<a href="https://kyzylorda-news.kz/">Kyzylorda-news.kz</a>. Облыс әкімдігінің қолдауымен Қорқыт ата атындағы Қызылорда университеті жанынан құрылған “Business-Start” жастар кәсіпкерлігі орталығының ұйымдастыруымен өткен стартап жобалар байқауының жартылай финалдық кезеңі өз мәресіне жетті. Жартылай финалға 85 жоба ұсынылып, нәтижесінде 21 жоба финалға жолдама алды. Оның ішінде университет студенттерінің де жобалары бар. Енді болашақ жас кәсіпкерлердің жобаларына инвестор тарту көзделіп отыр.
“Business-Start” бизнес инкубаторының резиденті, Қорқыт ата атындағы Қызылорда университетінің студенті Дидар Сәрсенбек болашақта D cube анимациациялық студиясын ашып, отандық мультфильмді жарыққа шығаруды көздейді. D cube анимациялық студиясының жобасы қолдау тапса, графикалық технологияларды қолдану арқылы түрлі анимациялық, жарнамалық және мультипликациялық бейнероликтер әзірлейтін болады. Осыған дейін бірінші кезеңде ерекше жобасы үшін қаржылай сыйақыға ие болған еді. Қазір ол «Шашбау» атты жаңа жобасын ұсынуға дайындық үстінде. Қазақтыңқыз-келіншектері тағатын сәндік қолданбалы әшекей бұйымдарының жасалу жолдары, шығу тарихын мультфильм арқылы көрсетпек.
Финалист Қаракөз Тасқынбайқызының бағыты – каллиграфия өнері. Қаракөз –Қорқыт ата атындағы Қызылорда университетінде «Араб-ағылшын тілі» мамандығы бойынша жоғары білім алған, діни және мәдени каллиграфияның шебері. Қазіргі таңда өз қолымен жазылған мұсылмандық діни және мәдени каллиграфиялық картинкаларды жасап, табыс табуда. Сондай-ақ, ақылы түрде каллиграфия өнеріне қызығушыларға курс өткізеді.
<blockquote>
 «Отандық мультфильмді жарыққа шығару – бала күнімнен арманым. «Kyzylorda Business Hub» – мен үшін үлкен мүмкіндік алаңы болды. 1 кезеңде ұтып алған қаржыға бизнесіме қажетті планшет сатып алдым. Менің жобамда мықты техниканың болуы маңызды рөл ойнайды. Финалдық кезеңде өз жобамның маңыздылығы мен артықшылығын көрсету арқылы инвесторлардың көмегімен бизнесімді толықтай ашамын деген ойдамын. Өз идеясы бар жастарға қазір мүмкіндік өте көп. Техниканың қарыштап дамыған уақытында Отандық өнімдердің санын өсіру жастар үшін үлкен міндет болмақ»,-деді Қорқыт ата атындағы қызылорда университетінің студенті, «Kyzylorda Business Hub» облыстық стартап жобалар байқауының финалисті Дидар Сәрсенбек.
</blockquote>

Қызылордалық студент отандық мультфильмді жарыққа шығармақ

<a href="https://kyzylorda-news.kz/">Kyzylorda-news.kz</a> Қазақстанда білім грантын тағайындау конкурсына қатысу үшін құжат қабылдау 16 шілде күні басталады.
Білім және ғылым министрлігінің мәліметінше, қабылдау электрондық форматта жүзеге асырылады.
Талапкерлер мен олардың ата-анасының денсаулығын қорғау мақсатында жоғары оқу орындарында виртуалды қабылдау комиссиялары жұмыс істеп, талапкерлерге бейнебайланыс арқылы кеңес береді.
Оқуға түсушілер 6 мамыр мен 1 шілде аралығында өткен ҰБТ-ның екі нәтижесінің біреуін конкурсқа ұсына алады.
Өтініш берген кезде талапкерлер аттестат, аттестатқа қосымшаның электрондық көшірмелерін және электрондық құжат нысанындағы көлемі 3×4 цифрлық фотосуретті, сондай-ақ басқа да құжаттардың көшірмесін қоса тапсыруы қажет.
Егер талапкер «Алтын белгі» иегері немесе отансүйгіштік және белсенді азаматтық ұстанымы үшін ерекшелік белгісімен марапатталған болса, онда ол басқа үміткерлермен балдары тең болған жағдайда басым құқыққа ие болады.
Олимпиадалар мен спорт жарыстарының жеңімпаздары үшін де осындай артықшылықтар қарастырылған.
Талапкерлердің мұндай жетістіктерінің ескерілуі үшін құжаттарды тапсыру кезінде растайтын құжаттардың көшірмелерін тіркеу қажет.
Шет тілін меңгергенін растайтын халықаралық сертификат болған кезде өтініш беруші сертификаттың атауын, балын көрсетеді және электрондық сертификатты тіркейді.
Сонымен қатар биыл білім беру гранттарын бөлу кезінде ҚР БҒМ алғаш рет халықтың әлеуметтік осал топтарына квоталар бөлді.
Енді көпбалалы немесе толық емес отбасынан шыққан балалар, сондай-ақ ерекше қажеттіліктері бар балаларды тәрбиелеп отырған отбасылардағы талапкерлердің грант алу мүмкіндіктері жоғарылай түсті.
Кәмелетке толмаған төрт және одан көп бала тәрбиелеп отырған отбасылардағы балалар үшін гранттардың жалпы санының 5%-ы, кемінде үш жыл толық емес отбасы мәртебесі бар отбасылардан шыққан балаларға – 1%, І, ІІ топтағы мүгедек балаларды тәрбиелеп отырған отбасылардан шыққан түлектерге білім беру гранттарының 1%-ы көзделген.
ҰБТ қорытындысы бойынша кемінде 65 балл жинаған талапкерлер ұлттық жоғары оқу орындарына түсе алады.
«Педагогикалық ғылымдар» – кемінде 75 балл, «Денсаулық сақтау» − кемінде 70 балл, «Ауыл шаруашылығы және биоресурстар», «Ветеринария» – кемінде 60 балл, басқа жоғары оқу орындарына – кемінде 50 балл.
Бұл ретте ҰБТ-ның әрбір пәні және (немесе) шығармашылық емтихан бойынша кемінде 5 балл жинау қажет.

