<a href="https://kyzylorda-news.kz/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова Түркияда өткен халықаралық білім байқауының жүлдегері Ерасыл Сапарбековпен кездесті. Талантты жас география пәнінен онлайн форматтағы халықаралық олимпиаданың қола жүлдегері атанып, Сыр елінің абыройын асырды.
Кездесуде аймақ басшысы Сыр елі үшін тамыз айының жемісті болғанын тілге тиек етіп, Токио олимпиадасынан қола жүлде әкелген жерлесіміз Қамшыбек Қоңқабаевтан кейін Ерасылдың олжалы оралғанын атап өтті. Бұл Сыр елінің ғана емес, ел мерейін асырған ерекше сәт деп жас өренге ақжолтай тілегін арнады. &nbsp;
<blockquote>
 «Ең алдымен Өзіңді онлайн форматта өткен Түркия жеріндегі жарқын жеңісімен шын жүректен құттықтаймын. Әлем елдерінің 160-тан астам дарынды жастары қатысқан білім додасында жүзден жүйрік, мыңнан тұлпар шығып, қола медаль иелену, шын мәнінде, үлкен жетістік. Бұл сенің талай жылдардан бергі талмай ізденгеніңнің нәтижесі, ата-анаң мен ұстаздарыңның ортақ жемісі. Бұл жүлдең біз үшін алтынмен тең. Білім көгінде жұлдызың биіктен жарқырай берсін деген тілегімді білдіремін», – деді Гүлшара Әбдіқалықова.
</blockquote>
Жүздесуде аймақ басшысы Ерасыл Сапарбековке аймақ абыройын асырып, білім додасында алға шыққаны үшін арнайы естелік сыйлықты табыс етті. Өз кезегінде жас өрен сенім білдіріп, қолдау көрсеткен Сыр жұртшылығына алғысын айтып, білім сынында бұдан да жақсы жетістіктерге жетіп, биік шыңды бағындыратынына уәде етті.
Айта кетейік, Ерасыл Сапарбеков №9 Білім-инновация лицейінің 10-сынып оқушысы. Осы кезеңге дейін халықаралық Әл-Фараби атындағы география пәнін өткен онлайн олимпиаданың алтын медаль иегері. Облыстық, қалалық пәндік олимпиада жеңімпазы атанған.
<img src="https://kyzylorda-news.kz/wp-content/uploads/2021/08/bek_7676-scaled.jpg" alt="" />
<img src="https://kyzylorda-news.kz/wp-content/uploads/2021/08/bek_7740-scaled.jpg" alt="" />

Гүлшара Әбдіқалықова Түркияда өткен халықаралық білім байқауының жүлдегерімен кездесті

