Kyzylorda-news.kz. Тұңғыш рет Қызылордада ерекше форматта мектеп директорларының саммиті өткізілді. Бұл лиганың оқу жылындағы қорытынды жиыны.
Саммитке облыстық білім басқармасының басшысы Ақзира Қасымова, қалалық білім бөлімінің басшысы Динара Баймұрзаева және бірқатар мектеп директорлары жиналды.
“re-Start: Жаңа әлемдегі жаңа мен” атауында өткен директорлар саммитінде білім беру ұйымының басшылары өзекті тақырыптарға негізделген мәселелерді пікір алмасу форматында талқылады.
Шарада білім орнының басшылары қызықты тақырып аясында ой бөлісті. Мәселен, 176 мектеп директоры Қадыркүл Шаймағанбетова “Директордың 10 қателігі” тақырыбын арқау етіп алып, ортаға жиналған директорларға төте сауал қойып, пікір алмасты. Ал, 3 ІТ лицей директоры Ләззат Әбенова “Директордың өзіндік дамуындағы жылдық жоспар модулі” тақырыбын ашып берді. Жеке және жылдық жоспарды құрудың жолдарын тарқатты. Сондай-ақ, 43 мектеп директоры Бақытжан Иманбердиева “Көшбасшыдағы эмоциональды интеллект” бағытында ой өрбітті. Арнайы бейнесюжет арқылы директорларға тығырықтан шығар жолды нұсқап, тосыннан сұрақтар қойды. Ал, облыстағы ең жас мектеп директоры 164 мектеп директоры Жанболат Ахметжанов “Педагогпен диалог” тақырыбында қызу пікірталас ұйымдастырды.
Жиында Ақзира Бақтыбайқызы директорлардың бәсеке ағынына қарсы төтеп беру, өзіндік даму, ата-анамен байланыс туралы ойымен бөлісті.
<blockquote>
 “Бүгін директорлардың еркін пікір алмасуы алаңын көргендей болдым. Шын мәнінде қазіргі заман талабы директорларға кабинеттік басқару жүйесінен алыстайтын уақыт жеткенін айқындап отыр. Өз мектебіндегі мұғаліммен жақсы қарым-қатынас орната алмаған директор басқарушылық сатыда көрінбеуі мүмкін. Оқушылармен, ата-аналармен жұмысты жүйелі жолға қойған директордың әрбір жұмысы сондай өлшемшарттармен бағаланады. Әрине, бірінші кезекке мазмұн, сапаны қоюларыңыз қажет. Білім беру стандартын меңгерту үшін директор жан-жақты жұмысты үйлестіруі қажет. Жаңа білімді игеру, педагогтардың жағдайына кіру, ата-аналардың тілін табу ең маңызды керек қасиет. Бұл ретте алдағы оқу жылын табысты бастайсыздар деп сенемін”, – деді Ақзира Бақтыбайқызы.
</blockquote>
Ой алаңында барлық директорлар өзіндік пікірін айтып, көзқарастарын білдірді. Ішкі анализ, сыни ойлау сынды мәселелерде қамтылды.
Саммит соңында қалалық білім бөлімінің басшысы Динара Баймұрзаева лига аясындағы жұмыстардың барлығы директорлардың өзіндік дамуына жол ашқанын атап өтті.
Алдағы уақытта лигалықтардың құрамы жаңа директорлармен толығады.
<img src="https://kyzylorda-news.kz/wp-content/uploads/2021/06/fb_img_1624085455442.jpg" alt="" />
<img src="https://kyzylorda-news.kz/wp-content/uploads/2021/06/fb_img_1624085461133.jpg" alt="" />
<img src="https://kyzylorda-news.kz/wp-content/uploads/2021/06/fb_img_1624085458357.jpg" alt="" />
<img src="https://kyzylorda-news.kz/wp-content/uploads/2021/06/fb_img_1624085492649.jpg" alt="" />
<img src="https://kyzylorda-news.kz/wp-content/uploads/2021/06/fb_img_1624085466977.jpg" alt="" />
<img src="https://kyzylorda-news.kz/wp-content/uploads/2021/06/fb_img_1624085536922.jpg" alt="" />
<img src="https://kyzylorda-news.kz/wp-content/uploads/2021/06/fb_img_1624085554977.jpg" alt="" />