Білім гранттары конкурсына құжат қабылдау 16 шілдеде басталады

<a href="https://kyzylorda-news.kz/">Kyzylorda-news.kz</a>. Педагогтары мен қызметкерлері 100% вакцина салдырған мектептер дәстүрлі оқыту форматына көшеді. Бұл туралы бас мемлекеттік санитар дәрігер Ерлан Қиясов “Nur Otan” партиясы жанындағы білім мен ғылымды дамыту жөніндегі кеңесте айтты, деп хабарлады “<a href="https://astanatv.kz/kz/news/62334/">Астана</a>” телеарнасы.
Жоғары оқу орындарында 18 жастан асқан студенттер де вакциналануы немесе қашықтан оқытуға ауыстырылуға тиіс. Кеңес мүшелері офлайн оқуға оралу үшін санитарлық талаптар қатаң сақталуы керек деп отыр. &nbsp;
<blockquote>
 “Мектептердегі сақтық шаралары бұқаралық іс-шараларды өткізуге тыйым салуды, сыныптарды бөлуді және әртүрлі сыныптар үшін үзіліс уақытын бөлуді, асханада тамақтану барысына бақылауды күшейтуді қамтиды”, – деді денсаулық сақтау министрлігінің бас мемлекеттік санитар дәрігері Ерлан Қиясов.
</blockquote>
Ал білім және ғылым вице-министрі Шолпан Каринова 1 қыркүйектен бастап 7,5 мыңға жуық мектепті ашу жоспарланып отырғанын жеткізді. Сондай-ақ, ол “Nur Otan” партиясының сайлауалды бағдарламасын орындауға арналған “Жол картасы” аясында биыл 200 мектеп салу және 1 мың мектепті жаңарту міндеті тұрғанын атап өтті.
<blockquote>
 “Әр сыныптағы оқушы саны 25-тен аспауы керек деген талап қойылды. Ата-аналар санитарлық-гигиеналық ережелерді сақтауы үшін арнайы жұмыстар жүргізілуде”, – деді Шолпан Каринова.
</blockquote>

Оқушылар 1 қыркүйектен бастап мектепке барып оқиды

<a href="https://kyzylorda-news.kz/">Kyzylorda-news.kz</a>. 2021-2022 оқу жылында магистратураға түсу үшін 13 мыңнан астам грант, докторантураға – 1800-ден астам грант бөлінді.
Білім беру гранттары ҚР Еңбек және халықты әлеуметтік қорғау министрлігінің деректеріне және жұмыс берушілердің сұранысқа ие мамандықтар туралы ақпаратына сәйкес бөлінген, деп хабарлайды ҚР Білім және ғылым министрлігінің баспасөз қызметі.
Магистратурада оқуға гранттардың көп саны педагогикалық мамандықтар бойынша қарастырылған – 3 642 грант. Инженерлік, өңдеу және құрылыс салаларына – 3429, жаратылыстану ғылымдары, математика және статистика бағыты бойынша – 1278, ақпараттық-коммуникациялық технологиялар бойынша – 1233, ауыл шаруашылығы және биоресурстар бойынша – 527 грант бөлінді.
Естеріңізге сала кетейік, магистратураға түсу үшін кешенді тестілеуден өтуге ниет білдірушілерді тіркеу 18 маусымда басталып, 15 шілдеге дейін жалғасады. Емтихан 20 шілдеде басталады.
<blockquote>
 «Талапкерлерге ыңғайлы болу үшін біз тестілеу нәтижелерімен келіспеген жағдайда апелляцияға беру жүйесін өзгерттік. Ол электрондық форматта өтеді. Енді талапкер тестілеу аяқталғаннан кейін 30 минут ішінде бірден апелляцияға өтініш бере алады»,&nbsp;– деп хабарлады ҚР Білім және ғылым вице-министрі Қуаныш Ерғалиев.
</blockquote>

