<a href="https://kyzylorda-news.kz/ru/obshestvo/">Kyzylorda-news.kz</a>. Назарбаев Зияткерлік мектептерінің оқушылары арасында өткізілген тоғызқұмалақтан желілік сайыста қызылордалық өрендер тағы да жеңіс тұғырынан көрінді. Бір алтын және бір қола медалін қанжығалаған ойыншылар командалық есепте екінші жыл қатарынан чемпион атанды.
Еске сала кетейік, жарыс 1-3 қараша аралығында PlayOk платформасында онлайн түрде өткізілді. Мектептің намысын Жұлдызай Мұнайтбасова (10-сынып), Досымжан Райымбек (11-сынып), Азамат Алтынбеков (7-сынып) және Жансая Досық (8-сынып) қорғады. Сыр бойылық зияткерлер еліміздің түпкір-түпкірінен жиналған 90 ойыншымен бірге жүлделі орындарға таласты. Нәтижесінде 10-12-сыныптар арасында оқушыларымыз олжалы болды.
Бұл спартакиаданың тұрақты қатысушысы – Жұлдызай Мұнайтбасова. Ол тоғызқұмалақ спорт түрімен 8 жасынан бастап айналысады.
<blockquote>
 «Тоғызқұмалақ ақыл-ойымызды дамытып, логикалық дағдыларымызды жақсартады және сыни ойлауға үйретеді. Мен бұл спорт түрімен шұғылдану арқылы математикалық білімімді кеңейте түстім», – дейді жеңімпаз оқушы Жұлдызай Мұнайтпасова.
</blockquote>
Айта кету керек, сыр бойылық оқушылар бұл спартакиаданың жыл сайынғы жеңімпаздары. Өткен жылы да NIS Kyzylorda құрамасы жеңіс тұғырынан көрініп, жалпы камандалық есепте «Үздік» команда атанған болатын.

NIS Kyzylorda құрамасы – спартакиада чемпионы

Kyzylorda-news.kz. Жалағаш ауданында «Серіктес директорлар» лигасының “Білім берудегі жаңа басымдық” тақырыбында көшпелі отырысы өткізілді. Жиынға облыстық білім басқармасының басшысы Ақзира Қасымова мен Қызылорда облысының білім саласындағы бақылау департаментінің басшысы Ғалия Дәулетова, «Серіктес директорлар» лигасының қала және аудандағы мүшелері қатысты.
Жиынға қатысушылар ең алдымен ерекше балаларға ерекше жағдай жасап, инклюзивті білім беруді дамытып отырған аудандағы Әл-Фараби атындағы №201 мектеп-лицейінде болды. Қонақтарға білім ордасындағы “Мұрагер” домбырашылар ансамблінің, мектеп парламентінің, “Оқуға құштар мектеп” оқу алаңы мен соңғы үлгідегі технологиямен жабдықталған инклюзивті сыныптарын таныстырды.
Мұнан соң, жиынға қатысушылар З.Жарқынбаев атындағы №202 орта мектептің жұмысымен танысты. Ұлттық құндылықтарды ұлықтайтын білім ордасындағы оқушылардан жасақталған оркестр, ұлттық ойындар (ләңгі, асық ату, бес асық) үйірмелері, «Ана мейірімі» аналар мектебі мен «Ұлағат» әкелер мектебінің жұмыстары көпшілік назарына ұсынылды. Сонымен қатар, әкелер мектебінің төрағасы, ардагер ұстаз Әбілхайыр Ералиевтің «Рухани жаңғыру» бағдарламасы аясында ашылған ұлттық этнографиялық кабинеті таныстырылып, мектеп театрының қойылымы көрсетілді.
Ары қарай шара «Серіктес директорлар» лигасының “Білім берудегі жаңа басымдық” тақырыбындағы көшпелі отырысымен жалғасты. Директорлардың басқосуында “Мектептегі көшбасшылық және адам ресурстарын дамыту” туралы Т.Жүргенов атындағы 123 мектеп-лицейінің директоры Л.Шөменова мектеп ұстанымын білім беру сызбасы арқылы көрсетіп, дамытушы топтардың жұмысына тоқталды. Содан соң, І.Қабылов атындағы 32 мектеп-лицейінің директоры Б.Әбдіриева “PRO INT” эксперименттік алаңындағы кәсіптік бағдар беру турасында өз ойларымен бөлісті.
Пікірталас алаңында Қызылорда облысының білім саласында сапаны қамтамасыз ету департаментінің басшысы Ғалия Ноғайқызы мен облыстық білім басқармасының басшысы Ақзира Бақтыбайқызы бүгінгі күні білім саласына қойылып отырған талаптың жоғарылығына, мектеп директорларының ұжымды басқару қадамдары мен тетіктеріне, жетістікке жету мүмкіндіктеріне тоқталды.
<blockquote>
 “Іс-тәжірибе алмасу бағытындағы №201, №202 мектептердің құндылыққа негізделген тәрбие жұмыстарын, инклюзивті білім берудегі жаңашылдықтарды көрдік. Осы секілді жұмыстар өңіріміздегі барлық мектептерде жалғасын табуы тиіс. Ал мектеп директорлары осыған сәйкес сапалы жұмыс жасауы керек. Сапаға бағытталған жұмысты жүйелендіруде талдау, сараптау, дамытуға басымдық беріп, нәтижелі жұмыс көрсету қажет”, – деді басқарма басшысы Ақзира Қасымова.
</blockquote>
Жалағаш ауданында өткізілген «Серіктес директорлар» лигасының көшпелі жиыны алдағы уақытта барлық ауданда өткізілетін болады.
<img src="https://kyzylorda-news.kz/wp-content/uploads/2021/11/fb_img_1636853629698.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636853638713.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636853645461.jpg" alt="" />
.

