<a href="https://kyzylorda-news.kz/">Kyzylorda-news.kz</a>.&nbsp; Қорқыт ата атындағы Қызылорда университетінің ғалымдары Еуропалық Одақ грантын жеңіп алды. Олар Португалия, Нидерланды, Дания, Ресей, Беларусь және Украина ғалымдарымен бірлесіп, әзірлеушілер тобына кірді.
Дәрілік препаратты дайындау үшін Қазақстанның оңтүстік аймақтарында өсетін түйе тікенегі пайдаланылады. 
Отандық зерттеушілер өсімдіктен атеросклероздың бастапқы формаларын емдеуде тиімді биологиялық белсенді заттарды алды.
<blockquote>
 «Біз дәрілік өсімдік – түйе тікенегіне зерттеу жүргізу үшін Білім және ғылым министрлігі Ғылым комитетінің грантын алдық. Содан кейін біз оның құнды қасиеттерін анықтадық. Біз өзіміз ашқан жаңалықты Португалияда таныстырдық. Олар біздің ғылыми әзірлемелерімізге қызығушылық танытып, ынтымақтастық ұсынды. Жобаны орындау кезінде флавоноидтардың суда еритін формаларын аламыз, оларды көміртекті наноматериалдармен модификациялаймыз. Шетелдік ғалымдар жедел тест өткізіп, біз анықтаған наноматериалдар Альцгеймер және Паркинсон ауруларының дамуына кедергі келтіретінін және пациенттерді аурудың алғашқы кезеңдерінде емдеуге көмектесетінін растады. Сонымен қатар түйе тікенегінен алынған модификацияланған биологиялық белсенді заттардың жанама әсерлері жоқ және адам денсаулығы үшін қауіпсіз болып танылды», – деді Қорқыт Ата атындағы Қызылорда университетінің зерттеуші-профессоры Нұрбол Аппазов.
</blockquote>
Қызылордалық ғалымдар шетелдік әріптестерімен бірге байқауға қатысу үшін өтініш беріп, Horizon-2020 бағдарламасы бойынша Еуропалық Одақтың грантын жеңіп алды. Енді ғылыми топ клиникаға дейінгі және клиникалық зерттеулер жүргізуді жоспарлап отыр.
Қорқыт ата атындағы Қызылорда университетінің ғалымдарында басқа да көптеген инновациялық жобалар бар, олардың бір бөлігі коммерцияландырылған. Мәселен, химик ғалым, профессор Нұрбол Аппазов қара алтынды мұнай шламынан өңдеудің тиімді әдісін ойлап тапты. Жоба Құмкөлдің ірі мұнай-газ кен орындарының бірінде енгізілді. Қазақстандық ғалымның жобасы көптеген шетелдік жобалар арасынан топ жарып, ең үнемді жобалардың бірі ретінде танылды.
Ғалымдардың күріш сабанынан целлюлоза алу жобасы қағаз өндірісінде қолданысқа енгізілді. Бұрын астық жинап, өңдегеннен кейін мыңдаған тонна күріш сабаны мен қауызы қолданылмай өртелетін. Ғалымдардың жұмысының арқасында экологияға таза шешім табылды. Қазір күріш сабанының дәндері мен қабығынан қағаз, белсендірілген көмір және тыңайтқыш – биочар жасалады.

Сыр ғалымдары альцгеймер және паркинсон ауруларына қарсы дәрі жасап жатыр

<a href="https://kyzylorda-news.kz/">Kyzylorda-news.kz</a>. Биыл&nbsp;«Елбасы қорының Стипендиясы»&nbsp;байқауына еліміздің барлық өңірінен 350-ден астам студенттер мен магистранттар қатысты.
Олардың арасынан тек 80 үміткер ғана үздіктер қатарынан көрінді. Солардың қатарында Қорқыт ата атындағы Қызылорда университетінің 3 курс студенті Ақжайық Тәжі бар. Ол Қызылорда облысы бойынша Елбасы стипендиясы мәртебесін иеленген жалғыз қызылордалық. Қазіргі таңда педагогика және психология мамандығында білім алуда.
<blockquote>
 «Әрбір студент іздену жолында жүріп, ешқашан бір орында тоқтап қалмау керек. Жастарға көп мүмкіндік жасалған. Байқау туралы әлеуметтік желідегі жаңалықтар арқылы білдім. Сол уақыттан бастап Елбасы стипендиясының&nbsp; сайтын оқып, алдыма мақсат қойдым. Құжаттарымды дайындауға 2 аптадай уақыт кетті. Маған жетістікке жету жолында гуманитарлық-педагогикалық институт директоры Сағат Тайман мен педагогика-психология кафедрасының меңгерушісі жан-жақты қолдау көрсетті. Елбасы стипендиясына іліну менің көптен күткен арманым болды. Білікті бірді жығар, білімді мыңды жығар демекші, жас кезде барлық мүмкіндікті пайдалануымыз керек. Сонда ғана еліміздің одан әрі өркендеп, дамуына үлес қоса аламыз», – деді Ақжайық Тәжі.
</blockquote>
<img src="https://kyzylorda-news.kz/wp-content/uploads/2021/09/03.jpg" alt="" />

