<a href="https://kyzylorda-news.kz/">Kyzylorda-news.kz</a> Әлеуметтік медициналық сақтандыру қоры денсаулық сақтау саласындағы қаржы ағындарын басқарудың кешенді цифрлық моделіне көшуде.Мемлекет басшысының тапсырмасы мен ҚР Премьер-Министрінің тапсырмасын орындау аясында жаңа цифрлық Qalqan жүйесі қалыптастырылуда. Жоба Қор қызметін толық цифрландыруға, технологиялық алшақтықтарды жоюға және қолмен орындалатын операцияларды болдырмауға бағытталған. Бұл саладағы барлық негізгі шешімдердің бірыңғай әрі сенімді деректер негізінде қабылдануын қамтамасыз етеді.Qalqan платформасының басты ерекшелігі – оның ҚР Қаржы министрлігінің контурындағы заманауи технологиялық платформада орналастырылуы. Бұл дайын мемлекеттік IT-шешімдерді пайдалануға және денсаулық сақтау жүйесінің бюджетіне қосымша шығын түсірмей интеграциялауға мүмкіндік берді. Сонымен қатар, платформа медициналық ақпараттық жүйе болып табылмайды, емдеу-диагностикалық&nbsp;үрдісіне араласпайды және дәрігерлерге қосымша әкімшілік жүктеме түсірмейді. Оның негізгі мақсаты – қаржының абсолютті ашықтығын қамтамасыз ету, көрсетілген қызметтерді верификациялау және МӘМС қаражатына қатаң бақылау орнату.<blockquote>«Қазіргі уақытта Қор қызметі тек ішінара цифрландырылған, бұл процестердегі белгілі бір алшақтықтардың сақталуына және кейбір операциялардың қолмен орындалуына әкеліп келді. Qalqan платформасы – біздің түбегейлі жаңа деңгейге өтуіміз: жекелеген операцияларды жай есепке алудан бастап шығындар мен олардың тиімділігін толық басқаруға дейінгі жол. Біз медициналық ақпараттық жүйелерді, клиникалардың бухгалтерлік бағдарламаларын және мемлекеттік дереккөздерді байланыстыратын бірыңғай модель қалыптастырып жатырмыз. Бұл бізге тарифтерді жедел түзетуге және олардың бюджетке әсерін бірден көруге мүмкіндік беретін бірегей&nbsp;«бюджетті оркестрлеу»&nbsp;құралын енгізуге жол ашады. Ең бастысы – жүйе әрбір нақты пациентке жұмсалған шығындарды толықтай дараландырып, бұл ақпаратты оның жеке цифрлық ресурстарына шығаруды қамтамасыз етеді», – деп атап өтті ӘМСҚ басқарма төрағасының орынбасары Индира Ерденова.</blockquote>Qalqan платформасының пилоттық іске қосылуы 2026 жылғы 16 наурызда өтті. Бүгінде жүйеге еліміздегі барлық медициналық ұйымдар – 1700-ден астам клиника мен шамамен 5 000 бірлесіп орындаушы тартылған. Қазіргі уақытта оларды толық цифрландыру кезеңі жүріп жатыр: медициналық ұйымдар жүйеге лицензиялары, инфрақұрылымы (өндірістік базалары) және өзге де ресурстары туралы верификацияланған мәліметтерді енгізуде. Бұл еліміздегі медициналық қызмет көрсетушілердің алғашқы бірыңғай әрі сенімді базасын қалыптастыруға мүмкіндік береді.Qalqan платформасы аясында жүйеге деген ұзақ&nbsp;мерзімді сенімнің негізіне айналатын озық бақылау құралдары енгізілуде. Атап айтқанда, тіркелмеген қызметтерді болдырмау үшін медициналық көмектің нақты көрсетілгенін QR-код арқылы растау тетігі енгізілуде. Бұл ретте eGov инфрақұрылымы мен екінші деңгейлі банктердің үйреншікті сервистері пайдаланылады, бұл құралдың қосымша жүктемесіз жаппай қолданылуын қамтамасыз етеді.Платформа медициналық ақпараттық жүйелерге (оның ішінде Damumed, «Надежда» МАЖ және т.б.) тікелей қосылады. Қазіргі уақытта тестілеу кезеңі аяқталуға жақын, бұл бастапқы деректерді тікелей алуға мүмкіндік береді.Сонымен қатар, ауруханалардың ішкі бухгалтерлік жүйелерін (оның ішінде 1С базасындағы жүйелерді) қосу жұмыстары жүргізілуде. Осы деректер негізінде автоматтандырылған «тарифтік экономика» блогы әрбір медициналық қызметтің нақты өзіндік құнын есептейтін болады.Qalqan платформасын енгізу медицинадағы қаржылық бақылау жүйесін түбегейлі өзгертіп, оны мемлекет, медициналық ұйымдар және Қазақстанның әрбір азаматы үшін барынша ашық етеді.

