<a href="https://kyzylorda-news.kz/">Kyzylorda-news.kz.</a> Елдегі эпидемиологиялық жағдайды есепке ала отырып, 2020 жылдың 31 наурызынан бастап Қазақстан аймақтары арасында жолаушылар қатынасы толық тоқтатылды, деп хабарлайды «Жолаушылар тасымалы» АҚ баспасөз қызметі.
Барлық жолаушылар пойыздарының (соның ішінде жекеменшік тасымалдаушылар және басқа да теміржол әкімшіліктерінің) қозғалысы тоқтатылды. Қазіргі кезде пойыздар орналасқан орындарына қайтып жатыр. Соңғы пойыз бағыты 4 сәуірде тоқтайды.
<blockquote>
 «Жолаушылар тасымалы» АҚ төтенше жағдай кезінде сапарға шыға алмаған барлық жолаушылар билет сатып алуға жұмсаған ақшасын алдағы алты ай ішінде өздеріне ыңғайлы кез келген күні толық көлемде қайтарып ала алатынын айтады. Жүрмеген пойыз билетінің ақшасын сату сайттарында онлайн, «Жолаушылар тасымалы» АҚ билет кассаларында немесе жекеменшік кассалардан қайтарып алуға болады.
</blockquote>
12 наурыздан бері жолаушыларға 590 мыңға жуық билет қайтарылған. Карантин режимі аяқталған соң билет сату кассалары өз жұмысын қайта бастайды.
<blockquote>
 «Осыған байланысты, барлық жолаушылардан қоғамдық орындарда теміржол билеттерін қайтаруға байланысты шу шығармай, қауіпсіздік шараларын сақтауын сұраймыз» деп мәлім етті компаниядан.
</blockquote>

Қазақстан ішінде қатынайтын жолаушы пойыздары толық тоқтады

<a href="https://kyzylorda-news.kz/">Kyzylorda-news.kz.</a> 2020 жылға арналған бюджетті нақтылау барысында эпидемияға қарсы шараларға 125,2 миллиард теңге қарастырылды. Оның 8 миллиард теңгесі полицейлер мен әскери қызметшілердің сыйақысына жұмсалмақ. Бұл туралы қаржы министрінің бірінші орынбасары Берік Шолпанқұлов мәлімдеді.
<blockquote>
 «Ішкі істер органдарының қызметкерлері мен медицина қызметкерлеріне, Ұлттық гвардия мен Қарулы күштердің әскери қызметшілеріне 1 еңбекақы мөлшерінде сыйақы төлеуге 8 миллиард теңге бөлінді», – деді Шолпанқұлов онлайн брифингте.
</blockquote>
2020 жылға арналған бюджетті нақтылау аясында эпидемияға қарсы шараларға қосымша 125,2 миллиард теңге қарастырылмақ.
40,6 миллиард теңгесі карантиндік шараларға тартылған медицина қызметкерлерін ынталандыруға жұмсалады.
4 миллиард теңгесі ведомствоаралық ақпарат жүйелерінің қызметі мен байланыс қызметін қамтамасыз етуге бағытталады.
Ал 5,6 миллиард теңгесі сот медициналық сараптама қызметінің үздіксіз жұмысын қамтамасыз етуге бөлінеді.