Қызылордада &#8220;Серіктес директорлар&#8221; лигасы саммит өткізді

<a href="https://kyzylorda-news.kz/">Kyzylorda-news.kz</a>. Қазақстанда “Алтын белгі” иегерлерінің саны рекордтық көрсеткішке жетті. 2020-2021 оқу жылының қорытындысы бойынша он мыңға жуық түлек “Алтын белгі” иегері атанды, деп хабарлады білім және ғылым министрлігінің баспасөз қызметі.
Биыл мектеп бітірушілердің арасында 9 738 түлек “Алтын белгі” алды. Бұл түлектердің жалпы санының 6,2%-ін құрайды. Олардың басым бөлігі мұғалім мамандығын таңдап отыр.
Үздік түлек атанғандар саны бойынша Түркістан облысы бірінші орында тұр. Мұнда 1 856 түлек “Алтын белгі” иегері атанды. Содан кейін Алматы (1 432 түлек) және Шығыс Қазақстан (738 түлек) облыстары тұр.
“Алтын белгіге” үміткерлердің емтихан жұмыстарын мектептер емес, білім басқармалары жанындағы комиссиялар қарады, деп толықтырды министрлік.
Айта кетейік, 2019 жылы 7 349 оқушы “Алтын белгі” алса, 2020 жылы 8 615 &nbsp;оқушы ерекше төсбелгі иесі атанды.

«Алтын белгі» иегерлерінің саны бойынша рекорд жаңарды

<a href="https://kyzylorda-news.kz/">Kyzylorda-news.kz</a>. Қазір облыста 30 колледж бар. Онда аймақтың еңбек нарығына қажетті 97 мамандық бойынша 19775 студент білім алуда. Алдағы 2021-2022 жаңа оқу жылында техникалық және кәсіптік, орта білімнен кейінгі білімі бар кадрлар даярлау үшін жергілікті бюджеттен 3108 орын мемлекеттік тапсырыс бөлінді. Бұл туралы Өңірлік коммуникациялар қызметінің ақпарат алаңында облыстық білім басқармасының басшысы Ақзира Қасымова мәлімдеді.
<blockquote>
 «Биыл 9-11 сынып оқушыларынан мемлекеттік тапсырыс негізінде оқуға құжаттар қабылдау күндізгі бөлімнің мамандықтары үшін 25 маусым мен 25 тамыз аралығында өтеді. Ал орта буын мамандықтары үшін 25 маусым мен 20 тамыз аралығында құжат қабылданады. Сонымен қатар, оқудың кешкі және сырттай нысанына – 25 маусымы мен 20 қыркүйегі аралығында, шығармашылық дайындықты талап ететін мамандықтар бойынша 25 маусымы мен 20 шілдесі аралығында, педагогикалық мамандықтар – 25 маусымы мен 15 тамызы аралығында құжат тапсыра алады», – деді Ақзира Қасымова.
</blockquote>
Талапкерлерді оқуға қабылдау үшін құжаттар «Egov» және «CollegeSmart Nation» электронды порталдары арқылы жүзеге асады. Яғни, талапкер өтініш, білімі туралы құжаттың көшірмесі, 3х4 фотосурет және У-086 медициналық, мүгедектігіне байланысты арнайы үлгідегі медициналық анықтама тапсырады. Бүгінде аймақтағы барлық колледж 100 пайыз аталған электронды платформа арқылы оқуға қабылдауға дайын.
<blockquote>
 «Оқуға түсу үшін құжаттарды кәмелетке толған адамдар жеке өзі, кәмелетке толмағандар – заңды өкілінің қатысуымен ұсынады. Колледжге жұмыс мамандықтары бойынша оқуға түсушілердің саны мемлекеттік тапсырысы бойынша оқуға бөлінген орындардан санынан асып кеткен жағдайда оқуға қабылдау орташа конкурстық баллға сәйкес квота санаты негізінде жүзеге асырылады», – деді Ақзира Қасымова. 
 Сондай-ақ, колледждердегі қабылдау комиссиясының қорытынды отырысында аудио-немесе бейнежазба жүргізіледі.
</blockquote>
<img src="https://kyzylorda-news.kz/wp-content/uploads/2021/06/181890665_1311561659239343_1824274959269531773_n.jpg" alt="" />

