<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Бүгін облыс әкімі Гүлшара Әбдіқалықованың қатысуымен облыстық мәслихаттың кезектен тыс 3 сессиясы өтті.
<blockquote>
 «Өздеріңіз білетіндей, 2021 жылға арналған облыстық бюджет 411,6 млрд.теңге көлемінде бекітілді. Бүгін міне, облыстық мәслихат сессиясының қарауына 2021-2023 жылдарға арналған облыстық бюджетті 18,9 млрд.теңге сомасында алғашқы нақтылау мәселесін ұсынып отырмыз. Бұл қаржылар 2021 жылдың 1 қаңтарындағы жағдай бойынша облыстық бюджет қаражаты қалдықтарын қайта бөлу, кіріс көзінің ұлғаюы, бюджеттік бағдарлама әкімшілерінің пайдаланылмаған және үнемделген қаржысы есебінен қалыптасып отыр. Атап өтетін жәйт, осы нақтылауда энергетика, құрылыс, автомобиль жолдары, әлеуметтік салалар бойынша алдағы уақытта құрылысы жоспарланып отырған жаңа бастамалардың жоба-сметалық құжаттарын әзірлеуге және мемлекеттік сараптамадан өткізуге қаржы қаралуда», – деді Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2021/04/173886155_3282237148545998_1768736288207811104_n.jpg" alt="" />
Күн тәртібінде 6 мәселе қаралды. Атап айтсақ, «2021-2023 жылдарға арналған облыстық бюджет туралы» Қызылорда облыстық мәслихатының 2020 жылғы 11 желтоқсандағы № 519 шешіміне өзгерістер мен толықтырулар енгізу, «Қызылорда облысы әкімдігінің дербес құрамын келісу туралы» Қызылорда облыстық мәслихатының 2016 жылғы 31 тамыздағы № 51 шешіміне өзгеріс енгізу, «Азаматтардың жекелеген санаттарына амбулаториялық емдеу кезінде тегін және (немесе) жеңілдікті шарттармен тегін медициналық көмектің кепілдік берілген көлемін, оның ішінде дәрілік заттарды, арнайы емдік өнімдерді, медициналық бұйымдарды қосымша беру туралы» Қызылорда облыстық мәслихатының 2020 жылғы 21 қазандағы № 474 шешіміне өзгерістер мен толықтырулар енгізу, «Әлеуметтік маңызы бар қатынастардың тізбесін айқындау туралы» Қызылорда облыстық мәслихатының 2016 жылғы 10 ақпандағы № 352 шешіміне өзгеріс енгізу, Қазақстан Республикасы Үкіметінің жанындағы Республикалық ономастика комиссиясының қарауына «Қызылорда облысының білім басқармасының Қызылорда қаласы бойынша білім бөлімінің «№ 11 мектеп-лицейі» коммуналдық мемлекеттік мекемесіне Әбубәкір Тыныбаевтың есімін беру жөніндегі ұсынысты енгізу және «Қызылорда облыстық сайлау комиссиясының құрамын сайлау туралы» Қызылорда облыстық мәслихатының 2019 жылғы 11 қаңтардағы № 290 шешіміне толықтыру енгізу туралы сөз болды.
Күн тәртібіндегі бірінші мәселе бойынша облыстық экономика және бюджетті жоспарлау басқармасының басшысы Нұрғали Қордабай баяндама жасады.
«Қызылорда облысы әкімдігінің дербес құрамын келісу туралы» Қызылорда облыстық мәслихатының 2016 жылғы 31 тамыздағы № 51 шешіміне өзгеріс енгізу туралы облыс әкімінің аппарат басшысы Ерлан Райғаниев сөз сөйлесе, үшінші мәселе бойынша облыстық денсаулық сақтау басқармасының басшысы Сабит Пазылов баяндады. 
2020 жылы Республикалық бюджеттен қаржы бөлініп, амбулаториялық дәрілік препараттармен тегін қамтамасыз етілген. Алайда, соңғы жылдары кейбір дәрілік препараттар атталған бұйрыққа енгізілмеуіне байланысты жергілікті бюджет есебінен қамтамасыз етіліп келеді. Осы орайда, Сабит Пазылов 2021 жылға әлеуметтік осал топтар арасынан науқастарды нозологиялық аурудың ауырлық деңгейіне байланысты тегін және (немесе) жеңілдікпен берілетін дәрілік заттармен қамтамасыз ету туралы шешімге өзгерістер мен толықтырулар енгізуді сұрады.
<img src="https://kyzylorda-news.kz/wp-content/uploads/2021/04/173421023_3282238388545874_749394374533398667_n.jpg" alt="" />
Ал, облыстық жолаушылар көлігі және автомобиль жолдары басқармасысының басшысы Мұрат Тілеумбетов күн тәртібіндегі төртінші мәселе бойынша баяндады.
Қоғамның әлеуметтік-экономикалық жағдайына ықпал ететін және тарифтердің қолжетімділік деңгейі мен Қазақстан Республикасының аумағы бойынша халықтың еркін жүріп тұру мүмкіндігін қамтамасыз ету мақсатында ұйымдастырылатын тұрақты қатынастардағы жолаушыларды тасымалдау әлеуметтік мәні бар тасымалдар деп танылады. Басқарма басшысы ауданаралық бағыттар тізбесін әлеуметтік маңызы бар қатынастар ретінде айқындауды ұсынды.
<img src="https://kyzylorda-news.kz/wp-content/uploads/2021/04/173473815_3282237711879275_1259354315548979616_n.jpg" alt="" />
«№ 11 мектеп-лицейі» коммуналдық мемлекеттік мекемесіне Әбубәкір Тыныбаевтың есімін беру жөніндегі ұсыныс бойынша облыстық ішкі саясат басқармасының басшысы Мира Қазбекова хабарлама жасады. 
Күн тәртібіндегі соңғы сұраққа қатысты облыстық мәслихаттың хатшысы Наурызбай Байқадамов сөз сөйледі.
<img src="https://kyzylorda-news.kz/wp-content/uploads/2021/04/173582154_3282238035212576_8202482200911667633_n.jpg" alt="" />
Облыстық сайлау комиссиясының құрамына «Ауыл» халықтық-демократиялық патриоттық партиясы Қызылорда облыстық филиалынан Болат Накиповтың кандидатурасы қолдау тапты.
Жиын соңында облыстық мәслихат депутаты Қылышбай Бисенов өңірдегі балабақшаларды қаржыландыру мәселесін қозғаса, Шахизада Әбдікәрімов көпқабатты тұрғын үйлер құрылысына қатысты бірқатар ұсыныс айтты.
<img src="https://kyzylorda-news.kz/wp-content/uploads/2021/04/173812204_3282238538545859_2424834901831728047_n.jpg" alt="" />

