<a href="https://kyzylorda-news.kz/">Kyzylorda-news.kz</a> Әлеуметтік медициналық сақтандыру қорының 10 жылдығына орай елімізде алғаш рет республикалық «Медициналық көмектің флагманы» байқауы өтті. Жарыс биылғы жылдың 1 мамыры мен 1 тамызы аралығында ұйымдастырылып, тиімді жұмысымен, жоғары көрсеткіштерімен және пациенттердің қажеттіліктеріне бағдарлануымен ерекшеленетін медициналық ұйымдарды анықтауға бағытталды.Өңірде байқауға 121 медициналық ұйым қатысты.Медициналық ұйымдардың қызметі алты негізгі индикатор бойынша бағаланды:<ul><li style="text-align:justify;">медициналық қызметтер көрсетушінің қаржылық тұрақтылығы;</li><li style="text-align:justify;">халықпен ақпараттық жұмыс;</li><li style="text-align:justify;">шағымдар санын азайту;</li><li style="text-align:justify;">пациенттерді қолдау қызметі мен ішкі бақылау жұмысының тиімділігі;</li><li style="text-align:justify;">медициналық ұйымның қаржылық тәртібі;</li><li style="text-align:justify;">Qalqan ақпараттық жүйесіне қатысуы.</li></ul>Бағалау қорытындысы бойынша байқаудың жеңімпаздары анықталды.<img src="https://knadmin.beoblood.kz/uploads/diplom_osms_1_3e975b9bf6.jpg" alt="диплом осмс.jpg">«Бастапқы медициналық-санитариялық, консультациялық-диагностикалық және жедел медициналық көмек көрсету жағдайларында» бағыты бойынша 44,2 ұпай жинаған «Сырдария аудандық ауруханасы» ШЖҚ КМК үздік деп танылды.«Стационарлық және стационарды алмастыратын көмек көрсету жағдайларында» бағыты бойынша 42,3 ұпай жинаған «Dertke Daua» ЖШС бірінші орынға ие болды.Ал «Сенім медицинасы: назар орталығында - пациент» арнайы номинациясында №6 қалалық емхананың жұмысы атап өтілді. Республикалық комиссия емхананың азаматтардың өтініштерімен жұмыс жүргізудегі нәтижесін жоғары бағалады.Атап айтқанда, тұрғындардың шағымдары 80%-ға төмендеген, сондай-ақ пациенттерді қолдау қызметінің тиімді жұмысы атап өтілді.Әлеуметтік медициналық сақтандыру қорының Қызылорда облысы бойынша филиалы директорының міндетін атқарушы Жұпар Алхожаеваның айтуынша, байқау медициналық көмек көрсетуді ұйымдастырудағы тиімді тәсілдерді анықтап, тәжірибе алмасуға мүмкіндік берді.<blockquote>«Байқаудың басты мақсаты – үздіктерді анықтап қана қоймай, басқа медициналық ұйымдарға үлгі бола алатын озық тәжірибелерді көрсету. Медициналық көмектің сапасы мен қолжетімділігі, сондай-ақ пациенттердің сенімі басты назарда. Медициналық ұйымдардың пациенттермен тиімді өзара іс-қимылы жалпы денсаулық сақтау жүйесіне деген сенімнің қалыптасуына тікелей ықпал етеді», - деді Жұпар Алхожаева.</blockquote>Байқау қорытындысы бойынша жеңімпаздарға естелік кубоктар мен дипломдар табысталды.<img src="https://knadmin.beoblood.kz/uploads/diplom_osms_2_991c32d2dd.jpg" alt="диплом осмс.jpg">

Медицина көшбасшылары: Қызылорда облысында үздіктер марапатталды

МӘМС: Медициналық көмекке қолжетімділік арта ма?