Елбасы қорының стипендиясын қызылордалық студент жеңіп алды

<a href="https://kyzylorda-news.kz/">Kyzylorda-news.kz</a>. Мектептегі&nbsp; «Өзін-өзі басқару» жобасының&nbsp;&nbsp; миссиясы, оқушылар арасында мәдениетаралық түсіністік, үздіксіз білім мен тәрбие алуға және жоғары адамгершілік құндылықтарды дамытуға бағытталған зияткерлік қоғам құруға үлесін қосу.
Мектеп парламентінің миссиясын түсінген оқушылар &nbsp;толерантты әлем құруға бағыттайтын және үйлесімді дамуға мүмкіндік беретін&nbsp; адами капиталы мол жаһандық азамат болуға талпынады. Осы мақсатты іске&nbsp; асыру&nbsp; барысында&nbsp; Қызылорда облысы бойынша білім беру ұйымдарында оқушылардың бос уақытын тиімді ұйымдастыруға бағытталған жұмыстар&nbsp; оқушы қажеттілігіне &nbsp;қарай іске асырылып, облыс бойынша 285 білім беру ұйымында мектеп парламенті жұмыс жасайды. Мектеп парламентінің жобаларына&nbsp; қатысу арқылы&nbsp;&nbsp; оқушылар қамқор болу, танымдық іс-шаралар жүргізу, жұмыстарды үйлестіру, оқушылар қауымдастығымен жұмыс жасау, толеранттық ретінде өзгелердің кемшілігіне кешіріммен қарау, төзе білу, басқаны қабылдай білуге&nbsp; бағытталған шараларды &nbsp;жоспарлап &nbsp;ұйымдастырды.
Өңірімізде&nbsp;&nbsp; мектеп парламенті жобасын іске&nbsp; асыру тәрбие мамандары мен білім беру ұйымдары директорының тәрбие орынбасарларына арналған облыстық онлайн семинар&nbsp; ұйымдастырудан басталды. Облыстық шараға ат салысқан белгілі тәрбие мамандары &nbsp;«Балалар мен жастардың құқықтық мүмкіндіктерін іске асыру жолдары», «Парламент – оқу тәрбие процесінің кешенді көмекшісі», «Өзін өзі басқару – саналы азамат қалыптастыру негізі»,&nbsp;&nbsp;«Мектеп парламенті. Оқушылардың өзін өзі басқару ұйымының жұмыстарын дамыту» тақырыптарында оқушыларға кеңінен&nbsp; таныстыру жұмыстарын&nbsp; жүргізді.
&nbsp;&nbsp;&nbsp;&nbsp; Оқушылардың тең құқығы, әрбір жеке тұлғаға қатысты ізгілік, ашықтық, еріктілік, адалдық және серіктестерді құрметтеу қағидаттарына негізделіп құрылған мектеп парламентінің&nbsp; алғашқы шаралары&nbsp; облыстық өңірлік коммуникациялар қызметінде мектеп парламенті сайлауын өткізу комиссиясының төрағасы, №261 мектеп оқушысы Нұрсұлтан Мейрамбекұлы тікелей эфирде есеп беруімен жалғасты. Білім беру ұйымдарында «Мектеп Парламенті» жобасы &nbsp;парламентке фракция мүшелерін сайлау үшін арнайы ереже бекітіп, кандидаттар өтініш беру кезеңінен өтті. Одан кейін&nbsp;&nbsp; үміткелерге&nbsp; үгіт-насихат жұмыстары үшін уақыт берілді.Сайлауды өткізу комиссиясы құрылып, ұйымдастыру жұмыстарында &nbsp;оқушылар алдағы сайлау науқанына дайындық жұмыстарын жүргізіп, депутаттыққа үміткерлер сайлау алды бағдарламаларын &nbsp;ұсынды. Мектептерде ұстаздармен оқушылардың арасында кеңінен түсінік жұмыстары жүргізілді, одан кейін арнайы іс-шара жоспары жасалып, мектептегі түрлі қоғамдық ұйымдардан осы мектеп парламентінің президентігіне үміткерлер ұсынылды.
Оқушыларға осындай&nbsp; жауапкершілікті жүктеген&nbsp; мектеп парламентінің алғашқы отырысы &nbsp;сәуір айының&nbsp; басында өткізіліп,&nbsp; &nbsp;депутаттар мектеп президентінің алдында ант беру рәсімінен өтті. Өз мектебінің гүлденуіне үлес&nbsp; қосуға&nbsp; ниеттенген&nbsp;&nbsp; парламент мүшелері: «Өзіме жүктелген мәртебелі міндеттерді адал атқаруға,&nbsp; мектебіміздің бірлігі мен ынтымақтастығын сақтауға, ішкі ережелер мен тәртіптерді берік ұстанамын ” – деп ант берді.Бұл рәсім өз кезегінде оқушыларға&nbsp; үлкен &nbsp;жобаларды іске&nbsp; асыруға жол&nbsp; ашты.