Қызылорда облыстық мәслихатының кезектен тыс 3 сессиясы өтті

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Қызылорда облысының әкімі Гүлшара Әбдіқалықова Қызылорда қаласындағы бірқатар бизнес және әлеуметтік бағыттағы нысандарды аралап, жұмысын тексерді.
Алдымен аймақ басшысы «КазАгроМир» жылыжай кешенінің, ет өнімдерін шығаратын «Танкаман» шаруа қожалығының жұмысымен танысты. Жалпы ауданы 2,2 гектар жерде орналасқан жылыжай кешені жылына 1000 тонна қияр және қызанақ өндіреді.
Ал, «Танкаман» шаруа қожалығында жылқы малдарын өсіреді, бордақылайды және қымыз өнімін өндіреді. Мұнда 15 азамат жұмыс істеуде.
Мұнымен қоса, облыс әкімі қаладағы бірнеше шағын өндіріс орындарына барды. «Хуа Ю Интернационал» химиялық реагенттер шығаратын зауыттың, «ВЕГА-ПРОМ» желім (клей), ЖК «Қалымбетова» шұжық, «Аруана-Агролидер» ет өнімдерін шығаратын цехтарының, «Dalatex» тігін фабрикасының жұмысымен танысты.
«Хуа Ю Интернационал» химиялық реагенттер шығаратын жылына 1000 тонна өнім шығарса,, «ВЕГА-ПРОМ» желім шығаратын цех тәулігіне 50 тонна желім өндіреді. Ал, шұжық шығару цехында 12 азамат тәулігіне 5 тонна шұжық өнімін шығарады.
Құны 50 млн.теңгені құрайтын «Аруана-Агролидер» ет өнімдерін шығаратын цех тәулігіне 800 тонна консервіленген ет өнімдерін әзірлейді. Ал, «Dalatex» тігін фабрикасында сағатына 7 тонна өнім тігеді. Мұнда 23 тұрғын жұмыспен қамтылып отыр.
Аймақ басшысы Гүлшара Әбдіқалықова шағын бизнес иелеріне жұмысты одан әрі жандандырып, өнім көлемін арттыра отырып, шығарылатын өнімдерді сапалы әрі стандартқа сай етіп өндіруді тапсырды. Бұл жұмыстардың іске асырылу барысын бақылауды орынбасары Нұрлан Тілешовке жүктеді.
Мұнан кейін облыс әкімі жалпы ауданы 41,1 мың шаршы метрді құрайтын СПМК-70 тұрғын ауданында жаңадан салынып жатқан 14 кредиттік тұрғын үйдің құрылыс барысын көрді. 630 пәтерлік үйлерді салуға 8 млрд. 245,7 млн теңге бөлінген.
Аймақ басшысы Гүлшара Әбдіқалықова қала әкімі Ғанибек Қазантаевқа тұрғын үй құрылысына қажет құрылыс материалдарының сапасына аса мән беруді және уақытылы аяқтауды міндеттеді.
Сондай-ақ, өңір басшысы «Жұмыспен қамтудың 2020-2021 жылдарға арналған
Жол картасы» аясында Ғ.Мұратбаев көшесіндегі стадион аумағын абаттандыру және «Қызылорда су жүйесі» мекемесіне жүргізілген ағымдағы жөндеу жұмысын тексерді.
Абаттандыру жұмыстарына 195,0 млн. теңге бөлінген. Бағдарлама аясында 75 данатүнгі жарық шам, 67 дана орындық, 67 дана қоқыс жәшігі, 1 дана су бұрқақ орналастырылып, 17 000 шаршы метр жерге брусчатка төселуде. Ал, «Қызылорда су жүйесі» мекемесінің өндірістік техникалық базасына ағымдағы жөндеу жұмыстарын жүргізуге 109,7 млн. теңге бөлінген. Жоба аясында 35 адам жұмыспен қамтылды. 
Аймақ басшысы қала әкіміне мемлекеттік бағдарламалар арқылы бөлінген қаржының мақсатты жұмсалып, тиісті жұмыстарының сапалы атқарылуын қатаң бақылауға алуды жүктеді.
Нысандарды аралау барысында облыс әкімі қалалық жұмыспен қамту, әлеуметтік бағдарламалар және азаматтық хал актілері бөлімінің жұмысын тексерді. Ғимарат 3 қабаттан тұрады. 1 қабатта – мүгедектігі бар азаматтарға қызмет көрсету және сауықтыру, 2 қабатта – мемлекеттік қызметтер көрсету, 3 қабатта – «Бақытты отбасы» отбасын қолдау блогтары орналасқан.
<blockquote>
 «Бүгінгі күні әлеуметтік сала өзекті салалардың бірі. Жұмыссыздарды тіркеу, мемлекеттік атаулы әлеуметтік көмекті ұйымдастыру, жұмыспен қамтудың төлемдерін жүргізу, қоғамдық қабылдау өткізуаса жауапты қызмет. Тұрғындарға жоғары деңгейде қызмет көрсетіп, дер кезінде көмек беру керек. Мемлекеттік бағдарламалардың сапалы жүзеге асырылуына аса мән беріңіздер», – деді Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2021/04/5dd2e2b3ebddc98c6d858bf253dabd79_1280x720.jpg" alt="" />
<img src="https://kyzylorda-news.kz/wp-content/uploads/2021/04/fb_img_1618248537463.jpg" alt="" />