<a href="https://kyzylorda-news.kz/">Kyzylorda-news.kz</a> 12 қыркүйек - Дүниежүзілік алғашқы медициналық көмек көрсету күні. Осы атаулы күн қарсаңында Әлеуметтік медициналық сақтандыру қорының Қызылорда облысы бойынша филиалы облыстық жедел медициналық жәрдем станциясына баспасөз турын ұйымдастырды. Тілшілер жедел медициналық жәрдем бригадасымен бірге бірнеше шақыртуға барып, медицина қызметкерлерінің жұмыс барысымен танысты.«Қызыл аймаққа» ерекше назар аударуды қажет ететін жағдайлар бойынша шақыртулар жатады. Олардың арасында созылмалы обструктивті өкпе ауруы және жүрек жеткіліксіздігі диагноздарымен диспансерлік есепте тұрған 84 жастағы қала тұрғыны да болды. Пациентте созылмалы ауруларының асқынуы байқалған. Медицина қызметкерлері электрокардиография жүргізіп, қажетті дәрі-дәрмектік көмек көрсетті. Нәтижесінде науқастың жағдайы тұрақтанды.Жедел медициналық жәрдем фельдшері Саят Қыстаубаевтың айтуынша, шұғыл жағдайларда алғашқы минуттар көбіне шешуші рөл атқарады.<blockquote>«Жол-көлік оқиғалары салдарынан болатын жарақаттар, күйік, құлау, сондай-ақ жүрек-қан тамырлары аурулары денсаулыққа ауыр зардаптар әкелуі мүмкін. Сондықтан дер кезінде көрсетілген алғашқы медициналық көмектің маңызы зор. Әрбір шақырту – адамның өмірі мен денсаулығы үшін үлкен жауапкершілік», – деді фельдшер.</blockquote>Бүгінде өңірде 70 жедел медициналық жәрдем бригадасы жұмыс істейді. Станцияның аға дәрігері Ляззат Медетованың айтуынша, медициналық ұйым барлық жеделдік санаттары бойынша шақыртуларды қабылдайды.Егер бұған дейін станция 1, 2 және 3-санаттағы шақыртуларға қызмет көрсетсе, қазіргі таңда оның жауапкершілік аймағына 4-санаттағы шақыртулар да енгізілді. Оларға өмірге тікелей қауіп төндірмейтін, алайда медициналық араласуды қажет ететін жіті аурулар мен созылмалы аурулардың асқынуы жатады.<blockquote>«Тәулік бойы 2 мыңнан астам өтініш қабылдаймыз, оның шамамен 600-і балаларға қатысты. Орта есеппен тәулігіне бригадалар 1 700-ге жуық шақыртуға шығады, олардың шамамен 400 жағдайында пациенттер медициналық тексеруден кейін стационарға жатқызылады. Қызметке түсетін жүктеменің ең жоғары кезеңі – күннің екінші жартысы», – деді Ляззат Медетова.</blockquote>Қор филиалының бас сарапшысы Айгүл Аханованың айтуынша, 2026 жылғы 1 қаңтардан бастап Қазақстанда медициналық көмектің бірыңғай базалық пакеті кезең-кезеңімен енгізілуде. Ол тегін медициналық көмектің кепілдік берілген көлемі (ТМККК) мен міндетті әлеуметтік медициналық сақтандыру (МӘМС) аясында медициналық қызметтерді ажыратуды көздейді.<blockquote>«Жедел және шұғыл медициналық көмек азаматтарға МӘМС жүйесіндегі сақтандырылған мәртебесіне қарамастан қолжетімді болып қала береді. Бұл адам өмірі мен денсаулығына қауіп төндіретін жағдайларда қажетті медициналық көмекті қамтамасыз ету үшін аса маңызды. Медициналық көмек уақтылы әрі әрбір тұрғын үшін қолжетімді болуы тиіс», – деп атап өтті Қор филиалының маманы.</blockquote>Жедел медициналық жәрдем қызметтерін қаржыландыру Әлеуметтік медициналық сақтандыру қоры тарапынан қолданыстағы нормативтік құжаттарға сәйкес жүзеге асырылады.2026 жылға арналған сатып алу жоспарында Қызылорда облысында ТМККК аясында жедел және шұғыл медициналық көмек көрсетуге 6 млрд 814 млн теңге қарастырылған.<img src="https://knadmin.beoblood.kz/uploads/skoraya_osms1_db390f2380.jpg" alt="скорая осмс1.jpg">

Қызылорда облысында жедел медициналық жәрдем қызметі кеңейтілуде

<a href="https://kyzylorda-news.kz/">Kyzylorda-news.kz</a> Қызылорда қаласында жекеменшік медициналық ұйымдар міндетті әлеуметтік медициналық сақтандыру жүйесі аясында халыққа бастапқы медициналық-санитариялық көмек көрсетуге белсенді түрде атсалысуда. Солардың бірі – «Али-Нұр Мед» клиникасы. Бұл мекемеге Әлеуметтік медициналық сақтандыру қорының Қызылорда облысы бойынша филиалы ұйымдастырған баспасөз туры барысында тілшілер арнайы барды.Сенбі күні өткен Ашық есік күні аясында клиника мамандары тіркелген тұрғындарды қабылдады. Қызылордалықтар өздеріне ыңғайлы уақытта дәрігерлердің кеңесін алып, қажетті медициналық тексерулерден өте алды. Пациенттердің арасында балаларымен бірге келген Лаура Елемесова да болды. Оның айтуынша, отбасының барлық мүшесі осы медициналық ұйымға тіркелген.<blockquote>«Жұмыс күндері жұмыста болатындықтан, демалыс күні дәрігерлерге қаралу біз үшін өте ыңғайлы. Емханадағы қызмет көрсету сапасы ұнайды – &nbsp;ұзын-сонар кезек жоқ, әрі қажетті медициналық қызметтердің барлығын бір жерден алуға болады. Бұл – МӘМС жүйесі ұсынған жақсы мүмкіндік», – деді Лаура Елемесова.</blockquote>Бүгінде «Али-Нұр Мед» клиникасына шамамен 5 мың тұрғын тіркелген. Мұнда жалпы практика дәрігерлерімен қатар кардиолог, эндокринолог, хирург, офтальмолог, ревматолог, гастроэнтеролог және басқа да бейінді мамандар қабылдау жүргізеді.Медициналық ұйым қажетті диагностикалық құрал-жабдықтармен, оның ішінде флюорографиялық және рентгенологиялық зерттеулер жүргізуге арналған жабдықтармен қамтамасыз етілген. Бұл тұрғындарға қажетті тексерулерден клиниканың өзінде өтуге мүмкіндік береді.<blockquote>«Жалпы практика дәрігерлерінен бөлек, бізде әртүрлі бейіндегі мамандар қабылдау жүргізеді. Тіркелген тұрғындар үшін медициналық көмекті барынша қолжетімді етуге тырысамыз. Пациенттеріміздің бізге деген сенімі үшін алғыс айтамыз. Бұл біз үшін үлкен жауапкершілік», – деді жалпы практика дәрігері Аружан Қосбергенова.</blockquote>Клиника көрсететін медициналық қызмет түрлерін кезең-кезеңімен кеңейтіп келеді. Егер бұған дейін медициналық ұйым негізінен күндізгі стационар қызметтерін көрсетсе, бүгінде тіркелген тұрғындарға бастапқы медициналық-санитариялық көмек көрсетеді.2026 жылы «Али-Нұр Мед» клиникасына МӘМС жүйесі аясында медициналық көмек көрсетуге Әлеуметтік медициналық сақтандыру қоры тарапынан шамамен 221 млн теңге қарастырылған.