Жалағашта «Серіктес директорлар» лигасының көшпелі отырысы өтті

<a href="https://kyzylorda-news.kz/ru/obshestvo/">Kyzylorda-news.kz</a>. Мектеп жасына дейінгі балаларға арналған «Ұмай» қайырымдылық үйі мектеп жасына дейінгі балаларға арналған экологиялық білім беру және эковолонтерлікті дамыту бойынша жобаны іске асыруда. Жоба «Шеврон» компаниясы және Орталық Азияның Еуразия қорымен әріптестікте «Qolda 3.0» жедел көмек бағдарламасы аясында гранттық қаржыландыру есебінен іске асырылады.
Балалар үйінің 10 тәрбиешісі «Мектеп жасына дейінгі балалардың қарапайым экологиялық түсініктері» бағдарламасы бойынша оқытудан өтеді. Тәрбиешілер Монтессори әдісінің элементтерін қолдана отырып, мектеп жасына дейінгі 75 балаға білім берумен айналысады. Жылыжайда 48 сағаттық теориялық және практикалық сабақтар балалардың бойына экологиялық мәдениетті ойын түрінде бекітуге бағытталған.
Сондай-ақ «Ұмай» қайырымдылық үйінде табиғат аясында тұрақты экскурсиялар өткізу арқылы балалардың бойына сұлулықты көру қабілетін арттырады. Эксперттердің айтуынша бұл байқампаздық пен эмоционалды интеллектті дамытады, баланың бойындағы шығармашылық қабілеттерді оятады және қоршаған ортаға деген жауапкершілік сезімін тәрбиелейді.
<blockquote>
 Оқыту семинарларының тренері Анар Изден: «Табиғатқа тамсану бойынша сабақтар – бұл мектепке дейінгі білім беру процесінде экологиялық бағытты дамыту ғана емес. Бұл – балалардың шығармашылық әлеуетін дамыту және мәдениетті адамды тәрбиелеу. Бүгін семинарда маған «Таудың басындағы жалғыз ағаш» тақырыбын талдау ұнады. Ұмайлықтар күш пен тұрақтылық тақырыбын өте кең және қолжетімді түрде аша білді. Жоба аясындағы басқа да тақырыптар мазмұнды болады деп ойлаймын» – деп атап өтті.
</blockquote>
Мектеп жасына дейінгі балалардың эко-білім беру бағдарламасына қатысуы олардың дұрыс экологиялық әдеттерін деп күтілуде, атап айтқанда: қоқыс тастамау, гүлдерді жұлмау, пластикті пайдаланбау, қалдықтарды сұрыптау, үй өсімдіктерін өсіру, ағаш отырғызу және қоршаған ортаға мұқият болу қасиеттерінқалыптастыруға көмектеседі.
<blockquote>
 «Мектеп жасына дейінгі балаларға экологиялық тәрбие беру өте маңызды! Дәл осы 4-5 жаста сана элементтері айқын көрінеді: табиғатқа деген қызығушылық, эмоционалды реакциялар, табиғаттағы адамдардың мінез-құлқын саналы бағалау. Осылайша, мектепке дейінгі балалық кезеңде балалардың экологиялық мәдениетінің қалыптасуы мен дамуы жүреді. Дәл уақытында осы субмәдениеттің сапалы түрде қалыптасуының арқасында бала өзінің білімі мен дағдыларын келесі ұрпаққа бере отырып, қоршаған табиғатты өмір бойы жақсы көретін болады, бағалайды және оны қорғайды. Оқыту семинары аясында мен көп нәрсені білдім. Маған тыңдаушы ғана емес, орын алып жатқан оқиғалардың қатысушысы болу ұнады. Мен өз жұмысыма басқаша қарай бастадым», – деп санайды қайырымдылық үйінің тәрбиешісі Айзада Дәуренбекова.
</blockquote>
«Ұмай» мектеп жасына дейінгі балаларға арналған сауықтыру және тәрбиелеу қайырымдылық үйі» – 1999 жылы құрылған мемлекеттік емес мекеме. Облыстың ең ірі үкіметтік емес ұйымдарының бірі қазіргі уақытта 41 қызметкерді жұмыспен қамтамасыз етіп отыр. Негізі қаланған сәттен бастап әлеуметтік жетімдіктің алдын алу мақсатында қиын өмірлік жағдайларға тап болған отбасыларға үздіксіз қызмет көрсетеді. Қайырымдылық үйі республикалық «Таным» сыйлығының иегері атанды.

