<a href="https://kyzylorda-news.kz/">Kyzylorda-news.kz</a>. Қызылорда облысы білім басқармасының бұйрығының негізінде «Облыстық балалар оңалту орталығы» коммуналдық мемлекеттік мекемесі директоры қызметіне Ибраимова Жанар Қолғанатқызы тағайындалды.
Жанар Қолғанатқызы 1977 жылы 14 шілдеде Қызылорда облысы, Арал ауданында дүниеге келген. Білімі – жоғары. Орталық Азия университетінде педагог-психолог мамандығы бойынша білім алған.
Еңбек жолын 1997 жылы мектеп балабақшасында тәрбиешісі ретінде бастаған. 2005-2007 жылдары аралығында ППТК Арал қаласы емдеу сауықтыру ісінің маманы, педагог-психолог, 2009 жылдан бастап осы кезге дейін аталған мекеменің меңгеруші қызметтерін абыроймен атқарып келді.

Облыстық балалар оңалту орталығының директоры тағайындалды

<a href="https://kyzylorda-news.kz/">Kyzylorda-news.kz</a>. Қазақстан Республикасының&nbsp; Президенті Қасым-Жомарт Кемелұлы Тоқаевтың Қазақстан халқына «Халық бірлігі және жүйелі реформалар – ел өркендеуінің берік негізі» атты Жолдауы елдің алдағы әлеуметтік-экономикалық дамуының басым бағыттарына арналды.
Мемлекет Басшысы Жолдауда өткен отыз жыл ішінде «Ең басты жетістігіміз-біртұтас ел болдық. Еліміз тұрақты қоғам құрып, орнықты даму жолына түсті» дей отыра, Елбасы Н.Ә. Назарбаевтың&nbsp; тәуелсіз елімізді құрып, дамытудағы ерен еңбегін атап айтты.
Орталық Азиада көшбасшы болу, әлемдік экономикадағы орнымызды одан әрі нығайту ел дамуының&nbsp; басым бағыттары болып қала береді. Әлемді жайлаған пандемия кезінде қолға алынған байыпты шаралардың арқасында 150 мың жұмыс орны сақталып, бір миллионнан астам адам тұрғын үй жағдайын жақсартты. Іске қосылған қарапайым заттар экономикасы да аз уақытта өз өміршеңдігін көрсетіп отыр.
Жолдауда айтылған экономиканы барынша әртараптандыру, өңдеу өнеркәсібі өнімінің экспортын арттыру,&nbsp; жер асты байлықтарының&nbsp; ресурстық әлеуетін толық ашу, т.б. нақты қадамдар ел дамуына жаңа мүмкіндіктер әкелетіні сөзсіз.
Агроөнеркәсіп кешенінде қордаланған проблемалар өз алдына бір төбе. Бұл орайда, Ел Президенті әкімдердің&nbsp; мал шаруашылығын жайылыммен қамтамасыз ету, ветеринария саласын дамыту, қолайсыз ауа-райының болуы мүмкін&nbsp; зардаптарының алдын алу, ауыл шаруашылығы нарығында баға белгілеу, аграрлық саясаттағы сабақтастықты жолға қою мәселелеріне тоқталып, нақты тапсырмалар берді.
IT саласында 4.0 элементтерін батыл ендіру, заманауи технологиялар трансферті, жас мамандарды көптеп даярлау,&nbsp; Орталық Азиядағы цифрлық хабқа айналу&nbsp; еліміздің цифрлық архитектурасын жедел өзгертетін болады.
Еліміздің басты байлығы-адам. Сондықтан, Жолдауда ауырып ем іздегенше, ауырмайтын жол іздеу қажеттігі баса айтылды. Осы ретте, денсаулық сақтау жүйесінің тиімділігін арттыру, биологиялық қауіпсіздік жүйесін құруға да ерекше көңіл бөлінді.
Білім және ғылым саласының адами капиталды дамытудағы орны қоғамға жақсы белгілі.&nbsp; Соңғы жылдары Мемлекет Басшысының тікелей&nbsp;қолдауымен бұл салаларда өршіл бастамалар қолға алынып, осының арқасында баршамыз бұрын-соңды болмаған&nbsp; сапалық өзгерістерге куә болудамыз. Осынау үрдісті жалғастыру аясында алдағы 3 жылда ұстаздардың еңбек ақысын өсіруге 1,2 трлн теңге бөлінетіні барша зиялы қауымның көңіліне қуаныш ұялатты десек, артық айтпаймыз.&nbsp; Жолдау осындай көптің көңілінен шыққан білім бағдарламаларын тез өзгермелі заман талабымен үндестіру, оқытушы-педагогтердің кәсіби біліктілігін&nbsp; 5 жыл сайын емес, енді 3 жыл сайын көтеру, оқушылар арасындағы ғылыми жобалар конкурстары мен олимпиада жеңімпаздарын тәрбиелеген педагогтерді марапаттау сияқты бастамаларға толы.
Жолдауда айтылған жетекші ғалымдардың жалақысын базалық қаржыландыру арқылы төлеу, ғылыми ұйымдарды тікелей қаржыландыру, гранттық қаржыландыру бойынша ұтып алынған жобаларды орындау мерзімін 5 жылға ұзарту. Ұлттық ғылыми кеңестер шешіміне апелляция институтын енгізу сынды құндылығы теңдессіз бастамалардың отандық ғылымның&nbsp; серпінді дамуын қамтамасыз ететіні күмәнсіз.
Ел&nbsp; Президенті Қасым-Жомарт Кемелұлы Тоқаевтың Қазақстан халқына арнаған бүгінгі Жолдауында еліміздің сындарлы кезеңдегі әлеуметтік-экономикалық дамуының басым бағыттары егжей-тегжейлі сараланып, оларға қол жеткізудің жаңа мазмұнды жолдары көрсетілген. Сын-тегеуріндерден әрдайым бір адым алға жүру қағидатына негізделген Жолдау елімізді өркениет өрісінің&nbsp;жаңа белестеріне бастамақ.

