<a href="https://kyzylorda-news.kz/">Kyzylorda-news.kz.</a> Бүгінгі күннің батырлары – дәрігерлер екені даусыз. Төтенше жағдай кезінде табанынан тік тұрып, қызметке кіріскен ақ халаттылар әлі де тыным тапқан жоқ. Пандемиямен күресте науқастармен тығыз байланыста жұмыс істеп жүрген жанның бірі дәрігер Бекзат Мәмбетәлиева.
1986 жылы Қызылорда облысы, Қазалы ауданында туған ол бала кезінен ақ халат киіп дәрігер болуды армандаған. Мектепті тәмәмдаған соң, алдына биік мақсаттар қойған ол М.Оспанов атындағы Батыс Қазақстан мемлекеттік медициналық университетіне оқуға түседі.
Жалпы тәжірибелі дәрігер мамандығы бойынша оқуын ойдағыдай аяқтап, алғаш еңбек жолын Қызылорда қаласындағы №6 емханада жасөспірімдер дәрігері болып бастайды.
Мұнан кейін, Ақтөбе облысы, Әйтеке би аудандық орталық ауруханасында жұмыс істейді. Бұл жерде 6 жылға жуық қызмет етіп, халықтың ақеден алғысына бөленеді.
Онан соң, №3 қалалық емханаға жалпы тәжірибелі дәрігер болып жұмысқа орналасады. Бүгінде Бекзат Әкімғазықызы аталған емханада абыройлы еңбек етіп келеді.
Жоғарғы оқу орнын бітіргеннен кейін рентгенолог – дәрігер мамандығы бойынша білімін жетілдірген ол қазіргі таңда білікті мамандардың бірі әрі бірегейі.
Бүгінге дейін Бекзат Мәмбетәлиева жүрек-өкпе ренимациясы бойынша біліктілігін арттыру крусынан өтті. Сонымен қатар Қазақ медициналық үздіксіз білім беру университетінде көшбасшылық және адами ресурстарды басқару циклі аясында тәжірибе жинақтады.
Одан бөлек, ҚР ДСМ «Еңбек гигиенасы және кәсіби аурулар ұлттық орталығы» ШЖҚ РМК жанында «Кәсіптік аурулардың өзекті мәселелері» циклында 108 сағат көлемінде біліктілігін арттырды.
Үнемі ізденіс үстінде жүретін жан заманауи медициналық емдеу тәсілдерін меңгеру негізгі мақсаты екендігін алға тартады. Қазіргі таңда ол карантин жағдайына байланысты емханада құрылған мобильді топ мүшесі. Уақытпен санаспай барлық шақыртуларға жедел жетіп, тұрғындарға сапалы медициналық қызмет көрсетуде.
<blockquote>
 «Өзгенің өміріне жауапты болғандықтан, жұмысымды бірінші орынға қоямын», дейді дәрігер.
</blockquote>
Бір қолымен әлемді, екінші қолымен бесікті тербететін нәзік болмыс иелерінің осындай жауапты қызметтегі ерен ерліктері жас мамандарға үлгі болары хақ. Ақ халатты абзал жан Бекзат Мәмбетәлиева жұмыспен қатар отбасына да көңіл бөліп, бала тәрбиесімен айналысып отырған ардақты ана. Дәрігер әрбір тұрғын карантин кезінде барлық сақтық шараларын жасап, аурудың алдын-алуға жұмыс жасаса қауіптің сейілетінін айтады.

Бекзат Мәмбетәлиева: «Өзгенің өміріне жауапты болғандықтан жұмысымды бірінші орынға қоямын»

<a href="https://kyzylorda-news.kz/">Kyzylorda-news.kz.</a> Қызылордада емханалар жоспарлы жұмыстарын бастады.
Бұған дейін скринингтік және профилактикалық тексерулер, жоспарлы стоматологиялық қызмет, оқушылардың денсаулығын қорғау қызметтері, салауатты өмір салтын ұстану бойынша шаралар, психологиялық көмек көрсету уақытша тоқтатылған болатын. Енді бұл қызметтер қайта жанданды.
5 тамыздан бастап облыстық фтизиопульмонология орталығының 120 төсек орынға арналған инфекциялық стационары жабылып, 100 орынға шақталған провизорлық стационар болып қайта жасақталады.
Ал 10 тамыздан бастап көпбейінді қалалық аурухананың 210 орынға арналған провизорлық стационары жабылып, залалсыздандыру жұмыстары жүргізілгеннен кейін шұғыл және жоспарлы емдеу жұмыстарын бұрынғыша жалғастырады.
Жоспарлы емдеу жұмыстарының қайта іске қосылып жатқаны, аймақтағы ахуалдың тұрақталып келе жатқанын көрсетеді.

