<a href="https://kyzylorda-news.kz/">Kyzylorda-news.kz.</a> Шиелі ауданы өткен жылы 120 тонна күріш, 850 тонна қарбыз, 1005 тонна қауын және 351 тонна қызанақ дақылын Ресей және Қырғызстан елдеріне экспорттады. Бұл туралы Өңірлік коммуникациялар қызметінің ақпарат алаңында өткен баспасөз конференциясында Шиелі ауданының әкімі Қамбарбек Мүбараков мәлімдеді.
Жалпы ауданда 13 жылыжай бар. Былтыр қызанақ пен қиярдан 550 тонна өнім жинаған. Биыл Шиеліде 30 246 гектар жерге ауыл шаруашылығы дақылы егіледі. Негізгі дақыл күріштің үлесі 12 037 гектар. Жалпы егіс көлемінің 38,8 пайызын құрап отыр. Дәнді дақылдар үлесін 2379-ға, картоп, көкөніс, бақша дақылдарын 5157 гектарға ұлғайту көзделуде. Сондай-ақ, 70 гектарға соя дақылы егілетін болады.
<blockquote>
 «Өткен жылы аудан бойынша 29 461 гектар жерге ауыл шаруашылығы дақылдарын еккенбіз. Диқандар 14 353 гектардан 59,9 центнерден өнім алып, қамбаға 85 940 тонна астық жинады. Бұған қоса, 1183 гектар картоптан 29575 тонна, 1537 гектар көкөністен 46110 тонна және 2123 гектар бақша дақылдарынан 63690 тонна өнім алды. Биыл да мол өнім жинаймыз деген ниеттеміз», – деді Шиелі ауданының әкімі Қамбарбек Мүбараков.
</blockquote>

Шиелі ауданы ауыл шаруашылығы өнімдерін Ресей мен Қырғызстанға экспорттауда

<a href="https://kyzylorda-news.kz/">Kyzylorda-news.kz.</a> Биыл Шиелі ауданындағы сегіз елді мекенге газ тартылады. Оған 3 млрд. теңгеге жуық қаржы қаралған. Бұл туралы Өңірлік коммуникациялар қызметінің ақпараттық алаңында өткен брифингте Шиелі ауданының әкімі Қамбарбек Мүбараков мәлімдеді.
Қазіргі таңда Шиелі кентіндегі 6351 тұрғын үйге, 190 мекеме газға қосылған. Жеке тұрғындардың есебінен Ы.Жахаев және Бидайкөл елді мекендерінде газдандыру жұмыстары жүргізілуде. Қос ауылда 760 үйге газ кіргізілді. Өткен жылдың соңында Байсын елді мекеніне де көгілдір отын берілді. Ауылдағы 140 үй газды пайдаланып отыр.
<blockquote>
 «Ауданға қарасты ауылдарды көгілдір отынмен қамту жұмыстарын кезең-кезіңмен жалғастырып жатырмыз. Н.Бекежанов ауылын газдандыруға өткен жылдың желтоқсан айында 100 млн.теңге қаражат бөлініп газдандыру жұмыстары бастау алса, бүгінгі таңда осы жобаға қосымша 327 млн.теңге қаржы бөлінді, үстіміздегі жылы ауылды толық газға қосатын боламыз. Биыл «Ауыл – ел бесігі» бағдарламасы аясында Қодаманов ауылын газдандыруға республикалық бюджеттен 557 млн. теңге қаражат бөлінді. Қазір мердігер мекеме анықталуда. Жақын арада басталады», – деді Шиелі ауданының әкімі Қамбарбек Мүбараков.
</blockquote>
Ақмая, Алғабас, Бестам, Ақтоған, Жиделіарық, Еңбекші елді мекендерін газдандыруға жобалық-сметалық құжаты әзірленіп, облыстық энергетика және тұрғын үй-коммуналдық шаруашылық басқармасына бюджеттік өтінім тапсырылған. Ал Алмалы және Ә.Тәжібаев елді мекендерін газдандыруға жоба сметалық құжаттары әзірленіп, мемлекеттік сараптама қорытындысы күтілуде. Қалған ауылдарға газ тартуға қатысты құжаттарына қаржы қарастырылып, жұмыс жасалуда.