Qalqan – денсаулық сақтауды қаржыландырудың бірыңғай цифрлық платформасы

<a href="https://kyzylorda-news.kz/">Kyzylorda-news.kz</a> Қазақстанда адам папилломасы вирусына (АПВ) қарсы вакцинациялау жұмыстары кезең-кезеңімен жалғасуда. 2024 жылдан бастап елімізде 11 жастағы қыздарға жоспарлы түрде және 12-13 жастағы қыздар үшін толықтыра иммундау жүргізіліп келеді. Енді бұл профилактикалық шара 14-17 жас аралығындағы қыздарды да қамтиды. Бұл туралы Өңірлік коммуникациялар қызметінің ақпарат алаңында Қызылорда облысының санитариялық-эпидемиологиялық бақылау департаменті басшысының орынбасары Алия Абдикаимованың айтуынша, вакцинациялаумен қамтуды кеңейту халықтың сұранысы мен жасөспірімдердің денсаулығын қорғау қажеттілігіне байланысты қолға алынған.<blockquote>– ҚР Денсаулық сақтау министрлігінің Санитариялық-эпидемиологиялық бақылау комитетіне АПВ-ға қарсы вакцинацияға қатысты азаматтардан көптеген өтініштер келіп түсті. Осыған байланысты ҚР Бас мемлекеттік санитариялық дәрігерінің 2026 жылғы 13 мамырдағы №7 қаулысы қабылданып, 14 жастан 17 жас 11 ай 29 күнге дейінгі қыз балаларды ерікті негізде вакцинациялау енгізілді. Бұл жатыр мойны обырының және АПВ-мен байланысты өзге де қатерлі аурулардың алдын алуға бағытталған маңызды қадам. Қызылорда облысында ағымдағы жылдың басынан бері 11-13 жастағы қыз балаларға АПВ-ға қарсы екі мыңға жуық екпе салынды. Оның ішінде 1604 қыз бірінші дозамен, 1213 қыз екінші дозамен вакцина алды. Мамандардың айтуынша, вакцина алғандар арасында иммундаудан кейінгі қолайсыз жағдайлар тіркелмеген, – деді спикер.</blockquote>Мамандардың мәліметінше, вакцинация барысында 4 валентті «Гардасил» екпесі қолданылады. Бірінші доза кез келген таңдалған күні салынады. Екінші доза алғашқы екпеден кейін 2 айдан соң, ал үшінші доза 6 айдан кейін жүргізіледі.<img src="https://knadmin.beoblood.kz/uploads/Vakczinacziya_tek_bir_balany_or_au_emes_o_am_densauly_yn_ny_ajtu_ffe5443ab5.jpg" alt="Вакцинация - тек бір баланы қорғау емес, қоғам денсаулығын нығайту.jpg">Вакцинация білім беру ұйымдарының медициналық кабинеттерінде және емханалардың егу кабинеттерінде жүргізіледі. Сонымен қатар, шалғай елді мекендер мен қажетті жағдайы жоқ білім беру ұйымдарында арнайы көшпелі егу бригадалары жұмыс істейді.<blockquote>– Вакцинация міндетті емес, тек ата-анасының немесе заңды өкілінің ақпараттандырылған келісімі арқылы жүргізіледі. Басты мақсат – жасөспірім қыздардың денсаулығын сақтап, болашақта онкологиялық аурулардың алдын алу, – деді Алия Абдикаимова.</blockquote>Дәрігерлердің айтуынша, адам папилломасы вирусы әлемде ең кең таралған инфекциялардың бірі. Ол ұзақ уақыт бойы белгісіз өтіп, кейін жатыр мойны обырына және басқа да қауіпті дерттерге әкелуі мүмкін. Сондықтан Дүниежүзілік денсаулық сақтау ұйымы АПВ-ға қарсы вакцинацияны жатыр мойны обырының ең тиімді алдын алу тәсілі ретінде ұсынады.Бүгінде АПВ-ға қарсы вакцина әлемнің көптеген елдерінде кеңінен қолданылып келеді. Оның қауіпсіздігі мен тиімділігі халықаралық зерттеулер арқылы дәлелденген. Мамандардың пікірінше, вакцина жасөспірім шақта салынған кезде ағзада вирусқа қарсы тұрақты иммунитет қалыптастыруға мүмкіндік береді.Сала мамандары ата-аналарды қыз баласының денсаулығына жауапкершілікпен қарап, профилактикалық екпелердің маңызын түсінуге шақырады. Себебі вакцинация тек бір баланы қорғау ғана емес, қоғам денсаулығын нығайтудың маңызды тетігі.Фото: pixabay

