<a href="https://kyzylorda-news.kz/">Kyzylorda-news.kz</a>. Биыл Қызылорда облысында 5 184 оқушы мемлекеттік грантқа өтініш берген. Оның 3 849-ы грант иегерлері атанды.
Өткен оқу жылымен салыстырғанда грант иегерлерінің саны – 791 түлекке көбейіп отыр.Гранттардың бөлінісі бірнеше басым бағыттарға қарай тағайындалды. Атап айтқанда, педагогика саласы мен медицина, ауыл шаруашылығы және техникалық мамандықтарға гранттар алынған. Облыс бойынша грантқа үміткер болған 3 849 оқушының басым бөлігі педагогикалық және техникалық мамандықтарды таңдаған. Тарқатып айтқанда, 1 303 талапкер педагогикалық, 361 түлек медициналық бағытты таңдаса, 1 173 үміткер техникалық мамандықтарға таңдау жасаған. Ал, 217 түлек ауыл шаруашылығы бағытына баруды көздейді. Сонымен бірге 795 түлек өзге де бағыттағы мамандық иесі болуды қалады.
Айта кетейік, 2020-2021 оқу жылының қорытындысы бойынша «Алтын белгі»иегерлерінің 190 – ы, яғни 35%-ы педагогикалық бағыттағы мамандықтарға оқуға қабылданып отыр.

Қызылордада 3 849 талапкер грант иегері атанды

Kyzylorda-news.kz. Қызылорда облысы әкімінің орынбасары Балжан Шаменова Саяхат мөлтек ауданындағы 348 орынға шақталған “Ұлағат білім ордасы” жеке мектебінің құрылыс алаңына барды.
“Nur Otan” партиясының жол картасы аясында бой көтеріп жатқан білім нысанының сапасына баса назар аударған облыс әкімінің орынбасары кемшіліктер орын алмас үшін білім басқармасының басшысына барлық талаптарға сай болуын қадағалауды тапсырды.
<blockquote>
 «Қоғамдық көлік схемасы оқушылар мен ата-аналары үшін тиімді болу керек. Себебі оқушылардың қауіпсіздігін назарға алуға тиіспіз. Сонымен бірге, жаңа оқу жылының қарсаңында уақытылы пайдалануға беруіміз қажет», — деді Балжан Мөрәліқызы.
</blockquote>
Еске сала кетейік, Саяхат мөлтек ауданының тұрғындары осыған дейін мектеп тапшылығының зардабын тартып келген болатын. Тұрғындар қажеттілігін қамтамасыз ету мақсатында мемлекеттік-жекеменшік әріптестік жүйесі негізінде заман талабына лайықталып салынып жатқан бұл мектеп жаңа оқу жылында пайдалануға беріледі деп жоспарлануда.

Балжан Шәменова: Оқушылардың қауіпсіздігін назарға алуға тиіспіз

<a href="https://kyzylorda-news.kz/">Kyzylorda-news.kz</a>. Барлық білім беру ұйымдарында қызметкерлер мен білім алушыларға маска кию міндетті. Бұл туралы бүгін Үкімет отырысында ҚР Білім және ғылым министрі Асхат Аймағамбетов айтты.
<blockquote>
 «Жаңа оқу жылында оқушылардың қауіпсіздігін қамтамасыз ету және денсаулығын сақтау үшін арнайы санитарлық іс-шаралар қабылданады. Барлық мектептер, колледждер мен университеттердегі қызметкерлер мен білім алушыларға маска киюге міндетті болады. Барлық білім беру ұйымдарында күнделікті термометрия, желдету, кварцтеу, дезинфекциялау іс-шаралары жүргізілетін болады», – деді Асхат Аймағамбетов.
</blockquote>
Оның атап өтуінше, студенттер, педагогтар мен басқа да қызметкерлер ғимаратқа «Ashyq» жүйесі арқылы кіргізіледі.

