<a href="https://kyzylorda-news.kz/">Kyzylorda-news.kz.</a> Елімізге 45 миллионға жуық маска қажет. Бұл туралы елдегі коронавирустық инфекция бойынша ағымдағы жағдай жайлы онлайн брифингте айтылды, деп хабарлайды <a href="https://lenta.inform.kz/kz/dakeden-maska-tigu-uyat-emes-maska-tapshylygy-bukil-alemde-bar-ministr_a3631434">ҚазАқпарат.</a>
<blockquote>
 «Жыл басында елімізде күнделікті 200 мың маска тігіп, өзіміз пайдаланатынбыз. Масканың 80% өз елімізде тігіледі. Ал арнайы масканы шетелден аламыз. Эпидемияның алдында біздің мемлекеттегі фармацевтикалық зауыттар күнделікті 200 мың, айына 6 миллион дана маска шығаратын және ол жеткілікті болатын» , – дейді ҚР Денсаулық сақтау министрі Елжан Біртанов.
</blockquote>
Ол ақпан айында эпидемия басталғалы аталған зауыттардың мүмкіндігін кеңейту жұмыстары жүргізілгенін айтты.
<blockquote>
 «Өкінішке қарай, ол оңай болған жоқ. Шикізаттың көбі Қытайдан алдырылатын, ал Қытай экспортты тоқтатты. Басқа да мемлекеттердің мүмкіндігін, өзіміздің елдегі мүмкіндікті қарастырып, күніне 1 миллион дана түрлі маска тігілуде. Бір айда елімізде 30 миллион маска тігіліп, қажетті медициналық мекеме, дәріханаларға таратылды. Шынын айту керек, медициналық маска қажеттілігі әлі бар. Бізге 45 миллионға жуық маска керек болып тұр, демек маска тапшылығы бар. Маска тапшылығын жою үшін мемлекет тарапынан маска экспорттау тоқтатылды. Екіншіден, маска мемлекеттік комиссияның шешімімен таратылады. Алдымен медициналық мекемелерге таратылады. Мемлекет басшысының тапсырмасы бойынша, кейбір қажетті топтарға тегін беріледі. Бұл жұмыстар Нұр-Сұлтан, Алматы қалаларында басталып кетті. Маскаға қатысты жағдай дүние жүзінде бар, себебі бұған ешкім дайын болған жоқ. Кейбір адам дәкеден маска тігу ұят екенін айтады. Ол ұялатын жағдай емес, себебі Қазақстанда ғана емес, басқа да мемлекеттерде әскери, медициналық қызметкерлер, түрмеде отырған азаматтар, әртістер бізді қолдап, маска тігіп жатыр. Өткен ғасырда ата-бабаларымыз дәкеден жасалған маска арқылы бұдан да қауіпті эпидемияларды тоқтатқан. Дүние жүзінде осындай қиын жағдай болған кезде барлық мүмкіндіктерді пайдалануымыз керек. Қажет болса осындай марліден көп рет пайдалануға болатын маска тігіп, пайдаланамыз. Мақсат – инфекцияны тоқтату» – дейді ол.
</blockquote>