&nbsp;Мектептегі парламент жұмысы, мектеп&nbsp; оқушылары арасынан оқушылар Президентін сайлау, жобаларды жоспарлау, іске асыру шараларымен жалғасты. Содан бері&nbsp; облыс бойынша&nbsp; мектептерде «Мейірімге толы жүрек » «Қайырымдылықпен қадам басамыз» акциялары, «Отбасы –мейрім ұясы»&nbsp;&nbsp;&nbsp;&nbsp; «Жақсылық жасауға ұмтыл», «Біз және болашақ», «Оқуға құштар Ұлан», «Бабалар Үні» тақырыбында челлендждер ұйымдастырылды.Сонымен қатар, оқушылардың өлкетанулық білімін және тарихи – археологиялық танымын арттыру мақсатында “Ата қоныс – алтын мекен” тақырыбында онлайн форматта музей сағаттары ұйымдастырылып, онлайн саяхаттар өткізілді. Мектептердегі өзін-өзі басқару ұйымдары&nbsp; алғыс айту, отбасы&nbsp; күндеріне орай түрлі акциялар аясында &nbsp;мектеп ұстаздарына, қарттарға, түрлі мамандық иелеріне &nbsp;ашық хаттар&nbsp;&nbsp; жолдау апталығын &nbsp;өткізді. «Жүгір және тазала» плоггингі мен «Өз ағашыңды отырғыз» акциясы оқушылардың&nbsp; сүйікті&nbsp;&nbsp; істеріне айналды. «Ақылды бейсенбі» жобасында парламент мүшелерінің жұмыс жоспарлары таныстырылып, оқушылар үні тыңдалады. Осы &nbsp;орайда мектептерде «Парламент&nbsp; тынысы» жобасы іске асып келеді.Жоба аясында «Еңбек», «Эрудит», «Ақпарат» кеңестері жұмыс жасайды.Жобаларды жан-жақты&nbsp; дамыту мақсатында онлайн форматта&nbsp; мәдени шаралар, ZOOM платформасы арқылы&nbsp; жиналыстар ,&nbsp; онлайн ақпараттық сабақтар,танымдық сабақтар&nbsp; өткізіліп, мектеп парламенттерінің атқарып жатқан шаралары&nbsp;&nbsp; инстаграм, фейсбук желілерінде насихатталып отыр.Мектеп парламентінің мүшелері&nbsp; халықаралық&nbsp;&nbsp; балаларды&nbsp; қорғау&nbsp; күніне&nbsp; орай&nbsp; «Бақытты&nbsp; бала- бақытты ел» шарасының аясында Облыстық &nbsp;білім басқармасының&nbsp;&nbsp;&nbsp;&nbsp; басшысы Ақзира Бақтыбайқызы Қасымовамен кездесіп жаңа жобалар&nbsp; жоспарлап, өздерін ойландырып жүрген сұрақтарына жауап алды.
Мектеп&nbsp; парламенті–білім алушылардың білім беру ұйымын бірлесіп басқаруға, оқу-тәрбие процесін ұйымдастыру кезіндегі мәселелерді шешуге қатысу нысаны екендігін&nbsp; ескерсек….&nbsp; Жаңа&nbsp; оқу&nbsp; жылында Сыр ұландарының&nbsp; алдында,
-Интернет-тәуелділіктің, кибербуллингтің және құмар ойындардың алдын алу&nbsp; шараларын&nbsp; ұйымдастыру,
– Оқушылар&nbsp; арасында &nbsp;экологиялық мәдениетін қалыптастыру, &nbsp;
-Интеллектуалдық даму, зерделі түрде алдына нақты мақсат қоя білу дағдыларын қалыптастыру,
-Волонтерлік қызметті дамыту ,
-Денешынықтыру мәдениеті мен психикалық денсаулығын қалыптастыру ,
-Мектеп қабырғасынан кәсіби мамандыққа бағдар беру, еңбекке деген құрметті сіңіру ,
-Құқықтық мәдениетті қалыптастыру &nbsp;бағыттарында &nbsp;тың жобалар іске асыру міндеттері&nbsp;&nbsp; тұр.
Ендеше&nbsp;&nbsp; қоғамның алға басуы – жастарды білім мен тәрбие арқылы дамытуға, жаңаша&nbsp;ойлауға, бәсекелестік жағдайында іскерлікке үйретуге байланысты екені анық.Сондықтан өңіріміздегі&nbsp; мектептерде өзін-өзі басқару мәселесіне ерекше көңіл аударылып, нәтижелі жобалар іске асырылуда.
Гүлайым АҚМЫРЗАЕВА,
Қызылорда облыстық оқу орталығының бөлім меңгерушісі