Білім беру ұйымдарында барлығы маска киюге міндетті

<a href="https://kyzylorda-news.kz/">Kyzylorda-news.kz</a>. ҚР премьер-министрі Асқар Маминнің төрағалығымен өткен Үкімет отырысында оқу жылының басталуына дайындық барысы қаралды, деп хабарлайды primeminister.kz.
Білім және ғылым министрі Асхат Аймағамбетов, денсаулық сақтау министрі Алексей Цой, Маңғыстау облысының әкімі Серікбай Трұмов және Түркістан облысының әкімі Өмірзақ Шөкеев баяндама жасады.
2021-2022 оқу жылында Қазақстанның 7475 мектебінде 3,4 млн-нан астам адам, оның ішінде 1 сыныпта 380 мыңнан астам бала оқитын болады. Оқу дәстүрлі форматта жүргізіледі. Вакцина алған педагогтер жұмысқа жіберіледі. Қазіргі уақытта вакциналауға жататын педагогтер мен білім беру мекемелерінің басқа қызметкерлерінің 88,4%-і вакцина алды.
Үкімет басшысы оқушылар мен педагогтердің қауіпсіздігі мен денсаулығын сақтауды қамтамасыз ету бойынша ұйымдастырушылық мәселелерді барынша тездетіп шешу қажеттігін атап өтті.
Білім және ғылым, денсаулық сақтау министрліктеріне, өңірлердің әкімдіктеріне жаңа оқу жылында мектепке дейінгі және орта білім беру ұйымдарында, сонымен қатар колледждер мен жоғары оқу орындарында оқуды штаттық режимде қамтамасыз ету тапсырылды.&nbsp;Бұл ретте әрбір мектепке дәстүрлі форматта оқу бойынша нақты ұсынымдар жеткізілуі тиіс.
Премьер-министр осы жылғы 25 тамызға дейін медициналық қарсы көрсетілімдері бар адамдардан басқа, педагогтар мен техперсоналды вакциналаумен 100% қамтамасыз етуді, осы жылғы 20 тамызға дейін мектептерді санитариялық талаптарға сәйкес (кварцтеу, дезинфекция, маска режимі, күнделікті термометрия және т.б.) қабылдауды аяқтауды тапсырды.
Барлық білім беру ұйымдарында педагогтер, қызметкерлер мен ата-аналар үшін «Ashyq» жүйесі енгізіледі.
Үкімет басшысы 25 тамызға дейін ең алдымен кестеден кешігіп отырған Павлодар және Түркістан облыстарында оқулықтарды мектептерге кестеге сәйкес толығымен жеткізуді тапсырды.&nbsp;
А.Мамин кестеден артта қалған мектептерде жөндеу жұмыстарын аяқтау қажеттігін атап өтті. Жөндеу жұмыстары аяқталмаған мектептердің ең көп саны Алматы (9), Қостанай (6) және Батыс Қазақстан (5) облыстарында екені атап өтілді.
Премьер-министр 25 тамызға қарай барлық білім беру ұйымдарының оқу жылын бастауға 100% дайын болуын қамтамасыз етуді, балалардың қауіпсіздігі, тамақтандыру және мектепке жеткізу бойынша мәселелердің шешімін табуды тапсырды.
primeminister.kz