Аймақ басшысы Қызылорда қаласындағы бірқатар бизнес және әлеуметтік нысанды аралады

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; 2025 жылға қарай Байқоңыр қаласы мен мұндағы ғарыш айлағына жылына 250 мыңға дейін турист тарту жоспарлануда. Бұл тарихи мекеннің әлеуеті жоғары: мұнда ғарыш саябағын салып, туристік пойыз жүргізуге және автожарыстар ұйымдастыруға болады, деп жазады <a href="https://sputnik.kz/">Sputnik Қазақстан</a>.
<h3 id="">Туристер отбасымен демалысқа келуі керек</h3>
“Байқоңыр” туристік аймағы 2019-2025 жылдарға арналған туристік саланы дамытудың мемлекеттік бағдарламасы бойынша келешегі зор он бағыттың ішіне кірді.
<blockquote>
 “Қала мен ғарыш айлағының аумағына келген қонақтар орналасатын орындар тапшы екенін жақсы түсінеміз. Барлығы жеті қонақ үй болса, оның бесеуі қалада, екеуі ғарыш айлағының аумағында орналасқан. Жалпы саны 550 жатын орын бар. Бұл өте аз”, – дейді Ержан Еркінбаев.
</blockquote>
Kazakh Tourism қонақ үйлердің құрылысына инвесторлар тартуды көздеп отыр. Оның айтуынша, Байқоңыр қаласы мен ғарыш айлағына туристердің отбасымен 3-4 күн демалысқа келуіне қолайлы инфрақұрылым қажет.
<img src="https://sputnik.kz/images/07e5/04/0c/16768118.jpg" alt="Председатель правления национальной компании Kazakh Tourism Ержан Еркинбаев" title="Председатель правления национальной компании Kazakh Tourism Ержан Еркинбаев" />
Kazakh Tourism ұлттық компаниясының басқарма төрағасы Ержан Еркінбаев
<blockquote>
 “Ғарыш айлағындағы алаңдар өзара дамыған теміржол жүйесімен байланысып тұр. Қазір бұл темір жол сервистік, қызмет көрсетуші, техникалық мақсатта ғана қолданылып жүр. Қосымша вагондар сатып алу арқылы алаңдар арасында туристік пойыз жүргізуге болады. Сол вагондардан зымыранның ұшуын көруге болады. Маневрлі тепловоз туристер үшін нағыз қолайлы жылдамдықта жүре алады”, – деді Еркінбаев.
</blockquote>
<h3 id="-1">Бақылап-өткізуді жеңілдету ұсынылды</h3>
Kazakh Tourism ұлттық компаниясының басқарма төрағасы бақылау-өткізу орындарындағы кей рәсімдерді цифрландыруға болатынын айтты.
<blockquote>
 “Біз ресейлік тарапты бұл процсті бірлесіп қарастыруға шақырдық. Әрине, технологиялық процестер мен қауіпсіздікті елеусіз қалдыруға болмайды. Бірақ кей процестерді жылдамдату қажет деп ойлаймын. Ол үшін барлық техникалық қауіпсіздікті ескере отырып, цифрландыруды енгізу керек”, – деді Еркінбаев.
</blockquote>
Оның пікірінше, Байқоңыр туристерге арналған музей емес, ол ең алдымен ғарыш айлағы екенін естен шығармау керек.
<blockquote>
 “Оны жалпыға қолжетімді орынға айналдыруға болмайды. Бірақ ақылға қонымды шаралар, жоспарлар және ең бастысы туризмнің дамуы үшін бұл процестерді жеңілдетуге бағытталған екі ел арасындағы диалог бар”, – деп атап өтті басқарма төрағасы.
</blockquote>
<h3 id="-2">Байқоңырда ғарыш саябағы пайда болады</h3>
Еркінбаев серіктестермен бірлесіп ғарыш айлағын дамыту жоспары әзірленгенін айтты. Ол ғарыш айлағы музейінің аумағына орналастырылады.
<blockquote>
 “Алдын ала есеп бойынша аумағы 50 гектар шамасында. Онда жабық ғарыш музейі мен ашық аспан астындағы музей орналасады. Оған заманауи аттракциондар, цифрлық, компьютерлік шешімдер, күмбезді кинотетар мен &nbsp;басқа да нысандар салынады. Бұл туристерді тартуға ықпал етеді”, – деді ол.
</blockquote>
Kazakh Tourism басшысы атап өткендей, басқа елдердегі ғарыш айлақтары елге бір жарым миллион туристі тартып, экономикаға 300 миллион долларға дейін табыс кіргізіп отыр.
<h3 id="-3">Аэродромда автожарыс өткізу мүмкін бе?</h3>
Еркінбаев Юбилейный аэродромын туризм дамыту бойынша әлеуеті жоғары орын деп санайды.
<blockquote>
 “Юбилейный аэродромы ғарыш айлағының функционалынан шығарылған. Бірақ ол жақта аумағы үлкен ұшу-қону жолағы бар. “Буран” ғарыш кемесі осы орынға қонған болатын. Бұл орынды жоғалтуға болмайды. Оны “Формула-1″ секілді автожарыстар өткізу үшін пайдалануға болады. Егер стратегиялық серіктес пен трансұлттық компаниялар қызығушылық танытса, онда әлемдік деңгейде туристер тарту 50%-ке қамтамасыз етіледі. Бұл ғарыш айлағындағы бір ғана элемент көрсеткіші”, – деді ол.
</blockquote>
Алайда, Еркінбаев осы аталған шаруалардың барлығы тек жоспар екенін еске салды. Қазір келіссөздер жүріп жатыр.
<blockquote>
 “Нұр-Сұлтанға қайтқаннан кейін Red Bull, Burning Man секілді әлемдік фестивальдердің авторлары саналатын әлемдік брендтермен байланысатын боламыз”, – деді ол.
</blockquote>
Сондай-ақ, Еркінбаев Байқоңырға өз балаларын алып келуді армандайтынын айтты.
<blockquote>
 “Мұнда адамның ой-санасы өзгереді. Адамның мүмкіндіктеріне басқаша көзқараспен қарай бастайсың”, – деді ол.
</blockquote>
Ол ғарыш айлағы өзінің тартымдылығын жоғалтпауы үшін Байқоңырда зымырандарды ұшыру жүйесі қарқынды дамуы керек екенін атап өтті.