Гүлайым Ақмырзаева: Өзін  өзі  басқару – саналы  азамат  қалыптастырудың  негізі

<a href="https://kyzylorda-news.kz/">Kyzylorda-news.kz</a>. Мемлекет басшысының Жолдауы еліміздің алдағы әлеуметтік-экономикалық дамуының басым бағыттарын айқындап берді. Жаңа Жолдау ел дамуы мен халқымыздың өмірінде біршама жаңашылдықтың болатынын айқындады. Өңірлік коммуникациялар қызметінің ақпарат алаңында өткен баспасөз конференциясында Қорқыт ата атындағы Қызылорда университетінің академиялық мәселелер жөніндегі проректоры Абайбек Жүнісов ел Президентінің Жолдауынан туындайтын міндеттерге тоқталып, өз пікірімен бөлісті.
<blockquote>
 Өз ойын ортаға салған Абайбек Талғатұлы «Бұл ретте жетекші ғалымдардың жалақысын базалық қаржыландыру арқылы төлеу, ғылыми ұйымдарды тікелей қаржыландыру, гранттық қаржыландыру бойынша ұтып алынған жобаларды орындау мерзімін 5 жылға ұзарту бастамаларын ерекше атап өтуге болады», – деді.
</blockquote>
Сонымен қатар Жолдауда көрсетілген ІТ саласын дамыту тетіктеріне кеңінен тоқталып, бұл бағытта университет тарапынан атқарылып жатқан жұмыстарды баяндады. Университет базасында IT департаменті жұмыс істеп тұрғандығын да атап өтті.
<blockquote>
 Келесі кезекте проректор соңғы жылдардағы Мемлекет басшысының білім беру саласын қолдауы саладағы сапалық өзгерістерге негіз болғандығын жеткізді. Сонымен бірге «Алдағы 3 жылда ұстаздардың еңбек ақысын өсіруге 1,2 триллион теңге бөлінетіні барша зиялы қауымның көңіліне қуаныш ұялатты десек, артық айтпаймыз. Осы орайда, қыркүйек айынан бастап біздің университетте де оқытушы-профессорлардың жалақысы 90 пайызға, қызметкерлердің еңбекақысы 25 пайызға өсті», – деді Абайбек Талғатұлы.
</blockquote>