Бюджеттен техникалық және кәсіптік кадрлар даярлау үшін 3108 орын бөлінді

<a href="https://kyzylorda-news.kz/">Kyzylorda-news.kz</a>. Докторантураға грантқа түсу үшін шекті балл 75 балды құрайды. Ал, оқуға ақылы негізде түсу үшін шекті балл – 50.
Бұл туралы бүгін Білім және ғылым министрлігінің Instagram парақшасында өткен тікелей эфир барысында ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев мәлімдеді.
Оның айтуынша, биыл докторантураға өтініш қабылдау 3 шілдеде басталып, 3 тамызға дейін жалғасады. Докторантураға түсу емтихандары 4-20 тамыз аралығында өтеді. Осы ретте докторантураға түсу үшін бір ғана жоғары оқу орнын және бір білім беру бағдарламаларының тобын таңдауға болатынын айта кеткен жөн.
<blockquote>
 «Докторантураға түсу үшін өтініштер жоғары оқу орындарының қабылдау комиссиялары арқылы қабылданады. Бұдан әрі өтініштер Ұлттық тестілеу орталығының ақпараттық жүйесінде тіркеледі. Оқуға түсушілер өңірлік тестілеу орталықтарында түсу емтихандарын тапсырады. Мәдениет және спорт министрлігі мен Денсаулық сақтау министрлігіне ведомстволық бағынысты жоғары оқу орындарына түсушілер емтихандарды өз жоғары оқу орындарының базасында тапсырады», – деп атап өтті ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев.
</blockquote>
Түсу емтихандарының кестесін ҚР БҒМ Ұлттық тестілеу орталығы әзірлейді. Түсу емтихандарын өткізу бағдарламалары мен кестесі оқуға түсушілерге емтихан басталғанға дейін хабарланатын болады.
Естеріңізге сала кетейік, биылдан бастап докторантураға түсу емтиханы электрондық форматта өтеді. Үміткерлер компьютерде эссе жазады, докторантурада оқуға дайындық бойынша тест және білім беру бағдарламасының бейіні бойынша емтихандар тапсырады.
<blockquote>
 «Қабылдау емтихандары тестілеу орталықтары базасында алғаш рет электрондық форматта өтеді. Бұл формат өткен жылы магистратураға қабылдау кезінде апробациядан өткен болатын. Дегенмен, бұл түсу емтихандары тек тестілеу форматында болады деген сөз емес. Сонымен бірге болашақ докторанттар жоғары оқу орындары бекітетін тақырыптар бойынша эссе жазады. Эссені бағалау, докторантурада оқуға дайындық тесті және бейінді емтихандардың нәтижелері арқылы алынған балдар жинақталып, қабылдау емтиханының қорытынды бағасы шығарылады», – деп атап өтті ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев.
</blockquote>
Жалпы, оқуға түсу емтиханының ең жоғары көрсеткіші – 100 балл.
Оның ішінде эссе – 20 балл, докторантурада оқуға дайындығын анықтауға арналған тест – 30 балл, бейінді емтихан сұрақтары – 50 балл. Жалпы емтиханға 4 сағат беріледі.
Докторантура бойынша мемлекеттік білім тапсырысына келетін болсақ, 2021-2022 оқу жылына PhD мамандарын даярлауға арналған мемлекеттік грант саны 1890 грантты құрайды.
Докторантураға «магистр» дәрежесі және кемінде тоғыз ай жұмыс өтілі бар немесе медициналық мамандықтар бойынша резидентурада оқуын аяқтаған тұлғалар қабылданады.
<a href="https://lenta.inform.kz/kz/75-baldan-kem-zhinagan-talapkerler-doktoranturaga-grantka-tuse-almaydy_a3801692">ҚазАқпарат</a>