Оқушылардың қандай форматта білім алатыны белгілі болды

<a href="https://kyzylorda-news.kz/">Kyzylorda-news.kz</a>. Бүгін Арал ауданының әкімі Серік Сермағамбетовтың төрағалығымен әкімдік және аппарат мәжілісі өткізілді. Басқосуда аудан әкімі ең алдымен орын алған кадрлық өзгерістерге тоқталып, аудандық мәдениет және тілдерді дамыту бөліміне және аудан әкімінің кеңесшісі қызметіне жаңадан тағайындалған қызметкерлерді таныстырып өтті.
Одан әрі күн тәртібіне көшкен аудан басшысы ең алдымен әкімдік мәжілісінде қаралатын өзекті үш мәселеге тоқталды.
Алғашқы мәселе, 2021 жылғы 6 айдың қорытындысы бойынша ауданның әлеуметтік-экономикалық даму көрсеткіштері туралы аудандық экономика және бюджеттік жоспарлау бөлімінің басшысы Т.Рашев хабарлама жасап, негізгі көрсеткіштерді баяндап өтті. Баяндама негізінде аудан басшысы көңіл көншітпей тұрған бірқатар көрсеткіштерге тоқталып, тиісті сала басшыларымен талдай келе, межелі көрсеткіштерді орындау бағытында жұмысты жандандыру қажет екендігін ескертті.
Екінші мәселе бойынша аудандық білім бөлімінің басшысы С.Жанназарова сөз алып, аудан мектептерінің 2021-2022 оқу жылына дайындық жұмыстарының жай-күйін кеңінен баяндап өтті. Белгілі болғандай қазіргі таңда білім бөліміне қарасты 50 мектеп, 4 қосымша білім беру ұйымы және 54 мектепке дейінгі білім беру ұйымында жаңа оқу жылына байланысты дайындық жұмыстары қарқынды. Мектеп және балабақшаларда оқытудың онлайн немесе оффлайн форматына көшіруге бағытталған шаралар үйлестіріліп, барлық білім беру ұйымдары “ASHYQ” бағдарламасы негізінде жұмыс жасауға кіріскен. Алдын ала есептеме бойынша жаңа оқу жылында 18000 оқушы білім алады деп жоспарланса, тамыз айына дейін 1 сыныпқа 1742 оқушы қабылданып үлгерген.
Осылайша білім саласындағы атқарылып жатқан жұмыстар сараланған жиын барысы үшінші мәселе, 2021-2022 жылдардағы жылу беру маусымына дайындық жұмыстарының барысына ойысты. Аталған мәселе жайлы аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Ж.Құдайберген сөз алып, аудан көлемінде орналасқан 189 әлеуметтік нысанның жылу беру маусымына дайындығы бойынша толыққанды талдап өтті. Сонымен қатар электр қуатымен қамту, ауыз су желілерінің қыс айларында қалыпты жұмыс істеуін қамтамасыз ету және газдандыру бағытында атқарылып жатқан жұмыстарға тоқталды.
Айта кету керек, аудан бойынша 2021-2022 жылдардағы жылу беру маусымына қатты отынға қажеттілік 15 000 тоннаны құрап отыр. Осы орайда аудан басшысы жылу беру кезеңінде кедергілерді болдырмау мақсатында бұл бағыттағы жұмыстарды тағы бір пысықтап, алдын ала жоспарлап, қажетті шараларды жүзеге асыру керектігін айтты. Өзекті мәселелер қаралған жиын қорытындысымен тиісті қаулылар қабылданды.
Алқалы жиын одан әрі аппарт мәжілісіне ұласып, күн тәртібінде аудан бюджетінің 6 айдағы игерілу барысы талқыланды. Мәселе бойынша аудан әкімінің салаға жауапты орынбасары Е.Талекенов баяндап өтті.
Атап өтілгендей, аудан бюджетінен қаржыландырылатын бюджеттік бағдарлама әкімшілері ағымдағы жылдың 1 шілдесіне бөлінген қаржының 99,7 пайызын игерген. Осы ретте аудан әкімі жылдың үшінші тоқсаны басталғанын, бюджет қаржыларының тиімді әрі уақытылы игерілуі аса маңызды екенін баса айтып, игерілмеген қаржылардың қалай, неден қалыптасқанын таразылап, атқарылған жұмыстардың кемшін тұстарын тізбектеді. Бюджет қаржыларының тиімді игерілмеуіне салаға жауапты орынбасарынан бастап, аудандық қаржы бөлімі мен бюджет әкімшілері тікелей жауапты екендігін еске салып, жоспарлы жұмыстарды тез арада ретке келтіруді тапсырды.
Аппарат мәжілісінің қорытындысы бойынша тиісті сала басшыларына нақты тапсырмалар беріліп, аталған тапсырмалардың орындалуын қадағалау аудан әкімінің орынбасарларына жүктелді.

