<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығы мерекесіне орай Атырау облысында жалпы білім беру ұйымдарының басшылары арасында алғашқы рет І республикалық дебат турнирі өтті.
Мектеп директорларының басын қосқан турнир дебаттың Американдық парламенттік форматына сәйкес офлайн форматында өткізілді.
Республикалық турнирге аймақ атынан облыстық кезеңінен жеңімпаз атанған Қызылорда қаласы №101 мектеп-лицей директоры Айгүл Өткелбаева және №4 ІТ мектеп-лицей директоры Алмат Рахметов қатысып, бақ сынасты.
Сайыстың қорытындысы бойынша Қызылорда облысының намысын қорғаған «Ұшқыр жебе» фракциясы жүлделі 3 орынды иеленіп, Сыр ұстаздарының мерейін үстем етті.

Қызылордалық мектеп директорлары республикалық дебат сайысында топ жарды

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы Мырзабек Дүйсенов атындағы №15 мектеп-лицейінде Тәуелсіздігіміздің 30 жылдығына орай «Рухани құндылық» шығармашылық орталығы ашылды. Орталықтың ашылу салтанатына облыстық білім басқармасының басшысы Ақзира Қасымова, қалалық білім бөлімінің басшысы Динара Баймурзаева қатысып, лентасын қиды.
Ұлттық тұрғыда халқымыздың әдет – ғұрпын сақтайтын, салт – дәстүрін қадірлейтін, ұлтжанды, отансүйгіштік білім алушыларды шығармашылықа баулитын орталықта «Оқуға құштар мектеп» жобасы, «Балалар және театр» жобасы, «Ұшқыр ой алаңы» дебат қозғалысы, «Қош келдіңіздер» кіші медиа студиясы жұмыс жасайтын болады.
Шара барысында «Құндылық. Инновация. Білім» тақырыбында облыстық іс-тәжірибе алаңы өткізілді. Іс-тәжірибе алаңында мектеп жылыжайындағы «Green land» ғылыми-эксперименттік алаңының ашылуы өткізіліп, «Gmart garden» жылыжайды автоматтандыру тәжірибелік-эксперимент жобасы көрсетілді. Сонымен қатар, ізденіс және зерттеу ғылыми шығармашылық жобалар көрмесі ұйымдастырылып, информатика пәнінен олимпиадалық есептерді С/С++ бағдарламалау тілінде шешу тақырыбында жұмыстар көрсетілді.
Жиында Ақзира Бақтыбайқызы іс-тәжірибе алаңында көрсеткен олимпиадалық есептерді бағдарламалауды барлық білім беру ұйымдарына магнитті түрде тарату қажеттігін атап өтті.
Іс-тәжірибе алаңының соңында оқушы үні жобасы аясында оқушылар «Армандар орындалады» тақырыбымен тілек-армандарымен бөлісті. Сонымен қоса, балалар және театр мектебі аясында сахналық қойылым көрсетіліп, «Қош келдің!» медиа жобасы негізінде кері байланыс жүргізілді.
<img src="https://kyzylorda-news.kz/wp-content/uploads/2021/12/264801499_1254053835097819_4795894034502686615_n.jpg" alt="" />
<img src="https://kyzylorda-news.kz/wp-content/uploads/2021/12/265874020_1254053488431187_4957594999079092407_n.jpg" alt="" />