*<a href="https://kyzylorda-news.kz/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова қаладағы бірқатар білім мекемелеріне барып, мектептердің жаңа оқу жылына дайындығын саралады.*
Алдымен аймақ басшысы Әли Мүсілімов атындағы №101 мектеп-лицейіне барып, оқу процесіне әзірлікті бақылады. Білім ошағында 230 педагог қызмет істесе, оның 99 пайызы коронавирусқа қарсы екпенің толық курсын алған. Қазір мектепте оқитын 2200-ден аса оқушының ата-анасына екпенің маңыздылығы, «Ashyq» қосымшасы туралы түсіндірме жұмыстары жүргізіліп жатыр.
Биыл мектепте 1-сыныпқа 258 бала қабылданбақ. Олардың қауіпсіздігі үшін “бір сынып, бір кабинет” жүйесі сақталған. Өңір басшысы оқушылардың толыққанды, кедергісіз білім алуы үшін карантиндік талаптарды қатаң сақтауды назарға салып, дәстүрлі форматта білім алуға оралған әрбір оқушының денсаулығына жете мән беру керектігін қатаң тапсырды.
<blockquote>
 «Дәстүрлі форматта балаларымыз мектепке келіп оқитындықтан балалардың карантин талаптарын нақты орындап, сақтық шараларын сақтауына көңіл бөлінуі тиіс. Оқушылар арасында түсіндірме жұмыстарын күшейту қажет. Ал, әрбір педагог балалардың денсаулығы үшін екпенің толық курсын алуы маңызды» – деді облыс әкімі.
</blockquote>
Мұнан кейін облыс әкімі Жанәбіл Нұрманов атындағы №198 орта мектептің оқу жылына дайындығын саралады. Негізі 1966 жылы қаланған мектепте 2000-нан аса оқушы білім алады. Өткен оқу жылында 287 оқушы дәстүрлі форматта, қалған 1875 білім алушы онлайн форматта оқыған. Биыл бұл мектепте 1-сыныпқа 785 бала қабылданады. Жаңа оқу жылындағы тағы бір жаңалық – қазақ сыныбының ашылуы.
Гүлшара Әбдіқалықова қалыптасқан жағдайды ескере отырып, мектепке оралатын оқушылардың қауіпсіздігі үшін мұғалімдер мен ата-аналардың жауапкершілігі аса маңызды екенін тілге тиек етті. Білім нысандарын бақылауға алған облыс әкімі С.Толыбеков атындағы №3 мектеп-лицейінде де болды. Мұнда екі мыңнан аса бала білім алады. Ұстаздардың 100 пайызы екпе салдырған. Оқушы санының көптігіне байланысты мектеп үш ауысымға ауысу қаупінде тұр. Бұған байланысты облыс әкімі білім басқармасының басшысы Ақзира Қасымоваға аталған мәселені шешу тетіктерін қарастыруды және адам шоғырын шектеу үшін жаңа оқу жылында барлық мектептерге «бір сынып – бір кабинет» жүйесін қолдануды тапсырды. Оқудың дәстүрлі форматта өтуіне байланысты барлық мектептер «ASHYQ» қосымшасына қосылған. Сонымен бірге, мектеп оқушыларының күнделікті дене қызуын өлшеніп, маскалық режимнің сақталуы, кварцтау, желдету, дезинфекциялау шараларын қатаң сақтауы тиіс.
Айта кетейік, аймақтағы 177 196 оқушының он пайызы мектеп табалдырығын алғаш аттайды. Яғни 18 мыңнан аса оқушы үшін “Әліппе” мен «Ана тілі» оқулығы беріледі. Білім ошақтарын аралаған облыс әкімі жаңа оқу жылына дайындық барысын тағы бір пысықтап, санитарлық-эпидемиологиялық шараларды толық бақылауда ұстап, қажетті қадамдарды уақытылы орындау қажет деді.
<img src="https://kyzylorda-news.kz/wp-content/uploads/2021/08/fb_img_1629471737133.jpg" alt="" />
<img src="https://kyzylorda-news.kz/wp-content/uploads/2021/08/fb_img_1629471742900.jpg" alt="" />
<img src="https://kyzylorda-news.kz/wp-content/uploads/2021/08/fb_img_1629471756284.jpg" alt="" />

Гүлшара Әбдіқалықова жаңа оқу жылына дайындық барысын саралады

<a href="https://kyzylorda-news.kz/">Kyzylorda-news.kz</a>. Қазақстанда «Алтын белгіні» алу талаптары қатаңдатылады. Бұл туралы ҚР Білім және ғылым министрі Асхат Аймағамбетов.
<blockquote>
 «Біз жыл сайын талаптарды кезең-кезеңімен қайта қарап келеміз. Өткен жылы талапты қатаңдату мәселесі көтеріліп, бірқатар өзгеріс енгізілді. Биыл екінші кезеңде үміткердің оқу жылы соңындағы нәтижесі ғана емес, 5-11 сынып аралығында әр тоқсанды беске аяқтауы ескеріледі», – деді Асхат Аймағамбетов.
</blockquote>
Министрлік&nbsp; мұндай талапты маңызды әрі нәтижелі деп есептейді. «Алтын белгіге» үміткер орта білімін мектепте мемлекеттік емтиханды беске тапсырып, қорғап шығуға тиіс.
«Алтын белгі» – қазақстандық білім беру жүйесінде озат оқушыға берілетін төс белгі.