Бейбіткүл Кәрімова: Жолдау елімізді өркениет өрісінің жаңа белестеріне бастамақ

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 10644 адам коронавирус індетінен емделіп шықты.
Аймақтар бойынша:
Нұр-Сұлтан қаласы – 1295,
Алматы қаласы – 3859,
Шымкент қаласы – 720,
Ақмола облысы – 58,
Ақтөбе облысы – 778,
Алматы облысы – 114,
Атырау облысы – 636,
Шығыс Қазақстан облысы – 231,
Жамбыл облысы – 171,
Батыс Қазақстан облысы – 135,
Қарағанды облысы – 1380,
Қостанай облысы – 283,
Қызылорда облысы – 90,
Маңғыстау облысы – 350,
Павлодар облысы – 337,
Солтүстік Қазақстан облысы – 108,
Түркістан облысы – 99.
Қазақстан бойынша жазылғандар саны – 691480.

Қызылордада 90 адам коронавирустан айықты

<a href="https://kyzylorda-news.kz/">Kyzylorda-news.kz</a>. Биыл Қорқыт Ата атындағы Қызылорда университеті өзінің 85 – оқу жылына қадам басып отыр. Сапалы білімнің мемлекет пен қоғам үшін басты құндылық, ең қымбат қазына екендігі сөзсіз. Білікті мамандарды даярлауда ұстаздардың еңбегі зор. Осы орайда, жаңа оқу жылында университеттің бірқатар оқытушы-профессорлары марапат төрінен орын алды.
<blockquote>
 «Бүгін білім беру жүйесін дамытуға қосқан үлесі үшін&nbsp; университеттің&nbsp;&nbsp;&nbsp; 6 оқытушы-профессоры Қазақстан Республикасы Білім және Ғылым министрлігінің Құрмет грамотасы және Алғыс хатымен марапатталды. Соныменмен қатар, 1 қыркүйек – Білім күні аясында университеттің стратегиялық дамуына қосқан үлесі үшін 8 оқытушы-профессордың еңбегі еленді. Осы орайда, марапат иелерін құттықтай отырып, жаңа оқу жылында шығармашылық табыс тілеймін!»,-деді Қорқыт Ата атындағы Қызылорда университетінің басқарма төрағасы – ректор Бейбіткүл Кәрімова.
</blockquote>
Мереке қарсаңында табысталған бұл марапаттар оқытушылардың қажырлы еңбегінің жемісі.
<blockquote>
 «Бүгінгі марапат – білім саласындағы бағындырылған үлкен белестің бірі деп білемін. Ұрпақ тәрбиесі, ұлт сапасы ұстазға байланысты. Сондықтан, әрбір оқытушының қызметі осылай ескеріліп жатса, мерейінің артқаны. Білім жолындағы еңбегімізді елеп, құрмет көрсетіп жатқан ұжымға алғысым шексіз», – дейді Тарих және Қазақстан халқы Ассамблеясы кафедрасының аға оқытушысы Қыдыр Өткелбаев.
</blockquote>