«Рухани құндылық» шығармашылық орталығы ашылды

<a href="https://kyzylorda-news.kz/">Kyzylorda-news.kz.</a> Қазақстан Республикасы Тәуелсіздігінің 30 жылдығына орай 5-6 желтоқсан күндері «QORQYT АTA CUP» студенттер арасында республикалық пікірсайыс турнирі өтті. Шешендік пен ұтқыр ой сыналатын сайысқа еліміздің барлық аймағынан 18 команда қатысты.
Дебат – жастардың логикалық және сыни ойлау қабілетін ұштайтын интеллектуалды ойын. Қоғамның өзекті мәселелерін көтеріп, тәуелсіз шешім қабылдауға бейімдейді.
<blockquote>
 «Бүгінгідей ақпараттар алмасқан заманда жастардың жаңалықты саралап, өз ұстанымын дәлелді түрде қорғай алуы маңызды. Бүгінгі республикалық ауқымды пікірсайыс турнирі Қазақстан Республикасы Білім және ғылым министрлігі Жоғары және жоғары оқу орнынан кейінгі білім департаментінің қолдауымен Республикалық қосымша білім беру оқу-әдістемелік орталығы және Қорқыт ата атындағы Қызылорда университетінің ұйымдастыруымен өткізілуде», – деді ректордың міндетін атқарушы Абайбек Жүнісов.
</blockquote>
Пікірсайыс турнирі американдық парламенттік және Линкольн-Дуглас форматында өтті. Турнирге еліміздің іргелі жоғары оқу орнының білім алушылары қатысты. Атап айтсақ, Абай атындағы қазақ ұлттық педагогикалық университеті, Қазақ Ұлттық Қыздар Педагогикалық университеті, Қожа Ахмет Ясауи атындағы Халықаралық қазақ-түрік университеті, Мұхтар Әуезов атындағы Оңтүстік Қазақстан университеті, М.Х.Дулати атындағы Тараз өңірлік университеті, М.Өтемісов атындағы Батыс Қазақстан университеті, Ш.Уәлиханов атындағы Көкшетау университеті, Халықаралық туризм және мейман достық университеті, Оңтүстік Қазақстан медицина академиясы, «Болашақ» университеті, Қорқыт Ата атындағы Қызылорда университеті.
Екі күндік сайыстың қорытындысы бойынша I орын (300 мың теңге) Қожа Ахмет Ясауи атындағы Халықаралық қазақ-түрік университетінің «Бекзат Саттарханов» фракциясына, II орын (150 мың теңге) Қазақ Ұлттық Қыздар Педагогикалық университетінің «Терең дем ал» фракциясына және жүлделі III орын (100 мың теңге) Абай атындағы қазақ ұлттық педагогикалық университетінің «Цицерон» фракциясына табысталды. Республикалық пікірсайыс турнирінің «Үздік спикер» (30 мың теңге) номинациясын М.Х.Дулати атындағы Тараз өңірлік университетінің студенті Алима Калисаева иеленді. Ал «Үздік төреші» (30 мың теңге) номинациясымен аймағымыздың тәжірибелі пікірсайысшысы Маржан Ердібек марапатталды.
<blockquote>
 «Пікірсайыс арқылы жастар логикалық ойлауға, өз ұстанымын білдіруге тәрбиеленеді. Сондай-ақ, әртүрлі жағдайда оны талдап, өзіндік көзқарасын қалыптастыруға бейімделеді. Бүгінгі турнирде қатысушылар тәуелсіздік жылдарында еліміздің жеткен жетістіктерін насихаттап, қоғамдағы өзекті мәселелерді өз деңгейінде көтере білді. Бұл жастардың сыни ойлау қабілетін дамытып, демократиялық қоғам өміріне жас ұрпақтың араласуына жол ашады. Осындай шаралар арқылы жастар бір-бірімен тәжірибе алмасып, өзара достық қарым-қатынастары нығая түседі деп санаймын»,- деді турнирдің бас төрешісі Айжан Орынбасар.
</blockquote>
Турнирдің бас демеушісі ретінде қолдау көрсеткен Жаңақорған ауданының Құрметті азаматы, медицина саласының Құрметті қызметкері Нурылда Талипов болса, шараның өтуіне «Қазақстан Астық компаниясы» ЖШС атқарушы директоры, «Қазақстан астық одағы» ЗТБ ресми өкілі Қазбек Омаров атсалысты.
Айта кетейік, университетте 2004 жылдан бастап «АҚИҚАТ» саяси пікірсайыс клубы жұмыс істейді. Университеттің барлық институттарында бөлімшелер ашылған. Сондай-ақ, қаладағы 27 мектепте клубтың филиалы бар.
<img src="https://kyzylorda-news.kz/wp-content/uploads/2021/12/02.jpg" alt="" />
<img src="https://kyzylorda-news.kz/wp-content/uploads/2021/12/06.jpg" alt="" />
<img src="https://kyzylorda-news.kz/wp-content/uploads/2021/12/08.jpg" alt="" />

