<a href="https://kyzylorda-news.kz/">Kyzylorda-news.kz</a>. Білім және ғылым вице-министрі Шолпан Қаринова жаңа оқу жылында бірінші сынып оқушыларының білімі қалай бағаланатынын айтты.
Ол 2020 жылдан бастап бірінші сынып оқушыларына баға қоймау туралы шешім қабылданғанын еске салды. Алайда бұл пандемия кезінде қашықтан оқыту форматына ауысумен байланысты емес.
<blockquote>
 “Шешім шектеу шараларының шарттарымен сәйкес келді. Шын мәнісінде болашақта бірінші сынып оқушыларына баға қойылмайды. Бұл мәселеге қатысты әлемдік тәжірибе де зерделенді. Көптеген жетекші дамыған елдер осылай жұмыс істейді”, – деп түсіндірді ол.
</blockquote>
Айтуынша, бүлдіршіндер үшін критериалды бағалау жүйесі енгізіледі. Ол формативті (күн сайынғы жетістіктер) және жиынтық (бөлімдер мен тоқсан бойынша) бағалаудан тұрады.
<blockquote>
 “Биыл қашықтан оқыту басталғанда, ата-аналар көру үшін балалардың күн сайынғы жетістіктерін тіркеп отырдық. Сол себепті ережелерге өзгеріс енгізілді: күн сайын баллмен бағалау. Бұл дәл биылғы оқу жылының ерекшелігі еді”, – дейді вице-министр.
</blockquote>
Ата-аналарды, балалар мен мұғалімдерді бағаның өзі емес, оқу жетістіктері –оқушылардың білімі қаншалықты өскені қызықтыруға тиіс, деп түйіндеді сөзін Қаринова.
<a href="https://sputnik.kz/society/20210607/17269780/Vitse-ministr-1-synyp-baga.html">Sputnik</a>

Вице-министр бірінші сынып оқушылары үшін қандай өзгеріс болатынын айтты

**<a href="https://kyzylorda-news.kz/">Kyzylorda-news.kz</a>. *ҚР Білім және ғылым вице-министрі Шолпан Каринова* ақылы білім беру олимпиадаларының министрлікке қатысы жоқ екенін мәлімдеді, деп хабарлайды ҚазАқпарат.**
<blockquote>
 «Қоғамда көп талқыланып жүрген мәселеге тоқталып өтпекпін. Бұл өз кезегінде ұйымдастырылып жатқан ақылы олимпиадалар мен конкурстарға қатысты. Қазіргі кезде қазақстандық білім беру нарығында жекеменшік кәсіпорындар мен ұйымдар да осы қызметтерді ұсынып келеді. Олар түрлі ақпарат көздері арқылы ата-аналарға да, оқушыларға да, мұғалімдерге де, мектептерге де мәліметтерді толықтай жеткізіп тұрады. Бұл қызмет көрсету саласы лицензияланбайды және министрлік тарапынан ресми тұрғыда рұқсат алуды қарастырмайтын қызмет түрі. Қазіргі кездегі тәжірибеде осы конкустардың барлығы ақылы түрде өткізіліп жатыр. Оларға қатысу үшін ата-аналар өз қаражатын салады», – деді Ш. Каринова Орталық коммуникациялар қызметінде.
</blockquote>
Осы орайда ол аталған ақылы жарыстардың деңгейі түрлі дәрежеде екенін атап өтті.
<blockquote>
 «Ата-аналар мен мұғалімдердің атап өтуінше, олардың ішінде өте нашар ұйымдастырылатындары да кездеседі. Сонымен қатар, балалардың дамуы тұрғысынан қызықты әрі танымдық түрде өткізілетін олимпиадалар баршылық. Көбінесе бұл ұйымдар олимпиадалар атауын министрліктің тізбесінде бекітілген жарыстар секілді етіп жариялайды. Бірақ Білім және ғылым министрлігінің бұл ақылы жарыстарға ешқандай қатысы жоқ екенін атап өтемін. Сондықтан балалар мен мұғалімдер, мектептер әртүрлі олимпиадалар мен конкурстарға оқушылардың қатысуын таңдаған кезде мұқият болуына кеңес береміз», – деді вице-министр.
</blockquote>
Оның айтуынша, өз қаражатын жұмсамас бұрын, ата-аналар ұйымдастырушының кім екенін, балаларды дамытуда қандай тәжірибесі бар екенін, балалардың оларға не үшін қатысуы керектігін, олардың қандай дағдыларды дамытатынын анықтау алуы маңызды.