Мектеп жасына дейінгі балаларға экологиялық тәрбие беру маңызды

<a href="https://kyzylorda-news.kz/ru/obshestvo/">Kyzylorda-news.kz</a>. «Тұлпар мініп, ту алған!» байқауының облыстық кезеңі өз мәресіне жетті.
Облыс әкімдігі мен облыстық білім басқармасы, «Nur Otan» партиясы және «Qazaq Epos» қорының ұйымдастыруымен өткен байқауға 713 оқушы қатысып, өзара бақ сынасты. Байқау 6-10 сынып оқушылары арасында «Едіге батыр» жырын жатқа айтудан өтті. Өңірлік коммуникациялар қызметінде өткен баспасөз конференциясында облыстық білім басқармасының басшысы Ақзира Қасымова ауқымды шараның қорытындысын хабарлады.
<blockquote>
 «Бүгін облыс көлеміндегі «Тұлпар мініп, ту алған!» байқауының жеңімпаздары анықталды. Байқауда 713 оқушының арасынан іріктеліп шыққан 24 оқушы облыстық кезеңде жарысқа түсті. Нәтижесінде 1- орынды қазалылық Гаухар Әзен, 2-орынды Гүлназ Жеңісбек, ал, 3-орын Арал ауданынан келген Қарақат Бекрікқызы иеленді. Айта кетейін, І-орын иегеріне 750 000 теңге, ІІ орын иегеріне 350 00 теңге, ІІІ орын үшін 200 000 теңге қаржылай сый берілді», – деді басқарма басшысы Ақзира Қасымова.
</blockquote>
<img src="https://kyzylorda-news.kz/wp-content/uploads/2021/11/254825471_1409916952737146_8448498284809095398_n.jpg" alt="" />

«Тұлпар мініп, ту алған!» байқауының облыстық кезеңі аяқталды

<a href="https://kyzylorda-news.kz/ru/obshestvo/">Kyzylorda-news.kz</a>. ҚР Білім және ғылым министрінің қашықтан білім беру ережесіне өзгерістер енгізуді көздейтін бұйрығы жарияланды, деп хабарлайды ҚазАқпарат.
Құжаттың толық атауы – «Қашықтан білім беру технологиялары бойынша оқу процесін ұйымдастыру қағидаларын бекіту туралы» Қазақстан Республикасы Білім және ғылым министрінің 2015 жылғы 20 наурыздағы № 137 бұйрығына өзгерістер енгізу туралы бұйрық.
Құжат 2021 жылдың 19 қарашасынан бастап қолданысқа енгізіледі.
Бұйрыққа енген өзгерістер бойынша, бұдан былай білім беру ұйымдары қашықтан оқытуға толық көшкен кезде процеске қатысушылардың бәрін ақпараттық жүйемен, сабақтардың электрондық кестесімен, журнал және оқу ресурстарымен қамтамасыз етуі керек.
Нақтырақ айтсақ, қашықтан оқытуды ұсыну үшін білім беру ұйымдары мына талаптарға сай болуы керек:
1) оқу қызметін ұйымдастыру үшін интернет желісіне қосылуға мүмкіндік беретін телекоммуникациялық арналардың болуы;
2) ақпараттық ресурстарға, цифрлық ресурстарға жедел қол жеткізу құралдарының болуы;
3) оқу-әдістемелік, ұйымдық-әкімшілік ақпаратты, бейнесабақтарды қамтитын ақпараттық жүйенің болуы;
4) «Орта, техникалық және кәсіптік, орта білімнен кейінгі білім беру ұйымдарының педагогтері жүргізу үшін міндетті құжаттардың тізбесі және олардың нысандарын бекіту туралы» Қазақстан Республикасы Білім және ғылым министрінің 2020 жылғы 6 сәуірдегі № 130 бұйрығына (нормативтік құқықтық актілерді мемлекеттік тіркеу тізілімінде № 20317 болып тіркелген) сәйкес электрондық журналдар мен күнделіктер жүйесіне қосылу;
5) білім беру ұйымдарының педагогтерінде ақпараттық технологиялар бойынша курстарынан өткендігі туралы сертификаттардың болуы;
6) оқу процесін цифрлық білім ресурстарымен қамтамасыз ету;
7) білім беру ұйымдарында пайдаланылатын бағдарламалық-аппараттық кешенге және қолданбалы бағдарламалық қамтамасыз етуге қойылатын ұсынылған ең аз талаптардың сақталуы.
Сондай-ақ, құжатта жоғары және жоғары оқу орнынан кейінгі білімнің білім беру қашықтан ұйымдастырылса, қандай талаптар сақталуы керектігі нақты көрсетілген. Ол талаптарды мына сілтемеден көруге болады.