Төтенше жағдай: Әскерилерге бір еңбекақы мөлшерінде сыйақы төленеді

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус жұқтырған 26 науқаспен 643 адам байланыста болған. Бұл туралы облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте мәлімдеді.
<blockquote>
 “Қазіргі таңда Қызылорда облысында коронавирустық инфекцияны жұқтырған 26 науқас анықталды. Олармен байланыста болғандардың саны – 643. Жақын қарым-қатынаста болғандар саны – 231, потенциальды байланыста болғандар 412 адамды құрап отыр. Бүгінгі таңда осы байланыста болғандардан 13 адам правизорлық стационарға, 218 адам карантинге оқушауланды”, – деді Жақсылық Абдусаметов.
</blockquote>
Басқарма басшысының айтуынша, Қызылорда облысына қауіптілік деңгейі 1 (А) елдерінен барлығы 20 адам келген. Оның алтауы – стационарға, 14 – үй карантиніне жатқызылған.
Сондай-ақ, өңірге қауіптілік деңгейі 1 (Б) елдерінен барлығы 168 адам келген. Оның алтауы – стационарға оқшауланса, 158 – үй карантиніне алынған.
<blockquote>
 “Бүгінгі таңда облыста анықталған коронавирустық инфекцияның барлық ошақтары толық залалсыздандырылды. Қауіпті індет анықталған 26 науқастың жағдайы нашарлаусыз, қанағаттанарлық күйде”, – деді басқарма басшысы брифингте.
</blockquote>

Қызылорда облысында коронавирус жұқтырғандармен 643 адам байланыста болған

<a href="https://kyzylorda-news.kz/">Kyzylorda-news.kz.</a> Қытайдың зерттеушілері басқа елдерде коронавирусқа қарсы вакцина сынақтарын өткізуді жоспарлап отыр. Бұл шешімнің себебі – Қытайда жұқтырғандардың саны жеткіліксіз, деп хабарлайды South China Morning Post басылымы.
<blockquote>
 «Біз вирустың таралуын тез бақыладық, ал қазір науқастар жетіспейді», – дейді елдің жетекші вирусологтарының бірі Чен Лин.
</blockquote>
Алғашқы сынақтарға Уханьнан келген 108 ерікті қатысты. Алайда келесі вакциналарды тексеру үшін мыңдаған адамдар қажет болады, ал Қытайда қазіргі уақытта үш мыңнан астам адам жұқтырған. Зерттеу үшін мүмкін жерлер – Италия, Испания және Германия.
Қазіргі уақытта Америка Құрама Штаттарында ең көп жұқтырған, алайда, Шанхайдан келген сарапшы Тао Линнің пікірінше, мемлекеттер Пекинмен ынтымақтаспайды.
Чен Лин егер вакцина он мың науқасқа сыналып, тек 100-де иммунитет дамыған болса, бұл препараттың тиімділігі туралы қорытынды жасауға жеткіліксіз болады деп мәлімдеді.

Қытай науқастардың болмауына байланысты коронавирустық вакцинаны басқа елдерде сынақтан өткізбек

<a href="https://kyzylorda-news.kz/">Kyzylorda-news.kz.</a> Еуразиялық экономикалық комиссия дүние жүзінде жарияланған пандемияға орай бірқатар азық-түлік түрлерін осы жылдың 30 маусымына дейін Еуразиялық экономикалық одақ елдерінен өзге елдерге&nbsp; шығаруға тыйым салғандығы белгілі болды. Оның ішінде күріш те еніп кеткен болатын.
Бұл жаңалық қызылордалық дихандар үшін айтарлықтай проблемаға айналды. Осы ретте, Сыр күрішшілері Кәсіпкерлер палатасына келіп, көмек сұраған болатын.
<blockquote>
 «Қызылорда облысында сауда орталықтарының қоймаларындағы күріштің қоры 3 мың тонна шамасында. Мұнан өзге ауыл шаруашылығы тауар өндірушілерінің қоймасындағы ақталмаған күріштің көлемі 190 мың тонна, яғни 90 мың ақталған күріш бар деп айта аламыз. Мұндай қормен ішкі нарықты толық, тіпті артығымен қамти аламыз. Біздің облыстағы ауыл шаруашылығы тауарөндірушілері осы жылдың күз мезгіліне дейін үшінші елдерге экспортқа күріш жеткізіп беру үшін алдын ала ұзақ мерзімді келісім-шартқа қол қойып қойған. Бұл саладағы кәсіпкерлеріміздің негізгі табысы экспортқа тәуелді. Сондықтан да біз «Атамекеннің» орталық аппаратына ұсыныс жібердік. Өз кезегінде Орталық аппарат шұғыл тиісті министрліктерге шығып, кәсіпкерлердің проблемасын жеткізді. Нәтижесінде, қазақстандық күріш экспортқа кедергісіз шығатын болды», – дейді Кәсіпкерлер палатасының бөлім бастығы Жасұлан Серіков.
 «Енді Сырдың күрішін экспортқа шығармайтын болыпты» деген хабарды естіп біраз қиналып қалған едік. Себебі жүздеген мың адамның айлығы, ризығы соған тікелей байланысты, соны түсінген кәсіпкерлер палатасы дер кезінде тиісті, құзырлы орындарға шығып, хабарласып ол бұйрықтың күшін жоюға үлкен көмегін тигізді», – дейді «Абай-Дәулет» ЖШС директорының орынбасары Марат Сәрсенбаев.
</blockquote>
Айта кету керек, Қызылорда облысы кәсіпкерлер палатасының тұрақты жұмыс жасайтын «жедел желісі»: 8 /7242/ 40-09-81 немесе 8 777 764 33 11 нөміріндегі call-орталыққа хабарласа алады.
Ал «Атамекен» Ұлттық кәсіпкерлер палатасына хабарласуға арналған байланыс құралдары: 1432, 8 778 870 14 32.
Төтенше жағдай кезінде елімізде кәсіпкерлікке қатысты жасалып жатқан жағдай туралы ақпараттарды мына сілтемеден алуға болады:
https://atameken.kz/ru/pages/1012-biznesvrezhimechs.
Төтенше жағдайдағы форс-мажорға қатысты сауалдар бойынша бот: https://t.me/atameken_certificate_bot
Қаржылық қызметтер бойынша бот: https://t.me/Atamekencallcentre_bot