Қызылорда облысында адам папиллома вирусына қарсы вакцинациялау жалғасуда

<a href="https://kyzylorda-news.kz/">Kyzylorda-news.kz</a> &nbsp;Артериялық&nbsp;гипертензия – әлем бойынша ең кең таралған созылмалы аурулардың бірі және мүгедектік пен&nbsp;мезгілсіз&nbsp;өлім-жітімнің негізгі қауіп факторларының бірі. Қан қысымының жоғарылауы инфаркт, инсульт, жүрек және бүйрек жеткіліксіздігі сияқты ауыр асқынуларға жиі әкеледі.Қызылорда облысында да артериялық гипертония ең жиі кездесетін аурулардың бірі болып тұр.&nbsp;Бұл дерттің пайда болу себептері, оның алдын алу жолдары, дер кезінде диагностика жасау және міндетті әлеуметтік медициналық сақтандыру жүйесі аясындағы заманауи емдеу тәсілдері туралы №6 қалалық емхананың кардиолог дәрігері Таир Бельгибаев сұхбат барысында айтып берді.–&nbsp;Артериялық гипертонияны қазіргі заманның індеті деп атайды. Қазақстандағы статистика қандай, бұл ауру қай жастан бастап дамуы мүмкін және оны қалай анықтауға болады?<blockquote>–&nbsp;Артериялық гипертензия шынымен де әлемдегі ең кең таралған созылмалы аурулардың бірі болып қала береді, Қазақстан да бұл қатардан тыс емес. Денсаулық сақтау&nbsp;саласының деректеріне сүйенсек, елімізде миллиондаған адамда қан қысымының жоғарылауы анықталған. Алайда көптеген пациенттер өз диагнозы туралы ұзақ уақыт бойы білмей жүреді.</blockquote><blockquote>Гипертония қаупі әдетте&nbsp;40 жастан кейін артады деп есептеледі, бірақ бүгінде бұл дерт 25-30 жастағы жастар арасында да жиі кездесуде.Гипертонияның&nbsp;негізгі проблемасы –&nbsp;дерт&nbsp;ұзақ уақыт бойы еш белгісіз өтуі мүмкін. Сондықтан оны анықтаудың ең сенімді жолы – қан қысымын үнемі&nbsp;өлшеу. Қалыпты қысым 140/90 мм сын. бағ.-дан төмен болуы тиіс. Егер көрсеткіш тұрақты түрде жоғары болса, міндетті түрде дәрігерге қаралу қажет.</blockquote>–&nbsp;Қауіп тобына кімдер жатады? Қандай белгілер алаңдатуы керек?<blockquote>–&nbsp;Қауіп тобына артық салмағы, қант диабеті,&nbsp;жоғары&nbsp;холестерині бар, тұқым қуалаушылығы бар&nbsp;пациенттер, сондай-ақ темекі шегетін және аз қимылдайтын адамдар жатады.Бастың ауыруы, әсіресе желке тұсының сырқырауы, бас айналу, құлақтағы шу, жүрек қағысының жиілеуі, әлсіздік, ентігу сияқты белгілерге назар аудару қажет. Алайда гипертония көптеген науқастарда ұзақ уақыт бойы айқын белгілерсіз өтуі мүмкін екенін ұмытпау керек.</blockquote>– Қан қысымының бақылаусыз жоғарылауы немесе төмендеуі несімен қауіпті?<blockquote>– Қан қысымының бақылаусыз жоғарылауы инсульт, миокард инфаркті, жүрек жеткіліксіздігі, бүйрек зақымдануы және көру қабілетінің нашарлауы сияқты ауыр асқынуларға алып келеді. Жоғары қысым қан тамырлары мен ішкі ағзаларды біртіндеп зақымдайды.Ал қысымның күрт төмендеуі, әсіресе егде жастағы адамдар үшін қауіпті. Бұл есінен тануға, құлап қалуға, ми мен жүректің қан айналымының бұзылуына себеп болуы мүмкін. Сондықтан қан қысымындағы кез келген өзгеріс дәрігер бақылауын қажет етеді.</blockquote>– Гипертония белгілері пайда болған жағдайда пациент қандай әрекет жасауы керек? Кардиологпен кеңесу&nbsp;үшін жалпы тәжірибелік дәрігердің жолдамасы қажет пе?– Ең алдымен тіркелген емханадағы жалпы тәжірибелік дәрігерге қаралу қажет.&nbsp;Маман тексеру жүргізіп, қажетті зерттеулерді тағайындайды және қажет болған жағдайда кардиологқа жолдама береді. Айта кету керек,&nbsp;тар буынды&nbsp;маманнаң кеңес&nbsp;алу үшін пациент міндетті әлеуметтік медициналық сақтандыру жүйесінде сақтандырылған болуы тиіс.Егер жағдай өте жоғары қысыммен, қатты бас ауруымен, сөйлеудің бұзылуымен, аяқ-қолдың жансыздануымен немесе тыныс алудың қиындауымен қатар жүрсе, шұғыл түрде жедел жәрдем шақыру қажет.– Демек, шұғыл жағдайда медициналық сақтандыруы жоқ пациент те тегін ем ала ма?<blockquote>– Иә, Қазақстанда шұғыл медициналық көмек МӘМС жүйесіндегі сақтандыру мәртебесіне қарамастан барлық азаматтарға көрсетіледі. Бұл жедел жәрдем шақыруға, шұғыл госпитализацияға және өмірге қауіп төндіретін жағдайларда көрсетілетін медициналық көмекке қатысты.</blockquote>– Артериялық гипертензияға күдік болған жағдайда қандай зертханалық және аспаптық зерттеулерден тегін өтуге болады? МӘМС аясында не қарастырылған?<blockquote>– 2026 жылдан бастап артериялық гипертензияны динамикалық бақылау және емдеу міндетті әлеуметтік медициналық сақтандыру пакетіне енгізілді. Гипертонияға күдік болса сақтандырылған пациенттер мамандардың кеңестеріне, зертханалық талдауларға және диагностикалық зерттеулерге қол жеткізе алады.&nbsp;Көрсеткіштерге байланысты дәрігер жалпы және биохимиялық қан талдауын, зәр талдауын, ЭКГ, эхокардиография, холтерлік мониторинг, тәуліктік артериялық қысым мониторингін, қан тамырларының УДЗ-сын және басқа да тексерулерді тағайындай алады.</blockquote>– Диспансерлік есепте тұрған пациенттерге гипертонияны емдеуге арналған қандай дәрілер беріледі?<blockquote>– Артериялық гипертония бойынша диспансерлік есепте тұрған пациенттер тегін медициналық көмектің кепілдік берілген көлемі және МӘМС аясында тегін дәрілік препараттармен қамтамасыз етіледі.Олардың қатарында АӨФ (ангиотензин-өзгертуші фермент) тежегіштері, бета-блокаторлар, кальций антагонистері, диуретиктер және басқа да заманауи гипотензивтік препараттар бар. Дәрілер пациенттің жағдайына және қатар жүретін ауруларына байланысты тағайындалады. Мысалы, орташа өкпелік гипертензиясы бар пациенттер емханада ай сайын «Бозентан» препаратын алады. Бір қаптамасының құны 400 мың теңгеден асады.Жалпы, диспансерлік есепте тұрған кардиологиялық аурулары бар пациенттер шамамен 30 түрлі дәрілік препаратпен қамтамасыз етіледі.</blockquote>– Нәтиже болмаған жағдайда емдеу әдісін өзгертуге бола ма?<blockquote>– Әрине. Егер тағайындалған ем тиімді болмаса немесе жанама әсерлер туындаса, дәрігер дозаны өзгертіп, дәрі-дәрмекті өзгертеді немесе біріктірілген терапия тағайындайды. Емдеуді өз бетінше өзгертуге немесе тоқтатуға болмайды, өйткені бұл жағдайдың күрт нашарлауына әкелуі мүмкін.</blockquote>– Қандай жағдайда пациент кардиологиялық орталыққа жіберіледі?<blockquote>-Гипертония ауыр түрде өткенде, гипертониялық криздер жиі қайталанғанда, жүрек пен қан тамырлары тарапынан асқынуларға күдік болғанда, жоғары технологиялық диагностика немесе ем қажет болған жағдайда пациент стационарға жолданады. Сондай-ақ стандартты терапия нәтиже бермегенде немесе қатар жүретін жүрек-қан тамырлары аурулары болғанда да жолдама беріледі.</blockquote>– Мен өзімді жақсы сезінсем, қан қысымды күнділікті өлшеуім керек пе? Үй жағдайында қысымды қалай бақылауға болады?– Иә, әсіресе 40 жастан асқан адамдар мен қауіп тобындағы пациенттер үшін маңызды. Өзін жақсы сезінгеннің өзінде қысымды бақылап отырған жөн.Қан қысымыңызды таңертең және кешке бір уақытта өлшеген дұрыс. Өлшеуге дейін 30 минут бұрын кофе ішпеу, темекі шекпеу және физикалық жаттығу жасамау ұсынылады. Көрсеткіштерді өзін-өзі бақылау күнделігіне жазып отырған жөн.– Жасанды интеллектке жиі жүгініп, дәрігерсіз өз бетінше емделуге тырысатын қазақстандықтар көбейді. Сіздің тәжірибеңізде мұндай жағдайлар кездесе ме?<blockquote>– Иә, мұндай жағдайлар жиілеп келеді. Пациенттер интернеттегі кеңестерді оқиды немесе жасанды интеллект көмегімен өзіне диагноз қойып, дәрі таңғдайды. Бірақ ешқандай технология дәрігердің толыққанды тексеруі мен медициналық зерттеуін алмастыра алмайтынын түсіну қажет.Кейде өз бетінше емделу дәрілердің дұрыс таңдалмауына, асқынуларға және уақыт жоғалтуға әкеледі. Жасанды интеллект жалпы ақпарат алуға көмектесуі мүмкін, бірақ емдеу туралы шешімді дәрігер қабылдауы тиіс.</blockquote>– Артериялық қысымды қалыпты деңгейде ұстау үшін қандай профилактикалық шаралар қажет? Өмір салтында нені өзгерту керек?<blockquote>– Алдын алудың негізі – саламатты өмір салты. Тұзды, майлы тағамдар мен қантты шектеу, физикалық белсенділікті арттыру, салмақты бақылау, темекі мен алкогольден бас тарту қажет. Ұйқы кестесін сақтау және күйзеліс деңгейін төмендету де өте маңызды. Сондай-ақ профилактикалық тексерулерден тұрақты өтіп, шағым болмаса да қан қысымын бақылап отырған жөн. Гипертонияны ерте анықтау ауыр асқынулардың алдын алып, өмір сапасын сақтауға мүмкіндік береді.</blockquote>