Қызылордада емханалар жоспарлы жұмыстарын бастады

<a href="https://kyzylorda-news.kz/">Kyzylorda-news.kz.</a> Жан сақтау бөлімшесі қызметінің қиындығын көп азаматтар жақсы біледі. Бөлімше мамандары өмір мен өлім арпалысын көзбен көріп, адам жанын ажалдан арашалау үшін бар күш-жігерін салады.
Біздің қарбаласқа толы жұмысымыз коронавирус індеті өршігенде тіптен қиындап кетті. Талай науқастың қиналғанын көрдік.
Науқастардың ауа жетпей мазасызданған күйін көру оңай емес. Ет пен сүйектен жаралған пенде болғаннан кейін бәрін жүрекпен қабылдаймыз. Адам жанын аман алып қалу үшін барлық білімімізді, тәжірибемізді жұмсаудамыз. 
Жақында жасы елуден асқан науқас өкпесінің қабынуынан ауа жетіспей біздің бөлімшеге келді. Оттегі баллонының көмегімен жанын аман алып қалдық. Бірнеше күннен кейін беті бері қарады. Қажетті ем-домның барлығын жасадық.
Науқастардың ем-шарасы үшін жанашыр азаматтар біздің салаға көп көмек көрсетуде. Мұның бәрі бір қарағанда жәй нәрсе болғанымен, түпкі мәнінде бір адамға ғана емес, бір отбасыға, бәрімізге қуаныш сыйлайды. Қаншама адам әкесімен, анасымен, баласымен, бауырымен қайта қауышып, алғыстарын білдіруде. Сол себепті осы кезеңдерде адамдардың бір-біріне жанашырлық танытуы індетке қарсы тұруға айтарлықтай әсер етеді. Бұл біздің жұмысымызға да серпін беруде.
Біз соңғы үш айда күлкісіз күндерді, ұйқысыз түндерді бастан өткердік. Қазір эпидемиологиялық жағдай тұрақталып келеді. Десе де, сақтық шараларына әлі де аса мән беру қажетпіз. Карантин талаптарын сақтау – дертті жеңудің төте жолы. Сондықтан аудан тұрғындарын сақтық шараларын ұстануға шақырамын. Бір-бірімізге жанашырлық танытып, індетті жеңіп шығайық!
Дастан СӘДІРҚОЖАЕВ,
Сырдария аудандық аурухананың реаниматолог дәрігері

Дастан Сәдірқожаев: Карантин талаптарын сақтау – дертті жеңудің төте жолы

<a href="https://kyzylorda-news.kz/">Kyzylorda-news.kz.</a> Қазақстанда алкоголь мен темекіні сату ережелері өзгерді, енді сатушылар барлық адамдардан, тіпті зейнеткерлерден құжаттарды көрсетуді сұрауға міндетті. Бұл туралы Халық денсаулығы және денсаулық сақтау жүйесі туралы жаңа Кодексте айтылған.
Кодексте кәсіпкерлер 110-баптың талаптарымен танысуы тиіс, әйтпесе оларға әкімшілік жауапкершілік төніп тұр. Онда&nbsp;темекі өнімдерін сатушылар барлығынан жеке басын куәландыратын құжаттарды талап етуге міндетті делінген. Бұл темекі шегуге байланысты басқа тауарларға да қатысты.
<blockquote>
 “Егер жеке басын куәландыратын құжат ұсынылмаса, темекі өнімдерін, оның ішінде қыздырылған темекі бұйымдарын, кальянға арналған темекіні, кальян қоспасын, темекіні қыздыру жүйелерін, электрондық тұтыну жүйелері мен олар үшін сұйықтықтарды сатудан бас тартылсын”, – делінген Кодексте.
</blockquote>
Сонымен бірге, алкоголь сатушыларға да норма әсер етті. 18-баптың 110-тармағында алкоголь өнімдерін сату кезінде сатушылар жеке басын куәландыратын құжатты көрсетуді талап ету және егер бұл талап орындалмаса, сатудан бас тарту қажет делінген.
Осылайша, егер бұрын сатушы сатып алушының белгілі бір жасқа жеткеніне көз жеткізуі керек болса, енді&nbsp;ол әркімнің жеке куәлігін тексеруі керек.
Сонымен қатар, 2021 жылдың 1 шілдесінен бастап тағы бір өзгеріс күтілуде. Сөрелерге темекі қораптарын салуға тыйым салынады. Оның орнына темекі өнімдерінің сатылымда бар екендігі туралы тізім ілінеді. Оларды сатып алушы тізіммен танысқаннан кейін ғана көрсетуге болады. Бұл туралы 16-баптың 4-тармағының 110-тармақшасында айтылған.
<blockquote>
 “Темекі өнімдері, оның ішінде қыздырылған темекі өнімдері, кальянға арналған темекі, кальян қоспасы, темекіні қыздыру жүйелері, электрондық тұтыну жүйелері және олар үшін сұйықтықтар туралы ақпарат бөлшек сауданы жүзеге асыру кезінде қандай да бір графикалық бейнелер мен суреттерді пайдаланбай сатылатын темекі өнімдерінің бағасын көрсете отырып, сатылатын өнімдердің тізбесін орналастыру арқылы сатып алушылардың назарына жеткізіледі”, – делінген Кодексте.
</blockquote>

