<a href="https://kyzylorda-news.kz/">Kyzylorda-news.kz.</a> Аккредиттеу және рейтингтің тәуелсіз агенттігі (АРТА) өткізген 2020 жылдағы ЖОО-ң сұранысқа иелігі Ұлттық рейтингінің қорытындылары бойынша Қазақстанның үздік ЖОО-ы анықталды. Осы рейтингке қатысқан еліміздің 89 ЖОО ішінде Қорқыт Ата атындағы Қызылорда мемлекеттік университеті ҚР ЖОО-ның Бас рейтингісінің Үздік-10 құрамына енді.
Университеттің он үш білім беру бағдарламалары үздік үштікке енді, оның ішінде: Бакалавриат: Білім беру бағдарламаларының тобы В025-Дәстүрлі музыкалық өнер– 3 орын;
Білім беру бағдарламаларының тобы В028 – Хореография – 2 орын;
Білім беру бағдарламаларының тобы В051 – Қоршаған орта – 2 орын;
Білім беру бағдарламаларының тобы В082 – Су қорлары және суды пайдалану – 2 орын;
Білім беру бағдарламаларының тобы В183 –Агроинженерия – 3 орын.
Магистратура: Білім беру бағдарламаларының тобы М007 – Көркем еңбек, графика және жобалау педагогтарын дайындау – 1 орын;
Білім беру бағдарламаларының тобы М016 – Тарих педагогтарын дайындау – 3 орын;
Білім беру бағдарламаларының тобы М017 – Қазақ тілі және әдебиеті педагогтарын дайындау – 3 орын;
Білім беру бағдарламаларының тобы М1237 – Су қорлары және суды пайдалану– 1 орын.
PhD докторантура: Білім беру бағдарламаларының тобы D014 – Биология педагогтарын дайындау – 3 орын;
Білім беру бағдарламаларының тобы D017 – Қазақ тілі және әдебиеті педагогтарын дайындау – 3 орын;
Білім беру бағдарламаларының тобы D125 – Құрылыс материалдары, бұйымдары мен құрастырмалары өндірісі– 3 орын;
Білім беру бағдарламаларының тобы D137 – Су қорлары және суды пайдалану –2 орын.

Қорқыт ата атындағы ҚМУ-дың білім беру бағдарламалары үздік үштікте

<a href="https://kyzylorda-news.kz/">Kyzylorda-news.kz.</a> Диссертацияны қорғау кезіндегі жарияланымдарға қойылатын талаптар қайта қарастырылды. Бұл туралы бүгін өзінің <a href="https://m.facebook.com/story.php?story_fbid=10216259067525609&id=1120704037">Facebook</a> парақшасында ҚР Білім және ғылым министрі Асхат Аймағамбетов жазды.
<blockquote>
 «ҚР Білім және ғылым министрлігінің тиісті бұйрығы ҚР Әділет министрлігінде тіркелді. Бұған дейін докторант қорғау кезеңіне дейін жету үшін 7 мақала жариялауы тиіс болатын. Бұл көрсеткішке қол жеткізу үшін докторанттар сапасы күмән тудыратын журналдарда жарияланымдар жасауға мәжбүр болды. Біздің ғалымдардың мақалалары халықаралық базалардан алынып тасталған, түкке тұрмайтын журналдарда жарияланған кездер де болды. Осыған байланысты біз бұл тәжірибені өзгерту жөнінде шешім қабылдадық»,-деді Білім және ғылым министрі.
</blockquote>
Оның сөзінше, енді сапасы төмен журналдарда 7 мақаланың орнына, жоғары квартильге кіретін басылымдарда мақалалар жарияланса жеткілікті. Ал бірінші квартиль құрамына кіретін журналдарда бір ғылыми мақала шыққан болса, өзге жарияланымдар талап етілмейді. Бұл шара сапасыз жарияланымдардың санын азайтып, жүктемені жеңілдетеді және ғалымдарды дәйексөздері таралу бойынша жоғары деңгейдегі оригиналды ғылыми мақалалар жазуға ынталандырады.