Шиелі ауданындағы 8 елді мекен көгілдір отынға қосылады

<a href="https://kyzylorda-news.kz/">Kyzylorda-news.kz.</a> Биыл облыста 48,5 млрд. теңгені құрайтын 4 ірі индустриялық жоба іске асырылады. Оның ішінде Арал ауданындағы ас тұзы және түйе сүтінен құрғақ сүт дайындау өндірісі, Қармақшы ауданындағы құс фабрикасы және шыны зауыты бар. Бүгінде бұл жобалардың жұмыстары аяқталуға жақын.
<blockquote>
 «Пандемияға байланысты біраз жоба тоқтап қалды. Қазір соның бәрін қайта қолға алып, жандандырып жатырмыз. Мәселен, биыл Қармақшы мен Аралдағы жобалардан бөлек, Жаңақорған ауданындағы «Шалқия» қорғасын-мырыш кен орнында кен байыту комбинатын, «Абдулла» шаруа қожалығы құс фабрикасының және Аралдағы кальцилендірілген сода зауытының құрылысы басталатын болады. Айта кетейін, сода зауыты жобасы бойынша инженерлік инфрақұрылымы «Бизнестің жол Картасы – 2025» бағдарламасы аясында жүргізілуде», – деді облыстық индустриялық-инновациялық даму басқармасының басшысы Ринат Сұлтангереев.
</blockquote>
Сонымен қатар, бүгінде қуаттылығы жылына 5 мың тонна өндіретін ет комбинаты және сүт өңдеу кешенінің ІІ кезеңі жобалары бойынша қажетті инженерлік инфрақұрылымдары жеткізіліп, құрылыс жұмыстары жалғасуда.
Жалпы индустрияландыру бағдарламасының ІІІ бесжылдығы аясында облыста 7 мыңнан аса жұмыс орны құрылатын 41 жоба жүзеге асырылуда. Оның ішінде Арал ауданындағы экспортқа бағытталған балықты тереңінен өңдеу цехтарының І кезеңі, облыстағы алғашқы кварц құмын байыту комбинатының желісі, Жаңақорғанда тротуарлық плитка, бордюр, лего кірпіш өндірісі және Жалағашта түйіршіктелген аммоний-сульфаты өндірістері пайдалануға берілді.

Биыл Қызылорда облысында 4 ірі индустриялық жоба іске асырылады

<a href="https://kyzylorda-news.kz/">Kyzylorda-news.kz.</a> Жаңақорғанда өткен жылы 18 пәтерлі 3 қабатты тұрғын үй сатып алынып, баспана кезегінде тұрғандарға берілді. Ал биыл әлеуметтік жағынан аз қамтылған және мұқтаж азаматтарды тұрғын үймен қамту мақсатында 3 бөлмелі 20 тұрғын үй сатып алу жоспарлануда. Бұл туралы Өңірлік коммуникациялар қызметінің ақпарат алаңында өткен брифингте Жаңақорған ауданының әкімі Руслан Рүстемов мәлімдеді.
<blockquote>
 «Ауданда маусым айында 18 пәтерлі екі қабатты тұрғын үйдің құрылысы басталады. Қазіргі таңда баспана салуға үшін жер кезегінде 7 мыңның үстінде тұрғын тұр. Сондықтан, осы мәселелерді шешу мақсатында ауданда 1 қоныстану аймағына егжей-тегжейлі жоспарлау жұмысына аудандық бюджеттен 29,2 млн. теңге бөлінді. Мемлекеттік сатып алу жұмыстары жүріп жатыр. Жыл соңына дейін жоба-сметалық құжаттарын дайындауға қаржы бөлетін боламыз. Одан кейін жер учаскелері берілетін болады. Мәселен соңғы 3 жылдың ішінде аудан бойынша тұрғындарға 1179 жер учаскесі табысталды», – деді Руслан Рүстемұлы.
</blockquote>
Жалпы, ауданда құрылыс қарқынды. Былтыр басталған Жаңақорған кентіндегі 600 және 300 орындық мектептердің, Шалқия кентіндегі 150 орынға арналған клуб үйінің құрылыс жұмыстары жүріп жатыр. Биыл барлығының құрылысы аяқталады.

Жаңақорғанда маусым айында 18 пәтерлі екі қабатты тұрғын үйдің құрылысы басталады