Шолпан Каринова: Ақылы олимпиадалардың Білім және ғылым министрлігіне қатысы жоқ

Kyzylorda-news.kz. 31 мамырдағы жағдай бойынша елімізде Алматы, Павлодар, Түркістан, Ақтөбе және Қызылорда облыстарындағы 12 сауықтыру ұйымы санитариялық қағидалар мен гигиеналық нормативтердің талаптарына сәйкестігі туралы қорытындыны алды. Бұл туралы ҚР Денсаулық сақтау министрлігі Санитариялық-эпидемиологиялық бақылау комитеті хабарлады.
Бас мемлекеттік санитариялық дәрігердің қаулысымен балаларды сауықтыру лагерлерінің қызметі әлеуметтік-экономикалық объектілердің жұмысын шектеу критерийлерімен айқындалған. «Жасыл» аймақтағы өлшемдерге сәйкес жазғы лагерьлер шектеусіз, «сары» аймақтағы лагерьлер – 50%, «қызыл» аймақтағы 30% жүктемемен жұмыс істейді.
Мұнымен қоса, Бас мемлекеттік санитариялық дәрігердің 26 мамырдағы қаулысына сәйкес балаларды сауықтыру лагерлерінің (мектеп жанындағы, қала сыртындағы) шектеу іс-шаралары, оның ішінде карантин кезіндегі қызмет алгоритмі бекітілді. Оған сәйкес, стационарлық демалыс және сауықтыру ұйымдарының персоналына жұмыс басталғанға дейін 72 сағат бұрын жасалған ПТР зерттеудің теріс нәтижесі бар анықтама немесе коронавирусқа қарсы вакцинаның толық курсын алғанын растайтын құжат болған жағдайда ғана қызметіне кірісуге рұқсат беріледі.
Әрбір бала лагерьге келу кезінде денсаулық жағдайы туралы құжаттарды (сауықтыру лагеріне баратын оқушыға арналған 079/у үлгісіндегі медициналық анықтама), инфекциялық ауруларға, оның ішінде коронавирус инфекциясына шалдыққан науқастармен байланыстың жоқтығын растайтын анықтамаларды, лагерьге келгенге дейін 72 сағат бұрын жүргізілген ПТР зерттеудің теріс нәтижесі бар құжатты ұсынуы шарт.
Бұдан бөлек, сауықтыру ұйымдарының барлығы санитарлық ережелердің талаптарына сәйкес келуі қажет. Дәлірек айтқанда, балалар лагерьлері (жыл бойы жұмыс істейтін ұйымдарды қоспағанда) сауықтыру маусымы басталғанға дейін санитариялық-эпидемиологиялық қорытынды алуға міндетті.
Жыл бойы жұмыс істейтін сауықтыру ұйымдары санитариялық-эпидемиологиялық қорытындыны нысанды пайдалану мерзімі басталғанға дейін бір рет алады.
31 мамырдағы жағдай бойынша елімізде Алматы, Павлодар, Түркістан, Ақтөбе және Қызылорда облыстарындағы 12 сауықтыру ұйымы санитариялық қағидалар мен гигиеналық нормативтердің талаптарына сәйкестігі туралы қорытындыны алды.

Қызылордада балаларды сауықтыру лагерьлері қалай жұмыс жасайды?