Асхат Аймағамбетов: Диссертацияға қажет жарияланымдарға қойылатын талаптар өзгерді

<a href="https://kyzylorda-news.kz/">Kyzylorda-news.kz.</a> Нарық қажеттілігін ескеріп, мамандық таңдау маңызды. Осы себепті Қызылорда облыстық білім басқармасының ұйымдастырумен мектеп бітіруші 9-11 сынып түлектерге арналған кәсіби бағдар беруге арналған вебинар өткізілді.
Вебинардың мақсаты – мектеп бітіруші түлектерге өңіріміздегі техникалық және кәсіптік білім беру оқу орындарындағы қазіргі таңдағы даярланып жатқан мамандықтар туралы ақпарат беру.
И.Әбдікәрімов атындағы Қызылорда аграрлық техникалық жоғары колледжінің мамандары оқушыларға колледж базасындағы мамандықтармен таныстырып, құжат тапсыру жолдарымен, жатақанаға орналасу, әлеуметік көмектер турасында ой бөлісті.
<img src="https://kyzylorda-news.kz/wp-content/uploads/2020/05/fb_img_1589533761591.jpg" alt="" />
Онлайн вебинарға аудан, қала, ауыл мектеп директорларының бейінді оқыту жөніндегі орынбасарлары, мектеп бітіруші 9,11 сынып түлектері және бітіруші түлектердің ата-аналары қатысты.
<img src="https://kyzylorda-news.kz/wp-content/uploads/2020/05/fb_img_1589533759068.jpg" alt="" />
Оқушылардың сауалдарына жауап беріліп, мамандықтардың ерекшеліктері айтылды.

Қызылордалық оқушыларға мамандық таңдауға бағыт берілді

<a href="https://kyzylorda-news.kz/">Kyzylorda-news.kz.</a> Білім және ғылым министрі Асхат Аймағамбетов білім берудің мектептегі қалыпты форматын қайтаруды сұраған ата-аналардың петициясына жауап берді.
<blockquote>
 «Дәстүрлі іштей оқитын мектеп қайтарылсын» деген петицияны оқыдым. Қазақстанда келешектегі оқыту форматына алаңдап отырған ата-аналардың бәріне айтатыным, қашықтан оқыту – әлемдік Covid-19 пандемиясына байланысты бәріміздің қауіпсіздігіміз үшін қолданылған мәжбүрлі шара. Біздің алдымызда нақты міндет тұрды – оқушылар мен білім қызметкерлерінің денсаулығын сақтау, сонымен бірге оқыту процесін үзбеу. ЮНЕСКО мәліметіне сәйкес, бүкіл әлемде 1,5 млрд оқушы қашықтан оқытуға мүмкіндік беретін технологиялармен білім алуда. Біз оқу үрдісін жалғастыру үшін қолдағы бар мүмкіндікті пайдаландық. Кейбір жағдайдың кездескені болмаса жалпы үрдіс ұйымдастырылды деп есептеймін», – деп жазды Асхат Аймағамбетов Facebook -тегі парақшасында.
</blockquote>
Министрдің айтуынша, әйтсе де қазіргі таңда білім берудің ең тиімді құралы – дәстүрлі түрде мектепте білім алу екені анық.
<blockquote>
 «Ешкім де дәстүрлі іштей білім беру формасын алып тастаған жоқ. Қашықтан оқыту – мәжбүрлі шара болды. Әлбетте алда да мұндай жағдайлармен бетпе-бет келген кезде байқау керек. Сол себепті Мемлекет басшысының тапсырмасымен біз тиісті жұмыстарды ұйымдастырудамыз. Қашықтан оқытудың технологияларын дамытып, мектептерді ақпараттандыру жұмысын жүргізу керек. Мәселен ауа райының бұзылуына байланысты оқушылардың оқудан қалуға мәжбүр болатын жағдайын алып қарастырайық немесе кейде бала үйінде оқуға мәжбүр болады. Іштей оқыту форматы бүгінгі таңда ең тиімді шешім екенін бәріміз түсініп отырмыз. Келесі оқу жылы мектеп қабырғасынан басталар деген үміттеміз», – дейді ол.
</blockquote>

Асхат Аймағамбетов: «Ешкім дәстүрлі іштей білім беру формасын алып тастаған жоқ»