Арал ауданында биыл 1 800-ге жуық бала 1 сыныпқа барады

Kyzylorda-news.kz. Білім гранттары бойынша бакалавр академиялық дәрежесінде техникалық, ауыл шаруашылығы, білім беру, өнер, журналистика, дін, ветеринария және медицина салаларының мамандары даярланатын болады. Бұл туралы Өңірлік коммуникациялар қызметінің ақпарат алаңында өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Мейрамбек Абдукаримов жан-жақты баяндап берді.
Гранттар көпбалалы және аз қамтылған отбасыларға қосымша қолдау шараларын ұсыну мақсатында қабылданған 2019-2021 жылдарға арналған өңірлік Әлеуметтік жол картасы шеңберінде тағайындалды. Бұл мақсатқа облыстық бюджеттен қаржы бөлініп, облыс әкімінің 100 оқу гранты бөлінді. Ал оқу гранты 9 санат бойынша әлеуметтік осал топтарға енгізілген түлектерге табысталады. Грантты тағайындау туралы шешімді жергілікті аудан және қала әкімдіктері жанынан құрылған арнайы комиссия қабылдайды. Үміткерлердің ҰБТ, кешенді тестілеуден алған нәтижесі, жеке жоғары жетістіктері, әлеуметтік жағдайы, отбасының табыс деңгейі – іріктеудің негізгі критерийлері болып табылады.
<blockquote>
 «Атап айтқанда, Қорқыт ата атындағы Қызылорда мемлекеттік университетіне – 46, Қазақ Ұлттық аграрлық университетіне – 5, Нұр Мүбәрәк университетіне – 10, М.Оспанов атындағы Батыс Қазақстан мемлекеттік медицина университетіне – 20, С. Ж. Асфендияров атындағы Қазақ Ұлттық медицина университетіне – 19 грант бөлінді», – деді М.Абдукаримов.
</blockquote>
Ал, Қорқыт ата атындағы Қызылорда мемлекеттік университетінің проректоры Абайбек Жүнісовтың айтуынша, білім беру гранты конкурсына қатысуға ҰБТ-дан өткен және нәтижесі кемінде 50 балл, ал педагогикалық ғылымдар саласы бойынша кемінде 75 балл, шығармашылық емтихан бойынша кемінде 5 балл жинаған адамдар жіберіледі.
Жалпы, аймақта облыс әкімінің гранты 2013 жылдан бастап халықтың осал топтары қатарынан шыққан студенттерге әлеуметтік қолдау ретінде тағайындалып келеді. Бүгінде еліміздің алдыңғы қатарлы жоғары оқу орындарында оқитын 1 153 студент облыс әкімінің грантын иеленіп, оның 507-і оқуды бітіріп, 291 маман жұмыспен қамтылған. 24-і жұмыспен қамтудың белсенді шараларына тартылды.

Қызылорда облысы әкімінің 100 гранты бөлінді

<a href="https://kyzylorda-news.kz/">Kyzylorda-news.kz</a>. Қазақстандықтар тегін оқи алатын елдер саны артты. Бұл туралы ҚР Білім және ғылым министрлігінің баспасөз қызметі хабарлады.
Енді қазақстандықтарға Словакия, Әзірбайжан және Вьетнам грант бөледі. Осылайша, егер 2019 жылы білім беру саласындағы келісімдер аясында мемлекеттер тізімінде 7 ел болса, қатарға тағы үш ел қосылды.
Мемлекеттердің қатарында Венгрия, Польша, ҚХР, Украина, Беларусь, Қырғызстан және Тәжікстан бар. Өткен екі жылда мыңға жуық қазақстандық осы елдердің жетекші жоғары оқу орындарында тегін білім алды. Биыл қазақстандықтарға 500-ге жуық грант бөлінді. Үкіметаралық гранттар аясында қазақстандықтар бакалавриат, магистратура, докторантура, резидентура бағдарламалары бойынша оқи алады, делінген министрлік таратқан ақпаратта.
<blockquote>
 «Біз «Болашақ» стипендиялық бағдарламасы бойынша ғана емес, үкіметаралық келісімдер шеңберінде де қазақстандықтарды тегін оқыту үшін елдерді көбейтіп жатырмыз. Қазақстанға оралғаннан кейін мамандар алған білімін өздері еңбек ететін саланы дамыту үшін қолданады деп үміттенеміз», – деді білім және ғылым вице-министрі Қуаныш Ерғалиев.
</blockquote>
2019 жылмен салыстырғанда конкурстық іріктеуге қатысуға ниет білдірушілер саны 15%-ке артқан.
Айта кетейік, үміткерлерді депутаттар, сарапшылар, инженерлік-техникалық, медициналық, гуманитарлық және жаратылыстану ғылымдарының ғалым-докторларынан тұратын тәуелсіз комиссия іріктейді.

