<a href="https://kyzylorda-news.kz/">Kyzylorda-news.kz.</a> Түркіменстан үкіметі «коронавирус» сөзін қолдануға тыйым салды.
Түркіменстан пандемияға байланысты БАҚ-тағы жаңалықтардың барлығында «коронавирус» сөзін қолдануға шектеу қойды. Сондай-ақ бұл сөз елдің денсаулық сақтау министрлігінің індет жайлы түсіндірме кітапшалардан да толығымен алынып тасталды. Аталмыш кітапшалар ем қабылдау орталықтары мен білім беру мекемелеріне таратылған.&nbsp;
Сонымен қатар мемлекетте көшеде маска тағып, әлемедегі эпидемияның таралуы жайлы әңгіме айтып бара жатқан тұрғындар қамауға алынуы мүмкін көрінеді.

Түркіменстан «коронавирус» сөзін пайдалануға тыйым салды

<a href="https://kyzylorda-news.kz/">Kyzylorda-news.kz.</a> Дүниежүзілік денсаулық сақтау ұйымы коронавирус ауа арқылы берілмейді деген қорытындыға келді, деп хабарлайды&nbsp;<a href="https://stan.kz/ddy-koronavirus-aue-arkili-berilmeydi-329171/">Stan.kz</a>.
<blockquote>
 «Коронавирус жұқтырған адам жөтелгенде, түшкіргенде немесе сөйлегенде пайда болатын тамшылар арқылы өтеді», – делінген ДДҰ-ның ресми твиттерінде.
</blockquote>
Осылайша, ДДСҰ мәліметі бойынша, вирус ауада өмір сүрмейді. Сондықтан өзіңізді қорғау үшін бір-бірінен бір метр қашықтықты сақтау керек, үнемі беттерді зарарсыздандыру, қолды жуу, көзге, мұрынға және ауызға қол тигізбеу керек.

ДДҰ: Коронавирус ауа арқылы берілмейді

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова қаладағы блок-бекеттің жұмысымен танысты.
Аймақ басшысы «Шиелі-Қызылорда» тас жолына қойылған тосқауыл бекетіне барды. Карантин жағдайында жүргізіліп жатқан жұмыстармен танысты.
Қала әкімі Нұрлыбек Нәлібаев пен облыстық жұмылдыру дайындығы басқармасының басшысы облыс әкіміне қаладағы ахуал туралы есеп берді.
<blockquote>
 «Қазіргі таңда қала бойынша 6 тосқауыл бекеті қойылды. Әр бекетке әскери бөлімнің 14 қызметкері бекітілген. 10 адамдық шатыр тігілген. 1 арнайы техника мен адам тасуға арналған көлік те қарастырылған», – деді басқарма басшысы.
</blockquote>
Бүгінгі таңда тосқауыл бекеттерінің жұмыс істеу тәртібі бекітілген. Облыстық полиция департаменті мен денсаулық сақтау бақармасының мамандары тәулік бойы қызмет атқаруда.
Облыс әкімі Гүлшара Әбдіқалықова карантин талаптарын қатаң сақтауды міндеттеді. Тосқауыл бекеттеріндегі қызметкерлердің ыстық тамақпен қамтамасыз етілуін де басты назарда ұстау қажеттігін тапсырды.
<img src="https://kyzylorda-news.kz/wp-content/uploads/2020/04/gwlshara-kaz-2.jpeg" alt="" />
<img src="https://kyzylorda-news.kz/wp-content/uploads/2020/04/gwlshara-kaz-3.jpeg" alt="" />
<img src="https://kyzylorda-news.kz/wp-content/uploads/2020/04/gwlshara-kaz-4.jpeg" alt="" />

Гүлшара Әбдіқалықова блок-бекеттің жұмысымен танысты

<a href="https://kyzylorda-news.kz/">Kyzylorda-news.kz.</a> Қарағанды облысында коронавирус індетінен 1 адам көз жұмды, деп хабарлайды&nbsp;<a href="https://www.coronavirus2020.kz/kz">coronavirus2020.kz</a>.
Осылайша Қазақстан бойынша үшінші адам коронавирус инфекциясынан қайтыс болды.