<a href="https://kyzylorda-news.kz/">Kyzylorda-news.kz.</a> Кәсіпкерлер палатасы күріш өңдеумен айналысатын қызылордалық кәсіпкерлерге салықтық жеңілдік беруді сұрайды.
<blockquote>
 &nbsp;«Өңірде су жетіспеушілігі себебінен жылдан жылға күріш алқаптарының көлемі азаюда. Соған сай қысқарған алқаптарға біздің облыста дәстүрлі емес дақылдарды егу науқаны басталып жатыр. Бұл жағдай күріш өндіру көлемінің, ақша айналымының азаюына, жұмысшылардың қысқаруына алып келуі мүмкін. Бұлай айтуыма да бірқатар себептер бар», – дейді Қызылорда облысы кәсіпкерлер палатасының бөлім бастығы Жасұлан Серіков.
</blockquote>
<img src="https://kyzylorda-news.kz/wp-content/uploads/2021/03/img_1324-scaled.jpg" alt="" />
Қызылорда облысы кәсіпкерлер палатасының бөлім бастығы Жасұлан Серіков.
Жасұлан Серіковтің айтуынша, кәсіпкерлер корпоративтік табыс салығын өткен жылы тапсырған көлеммен алдын ала төлейді екен. Ал күріш шаруашылығы өнімнің бітік шығуына тәуелді, сондықтан кәсіпкерлер жиналмаған өнімнің корпоративтік табыс салығын алдын ала төлей алмайды. Бұл жағдай бүгінде кәсіпкерлер үшін айтарлықтай проблемаға айналып отыр.
Екінші мәселе мынада. Өздерінің күріш егетін жерлері бар шаруашылықтар корпоративтік табыс салығын 10 пайыз, әрі қарайғы өзге де жеңілдіктерімен 3 пайыз төлейді екен де, ал өз жерлері жоқ, өңделмеген күрішті серіктестерінен сатып алып, өңдейтін кәсіпкерлердің бюджетке беретін корпоративтік табыс салығы 20 пайызды құрайды. Айырмашылықты өздеріңіз де бағамдай беріңіз. Өңдеу саласындағы кәсіпкерлер 6-7 есе артық төлеп отыр.
<blockquote>
 «Біз мына жайтқа мән беруіміз керек, барлық кәсіпкерлер агроөнеркәсіп секторының өркендеуіне ат салысып жүр және халықты маңызды өніммен қамтып отыр. Оның үстіне күріш халық тұтынатын әлеуметтік маңызы бар азық-түлік өнімдерінің қатарында. Осы орайда корпоративтік табыс салығында күрішті өндірушілер секілді өңдеушілерге жеңілдік жасалуы қажет. Қызылорда облысында күріш өнімін өңдеумен айналысатын ірі кәсіпорындар – «Най-Мир», «Ақорда Капитал», «Жан-Арай», «Абай-Дәулет», «Аза-Мир» ЖШС-тері қазір 20 пайыздық салық төлеп отыр. Салықтық жеңілдік жасалып, корпоративтік табыс салығы 20 пайыздан 10 пайызға төмендетілсе өңірдегі күріш шаруашылығының сәтті әртараптандыруына септігі тиер еді», – дейді Кәсіпкерлер палатасының бөлім бастығы.
</blockquote>
Осы жылдың қаңтар айында өткен Үкіметтің кеңейтілген отырысында ел Президенті Қасым-Жомарт Тоқаев Қызылорда облысына нақты қолдау көрсетілсін деп Үкіметке тапсырған болатын. Кәсіпкерлер палатасы жоғарыда айтылған ұсыныс қабылданса, нақты қолдаудың көрінісі болар еді деген пікірде.
Қазіргі уақытта Кәсіпкерлер палатасы аталмыш ұсынысты Орталық аппарат пен Министрлікке жолдауда. Нәтижесін қосымша хабарлайтын боламыз.

Кәсіпкерлер палатасы күріш өңдеумен айналысатын қызылордалық кәсіпкерлерге жеңілдік беруді сұрайды

<a href="https://kyzylorda-news.kz/">Kyzylorda-news.kz.</a>&nbsp; 2021 жылдың қаңтар-ақпанында 649 мыңнан астам адам атаулы әлеуметтік көмек алды, деп хабарлайды&nbsp;<a href="https://sputnik.kz/">Sputnik Қазақстан.</a>
<blockquote>
 “2021 жылдың 1 наурызындағы жағдай&nbsp;бойынша 128,8 мың отбасындағы 649 мың адамға атаулы әлеуметтік көмек тағайындалды. Бұл мақсатқа бюджеттен 122,8 миллиард теңге бөлінді”, – делінген еңбек және халықты әлеуметтік қорғау министрлігі таратқан хабарламада.
</blockquote>
Атаулы әлеуметтік көмек отбасының әрбір мүшесіне жан басына шаққандағы орташа табысы өңірлік ең төменгі күнкөріс деңгейінің 70%-інен төмен азаматтарға тағайындалады.
Бұдан басқа, АӘК көрсетудің жаңа тетігін іске асыру шеңберінде еліміздің барлық өңірінде табысы аз отбасылардың мектеп жасына дейінгі балаларын кепілдік берілген әлеуметтік топтамамен қамтамасыз ету жұмысы жүргізіліп жатыр.
2021 жылдың 1 наурызындағы мәлімет бойынша АӘК алушылар қатарындағы 1 жастан 6 жасқа дейінгі 154,3 мың бала азық-түлік және тұрмыстық химия жиынтығы түрінде әлеуметтік топтама тағайындалды.
Естеріңізге сала кетейік, 106,4 мың отбасындағы 524,3 мыңнан астам қазақстандыққа 2021 жылғы I тоқсанда атаулы әлеуметтік көмек тағайындау мемлекеттік инстанцияға жүгінбей-ақ автоматты түрде ұзартылды.

