<a href="https://kyzylorda-news.kz/">Kyzylorda-news.kz</a>. Жаңа оқу жылының алғашқы тоқсанында оқушылар қандай форматта білім алады? Білім және ғылым министрлігі Мектепке дейінгі және орта білім комитеті төрағасының орынбасары Жомарт Қарамбаевқа Орталық коммуникациялар қызметінде БАҚ өкілдері осындай сауал қойды, деп хабарлайды ҚазАқпарат.
<blockquote>
 «Бұл эпидемиологиялық жағдайға байланысты. Шешімді коронавирусты таратпау жөніндегі ведомствоаралық комиссия шығарып, ол шешім Мемлекеттік санитарлық дәрігердің қаулысымен бекітіледі. Эпидемиологиялық жағдай жақсарған кезде министрлік дәстүрлі оқыту форматына көшуге дайын», – деген Жомарт Қарамбаев қалыпты оқу форматына ауысу үшін педагогтерге вакцина алу талабы қойылмайтынын айтты.
</blockquote>
«Мұндай талаптар қойылмайды, мұғалімдер ерікті түрде екпе алып жатыр. Ең бастысы, ұжымдық иммунитет қалыптасуы керек. Сол үшін ұстаздардың 100 пайыз вакцина алғаны жөн болар еді», – деді ведомство өкілі.

Оқушылар бірінші тоқсанда оқуды қандай форматта бастайды?

<a href="https://kyzylorda-news.kz/">Kyzylorda-news.kz</a>. Тәуелсіздіктің 30 жылдығына орай облыстық ішкі саясат басқармасының «Қоғамдық келісім» КММ ұйымдастыруымен үздік ғылыми жобалардың өңірлік кезеңі өтті.
Конкурстың басты мақсаты өзгермелі әлем жағдайында Қазақстанның этносаясатын жетілдіру бойынша жаңа идеяларды іздеу, ғылыми қоғамдастықты Н.Ә. Назарбаевтың қоғамдық келісім мен жалпыұлттық бірліктің қазақстандық үлгісін ілгерілетуге ықпал ететін зерттеу жұмыстарына тарту болып табылады.
Конкурсқа Қорқыт ата атындағы Қызылорда университетінің «Тарих және Қазақстан халқы Ассамблеясы» кафедрасының меңгерушісі, облыстық ҚХА жанындағы ғылыми-сарапшылық топ жетекшісі, т.ғ.к., қазылар алқасының төрағасы Айтжан Оразбаков және аталған кафедраның профессоры, облыстық ҚХА жанындағы ғылыми-сарапшылық топ мүшесі, т.ғ.д. Тастанбек Сәтбай, сондай-ақ кафедраның аға оқытушысы, философия докторы Даулет Омаров қазылық етіп, үміткерлердің жұмыстарына бағасын берді.
Нәтижесінде байқау жеңімаздары анықталып, оларға қаржылай сыйлықтар табысталды. Жеңімпаздарды облыстық ішкі саясат басқармасының «Қоғамдық келісім» КММ директоры Бауыржан Мастеков марапаттап, белсенділік танытқан қатысушыларға алғысын білдірді.
«Ең үздік» жоба ретінде М. Мәметова атындағы Қызылорда педагогикалық жоғары колледжі, «Мектепке дейінгі тәрбие және оқыту» мамандығы бойынша оқытушысы Айнұр Маханбетәбдиеваның жұмысы танылды. Ол «Ұлт мәдениетін құрметтеу – достық пен бірліктің нышаны» тақырыбын қозғады. Сондай-ақ, М.Мәметова атындағы Қызылорда педагогикалық жоғары колледжі, «Қазақ тілі мен әдебиеті» мамандығының 2-курс студенті Ақбота Кеңесбектің «Елбасы – жаһандық тұрақтылық пен татулық дәнекері» тақырыбындағы жұмысы «Үздік» жоба деп белгіленді.
«Ізденімпаз жас ғалым» номинациясы бойынша М. Мәметова атындағы Қызылорда педагогикалық жоғары колледжі, «Мектепке дейінгі тәрбие және оқыту» мамандығы бойынша оқытушысы Қаламқас Болатбек марапатталса, жобада бақ сынаған өзге 5 қатысушыға алғыс хат табысталды.
«Ең үздік» және «Үздік» деп танылған екі жоба республикалық кезеңге жолданды.