<a href="https://kyzylorda-news.kz/">Kyzylorda-news.kz</a>.&nbsp;Қорқыт ата атындағы Қызылорда университеті 1 маусым – Халықаралық балаларды қорғау күніне орай «Атамекен» отбасы үлгісіндегі&nbsp; балалар ауылына барып,&nbsp;мерекемен құттықтады.
Биыл бұл шаңырақта 9 талапкер жоғары оқу орнына түсуге дайындық жүргізуде.
Шара барысында университет Ректоры&nbsp;БейбіткүлКәрімова Бейбіткүл Сәрсемханқызы мектеп бітіруші түлектерді құттықтап, алдағы қадамдарына сәттілік тіледі. Сонымен қатар университет ректоры балаларды Қорқыт Ата атындағы Қызылорда университетінде білім алуға шақырып, өздері таңдаған мамандық бойынша 4 жыл тегін оқу сертификаттары мен оқу орны туралы кітаптарды табыс етті.
<blockquote>
 «Университетте білім алушыларды әлеуметтік қолдау жүйелі түрде жүзеге асып келеді. Мәселен 2020-2021 оқу жылында&nbsp; университеттің 260 білім алушысына жеңілдіктер тағайындалды. Соның ішінде жетім балалар мен ата-ана қамқорлығынсыз қалған балаларға арналған ұйымдар және «Атамекен» отбасы үлгісіндегі балалар ауылының түлектеріне&nbsp; – 10 білім алушыға 100%&nbsp; жеңілдікпен университет гранты берілді» – деді университет ректоры.
</blockquote>
Айта кетейік, Қорқыт Ата атындағы Қызылорда университеті жыл сайын «Атамекендік» балаларға тегін грант үйлестіруді дәстүрге айналдырып келеді. Сонымен қатар, «Ақжайық» үйін университет өз қамқорлығына алған. Яғни балалармен достық қарым-қатынас орнатып, түрлі шараларды бірге өткізеді.
<blockquote>
 «Бүгін бізде қос қуаныш! Бірі балаларды қорғау күні мерекесі болса, екіншісі Қорқыт Ата атындағы Қызылорда университетінің тегін білім беру грантына ие болдық. Қуанышымызда шек жоқ. Университет ұжымына алғысымыз шексіз.&nbsp; Енді біз еш уайымсыз оқуға дайындаламыз. Өзім спортқа жақынмын. Түрлі спорттық үйірмелерге қатысқанды жақсы көремін. Болашақта денешынықтыру пәнінен сабақ берсем, тренер болсам деген ойым бар», – дейді грант иегері Роман Ступновский.
 «Өзім армандаған &nbsp;Қорқыт Ата атындағы Қызылорда&nbsp; университетінің табалдырын аттағалы тұрмын. Себебі бүгін дәл осы университеттің грант иегері атандым. Маған дизайнер Ая Бапанидың стилі, жұмыстары қатты ұнайды.&nbsp; Ару Наз есімді дизайнердің киімдерін сызсам деген арманым бар», – дейді грант иегері Мариям Әуезханова.
</blockquote>

Қызылордада 9 талапкер Қорқыт ата университетінде тегін оқиды

<a href="https://kyzylorda-news.kz/">Kyzylorda-news.kz</a>.&nbsp;1 маусым – Балаларды қорғау мерекесіне орай Қызылорда&nbsp;қалалық демалыс паркінде «Бақытты балалық шақ» атты концерттік бағдарлама өтті.
Қалалық білім беру ұйымдарының ұйымдастыруымен өткен мерекелік шараны облыстық білім басқармасының басшысы Ақзира Қасымова ашып беріп, Қызылорда облысының&nbsp;білім саласындағы сапаны қамтамасыз ету департаментінің басшысы Ғалия Дәулетова мен қала әкімінің орынбасары Асқарбек Есжанов сөз сөйлеп, балаларды мерекемен құттықтады.
Шара қонақтары «Инстаграм», «Робототехника» және «Тик-ток» бекеттерінде қонақта болып, балалардың жұмыстарымен танысып, әр бекеттегі балғындармен &nbsp;бірге естелік суретке түсті.
Шарада бүлдіршіндерге тәттілер табысталып, арнайы дайындалған мерекелік концертті тамашалады.
<img src="https://kyzylorda-news.kz/wp-content/uploads/2021/06/img-20210601-wa0093-1.jpg" alt="" />
<img src="https://kyzylorda-news.kz/wp-content/uploads/2021/06/20210601_124514.jpg" alt="" />
<img src="https://kyzylorda-news.kz/wp-content/uploads/2021/06/img-20210601-wa0081.jpg" alt="" />
<img src="https://kyzylorda-news.kz/wp-content/uploads/2021/06/img-20210601-wa0083.jpg" alt="" />