МӘМС жүйесіндегі жеке клиникалар: пациент үшін тиімді таңдау

<a href="https://kyzylorda-news.kz/">Kyzylorda-news.kz</a> Қызылорда облысында балалар мен жасөспірімдерге арналған өнімдерге мониторинг жүргізілді., – деп хабарлайды <a href="https://kaz.inform.kz/news/kizilordada-keybr-oyinshiktardin-bala-densauligina-kaupt-eken-aniktaldi-cdc4ad8f/">Қазақпарат.</a>Облыстық санитариялық-эпидемиологиялық бақылау департаменті биыл жарты жылда 38 сынама сатып алып, олардың қауіпсіздік көрсеткішін Ұлттық сараптама орталығы филиалының зертханасында тексерді.<blockquote>– Бақылау мақсатында алынған тауардың барлығы Еуразиялық экономикалық одаққа мүше және басқа да шет мемлекеттерде өндірілген. Сараптама нәтижесінде 1 сынаманың таңбалануы қолданыстағы техникалық регламент талаптарына сәйкес келмейтіні анықталды. Өнімнің таңбалануы – тұтынушы үшін маңызды ақпарат көзі. Онда тауардың атауы, өндіруші, құрамы, пайдалану және жас ерекшелігі туралы, басқа да қажет ақпарат көрсетілуі керек. Сондықтан таңбалауға қойылатын талаптың сақталуы өнім қауіпсіздігінің маңызды құрамдас бөлігі болып саналады, – деді департамент басшысы Гүлмира Сыздықова.</blockquote>Балалар жиі тұтынатын ойыншықтың қауіпсіздігі жіті назарда. Өйткені ойын кезінде бала оны қолымен ұстап қана қоймай, аузына салуы мүмкін. Осы орайда физикалық және басқа да қауіпсіздік көрсеткішінің талаптары қатаң сақталуы қажет.<blockquote>– Тексеру барысында жекелеген ойыншықтардың беткі қабатының тегіс емес, кедір-бұдыр, үшкір екені анықталды. Мұндай кемшіліктер баланың терісін жарақаттауы немесе денсаулығына басқа да қауіп төндіруі мүмкін. Сондықтан ата-аналар мен тұтынушылар ойыншық сатып аларда оның сыртқы түріне ғана емес, қауіпсіздік талаптарына сәйкестігіне де назар аударуы қажет, – деді Гүлмира Сыздықова.</blockquote>Департамент басшысы ата-аналарға өнімнің таңбалануын мұқият тексеруге, өнімнің сыртқы пішініне назар аударуға, баланың жасына сәйкес келмейтін ойыншықтарға жоламауға, өнімді заң талаптарына сәйкес жұмыс істейтін сауда орындарынан сатып алуға кеңес берді.<img src="https://knadmin.beoblood.kz/uploads/SES_e5131d1fc9.jpg" alt="СЭС.jpg">Сурет: freepik.com

Қызылордада бала денсаулығына қауіпті ойыншықтар анықталды

<a href="https://kyzylorda-news.kz/ru">Kyzylorda-news.kz</a> Жоспарлы ем алу үшін стационарға жату қиын, ал ауруханаға жолдама кез келген адамға беріле бермейді деген пікір қалыптасқан. Сақтандырылған азаматтардың медициналық көрсетілімдер болған жағдайда міндетті әлеуметтік медициналық сақтандыру аясында стационарлық жағдайда жоспарлы медициналық көмек алуға құқығы бар.Қызылорда қаласының тұрғыны Сәрсенкүл Ережепова тұрақты түрде жоспарлы ем қабылдап тұрады. №6 қалалық емхананың 65 жастағы пациенті «артериялық гипертензия» диагнозымен диспансерлік есепте тұр және әр алты ай сайын тәулік бойы стационарлық ем қабылдайды.<blockquote>«Менің қан қысымым жоғары. Көп бейінді облыстық ауруханадан бөлек, жеке клиникаларда да жоспарлы ем аламын. Учаскелік дәрігерім қажетті құжаттарды дайындап, Емдеуге жатқызу бюросының порталы арқылы өтінім береді. Содан кейін стационарда тегін ем аламын. МӘМС жүйесінің арқасында денсаулығым дәрігерлердің тұрақты бақылауында», – дейді Сәрсенкүл Ережепова.</blockquote>Жоспарлы түрде стационарға жатқызуға жолдаманы қажетті тексерулер жүргізілгеннен кейін және медициналық көрсетілімдер болған жағдайда бастапқы медициналық-санитариялық көмек ұйымының маманы береді. Пациент туралы мәліметтер Емдеуге жатқызу бюросының порталына енгізіледі, содан кейін стационар өтінімді қарайды. Стационарға жатқызуға қатысты жауап үш жұмыс күні ішінде беріледі.<blockquote>«Сақтандырылған пациент медициналық ұйымды тек өз қаласынан ғана емес, Қазақстанның басқа өңірінен де таңдай алатынын атап өткен жөн. Ол үшін Әлеуметтік медициналық сақтандыру қорының медициналық қызметтерді жеткізушілері арасынан таңдау жасауға болады. Бұл пациентке қажетті емді өзіне ыңғайлы жерде және тиісті медициналық мүмкіндіктер бар жерде алуға мүмкіндік береді», – деді №6 қалалық емхананың учаскелік дәрігері Айгүл Мешітбаева.</blockquote>Қызылорда облысында стационарлық медициналық көмекті 24 медициналық ұйым көрсетеді, оның ішінде 8-і – жекеменшік ұйым. 2026 жылы өңірде стационарлық және стационарды алмастыратын медициналық көмек көрсетуге Әлеуметтік медициналық сақтандыру қорының қаражаты есебінен 54,5 млрд теңгеден астам қаржы қарастырылған.