Байқоңырда ғарыш саябағы пайда болады

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Түркістан қаласында Орталық Азиядағы ең ірі «Керуен-сарай» көпфункционалды туристік кешенінің ашылу рәсімі өтті. Инвестициялық жобаны «Turkistan Tourism City» компаниясы іске асырды, кешен құрылысы 2019 жылы желтоқсан айында басталды.
Нысан Қожа Ахмет Яссауи кесенесіне қарама-қарсы «Әзірет Сұлтан» мәдени қорығының буферлік аймағында 20,5 га аумақта орналасқан. Мұнда 4 мыңнан астам тұрақты жұмыс орны құрылды. Кешенге Жібек жолы дәуіріндегі саудагерлер мен қолөнершілер көшесі, «ұшатын театр», ат шоуын өткізуге арналған амфитеатр, Шығыс базары, сауда сөрелері мен бутиктер, қонақ үйлер мен мейрамханалар, СПА және фитнес-орталық, кинотеатр, отбасылық ойын-сауық орталығы кіреді. Бұл ретте, барлық құрылымдар су арнасы арқылы байланыстырылған, онда судағы «қайық шеруі» театрландырылған шоуы өткізіледі. «Керуен-сарай» кешенінің Орталық Азияда баламасы жоқ және ол Қожа Ахмет Яссауи кесенесінен кейін өңірге туристер мен инвестицияларды тартатын басты орталыққа айналуы тиіс.
«Керуен-сарай» кешенінің ашылу салтанатына Премьер-Министр Асқар Мамин, Түркістан облысының әкімі Өмірзақ Шөкеев, мәдениет және спорт министрі Ақтоты Райымқұлова, сондай-ақ инвестор компанияның өкілі Қуанышбек Құдайберген қатысты. А. Мамин Түркістандағы Қазақ музыкалық драма театрына барды.
Ғимараттың жалпы ауданы 11 мың шаршы метрден асады. Бұл аса жаңа жабдықтармен және театр жұмысына қажетті барлық бөлмелермен жабдықталған заманауи кешен. Көрермендер залының сыйымдылығы 510 адамды құрайды.Үкімет басшысы облыстық ғылыми-әмбебап кітапханамен танысты. Бұл ақпарат пен шығармашылыққа арналған бірегей хаб. Ғимараттың үш қабаты оқу залдары, коворкинг-орталықтары, фото-, бейне- және аудиожазба, каллиграфия, қыш өнері студиялары, шеберханалары, оның ішінде 3D-модельдерді жасауға арналған шеберханалары, сондай-ақ киноконцерт залы, кофеханалары, кітап кәдесыйлары мен қолдан жасалған бұйымдар дүкендері қамтылған зоналарға бөлінген.
Кітапхананың ғылыми-зерттеу орталығында кітап сақтау қоймасы, сирек кездесетін кітаптар мен көне заманғы қолжазбаларды сақтауға арналған бөлім, құжаттарды, кітаптарды цифрландыру және консервациялау цехтары, оның ішінде Орталық Азиядағы тотығуға қарсы жабдықпен жабдықталған бірден-бір цех бар.
Жұмыс сапары аясында Премьер-Министр сондай-ақ Түркістан қаласында басқа да инвестициялық жобалардың іске асырылу барысын тексерді.
<img src="https://kyzylorda-news.kz/wp-content/uploads/2021/04/171831578_3760779087371736_5449109305228828888_n.jpg" alt="" />
<img src="https://kyzylorda-news.kz/wp-content/uploads/2021/04/171530487_3760722050710773_7587846627225887014_n.jpg" alt="" />
<img src="https://kyzylorda-news.kz/wp-content/uploads/2021/04/172226223_3760779060705072_575265620045942261_n.jpg" alt="" />