Абайбек Жүнісов: Жаңа Жолдау жарқын бастамаларға толы

<a href="https://kyzylorda-news.kz/">Kyzylorda-news.kz</a>. Мемлекеттің интелектуалдық әлеуетінің өсуі, бәсекеге қабілетті болуы білім саласының сапалық деңгейіне тікелей байланысты. Бұл ретте жоғары оқу орындарында бәсекеге қабілетті маман даярлау ісі ерекше маңызға ие. Бүгін Өңірлік коммуникациялар қызметінде өткен баспасөз конференциясында “Болашақ” университетінің ғылыми-зерттеу институтының директоры, саяси ғылымдарының кандидаты, профессор Мұрат Насимов оқу орнындағы білім беру мен санитарлық талаптардың орындалу барысын баяндады.
Ел Президенті Қасым-Жомарт Тоқаевтың кезекті Жолдауында білім және ғылымға ерекше мән берілген. Жоғары деңгейдегі білімге қол жеткізу үшін оқу бағдарламалары үнемі назарға алынып, қайта қарастырылу процестері жүріп отыруы қажет делінді. Қазіргі таңда Жолдауда қойылған міндеттерге сәйкес, ғылым саласын гранттық қаржыландыру мерзімін бес жылға дейін ұзарту мәселесі қарастырылып жатыр. Бұл ғылымдағы жақсы жаңалықтардың бірі болды.
<blockquote>
 «Ал “Болашақ” университеті білім сапасын арттыру мақсатында оқытушылар мен білім алушылардың тікелей көзқарастары негізінде білім бағдарламаларын құруда. Сонымен қатар ғылым саласы бойынша қазіргі таңда он бір бағыт бойынша жұмыстар атқарылуда. Соның бірі “Рухани жаңғыру: қоғамдық сана мен тәрбие сананы жаңғырту” пәндері енгізілді», – деді Мұрат Өрленбайұлы.
</blockquote>
Одан әрі Мұрат Өрленбайұлы университтегі санитарлық талаптардың орындалу барысына тоқталып «Жаңа оқу жылында “Болашақ” университетінің барлық оқытушылары мен студенттері індетке қарсы екпе алды. Қазір университетте дәстүрлі форматта оқу процесі жүріп жатыр. Сондай-ақ, ғимараттарға “Ашық” бағдарламасы енгізіліп, сол арқылы кіргізілуде. Жалпы айтқанда біздің университте санитарлық талаптар сақталуда”,- деді.
<img src="https://kyzylorda-news.kz/wp-content/uploads/2021/09/241822492_1371555436573298_2391302439029986945_n.jpg" alt="" />

Мұрат Насимов: Жолдауда білім мен ғылымға ерекше мән берілген

<a href="https://kyzylorda-news.kz/">Kyzylorda-news.kz</a>. Бүгінде Қорқыт Ата атындағы Қызылорда университетінде академиялық ұтқырлық бағдарламасы сәтті жүзеге асырылуда. Бағдарлама арқылы білім алушылар белгілі бір академиялық кезеңге оқуға немесе зерттеу жұмыстарын жүргізуге өзге ЖОО баруына мүмкіндіктер бар. Осы арқылы білім алушылар мен оқытушылар ғылыми және білім беру саласында халықаралық деңгейде тәжірибе жинақтайды.
<blockquote>
 «Биыл шектеу шаралары бар елдерді қоспағанда, білім алушылардың шетелдік академиялық ұтқырлығы мен тағылымдамаларына рұқсат етілген. «Шетел тілі: екі шетел тілі» мамандығы бойынша 2 білім алушы қос диплом бағдарламасы негізінде Корея Республикасының Кангнам университетіне оқуға жіберілді. Білім алушылардың оқу ақысы және жатақхана төлемақысы екі жақты келісімшарт негізінде Кангнам университетінің гранты есебінен жүзеге асады», – деді халықаралық байланыс бөлімінің басшысы Бекзат Ырза.
</blockquote>
Сонымен қатар, биылғы жылдың 4 қазан күні 9 білім алушы академиялық ұтқырлық бағдарламасы бойынша Польша Республикасының Лодзь университетіне оқуға жіберіледі. Сондай-ақ, Бельгия Корольдігінің Ховест қолданбалы ғылымдар университетіне 2 магистрант, Словения еліне 2 білім алушы оқуға жолдама алды. Барлық шығындар мен шәкіртақысы Еуропа Одағының Эразмус+ бағдарламасы аясында қолдау тапты. Жалпы шет елде оқуға ниет білдірушілер жыл сайын артып келеді.
Қазіргі таңда университет АҚШ, Ұлыбритания, Түркия, Франция, Италия, Германия, Индонезия, Сингапур, Колумбия елдерінің жоғарғы оқу орындарымен байланыс орнатуда. Шет елде тәжірибе алмасуға ниет білдіргендер үшін ең алдымен қойылатын талап – ағылшын тілінің деңгейі. Білім алушылардың тіл деңгейін көтеру мақсатында университетте TOEFL тест орталығы жұмыс істейді.