Қызылордада өткен республикалық пікірсайыс турнирі қорытындыланды

<a href="https://kyzylorda-news.kz/">Kyzylorda-news.kz.</a> Ақпарат және қоғамдық даму министрлігінің қолдауымен «Қазақстан» телерадиокорпорациясы ұйымдастырған «30 жыл 30 есім» ұлттық байқауының жеңімпаздары анықталды.
**Жеңімпаздар: 
**– «Медицина және денсаулық сақтау саласына қосқан үлесі үшін» – Серік Ақшолақов, Юрий Пя, Надежда Петухова 
– «Қоғамдық белсенділігі үшін» Асылы Осман, Олеся Баимова, Айман Омарова 
– «Мәдениет саласына сіңірген еңбегі үшін» Димаш Құдайберген, Секен Тұрысбеков, Ерболат Төлепбай 
– «Кино саласына сіңірген еңбегі үшін» Болат Әбділманов, Асанәлі Әшімов, Досхан Жолжақсынов 
– «Спорт саласындағы жетістіктері үшін» Дәулет Тұрлыханов, Қанат Ислам, Илья Ильин 
– «Ғылымның дамуына қосқан үлесі үшін» Асқар Жұмаділдаев, Күнсұлу Закарья, Зейнолла Самашев 
– «Білім саласының дамуына қосқан үлесі үшін» Муаммер Гүль, Аятжан Ахметжанұлы, Аягүл Миразова 
– «Ауыл шаруашылығы және агроөндіріс саласына қосқан үлесі үшін» Нұрислам Ыбраев, Иван Сауэр, Сыдық Дәулетов 
– «Дәстүрлі өнердің дамуына қосқан үлесі үшін» Айгүл Үлкенбаева, Рамазан Стамғазиев, Елмұра Жаңабергенова 
– «Әдебиет» аталымы бойынша Дулат Исабеков, Светқали Нұржан, Ұлықбек Есдәулет марапатталды.

«30 ЖЫЛ 30 ЕСІМ» ұлттық жүлдесінің иегерлері анықталды

<a href="https://kyzylorda-news.kz/">Kyzylorda-news.kz.</a> ҚР білім және ғылым министрі Асхат Аймағамбетов мұғалімдердің орташа жалақысын атады.
<blockquote>
 “Ұлттық білім беруді дамытудағы маңызды кезеңдердің бірі – “Педагог мәртебесі туралы” заңның қабылдануы болды. Білесіз бе, мемлекет басшысы заң қабылдап, мұғалімдердің жалақысын екі еседен кем емес өсіру міндетін қойды. Бұл жұмыс жүргізілуде, міндет өзекті”, – деді Асхат Аймағамбетов Қазақстан Республикасы президенті жанындағы Адам құқықтары жөніндегі комиссияның отырысында.
</blockquote>
Министр мұғалімдердің орташа жалақысын атап өтті.
<blockquote>
 “Мұғалімдердің еңбек жағдайлары жақсартылды. Жалақы өсті. Осы заң жобасы қабылданғанға дейін орташа жалақы шамамен 109 мың теңгені құраған десек, бүгінде ол 200 мыңнан астам теңгені құрап отыр, бұл еліміздегі мұғалімдердің орташа жалақысы”, – деді министр.
</blockquote>