Қызылорда: «Бақытты балалық шақ» шарасы өтті

<a href="https://kyzylorda-news.kz/">Kyzylorda-news.kz</a>. «Серіктес директорлар» лигасы аясында №140 Абылайхан атындағы орта мектеп ғылыми-әлеуметтік жобаларға бағытталған мектеп ретінде жаңа жобаларды жандандыратын болады. Білім ұясы оқушылар мен мұғалімдер үшін венчурлік әдісті енгізіп, инвестиция тарту жұмыстарын бастап кетті.
Мектеп «Жасыл ғаламшар» кіші жобасы аясында мектеп ауласынан «Green study» жылыжай ғылыми-зерттеу оқу орталығын іске қосты. Аумағы 200 шаршы метрді құрайтын жылыжайда қызанақ, қияр, шалқан өсіріледі. 
Венчурлық қадамнан түскен қаржыға мектеп әкімшілігі «Метеорология» тәжірибелік-зерттеу алаңын ашты. Мұнда оқушылар ғылыми бағыттағы ізденістерін дамытып, университет ғалымдарымен бірлесе жұмыс істеуге мүмкіндік береді.
Мұнан бөлек, мектепте «Global eco» жобасы қолға алынған. Мұнда оқушылар мен ұстаздардың бірлесіп экологиялық таза бұйымдардан көрме ұйымдастырды.
Мектептегі жаңа бастамалардың таныстырылымына қатысқан облыстық білім басқармасының басшысы Ақзира Қасымова әрбір жобаның маңызды екенін атап өтіп, оқушылардың ғылыми ізденіске бет бұруына ерекше мүмкіндік беретінін атап өтті.
Айта кетейік, ғылыми-әлеуметтік жобаларды қолға алған №140 мектептің тәжірибесі өзге мектептерге таратылады. Бұл ретте университет ғалымдарымен арнайы жоспар бекітілетін болады.
<img src="https://kyzylorda-news.kz/wp-content/uploads/2021/05/193169902_1129785027524701_3595760633800193375_n.jpg" alt="" />
<img src="https://kyzylorda-news.kz/wp-content/uploads/2021/05/193195026_1129785224191348_5621426676431578159_n.jpg" alt="" />

Қызылордада «Метеорология» тәжірибелік-зерттеу алаңы ашылды

<a href="https://kyzylorda-news.kz/">Kyzylorda-news.kz</a>. Аккредиттеу және рейтинг тәуелсіз агенттігі өткізген ЖОО-ның Ұлттық рейтингісінде «Болашақ» университеті ТОП-20 енді. Университетте мамандар даярлауда 50 бакалавриат және 6 магистратура бойынша білім беру бағдарламалары арқылы жүзеге асырылады.
<blockquote>
 «Бүгінде университет 4963 студент білім алуда. Оның ішінде 139-ы грант негізінде оқыса, 23-і шетел азаматтары. Университетте 203 оқытушы-профессор қызмет етеді. Ресей Федерациясы, Өзбекстан, Швеция елдерінен профессорлар дәріс оқиды. Бұл биылғы оқу жылының бір ерекшелігі десек болады. Сондай-ақ, 150 студентке жеңілдіктер тағайындалды. Атап айтсақ, көпбалалы отбасылардан шыққан, бір отбасынан екі студент оқыған жағдайда, ата-анасынан айрылған студенттерге, біздің колледждерді бітірген, белсенді және түрлі жетістіктері бар студенттерге жеңілдік берілді. Бүгінде ғылыми-зерттеу институтының құрамында кафедралар жанынан құралған 1 лаборатория және 4 ғылыми орталық бар. Университет жылыжайы көлемі биылғы оқу жылында 2 есеге ұлғайды», – деді «Болашақ» университетінің ректоры Қуаныш Дәуренбеков.
</blockquote>
Қазіргі уақытта университеттің материалдық-техникалық базасы жыл сайын қарқынды дамуда. Биыл заманауи 378 орындық жаңа жатақхана және 2260 шаршы метрді құрайтын спорттық секциялар ұйымдастыруға арналған спорткешен құрылысы аяқталып, қолданысқа берілді. Бүгінде 400 орындық екінші жатақхана, 1100 орындық «Болашақ» конгрессхол құрылысы, типтік ашық стадион құрылысы басталды. Сонымен қатар, келесі жылы оқытушы профессорлар үйі, дендропарк, медициналық клиника, жағалаудағы ашық аспан астындағы атриум, кинотеатр, бизнес инкубаторды жүзеге асырылады. Ал білім алушылардың ғылыми зерттеу жұмыстарын жүргізуге арналған технопарк, университет жанындағы зияткерлік мектеп, жастар кешені құрылысын салу жоспарлануда.