Түркістанда Орталық Азиядағы ең ірі «Керуен-сарай» туристік кешені ашылды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Байқоңыр қаласында адам баласының ғарышқа алғаш ұшуының 60 жылдығына арналған салтанатты кездесу өтті. Оған еліміздің Премьер-министрі Асқар Мамин, «Роскосмос» мемлекеттік корпорациясының басшысы Дмитрий Рогозин, Цифрлық даму, инновациялар және аэроғарыш өнеркәсібі министрі Бағдат Мусин, NASA әкімшісінің орынбасары Кеннет Бауэрскок, ғарышкер Тоқтар Әубәкіров, ҚР Парламенті Сенатының депутаты Талғат Мұсабаев және басқалар қатысты.
Кездесуге қатысушылар алдында сөз сөйлеген ғарышкер-сенатор Талғат Мұсабаев қазақтандық ғарыш саласының бастауында Қазақстан Республикасының Тұңғыш Президенті – Елбасы тұрғанын, себебі сол кісінің Жарлығымен Ұлттық ғарыш агенттігі құрылғанын атап өтті. Депутат сонымен қатар адамның ғарышқа ұшуы – дүниежүзілік маңызы бар оқиға екеніне тоқталды. Ал осы оқиғаның Қазақстан жерінде орын алғаны ерекше маңызды деп айтты.
<blockquote>
 «Біз, қазақстандықтар, Байқоңырдың табысты жұмысы, бүкіл адамзаттың игілігі, ғарыштық жобалардың дамуы үшін ерекше мақтаныш пен жауапкершілік сезінеміз. Қазақстан ғарышты игерудің өзіндік күрделі жолымен жүріп келеді. Біздің еліміз экономиканың жоғары технологиялық және ғылымды қажетсінетін секторы – ғарыш саласын дамытуда маңызды қадамдар жасады»&nbsp;– деді Талғат Мұсабаев.
</blockquote>
Сенатор бүгінгі таңда біздің еліміз ғарыш аппараттарының орбиталық топтарының екі жүйесін іске қосқанын айтты. Ұлттық ғарыштық зерттеулер мен технологиялар орталығы, «Бәйтерек» қазақстандық-ресейлік кәсіпорны және тағы өзге де мамандандырылған кәсіпорындар ашылды. Алайда, сенатордың айтуынша, бұл салада проблемалар бар. Талғат Мұсабаев қазіргі таңда жоғары білікті мамандардан айрылу қаупі жоғары екенін атап өтті. Оның пайымдауынша, бұрын құрылған ғарыш саласын басқару жүйесі, атап айтқанда кадрларды іріктеу және орналастыру жүйесі құлдырай бастады.
<blockquote>
 «Ғарыш саласының табысты жұмысының басты факторы туралы тағы да айтқым келеді. Бұл – адамдар, мамандар. Қазақстандық ғарыш саласын құрудағы барлық қиындықтардан бірге өткен әріптестерім, ғалымдар, ғарышқа ұмтылған жас мамандар болмаса, ештеңе де болмас еді»,&nbsp;– деді Талғат Мұсабаев.
</blockquote>

Ғарыш: Талғат Мұсабаев қазіргі таңда жоғары білікті мамандардан айрылу қаупі жоғары екенін айтты