<a href="https://kyzylorda-news.kz/">Kyzylorda-news.kz.</a> Аймағымызда жалпыұлттық «BIRGEMIZ: BILIM» жобасын жүзеге асыру мақсатында «Nur Otan» партиясы Қызылорда облыстық филиалы жанындағы «Jas Otan» Жастар қанаты «Сана» зияткер жастар мектебі» қоғамдық қорымен меморандумға отырды.
​«BIRGEMIZ: BILIM» жобасының мақсаты – өңіріміздегі ауылдық орта білім беру мекемелерінің жоғары сынып оқушыларына (8-11 сынып) қосымша дайындық сабақтарын ұйымдастыру болып табылады.
Жобаға волонтерлар, қоғамдық ұйымдарының белсенділері, білікті мамандар, кәсіби мұғалімдер және студенттер қатыса алады.
​Жоба аясында ҰБТ-ге арналған дайындық сабақтары, олимпиядаларға және ғылыми-интеллектуалды байқауларға қатысуға арналған қосымша сабақтар, компьтерлік сауаттылық бойынша қосымша сабақтар, құқықтық сауаттылық және ағылшын тілін үйрету бойынша дайындық сабақтары жүргізіледі.
​Қосымша ақпаратты «BIRGEMIZ: BILIM» жобасының орталығы – «Сана» зияткер жастар мектебі» қоғамдық қорынан білесіздер
Байланыс телефоны: +7 747 486 03 04.
<img src="https://kyzylorda-news.kz/wp-content/uploads/2020/05/02-23.jpg" alt="" />

Қызылордада жоғары сынып оқушыларына тегін қосымша сабақтар ұйымдастырылмақ

<a href="https://kyzylorda-news.kz/">Kyzylorda-news.kz.</a> Дене шынықтыру мұғалімдері сабақтан тыс спорт сабақтарын жүргізгені үшін базалық лауазымдық жалақыдан 100 пайыз мөлшерінде қосымша ақы алуы мүмкін. Бұл туралы ҚР Мәдениет және спорт министрі Ақтоты Райымқұлова мәлім етті, деп хабарлайды <a href="https://lenta.inform.kz/kz/kazakstanda-dene-shynyktyru-mugalimderine-kosymsha-aky-tolenui-mumkin_a3649664">ҚазАқпарат.</a>
<blockquote>
 «Мемлекет басшысының 2019 жылғы Қазақстан халқына Жолдауын іске асыру бойынша Жалпыұлттық іс-шаралар жоспарының 64-тармағын орындау аясында Дене шынықтыру және бұқаралық спортты дамыту жөніндегі 2020-2025 жылға арналған кешенді жоспары әзірленді. Бұл жоспарда мүдделі мемлекеттік органдардың, жергілікті атқарушы органдардың ұсыныстары толық ескерілiп, ҚР Премьер-Министрімен бекітілді. 2016 жылы Елбасы Нұрсұлтан Әбішұлы Назарбаев өзiнiң Жарлығымен халықты дене шынықтыру және спортпен жүйелі түрде шұғылдануға тарту деңгейін 35%-ға дейін арттыруды тапсырған болатын. Бұл кешенді жоспар осы көрсеткішке қол жеткізуді және халықтың дене шынықтыру мен спортпен айналысуы арқылы салауатты өмір салтына ұмтылысын қалыптастыруды көздейді», – деді министр Орталық коммуникациялар қызметіндегі онлайн баспасөз мәслихатында.
</blockquote>
Бұл тұрғыда халықтың барлық жас санаттары арасында дене шынықтыру мен бұқаралық спортты дамытуды және балалар үшін спорттық инфрақұрылымға барынша қол жеткізу жөніндегі шаралар қамтылған. Кешенді жоспар 34 тармақ пен 5 негізгі бағыттан тұрады: нормативтік-құқықтық қамтамасыз ету, мектеп және студенттік спорт, спорт желілерін кеңейту, салауатты өмір салтын насихаттау және кеңінен тарату, спорттық-бұқаралық іс-шаралары.
Бұқаралық спортты дамыту, сондай-ақ дене шынықтырумен және спортпен шұғылданатындардың санын арттыру мақсатында кешенді жоспарда негізгі бағыттар бойынша Қазақстан Республикасының 8 заңнамалық актісіне 33 түзету енгізе отырып, бұқаралық спорт жөніндегі заң жобасы Парламент Мәжілісіне енгізілді.
<blockquote>
 «Заң жобасына дене шынықтыру мұғалімдеріне сабақтан тыс спорт сабақтарын жүргізгені үшін базалық лауазымдық жалақыдан 100 пайыз мөлшерінде қосымша ақы енгізіліп отыр. Сондай-ақ, заң жобасында ұлттық спорт түрлерін дамыту бойынша шаралар көзделген. Білім берудің барлық деңгейлерінде дене тәрбиесі бойынша сабақтарда дене шынықтыру және спорт саласындағы уәкілетті орган бекіткен тізбеге сәйкес, ұлттық спорт түрлері бойынша міндетті компонент көзделіп отыр», – деді Ақтоты Райымқұлова.
</blockquote>

