<a href="https://kyzylorda-news.kz/">Kyzylorda-news.kz.</a> Қызылорда қаласы білім бөліміне қарасты Әли Мүсілімов атындағы №101 мектеп-лицейінде “Рухани жаңғыру” бағдарламасы аясында «Жаhандық әлемдегі заманауи қолөнер мәдениеті» тақырыбында қалалық семинар өтті.
Оған қалалық білім бөлімінің маманы Сулушаш Алмасбекқызы және қала көлеміндегі мектептердің мұғалімдері қатысты.
Семинар жоспары үш бөлімнен: ұйымдастыру бөлімі, негізгі бөлім:ашық сабақтар, практикалық бөлім:шебер-сынып жұмыстары жүргізілді. Ұйымдастыру бөлімінде мектеп-лицей директоры Айгүл Алтынбекқызы сөз сөйлеп, еліміздің өркениетті елдер қатарына қосылуы үшін қоғамның әрбір азаматының ой-санасы дамыған, өзіндік ой-пікірі бар, шығармашылық тұлға болуы талап етіледі. Өйткені, мемлекетіміздің келешегінің кемелдене түсуі – тек шығармашыл адамдар қолынан келетін іс. Қолөнердің қашанда заман, өмір ағымымен туындап, дамып отыратындығын айтты.
Көркем еңбек пәні мұғалімдері Мақсат Байділдақызы «Этностильдегі бас киімдер. Тақия, сәукеле» тақырыбында, «Бұйым өру» тақырыбында Гүлбарам Қанжарбекқызы және Алия Данышпанқызы «Өзгеріске ұшырау және тігін бұйымдарды сәндеу» тақырыбында жоғары деңгейде ашық сабақтар көрсетіп, көпшілік ілтипатына бөленді.
Семинардың практикалық бөлімі шеберлік сыныптармен жалғасын тапты. Көркем еңбек пәні мұғалімдері Рысдаулет Әкімбекұлы, Бауыржан Баймағанбетұлы «Қалдық материалдан бұйым жасау», «Аэрография» «Модерн дизайн қазақи ою нақышында салынған өнер мектебі» тақырыбында қолдан жасалған бұйымдарын көрсетіп, заманауи қазақи нақышта жасалынған макеттерін таныстырды. 7 сыныптары оқушылары «Құм терапиясы» тақырыбында құммен сурет салу әдісін көрсетсе, қолдан жасалынған бұйымдарын «Бейнелеу өнердегі заманауи бағыттары» тақырыбында таныстырды. Сондай-ақ қыздар тобына сабақ беретін мұғалімдеріміз «Сән үлгілерінің көрсетілімі», «Жылдам тігілетін белдемше» тақырыптарында жылдам тігілетін киім үлгілерін, трансформация және тігін бұйымдарын сәндеп тігу әдістерін көрсете білді.
Семинардың қорытынды бөлімінде қалалық білім бөлімінің маманы Сулушаш Алмасбекқызы сөз сөйлеп, кері байланыс алды. Семинарда көркем еңбек пәні ұстаздарының түрлі материалдардан: қалдық материалдан, ою нақышындағы қазақи дизайн ғимараты, заманауи бағыттағы өнер туындысы, құм терапиясы мен сән үлгілері насихаттала отырып, пішіндердің ықшам да мәнді үйлесімі, түстердің жоғары талғамы, көздің мүлтіксіздігін, колдың дәлдігін және қиял ұшқырлығын ұштастырып, шебердің өзіне тән тәсілдермен жеткізе білгендігін айтты.
Шара соңында қала мектептерінен келген мұғалімдер жүргізілген жұмыстарға кері байланыстар беріп, өз ұсыныс пікірлерін білдіріп, заманауи өнер туындысы жайында көп мағлұмат алғандықтарын айтты. Өткізілген жұмыстардың көкейге қонымды, тиімді, шынайы екендігіне көз жеткізгендерін айтып, алдағы уақытта өз жұмыстарынан көрініс табатындарын атап өтті.
<img src="https://kyzylorda-news.kz/wp-content/uploads/2020/01/22koloner2.jpg" alt="" />
<img src="https://kyzylorda-news.kz/wp-content/uploads/2020/01/22koloner3.jpg" alt="" />
<img src="https://kyzylorda-news.kz/wp-content/uploads/2020/01/22koloner4.jpg" alt="" />

Қызылордада «Жаhандық әлемдегі заманауи қолөнер мәдениеті» тақырыбында семинар өтті