МӘМС жүйесі аясында жоспарлы медициналық көмектің қолжетімділігі туралы

<a href="https://kyzylorda-news.kz/">Kyzylorda-news.kz</a> Облыстық денсаулық сақтау басқармасының мәжiлiс залында медицина қызметкерлері арасында интернет алаяқтық, пирамида, қаржылық сауаттылық тақырыбында семинар өттi.&nbsp;Аймақтың бас дәрігері Әбілпатта Алмас Әбдіғаппарұлының төрағалығымен өткен жиында денсаулық сақтау саласының қызметкерлерiне Қызылорда облысы экономикалық тергеп-тексеру департаментінің ұйымдастыру-бақылау басқармасының аса маңызды істер жөніндегі тергеушісі Оралбаева Майра Тұрлыбекқызы қазіргі қоғам үшін өзекті мәселелер бойынша түсiндiрiп, кеңес бердi.Атап айтар болсақ, семинар барысында интернет алаяқтықтың кең тараған түрлері, қаржы пирамидаларының негізгі белгілері, күмәнді қаржылық ұсыныстарды қалай ажыратуға болатыны және алаяқтық жағдайына тап болған кезде қандай әрекет жасау керектігі жөнінде пайдалы ақпараттар айтылды.&nbsp;

Қаржылық сауаттылық тақырыбында семинар ұйымдастырылды

<a href="https://kyzylorda-news.kz/">Kyzylorda-news.kz</a> 2026 жылдың бірінші жартыжылдығында Әлеуметтік медициналық сақтандыру қорына (бұдан әрі – Қор) кері байланыс арналары арқылы Қызылорда облысының тұрғындарынан 267 өтініш келіп түсті. Бұл туралы Қордың Қызылорда облысы бойынша филиалының директорының міндетін атқарушы Асқар Рахышов хабарлады.Ең жиі көтерілген мәселелердің қатарында көрсетілген медициналық қызметтердің сапасына қатысты мәселелер – 37,08%, медициналық көмек көрсетуден бас тарту – 32,58%, дәрі-дәрмекпен қамтамасыз етуден бас тарту – 9,36%, медициналық көмекті ұзақ күту – 2,62%, сондай-ақ ақпараттық жүйелерде іс жүзінде көрсетілмеген медициналық қызметтердің тіркелуі – 3,37% бар.Азаматтардың өтініштерінің басым бөлігі медициналық көмектің қолжетімділігі мен сапасына, сондай-ақ пациенттерді дәрі-дәрмекпен қамтамасыз ету мәселелеріне қатысты.Пациент ең алдымен қайда жүгінуі керек?Егер медициналық ұйымға жүгінген кезде пациент қандай да бір мәселеге тап болып, қажетті медициналық көмек немесе түсініктеме ала алмаса, ең алдымен медициналық ұйымның Пациенттерді қолдау және ішкі сараптама қызметіне жүгінуі қажет.Бұл қызмет медициналық көмектің сапасын, толықтығын және белгіленген стандарттарға сәйкестігін бақылау үшін құрылған. Ол медициналық қызметтер көрсету мен медициналық ұйымның клиникалық қызметіне ішкі талдау жүргізеді, заңбұзушылықтарды анықтайды, сондай-ақ пациенттердің өтініштері мен шағымдарын қарайды.Асқар Рахышов атап өткендей, көптеген жағдайда Пациенттерді қолдау қызметіне жүгіну мәселені медициналық ұйымның өзінде, Қорға қосымша жүгінбей-ақ шешуге мүмкіндік береді.Тұрғындарды қандай мәселелер жиі алаңдатады?Салыстыру үшін айта кетсек, 2025 жылдың қорытындысы бойынша Қорға 736 шағым келіп түсті. Бұл 2024 жылдың сәйкес кезеңімен салыстырғанда 111 (11,9%) шағымға аз.Сонымен қатар, медициналық ұйымдардағы Пациенттерді қолдау және ішкі сараптама қызметтері тарапынан «осы жерде және қазір» қағидаты бойынша кері қайтарылған немесе шешілген шағымдардың үлесі 51,1%-дан 56,3%-ға дейін өсті. Келіп түскен 736 шағымның 415-і (56,3%) кері қайтарылған немесе тікелей медициналық ұйым деңгейінде шешілген.Қызылорда облысының тұрғындары шағымдарының басым бөлігін мына мәселелер бойынша жолдаған: медициналық көмектің сапасыз көрсетілуі – 294 (39,9%); медициналық көмек көрсетуден бас тарту – 238 (32,3%); ТМККК және МӘМС шеңберінде дәрілік заттарды беруден бас тарту – 94 (12,8%).Бұл деректер тұрғындар үшін медициналық көмектің қолжетімділігі мен сапасы, сондай-ақ дәрі-дәрмекпен қамтамасыз ету мәселелері әлі де өзекті екенін көрсетеді.Қорға қалай жүгінуге болады?Қор азаматтарға кеңес алуға, мәселе туралы хабарлауға немесе шағым жолдауға мүмкіндік беретін бірнеше кері байланыс арнасын ұсынады.Тұрғындар арасында кеңінен қолданылатын арналардың бірі – «Qoldau 24/7» мобильді қосымшасы. Қосымша арқылы мәтін түрінде өтініш жолдап, қажет болған жағдайда растайтын құжаттарды қоса тіркеуге болады. Әрбір өтінішке жеке нөмір беріледі, сол нөмір арқылы оның қаралу мәртебесін бақылауға мүмкіндік бар. 2026 жылдың бірінші жартыжылдығында мобильді қосымша арқылы 157 (58,8%) өтініш өңделді.Сонымен қатар сұрақтарды, шағымдар мен ұсыныстарды Қордың msqory.kz ресми сайты арқылы да жолдауға болады. Сайттың басты бетінде электронды өтініш қалдыруға мүмкіндік беретін «Қорға жүгіну» батырмасы орналасқан.Тағы бір ыңғайлы тәсіл – Telegram мессенджеріндегі Saqtandyrybot. Өтініш жолдау үшін «Басты мәзір» бөлімінен «Қорға өтініш жіберу» тармағын таңдап, әрі қарайғы нұсқауларды орындау қажет.Асқар Рахышовтың айтуынша, азаматтардың барлық өтініштері міндетті түрде қаралып, көтерілген мәселелер толық шешілгенге дейін бақылауда болады.<blockquote>- Халықпен кері байланыс денсаулық сақтау жүйесін жетілдірудің маңызды құралы болып табылады. Өтініштерді талдау жекелеген заңбұзушылықтарды ғана емес, жүйелі мәселелерді де анықтауға, тиісті шаралар қабылдауға және ТМККК мен МӘМС аясында медициналық көмектің қолжетімділігін, сапасы мен ашықтығын арттыруға мүмкіндік береді, – деп атап өтті Асқар Рахышов.</blockquote>Осыған байланысты пациенттердің өз құқықтарын білуі маңызды. Мәселе туындаған жағдайда ең алдымен медициналық ұйымның Пациенттерді қолдау қызметіне жүгіну ұсынылады. Егер мәселе шешілмесе, Қордың кері байланыс арналары арқылы өтініш жолдауға болады.Сурет: МӘМС баспасөз орталығы