Қазақстанда қашықтан оқыту тәртібі өзгереді

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстанда волонтер студенттерді материалдық ынталандыру жүйесі енгізілді. Енді волонтерлік қызметпен белсенді айналысатын білім алушылар атқарған еңбегі үшін ақшалай сыйақы ала бастайды. Сондай-ақ академиялық кредиттер есептелуі мүмкін. ҚР Білім және ғылым министрлігі тиісті нормаларды енгізді, деп хабарлайды ҚазАқпарат.
Бұл шешім әлеуметтік маңызды қызметпен айналысатын белсенді студенттердің санын көбейту мақсатында қабылданып отыр.
Мысалы, мұқтаж адамдарға көмек көрсетіп жүрген, түрлі әлеуметтік жобаларды жүзеге асыратын студенттер аз емес.
<blockquote>
 «Министрлік жастар бастамаларына ерекше ден қойып, оларды қолдайды. Мәселен, енді 20 сағаттық волонтерлік қызмет үшін студенттерге ваучер түрінде кредит беріледі. Бұл студент оқитын жоғары оқу орнында/білім беру ұйымында екі академиялық кредитті (сағатты) есепке алуға мүмкіндік береді. Сондай-ақ студент 20 000 теңге мөлшерінде біржолғы ақшалай төлем алады. Егер студент 50 сағат жұмыс істесе, оған бес академиялық кредит (сағат) есептеліп, 50 000 теңге төленеді»,&nbsp;– деді ҚР БҒМ «Қаржы орталығы» АҚ басқарма төрағасы Асқар Ибраимов.
</blockquote>
Айта кетейік, волонтер студенттерге арналған төлемдер тілдерді оқыту және компьютерлік сауаттылық бойынша репетиторлық қызмет үшін, ерекше білім беру қажеттілігі бар балалармен жұмыс, сонымен бірге аула және спорт клубтарын ұйымдастырғаны үшін, балалар, қарттар және мүмкіндігі шектеулі адамдармен жүргізілген әлеуметтік жұмыс, қоршаған ортаны қорғау және басқа да қызметтер үшін қарастырылған.
Волонтер-студенттерді көтермелеу жүйесін енгізу – жастар арасында әлеуметтік жауапкершілікті дамыту және Қазақстанда волонтерлер қозғалысын ілгерілету барысында жаңа серпін болмақ.

Қазақстанда волонтер студенттерге ақшалай сыйақы төленетін болды

<a href="https://kyzylorda-news.kz/ru/obshestvo/">Kyzylorda-news.kz</a>. Еліміздегі Назарбаев Зияткерлік мектептерінің 300-ге жуық оқушысы қатысқан додаға 264 жоба ұсынылды. Жұмыстар «Ғылыми-техникалық прогресс – экономикалық өсудің негізгі буыны ретінде», «Экономикалық және әлеуметтік процесстерді математикалық модельдеу», «Таза табиғи орта – «Казақстан – 2050» стратегиясын жүзеге асырудың негізі», «Қазақстанның тарихи ескерткіштері мен перспективалық туристік бағдарлар» сияқты төрт бағытты қамтыды. Сыр өңіріндегі NIS командасы бұл сайыста 12 зерттеу жұмысын таныстырып, ғалымдардың жоғары бағасын алды.
12-сынып оқушысы Нұрай Өмірзақова ортағасырлық Жанкент қалашығындағы тың зерттеулерін таныстырды. Оның айтуынша қазіргі таңда Сыр бойында құпиясы ашылмаған 40-тан астам қалалар бар екен. Солардың бірі – орта ғасырдағы Оғыз хандарының резиденциясы болған Жанкент республикалық маңызға ие тарихи қала болып табылады.
<blockquote>
 «Археологтармен жүргізген сұхбат барысында Жанкент қаласы аймақ бойынша ең басты қыш өндіруші орталық болғаны анықталды. Сонымен қатар жергілікті халық егін шаруашылығымен айналысып, сыртқы импорт көмегінсіз елді астықпен қамтамасыз ете алғанын білдім. Менің ойымша тарихты сақтап қалу үшін қаланың фотосуреттерін геоинформациялық жүйелерде (ГИС) енгізу қажет», – дейді Нұрай.
</blockquote>
Ал 9-сынып оқушысы Арайлым Әшірмет жастардың кітап оқуға қызығушылықтарын арттыруға арналған «Сенің “кітап сөрең”» атты онлайн платформа жасады. Әдеби сайт ерекшелігі өзі оқыған сүйікті кітаптарының мазмұнына сүйене отырып көлемді шығармалармен танысуға мүмкіндік беретін мультимедиялық лонгридтер әзірледі.
<blockquote>
 «Бұл электронды «кітап сөресінде» оқырмандар әлемдік классиканың үздік туындыларымен таныса алады. Әртүрлі мультимедиялық элементтерді қолдану арқылы оқырмандардың қызығушылығын арттыра аламыз», – деп бөлісті Арайлым.
</blockquote>
Химия секциясында 12-сыныптың білім алушысы Зарина Айсауытова өз ғылыми жаңалығын таныстырды. Ол кальций силикатының золін вакуммда өңдеу және оның мыс катиондарын сорбциялау қасиетін зерттеу арқылы өндірістік суларды тазалаудың тиімді әдісін ұсынды. Жоғарыда аталған барлық оқушылардың жұмыстары байқаудың қорытындысы бойынша үздік деп танылып, жүлделі 2-орынмен марапатталды.
Бұл білім додасында қола медалін иеленгендер – Бәйдібек Мұсаев пен Ляззат Өтеп. Бірі полиэтилентерефлатат қалдықтарының бұзылуы арқылы бис-2-гидроксиэтилтерефлатат алуды зерттесе, енді бірі қазіргі жастар прозасының даму деңгейін талдау арқылы жасөспірімдерді қызықтыратын қазақ тіліндегі әдеби шығармалардың тізімін жіктеді.
<blockquote>
 «Алдымен 14-17 жастағы жасөспірімдерден сауалнама алып, респондеттерді қызықтыратын жанрларды анықтадық. Қазіргі оқушылар детектив, мистика бағытында шетелдік шығармаларды көп оқиды. Осы ретте қазақ тіліндегі шағын прозаларға зерттеу жүргізіп, әдебиеттер тізімі ұсынылды», – дейді Ләззат.
</blockquote>
Айта кетейік, оқушылардың кітап оқуға деген қызығушылығын арттыру мақсатында Ляззат мектеп жанынан «Руханият» жас оқырмандар клубын құрды. Клуб мүшелері оқыған шығармалары жайында ой бөлісіп, талдау жүргізіп, заманауи әдебиеттерді әлеуметтік желілер арқылы көпшілікке насихаттайды.