<a href="https://kyzylorda-news.kz/">Kyzylorda-news.kz.</a> Қазақстанда қаңтардағы ақылы ұлттық бірыңғай тестілеу аяқталды. Тестілеуге қатысуға өтініш берген 95 440 адамның 72 520-сы – қазақ тілінде тапсыруға ниет білдірсе, 22 744 оқушы орыс тілін, 176 оқушы ағылшын тілін таңдаған.
Ұлттық тестілеу орталығы директорының міндетін атқарушы Дидар Смағұлов ақылы ҰБТ-ға қатысатындар легі артып келе жатқанын айтады. 2019 жылы қаңтарда тестілеуге бар болғаны 35 838 адам өтініш берген екен.
Бұған дейін тестілеуге тыйым салынған зат алып кіру әрекетіне түсіністікпен қарап келсе, бұл жолы алғаш рет олар автоматты түрде сынақтан шеттетілді. Мұндай оқушылар саны – 778. Тестілеуге кірер алдында қатысушылар жеке заттарын, смартфондары мен басқа да тыйым салынған заттарды қалдырып кетті. Сонда да смартфонын шоколад сияқты безендіріп, рентген кескініне орап, шаш арасына жасырып кірмекші болғандар анықталған.
ҰБТ 2019 жылдан бері жылына төрт рет: қаңтар, наурыз, маусым және тамыз айларында өткізіледі. Маусым айындағы тестілеуге қатысқан талапкерлер ғана білім беру грантын тағайындау конкурсына қатыса алады. Қалған айлардағы ҰБТ нәтижелерімен ақылы түрде жоғары оқу орындарына түсуге болады.
Тестілеу құны –&nbsp;2242 теңге.&nbsp;Жыл сайын тест тапсырмаларының базасы&nbsp;25-30 пайыз&nbsp;жаңартылады.

Ақылы ҰБТ тапсырған оқушылардың жартысынан астамы ғана қажетті балл жинаған

<a href="https://kyzylorda-news.kz/">Kyzylorda-news.kz.</a> Қазақстанның жоғары оқу орындарында 25% арттырылған стипендия беріле бастады, деп хабарлайды ҚР Білім және ғылым министрлігінің баспасөз қызметі.
<blockquote>
 «ҚР Президенті Қ. Тоқаев Жастар жылының жабылу салтанатында 2020 жылдың қаңтарынан бастап жоғары оқу орындары мен колледж студенттерінің стипендиясы 25% көтерілетінін мәлімдеді. ҚР Білім және ғылым министрлігі жергілікті атқарушы органдармен бірлесе отырып, Мемлекет басшысының тапсырмасын орындау бойынша шаралар қабылдады. Бүгінде еліміздің 30-дан астам жоғары оқу орны студенттердің стипендиясын 25% жоғарылатты. Жергілікті атқарушы органдар тарапынан колледж студенттеріне стипендия төлене бастады. Осылайша, 179 мың ЖОО студенті мен 136 мың колледж студенті стипендиясының көлемі артады», – деді ҚР БҒМ-нің баспасөз қызметінен.
</blockquote>
Айта кетейік, бакалавриат студенттерінің стипендиясы 20 949 теңгеден 26 186 теңгеге дейін, интернатура –37 945 теңгеден 47 431 теңгеге дейін, магистратура – 53530 теңгеден 66 913 теңгеге дейін, докторантура – 81 998 теңгеден 102 498 теңгеге дейін өсті. Колледж студенттерінің стипендиясы 16 759 теңгеден 20 948 теңгеге артты.

Қазақстандық студенттердің стипендиясы 25% артты

<a href="https://kyzylorda-news.kz/">Kyzylorda-news.kz.</a> Білім және ғылым министрлігі «Педагог туралы» заңның аясында қосымша ақылардың қалай төленетінін түсіндірді.
Вице-министр Бибігүл Асылованың айтуынша, қазіргі кезде мұғалімдердің арасында магистр дәрежесі бар мамандар аз. Олардың жалпы саны – 7,5 мың адам, яғни барлық педагогтың 3,5 проценті ғана. Ал әлемдік көрсеткіш 40-50 процентті құрайды. Осыған байланысты магистр атағы үшін 10 АЕК (26 510 теңге – Sputnik Қазақстан) көлемінде қосымша ақы қарастырылған.
<blockquote>
 «Сосын мектепке алғаш рет келген жас мұғалімге бір жылға тәлімгер бекітіледі. Ол педагогтың кәсіби дайындығы жоғары болуы шарт. Оған тәлімгерлік жасағаны үшін бір базалық қызметтік еңбекақының көлемінде қосыша ақы төленеді. Оның көлемі 17 697 теңгені құрайды», – деді Асылова.
</blockquote>
Бұдан бөлек, сынып жетекшілігі мен дәптер тексергені үшін қосымша ақылардың көлемі екі есеге артып отыр.
<blockquote>
 «Бұған дейін сынып жетекшілігі үшін кем дегенде 4 424 теңге, әрі кетсе 5 309 теңге болған. Енді осы ақша екі есеге көбейеді. Сол сияқты дәптер тексергені үшін 3 533-4 424 теңге төленетін. Ол да екі есеге өседі», – деп атап көрсетті вице-министр.
</blockquote>
Сондай-ақ, педагогикалық шеберлік үшін барлық мұғалімге 30-50 проценттік қосымша ақылар төленеді. Ол үшін ұлттық біліктілік тестін тапсырып, кәсіби дәрежені дәлелдеу керек. Ал мектеп директорлары мен олардың орынбасарлары өз жалақысын 30-100 процентке дейін өсіре алады.
<blockquote>
 «Жергілікті атқарушы органдар қосымша қолдау шараларын жасап, 300 айлық есептік көрсеткіштен (795 300 теңге) кем түспейтін сыйақы бере алады», – дейді Асылова.
</blockquote>
Еске сала кетейік, осы уақытқа дейін <a href="https://kyzylorda-news.kz/kogam/mughalimder-shipazhajda-tegin-emdeledi-39955/">мұғалімдердің енді шипажайда тегін емделетінін</a> хабарлаған едік.