Қорқыт ата атындағы Қызылорда университетінің оқытушылары марапатталды

<a href="https://kyzylorda-news.kz/">Kyzylorda-news.kz</a>. Жаңа оқу жылында Арал ауданының Сексеуіл кентінде 300 орындық мектеп салтанатты түрде ашылды.
Білім ошағы Президент тапсырмасы негізінде салынып, ел игілігіне берілді. Екі қабаттан тұратын мектеп халықаралық стандарт бойынша тұрғызылған. Нысанда 20 сынып кешені, спорт зал, мәжіліс залы, кітапхана, асхана және автотұраққа дейін қамтылған. Оқу жылында 442 оқушы білім алады. Оның 40-ы мектеп табалдырығын алғаш аттады. Білім ордасындағы ұстаздардың 100 пайызы коронавирустық инфекцияға қарсы екпенің толық салған. Сонымен қатар, білім ошағында санитарлық-дезинфекциялық шаралар қатаң сақталған.
Айта кетейік, Сексеуіл кентінде 15 мыңға жуық тұрғын бар. Кент орталығы үстінен темір жол торабы өтеді. Мұндағы 3 мектептің барлығы темір жолдың бір жақ бетінде орналасқандықтан арғы бетте тұратын оқушылар шойын жолды кесіп өтуге мәжбүр болды. Енді жаңа мектеп бұл қиындықтарды артта қалдырды. Осылайша, Сексеуіл кентіндегі 4 білім ошағы орын тапшылығын толық жойды. Бүгіннен бастап өңірдегі оқушылар оқуды дәстүрлі форматта бастады.
Ұстаздар мен ата-аналар мектепке “Ашық” қосымшасы арқылы кіреді. Ал, оқушылар 5 сатылы дезинфекциялық тексерістен өтіп барып, мектепке кіре алады. Қарым-қатынасты шектеу үшін “1 сынып-1 кабинет” қағидасы енгізілген. Яғни оқушылардың қоңырауда топтасып қалуына жол берілмейді. Еске салайық, биыл Сыр елінде 6 жаңа мектеп пайдалануға беріледі. Оның 3-уі 1-қыркүйекте берілсе, қалған 3-уі жыл аяғында табысталады.
<img src="https://kyzylorda-news.kz/wp-content/uploads/2021/09/241110125_3667790706657305_5002506559211015599_n.jpg" alt="" />

Арал: Сексеуіл кентінде 300 орындық мектеп ашылды

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысының әкімі Гүлшара Әбдіқалықова қызылордалықтарды 1 қыркүйек – Білім күнімен құттықтады
Қымбатты жерлестер!
Баршаңызды Білім күнімен шын жүректен құттықтаймын! Бүгін республикамыздың барлық білім беру мекемелерінде алғашқы қоңырау соғылуда.
Биыл – ел Тәуелсіздігінің30 жылдық мерейлі мерекесі.Жаңа оқу жылының бірінші күні мерекелік іс-шаралар тәуелсіздігіміздің 30 жылдығына арналады. Бұл жас өркеннің егемен елінің, туған жерінің ұлттық, рухани құндылықтарын бойына сіңіріп, отаншыл, патриот ұрпақ тәрбиеленуіне үлкен үлес қосары сөзсіз.
Сонымен бірге, осы жылы алғаш рет мектеп партасына отыратын бүлдіршіндерімізге «Әліппе» оқулығы салтанатты түрде табысталады.
Бір жарым жылдай уақыт пандемия індеті салдарынан ұстазы мен шәкірті бір-бірімен қашықта байланысып, мектеп парталары бос қалып, өмірімізге біраз өзгеріс енгені белгілі. Бұл жағдай білім саласының жаңа бағытқа қарай қалыптасуына әсер етті. Соған қарамастан оқушыларымыз халықаралық, республикалық білім жарыстарында жүлделі орындарды иеленді. Дегенмен, мұғалім мен оқушының жүзбе-жүз қарым-қатынасына, сыныптас достардың бір-бірімен байланыста болуына ештеңе жетпейді.
Енді, міне 2021-2022 жаңа оқу жылында оқушылардың бірі мектеп табалдырығын алғаш аттап жатса, бірі өз партасымен, сыныптастарымен, ұстаздарымен сағына қауышуда.
Өңірде бірінші сыныпқа 18 мыңдай бала барып, барлығы 177 196 бала білім алады. Бәріміз бірігіп, балаларымыздың үздіксіз білім алуын қамтамасыз етуіміз қажет.
Білім мекемелерінде сабақ санитарлық қауіпсіздік шараларын қатаң сақтай отырып өткізілуі тиіс. Педагогтардың және техникалық қызметкерлердің 100 пайыз вакциналануы (медициналық қарсы көтерсетілімдері бар адамдардан басқасы), «ASHYQ» қосымшасын қолдану да маңызды. Балаларымыздың денсаулығы үшін осы айтылғандарға мән беріп қарайық!
Барша ұстаздар мен оқушыларды, ата-аналар қауымын дәстүрлі оқу жылымен құттықтай отырып, жаңа табыстарға жете беріңіздер деп тілеймін!
Дана халқымыз «Оқу – білім азығы, білім – ырыс қазығы» демей ме. Білім – баға жетпес рухани байлық, ғылым-ілімнің іргетасы, мемлекет дамуының алтын арқауы. Әлемді байлықпен, басқамен таң қалдыра алмайсың. Бәрінен оздыратын алғыр зейін мен байыпты білім ғана. Сондықтан, білім мен ғылым заманында алар асуларыңыз бен бағындырар биіктеріңіз көп болсын!
Алғаш мектеп табалдырығын аттаған бүлдіршіндеріміздің қадамы құтты болғай!
Тәуелсіз еліміздің тұғыры нық, еліміз аман болсын!

