<a href="https://kyzylorda-news.kz/">Kyzylorda-news.kz</a> Қызылордалық оқушы Алтын Исламова ұлттық нақыштағы қолөнер бұйымдарын дайындайды. Әрбір жасаған дүниесі көздің жауын аларлықтай. Көрген адам оның еңбегіне жоғары баға беріп жатады. Жас қолөнер шебері &nbsp;ұлттық нақыштағы қолөнер бұйымдарын жасауды 2022 жылдан бастап қолға алған. Сол жылдың шілде-тамыз айларында алғашқы дүниелерді жасап шығарады. Оның қолөнермен айналысуына анасының жасап берген шолпысы, әрі, &nbsp;ұстаздары мен сыныптастарының жылы сөзі.<blockquote>− Қазақ халқы ертеден ырымға сенеді. Әсіресе, көз тию, тіл өтуден сақтанып жатады. Анашым менің тізеден келетін ұзын шашыма көз тиіп кетпесін деген ниетпен маған фурнитураларды біріктіріп, кішкентай көлемді шолпы жасап берген еді. Оны жіппен байлап өте қарапайым етіп жасап шығарды. Шолпыны мектепке тағып бардым. Сол сәтте мектеп басшылығы, ұстаздар және мен сыныптастардан көп жылы сөз естігенім есімнен кетпейді, − дейді ол.</blockquote>Сондай-ақ, жазғы демалысын тиімді өткізуді ойлаған Алтын анасының шолпысын аздап әрлеп, өзі ұнатқан бөлшектерді қосып қайта жасап шығарады. Осылайша қолда бар құралды, шынжырды және тиынды біріктіріп ерекше дүние дайындайды. Бұл оның қолөнер бұйымдарын жасауға деген қызығушылығын одан сайын арттырып, ынтасын жігерлендіре түседі. &nbsp;<blockquote>− Менің алғашқы жасаған бұйымым шашыма арналған шолпы еді. Рас, алғашқыда өзім қолөнер бұйымдарын қалай жасау керек екенін білмейтін едім. Қажетті ұсақ бөліктер қолымда жоқ еді. Соған қарамастан қыздың көркіне айналған, қос бұрымның көркін ашатын ұлттық бұйымға деген қызығушылығым басым болды. Шын ниетіңмен істегің келген жұмысқа барлығы табылады. Оған уақыт та жетеді, көңіл бөліп жасасаң алынбайтын қамал жоқ. Алғашқы бұйымдарыма қанша уақыт жұмсағаным қазір есімде жоқ. Алайда қазір қолым үйреніп, осы саланың қыр-сырын меңгеріп келемін. Қазір оған көп уақыт жұмсай бермеймін. Тапсырысты уақытында орындауға тырысамын, − дейді.</blockquote>15 жасынан зергерлік бұйымдарды жасаумен айналысып, тапсырып қабылдап жүрген шебердің бұл ісіне көпшілік сүйсіне қарайды.&nbsp; Бүгінде Алтын шолпы, сырға, алқа және өзге бұйымдарға қажет жабдықтарды Қызылордадан алса, кейбір заттарды Алматыдан алдыртып отыр. Әрбір бөлшекті біртіндеп біріктіріп оларды тастармен қосып, шынжырлайтын бұйымның қиындығы көлеміне қарай 1 сағатқа дейін уақытты қажет етеді екен.Қазіргі таңда мұндай бұйымдарға деген сұраныс пен қызығушылық артқан. Осы ретте шебер нәзік жандылардың талғамына сай түрлі бұйымдар жасап отыр.<blockquote>− Әлбетте, барлық нәзік жандылардың ата-баба өнеріне деген қызығушылығы ерекше. Қазақ арулары ұзын бұрым, шолпы-сырғасымен келбетіне көрік қосады. түседі. Шолпымды көрген үлкен ризашылығын білдіріп жатады. Жылы сөз айтып, батасын береді. Дос қызымның туған күніне сыйлық ретінде көздің жауын алатын, талғамына сай келетін шолпы табыстаған едім. Оның сол сәтте қуанғаным көріп, өзім ерекше сезімге бөлене түстім. Мен жасаған бұйымдарды үйдегі қыздар да тағып жүреді. Оларға сыйға тартқанды ұнатамын. Мектеп қабырғасында жасаған жұмыстарыма көзі түсіп, сатып алған оқушылар бар. Мектепте «Бегім ана» атты қлттық өнерді дәріптейтін шаңырақ бар. Кіші сыныпта білім алып жүрген қыздар өздерінің ұлттық нақыштағы бұйымдарға қызығушылығы ерекше екенін айтып жүреді. Айтпақшы, кезінде сайыста, қыз сыны байқауында, мерекелерде шашбау, шолпы сияқты бұйымдар таба алмай қиналатын едік, −дейді.</blockquote>Бүгінгі күні Алтын Қызылорда қаласындағы Назарбаев зияткерлік мектебінде білім алады. Онда қолөнерге, ұлттық құндылықтарды жас ұрпақ бойына сіңіруге барынша қолдау көрсетіліп жатқандығын жеткізді.&nbsp;<blockquote>− Қолөнеріме лайықты қолайлы орта туғызды. Мектеп қауымдастығы түгелдей мен жасаған бұйымдарды жоғары бағалайды. Маған жылы лебізін білдіріп жатады. Шашымның ұзындығына рақметін айтады. Үлкендер қазақ тарихында шаштың ұзын болуы жөнінде қызық әңгімелер айтады. Меніңше, осындай қолдау маған қолайлы орта туғызып, ұлттық әшекей-бұйымдарды дамытуға жол ашқан тәрізді. Қазіргі күні бұнымен хобби ретінде айналысып жүрмін. Алдағы уақытта &nbsp;қолдаушылар мен қызығушылық танытатындар саны өсіп жатса, осындай бұйымдарды дамыту ойымда бар. Тіпті өсе келе бұл хобби үлкен кәсіпке ұласып кетуі де ғажап емес. Қазақы нақыштағы ұлттық әшекейлер деген атпен әлемдік нарыққа бәсекеге қабілетті дүние ретінде дәріптеліп жатса қандай ғанибет. Оны алдағы уақытта көре жатамыз,− дейді шебер.</blockquote>Алтын қолды алтын қыз өзінің бастауын ұзақ уақыт бұрын алған және әшекей-бұйым бағытында осы жұмыстың қыр-сырын меңгеріп алған майталмандарды жиі бақылайды. Олардың өнерін жоғары бағалайды. Оның қызығушылығы болашақта осы саланың майталманы болуға әкелуі мүмкін. Барлығы уақыт еншісінде.