75 балдан кем жинаған талапкерлер докторантураға грантқа түсе алмайды

<a href="https://kyzylorda-news.kz/">Kyzylorda-news.kz</a>. Қызылорда облысы бойынша ҚАЖ департаментініӊ ЗК-169/5 мекемесіндегі жалпы білім беретін мектепте оқығандарға 2020-2021 оқу жылын аяқтап, орта білім алғандығы туралы аттестат берілді.
Ел азаматтары орта білімді міндетті түрде алу тиіс. Сондықтан біліммен қамту бас бостандығынан айыру орындарында да жүзеге асырылуда. Аталған іс-шараға облыстық білім басқармасына қарасты жалпы білім беретін кешкі мектеп директоры А.Абашова қатысып, мектеп бітіруші түлектерге алған аттестаттарын игі кәдеге жаратуларына тілектерін білдіріп, оларға табыстар тіледі және сотталғандарға білім беруге жан-жақты көмек көрсеткені үшін мекеме басшылығына алғысын білдірді.
<blockquote>
 «Бүгін мен үшін қуанышты күн. 11-сыныпты бітіріп, қолыма аттестат алып отырмын. Жастықтың желегімен жаза басып, жаңылып, тағдыр тауқыметімен мектепті де аяқтай алмай қалғанмын. Жалпы біз&nbsp; түзеу мекемесінде қамауда отырсақта, уақытты текке өткізбей, бостандықта ала алмаған білімімізді осында алып жатырмыз, енді одан әрі жазамды өтей жүріп, кәсіптік колледжде «ағаш ұстасы» мамандығын оқығым келеді -дейді сотталған.
</blockquote>
Аттестат беру рәсімі аяқталған сәтте&nbsp; жазасын өтеушілер мектеп мұғалімдеріне ізгі тілектерін жеткізіп кешті көңілді аяқтады.
<img src="https://kyzylorda-news.kz/wp-content/uploads/2021/06/00000_00000020210612093424_0020.jpg" alt="" />
TEST.JPG00000

Қызылордада сотталғандар аттестат алды

<a href="https://kyzylorda-news.kz/">Kyzylorda-news.kz</a>. Ұлттық бірыңғай тестілеуде қызылордалық түлек Сымбат Асылбек ең жоғарғы 140 ұпайдың 138 ұпайын жинады. Түлек Шиелі ауданындағы №45 «Ақ орда» мектеп-гимназиясының 11-сынып оқушысы.
<blockquote>
 «Таңдау пәнім – қазақ тілі мен әдебиеті. Маған тест сұрақтары қиындық туғызған жоқ. Мектеп қабырғасында алған білімім мен қосымша дайындығының арқасында осындай нәтижеге жеттім деп ойлаймын. Сынып жетекшім әрі пән мұғалімі Қалмырза Гүлнар апайға және барлық пән мұғалімдеріне үлкен алғысымды білдіремін»,-дейді Сымбат Асылбек.
</blockquote>
Айта кетейік, ұлттық тест 30 маусымға дейін жүреді. Әзірге дейін Қызылорда облысы бойынша 138 ұпай ең жоғарғы ұпай қатарында. Ал, екі оқушы 137 ұпай еншіледі.