Қазақстандықтарға көмек көрсетуге бюджеттен 122,8 миллиард теңге бөлінді

<a href="https://kyzylorda-news.kz/">Kyzylorda-news.kz.</a>&nbsp; Қазалы ауданында жер қатынастарының жағдайы және жылдық есебінің орындалуы туралы мәселе қаралды.
Аудан әкімі Мұрат Ергешбаевтың төрағалығымен өткен басқосудың күн тәртібіндегі мәселеге байланысты аудандық жер қатынастары бөлімінің басшысы Еркін Сейітов хабарлама жасап, Қазалы ауданында жер қойнауын заңсыз пайдаланушылар қатары азаймай отырғанын атап өтті.
<blockquote>
 «2020 жылы жерлерді заңсыз иемденіп, құм, саз алған 4 серіктестік пен 1 мекеме және 1 жеке тұлға анықталып, заңдылықтарға сәйкес айыппұл түріндегі әкімшілік шара көрілді. Жыл басынан бері Басықара ауылынан заңсыз құм алып жатқан тағы бір тұрғын анықталып, шара көру үшін тиісті департаментке хат жолданды», – деді Еркін Нұржаубайұлы.
</blockquote>
Сондай-ақ, бөлім басшысы ауыл шаруашылығы мақсатындағы жерлерді түгендеу, жердің бір бөлігін басқа мақсатқа пайдалану, жер учаскесін заңсыз артық пайдалану, акционға ұсынылатын жерлер, инфрақұрылыммен қамтамасыз етілген аймақтар және мемлекеттік көрсетілетін қызметтер туралы кеңінен айтып берді.
Аудан әкімі Мұрат Ергешбаев бөлім басшысына карьер мәселесіне байланысты кәсіпкерлердің құжаттарын дайындауды бақылауға алуды тапсырды. Сонымен қатар, тұрғындарға кәсіпкерлік мақсатта жер учаскесін табыстамаған ауылдық округ әкімдеріне белсенді жұмыс істеуге шақырды.
Басқосу мұнан соң аппарат мәжілісіне ұласып, онда маңызды мәселелер қаралды.
Мәжілісте алдымен аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Совет Бабанаев аудандағы жұмыспен қамту мәселесі және әлеуметтік төлемдердің жағдайы туралы баяндама жасады.
Ал, аудандық тұрғын үй, коммуналдық шаруашылығы, жолаушылар көлігі және автомобиль жолдары бөлімі басшысының міндетін атқарушы Жасұлан Сыдықов көркейту, көгалдандыру және санитарлық тазалық мәселене қатысты атқарылған жұмыстар жөнінде айтып, алдағы жоспарларымен бөлісті.
<blockquote>
 «Ауданда 7 наурыз бен 9 мамыр аралығында санитарлық тазалық айлығы болып белгіленіп, сенбіліктер ұйымдастырылды. Нәтижесінде қала, кент және елді мекендер аумағынан 7300 текше метр қоқыс жойылып, 2800 текше метр тұрмыстық қатты қалдықтар арнаулы орындарға шығарылды. Аталған шараларға мыңнан астам адам мен 25 арнаулы техникалар жұмылдырылды. Одан бөлек, 20 наурыз күні ҚР экология, геология және табиғи ресурстар министрлігінің «Таза табиғат» ұлттық жобасының тұжырымдамасына байланысты «Бірге таза Қазақстан», «Мекенім – жасыл орманым» атты акциялар өткізілді. Акция барысында қала, кент және ауылдық округтерде тазалық жұмыстары жүргізіліп, 4 мыңнан астам көшеттер мен қаламшалар отырғызылды», – деді Жасұлан Жиентайұлы.
</blockquote>
Басқосуды қорытындылаған аудан әкімі Мұрат Ергешбаев қала, кент және ауылдық округ әкімдеріне санитарлық тазалық және көркейту-көгалдандыру бағытындағы жұмыстарға ерекше мән беріп, елді мекенге кіре берістен бастап тап-таза болу қажет екендігін ескертті.
<img src="https://kyzylorda-news.kz/wp-content/uploads/2021/03/dsc_2321-scaled.jpg" alt="" />