Министрлік «Алтын белгі» алу талаптарын қатаңдатады

<a href="https://kyzylorda-news.kz/">Kyzylorda-news.kz</a>.&nbsp;Жаңа оқу жылынан бастап педагогтарды жұмысқа қабылдаудың жүйесі өзгереді. Ал, 2022 жылдың қаңтарынан балабақша мен мектеп, колледж мұғалімдерінің жалақысы тағы 25%-ке өседі. Бұл туралы Білім және ғылым министрі Асхат Аймағамбетов тамыз кеңесінде мәлімдеді.
Бас ұстаздың айтуынша, осыған дейін мұғалімдерді мектеп директоры қабылдаса, қазір олар электронды форматта конкурстан өтеді. Сонымен қатар мектеп директорларын тағайындау жолы өзгермек. Жаңа тағайындау жүйесі жетекшілердің жұмыс тиімділігін арттырады. Себебі, бір орында 25-30 жыл табан аудармай істеген басшылар бар. Әрі мектеп басшылығының жалақысы да көтерілетін болады. Сондай-ақ бұдан былай мұғалімдердің біліктілігін бес жылда бір рет емес, екі немесе үш жылда бір өткізілуі мүмкін.
<blockquote>
 «Қыркүйектен бастап білім беру мекемелерінің директорларына алғаш рет ротация енгізіледі. Ротация маңызды қадам болып есептеледі. Бұйрыққа қол қойылды. Ол қыркүйекте өз күшіне енеді», – дейді Асхат Аймағамбетов.
</blockquote>
Білім және ғылым министрінің айтуынша, колледждерге академиялық дербестік берілді. Енді олардың өздері жұмыс берушілермен бірлесіп, білім беру бағдарламаларының мазмұны мен оқу мерзімдерін айқындайтын болады. Білім беру бағдарламалары студенттерге қажетті білім алып, қысқа мерзімде жұмысқа орналасуға мүмкіндік береді.

Жаңа оқу жылынан бастап мұғалімдердің жалақысы өседі

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысы бойынша «Елбасы медалі» жобасының 52 қатысушысы ҚР жоғары оқу орындарына білім гранттарын алды.
Қызылорда облысының атынан Елбасы медалінің иегері атанған 52 жоба қатысушысы ҚР жоғары оқу орындарына білім гранттарын алды. Енді олар &nbsp;ұлттық бірыңғай тестілеуде және «Елбасы медалі» жобасында жоғары баллдардың арқасында тегін оқи алады.
Естеріңізге сала кетейік, «Елбасы медалінің» иегерлеріне Қазақстан Республикасының заңнамасында белгіленген тәртіппен ұпайлары тең болған жағдайда білім беру гранттарын алуға басымдық берілді.
Еліміз бойынша барлығы 605 медаль иегері грант алды.Гранттардың ең көп бөлігін Нұр-Сұлтан және Алматы қалаларынан, сондай-ақ Қызылорда және Павлодар облыстарынан келген болашақ студенттер алды. Ал жүлдегерлер арасында ең танымал оқу орындары – Әл-Фараби атындағы Қазақ ұлттық университеті, Л. Н.Гумилев атындағы Еуразия ұлттық университеті және Сүлеймен Демирел атындағы Университет және Astana IT University.
«Биыл мен таңдаған мамандыққа грант аз бөлінді. Ең төменгі өту баллы 125-тен 123-ті құрады. Мұндай жоғары бәсекелестікке таң қалдым. Алайда, өткен жылы «Елбасы медалі» бағдарламасына қатысып, қола медаль алдым. Бұл медаль маған грантқа түсу кезінде басымдық берді», – деді Instagram парақшасында жаңалығымен бөліскен Халықаралық ақпараттық технологиялар университетінің талапкері Динара Болатова.
«Елбасы Академиясы жобаларының әрбір қатысушысы – біздің &nbsp;мақтанышымыз. «Елбасы медалі» жобасы дарынды жастардың, әсіресе ауыл балалары үшін болашақ табыстарға жетуіне маңызды қолдау болатынын көріп отырмыз. Жақын арада осы мақсатта тағы да бірнеше жобаны жүзеге асыру жоспарда бар. Тұрғылықты жеріне қарамастан, әрбір жас қазақстандықты жобаларға қатысуға шақырамыз», – деді «Елбасы Академиясы» КҚ директоры Асланбек Амрин.
«Елбасы медалі» жобасына барлығы 21 мыңнан астам бала қатысады. Оның ішінде 6 078 қатысушы бағдарламаны аяқтап, қола және күміс медальдарға иеленді. Естеріңізге сала кетейік, бұл – жастарды кешенді дамытуға бағытталған ұлттық деңгейдегі жоба. Бағдарлама 7 негізгі бағыттан тұрады: спорт, дарын мен дағды, кітап оқу, ұлттық мұра, волонтерлік, саяхат мен жорықтар, еңбек тәжірибесі. Бағдарлама 14 пен 29 жас аралығындағы жастарға арналған.
2021-2022 оқу жылындағы Елбасы медалі мен білім беру гранттары иегерлерінің сандық деректері
№
Облыс атауы
Елбасы медалі мен білім гранты иегерлері
&nbsp;
1
Ақмола облысы
15
2
Алматы облысы
27
3
Ақтөбе облысы
18
4
Атырау облысы
11
5
Батыс Қазақстан облысы
21
6
Маңғыстау облысы
39
7
Шығыс Қазақстан облысы
27
8
Жамбыл облысы
9
9
Қарағанды облысы
18
10
Қызылорда облысы
52
11
Түркістан облысы
13
12
Қостанай облысы
28
13
Павлодар облысы
43
14
Солтүстік Қазақстан облысы
29
15
Нұр-Сұлан қаласы
64
16
Алматы қаласы
137
17
Шымкент қаласы
54
&nbsp;
Барлығы
605