Артериялық гипертония: МӘМС аясында көмекті қалай алуға болады?

<a href="https://kyzylorda-news.kz/">Kyzylorda-news.kz</a> Қызылорда облысының денсаулық сақтау басқармасының басшысы Әбiлпатта Алмас Әбдіғаппарұлы партия алаңында азаматтарды жеке мәселелері бойынша қабылдады.Қабылдау барысында тұрғындардың денсаулық сақтау, әлеуметтік көмек, емделу, дәрі-дәрмекпен қамту, мүгедектік рәсімдеу және тұрғын үй мәселелеріне қатысты өтініштері тыңдалып, тиісті түсіндірме жұмыстары жүргізілді.Қабылдауға келген азаматтардың бірі өзінің денсаулығына байланысты тұрақты түрде ем қабылдайтынын айтып, дәрі-дәрмекпен қамтамасыз етуге көмек сұрады. Өз кезегінде жауапты мамандар тарапынан азаматқа медициналық мекемелер арқылы қажетті ем алу жолдары түсіндіріліп, мәселе бақылауға алынатыны жеткізілді.Сонымен қатар тағы бір тұрғын баспана мәселесін көтеріп, тұрғын үй кезегіне қатысты көмек сұрады. Осыған байланысты өтініш иесіне қолданыстағы заңнама талаптарына сәйкес түсіндірме беріліп, жауапты мекемелерге жолданатыны айтылды.Сондай-ақ қабылдауға келген азаматтар емханаға тіркелу, жолдама алу, мүгедектік рәсімдеу және әлеуметтік қолдау көрсету мәселелері бойынша да өтініштерін жеткізді. Әрбір мәселе назарға алынып, тиісті сала мамандары тарапынан заң аясында жауаптар берілді.Қабылдау қорытындысында көтерілген мәселелер бойынша тиісті жұмыстар жүргізілетіні айтылып, азаматтардың өтініштері бақылауға алынды.