Педагог мәртебесі: мұғалімдерге қосымша ақы қалай төленеді?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Алматыда өткен «Педагогикалық идеялар фестивалі» республикалық байқауында Қызылорда қаласындағы Назарбаев Зияткерлік мектебінің мұғалімі Мұхтар Бегайдаров І дәрежелі Дипломмен марапатталды.
&nbsp;«Дарын» ғылыми-практикалық орталығы ұйымдастырған&nbsp; жыл сайынғы педагогикалық байқауға биыл мектеп, колледж, мектепке дейінгі ұйымдар мен оқыту орталықтарынан барлығы үш жүзге жуық талантты мұғалімдер жиналды.
Қатысушылар кәсіби қызметтегі жетістіктерімен жұмыс нәтижелерін таныстырды. «Мамандық палитрасы» секциясында тәжірибесімен бөліскен қызылордалық жас математик Мұхтар Бегайдаров мектеп оқушыларына және мұғалімдерге арналған өзінің авторлық жобасын, яғни математикалық сайтты таныстырды.
«nismath.org» деп аталатын онлайн-платформада оқу процесінде пайдалануға болатын түрлі ресурстар мен құралдар жинақталған. Бұл сайтта оқушылардың қосымша теориялық материалдар, сынақ емтихан жұмыстары, тест пен олимпиада беті арқылы өздігінен білім алуына мүмкіндік жасалған. Сондай-ақ, мұғалімдер үшін пәнді оқытудың сапасын арттыру бағытында түрлі тақырыптағы мақалалар, бейнесабақтар мен 600-ге жуық үштілді математикалық терминологиялық сөздіктер мен оқулықтардың электронды нұсқалары жүктелген. Веб-портал қолданушыларына қажетті қосымшалар да осы ақпараттық ортадан алуға болады.
<blockquote>
 «Мен сайтты әзірлеуді 2018 жылы бастадым. Біртіндеп жаңа функциялармен толықтырып отырдым. Оқушылар мен әріптестерім сайттың логотипі мен мобильді нұсқасын жасауға көмектесті. Бір айдың ішінде жүйе 23 000 белсенді қолданушыны тіркеді. Күн сайын мыңнан астам адам сайтты пайдаланады екен », – деді мұғалім.
</blockquote>
Жобаны қорғаған сәтте, фестиваль қатысушыларының 100 пайызы аталмыш платформаның белсенді қолданушысы екені байқалды. Көптеген пән мұғалімдері сайтты оқу үрдісінде үнемі пайдалантынынайтты.
Мұхтар Бегайдаровтың бұл жобасы фестиваль қорытындысы бойынша таратуға тұрарлық және дарынды балаларды оқыту мен тәрбиелеу практикасына енгізуі керек үздік педагогикалық идеялардың қатарынан табылып, І дәрежелі Дипломмен марапатталды.
<img src="https://kyzylorda-news.kz/wp-content/uploads/2020/01/20nis2.jpg" alt="" />

Қызылордадағы Назарбаев мектебінің мұғалімі республикалық байқауда жеңімпаз атанды