Халықпен кері байланыс: пациент ретінде өз құқықтарыңызды қалай қорғауға болады?

<a href="https://kyzylorda-news.kz/">Kyzylorda-news.kz</a>«Small» сауда орталығында Әлеуметтік медициналық сақтандыру қорының Қызылорда облысы бойынша филиалының ұйымдастыруымен жыл сайынғы «Денсаулық аралы» акциясы өтті. Іс-шара халықтың медициналық сауаттылығын арттыруға, аурулардың алдын алуға және өз денсаулығына жауапкершілікпен қарауды насихаттауға бағытталды.Акция аясында №3 қалалық емхананың мамандары тұрғындарға тегін экспресс-скрининг жүргізіп, медициналық кеңес берді. Қатысушылар артериялық қан қысымын, бойы мен салмағын өлшетіп, қандағы қант пен холестерин деңгейін анықтай алды. Сонымен қатар мамандар салауатты өмір салтын ұстану және созылмалы аурулардың алдын алу бойынша ұсынымдар берді.Медицина мамандары қауіп факторларын ерте анықтауға ерекше назар аударды. Мұндай профилактикалық іс-шаралар адамның денсаулық жағдайын дер кезінде бағалауға, ықтимал ауытқуларды анықтауға және қажет болған жағдайда қосымша тексеруден өтуге мүмкіндік береді.Акция қала тұрғындарының үлкен қызығушылығын тудырды. Сауда орталығына келген көптеген тұрғын денсаулықтың негізгі көрсеткіштерін тегін тексертіп, мамандардан жеке ұсынымдар алды.Іс-шара барысында Қордың облыстық филиалының қызметкерлері міндетті әлеуметтік медициналық сақтандыру жүйесі бойынша да түсіндіру жұмыстарын жүргізді. Тұрғындарға МӘМС жүйесіндегі соңғы өзгерістер, сақтандырылған мәртебесін алу тәртібі, жарналар мен аударымдарды төлеу ережелері, сондай-ақ жүйеге қатысудың артықшылықтары туралы ақпарат берілді.Мамандар 2026 жылдан бастап күшіне енген өзгерістерге де жеке тоқталды. МӘМС аясында диспансерлік есепте тұрған пациенттер үшін бірқатар созылмалы ауруларды емдеу және динамикалық бақылау қарастырылған.Акцияға қатысушыларға МӘМС жүйесі және медициналық көмек алу тәртібі туралы өзекті ақпарат қамтылған ақпараттық материалдар таратылды.Қор филиалының сарапшысы Алия Убисултанованың айтуынша, сақтандырылған мәртебесінің болуы азаматтарға медициналық қызметтердің кең ауқымына алуға мүмкіндік береді.<blockquote>«Денсаулыққа қамқорлық жасау профилактикадан және медициналық көмекке уақтылы жүгінуден басталады. Сапалы медициналық қызметтерге қол жеткізу және қаржылық себептерге байланысты емдеуді кейінге қалдырмау үшін МӘМС жүйесінде сақтандырылған мәртебесінің болуы маңызды», - деп атап өтті маман.</blockquote>«Денсаулық аралы» акциясы медицина мамандары мен тұрғындар арасында тікелей байланыс орнатуға мүмкіндік беретін тағы бір алаңға айналды. Мұндай іс-шаралар қауіп факторларын дер кезінде анықтауға ғана емес, сонымен қатар азаматтардың денсаулық сақтау жүйесінің мүмкіндіктері мен аурулардың алдын алу шаралары туралы хабардарлығын арттыруға ықпал етеді.