Қызылордалық зияткер хоббиін кәсіпке айналдырмақ 

Облыстық кітапхананың оқырманы артып келеді

<a href="https://kyzylorda-news.kz/">Kyzylorda-news.kz</a> &nbsp;Оқу-ағарту министрі Ғани Бейсембаев мектеп оқушыларын, түлектерді, педагогтер мен ата-аналарды 2023-2024 оқу жылының аяқталуымен құттықтады.&nbsp;Бүгін еліміздің барлық мектептерінде бір мезгілде "Білімім - Отаныма" бірыңғай сынып сағаты өтті. Сынып сағатының аясында министр барлық мектеп оқушыларын 2023-2024 оқу жылын табысты аяқтауларымен құттықтады.&nbsp;Ғани Бейсембаев Бірыңғай сынып сағаты - бір жылда атқарылған жұмысты қорытындылап, балалардың өз мұғалімдеріне, мектеп ұжымына, ата-аналарына алғыс айтуына мүмкіндік беретінін атап өтті.&nbsp;<blockquote>"Сіздердің еңбекпен алған білімдеріңіз Отанға деген сүйіспеншілік пен құрметтің белгісі! Бүгін сіздермен бірге еліміздегі төрт миллионға жуық оқушы келесі сыныптарға ауысады. Бір жылда сіздер есейіп, оқуда, шығармашылықта, спортта үлкен жетістіктерге жеттіңіздер. Осы оқу жылында біздің оқушылар 10 халықаралық олимпиадада 243 медаль жеңіп алды. Оның ішінде 20 алтын, 95 күміс, 128 қола медаль бар. Сіздердің әрқайсыларыңыз өз нәтижелеріңізбен мақтана аласыздар! Сіздерді шын жүректен құттықтаймын және мұнымен тоқтап қалмауларыңызды тілеймін!", - деді ол өз құттықтауында.&nbsp;</blockquote>Министр сондай-ақ су тасқынымен күресте алдыңғы қатарда болып, көмекке жұмылған қазақстандық педагогтерге алғысын білдірді.&nbsp;<blockquote>"Қиындықтарға мойынсұнбай, балаларымызды оқытуды жалғастырдыңыздар, мектептерді құтқарып, мұқтаж жандарға қолдау көрсеттіңіздер және ағартушылық миссияны адал атқардыңыздар. Сіздердің ерен еңбектеріңіз бен ұстаздық кәсіпке адалдықтарыңыз үшін ең шынайы ризашылығымды білдіремін!", - деді Ғани Бейсембаев.&nbsp;</blockquote>Сөзін қорытындылай келе, министр мектеп, колледж бітіруші түлектерге алдағы емтихандарда сәттілік тіледі. Айта кету керек, 2023-2024 оқу жылын 3,8 млн-нан астам оқушы аяқтауда. Оның ішінде 186 мыңнан астам 11-сыныпты бітіруші бар. Сондай-ақ 150 мыңнан астам колледж бітіруші диплом иеленіп, толыққанды маман болады.&nbsp;Фото: t.me/oqu_agartu&nbsp;