Қазақстанда дене шынықтыру мұғалімдеріне қосымша ақы төленуі мүмкін

<a href="https://kyzylorda-news.kz/">Kyzylorda-news.kz.</a> Балабақшаларға, мектептерге, колледждерге және жоғары оқу орындарына қабылдау үшін құжат тапсыру жеңілдетілді. Бұл туралы ҚР Білім және ғылым министрі Асхат Аймағамбетов <a href="https://www.facebook.com/story.php?story_fbid=10216229011574229&id=1120704037">Facebook-</a>тегі парақшасына жариялады.
<blockquote>
 «Еліміздегі мемлекеттік қызметтің басым бөлігі білім беру саласында көрсетіледі. Әсіресе, балабақшаларға, мектептерге, колледждерге және жоғары оқу орындарына қабылдау қызметі – үлкен сұранысқа ие.
 Білім беру ұйымдарына құжат тапсыру үшін біраз уақыт жұмсау қажет болатын. Ол үшін көптеген анықтамаларды жинап, басқа мемлекеттік органдардан құжаттарды алып, оларды апарып беру сынды бірқатар кезеңдерден өту қажет еді. Мұндай процесс өте ыңғайсыз екені түсінікті.
 Біз бұл жағдайды өзгертіп жатырмыз», деп жазды Асхат Аймағамбетов&nbsp;<a href="https://www.facebook.com/story.php?story_fbid=10216229011574229&id=1120704037">Facebook</a>-тегі парақшасында.
</blockquote>
Министрдің айтуынша, балабақшаларға, мектептерге, колледждер мен жоғары оқу орындарына қабылдау процесін автоматтандыру, қағазбастылық деңгейін күрт төмендету, жалпы қабылдау талаптарын жеңілдету жұмыстары қолға алынған.
Мектепке дейінгі білім беру ұйымдары бойынша
Биыл біз балаларды балабақшаларға қабылдау ережелеріне өзгерістер енгіздік. Енді ата-аналар кезекке қою қызметін тек білім беру бөлімінің кеңсесі арқылы ғана емес, сондай-ақ өз бетімен «Азаматтарға арналған үкімет» бөлімдері немесе «Электрондық үкімет» веб-порталы арқылы жүзеге асыра алады. Бұл ретте көптеген құжаттарды жан-жақтан жинау қажет болмайды.
Алғаш рет балабақшаларға кезекте тіркелгендер арасында басымдық ең алдымен педагогтердің балаларына және мүгедек баласы бар отбасылардың бүлдіршіндеріне беріледі.
Егіз балалары, үшемдері бар отбасылар балаларын бір балабақшаға беру бойынша қиындықтарға тап болатын. Енді мұндай ата-аналардың бір баласына белгілі бір балабақшадан орын тиген жағдайда, барлық балалары да (егер тағы орын болcа) сол балабақшаға жолдама алады.
Сонымен қатар, мектепке дейінгі ұйымдардағы бос орындарды бөлу процесі жүйеге келтірілді. Егер бұған дейін арнайы санаттағы балалар қабылданғаннан кейін, үш күн өткен соң, кезекте тұрғандардың барлығына бірдей жаңа орындарды алу мүмкіндігі ашылса (мұндайда кезектің мәні жойылатын), енді орындар кезекте тұрған келесі бірінші 1 000 (бір мың) өтініш берушіге ашылатын болады.
Мектепке қабылдау бойынша
Келесі жылдан бастап бірінші сынып оқушыларының құжаттарын қабылдау маусымнан бастап емес, одан ертерек – бірінші сәуір мен бірінші тамыз аралығына дейін жалғасады.