Облыстық денсаулық сақтау басқармасының басшысы тұрғындарды қабылдады

<a href="https://kyzylorda-news.kz/">Kyzylorda-news.kz</a> Әлеуметтік медициналық сақтандыру қорының Қызылорда облысы бойынша филиалының мәліметінше, 2026 жылдың алғашқы төрт айында өңірде 34 жағдайда жасалған жоғары технологиялық медициналық оталарға 282,4 млн теңге бағытталды.Бүгінде медицина саласында заманауи жоғары технологиялардың көмегімен жасалатын күрделі оталар мен медициналық манипуляциялардың маңызы артып келеді. Міндетті әлеуметтік медициналық сақтандыру жүйесі аясында ай сайын кардиохирургия, нейрохирургия, урология, травматология, онкология және жалпы хирургия және басқа да бағыттар бойынша ондаған жоғары технологиялық&nbsp;оталар жасалуда. Осындай бір&nbsp;отаның орташа құны 8,3 млн теңгені құрайды.<img src="https://knadmin.beoblood.kz/uploads/aral_mczrb_ff79ec704e.jpg" alt="осмс">Филиал директоры Жақсылық&nbsp;Абдусаметовтың айтуынша, өңірде жоғары технологиялық медициналық көмектің қолжетімділігі артып, көрсетілетін қызмет сапасы жақсарып келеді.<blockquote>«Бүгінде өңірде жүрек пен қан тамырларындағы, жүйке жүйесіндегі, есту және көру қабілеттеріне қатысты ауруларды емдеуге, сондай-ақ нәрестелердің туа біткен ақауларын түзетуге арналған заманауи оталарды жасау мүмкіндігі бар», – деді филиал басшысы.</blockquote>2026 жылдың қаңтар–сәуір айларында:- 26&nbsp;кардиохирургиялық оталар&nbsp;жасалып, оған&nbsp;226,4 млн теңге төленді;- 7 нейрохирургиялық&nbsp;оталар орындалып, жалпы құны&nbsp;48,9 млн теңгені құрады;Аталған медициналық қызметтердің барлығы МӘМС жүйесі аясында қаржыландырылады. Нәтижесінде сақтандырылған азаматтар үшін қымбат әрі күрделі&nbsp;оталар тегін әрі қолжетімді болып отыр.Жоғары технологиялық медициналық көмек күндізгі және тәулік бойғы стационар жағдайында көрсетіледі. Бұл пациенттерге заманауи емдеу тәсілдерін қолдануға мүмкіндік беріп, ауыр диагноздар кезінде өмір сапасын жақсартуға және ұзартуға жағдай жасайды.Еске сала кетсек, 2025 жылы МӘМС жүйесі аясында&nbsp;Қызылорда облысында жоғары технологиялық медициналық қызметтерге&nbsp;1,1 млрд теңгеден астам қаржы бағытталған.<img src="https://knadmin.beoblood.kz/uploads/Peresadka_pochek_3_24d9db50a4.jpg" alt="осмс">Жоғары технологиялық медициналық көмектің дамуы&nbsp;-&nbsp;өңірлік денсаулық сақтау жүйесіндегі маңызды бағыттардың бірі. МӘМС арқылы көрсетілетін қызметтер азаматтардың өмірін сақтап қалуға және сапалы медициналық көмекке тең қолжетімділікті қамтамасыз етуге мүмкіндік беруде.

МӘМС: Қызылорда облысының тұрғындары үшін жоғары технологиялық оталар қолжетімді 

<a href="https://kyzylorda-news.kz/">Kyzylorda-news.kz</a> &nbsp;Әлемде ең көп таралған дерттің бірі - жүрек-қан тамырлары аурулары. Міндетті әлеуметтік медициналық сақтандыру жүйесі аясында мұндай диагнозы бар пациенттер қымбат оталарға, тексерулерге және дәрі-дәрмектерге қол жеткізе алады. Кардиологиялық пациенттерге амбулаториялық деңгейде көрсетілетін көмек туралы № 6 Қызылорда қалалық емханасының кардиологы тоқталып өтті.Рысбек Төлеуұлы «созылмалы жүрек жеткіліксіздігі» диагнозымен диспансерлік есепте тұр. Осыдан бес жыл бұрын оған кардиовертер-дефибрилляторды орнату бойынша ота жасалған.<blockquote>- Дәрігердің тұрақты бақылауындамын. Қазір ентігу мен аяқтағы ісіну азайды. МӘМС-тің арқасында қажетті дәрі-дәрмек пен емді уақытылы алып отырмын, – дейді пациент.</blockquote>75 жастағы Данияр Баялимовқа аортокоронарлық шунттау отасы жасалған. Оған жүректің ишемиялық ауруы диагнозы қойылған.<blockquote>- Көп уақыт бойы қыжыл мазалады. Өттің тоқырауынан шығар деп ойладым, бірақ бұл жүрек ауруының белгілері болып шықты. Отадан кейін тез қалпыма келдім. Саламатты өмір салтын ұстанамын, көп жаяу жүремін. Әр үш ай сайын тексеруден өтемін. Мұның бәрі МӘМС аясында көрсетіледі, – деді ол.</blockquote>Бүгінде емханада жүрек-қан тамырлары ауруларымен есепте тұрған екі мыңға жуық пациент бар. Кардиолог Таир Белгібаевтың айтуынша, пациенттер жоғары технологиялық оталарға уақытылы жолданып, қымбат дәрі-дәрмекпен қамтамасыз етіледі.<blockquote>- Мәселен, орташа өкпе гипертензиясы бар пациенттер емханада ай сайын «Бозентан» дәрі-дәрмекті алады. Бір қаптамасының құны 400 мың теңгеден асады. Бір сөзбен айтқанда, пациенттер МӘМС жүйесі аясында қажетті емді шығынсыз алады, – деп атап өтті дәрігер.</blockquote>