Қарағанды облысында коронавирус індетінен 1 адам көз жұмды

<a href="https://kyzylorda-news.kz/">Kyzylorda-news.kz.</a> Ішкі істер министрі Ерлан Тұрғымбаев емделуден бас тартқаны және байланыста болған адамдарын жасырғаны үшін төрт қазақстандықтың тергеуге алынғанын мәлімдеді, деп хабарлайды <a href="https://kaz.nur.kz/1848222-koronavirus-zktyrgan-trt-kazakstandyk-tergeuge-alyndy.html?utm_source=article-fragment&utm_medium=clipboard">NUR.KZ</a>.
Оның айтуынша, қазір коронавирусқа шалдыққан төрт қазақстандыққа қатысты тергеу шаралары жүргізілуде. Олар емделуден және кіммен байланыс жасағандарын айтудан бас тартқан.
Сонымен қатар, ведомство басшысы Қазақстанда 32 адамның қамауға алынғанын атап өтті. Олардың бір бөлігі ақша беріп, карантинге жабылған Алматы мен Нұр-Сұлтанға кірмек болса, енді бірі адамдарды ақшаға блок-бекеттерден өткізуге тырысқан.

Коронавирус жұқтырған төрт қазақстандық тергеуге алынды

<a href="https://kyzylorda-news.kz/">Kyzylorda-news.kz.</a> Қазақстан мұсылмандары діни басқармасы Шариғат және пәтуа бөлімі қауіпті жұқпалы аурулардан қайтыс болғандарды жерлеу туралы пәтуа шығарды.
<blockquote>
 «Шариғат бойынша қайтыс болған мұсылманды жуындыру, кебіндеу, оған жаназа намазын оқу және оны жерлеу – парыз кифая. Парыз кифая дегеніміз – кейбір мұсылмандар орындаған жағдайда өзгелерге міндет болмайтын амал» делінген ҚМДБ мәлімдемесінде.
</blockquote>
Қазақстан мұсылмандары діни басқармасының Ғұламалар кеңесі өте қауіпті жұқпалы (туляремия, эбола, коронавирус, оба, т.б.) аурулардан қайтыс болған адамдардың мәйіттерін жуындыруға және жерлеуге қатысты төмендегі шараларды жүзеге асыруды мақұлдайды:
Біріншіден, мәйітті жуындыру. Өте қауіпті жұқпалы дерттен қайтыс болған адамды жуындыру рәсімі арнайы мемлекеттік мекеменің санитариялық-эпидемиологиялық талаптарына сәйкес жүзеге асуы тиіс. Мәйітханада (морг) жуындыру шарасы шариғат талабына қайшы келмесе, мәйітті қайта жуындыру шарт емес. Қайтыс болған ер кісіні ер кісі, әйелді әйел жуындыруы керек.
Екіншіден, мәйітті кебіндеу. Шариғат бойынша мәйіт кебінделуі міндет. Ер кісі үш қабат матамен, ал әйел бес қабат матамен кебінделеді. Алайда жұқпалы дерттен қайтқан кісіні кебіндеу ісінде санитарлық қағидалар сақталуы тиіс. Егер мәйітханада кебінделген мәйіт шариғатқа сай болса, қайта кебіндеу шарт емес. Қайтыс болған ер кісіні ер кісі, әйелді әйел кебіндеуі қажет.
Үшіншіден, жаназа намазын оқу. Қауіпті індетке байланысты жарияланған төтенше жағдайда жаназа намазына марқұмның ең жақын туыстарының қатысуы жеткілікті. Сақтық шаралары үшін адам санын барынша азайту қажет. Қалалық жағдайда індеттің қоғамдық ортаға (мысалы, көпқабатты үй тұрғындарына, көршілеріне, т.б.) таралмауы үшін марқұмды мәйітханадан тікелей зират басына апарып, сол жерде жаназа намазын оқып, жерлеуге шариғатымызда рұқсат етілген. Жаназа рәсімдерін жергілікті имам атқарады. Намаз оқыған кезде санитарлық нормаға сай мәйіт имам мен жамағаттан қашық жерге қойылады.
Төртіншіден, мәйітті жерлеу. Мәйіт зиратқа арнайы көлікпен жеткізілуі тиіс. Мәйітті жерлеу рәсімінде биоқауіпсіздік шаралары қатаң сақталуы тиіс. Сондай-ақ мәйіт қайтыс болған мекенінде жерленуі тиіс. Санитариялық-эпидемиологиялық мекемесінің рұқсатынсыз мәйітті үйіне немесе басқа мекен-жайға (өзге қалаға, туған жеріне) апармаған дұрыс. Мұндағы мақсат – жұқпалы індеттің өзге аймақтарға таралуының алдын алу.
Ескерту: Санитариялық-эпидемиологиялық мекемесі тарапынан мәйітті шариғат жолымен жуындыруға, таяммум алдыруға және кебіндеуге рұқсат берілмесе, мұндай жағдайда шариғаттың зәрулік үкімі негізге алынады. Мәйітханада оралған мата, арнайы үлдір (клёнка) немесе табыт ашылмастан, сол хәлінде жаназа намазы мәйіттен алыс тұрып оқылады.