Университетте халықаралық байланыс деңгейі жоғары

<a href="https://kyzylorda-news.kz/">Kyzylorda-news.kz</a>.&nbsp; Қазақстанда осы жылдың соңына дейін 37 жаңа жатақхана пайдалануға беріледі, деп хабарлайды Білім және ғылым министрлігінің баспасөз қызметі.
БҒМ Қаржы орталығының президенті Асқар Ибраимовтың айтуынша, министрлік студенттер жатақханаларын салу мен қайта құру қарқынын жеделдету үшін жаңа тетіктер әзірледі.
<blockquote>
 “Атап айтқанда, жатақханалар нысаналы құрылыс және жоғары оқу орындарының өз қаражаты есебінен, сондай-ақ мемлекеттік-жекеменшік әріптестік қағидаты бойынша салынады. Яғни, инвесторлар өз қаражатына жатақхана салады, ал министрлік оларға мемлекеттік тапсырысты орналастырып, студенттің әрбір жатын орнын төлейді”, – деді ол.
</blockquote>
Ведомство мұндай алгоритм жатақхана санын едәуір арттыруға және студенттердің өмір сүру жағдайын жақсартуға мүмкіндік бергенін атап өтті.
Қазір құрылыс жұмыстары Нұр-Сұлтан қаласында, Қызылорда, Қарағанды, Шығыс Қазақстан, Жамбыл және Маңғыстау облыстарында белсенді жүріп жатыр.
Нұр-Сұлтан мен Алматыда жеке инвесторларды қосымша ынталандыру үшін мемлекеттік тапсырыс көлемін 47 АЕК-тен 92 АЕК-ке дейін ұлғайту мүмкіндігі қарастырылуда. Өйткені бұл қалаларда жатақханаға аса қажеттілік байқалады.
Сондай-ақ, мемлекеттік тапсырысты орналастыру мерзімін 8 жылдан 5 жылға дейін қысқарту туралы ұсыныс әзірленді.
Жоғары оқу орындары мүмкіндігіне қарай өз ақшасына да жатақхана салады. Кейбір оқу мекемелері тұрғын үй, жатақхана мен қонақ үйлерді жалға алып, студенттерді соған орналастыруда. Бүгінгі таңда 13 жоғары оқу орны 5 мың студент үшін төсек-орындарды жалға алды, деп толықтырды білім министрлігі.
Ведомство келесі жылы тағы 60-қа жуық студенттер үйін пайдалануға беру жоспарланып отырғанын мәлімдеді.
Айта кетері, соңғы үш жылда республикада 85 жаңа жатақхана іске қосылып, 22 мыңнан астам студент қоныстанды.

Қызылордада жыл соңына дейін студенттер жатақханасы пайдалануға беріледі

<a href="https://kyzylorda-news.kz/">Kyzylorda-news.kz</a>&nbsp; «Өзгерістер жолы: Әр азаматқа лайықты өмір!» атты «Nur Otan» партиясының сайлауалды бағдарламасын іске асыру жөніндегі Қызылорда облысы бойынша Жол картасының орындалу барысы туралы республикалық «Ұлт саулығы» қоғамдық кеңесінде баяндалды.
Кеңес отырысына облыстық партия филиалы төрағасының бірінші орынбасары, облыстық мәслихаттағы партия фракциясы жетекшісі Төрешова Ләйлә Бегалықызы қатысып, республикалық Жол картасының біздің өңіріміз бойыншы іске асырылуына түсіндірме берді.
Отырыста аймақтық қоғамдық кеңестің төрағасы, облыстық мәслихаттағы партия фракциясы мүшесі Әмитов Нұридин Егенбердіұлы өңірлік жол картасында «Әлеуметтік бағдарланған аймақ» бағытының Медициналық қызмет көрсету сапасын арттыру бойынша жоспарланған 8 индикаторына тоқталып, атқарылған жұмыстарды баяндап өтті.
Атап айтсақ, Арал және Жаңақорған аудандарында 2 компьютерлік томография аппаратының мемлекеттік сатып алу үрдісі өткізіліп, жыл соңына дейін ел игілігіне пайдалануға берілетін болады. Сондай-ақ, медицина кадрларының жетіспеушілігін төмендету мақсатында 2021 жылы облыс әкімінің гранты бойынша М.Оспанов атындағы Батыс Қазақстан мемлекеттік медицина университеті мен С.Асфендияров атындағы Қазақ Ұлттық медицина университеттеріне бакалавриатқа 30 грант тағайындалды және резидентурада оқытуға 20 грант бөлініп, жас мамандар білім алуға жолданды.
Қоғамдық кеңес отырысында әрбір атқарылған жұмысқа талдау жасалып, алдағы іске асырылатын шаралар пысықталды.