Қызылордада үздік ғылыми жобаның жеңімпаздары анықталды

<a href="https://kyzylorda-news.kz/">Kyzylorda-news.kz</a>. Жалағаш ауданында білім беру ұйымдарының инфрақұрылымын дамыту басты назарда. Апатты жағдайдағы мектеп мәселесі шешілген.
Биыл Таң ауылындағы орта мектеп ғимаратына бөлінген 333 млн. теңгеге, Есет батыр ауылындағы орта мектеп ғимаратына құны 368 млн. теңгеге күрделі жөндеу жұмыстары жүргізілуде.
Сонымен қатар мемлекеттік бағдарлама қолдауымен («Ауыл-Ел бесігі») Жалағаш кентінен құны 420 млн. теңгені құрайтын 200 орындық оқушылар үйі мен 50 орындық өнер мектебін жаңа оқу жылына пайдалануға беру жоспарлануда.

Жалағашта оқушылар үйі мен өнер мектебі жаңа оқу жылында пайдалануға беріледі

<a href="https://kyzylorda-news.kz/">Kyzylorda-news.kz</a>. Бүгінгі таңда бірінші сыныпқа қабылдау үшін 310 мыңнан астам өтініш түсті. Құжаттарды қабылдау 1 сәуірде басталып, 1 тамызға дейін жалғасады, деп хабарлайды ҚР Білім және ғылым министрлігінің баспасөз қызметі.
Бұл мерзім болашақ оқушылардың ата-аналары мектепті алдын-ала анықтап, қажет құжаттарды уақытылы тапсырып, балаларды оқу құралдарымен қамтамасыз етуі үшін берілді. Ал мектеп әкімшілігі сыныптарды алдын ала жинақтау, оқулықтардың қажетті көлемін сатып алу, мұғалімдер арасында сағаттарды бөлу және сыныптар санына байланысты педагогтер құрамын анықтау бойынша жұмыстарды атқаратын болады. Осыған байланысты министрлік өтініштерді уақытылы берудің маңыздылығын еске салады.
<blockquote>
 «Біз құжаттарды қабылдау мерзімін ұзарттық. Енді құжаттарды қабылдау 4 айға созылады. Бұл ата-аналарға да, мектеп әкімшіліктеріне де оқу процесіне дайындықты алдын ала ойластыруға мүмкіндік береді. Сондай-ақ 10 тамыздан кейін мектептерде дайындық тобы жұмысын бастайды, оған ата-аналардың қалауы бойынша мектепке дейінгі мекемелерге бармаған немесе мектепалды даярлықтан өтпеген балалар бара алады», – деп атап өтті ҚР БҒМ Мектепке дейінгі және орта білім комитеті төрайымы Майра Мелдебекова.
</blockquote>
Өтініштерді қабылдау Еgov.kz электрондық үкімет порталы арқылы электрондық форматта жүргізіледі. Мектепке қабылдау үшін келесі құжаттарды ұсыну қажет: баланың денсаулық жағдайы туралы құжаттар (баланың денсаулық паспорты №026/у-3, №063/у нысаны бойынша медициналық анықтама); баланың көлемі 3х4 см цифрлық фотосуреті. Өтініш 1 жұмыс күні ішінде қаралады.
«Қызыл» аймаққа енген өңірлерде тұратын ата-аналар медициналық анықтамаларды оқу жылының басталуына дейін ала алады.
Ведомствоның болжамы бойынша осы оқу жылында бірінші сыныпқа 380 мыңнан астам оқушы барады.