Оқу-ағарту министрі оқу жылының аяқталуына байланысты үндеу жасады 

<a href="https://kyzylorda-news.kz/">Kyzylorda-news.kz</a>&nbsp; Тәрбиенің сан салалы, күрделі мәселелеріне терең бойлауға бастайтын, күнделікті тұрмыста кездесетін дағдылар арқылы баланың жан дүниесіне әсер ететін білім мен тәрбиенің алғашқы баспалдағы – бастауыш мектеп. Бастауыш саты – білім, дағды, іскерліктің қалыптасуының бастамасы болып табылады. Келешекте жалпы білім алу мен кез-келген арнаулы мамандықтарға талпынудың іргетасы осы бастауышта қаланбақ. Сол білімді құрайтын кім? Әрине, бастауыш сынып мұғалімі. Осы ретте парасат пен махаббатқа толы өмірін ұстаздыққа арнаған, бастауыш сынып маманы ретінде 14 сыныпты орта буынға жоғары сапа білім көрсеткішімен түлеткен алтын есімді ұстаз туралы сөз етпекпіз.Ұстаз құрметті де қастерлі сөз. Ол білім мен тәрбиенің қайнар көзі. Тіпті ғұлама ғалымдар да ұлағатты ұстаздың алдынан өтеді. «Ұстазы жақсының – ұстанымы жақсы» демекші, осындай ұлы есімді арқалап жүрген қармақшылық Оразкүл Жұманқызы білім беру барысындағы тәжірибесімен ерекшеленіп, тұлғалық өнеге сыйлай алған құрметті ұстаз. Ол қырық жылға жуық ұстаздық еткен уақытында әрбір оқушыға бар білгенін үйреткен ұлағатты мұғалім, аяулы ана, биік тұлға, ардақты әже. Оның бойындағы қарапайымдылықпен ұштасып жатқан өнеге, білімінің қайнар көзін арнасынан тасытып жатқан білік-дағды, сұлулығының сырын аша түсетін қазақы болмысы – бүгінде ұстаздық пен адамдыққа бойлайтұғын әр адамға үлгі ғана емес, даңғыл жол. Ұстаздың біліктілігі тек сабағының мағыналылығында емес, көрсеткен нәтижесі мен жеткен жетістігінде. Дәлелі – шәкірттерінің «Алтын белгі», «Үздік аттестат» иегері атануы. Одан бөлек, шәкірттері талай халықаралық, республикалық деңгейдегі білім бәсекелерінде білімін дәлелдеп, биік шыңды бағындыруда. Осы бастама мен керемет жетістіктердің нәтижесінде апайымыз Қазақстан Республикасы Білім мен ғылым министрлігінен Құрмет грамотасына ие болып,&nbsp;облыстық, аудандық марапаттарды иеленді. Ұстаз тек шәкірттердің емес, ұстаздыққа қадам басқан жас мамандардың тәлімгері болып, бағыт-бағдарын аямай, сапалы тәжірибесімен бөлісіп келеді.Төрт жыл әріп танытып, тәрбиелеп, баланың білім саласындағы іргетасын қалаған ұстаздың орны ерекше.&nbsp;Себебі, Оразкүл Жұманқызының еңбек жолында жеткен жетістіктерінен бөлек, бүгінде ұстаз, тұлға болып қалыптасқан шәкірттері қаншама? Дарынды ұстаз болған жерде дарынды бала шығады.&nbsp;Осыған орай мұғалім жан-жақты, кәсіби дайындығы терең, өз бойына жинақтаған білімін жастарға үйрете алатын маман болуы шарт. Ол тек білімді жеткізуші ғана емес, керісінше оқушының білімін, өмірге көзқарасын жүйелі түрде қалыптастыра алатын жан болуы тиіс. Оқушы бойындағы қабілет-қарымды ашуда екінің бірі шебер бола бермейді. Біздің әріптесіміз секілді білімді, білікті ұстаздар тұрғанда елімізде дарынды, бәсекеге қабілетті жас ұрпақ тәрбиеленіп шыға берері сөзсіз.Ғибратты ғұмырын&nbsp;өнегеге айналдырып, өмірлік миссияны дұрыс таңдай білген, ізгілікке толы өмірін білім беру ісіне арнаған жанашыр ұстаз, ардақты ана, биік тұлға, ардақты әжеге зейнеттің тек тәтті жемісін, арайлы таңдардың бақытты сәттерін, шаттығы мол ғұмыр, немере, шөбере күлкісіне толы шаңырақ, аласармас абырой биігін қимастыққа толы жүрегімізбен тілейміз. Қызмет деген бір белестен өтіп, құрметті демалыс деген кезеңге жеттіңіз. Қуанышыңыз ұзағынан болсын. Ағайын-туыстың құрметіне, қосағыңыздың үлдесі мен бүлдесіне, немере мен шөберелердің шу-күлкісіне, ұл-қыздарыңыздың жеңісті шақтарын көрген бақытты сәттеріне бөленген әдемі ғұмыр кешіңіз!&nbsp;Жұма МАХАМБЕТОВА

Дарынды ұстаздың дара жолы 

<a href="https://kyzylorda-news.kz/">Kyzylorda-news.kz</a> «Қызылорда облысының қоғамдық даму басқармасы» КММ-нің «Сотсыз татуласу орталығы» қызметін қамтамасыз ету әлеуметтік жобасы аясында Мектептік медиацияны дамыту мақсатында жалпы білім беру мекемелерінен білім алушылар арасында «Жас бітімгер – 2024» интеллектуалды байқауы өткізілді. Білім сайысының мақсаты – жаһандану заманында бәсекелестік бәйгесінен қалмайтын ұшқыр ойлы интеллектуалды жастарды дәріптеу, олардың мүмкіндіктерін көрсету. Білімді, коммуникативті, креативті, ізденгіш әрі тапқыр тұлғаларды анықтау болып табылады.&nbsp;Білім сайысына қала мен аудан мектептерінің 8-10 сынып оқушылары қатысты. Сайыс 5 кезеңнен тұрады. Бірінші кезең «Блиц сұрақтар». Гугл платформасын пайдалана отырып, берілген сұрақтарға жылдам әрі дұрыс жауап берулері қажет. Екінші кезең «Пазл», яғни қатысушы топтарға фотолар беріледі. Фотоларды даудың сатыларына байланысты жинақтаулары қажет. Үшінші кезең «Ақындық өнер». Әр топ медиацияға қатысты 1 шумақ өлең шығарып, оқулары қажет. Төртінші кезең «Шешендік өнер», ең соңғы бесінші кезең «Үй тапсырмасы», алдын-ала берілген тақырыптардың біреуін таңдап, 45-50 секундтық бейнеролик дайындап келулері қажет. Сұрақтар Қазақстан Республикасының Конституциясы мен «Медиация туралы» Заңынан алынады. Тәуелсіз Қазақстан тарихы жайлы сұрақтар да қойылды.Байқауда Қоғамдық даму басқармасының ҚХА хатшылығы, этносаралық мәселелері жөніндегі бөлім басшысы – Алиева Айгерім Икрамқызы, Әли Мүсілімов атындағы №101 мектеп-лицейінің педагог-психологы – Бекбембетова Жанат Бурхановна және «Бітім» медиация орталығы» ҚБ-нің директоры – Мирамбекқызы Жанна төрелік етті. Қатысушылардың барлығы «Алғыс хатпен», жүлделі орын иегерлері «Дипломмен» марапатталады және жеңімпаздарға бағалы сыйлықтар табысталды.<img src="https://knadmin.beoblood.kz/uploads/b028b42c_22e0_47a3_97b5_05083c6bfcd5_fbcc6e5ee2.jpg" alt="b028b42c-22e0-47a3-97b5-05083c6bfcd5.jpg">