Мұндай өзгерістер не үшін қажет? Біріншіден, бұл – ата-аналар үшін ыңғайлы. Олар мектепті алдын-ала анықтап, оқуға түсу үшін қажетті құжаттарын мектеп ұжымы немесе өздері еңбек демалысында болған уақытта емес, одан ертерек тапсыра алады.
Сонымен қатар, жаз бойы ата-аналар қажетті оқу құралдарын жинақтап, тиісті жұмыстарды жүргізіп, балаларын мектепке дайындауы керек. Ата-аналар құжаттарды жинауға, мектепті анықтауға үлгермейтіндерін айтып шағымданатын, сондықтан құжаттарды өткізу процесі көбінесе 31 тамызға дейін, кей жерлерде тіпті қыркүйектің ортасына дейін созылатын.
Мектеп әкімшілігінің көзқарасы бойынша, бұл өзгерістер процестерді оңайлатады және мектеп қызметін жоспарлауды әлдеқайда ыңғайлы етеді. Яғни, мектеп басшылығы сыныптарды алдын-ала толтыра алады, оқулықтардың қажетті санымен алдын ала қамтамасыз етіледі және оларды уақытында жеткізеді, сағаттарды бөледі, сыныптардың санына байланысты педагогтерді қабылдай алады. Жалпы, оқу жылының басталуына тиімді дайындалуға мүмкіндік туады.
Енді ата-аналар балаларының мектепке баруын алдын ала жоспарлап, нақты білім беру ұйымын анықтауы қажет және керек құжаттарды уақытында тапсыруды, жіберуді үйренуі маңызды.
Естеріңізге сала кетсем, енді осы үдерістердің барлығы толығымен автоматтандырылады және «Электрондық үкімет» арқылы қолжетімді болады. Жай ғана үйде отырып, уақыт пен басқа да ресурстарды шығындамай-ақ портал арқылы 1-сыныпқа қабылдау туралы өтініш беруге болады.
Оқушыларды бір мектептен екіншісіне ауыстыру да жаңа форматта жүргізіледі, ол процесс те автоматтандырылады.
Яғни, ата-аналарға бір мектептен екінші мектепке барудың қажеті болмайды және қағаз түрінде құжаттарды тапсырудың, ескі мектептен кету түбіртегін, одан кейін келу түбіртегін ресімдеудің қажеті жоқ. Мұндай ескірген, уақыт және қаржы шығынын талап ететін рәсімдеу процесімен көбісі «кезікті» деп ойлаймын. Бұл өзгерістер ата-аналар мен мектеп үшін уақытты үнемдеуге мүмкіндік береді. Біз бұл жұмысты жақын арада аяқтаймыз.
Айта кетерлігі, биылдан бастап колледждер мен жоғары оқу орындарына қабылдау автоматтандырылған режимде қолжетімді.
Өткен жылы мен ата-аналарға аталған жұмыс 2020 жылы аяқталады деп уәде бергенмін.
Енді балаларға құжаттарды қағаз түрінде тапсырудың қажеті жоқ, әрбір болашақ студент өзі үшін таңдаған колледждің және ЖОО-ның сайттары немесе «Электрондық үкімет» порталы арқылы құжаттарын тапсыра алады. Құжат тігетін папкаларды, конверттерді сатып алу, қағаз анықтамаларды тапсыру, таң атпастан жоғары оқу орындары мен колледждердің қабылдау комиссияларында кезекте тұру немесе басқа елді мекенге барудың қажеті жоқ. Мұның бәрі енді оңай және ыңғайлы болады, сайтқа кіріп, бір тетікті басу арқылы барлық құжаттарды жіберуге болады.
Жалпы мемлекеттік қызметтер бойынша біз бизнес-процестерді, рәсімдерді барынша автоматтандырып жатырмыз. Бұл процестер халыққа барынша ыңғайлы болуы қажет.