Гүлшара Әбдіқалықова: Бірінші сыныпқа 18 мыңдай бала барды

<a href="https://kyzylorda-news.kz/">Kyzylorda-news.kz</a>.&nbsp;Бүгін – білім күні. Қазақстандық оқушылар 1 жарым жылдан соң мектепке қайта оралып, оқу ордалары бүгіннен бастап дәстүрлі білім беру форматына көшеді.
10 шілдеде өткен Үкіметтің кеңейтілген отырысында Президент Қасым-Жомарт Тоқаев жаңа оқу жылында оқушылар мен студенттердің дәстүрлі оқу жүйесіне оралуын қамтамасыз етуді тапсырған болатын.
Мемлекет басшысының тапсырмасына сәйкес, бүгін жаңа оқу жылы қатаң санитарлық-эпидемиологиялық талаптарды сақтай отырып штаттық форматта басталды. Мектепке дейінгі ұйымдар да түгелдей штаттық жұмыс режиміне оралды. Осы оқу жылында 7 мыңнан астам мектеп шамамен 3,6 млн оқушыны, оның ішінде 380 мыңға жуық оқушыны бірінші сыныпқа қабылдайды.

Елімізде жаңа оқу жылы басталды

<a href="https://kyzylorda-news.kz/">Kyzylorda-news.kz</a>.&nbsp;Қазақстанда жоғары оқу орындарының білім беру қызметіне қойылатын талаптар өзгерді, деп хабарлайды&nbsp;<a href="https://stan.kz/">Stan.kz</a>.
Мәселен, егер бұрын-соңды “Педагогикалық ғылымдар” бағыты бойынша оқытушылардың 45%-ында ғылыми дәреженің болуы міндетті болса, ал қазір бұл көрсеткіш кемінде 50%-ды құрайды. Бұдан басқа, жоғары оқу орындары дуалдық оқыту жүйесін енгізіп, іске асыруы қажет. Яғни, студенттер білім беру ұйымдарында тәжірибеден өтіп, ЖОО-да оқу кезінде практикалық дағдыларды алуы тиіс. Ол үшін университеттер білім беру ұйымдарымен және салалық мекемелермен тығыз байланыста болуы қажет.
Өткен жылы педагогтерді даярлау бойынша талаптар енгізілген. Атап айтсақ, білім беру бағдарламаларының педагогтің кәсіби стандартына сәйкестігі және бейінді бағыт бойынша кемінде 7 лицензияның болуы қажеттігі туралы. Бұл педагогикалық бағыттар бойынша білім беретін жоғары оқу орындарының санын 86-дан 55-ке дейін қысқартуға мүмкіндік берді. Осы талаптарға сәйкес келетін жоғары оқу орындарының саны одан да аз болғандықтан, лицензияларды қайтару бойынша жұмыс жалғасатын болады.
Мұндай жаңашылдықтардың нәтижесінде педагогтерді сапалы білім беру бағдарламалары мен білікті оқытушылар құрамы бар, сондай-ақ тиісті материалдық-техникалық базамен жабдықталған университеттер ғана дайындайтын болады.
“Денсаулық сақтау” бағытына келетін болсақ, оқытушылардың құрамы мен дәрежесі бойынша талаптар өзгеріссіз қалды. Бірақ енді бейінді пәндерді жүргізетін оқытушылардың 50%-ында Денсаулық сақтау ұйымдарында кемінде 5 жыл практикалық және клиникалық жұмыс тәжірибесі болуы тиіс. Бұған дейін денсаулық сақтау саласындағы оқытушыларға мұндай талаптар қойылмаған. Бакалавриат түлектерінің жұмысқа орналасу көрсеткіші олардың жалпы санының кемінде 80%-ын құрауы тиіс, ал бұрын 50% жеткілікті болатын.
“Сәулет және құрылыс” бағыты бойынша оқытушыларға кемінде 5 жыл практикалық жұмыс тәжірибесінің болуы туралы талап алғаш рет енгізіліп отыр. Мұндай оқытушылардың саны педагогтердің жалпы санынан 50%-дан кем болмауы тиіс. Сондай-ақ оқытушылар кемінде 5 жылда бір рет ғылыми-зерттеу, іздестіру, жобалау және өндірістік ұйымдарда біліктілігін арттыруы қажет. Бұдан басқа, жоғары оқу орындарында енді мамандандырылған аудиториялар (құрылыс материалдары мен құрылыс физикасы бойынша, студиялық сабақтар үшін, гипс фигуралар қоры бар макеттік шеберхана, сәулет бөлшектері, мольберттер және т.б.) және арнайы материалдары бар 3D-принтерлермен жабдықталған зертханалардың болуы талап етіледі.
“Құқық” бағыты бойынша студенттерге жыл басынан 72 жоо білім берді, бүгінде олардың саны 67-ге дейін қысқарды. Дегенмен, олардың көпшілігінде білім сапасы көңіл көншітпейді. Сондықтан олардың білім беру бағдарламаларына қойылатын талаптар күшейтілді. Алғаш рет оқытушылардың кем дегенде 60%-ы кемінде 5 жыл тәжірибесі бар заңгерлер болуы керек деген талап енгізілді. Ғылыми дәрежеден өткен оқытушылар саны 50%-ға дейін өсуі тиіс. Бұрын-соңды бұл көрсеткіш 40%-ды құрайтын. &nbsp;