Асхат Аймағамбетов мұғалімдердің орташа жалақысын атады

<a href="https://kyzylorda-news.kz/">Kyzylorda-news.kz.</a>&nbsp;ҚР Ғылым және білім министрі Асхат Аймағамбетов мектептерде бұқаралық іс-шараларды өткізуге қатысты сұраққа жауап берді, деп хабарлайды <a href="https://www.inform.kz/kz">ҚазАқпарат.</a>
Айта кетейік, жақында ҚР Бас санитар дәрігері Ерлан Қиясов коронавирус инфекциясының «Омикрон» штамы Қазақстан аумағында таралмауына арналған жаңа қаулы жариялады.
<blockquote>
 «Ертеңгіліктер мен өзге де бұқаралық іс-шаралар мектептерде өткізілмейді. Осы орайда Бас санитар дәрігерінің шешімі болғандықтан, біз оны орындауға міндеттіміз. Сондықтан ертеңгіліктер мен басқа да мерекелік жиындар мектепте ұйымдастырылмайды», – деді А. Аймағамбетов Сенаттың жалпы отырысынан кейін тілшілер сауалына жауап бере отырып.
</blockquote>
Оның айтуынша, бір сыныптың ішінде мерекені өткізу туралы шешім мектеп әкімшілігі деңгейінде қабылданады. Сонымен қатар тілшілер «омикрон» штамының таралуына байланысты оқушыларды қашықтан оқытуға ауыстыру мүмкіндігі туралы сұрады.
<blockquote>
 «Қазіргі кезде бұл жайында айту ертерек. Біз Ведомствоаралық комиссияның шешімі аясында жұмыс істейміз. Қазіргі уақытта қорытынды шығару үшін мәліметтер жеткіліксіз болып тұр», – деді министр.
</blockquote>

Мектептерде жаңажылдық іс-шаралар өткізілмейді

<a href="https://kyzylorda-news.kz/">Kyzylorda-news.kz.</a>&nbsp; Қызылорда облыстық білім басқармасының басшысы Ақзира Қасымова бүгінгі 45 минутын шәкірттермен өткізді. Серәлі Лапин атындағы №261 мектептің 10 сынып оқушыларының арнайы ұсынысымен «Физика» пәнінен сабақ өткізген аймақтың бас ұстазы жаңа тақырыпты тың тәсілдермен түсіндірді.
Физика сабағының тақырыбы – «Изопроцестер. Изопроцестердің графиктері. Дальтон заңы». Сабақтың ерекшелігі – изопроцестерді графикалық тәсілмен сипаттай отырып, тәуелділікті анықтау мазмұнына сәйкес дайындалған. Сонымен қоса, тақырыпты ашу мақсатынды макроскопиялық параметрлердің байланыстарын көрсету үшін тәжірибе жұмысы жасалды.
Сабақта оқушылар жеке, топтық формада жұмыс жасап, тапсырмаларды жылдамдыққа орындады. Топтық жұмыста изопроцестердің графиктерін pV, pT, VT параметрлері бойынша салуға тапсырма беріліп, «Сематикалық карта» арқылы жеке жұмыс жүргізілді. Сабақ соңында оқушылармен «SWOT» талдау арқылы кері байланыс жасалды.
<blockquote>
 «Осыдан бірнеше ай бұрын аталмыш мектептің оқушылары дәріс беруімді сұрап, ұсыныстарын білдірген болатын. Шәкірттердің тілегін орындаудың сәті түсіп, бүгін ынталы оқушылардың ортасына келіп сабақ бердім. 6 жылғы үзілістен соң өткізіліп отырған бұл сабағымда балаларға барынша жаңа тақырыпты тың әдістермен түсіндіруге, ҰБТ кезеңінде есептерді шығаруда алабөтен ойлануға бағыт-бағдар бердім. Ұстаздық еткен күндерімді еске алып, оқушылармен емін-еркін топтық тапсырмаларды бірге орындадық», – деді басқарма басшысы Ақзира Бақтыбайқызы.
</blockquote>
Басқарма басшысы сабақ беру сәтінен кейін мектептің 11 сынып оқушыларымен кездесті. Еркін форматта өткізілген басқосуда Ұлттық тестке әзірлік, мамандық таңдау секілді өзекті мәселелер талқыланып, түлектер аймақтың бас ұстазымен еркін пікір алмасты.
<img src="https://kyzylorda-news.kz/wp-content/uploads/2021/11/f2f46488-2681-4cdb-99bc-93ba2d33f2f9.jpg" alt="" />
<img src="https://kyzylorda-news.kz/wp-content/uploads/2021/11/c6b51d0e-702c-4832-99c8-9f1c31e94f3c.jpg" alt="" />
<img src="https://kyzylorda-news.kz/wp-content/uploads/2021/11/af0a2bf5-7438-4e78-a25e-b621cc12de52.jpg" alt="" />