ҚМДБ қауіпті індеттен көз жұмғандарды жерлеу туралы пәтуа шығарды

<a href="https://kyzylorda-news.kz/">Kyzylorda-news.kz.</a> Мұқтаж адамдарға нақты көмек көрсетіледі. Бұл туралы республикалық телеарналардың эфирінен еліміздегі төтенше жағдайға және мемлекеттің дағдарысқа қарсы іс-шараларына байланысты мәлімдемесінде Президент Қасым-Жомарт Тоқаев айтты.
<blockquote>
 «Коронавирус індетіне байланысты баршамыз күрделі кезеңді өткеріп отырмыз. Бірақ, бұл – уақытша қиындық. Біз оны міндетті түрде жеңеміз! Бүкіл әлем күресуде. Біз де бар күш-жігерімізді саламыз. Біз, мемлекет және қоғам болып барша азаматтарымызға қолдау көрсетеміз, ешкімді көмексіз қалдырмаймыз. Мұқтаж адамдарға қол ұшын береміз. Бұған ешқандай күмән болмауы керек», – деді Мемлекет басшысы.
</blockquote>
Осы орайда Президент ең бастысы, шыдамдылық, төзімділік және жауапкершілік танытуға шақырды.
<blockquote>
 «Біз – рухы асқақ, бірлігі бекем, еңсесі биік халықпыз. Сондықтан, бұл сынақтан да сүрінбей өтіп, қиындықты бірге еңсереміз деп сенемін. Басты тойларымыз әлі алда. Төрт құбыламыз түгел болсын, ағайын! Бір біргеміз!», – деді Қасым-Жомарт Тоқаев.
</blockquote>

Президент: Бұл сынақтан сүрінбей өтіп, қиындықты бірге еңсереміз

<a href="https://kyzylorda-news.kz/">Kyzylorda-news.kz.</a> Ақ халатты абзал жандар бұдан да зор қолдауға лайық. Бұл туралы республикалық телеарналардың эфирінен еліміздегі төтенше жағдайға және мемлекеттің дағдарысқа қарсы іс-шараларына байланысты мәлімдемесінде Президент Қасым-Жомарт Тоқаев айтты.
<blockquote>
 «Бүгінде бүкіл еліміз дәрігерлер мен медицина қызметкерлерінің қайсарлығына тәнті болуда. Олар – адам өміріне араша түсіп жатқан бүгінгі күннің батырлары. Сондықтан, пандемияға қарсы күрестің алдыңғы легінде жүргендерге қосымша қолдау көрсету жөнінде шешім қабылдадым. Дәрігерлерге және медицина қызметкерлеріне 3 ай бойы қосымша үстеме ақы төленеді. Медицина қызметкерлерінің өмірін сақтандыру мәселесі де шешімін тапты.Әрине, ақ халатты абзал жандар бұдан да зор қолдауға лайық», – деді Мемлекет басшысы.
</blockquote>
Президент төтенше жағдай режімінің қашанда экономикалық және әлеуметтік салдары болатынын еске салды.
<blockquote>
 «Біз үшін азаматтардың денсаулығымен қатар олардың өз табысынан айырылмауы да маңызды», – деді Қ. Тоқаев.
</blockquote>