Қызылордалық күріш экспортқа шығарылуын тоқтатпайтын болды

<a href="https://kyzylorda-news.kz/">Kyzylorda-news.kz</a>. Еліміздегі төтенше жағдайға байланысты «WhatsApp» мессенджерінде түрлі қауесет таратып жатқандар бар. Олар халықтың арасына жалған ақпарат жіберіп, елді дүрбелеңге салуда.
Соның бірі жақында ғана «Қазалы ауданына қарасты бұрынғы «Қырықжылдық», қазіргі Жанқожа батыр елді мекенінде коронавирус індеті анықталған 1 азамат белгілі болды, осы елдің тұрғындары жан-жаққа қашып жатыр, індет жұқтырған азамат қалтырап ауырып жатыр» деп тараған хабар болатын.
<blockquote>
 «Осы жалған ақпаратты таратқан азаматты аудандық полиция бөлімінің қызметкерлері анықтады. Ол Әйтеке би кентінің тұрғыны болып шықты. Қазіргі таңда бұл азаматтың үстінен ҚР Қылмыстық кодексінің 274 бабы 4 бөлігі бойынша іс қозғалды», – деп мәлімдеді Қазалы ауданы әкімінің баспасөз қызметі.
</blockquote>

Коронавирус: Қазалыдан жұртты «қашуға шақырған» тұрғын ұсталды

<a href="https://kyzylorda-news.kz/">Kyzylorda-news.kz.</a> Қазіргі таңдағы проблеманың бастысы жер жаһанға кең тараған «Коронавирус» пандемиясы туралы болып отыр.
Бұл мәселеге бей-жай қарауға болмайтынын қазіргі қалыптасқан жағдай осыны дәлелдеуде. Бұл турасында Мемлекет басшысы Қасым-Жомарт Кемелұлы Тоқаев арнайы шешім шығарып, республика аймағында, оның ішінде Сыр бойында да төтенше жағдай жарияланды.
Осыған байланысты жергілікті жерлерде нақтылы іс шаралар жүзеге асырылуда, бүкіл бұқаралық ақпарат құралдары күнделікті мәліметтерменен қалың жұртшылықты хабардар етуде. Бәрі шындық, бәрі рас!
Бұл эпидемияға қарсы тұру тек қана мемлекеттік органдардың жұмысы ғана емес әрбір Қазақстан азаматының, тірі пенденің төл міндеті болуы тиіс.
Өмір сүрудің аксиомасы өзіңді-өзің сақтандыр, өзгеге жанашырлық сөзіңді жеткіз, атқарылып жатқан жұмыстарға қолдау көрсет.
Төтенше жағдай кезінде қабылданған шешімдердің әрбір пунктінің орындалуына азаматтық борыштарынды орындаңдар! Бұл істе ардагерлер қауымдастығының, ардагерлердің атқарар жұмыстары жеткілікті-ақ. Болашақ ұрпағымыздың денсаулықтарының зардап шекпеуіне өмірлік тәжірибелеріңізді айтыңыздар!
Халқымыздың басынан өткізген қиын қыстау кездегі зұлмат замандардан қалай аман-есен шыққанымызды, ұлт болып қалай ұйысқанымызды үнемі нақты мысалдармен жеткізе беріңіздер! Күні кешегі тәуелсіздігіміздің алмағайып кезеңінде болған қиыншылықтарды еске түсіріңіздер. Халқымыздың санасында сақталған мына сөз «мың өліп, мың тірілген қазақ» деп тегін айтылмаса керек.