Бірінші сыныпқа құжат қабылдау 1 тамызда аяқталады

<a href="https://kyzylorda-news.kz/">Kyzylorda-news.kz</a>.&nbsp; Вакцина салдырған студенттерге сыйлық беріп, жеңілдік жасайтын жоғары оқу орындарының саны артты, деп хабарлады білім және ғылым министрлігінің баспасөз қызметі.
Ведомствоның хабарлауынша, министрдің тапсырмасынан кейін 20 жоғары оқу орны жедел шаралар қабылдап, тізім тағы 10 университетпен толықты.
Оның ішінде Satpayev University, Қарағанды техникалық университеті, С.Өтебаев атындағы Атырау мұнай және газ университеті, Торайғыров университеті, С.Сейфуллин атындағы Қазақ агротехникалық университеті, Оңтүстік Қазақстан мемлекеттік педагогикалық университеті, Қ.А.Ясауи атындағы қазақ-түрік университеті, М.Х.Дулати атындағы Тараз өңірлік университеті бар.
Satpayev University вакцина салдырған студенттерге жеке стартап ашуға 5 миллион теңге грант, ЖОО жатақханаларында тұру үшін 20 орын, елдегі немесе шетелдегі жетекші компанияларда өндірістік практикадан өтуге жұмсалатын шығындарын толық өтеу, Qoldau бизнеске арналған цифрлық платформамен бірлесіп кәсіпкерлік дағдыларды дамыту курстарына 100 сертификат, сессияны уақытында тапсырмаған студенттерге курстардан екінші рет тегін өту және 3 кредитті қайта тегін тапсыру мүмкіндігін беріп отыр.
<blockquote>
 “Қарағанды техникалық университеті вакцина салдырғандар арасында 2022 жылдың жазына студенттер арасында “Политехник” спорт-сауықтыру лагеріне тегін жолдама ойнатады. Сондай-ақ күзгі семестрде студенттерге ағылшын тілі курсына тегін қатысу мүмкіндігі қарастырылған”, – делінген хабарламада.
</blockquote>
С.Өтебаев атындағы Атырау мұнай және газ университеті вакцина салдырған 20 студент пен 10 қызметкерге Түркістан қаласына жолдама береді.
Торайғыров атындағы университет 15 студентке Қазақстанның Конституциясы күніне орай Нұр-Сұлтан қаласына жолдама береді. Сондай-ақ “Баянтау” сауықтыру лагеріне 30 жолдама және фитнес-залға баруға 25 тегін абонемент бермек.
Сонымен қатар бір оқу жылы ішінде ЖОО жатақханасында 40 студенттің тұруына 50% жеңілдік қарастырылған.
Оңтүстік Қазақстан мемлекеттік педагогикалық университетінде өз еркімен вакцина салдырған алғашқы 50 студент конкурстан тыс ең жақсы студенттер үйінде тұруға жолдама алады. Ал университет қызметкерлеріне вакцинадан кейін бір күн демалыс беріледі.
Оқу орнында әрбір 500-ші өз еркімен вакцина салдырған студентке планшет сыйлыққа беріледі. Ал әрбір 200-ші студент Нұр-Сұлтан қаласына жолдама алады.
Қ.А.Ясауи атындағы қазақ-түрік университеті “Сарыағаш”, “Манкент”, “Жаңақорған” шипажайларына 5 жолдама ойнатады. Сондай-ақ студенттерге бағалы сыйлықтар береді.
М.Х.Дулати атындағы Тараз өңірлік университетінде вакцина салдырған 100 студент жарты жылдықта жатақханада тегін тұра алады. Сондай-ақ оқу орнының 50 оқытушысына Ыстықкөлге жолдама беріледі.
Айта кетейік, бұған дейін Қазақстанның жоғары оқу орындары коронавирусқа қарсы вакцина салдырған студенттер үшін оқу ақысын төлеуге жеңілдік қарастырылғанын айтты.
Маусымда Әл-Фараби атындағы ҚазҰУ, Л.Н. Гумилев атындағы ЕҰУ, Абай атындағы ҚазҰПУ, Қ.И. Сәтбаев атындағы ҚазҰТЗУ, М. Әуезов атындағы ОҚУ, М. Өтемісов атындағы БҚУ мен Х. Досмұхамедов атындағы Атырау университеті вакциналау шараларын қолдауға арналған акцияларды бастап кетті.

Вакцина салдырған студенттерге сыйлық беретін университет көбейді

<a href="https://kyzylorda-news.kz/">Kyzylorda-news.kz</a>. Қазақстанда мемлекеттік білім грантына құжат қабылдау мерзімі тағы бір күнге созылады.
Айта кетейік, бұған дейін Білім және ғылым министрлігі грант тағайындау конкурсына қатысу үшін құжат қабылдау 25 шілдеде аяқталады деп жоспарлаған болатын.
<blockquote>
 «Алайда талапкерлерден құжат қабылдау мерзімін ұзарту туралы өтініштер келіп түсті. Өйткені құжат тапсырудың соңғы күні жексенбіге келеді. Осыған байланысты БҒМ құжат қабылдауды тағы бір күнге – 26 шілдеге дейін ұзарту туралы шешім қабылдады. Құжаттар жоғары оқу орындарының виртуалды қабылдау комиссиялары арқылы қабылданатынына назар аударуларыңызды сұраймыз» делінген хабарламада.
</blockquote>
Талапкерлердің денсаулығын қорғау мақсатында еліміздің барлық жоғары оқу орындарында виртуалды қабылдау комиссиялары жұмыс істейді.
Олардың көмегімен конкурсқа қатысу үшін құжаттарды онлайн форматта тапсыруға болады.
Виртуалды қабылдау комиссияларының тізімі мына&nbsp;<a href="http://testcenter.kz/press-tsentr/novosti/?ELEMENT_ID=4410">сілтемеде</a>.