Қазақстандықтар енді темекі мен алкоголь сатып аларда құжаттарын көрсетуге міндетті

Kyzylorda-news.kz. Өкпе қабынуынан көз жұмғандарға коронавирустан қайтыс болғандарды жерлеу ержесі қолданылады. Бұл туралы ҚР Денсаулық сақтау министрі Алексей Цой айтты, деп хабарлайды <a href="https://www.inform.kz/kz/okpe-kabynuynan-koz-zhumgandar-kalay-zherlenedi_a3679169">ҚазАқпарат</a>.
Орталық коммуникациялар қызметіндегі баспасөз мәслихаты барысында министрге «коронавирустан қаза тапқандарды жерлеу ережесі өкпе қабынуынан қайтыс болғандарға да қолданыла ма?» деген сұрақ қойылған еді.
<blockquote>
 «Бұл бірдей жағдай. Сондықтан емдеу шараларымен қатар басқа да прициптер сақталатын болады», – деп жауап берді министр.
</blockquote>
Айта кетейік, ҚР Бас мемлекеттік санитар дәрігері Айжан Есмағамбетованың коронавирус індетінен қаза тапқандарды жерлеу алгоритмі айқындалған қаулысы шыққан болатын. Аталған қаулының қосымшасына сәйкес, COVID-19-ға күдікті адам қайтыс болғанда эпидемиологиялық тексеру және осы жағдайға байланысты басқа да іс-шаралар эпидемияға қарсы режим талаптарын сақтай отырып тез арада жүргізіледі. СОVID-19 диагнозы зертханалық расталған жағдайда қайтыс болған адамның денесі ашылмайды және туыстарына берілмейді. Ал, COVID-19-ға күдікті қайтыс болғанда мәйіт зертханалық зерттеу нәтижесі шыққанша туыстарына берілмейді.

Өкпе қабынуынан көз жұмғандар қалай жерленеді?

Kyzylorda-news.kz. Денсаулық сақтау министрі Алексей Цой Қазақстанда коронавирустың шарықтау шегі өтіп кеткенін айтты.
<blockquote>
 «Осы уақытқа дейін 92 662 коронавирус жағдайы тіркелді. Олардың 67% астамы жазылып шықты. Соңғы тәулікте 672 науқас сауықты. Осындай жақсы көрсеткіштер көбейіп келеді. Жағдай Батыс Қазақстанда, Алматы, Түркістан, Қостанай, Ақмола, Маңғыстау облыстарында және елордада жақсарып келеді. Осылайша, Қазақстанда коронавируспен ауыру жағдайы тұрақталды деп толық сеніммен айта аламыз. Аурудың шарықтау шегі өтті», – деді министр ОКҚ брифингінде.
</blockquote>
<a href="https://24.kz/kz/zha-aly-tar/basty-zha-aly-tar/item/413555-aza-standa-koronavirus-zha-dajy-t-ra-taldy-dep-toly-senimmen-ajta-alamyz-a-tsoj">Хабар 24</a>