2021-2022 оқу жылында магистратураға түсу үшін 13 мыңнан астам грант бөлінді

<a href="https://kyzylorda-news.kz/">Kyzylorda-news.kz</a>. Шахмат – көнеден бар интеллектуалды ойын. Адамның ойлау қабілеті мен когнитивті жүйесін дамытады деседі. Шахмат ойнай білетін адамның дүниеге көзқарасы, қабылдауы мен ойлауы өзгешелеу болады. Ақылдылар ғана шахмат ойнай&nbsp; алады деседі.
Ендеше осынау бекзада ойынды неге балаға үйретпеске? Баланы жастайынан ақыл-ойды дамытар дағдыға баули білсек, болашағы да жарық болмай ма? Оның үстіне, смартфон қуған балаға шахмат үйрету қиын деп кім айтты? Ендеше қойылған сауалдарға бірге жауап іздеп көрейік.
Ең алдымен айтарымыз – балаға шахмат үйреткім келеді деген ниеттің өзі әжептәуір күш. Бұл ойға көңіліңіз түскенінің өзі керемет, мақтауға тұрарлық. Ендігі кезек – алгортимде.
Қай жастан баулыған жөн?
Бұл сауалға нақты жауап беру қиын. Бірақ барынша ерте жастан бастасаңыз, соғұрлым оңай.
<ol>
<li>Үш жастан бастап балаға шахматты таныстыра бастаймыз. Көзі жаттыға бергені дұрыс. Көзбен көріп, санасы қабылдай бастайды. Осы кезеңде шахмат тастарын таныстырып, қызықтырып ойнап көрсеңіз де болады.</li>
<li>Төрт жастан бастап шахмат ойнауды үйретуге, қай тас қалай жүретінін көрсетуге болады. Ақырыңдап ойын арқылы “ойнап көру” де артық етпейді.</li>
<li>Бес жастан бастап шахматтың комбинацияларын, кейбір әдіс-тәсілдерін, алғашқы жолдарын үйретуге болады.</li>
<li>Ал балаға шахмат үйретудің ең тиімді әрі жемісті кезеңі – 6-8 жас арасы. Баланың шахматқа деген қызығушылығы осы жаста ашылады. Таланты да ашылып, дарын қабілеті де осы жаста байқала бастайды. Бұл жастағы баланың тағы бір қасиеті – өзі ойланып, өзі ойнай алатыны, шешім қабылдай алатыны.</li>
</ol>
Шахмат – жасөспірім мен ересек, үлкен адамдардың ойыны десеңіз қателесесіз. Бұған АҚШ ғалымдарының айтқан уәжі дәлел бола алады. Олардың айтуынша, бүлдіршін баланың дүниені тануы мен қабылдауы өте зерек, ал шахмат баланы сыни ойлау мен шешім қабылдауды ерте жастан үйретеді.
“Балаға шахматты қай жаста үйрету керек дегенге сарапшылар түрлі пікір айтады. Бірақ бір нәрсеге бәрі келіседі. Ол – баланы барынша ерте жастан бастап үйрету керек деген пікір. Мен де балаға барынша ертерек үйрету керек деген ойдамын. Өйткені бала ерте жаста өте зерек, зейінді болады”, – дейді АҚШ Шахмат мектебінің доктор Фергюсон.
<blockquote>
 “Балабақшадағы және бірінші сыныпқа барған балаларға шахмат үйретіп көрген едім, тұщымды нәтиже болмады. Бірақ екінші сыныпқа үйреткен кезімде, тез үйренгенін байқадым”, – дейді АҚШ Шахмат федерациясының маманы Том Браунскомб.
</blockquote>
Баланы қалай қызықтырамыз…
Балаға шахмат үйретудің маңызы зор. Қарапайым ғана жылқының “Г” жүрісін үйретіп қойғаныңыз дұрыс.
Ал балаға шахматты қалай үйретеміз, қалай қызықтырамыз дегенге келсек, оның жолдары көп.