«Жас бітімгер – 2024» интеллектуалды байқауы өтті

Қызылорда: Үздіктер қатарындағы білім ошағы

<a href="https://kyzylorda-news.kz/">Kyzylorda-news.kz</a>&nbsp; Әрбір педагог үшін кәсіби білімін жетілдіру, құзыреттілігін арттыру басты мақсат болып табылады. Себебі, мұғалімнің кәсіби құзыреттілігі – оның жан-жақты білімімен, ұстаздық шеберлігімен, оқытудың жаңа әдістерін меңгеруімен өлшенеді.Мұғалімнің білімін жетілдіруге бағытталған, сабақтағы іс-әрекетті зерттеудің ерекше үлгісі болып табылатын Lesson Study әдісі қазіргі кезде оқу үдерісінде табысты қолданылуда.«Өрлеу» Қызылорда филиалының ұйымдастырумен бастауыш сынып мұғалімдеріне арналған «Бастауыш сыныптарда Lesson Studyді өткізу ерекшеліктері, өзекті мәселелері және оларды шешу жолдары» тақырыбында облыстық дөңгелек үстел өтті.Курс тыңдаушыларын курстан кейінгі қолдауды жүзеге асыру, аталған пәндерді оқытуды жетілдіру мақсатында сабақты зерттеу тәжірибелерімен бөлісу, сабақтағы оқыту мен оқу үдерісін табысты жоспарлау, педагогтерге әдістемелік көмек беру бағытында ұйымдастырылған шараға бастауыш сынып мұғалімдері, мектеп директорының бастауыш сыныптар жөніндегі орынбасарлары қатысты.Онлайн форматта өткізілген дөңгелек үстелде педагогтер Lesson Study тәсілінің артықшылықтары, сабақты зерттеу үдерісінің ұжымның әлеуетін көтерудегі рөлі, Lesson Study-де зерттеу тақырыбын таңдаудың маңызы, зерттеу сабағын ұйымдастыру қадамдары, оқушы белсенділігін арттыруға ықпалы, оқушылардың сыни ойлау дағдыларын ойын арқылы дамыту жолдарын зерттеу, әдебиеттік оқу сабағында Lesson Study-ді қолдану тәжірибесі, ескеретін негізгі ұстанымдар және т.б. бағыттар бойынша тәжірибелерімен бөлісті.Дөңгелек үстел барысында мұғалімдер мынадай сұрақтар төңірегінде ой бөлісті:Lesson Study-дың&nbsp;тиімділігінеде? Lesson Study-дің&nbsp;мұғалімдерүшін&nbsp;тиімділігі&nbsp;неде? Lesson Study&nbsp;тобына&nbsp;кімдерқатысады? Lesson Study&nbsp;жүргізуде&nbsp;негемән&nbsp;берген&nbsp;дұрыс? Lesson Study&nbsp;өткізу&nbsp;үшінтақырыпты&nbsp;қалай&nbsp;таңдағандұрыс? А, В, С деңгейіндегі оқушыларды қалай таңдауға болады? Сабақтан кейін бақылаудағы оқушылардың пікірін қалай білуге болады? Lesson Study-ден кейінгі талқылау кезінде неге мән берген дұрыс? Сабақты бақылау кезінде неге мән беру керек?Педагогтеріміздің кәсіби құзыреттілігін арттыруға, курстан кейін қолдауға бағытталған шаралар алдағы уақытта жалғасын табатын болады.&nbsp;&nbsp;