Коронавирус: Қазақстанға 45 миллионға жуық маска қажет

<a href="https://kyzylorda-news.kz/">Kyzylorda-news.kz.</a> Қызылорда қаласында коронавирус жұқтырғандар саны 5-ге жеткеніне байланысты Қызылорда облыстық денсаулық сақтау басқармасының басшысы Жақсылық Абдусаметов шұғыл түрде науқастардың жағдайын баяндады.
<blockquote>
 «Бүгінгі күнде Қызылорда облысында коронавирустың 5 жағдайы тіркелді. Оның 2-уі бұған дейін хабарланған болатын. Бүгін таңертең үш жағдай лаборатиориялық зерттеулер арқылы нақтыланып отыр. Оның біреуі өткендегі екі науқаспен қарым-қатынаста болған азамат. Қазіргі таңда Жаңақорған ауданаралық ауруханасының жұқпалы аурулар бөліміне жатқызылды. Кеше анализдер алынып, бүгін таңертең дәлелденіп отыр. Екінші пациент 20 наурызда Америкадан Қызылорда қаласына келген. Ол 1 «Б» санатына жататын елден келгендіктен үйдегі карантинге алынған болатын. Кеше дене қызуының көтерілуіне байланысты жұқпалы аурулар ауруханасына жеткізіліп, анализі алынып, оң дәлелденді. Үшінші азамат осы Қызылорда қаласының тұрғыны. Дене қызуының көтерілуіне және денесінде бөртпе пайда болуына байланысты шағымданып, облыстық жұқпалы аурулар ауруханасында зерттемесі алынды. Оның да анализдері оң дәлелденіп отыр. Ол осы уақытқа дейінші қызылша ауруына күдіктелген», – деді Жақсылық Абдусаметов.
</blockquote>
Басқарма басшысы науқастардың жағдайына да тоқталып өтті. Оның айтуынша, АҚШ-тан келген азаматтың жағдайы қанағаттанарлық, шағымы тек дене қызуының көтерілуіне болып отыр. Жаңақорған ауданаралық ауруханасында жатқан науқастың жағдайы орташа ауыр деп айтуға болады. Оның шағымы жалпы әлсіздік және дене қызуының көтерілуі.
Ал үшінші науқаста улану сиптомдары және қосымша қызылша дерті бар екені анықталды. Сондықтан оның да жағдайы орташа ауырлықта деп баға берілді.
<blockquote>
 «Қазіргі таңда бекітілген хаттамаға сәйкес, емі жүргізілуде. Қызылшамен ауырып түскен науқастың жағдайы кешегі күнге қарағанда жақсаруда», – дейді басқарма басшысы.
</blockquote>

Короновирус: екеуі – Қызылорда қаласында, біреуі – Жаңақорғанда

<a href="https://kyzylorda-news.kz/">Kyzylorda-news.kz.</a> Шымкентте коронавируспен ауыратын науқастың жеке деректерін таратуға қатысты сотқа дейінгі тергеу жүргізілуде. Бұл туралы брифингте ақпарат және қоғамдық даму министрі Дәурен Абаев мәлімдеді.
Брифингте Дәурен Абаевтан ғаламторда&nbsp;COVID-19 жұқтырған адамның аты-жөні қалай пайда болды деген сұрақ қойылды.
<blockquote>
 “Шымкенттік полиция бөлімі коронавирустық инфекциясы бар науқастың жеке деректерін әлеуметтік желілерде тарату бойынша қылмыстық кодекстің 147-бабының 5-бөлігі&nbsp;жеке өмірге қол сұғушылықты және “Қазақстан Республикасының жеке деректер және оларды қорғау туралы заңнамасын бұзу” бойынша сотқа дейінгі тергеу жүргізуде”, – деді министр.
</blockquote>
Айта кетейік, осы бап бойынша құқық бұзушылар жеті жылға дейін бас бостандығынан айырылады.

Коронавирус: Шымкентте анықталған науқастың мәліметтерін таратушы 7 жылға сотталуы мүмкін

<a href="https://kyzylorda-news.kz/">Kyzylorda-news.kz.</a> Қазақстанда коронавирустан 13 адам жазылып шықты, деп хабарлайды <a href="https://www.coronavirus2020.kz/kz">www.coronavirus2020.kz</a>.
Айта кетейік, елімізде коронавирустан жазылып шыққан науқастың 11 – Нұр-Сұлтан қаласында, 2 – Алматы қаласында тіркелген.

Коронавирус: Қазақстанда 13 науқас жазылып шықты

<a href="https://kyzylorda-news.kz/">Kyzylorda-news.kz.</a> Коронавирус індетін жұқтырған тағы 1 адам Павлодар облысында тiркелді, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-27-nauryz-sagat-14-20-zhagday_a3630084">coronavirus2020.kz.</a>
Осы сағатта Нұр-Сұлтан қаласы бойынша 60 адам, Алматы қаласында – 48 адам, Қарағанды қаласында – 4, Жамбыл облысында – 3 адам, Атырау облысы – 3 адам, Шымкент қаласында – 2 адам, Алматы облысында – 1 адам, Ақтөбе облысында – 1 адам, Солтүстік Қазақстан облысында – 1 адам, Ақмола облысында – 1 адам, Павлодар облысында – 1 адам, жалпы 125 науқас тіркелді.