Билік басындағы азаматтарға қамқор көңілдеріңізді білдіре отырып, әрбір жасалынып жатқан іс әрекеттеріне қолдау көрсетейік, ардагерлер демекпіз. Біздер, барлық уақытта қиын қыстау шақта халық пен билік біргеміз!
Қазақ елінің болашағы үшін белсенді қызмет жасай берейік, ағайын!
Көктемнің шуақты күнінің әрбір мезгілін тиімді пайдаланып, үй жайымыздағы ағаш егу, гүл отырғызу, көкөніс егу жұмыстарын шарбақтан шықпай-ақ атқара беруге болады, жастарға үлгі көрсетейік, абзал Ардагерлер!
Сайлаубай ӘБІШЕВ,
Қызылорда қалалық ардагерлер кеңесінің төрағасы

Сайлаубай Әбішев: Бірлік – жетістікке жеткізеді

<a href="https://kyzylorda-news.kz/">Kyzylorda-news.kz.</a> Халықаралық топтың мамандары коронавирустың таралуын тежейтін ауа ылғалдылығының деңгейін анықтады. Зерттеу жұмысының қорытындысы Annual Review of Virology журналында және Йель университетінің сайтында жарияланды, деп хабарлады&nbsp;<a href="https://kyzylorda-news.kz/">Naked Science</a>.&nbsp;
Ғылыми жұмыстың авторлары пандемиямен күрес жолында карантин шаралары мен арақашықтықты сақтау аздық ететінін айтып отыр. Аурудың таралуына ғимараттағы, үйдегі және бөлмедегі микроклимат, атап айтқанда, ауаның ылғалдылығы да әсер етеді.
<blockquote>
 «Біз өмірдің 99 процентін үй-жайда өткіземіз, бірі-бірімізге жақын жүреміз. Осы орайда бұған дейін маңызды бір мәселе жайында айтылған жоқ. Үйдегі және даладағы температура мен ауа ылғалдылығының ара қатынасы вирустың таралуына қалай әсер етеді? Міне, біз осы мәселені зерттеп шықтық», – дейді зерттеудің бас авторы, иммунобиолог Акико Ивасаки.
</blockquote>
Ғалымдардың айтуынша, қыста вирустар үш есе қаупті болады. Себебі сырттан келетін суық ауаның ылғалдылығы төмен, ал бөлменің іші жылынғаннан кейін ауаның ылғалдылығы 20 процентке түседі. Ондайда вирустар тез тарайды. Бұдан бөлек, құрғақ ауа тұрса, адамның иммунитеті патогендік бактерияларды дер кезінде тоқтата алмайды.
Зерттеушілер тышқандарға тәжірибе жасап, инфекцияның таралуын байқап көрді. Сонда ауа ылғалдылығы төмен жерде вирус тез тараған. Ал ылғалдылық 40-60 процентке көтерілгенде тышқандардың инфекцияны бір-біріне жұқтыру көрсеткіші күрт төмендеді.
Бірақ ауа ылғалдылығы тым жоғары болса, респираторлық вирус қайтадан тез тарап, заттардың үстінде ұзақ уақыт сақталған. Осыған байланысты ғалымдар барлық дезинфекциялық шараларды сақтай отырып, үйдегі ауа ылғалдылығын 50 проценттің деңгейінде ұстап тұруға кеңес беріп отыр.