Lesson Study – мұғалімдерге арналған ерекше әдістеме

Қызылордалық оқушы «Flex» бағдарламасымен шетелде білім алды

<a href="https://kyzylorda-news.kz/">Kyzylorda-news.kz</a> Мұғалімнің көбейіп, ұстаздың азайып кетуі жан-жақты білім мен қарым-қабілеттің жоқтығынан. Мәуелі бәйтеректің тереңге тамыр тартып, жапырағын кеңге жаюы үшін «сылдыр судың» өзі жеткіліксіз. Құнар керек. Құлқынның құлы емес, ұлтының ұлы болғандар осыны ойлайды.Қара судан қаймақ алып, қара даладан дара дарын шығару педагогтың біліктілігіне, біліміне байланысты. Бүгінде рухтың төрін, намыстың өрін бағындырғандар ғана дана ұстаз болмақ. Осы соқпақты ақындықпен ұштастыру, сөзден өрмек тоқып, шумақты шуаққа айналдырып, екі кеменің басын ұстап жүру ешбір адамға оңайға соқпасы сөзсіз. Намысты нанға сатпайтын нар ақындар, ұстаз шайырлар тарих керуенінде де кездеседі. «Кел, балалар, оқылық!» деп Ыбырай салған қозы көшті тізбектеген, ізгі ізді үзбеген алып ақындар іргелі оқу орындарында дәріс беріп те жүр бүгінде.&nbsp;Ал біздің айтпағымыз қазыналы Қазалы жеріндегі шайырлар шоғыры жөнінде.Өзен түбіндегі шоңғал тастай талай тасқынға төтеп беріп, буырқанған ағындарды бастан кешкен аймақ ақындарының бағыты турасында сөз қаузамақпыз. Көлі киелі, өзені өмір, топырағы текті жерден шын дарындардың шыкпауы әсте мүмкін емес шығар. Намыс пен рухтың ақындары да осында. Өлендерін оқи отырып жүрегіңізбен сезініп, сезім суына шомасыз.Әңгімені тың идеялардың генераторы, намыс туын нық ұстаған, шындыққа біткен шоңғал тас Абдолла Сапардан бастасақ. Сапар ақын мәңгілік сапарға аттанып кеткелі ұзақ уақыт бола қойған жоқ. Соңында қалған шоқ-шоқ шәкірттері оның адуынын, аптап лебін әлі күнге ұмытпаған. 2009 жылдан бастап №249 мектеп лицейде жұмыс істеген оның өлендері «Қазақ деген ол менмін» деген атаумен басылып шықты. Жарық жалғанда небәрі 38 жыл ғана өмір сүрген талантты ақын, таңдаулы ұстаз, тосын идея, тың шешімдердің иесі, көзі тірісінде аңызға айналған «Сегіз қырлы, бір сырлы» Абдолла Сапардың таңғажайып туындыларын, отты өлеңдерін осы жинақтан оқи аласыздар.А.Сапар соңғы сұхбатында «Бақыт деген не?» деп келетін сұраққа былай жауап қатыпты: «Меніңше, дәл осы отырғанда денемнің саулығы, айналамның амандығы. Мен үшін бақыт – баламның алдымнан жүгіріп шыққаны, әйелімнің маған күлімсіреп жымиюы, мен үшін бақыт белгілі бір мазмұнды толық қабылдай алған оқушының саған деген ризашылық көзқарасы, жанарынан есіп тұратын жылулық лебі. Дәл осы тенденцияны өзімнің ішкі күйіммен синтездеу арқылы ләззат аламын. Мен үшін белгілі бір моральдық экстаз көбінесе лицей қабырғасында өтетін сияқты. Бақыт құсы мектептің ішінде, азанда келгеннен менің алдымнан жүгіріп шыққан оқушылар» дейді. Рас қой. Ақын мұны сезінді. Басқалар да түсінсе игі. Себебі баланы «бақыт» деп білетін жан ғана рух биігінен көріне алмақ. «Қазақ деген ол менмін, мақтанайын деп едім… Тәңірге ғана бағынар» деп жырлаған ақынның жан жүрегі осыны ұғынған.Намыс найзағайының ізін жалғап, ақындық соқпақты салып келе жатқан қазір Қазалыда ұстаз-ақындар жетерлік. №78 мектептің мұғалімі Шертай Ерхан «Найзағай ғұмыр» өлеңінде:Салмағын салып саналы істері, Жанымның шоғын қаузады-ай бүгін. Жарқ етіп ойнап, жерге түскені, Сияқты маған найзағай ғұмыр, – деп жырлайды. Ал, №100 мектептің ұстазы Ақынсара Даулова «Абай рухына тағзым» жырында:Өлеңмен бар әлемді бағындырған, Біздерге сара жол бар сағым жылдан. Қазақтың ұлы ақыны Абайымның, Қиялы кең, жүрегі жалын нұрдан.Қарап тұрсаңыз, оқушы қиялын өлеңмен баурап, өнермен сусындатуға болады. Бас ақын өмірін өнегелі өлеңмен түсінген оқушы тақырыпты ойда ұстап қалары анық. Бұдан бөлек, №225 орта мектептің қазақ тілі мен әдебиеті пәнінің мұғалімі, Қазақстан Журналистер одағының мүшесі Жанат Аханның «Адамдықтың қол жеткізем тағына» өлеңінен тағылым табуға болады. Тау көтеріп, тac қопарған жырлар болмаса да, ұстаз қаламынан туған түйдек тіркестер көпке ой салады.Мың тербелем кемедей айдындағы, Еске түсіп ескі өмір жайдың бәрі. Құлазыған сәттерде қылаң беріп, Өмір маған кұшақты жайдың тағы.Өлеңмен өрілген өмір. Шағын ғана қаланың әр мектебінде ақын бар болса, ол руханияттың өрлігі. Қазалыдағы ақындар тізбегі мұнымен бітіп қалған жоқ. Баршылық. Соның бірі – Сәкен Қабылов. Ол №225 орта мектептің қазақ тілі мен әдебиеті пәні мұғалімі. Жырлары да уытты.Лашын құстай бәрі шүйілді кеп, Лебізін тыңдата алмай, түйілді кек. Лайқат сөз таба алмай жасын топқа, Лауазым иелері күйінді көп, – деп, ғасыр зұлматын шумаққа сыйдырып жібереді. Желтоқсандағы жыл ызғарын жыр ету, ұстаздық жүрекпен түйсіну ерлік. Онын «Сараман сыры», «Туған өлкем», «Көктем келді» өлеңдері де өмір бедерін бейнелейді.Ақындық дейтін ауыр жүкті арқалап жүру нәзік жандарға оңайға соқпайды. Керек тастың ауырлығы жоқ. Әйткенмен жан солқылын сыздатып, қоғамдағы мәселелермен, махаббатпен күйіп-пісіп жүрудің машақаты көп. Сағыныш Өтеулиева бұл белесті де бастан кешкенін өлеңдерінен аңғарамыз. Сағыныштың сағынышқа, сырға толы өлеңдері өз бағасын алып келеді.Ол Қазалы ауданы, Әйтеке би кентіндегі №266 мектеп-лицейдің І санатты қазақ тілі мен әдебиеті пәні мұғалімі. Өлеңдері 2017 жылы Алматы қаласында жарық көрген республикалық жас ақындардың «Жастық – жалын жыр» антологиясына және республикалық «Мәртебелі мамандық» журналына бір топ өлеңдері жарық көрген. Аудандық мұғалімдер арасындағы Рүстем Жанай, Алмагүл Қаржаубаева атындағы жыр мүшәйралары мен Мұхтар Шаханов, Оралхан Бөкей, Абай, мектепішілік Фариза Оңғарсынова, Мұқағали Мақатаев оқуларының жүлдегері. «Жүрек жылап қалды» өлеңінде:«Жүрек жылап қалды» өлеңінде: Жақын жүріп жанымнан жырақ қалдың, Көшпейді екен көңіліңмен ұнатқаның. Мені мұнша дәрменсіз күй кештірген – Сынақтарым… Ертең үшін өзімді сан сұраққа алдым, Ол жоқ жерге расыменен тұрақтадым. Бұл қылығым бәлкім ерсі көрінсе де – Ұнатқаным…Иә «Өлең-өмір» деген осы шығар. «Ұстазсыз шәкірт тұл». Шәкіртсіз ұстаз жеміссіз қу ағашпен бірдей. Бойында қасиет қаны қайнап жатқан қазалылық ақындар мектебінен тау тұлғалардың өсіп шығарына кәміл сенеміз. Себебі бұл елде Жетіскен Мәкеналы өмір сүрген. Көп жылдардан бері өлке тарихын зерттеумен айналысқан азамат ол. «Ортаймаған қазаны, қасиетті Қазалы» жинағы, «Тамыры терең, тарихы кенен – Қазалы» жинағының үш кітабы, «Асандар көтерілісі», Ғани Мұратбаевтың өмірі мен кызметі, жастарға рухани тәрбиесі туралы «Мен – Ғанимын», «Ғани тағылымы» атты жинақтары, «XXI ғасырға аманат» атты жыр кітабы жарық көрген адуынды ақын.Қаза берсең қазына осы өлкеде. Қазалы ауданы жерінде Жалаңтөс пен Әйтеке, Жанқожа мен Ақтан, Ашабай мен Сырлыбай, Үмбет пен Ерімбет, Ғани Мұратбаев, Роза Бағланова мен Мәдина Ералиева т.б. танымал әйгілі батырларымыз бен би-шешендеріміз, өнер қайраткерлері дүниеге келген. Осы сабақтастықты пән сабақтарында санаға түйдіріп, оқушыға рухани тәрбие беруде алдына жан салмаған қазалылық ұстаз ақындардың шығар белесі құзар шың ғана. Бұл із, өнерге салынған күре жол еш үзілмесіне кәміл сенеміз.&nbsp;Айдар САЙЛАУОВ Фото: qazaly.kz