«Болашақ» университеті үздіктер қатарында

<a href="https://kyzylorda-news.kz/">Kyzylorda-news.kz</a>.&nbsp;Аккредиттеу және рейтинг тәуелсіз агенттігі (АРТА) 2021 жылы&nbsp;өткізген ЖОО-ның Ұлттық рейтингісі қорытындысында Қорқыт ата атындағы Қызылорда мемлекеттік университеті ҚР ЖОО Бас рейтингісінің ТОП-20 еніп, 85 жоғары оқу орындары қатысқан рейтингте 7 орынды иеленді. Бұл туралы өңірлік коммуникациялар қызметі орталығында өткен брифингте Қорқыт Ата атындағы Қызылорда университетінің басқарма төрағасы – ректоры Бейбіткүл Кәрімова айтты.
Университет ректоры 2020-2021 оқу жылындағы атқарылған жұмыстар, жеткен жетістігі мен алдағы жоспарлары жайында есеп берді.
Университет ректоры&nbsp; БАҚ өкілдеріне&nbsp; оқу орнының&nbsp; мен таныстырды. Қазақстан Республикасының 2050 жылға дейінгі Даму стратегиясында еліміздің әлемнің дамыған 30 елінің қатарына кіру мақсаты қойылған. Мұнда басты рөл білім мен ғылымға беріледі, себебі бәсекеге қабілетті адами капиталсыз және дамыған ғылыми инновациялық жүйесіз бұл мақсатқа қол жеткізу мүмкін емес. Аймақтағы іргелі білім ордасы – Қорқыт ата атындағы Қызылорда университеті осы бағытта нәтижелі іске бағдарланған стратегиялық жоспарға сәйкес ауқымды жұмыстар атқарып келеді. Тарихы терең университет келер жылы 85 жылдық мерейтойын атап өтетіндігін жеткізді.
Қорқыт Ата атындағы Қызылорда университетінің білім беру қызметі бакалавриат, магистратура, докторантура бағдарламалары бойынша жүзеге асырылады.
<blockquote>
 «Биылғы оқу жылын үлкен жетістікпен аяқтап отырмыз деп айтуға негіз бар. Аккредиттеу және рейтинг тәуелсіз агенттігі (АРТА) 2021 жылы&nbsp;өткізген ЖОО-ның Ұлттық рейтингісі қорытындысында университет ҚР ЖОО Бас рейтингісінің ТОП-20 еніп, 85 жоғары оқу орындары қатысқан рейтингте 7 орынды иеленді. Оның ішінде 12 бағдарламамыз бірінші үштікке еніп отыр. Бұл үлкен жетістік. Бұған дейін соңғы 2 жылда университет 9 орынды иеленіп келген», – дейді ректор.
</blockquote>
Білім беру қызметін 452 оқытушы-профессор құрамы жүзеге асырады. 19 ғылым докторы, 168 ғылым кандидаты, 30 РhD доктор, 179&nbsp; магистр бар. Биылғы оқу жылында жас ғалымдар арасынан 6&nbsp;PhD, 3 қауымдастырылған профессор, 2 ғылым кандидаты, «ЖОО үздік оқытушысы» атағының иегері шықты. Халықаралық және республикалық ғылыми-зерттеу және шығармашылық конкурстарда 40-тан астам студент жүлдегер атанды. 
ҚР БҒМ ҒК&nbsp; гранттық қаржыландыруы негізінде 2020 жылдың қыркүйек айынан бүгінгі күнге дейін, яғни 9 айдың ішінде 11 жоба ұтып алынды. Бұл&nbsp; өткен жылғымен салыстырғанда 20%-ға&nbsp; артық. Жалпы гранттық қаржыландыру сомасы 250 млн теңгені құрайды.
Одан бөлек облыстық бюджеттен бөлінген қаражат негізінде (28,1 млн теңге) 3 жоба бойынша археологиялық қазба жұмыстары жүргізілді.
2020-2021 оқу жылында&nbsp; университеттің 260 білім алушысына жеңілдіктер тағайындадық. Атап айтқанда, көп балалы отбасылардан шыққан 122 студентке оқу ақысына 25%, анасының алтын немесе күміс медалі бар көп балалы отбасылардан шыққан 35 студентке 50%,6 «Алтын белгі» иегеріне 100 пайыз жеңілдік берілді. 
Қазіргі уақытта университеттің материалдық-техникалық базасына 10 оқу ғимараты, ғалымдар үйі мен 4 студенттік жатақхана, Студенттер сарайы, 7 студенттік асхана, жүзу бассейні мен жаттығу залы орналасқан «Сейхун» спорттық-сауықтыру кешені, әскери кафедраның оқу-тақтикалық полигоны, агробиологиялық участок, 6 кітапхана мен оқу залдарынан тұрады.
Құны 11 миллион теңгеден астам сомаға сатып алынған спорттық құрал-жабдықтар университет қызметкерлері мен студенттері, сондай-ақ қызығушылық танытқан&nbsp; сырттан келушілер үшін Фитнес орталығы ашылды. 
“Сейхун” спорттық-сауықтыру кешенінде қызметкерлер, студенттер және жүзуді үйренгісі келетіндерге спорттық секция ашылды.