Облыстың бас ұстазы мектеп оқушыларына сабақ берді

<a href="https://kyzylorda-news.kz/">Kyzylorda-news.kz.</a> Байқоңыр қаласында бюджет қаражатын жымқырған балабақша меңгерушісі ұсталды, деп хабарлайды&nbsp;<a href="https://sputnik.kz/">Sputnik Қазақстан.</a>
Ғарыш кешенінің прокуратурасы ұсынған мәліметке сәйкес, балабақша жетекшісі бірнеше ай бойы қала бюджетінен ақшаны қылмыстық жолмен ұрлап келген.&nbsp;
<blockquote>
 «Алдымен балабақша меңгерушісінің міндетін атқарушы жұмыс уақытын тіркеу табелі мен бұйрыққа қосымша жұмыс туралы жалған мәлімет енгізіп отырған. Шын мәнінде, қызметкерлер ол жұмысты жасаған жоқ. Ал жалақы төленетін күні балабақша меңгерушісі бухгалтериядан қосымша жұмыстың көлемін анықтап, ақшаны жинап тұрған», – дейді прокурорлар.
</blockquote>
Мекеме қызметкерлері одан қорқып, ақшаны беріп отырыпты. Құқық қорғау органдарына да хабар бермеген. Себебі балабақша басшысы қызметін пайдаланып, өш алады деп қауіптенген. Ал мектепке дейінгі мекеменің жетекшісі әрбір қызметкерден 10 мың рубльге (60 мың теңге) дейінгі “артық жұмыстың ақысын” жинаған.&nbsp;&nbsp;&nbsp;
Қазіргі кезде қылмыстық іс қозғалды. Осы оқиғадан кейін Байқоңырдағы барлық балабақшада тексеріс өткізуге шешім қабылданды.