Қазалылық ұстаз ақындардың қатары артып келеді

<a href="https://kyzylorda-news.kz/">Kyzylorda-news.kz</a>&nbsp; Қорқыт ата атындағы Қызылорда университетінің «Орыс тілі мен әдебиеті» білім беру бағдарламасы оқытушыларының ұйымдастыруымен «А.С.Пушкиннің шығармаларын оқуда цифрлық білім беру ресурсын қолдану» тақырыбында халықаралық ғылыми-әдістемелік семинар өтті.&nbsp;Семинардың мақсаты — А.С.Пушкин шығармашылығын зерттеуде цифрлық білім беру ресурстарын пайдаланудың тиімділігін талқылау және анықтау болды.Университеттің ғылыми жұмыстар және халықаралық байланыстар жөніндегі проректоры, ф.ғ.к Майнұр Бөрібаева кіріспе сөзін сөйлеп, іс-шараны бастап берді.Одан әрі семинарда қызықты да танымдық баяндамалар жасалды. Олардың қатарында ф.ғ.д, мемлекеттік орыс тілі институтының бас ғылыми қызметкері, А.С.Пушкин жобаларының жетекшісі Эльмира Афанасьева (Ресей Федерациясы), ф.ғ.д., А.С. Пушкин атындағы Брест мемлекеттік университетінің орыс әдебиеті және журналистика кафедрасының доценті Татьяна Сенкевич (Беларусь Республикасы), ф.ғ.к, Кония Селжук университетінің орыс тілі мен әдебиеті кафедрасының оқытушысы Зейне Оразбекова және аталмыш кафедра студенті Лейлим Ағаханоглу (Түркия Республикасы), Қорқыт Ата атындағы мемлекеттік университетінің «Орыс тілі мен әдебиеті» білім беру бағдарламасының аға оқытушылары Гүлнар Жалелова, Талғат Телеубаев болды.&nbsp;Сондай-ақ семинар барысында РЯЛ-21-2 тобының студенттері А.С.Пушкиннің шығармаларын оқу барысында «Rudall-E» нейрондық желісін және «Plickers» қосымшасын қолдануды көрсетті. «Славянь» этномәдени бірлестігінің жетекшісі Галина Щербакова семинарға қатысушыларға шығармашылық табыс тіледі. Семинар тақырыбы барлық қатысушылардың үлкен қызығушылығын тудырды.&nbsp;Қорлан САРЫФото:aqmeshit-zhastary.kz