Студенттердің практикалық дағдыларды алу мүмкіндігі болуы үшін жоғары оқу орындарында әділет және/немесе ішкі істер органдарымен (полициямен) және/немесе прокуратурамен және/немесе сыбайлас жемқорлыққа қарсы қызметпен және/немесе экономикалық тергеу қызметімен және/немесе адвокаттар алқасымен және/немесе нотариаттық палаталармен және/немесе заң консультанттары палаталарымен келісімшарт болуы қажет. Студенттер тек университеттердегі кітапханаларға ғана емес, сонымен бірге лицензияланған халықаралық және ұлттық құқықтық ақпарат қорына да қол жеткізе алуы тиіс.
<blockquote>
 “Біз барлық жаңашылдықты&nbsp;жоғары оқу орындары білім алушыларға&nbsp;теориялық қана емес, практикалық білім беруі&nbsp;үшін және студенттер таңдаған мамандығын&nbsp;туралы теория&nbsp;бойынша&nbsp;емес,&nbsp;тәжірибе жүзінде&nbsp;игеруі&nbsp;үшін енгіземіз. Өзгерістерді&nbsp;енгізбес бұрын, біз&nbsp;бұл тетіктерді&nbsp;болашақта&nbsp;жоо&nbsp;түлектерін жұмысқа қабылдайтын жұмыс берушілермен талқыладық. Яғни, қазір&nbsp;оқытушылардың&nbsp;ғылыми дәрежесінің болуы&nbsp;және олардың&nbsp;дәріс оқуы жеткіліксіз. Оқытушылардың бір бөлігі студенттерді қазіргі еңбек нарығының сұраныстарына&nbsp;сай&nbsp;оқыта алатын тәжірибелі мамандар болуы маңызды. Оқытушы жұмыс істейтін саласына сәйкес&nbsp;сабақ беруі тиіс. Сонда студенттеріміз өздерінің әрі қарайғы жұмысында қолданылатын білім мен дағдыларға ие болады. Жаңашылдықтар оқытушылар құрамына да, білім беру бағдарламалары, практика базалары және материалдық-техникалық жарақтандыруға да қатысты. Осы кешенді өзгерістердің барлығы оқыту сапасы мен кадрларды даярлау процесін жақсартуға бағытталған. Бірінші кезекте, бұған жоғары оқу орындарының өздері мүдделі болуы тиіс”,&nbsp;– деп атап өтті ҚР БҒМ білім және ғылым саласында сапаны қамтамасыз ету комитетінің төрайымы Гүлзат Көбенова.
</blockquote>
Сонымен қатар ҚР БҒМ “Журналистика”, “Қоғаммен байланыс”, “Мейрамхана ісі”, “Бухгалтерия”, “Туризм”, “Қызмет көрсету”, “Қаржы”, “Ақпараттық-коммуникациялық технологиялар”, “Стандарттау және сертификаттау”, “Көлік қызметтері” сияқты білім беру бағдарламалары бойынша талаптарды өзгертті. Мысалы, егер бұрын журналистика немесе IT саласындағы оқытушылардың кемінде 40%-ында ғылыми дәреженің бар болуы талап етілсе, ендігі кезекте білім беру процесіне тәжірибесі бар мамандарды тарту үшін дәрежелілік пайызы айтарлықтай төмендеді. Штаттағы оқытушылардың болуына қойылатын талаптар бойынша да өзгерістер енгізілді. Енді осы бағыттар бойынша дайындықты жүзеге асыратын жоғары оқу орындары практиктер мен жұмыс пен оқыту процесін қатар алып жүретін мамандарды тарту мүмкіндігіне ие болды.
<blockquote>
 “Журналистика”, “Қоғаммен байланыс”, “Мейрамхана ісі”, “Туризм” және т.б. бағыттар бойынша кадрлар даярлаудың ерекшеліктеріне сәйкес, біз бұл салаларда оқытушылардың ғылыми дәрежелерінің болуы жөніндегі талапқа басымдық берілмейтінін түсінеміз. Мамандардың практикалық білімі әлдеқайда маңызды. Мәселен, өз тәжірибесімен бөлісіп, қазіргі журналистика саласында мамандарға қойылатын талаптар туралы айта алатын тәжірибелі журналист сабақ берсе, журналистика факультетінің студенттері оқуға көбірек қызығушылық танытады. Бұл бағдарламашылар, бухгалтерлер немесе аудиторларды даярлауға да қатысты. Жұмыс берушілер арасында жоғары оқу орнын бітіргеннен кейін қазіргі заманғы еңбек нарығының талаптарына сай мамандар сұранысқа ие екенін білеміз”,&nbsp;– деді ҚР БҒМ білім және ғылым саласында сапаны қамтамасыз ету комитетінің төрайымы Гүлзат Көбенова.
</blockquote>