Білім беру ұйымдарына қабылдауға құжат тапсыру жеңілдетілді

Kyzylorda-news.kz. Білім және ғылым министрі Асхат Аймағанбетов педагогтердің шамадан тыс есеп беру мәселесін түбегейлі шешетін бұйрықтың маңыздылығы туралы айтты.
<blockquote>
 «Мен 2020 жылғы 6 сәуірде қол қойған № 130 бұйрықта орта, техникалық және кәсіптік білім беру ұйымдарының мұғалімдері толтыруға міндетті құжаттардың нақты тізімі көрсетілген. Бұл құжаттың маңыздылығы неде? Бұдан былай мұғалімдерді шамадан тыс есеп беруден арылтатын заң жүзіндегі негіз пайда болды. Енді Министрлік бекіткен нақты тізім бар. «Педагог мәртебесі туралы» Заңға және Әкімшілік кодекске сәйкес, мұғалімдерден бекітілген тізімнен өзге құжаттар бойынша артық есепті талап еткендерді арнайы орган айыппұл түріндегі әкімшілік жауапқа тартуға болады», – деп жазды министр өзінің әлеуметтік желідегі <a href="https://m.facebook.com/story.php?story_fbid=10216203621059482&id=1120704037">парақшасында</a>.
</blockquote>
Сондай-ақ, министр аталған құжатты егжей-тегжейлі түсіндірді.
<blockquote>
 «Енді пән мұғалімі күнделікті екі құжатты толтырады. Біріншісі – сынып журналы, екіншісі – сабақ жоспары. Сондай-ақ оқу жылының басында күнтізбелік-тақырыптық жоспарды дайындайды және әр тоқсан соңында критериалдық бағалау бойынша құжаттарды толтырады. Қалған құжаттың еш қажеті жоқ.
 Егер мұғалім жас педагогтің тәлімгері болып, сол үшін 17 мың теңгеге жуық үстемеақы алатын болса, онда жас әріптесімен бірлесіп атқарған жұмысы бойынша әдістемелік құжат толтырады. Егер мұғалім сынып жетекшісі болса, онда оқу жылының басында тәрбие жұмысының жоспарын жасайды, өткізілген ата-аналар жиналысы бойынша электрондық форматта хаттама толтырады, оқушылардың табельдерін толтырады және қажеттілігіне қарай олардың жеке істерін жаңартып отырады.
 Мектеп басшысы мен басшының орынбасарлары толтыратын маңызды құжаттардың да нақты тізімі белгіленді, артық құжаттың еш қажеті жоқ.
 Колледж педагогтері толтыратын құжаттар тізімі де бекітілді. Олар жылдың басында жұмыс істеуге арналған оқу бағдарламасын құрып, күнтізбелік-тақырыптық жоспар жасайды, ал күн сайын сабақ жоспарын әзірлейді, теориялық, өндірістік оқыту және жеке сабақтарды есепке алу журналдарын толтырады. Егер педагог куратордың қызметін атқарса, тағы бір құжат қосылады. Шамадан тыс есеп беру көрсеткішін түбегейлі азайтуға қатысты нақты жұмыстар мектепке дейінгі және жоғары білім беру деңгейлері бойынша да жүргізіліп жатыр. Жоғары оқу орындарының оқытушылары да қажетсіз қағаз жүктемесінен арылады. Қазіргі уақытта БҒМ тарапынан нормативтік құжаттарда көрсетілген бақылаудың жүргізілуіне қатысты толтырылатын құжаттар тізімі қайта қаралып жатыр. Басым бөлігін алып тастау туралы шешім қабылданды. Мәселен, кафедраның жұмыс жоспары, комиссияның хаттамасы, қызметтік оқу жоспары сынды құжаттар бізге қажет емес. Бұл ретте мұғалімдерге артылған артық жүктемені азайту бойынша жағдай жасап қана қоймай, педагогтерден жоғары кәсіби біліктілікті және сапалы білім беруді талап ететін боламыз. Қоғамда білім беру сапасының неге ақсап тұрғанын түсіндіру үшін, педагогтердің шамадан тыс есеп беретіні, олардың өзіне тән емес жұмыстарға тартылуы, оқу бағдарламалары мен оқулықтардағы олқылықтар туралы және тағы сол сияқты мәселелер айтылады.
 Бірақ бұл проблеманың барлығы шешіліп жатыр және бұдан былай да шешімін таба береді. Дегенмен, білім сапасы, ең алдымен, мұғалімдердің біліктілігіне тікелей байланысты. Сол себепті, педагог үнемі өзін-өзі жетілдіріп, кәсіби деңгейін арттырып отыруы керек», – деді министр.
</blockquote>