Қазақстанның қай өңірлерінде коронавирус жағдайы тұрақталды

Kyzylorda-news.kz. Қызылорда қаласында 360 орындық провизорлық орталық жабылды.
Медициналық мекеме індет өршіп тұрған уақытта Қорқыт ата атындағы Қызылорда мемлекеттік университетінің 5-ші жатақханасынан ашылған болатын. Жатақхана толықтай медициналық құралдармен жабдықталды. Бірінші қабатында фильтр кабинеті орналастырылды.
Шіденің 1-і күні жұмыс істей бастаған орталықта 1 айда өкпесі қабынған 1000-ға жуық науқас емделді. Енді міне соңғы адам еміне шипа тауып, үйіне қайтты.
Зейнеткер бұл орталыққа өте ауыр жағдайда түскен. Дәрігерлердің біліктілігі мен қажырлығының арқасында екі аптада денсаулығы жақсарды.
Айта кету керек, емдеу мекемесінде 200-ге жуық медициналық қызметкер 2 ауысыммен қызмет еткен.

COVID-19: Қызылордада провизорлық орталық жабылды

Kyzylorda-news.kz. Денсаулық сақтау министрі Алексей Цой елдегі эпидемиологиялық ахуал жайлы айта келе қиын кезеңнің артта қалғанын мәлім етті, деп хабарлайды <a href="https://www.inform.kz/kz/aleksey-coy-kiyn-kezen-artta-kaldy_a3679125">ҚазАқпарат</a>.
<blockquote>
 «Қиын кезең артта қалды десек артық айтқанымыз емес. Ең алдымен еліміздегі эпидемиологиялық ахуалға тоқталайын. Қиын кезең артта қалды деп айтсақ артық болмас. Қазіргі уақытта жағдай тұрақталып келеді. Қазақстанда жалпы наурыз айынан бері 92 262 адамнан індет анықталды. Оның ішінде 30 мыңға жуық адам емделуде. Өкінішке қарай, 1058 адам қайтыс болды. Бүгін де коронавирус жұқтырғандар саны едәуір азайып келеді. Мысалы бір тәулікте COVID-ке шалдығу деңгейі 1400 адамды құрап отыр. Ауруханаларда дәрі-дәрмек те жеткілікті», – деді Алексей Цой ОКҚ-да өткен баспасөз мәслихатында.
</blockquote>
Министрдің айтуынша, COVID-19 бен пневмонияға шалдыққан пациенттерге арналған елу екі мың төсек орын бар.
<blockquote>
 «Әрине бұл нәтижелер мемлекет тарапынан қолданған іс шараларын қоғам дұрыс түсініп қабылдауының арқасы», – деді ол.
</blockquote>
https://www.inform.kz/kz/aleksey-coy-kiyn-kezen-artta-kaldy_a3679125

Алексей Цой: Қиын кезең артта қалды

Kyzylorda-news.kz. Бүгін, яғни 3 тамыздан бастап елімізде қатаң карантин мерзімі тағы 2 аптаға ұзартылды.
Әр аймақтағы бас санитар дәрігердің қаулысы бойынша 3 тамыздан бастап елде шектеу шаралары енгізіледі. Мәселен, күні кеше елорданың бас мемлекеттік санитар дәрігері арнайы бұйрыққа қол қойды. Оған сәйкес, сауықтық, спорттық және басқа да бұқаралық іс-шараларды, сондай-ақ отбасылық, еске алу, форум, конференция, семинар, жиналыс сияқты жиындарды өткізуге тыйым салынады. Спорт жаттығуы тек жекелей үлгіде және ашық аспан астында өткізілуі керек.
Үш адамнан артық не бір отбасы мүшелерінен басқа экскурсия, корпоратив, топтық серуен ұйымдастыруға және рұқсат етілмеген жағажайларда шомылуға болмайды. Сондай-ақ, 65 жастан асқан адамдардың қалада және басқа да қоғамдық орындарда жүруіне шектеу қойылады. Тұрғындар маска кию бойынша міндетті талаптарды ескеріп, әлеуметтік қашықтықты сақтау қажет. Бұған қоса, санитарлық-профилактикалық іс-шараларды күшейте отырып, ашық аспан астындағы көтерме азық-түлік және азық-түлік сатпайтын базарлар сағат 13.00-ге дейін жұмыс істейді. Балабақшалар жабық. Осыған ұқсас шаралар еліміздің барлық аймағында қолға алынды.