Қазақстанда ЖОО-лардың білім беру қызметіне қойылатын талаптар өзгерді

<a href="https://kyzylorda-news.kz/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықованың қатысуымен Қызылорда қаласында «Ұлағат білім ордасы» жеке мектебінің салтанатты ашылу рәсімі өтті. Аймақ басшысы ұстаздар мен оқушыларды құттықтап, жаңа оқу жылына сәттілік тіледі.
<blockquote>
 «Ең алдымен баршаңызды келе жатқан 1 қыркүйек – Білім күнімен шын жүректен құттықтаймын! Пандемия салдарынан мектеп оқушылары өткен жылы қашықтан білім алуға мәжбүр болды. Мемлекет басшысы Қасым-Жомарт Кемелұлы Тоқаевтың тапсырмасына сәйкес жаңа оқу жылында оқушылар дәстүрлі форматта білім алатын болады. Балаларымыздың оқу үлгерімі мен білім сапасы үшін бұл оңтайлы шешім болды деп санаймыз. Аймақтағы эпидемиологиялық ахуалды ескере отырып, оқушылар мен мұғалімдерді қорғаудың барлық кешенді шараларын қабылдадық. Өйткені, біз үшін әрбір баланың денсаулығы қашанда маңызды», – деді Гүлшара Әбдіқалықова.
</blockquote>
450 орындық білім ұясында 21 оқу кабинеті, денешынықтыру, акт залдары кітапхана бар. Оқушыларға 33 педагог сабақ береді.
Салтанатты шарада мемлекеттік-жекешелік әріптестік негізінде жүзеге асқан «Ұлағат білім ордасының» құрылтайшысы Қалқазбек Әжібеков пен мектеп директоры Досбол Аймухамбетов құттықтау лебіздерін жеткізді. Бүгінгі күні аймақта 3 пен 6 жас аралығындағы бүлдіршіндерді мектепке дейінгі тәрбиемен қамтамасыз етуді 100 пайыз орындалған. Өңірде мемлекеттік-жеке әріптестікті дамытудың үлесі басым. Облыста балабақшалардың 70 пайыздан астамы мемлекеттік-жекешелік әріптестік негізінде жұмыс жасайды. Аймақтағы демографиялық өсім мен халықтың көшіп-қону белсенділігінің жоғары болуына байланысты, 1-сыныпқа қабылданатын оқушылардың өсімі байқалады. Биыл 18 мың бала мектеп табалдырығын аттайды.
Еске сала кетейік, биыл 6 жаңа мектеп пайдалануға беріледі деп жоспарлануда. Жаңа оқу жылында Президент тапсырмасымен іске асқан 300 орындық Арал ауданы, Сексеуіл кентіндегі мектеп пен инвесторлар есебінен жүргізілген 2 жеке мектеп құрылысы пайдалануға берілсе, қалған 3 мектеп жыл соңына дейін табысталатын болады. Мұнан бөлек, бірнеше жылдан бері жөндеуді қажет еткен Жалағаш ауданындағы 2 білім беру нысаны жаңарып, жөндеу жұмыстары жүргізілуде.
<img src="https://kyzylorda-news.kz/wp-content/uploads/2021/08/240831476_3664876910282018_4053721737188554526_n.jpg" alt="" />
<img src="https://kyzylorda-news.kz/wp-content/uploads/2021/08/240783846_3664877886948587_7937761029210649370_n.jpg" alt="" />