Мемлекеттік білім грантына құжат тапсыру мерзімі 26 шілдеге дейін ұзартылды

<a href="https://kyzylorda-news.kz/">Kyzylorda-news.kz</a>. Естеріңізге сала кетейік, осыған дейін мемлекет басшысы Қасым-Жомарт Тоқаев оқушылар мен студенттерді дәстүрлі форматта оқытуға дайындықты қамтамасыз етуді <a href="https://stan.kz/kazakstandik-okushilar-mektepke-barip-bilim-aladi-kanda-349685/">тапсырған болатын.</a>
Осыған байланысты, жергілікті атқарушы органдардың білім басқармалары оқу орындарында санитарлық нормалардың сақталуына ерекше назар аударып, бақылауы қажет. Барлық мектептерде қызметкерлер мен білім алушылардың температурасын өлшеу, қауіпсіздік шараларын сақтай отырып, кабинеттердің ауасын зарарсыздандыру (кварцтау) және дезинфекциялау шараларын жүргізу керек. Білім беру ұйымдары дезинфекциялау құралдарымен қамтамасыз етілуі тиіс.
Жалғасып жатқан шектеу шаралары кезінде оқу орындарының сыйымдылық қуаты мен білім алушылардың санына қарай ауысым мен жұмыс режимін алдын ала анықтап, әлеуметтік қашықтықты сақтай отырып, оқу процесін ұйымдастыру маңызды.
Әкімдіктердің білім басқармалары мен мектеп әкімшіліктері балалардың дәліздер мен буфеттерде жиналуын болдырмау үшін үзілістерді әртүрлі уақытта өткізуді ұйымдастыруы қажет. Сондай-ақ білім алушылар мен қызметкерлер арасында маска тағу режимін сақтауды қамтамасыз ету керек. Бір сынып бір кабинетте оқуы тиіс.
<blockquote>
 “Әрбір әкімдіктің білім басқармасы мен білім беру ұйымдарының пандемия кезінде санитарлық талаптарды сақтай отырып, кезекші сыныптар мен мектептердің жұмысын ұйымдастыруда тәжірибесі бар. Дегенмен, күндізгі оқу процесін ұйымдастыру мәселесіне үлкен жауапкершілікпен қарау керек. Бастысы – балалардың денсаулығы. Сондықтан әр сынып басқа кабинетке ауыспай, өз кабинетінде оқиды. Оқушылар да мұғалімдер сияқты бетперде киеді. Үзілістер әртүрлі уақытта болады, қажет болған жағдайда қосымша ауысымдар енгізіледі. Кіреберісте температураны өлшейтін және дезинфекциялық құралдардың болуы міндетті. Сондай-ақ оқушылардың білім олқылықтарын толтыру бойынша педагогтердің көлемді жұмыс жүргізуі маңызды”, – деді ҚР БҒМ мектепке дейінгі және орта білім комитеті төрағасының орынбасары Жомарт Қарамбаев.
</blockquote>
Сонымен қатар, сабақ кестесі санитарлық талаптарды ескере отырып жасалуы керек. Білім беру ұйымдары бұқаралық, мәдени және спорттық іс-шараларды өткізуді шектеуі қажет. Дәстүрлі оқыту форматында мектеп формасы бұрынғыдай сақталады.
Санитарлық қызметтің талабы бойынша алдағы оқу жылында мектептерді ашу шарттарының бірі – мұғалімдер мен қызметкерлерді вакцинациялау. 
Білім беру ұйымдарын дәстүрлі форматқа қайтару елдегі санитарлық-эпидемиологиялық жағдайға байланысты болатынын айта кетейік. Оқыту форматы туралы шешімді коронавирустық инфекцияның пайда болуы мен таралуына жол бермеу жөніндегі ведомствоаралық комиссия, елдің бас мемлекеттік санитариялық дәрігері және өңірлердің бас санитарлық дәрігерлері қабылдайды.
<blockquote>
 “Өткен жылы оқыту форматы эпидемиологиялық жағдайға байланысты өзгеріп отырғаны естеріңізде болар. Кейбір оқушылар қашықтан білім алды, бір бөлігі аралас форматта оқыды. Эпидемиологиялық жағдай жеңілдеп, дәстүрлі оқуға мүмкіндік болған кезде кейбір оқушылар кезекші сыныптарға барды. Яғни, елде жаппай қашықтан оқыту болған жоқ. Іс жүзінде орта есеппен 4000-ға жуық шағын ауылдардағы мектептер жыл бойы &nbsp;дәстүрлі форматта оқытылды. Дәстүрлі форматта оқитындардың жалпы саны кезекші сыныптарды қоса алғанда бірінші тоқсанда 1 млн бала болса, төртінші тоқсанда 2 млн балаға дейін жетті”, – деді Жомарт Қарамбаев.
</blockquote>
1 қыркүйекте 3,5 млн-нан астам бала үшін 7 475 мектеп ашу жоспарланған. Қазір мектептерде жөндеу жұмыстары жүргізіліп жатыр. Олардың барысын әкімдіктердің білім басқармалары бақылайды. Барлық білім беру ұйымдарында жөндеу жұмыстары аяқталады, соның ішінде 263 мектеп күрделі жөндеуден өтеді.