Бейбіткүл Кәрімова: Биылғы оқу жылын үлкен жетістікпен аяқтап отырмыз

<a href="https://kyzylorda-news.kz/">Kyzylorda-news.kz</a>.&nbsp;Білім және ғылым министрі Асхат Аймағамбетов 1 қыркүйекте балалардың мектепке баруы туралы сұраққа жауап берді, деп хабарлайды&nbsp;<a href="https://stan.kz/">Stan.kz</a>.
<blockquote>
 «Бұл өте өзекті сауал. Мұның барлығы санитарлық-эпидемиологиялық жағдайға, біздің жүріс-тұрысымызға байланысты. Егер халықтың басым бөлігін вакцинациялай алсақ, барлық санитарлық-эпидемиологиялық талаптар мен шектеулерді сақтасақ, онда келесі оқу жылында, қыркүйекте білім беру ұйымдарымыз, ең алдымен әрине мектептер ашылады», – деп жауап берді Аймағамбетов.
</blockquote>
Министр балалар мектепті, достарын, мұғалімдерін қатты сағынғанын атап өтті.
<blockquote>
 «Мұғалімдер де дәстүрлі форматқа тезірек оралғысы келеді. Бірақ бәрі өзімізге, қоғамға байланысты. Мен вакцинация қарқыны келесі жылы мектептердің ашылып, дәстүрлі форматқа оралуымызға әсер етеді деп үміттенемін», – деп түйіндеді БҒМ басшысы.
</blockquote>

Қазақстандық оқушылар 1 қыркүйекте мектепке бара ма?

<a href="https://kyzylorda-news.kz/">Kyzylorda-news.kz</a>. Қазақстанда волонтерлікті және қайырымдылықты дамыту мәселелері бойынша заңнамаға түзетулер енгізіледі. Бұл туралы ҚР Ақпарат және әлеуметтік даму министрі Аида Балаева мәлімдеді.
Заңға енгізілетін түзетулерде еріктілер мен қайырымдылықпен айналысатындарға жоғарғы оқу орнына түсу, мемлекеттік қызметке тұру жеңілдету көзделген.&nbsp;Оған қоса, қайырымдылық ұйымдарына мемлекеттік меншікті ұсыну, зейнетке шыққаннан кейін еріктілер қызметін есепке алу мәселесі де заңмен бекітілмек.&nbsp;
Аида Балаева атап өткендей, еріктілер жылында волонтерлер саны&nbsp;шамамен 3 есеге өсті (2020 жылдың басында – 224, қазіргі уақытта – 600), ал белсенді еріктілер – 2 есеге өсті.
<blockquote>
 “Қайырымдылық қызметін дамыту шаралары тиімді жүзеге асырылды. Пандемия азаматтарға бір-біріне көмектесудің қаншалықты маңызды екенін көрсетіп берді.&nbsp;Осы дәстүрді сақтай отырып, биыл мемлекет басшысының бастамасымен жалпыхалықтық игі істер марафоны басталды. Ол да қоғамдық&nbsp;қолдау тауып отыр. Тек бірінші тоқсанның өзінде 2500-ден астам түрлі форматтағы іс-шаралар өткізілді, оған 2 миллионнан астам азамат қатысты”, – деді министр.
</blockquote>
Естеріңізге сала кетейік, Қазақстанда 500-ден астам ұйымды біріктірген Республикалық фронт-офис және 17 аймақтық волонтерлік қолдау орталығы құрылды. 6000-нан астам еріктілер оқытылды, 50 бастамашыл топтар құрылды, 500-ден астам шағын гранттар іске асырылды.
<a href="https://stan.kz/kazakstandik-eriktilerge-zhoo-ga-tusu-zhenildetiledi-347248/">Stan.kz</a>