Ғылыми жобалар байқауында қызылордалық зияткерлер бес жүлделі орын иеленді

<a href="https://kyzylorda-news.kz/ru/obshestvo/">Kyzylorda-news.kz</a>. Мемлекет және қоғам қайраткері,&nbsp;тарих ғылымдарының докторы,&nbsp;профессор,&nbsp;Қазақстан Республикасының Еңбек сіңірген қызметкері&nbsp;Өмірзақ Озғанбаев Сыр еліне арнайы іс-сапармен келіп,&nbsp;Қорқыт Ата атындағы Қызылорда университетінің ұжымымен кездесті.
Жиында университеттің ректоры Бейбіткүл Кәрімова Өмірзақ&nbsp;Озғанбаевтың&nbsp;елді дамыту, сала жұмыстарын жандандыру бағытында айрықша еңбек сіңіргенін атап өтті.
Кездесуге облыстық ардагерлер кеңесі төрағасының орынбасары
Күләй Ермағамбетова, Қызылорда қалалалық ардагерлер Кеңесінің төрағасы Сұлтанбек Тәуіпбаев, университет ардагерлері, профессор-оқытушылары және жас ғалымдар мен студенттер қатысты.
Айта кету керек, Өмірзақ Озғанбайұлы еңбек жолын білім беру саласынан бастап, «Білім» облыстық ұйымы төрағасының орынбасары, Маңғыстау облыстық педагог кадрларды даярлау, кәсіптік оқыту басқармасының Өңірлік институтының директоры, Қазақ КСР Білім және ғылым министрлігінің Ұлттық оқыту орталығының директоры, Маңғыстау облысы Білім департаментінің басшысы, Ы.Алтынсарин атындағы Қазақ білім беру академиясының президенті, Т.Рысқұлов атындағы Қазақ экономикалық университетінің проректоры қызметтерін атқарды.
1994-1995 жылдары Қазақстан Білім және Ғылым жөніндегі министрлігінің жаңа технологиялар комитетінің мүшесі, 1996-1999 жылдары ҚР Парламенті Сенатының депутаты, Аймақтық даму және жергілікті басқару комитетінің төрағасы ретінде жауапкершілігі өте жоғары, ауқымды жұмыстарды жүргізді. «ҚазМұнайГаз барлау және өндіру» АҚ бас директорының кеңесшісі, «Рауан Медиа Груп» АҚ бас директорының кеңесшісі, республикалық «Ардагерлер ұйымы» Орталық кеңесінің төрағасы ретінде де еліміз үшін маңызды мәселелердің шешілуіне атсалысты.
Бүгінде «Ардагерлер ұйымы» Республикалық қоғамдық бірлестігі Орталық кеңес төрағасының орынбасары қызметін атқарады.

Өмірзақ Озғанбаев Қорқыт ата атындағы Қызылорда университетінің ұжымымен кездесті

<a href="https://kyzylorda-news.kz/ru/obshestvo/">Kyzylorda-news.kz</a>. Өскемен қаласында республикалық педагогтар олимпиадасының жеңімпаздарын марапаттау рәсімі өтті. «Дарынды балаларға-талантты ұстаз» атты байқауға аймағымыздан 4 мұғалім қатысты.
Жыл сайын дәстүрлі түрде өткізілетін республикалық олимпиаданың басты мақсаты – жас педагог қызметкерлердің шығармашылық әлеуетін және өзін-өзі дамыту үшін жағдай жасау, білім беру жүйесін жетілдіруге жас мұғалімдердің белсенді кәсіби көзқарасын қалыптастыру болып табылды.
Төрт кезеңде бақ сынасқан олимпиаданың қорытындысымен ІІ орынды – Қызылорда қаласы, №4 дарынды балаларға арналған мектеп-интернатының биология пәнінің мұғалімі Жазира Тыныбек алды. ІІІ орынды – Арал ауданы №2 дарынды балаларға арналған мектеп-интернатының математика пәнінің мұғалімі Нұрхан Мұстафа, Қызылорда қаласы №198 орта мектептің информатика пәнінің мұғалімі Айдана Жауғашарова ІІІ орын иемденді.
<img src="https://kyzylorda-news.kz/wp-content/uploads/2021/11/253147053_1231512280685308_6247618736851782493_n.jpg" alt="" />
<img src="https://kyzylorda-news.kz/wp-content/uploads/2021/11/251583572_1231512354018634_186046190238972544_n.jpg" alt="" />