<a href="https://kyzylorda-news.kz/">Kyzylorda-news.kz.</a> Білім және ғылым министрлігі Педагогтың жұмыс және демалыс уақыты ерекшеліктерін анықтау қағидаларын әзірледі. Жоба Ашық НҚА порталында жарияланып, 3 ақпанға дейін қоғамдық талқылауға шығарылды, деп хабарлайды <a href="https://sputniknews.kz/society/20200120/12580961/mugalimder-jumys-aptasy.html">Sputnik Қазақстан</a>.
Бес күндік жұмыс аптасы
Құжатта айтылғандай, білім беру ұйымдарының қолда бар материалдық-техникалық және кадрлық ресурстарына қарай мұғалімдер үшін бес күндік те, алты күндік те жұмыс аптасы белгіленуі мүмкін.
<blockquote>
 “Білім беру ұйымдарының ішкі тәртіп ережелерінде барлық мұғалім үшін, сондай-ақ жекелеген педагогтер үшін оқу-тәрбие жұмысының жоспарын, оқу кестесін, кезекшілік кестесін, білім беру ұйымының түрі мен түрін ескере отырып, бес күндік жұмыс аптасы көзделуі мүмкін”, – делінген жобада.
</blockquote>
Бес күн жұмыс істейтіндер сенбі және жексенбі демалса, алты күн істейтіндер үшін бір демалыс күні – жексенбі ғана қарастырылған.
Сабақ болмаған кезде мұғалім бос уақытын өз қалауы бойынша пайдалануға құқылы.
Түскі үзіліс 30 минуттан кем емес
Сонымен қатар, мұғалімдердің демалысы мен тамақтануына қажетті үзіліс уақыты, ауысым кестесі, демалыс және жұмыс істемейтін мереке күндеріндегі жұмыс білім беру ұйымының ішкі тәртібімен белгіленеді.
<blockquote>
 “Демалыс және тамақтану уақыты ішкі тәртіп ережелерімен бекітіледі және түскі үзіліс уақыты 30 минуттан кем болмауы тиіс”, – делінген ережелерде.
</blockquote>
Педагогтердің кезекшілігі сабақ басталғанға дейін кемінде 20 минут бұрын басталып, ол аяқталғаннан кейін 20 минуттан аспауы тиіс.
Жыл сайынғы еңбек демалысы
Төмендегі қызметкерлер жазғы немесе өзіне ыңғайлы кез келген уақытта жыл сайынғы еңбек демалысын алу кезінде басым құқыққа ие болады:
<ul>
<li>кәмелетке толмаған баланы (18 жасқа дейін) жалғыз тәрбиелеп отырған ата-аналар (қамқоршылар);</li>
<li>үш және одан да көп баласы бар әйелдер;</li>
<li>еңбек жарақатын алған қызметкерлер;</li>
<li>емделуге жолдамасы бар кез келген қызметкерлер.</li>
</ul>

Бес күндікке кімдер көшеді – мұғалімдер үшін жұмыс күнінің режимі әзірленді

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Қазақстан Республикасының сыбайлас жемқорлыққа қарсы іс-қимыл агенттігінің Қызылорда облысы бойынша департаменті мен білім басқармасы бірлесіп, облыс бойынша барлық орта білім беру мекемелерінде «Адалдық сағаттары»республикалық акциясын ұйымдастырды.
Аталған акцияға, облыс әкімінің орынбасары Н.Байқадамов, департамент басшысының бірінші орынбасары Б.Ниязов, департамент қызметкерлері мен ақпараттық-ағартушылық штабының өкілдері, «Ақмешіт – адалдық алаңы» жобалық кеңесінің мүшелері, «Nur Otan» партиясының облыстық филиалының, арнайы мониторингтік топтың және үкіметтік емес ұйымдарының, ардагерлер алқасының, әкелер кеңесінің, жастар ұйымдарының өкілдері, сондай-ақ басқа да қоғам белсенділері қатыстырылды.
Адалдық сабақтары облыстағы 276 орта білім беру ұйымдарында өткізіліп, жалпы 18500 оқушы қатысты.
Сабақ барысында оқушыларды өмірде жетістікке жету үшін адал еңбек етудің маңыздылығын түсіндіріп, қоғамда ұмытылып бара жатқан тәрбиелік маңызы бар құндылықтарды сақтауға шақырды.
Сонымен қатар, «Ақмешіт –Адалдық алаңы» жобалық кеңсесінің жанынан жалпы білім беретін мектептер мен жоғары және орта арнаулы оқу орындарында 2019-2020 оқу жылы қарсаңында Парасаттылық мектептері құрылғанын, оның негізгі мақсаттарын түсіндіріп, алдағы уақытта осындай сабақтар әлі де ұйымдастырылатынын жеткізді.
<img src="https://kyzylorda-news.kz/wp-content/uploads/2020/01/20adaldyk2.jpg" alt="" />
<img src="https://kyzylorda-news.kz/wp-content/uploads/2020/01/20adaldyk3.jpg" alt="" />