Шиелілік түлек ҰБТ-дан 138 ұпай жинады

<a href="https://kyzylorda-news.kz/">Kyzylorda-news.kz</a>. «Назарбаев Зияткерлік мектептері» мен «National Geographic» ұйымдарының бастамасымен ұйымдастырылған Photo camp жобасына сырбойылық Даяна Хегай мен Нұрай Ғабит белсенді қатысып, фотошеберліктерін растайтын арнайы сертификаттарға ие болды.
Алматыдағы химия-биологиялық бағыттағы Зияткерлік мектеп базасында өткізілген фотоөнерден элективті курсқа еліміздің түпкір-түпкірінен 70-ке жуық оқушы мен жетекшілері қатысты. Бес күн бойы қатысушылар әлемнің әрбір 8 адамы оқитын әйгілі National Geographic журналының танымал фотографтарынан білім алып, тәжірибе жинақтады.
Кейіпкердің эмоциясын, ішкі жан-дүниесін сезінгенде ғана үздік фотосурет түсіруге болады. Бұл National Geographic-тің фотошебері Гердт Людвигтің басты лайфхактарының бірі. Кәсіби маманмен өткен сабақтарда қатысушылар фотоөнердің техникалық компоненттерін талқылап, сапалы сурет жасаудағы негізгі заңдылықтарын меңгерді:
<blockquote>
 «Бастапқыда мен политология және неміс әдебиеті мамандығы бойынша білім алдым. Бірақ кейін фото әлемі мені ерекше қызықтырып, осы іспен кәсіби тұрғыда айналысуыма түрткі болды. Жақсы әрі әдемі фотосуреттер адамның жүрегіне жетіп, адамға әсерлі эмоция қалдырады. Мен сурет арқылы көріністен алған өзімнің әсерімді және өзгелердің эмоциясын жеткізіп отыруды мақсат етемін», – деді Герд Людвиг.
</blockquote>
Курс қатысушыларының шығармашылығын кешкі бағдарлама аша түсті. Күнделікті әртүрлі тапсырмаларды орындау арқылы оқушылар теориялық білімдерін практикумдарда жетілдіріп, жеке портфолиоларын жаңа туындылармен толықтыра алды. Photo camp курсында National Geographic Қазақстандағы өкілдігінің кәсіби фотомамандары да сабақ жүргізді. Фотошеберлер көркем фотосуреттің құпияларын ашып, фото жанрлары мен композициясы, жарық және жарықты қолдану рөлін, фотосуреттерді арнайы бағдарламаларда өңдеу бойынша шебер-сыныптар жүргізді.
<blockquote>
 «Бұл сабақтар мені қатты шабыттандырды. Фото түсіру барысында тәжірибе жасай білуді үйрендік. Әрбір фотода белгілі тарих сипатталуы өте маңызды», – дейді қызылордалық зияткер Нұрай Ғабит.
</blockquote>
National Geographic – география, табиғат, тарих, ғылым және мәдениет туралы ғылыми мақалалары мен сапалы фотосуреттермен ерекшеленетін бренд журнал. Элективті курс барысында қатысушылар фото түсірудің қыр-сырымен танысып қана қоймай, фотоөнер арқылы әлемдік мәселелерге назар аударып, ғылыми зерттеушілік дағдыларын арттыра алды.
<blockquote>
 «Бұл Зияткерлік мектептермен бірлескен алғашқы жоба. Курс бағдарламасы фотоөнермен байланысты көптеген тақырыптарды қамтиды. Photo camp қатысушылары алған білімдерін алдағы уақытта тиімді пайдаланып, өзге оқушылармен бөліседі деп сенеміз», – дейді «Назарбаев Зияткерлік мектептері» ДББҰ дамыту департаменті директорының орынбасары Аида Ағаділ.
</blockquote>
<img src="https://kyzylorda-news.kz/wp-content/uploads/2021/06/095eff64-544d-4ff8-9619-6c681f4e7ffe.jpg" alt="" />
<img src="https://kyzylorda-news.kz/wp-content/uploads/2021/06/57ce24b9-5789-42e7-ab84-b06b1d8bcd7c.jpg" alt="" />
<img src="https://kyzylorda-news.kz/wp-content/uploads/2021/06/23fc5b93-4fae-486e-90c0-3736cd133269.jpg" alt="" />