Халықаралық семинар өтті

<a href="https://kyzylorda-news.kz/ru">Kyzylorda-news.kz</a> Облыстық кітапханада 17 мамыр күні қазақтың көрнекті ақыны, қоғам қайраткері Ілияс Жансүгіровтің туғанына 130 жыл толуына орай «Қазақ әдебиетінің ақсұңқары» тақырыбында поэзия кеші ұйымдастырылды.Ілияс Жансүгіров – ақын, драмашы, прозашы, оның поэзиясы ұлттық әдебиеттің классикалық байлығының қатарына жатады. Ақынның терең идеялы, көркем мүсінді, эпикалық кең тынысты шығармаларының танымдық, тәрбиелік мәні зор. Олар қалың оқырманның ойына ой, сезіміне сезім қосады, қиялына қанат бітіреді, эстетикалық ләззат беріп, гуманистік адамгершілік идеяларды толғайды.Ілияс Жансүгіров әдебиет әлемінде өз халқының ұлттық қазынасына құнды мұралар қалдырған ұлылардың бірі. Ұрпақ үшін оның парасат әлемі, білгір суреткерлігі, зор адамгершілік үлгісі өшпейтін өнеге мектебі. Ұлылардың бойындағы ортақ қасиет көп қырлылық болса, бұл ерекшелік &nbsp;Жансүгіров талантына тән.Арынды ақын балаларға арналған өлеңдерінде танымдық, тәрбиелік, білімдік мәніне баса наза аударады. Әндетіп, өлеңдетіп тербете тәрбиелеу арқылы баланы бесіктен тәрбиелеп, сөз өнеріне баулу, ой-өрісін дамыту, адамгершілікке, анаға &nbsp;деген мейірімділік , жағымды мінез-құлыққа тәрбиелеуді көздегенін оның әрбір шығармасынан көруге болады. Ілиястың көптеген өлең-поэмалары қазақ халқына тән-адам жанын жадыратар, сұлулық сезімін лаулатар жан азығы ән мен күй, тастан шыққан бұлақ секілді сызылып, кемеліне келген ағын дариядай толқиды. Ән мен жырға, күмбірлеген күйге арнаған өлеңдерінде өте бір әсерлі, екпінді, желдірме әсем сөздер бастырмалатып, бір эстетикалық сұлулық, айтуға жеңіл, әнге қосуға лайық өлеңдер болып келеді. Балалардың танымдық, қабылдау әрекеттерін дамытып, оларды эстетикалық сезімталдыққа, ой тереңдігіне , байқампаздыққа, шығармашылыққа тәрбиелеуге бағытталумен бірге, сөз шеберлігіне, сөз тапқырлығына үйретерлік көркемдік кеңістігіне өрнектелген.Шараға №7 мектеп-лицейінің қазақ тілі мен әдебиеті пәнінің мұғалімдері Г.Мамытова, М.Андақұлова, А.Оспанғалиева, Ә.Мүсілімов атындағы №101 мектеп-лицейінің мұғалімі С.Молдағажиева, С.Сейфуллин атындағы №4 ІТ мектеп-лицейінің мұғалімі Г.Таркешева ақынның өмірі мен шығармашылығы туралы баяндады. №7 мектеп-лицейінің оқушылары ақынның өлеңдерінен үзінділер оқып, сахналық қойылым қойды.Кеш қонақтарына «Қазақ поэзиясының құлагері» тақырыбында ұйымдастырылған кітап көрмесі таныстырылды. Қорлан САРЫ Фото:aqmeshit-zhastary.kz