Жаңа оқу жылында мектептерге қандай санитарлық талаптар қойылады?

<a href="https://kyzylorda-news.kz/">Kyzylorda-news.kz</a>. Биыл аймақта жеті мемлекеттік және бір жеке балаларды тынығу-сауықтыру лагері жұмыс істеуде. 2022 жылы жазғы лагерьлерді жаңаша ұйымдастыру жоспарлануда. Яғни жұмысын ІТ бағытқа бұрмақшы. Бұл туралы Өңірлік коммуникациялар қызметінің ақпараттық алаңында өткен брифингте облыстық білім басқармасының бөлім басшысы Әбдіқадыр Тұрар мәлімдеді.
<blockquote>
 «Жазғы демалыс кезеңінде балалардың сауықтыру демалысын, бос уақытын және жұмыспен қамтамасыз ету бойынша түрлі бағытта танымдық шаралар өткізілуде. Атап айтсақ, жалпы білім беру ұйымдарының 8-10 сынып оқушылары арасында «Елорда тарихы – ел тарихы» тақырыбында қашықтан облыстық бейнеролик байқауы, ауыл мектептерінің 6-9 сынып оқушылары арасында «Нағыз қазақ – қазақ емес, нағыз қазақ – домбыра» қашықтан дәстүрлі әндер мен күйлер байқауы өткізілді. Сонымен қатар, 8-10 сынып оқушылары арасында «Табиғатты аяла» тақырыбында онлайн презентация байқауы өтті. Байқау қатысушылары «Біздің ауыл көшелері», «Менің қалам» тақырыптарында туған жердің қадір-қасиетін ұғынып, құрметтеуге тәрбиелеу мақсатында әзірленген бейнероликтерін ұсынды»,-деді Әбдіқадыр Орынбасарұлы.
</blockquote>
Биыл «Қамбаш» балаларды сауықтыру орталығында жеті ауысыммен 900-ден астам оқушыны қамту жоспарланған.
<blockquote>
 «Жазғы маусымда 9 үйірме жұмыс жасайды. Атап айтсақ, «Робототехника», «Вокал», «Шахмат», «Дебат», «Драма», «Киіз басу», «Қолөнер», «Русский медвежонок», «Қылқалам» үйірмелері мен түрлі спорт секциялары. Баланы жақсылыққа, адамгершілікке, ұйымшылдыққа тәрбиелей отырып, олардың жаз мезгіліндегі демалысын, сауықтырылуын тиімді әрі мағыналы өткізуге жағдайлар жасалуда»,-деді Қамбаш» балаларды сауықтыру және қосымша білім беру орталығының директоры Рахан Қалиев.
</blockquote>