«Денсаулық аралы»: дерттің алдын алу және МӘМС

<a href="https://kyzylorda-news.kz/">Kyzylorda-news.kz</a> Қызылорда облысында эпидемиологиялық ахуал тұрақты. Есепті кезеңде бақылаудағы 94 нозологияның 55 түрі бойынша ауру тіркелмеді. Өткен жылдың сәйкес кезеңімен салыстырғанда 23 нозология бойынша сырқаттанушылық төмендеді. Әсіресе, «А» вирусты гепатиті мен тұмау көрсеткіштерінің азаюы профилактикалық шаралардың тиімділігін көрсетеді. Бұл туралы Өңірлік коммуникациялар қызметінің ақпарат алаңында Облыстық санитариялық-эпидемиологиялық бақылау департаментінің басшысы Гүлмира Сыздықова профилактикалық жұмыстардың маңыздылығына тоқталды.<blockquote>- Жыл басында қызылшаға байланысты қосымша егу науқаны ұйымдастырылып, 5450 адам вакцина алды. Соның нәтижесінде наурыз-сәуір айларында қызылшаның бірде-бір жағдайы тіркелген жоқ. Дегенмен иммундаудан бас тарту мәселесі әлі де өзекті. Сондықтан халық арасында түсіндіру және вакцинациямен қамтуды арттыру жұмыстары жалғасуда. Сондай-ақ биыл адам папилломасы вирусына қарсы вакцинациялау жұмыстары кеңейтіліп, есепті кезеңде 3771 қыз бала вакцина алды. Аса қауіпті инфекциялар бойынша оба, құтырма, тырысқақ және сібір жарасы тіркелген жоқ. Конго-Қырым геморрагиялық қызбасының 11 жағдайы анықталды. Кене шағуына байланысты 1403 тұрғын медициналық көмекке жүгінген. Өнім қауіпсіздігі де тұрақты бақылауда. 58 нысаннан алынған 810 сынама зерттеліп, 133 сынаманың техникалық регламент талаптарына сәйкес келмейтіні анықталды. Сәйкесінше, бірқатар сауда нысандарына жедел ден қою шаралары қолданылып, талапқа сай емес өнімдер сатылымнан алынды, – деді Гүлмира Сыздықова.</blockquote>Ауыз су сапасы бойынша да мониторинг жүргізілді. Орталықтандырылған су жүйелерінен алынған сынамалар зертханалық тексеруден өткізіліп, анықталған сәйкессіздіктер бойынша тиісті шаралар қабылданды.<blockquote>- Балалардың қауіпсіздігіне ерекше көңіл бөлінуде. Мектептер, мектеп-интернаттары мен асханаларға мониторинг жүргізіліп, анықталған кемшіліктерді жою жөнінде нұсқамалар берілді. Жазғы лагерьлердің дайындығы, ауыз су сапасы, тамақтану және санитариялық жағдайы да тұрақты бақылауға алынды. Алдағы кезеңде вакцинациямен қамтуды арттыру, Конго-Қырым геморрагиялық қызбасының алдын алу, білім беру және қоғамдық тамақтану нысандарындағы санитариялық талаптардың сақталуын қамтамасыз ету, сондай-ақ өнім қауіпсіздігін бақылауды күшейту негізгі бағыттардың бірі болып қала береді, - деді департамент басшысы.</blockquote><img src="https://knadmin.beoblood.kz/uploads/BRIFING_44b546248d.jpg" alt="БРИФИНГ Сыздыкова.jpg">Сурет: Нұрболат Нұржаубай

Санитариялық ахуал тұрақты бақылауда 

<a href="https://kyzylorda-news.kz/">Kyzylorda-news.kz</a> Науқас жабық омыртқа жарақаты, омыртқа доғаларының сынуы, Джефферсон сынығы диагноздарымен Қызылорда облыстық көпбейінді ауруханасының нейрохирургия бөліміне түскен, – деп хабарлайды <a href="https://kaz.inform.kz/news/kizilordada-moyin-omirtkasina-algash-ret-kurdel-ota-zhasaldi-33b47464">Қазақпарат.</a>Медициналық ұйымның баспасөз қызметі хабарлағандай, мойын омыртқасына алғашқы күрделі ота шеберлік сағаты аясында жасалды.Оған Шымкент қаласынан келген медицина ғылымдарының кандидаты, нейрохирург А.Сансызбаева және осы аурухананың бөлім меңгерушісі А.Әбдіқалықов, дәрігер-ординатор Н.Байдүйсенов бастаған жергілікті нейрохирургтар қатысты.&nbsp;<blockquote>— Ота С1, С2 мойын омыртқаларының анатомиялық аймағында миды қанмен және оттегімен қамтамасыз ететін негізгі омыртқалық артериялардың орналасуына байланысты күрделі болып есептеледі. Сондықтан омыртқалық артерияларды зақымдамай, анатомиялық тұрғыдан дәл бағытта жұмыс істеу маңызды. Бұрандаларды омыртқалардың қауіпсіз аймағына орналастыру қажет, — делінген хабарламада.</blockquote>Жергілікті дәрігерлер бұл әдісті алдағы уақытта өз бетінше тәжірибеде қолданбақ. Шеберлік сағаты аясында екі ота жасалды. Мамандар екі науқастың да жағдайы қанағаттанарлық екенін, неврологиялық тапшылық байқалмайтынын айтып отыр.Сурет: Қызылорда облыстық көпбейінді ауруханасы