Kyzylorda-news.kz. Бүгін ҚР Премьер-Министрі Асқар Мамин жұмыс сапарымен Қызылорда облысының Байқоңыр қаласына барды. Сапары аясында Үкімет басшысы Асқар Мамин, «Роскосмос» ғарыш қызметі жөніндегі мемлекеттік корпорациясының бас директоры Дмитрий Рогозин және облыс әкімі Гүлшара Әбдіқалықова бірқатар нысандарды аралады.
Аймақ басшысы Премьер-министр Асқар Маминге Байқоңыр қаласының әлеуметтік-экономикалық даму мәселелері бойынша атқарылған жұмыстарды атап өтті. Сондай-ақ, қаланы газдандыру және сумен жабдықтау, туристік инфрақұрылымды дамыту мәселелеріне тоқталды. 
Соңғы 30 жылда алғаш рет Байқоңыр қаласының бас жоспарына сәйкес республика есебінен 50 пәтерлік 5 тұрғын үй салынып, пайдалануға берілді. Биыл тағы бес көпқабатты үйдің құрылысын бастау жоспарлануда.
Қалада барлық көпқабатты үйлер мен бірқатар шағын және орта бизнес кәсіпорындары газбен қамтылған, табиғи газға төлеу тарифі Қызылорда облысымен бірыңғай тарифке тең. Сонымен қатар, сумен жабдықтау және су бұру жүйелерін жаңарту жұмыстары жүргізілетін болады. 2021 жылы 901,2 млн.теңге қаржы көлемінде кәріз су жүйелерін қайта құру жұмыстары жоспарлануда. Яғни кәріз су желілерінің 11,4 шақырымы қайта жаңартылады.
Өткен жылы Байқоңыр қаласында «Жұмыспен қамтудың Жол картасы – 2020» бағдарламасы арқылы 11 жоба жүзеге асып, 306 адам жұмысқа алынған. Сондай-ақ, 1552 азамат «Еңбек» мемлекеттік бағдарламасы аясында еңбекпен қамтылған.
Байқоңыр қаласында атқарылған жұмыстарды саралаған Премьер-Министр Асқар Мамин Байқоңыр қаласы мен оған жақын орналасқан Ақай және Төретам ауылдарындағы инфрақұрылым нысандарын қаржыландыру тетіктерін қарастыруды тапсырды.
Мұнан кейін Үкімет басшысы Асқар Мамин мен облыс әкімі Гүлшара Әбдіқалықова «Союз МС-18» басқарылатын кораблінің ұшырылуын және оның Халықаралық ғарыш станциясымен түйісу сәтін бірге бақылады. Сондай-ақ, Премьер-Министр адамның ғарышқа алғаш ұшуының 60 жылдығына арналған конференцияның пленарлық отырысына қатысып, ҚР Президенті Қасым-Жомарт Тоқаевтың шараға қатысушыларға арнаған сөзін оқып берді.
<blockquote>
 «Міне, 65 жыл бойы әлемдегі ең ірі ғарыш айлағы болып келген Байқоңыр ғарыш айлағынан 150 ғарышкер кең байтақ ғаламды игерді. Олардың қатарында қазақстандық ғарышкерлер Тоқтар Әубәкіров, Талғат Мұсабаев және Айдын Айымбетов бар. Қазақстан мен Ресейдің одан әрі белсенді және жемісті ынтымақтастығы ғарыштық зерттеулер мен басқарылатын ұшулар саласындағы бірлескен жобалар мен бағдарламаларды іске асыруға ықпал ететініне сенімдімін»,- деді А.Мамин.
</blockquote>
Айта кетейік, конференцияның пленарлық отырысына «Роскосмос» мемлекеттік корпорациясының басшысы Дмитрий Рогозин, ҚР цифрлық даму, инновациялар және аэроғарыш өнеркәсібі министрі Бағдат Мусин, NASA әкімшісінің орынбасары Кеннет Бауэрсокс, қазақстандық ғарышкерлер Тоқтар Әубәкіров, Талғат Мұсабаев, Айдын Айымбетов және Мұхтар Аймаханов, «One Web», «SES Networks» спутниктік операторларының басшылығы қатысты.
<img src="https://kyzylorda-news.kz/wp-content/uploads/2021/04/fb_img_1617988072838.jpg" alt="" />

ҚР Премьер-министрі Асқар Мамин жұмыс сапарымен Байқоңыр қаласына барды

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Аудан әкімі Асылбек Шаменовтың төрағалығымен бүгін Жалағаш аудандық әлеуметтік әріптестік және әлеуметтік еңбек қатынастарын реттеу жөніндегі үшжақты комиссия отырысы өтті.
Комиссия отырысына “Қызылорда облысының кәсіподақтар орталығы” аумақтық кәсіподақтар бірлестігі төрағасы Сермағамбетов Серік, “Қызылорда облысының кәсіподақтар орталығы” аумақтық кәсіподақтар бірлестігі төрағасының орынбасары Бәйімбетов Марат, Мәдениет, спорт, туризм және ақпарат қызметкерлері салалық кәсіподағының Қызылорда облысы филиалының төрағасы Үмбетова Раушан, Қазақстандық білім және ғылым қызметкерлерінің салалық кәсіподағы ҚБ Қызылорда облыстық ұйымының төрайымы Гүлнар Есқалиева, “Senim” денсаулық сақтау жүйесі жұмыскерлерінің салалық кәсіподағы РҚБ Қызылорда облыстық филиалының төрағасы Асылхан Абылайханұлы, “Ауыл шаруашылығы қызметкерлері салалық кәсіподағы” Қызылорда облыстық филиалы төрағасы Толыбай Жүсіпов, облыстық жұмыспен қамтуды үйлестіру және әлеуметтік бағдарламалар басқармасы, облыстық еңбек саласындағы бақылау басқармасы, аудандық бөлім, мекеме басшылары, кәсіпкерлер, шаруашылық басшылары мен кәсіподақ ұйымдарының өкілдері қатысты.
Комиссия отырысында Қызылорда облысы көлемінде әлеуметтік әріптестік аясында облыстық кәсіподақтар орталығы тарапынан әлеуметтік еңбек қатынастарын реттеуде атқарылып жатқан жұмыстар мен алдағы мақсаттар туралы Қызылорда облысының кәсіподақтар орталығы” аумақтық кәсіподақтар бірлестігі төрағасы Сермағамбетов Серік, ауданда әлеуметтік әріптестік аясында халықтың тиімді жұмыспен қамтылуын қамтамасыз ету, лайықты еңбек жағдайлары мен жалақыны қалыптастыруға, әлеуметтік саясатты нығайтуға бағытталған жұмыстар туралы аудан әкімінің орынбасары Еспенбет Жасұлан хабарлама жасады.
Жиын соңында аудан көлемінде жұмыс жасап жатқан ірі және орта бизнес өкілдер арасындағы қызметкерлердің жұмыспен қамтылуы, еңбек құқықтары мен кепілдіктерін сақтау және өндірістің қалыпты жұмыс істеуін қамтамасыз ету мәселелері жөніндегі өзара ынтымақтастық меморандумына қол қою рәсімі өткізілді.
<img src="https://kyzylorda-news.kz/wp-content/uploads/2021/04/170152652_1191118574673552_1367267046362591956_n.jpg" alt="" />
<img src="https://kyzylorda-news.kz/wp-content/uploads/2021/04/171642598_1191118774673532_5050696749695167717_n.jpg" alt="" />