Асхат Аймағамбетов: Мұғалім күнделікті екі құжатты толтырады

<a href="https://kyzylorda-news.kz/">Kyzylorda-news.kz.</a> Назарбаев Зияткерлік мектептерінің білім алушылары арасында алғаш рет өткізілген «Біз біргеміз» қашықтан би фестивалінде қызылордалық зияткерлер 2 жүлделі орындарды иеленді.
60-қа жуық талантты жастардың басын қосқан байқау халық билері, қазіргі заман хореографиясы, спорттық балдық би, хип-хоп және k-pop бағыттары бойынша өткізілді. Алғашқы жанрда Қызылордадағы мектептің 11-сынып оқушысы Елжан Жарылқасын және 12-сынып оқушылары Гүлмарал Кеңесбек пен Жансая Серікбай өз өнерлерін көрсетсе, қазіргі заман билері бағытында 11-сынып оқушылары Мерей Исатай мен Назым Қуандық және 10-сынып оқушысы Баян Сарибаева бақтарын сынады.
Жансая мен Баян байқаудың ақтық кезеңіне жолдама алып, қорытындысы бойынша бірінші ару І орынды, ал екінші оқушы жүлделі ІІІ орынды иеленді. Сондай-ақ, фестиваль барысында би қойылымының креативті мазмұнымен ерекшеленген Мерей Исатай «Үздік қойылым» номинациясымен марапатталды.
Айта кету керек, І онлайн би фестивалін Шымкент қаласындағы физика-математика бағытындағы Назарбаев Зияткерлік мектебі ұйымдастырып, алдағы уақытта дәстүрлі түрде өткізуді жоспарлап отыр.
<img src="https://kyzylorda-news.kz/wp-content/uploads/2020/05/02-13.jpg" alt="" />
<img src="https://kyzylorda-news.kz/wp-content/uploads/2020/05/03-9.jpg" alt="" />
<img src="https://kyzylorda-news.kz/wp-content/uploads/2020/05/kashyktan-bi-konkwrsy-1.png" alt="" />

Қызылордалық оқушылар қашықтан би фестивалінде жеңімпаз атанды

<a href="https://kyzylorda-news.kz/">Kyzylorda-news.kz.</a> ҚР БҒМ жоғары және жоғары оқу орнынан кейінгі білім департаментінің басшысы биылғы жылы ҰБТ қалай өтетіндігін айтып берді. Әділет Тойбаев биыл коронавирустық пандемияға байланысты ҰБТ тапсыру үшін құжаттар онлайн режимінде қабылданады деп мәлімдеді.
Сонымен қатар, талапкерлердің тестілеу кезіндегі жауапкершілігі күшейтілді. Егер өтініш берген оқушының орнына өзге адам тест тапсырғаны белгілі болса, онда бұл оқушы жыл бойы ҰБТ-ға жіберілмейді.
Міндетті мониторинг болатындығы туралы да хабарланды. Егер заң бұзушылықтар анықталса, онда ҰБТ нәтижесі жойылады.
Жалпы, осы уақытқа дейін 82 мың адам ҰБТ-ға құжаттар тапсырды. Олардың 17 мыңы интернет болмағандықтан&nbsp;дәстүрлі түрде тапсырды.
Интернетке кіре алмағандар өтініштерді дәстүрлі түрде бере алады. Оның айтуынша, тестілеу форматы өзгермейді. Білімдер бірдей негізгі және қажетті пәндер бойынша және сол шкала бойынша бағаланады.
Тек жоғары оқу орындарына түсу тәртібі өзгерді. Сонымен, егер талапкер шекті балл жинамаса, онда ол бірінші сессия аяқталғанға дейін ақылы бөлімге түсуге құқылы. Осыдан кейін студент бір жыл ішінде тестті қайта тапсыра алады.
Тағы бір өзгеріс сертификатқа&nbsp;қатысты болмақ – маусымдық тест нәтижелері бойынша олар қағаз куәлігін бұрынғыдай емес, электронды сертификатпен шығарады.