Қызылордада медицина мамандығына облыс әкімінің 50 гранты бөлінді

<a href="https://kyzylorda-news.kz/">Kyzylorda-news.kz</a>&nbsp; Қазіргі таңда Қорқыт ата атындағы Қызылорда университетіндегі агробиологиялық учаскесінде дәрілік өсімдіктердің 9 түрі бар. Табиғат&nbsp; байлықтарын сақтап келер ұрпаққа&nbsp; аманат ету мақсатында бүгінде университет білім алушыларымен зерттеу жұмыстары жүргізілуде. Дәрілік өсімдіктер санатына жататын қызыл мия, жоңышқа, түйежоңышқа, эспарцет зерттелуде.
<blockquote>
 «Өсімдіктің&nbsp; дәрілік&nbsp; қасиеті&nbsp; мерзімге&nbsp; байланысты. Сондықтан, қай кезде өсімдіктің&nbsp; қай&nbsp; бөлігін&nbsp; жинау керек екенін зерттеудеміз. Өсімдіктің әр&nbsp; бөліктерінде&nbsp; дәрілік қасиетінің&nbsp; мөлшері&nbsp; бірдей бола бермейді. Біреуін&nbsp; таң&nbsp; ата, екіншісін&nbsp; кешке, кейбірін&nbsp;&nbsp; гүлдегенге&nbsp; дейін, кейбірін&nbsp; гүлдеп&nbsp; тұрған&nbsp; кезде&nbsp;&nbsp; алу&nbsp; керек. Сол&nbsp; уақытта&nbsp; олардың&nbsp; емдік&nbsp; қасиеті&nbsp;&nbsp; мол&nbsp;&nbsp; болады. Дайындау&nbsp; негізінен құрғақ, жылы&nbsp;&nbsp; күндері&nbsp; түстен кейін&nbsp; жүргізіледі. Емдік қасиеті&nbsp; бар шөптердің&nbsp; сипаты, пайдасы, қасиеті, қолданылуы жайлы білу табиғат&nbsp; сырына&nbsp; деген&nbsp; құмарлық», – дейді «Аграрлық технологиялар» кафедрасының аға оқытушы, ауыл шаруашылық ғылымдарының кандидаты Раушан Нұрымова.
</blockquote>
Аграрлық сала ғалымдары және білім алушылары аймақтың қатал табиғи-климаттық жағдайына бейімделген ресурс үнемдеуші технологияларды әзірлеуге, ауылшаруашылық дақылдарының өнімділігін көтеруге бағытталған тәжірибелік-эксперименттік жұмыстарын жүргізуде.
<blockquote>
 «Білім алушылар зерттеулер нәтижесінде халықаралық, республикалық ғылыми жобалар мен олимпиадаларға қатысып, жеңімпаз атанып келеді. Мысалы&nbsp; Аружан Мүсірәлі 2 жылдан бері цитрустық өсімдіктер өсіруде. Біздің климатқа бейімдеп, үй жағдайында лимон мен ананас өсіруде. Егер сол өнімдер жеміс беретін болса, біз үшін үлкен жаңалық болады. Бүгінде университет тарапынан үлкен қолдау көрсету жұмыстары жүріп жатыр. Әр білім алушы орталықта өсіп тұрған дәрілік, малазықтық өсімдік түрлерімен жеке таныса алады»,- деді&nbsp; Раушан Нұрымова.
</blockquote>
Еске сала кетейік, университетте агробиологиялық орталық 1997 жылдан&nbsp; бастап игеріліп келеді. Орталықтың аумағы 4,4 гектарды қамтиды. Оның құрамына жылыжай шаруашылығы және 4 бөліктен&nbsp; тұратын агробиологиялық учаске кіреді.
<img src="https://kyzylorda-news.kz/wp-content/uploads/2021/09/3-11.jpg" alt="" />
<img src="https://kyzylorda-news.kz/wp-content/uploads/2021/09/2-17.jpg" alt="" />