Коронавирус: Павлодар облысында алғашқы оқиға тiркелді

<a href="https://kyzylorda-news.kz/">Kyzylorda-news.kz.</a> 13 адам Қазақстанда жүріп қауіпті вирусты жұқтырған, 29 адам сырттан жеткізсе, 26-сы солармен ұшақта қарым- қатынаста болғандар.&nbsp;Бұл туралы ҚР ақпарат және қоғамдық даму министрі Дәурен Абаев брифинг барысында айтты.
Оның айтуынша, коронавирус жұқтырғандардың 80 пайызында ауру симптомдары білінбеген немесе аздап жөтелу белгісі ғана болған.&nbsp;
<blockquote>
 “13 адам Қазақстанда жүріп қауіпті вирусты жұқтырған, 29 адам сырттан жеткізсе, 26-сы солармен ұшақта қарым-қатынаста болғандар”, –деді министр журналистер жолдаған сұраққа жауап бере отырып.&nbsp;
</blockquote>
Сонымен қатар, ол шетелде коронавирус жұқтырған Қазақстан азматтарының жағдайын баяндады.
<blockquote>
 “Германияда коронавирус жұқтырған Қазақстан азаматының жағдайы жақсарды. Ол ауруханадан шығарылды. Қазір неміс дәрігерлерінің бақылауында карантинде жатыр. Венгриядағы азаматымыздың жағдайы қанағаттанарлық. Ауруханада ем қабылдап жүр. Біздің дипломаттар онымен және дәрігерлерімен байланысып тұрады”, – деді Дәурен Абаев.
</blockquote>

Коронавирус: 13 адам Қазақстанда жүріп жұқтырған

<a href="https://kyzylorda-news.kz/">Kyzylorda-news.kz.</a> Қызылорда облысының екі тұрғыны әлеуметтік желі арқылы аймақта коронавирус жұқтыру оқиғалары болғандығы туралы жалған ақпарат таратқан. Қазір олар қамауға алынған. Бұл туралы облыстық Полиция департаментінің баспасөз қызметі хабарлады.
Облыстық полиция департаментінің қызметкерлері WhatsApp желісі арқылы жалған ақпарат таратқан 62 жастағы Қызылорда қаласының тұрғыны мен 32 жастағы Жаңақорған ауданының тұрғынын ұстады. Жалған хабарламада аймақта коронавирус жұқтыру оқиғалары бар екені туралы айтылған.
Айта кетейік, жалған ақпарат таратқан 2 тұрғын да әйел адамдар.
<blockquote>
 “Тексерілмеген ақпаратты таратпау туралы көптеген ескертуге қарамастан, полиция тұрғындар арасында алаңдаушылық туғызған жалған ақпарат таратқан екі адамды анықтады”, – деді Қызылорда облыстық полиция департаменті.
</blockquote>
Кінәлілер өз қатесін толық мойындап, өкініш білдірген.
Қылмыстық кодекстің 274-бабы, 4-тармағына сәйкес (төтенше жағдай кезінде көрінеу жалған ақпарат тарату) сотқа дейінгі тергеу басталды. Бұл үшін үш жылдан жеті жылға дейінгі мерзімге бас бостандығын шектеу немесе сол мерзімге бас бостандығынан айыру жазасы қолданылуы мүмкін.
Полиция ел азаматтарына арандатушылық ақпаратты анықтау үшін күн сайын әлеуметтік желілер бақыланып отыратындығын ескертеді.
Айта кету керек, Қазақстанда жалған ақпарат таратқаны үшін қылмыстық жауапкершілік қарастырылған.