Қызылордада мойын омыртқасына алғаш рет күрделі ота жасалды

Биыл ақпан айында Қызылорда қаласында «Orhun Medical» медициналық орталығы өз жұмысын бастады. Жаңа орталық «Orhun Medical» компаниясының Қазақстан өңірлерінде жоғары технологиялық онкологиялық көмекті қолжетімді етуге бағытталған ауқымды жобасының екінші кезеңі аясында іске қосылды. Орталықтың қызметі Қызылорда қаласы мен облысы тұрғындарымен ғана шектелмей, Ұлытау, Түркістан және Ақтөбе облыстарының тұрғындарына да заманауи диагностикалық және медициналық көмек көрсетуге мүмкіндік береді.Орталықтың басты бағыты – позитронды-эмиссиялық томография (ПЭТ) мен компьютерлік томографияны (КТ) біріктіретін заманауи диагностикалық әдіс. ПЭТ/КТ зерттеуі онкологиялық ауруларды ерте кезеңде анықтап қана қоймай, ісіктің таралу деңгейін бағалауға, аурудың динамикасын бақылауға және жүргізіліп жатқан емнің нәтижесін саралауға мүмкіндік береді. Тексеруден МӘМС жүйесі аясында өтуге болады. «Orhun Medical» клиникасының ядролық медицина бағытының жетекшісі Қасым Сейіткұлов тілшіге берген сұхбатында орталықтың негізгі қызметі, ПЭТ/КТ диагностикасының мүмкіндіктері, пациенттерге көрсетілетін қызмет түрлері және ядролық медицина саласын дамытуға қатысты алдағы жоспарлары туралы айтып берді.- Қасым Қайырбекұлы, осы орталықта пациенттер ем қабылдай ма, әлде мамандардың құзыретіне тек онкологиялық ауруларды анықтау және емнің тиімділігін бақылаумен шектеле ме?<blockquote>- Қызылордадағы «Orhun Medical» медициналық орталығында терапевт пен тар бейінді мамандардың қабылдауы ұйымдастырылған. Пациенттер дәрігер кеңесін алып, қажетті зертханалық және аспаптық тексерулерден өтіп, амбулаториялық ем қабылдай алады. Орталықта диагнозды нақтылауға мүмкіндік беретін заманауи диагностикалық технологиялар кеңінен қолданылады. Атап айтқанда, ультрадыбыстық зерттеу (УДЗ), рентгенография, маммография, магнитті-резонанстық томография (МРТ) және компьютерлік томография (КТ), соның ішінде контрастты зат қолданылатын зерттеулер жүргізіледі. Заманауи диагностиканың бұл түрлері ауруды дәл анықтап, оның ерекшеліктерін бағалауға және әр пациентке тиімді ем тактикасын таңдауға мүмкіндік береді. Егер онкологиялық аурулар туралы айтатын болсақ, медициналық орталық, ең алдымен, диагностикаға бағытталған. Мұнда онкологиялық ауруларды анықтаудың «құнды стандарты» болып саналатын ПЭТ/КТ әдісі қолданылады. Ол ісік үдерістерін анықтауға, аурудың сатысы мен бастапқы ошағын нақтылауға, жүргізіліп жатқан емнің тиімділігін бағалауға мүмкіндік береді. Онкологиялық ауруларды тікелей емдеуді – хирургиялық, сәулелік немесе дәрі-дәрмектік емді – республикалық және облыстық онкологиялық орталықтарда алуды ұсынамыз. Сонымен қатар, Алматы мен Қарағанды қалаларындағы «Orhun Medical» томотерапия орталықтарында «Accuray» заманауи аппараттарында сәулелік терапия қызметтері көрсетіледі.</blockquote><img src="https://knadmin.beoblood.kz/uploads/orhun_baaa46a3e7.jpg" alt="ОСМС орхун +.jpg">- Мамандар қызметтерді ақылы негізде көрсете ме? Міндетті әлеуметтік медициналық сақтандыру (МӘМС) жүйесінде сақтандырылған пациенттер емді тегін ала ала ма?<blockquote>- Орталық диагностиканың түрі мен пациенттің жолдамасына қарай қызметтерді ақылы негізде де, МӘМС жүйесі аясында да көрсетеді. Мысалы, тиісті медициналық көрсетілімдер болған жағдайда, ПЭТ/КТ зерттеуі дәрігердің жолдамасы бойынша МӘМС аясында жүргізілуі мүмкін. Қазіргі таңда орталықта МРТ, КТ, рентгенография және маммография қызметтері ақылы негізде көрсетіледі. Сонымен қатар, аталған диагностикалық зерттеулер емханалар мен ауруханалардан берілген жолдамалар негізінде МӘМС жүйесі аясындағы бірлесіп орындау шеңберінде де қолжетімді. Ал орталықтағы клиницист дәрігерлердің қабылдауы әзірге тек ақылы негізде жүргізіледі. Мекеме қажетті лицензиялардың барлығын алып, өз жұмысын жаңадан бастап отыр. Қазіргі уақытта медициналық қызметтердің баға прейскуранты әзірленіп, азаматтарға қолжетімді. Біздің басты мақсатымыз – өңір тұрғындарына заманауи диагностикалық технологияларды барынша қолжетімді етіп, ауруларды дер кезінде анықтауға және медициналық көмектің сапасын арттыруға үлес қосу.</blockquote>-Медициналық орталықта қандай мамандар қабылдайды?