Қызылордалық жас педагогтар республикалық олимпиадада топ жарды

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін облыстық білім басқармасының қолдауымен «Серіктес директорлар» лигасының менеджер басшыларға басқару үдерісін ұйымдастырып, оның тиімділігін арттыру үшін теориялық концепцияларын, мазмұнын, тәжірибедегі қажеттілігін іс жүзінде қолдануға арналған «Теория, тәжірибе, іс әрекет: Жаңа көзқарастар алаңы» атты жаңа жинақтың тұсауы кесілді.
Жаңа жинақтың тұсау кесеріне облыстық білім басқармасының басшысы Ақзира Бақтыбайқызы, ҚР Ұлттық ғылым академиясының акамедигі, экономика ғылымдарының докторы, профессор Бақберген Сәрсенұлы, Қызылорда облыстық мәслихатының хатшысы Наурызбай Сейтқалиұлы, Педагогика ғылымдарының кандидаты, ҚР еңбек сіңірген қайраткері, ҚР Білім беру ісінің үздігі, Білім беру ісінің құрметті қызметкері Алима Жақыпқызы, «Құрмет белгісі» ордені мен Ы.Алтынсарин атындағы және «Ерен еңбегі үшін» медалдарының иегері, халықаралық «Жыл директоры атанған білім саласының ардагері Күләш Бердікенқызы және қала мектептерінің директорлары, аудандық білім бөлімінің басшылары ZOOM қосымшасы арқылы қатысты.
<blockquote>
 «Серіктес директорлар» лигасы өткен оқу жылында жасақталған тұжырымдамаларды жинақтап, өздеріңіздің назарларыңызда тұсауын кесті, енді оны бағыттар бойынша енгізілген тәжірибелерін магнитті түрде өзге білім ұяларына тарататын болады», – деді Ақзира Қасымова.
</blockquote>
Шара барысында «Серіктес директорлар» лигасының семинары өткізілді. «Білім берудегі импульс, менеджмент, прогресс» тақырыбында өткен директорлардың басқосуында білім саласының майталмандары, ұлағатты ұстаздар Досмамбетов Бақберген Сәрсенұлы, Байқадамов Наурызбай Сейтқалиұлы, Әбдіхалықова Алима Жақыпқызы, Мергенбаева Күләш Бердікенқызы баяндама жасап, өзекті тақырыптарға негізделген мәселелерді пікір алмасу форматында талқылады. Сонымен қатар, оқытудың педагогикалық тәсілдері мен директор қандай болуы керектігі жөнінде өз тәжірибелерімен бөлісті.
Жиында Ақзира Бақтыбайқызы директорлардың бәсеке ағынына қарсы төтеп беру, өзіндік даму, ата-анамен байланыс туралы ойымен бөлісті. Ой алаңында барлық директорлар да өзіндік пікірін айтып, көзқарастарын білдірді.
Басқосу соңында басқарма басшысы Ақзира Бақтыбайқызы «Серіктес директорлар» лигасының жобалары жаңа мазмұнға бағытталып, даму, жаңару жолындағы жаңалықтары мен түрлі өзгерістері өңіріміздегі білім беру саласының дамуына септігін тигізетінін атап өтті.
Алдағы уақытта лиганың аудандардағы көшпелі отырыстары өткізіліп, құрамы жаңа директорлармен толығады.
<img src="https://kyzylorda-news.kz/wp-content/uploads/2021/11/253282502_1231369937366209_1820674666979932839_n.jpg" alt="" />
<img src="https://kyzylorda-news.kz/wp-content/uploads/2021/11/252983314_1231369827366220_4506440431061001412_n.jpg" alt="" />

Қызылордада «Серіктес директорлар» лигасының тұжырымдамасы жарық көрді

<a href="https://kyzylorda-news.kz/ru/obshestvo/">Kyzylorda-news.kz</a>. Назарбаев Зияткерлік мектептерінің ең қызықты жобалардың бірі — «Туған елге тағзым» өлкетану-зерттеу экспедициясы жүріп жатыр.
Бес күнде қызылордалық зияткерлер Сыр өңірінің тарихи, мәдени және инновациялық дамуын зерттемек. Атап айтқанда, оқушылар экспедициясы Ақмешіт-Перовсктің сырымен, Сығанақ, Сауран көне қалашықтардың тарихи деректерімен, Қаратау бөктеріндегі қола дәуіріне жататын петроглифтермен, Байқоңыр ғарыш айлағымен, еліміздің ең көрікті Нағи Ілиясов ауылымен және ескерткіш нысандарымен жан-жақты танысатын болады.
Айта кетейік, «Туған елге тағзым» өлкетану-зерттеу экспедициясы — Зияткерлік мектептердің патриоттық тәрбие беруде маңызы зор дәстүрлі жобасы. Жыл сайын NIS-тің үздік оқушыларынан құралған экспедициялық топ еліміздің түрлі аймақтарына саяхаттап, сол жердің табиғатын, мәдениетін, тарихи ескерткіштері мен архитектуралық нысандарға зерттеу жүргізіп, ғылыми жаңалықтар ашуға ұмтылады.
Өлкетану-зерттеу экспедициясы аясында қызылордалық зияткерлер Ақ орданың астанасы болған , ортағасырлық қалалардың бірі Сауран қалашығына саяхаттады. Бұл орталық – көне тарихтың теңдесіз ескерткіші. Экспедиция барысында оқушылар қаланы қайта қалпына келтіру жұмыстарының нәтижесінде Сауран қалашығындағы көне үйлерді, мешітті көзбен көріп, жергілілікті халықтың тұрмыс-тіршілігі туралы ақпарат алды.
<blockquote>
 «Бұл жерде біз сол заманда билеген хандар жайында мағлұмат алдық. Сонымен қатар бұл қала сауда мен қолөнерінің ірі орталығы болғанын байқадық. Үлкен қақпалар арқылы қала орталығына кіріп, құнды деректер жинадық. Мұндай жобалар біздің тарихымызды танып білуде ықпалы зор», – дейді экспедицияға қатысушы 11-сынып оқушысы Айгерім Серікбайқызы.
</blockquote>
Сонымен қатар экспедиция барысында оқушылар Қызылорда облысы Жаңақорған аудандық тарихи-өлкетану музейінде болды. Бұл жерде көне қалалардан табылған қыш ыдыстар, көне теңгелер секілді ең құнды жәдігерлерді кездестіруге болады. Жалпы, бұл мұражайда 8600 – ден астам экспонат бар.
«Туған елге тағзым» экспедициясы аясында қызылордалық зияткерлер өңірдегі «Сауысқандық» шатқалындағы петроглифтерге зерттеу жұмыстарын жүргізді.
Шиелі ауданында орналасқан Қаратау тау жоталарының жартастарындағы қола дәуірінен қалған суреттерде антропоморфтық бейнелер, арбалар, аңшылық сюжеттері мен солярлық таңбалар кездеседі. Тарихи ескерткішпен танысу барысында жас зияткерлер антропогендік, техногендік және табиғи факторлардың әсерінен оның жойылу үстінде екенін байқады. Және де бұл мәселені шешуде өз идеяларын ұсынады.
<blockquote>
 «Сауысқандық петроглифтері» электронды базасын құру және виртуалды музей әзірлеу ойға келді. Бүгінгі экспедиция барысында біз қажетті деректер жинап, мол ақпарат алдық. Алдағы уақытта осы бағытта жұмыс жасайтын боламыз», – дейді 9-сынып оқушысы Еркін Ағзам.
</blockquote>
<img src="https://kyzylorda-news.kz/wp-content/uploads/2021/11/252338059_2944659982530583_3272072553893522505_n.jpg" alt="" />
<img src="https://kyzylorda-news.kz/wp-content/uploads/2021/11/250892080_2944660202530561_5434091696226490812_n.jpg" alt="" />
<img src="https://kyzylorda-news.kz/wp-content/uploads/2021/11/252737118_2945624072434174_507144943557468074_n.jpg" alt="" />
<img src="https://kyzylorda-news.kz/wp-content/uploads/2021/11/252782963_2945624299100818_8197739547435764032_n.jpg" alt="" />