Қазалы ауданында жер қойнауын заңсыз пайдаланушылар қатары азаймай отыр

Kyzylorda-news.kz. Байқоңыр ғарыш айлағынан Нұр-Сұлтан уақыты бойынша 12 сағат 07 минутта 38 ғарыш аппаратын орбитаға шығаратын «Фрегат» үдеткіш блогы бар «Союз-2.1 а» зымыран-тасығышы ұшырылды, деп хабарлайды <a href="https://www.inform.kz/kz/baykonyr-garysh-aylagynan-alemnin-18-elinin-38-sputnigi-ushyryldy_a3767309">ҚазАқпарат</a>.
Бұған дейін хабарланғанындай, техникалық ақауларға байланысты ұшыру 2021 жылдың 20 наурызынан кейінге қалдырылған.
Ұшыру штаттық режимде өтті, Байқоңырдан берілген трансляция Роскосмос сайтында тікелей эфирде жүргізілді.
Бүгін Байқоңырда жаңбыр жауып тұр, ауа температурасы +3 градус, бұлттылық төмен, сондықтан көрермендер зымыранның ұшуын бірнеше секунд тамашалай алады.
Тікелей репортаж жүргізушілерінің ақпараты бойынша, зымыран-тасығыштың барлық үш сатысының бөлімшелері жоспарлы режимде өтті, басталғаннан кейін 10 минутта ғарыш аппараттарының кластері бар «Фрегат» екпінді блогы тірек орбитасына шығарылды.
Спутниктерді берілген орбиталарға одан әрі шығару үдету блогын қосу есебінен жүзеге асырылады. Атап айтқанда, негізгі жүктемені – оңтүстік кореялық CAS500-1 аппаратын мақсатты орбитаға шығару үшін «Фрегатқа» бір сағаттан астам уақыт кетеді.
Нұр-Сұлтан уақыты бойынша шамамен 14:35-тен 14:37-ге дейін жолшыбай пайдалы жүктеме спутниктерінің бірінші партиясының, 16:13-тен 16: 43-ке дейін екіншісінің бөлінуі күтілуде.
«Союз-2.1 а» зымыранымен CAS500-1 (Корея Республикасы) Жерді қашықтықтан зондтау ғарыш аппараты, ELSA-d ғарыш қоқысын жоюға арналған жапониялық аппарат, Grus Жерді қашықтықтан зондтауға арналған жапониялық спутниктер, Жердің суреттерін алуға және байланысты қамтамасыз етуге арналған Сауд Арабиясының NAJM-1 шағын аппараты, Берлин техникалық университетінің байланыс спутниктері орбитаға шығарылды.