Қызылордада үй жағдайында лимон мен ананас өсіріп жатқан студенттер бар

<a href="https://kyzylorda-news.kz/">Kyzylorda-news.kz</a>&nbsp; Оқушылар арасында қала бойынша 1 462 бала үйде, 110 бала ауруханада ем қабылдап жатыр.
Алматыда бірінші қыркүйектен бері 89 бала коронавирус инфекциясын жұқтырды. Оның барлығы мектепте емес, отбасы ішінде вирусқа шалдыққан. Бұл туралы қаланың бас санитар дәрігері Жандарбек Бекшин мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>&nbsp;.
“Бірінші қыркүйектен бастап қалада офлайн оқып жатқан 89 оқушы коронавирус инфекциясын жұқтырды. Бұл 62 мектепте болған жағдай. Олар оқыған сыныптар карантинге жіберілді. Себебі бір адамнан инфекция табылса, мектеп емес, сынып карантинге жіберіледі. Сабақ онлайн режимде өтеді. Ал олардың 99%-і мектепте емес, отбасы ішінде жақындарынан инфекция жұқтырған”, – деді Жандарбек Бекшин.
Ал студенттер арасында 6 науқас, 17 байланыста болған адам анықталды. Олар арнайы дайындалған емханаға жатқызылды. Ауру жеңіл түрде өтті.
Соған байланысты қаланың бас санитар дәрігері ата-аналардан барлық санитарлық талапты сақтауды сұрады.
Айта кетері, Алматыда коронавирус жұқтырғандар арасында 31,2%-і 20-39 жас аралығындағы азаматтар, 24%-і – 40-59 жас аралығындағы азаматтар, 23%-і – 60 және одан жоғары жастағы қарт адамдар.

Бірінші қыркүйектен бері 89 бала коронавирус жұқтырды

<a href="https://kyzylorda-news.kz/">Kyzylorda-news.kz</a>. Мемлекеттік мектепте де, жеке білім беру ордасында да хиджаб кию ел заңына қайшы. Бұл туралы ақпарат және қоғамдық даму министрлігіне қарасты дін істері комитетінің төрағасы Ержан Нүкежанов мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “2016 жылы мектеп формасына қатысты білім министрінің бұйрығы шықты. Оған сәйкес, стандарт бекітілген. Азаматтар осы ережені, жалпы заңдарды сақтауға тиіс”, – деді&nbsp;Нүкежанов.
</blockquote>
Ол Конституцияда Қазақстан зайырлы мемлекет екені жазылғанын атап өтті. Мектепке баратындар білім және ғылым министрі бұйрығын, “Діни қызмет және діни бірлестіктер туралы” заң мен Конституцияны сақтауға міндетті.&nbsp;
<blockquote>
 “Мемлекеттік мектепте де, жеке білім беру ордасында да хиджаб кию ел заңына қайшы. Стандарттар барлық мектепке қатысты. Талап орындалмаған жағдай болса, өңірдегі білім басқармасы, комитет немесе министрлікке жүгіну керек”, – деді комитет басшысы.
</blockquote>

Мектепте хиджаб киюге бола ма – дін комитетінің жауабы

<a href="https://kyzylorda-news.kz/">Kyzylorda-news.kz</a>. Қазақстанда магистратура мен докторантураға қабылдау талаптары өзгерді.
Бұл жайында еліміздің Білім және ғылым министрі Асхат Аймағамбетов&nbsp;<a href="https://www.facebook.com/1120704037/posts/10218986983041792/?d=n">Facebook</a>&nbsp;парақшасында мәлім етті.
«Жоғары оқу орындарының қауымдастығы мен Ректорлар кеңесі Тамыз кеңесінің отырысында магистратура мен докторантураға қабылдауға қатысты ұсыныстар енгізген болатын. Егжей-тегжейлі талқылаудан кейін біз қабылдау ережелеріне өзгерістер енгізу туралы шешім қабылдадық. Енді магистратура мен докторантураға қабылдау жылына екі рет өткізіледі.
Яғни, магистратура мен докторантураға түсу емтихандары дәстүрлі түрде тамыз айында және қосымша желтоқсан айында ұйымдастырылады. Осы норма 2021 жылы күшіне енеді деп жоспарлап отырмыз» деп жазады министр.
Оның айтуынша, осы мақсатта Ұлттық тестілеу орталығының қызметкерлері кешенді тестілеу мен түсу емтихандарын қосымша ұйымдастырады.
Құжаттарды қабылдау қараша айында басталады.
«Әлбетте, құжаттары мен емтихандарын тапсыруға, қажетті сертификаттарды алуға үлгермеген азаматтар үшін бұл жағымды жаңалық екені сөзсіз.
Жазғы қабылдау науқаны мен өткізілген емтихандардың қорытындысы бойынша магистратура мен докторантураға арналған білім беру гранттарының артық қалуына байланысты азаматтар осы жылдың желтоқсан айында мемлекеттік гранттарды иелене алады.
Дайындық бағыттары бөлінісінде гранттардың саны мен құжаттарды қабылдаудың нақты мерзімдері туралы ақпарат қосымша жарияланады» деп түйіндеді сөзін Асхат Аймағамбетов.

Қазақстан және Қызылорда облысының жаңалықтары: Білім