Қызылордада жаңа жеке мектеп ашылды

<a href="https://kyzylorda-news.kz/">Kyzylorda-news.kz</a>.&nbsp;Биыл Қызылорда облысының әкімі мектеп бітіруші түлектердің жоғары оқу орнынан білім алуы үшін 100 грант тағайындады. Қызылорда қаласы мен аудандарда құрылған арнайы комиссия өтініш берген 138 үміткердің құжаттарын қарап, нәтижесінде барлығы 98 грант иегері анықталды. Бұл туралы бүгін Өңірлік коммуникациялар қызметінде өткен баспасөз конференциясында облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Мейрамбек Әбдукаримов мәлімдеді.
Әкімдік жанынан құрылған арнайы комиссияның шешімімен облыс әкімінің гранты еліміздегі үздік 4 жоғарғы оқу орнына бөлінді. Қорқыт ата атындағы Қызылорда университетіне – 67, «Нұр-Мүбарак» университетіне – 6, М.Оспанов атындағы Батыс Қазақстан мемлекеттік медицина университетіне – 11, С.Ж. Асфендияров атындағы Қазақ Ұлттық медицина университетіне – 16 түлек тегін білім алуына мүмкіндік алды. Әкім грантын иеленгендердің 57-і көп балалы отбасынан, 18-і тұрмысы төмен отбасынан, 11-і асыраушысынан айырылған отбасынан, 9-ы ата-анасының біреуі мүгедек, 1-і «Атамекен» балалар үйінің тәрбиеленушісі, 2-і мүгедек бала.
Сонымен қатар, тағайындалған гранттар бойынша білім беру саласының математика, орыс тілі мен әдебиеті, қазақ тілі мен әдебиеті, шет тілі, биология, денешынықтыру және спорт, бастауышта оқыту педагогикасы мен әдістемесі мамандықтарына – 38 грант, өнер саласы бойынша дәстүрлі музыка өнері, хореография мамандығына – 7 грант, ақпараттық қауіпсіздік жүйесіне – 2 грант, азық түлік өнімдерін өндіру технологиясына – 1 грант, инженерлік желілер мен жүйелерге – 5 грант, су ресурстары және суды пайдалануға – 1 грант, кадастр және жерге орналастыруға – 1 грант; журналистика және репортер ісіне – 10 грант, дінтанушы мамандығына – 6 грант, медицина саласы бойынша жалпы медицинаға – 27 грант тағайындалды.