Зияткер оқушылардың экспедициясы қола дәуіріне саяхаттады

<a href="https://kyzylorda-news.kz/">Kyzylorda-news.kz.</a> «Білімді ұлт» ұлттық жобасының аясында 5000 мектептің материалдық- техникалық базасы жаңартылып, қауіпсіздік шаралары күшейтіледі. Ал шалғайдағы шағын мектептерге қаладағы әлеуетті мектептер әдістемелік көмек беріп, «тәлімгер» болады. Бұл туралы ҚР Білім және ғылым министрлігі Мектепке дейінгі және орта білім комитеті төрағасының орынбасары Сапура Төлекова айтты, деп хабарлайды <a href="https://lenta.inform.kz/kz/ulttyk-zhoba-shalgaydagy-mektepterge-kaladagy-aleuetti-mektepter-talimger-bolady_a3856668">ҚазАқпарат</a>.
Жоба аясында мектепке дейінгі тәрбиенің мемлекеттік стандартын өзгерту көзделген. Министрлік өкілі осы жоспардың қала іске асатынын баяндады.
<blockquote>
 «Мемлекет басшысының тапсырмасы бойынша барлық мектепке дейінгі ұйымда бала дамуының жаңа моделі енгізіледі. «Ойын арқылы оқыту» қағидаты негізінде мемлекеттік стандарт өзгертілетін болады. Бұрынғы стандартта негізінен мектептердегі академиялық білім қамтылған. Яғни балабақшадан бастап пәндер оқытылатын. Енді жаңа стандарт бойынша балабақшада қалыптасатын дағдылардың бәрі ойын арқылы сіңіріледі. Мектепке дейінгі тәрбие дегеннің өзі балабақша мен мектепалды даярлығы деп бөлінеді. Сол мектепалды даярлықта ғана оқыту ұйымдастырылады. Оның өзі бағаланбайтын ойын түрінде жүреді», – дейді комитет төрағасының орынбасары.
</blockquote>
«Білімді ұлт» ұлттық жобасының аясында қала мен ауыл мектептерінің арасындағы сапа айырмашылығын қысқарту мақсат етіліп отыр.
<blockquote>
 «Ол үшін ең әуелі қалалар мен аудан орталықтарындағы әлеуеті мықты мектептер ауылдағы қандай да бір кедергісі бар мектептерге тәлімгер болып бекітіледі. Бұл негізі 2019 жылдан басталған болатын. Бірақ саны аз еді. Яғни мектептер арасында әдістемелік сүйемелдеу жанданады. Тәлімгер мектептер мен түрлі кедергісі бар мектептердің саны кейін нақтыланады. 2019 жылдан бері 50-дей мектеп осындай әдістемелік сүйемелдеуге тартылған», – деді Сапура Төлекова.
</blockquote>
Министрлік Ұлттық жоба аясында мектептердің әлеуетіне жеке-жеке талдау жүргізбекші. Сол үшін халықаралық PISA стандарттарын пайдалану жоспарланып отыр.
<blockquote>
 «Келесі жылы халықаралық PISA сараптамасы бойынша салыстырмалы талдаулар жүргізіледі. Осы жолы Қазақстан мектептерінде алғаш рет «Мектепке арналған PISA» деген жоба іске асады. Қазіргі PISA талдауларында жалпы Қазақстан бойынша көрсеткіштер анықталса, мұнда әр мектептің мүмкіндігі мен әлеуеті, проблемасы мен кемшілігі айқын көрінеді. Бірінші жылы пилоттық негізде 200 мектеп алынып тұр. Кейін бірте-бірте 1000 мектепке барады. Бұл да мектептердің проблемасын жеке-жеке талдап, шешімін табуға септігін тигізеді», – деді сарапшы.
</blockquote>
Сондай-ақ ол 2024 жылы 12 жылдық білім беру жүйесіне көшу жоспарланғанын еске салды.
<blockquote>