Қызылордалық зияткерлер фотошебер сертификатына ие болды

<a href="https://kyzylorda-news.kz/">Kyzylorda-news.kz</a>. Бүгін – барлық білім ордаларында мектеп бітіруші түлектерге аттестат тапсыру күні. 11 жыл білім алған шәкірттер «Алтын белгі», «Үздік аттестат» алып, мектептерімен қоштасады. Ерекше күнде түлектердің қуанышына ортақтасқан облыстық білім басқармасының басшысы Ақзира Қасымова Қызылорда қаласындағы №218 мектепке барып, шәкірттерді құттықтап, игі тілегін арнады.
Білім ұясында 16 оқушы 11-сыныпты аяқтап отыр. Оның 3-і “Алтын белгі” иегері. Оқушылардың барлығы Ұлттық тестке қатысып, жоғары ұпай иеленуде.
Салтанатты шарада түлектер ән айтып, вальс биледі. Ата-аналар ақ тілектерін арнап, шәкірттер ұстаздарына алғысын білдірді.
Басқарма басшысы мектеп бітіру салтанатынан кейін білім ұясының жағдайымен танысып, сыныптарды аралап, ұстаздармен тілдесті.
Айта кетейік, аймақта биыл 7007 оқушы мектеп бітірді. Оның 597-і ” Алтын белгі” иегері атанса, 493-і Үздік аттестат иегері. Өңірде Ұлттық тесттен ең жоғары 137 ұпайды екі оқушы иеленді. Оның біреуі Қызылорда қаласының, екіншісі Сырдария ауданының түлегі.
<img src="https://kyzylorda-news.kz/wp-content/uploads/2021/06/195509890_1137187306784473_2800762542890428534_n.jpg" alt="" />
<img src="https://kyzylorda-news.kz/wp-content/uploads/2021/06/198832307_1137187346784469_2417319750803282629_n.jpg" alt="" />

Қызылорда облысында биыл 7007 оқушы мектеп бітірді

<a href="https://kyzylorda-news.kz/">Kyzylorda-news.kz</a>. Білім және ғылым министрі Асхат Аймағамбетов жаңа оқу жылында мектептер ашылуы мүмкін екенін жоққа шығармады.
<blockquote>
 “Жаңа оқу жылында біз мектептерді ашып, оқушылар дәстүрлі форматқа оралады деген үміттеміз. Бірақ әрине бұл үшін ең негізгі шарттар орындалуы керек: бұл қарапайым санитарлық-эпидемиологиялық талаптарды сақтау және вакциналау. Сондай-ақ өңір “қызыл” аймақта тұрмауға тиіс, “жасыл” аймақта болғаны жақсы”, – деді Аймағамбетов орталық коммуникациялар қызметінде өткен баспасөз мәслихатында.
</blockquote>
Министр вакиналау қарқыны мен аурушаңдықтың төмендеуі оқу жылының басталуына оптимистік көзқараспен қарауға мүмкіндік беретінін атап өтті.

Қыркүйекте оқушылар мектепке бара ма?

<a href="https://kyzylorda-news.kz/">Kyzylorda-news.kz.</a> Қызылорда өңірінде мектеп салу қарқыны бәсеңдеген емес. 2021 жылы 6 білім беру ұйымы пайдалануға беріледі, оның ішінде инвесторлармен бірге 300 және 500 орындық 2 жеке мектептің іргетасы қаланған. Бұл туралы Орталық коммуникациялар алаңында өткен баспасөз брифингінде облыс әкімі Гүлшара Әбдіқалықова баяндады.
<blockquote>
 «Білім беру саласында апатты жағдайдағы мектептерді жою жұмыстары жалғасуда. 2020 жылы бізде 3 апатты жағдайдағы мектеп болды, біз 140 орындық бір мектепті пайдалануға бердік, тағы екеуінің құрылысы биыл аяқталады. Мұнан бөлек, 550 орынға арналған үш қосымша білім беру ұйымының құрылысы жүргізілуде», – деді Гүлшара Әбдіқалықова.
</blockquote>
Сонымен бірге өңірде 3750 орындық тағы 5 мектептің құрылысын бастау жоспарлануда. Ал, 47 балабақша мен 44 мектепте арнайы инклюзивті сыныптар ашылған.