Білім беру ұйымдарында адалдық сағаты өтті

<a href="https://kyzylorda-news.kz/">Kyzylorda-news.kz.</a> 2020 жылдың алғашқы Ұлттық бірыңғай тестілеуі 16-20 қаңтар аралығында өтеді. Оған қатысуға 95 мыңнан астам адам өтініш берген.
Білім және ғылым министрлігіне қарасты Ұлттық тестілеу орталығымен бірге биыл өткізілетін Ұлттық бірыңғай тестілеуге қатысты басты сауалдарға жауап берді.
ҰБТ-ны қашан тапсыруға болады?
2019 жылдан бастап ҰБТ жылына төрт рет:&nbsp;қаңтар, наурыз, маусым, тамыз айларында&nbsp;өткізіледі. Маусым айындағы тестілеуге қатысқан талапкерлер ғана білім беру грантын тағайындау конкурсына қатыса алады. Қалған айлардағы ҰБТ нәтижелерімен ақылы түрде жоғары оқу орындарына түсуге болады.
Ұлттық білім беру дерекқорының мәліметінше биыл&nbsp;131 387&nbsp;оқушы мектеп бітіреді. Қаңтардағы тестілеугеқатысуға&nbsp;95 400&nbsp;адам өтінім берген. Тестілеу 99 ҰБТ өткізу пункті базасында өткізіледі және 820 аудитория пайдаланылады.
Тестілеу құны –&nbsp;2242&nbsp;теңге. Жыл сайын тест тапсырмаларының базасы 25-30 пайыз жаңартылады.
ҰБТ-ға қатысу үшін қандай құжаттар қажет?
Орта білім беру ұйымдарының бітірушілері тестілеуге қатысу үшін ҰБТ өткізу пунктіне келесі құжаттарды тапсырады:
<ul>
<li>жеке басын куәландыратын құжат бойынша толтырылған өтініш (өткізу пунктінде беріледі);</li>
<li>3×4 см екі фотосурет;</li>
<li>жеке басын куәландыратын құжат көшірмесі (16 жасқа толмаған және жеке басын куәландыратын құжаты жоқ адамдар туу туралы куәлігінің көшірмесін тапсырады);</li>
<li>туу туралы куәлігімен тіркелетін тұлғалар үшін өзі білім алатын орта білім беру ұйымының анықтамасы (2 дана).</li>
</ul>
Құжаттар онлайн қабылдана ма?
ҰБТ-ға өтініш беру құжаттарының санын азайту және рәсімді оңтайландыру үшін орта білім беру ұйымдарының бітіруші 11 және 12-сынып оқушыларынан өзі білім алатын орта білім беру ұйымының анықтамасы (Туу туралы куәлігімен келетіндерді есепке алмағанда) мен тестілеу ақысы төленгені туралы түбіртек талап етілмейді. 2020 жылғы бітіруші сынып оқушыларының деректер базасы сайт арқылы тексерілді.
Ұлттық тестілеу орталығы ҰБТ-ға қатысатындардан бірде-бір құжатты талап етпеудің жолдарын әзірледі. Соның бірі –&nbsp;Digital ID&nbsp;қосымшасы арқылы онлайн түрде цифрлық сәйкестендіруден өту. Пилоттық жоба сәтті аяқталып, жақсы нәтиже көрсетсе, наурыз айындағы ҰБТ құжаттары онлайн қабылдануы мүмкін.
ҰБТ-ны электронды түрде тапсыруға бола ма?
Қаңтардағы ҰБТ-ны онлайн тапсыруға болады деген ақпарат тараған болатын. Алайда Ұлттық тестілеу орталығы мұның жалған екенін, бұрынғыдай кітапшалар қала беретінін мәлімдеді. Дегенмен наурызда пилоттық жоба ретінде электронды тестілеу өткізу жоспарланып отыр. Ал маусымдағы ҰБТ қағаз түрінде қала береді. Орталық инфрақұрылымды тексерістен өткізу және өзге де тестілеу мәселелері барын айтып отыр.
Наурыз айындағы электронды тестілеунақты қай қалаларда өтетіні белгісіз. Электронды сұрақтар базасы дайын. Ұлттық тестілеу орталығы пилоттық жоба белгілі бір пәндер бойынша өткізілуі мүмкін екенін де айтып отыр.
2019 жылы педагогтардың Ұлттық біліктілік тестілеуі онлайн форматқа толық ауыстырылды. Ал ҰБТ-ны электронды түрге кезең-кезеңімен&nbsp;2021 жылы&nbsp;толық көшіру жоспарланып отыр.
Электронды тестілеудің артықшылықтары қандай?
<ol>
<li>Электронды форматқа көшу қаржыны үнемдейді.</li>
<li>Электронды тестілеу нәтижелері тапсырып отырған компьютердің экранына бірден шығады.</li>
<li>Тестілеу аяқталған соң&nbsp;60 минут&nbsp;ішінде апелляцияға сұрақтар беруге болады. Осыған дейін сұрақтарды есте сақтап, тестілеудің келесі күні ғана апелляцияға беруге болатын.</li>
<li>Тестілеу кезінде сұрақтарға қайта келіп белгілеген жауаптарды өзгерту мүмкіндігі.</li>
<li>Экран бетінде үлкен шрифтпен тек бір сұрақтың көрсетілуі ыңғайлы.</li>
</ol>
ҰБТ-ны қалай бақылауға болады?
Ұлттық тестілеу орталығының басшысы Дидар Смағұлов тест тапсырушылардың әлеуметтік тобына, отбасылық қатынастарына және қаржылық жағдайына қарамастан&nbsp;тең және объективті&nbsp;жағдай жасалатынын айтты. Сондай-ақ тәуелсіз бақылаушылар ретінде Арнайы мониторингтік топ өкілдері шақырылды.
Тест жүргізіліп жатқан барлық аудиторияға ZOOM функциясы бар бейнебақылау орнатылады. Соның арқасында экрандарды үлкейтуге және әр тест тапсырушыны жеке тексеру мүмкін болмақ.
Барлық аудиториядан онлайн көрсетілім ұйымдастырылады. Онлайн трансляцияға арналған сілтеме БАҚ, әлеуметтік желілер арқылы таратылып, көпшілікке жария етіледі. Кез келген адам сілтеме арқылы өтіп, ҰБТ-ның қалай өтіп жатқанын көре алады. Көшіріп алу фактілері, басқа да ережелердің бұзылуы жөнінде&nbsp;Digital agent&nbsp;қосымшасы арқылы Ұлттық тестілеу орталығына хабарлауға болады. Орталық әрі қарай шара қолданады.
ҰБТ-да қандай заттар қолдануға тыйым салынады?
<ul>
<li>калькулятор;</li>
<li>фотоаппарат;</li>
<li>пейджер;</li>
<li>ұялы телефон;</li>
<li>планшет;</li>
<li>ноутбук;</li>
<li>плеер;</li>
<li>ақпарат беретін материалдар мен анықтамалар,</li>
<li>шпаргалка;</li>
<li>шимай дәптер алып кіруге және қолдануға болмайды.</li>
</ul>
Химияны таңдау пәні ретінде таңдаған оқушылар Менделеев пен тұздың еру кестесін алып кіре алады. Оқушы өзімен бірге су, көк не қара түсті қалам, сызғыш, қарындаш кіргізуіне рұқсат.
Бұрын тестілеуге кірер алдында қатысушылардан тыйым салынған заттар табылса оларды тек алып қоюмен шектелетін. Енді металл анықтағыштан өткен кезде шпаргалка, құлаққап, смартфон секілді кез келген тыйым салынған зат табылса тест тапсырушыға аудиторияға өтуге автоматты түрде рұқсат етілмейді. Осылайша тестілеуге жіберілмейді.
Тестілеу кезінде не істеуге болмайды?
<ul>
<li>сөйлесуге;</li>
<li>орнынан тұруға;</li>
<li>жүруге;</li>
<li>аудиториядан рұқсатсыз шығуға;</li>
<li>орын ауыстыруға;</li>
<li>кез келген материалмен алмасуға;</li>
<li>кітапшаны ауыстыруға;</li>
<li>көшіруге;</li>
<li>алдын ала берілген тест жауаптарын пайдалануға болмайды.</li>
</ul>
Тәртіп бұзғандар аудиториядан шығарылып, олардың жауап парақтары қабылданбайды.
Жауап парағын бояу кезінде:
<ul>
<li>түзетуге арналған сұйықтықты пайдалануға;</li>
<li>көк немесе қара түсті қаламнан өзгесін қолдануға;</li>
<li>қауырсынмен, гель қаламмен жазуға;</li>
<li>қарындашпен бояуға;</li>
<li>жауап парағын бүктеп, жыртуға тыйым салынады.</li>
</ul>
Ұлттық тестілеу орталығы ҰБТ туралы өзгерістер мен жаңалықтардан хабардар болу үшін әлеуметтік желілердегі парақшаларында ұдайы ақпарат жаңартып отырады.