«Елбасы медалі»: Қызылордада 52 қатысушы грантқа ие болды

<a href="https://kyzylorda-news.kz/">Kyzylorda-news.kz</a>.&nbsp;Қызылорда қаласындадағы Назарбаев Зияткерлік мектебінің 2020-2021 оқу жылы түлектерінің жоғары оқу орындарына түсу көрсеткіші 100 пайызды құрады. Жас зияткерлердің дерлігі қазақстандық және шетелдік университеттердің білім гранттарына қол жеткізді.
Биыл мектептен түлеп ұшқан 95 зияткердің 38 пайызы Назарбаев Университетіне қабылданды. Ал 13 сырбойылық жас зияткер Италия, Ресей, Гонконг, АҚШ, Венгрия, Оңтүстік Корея және Малайзия елдерінің озық білім ордаларынан тегін оқуға шақырту алды.
<blockquote>
 «Мектеп маған коммуникация, жауапкершілік, өз ойымды еркін жеткізе білу дағдыларын бойыма дарытты. Бұл өз кезегінде болашақта өзге елде білім алуда, жаңа ортаға бейімделуде өзінің үлкен септігін тигізетініне сенімдімін. Тандаған мамандығым ғылым саласына қатысты болғандықтан, келешекте туған жерде ғылыми жаңалықтарды ашуға және ғылымға халықаралық тәжірибені енгізуді жоспарлаймын», – дейді Оңтүстік Кореяның Кваджу технология мен ғылым институтының студенті Зарина Алтынбай.
</blockquote>
Мектеп шәкірттерінің басым бөлігі әдеттегідей медицина, ақпараттық технологиялар мен ғылым бағытындағы мамандықтарға таңдау жасады. Келешегін әлеуметтану, педагогика, экономика, бизнес, құрылыс пен халықаралық қатынастар саласымен байланыстырғысы келетіндер жоқ емес. Ринат Керімсал жоғары академиялық білімнің арқасында және NIS оқу бағдарламасының халықаралық мойындалуының нәтижесінде Назарбаев Университетінің тікелей бірінші курсына оқуға түсті. НУ-ға шақырту алуда мектептегі ұстаздардың қосқан үлесі зор деп санайды:
<blockquote>
 «Назарбаев Университетін таңдаудағы басты себебім – ол оқу ордасының әлемнің үздік университеттерінің ұстанатын жүйесі бойынша студенттерге сапалы білімді ұсынуы. Саясаттану және халықаралық қатынастар мамандығын игеру арқылы әлемдегі түрлі өзгерістерді саралап, Қазақстанның басқа елдермен достық қарым-қатынаста бірге дамуын қамтамасыз еткім келеді», – дейді жас түлек.
</blockquote>
Сондай-ақ, оқушылардың таңдауы Әл-Фараби атындағы Қазақ ұлттық университеті, С.Ж. Асфендияров атындағы Қазақ ұлттық медицина университеті, Астана медицина университеті, Қазақстан-Британ техникалық университеті, Сулеймен Демирел атындағы Университет, Astana IT University секілді беделді жоғары оқу орындарына түсті.

Қызылорда: NIS түлектері – озық университет студенттері

<a href="https://kyzylorda-news.kz/">Kyzylorda-news.kz</a>.&nbsp;Қызылордалық оқушы Түркияда топ жарды.
Қызылорда қаласындағы №9 дарынды балаларға арналған облыстық «Білім-инновация» лицей-интернатының 10 сынып оқушысы Ерасыл Сапарбеков түрік еліндегі білім додасында топ жарды.
Ол Туркияның Стамбул қаласында география пәнінен өткен халықаралық олимпиадасына қатысып, үшінші орын – «қола медаль» иеленді.
Айта кетейік, 6 күнге созылған олимпиадаға әлемнің 46 елінен 200-ге жуық оқушы қатысты. Соның ішінде Қазақстанның атынан Қызылорда, Ақтөбе және Шымкент қаласынан 4 оқушы қатысып, бақтарын сынаған болатын.