Сыр елінде 1 жылда 6 мектеп пайдалануға берілді

<a href="https://kyzylorda-news.kz/">Kyzylorda-news.kz</a>. ҚР білім беруді және ғылымды дамытудың 2020-2025 жылдарға арналған бағдарламасының аймақта жүзеге асырылу барысы«Nur Otan» партиясы Қызылорда облыстық филиалы жанындағы «Білім мен ғылымды дамыту» жөніндегі аймақтық қоғамдық кеңес отырысында талқыланды.
Жиында облыстық білім басқармасының басшысы Ақзира Қасымова аталмыш бағдарламаның өңірде орындалысы барысын кеңінен таныстырып өтті.
<blockquote>
 «Атап айтсақ, мемлекеттік бағдарламада жергілікті әкімдіктердің құзыретіне 4 индикатор, 23 көрсеткіш бекітілген. Бүгінгі күні 4 индикатор мен 22 көрсеткіш толық орындалған. Қалған бір көрсеткіш үш ауысымды оқытуды жоюға бағытталған. Алайда бұл мәселені шешу үшін жұмыстар қолға алынуда. Мәселен, Қызылорда қаласында үш ауысымды болдырмау бағытында 600 орындық жаңа мектеп пен 200 орындық бір мектептің қосымша құрылысы жыл соңына іске қосылмақ. Сондай-ақ, осы мақсатта жеке инвесторлармен 800 орындық 2 жеке мектеп пайдалануға беріледі. Сонымен бірге, Арал, Жаңақорған аудандарында екі жаңа 300 орындық мектеп қыркүйек айында оқушы қабылдайды деп жоспарланып отыр», – дейді облыстық білім басқармасының басшысы Ақзира Қасымова.
</blockquote>
Басқарма басшысы мектепке дейінгі тәрбие мен оқыту мәселесіне де тоқталып өтті. Мәселен ағымдағы жылы 1-6 жасқа дейінгі балаларды мектепке дейінгі тәрбие мен оқытужоспар бойынша 81 пайыз болса, орындалысы 85,5 пайызды құрап отыр. 3-6 жасқа дейнгі балалардың қамтылуы 100 пайыз. 
Балалар қауіпсіздігі үшін 70 мектеп бейнебақылау жүйелеріне қосылып, терроризмге қарсы қауіпсіздік талаптарына сәйкестендірілген. Нақты айтар болсақ, 14 мектеп жедел басқару орталығына, 56 мектеп полицияның кезекші бөлімшелеріне қосылған. 110 мектеп ювеналды полиция қызметкерлерімен қамтамасыз етілген. 
Техникалық және кәсіптік білім беру бағытына келсек, облысымызда 30 колледжде (оның ішінде 17 мемлекеттік, 13 жекеменшік) 97 мамандық 163 біліктілік бойынша 20 мың студент білім алуда. 2020 жылы мемлекеттік тапсырыс негізінде бітірген 4067 студенттің 3459 жұмысқа орналасып, көрсеткіш 85,1% құрап отыр. 
Басқарма басшысы дарынды балаларды қолдау бағытындағы жұмыстарды да тілге тиек етті. Айтуынша жыл басынан халықаралық және республикалық олимпиадалар мен ғылыми жоба конкурстарында 124 оқушы жүлделі орын алған. Республикалық олимпиаданың қорытындысымен 26 оқушы жеңімпаз атанып, өңіріміздің олимпиадалық командасы республикада жүлделі 3 орынды иеленген.
<img src="https://kyzylorda-news.kz/wp-content/uploads/2021/06/6b69a886-facf-4fc0-beb4-47d336510a7e.jpg" alt="" />
<img src="https://kyzylorda-news.kz/wp-content/uploads/2021/06/c88c4edf-754f-4623-9f2a-d9a9f7c2a903.jpg" alt="" />