Шекті балл жинамаса да ақылы бөлімге түсе алады: Жоғары оқу орындарына түсу тәртібі өзгерді

<a href="https://kyzylorda-news.kz/">Kyzylorda-news.kz.</a> Қызылорда облысының Білім саласында сапаны қамтамасыз ету департаменті 2020 жылдың бірінші жартыжылдығында жүргізілген бақылаудың қорытындысын жариялады.
<blockquote>
 «2020 жылғы бірінші жартыжылдығына арналған білім беру жүйесіне бару арқылы профилактикалық бақылау жүргізудің тізімдері» туралы Қазақстан Республикасы Білім және ғылым министрінің 2019 жылғы 09 желтоқсандағы №528 бұйрығымен Қызылорда облысының Білім саласында сапаны қамтамасыз ету департаментімен 2020 жылғы бірінші жартыжылдығында 11 білім беру ұйымдарына бару арқылы профилактикалық бақылау жүргізді», – деп хабарлады біздің ақпарат агенттігіне аталған департаменттен.
</blockquote>
Атап айтқанда, департамент Қызылорда қаласында 4, Арал, Қазалы, Қармақшы, Жалағаш, Сырдария, Шиелі, Жаңақорған аудандарында 6 орта және негізгі білім беру мекемелері мен 1 мектепке дейінгі білім беру ұйымына бару арқылы профилактикалық бақылау жасаған.
<blockquote>
 «Профилактикалық бақылау нәтижелерімен тізімдегі білім беру ұйымдарында білім беру саласындағы нормативтік-құқықтық актілері талаптарының 75 бұзушылық анықталды. Атап айтқанда, білім беру процесі сапасына әсер ететін біліктілік талаптарының сақталмауы бойынша – 16, білім беру процестерін жүргізу үшін жағдайлардың жасалмауы бойынша – 30, оқу-тәрбие процестерін ұйымдастыруының өз деңгейінде жүргізілмеуі бойынша – 29. Білім беру ұйымына бару арқылы профилактикалық бақылау қорытындысымен тиісті білім беру мекемелеріне бұзушылықтарды жою жөнінде нұсқама берілді», – деп мәлімдеді департаменттегі мамандар.
</blockquote>
Профилактикалық бақылаудың нәтижесі бойынша берілген нұсқамалардың тиісті білім беру мекемелерінің орындауы туралы мәлімет жергілікті атқарушы органдардың назарына ұсынылды.
Сонымен қатар, 2020 жылдың екінші жартыжылдығында профилактикалық бақылаудан өткізуге 24 оқу орны жоспарланған.

Қызылордадағы мектептерде бірінші жартыжылдықта 75 заң бұзушылық анықталған

<a href="https://kyzylorda-news.kz/">Kyzylorda-news.kz.</a> Қашықтан оқыту жағдайында оқушылар бөлімдік жиынтық бағалау (БЖБ), тоқсандық жиынтық бағалау (ТЖБ) тапсырады. Қызылорда облыстық білім басқармасы оқушылар мен ата-аналар білуі тиіс талаптарды ұсынды.
БЖБ және ТЖБ өтілген оқу сабақтары негізінде әзірленеді. Яғни оқу материалынан тыс сұрақтар болмайды.
Әрбір педагог тапсырманы өзі құрастырып, бағалаудың өлшемшартын өзі әзірлейді.
БЖБ және ТЖБ 1-4 сынып үшін 2 тапсырмадан артық болмауы керек, ал 5-10 сыныптар үшін 5 тапсырмадан артық болмайды.
БЖБ және ТЖБ тапсырмалары оқушыларға электронды ресурстар арқылы жіберіледі 
(эл/почта, электронды күнделік, 
whats app желілері)
БЖБ тапсыруға 20 минут, ТЖБ тапсыруға 40 минут беріледі. Ал, 1-4 сынып оқушыларына уақыт шектеуі жоқ.
Аптасына 2 және одан көп сағатты құрайтын пәндер үшін БЖБ 4-11 мамыр аралығында өтеді.
Аптасына бір сағатты құрайтын пәндер үшін БЖБ 11-15 мамырда өтеді.
1-10 сыныптардағы ТЖБ, 11 сыныптағы бақылау жұмысы 18-22 мамыр кезеңінде өтеді.
Бір күнде оқушылардан 3 жиынтық жұмысы ғана алынады.
Интернетке мүмкіндігі жоқ елді мекендерде тапсырмалар қағаз түрінде санитарлық талаптар сақтала отырып оқушылардың үйлеріне жеткізіледі.
ЕСКЕРУ КЕРЕК: Ата-аналар, оқушылар БЖБ және ТЖБ-ға арналған кестелер әр мектептің фейсбук парақшасына орналасады. Сонымен бірге whats app желісі арқылы әр педагог әр сыныпқа жеке жолдайды.

Қазақстан және Қызылорда облысының жаңалықтары: Білім