Бала айтқанды емес, көргенді істейтінін бәріміз білеміз. Ендеше баланың көзінше шахмат ойнаңыз. Бүкіл әулет, жанұя боп шахмат ойнасаңыздар, тіпті керемет! Ойнап отырып баланы ақырың ойынға тартып, жүрістерді үйретуге болады.
Сол сәтте бала шахмат үйренгісі келетінін айтып, үйретуді өтінсе, “сен әлі кішкентайсың, есейгенде ойнайсың” деңіз. Кейін біраз уақыттан кейін (2 аптадан кейін) “сен есейдің, енді шахмат ойнасаң болады” деңіз. Солай шахмат үйретіп кетуге болады…
Бұл жерде айта кететін бір нәрсе бар. Балаға алғаш шахмат үйреткен кезде, 10-15 минут қана уақыт жұмсаңыз. Болды. Одан әрі жалығып кетуі мүмкін. Егер осы арада баланың шахмат тақтасы мен тастарына қызығушылығы туса, айлаңыз іске асты дей беріңіз.
Одан кейін де шахмат үйретуге отырған кезде, 15 минуттан артық отырмаңыз.
Балаға шахмат ойыны бар мультфильмдерді, кітапшаларды көрсетуге болады. Шахматтың тарихын, пайда болу оқиғасын, басқа да қызықты деректерді айтыңыз.
Сабақты қалай бастаймыз?
Балаға шахмат үйретуде мына кеңестерді есте ұстаған жөн:
<ul>
<li>Шахматты компьютермен үйретпеңіз. Баламен байланыс, қарым-қатынас орната отырып үйреткеннің маңызы зор. Бұл – бір. Екіншіден, бала шахматты басымен де, қолымен де ойнайды. Содан баланың тактильді рецепторлары дамып, ойынды тез игереді.</li>
<li>Ойынның ережесі мен тәртібін қатар үйретіңіз. Бала 6-8 жаста дүниені тануға құлшынысы ерекше болады. Танымдық қабілеті артады. Осы сәтті пайдаланып, жадына сіңіріңіз.</li>
<li>Бала ойыннан мазасызданып, көңілі басқа жаққа ауып кетсе, уақытты қысқартыңыз әрі баланың назарын аудару үшін “балалық дүниелерді”, ойын элементтерін қосыңыз.</li>
<li>Тастарды баланың өзі жинап, өзі тізсін. Атын айтып, қалай жүретінін де айта отырса, артық емес.</li>
<li>Балаға жанашыр адам, серіктес дос керек. Сондықтан бүлдіршін ойын ойнағысы келсе, бас тартпаңыз.</li>
<li>Баланың өзі ойланғаны дұрыс, сондықтан көп ым-ишара беруге болмайды. Тек бір нәрсені ойлап ұзақ отырып қалса ғана көмек беріңіз.</li>
<li>Шахмат үйретуге мынандай бір айланы қолданып көріңіз. Басында тек пешкамен ойнап көріңіздер. Тасты қалай “жеуді”, не үшін “жеу керегін” түсіндіріңіз. Содан кейін ақырыңдап жылқы, піл, ладья, король, ферзьді үйретіңіз. Шахмат күрделі ойын болғандықтан, балаға біртіндеп үйрету маңызды. Жалықтырмайды, іш пыстырмайды. Бастысы – асықпау. Бала бір фигураны игеріп болды ма, оны үйренгенін тексеріп көріңіз. Ұққан болса, келесі тасқа өтуге болады.</li>
</ul>
Уақыт
Шахматты басында жиі ойнап тұрған дұрыс. Дебютантқа ең керегі сол. Күніне бір не екі партиядан ойнаған жөн. Екі аптада баланың ойынға деген азарты оянуы мүмкін.
Қайталау – үйренудің анасы. Баланың стратегиялық ойлауын дамыту үшін әр ойынның соңында бекіту, қорыту, нәтиже шығару сынды ой тұжырым жасау керек.
<a href="https://massaget.kz/layfstayl/bilim/64991/">Massaget</a>