Байқоңыр ғарыш айлағынан әлемнің 18 елінің 38 спутнигі ұшырылды

Kyzylorda-news.kz. Биылғы жылы Қызылорда облысында күріш егістігінің&nbsp;көлемі 5 мың гектарға қысқармақ. Сырдариядағы су тапшылығы салдарынан осындай шешім қабылданды. Соңғы бірнеше жылдан бері өзендегі судың деңгейі төмен түсіп кеткендіктен, қарапайым шаруалар тығырыққа тіреліп отыр. Әсіресе, күріш егетін диқандарға қиын соғуда. Ал мамандар болса, алдағы маусымда да судың тапшы болатынын айтады, деп хабарлайды Stan.kz сайты.&nbsp;
Осыдан бірнеше жыл бұрын ғана арнасы тасып, толқыны тулап жататын Сырдарияның бүгінгі көрінісі көңіл көншітпейді. Қыстың күндері жауын-шашын мен мұздың қатуынан деңгейі артқанымен, жаздың күні су айдынының табаны көрініп тұрады. Әсіресе шіліңгір шілде мен тамылжыған тамызда су тапшылығы қатты сезіледі. Дәл осы уақытта күрішшілердің суға деген сұранысы ерекше арттыны айтпаса да түсінікті.&nbsp;
Қызылорда облысы Жалағаш ауданы Мырзабай ауылының тұрғыны Сәкен Шағыртаев көп жылдан бері күріш егумен айналысады. Өзі басқарып отырған “Егінші” шаруа қожалығында 120 адам тұрақты еңбек етеді. Былтырғы жылы күрішшілер сы тапшылығын қатты сезінгенін айтады. Канал қазып, егістікке суды әрең жеткізген.&nbsp;
<blockquote>
 “Былтыр біздің шаруашылық&nbsp;1100 гектар жерге күріш екті. Әр гектарынан әрең дегенде 60 центнерден өнім алдық. Біздің күріштігіміз өзен жағалауына жақын. Соның арқасында электрлі мотор қолданған жоқпыз. Соның өзінді күрішті 90 күн бойы сумен қаматамасыз ету оңай болған жоқ”, – дейді қызылордалық шаруа.&nbsp;
</blockquote>
Биыл Сәкен Шағыртаев бастаған күрішшілер егістік көлемін 300 гектарға қысқартуға мәжбүр. Қазір мамандар қажетті техникаларын сайлап, керек минералды тыңайтқыштар қорын жинақтап алған. Тұқым себу жұмыстарын асыға күтіп жүр. Күріштен бөдек, маусымдық жоңышқа егу жоспарда бар.&nbsp;
<blockquote>
 “Мен көп жылдан бері күріш егумен айналысып келемін. Бірақ дәл мұндай су тапшылығы есімде жоқ десем болады. Көптеген диқаншылар өнімсіз қалды. Биыл да сусыз қалатын түріміз бар. Алдағы жағдай қандай болатыны белгісіз”, – деп уайымын жасырмайды Сәкен Шағыртаев.&nbsp;
</blockquote>
Қызылорда қаласының тұрғыны Ардақ Өтеген – тәжірибелі бағбан. Азамат көп жыл отбасымен бірге қауын-қарбыз, картоп, асқабақ пен пияз егіп, бау-бақша өнімдерінен пайда тауып жүр. Алайда өткен жылы шаруа шаш-етектен шығынға батқанын айтады. Жаздың ортасында су болмай, егілген өнімдер қурап қалды. Сол себепті биыл Ардақ Өтеген тәуекелге бармайтынын айтады. Су болмаса, табыстың да болмайтыны анық.&nbsp;
<img src="https://stan.kz/download/uploads/news_full1616383088f81844d9ccfede9ed55a30602993bace.jpg" alt="" />
<blockquote>
 “Былтыр отбасым және туыстарыммен 5 гектар жерге өнім еккен едім. Қаражаттың біразы тұқымға кетті, одан қалды жанар-жағармай алуға да мәжбүр болдық. Еңбегіміз еш болды, төгілген маңдай тер ақталмады. Электрлі мотор қолдандық, бірақ каналда су мүлдем болмады. Сол себепті жұмысты тоқтатуға тура келді. Биыл егін екпейміз деп шештік”, – дейді бағбан.&nbsp;
</blockquote>
Жалпы мамандар су тапшылығының бірнеше себебін атап отыр. Ең бірінші кезекте, халықаралық мәселені шешіп алу аса маңызды. Мұнан бөлек, табиғи құбылыс пен климаттың бұзылуы өзінің кері әсерін тигізуде. Сырдария өзені өзінің бастауын Тәжікстандағы таулардан алады. Соңғы бірнеше жылдан бері бұл аумақта жауын-шашын көлемі күрт азайып кеткен. Оның үстіне өзен Өзбекстан мен Қырғызстан территорияларынан өтеді. Көрші Түркістан облысының халқы да осы өзеннің суына мұқтаж.&nbsp;
<blockquote>
 “Біздің облыс Сырдария өзенінің төменгі арнасында орналасқан. Үш мемлекет пен бір облыстан ауысқан суды пайдаланып отырмыз десек те болады. Өткен жылы біз шаруаларға күріштік көлемін азайту қажет екенін бірнеше мәрте айтқан едік. Алайда біздің дабылымызға ешкім құлақ түре қоймады. Нәтижесінде кейбір шаруа қожалықтары өнімсіз қалып, шығынға батты. Биыл осындай келеңсіз жағдайларды алдын алуымыз қажет”. – дейді Арал-Сырдария бассейндік инспекциясының басшысы Сейілбек Нұрымбетов.&nbsp;
</blockquote>
Басшының айтуы бойынша, қазір Қырғызстандағы Тоқтығұл су қоймасында жиналған судың мөлшері өте төмен. Былтырғы жылдың осы кезеңімен салыстырғанда 2,9 млрд текшекубқа аз. Оның үстіне Шардара мен Көксарайда да қажетті су мөлшері жиналмай отыр. Бұл мәселенің қашан шешіліп, жағдайдың түзелетіндігі әзірге белгісіз.&nbsp;
<blockquote>
 “Қарап отырсақ, өзендегі су тапшылығы әр жеті жыл сайын қайталанып отыр. 2014 жылы өзекті мәселе бұдан да күрделі болған. Бұл – табиғи құбылыс. Дегенмен өзеннің суын мақсатты жұмсап, үнемдеу қажет. Біздің есебіміз бойыншы биылғы маусымда өңірімізге 5,3 млрд текшеметр көлемінде су қажет. Оның 4,2 млрд егістік алқаптарын суаруға кетсе, 1,2 млрд&nbsp;текшеметрі экологиялық қажеттіліктерге жұмсалады”, – дейді Сейілбек Нұрымбетов.&nbsp;
</blockquote>
Қазір Қызылордада шаруа қожалықтарын қолдау мақсатында арнайы комиссия жұмыс жасап жатыр. Ауыл шаруашылығының мамандары әртараптандыру әдісін пайдалану арқылы су тапшылығымен күресуге болатынын айтады.