Үйдегі ауаның ылғалдылығы вирустың таралуына қалай әсер ететіні анықталды

<a href="https://kyzylorda-news.kz/">Kyzylorda-news.kz.</a> Ресми мәліметтерге сәйкес, вирустың 200-ге жуық елде шамамен 1 миллион адамға жұққанына қарамастан, Тәжікстанда инфекция жұқтырудың бірде-бір оқиғасы тіркелген жоқ. Журналистер елге инфекцияның алдын алуға не нәрсенің көмектескенін анықтауға тырысты деп хабарлайды <a href="https://kaz.nur.kz/1848528-nelikten-tzikstanda-koronavirus-zok-bak-birnese-nska-syndy.html?utm_source=article-fragment&utm_medium=clipboard">NUR.KZ</a>.
Тәжікстанда коронавируспен ауыратын науқастардың болмауын түсіндіретін бірнеше нұсқалар бар.
Бірінші нұсқа бойынша, Тәжікстан айтарлықтай жабық ел. Бұл жерде туризм дамымаған, мемлекеттің өзі әсіресе шетелдіктер арасында танымал емес, республикада рейстер аз, ал транзиттік маршруттар мүлде жоқ. Осы факторлардың барлығы вирустың елге сырттан әкелуіне шектеу қояды. Сондай-ақ бұл елдің құрлық тереңдігінде, көлік ағындарына әсер етпей орналасқандығы атап өтілді.
Екінші нұсқа – кедейлік. Көптеген елдерде инфекцияны Еуропаға немесе Қытайға сапар шеккен азаматтар жұқтырған. Бірақ тәжіктердің басым көпшілігінің шетелге шығуға мүмкіндігі жоқ, көрші Өзбекстан, шетелде жұмыс істейтіндер үйге сирек келеді. Сондай-ақ, қазірдің өзінде елде жұқтыру оқиғалары бар деген болжам бар, алайда дәрі-дәрмектердің жетіспеуінен, тест жүйелері мен қажетті жабдықтардың болмауынан дәрігерлер дұрыс диагноз қоя алмайды. Басылым бұған дейін тәжіктер коронавируспен ауырып, иммунитеті. нығайтқан деген нұсқаны жоққа шығармайды. Осы нұсқаны қолдай отырып, қыстың алғашқы айларында Тәжікстанда атипті тұмаудың өршуі болғанын, пациенттің бірнеше күн бойы ыстығы көтеріліп, жөтеліп, құсып, ауырғаны туралы деректер келтіріледі. Ағымдағы жылдың қаңтар айының аяғында қабылданған шаралар вирустың таралуын болдырмады деп болжануда: осы уақыттан бастап елге келгендердің барлығы 2 аптаға карантинге жіберіліп, содан кейін шетелдіктер үшін шекараны толығымен жауып тастады.
Келесі нұсқа – 65 жастан асқан азаматтарға, созылмалы аурулардан зардап шегетіндерге, иммундық жүйесі әлсіреген адамдарға қатысты. Тәжікстанда олардың саны аз. Басылымның мәліметінше, туу деңгейінің жоғары болуына байланысты халықтың басым көпшілігі балалар, жастар және еңбекке қабілетті адамдар. Зейнеткерлікке шыққан адамдар тәжіктердің тек 5,4% құрайды.
Тағы бір нұсқа – тәжіктерді дін аман сақтайды. Халықтың көпшілігі күн сайын бес уақыт намаз оқитын ислам дінін ұстанады. Намаз алдында әр мұсылман дәрет алады – сақалын, ауызын, құлақтарын, қолын, аяқтарын, бетін бірнеше рет жуады. Мұндай жеке гигиена да вирустардан қорғайды.