Елімізде ақылы ҰБТ басталды: Тест тапсырушылар нені білуі керек?

<a href="https://kyzylorda-news.kz/">Kyzylorda-news.kz.</a> Оқушылардың әлеуметтік желіні пайдалану ережелері мен жазба этикасы туралы ақпарат беру мақсатында Қызылорда қаласындағы Назарбаев Зияткерлік мектебінде кәмелетке толмағандардың істері жөніндегі мамандандырылған ауданаралық сотының мамандарымен кездесу өтті.
Кездесуде судья Қайратбек Бержанов пен мекеменің бас маманы Дәурен Тайыров жас жеткіншектерге ғаламтордың зияны мен пайдалану ережелерін бұзу салдарынан заң шеңберінде жазаланатын әрекеттерді саралап берді.
<blockquote>
 «Бір-бірін қорлау, ар-намысына тиетін сөздер айтса, қылмыстық жауапкершілікке тартылады. Жалған ақпарат таратқан жағдайда да азаматтар заң шеңберінде жазаланады», – деді судья Қайратбек Бержанов.
</blockquote>
Сондай-ақ, сот өкілдері интернет кеңістігіндегі кейбір ақпараттың пайдаланушыларға тигізетін зияны туралы тереңірек түсінік беріп, хат алмасу мессенджерлеріндегі теріс топтардың тұтқынына түспеуге кеңес берді. Сонымен қатар, күмән тудырған хабарламалар туралы ата-аналарды хабардар етіп, қауіп-қатерлерді алдын алудың маңызды екенін ескертті.
Кездесу барысында кәмелет жасына жетпеген балалардың түнгі уақытта қоғамдық орындарда жүруі, компьютерлік ойындарға құмарлығы секілді өзекті мәселелер туралы да сөз қозғалып, келелі кеңестер берілді.