Байқоңырда балабақша меңгерушісі ұсталды

<a href="https://kyzylorda-news.kz/ru/obshestvo/">Kyzylorda-news.kz</a>. Қорқыт ата атындағы Қызылорда университетінің 18 студенті Қазақстан Республикасы Президентінің стипендиясына ие болды. Президенттік стипендия биылғы қыркүйек айынан бастап оқу&nbsp; үлгерімі «өте жақсы» және университеттің қоғамдық жұмыстарында белсенділігімен ерекшеленген білім алушыларға тағайындалып отыр. Бұл студенттер қазіргі уақытта 81&nbsp;000 – 171000 теңге көлемінде стипендия алады.
Білімді әрі белсенді жастарға қашанда жүйелі қолдау бар. Президенттік стипендия иегерлерінің бірі – «Азық-түлік өнімдерінің технологиясы» мамандығының 4-курс студенті Айжан Дастанбек.
<blockquote>
 &nbsp;Оқу орнына алғаш қабылданғанда Президенттік стипендия иегерлерімен танысудың сәті түсті. Сол кезде «мен де осындай үздік студент боламын» деген мақсат пайда болды. Бірақ Президенттік стипендия 3-курстан бастап тағайындалады. Ол үшін екі курс бойы барлық пән бойынша «өте жақсы» оқу қажет. Президенттік стипендия ең алдымен білім алушының оқу үлгеріміне және қоғамдық жұмыстардағы белсенділігіне қарай тағайындалады. Өзім халықаралық, республикалық олимпиада, конференциялар мен ғылыми жоба конкурстарының жүлдегері атандым. Қазір 81 мың теңгеден астам шәкіртақы аламын,– деді Айжан Дастанбекқызы.
</blockquote>
Президенттік стипендияны екінші оқу жылында да иеленген білім алушылардың қатарында «Жерге орналастыру» мамандығының 4-курс студенті Нұрсұлу Сүйіндік те бар.
<blockquote>
 Білім алушылар үшін бұл үлкен мүмкіндік деп ойлаймын. Бізге Президенттік стипендияға үміткерлерден құжат қабылдау басталғанын Инженерлі-технологиялық институтының директоры Гүлзат Асқарова хабарлады. Тамыз айында іріктеу жұмыстары жүргізілді. Биыл да Президенттік стипендия иегері атанғаныма қуаныштымын. Кейбір студенттер сабақ уақытынан тыс жұмыс істеп, қосымша қаражат табуға тырысады. Меніңше сабақты үздік оқып та, жоғары шәкіртақыны иеленуге мүмкіндік мол, – деді студент.
</blockquote>
Айта кету керек, стипендия күндізгі оқу нысаны бойынша оқитын студенттерге 3-курстан бастап мемлекеттік білім беру тапсырысы бойынша және ақылы негізде тек «өте жақсы» (А, А-) оқитын студенттерге беріледі.
&nbsp;&nbsp;&nbsp; Стипендия білім алушылардың мынадай санаттарына тағайындалады: 
&nbsp;&nbsp;1) республикалық және халықаралық олимпиадалардың, шығармашылық конкурстардың, спорттық жарыстардың, фестивальдардың жеңімпаздары немесе жаңалық авторлары;
2) ғылыми еңбек жинақтарында, республикалық және халықаралық ғылыми журналдарда жарияланымдары бар;
&nbsp;3) табыстары дипломдармен, грамоталармен, сертификаттармен, куәліктермен расталған ғылыми-зерттеу жұмыстарымен белсенді айналысатындар;
4) білім беру ұйымының қоғамдық, мәдени және спорттық өміріне белсене араласатындар.
Қазақстан Республикасы Президентінің стипендиясын иеленген білім алушылар тізімі:
Нұржан Жарылқасын – 6В04140-Экономика білім беру бағдарламасының 3-курс студенті
Гүлнұр Шахмардан – 6В01516 –Химия-Биология білім беру бағдарламасының 3-курс студенті
Ақерке Қонысбай – 6В07365-Құрылыс білім беру бағдарламасының 3-курс студенті
Ақзер Бодыкова – 6В04246-Құқықтану білім беру бағдарламасының 3-курс студенті
Азамат Абимолдаев – 6В03238-Журналистика білім беру бағдарламасының 3-курс студенті
Дана Тұрғанбек – 6В06149 –Ақпараттық жүйелер білім беру бағдарламасының 4-курс студенті
Әлия Бекенова – 6В04142-Есеп және аудит білім беру бағдарламасының 3-курс студенті
Динара Амирова – 6В11177-Туризм білім беру бағдарламасының 3-курс студенті
Жаңыл Сәрсенбай – 6В04140-Экономика білім беру бағдарламасының 3-курс студенті
Айжан Байдосова – 5В012500-Химия-Биология білім беру бағдарламасының 4-курс студенті
Ақжайық Тәжі – 6В01101-Педагогика және психология білім беру бағдарламасының 4-курс студенті
Жансая Мирамбекқызы – 6В01517-Биология білім беру бағдарламасының 3-курс студенті
Перизат Тобжан – 6В06149-Ақпараттық жүйелер білім беру бағдарламасының 3-курс студенті
Аружан Алданазарова – 5В011700-Қазақ тілі және әдебиеті білім беру бағдарламасының 4-курс студенті
Айдана Дәурен – 5В030100-Құқықтану білім беру бағдарламасының 4-курс студенті
Айжан Дастанбек – 5В072700-Азық-түлік өнімдерінің технологиясы білім беру бағдарламасының 4-курс студенті
Нұрсұлу Сүйіндік – 5В090300-Жерге орналастыру білім беру бағдарламасының 4-курс студенті
Динара Болатбек – 5В070300-Ақпараттық жүйелер білім беру бағдарламасының 4-курс студенті