Баланы шахмат ойынына қалай баулуға болады?

<a href="https://kyzylorda-news.kz/">Kyzylorda-news.kz</a>. 2021 жылдағы ұлттық бірыңғай тестілеудің соңғы қорытындысы 25 тамызға дейін шығарылады.&nbsp;Егер талапкердің емтихан тапсыру кезінде тыйым салынған заттарды пайдаланғаны анықталса, ҰБТ нәтижесі жойылады. Бұл туралы білім және ғылым министрлігі жоғары және жоғары оқу орнынан кейінгі білім департаментінің директоры Әділет Тойбаев айтты.
<blockquote>
 “Соңғы нәтижелер тамыз айында дайын болады. Қолданыстағы ережелерге сәйкес барлық бейнежазба 25 тамызға дейін талданады. Егер талапкердің емтихан тапсыру кезінде тыйым салынған заттарды пайдаланғаны анықталса, ҰБТ нәтижесі жойылады”, – деді Тойбаев баспасөз мәслихатында.
</blockquote>
Ол ҰБТ процесі орталықтандырылған ахуалдық орталық арқылы бақыланатынын атап өтті. Сондай-ақ әр ҰБТ өткізу пунктінен онлайн көрсетілім ұйымдастырылды.
Тойбаев биыл ҰБТ штаттық режимде және қандай да бір форс-мажорсыз өткенін айтты.
Ұлттық тестілеу орталығы директорының міндетін атқарушы Наужан Дидарбекованың айтуынша,&nbsp; 2021 жылы ұлттық бірыңғай тестілеудің орташа балы 69,08 ұпай болған.
<blockquote>
 “Биыл жалпы ұлттық бірыңғай тестілеудің орташа балы – 69,08. Бұл 2020 жылмен салыстырғанда 5 ұпайға жоғары”, – деді ол.
</blockquote>
Айтуынша, 88 101 талапкер немесе 60%-дан&nbsp;астамы шекті балды жинады. Ал 57 187 түлек немесе 39,4%-ы&nbsp;шекті балл жинай алмаған.
<blockquote>
 “Орташа балдың өсуі мектеп бітірушілердің емтиханды екі рет тапсыру мүмкіндігіне ие болуымен байланысты деп есептейміз”, – деді ол.
</blockquote>
Ол ҰБТ-ға биыл 145 288 талапкер қатысқанын айтты. Оның ішінде 109 693-і немесе 65,5 пайызы – қазақ тілінде, 35 245 немесе 24,3 пайызы&nbsp;– орыс тілінде, 350 немесе 0,2 пайызы ағылшын тілінде тапсырған.
Биылғы сынақта 1 923 түлек 120 балдан жоғары жинаса, тек 1 талапкер ғана барлық сұраққа дұрыс жауап беріп, 140 балл алды. Өткен жылы ең жоғары балл 139 болған еді.

ҰБТ тапсырғандардың нәтижесі тамыз айының соңына дейін жойылуы мүмкін

<a href="https://kyzylorda-news.kz/">Kyzylorda-news.kz</a>. Вундеркинд балалардың қарым-қабілеті өзгелерге үнемі шабыт береді. Біз бүгін биыл орта мектеп пен колледжді бір уақытта бітіретін 12 жастағы бала туралы әңгімелейміз.
“Индиго балалар” аңыз ба, ақиқат па?
Солтүстік Каролина штатындағы Солсбери қаласының тұрғыны Майк Виммер колледжді ерте бітіруді ойламаған. Ол жай ғана пандемия кезінде мектепте қосымша сабақтар алуға шешім қабылдаған. Сыныпта қатарластарына қарағанда білімді тезірек үйренетінін ол бұрыннан байқап жүретін. Пандемия кезінде Майк орта мектепті бітіргенше колледж мамандығын қоса алу туралы шешім қабылдаған.
21 мамырда жасөспірім Роуэн Кабррус Қоғамдық колледжінің дипломын алады, ал 28 мамырда Конкорд академиясының орта мектебін бітіреді.
Қазақтың 12 жастағы вундеркинді ата-анасына мұғалім болып жүр
Робототехникаға қызығушылық танытқан Виммер өзінің табиғатынан “математик және ғалым” екенін айтады. Ол бағдарламалау және робототехника саласындағы барлық білімді тәжірибе, қате ісі және желідегі бейнелер арқылы жинайтынын айтады. Сонымен қатар, жасөспірім Reflect Social деп аталатын өзінің стартапын құрған. &nbsp;Бұл стартап әлеуметтік медиа арқылы ақылды үй технологиясының қолданылуын жақсартуға бағытталған.
Қазір ол Америка Құрама Штаттарында немесе шетелде жұмыс істеу, қосымша білім немесе стартапты дамыту үшін стипендия алу мүмкіндіктерін қарастырып жатыр. Алайда Виммер өзінің әлі де бала екенін, сондықтан қарапайым балалардың іс-әрекеттері мен ойын-сауықтарына, мысалы, баскетболға оңай уақыт таба алатынын айтады.
<blockquote>
 “Көптеген адамдар мені балалық шағын жоғалтқан бала санайды. Мен оларға жақсы өмір сүріп жатқанымды және өмірден ләззат алатынымды айтқым келеді”, – дейді ол.
</blockquote>
<a href="https://massaget.kz/layfstayl/bilim/gumanitarly-ylymdar/65057/">Massaget</a>