ІТ: Жазғы лагерьлерді жаңаша ұйымдастыру жоспарлануда

<a href="https://kyzylorda-news.kz/">Kyzylorda-news.kz</a>.&nbsp; Өмірде қателесуге болмайтын шешімдердің бірі – мамандық таңдау. Ал қазіргі таңда еңбек нарығының жылдам өзгеруіне байланысты, 5 жыл бұрын өзекті болған мамандықтардың басым бөлігі нарық талабына сай болмай қалып жатыр. Осы орайда, әрбір бітіруші түлекке өзекті деген мамандықтар тізімін білу маңызды. Себебі болашаққа керекті маман болу үшін аталмыш ақпараттың берері мол.&nbsp;
Қазақстанда қандай мамандықтарға болашақта жоғары сұраныс болады? Сіз өз келешегіңізді қазақстандық еңбек нарығына қажет мамандықтар мен кәсіптер бойынша дұрыс профильді таңдағаныңызды сенімдісіз бе?Олай болмаған жағдайда сізге қайта оқып мамандануға&nbsp; тура келеді.
<ol>
<li>Инжениринг</li>
</ol>
Өнеркәсіп инженирингі еліміз үшін өте маңызды сала.&nbsp; Көлік инженерлері, құрылыс инженерлері, машина жасау және механика мамандары таптырмас кадр ретінде бағаланады. Сонымен қатар &nbsp;мұнай және газ саласындағы металлургия мен энергетика саласы мамандары да бар. Бұл дегеніміз инжениринг саласы еліміздің дамуында өзіндік оны барын айқындайды.
Дегенмен жақын болашақта тау-кен өнеркәсібі саласында автоматтандырылған жүйелермен және күрделі машиналармен жұмыс жасайтын сандық мамандарды аса қажет етеді, өйткені тау-кен өндірісі, пайдалы қазбаларды байыту процестері өзгереді – ол күрделене түседі және роботтандырылады.
Дәл қазір өндірістік еңбек нарығында инженерлік кадрлар мен орта буын менеджерлері жетіспейді. Жұмыс берушілер техникалық, экономикалық және құқықтық білімдерді бірге қоса игерген, сонымен қатар ағылшын немесе басқа еуропалық тілдерді игерген өте қажетті әмбебап мамандарды табуда қиналады. Қазақстандық индустрияның барлық салаларында маркетинг туралы түсінігі және менеджерлік біліктілігі бар инженерлер жеткіліксіз. Сондықтан болашақта технологиялық мамандықтар қосымша дағдылардың нақты тізімімен қамтамасыз етілуі керек.
2. IT саласы
Болашақтың мамандығы – веб-дизайнер. Сайт кез-келген компанияның айнасы, тұтынушы мен қолданушы арасындағы көпір. Жақсы жасалынған сайт компанияларға көп нәрсе береді. Сондықтан оны интернетте қол жетімді және әдемі көрінетін етіп жасайтын маман жоғары жалақы мен сұраныстарға ие бола алады.
3. Нанотехнология
Ең кішкентай бөлшектермен жұмыс жасау, заттардың бойындағы жасырын және құнды қасиеттерін пайдалану – зерттеу мен іске асырудың үлкен өрісі екені анық. Қазақстанда наносаладағы болашақ мамандықтардың негізгі үш маңызды бағыты бар: микрочиптер шығару, наноөлшемді роботтар жасау және ядролық инженерия.
Нанотехнология ғылымның барлық салаларында қолданылады. Мысалы, биотехнологияда, молекулалық медицинада, биофармакологияда. Бұл бағыттар алдағы уақытта сөзсіз дамиды және еліміздегі университеттер осындай жұмыстарға бейімделе алатын құзіретті мамандарды даярлауға өте мүдделі болуы керек.
4. Сервис немесе қызмет көрсету
Коронавирус тудырған алпауыт дағдарысқа дейін халықтың орташа табысы өмір сүру деңгейі тұрақты өсіп отырды. Пандемия – уақытша құбылыс. COVID-19 зардаптарынан толық &nbsp;шыққаннан кейін адамдар қайтадан қонақжайлылық, тамақтану және ойын-сауық т.б. салаларда сапалы қызметтерге мұқтаж бола береді. Алдағы уақытта Қазақстанда сұранысқа ие мамандықтарға міндетті түрде: мейрамхана, спа-менеджер, ресторатор, қонақ үй менеджері, тамақтану менеджері т.б. қызмет көрсету салалары кіреді.
5. Логистика
Мамандарға адамдардың, шикізаттың, тауарлардың қозғалысын жоспарлау және жүзеге асыру тым күрделі процесс. Бірақ, қазірдің өзінде көптеген процестер автоматтандырылуда. Бір жағынан, бұл арқылы жұмысты тиімді әрі жылдам орындайтын бағдарламалар арқасында логисттердің санын қысқартуға болады. Дегенмен, болашақта сұранысқа ие мамандықтардың тізімдеріне техникалық біліммен қаруландырылған жаңа логистер кіреді.
6. Экология
Қазақстандағы экологиялық жағдай апатты деп бағаланады: жер проблемалары (40-50 жыл бұрын атом қаруын сынаудың салдары), ауа (15 ірі қалаларда ластану деңгейі рұқсат етілген деңгейден әлдеқайда асады), су (Арал теңізі екі ұсақ су қоймасына айналуда, Балқаш та солай).
Қазіргі кезеңдегі қоршаған ортадағы қиындықтардың санына қарағанда экологтар алдағы көптеген онжылдықтар бойы болашағы зор 5 мамандықтың қатарында болады деп болжанады. Перспективалық бағыттар – қайта өңдеу, эко-қорғау, экотехника, биоэкология әрдайым дами береді.
7. Химия
Кез-келген энергетика саласында химиктерге үнемі сұраныс бар. Балама көздер уақыт өте келе тезірек қажет етілуде. Ал химия саласы дамымаған ел ешқашан алға жылжымайтынын уақыт көрсетіп отыр.
8. Медицина
Қазір аймақтарғы еңбек нарығының 40 пайызын дәрігерлер құрайды. Олардың 60 пайызы бес жылдан кейін зейнетке шығады деп есептесек, алдығы 10 жылда білікті дәрігер атану үшін күрделі медициналық технологияларды игеру қажет болады. Бұл медицина қызметкерлерінің жұмысын одан әрі қиындатады және жоғары біліктілікті талап етеді.
9. Азық-түлік өнеркәсібі
Фермерлер мен агрономдар генетикалық және биологиялық технологиялармен бірге табиғи өсімдік шаруашылығы процестерін «жақсарту» бағытына өзгереді. Бірақ адамдар зауыттарда өндірілген көкөністерді, жемістерді, жармаларды жеуге үйренбейінше, бұл мамандарға сұраныс болады. Әсіресе, территориясының 70 пайызы агроөнеркәсіптік кешенге жататын Қазақстанда бұл мәселе өте өзекті.
10. Қала құрылысы
Жер шары– ауылға қарағанда қалалардың планетасы деуге лайық.Үкіметтік сарапшылар 2025 жылға қарай халықтың 77 пайызы қалалық болады деп есептеп отыр. Жалпы әлемдегі 30 ірі қаланың халқы 27 пайызға өседі деп жоспарлануда. Сондықтан болашақтың қалаларына өмір сүруге қолайлы және сау ортаны құра алатын мамандар: урбанисттер, қала жоспарлаушылар, көлік инженерлері, эргономистер қажет. Сондай-ақ қалаларды салуға және өндіруге қабілеттілікке ие адамдар: «ақылды» үйлер, дүкендер, қауіпсіз жолдар жасайды деп күтілуде.
Нұрлыбек АХАТАЕВ,
Экология және химиялық технологиялар кафедрасының қауымдастырылған профессор м.а., химия ғылымдарының кандидаты