Ілияс Жансүгіровтің 130 жылдығына орай поэзия кеші өтті

<a href="https://kyzylorda-news.kz/">Kyzylorda-news.kz</a>&nbsp; Қазақстанда IT саласы дамудың жаңа сатысына көтеріле бастады.&nbsp;Оның дәлелі – резиденттердің, «Астана хаб» стартаптарының саны, шетелдерге IT-қызметтер экспортының өсуі. Жасанды интеллекттің дамуы экономика мен қоғамды жаңғырту стратегиясының контекстінде барған сайын маңыздырақ бола түсуде. Мемлекет басшысы ақпан айында өткен Үкіметтің кеңейтілген отырысында елімізде ІТ саланы серпінді дамытуға бағытталған жобалардың қолданысын кеңейтуді тапсырған болатын.Бұл бағытта аймақта жаңа игі жобалар атқарылуда. Дәл осы саламен айналысамын деген жастарға мол мүмкіндік бар. Жыл өткен сайын қызығушылық танытатын оқушылар мен студенттердің саны да артып келеді. Олардың тың жобасы оң нәтижесін көрсетуде. «Smart Bench» жобасын ұсынып, 70-тен аса өтінімнің арасынан топжарған KyzylordaHub бизнес инкубаторының резиденттері, Қорқыт ата атындағы Қызылорда университетінің студенттері Саят Қанатұлы мен Темірлан Абжанов&nbsp;тың жаңалығымен бөлісті.<blockquote>– Өткен жылы «Chevron» компаниясы ұйымдастырған «Sustainability Living Lab» &nbsp;жобалар сайысына Қорқыт ата атындағы Қызылорда университетінен 6 білім алушы қатысуға өтінім беріп, 4 жобаның авторы финалдық кезеңге өткен едік. Сайыстың шарты бойынша қазылар алқасына оқу орындарының кампусын дамытуға арналған 70-тен астам жоба келіп түскен. Соның ішінде 17 жоба үздік деп танылып, әрқайсысымызға 1 млн 300 мың теңге көлемінде арнайы грант бөлінді. Мен ұсынған «Smart Bench» жобасы − университетіміздің бас оқу ғимаратының алдына күн панельдері орнатылған смарт орындықтар қоюға бағытталған жоба. Негізгі мақсаты − кампус ландшафтарын өзгерту, экологиялық мәселелерді тұрақты шешіммен қамтамасыз ету, университет инфрақұрылымының дамуына үлес қосу.Қарапайым тілмен айтқанда, күн сәулесінен қуат алатын «ақылды» орындық әдеттегі орындықтардан зарядтау станциясы ретінде жұмыс істейтін кіріктірілген күн панелімен ерекшеленеді. Олардың көмегімен бір уақытта бірнеше телефонды қуаттауға болады, – дейді Саят Қанатұлы.</blockquote>Келесі грант иегері Темірлан Абжанов тұрақты жылыжайға бағытталған жоба ұсынған. Аталған жобаның мақсаты – органикалық қалдықтарды өңдеу арқылы топырақты құнарландыруға пайдалану. Сонымен қатар топырақтың төменгі қабаты арқылы суару әдісін қолдану және суару процесін автоматтандыру арқылы су шығынын азайтуды да көздейді.<blockquote>− Жобалар конкурсын қорытындылау мақсатында сәуір айында Назарбаев Университетінде «Sustainability Living Lab» бағдарламасының конференциясы ұйымдастырылды. Конференцияға республика бойынша 12 университеттің студенттері қатысып, бағдарлама аясында іске асқан инновациялық экологиялық жобаларын таныстырды. Жеңімпаз атанған жобаны командамен жасадық.Конференцияның алғашқы күні қатысушы ретінде баяндамамызды ұсынып, гидропоникалық қондырғы жасау бойынша шеберлік сағатына қатыстық. Сондай-ақ жасыл жобалардың көрмесіне қатысушылар қайта өңделген материалдардан күн панельдерін, жасыл шатырларды, гравитациялық генераторларды, биологиялық ыдырайтын каппа-карраген пленкаларын, су қоймаларынан пластмасса ұстайтын құрылғыларды жасау әдістері көрсетілді. Көрмеге келушілер түрлі экологиялық бастамаларды көріп, студенттердің атқарған жұмыстарымен танысуға мүмкіндік алды. Сәйкесінше жобалары жүзден жүйрік шыққан студенттер де өзара тәжірибе алмасып, достар тауып, идеяға идея қосылып, шабыттанып қайттық, − дейді Темірлан Абжанов.</blockquote>Оның айтуынша, команда жолдама алған Үндістандағы әлемдік компанияда өтетін тағылымдама 10 күнге созылады. Қызылордалық зияткерлер Дели қаласындағы тағылымдамаға маусым айының соңына қарай аттанбақ.<blockquote>− Өзім KyzylordaHub бизнес инкубаторының резидентімін. Мұнда біз екі бағытта, яғни, оқушылармен және студенттермен жұмыс жасауға көңіл бөлеміз. Студент болсам да, оқушыларға тәлімгерлік жасап, IT салаға деген аймақ жастарының құштарлығын оятып, заман талабына сай жаңа білімді игеретін жасөспірімдердің саны да, сапасы да артуына үлесімді қосудамын. Сонымен қатар облыстағы 15 мектеппен тікелей байланыстамыз.Жобамыз әзірге қаржыландырылған жоқ. Жалпы жоспары, шығындары есептелген. Үлкен қаржылай қолдауды қажет еткенімен, жоба іске асырылып, қызылордалықтардың өмір сапасына әсер ететін күн де алыс емес деген ойдамын. Әлемді өзгерткің келсе, алдымен өзіңді өзгерт деген сөз бар. Айналам қашан өзгереді деп күтіп отырмай, бүгіннен бастап тамшыдай әрекеттермен өзімнің сүйікті салама, болашақтың басты мамандықтарының біріне күш салып, ізбасар оқушыларды дайындауды бастап кеткенімізге қуанамын. Қоғамға пайдалы болу – үлкен мотивация. Сыр өңіріне, жалпы қазақ еліне пайдасын тигізуге асық жастардың жаңа толқынына сәттілік! – дейді Темірлан Абжанов.</blockquote>Айта кетейік, жыл сайынғы конференция университет қауымдастықтарының тұрақты шешімдерін қолдап, оларды нақты жобаларға айналдыратын SLL бағдарламасына бағытталған. Бұл шараны Тұрақты даму офисі, «National Conservation Initiative» корпоративті қоры мен «Chevron» компаниясы ұйымдастырады. Бүгінгі күні өңірден грантқа ие болған 2 жоба да іске асырылып, «ақылды» орындық оқытушылар мен білім алушыларға қолданысқа берілген.&nbsp;Дина&nbsp;Бөкебай &nbsp;

Қазақстан және Қызылорда облысының жаңалықтары: Білім