 «Оның аясында оқу бағдарламасы толығымен өзгереді. Бұл жерде білім мазмұнын қолданбалы форматқа ауыстыруға басымдық беріледі. Қазір бізде алған білімді қолданып үйрену деген мәселе кенже қалыңқырап тұр. Сондықтан 12 жылдық жүйе аясында функционалдық құзыреттілікке бағытталған білім мазмұны енгізіледі. Демек қазіргі жаттанды ереже, жаттанды формула сияқты нәрселерден сәл алшақтаймыз. Мысалы, математикадан «аудан» ұғымы оқытылса, әр оқушы үйінің еденін кафельдеу үшін қанша материал алатынын есептейді. Осы сияқты барлық пәндерді нақты өмірмен байланыстырып оқыту, пәнаралық байланысты тереңдету алға шығады. Қазіргі STEM бағыты сияқты бірнеше пәннің интеграциясы бойынша оқушылар өзіне қажетті жоба жасауға бейімделеді», – деді ведомство өкілі.
</blockquote>
Оның айтуынша, 12 жылдық білім жүйесіне көшу жергілікті бюджеттер есебінен іске асады. Ал «Мектепке арналған PISA» жобасы бойынша 200 мектепте талдау жүргізуге 213 млн теңге бөлінген.
Ұлттық жобаның тағы бір жаңашылдығы қосымша білім беруге мемлекеттік тапсырыс беру бастамасымен байланысты. Маманның сөзінше, бұл да жергілікті бюджеттен қаралады.
<blockquote>
 «Яғни жерігілкті бюджеттің мүмкіндігіне қарай бөлінеді. Қосымша білімге мемлекеттік тапсырыс аясында тегін үйірмелермен қамту биыл да іске асып жатыр. Тек оқушылар сарайы мен музыка мектептері ғана емес, түрлі дамыту орталықтары, жекеменшік би үйірмелері де конкурс арқылы тапсырысқа ие болып, орындай алады. Бұл не үшін керек? Бала робот техникасы бойынша үйірмеге қатысқысы келді дейік. Бірақ оны үйрететін мемлекеттік орталық қаланың екінші шетінде болуы мүмкін. Осындай балалар мемлекеттік тапсырыс арқылы үйіне жақын жердегі жекеменшік орталықтағы үйірмеге тегін қатыса алады. Мысалы спорттық үйірмелер бойынша айтсақ, 2020 жылы оқушылар 87 пайыз қамтылған. 2025 жылы бұл көрсеткіш 100 пайыз болуы керек», – деді Сапура Төлекова.
</blockquote>
Бесжылдық жоба шеңберінде мектептерді қауіпсіз әрі жайлы етудің нақты өлшемдері енгізілмек.
<blockquote>
 «Бұл іс екі негізгі бағыт бойынша қарастырылып отыр. Ауылдар мен шағын қалалардағы мектептердің ішінде 5000 мектепті жаңғырту қолға алынған. Оның ішіне күзетшімен, бақылау камераларымен қамту сияқты қауіпсіздік шаралары кіреді. Сондай-ақ, күрделі жөндеуден өткізіліп, заманауи пән кабинеттерімен жабдықталады. Интернетпен қамтамасыз етіп, асханаларын жаңа үлгіде жабдықтау, кітапханаларын жаңарту да бар.
 Бұл мақсатқа 2021 жылы 133 млн теңге қарастырылған. Жалпылап айтсақ, апатты және үш ауысымды мектептердің санын азайту, жаңадан ашылатын мектептерді кадрмен қамтамасыз ету, қауіпсіздік шаралары мен матералдық-техникалық базаны жаңартуға 2021-2025 жылдары 3,6 млрд теңге бөлінбек», – дейді Мектепке дейінгі және орта білім комитеті төрағасының орынбасары.
</blockquote>
Ұлттық жоба аясында ел арасында «ПМПК» деп қысқартылып айтылатын ерекше білім беру қажеттілігі бар балаларды психологиялық-педагогикалық қолдауды қамтамасыз ету үшін норматив жеңілдетілмек.
<blockquote>
 «Бұрын 60 мың балаға бір комиссия деп қарастырылса, Ұлттық жоба аясында соны 50 мың балаға 1 комиссия деп жаңарту көзделіп отыр. Яғни аймақтарда жаңа комиссиялар құрылады деген сөз. Бұл кезектерді азайтады. Қазір ерекше білім беруге мұқтаж балалардың ұзақ уақыт кезек күтуі жиілеп барады. Бұл соның алдын алу үшін жасалып отыр», – деді Сапура Төлекова.
</blockquote>

Қазақстан және Қызылорда облысының жаңалықтары: Білім