Қызылордалық оқушы Түркияда топ жарды

<a href="https://kyzylorda-news.kz/">Kyzylorda-news.kz</a>.&nbsp;Биыл алғаш рет еліміздің әрбір мұғалімі жылдың бас педагогикалық кеңесіне қосылуға мүмкіндік алып отыр. Бүгінде NIS-тің орталық кеңсесінде тікелей эфир арқылы ауқымды конференцияның пәндік сессиялары ел аумағына таралатын екі телестудия үздіксіз жұмыс істеуде. Мұғалім тәжірибесін әдістемелік қолдау – жаңа жағдайдағы білім беру туралы кәсіби ойталқының өзегі.
9-17 тамыз аралығында өтетін дәстүрлі тамыз конференциясы аясында қазақ және орыс тілдерінде 15 пән бойынша тақырыптық сессиялар, сондай-ақ кітапханашылар сессиясы жоспарланған. «Назарбаев Зияткерлік мектептері» ДББҰ, жетекші және пилоттық мектептердің педагогтері онлайн форматта вебинарлар, шеберлік сабақтар мен презентациялар өткізеді, халықаралық сарапшылардың эксперттік пікірлері ұсынылады, сондай-ақ Ы.Алтынсарин атындағы Ұлттық Білім академиясы жаңа оқу жылында оқу-тәрбие үдерісін ұйымдастыруға қатысты ұсыныстарын білдіреді. Қазіргі таңда педагогтер үшін ең өзекті басымдықтардың бірі – пән аясында функционалдық сауаттылықты қалыптастыру, сондай-ақ ағымдағы және қорытынды бағалаудың форматы мен мазмұны.
Онлайн-кеңестің алғашқы күні еліміздің әр өңірінен ондаған мың педагог жиналды. Пәндік сессиялар бастауыш сынып мұғалімдері мен «Жаратылыстану» пәніне арналды. Тікелей эфир ЭЫДҰ-ның «Білім беру 2030» компасын тамашалаудан басталып, мектеп табалдырығын енді ғана аттамақ Айзере Қайратбек пен Самина Сейтбекованың сұрақ-жауап сұхбатымен жалғасын тапты. Олар NIS телестудиясына өздерінің армандаған мектептері туралы ой бөлісу үшін келді. Бастауыш сынып мұғалімдеріне арналған пәндік сессиянының шымылдығын болашақ мектеп оқушылары түрді. Айзере мен Самина жаңа өмірге жетелеуші болашақ ұстаздарының қандай болатынын елестетіп, бала армандарымен бөлісті.
Сарапшылар жаңа оқу жылына арналған міндеттерді, ағымдық және қорытынды бағалаудың форматы мен мазмұнын, оқушылардың функционалдық сауаттылығын қалыптастыруды талдады, ал зияткерлік және жалпы білім беретін мектептердің мұғалімдері шеберлік сыныптарын дайындады. Спикерлер арасында Педагогикалық шеберлік орталығының өкілдері: бастауыш мектеп пәндері бойынша оқу бағдарламаларын жасаушы, мектепке дейінгі және бастауыш білім беру бөлімінің бастығы Қаламқас Байтенова, аға менеджерлер Наталья Орехова мен Гүлмира Жақыпова, сондай-ақ Ыбырай Алтынсарин атындағы Ұлттық білім академиясының ЖМБ және STEM-технологиялар пәндері зертханасының бас ғылыми қызметкері Орденбек Мазбаев, Павлодар қаласындағы NIS-тің өнер мұғалімі Динара Қабиева және басқалары болды.
Онлайн-конференцияға Алматы облысы Текелі қаласынан қосылған №8 орта мектептің бастауыш сынып мұғалімі Гүлнар Мұсабекова пәндік сессия барысында одан әрі жұмыс істеу үшін көптеген жаңа білім мен идеялардың тұсбағдарын тапқанын айтады.&nbsp;
<blockquote>
 «Карантиндік шектеулерден туындаған қиындықтарға қарамастан үлгерім деңгейін тиісті дәрежеде ұстап тұру&nbsp; мүмкіндігіне ие болдық . Бастауыш сынып мұғалімдеріне арналған конференция алдағы оқу жылында әдеттегі оқыту форматына оралуға дайындалуға өз септігін тигізері анық», – деп пікір білдірді Гүлнар Мұсабекова.
</blockquote>
Қаратал ауданы Қошқарбаев атындағы орта мектептің жаратылыстану пәні мұғалімі Алишер Советбаев NIS-ке конференцияның мазмұнды әдістемелік бөлімі үшін алғысын білдіріп, оқытудағы олқылықтардың орнын толтыру бойынша сарапшылар кеңесі барлық мүмкін қиындықтарды еңсеруге және оқу процесін қалыпты режимде сенімді түрде жалғастыруға көмектесетінін айтты.
Пәндік сессиялардың екінші күнінің басты назарында – музыка, көркем еңбек және дене шынықтыру мұғалімдері болды.
Сарапшылар музыкалық, цифрлық және ақпараттық сауаттылықтың бірегей қосындысы туралы ой қозғап, сауаттылықты дұрыс дамыта отырып, музыканы тыңдау және орындау ұлттық және әлемдік мәдениеттің құндылығын түсінуге көмектеседі деген қорытындыға келді. Көркем еңбек сабақтарында әдемілік пен нәзіктік сезімі қалыптасады. Өнер саласындағы сарапшылардың пікірінше, балалардың шығармашылық қабілеттерін дамыту мұғалімнің шығармашылығына тікелей байланысты.