Неліктен Тәжікстанда коронавирус жоқ?

<a href="https://kyzylorda-news.kz/">Kyzylorda-news.kz.</a> Ресей президенті Владимир Путин SARS-CoV-2 коронавирусын жұқтыру қаупіне байланысты қашықтықтан жұмыс істеу режиміне көшті деп хабарлайды <a href="https://www.dw.com/ru/%D0%BF%D1%83%D1%82%D0%B8%D0%BD-%D0%BF%D0%B5%D1%80%D0%B5%D1%88%D0%B5%D0%BB-%D0%BD%D0%B0-%D0%B4%D0%B8%D1%81%D1%82%D0%B0%D0%BD%D1%86%D0%B8%D0%BE%D0%BD%D0%BD%D1%8B%D0%B9-%D1%80%D0%B5%D0%B6%D0%B8%D0%BC-%D1%80%D0%B0%D0%B1%D0%BE%D1%82%D1%8B-%D0%B8%D0%B7-%D0%B7%D0%B0-%D0%BA%D0%BE%D1%80%D0%BE%D0%BD%D0%B0%D0%B2%D0%B8%D1%80%D1%83%D1%81%D0%B0/a-52980667">DW</a>.
<blockquote>
 «1 сәуірде үкімет мүшелерімен кездесу телеконференция арқылы өтті», деді Путиннің баспасөз хатшысы Дмитрий Песков.
 «Президент Ново-Огаревода болады және телекөпір арқылы үкіметтің жетекшілерімен, министрлер кабинеттерімен жұмыс істейді, шенеуніктер де жұмыс орындарында болады», – деді Песков.
</blockquote>
Оның айтуынша, коронавирустың таралуына байланысты Путин сәлемдесу тәсілін өзгерткен. Ресей басшысының әзірге жеке кездесулерде қол беріп амандаспайтыны белгілі болды.
<blockquote>
 «Қазір барлығы әлеуметтік қашықтықты сақтайды», – деп сөзін толықтырды Песков.
</blockquote>
Песков коронавирусқа арналған күнделікті сынақтарды Путиннің тапсыратынын жасырған жоқ.
<blockquote>
 «Әрине, біз сақтық шараларын қолданамыз, кез келген жиналыстарды болдырмаймыз, мұны мүмкіндігінше қашықтан жасауға тырысамыз», – деді ол.
</blockquote>

Путин коронавирус жұқтыру қаупіне байланысты қашықтан жұмыс істеуге көшті

<a href="https://kyzylorda-news.kz/">Kyzylorda-news.kz</a>. Коронавирус індетінің алдын алу және жою шараларын жүргізу үшін Қызылорда облысының денсаулық сақтау басқармасына 104 млн теңге бөлінді.
Бұл туралы Қызылорда облысының әкімі Гүлшара Әбдіқалықова «Хабар 24» телеарнасының тікелей эфирінде мәлімдеді.
<blockquote>
 «Коронавирус инфекциясының таралуына байланысты кеселдің алдын алу және жою шараларын жүйелі жүргізу үшін облыстық денсаулық сақтау басқармасына 104 млн теңге бөлінді. Қаржының 12,8 млн теңгесіне мың жарым литр антисептик, 100 дана төсек жабдығы және бетперде сатып алынды», – деді өңір басшысы.
</blockquote>
Сонымен бірге, төтенше жағдайларға арналған резервтен 672 млн теңге қаражат қаралып отыр.