Жаңақорған, Арал аудандарында жаңа мектептер пайдалануға беріледі

<a href="https://kyzylorda-news.kz/">Kyzylorda-news.kz</a>. ҚР Білім және ғылым министрі Асхат Аймағамбетов республикадағы мектеп директорларының ротациясы туралы айтты, деп хабарлайды&nbsp;<a href="https://stan.kz/">Stan.kz</a>.
<blockquote>
 «Қазір бұл ұсынысқа қатысты пікірталас болып жатыр.&nbsp; Бұл бір күнде 7500 мектептің директоры жұмыс орнын ауыстырады деген сөз емес.&nbsp;&nbsp;Оған қоса, Павлодар облысынан Қарағандыға, Түркістан облысына ауыстырады деген түсінік қалыптаспауы керек. Олай болмайды», – деді Аймағамбетов.
</blockquote>
Халықаралық тәжірибе зерделенді, шешім барлық оң және теріс жақтарын ескере отырып қабылданады, деп жалғастырды ол.
<blockquote>
 «Біз әріптестерімізбен директорлардың орнын ауыстыру&nbsp;ережелерін талқылап жатырмыз.&nbsp;Нюанстар өте көп. Біз бұл жүйенің жеке мүдде үшін қолданылғанын қаламаймыз. Әртүрлі жағдайлар болады. Алпыс жастағы отыз жылдық тәжірибесі бар мұғалім де сұранысқа ие бола алады. Бірақ мұндай жағдайлар өте сирек.&nbsp;Бірақ, тәжірибе кадрларды ауыстыру үлкен&nbsp;маңызға ие екенін көрсетеді», – деп толықтырды министр.
</blockquote>
«Open NРA» порталында мемлекеттік білім беру ұйымдарының бірінші басшыларын ротациялау ережесінің жобасы ұсынылды. Мектеп директорларын үш жыл сайын аттестаттау және олардың қызметінің тиімділігін жыл сайынғы бағалау нәтижелері бойынша ауыстыру ұсынылады.
Жобада ротация жойылса, еңбек келісімшарты тағы 3 жылға ұзартылатыны айтылған. Бірақ екінші&nbsp;рет бас тартқан жағдайда білім беру ұйымының басшысы қызметінен босатылады.
Осылайша, мектеп директорының ең ұзақ қызмет мерзімі 6 жылды құрайды. Ереже жобасында зейнетке шыққанға дейін үш жыл немесе одан аз уақыт бар адамдар ротациядан босатылуы мүмкін екендігі айтылған.

Қазақстан және Қызылорда облысының жаңалықтары: Білім

Қызылордада “Серіктес директорлар” лигасы саммит өткізді

«Алтын белгі» иегерлерінің саны бойынша рекорд жаңарды

Бюджеттен техникалық және кәсіптік кадрлар даярлау үшін 3108 орын бөлінді

75 балдан кем жинаған талапкерлер докторантураға грантқа түсе алмайды

Қызылордада сотталғандар аттестат алды

Шиелілік түлек ҰБТ-дан 138 ұпай жинады

Қызылордалық зияткерлер фотошебер сертификатына ие болды

Қызылорда облысында биыл 7007 оқушы мектеп бітірді

Қыркүйекте оқушылар мектепке бара ма?

Сыр елінде 1 жылда 6 мектеп пайдалануға берілді

Жаңақорған, Арал аудандарында жаңа мектептер пайдалануға беріледі

Қазақстанда мектеп директорлары 3 жыл сайын ауыстырылады – министр жаңа ережемен таныстырды

Қазақстан және Қызылорда облысының жаңалықтары: Білім

Қызылордада &#8220;Серіктес директорлар&#8221; лигасы саммит өткізді

«Алтын белгі» иегерлерінің саны бойынша рекорд жаңарды

Бюджеттен техникалық және кәсіптік кадрлар даярлау үшін 3108 орын бөлінді

75 балдан кем жинаған талапкерлер докторантураға грантқа түсе алмайды

Қызылордада сотталғандар аттестат алды

Шиелілік түлек ҰБТ-дан 138 ұпай жинады

Қызылордалық зияткерлер фотошебер сертификатына ие болды

Қызылорда облысында биыл 7007 оқушы мектеп бітірді

Қыркүйекте оқушылар мектепке бара ма?

Сыр елінде 1 жылда 6 мектеп пайдалануға берілді

Жаңақорған, Арал аудандарында жаңа мектептер пайдалануға беріледі

Қазақстанда мектеп директорлары 3 жыл сайын ауыстырылады &#8211; министр жаңа ережемен таныстырды

Қызылордада “Серіктес директорлар” лигасы саммит өткізді

Қазақстанда мектеп директорлары 3 жыл сайын ауыстырылады – министр жаңа ережемен таныстырды