Шеберлік сабақтары барысында NIS-тің&nbsp; пән мұғалімдері – Әлия Кайдарова, Альмира Даниярова, Гаухар Қайырбаева және Сәуле Ахметқалиева, сондай-ақ жалпы білім беретін мектептердің педагогтері Юлия Березко, Зейнолла Хасенов және Мұхаметқан Ахметжанов өз білімдерімен бөлісті.
Шымкенттегі физика-математика бағытындағы NIS-тің дене шынықтыру пәнінің мұғалімі, &nbsp;«Үздік педагог – 2019» республикалық байқауының жеңімпазы Ербол Тілеулов шеберлік сабағы &nbsp;барысында дене шынықтыру сабақтарында функционалдық сауаттылықты дамытуға болатынын және қажет екенін көрсетті.
<blockquote>
 «Өз денеңмен үйлесімді өмір сүру – дені сау адамның салауатты өмірінің міндетті компоненті. Бұл қағиданы қозғалыс белсенділігі, салауатты өмір салты және қозғалыс дағдылары арқылы сыни ойлауды дамытуға негізделген оқу бағдарламасының басты бағыты айқындай түседі», – дейді Ербол Эрнстович.
</blockquote>
Сегіз мыңнан астам дене шынықтыру мұғалімдері жаңа оқу жылында өз сабақтарында осы құралдарды қалай қолдану керектігі туралы көрнекі түсінік алды.
Ел педагогтеріне арналған тамыз конференциясының үшінші күнінің фокусын – филологтарға арналған пәндік сессиялар құрады.
Жиырма мыңнан астам пән мұғалімдері педагогикалық қоғамдастық үшін өзекті тақырыптарды талқылап, сарапшы әріптестерінің шеберлік сабақтарына қатысу үшін қазақ, орыс және ағылшын тілдерінен онлайн конференцияға қосылды.
Филологтар оқушылардың оқу сауаттылығын дамыту жоспарларын талдады, өйткені әртүрлі мәтіндерді түсініп оқып, қойылған міндеттерді шешу үшін ақпаратты пайдалану қабілеті 21 ғасырдағы адамның маңызды құзыреттерінің бірі болып табылады. Қазіргі адамдардың тағы бір маңызды шеберлігі – үлкен көлемде ақпаратпен жұмыс істеу.
<blockquote>
 «Мен оқушылардың сауаттылығын дамыту әдістері туралы сұрақтарға жауап алдым. Мәтінмен жұмыс істеу үшін берілген тапсырмалар мен авторлардың ұсыныстары пайдалы болды. Айта кету керек, ақпарат пен қаралған материалдар маған өз көзқарастарымды тағы бір рет қайта қарап, ішкі дүрбелеңнен арылуға, өзімді сенімді сезінуге, функционалдық сауаттылық туралы үзік білімді жүйеге келтіруге және өз тәжірибемді одан әрі жетілдірудің жолын көруге мүмкіндік берді», – деп өз әсерімен бөлісті Қарағанды облысы Қарқаралы ауданы №2 орта мектептің орыс тілі мен әдебиеті пәнінің мұғалімі Арай Тобықова.
</blockquote>
Келесі кезекте онлайн-конференцияның тікелей эфиріндегі сессиялар математика, информатика, физика, химия, биология,&nbsp;география, Қазақстан тарихы, Дүниежүзі тарихы пәндерінің мұғалімдеріне арналмақ. Ауқымды педкеңес кітапханашыларға арналған секциямен қорытындыланатын болады.
Айта кету керек, жылдың басты педагогикалық жиыны оқу үдерісінде оқушылардың бойында функционалдық сауаттылықты қалыптастыру жолдарын, мектеп қауымдастығындағы оқушылардың қауіпсіздігі мен әл-ауқаты мәселелерін, ағымдағы және қорытынды бағалаудың форматы мен мазмұнын, ковидтен кейінгі кезеңдегі оқу үдерісінің ерекшеліктерін, білім беру саласын цифрландырудың маңызын, білім берудегі жасанды интеллектінің мүмкіндіктері, жаңа оқу жылында оқу-тәрбие үдерісін ұйымдастырудың ерекшеліктерін кәсіби ойталқы өзегіне айналдырды.
<blockquote>
 «Биылғы тамыз кеңесі ерекше форматта өтуде. Ең бастысы жаңа оқу жылының ерекшеліктері мен әр ұстаздың көкейінде жүрген сұрақтарға жауап алынды. Оқушылардың қабілеттеріне қарай жүргізілетін жұмыстарға жекелей тоқтала отырып, практикалық түрде көрсетілді. Конференция барысында ой бөліскен әр маман өз іс-тәжірибесін үлкен дайындықпен жинақтай келіп, әр ұстаздың жүрегіне жол таба білді деп ойлаймын», – дейді Әлкей Марғұлан атындағы №40 мектеп-лицейі директорының оқу-тәрбие ісі жөніндегі орынбасары Жұмагүл Есіл.
</blockquote>
Еске сала кетейік, еліміздің ұстаздар қауымы асыға күткен дәстүрлі тамыз кеңесінің секциялық отырыстары NISTamyzConf2021 Youtube арнасында қазақ және орыс тілдерінде күнделікті таралуда. Сонымен қатар, «Назарбаев Зияткерлік мектептері» ДББҰ ресми интернет ресурстарында конференцияға еліміздің түкпір-түкпірінен қосылған педагогтердің бейне пікірлері мен кері байланыстары жариялануда.
<img src="https://kyzylorda-news.kz/wp-content/uploads/2021/08/333.jpg" alt="" />
<img src="https://kyzylorda-news.kz/wp-content/uploads/2021/08/555-1.jpg" alt="" />

