгін жиһаз өндірісінің хал ахуалын бағдарладық. Ең бастысы бағыт-бағдар, ілгерілеу бар, енді тек осы кәсіптің өрісін кеңейтуде мүмкіндіктерді сәтті үйлестіріп, заманауи технологияны енгізу керек...

Жиһаз саудасы Жаңақорғанда да қызып тұр

<a href="https://kyzylorda-news.kz/">Kyzylorda-news.kz.</a>&nbsp; Президент 2025 жылға қарай жолдардың 95 пайызын жөндеп, ретке келтіруді тапсырды. Оны орындау үшін жол саласындағы мекемелер жұмысқа оң өзгеріс енгізуге кірісті. Айталық, облыс орталығындағы Н.Назарбаев даңғылынан «Қызылорда-Құмкөл» трассасына дейін Бейбарыс сұлтан көшесін реконструкциялау жүйелі жұмыстың басы болып отыр. Сондай-ақ, Н.Назарбаев даңғылынан дариядағы көпірге дейін де қайта жаңғыртудың қызу жұмысы басталып кетті.Н.Назарбаев даңғылынан «Құмкөл» трассасына дейін жұмысты мердігер – «УАД» ЖШС жүргізуде. Техникалық қадағалаушы – «Алатау сапа құрылыс» ЖШС. Ал авторлық қадағалаушы – КБ «МұнайГаз Инжиниринг» ЖШС.Бұл – ауқымды құрылыс. Қазіргі көлік кептелісінің көбеюіне байланысты осындай жұмыстар жүргізілуде. Біз жоспарлы жұмысты өз уақытынан ерте бітіріп, ел игілігіне табыстасақ дейміз. Себебі, қаржы мәселесі шешім тапқан. Жолдың сметалық құны 2 млрд 350 мың теңгеге, ал келісім-шарт құны 2 млрд 230 млн теңгеге жуық болып отыр, – деді облыстық жолаушылар көлігі және автомобиль жолдары басқармасының басшысы Пакуатдин Шамұратов.Бейбарыс сұлтан көшесін жаңғырту жұмыстары, ең бастысы, жүргізушілерді қуантып отыр.<blockquote>– Жол жөндеу барысында жасыл желектің басым бөлігі сақталады. Ағаштар шабылмайды. Көгалдандыру жұмыстары жүргізіліп, жолдың бойына су жаңа аялдамалар мен заманауи жарықшамдар орнатылады, – деді қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі басшысының орынбасары Дархан Бақтияров.</blockquote>Жолдың жаяу жүргіншіге де, көлік жүргізушіге де бірдей ыңғайлы болуы – мердігер мекемелердің басты межесі.<blockquote>– Бұл – халық тығыз жүретін көше. Оған қоса, жол бойында қала көркін ашып тұрған ғимараттар бар. Сондықтан жол барынша кеңейтіледі. Қалаға енетін күретамыр жол болғандықтан, елге келген қонақтар да осы жолмен өтеді. Сол үшін де жол бойындағы барлық дүниелер жаңартылып, абаттандырылып, халыққа табыс етіледі, – деді Дархан Бақтияров.</blockquote>Жол қатынасы ел экономикасын дамытуға, жолаушылар тасымалын жақсартуға, кәсіпкерлікті дамытып, жүк тасымалын ұлғайтуға, сондай-ақ халықаралық, елішілік қатынастың артуына айрықша әсер етеді. Бұл орайда облыс әкімінің батыл шешімдері жаңашылдық қалыптастырып отыр. Жөндеуден өтіп жатқан Бейбарыс сұлтан көшесі де осы тұрғыда елге үлкен пайдасын тигізбек.Айта кетейік, биыл Қызылорда қаласы мен қалаға қарасты елді мекендердегі 236 көшеге орташа жөндеу жүргізу үшін 5 млрд теңгеден астам қаржы бөлініпті. Оның ішінде 99 көшеге асфальт және 137 көшеге тас жол салу межесі белгіленген.&nbsp;