 МӘМС: Жүрегі ауыратын науқастарға Қызылордада қымбат ем алуға көмектеседі

<a href="https://kyzylorda-news.kz/">Kyzylorda-news.kz</a>&nbsp; Туберкулез – көбінесе өкпені зақымдайтын, алайда басқа ағзаларға да әсер етуі мүмкін инфекциялық <a href="https://kaz.inform.kz/news/kazakstanda-tuberkulezd-aniktau-men-emdeu-tegn-zhurgzled-b8b65e8f">ауру.</a>Денсаулық сақтау министрлігінің мәліметінше, аурудың қоздырғышы – Mycobacterium tuberculosis бактериясы.Ведомство дерегіне сәйкес, туберкулез әлемдегі ең қауіпті инфекциялық аурулардың бірі болып қала береді.<blockquote>- Күн сайын әлемде 4 100-ден астам адам туберкулезден қайтыс болады, ал шамамен 30 мың адам осы дертке шалдығады, - делінген деректе.</blockquote>Министрлік Қазақстан туберкулезді ерте диагностикалау, емдеу және алдын алу бойынша халықаралық стандарттарға сай заманауи әдістер енгізілген санаулы елдердің қатарына кіретінін атап өтті.Сонымен қатар елімізде туберкулездің алдын алу, диагностикасы және емі барлық азамат үшін тегін жүргізіледі.Фото: freepik

Қазақстанда туберкулезді анықтау мен емдеу тегін жүргізіледі  

<a href="https://kyzylorda-news.kz/">Kyzylorda-news.kz</a>&nbsp; &nbsp;17 мамыр&nbsp;– Дүниежүзілік артериялық гипертониямен күрес күні. Бұл - әлемде кең таралған жүрек-қан тамырлары ауруларының бірі. Арал ауданының тұрғындары МӘМС жүйесі аясында кардиологиялық көмекті уақытылы әрі толық көлемде алуда.Бүгінде Арал ауданында 11 мыңнан астам адам қан айналымы жүйесі ауруларымен диспансерлік есепте тұр. Солардың бірі&nbsp;–&nbsp;Жанар Мырзалиева.&nbsp;Тұрғын&nbsp;артериялық қысымының күрт көтерілуіне байланысты аудандық ауруханаға шұғыл түрде жеткізілген.<blockquote>-&nbsp;Қан қысымым 200-ге дейін көтерілді. Жедел жәрдем дер кезінде ауруханаға жеткізді. Қазір денсаулығым жақсарды. МӘМС жүйесінде сақтандырылғанмын, қажетті емді толық көлемде алып жатырмын,&nbsp;- дейді&nbsp;ол.</blockquote>Арал қаласының тұрғыны Нұрлан Сембаев көп жылдан бері дәрігерлердің бақылауында. Ол әр алты ай сайын күндізгі стационарда ем қабылдайды. Осы уақыт аралығында ер адамға&nbsp;бірқатар&nbsp;жүрек оталар жасалды.<blockquote>- &nbsp;Жүрек саулығы үшін күресіп жүргеніме жиырма жылға жуықтады. Алдымен жүрек қақпақшасы ауыстырылды, кейін жылдар өте кардиостимулятор орнатылды. Дәрігерлердің тұрақты бақылауындамын. МӘМС арқасында қажетті тексерулер мен ем-дом қолжетімді,&nbsp;- деді&nbsp;ол.</blockquote>Мамандардың айтуынша, артериялық гипертонияны бекерге «үнсіз жау» деп атамайды. Себебі бұл ауру көп жағдайда белгілерсіз өтіп, ауыр асқынуларға алып келуі мүмкін. Жүрек жеткіліксіздігінің алдын алу үшін артериялық қысымды үнемі бақылап отыру маңызды.<blockquote>-&nbsp;Бізге түсетін&nbsp;науқастардың басым бөлігінде артериялық гипертония диагнозы бар. Оларшұғыл медициналықкөмекті, сондай-ақ МӘМСжүйесі&nbsp;аясында&nbsp;жоспарлы медициналық көмекті алады.&nbsp;Стационарда эхография, артериялық қысымды тәуліктік мониторингілеу және холтерлік мониторинг тексерулері жүргізіледі. Барша тұрғындарға айтар кеңесіміз - денсаулыққа мұқият болып, қан қысымын тұрақты түрде бақылау, - деді Арал аудандық көп бейінді орталық ауруханасының бөлім меңгерушісі Айнұр Есенгелдіқызы.</blockquote>Фото: freepik