Қызылорда облысы әкімінің 98 грант иегері анықталды

<a href="https://kyzylorda-news.kz/">Kyzylorda-news.kz</a>. Биыл Қорқыт ата атындағы Қызылорда университетінде жаңа оқу жылы дәстүрлі форматта басталады. Оқу жылы 2-3-4 курс студенттері үшін 1 қыркүйектен, 1 курс және магистранттар үшін 6 қыркүйекте басталады. Бұл туралы Өңірлік коммуникациялар қызметінің ақпарат алаңында Қорқыт ата атындағы Қызылорда университетінің Басқарма Төрағасы – Ректоры Бейбіткүл Кәрімова баяндады.
Университетте аралас оқыту нысаны жоспарланған, дәрістер – онлайн түрде өтсе, семинар, зертханалық және қолданбалы сипаттағы практикалық сабақтар санитарлық режим мен әлеуметтік қашықтықты сақтай отырып күндізгі формата жүргізіледі.
<blockquote>
 «Қазіргі таңда университетте жалпы қызметкер саны – 838 болса, оның 497 профессор-оқытушылар құрайды. Жалпы білім алушылар контингенті 2019-2020 оқу жылында 5300 құраса, 2020-2021 оқу жылында 6242 өсіп, басталайын деп отырған жаңа оқу жылында 7000-нан асады деп күтілуде. Бұл дегеніміз университетіміздің имиджі арта түскендігінің белгісі», -Бейбіткүл Кәрімова.
</blockquote>
Бүгінде Қорқыт Ата атындағы Қызылорда университетінде білім беру бағдарламаларының саны – 126. Оның ішінде, бакалавриат бағдарламасы бойынша – 78, магистратура – 35 және докторантура – 13. Сонымен бірге, 95 білім бағдарламасы жаңартылып, ҚР БББ реестіріне енгізілді. Оған қоса, 7 инновациялық білім беру және 2 бірлескен білім беру бағдарламасы әзірленді. Бұнымен қатар, өткен оқу жылында университетте бірқатар жаңа бастамалар көтеріліп, көптеген жұмыстар атқарылды. Соның ең маңызды жаңалығының бірі – түлектерге өзіндік үлгідегі диплом беру. Биыл алғаш рет университет дипломдары 1500-нан астам түлекке табысталды.
<blockquote>
 «Биылғы оқу жылы да бірқатар өзгерістермен басталғалы отыр. Қазіргі уақытта оқу процесін дайындау жұмыстары аяқталды. Оқу форматын ескере отырып, сабақ кестесі жасалды. Дене шынықтыру сабақтарын қоспағанда, білім алушылар аудиторияда болған уақытта бетперде режимі сақталады. Оқу ғимараттары санитарлық талаптарды сақтауға қажетті дезинфекциялық тунельдер, қол термометрі, санитайзерлермен қамтамасыз етілген. Өңіріміздегі эпидемиологиялық жағдайды ескере отырып, оқытушылар мен студенттерге барлық сақтық шаралары туралы түсіндірме жұмыстары жүргізілуде. Нәтижесінде университет қызметкерлерінің 97 пайызы, білім алушылардың 79 пайызы екпе алды. Оқу ғимараттары мен жатақханаларға «Ашық» бағдарламасы арқылы ғана кіруге рұқсат етілген. Ғимараттарға «жасыл» немесе «көк» мәртебесі бар білім алушылар, «жасыл» мәртебесі бар педагогтер мен қызметкерлер кіре алады»,- деді Б.Кәрімова.
</blockquote>

Қорқыт ата атындағы Қызылорда университеті қызметкерлерінің 97 пайызы екпе алды

<a href="https://kyzylorda-news.kz/">Kyzylorda-news.kz</a>. Қызылорда облысында өткен Тамыз кеңесі аясында облыстық білім басқармасы басшысы Ақзира Бақтыбайқызы мен «Talap» КЕ АҚ вице-президенті Санжар Мейірханұлы ынтымақтастық туралы ортақ меморандумға қол қойды.
Меморандумның мақсаты – аймақтың техникалық және кәсіптік білім беру жүйесін жетілдіру.
Бүгінде адамның білімі мен кәсіби біліктілігі экономика дамуының басты тетігіне айналып, заман талабына сай техниканы жан-жақты меңгерген кәсіби білікті мамандардың қажеттілігін туғызуда.
Осы орайда, техникалық және кәсіптік білім беру жүйесінде қазіргі таңда түбегейлі реформалар енгізілуде. Сондай-ақ, Елбасының тапсырмасына сәйкес «Жас маман» жобасы тиімді жүзеге асуда. Қазіргі таңда облыстағы кәсіптік-техникалық оқу орындары индустриалдық-инновациялық сала үшін кадрлар даярлауды қолға алды.
Аталған жұмыстарды тиімді ұйымдастыру үшін қол қойылған екіжақты меморандум аясында алдағы уақытта бірлескен жұмыстар бастау алады.
<img src="https://kyzylorda-news.kz/wp-content/uploads/2021/08/240712647_1185204001982803_3222061989410376961_n-1.jpg" alt="" />

Қазақстан және Қызылорда облысының жаңалықтары: Білім