Күретамыр көше жөнделеді

<a href="https://kyzylorda-news.kz/">Kyzylorda-news.kz.</a> Жаңақорған ауданында балық шаруашылығымен айналысатын 23 су айдыны болса, соның 8-і тауарлы балық өсірумен, 15 кәсіпшілік балық аулау шаруашылығымен айналысады. «Балық шаруашылығын дамытудың 2021-2030 жылдарға арналған бағдарламасына» ауданымыздан 6 су айдыны, 1 тоған, 2 шарбақтық балық шаруашылығы енгізілген.<blockquote>«2022 жылы Жаманбала-Қамбаркөл және Қалғандария-1 көлдері тауарлы балық өсіру шаруашылықтарының қатарына қосылды. Келінтөбе ауылдық округіндегі «Ислам» тауарлы балық өсіру тоған шаруашылығы ұзындығы 100-120 метрді құрайтын 12 тоған құрылысын салып, тауарлы балық шабақтарын салған. Осы жылдан бастап межелі өнім алу жоспарлануда. Бұдан өзге Жаңақорған кенті, Жаңауыл елді мекенінен «Сарбасов Сейдахмет» ДК, Жаңарық ауылдық округінен «Перуза» ш/қ және «Ғафур» ДК, Төменарық ауылдық округінен «QYZYL BALYQ» ДК, Көктөбе ауылдық округінен «Мұратбек» ДК, Жайылма ауылдық округінен «Томирис» ш/қ тоған балық шаруашылығымен айналысуда», – деді ауылшаруашылығы бөлімінің бас маманы Жасұлан Тұрапов.</blockquote>Жауаптың маманның сөзінше, биыл «Қазсушар» РМК Қызылорда филиалы теңгеріміндегі Жайылма ауылдық округінде орналасқан «Жиделі» су қоймасы және Жаманбай батыр ауылдық округіндегі «Бесарық» су қоймасында шарбақтық балық шаруашылығын құру жұмыстары жоспарлануда. Бұл да жақсы жаңалық.<blockquote>«Балық шаруашылығын дамытудың 2021-2030 жылдарға арналған бағдарламасы» бойынша жұмыстарды жүргізу барысында мәселелер туындап отыр. Біріншіден, су айдындарында инфрақұрылым саласы, оның ішінде электр сымдарын тарту, бағаналар орнату жұмыстары кедергі келтіруде. Екіншіден, балық шаруашылығын дамыту үшін су айдынына су кіретін және шығатын бөліктеріне шлюз орнату да күн тәртібіндегі өзекті мәселе. Осы мәселелер шешілсе, үлке олжа болғалы тұр», – деді ол.</blockquote>Субсидияға қандай құжат қажет?Аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің жауапты маманы Асылбай Дәулетханұлы инфрақұрылымдарын дамытуға байланысты электр желілерін жүргізу және трансформатор орнату үшін жобасметалық құжаттарын жасап ұсынған жағдайда, облыстық басқармаларға бюджеттік өтінім өткізіп, қолдау тапса, қаржы қаралатындығын атап өтті. Яғни, кез келген шаруашылық иесі бөлімге жоба-сметалық құжатын өткізуі тиіс.Аудандық кәсіпкерлік, өнеркәсіп және туризм бөлімінің басшысы Қаржыбек Тәжібайұлы су айдындары иелеріне бизнес жоспар, жоба-сметалық құжаттарын жасап, «Бизнестің жол картасы-2025» бизнесті қолдау мен дамытудың мемлекеттік бағдарламасына ұсыну арқылы мәселені шешуге болатындығын жеткізді. Сонымен қатар «Байқоңыр» ӘКҚ арқылы бірлескен өндіріс құру арқылы 51/49 проценттік үлеспен белгіленген мерзімге дейін төмендетілген пайызбен қажетті несие ала алады. Жақсы жобалар болған жағдайда гранттарға ұсынуға жәрдемдесетіндігін сөз етті.Бір сөзбен айтқанда, қос бөлім арқылы да, жоба-сметалық құжатты (ЖСҚ/ПСД) әзірлеп, өткізуге болады. Бірінде субсидия алсаңыз, енді бірінде қайтарымсыз қаржыға қол жеткізесіз. Екеуі де тиімді жол, қолдау тапса қос тараптан да кәсібіңізге инвестиция құйылады. Сөйтіп бабын тауып, балықтан да үлкен бизнеске қадам басуға мүмкіндік бар.Иә, біз неге бұл тақырыпты қозғап отырмыз? Өйткені, соңғы жылдары балық бизнесі толайым табыс көзіне айналды. Қазір дарияның өзінде балық қалмай бара жатыр. Қарап отырсаңыз, балықтың келісі еттің бағасына жетті. Көп тұтынатын сазан балығының келісі 1600 теңгеден асып жығылады. Сондықтан қолда тұрған алтынды қадірлеп, балық шаруасын ширату керекпіз. Бастысы, мемлекет тарапынан жеңілдік бар.

Қазақстан және Қызылорда облысының жаңалықтары: Экономика