Арал ауданының тұрғындары МӘМС бағдарламасы бойынша кардиологиялық көмек алады

<a href="https://kyzylorda-news.kz/">Kyzylorda-news.kz</a> Қазалы ауданы Әйтеке би кентінде «YERBOL» тіс емханасының ашылу салтанаты өтті. Игі шараға аудан әкімі Алмасбек Есмаханов қатысып, жаңа нысанның ел игілігі жолындағы маңызын атап өтті.Салтанатты шара барысында аудан әкімі ауданда денсаулық сақтау саласындағы атқарылып датқан игі жұмыстар жайындап атап өтіп, 40 жылдан астам уақыттан бері аудан медицинасының дамуына сүбелі үлес қосып келе жатқан Бекжановтар әулетіне алғысын жеткізді. Сонымен қатар, денсаулық сақтау саласындағы мұндай бастамалардың кәсіпкерліктің дамуына да оң ықпал етіп отырғанын атап өтті.Шара аясында ауданның денсаулық сақтау саласына және халыққа сапалы медициналық қызмет көрсету ісіне қосқан үлесі үшін Бекжановтар әулетіне аудан әкімінің «Алғыс хаты» табысталды.<img src="https://knadmin.beoblood.kz/uploads/FB_IMG_1778471605679_8170db366e.jpg" alt="FB_IMG_1778471605679.jpg">Жиында Қазалы ауданында денсаулық сақтау саласын ұзақ жылдар бойы басқарған ауданың Құрметті азаматы, Қызылорда облыстық денсаулық сақтау басқармасы бастығының экс-орынбасары, денсаулық сақтау саласының ардагері Амангелді Қадірбаев сөз сөйлеп, жаңа емхананың жұмысына сәттілік тіледі. Сонымен қатар, «YERBOL» емханасының алғашқы директоры болған марқұм Жомарт Бекжановтың досы, Шымкент қаласынан арнайы келген тіс дәрігері Мырзақан Жолтаев жүрекжарды лебізін білдіріп, Бекжановтар әулетінің елге қызмет жолындағы еңбегі жайында сөз қозғады.Салтанатты рәсім соңында арнайы лента қиылып, қонақтар жаңа емхананың ішкі құрылымымен, заманауи медициналық құрал-жабдықтарымен танысты.Айта кетейік, “YERBOL” тіс емханасы тұрғындарға тіс емдеу, тіс жұлу және тіс протездеу қызметтерін көрсетеді. Заманауи құрылғылармен жабдықталған жаңа нысан халыққа сапалы медициналық қызмет ұсынуға бағытталған.

Қазалыда жаңа тіс емханасы жұмысын бастады 

<a href="https://kyzylorda-news.kz/">Kyzylorda-news.kz</a> Жыл сайын 12 мамырда мейірімділіктің символына айналған мейірбике ісінің негізін қалаушы Флоренс Найтингейлдің (1820-1910 жылдар) туған күнінде бүкіл әлемдегі мейіргерлердің кәсіби мерекесі – Халықаралық мейіргерлер күні атап өтіледі. Бұл – 141 елдің мейіргерлер қауымдастығын біріктіретін кәсіби мереке.Әлемде қанша мамандық болса, олардың әрбірінің адам үшін маңызы зор. Әйтсе де, адам жанының арашасы болған ақ халатты абзал жандардың, оның ішінде мейіргерлердің орны ерекше екені рас.Облыстық денсаулық сақтау басқармасының ұйымдастыруымен Нартай Бекежанов атындағы драма театрында антына адал жандар мерекесі, яғни «Халықаралық мейіргерлер күніне» орай, салтанатты шара ұйымдастырылды.Салтанатты шараға облыстық денсаулық сақтау басқармасы басшысының емдеу, алдын алу жұмыстары жөніндегі орынбасары Жаңыл Исақызы, медицина ұйымдарының бас дәрігерлері мен ардагерлерi және өңірдің барша мейіргерлері қатысты.Жаңыл Исақызы шарада алдымен барша мейіргерлерді төл мерекелерімен құттықтап, өзінің жүрекжарды лебізін білдірді.&nbsp; &nbsp; Одан соң бірқатар саламызға еңбегін сіңірген білікті маман иелеріне мерекелік марапаттар табыстады.Мерекелік шара одан әрі концерттік бағдарламаға ұласты.Айта кетейік, халықтың денсаулығы жолындағы күресте облыс халқына бүгінде 11 мыңға жуық орта буын мамандары қызмет көрсетеді.

Мейіргерлер күніне орай салтанатты шара ұйымдастырылды

<a href="https://kyzylorda-news.kz/">Kyzylorda-news.kz</a> 5 мамыр – Дүниежүзілік бронх демікпесімен күресу күні. Бұл тыныс алу жолдарының созылмалы қабыну ауруы, ол бронхтардың сезімталдығын арттырып, тыныс алудың қиындауына (тұншығу, ентігу, сырыл) әкеледі. № 3 қалалық емханада осы дертпен мыңнан астам адам диспансерлік есепте тұр.Қызылорда қаласының тұрғыны Мира Нуралиеваға жас кезінде созылмалы бронхит диагнозы қойылған. Пандемия кезінде әйел пневмониямен ауырып, соның салдарынан бронх демікпесі мен өкпенің созылмалы обструктивті ауруы дамыған.<blockquote>- Мен бірнеше ауру бойынша диспансерлік есепте тұрмын: қант диабеті, бронх демікпесі, артериялық гипертензия. Әр алты ай сайын күндізгі стационарда ем қабылдаймын, тексеруден өтемін және барлық қажетті дәрі-дәрмектерді аламын. МӘМС жүйесінің арқасында денсаулығымды тұрақты деңгейде ұстап отырмын, – деді Мира Нуралиева.</blockquote>Дәрігерлер тыныс алу жүйесі аурулары үнемі бақылауды қажет ететінін атап өтіп, МӘМС жүйесі аясында уақтылы тексеруден және емделуден өтуге шақырады.<blockquote>- Егер сізді жөтел, ентігу немесе ысқырықты сырылдар мазаласа, пульмонологтың кеңесінен кейін спирографта тексеруден өту қажет. Бұл - тыныс алу қызметінің көрсеткіштерін өлшейтін құрал. Бронх демікпемен ауыратын пациенттер емнің тиімділігін бағалау және терапияны түзету үшін әр үш ай сайын спирографиядан өтеді, – деп түсіндірді пульмонолог Нұргүл Ілиясова.</blockquote>