Тамыз кеңесі: NIS-тің тікелей эфирінде – мұғалімдерді әдістемелік қолдау

<a href="https://kyzylorda-news.kz/">Kyzylorda-news.kz</a>. Қызылорда қаласындағы «Білім-инновация» мектеп-лицейінде «Сыр дарыны» білімділер академиясының жаңа маусымының ашылу салтанаты онлайн форматта өтті.
«Zoom» платформасы арқылы ашылу салтанатына қатысқан облыстық білім басқармасының басшысы Ақзира Қасымова бұл академия білім бәсекелерінде өңіріміздің абыройын асқақтатын дарынды балаларды даярлайтын ұстаханаға айналатынына сенім білдірді.
<blockquote>
 «Академия құрамына енген жас дарынды оқушыларымызға алдағы білім бәсекелерінде биік белестерді бағындыруды тілеймін. Зияткерлік жарыстарда көшбасшылық орынға ие болуы үшін біз барлық жағдайды жасауды жалғастыра беретін боламыз», – деді Ақзира Бақтыбайқызы.
</blockquote>
Айта кетейік, «Сыр дарыны» білімділер академиясының негізгі мақсаты – бастауыштан бастап, жоғарғы сыныпқа дейінгі оқушыларды түрлі деңгейдегі олимпиадалар мен конкурстарға дарынды оқушыларды белсенді қатысуын арттыру, жоғары нәтиже көрсетуге жұмыс жасау болып табылады.
Білімділер академиясының жұмысы бүгіннен бастап физика, химия, математика, информатика, биология пәндері бойынша оқыту курстарын бастады.
Академия құрамына облыс бойынша 100 оқушы түрлі білім сынақтары арқылы іріктеуден өткізіліп, таңдалған. Сонымен қатар, 16-21 тамыз аралығында өтетін оқыту курстарына белсенді қатысқан оқушылар апта соңында марапатталатын болады.
<img src="https://kyzylorda-news.kz/wp-content/uploads/2021/08/syr-daryny.jpg" alt="" />