Жалағашта әлеуметтік еңбек қатынастарын реттеу жөніндегі үшжақты комиссия отырысы өтті

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Жаңақорған ауданында қуаты 10 мегаваттық күн электр стансасының құрылысы аяқталды. Бұл туралы Энергетика министрлігінің баспасөз қызметі хабарлады.
Жобаны ресейлік «Хевел» компания­сының еншілес кәсіпорны «Хек-Кт» ЖШС іске асырды. Аталған станса күнді бақылау жүйесі бар жоғары тиімді күн модульдерімен қамтылған. Бұл жүйе фотоэлектрлік жүйе орналасуының статистикалық әдісімен са­лыстырғанда электр энергиясын өндіруді орта есеппен 20-25%-ға арттыруға мүмкіндік береді. КЭС құрылысы кезінде 100-ге жуық адам тартылып, 10 тұрақты жұмыс орны құрылды.
Былтыр «Хевел» компаниялар тобы Алматы облысында «Қапшағай» КЭС-ін (3 МВт) және «Сарыбұлақ» КЭС-ін (4,95 МВт) салған болатын. Аталған ұйым осы жылдың бірінші тоқсанында Шымкентте «Шымкент» КЭС-ін (20 МВт), Түркістан облысындағы «Кентау» КЭС-ін (50 МВт) және Қызылорда облысындағы «Жаңа­қорған» КЭС-ін (10 МВт) пайдалануға берді.
Инвестор сәуір айының соңына дейін Түр­кіс­тан облысында Шоқтас КЭС-ін (50 МВт) және Күшата КЭС-ін (10 МВт) пайда­ла­ну­ға беруді жоспарлап отыр. Бұл нысандарда негізгі жұмыстар аяқталып, іске қосу-жөндеу жұмыстары жүріп жатыр.
Осылайша, Қазақстанның оңтүстігінде «Хевел» компаниялар тобы жобаларының жиынтық қуаты 148 мегаватты құрайтын болады. 2020 жылғы қазандағы жағдай бойынша Қазақстандағы топ жобаларының жалпы көлемі 248 мегаватқа жетіп отыр.

Жаңақорғанда күн электр стансасының құрылысы аяқталды

<a href="https://kyzylorda-news.kz/">Kyzylorda-news.kz.</a> «Бес әлеуметтік бастама» жобасы аясында Қызылорда облысында 1500 орындық жатақхана салу жоспарланған болатын. Бүгінде студенттерге арналған үш жатақхана пайдалануға берілді.
Бұл туралы Өңірлік коммуникациялар қызметінің ақпарат алаңында өткен брифингте «Қаржы орталығы» АҚ Жобаларды ілгерілету департаментінің директоры Алпамыс Сатыбалдин мәлімдеді.
Қаржы орталығы өңірлердегі студенттерге қажетті жатақхана орнын зерттейді. Ұсыныстарды жинақтайды. Бағдарлама үш жыл бұрын басталды. Ел бойынша 75 мың орындық жатақхана салу қажеттігін анықтады. Ал облыс студенттеріне нақты 1320 орындық жатақхана керек екен.
<blockquote>
 «Қазіргі кезде облыс кәсіпкерлерінің көмегімен бұл мәселенің жартысынан көбі шешілді. Соның ішінде, жеке кәсіпкер «Сүйеніш» ЖК 414 орындық, «ДиЛМАШ » ЖШС-і 330 орындық, «Болашақ» университеті 372 орындық жатақхана салды. Сонымен бірге, бала санының артуынан мектептерге деген сұраныс артуда. Сол себепті де жатақхана немесе жеке мектеп салуға ниетті кәсіпкерлерге мемлекет қолдау көрсетуге дайын», -деді Алпамыс Айдарұлы. 
 Бүгінде өңірде 7 жеке білім ошағы жұмыс жасауда. Бұған қоса, жаңадан үш мектеп пайдалануға берілді.
</blockquote>

Қызылордада үш жатақхана салынды

<a href="https://kyzylorda-news.kz/">Kyzylorda-news.kz.</a> Шиелі ауданы өткен жылы 120 тонна күріш, 850 тонна қарбыз, 1005 тонна қауын және 351 тонна қызанақ дақылын Ресей және Қырғызстан елдеріне экспорттады. Бұл туралы Өңірлік коммуникациялар қызметінің ақпарат алаңында өткен баспасөз конференциясында Шиелі ауданының әкімі Қамбарбек Мүбараков мәлімдеді.
Жалпы ауданда 13 жылыжай бар. Былтыр қызанақ пен қиярдан 550 тонна өнім жинаған. Биыл Шиеліде 30 246 гектар жерге ауыл шаруашылығы дақылы егіледі. Негізгі дақыл күріштің үлесі 12 037 гектар. Жалпы егіс көлемінің 38,8 пайызын құрап отыр. Дәнді дақылдар үлесін 2379-ға, картоп, көкөніс, бақша дақылдарын 5157 гектарға ұлғайту көзделуде. Сондай-ақ, 70 гектарға соя дақылы егілетін болады.
<blockquote>
 «Өткен жылы аудан бойынша 29 461 гектар жерге ауыл шаруашылығы дақылдарын еккенбіз. Диқандар 14 353 гектардан 59,9 центнерден өнім алып, қамбаға 85 940 тонна астық жинады. Бұған қоса, 1183 гектар картоптан 29575 тонна, 1537 гектар көкөністен 46110 тонна және 2123 гектар бақша дақылдарынан 63690 тонна өнім алды. Биыл да мол өнім жинаймыз деген ниеттеміз», – деді Шиелі ауданының әкімі Қамбарбек Мүбараков.
</blockquote>