Президент: Ақ халатты абзал жандар бұдан да зор қолдауға лайық

<a href="https://kyzylorda-news.kz/">Kyzylorda-news.kz.</a> Қазақстан Президенті Қасым-Жомарт Тоқаев екінші деңгейлі банктерді азаматтық жауапкершілікке шақырды.
<blockquote>
 «Қазір кәсіпкерлердің көбі ТЖ уақытында несиеге пайыз қоспауды сұрайды. Бұлай болса банктердің өзі де шығынға батады. Банктер де – біздің экономиканың ажырамас бір бөлігі. Сол себепті мен тағы да екінші деңгейлі банктерді конструктивизмге, азаматтық жауапкершілікке шақырамын. Банктер қиын жағдайға тап болғанда мемлекет оларға айтарлықтай көмек көрсетті. Ал қазір сіздерден халыққа және отандық бизнеске қолдау керек болып тұр», – деді Мемлекет басшысы халыққа жасаған мәлімдемесінде.
</blockquote>
Қасым-Жомарт Тоқаев қажет болған жағдайда мемлекет қосымша директивті шараларды қабылдайтынын жеткізді.
<blockquote>
 «Егер жағдай ары қарай ушықса, Үкімет мен қаржылық реттеушілер аталмыш мәселені шешу шараларын қабылдайды», – деді Президент.
</blockquote>

Тоқаев: Мемлекет қиын кезде банктерге көмектесті – енді банктер халықты қолдауы керек

<a href="https://kyzylorda-news.kz/">Kyzylorda-news.kz.</a> Бүгін Мемлекет басшысы Қасым-Жомарт Тоқаевтың Қазақстан халқына арналған мәлімдемесін ұйып тыңдадым. Президент мәлімдемесінен ел көкейінде жүрген көптеген сауалдардың жауабын таптық.
«Жақсылықты бөліссең көбейеді», «Жақсы сөз – жарым ырыс». Бұл халқымыздың сан ғасырлық тәжірибесінен түйген ой-танымы, ғибрат-өнегесі, кейінгі ұрпаққа қалдырған аманаты.
Қазіргідей қиын уақытта жақсылықты, ізгі, мейірімді істерді, қамқор ниетті көре білсек, жазсақ, насихаттасақ дұрыс болар еді.
Бүгін Президент Қасым-Жомарт Тоқаев өзінің мәлімдемесінде көптеген жақсы жаңалықтарымен бөлісті.
Мәселен, дәрігерлердің төтенше жағдай уақытындағы айлық жалақыларына байланысты жаңа шешім шығарды. Сөз жоқ, әділ шешім. Материалдық қана емес, рухани демеу. Дәл қазіргі уақытта індетпен арпалысып жатқан ақ халатты абзал жандарға жасалған мемлекет қамқорлығы.
Сондай-ақ, ұялы байланыс операторлары 20 000 дәрігерге 1 айға тегін қызмет ұсынған. Отбасымен, балаларымен хабарласып тұру үшін. Ізгілікті іс. Көңіл жібітеді.
«Мен бұған дейін дағдарысқа қарсы алғашқы шаралар топтамасын жарияладым. Жағдайдың ушыға түскенін ескеріп, азаматтарға және бизнеске одан әрі қолдау көрсету жөнінде мынадай қосымша шешімдер қабылдадым. Инфляцияның артуына байланысты зейнетақы, мемлекеттік жәрдемақы және атаулы әлеуметтік көмек мөлшерін 10 пайызға индексациялауды тапсырдым», – деді Президент өзінің мәлімдемесінде.
Мұны ел қуана қабылдап жатыр. Қазіргі қиын кезеңде бұл халқымыз үшін өте үлкен қолдау.
Сонымен қатар, Қасым-Жомарт Кемелұлының жанар-жағар майды 15 пайызға арзандату жөніндегі шешімі – көктемгі егіс науқаны алдында еліміздегі шаруаларға үлкен көмек болатыны сөзсіз.
Бір сөзбен айтқанда, Мемлекет басшысы Қасым-Жомарт Кемелұлы Тоқаевтың бүгінгі мәлімдемесінен елдің көкейінде жүрген барлық сауалдарға жауап алдық деп толық сеніммен айта аламын.
Ғабит ТҰЯҚБАЙ,
Қорқыт ата атындағы ҚМУ қазақ тілі мен әдебиеті және журналистика кафедрасының меңгерушісі