Қазақстандағы болашағы зор мамандықтар: негізгі 10 бағыт

<a href="https://kyzylorda-news.kz/">Kyzylorda-news.kz</a>. Биыл Қорқыт ата атындағы Қызылорда универсиететі 1504 түлегін еңбек нарығына қосты.&nbsp; ҚР Білім туралы заңының 39-бабына сәйкес жоғары оқу орындары 2021 жылдан бастап өзіндік үлгідегі дипломдар табыстауда.
Жеке үлгідегі дипломдар жұмыс берушілерге маман даярлау сапасын бағалауға мүмкіндік береді.
Әр дипломда БҒМ жасаған бірегей сәйкестендіру нөмірі болады, ол сақталады және белгілі бір студентке бекітіледі. Бұл кез келген уақытта дипломның түпнұсқалығын тексеруге мүмкіндік береді. Диплом нөмірлерінің сәйкес келуі және олардың өзгеруіне жол берілмейді. Деректердің қауіпсіздігін блокчейн технологиясын қолдану – түлектің қайда оқығанын, дипломдық жұмысты қашан қорғағанын және дипломды қашан алғанын тексеруге мүмкіндік береді. Бұл диплом бланкілері үшінші тұлғаларға қол жетімді болған жағдайда «диплом сатумен» күресу үшін де қажет.
Университет табыстаған әр дипломда «Білім туралы» заңына сәйкес қорғаныс белгілері бар. Жеке үлгідегі дипломдар БҒМ-нің минималды талаптарына сәйкес келуі тиіс. Дегенмен, Қорқыт ата атындағы Қызылорда университеті министрліктің талабын 100 пайыз орындады. Бұл жүйе алдағы уақытта кез келген жағдайда құжаттың түпнұсқалығын тексеруге мүмкіндік беріп, еңбек нарығында сапаны арттыруға, жалған құжат даярлауға жол бермейді.
2020 жылы университетті бітірген жас мамандардың 91 пайызы жұмысқа орналасқан. Жалпы университетте 78 бакалавриат, 35 магистратура, 13 докторантура мамандығы бар. Білімнің сапасын басты орынға қоятын оқу ордасы сұранысқа ие мамандар даярлау үрдісін жүйелі түрде жалғастыра бермек.