Қызылордалық 18 студент Президенттік стипендия иеленді

<a href="https://kyzylorda-news.kz/ru/obshestvo/">Kyzylorda-news.kz</a>. Әділет министрлігінде мемлекеттік білім беру ұйымдарының бірінші басшыларын ротациялау қағидалары тіркелді. Бұл туралы білім және ғылым министрі Асхат Аймағамбетов мәлімдеді, деп хабарлайды <a href="https://sputnik.kz/bilim/20211122/18722901/bilim-beru-yiymdary.html">Sputnik Қазақстан</a>.
Министрдің хабарлауынша, білім беру жүйесінде мектеп, колледж және балабақша директорларын ротациялау институты пайда болды.
<blockquote>
 “Білім беру саласында он мыңнан астам мемлекеттік ұйым бар. Көптеген басшы мерзімсіз еңбек келісімшартын жасасқан. Осыған байланысты бір ұйымда 10-15 жыл және одан да көп жұмыс істейтіндер аз емес. Әрине, олардың арасында өз жұмысын жақсы білетін, білім беру ұйымының дамуына елеулі үлес қосатын басшылар бар. Дегенмен 10-15 жыл бойы бір орында отырып, өздерінің бастамашылдығы мен дамуға деген ынтасын жоғалтатын мектеп директорлары да бар”, – деп жазды министр Facebook парақшасында.
</blockquote>
Егер басшы ұзақ жыл бойы бір білім беру ұйымын басқарса, бұл мотивацияның төмендеуіне, жұмыс барысында жаңа тәсілдердің болмауына әкелуі мүмкін.
<blockquote>
 “Басшылық ететін ұйымның ауысуы өзгерістерді енгізуге және басшының жұмыстағы тиімділігін арттыруға мүмкіндік береді”, – деді Аймағамбетов.
</blockquote>
**Ереженің басым бағыттары 
**Біріншіден, бір білім беру ұйымында 4 немесе 7 жылдан астам жұмыс істеген басшылар ротацияланады.
Осы білім беру ұйымында лауазымға тағайындалған күннен бастап 4 жыл жұмыс атқарған бірінші басшы ротациядан өтініші негізінде босатылып, тиісінше, қолданыстағы еңбек шарты шеңберінде өз жұмысын жалғастыра алады.
Алайда егер басшы сол ұйымда 7 жылдан астам уақыт жұмыс істесе, онда ол міндетті түрде ротацияланады. Осылайша, бір білім беру ұйымына жетекшілік ету мерзімі 7 жылдан аспауға тиіс.
Екіншіден, ротациялаудың бірнеше шарты бар:
– ротациялауды облыстардың және республикалық маңызы бар қалалардың білім басқармалары жүзеге асырады;
– ротация бір елді мекен аумағында жүргізіледі;
– ротациялауды бір деңгейдегі ұйым басшылары арасында жүргізеді;
– ротациялау кезінде бірінші басшылардың біліктілік санаты, яғни аталған санат үшін төленетін қосымша ақы да мерзімі аяқталғанға дейін сақталады.
Ашықтық пен объективтілікті қамтамасыз ету үшін ротациялау туралы мәселені қарау үшін комиссия жұмыс істейді.
Ротациялау жүйесінің тиімді жұмыс істеуі және бұл қағидалардың жергілікті жерлерде дұрыс іске асырылуы үшін министрлік мониторинг жүргізеді.