«Сыр дарыны» білімділер академиясы жұмысын бастады

<a href="https://kyzylorda-news.kz/">Kyzylorda-news.kz</a>. Биыл Қызылорда облысында 5 184 оқушы мемлекеттік грантқа өтініш берген. Оның 3 849-ы грант иегерлері атанды.
Өткен оқу жылымен салыстырғанда грант иегерлерінің саны – 791 түлекке көбейіп отыр.Гранттардың бөлінісі бірнеше басым бағыттарға қарай тағайындалды. Атап айтқанда, педагогика саласы мен медицина, ауыл шаруашылығы және техникалық мамандықтарға гранттар алынған. Облыс бойынша грантқа үміткер болған 3 849 оқушының басым бөлігі педагогикалық және техникалық мамандықтарды таңдаған. Тарқатып айтқанда, 1 303 талапкер педагогикалық, 361 түлек медициналық бағытты таңдаса, 1 173 үміткер техникалық мамандықтарға таңдау жасаған. Ал, 217 түлек ауыл шаруашылығы бағытына баруды көздейді. Сонымен бірге 795 түлек өзге де бағыттағы мамандық иесі болуды қалады.
Айта кетейік, 2020-2021 оқу жылының қорытындысы бойынша «Алтын белгі»иегерлерінің 190 – ы, яғни 35%-ы педагогикалық бағыттағы мамандықтарға оқуға қабылданып отыр.

Қызылордада 3 849 талапкер грант иегері атанды

Kyzylorda-news.kz. Қызылорда облысы әкімінің орынбасары Балжан Шаменова Саяхат мөлтек ауданындағы 348 орынға шақталған “Ұлағат білім ордасы” жеке мектебінің құрылыс алаңына барды.
“Nur Otan” партиясының жол картасы аясында бой көтеріп жатқан білім нысанының сапасына баса назар аударған облыс әкімінің орынбасары кемшіліктер орын алмас үшін білім басқармасының басшысына барлық талаптарға сай болуын қадағалауды тапсырды.
<blockquote>
 «Қоғамдық көлік схемасы оқушылар мен ата-аналары үшін тиімді болу керек. Себебі оқушылардың қауіпсіздігін назарға алуға тиіспіз. Сонымен бірге, жаңа оқу жылының қарсаңында уақытылы пайдалануға беруіміз қажет», — деді Балжан Мөрәліқызы.
</blockquote>
Еске сала кетейік, Саяхат мөлтек ауданының тұрғындары осыған дейін мектеп тапшылығының зардабын тартып келген болатын. Тұрғындар қажеттілігін қамтамасыз ету мақсатында мемлекеттік-жекеменшік әріптестік жүйесі негізінде заман талабына лайықталып салынып жатқан бұл мектеп жаңа оқу жылында пайдалануға беріледі деп жоспарлануда.

Балжан Шәменова: Оқушылардың қауіпсіздігін назарға алуға тиіспіз

<a href="https://kyzylorda-news.kz/">Kyzylorda-news.kz</a>. Барлық білім беру ұйымдарында қызметкерлер мен білім алушыларға маска кию міндетті. Бұл туралы бүгін Үкімет отырысында ҚР Білім және ғылым министрі Асхат Аймағамбетов айтты.
<blockquote>
 «Жаңа оқу жылында оқушылардың қауіпсіздігін қамтамасыз ету және денсаулығын сақтау үшін арнайы санитарлық іс-шаралар қабылданады. Барлық мектептер, колледждер мен университеттердегі қызметкерлер мен білім алушыларға маска киюге міндетті болады. Барлық білім беру ұйымдарында күнделікті термометрия, желдету, кварцтеу, дезинфекциялау іс-шаралары жүргізілетін болады», – деді Асхат Аймағамбетов.
</blockquote>
Оның атап өтуінше, студенттер, педагогтар мен басқа да қызметкерлер ғимаратқа «Ashyq» жүйесі арқылы кіргізіледі.

Қазақстан және Қызылорда облысының жаңалықтары: Білім