Су тапшылығы: Қызылорда облысында күріш егістігінің көлемі 5 мың гектарға қысқармақ

Kyzylorda-news.kz. Бүгін облыс әкімі Гүлшара Әбдіқалықованың төрағалығымен кеңейтілген мәжіліс отырысы өтті. Онда 2021 жылдың көктемгі егіс жұмыстарын жүргізуге дайындық шаралары және облыс бойынша санитарлық тазалық, көркейту және көгалдандыру жұмыстарының барысы туралы екі мәселе қаралды.
Күн тәртібіндегі алғашқы мәселе бойынша облыстық ауыл шаруашылығы басқармасының басшысы Шахмардан Қойшыбаев көктемгі егіс науқанына дайындық барысы жөнінде хабарлады.
<blockquote>
 Облыс әкімімен аудандар және Қызылорда қаласы бойынша 2021 жылы егілетін ауыл шаруашылығы дақылдарын орналастыру сызбасы бекітілген, осы сызбаға сәйкес, үстіміздегі жылы облыс бойынша 188,2 мың гектарға егiс егу межеленіп отыр. Оның ішінде дәндi дақылдар 96,6 мың, майлы дақылдар 6,7 мың, мал азықтық дақылдар 66,4 мың, картоп, көкөнiс, бақша 18,5 мың гектарды құрайды. Негізгі дақыл күрiштің көлемі 84,4 мың гектарға жоспарлануда, – деді Шахмардан Қойшыбаев.
</blockquote>
<img src="https://kyzylorda-news.kz/wp-content/uploads/2021/03/fb_img_1616171281047.jpg" alt="" />
<img src="https://kyzylorda-news.kz/wp-content/uploads/2021/03/fb_img_1616171290438.jpg" alt="" />

Қызылордада 188,2 мың гектарға егін егу жоспарлануда

<a href="https://kyzylorda-news.kz/">Kyzylorda-news.kz</a>. Екі күн бойы «Атамекен» ҚР ҰКП төралқа төрағасы Тимур Құлыбаев еліміздің барлық өңірдің бизнесмендерімен онлайн режимде сұхбаттасты.
Кездесуде қызылордалық кәсіпкерлер де саладағы өзекті мәселелерді көтерді.
Қызылорда облысы кәсіпкерлер палатасы Өңірлік кеңесінің мүшесі Болат Нұрхожаев облыстағы 188 мың гектар егістік жердің 90 мың гектары күріш егуге бағытталғанын, техникалар да сол мақсатта алынғанын, басқа мақсатқа пайдалану мүмкін еместігін жеткізді.
<blockquote>
 «Қызылорда облысында су тапшылығына байланысты егіс өнімін әртараптандыру қажеттілігі туындап отыр. Бұрыннан несиелері бар күріш шаруашылықтарына мал азығын дайындау, халық тұтынатын картофель, пияз сияқты суды аз талап ететін дақылдарға арналған техникаларды алу қиындық тудырып отыр, яғни басқа дақылдарға тез арада көшу мүмкін болмай отыр. Қалыптасқан жағдайға байланысты Қызылорда облысында егісті әртараптандыруға тезірек көшу үшін күріштен басқа дақылдарға арналған техникаларға нарық бағасынан 50 пайызға дейін субсидиялауды, Ауыл шаруашылығы министрлігінің ережесіне енгізуді ұсынамыз», – деді отырыста Өңірлік кеңес мүшесі.
</blockquote>
Айта кетейік, бүгінгі қолданыстағы ережеге сәйкес сатып алынған техникалар үшін 25 пайызға дейін субсидиялау қаралған.
Сыр кәсіпкерлерін толғандырған мәселелердің бірі – міндетті әлеуметтік медициналық сақтандырудың айыппұлына қатысты.
<blockquote>
 «Міндетті әлеуметтік медициналық сақтандыру туралы» Заңның 31-бап, 1-тармағында «Аударымдардың және (немесе) жарналардың уақытылы аударылмаған сомаларын мемлекеттік кіріс органдары өндіріп алады немесе олар төлеушінің өткізіп алынған әр күн үшін (қорға төлеу күнін қоса алғанда) Қазақстан Республикасының Ұлттық Банкі белгілеген қайта қаржыландырудың 1,25 еселенген ресми мөлшерлемесі мөлшерінде есептелген өсімпұлмен бірге қор шотына төлеуіне жатады», – деп көрсетілген.
</blockquote>
«Міндетті медициналық сақтандыру бойынша төленбеген жарналар мен аударымдар үшін есептелген айыппұлдар пандемия кезінде микро, шағын және орта бизнес үшін қосымша ауыртпалық болып отыр. Есептелген өсімпұл мөлшері кәсіпкерлік субъектілері үшін көптеген проблемаларға әкеледі. Банктік шоттар жабылады, кәсіпкер тәуекелдерді басқару жүйесі бойынша жоғары тәуекел аймағында болады, бұл салықтық тексерулер мен басқа да мәжбүрлеу шараларына әкеледі», – деді кездесуде «Мансап-Қызылорда» ЖШС директоры, Өңірлік кеңес мүшесі Наталья Мишукова.
Кәсіпкер қазіргідей жағдайда микро, шағын және орта бизнес субъектілері үшін міндетті медициналық сақтандыру жүйесіндегі төленбеген жарналар мен аударымдар үшін айыппұлдарды есептеуді 2021 жылдың соңына дейін экономиканың барлық салаларында тоқтата тұруды ұсынды.
Өңірлік кеңес мүшесі Гүлзағира Абдраимова жылжымайтын мүліктің нысаналы мақсатын ауыстырудағы бюрократияға тоқталып, шешу жолы ретінде нормативтік-құқықтық құжаттарға өзгеріс енгізуді ұсынды.
Қызылордалық кәсіпкерлердің көтерген мәселелері маңызды әрі орынды екендігіне тоқталған «Атамекен» ҰКП Басқарма мүшелері аталмыш проблемаларды тиісті мемлекеттік органдармен бірге шешу жолдарын қарастыратындықтарын жеткізді.
<img src="https://kyzylorda-news.kz/wp-content/uploads/2021/03/img_1143-scaled.jpg" alt="" />