Карантиннен жалыққан 12 жастағы бала мектеп пен колледжді бір уақытта аяқтады

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықова ел Тәуелсіздігінің 30 жылдығы аясында халықаралық, республикалық олимпиадалар мен ғылыми жоба конкурс жүлдегерлерімен кездесті.
Аймақ басшысы Елбасы бастамалары мен Президенттің білімпаз жастарды ұдайы қолдауының нәтижесінде жастарға арналған түрлі бағдарламалардың қабылданып, зияткер ұрпақтың білім кеңістігіне жол ашуына ерекше мүмкіндік жасалғанын атап өтті. Сондай-ақ, әлемдік деңгейдегі білім мен ғылым додаларында бақ сынап, ел абыройын асқақ етіп жүрген өрелі өрендердің әрбірін жеңісімен құттықтап, ақжолтай тілегін арнады.
<blockquote>
 «Ата-бабамыз «Өсер елді білімді ұрпағынан танисың» деп бекер айтпаған. Сендер болашақта еліміздің өсіп-өркендеуіне қызмет ететін, ата-аналарыңның үкілі үмітін ақтап, туған еліміздің асқақ рухын сақтайтын азаматсыңдар! 
 Біздің туған өлкеміз – Сыр бойы қай кезде де ұлы тұлғаларға кенде болмаған. Атақты жерлесіміз, академик Шахмардан Есенов 34 жасында Геология министрі болса, Асқар Жұмаділдаев 32 жасында физика-математика ғылымдарының докторы атанған. Ел мүддесі жолында адал еңбек еткен қазақ азаматтарының тізімін осылай жалғастыра беруге болады. 
 Біздің жас ұрпақтың бойында білімге, ғылымға деген зор қызығушылық бар. Алдағы уақытта біздің елімізден де талай талантты азаматтардың шығатынына сенім мол. Олардың қатарында өздерің де барсыңдар. Болашақтарың баянды, өмірлерің жарқын болсын»,-деді Гүлшара Әбдіқалықова.
</blockquote>
Биыл облыста 8 оқушы халықаралық олимпиаданың жүлдегері атанып, 38 бала республикалық олимпиада мен ғылыми жарыстарда үздіктер қатарынан көрінді. Ал, «Бастау» республикалық олимпиадасында облыс командасы ІІІ орынды иеленді. Мұнан бөлек, ауыл балаларына арналған «Мың бала» Ұлттық Зияткерлік олимпиадасында 99 оқушы жеңімпаз атанып, мамандандырылған мектептерге қабылдануда. Сондай-ақ, IQanat Олимпиадасында үздік нәтиже көрсеткен 26 оқушы Қапшағайдағы демалыс орталығында тынығып қайтты. 4 оқушы қазіргі кезде Бурабайда орналасқан «Iqanat High shool of Burabai» мектебінде білім алуда.
Өңірде «Елбасы медалі» жобасына облыстан 351 оқушы қатысып, 247 бала қола медаль иегері атанды. Ал, 54 оқушы күміс медальге, 49 оқушы алтын медальді иелену үшін бақ сынамақ.
Салтанатты жиында дарынды оқушылар облыс әкімімен еркін форматта пікірлесіп, көкейде жүрген сауалдарын ортаға салды. Озат оқушылардың ойларын тыңдаған аймақ басшысы дарынды оқушыларға арнайы «Сыр Дарыны» медалін табыстады. Сонымен бірге оқушылар мен студенттер арасында өткен дебаттық турнир жеңімпазы №3 ІТ мектеп-лицейдің бітіруші түлегі, Алтын белгі иегері Арайлым Жақсылыққа Қорқыт ата атындағы Қызылорда университетінің гранты бұйырды.
Жиында республикалық олимпиада қорытындысымен «Үздік 100 мектеп» жобасының жеңімпаздары да марапатталды.
Кездесу соңында Сыр дарындылары атынан мектеп оқушылары Нұрайым Пакуаддинова мен Бағдаулет Жарылқасын сөз алып, жүрекжарды тілегін арнады. Мұнан кейін білімпаз жастар мотивацияға толы «Бір үйдің баласындай» әнін шырқады.
Басқосу соңында Гүлшара Әбдіқалықова Сыр өрендерінің халықаралық, республикалық білім додадарындағы жеңісі Тәуелсіздіктің 30 жылдығына арнайы тарту болғанын атап өтіп, дарындыларға сенім білдірді.
<img src="https://kyzylorda-news.kz/wp-content/uploads/2021/07/203582231_3491471917622519_719080614948238654_n.jpg" alt="" />
<img src="https://kyzylorda-news.kz/wp-content/uploads/2021/07/206467378_3491471717622539_1188005476433061654_n.jpg" alt="" />
<img src="https://kyzylorda-news.kz/wp-content/uploads/2021/07/208049388_3491470830955961_5831281876264693318_n.jpg" alt="" />