Шиелі ауданы ауыл шаруашылығы өнімдерін Ресей мен Қырғызстанға экспорттауда

<a href="https://kyzylorda-news.kz/">Kyzylorda-news.kz.</a> Биыл Шиелі ауданындағы сегіз елді мекенге газ тартылады. Оған 3 млрд. теңгеге жуық қаржы қаралған. Бұл туралы Өңірлік коммуникациялар қызметінің ақпараттық алаңында өткен брифингте Шиелі ауданының әкімі Қамбарбек Мүбараков мәлімдеді.
Қазіргі таңда Шиелі кентіндегі 6351 тұрғын үйге, 190 мекеме газға қосылған. Жеке тұрғындардың есебінен Ы.Жахаев және Бидайкөл елді мекендерінде газдандыру жұмыстары жүргізілуде. Қос ауылда 760 үйге газ кіргізілді. Өткен жылдың соңында Байсын елді мекеніне де көгілдір отын берілді. Ауылдағы 140 үй газды пайдаланып отыр.
<blockquote>
 «Ауданға қарасты ауылдарды көгілдір отынмен қамту жұмыстарын кезең-кезіңмен жалғастырып жатырмыз. Н.Бекежанов ауылын газдандыруға өткен жылдың желтоқсан айында 100 млн.теңге қаражат бөлініп газдандыру жұмыстары бастау алса, бүгінгі таңда осы жобаға қосымша 327 млн.теңге қаржы бөлінді, үстіміздегі жылы ауылды толық газға қосатын боламыз. Биыл «Ауыл – ел бесігі» бағдарламасы аясында Қодаманов ауылын газдандыруға республикалық бюджеттен 557 млн. теңге қаражат бөлінді. Қазір мердігер мекеме анықталуда. Жақын арада басталады», – деді Шиелі ауданының әкімі Қамбарбек Мүбараков.
</blockquote>
Ақмая, Алғабас, Бестам, Ақтоған, Жиделіарық, Еңбекші елді мекендерін газдандыруға жобалық-сметалық құжаты әзірленіп, облыстық энергетика және тұрғын үй-коммуналдық шаруашылық басқармасына бюджеттік өтінім тапсырылған. Ал Алмалы және Ә.Тәжібаев елді мекендерін газдандыруға жоба сметалық құжаттары әзірленіп, мемлекеттік сараптама қорытындысы күтілуде. Қалған ауылдарға газ тартуға қатысты құжаттарына қаржы қарастырылып, жұмыс жасалуда.

Шиелі ауданындағы 8 елді мекен көгілдір отынға қосылады

<a href="https://kyzylorda-news.kz/">Kyzylorda-news.kz.</a> Биыл облыста 48,5 млрд. теңгені құрайтын 4 ірі индустриялық жоба іске асырылады. Оның ішінде Арал ауданындағы ас тұзы және түйе сүтінен құрғақ сүт дайындау өндірісі, Қармақшы ауданындағы құс фабрикасы және шыны зауыты бар. Бүгінде бұл жобалардың жұмыстары аяқталуға жақын.
<blockquote>
 «Пандемияға байланысты біраз жоба тоқтап қалды. Қазір соның бәрін қайта қолға алып, жандандырып жатырмыз. Мәселен, биыл Қармақшы мен Аралдағы жобалардан бөлек, Жаңақорған ауданындағы «Шалқия» қорғасын-мырыш кен орнында кен байыту комбинатын, «Абдулла» шаруа қожалығы құс фабрикасының және Аралдағы кальцилендірілген сода зауытының құрылысы басталатын болады. Айта кетейін, сода зауыты жобасы бойынша инженерлік инфрақұрылымы «Бизнестің жол Картасы – 2025» бағдарламасы аясында жүргізілуде», – деді облыстық индустриялық-инновациялық даму басқармасының басшысы Ринат Сұлтангереев.
</blockquote>
Сонымен қатар, бүгінде қуаттылығы жылына 5 мың тонна өндіретін ет комбинаты және сүт өңдеу кешенінің ІІ кезеңі жобалары бойынша қажетті инженерлік инфрақұрылымдары жеткізіліп, құрылыс жұмыстары жалғасуда.
Жалпы индустрияландыру бағдарламасының ІІІ бесжылдығы аясында облыста 7 мыңнан аса жұмыс орны құрылатын 41 жоба жүзеге асырылуда. Оның ішінде Арал ауданындағы экспортқа бағытталған балықты тереңінен өңдеу цехтарының І кезеңі, облыстағы алғашқы кварц құмын байыту комбинатының желісі, Жаңақорғанда тротуарлық плитка, бордюр, лего кірпіш өндірісі және Жалағашта түйіршіктелген аммоний-сульфаты өндірістері пайдалануға берілді.

Қазақстан және Қызылорда облысының жаңалықтары: Экономика