Қызылордалық кәсіпкерлер саладағы өзекті мәселелерді көтерді

<a href="https://kyzylorda-news.kz/">Kyzylorda-news.kz</a>. Шиелі ауданында көктемгі егін науқанына дайындық жұмыстарын пысықтау мақсатында ауыл шаруашылығының мамандары бас қосты.
Жиынға Қызылорда облысының ауыл шаруашылығы басқарма басшысы Шахмардан Қойшыбаев, Қызылорда облысының табиғи ресурстар және табиғатты реттеу басқармасының басшысы Бауыржан Шәменов, ҚР су ресурстары комитетінің Су ресурстарын пайдалануды реттеу және қорғау жөніндегі Арал-Сырдария бассейндік инспекциясының басшысы Сейілбек Нұрымбетов, «ҚазСушар» шаруашылық жүргізу құқығындағы республикалық мемлекеттік кәсіпорнының Қызылорда филиалының директоры Хамит Биімбетов, «ҚазАгроҚаржы» акционерлік қоғамының Қызылорда облысы бойынша филиалының директоры Оразбек Қарақожаев жұмыс сапарымен барды. Ең әуелі «Қарағанды Агроинвест-Т» ЖШС-не берілген жер телімдерінен басталды.
Содан соң, Күзенбай Шераханұлы жетекшілік жасайтын ЖК «Дидар» мал шаруашылығында болып, ондағы шаруашылықтың жұмысымен танысты.
Мемлекет тарапынан ауылшаруашылығын қолдауға арналған «Сыбаға» бағдарламасы аясында несие алып, етті бағыттағы мүйізді ірі қара малын өсірумен айналысады. Жыл сайын мал басын көбейтуге жұмыстар жүргізілуде. Жергілікті малдың тұқымын ет бағытында асылдандыру арқылы мүйізді ірі қараның ет өнімділігін арттырып, еттің өзіндік құнын арзандатуға үлесін қосуда.
Мұнан соң сала мамандары Шиелі аудан әкімдігінің мәжіліс залында көктемгі егінге дайындық барысын талқылады.
Жиында көктемгі егіс жұмыстары кезінде су тапшылығының алдын алу үшін жұмыстар атқару керегін атап өтті. 
Сондай-ақ, алдағы бағыттар талқыланып, көкөніс бақша егу, өткізу маселелері пысықталды.
<img src="https://kyzylorda-news.kz/wp-content/uploads/2021/03/160552763_2831346797138553_6563352104902687299_n.jpg" alt="" />
<img src="https://kyzylorda-news.kz/wp-content/uploads/2021/03/160663288_2831347430471823_3082406056769884781_n.jpg" alt="" />
<img src="https://kyzylorda-news.kz/wp-content/uploads/2021/03/160293881_2831346460471920_4282607546432583609_n.jpg" alt="" />

Қазақстан және Қызылорда облысының жаңалықтары: Экономика