Қазақстандықтар тегін оқи алатын елдер саны артты

*<a href="https://kyzylorda-news.kz/">Kyzylorda-news.kz</a>. Қызылорда облыстық білім басқармасының басшысы Ақзира Қасымова білім мен ғылым, өнер салалары бойынша халықаралық, республикалық деңгейде үздік нәтижелерге қол жеткізген оқушыларды қабылдады.*
Еске сала кетейік, №9 дарынды балаларға арналған облыстық “Білім-инновация” лицей-интернатының түлектері Мұхаммедәли Ширниязов, Елнұр Хамзин, Нұрсұлтан Атымтай және №2 “Мұрагер” мектебінің түлегі Бақдәулет Жарылқасынның SAT нәтижелері ҰБТ балдарына ауыстырылып, 140 баллмен теңестірілген болатын. Сонымен қатар, Мысыр елінде өткен халықаралық математика-арифметика олимпиадасында №3 IT-лицейдің 4 сынып оқушысы Тоғжан Абдрахманова бақ сынап, бірінші орын – “Алтын кубокты” иеленіп, Дубайда өтетін «Юниор біріншілігіне» жолдама алған еді.
Сондай-ақ Сыр елінің атын әлемге танытып келе жатқан «Бриллиант дауысты» жас әнші Дінмұхамед Төлеубай жақында «Славян базары» халықаралық фестиваліне қонақ ретінде қатысып, өз өнерін көрсетіп келді. Дінмұхамед осы кезге дейін «АРТ-парад в Витебске», Diamonds voice, Спивограй секілді т.б түрлі халықаралық ән байқауларында гран-при иегері болды.
Басқарма басшының қатысуымен өткен кездесу аталған Сыр таланттарының басын қосты.
<blockquote>
 “Сендердің үздік атанған жетістіктеріңнің барлығы ұстаздар қауымының еселі еңбегінің арқасында екенін атап өткім келеді. Біз өз тарапымыздан оқушыларымыздың өздерін күллі әлемге таныта отырып, халықаралық байқауларда және білім көрсеткіштерінде үздік нәтиже көрсетуі үшін жағдай жасауды жалғастыра беретін боламыз», – деді басқарма басшысы.
</blockquote>
Қабылдауда білім, өнер салаларындағы жаңа есім иелеріне арнайы марапаттар мен сыйлықтар табысталды.
<img src="https://kyzylorda-news.kz/wp-content/uploads/2021/08/fb_img_1628306209322.jpg" alt="" />

Қызылордалық дарынды оқушылар марапатталды

<a href="https://kyzylorda-news.kz/">Kyzylorda-news.kz</a>.&nbsp;Құжат бойынша меншік нысанына және ведомстволық бағыныстылығына қарамастан орта білім беру ұйымдарында 2021-2022 оқу жылының басталуы, ұзақтығы және каникулы кезеңдерінің мынадай мерзімдері айқындалды.
1) Жаңа оқу жылы әдеттегідей 2021 жылғы 1 қыркүйекте басталады.
2) Оқу жылының ұзақтығы 1-сыныптарда – 33 аптаға, 2-11 (12)- сыныптарда – 34 аптаға жетеді.
Каникул кезеңдері: Бүкіл сыныптарда – күзгі каникул – 7 күн (2021 жылғы 1-7 қараша аралығында),
– қысқы – 11 күн (2021 жылғы 30 желтоқсан мен 2022 жылғы 9 қаңтар аралығында),
– көктемгі – 12 күн (2022 жылғы 19-30 наурыз аралығында). 1-сыныптарға арналған қосымша каникул – 7 күн (2022 жылғы 7-13 ақпан аралығында) болып белгіленді.

Жаңа оқу жылындағы тоқсандар мен каникулдардың мерзімі бекітілді

<a href="https://kyzylorda-news.kz/">Kyzylorda-news.kz</a>. ҚР Білім және ғылым министрлігі «Білім министрі мәлімдеуінше, оқушылар бірінші тоқсанда қашықтан білім алады», деген ақпаратты жоққа шығарды. Бұл туралы министрліктің <a href="https://t.me/bilim_jane_gylym/1727">Telegram</a>&nbsp;каналында хабарланды.
<blockquote>
 «Әлеуметтік желілерде қазақстандықтар жаңа оқу жылының бірінші тоқсанында қашықтан білім алады екен, бұл туралы Білім және ғылым министрі Асхат Аймағамбетов брифингте мәлімдеді» деген жалған ақпарат тарап жатыр. ҚР Білім және ғылым министрі Асхат Аймағамбетов брифингтерде мұндай мәлімдеме жасаған жоқ. Оқыту форматы туралы шешімді коронавирус инфекциясының таралуына жол бермеу жөніндегі ведомствоаралық комиссия, елдің бас мемлекеттік санитарлық дәрігері және өңірлердің бас санитарлық дәрігерлері қабылдайды», делінген хабарламада.
</blockquote>

Оқушылар бірінші тоқсанда қашықтан білім ала ма?