Гүлшара Әбдіқалықова: Сыр бойы қай кезде де ұлы тұлғаларға кенде болмаған

<a href="https://kyzylorda-news.kz/">Kyzylorda-news.kz</a>. Қызылорда облысының білім басқармасы және Қорқыт ата атындағы Қызылорда университеті бірлесіп, мектеп және колледж бітіруші түлектер арасында облыстық дебат турнирін ұйымдастырған. Дебатқа қатысқан Арайлым Жақсылық «Үздік спикер» атанып университеттің грантын жеңіп алды.
<blockquote>
 «Дебат тек зияткерлік ойын емес, ол – сыни ойлау дағдыларын қалыптастырып, ақпаратты дұрыс талдауға, командамен бірлесіп жұмыс істеуге, сұрақ қойып, оларға нақты жауап беруге үйрететін білім беру технологиясы.Бүгінгі дебат турнирінде жеңіске жетіп, Грант иегері атанғаныма өте қуаныштымын. Алдағы уақытта өзім қалаған оқу орнында сүйікті мамандығымды меңгере отырып, дебатпен әлі де айналысамын деген ойым бар»,- деді №3 IT мектеп-лицей оқушысы &nbsp;Арайлым Жақсылық.
</blockquote>
Алдағы уақытта университетте халықаралық ұйымдармен бірлескен ашық алаңдар, республикалық&nbsp; турнирлер, YouTube желісінде онлайн дебаттар ұйымдастыруды, халықаралық дәрежедегі спикерлермен семинар-тренингтер өткізуді, мектеп оқушыларын жүйелі түрде пікірсайысқа баулу сияқты көптеген іс-шараларды жоспарлауда. Турнирдің жеңімпазына грант сертификаты облыс әкімінің қатысуымен өтетін шарада арнайы табысталатын болады.
<blockquote>
 &nbsp;«Қазақстан Республикасының Білім және ғылым министрі Асхат Аймағамбетовтың еліміздегі дебат клубтарын жандандыруды қолға алуын жастар арасындағы қозғалысты жаңа деңгейге көтеру ісіне көрсетілген үлкен қолдау деп білеміз.Бүгін міне турнирге барлық аудандар және қаламыздан арнайы 11 фракция қатысып, қоғамдағы түрлі өзекті проблемаларды талқылап, нақты ұсыныстар әзірлеуде. Турнирдің Үздік спикеріне арнайы университет ректорының Грантын тағайындау жөнінде шешім қабылдадық. Біздің басты мақсатымыз – пікірсайыс клубтарын дамыту арқылы жас көшбасшылар мектебін қалыптастыру»,-деді Қорқыт ата атындағы Қызылорда университетінің ректоры Бейбіткүл Каримова.
</blockquote>

Қызылордалық оқушы дебатқа қатысып, білім грантын жеңіп алды

<a href="https://kyzylorda-news.kz/">Kyzylorda-news.kz</a>. ЮНИСЕФ «Еріктілер» бағдарламасы аясында Қорқыт Ата атындағы Қызылорда&nbsp; университетімен жұмыс істемек.&nbsp;
ЮНИСЕФ-тің Қазақстандағы өкілі Артур ван Дизен&nbsp; Қорқыт Ата атындағы Қызылорда университетінің ректоры Бейбіткүл Каримовамен кездесті. Басқосуда Артур ван Дизенге 85 жылдық тарихы бар университеттің тыныс-тіршілігі, алға қойған мақсат-міндеттері туралы таныстырылды.&nbsp;
<blockquote>
 ЮНИСЕФ ұйымы 75 жылдан бері әлемнің түкпір-түкпірінде жұмыс істейді. Ұйымның 190 елінде өкілдігі бар. 6 млрд доллар қаржысы бар ұйым Қазақстандағы балалардың өмірін жақсарту мақсатында әр өңірді аралап, зерттеу жүргізуде. Артур Ван Дизен әлеуметтік саясат саласында, қолданбалы әлеуметтік зерттеулерде, мониторинг пен бағалауда және бағдарламаларды басқаруда 25 жылдан астам тәжірибесі бар. Іскерлік кездесу көптеген жобаның жүзеге асуына себепші болды. Алдағы уақытта ЮНИСЕФ ұйымымен бірлесе отырып&nbsp;бірнеше жобаны жүзеге асыруды жоспарлап отырмыз, – дейді университет ректоры Бейбіткүл Сәрсемханқызы.
</blockquote>
ЮНИСЕФ үшін инновация, жас адамдардың дағдыларын дамыту мен гендерлік теңдікті ілгерілету аса маңызды. Осы орайда UniSat наноспутниктерін әзірлеу бойынша қыздарға арналған білім беру бағдарламасына университеттің&nbsp;ғылым, технология, математика, инженерия&nbsp;бағыттарында білім алатын студенттерді қатыстыру жоспарлануда. Сонымен қатар&nbsp;өңірдегі экологиялық мәселелерді шешу бағытында да бірқатар жоба&nbsp;талқыланды.
<blockquote>
 Біз экология, қоршаған орта және оның балаға әсері туралы әңгімелестік. БҰҰ-ның «Еріктілер» атты бағдарламасы жүйелі жұмыс істеп, өз нәтижесін беруде. ЮНИСЕФ Қазақстанда 9 000-нан аса волонтермен жұмыс істейді. 2020 жылы Қазақстандағы балалар мен қауымдастықтарды қолдау үшін волонтерлар ретінде жастарды тарту бойынша өзінің алғашқы бағдарламасын бастады. Алдағы уақытта Қорқыт Ата атындағы Қызылорда университетінің студенттерін бағдарламаға қосуға ұсыныс айттым. Университет мұражайын аралап, қосымша мәлімет алдым. Қызылорданың Астана болғанын, Арал теңізінің ғасырлар бойы өзгеріске ұшырай отырып, сақталу бағытындағы тарихи деректермен таныстым. Білім-ғылым саласы өзіме жақын болғандықтан университет тарихымен танысу мен үшін маңызды болды, – дейді ЮНИСЕФ-тің Қазақстандағы өкілі Артур ван Дизен.
</blockquote>
<a href="https://baq.kz/news/othernews/kyzylorda-universiteti-men-yunisef-birlesip-zhobalar-iske-asyrmak/">Baq.kz</a>