Қазақстанда еріктілерге ЖОО-ға түсу кезінде артықшылық беріледі

<a href="https://kyzylorda-news.kz/">Kyzylorda-news.kz</a>. Қызылорда облысы бойынша ҚАЖ департаментіне қарасты ЗК-169/4 мекемесінде жазасын өтей жүріп, орта білім алған сотталғандарға арналған &nbsp;соңғы қоңырау шарасы өтті.
Шараға Шиелі аудандық білім бөліміне қарасты кешкі мектеп мұғалімдері, мекеме қызметкерлері қатысты. Кешкі мектеп директорының оқу-ісі жөніндегі орынбасары Ә.Байтілеуова қатысушыларды соңғы қоңырау мерекесімен құттықтап, оқу барысында үлгілі тәртіптерімен үздік нәтижелер көрсеткен сотталғандарды мақтау қағаздарымен марапаттады.
<blockquote>
 «Қылмыстық-атқару кодексінің талаптарына сай &nbsp;30 жасқа дейінгі сотталғандарға орта білім алу міндеттелген.&nbsp; Мекемеде орта білімі жоқ 9 сотталғанның екеуі 11 сыныпты бітіріп жатыр. Қалған сотталғандар орта білімін одан әрі жалғастырады. Қазір шыны керек түзелемін деген адам үшін біраз жағдай жасалған. Мұның барлығы&nbsp; аяқтарын шалыс басқан жандарды түзу жолға қойып, бостандықта өз жолын табуға мүмкіндік жасалуда»,- деді мекеме бастығының тәрбие жұмыстары жөніндегі орынбасары әділет майоры Қ.Дайрабаев.
 «Жастық шақта аңғалдығымнан жаза басып, құқық бұзғандығым үшін жазамды өтеудемін. Осының салдарынан орта білімім де жоқ болатын. Мекеме қызметкерлерінің көмегімен кешкі мектепте білім алдым. Сол мектеп ұстаздарының табанды еңбегінің нәтижесінде орта білімімді растайтын құжат алып отырмын. Осы үшін мекеме әкімшілігі мен кешкі мектеп ұстаздарына алғысымды білдіремін», – дейді жазасын өтеуші.
</blockquote>
<img src="https://kyzylorda-news.kz/wp-content/uploads/2021/05/whatsapp-image-2021-05-26-at-10.23.07.jpeg" alt="" />

Қызылордада орта білімі жоқ жазасын өтеушілер аттестат алды

<a href="https://kyzylorda-news.kz/">Kyzylorda-news.kz</a>. Қызылорда облысында «Соңғы қоңырау» кезінде қоғамдық тәртіпті қадағалау күшейтілді.
Қызылорда өңірінің полицейлері бұл салтанатты шараның өткізілуі кезінде қоғамдық қауіпсіздікті &nbsp;күшейтті.
Білім басқармасының мәліметіне сәйкес, биыл &nbsp;облыс бойынша барлығы 293 мектепті 7006 түлек бітіреді.
«Соңғы қоңырау» салтанатты шара барысында облыс&nbsp; бойынша қоғамдық тәртіп пен жол қауіпсіздігін қамтамасыз етуге барлығы&nbsp;600-ге жуық қызметкер және 93 қызметтік автокөлік жұмылдырылды.
Сонымен қатар, мектеп бітіруші түлектердің қауіпсіздіктерін қамтамасыз ету үшін қалалық мәдени-демалыс паркі, орталық алаңда, жастар көп шоғырланатын орындарда білім беру ұйымдарының директорлары мен тәрбие ісі жөніндегі орынбасарлары Полиция департаментінің және қалалық Полиция басқармасының&nbsp; қызметкерлерімен бірлесіп қызмет атқарады.

Қазақстан және Қызылорда облысының жаңалықтары: Білім