<a href="https://kyzylorda-news.kz/">Kyzylorda-news.kz</a>. Басқарма басшысы Ақзира Қасымова қала аумағындағы «Саяхат» мөлтек ауданында инвестордың есебінен салынып жатқан «Ұлағат білім ордасы» мектебінің құрылысымен танысты.
Жеке кәсіпкердің қаржыландыруымен бой көтеріп жатқан 348 орындық мектеп ағымдағы жылдың 1 қыркүйегінде Саяхаттық оқушылардың игілігіне пайдалануға берілмек.
Айта кету керек, мөлтек аудан тұрғындары осыған дейін мектеп тапшылығының зардабын тартып келген болатын. Тұрғындар қажеттілігін қамтамасыз ету мақсатында заман талабына лайықталып салынып жатқан аталмыш білім үйі жаңа оқу жылынан бастап қаланың солтүстік аумағының жасөспірімдеріне сапалы әрі ақысыз білім беру жұмыстарын үйлестіреді, сонымен қатар, оқушыларды автобустармен тасымалдау, арнайы үйірме түрлері секілді қызметтерді тегін көрсететін болады.
Қазіргі таңда аймақта инвесторлардың жеке қаражаты есебінен салынған 10 білім беру нысаны тұрақты жұмыс жасап жатыр және жыл аяғына дейін «Nur Otan» партиясының жол картасын жүзеге асыру мақсатында 6 жаңа мектеп пайдалануға беріледі.

Қызылордада 6 жаңа мектеп пайдалануға беріледі

<a href="https://kyzylorda-news.kz/">Kyzylorda-news.kz</a>. Қыркүйектен бастап еліміздегі жоғары оқу орындары қашықтықтан білім беру жүйесін тоқтатады, деп хабарлайды&nbsp;<a href="https://qazaqstan.tv/news/143647/">Qazaqstan</a>&nbsp;ұлттық арнасы.&nbsp;
Жаңа ережеге сәйкес медицина, педагогика, заң, әскери іс, ветеринария, авиация, құрылыс саласының болашақ мамандары тек күндізгі бөлімде білім алады.
<blockquote>
 “Көптеген сұрақтар туындап жатқаны белгілі. Әрине, жұмыс істеп жатқан студенттерге ығайсыз болып жатқаны анық. Көзқарастарын да сұрап жатырмыз. Сабақ кестесін қалай құрған дұрыс. Бірнеше нұсқасын әзірледік. Оны студенттерге таныстырдық”, –&nbsp;дейді Kozybayev University академиялық мәселелер бойынша басқарма мүшесінің м.а.&nbsp;Жанар Таласпаева.
</blockquote>
Бүгінгі таңда екі сабақ кестесін қабылдауды жөн көріп отырмыз. Студенттерге 5 апталық сабақ кестесін қоюды қарастырып отырмыз. 1-семестрде 5 апта университет ішіне келіп оқу керек. 5 аптаның 2 аптасы мектептегі каникул уақытын қамтиды.&nbsp;
Петропавлдағы Қозыбаев университетінің студенттері мұндай өзгеріске наразы. Өйткені оқу ақысы екі есе қымбаттайды және қызмет етіп жүргендерге жұмыстан шығуға тура келеді. Қашықтан оқып жатқан 800-ден астам адамның көпшілігі ауылдық жерлерде тұрып жатыр. Студенттер оқу орнының ректорына петиция жолдамақ. Олар бастапқыда жасалған келісімшартқа сәйкес қашықтықтан оқу форматын өзгертпеуді талап етіп отыр.
<blockquote>
 “Біз оқып жүрген бөлімнің жабылайын деп жатқанын кездейсоқ білдік. Диплом алуға 2 жыл ғана қалды. Өзім ауыл мектебінде мұғаліммін. Кішкентай балам бар. Бірге қазір таңдау жасауға тура келеді: жұмыс істеу немесе оқу. Жұмыстан шықсақ, оқу ақысын қалай төлейміз? Құны жылына 400 мың теңге болады. Бізге бастаған оқуымызды қашықтықтан аяқтауға мүмкіндік берілсе дейміз. Әйтпесе төлеген ақша мен уақыт зая кеткелі тұр”, –&nbsp;дейді студент&nbsp;Евгения Қылышбекова.
</blockquote>

Қазақстан және Қызылорда облысының жаңалықтары: Білім