<blockquote>- Орталықта әртүрлі бейіндегі дәрігерлер қабылдау жүргізеді. Атап айтқанда, терапевт, педиатр, гинеколог, уролог, кардиолог, невропатолог, травматолог-ортопед, хирург және анестезиолог мамандары бар. Сонымен қатар, сәулелік диагностика дәрігерлері – МРТ, КТ және рентгенология саласының сарапшылары, сондай-ақ ультрадыбыстық зерттеу жүргізетін мамандар жұмыс істейді. Ядролық медицина мамандары ПЭТ/КТ диагностикасын жүргізеді. Біздің орталықтар желісінде телемедицина технологиялары белсенді қолданылады. Сәулелік диагностикаға қатысты барлық зерттеу нәтижелері – МРТ, КТ, ПЭТ/КТ, рентгенография және маммография – бірыңғай орталықтағы серверлерге жіберіледі. Оларды еліміздің әр өңірінен жиналған тәжірибелі радиолог дәрігерлер тобы қашықтан қарап, талдау жүргізеді. Ал күрделі немесе пікір алшақтығы туындаған жағдайларда мамандар консилиум өткізіп, ортақ шешімге келеді. Бұл тәсіл диагностикалық қорытындылардың сапасы мен нақтылығын арттыруға мүмкіндік береді. Осы ретте медициналық орталықтың қызметі тек онкологиялық аурулармен шектелмейтінін атап өткен жөн. Мұнда тұрғындарға денсаулыққа қатысты түрлі мәселелер бойынша кешенді медициналық көмек көрсетіледі. Пациенттер бейінді мамандардан кеңес алып, қажетті диагностикалық тексерулерден өтіп, көрсетілім бойынша амбулаториялық ем қабылдай алады. Орталық мамандары ересектермен қатар, балаларға да медициналық қызмет көрсетеді.</blockquote>-Сіз атап өткендей, ПЭТ/КТ аппараты – дәл диагностиканың «құнды стандарты». Оның өткізу қабілеті қандай? Қазақстанда осындай деңгейдегі қанша жабдық жұмыс істеп тұр?<blockquote>-ПЭТ/КТ аппараты бір ауысымда 25 пациентке дейін қабылдай алады. Алайда радиофармпрепараттарды тасымалдау ерекшеліктеріне байланысты бұл көрсеткіш өзгеруі мүмкін. Аппарат аптасына екі күн жұмыс істейді. Бүгінде Қазақстан бойынша 17 позитронды-эмиссиялық томографпен жабдықталған 12 ПЭТ-орталық жұмыс істейді. Елдегі ПЭТ диагностикасы желісінің кеңеюі пациенттердің жоғары дәлдіктегі радиоизотоптық зерттеулерге қолжетімділігін арттырып, онкологиялық ауруларды ерте анықтау, олардың таралу деңгейін бағалау және емдеу нәтижесін бақылау мүмкіндіктерін кеңейтті. ПЭТ/КТ арқылы бейнелеу әдісі бастапқы диагностикадан бастап емнің тиімділігін бағалауға мен терапияны жоспарлауға дейінгі кезеңдерді қамтитын заманауи онкологиялық хаттамалардың ажырамас бөлігіне айналды. ПЭТ/КТ диагностикасы қатерлі ісіктің сатысын анықтауға, бірнеше түзіліс болған жағдайда бастапқы ісік ошағын анықтауға және соған сәйкес емді, хирургиялық араласуды немесе химиотерапияны тағайындауға мүмкіндік береді. Сонымен қатар, бұл жабдық емдеу барысында ісіктің химиотерапияға берген жауабын бағалауға және аурудың қайталануын дер кезінде анықтауға мүмкіндік береді. Сонымен қатар, Қазақстанда радионуклидтік терапия бағыты да біртіндеп дамып келеді. Бұл ретте ел ішінде радиофармацевтикалық препараттар өндірісінің жолға қойылуының маңызы зор. Бүгінде Қазақстанда бес түрлі радиофармпрепарат өндірілсе, тағы бес препаратты әзірлеу және клиникалық тәжірибеге енгізу жұмыстары соңғы кезеңге жетті. Отандық радиофармпрепараттар өндірісінің дамуы еліміздің ядролық медицина саласындағы технологиялық әлеуетін арттырып қана қоймай, импортқа тәуелділікті азайтуға және радионуклидтік терапияның қолжетімділігін кеңейтуге мүмкіндік береді. Бұл – Қазақстандағы ядролық медицинаның тұрақты дамуы мен технологиялық тәуелсіздігін қамтамасыз ету жолындағы маңызды қадам. Радиофармацевтика өндірісін дамыту, ПЭТ-орталықтар желісін кеңейту және тераностиканың жаңа технологияларын енгізу диагностика мен емдеуді бірыңғай жоғары технологиялық жүйенің құрамдас бөлігіне айналатын дербестендірілген онкологияға көшуге негіз қалауда. Онкологиялық ауруларды ерте диагностикалау мемлекеттік скринингтік бағдарламалар және check-up арқылы қамтамасыз етіледі. Тұрғындарды ұсынылып отырған мүмкіндіктерді пайдалануға шақырамыз. Қазақстан Республикасы Атом энергиясы жөніндегі агенттігінің Ядролық физика институтымен бірлесіп, барлық өңірлердегі ПЭТ/КТ орталықтарының кең желісін радиофармпрепараттармен тұрақты қамтамасыз ету және жаңа дәрілік препараттардың түрлерін шығару мақсатында қосымша циклотрондық кешен құру жоспарлануда. Жобаның басты мақсаты – заманауи ядролық медицинаның қолжетімділігін арттыру және соның нәтижесінде онкологиялық ауруларды емдеудің тиімділігін жақсарту.</blockquote>– Сұхбатыңызға рақмет!Айгүл Аханова

Қазақстан және Қызылорда облысының жаңалықтары: Денсаулық