Қызылордада коронавируспен күреске 104 млн теңге бөлінді

<a href="https://kyzylorda-news.kz/">Kyzylorda-news.kz.</a> Сырбойылық зиялы қауым өкілдері облыс тұрғындарын сабырға шақырып, хат жазды. Облыс тұрғындарына арналған үндеудің толық нұсқасын төменде ұсынып отырмыз.
Мынау індеттің таралуы бір елдің, бір жұрттың басындағы ауырлық емес, күллі адам баласын алаңдатқан ахуал. Халқымыз сындарлы шақта келген қауіпті ауызбірлікпен, тәртіпке бағынған анық іспен аластаған. «Төртеу түгел болса, төбедегі келеді» деген даналықтың түп мәніне бойлай білгуге тиіспіз. «Төбе» деп отырғаны – Жаратаушының жарылқауы. Бүгінгі күні бізге жақсы сөз айтып, ниетімізді жақсылыққа бұрудың маңызы зор. «Ауызбен орақ орғанның белі ауырмайды» деген, әр жерден шыққан әсіре ақпаратқа сенбейік, бойымызды үрейге алдырмайық, болып жатқан жағдайға сауатты көзқараспен, салауатты санамен байып жасайық.
Облыс әкімі Гүлшара Әбдіқалықованың аймақта короновирус індетінен қалыптасқан жағдайға байланысты тұрғындарға үндеу жариялағанын бәріңіз білесіздер. Үндеуде: «Короновирус індеті таралуының алдын-алу талаптарын қатаң сақтауға тиіспіз. Қазір кез келген адам вирус жұқтыруы мүмкін. Барлық тұрғындар дерттен оқшауланғаны дұрыс. Елді&nbsp;жөнсіз дүрліктірмес үшін ресми&nbsp;ақпараттарға сүйенуіміз қажет. Төтенше жағдай талаптарын бұзғандарға заң аясында қатаң шаралар қолданылатынын ескертемін», – деп атап өтті аймақ басшысы. «Тәртіпке бағынған құл болмайды» дейді Бауыржан атамыз. Бізге – қала, аймақ тұрғындарына дәл осы сәтте заңға бағынып, тәртіпке мойынсұнып, үйде отыру ең абзал іс болмақ. Бұл өз басымыңыздың қауіпсіздігі ғана емес, қоғамға деген құрмет екенін түсінетін боларсыз.
Ақпарат көздерінен хабардар болып отырғанымыздай, облыс, қала басшылығы ат үстінде жүр. Облыс орталығы мен аудандар тосқауыл бекеттер арқылы жабылып, әскерилер, медица қызметкерлері, әкімшілік, кәсіпкерлік өкілдері күн-түні күзет басында қалып отыр.
Коронавирус – құрбанын алғанда ғана көрінетін, асынған қаруын жасырып келген жау. Біздің аталарымыз талай соғысты бастан өткеріп, жан берді. Қазір халықты қауіпсіз баспасына отырғызып, қауырт іс істінде жүрген қызмет адамдары – бүгінгі күннің батырлары. Үйде отырғандар мен онлайн жұмыс тәсіліндегілерге қарағанда оларға «жаудың» оғына ұшырау қаупі сәт сайын төніп тұр. Қарапайым жұрт ат үстіндегі ел ағалары мен жанкешті қызметкерлердің, антына адал дәрігерлердің осы еңбегін бағалауы керек. Бұл баға олардың тәртіпке бағынып, ережені бұзбауы болмақ.
Өкінішке қарай, ауданаралық жолдардағы бекеттерді айналып өтушілер мен кісі басын жинап, тіршілік түйткілі толас таппай отырғандар да кездеседі. Бүкіл қоғам болып қолы ұзын індеттің аяғын қысқарта алмай жатқанда, жер астынан жік шыққандай бұлардыкі қандай ақылға сыятын іс? Осы жайлы естігенде біз оларды есіктегі жауды төрге шығарғандар немесе ел мүддесін ескермеген есерлер деп есептеуге мәжбүрміз.
Құрметті Сыр елінің игі-жақсылары, бүгінгі сәт ел болашағына жаны ашитын әр азаматтың сабырды сауыт, ақылды қорған қылатын кезеңі.
Қатаң да болса ережеге сай іс қылайық, бұл да өтпелі кезең, «күн жаманы кетеді» деген қазақ. Жайдары, жақсы күндерге бірге жету үшін, қай кезде де бірге болғанымыз абзал, ағайын.
Құрметпен, бір топ қызылордалық зиялы қауым өкілдері.

Қазақстан және Қызылорда облысының жаңалықтары: COVID-19