Жаңа диплом: Жалған құжат даярлауға жол бермейді

<a href="https://kyzylorda-news.kz/">Kyzylorda-news.kz</a>. Аймақта дарынды балалар мен талантты жастарды қолдау, көшбасшылық қабілетін ашу, ғылыми дағдыларды қалыптастыруда біршама жұмыстар атқарылуда. Мәселен ауыл оқушыларына арналған «Мың бала» ұлттық зияткерлік олимпиадасына 9000-ға жуық бала қатысты. Олимпиада қорытындысымен 99 оқушы жеңімпаз атанып, біздің өңір үздік үштіктен көрінді. Бұл туралы Өңірлік коммуникациялар қызметінің ақпараттық алаңында өткен баспасөз конференциясында облыстық білім басқармасы басшысының міндетін атқарушы Бағдат Бердаулетов мәлімдеді.
<blockquote>
 «Елбасының «Ел үміті» бастамасы аясында 2 жоба жүзеге асырылуда. Сондай-ақ, «Елбасы медалі» жобасына облыстан 351 оқушы қатысып, 247 бала «қола» медаль иегері атанды. Ендігі кезекте, 54 оқушы «күміс», 49 оқушы «алтын» медальді иеленуге бақ сынайды. Бұған қоса, ауыл мектептерінде білім алатын 8-9 сынып оқушылары арасындағы IQanat олимпиадасына 5400 оқушы қатысып, үздік 26 оқушы Қапшағайдағы демалыс орталығына жолдама алды. Ал, 4 оқушы Бурабайда орналасқан арнайы «Iqanat High shсool of Burabai» мектебінде білім алуда. Жыл сайын оқушылар арасында өткізілген ғылыми жобалар байқауында ұсынылған жобада оқушылардың жасампаздығы, белсенділігі, білім дағдыларының қалыптасып, болашаққа деген ұмтылысы байқалады. Республикалық ғылыми жоба байқауында 10 оқушы жүлделі орындарды жеңіп алды. Ұсынылған әрбір жобаны әрі қарай дамыту, жетілдіру жұмыстары жүргізілуде. Олар – болашақ үйлер, жылыту жүйелері, тесла катушкасы, спорт кешені сынды жобалар. Біздің оқушылардың нарық ахуалын шынайы бағалайтыны, бос кеңістіктерді іздейтіні және мейлінше бәсекеге қабілетті өнім ұсынуға тырысатыны мақтанарлық жайт»,-деді Бағдат Камбозұлы.
</blockquote>
Сонымен қатар, техникалық және кәсіптік білім беру ұйымдарының арасында «100 үздік студенті» жобасы жүзеге асырылып, облыс бойынша 8 студент жеңімпаз атанған.

«Мың бала»: Қызылордалық оқушылар үздік үштіктен көрінді

Kyzylorda-news.kz. Сәуір айында тұңғыш рет Қорқыт ата атындағы Қызылорда университетінде жас ғалымдардың ғылыми зерттеулерінің конкурсы өткізілді.
Жеңімпаздарға жаңа оқу жылында 10 млн теңгеден аса қаражат бөлінбек. Бұл туралы Өңірлік коммуникациялар қызметінің ақпараттық алаңында өткен баспасөз конференциясында университет проректоры Жандос Базартай мәлімдеді.
Гранттың басты мақсаты – жастардың өңір экономикасының өзекті проблемаларына арналған зерттеулеріне қолдау көрсету, оларды жаңа ізденістерге жігерлендіру. Университетте білім алушыларды өз мамандығына баулитын, ғылыми ізденіске тәрбиелейтін арнайы 34 үйірме жұмыс жасайды.
<blockquote>
 “Студенттерді кәсіпкерлікке тарту мақсатында «Business Start» жастар кәсіпкерлігі орталығы бар. Қазіргі таңда орталық бастамасымен 33 жоба жүзеге асты. 89 студент өз бизнесін бастап жас кәсіпкер атанды. Аталмыш жобаларға осы уақыт аралығында 88 млн. теңге инвестиция салынып, 22 млн. теңгені «Zhas project» жобасы аясында университет студенттері жеңіп алды”, – дейді Жандос Нұртайұлы.
</blockquote>

Қазақстан және Қызылорда облысының жаңалықтары: Білім