Қызылорда университеті мен ЮНИСЕФ бірлесіп жобалар іске асырмақ

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаев биыл дәстүрлі форматта өтетін жаңа оқу жылына дайындық жұмыстарын қазірден бастап қолға алу қажет екенін қадап айтты, деп хабарлайды&nbsp;<a href="https://www.akorda.kz/kz/kasym-zhomart-tokaev-auyl-akimderin-saylau-maseleleri-zhoninde-kenes-otkizdi-2355013">Ақорда.</a>&nbsp;
Оның айтуынша, көптеген білім ордасы бір жылдан астам уақыт толыққанды жұмыс істемеді. Бұл ретте Қасым-Жомарт Тоқаев университеттердің, мектептер мен балабақшалардың инфрақұрылымдарының дайындығын, сонымен қатар оқытушылар мен тәрбиешілер штатының жасақталу деңгейін тексеруді тапсырды.

Жаңа оқу жылы дәстүрлі форматта өтеді – Қасым-Жомарт  Тоқаев

<a href="https://kyzylorda-news.kz/">Kyzylorda-news.kz</a>. «Алтын белгi» иегерлерінің нәтижесі тағы бір рет тексеріледі. Бұл туралы Алматы қалалық білім беру басқармасының басшысы Ляззат Жылқыбаева мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
Басқарма басшысы қашықтан оқыту кезінде үздік оқушылардың көбейгенін мойындап отыр.
<blockquote>
 «Иә, «Алтын белгi» иегерлерінің саны өсіп отыр. Бірақ ондай жағдай Алматыда ғана емес, жалпы Қазақстан бойынша байқалып отыр. Мәселен, былтыр Алматы қаласында мектепті үздік бітірген 528 оқушы болса, биыл 624 бала алтын медаль иегері атанып отыр. Алайда бір нәрсені ескеру керек, 2020 жылы түлектердің жалпы саны 7 мың адам болса, биыл 11 мың оқушы мектепті тәмамдап отыр. Проценттік арасалмақта қарасақ, керісінше, үздіктердің саны төмендеп отыр. Дегенмен, бір қала үшін 624 «Алтын белгi» тым көп», – дейді Жылқыбаева.
</blockquote>
Оның айтуынша, қазіргі кезде бақылау шаралары қолға алынып отыр. “Алтын белгi” алған оқушылардың барлық жұмысы қайта тексеріледі.
<blockquote>
 «Бұдан бөлек, біз мектеп директорларының қатысуымен кеңес өткізіп, сол жерде әрбір медальді беру мәселесін пысықтаймыз. Талдау жасаймыз», – деп атап көрсетті басқарма басшысы.
</blockquote>
Оның сөзіне қарағанда, әзірше “Алтын белгi” иегерінің ҰБТ-да шекті ұпайды алмауы тіркелген жоқ. Барлығы өз дәрежесін растады.
<blockquote>
 «Білім басқармасы ұлттық бірыңғай тестілеу аяқталғаннан кейін 30 маусымда «Алтын белгi» иегерлерінің нәтижесін тағы бір рет тексеріп шығады», – деді Жылқыбаева.
</blockquote>

Қазақстан және Қызылорда облысының жаңалықтары: Білім