Ғабит Тұяқбай: Президент мәлімдемесінен елдің көкейінде жүрген барлық сауалдарға жауап алдық

<a href="https://kyzylorda-news.kz/">Kyzylorda-news.kz.</a> «Біз басқа мемлекеттермен апта сайын видеоконференция өткізіп, қажетті өзгерістер енгізіп жатырмыз». Бұл туралы онлайн брифингте ҚР Денсаулық сақтау министрі Елжан Біртанов айтты
<blockquote>
 «Арнайы клиникалық, диагностикалық және емдеу протоколы бекітілген. Біз басқа мемлекеттермен апта сайын видеоконференция өткізіп, қажетті өзгерістер енгізіп жатырмыз. Халықаралық протокол арқылы пайдаланатын дәрілерді пайдаланудамыз. Вирусқа қарсы дәрі-дәрмек жеткілікті. 10 мың адамға арналған резервіміз бар» , – дейді ҚР Денсаулық сақтау министрі Елжан Біртанов.
</blockquote>
Ол шетелдік емханалардан көптеген ұсыныс түсіп жатқанын айтты.
<blockquote>
 «Шетелдік емханалардан, ғылыми-зерттеу институттардан көп ұсыныс түсіп жатыр. Көбі тексерілмеген, белгісіз дәрі-дәрмектер. Мұндай ақпараттарды біздің мамандар зерттеген соң ғана протоколға енгіземіз», – дейді ол.
</blockquote>

Коронавирус: Еліміздегі 21 науқас қауіпті індеттен қалай емделді?

<a href="https://kyzylorda-news.kz/">Kyzylorda-news.kz.</a> Қызылорда қаласында коронавирус жұқтырғандар саны 9 адамға жетті. &nbsp;Бүгін анықталған 4 науқастың коронавирустық инфекцияны қайдан жұқтырғаны туралы Қызылорда облыстық денсаулық сақтау басқармасының басшысы Жақсылық Абдусаметов жергілікті телеарналардан мәлімдеді.
<blockquote>
 «Бүгінгі күнге Қызылорда облысында коронавирус инфекциясының 9 жағдайы тіркелді. Бүгін 4 жағдай зертханалық сынамамен нақтыланды. Вирус жұқтырған 4 азамат та өткендегі анықталған науқастармен қарым-қатынаста болуына байланысты карантинге алынып, оқшауланған азаматтар болатын. Осы оқшауланған азаматтардан алынған зерттеме оң нәтиже беріп, бүгін стационарға, толық емге жатқызылды. Емі бекітілген хаттамаға сәйкес жүргізілуде. Қазіргі таңда осы азаматтармен тағы да қарым-қатынаста болуы мүмкін азаматтардың тізімі нақтылану үстінде. Алдағы уақытта ол азаматтарға да оқшаулау шарасы қолданылатын болады. Бүгінгі таңда облыстың ауруханаларында коронавирус инфекциясымен 9 науқас емін алуда. Барлығының жағдайлары динамикада нашарлаусыз. Емдерін жалғастыруда», – деді Жақсылық Абдусаметов.
</blockquote>
Айта кетейік, бүгін Қызылорда облысында осы қауіпті індетті жұқтырған <a href="https://kyzylorda-news.kz/kogam/qyzylorda-oblysynda-koronavirws-zhuqtyrghandar-sany-8-adamgha-zhetti-52947/">8-ші науқас тіркелгенін</a> хабарлаған болатынбыз.

Қазақстан және Қызылорда облысының жаңалықтары: COVID-19