5 мамыр – Дүниежүзілік бронх демікпесімен күресу күні

<a href="https://kyzylorda-news.kz/">Kyzylorda-news.kz</a> 5 мамыр - Дүниежүзілік бронх демікпесімен күресу күні. Бұл ауру не себептен пайда болады, оны қалай дер кезінде анықтауға болады және елімізде қандай емдеу мүмкіндіктері бар - осы тақырыпта Қызылорда қаласындағы №3 емхананың дәрігер-пульмонологы Нұргүл Ілиясовамен сұхбаттастық.- Бронх демікпесі не себептен пайда болады?<blockquote>-Бұл тыныс алу жолдарының созылмалы қабыну ауруы. Ол тұншығу ұстамаларымен, жөтелмен, ысқырықты тыныспен және кеуде тұсының қысылуымен көрінеді. Негізгі себеп — бронхтардың түрлі тітіркендіргіштерге жоғары сезімталдығы: аллергендер, инфекциялар, суық ауа, физикалық жүктеме. Сонымен қатар тұқым қуалаушылық, экологиялық факторлар мен өмір салты да маңызды рөл атқарады.</blockquote>- Аймақта және әлемде бронх демікпесімен қанша адам өмір сүреді?<blockquote>- Дүниежүзілік денсаулық сақтау ұйымының мәліметінше, әлемде 260 миллионнан астам адам бронх демікпесімен өмір сүреді. Қазақстанда да жүздеген мың науқас бар және олардың саны біртіндеп артып келеді. Қызылорда облысында да сырқаттанушылық деңгейі тұрақты. Соңғы 10 жылда бронх демікпесімен сырқаттану 4 есеге өсті. Бүгінде астма балалар мен жастар арасында жиі анықталуда. Бұл экологияның нашарлауымен, аллергиялық аурулардың көбеюімен және өмір салтының өзгеруімен байланысты.</blockquote>- Бронх демікпесіның алғашқы қандай белгілерін адамдар жиі елемейді?<blockquote>- Көбіне бұл: түнде немесе таңертең күшейетін құрғақ жөтел, физикалық жүктеме кезінде ентігу, тыныс алғанда ысқырық немесе сырыл, кеуде тұсының ауырлығы. Көпшілік бұл белгілерді суық тиюмен немесе шаршаумен байланыстырып, дәрігерге кеш жүгінеді.</blockquote>- ТМККК және МӘМС аясында қандай тексерулер мен емдеу әдістері қолжетімді?<blockquote>- Тегін медициналық көмектің кепілдік берілген көлемі және міндетті әлеуметтік медициналық сақтандыру жүйесі аясында пациенттер: жалпы тәжірибелік дәрігер мен пульмонологтың кеңесін; спирометрияны (өкпе қызметін бағалау); рентгенографияны; зертханалық және аллергологиялық тексерулерді өте алады. Сонымен қатар МӘМС аясында күндізгі стационарда ем алу қарастырылған. Ауыр түрімен ауыратын науқастар әр 3 ай сайын ем қабылдайды. Дәрігер бақылауында болып, дұрыс ем қабылдаса, астманы тиімді бақылауға болады.</blockquote>- Балаларда бронх демікпесін «жиі ЖРВИ» деп қателесіп өткізіп алу мүмкін бе?<blockquote>- Өкінішке орай, мүмкін. Балаларда бронх демікпесі жиі суық тию сияқты көрінуі мүмкін. Егер бала жиі жөтелсе, әсіресе түнде, тез шаршаса, ентігу пайда болса — міндетті түрде дәрігерге қаралып, тексеруден өту керек. Ерте диагностика асқынудың алдын алады.</blockquote>- Көктем мен гүлдену кезеңі бронх демікпесіне қалай әсер етеді?<blockquote>- Көктем - бронх демікпесі бар науқастар үшін ең қиын кезеңдердің бірі, әсіресе аллергиялық түрінде. Өсімдіктердің гүлдеуі, тозаң, сондай-ақ өңірдегі шаң мен жел аурудың асқынуына себеп болуы мүмкін. Уақыт өте келе аллергиялық ринит бронхиалдық астмаға ұласуы ықтимал. Сондықтан дәрігердің ұсынымдарын қатаң сақтау, ем қабылдау және аллергендермен байланысты шектеу маңызды.</blockquote>- Темекі, вейп, кальян - қауіп қаншалықты жоғары?<blockquote>- Темекі шегудің барлық түрлері, соның ішінде вейп пен кальян, бронх демікпесіның даму қаупін арттырады және аурудың ағымын ауырлатады. Олар тыныс алу жолдарын тітіркендіріп, қабынуды күшейтеді және емнің тиімділігін төмендетеді. Пассивті темекі шегу де өте қауіпті.</blockquote>- Бронх демікпесі кезінде вакцинация: тұмау, пневмококк — қажет пе, әлде қауіпті ме?<blockquote>- Вакцинация қауіпсіз әрі ұсынылады. Тұмау мен пневмококк инфекциясына қарсы екпелер аурудың асқынуы мен ауыр салдарының алдын алуға көмектеседі. Әрине, вакцинация мәселесі дәрігермен жеке түрде шешіледі.</blockquote>- Жаңа ғана «бронх демікпесі» диагнозы қойылған адамға үш негізгі кеңес?<blockquote>- Біріншісі - үрейленбеу. Дұрыс тәсіл болса, бронх демікпесі жақсы бақыланады. Екіншісі - симптомдар басылғанның өзінде тағайындалған емді үзбеу. Үшіншісі - ауруды басқаруды үйрену: триггерлерді білу, ингаляторды дұрыс пайдалану және дәрігерге тұрақты қаралу.</blockquote>Бронх демікпесі - үкім емес. Заманауи медицина бұл ауруды бақылауда ұстап, белсенді әрі толыққанды өмір сүруге мүмкіндік береді. Ең бастысы - белгілерді елемей, дер кезінде дәрігерге жүгіну.

Қазақстан және Қызылорда облысының жаңалықтары: Денсаулық