Білім беру ұйымдары басшыларын ротациялау қағидалары жарияланды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласы Е.Әуелбеков атындағы дарынды балаларға арналған №4 облыстық мектеп-интернатының 11 сынып оқушылары Какпан Нұрлыхан мен Бергенбекұлы Нұрдәулет Президенттік олимпиада жүлделі 2 орынды иеленді.
Осымен 11-ші мәрте ұйымдастырылған білім додасында бақ сынаған №4 облыстық мектеп-интернатының шәкірттері күмістен алқа тақты. Қарағанды қаласында жаратылыстану – математикалық бағытында ұйымдастырылған бұл білім бәйгесіне өңірімізден 10 оқушы бақ сынаған болатын.
Президенттік олимпиадада топ жарған №4 облыстық мектеп-интернатының оқушысы Бергенбекұлы Нұрдәулет – Нархоз Университеті, Х. Досмұхамедов атындағы Атырау университеті, Сафи Өтебаев атындағы Атырау мұнай және газ университеті мен М.Әуезов атындағы Оңтүстік Қазақстан университетінің бакалавриатының кез-келген білім беру бағдарламасы бойынша 100% жеңілдікпен білім алу сертификатына ие болды. Ал, Какпан Нұрлыхан – М.Нарикбаев атындағы қазақ мемлекеттік заң университеті мен Сафи Өтебаев атындағы Атырау мұнай және газ университетінің бакалавриатының кез-келген білім беру бағдарламасы бойынша 100% жеңілдікпен оқуға, сонымен қатар М.Әуезов атындағы Оңтүстік Қазақстан университетінде білім алуға 70% жеңілдік сертификатына ие болды.
Сонымен қатар, олимпиада қорытындысымен «Ең үздік олимпиадалық мектеп-2021» номинациясы бойынша жүлделі ІІІ орынды Қызылорда қаласы Е.Әуелбеков атындағы дарынды балаларға арналған №4 облыстық мектеп-интернаты қанжығасына байлады.
<img src="https://kyzylorda-news.kz/wp-content/uploads/2021/11/257808356_1240716599764876_4707115844167873777_n.jpg" alt="" />

Қызылордалық 2 оқушы президенттік олимпиадада күміс медаль иегері атанды

<a href="https://kyzylorda-news.kz/ru/obshestvo/">Kyzylorda-news.kz</a>. Назарбаев Зияткерлік мектептері арасында өткен ғылыми жобалар сайысында қызылордалық озат оқушылар екі қола және үш күміс медальға ие болды. Еліміздегі Назарбаев Зияткерлік мектептерінің 300-ге жуық оқушысы қатысқан байқауға 264 жоба ұсынылды. Бұл туралы Өңірлік коммуникациялар қызметінде өткен баспасөз конференциясында жоба жетекшісі әрі қазақ тілі мен әдебиеті пәнінің мұғалімі Мира Дөненхожаева хабарлады.
Ғылыми жобалар 4 бағытты қамтыды. Өңіріндегі NIS командасы бұл сайыста 12 зерттеу жұмысын таныстырып, ғалымдардың жоғары бағасын алды.
<blockquote>
 «9 сынып оқушысы Арайлым Әшірмет жастардың кітап оқуға қызығушылықтарын арттыруға арналған «Сенің “кітап сөрең”» атты онлайн платформа жасады. Әдеби сайтта өзі оқыған сүйікті кітаптарының мазмұнына сүйене отырып көлемді шығармалармен танысуға мүмкіндік беретін мультимедиялық лонгридтер әзірленіп, ұсынылған. Химия секциясында 12 сыныптың оқушысы Зарина Айсауытова өз ғылыми жаңалығын таныстырды. Ол кальций силикатының золін вакуммда өңдеу және оның мыс катиондарын сорбциялау қасиетін зерттеу арқылы өндірістік суларды тазалаудың тиімді әдісін ұсынды. Жоғарыда аталған барлық оқушылардың жұмыстары байқаудың қорытындысы бойынша үздік деп танылып, жүлделі 2 орынмен марапатталды», – деді жоба жетекшісі Мира Дөненхожаева.
</blockquote>
Білім додасында қола медалін иеленгендер – Бәйдібек Мұсаев пен Ляззат Өтеп. Бірі полиэтилентерефлатат қалдықтарының бұзылуы арқылы бис-2-гидроксиэтилтерефлатат алуды зерттесе, енді бірі қазіргі жастар прозасының даму деңгейін талдау арқылы жасөспірімдерді қызықтыратын қазақ тіліндегі әдеби шығармалардың тізімін жіктеді.
<img src="https://kyzylorda-news.kz/wp-content/uploads/2021/11/258220790_1414500208945487_8363694815630062096_n.jpg" alt="" />

Қазақстан және Қызылорда облысының жаңалықтары: Білім