Қызылордадағы Назарбаев мектебіне судья мен сот қызметкерлері не үшін келді?

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>Мектеп-бұл бүкіл әлем, бірнеше жүз бала мен ондаған мұғалімдер жиналған социумның өзіндік үлгісі. Бұл әлем мектеп қабырғалары мен ауланың периметрімен &nbsp;шектеледі.
Осы шекаралардың ішінде жиналған барлық адамдар мінез-құлқы, темпераменті, жасы, тәрбиесі, қоғамдық жағдайы жағынан әр түрлі. Олардың әрқайсысының өз дүниетанымы бар. Бұл адамдар бір-бірімен үнемі сөйлесіп, күніне 4-8 сағат бірге болады. &nbsp;Кейбіреулер табысты өзара іс-қимыл жасайды, басқалары конфронтацияға түседі.
Мұндай жағдайда даусыз жүруге бола ма? Болмайды, сондықтан, мектеп қақтығыстары сөзсіз. Оларға мұғалімдер, оқушылар және олардың ата-аналары тартылады. Сондықтан ең бастысы-барлық тараптар үшін ең аз шығынмен жанжалдардан шығуды үйрену.
Көбінесе ең күрделі мәселелерді шешу үшін екі адамның өздігінен шеше алмайтын жағдайда, үшінші тарап шақырылады. Бұл сот тәжірибесінен алынған классикалық жағдай: әрбір қақтығысқа қатысушылардың кезегін тыңдап, судья өз шешімін шығарады, шешім әділ болғаныменен, тараптың бір жағы қанағаттанбайды.
Осы кезде үшінші тарап көмекке келеді, бейтарап тұлға-медиатор (лат. mediatio-делдалдық).&nbsp;
Бірақ медиация-аралық сот емес. Медиация жүргізу алдында медиатор оған дайындық жүргізеді. Тараптарды тыңдап, даудың шығу себебін айқындау үшін, екі жақтың пікірін толық тыңдап қажетті мәлімет жинайды.&nbsp;&nbsp;&nbsp;&nbsp;&nbsp;
Тараптардың әрқайсысынан даудың шығу себебін тыңдап, қандай сұрақтарды талқылау қажеттігін шешеді. Бұл ретте медиатор нақты тыңдау және қайталап сұрап, конструктивті мағынасын табу шараларын қолданады.&nbsp;
Екіншіден медиатор екі жақтың талабын тыңдап, ол талаптың қайсысы болашақта тараптарды біріктіретінін жобалайды.&nbsp; Бұл кезде медиатор нейтралитет сақтауы қажет. Үшінші қадам кезінде медиатор тараптарға даудың түрлі шешімдерін ұсынады. Ол шешімдер бірнеше және олар альтернативті болуы қажет.
&nbsp;Сонымен медиатор екі жақты творчестволық ізденіске итермелейді. Қорытындыға келгенде екі жақ та шешімге өз еркімен келгеніне көзі жету керек. Төртінші қадамда медиация шешімі дайындалады. Тараптардың қатысуымен медиатор болашақ шешімнің талаптарын оқып береді және оның әр бабын талқылайды. Медиацияның бесінші қадамында медиация шешіміне екі жақ қол қояды. Медияциялық шешім олардың қайсысының да көңілінен шығу керек. Осы орайда медиаторға жүктелетін міндет өте ауыр десе болады. Медиатор шын мәнінде адамдармен тіл табыса алатын психолог әрі сабырлы, байыпты жан болуы тиіс.
Медиацияның мақсаты кінәлілерді іздеу емес, жағдайдан шығуды іздестіру болып табылады.
А.КАЙБАЛДИЕВА
Қызылорда облысының кәмелетке
толмағандардың істері жөніндегі
мамандандырылған ауданаралық
сотының кеңсе меңгерушісі