Қазақстанда карантин мерзімі тағы ұзарды

Kyzylorda-news.kz. ҚР Денсаулық сақтау министрлігі коронавирус бойынша жаңартылған статистиканы ұсынды, деп хабарлайды <a href="https://www.inform.kz/kz/zhanartylgan-statistika-bir-taulikte-koronavirustan-36-pnevmoniyadan-30-adam-kaytys-boldy_a3678915">ҚазАқпарат</a>.
<blockquote>
 «2020 жылдың 1 тамызындағы жағдай бойынша, COVID-19 зертханалық расталған жағдайлардың саны – 1226, соңғы бір тәулікте 36 адам қайтыс болды. Анықталмаған этиологиясы бар, бірақ коронавирустық инфекцияның клиникалық және эпидемиологиялық белгілері табылған пневмониямен ауырғандар саны – 5181. Өткен тәулікте пневмония диагнозымен 30 өлім жағдайы тіркелді», – делінген министрлік хабарламасында.
</blockquote>
Жалпы коронавирусқа қатысты жаңартылған мәліметтер төрт цифрға негізделеді. Бірінші көрсеткіш – коронавирус ПТР сынағымен расталған пациенттер, екіншісі – өлім жағдайлары, үшіншісі – ПТР сынамаларымен дәлелденбеген ықтимал ауырған пациенттер, төртіншісі – ПТР сынамаларымен дәлелденбеген бірақ өлім нәтижелері көрсеткен жағдайлар

Жаңартылған статистика: Бір тәулікте коронавирустан 36, пневмониядан 30 адам қайтыс болды

Kyzylorda-news.kz. Арал өңірінде эпидемиологиялық ахуал тұрақталып келеді. Коронавирус инфекциясын жұқтырған 120 тұрғынның 114-і дерттен айығып шықты. Қалғандары да аралдық дәрігерлердің тікелей бақылауында. Аудан орталығындағы аурухана, емханаларда дәрі-дәрмек қоры жеткілікті. Енді емдік препараттар теңіздің арғы бетіндегі шалғай ауылдардағы медициналық бекеттерге жеткізіліп жатыр. Бірақ қатынас қиын, елді мекендердегі емдеу мекемелеріне берілген жедел жәрдем көліктерінің тозығы жеткен, деп хабарлайды <a href="https://24.kz/kz/zha-aly-tar/o-am/item/413369-aral-audanynda-te-izdi-ar-y-betindegi-auyldarda-t-ra-ty-d-riger-zho">Хабар 24.</a>
Маусымның аяғы мен шілденің басында Арал ауданында пневмониядан 19 адам қайтыс болды. Дәрі-дәрмек тапшылығы айқын сезіліп, жұрт арғысы Алматы, Нұр-Сұлтан бергісі Ақтөбе, Қызылордадан сұрау салып іздеді. Бірақ қазір жағдай реттелді. Медициналық препараттар мен қажетті құрылғылар жеткілікті көлемде әкелініп жатыр.&nbsp;&nbsp;&nbsp;&nbsp;&nbsp;
<blockquote>
 “Келесі апта ішінде жеке компания арқылы тағы да 7 оттегі концентраторы келу керек. Жеке кәсіпкердің көмегімен қосымша дәрі-дәрмектер алыну жоспарланып жатыр. Аудан бойынша 20 мобильдік топ құрылды. Барлығында дәрігер, орта буын қызметкерлері қамтамасыз етілген. Аудан әкімдігі көмегімен қосымша автокөліктер бөлінді”,- дейді Арал аудандық ауруханасы бас дәрігерінің орынбасары Лаура Әбілдаева.
</blockquote>
Аудан орталығынан 350 шақырым жерде орналасқан Құландыда COVID-19 тіркелген жоқ. Дегенмен, басы ауырып, балтыры сыздағандар көбейіпті. Жергілікті медициналық бекетте дәрі қоры жасақталған. Тұрғындардың айтуынша, шалғай болғасын мұнда маман тұрақтамайтын көрінеді. Жұртшылық амбулаторияда тұрақты түрде жұмыс істейтін дәрігер болғанын қалайды.&nbsp;&nbsp;
<blockquote>
 “Аяғым мазалап еді, мына балама келіп, система салдырып, демалып жатырмын. Жақсы боламын деп ойлаймын. Жас балдар осы қыстай 4 рет ауысты, осы бала 2-3 ай болды келгеніне төртінші дәрігер. Аудан әкіміне отбасылы дәрігер сұрап жатқаным сол. Бізге тұрақты қарайтын маман керек. Азғантай ауыл болса да ауру-сырқау көп. Үлкендер, жастар ауырады, бәрі ем іздейді. Дәрігер ауадай қажет. Мына бала да жақсы, шақырсақ үйге келеді, уколын салады”,- дейді Құланды ауылының тұрғыны&nbsp;Манат Жұбаназарова.
 “Жоқ тыныш, COVID-19, пневмония тіркелген жоқ. Қазіргі көбінесе ем алып жатқандар ЖРВИ-мен ем алып жатқандар. Күніне тұмаумен 1-2 адам тіркеліп жатады. Халық жағдайы жақсы. Бәсеңсіді, бұрынғыдай қапылып жатқан жоқ. Дәрі-дәрмек жеткілікті. Айына өз мөлшерімен әкелінген дәрілер халыққа таратылып, салынып жатыр”,- дейді ауылдық амбулатория фельдшері Ернар Аймырзаев.
</blockquote>
Құланды, Ақбасты мен Қосаманнан аудан орталығына жететін жол жоқ. Қыс түсіп, жер бетін қар басқанда қатынас мүлдем үзіледі. Жедел жәрдем көліктері құмды, қатқақ соқпақ-сүрлеумен жүйіткіп, әбден тозған. Оқыс оқиға болып, науқас жағдайы нашарласа ауруханаға жеткізу жағы қиынға соғып тұр.
<blockquote>
 “Жедел жәрдем көліктерінің нашарлауы бар. Бұл жөнінде облыстық денсаулық сақтау басқармасымен келісім бар, ұсыныс беріп жатырмыз. Ауылдық округ әкімдерінің автокөліктерін біз осы шалғай елді мекендерге бекітіп қойдық. Сол жердегі мобильдік топтармен бірігіп жұмыс жасайды. Егер науқастардың жағдайы күрделене түсетін болса, орталыққа жеткізу мақсатында ауыл әкімдерінің көліктерін пайдаланады. Бірақ қазіргі таңда ауылдардағы жедел жәрдем көліктеріне біз қосалқы бөлшектер алып беріп, алдағы уақытта толық іске қосамыз”,- дейді Арал ауданының әкімі Мұхтар Оразбаев. &nbsp;
</blockquote>
Ауданда жалпы 100 провизорлық және 40 инфекциялық төсек орын дайындалған. Алыс ауылдардың барлығында кемі бір айға жететін дәрі-дәрмек қоры жасақталды.