Коронавирус: Қызылордада жалған ақпарат таратқан 2 әйел қамауға алынды

<a href="https://kyzylorda-news.kz/">Kyzylorda-news.kz.</a> Канада олимпиада комитеті 2020 жылғы Олимпиада ойындарына өз спортшыларын жібермейтінін жария етті.
Канада спортшылардың денсаулығы мен қауіпсіздігі маңызды екендігін айтып, Халықаралық олимпиада және Халықаралық параолимпиада комитеттері мен Дүниежүзілік денсаулық сақтау ұйымын Олимпиада ойындарын бір жылға кейінге қалдыруға шақырды.
2016 жылғы Рио Олимпиадасына Канададан 314 спортшы қатысып, 22 медальға ие болған еді.
Канададан кейін Аустралия олимпиада комитеті де коронавирус кеңінен етек алған қазіргідей жағдайда Токио Олимпиадасына өз құрамасын жинай алмайтынын, сондықтан келесі жылға әзірленетінін мәлім етті.
Рио Олимпиадасына Аустралиядан 421 спортшы барып, 29 медальмен бұл елдің құрамасы жалпыкомандалық есепте 8-орынға көтерілген болатын.
Халықаралық олимпиада комитетінің президенті Томас Бах 2020 жылғы Олимпиада ойындарына байланысты түпкілікті шешім төрт аптадан кейін қабылданатынын жеткізді. Оның сөзіне қарағанда, Жапониядағы жағдай біртіндеп түзеліп келеді. Ұйымдастыру комитеті 24 шілде мен 9 тамызға жоспарланған жарысты бір айға немесе 45 күнге шегеру мәселесін де қарастыруы мүмкін.

Коронавирус: 2 ел Олимпиадаға қатыспайтынын мәлімдеді

<a href="https://kyzylorda-news.kz/">Kyzylorda-news.kz.</a> Covid-19 жаңа коронавирус пандемиясы әлемде бұрынғыдан да жылдам тарап бара жатыр. Дүниежүзілік денсаулық сақтау ұйымының бас директоры Тедрос Адхан Гебрейесус осылай мәлім етті, деп хабарлайды <a href="https://www.bbc.com/russian/news-52002655">BBC</a>&nbsp;агенттігі.
<blockquote>
 «Алғашқы науқас анықталып, олардың саны 100 мыңға жеткенше 67 күн өтті. 100 мыңнан 200 мыңға дейін – 11 күн, ал 300 мыңыншы оқиға төрт күннің ішінде тіркелді», – деді Гебрейесус Женевада өткен брифингіде.
</blockquote>
Қазір инфекция әлемде 350 мыңнан астам науқастан табылған.
Дүйсенбі таңертеңгі мәлімет бойынша, Covid-19-дан әлемде 15 мыңға жуық адам қайтыс болып, 100 мыңы сауығып кетті. Ең көп өлгендер – Италия (5,5 мыңға жуық) мен Қытайда (3 153 адам).
Испанияда коронавирус эпидемиясы басталғалы індетті жұқтырғандардың ең көп өлімі тіркелген. Кеше Covid-19-дан бұл елде 462 адам көз жұмды, бұл алдағы тәуліктегіден 26%-ға көп. Сонымен қатар жұқтырғандар да көп – 4 500.

Коронавирус: Инфекция әлемде 350 мыңнан астам адамнан табылған

<a href="https://kyzylorda-news.kz/">Kyzylorda-news.kz.</a> Қазақстанның түзеу мекемелерінде медициналық маскалар тігіліп жатыр.
Еліміздің Ішкі істер министрі Е.Тұрғымбаев полицейлерді қорғаныс маскаларымен қамтамасыз ету үшін қылмыстық-атқару жүйесінің (ҚАЖ) түзеу мекемелеріндегі өндірістік базаны пайдалануды тапсырды. Осыған орай, ҚАЖ-дың «Еңбек» республикалық мемлекеттік кәсіпорны қорғаныс құралдарының үлгілерін әзірлеген. Тиісті сертификат та алынған. Стандартқа сәйкес өнім материалы гипоаллергенді саналады. Шаңнан қорғайды, инфекциялық аурулардың жұғу мүмкіндігін азайтады.
<blockquote>
 «Қазір бүкіл жеке құрам ерекше режимде жұмыс жүргізіп жатыр. Медициналық қызметкерлермен бірге карантин шараларына белсенді араласуда. Кезекшілікке күн сайын 12 мыңға тарта полицей мен Ұлттық ұлан сарбазы түседі. Олардың әрбірінің өмірі мен денсаулығы маңызды. Осыған байланысты түзеу мекемелеріндегі тігін цехтарында қорғаныс маскаларын тігіп бастауды тапсырдым. Маскалар осыған дейінгі өзге де қажетті өнімдермен бірге тігіле береді. Осылайша, бір жағынан маскаға деген сұранысты азайтсақ, екіншіден сотталғандардың жұмысқа орналасып, еңбектенуіне мүмкіндік туады», – дейді Ерлан Тұрғымбаев.
</blockquote>
Қазіргі таңда қылмыстық-атқару жүйесіндегі түзеу мекемелерінің алаңдарында мыңға тарта тігін станогы бар. Бірреттік және көпреттік маскаларды тігу жолға қойылған. Оларды ішкі істер органдарының қызметкерлері пайдаланады.
24 мың маскадан тұратын алғашқы партия бас бостандығынан айыру мекемелерінде отырған адамдар мен ішкі істер органдарының қызметкерлеріне беріледі. Бүкіл ел бойынша өндірістік қуаттылық – тәулігіне 50 мың маска болмақ.
<img src="https://kyzylorda-news.kz/wp-content/uploads/2020/03/turme-maska-2.jpg" alt="" />