Мектеп медиациясы да маңызды

<a href="https://kyzylorda-news.kz/">Kyzylorda-news.kz.</a> Бүгін Қазақстанның жүзге жуық тестілеу пунктінде Ұлттық бірыңғай тестілеудің алғашқы кезеңі басталды, деп хабарлайды <a href="https://www.inform.kz/kz/kazakstanda-ulttyk-biryngay-testileu-bastaldy_a3604086">ҚазАқпарат</a>.
2020 жылдың 16-20 қаңтары аралығында 95 мыңнан астам үміткер ҰБТ тапсырады.
Айта кетейік, жоғары оқу орнына ақылы негізде түсу үшін ҰБТ жылына 4 рет өткізіледі (қаңтар, наурыз, маусым және тамыз). Бұл ретте, оқуға түсушілер білім гранты конкурсына қатысу үшін маусым айында өтетін ҰБТ-ны тапсыруы қажет. Жалпы, Ұлттық бірыңғай тестілеуді тапсыру форматы өзгерген жоқ. Бұл норма жоғары білім алуға қолжетімділікті арттыру мақсатында енгізілді.
ҰБТ-ға қатысу үшін құжаттар 2019 жылы 1-15 желтоқсан аралығында бірыңғай ақпараттық жүйе арқылы қабылданды. Нәтижесінде, ҰБТ-ға қатысуға 95 мыңнан астам адам өтініш берді. Оның ішінде 75 520 оқушы тестілеуді қазақ тілінде, 22 744 бала – орыс тілінде және 176 бала ағылшын тілінде тапсырады.
Санаттар бойынша, 90 808 бала – 11 (12) сыныпта оқиды және былтырғы тестілеуден өтпеген, ЖОО-ға шартты түрде қабылданған 2 701 үміткер бар. Одан бөлек, шығармашылық дайындықты талап ететін, өзге білім беру бағдарламасына ауысқысы келетін 1-2-інші курстағы 1 841 студент бар.
ҰБТ-да 820 аудитория пайдаланылады. Барлық аудиториялар ұялы байланыс құралдарының жұмысын бұғаттайтын құралдармен және бейнебақылау камераларымен қамтамасыз етілген. Тыйым салынған заттар табылған үміткер ҰБТ-ға кіргізілмейді және акт арқылы ғимараттан шығарылады.
Өңірлерге ҚР Білім және ғылым министрлігінің 447 өкілі жіберіледі, апелляциялық комиссиялар құрылады, медициналық көмек көрсету бекеттері ұйымдастырылады және тестілеу барысындағы қауіпсіздік қамтамасыз етіледі. Бұдан бөлек, қажет болған жағдайда жеке көмекшілер, сондай-ақ ерекше білім беру қажеттілігі бар балаларға арналған сурдоаудармашылар ұсынылады.
Жергілікті жерлерде ҰБТ ұйымдастыру және өткізу бойынша Мемлекеттік комиссиялар құрылды. Мемлекеттік комиссия құрамына облыстар немесе республикалық маңызы бар қалалар әкімдіктерінің өкілдері, құқық қорғау органдарының, қоғамдық ұйымдардың, бұқаралық ақпарат құралдарының өкілдері кірді.

Қазақстанда Ұлттық бірыңғай тестілеу басталды

<a href="https://kyzylorda-news.kz/">Kyzylorda-news.kz.</a> 2015-2025 жылдарға арналған сыбайлас жемқорлыққа қарсы стратегияның іске асырылуын сыртқы талдау және бағалау жөніндегі арнайы мониторингтік топтың өкілдері екі күннен соң өтетін ҰБТ-ға қатысады.
Бұл туралы Ұлттық тестілеу орталығының басшысы Дидар Смағұлов өзінің Facebook парақшасында хабарлады.&nbsp;
Ұлттық тестілеу орталығының басшысы шынайы әрі әділ емтихан өтеді деп сендірді.
<blockquote>
 «Біз барлық түлектер үшін әлеуметтік мәртебеге, отбасылық қатынастарға және қаржылық жағдайға қарамастан емтихан тапсыру үшін тең және объективті жағдайлар жасаймыз. Бүгін Сыбайлас жемқорлыққа қарсы іс-қимыл агенттігінің қолдауы мен сеніміне ие болдық: арнайы мониторингтік бақылау топтарының мүшелері тәуелсіз бақылаушылар ретінде шақырылады», – деп жазды Дидар Смағұлов.
</blockquote>
2020 жылдың 16 және 20 қаңтар күндер аралығында Қазақстанда ҰБТ өтеді. Бұл университетке ақылы негізде түсуге мүмкіндік береді. Тестілеуге қатысуға 95 мыңнан астам адам өтінім берді.
ҰБТ тапсыру барысында ұялы құрылғылар жұмысы бұғатталатын және бейнебақылау жүйесімен қамтамасыз етілген&nbsp; 820 аудитория пайдаланылады.
<blockquote>
 «Біз кез келген емтихан бөлмесінен онлайн режимінде хабар таратамыз. Сонда кез келген адам емтиханның әділ өтуін бақылай алады. Алдау және басқа да ережелерді бұзу фактілері туралы Digital agent қосымшасы арқылы он-лайн режимінде хабарлауға болады: біз жедел жауап беруге кепілдік береміз», – деді Ұлттық тестілеу орталығының директоры.
</blockquote>

Қазақстан және Қызылорда облысының жаңалықтары: Білім