Арал ауданында теңіздің арғы бетіндегі ауылдарда тұрақты дәрігер жоқ

Kyzylorda-news.kz. ҚР Денсаулық сақтау министрлігі маска тағу немесе тақпау режимін қалай бақыланатынын түсіндірді, деп хабарлайды <a href="https://www.inform.kz/kz/ministrlik-maska-tagu-rezhimi-kalay-bakylanatynyn-tusindirdi_a3678783">ҚазАқпарат</a>.
Маска тақпағаны үшін тұлғаларды әкімшілік жауапкершілікке тарту тәртібі Қазақстан Республикасының «Әкімшілік құқық бұзушылық туралы» кодексінде жазылған.
<blockquote>
 «Жеке тұлғаларға (азаматтарға) карантиндік шараларды сақтамағаны үшін әкімшілік жауапкершілікке тарту туралы дәлелдемелер жинауды (әлеуметтік қашықтық, адамдар көп жиналатын жерлерде маскасыз жүру және т.б.) бақылау топтарының құрамында ішкі істер органдары және жергілікті полиция қызметі жүргізеді», – делінген хабарламада.
</blockquote>
Одан кейін ӘҚБтК-нің 425-бабының 1-бөлігімен әкімшілік іс қозғау үшін материалдарды Тауарлар мен қызметтердің сапасын бақылау комитетінің аумақтық бөлімшелеріне беріледі.
<blockquote>
 «Прокуратура органдары мемлекеттік органдар мен ұйымдардың карантиндік шараларды орындау кезінде азаматтар мен кәсіпкерлік субъектілерінің құқықтарының, бостандықтары мен заңды мүдделерінің сақталуын бақылауды қамтамасыз етеді. 5 шілдеден бастап өз қызметін қайта бастаған меншіктің әртүрлі нысандарының қызметін, сондай-ақ жеке тұлғалардың карантин талаптарын сақтауын бақылау мақсатында өңірлерде полиция қызметтері, әкімдіктер, «Атамекен» ҰКП, санитарлық-эпидемиологиялық қызмет өкілдері, волонтерлер кіретін 779 мониторингтік топ құрылды», – делінген хабарламада.
</blockquote>

Қазақстан және Қызылорда облысының жаңалықтары: Денсаулық