Коронавирус: Қазақстан түрмелерінде маска тігілуде

<a href="https://kyzylorda-news.kz/">Kyzylorda-news.kz.</a> Коронавирус инфекциясына байланысты алдағы екі аптада қазақстандықтар шұғыл тестілеуден өткізіледі.
Бұл туралы Нұр-Сұлтан қалалық Қоғамдық денсаулық сақтау басқармасының басшысы Сәуле Қисықова мәлімдеді.
<blockquote>
 “Таяуда екі апта ішінде&nbsp;коронавирус инфекциясының бар-жоғын анықтау мақсатында халықты шұғыл тестілеуден өткізу жоспарланып отыр. Қазіргі уақытта жауапты органдар мен ведомстволар коронавирус инфекциясының таралуын алдын алу мәселесін бақылауға алды. Коронавирус инфекциясын жұқтырғандармен байланыста болғандар ПТР-диагностикасы (полимеразды тізбек реакциясы) арқылы тексеріліп жатыр. Олар – вирус жұқтырғандардың отбасы мүшелері, жұмыстағы әріптестері, ұшақта болған адамдар. Шұғыл тестілеу тек ұлттық сараптама орталығында жүргізіледі”, – деді С. Қисықова.
</blockquote>
Айта кетейік, соңғы ресми деректер бойынша Қазақстанда коронавирус жұқтырғандардың саны <a href="https://kyzylorda-news.kz/kogam/taldyqorghanda-1-adamnan-koronavirws-anyqtaldy-51300/">53 адамға&nbsp;жетті</a>.

Коронавирус: қазақстандықтар шұғыл тестілеуден өткізіледі

<a href="https://kyzylorda-news.kz/">Kyzylorda-news.kz.</a> Қызылорда қаласы мен Жаңақорған ауданында «COVID-19» диагнозымен емделіп жатқандар бар екені туралы шындыққа жанаспайтын, көрінеу жалған ақпараттардың Whats-app мессенджері арқылы таратылуының 2 фактісі анықталды.
Бұл деректер бойынша Қазақстан Республикасы Қылмыстық кодексінің 274-бабы 4-бөлігінің)-тармағымен (төтенше жағдай кезінде көрінеу жалған ақпарат тарату) сотқа дейінгі тергеп-тексеру&nbsp; басталды.
Облыстық денсаулық сақтау департаментінің соңғы мәліметіне сәйкес облысымызда «COVID-19» диагнозымен науқастану жағдайы тіркелмеген. Күдік келтіріліп, карантинге жатқызылған тұлғаларда бұл диагноз расталған жоқ.
<blockquote>
 «Құқық қорғау және жергілікті атқарушы органдардың төтенше жағдай режимі жарияланған кезеңде қылмыс пен құқықбұзушылыққа жол бермеу жөнінде тиісті түсіндірме жүргізгеніне қарамастан жалған ақпарат тарату деректері кездесуде. Мұндай әрекет төтенше жағдай кезінде немесе ұрыс жағдайында немесе соғыс уақытында не жария іс-шаралар өткізу кезінде жасалатын болса, ол ауырлатушы мән-жай ретінде қарастырылып, ауыр қылмыс ретінде сараланады. Аталған қылмысты жасаған тұлғаларға үш жылдан жеті жылға дейінгі мерзімге бас бостандығын шектеу не сол мерзімге бас бостандығынан айыру жазасы тағайындалуы мүмкін», – деп атап өтті біздің ақпарат агенттігіне Қызылорда облысы прокуратурасының баспасөз қызметі.
</blockquote>

Қазақстан және Қызылорда облысының жаңалықтары: COVID-19